\id 1TH
\h 1 Tesalonaeka
\toc1 1 Tesalonaeka
\mt2 Na 'Etanai Usu-usu Ana Pol Tanaraaui Noni Hinihini Na'i
\mt1 Tesalonaeka
\is Gere Mamaani 'Iniai Bukani
\ip 'A 'ua? Na'i tahingamu 'o 'omesia do ra'i sae ra ha'ata'ini'i
hura'a i baronga goro suri'i tahingadaa'i tana'o 'anai suri'i? Ra'i
baronga he'ua na 'o ha'ata'ini'i tanaraaui geresae amu'i miraaui
do'oramu'i mana asimu'i 'anai suria? Na'i madoraa na 'ia Pol 'a
usuai 'etanai usu-usu ana tanaraaui sae hinihini na'i Tesalonaeka,
'a 'unua tanaraau do 'iraau ra'i ha'ausuringa'i goro tanaraaui noni
hinihini na'i Provens adaau.
\ip 'Ia Pol naasi na taraawa'anai heisoi na'i Tesalonaeka na'i
ruanai 'oha na 'aariha 'anai taroha'iniai Taroha Goro. Na'i
madoraasi 'iraaui sae ahurodo na'i 'omaasi rau taraawa'a
norata'airaaui sae hinihini. 'Ariwou mana heisoi 'a ha'ataaria
hura'a Pol baaniai 'omaa 'iniai magugu adaau 'inia, mia Pol 'a
'adoma'i wetewete di'u mau 'iniraau.
\ip Naasi mia Pol 'a ha'ataaria 'ari a Timoti neina 'iia 'ai matai
waa'i mai taroha 'ini'i taha nara to'o na 'omesi'i ma rongo'i. Naasi
na'i 'oha na 'ia Timoti 'a aho'i 'ari, 'a maani'i mwane mareho tanaa
Pol 'ini'i taha nara to'o na 'omesi'i ma rongo'i. Mana'i mamaani na
haua 'a 'unua do 'iraaui noni hinihini na'i Tesalonaeka rau awa na'i
tahitahi na 'ia God 'ai wa'ewa'e 'inia. Naia naasi 'anai heitaguma'i
hairiu, ma 'anai hasura'ini'i hinihinidaa'i beiai nata nei. Taranai
o'asi ana na 'ia Pol 'a usu-usu 'inia tanaraau ma 'unua do 'iraau
ra'i ha'ausuringa'i goro tanaraau tara'i sae hinihini ro'u na'i
Provens adaau.
\ip Na'i usu-usu ana, 'ia Pol 'a ha'a-wetewete'i 'ado'adodaa'i noni
hinihini na'i Tesalonaeka. Mia Pol 'a ha'ausuriraau ro'u 'ini'i dora
narau maemae'a suri'i, ma aramiai heisonga'i adaau 'iniai aho'i mai
nai haua Jisas. Naasi na'i 'oha na'o 'oha'iniai Tesalonaeka 'oi
sibaniai here na'oi suria 'inia i heiha'auu goro na 'iraaui noni
hinihini na'i Tesalonaeka rau ha'ata'inia neina i'oe ro'u 'oi
ha'ata'iniai taha nai goro tanaraau ro'u i haru nei.
\c 1
\p
\v 1 'Inaua Pol, 'ia Saelas mea Timoti na meu haua i usu-usuni
tana'amou i sae hinihini na'i 'omaa i Tesalonaeka, 'i'amou i sae
ana'ia God Amaga mia Araha aga Jisas Kraest. Meu ha'arahesi mia God
'ai ha'agorohi'amou ma'ai ha'a-awahi'amou goro.
\s 'Iraau Tesalonaeka 'E Ha'ausuringa'i//Tanaraau Tara'i Sae He'ete'i Ro'u
\p
\v 2 Meu ha'atee ha'agorohia taraua God 'ini'amou, ma meu
'adoma'ini'amou tarau suri'i ha'arahesi amee'i.
