\id 1PE
\h 1 Pita
\toc1 1 Pita
\mt2 Na 'Etanai Usu-usu Ana
\mt1 Pita
\is Gere Mamaani 'Iniai Bukani
\ip Ra'i mwane here he'ete'i hairiu nagau matai raharaha ara'a
suri'i. Gau raha ara'a na'i abegaa'i tari 'oha gau maua. Gau raha
ara'a suri'i aidangigaa'i na'i 'oha nagau ha'ausuringa'ini'i mareho
na'i skuru. Nata mareho na 'igaau gau matai raha ro'u ara'a na'iei,
naasi suri'i tahitahi agaa'i beia Kraest.
\ip Na'i usu-usu naanisi 'ia Pita 'a 'unua do 'anai raha ara'a
suri'i tahitahi agaa'i beia Kraest 'e mareho nagai bonasia 'onaa gau
raba ara'a mai wetewete na'iei. 'A 'onaai ha'ausuringa'i na'i skuru.
'Onaa 'o bwa'i bona, 'a bwara do'oi here goro na'iei. 'I awa maea
mana ano-ano, naasi mareho narai 'a'auhiai sae 'anai raha ara'a na'i
tahitahi ana beia Kraest. Na'i usu-usuni 'ia Pita 'a maani'i hura'ai
tara'i herehere 'anai awa maea, ma 'anai ano-ano.
\ip 'Ia Pita 'e ta'i 'iniraaui rongoiusuri ana'ia Jisas me 'iia 'e
ta'i na'otara ororiu beiraaui noni hinihini na'i 'ohai na'o. 'Ia
Pita 'a usuai usu-usuni tanaraaui noni hinihini 'anai ha'abasuraau
'iniraaui sae narai norata'airaau 'iniai suria adaaua Kraest. 'A
'unua tanaraau dorai ura wetewete na'i hinihinidaa'i neina 'ia God
'ai wa'ewa'e 'iniraau. 'Ia Pita 'a 'irisia do 'iraaui noni hinihini
rai raha ara'a goro suri'i tahitahi adaa'i beia Kraest maraigui siri
suri'i mareho ta'a'i na 'iraaui maerongadaa'i rai haa'i tanaraau.
'Igaau gau ga'i matai bonasiai haua ro'u moi heresi 'anai raha ara'a
suri'i tahitahi agaa'i beia Kraest.
\ip Na'i 'oha na'oi 'oha'i na'i 'etanai buka ana Pita 'oi matai
sadoi'i here narai 'a'auhi'o 'anai raha ara'a na'i tahitahi amua
beia Kraest.
\c 1
\p
\v 1 'Inaua Pita, Ha'ataari ana Jisas Kraest, nau usu-usu tana'amou
sae ana'ia God namou awa 'onaai mahuara 'adarara suriai Provens na'i
Pontas, Galesia, Kapadosia, Eisia ma na'i Bitinia.
\v 2 'Ia Godi Ama na 'ome sigihi'amou suria i hei'irisina. 'A
ha'amaea'amou 'iniai Hi'ona Maea ana, neina moi araisuria Jisas
Kraest mana tahingamoo'i rai wadiwadi 'iniai 'abuna. Mau ha'arahesi
mia God 'ai huunai ha'agorohi'amou mai ha'a-awahi'amou goro.
\s 'Adoma'i Heimamasi
\p
\v 3 Gaau ha'a-aneanea God Amana Araha aga Jisas Kraest. 'Iniai ahu
ta'ahigia di'u ana, 'a haua tanagiai tahinga haoru 'iniai
ha'a-suruta'ea ana Jisas Kraest baaniai mae. 'Iniai haua o'asi ana
nagau to'oraa 'iniai 'adoma'i heimamasi
\v 4 'anai daa'i mwani mareho goro na'ia God na nuga'i tanaraaui sae
ana'i. 'A nuga'i tana'amou na'i aro, dora ra bwa'i matai ngabo ma'ua
ta'a'i ma'ua ai'a'i.
\v 5 Me 'iniai hinihinia amooua God, 'iia 'ai taatahi bwarasi'amou
'iniai mena ana tari dangi hahako, 'oha nai ha'atahi'amou.
