1
00:00:05,000 --> 00:00:24,560
Pe ákura suron monó ánon banta kéká bá ánon banta kayo vá man baya ma afová ukhein banta kayo vá minó kanisoro kayo vá manafin baya siaren Yisasin ayantá damuren aviren mo Pairotin amen mino.

2
00:00:24,560 --> 00:00:28,020
Amíkan Pairoti ano véin inaemí,

3
00:00:28,020 --> 00:00:30,680
“Éi Yutan kayoi kin na fono.”

4
00:00:30,680 --> 00:00:33,960
Síkan Yisasi evaránen béin tiamemí,

5
00:00:33,960 --> 00:00:36,600
“Éi mai inka se ono.”

6
00:00:36,600 --> 00:00:44,960
Máa síkan monó ánon banta kéká ano véin aufin kokhon baya fóké kuráden ten mino.

7
00:00:44,960 --> 00:00:50,760
Tiyákan Pairoti ano véin evaránen enádá inaen temí,

8
00:00:50,760 --> 00:00:55,800
“Éi ídá anona evaráne mana vaya sinte fono.

9
00:00:55,800 --> 00:01:02,800
Onano vetí ankan nái máa vaya fókesá éin aufin kurariyan nafino.”

10
00:01:02,800 --> 00:01:12,860
Síkan Yisasi ídaevaránen anona vaya siyaimpin Pairoti ano anú duren kokhon ineine en mino.

11
00:01:12,860 --> 00:01:21,000
Pairoti Ano Ma Yutan Kéká Ayampin Yisasin Amein Baya Ino

12
00:01:21,000 --> 00:01:31,400
Ena ena orana Avo Uantan damú ma erin kamani ano mana vanta karavusi fintena útuanté iyan mino.

13
00:01:31,400 --> 00:01:39,600
Mai minó nanin banta ano ma útuantano ma sein mai vantan útuanté iyan mino.

14
00:01:39,600 --> 00:01:46,500
Máan tiyain bákan mana Barabasin ne sin banta karavusifin baren mino.

15
00:01:46,500 --> 00:01:59,160
Béi manáa vanta kayo vá kaminin má aruvin duváden manáa vanta aruan púdan mai vanbetí ankan má karavusíi uran baren mino.

16
00:01:59,160 --> 00:02:07,880
Mairá banasi ano oriven Pairotin nan pefá ma iyaonaí ono siren oovaren mino.

17
00:02:07,880 --> 00:02:14,440
Oovarákan Pairoti ano evaránen betíi vaya anona siamemí,

18
00:02:14,440 --> 00:02:23,220
“Tiretí ankani anunu ano Yutan kayoi kin na ifá ékun orino van iya rafono.”

19
00:02:23,220 --> 00:02:34,960
Mai véi afova ukhan monóánon banta kéká ano Yisasin inian namu unantáden kópin aviren mo kain baren mino.

20
00:02:34,960 --> 00:02:45,760
Bákan mai monóánon banta kéká ano vanasi arápin antaran betí ankan Pairoti vaípá oovaren temí,

21
00:02:45,760 --> 00:02:51,240
“Barabisin ifá uantan erino Yisasi ída ino,”

22
00:02:51,240 --> 00:02:52,120
sen mino.

23
00:02:52,120 --> 00:02:58,740
Máa síkan Pairoti ano enádá evaránen mai nanin bantará inaemí,

24
00:02:58,740 --> 00:03:08,700
“Mai siretí ankan ma Yutan kayoi kin mino ma siyaona mai vanta séi náisá béin onte rafuno.”

25
00:03:08,700 --> 00:03:13,080
Síkan betí ankan evaránen oovararen temí,

26
00:03:13,080 --> 00:03:15,820
“Béin daa unkamádantá arono.”

27
00:03:15,820 --> 00:03:21,140
Síkan Pairoti ano evaránen enádá betin tiamemí,

28
00:03:21,140 --> 00:03:25,400
“Paravae nái auisá béi ukhavae.”