\v 3 Meu ha'atee ha'agorohia God i Amaga 'ini'i mwani mareho goro
namou haa'i na ha'ata'iniai hinihinimoou mana heita'ahi amoou tanaa.
Meu ha'atee ha'agorohia ro'u 'iniai 'adoma'i heitotori amoou 'iniai
boi aho'i ana Araha aga, Jisas Kraest, na ura baabau.
\p
\v 4 Arai do'ora mana asimee'i na'i Kraest, meu 'iraraa do'ia God 'a
ta'ahi'amou ma 'ome sigihi'amou nana.
\v 5 'Inia 'oha nameu 'ari wou ani 'anai maania tana'amou i Taroha
Goro 'inia Jisas Kraest, ai'a domeu hadahada moi, ma'ata meu
ha'ata'inia tana'amou i mena anai Hi'ona Maea. Ma na'i madoraa meu
taroha'iniai Taroha Goro tana'amou, meu ha'ata'inia ro'u do meu
huunai hinihiniai Taroha Gorosi. Ma na'i 'oha nameu awa bei'amou,
mou 'omesi'i hako i taha na meu haa'i. Meu awa odo-odo 'anai
ha'ausuri'amou 'anai haua o'asi ro'u.
\v 6 Na'i 'ohasi, mougu taraawa'a awa suri'i barongamee'i nara goro
mana baronga goro ana Araha. Rei'uaa nara ha'a-mama'ai'amou ma mou
rongomaata'i di'u, me mou dauai Taroha Goro beiai wa'ewa'e na haa
tana'amou i Hi'ona Maea.
\v 7 Naasi 'i'amou 'e ha'ausuringa'i tanaraaui sae hinihini na'i
Provensi Masidonia ma na'i Provensi Akaea.
\v 8 'Iniai hinihini amoou, 'a ragoi nei nara rongoai Taroha Goro
'inia Araha. Ai'a do na'i moi Provensi Masidonia mana Akaea narau
rongo tarohana do mou hinihinia God, me gaarangi 'iraau hako i sae
hinihini suri'i mwani dora. Naasi 'agu ai'a arari'a ro'u do meigui
maani'amou tanaraau.
\v 9 'Inia 'iraau haariraau rau maani'amou tana'ameua Saelas mea
Timoti, do mou ha'amaoto'ameu na'i 'oha tahamora na meu taha
bei'amou. Ma ro'u do mou rihosi baaniai ha'arahesi'i araaranunu
mamou suriai huunai God na tahitahi.
\v 10 Ma rau maania ro'u tana'ameu do mou totoriai Garena God, 'oha
'ai boi aho'i baaniai aro. Naasi 'ia Jisas, na 'ia God 'a
ha'a-suruta'ea ani baaniai mae. 'E madoraa nai boi mau na'ia God 'ai
ha'a-mama'airaaui noni 'iniai taesu'a ana 'adaau 'ini'i ora-ora'a
adaa'i. Mia Jisas 'ai ha'atahigaau baaniai ha'a-mama'aisi.
\c 2
\s Na Tau'aro Ana Pol Na'i Tesalonaeka
\p
\v 1 Arai do'ora mana asimee'i na'i Kraest, mou 'iraraa 'oha na meu
taha bei'amou tahamora ani, ai'a do meu ha'a-gata'ini'i madoraa
amee'i. 'Inia 'oha meu awa bei'amou, ra rago i mwani maho goro nara
to'o.
\v 2 Mou 'iraraa do ra bwane ha'atee ha'a-ta'ai'ameu mara
ha'a-mama'ai'ameu na'i Pilipae ma meugu boi ani bei'amou na'i
Tesalonaeka. 'Oha meu awa bei'amou na'i Tesalonaeka, ra rago i sae
ra ura bwarasi'ameu ro'u. Ma rei'uaa na o'asi, 'ia God 'a
'a'auhi'ameu do mei abui mamaa'u mameugu taroha'inia hura'a i Taroha
Goro ana tana'amou.