\p
\v 6 Moi wa'ewa'e 'iniai mahosi, rei'uaa moi ahutotou ta gere madoraa
'ini'i mwani rongomaata'i he'ete'i hairiu namou siri suri'i na'i
'ohani.
\v 7 Mareho 'isi ra'i maho moi 'anai ha'a-ohoohoai hinihinimoou beia
Kraest, 'onaa namou hinihini ha'a-momori ma'ua ai'a. 'A 'onaai 'oha
'iraau sae ra raangiai gol 'iniai raoraohanai 'eu 'anai
ha'agata'inia i do'o baania ma 'anai sadoia ha'a-momori 'onaa 'e gol
ha'a-momori ma'ua ai'a. Ma rei'uaa ra haua o'asi, i gol 'a bwa'i
matai awa tarau. Mea God 'a 'adoma'inia dona hinihinimoou 'e maho na
ororiu di'ua i gol. Ma 'onaa rai sadoia domou hinihini ha'a-momori,
ma naasi, na'i 'oha nai aho'i maia Jisas Kraest, 'iia 'ai
ha'a-aneane'amou mai ha'ahou'amou.
\v 8 Rei'uaa namou ai'a re'ia, 'i'amou mou ta'ahia mamou hinihinia.
Ma na'i 'ohani, na wa'ewa'e namou haua, 'e wa'ewa'e na raha di'u na
bwarai sadoia ta ha'atee goro 'anai huunai ha'arangasia goro hura'a,
\v 9 'iniai daua amoou i tahi tarau suriai hinihinia namou haa.
\p
\v 10 Naia na tahi tarausi na 'iraaui Rarabea na'i 'oha bwani, rau
ha'atee rarabeanga'inia do'ia God 'ai banea tana'amou. Ma rei'uaa na
o'asi, rau ai'a aidangisia mora maraugu siba suriai huunai 'ado'ado
anai mahosi.
\v 11 Mana Hi'ona Maea ana Kraest na awa beiraau 'a ha'arangasia do'ia
Kraest 'ai siri na'i rongomaata'i raha maigu dauai mena mana raraha.
Ma naasi ra bonasiai sadoiai 'oha he'ua mai he'ua i to'o nai haua.
\v 12 'Ia God 'a ha'ata'inia tanaraaui Rarabea do tau'aro adaau ai'a
do 'anai 'a'auhiraau haariraau, me 'anai 'a'auhi'amou. Ma na'i
'ohani, tara'i sae rau maaniai Taroha Goro tana'amou 'iniai mena
anai Hi'ona Maea na'ia God 'a ha'ataaria dio mai baaniai aro. Ma
'ohani na mamaani narau haua, 'a ta'isada beiai mamaani ra haua
Rarabea. Maho 'isi, ra'i mareho na 'iraaui enjel rau raba
aidangisi'i ro'u.
\s Ha'ata'u'u 'Anai Awa Maea
\p
\v 13 Hoita naasi, moi ha'aagau suri'i tahingamoo'i 'anai suria Araha
mamoi 'omesuri'amou haarimoou ro'u baaniai ora-ora'a. Moi 'adoma'i
heimamasi 'iniai tahi tarau na'ia God 'ai banea tana'amou na'i 'oha
nai aho'i maia Jisas Kraest.
\v 14 Moi araisuria God mamoigu abu haa'i'a i here ra ta'a'i namou
haa'i ga'u na'i na'o, 'oha mou ai'a aidangisia maua God.
\v 15 'Ia God na 'ome sigihi'amou, 'a maea. Ma naasi, 'i'amou moi awa
maea ro'u suri'i mwani maho moi haa'i.
\v 16 Naia na Usu-usu Maea 'a ha'arangasia 'inia o'ani, “Moi awa
maea, 'inia 'inau 'au maea.”
 \f † \fr 1:16 \ft Levitikas 11:45; 19:2; 20:7 \f*
\p
\v 17 'Ia God, namou 'unua 'inia Ama na'i 'oha mou ha'arahesi, 'a
bwa'i 'adoma'i ha'a-ororiua ta noni 'oha nai hiiriraau 'ini'i taha
ra haa'i. Naasi moi ha'ahoua God na'i madoraa mou awa mau na'i
marewanani.