29
00:03:25,400 --> 00:03:32,340
Máa síkan minó nanin banta ano moéken avádóden oovararen temí,

30
00:03:32,340 --> 00:03:35,160
“Béin daa unkamádantá arono.”

31
00:03:35,160 --> 00:03:59,060
Máa síkan Pairoti ano vanasi arápin amusin amen Barabasin ifá uantan betí baípá oríkan béi Yisasin aruvin banta kayo ayampin kaíkan anan dafiyópóké nare ankáden daa unkamádantá béin arino van amin aviren oren mino.

32
00:03:59,060 --> 00:04:06,460
Aruvin Banta Kéká Ano Ma Yisasin Máká Máká Ein Baya Ino

33
00:04:06,460 --> 00:04:18,520
Mairá aruvin banta kayo ano Yisasi aviren kamanini yafufin má naun ódiyáken minó aruvin banta kayo arakan oren mino.

34
00:04:18,520 --> 00:04:33,640
Oriven betí ankan kini narare au anamun Yisasi untáden ayankun anan póké mana kini kamamo uváden béin ánontá afú uanten mino.

35
00:04:33,640 --> 00:04:42,280
Máan tuantáden betí ankan e mantaven taró uanten máká maáká iyan temí,

36
00:04:42,280 --> 00:04:45,800
“Yutan kayoi ákona kin noe,

37
00:04:45,800 --> 00:04:48,760
en aví daní iyá tiféuno!”

38
00:04:48,760 --> 00:05:03,500
Máa siren betí ankan mana ura yafiyópóké béin ánon ankáden aufen akhare siren aron durafúden matimen béin kampun amusin uanten mino.

39
00:05:03,500 --> 00:05:24,880
Máan turen aruvin banta kayo ano véin ayanavan baya siren intiren mai kini narare au anamun do yaváden beni au anamun evaránen uantáden béin daa unkamádantá arono van aviren oren mino.

40
00:05:24,880 --> 00:05:30,880
Daa Unkamádantá Ma Yisasin Arein Baya Ino

41
00:05:30,880 --> 00:05:59,400
Oríkan Yisasi ída ákona íkan mana Sairini varu fáke vanta Saimoni Arekisanda nú Dufasin nú afóe ano kákan barufá Yerusaremi orono van aasá eríkan aruvin banta kayo ano ákonaen duvun íkan béi Yisasini yaa unkamádan ayaen baren oren mino.

42
00:05:59,400 --> 00:06:07,560
Mairá betí ankan Yisasin aviren mana Korikhota e sin anurá mo khaen mino.

43
00:06:07,560 --> 00:06:14,200
Mai Korikhota e ma siyain beni ana máan mi sikhen mino.

44
00:06:14,200 --> 00:06:17,780
“Ánon Dampa Anuen” tikhen mino.

45
00:06:17,780 --> 00:06:30,980
Mairá avían mo Yisasin kauren betí ankan uvaini vá aí ma kusiantan non má opé uren amíkanmaen béi ifá en mino.

46
00:06:30,980 --> 00:06:51,300
Ifá íkan betí ankan béin daa unkamádantá antópóké aruren beni auí daná daváden betiyan maman kaúden mai auí danáká kati siren ayá nampa ma fákein mano mana yaná mádú en mino.

47
00:06:51,300 --> 00:06:59,740
Dan manápá ifo afápá kamí kamí un kádan áaurá Yisasin daa unkamádantá aren mino.

48
00:06:59,740 --> 00:07:06,740
Mai véin ánontá ben ma kó tiantein baya máa siren uvaremí,

49
00:07:06,740 --> 00:07:09,380
“Yutan Kayoi Kin Mino.”

50
00:07:09,380 --> 00:07:17,000
Máan turen betí ankan umoyan banta kanan má daa unkamádantá aren mino.

51
00:07:17,000 --> 00:07:23,160
Mana véin ayan kurompá aren mana ayan ópá aren en mino.