\v 3 'Oha nameu taroha'iniai Taroha Goro tana'amou, meu rabasia do
moi hinihinia. Naasi, na ha'ausuringa'i amee'i ra ai'a pwari'i mameu
ai'a to'ora'i 'ado'ado ta'a'i ma ai'a do meu raba
ha'a-bweubweu'amou.
\p
\v 4 God 'a 'omesi'i tahingamee'i do ra odo-odo, tarana naasi nagu
'u'uri'ameu 'inia 'anai taroha'iniai Taroha Goro tanaraaui noni.
Mana 'oha meu taroha'iniai Taroha Goro, meu ai'a maani'i maho do
'ira i noni rai wa'ewa'e 'ini'i. Ai'a! Meu 'unu'i moi mareho 'ia God
'a 'irisia do mei maani'i. Me 'iia naigui wa'ewa'e 'ini'ameu. 'Iia
moia God na matai aidangisi'i 'ado'adomee'i, 'onaa ra goro ma'ua
ta'aa.
\v 5 Mou 'iraraa i 'oha na meu awa bei'amou, meu ai'a
ha'a-gorogoro'amou do moi haa'i taha nameu rabasi'i. Mana
heitaroha'i nameu haa tana'amou ai'a do 'anai ha'a-bweubweu'amou
'ini'i maho namou to'ora'i. 'Ia God 'a aidangisia do 'i'ameu meu
ai'a haua o'asi!
\v 6-7 'A mwada'u tana'ameu 'anai ha'angoni'i tara'i mwani maho
baani'amou ma'ua 'unua do 'i'amou beiraaui mwani noni rai
ha'a-aneane'ameu, 'inia 'i'ameu ra'i Ha'ataari ana'ia Kraest,
mi'ameu ra'i na'otara amoo'i ro'u. Me na'i 'oha nameu awa bei'amou,
meu ai'a haua o'asi. 'I'ameu meu ta'ahi'amou 'onaai ina na
ta'ahiraaui gare ana'i.
\v 8 Meu ta'ahi'amou di'u! Na tarana naasi na meu taroha'inia 'inia
tana'amou i Taroha Goro, mameu wa'ewa'e 'anai 'a'auhi'amou rei'uaa
namei mae.
\p
\v 9 Mou 'iraraa meu ta'ahi'amou, 'inia na'i 'oha nameu awa bei'amou
'anai taroha'iniai Taroha Goro tana'amou, meu tagora raha ro'u suri
rodo mana dangi 'anai siba nameu ha'a. Neina mei abui ha'ahihi'amou
'anai hori'i tana'ameu i taha nameu 'irisi'i.
\v 10 'Ia God mi'amou hako i sae hinihini, mou 'iraraai tahingameu
bei'amou 'a maea, 'a odo-odo na'i maana God, ma 'a bwarai
ha'ahuni'ameu 'inia ta maho.
\v 11 Mou 'iraraa ro'u doni here nameu haua tana'amou 'a 'onaai here
na ama 'a haua tanaraaui huudi gare ana'i.
\v 12 Meu ha'a-ta'u'u'amou mameu bonga'ini'amou 'anai awasuriai
tahinga na arariraaui noni ana'ia God. 'Iia na 'ome sigihi'amou
'anai ta'i beiraaui nei na marungiraau mana heimarungi ana 'a
hauasa.
\p
\v 13 Nata maho ro'u na meu ha'atee ha'agorohia God tarau 'inia,
naani. 'Oha nameu taraawa'a taroha'ini'i ha'atee ana'ia God
tana'amou, 'i'amou mou hinihini'i. Mamou 'adoma'i o'ani, “Na
ha'atee 'ini ai'a boi baani'i noni, me ra'i huudi ha'atee ana'ia
God!” Ha'amomori! Na ha'atee 'isi 'iaana'ia God, marai 'a'auhi'amou
'anai orisi ha'agorohi'i tahingamoo'i.
\p
\v 14 Arai do'ora mana asimee'i na'i Kraest, na maho na to'i'amou 'a
to'iraau ro'u i noni hinihini ana'ia God na rau awa na'i Jiudea.