\v 18 'Inia 'ia God 'a hori'amou 'anai ruhasi'amou baaniai tahinga
ta'aa namou ha'ausuringa'inia baaniraaui wauwa amoo'i. Na tahingasi
'a bwarai 'a'auhi'amou. 'Ia God 'a ai'a hori'amou 'iniai maho na
matai ta'aa moi 'onaai silva ma'ua gol,
\v 19 ma'ata 'iniai huunai 'abuna Kraest na hauasa. 'Ia Kraest 'a
'onaai garei siip nara ha'aagaua 'anai suu ho'asi na ai'a ta ta'i
maho nai ta'aa beia.
\v 20 Na'i na'o mia God 'agu ha'apwa'araai marewana, 'a bwane 'ome
sigihia Kraest do'ai ruhasi'amou. Mia Kraest ai'a boi mau na'i
marewana 'ohasi. 'Agu boi na'i 'ohani, gaarangiai hahakonai dangi,
neina 'ai 'a'auhi'amou.
\v 21 'Iniai maho na haua Jisas, 'i'amou mou hinihinia God. 'Iia na
ha'a-suruta'ea Jisas Kraest baaniai mae ma ha'a-ororiua. Na tarana
naasi, na hinihini mana 'u'uri amoou 'ai awa tarau beia God 'anai
haua o'asi ro'u tana'amou.
\p
\v 22 'Iniai araisuria amooui huunai ha'ausuringa'i 'inia Jisas
Kraest, 'i'amou mou ha'a-wadiwadi'i haarimooui tahingamoo'i mamou
ta'ahiraau ro'u i noni hinihini. Naasi, moi ta'ahi'amou hairiu tarau
'ini'i tahingamoo'i hako.
\v 23 Mou matai haua o'asi, 'inia mou to'oraai tahinga haoru. Ma ai'a
do mou to'oraai tahinga haorusi baanira i noni nara matai mae moi,
ma'ata baaniai ha'atee ana God. Na ha'ateesi 'a tahitahi ma 'ai awa
tarau.
\v 24 'Inia na Usu-usu Maea 'a 'unua o'ani,
\q “'Iraau hakoi sae ra 'onaa moi raraaua,
\q2 mana mwani mareho goro ra hahaa'i ra 'onaai moi tagai raraaua.
\q Raraaua na matai maria mana taga na matai anunu.
\q2
\v 25 Ma'ata, ha'atee ana Araha God 'a awa tarau.”
 \f † \fr 1:24-25 \ft Aisaea 40:6-8 \f*
\p Mana ha'ateesi, naasi Taroha Goro nara bwane taroha'inia
tana'amou.
\c 2
\s 'Ia Kraest 'A 'Onaai Hau Na Ororiu
\p
\v 1 'Iniai o'asi ana, moi nugasi'i mwani maho ta'a'i. Moi abui
pwapwaari'i ma'ua here 'onaa domou goro. Abui kakawa 'ome ma'ua
ha'atee ha'ata'aiai nata nei.
\v 2-3 'I'amou mou aidangisiai gorohana Araha. Naasi, moi
hioronga'iniai ha'atee ana God neina moi raha ara'a mamoi tahi
'inia. Moi 'onaai'i gare mweramwera'a ra hioronga'iniai suuhiai wai
susu haoru.
\p
\v 4 Moi boi beia Araha. 'Iia na haua tanagia i tahi tarau. 'A 'onaai
hau na 'iraaui sae tatau'aro ruma rau 'itaa. Ma'ata, 'ia God 'a
'adoma'i ha'a-ororiua di'u ma 'ome sigihia.
\v 5 'I'amou namou dauai tahi tarau, mou 'onaai'i hau na 'ia God na
hau'i 'anai ha'a-urasiai ruma anai Hi'ona Maea, naasi heisoi. Me
'iniai hei'a'auhi ana Jisas Kraest, moi tau'aro 'onaai piriisi maea
nara tau'aro beiai mena anai Hi'ona Maea mara wate'i mareho tanaa
God 'anai ha'a-wa'ewa'ea.
\v 6 Na Usu-usu Maea 'a o'ani,
\q “'Au 'ome sigihiai hau na ororiu di'u
\q2 mau ha'a-urasia na'i di'unai bani na'i 'omaa i Saeon.