52
00:07:23,160 --> 00:07:31,180
Banasi ano onóbe enóbe iyáken béin ayanavan baya sen máa semí,

53
00:07:31,180 --> 00:07:32,260
“Odo!

54
00:07:32,260 --> 00:07:40,420
Éi monó namun barákureya kanú manaú damú ana uvaran banta ono.

55
00:07:40,420 --> 00:07:48,260
Máan tin banta ompo éi eyan ayaeya yaa unkamádantáké erano.”

56
00:07:48,260 --> 00:08:00,980
Máa siyákan monó ánon banta kéká bá man baya ma afová ukhein banta kayo vá ano yere oyampá baya sen betiyan máa semí,

57
00:08:00,980 --> 00:08:09,620
“Béi ena nanin banta ana ayaiyan mifo veyan ída kanaíen béi ayainten mino.

58
00:08:09,620 --> 00:08:24,120
Mai Karaisi Isareri kayoi kin mano véi kanaíen daa unkamádan me ampiren erantí tetí ankan ódé béintá mumunan otifanté uno.”

59
00:08:24,120 --> 00:08:36,900
Máa siyákan mai ma yaa unkamádantá béin má manará ma arukhein bantá kanan má ano yere ven nan oyampá baya sen mino.

60
00:08:36,900 --> 00:08:41,420
Yisasi Ma Furein Baya Ino

61
00:08:41,420 --> 00:08:51,000
Bayan áau siya yavanin dun maren titipá ukhan áau inúpá kanú manausí emí.

62
00:08:51,000 --> 00:08:59,320
Áau sitipá ukhen kanú manausí íkan Yisasi avádóden oovaren máa semí,

63
00:08:59,320 --> 00:08:59,920
“Eri,

64
00:08:59,920 --> 00:09:06,300
Eri rama sabáktani” Mai máan mi sikhemí,

65
00:09:06,300 --> 00:09:08,520
“Tenti Tiyarafenu oe!

66
00:09:08,520 --> 00:09:10,680
Tenti Tiyarafenu oe!

67
00:09:10,680 --> 00:09:14,440
Éi fará téin me oyan time fono.”

68
00:09:14,440 --> 00:09:22,920
Máa síkan manáa vanta kayo mairá ádé mantakharen betí ankan mai iniren temí,

69
00:09:22,920 --> 00:09:24,020
“Ineno!

70
00:09:24,020 --> 00:09:29,560
Béi feyan sakhanampa vanta Iraiyan mi ariyan mino.”

71
00:09:29,560 --> 00:09:49,380
Siyáken mana vanta ano savaen mómofen ma einí ukhein daná máden uvaini vá íta non má ma úpí urampin daren ura yankará damuren Yisasi nano van amiren mai vanta ano semí,

72
00:09:49,380 --> 00:09:59,380
“Ave ukhesí oná tifano Iraiya ano véin e aví ádantin ná eranten nafino áa ída fino.”

73
00:09:59,380 --> 00:10:04,800
Máa siyain má Yisasi avádóden bádiyan puren mino.

74
00:10:04,800 --> 00:10:20,400
Puriyain má kákan monó namumpin makákan davaráe kuran ma varé ein mai veyantá danté kafasen barará morúdan maman kankananíen mino.

75
00:10:20,400 --> 00:10:31,200
Aruvin bantai ánon ayafa ano mairá Yisasini ádé mantakharen béini furin ódaren béi semí,

76
00:10:31,200 --> 00:10:35,300
“Pura uron ma vanta Tiyarafenu Anin mino.”

77
00:10:35,300 --> 00:10:41,900
Máa siyákan manáa nanin kayo nentá mantakhen oniyan baren mino.

78
00:10:41,900 --> 00:10:55,180
Mai vetin pintena mana Makdaráke Mariaí inká ena mai Yemisin nú Yosepin nú anóe Maria má ena Saromii.

79
00:10:55,180 --> 00:11:05,960
Mai fefá ma Yisasin ma Karirifá ma vákan maen mai nanin kayo ano avákuren nóken béin aya iyaren mino.