'Iniai suria adaaua Jisas Kraest, 'iraau moi noni adaa'i, 'iraaui
Jiu, nara ha'a-mama'airaau. 'A 'onaai ha'a-rongomaata'i'amou adaaui
huudi sae amoo'i na'i kantri amoou.
\v 15 Na'i 'oha bwani, 'iraaui Jiu ra ha'amaesiraau tara'i rarabea
ana'ia God. Ma ro'u rau ha'amaesia Jisas, Araha aga. Me na'i 'ohani,
'iraaui Jiu rau ha'a-hura'ahi'ameu baaniai kantri adaau ma rau
ha'a-mama'ai'ameu. 'Ia God 'a taesu'a 'adaau 'ini'i here ta'aa
adaa'i, miraau ura bwarasiai taha na matai 'a'auhiraaui mwani noni.
\v 16 'Inia na'i 'oha meu tatariori 'anai heitaroha'i tanaraaui nei na
ra ai'a Jiu do neina rai daua nadaaui tahi tarau, 'iraaui Jiu rau
bonasiai ha'a-papaku'ameu. 'Oha rau hau'i here 'isi, 'iraau rau
ha'arago'i ro'u i ora-ora'a adaa'i. Mana ha'a-mama'ai ana God 'ai
auru na'i hungadaau'a 'iniai taesu'a ana 'adaau.
\s 'Adoma'ina Pol 'Adaaui Sae//Na'i Tesalonaeka
\p
\v 17 Arai do'ora mana asimee'i, mou 'iraraa do ra ha'a-hura'ahi'ameu
tara'i sae baaniai 'omaa amoou. 'A ai'a orea ma meu tarisi'amou'a.
Meu bonasia do mei garihi'amou maagu bwara tana'ameu. Rei'uaa na meu
awa ha'atau baani'amou, mi'ameu meu 'adoma'ini'amou moe'a mau.
\v 18 Ha'amomori, 'inau ro'ua Pol, 'a rago i madoraa nau raba ada wou
bei'amou maagu 'ia Saetan na ha'a-bwarasi'ameu hako.
\v 19-20 Me na'i 'oha 'ai boi aho'i Araha aga Jisas Kraest, meigu
wa'ewa'e mamei mari'ori'o 'ini'amou 'iniai hinihinia amoou taraua
Jisas. 'I'ameu mei mari'ori'o 'ini'amou 'onaai sae na dauai
heitahari na'i 'eba hei-ohooho. Ha'amomori! 'I'amou moi
ha'a-wa'ewa'e'ameu di'u mamei mari'ori'o 'ini'amou! Naia nameu raba
ada aho'i 'iniasi bei'amou.
\c 3
\p
\v 1 'I'ameu hako meu 'ado'ado raorao ani 'anai adai'amou, 'inia meu
tarisi'amou di'u maagu bwara tana'ameu. Na'i 'ohasi meu arunga ta'aa
di'u mameu 'adoma'inia do 'i'amiria Saelas mirii awa ga'u moi na'i
'omaa i Atens
\v 2 mamiri ha'ataaria wou ania do'oragaau na'i Kraest, 'ia Timoti.
'Iiasi 'e ta'i sae tatau'aro ro'u ana God neani, me'iia 'a
'a'auhimiria Saelas ro'u 'anai taroha'iniai Taroha Goro 'inia Jisas
Kraest. Miri ha'ataaria wou ania Timoti 'anai ha'a-'o'ori'amou ma
'anai ha'a-'o'ori'i hinihinimoo'i.
\v 3 Miri ha'ataaria wou bei'amou, 'inia 'a gasi rihota'i aho'i tanei
baania God 'ini'i mwani rongomaata'i namou siri suri'i 'ohani. Mou
ga'i 'iraraa moi doni noni rai ha'a-rongomaata'igaau 'iniai
hinihinigaau beia Kraest.