\q 'Iatei nai nugaa i 'u'uri ana beia, 'agu bwa'i ahutotou'a ta 'oha
'iniai 'u'uri na nugaa beiasi.”
 \f † \fr 2:6 \ft Aisaea 28:16 \f*
\p
\v 7 'A ororiu di'u i hausi tana'amoui nei mou hinihini.
\p Mei tanaraaui nei ra ai'a hinihini,
\q “Na hau 'iraaui sae tatau'aro ruma narau 'itaa,
\q2 naia nagu 'onaai hau na ororiu di'u.”
 \f † \fr 2:7 \ft Psalm 118:22 \f*
\m
\v 8 Mana nata dora na'i Usu-usu Maea 'a o'ani ro'u,
\q “Naani hau ra matai tora'i ei
\q2 mara matai agusu 'inia.”
 \f † \fr 2:8 \ft Aisaea 8:14 \f*
\m Ra agusu, 'inia ra ai'a araisuriai ha'atee ana God. Ra agusu,
'inia 'ia God 'a bwane 'adoma'inia mau mai do 'ai to'o o'asi.
\p
\v 9 Ma'ata 'i'amou 'e ruruhai sae na'ia God na 'ome sigihia. 'I'amou
ra'i Piriisi anai Mwaeraha God ma ra'i noni maea ana'i. 'A wai'amou
hura'a baaniai kuhi na'i dora marewa ma 'ome sigihi'amou domoi
taroha'iniai mwani mareho goro na haa'i.
\v 10 Na'i na'o ga'u, 'i'amou ai'a noni ana'ia God, mia God ai'a ahu
ta'ahi'amou. Ma na'i 'ohani, 'i'amou ra'i noni ana'i na 'ia God 'a
ahu ta'ahi'amou.
\s Awa 'Onaai Sae Tatau'aro Ana God
\p
\v 11 Arai do'ora mana asigu'i, 'i'amou mou awa moi 'onaai mahuara
na'i marewanani, suria ni marewanani 'a ai'a huunai 'omaa amoou. Wai
ha'atee wetewete tana'amou! Moi abu suriai hei'irisi ta'aa anai abe
hasi'o, 'iniai abe hasi'o 'a hei'oi bwarasiai tahinga haoru namou
awa iei na'i 'ohani.
\v 12 Moi haa'i here nara goro neina 'oha 'iraaui sae ahurodo rai
ha'ahuni'amou, rai re'i'i mareho goro mou haa'i marai ha'atee
ha'agorohia God na'i 'oha nai aho'i mai.
\p
\v 13 'Anai ha'a-wa'ewa'ea Araha, moi araisuriraaui nei ra
marungi'amou, ororiu Mwaeraha ni Rom, 'inia 'iia na bwauodo na
ororiu di'u na'i marewana.
\v 14 Moi araisuriraau ro'u Primia, 'inia neiraausi sae tatau'aro anai
mwaeraha 'anai ha'a-mama'ai'i sae ta'a'i mana ha'atee ha'agorohi'i
sae goro.
\v 15 'Ia God 'a 'irisia domoi haa'i mwani here goro maai ha'apapaku'i
ha'atee bweubweu'a adaa'i sae bweu nara ha'atee ha'a-ta'ai'amou.
\v 16 Bwa'i ta sae nai matai ha'a-abu'amou 'inia ta maho namoi raba
haua, 'inia 'ia Kraest 'a bwane ha'a-dadara'amou. Ma'ata rei'uaa na
o'asi, me 'i'amou ra'i sae tatau'aro mau ana'ia God. Mou gasi
'adoma'inia domou dadara'a mamoigu haa'i here nara ai'a odo-odo.
\v 17 Moi ha'ahouraau hakoi mwani sae mamoi ha'ata'iniai huunai
heita'ahi tanaraaui nei ra hinihini. Moi 'adoma'i ha'ahoua God mamoi
ha'ahouai Mwaeraha 'anai Rom.
\s Kraest 'A Ha'ata'iniai Huunai Herehere//'Iniai Rongomaata'i Ana
\p
\v 18 'I'amou slev, moi awa na'i bahaidi heimarungi adaa'i na'otara
amoo'i mamoi ha'ahouraau tarau. Moi haua o'asi, rei'uaa tara'i nei
'iniraau ra goro 'ini'amou ma tara'i nei ra here ha'a-ta'ai'amou.