80
00:11:05,960 --> 00:11:12,520
Mai véin má ma Yerusaremí orein nanin kayo yere mairábaren mino.

81
00:11:12,520 --> 00:11:18,660
Yisasin Ma On Aimpin Masí Ein Baya Ino

82
00:11:18,660 --> 00:11:25,600
Inuran Sabati yamú bantéin mai útain damú inúpasíen mino.

83
00:11:25,600 --> 00:11:31,000
Inúpasí íkan Arimatiaké Yosepi ano eren mino.

84
00:11:31,000 --> 00:11:41,560
Béi mai mana kama aví bain kanisoro ifo véin má deren Tiyarafenui Yafisin ave ukharen mino.

85
00:11:41,560 --> 00:11:54,400
Mairá Yosepi orein ída feranto Pairotin avorá o mantaven Yisasin au varen mo masí ino van béintá inaen mino.

86
00:11:54,400 --> 00:11:59,360
Ina íkan Pairoti ano kokhon ineine uren temí,

87
00:11:59,360 --> 00:12:02,500
“Béi inká púken nafino.”

88
00:12:02,500 --> 00:12:09,840
Máa siren aruvin bantai ánon ayafa aran eríkan béintá inaemí,

89
00:12:09,840 --> 00:12:14,500
“Yisasi inká púken nafino áa ída fino.”

90
00:12:14,500 --> 00:12:26,920
Mairá béi máa siren aruvin bantai ánon ayafai vaya iniren Yosepin nan kana ifo véin au varano sen mino.

91
00:12:26,920 --> 00:12:49,740
Máa síkan Yosepi efanten davaráe o miyaní uren béin un maman barará aséden mai efanten davaráefin ukhuren béin mo on aimpin kaúden ain oyirá kákan onámanáo vaé baé uan ataen mino.

92
00:12:49,740 --> 00:13:04,240
Kaiyákan Makdaráke Maria nú Yosesin anóe Maria nú intefasá béin kaiyan nafi siren o váken onen mino.

93
00:13:04,240 --> 00:13:22,480
Sabati yamú kípavíkan Makdaráke Maria má Yemisin anóe Maria má Saromin má kama aunka iyain uveri kayo vetí ankan Yisasin aufá mo féantano van miyaníen mino.

94
00:13:22,480 --> 00:13:31,760
Esé araí in damú pe ákura suron asaréa áau e unin betí ankan masíká oren mino.

95
00:13:31,760 --> 00:13:35,680
Oriyáken betiyan ten orera emí,

96
00:13:35,680 --> 00:13:42,760
“Iye anó masí oyi rákena onámaná do setin eka sintanten nafino.”

97
00:13:42,760 --> 00:13:48,980
Máa siren onákan mai onámaná ída masí oyirá baren mino.

98
00:13:48,980 --> 00:13:56,060
Mai kákan onámaná ifo mana vanta ano fefá do avékakharen mino.

99
00:13:56,060 --> 00:14:13,960
Mai masí aimpin betí ankan ódiven onákan mana fumara ano ayan kurompáayá efanten au anamunuren kumantaré íkan betí ankan ódaren akhokho van en mino.

100
00:14:13,960 --> 00:14:18,440
Akhokho van íkan béi vetí ankan tiamemí,

101
00:14:18,440 --> 00:14:21,880
“Tiretí ankan ída vá akhokho van ono.

102
00:14:21,880 --> 00:14:41,660
Nasaretíke Yisasin onano van ere ompo véin ma yaa unkamádantá ma antópó arukhá ein mai inka véi fe e mantakhen mifo onano véin ma kain báeimpin ída van mino.

103
00:14:41,660 --> 00:14:48,180
Tiretí ankan ore vá beni eyo iyampon kayo vá Pita má mo siameno,

104
00:14:48,180 --> 00:15:01,420
‘Béi ma fefá tiretin tiamikhá einíen tiretin an uanten Karirifá orikhen mifo mai fákena vá tiretí ankan béin o onano.’”