\v 4 'Oha meu awa ga'u bei'amou ani, meu bwane 'u'unua tana'amou do
'ira i noni rai ha'a-mama'aigaau 'iniai suria agaaua Kraest. Ma na'i
'ohani, na maho na meu 'unua ani, 'a to'o'a.
\v 5 'Au 'adoma'i raha di'u 'ini'amou 'oha nau rongoa do 'ira i noni
rau ha'a-rongomaata'i'amou. 'Au 'adoma'inia, gasi 'ia Saetan 'a
ohongi'amou 'anai ha'atehamou. Naasi maho nau ha'ataaria wou 'inia
ania Timoti tana'amou, neina 'iia 'ai boi aho'i maigu'i maania
tanaau 'onaa namou suria maua God. Ma 'onaa 'ia Saetan 'a
ha'atehamou, ma 'a ha'ata'inia doni heitaroha'i nameu haua tana'amou
'inia i Taroha Goro, 'a 'ari pwaranga moi.
\p
\v 6 Ma'ata, na'i 'ohani 'ia Timoti 'a taha aho'i mai beiai taroha na
goro 'ini'amou. Do 'i'amou mou hinihinia maua God mamou ta'ahi'amou
hairiu. 'A 'unua ro'u i 'adoma'i goro namou haua 'ini'ameu, mamou
raba 'omesi'ameu ro'u 'onaai raba 'omesi'amou ameeu.
\p
\v 7 Arai do'ora mana asimee'i na'i Kraest, rei'uaa meu rongomaata'i
mana maho ra bwara tana'ameu 'ini, 'i'ameu meu wa'ewa'e moi. 'Inia
meu 'iraraa do 'i'amou mou ura baabau suri'i hinihinimoo'i.
\v 8 Mara aroi ahumee'i 'inia mou 'u'uria tarau Araha.
\v 9 Madoraa meu ha'arahesi, na ha'atee ha'agorohi ameeu tanaa God 'a
bwarai hako, 'iniai wa'ewa'e ameeu 'ini'amou.
\v 10 Ha'amomori, meu ha'arahesi wetewete suri rodo mana dangi 'anai
boi garihi'amou aho'i. 'Inia meu raba ha'ausuri'amou 'ini'i tara'i
mareho nara matai ha'a-wetewete'i hinihinimoo'i.
\p
\v 11 Hoita, naani ha'arahesi ameeu tanaa God i Amaga mea Araha aga
Jisas Kraest. “God i Ama, meu ha'arahesi dona mwani maho rai 'ari
odo-odo maai mwada'u tana'ameu 'anai garihiraaui noni hinihini na'i
Tesalonaeka.
\v 12 'Oi 'a'auhiraau neina heita'ahi adaau hairiu mei tanaraaui noni
'ai raha di'u ro'u 'onaai heita'ahi ameeu tanaraau.
\v 13 Ma 'onaa rai ta'ahiraau hairiu o'asi, meu ha'arahesi ma'oi
ha'a-'o'ori'i 'adoma'idaa'i marai awa odo-odo. Ma naasi, na'i 'oha
'ia Araha aga 'ia Jisas Kraest 'ai aho'i mai goni beiraaui noni maea
ana'i, 'iraau rai 'onaairaau ro'u. Na'i madoraa rai ura na'i maamu,
i'oe 'oigui 'unua do 'iraau rau odo-odo.”
\p Naasi ha'arahesi ameeu 'ini'amou.
\c 4
\s Na Tahinga 'Ia God 'A Wa'ewa'e 'Inia
\p
\v 1 Arai do'ora mana asimee'i na'i Kraest, 'au raba 'unu'i ro'u
tara'i maho tana'amou. Mou 'iraraa do meu bwane ha'ausuri'amou
'ini'i baronga na 'ia God 'a wa'ewa'e 'ini'i. Ma tari mai dangini,
mamou susuri'i mau. Meu ura 'inia Araha aga Jisas Kraest, ma naasi
meu ha'a-ta'u'u'amou 'anai suri'i moe'a i ha'ausuringa'i 'isi.
\v 2 Mou bwane aidangisi'i ringe nameu 'unu'i tana'amou. Na ringe
'isi ai'a baani'ameu moi, mei baania ro'u Araha aga, 'ia Jisas
Kraest.
\v 3 Nara 'ini maho 'ia God 'a rabasi'i do moi suri'i. 'A 'irisia do
moi awa maea ma mou abui haa'i mwane here wawaasua'a.
\v 4 Moi abui ha'awate'i hei'irisi ta'aa anai abe 'anai na'otaramoou,
ma'ata moi ha'ahou'i abemoo'i mamoi haa'i 'ini'i here nara odo-odo.
\v 5 Abui 'adoma'i sisiwa tarau 'onaai'i sae nara ai'a hinihini.
\v 6 Abui ha'ata'aiai nei na hinihini 'anai mauru beiai urao ana
ma'ua i mwane ana. 'Oha na'o haua o'asi, 'a 'onaa do 'o beriai maho
na'o ai'a to'oraa. Meu bwane ha'abasu'amou wetewete 'ia God 'ai
ha'a-mama'airaau i nei rau haua o'asi.
\v 7-8 'Ia God ai'a 'ome sigihigaau 'anai hau'i mwani here wawaasua'a.
Me 'a 'ome sigihigaau 'anai ha'i noni ana'i neina gai awa maea. Ma
haua tanagaau i Hi'ona Maea 'anai 'a'auhigaau 'anai awa maea. 'Onaa
tei na gagata'iniai ha'ausuringa'isi, 'iia 'a gagata'inia God, ai'a
i noni. 'Inia ni ha'ausuringa'isi 'a boi baania God.
\p
\v 9 'Io, 'a ai'a arari'a ro'u do meigu usu-usu tana'amou do moi
ta'ahi'amou hairiu. 'Inia 'ia God 'a bwane ha'ata'inia tana'amou i
here 'anai ta'ahi'amou hairiu. Ma'ata, rei'uaa na o'asi, mamei gere
usu-usu tana'amou mau 'inia.
\v 10 Meu aidangisia do mou ta'ahiraaui sae hinihini na'i Provens
amoou i Masidonia. Mameu 'irisia doni heita'ahi amoou 'ai raha di'u
ro'u.
\v 11 'Onaai bwane 'unua ameeu tana'amou, moi bonasia awa 'abenga'i,
hau'i odo-odo i tau'aro amoo'i mamoi abui heiheiai tau'aro anai nata
sae.
\v 12 'Onaa moi hau'i maho nameu 'unu'i 'isi, naasi 'iraaui nei rau
ai'a hinihini raigui ha'ahou'amou. Ma ro'u, 'i'amou mou bwa'i
'u'uria'a ta sae 'anai ha'i ha'a tana'amou ma'ua mahoingau.
\s Na Boi Aho'i Ana Jisas Kraest
\p
\v 13 Arai do'ora mana asimee'i na'i Kraest, meu raba
ha'a-aidangisi'amou 'inia i taha nai to'o tanaraaui noni hinihini
nara mae'a. Meu ai'a 'irisia do moi ahutotou 'iniraau 'onaai nei na
ai'a hinihiniai suruta'e aho'i baaniai mae.
\v 14 Gau 'iraraa, 'ia Jisas 'a mae ma suruta'e aho'i. Ma naasi, gau
'iraraa do 'ira i nei ra 'u'uria Jisas na'i marewanani, rai suruta'e
aho'i ro'u baaniai mae. Ma gau hinihinia do'ia God mea Jisas rarui
taragoniraau beirarua.
\v 15-17 'E ta'i maho ro'u na 'unua tana'ameu a Jisas, 'a o'ani. Do 'iia
haaria 'ai dio mai baaniai aro, ma na'i 'ohasi gaigui rongoai
na'ohadaaui enjel, 'ai awara. Ma gaigui rongoa ro'u i trampet ana
God narai 'uhia na rongo 'onaai ahuri. Na'i 'ohasi 'iraau noni
hinihini narau mae'a, raigu tahi aho'i na'i na'o. Murina, 'onaa gau
tahi mau na'i 'ohasi, 'ia God 'ai waigaau hako ara'a suri'i rorodo
'anai heisadoi beia Jisas 'anai awa beia tarau.
\v 18 Na'i 'oha moi ahutotou 'iniai nei hinihini na mae baani'amou,
moi ha'a-'o'ori'amou hairiu 'ini'i mareho 'isi.
\c 5
\s Gai Ha'aagau 'Iniai Boi Ana Araha
\p
\v 1 Arai do'ora mana asimee'i na'i Kraest, ai'a arari do mei 'unua
ro'u tana'amou i 'oha 'ia Araha 'ai aho'i mai.
\v 2 'Inia mou bwane 'iraraa do 'ai boi ta 'oha moi. 'Ai boi 'onaai
sae beriberi na ha'aagau 'anai sirihiai ruma amua na'i rodo 'oha
na'o ai'a 'iraraa.
\v 3 Na'i 'oha maigui boi Araha, 'ira i noni rai ha'atee o'ani,
“Na'i 'ini na ohi ma papaku, 'a bwa'i maho ta'aa nai to'igaau.”
Raigui 'asu'a mai to'iraau'a ta kae ha'a-mama'ai na bwa'i tanei'a
nai hora baania. 'Ai 'onaai urao pote nagu 'asu'ani maesi ahu moi
'anai ha'ahutaai gare.
\p
\v 4 Arai do'ora mana asimee'i, mou ai'a 'onaaira i nei ra awa na'i
kuhi narau ai'a ha'aagau 'anai boi ana Jisas. Naasi mou bwa'i 'asu'a
'oha 'ia Jisas 'ai boi raurau 'onaai sae beriberi na boi na'i 'oha
na ai'a sae nai 'omesia.
\v 5 'I'amou hako mou awa na'i marewa. 'Igaau ai'a awa na'i kuhi
magau ai'a haa'i maho ta'a'i 'onaaira i noni ra awa na'i dora kuhi.
\v 6 Naasi gai abui 'onaai sae na mauru. Ma'ata gai awa ha'aagau mana
'ado'adogaa'i rai odo-odo tarau 'onaai sae na rarai.
\v 7 Na'i rodo tara'i sae ra mauru, ma na'i rodo tara'i sae ra bweu
'ini'i waini bweu.
\v 8 Me'igaau gau ai'a 'onaairaaui sae 'isi. 'Igaau gau awa na'i
marewa. Na tarana naasi nagai 'omesurigaau haarigaau 'inia baaniai
ora-ora'a. Gai 'u'uria God, gai ta'ahia, gai ta'ahira i mwani noni,
magai hinihinia tarau do'ia God 'ai ruhasigaau baaniai ora-ora'a.
'Onaa gai haua o'asi, gai 'onaai sae hehei'oi na nugaai didimaa hau
'anai ha'abwarasiai bwauna ma ho'osiai to'oni baabau 'anai
ha'abwarasiai waiburuna.
\v 9 'Ia God ai'a 'ome sigihigaau 'anai ha'a-mama'aigaau. Ai'a! 'A
'ome sigihigaau do'ia Jisas 'ai ruhasigaau baani'i ora-ora'a agaa'i.
\v 10 'Ia Jisas 'a mae 'inigia do gai awa tarau beia. Na'i 'oha 'ia
Jisas 'ai aho'i mai, rei'uaa nagau tahi mau ma'ua mae'a, 'igaau hako
gai awa tarau beia.
\v 11 Hoita, 'onaa tanei 'ini'amou 'ai ahutotou 'inia ta nei hinihini
na mae, moi ha'a-'o'ori'amou hairiu 'ini'i mareho 'isi 'onaai bwane
hahaua amoou.
\s Ha'atee Ha'ahako Ana'ia Pol
\p
\v 12 Arai do'ora mana asimee'i na'i Kraest, meu ha'a-ta'u'u'amou
'anai 'adoma'i ha'ahouraaui na'otara amoo'i narau tatau'aro bei'amou
'anai ha'a-'o'ori'amou na'i tahingamoou beia Kraest.
\v 13 Moi 'adoma'i ha'ahouraau mamoi ta'ahiraau 'ini tatau'aro adaau.
Moi awa goni goro ma abu 'ini ringei heihoa.
\p
\v 14 Arai do'ora mana asimee'i, meu ha'a-ta'u'u'amou ro'u 'anai
ha'atee wetewete tanaraaui nei rau awa ahuare moi nara ai'a raba
tau'aro. Moi ha'a-'o'ori'i 'adoma'ida i nei ra mamaa'u mara
wairikoi'a i 'adoma'idi 'ini'i taraani maho moi. Moi 'a'auhira i nei
ra bwarai 'a'auhiraau haariraau, mamoi ahumaratanoa beiraaui mwani
noni hako.
\v 15 'Onaa 'e nei na haai ta'aa tanaa tanei 'ini'amou, 'ai abui su'ua
aho'i 'iniai ta'aa. Mamoi bonasia do moi haa'i mwani maho goro
tana'amou hairiu mei tanaraau ro'u i mwani noni.
\p
\v 16 Moi wa'ewa'e waiori,
\v 17 mamoi ha'arahesi tarau,
\v 18 ma rei'uaa ra hehe'ua i maho tana'amou, moi ha'atee ha'agorohia
taraua God 'inia. Na'isi maho 'ia God na 'irisi'i do moi haa'i,
suria 'i'amou 'iaana'ia Kraest.
\p
\v 19 'Io, moi abui ha'abwarasiai Hi'ona Maea 'anai tatau'aro suri'i
tahingamoo'i.
\v 20 'Onaa tei nai 'unua do 'a raba ha'arangasi'i hura'a i 'ado'ado
ana'ia God, moi abui rongo agoheta'iniai taha rai 'unua.
\v 21 Ma na'i na'o, moi wai'ado'ado goro ga'u suriai taha rai 'unua.
Ma 'onaa ra odo-odo, ma naasi moigui hinihini'i.
\v 22 Ma'ata moi nugasi'i mwani maho ta'a'i.
\p
\v 23 Meu ha'arahesi tanaa Godi ni gooroha, 'ai ha'amaea'i
tahingamoo'i maai bwarai ha'ahuni'amou 'inia ta maho tari 'oha nai
aho'i mai Araha aga, 'ia Jisas Kraest.
\v 24 'Ia God na 'ome sigihi'amou, me 'iia moi nai 'a'auhi'amou 'anai
awa odo-odo. 'Inia 'iia 'a haua tarau i taha na 'unua.
\p
\v 25 Arai do'ora mana asimee'i, moi ha'arahesi 'a'auhi'ameu ro'u.
\p
\v 26 'Oha moi awa goni noni hinihini 'onaai ta'i ruruha, moi here
beiai nata nei
 \f † \fr 5:26 \fk Here beiai nata nei: \ft Na'i ha'atee ni Grik ra 'unua “ngooniai nata nei beiai heingooni ni heita'ahi.” Na'i madoraasi, 'iraau sae mwane rau ngooniai babanai nata sae mwane, miraaui urao rau ngooniai babanai nata urao 'anai ha'ata'iniai heita'ahi tanaraau hairiu. 'A ta'isada beiai herehere agaau na'i 'ohanisi 'oha gau here beiai nata nei. \f*
 'anai ha'ata'iniai
heita'ahi amoou tana'amou hairiu.
\p
\v 27 'Inaua Pol 'au 'unua tana'amou na'i atana Araha aga Jisas
Kraest, 'anai 'oha'iniai usu-usuni tanaraaui noni hinihini na'i
'isi.
\p
\v 28 'Io, mameu ha'arahesi 'ini'amou, 'ia Araha aga Jisas Kraest 'ai
ha'agorohi'amou hako.