\v 19 'Inia 'onaa na 'oi siri na'i rongomaata'i na ai'a arari dorai
haua tana'o, ma 'o mwa'emwa'e 'iniai 'adoma'inia amua tarau a God,
'ia God 'ai ha'agorohi'o.
\v 20 'A 'ua? 'O 'adoma'inia do'oi dauai ha'agorohi 'onaa ra
ha'a-mama'ai'o 'iniai maho ta'aa na'o haa ma'o mwa'emwa'e moi 'inia?
'Ia God 'ai matai ha'agorohi'o moi 'onaa ra ha'a-mama'ai'o 'iniai
maho goro na'o haua ma'o mwa'emwa'e 'inia.
\v 21 Naia na 'ia God 'a soi'amou 'inia, 'inia 'ia Kraest 'a
rongomaata'i 'ini'amou ma ha'ata'inia tana'amoui huunai herehere
domoi suria.
\v 22 'Ia Kraest 'a ai'a haua ta ora-ora'a ma ai'a ta pwari'i nai
hura'a na'i ngoona ta 'oha.
\v 23 Na'i 'oha ra ha'atee ha'ata'aia, 'a ai'a heiarami 'inia ta
ha'atee ta'aa. 'Oha na rongomaata'i 'a ai'a 'unua do'ai su'ua aho'i
ta'aa. 'A 'u'uria moia God, 'ia mo'o na hihiiri odo-odo.
\v 24 'Ia Kraest 'a waa'i ora-ora'a agaa'i na'i abena 'oha na hano
'anai mae na'i dadaahoro, neina gai nugasiai ora-ora'a magai awa
odo-odo. 'Ini'i maara na'i abena nagaugu goro aho'i 'inia.
\v 25 Na'i na'o, 'i'amou mou 'onaaia ga'u i siip na teha ma na'i
'ohani mou aho'i mai beia mo'o na 'omesuri'amou ma taguma'ini'i
tahingamoo'i.
\c 3
\s 'Iraaui Sae Ha'iwai
\p
\v 1 'A o'asi ro'u, 'i'amou urao ha'iwai moi awa bahaidi heimarungi
adaa'i mwane amoo'i. 'Inia 'onaa tara'i nei 'iniraau rau ai'a
hinihiniai ha'atee ana God, marai matai rihosi 'anai hinihini 'iniai
re'ia adaa'i barongamoo'i nara goro. 'A ai'a ororiu domoi hadahada,
\v 2 'inia 'iraau rai re'i'i barongamoo'i ra goro mana ha'ahoua
amooua God.
\v 3 'A ai'a taraa ororiu domoi haa'i here do rai 'ome goro 'iniai
abemoo'i, 'onaai hiohio warihu mana nuga ringi wadowado suri'i
karingamoo'i mana ha'aha'abii mana ho'o bwana 'ome goro.
\v 4 Ma'ata 'a ororiu di'u doni barongamoo'i rai 'ome goro. Moi awa
manego, 'inia naasi maho na matai awa tarau mana maho na'ia God 'a
'adoma'i ha'a-ororiua.
\v 5 Na tahingadaa'i urao nara awa maea na'i 'oha bwani ra 'ome goro
o'asi. Rau 'u'uria God marau awa bahaidi heimarungi adaa'i mwane
adaa'i. Naasi maho nara haua 'anai ha'a-'omegororaau haariraau.
\v 6 'Ia Sera 'a haua o'asi. 'A araisuri'i taha na 'unu'ia Ebraham ma
ha'abwauodoa. Ma naasi 'onaa moi abu mamaa'u mamoi haa'i mwani
mareho goro, mou ga'i 'onaai huunai gare ana'i.
\p
\v 7 'I'amou ro'u i saemwane ha'iwai, 'oha mou awa bei'i urao amoo'i
moi aidangisia do 'iraaui urao ra ai'a wetewete 'onaaimou. Moi
ha'ahouraau, 'inia 'i'amou hako moi daua baania God i ta'i bane,
naasi i tahi tarau. 'Onaa moi haua o'asi, 'a bwa'i ta maho nai
ha'abwarasi'i ha'arahesi amoo'i.
\s Rongomaata'i 'Iniai Hauai Mareho Na Goro
\p
\v 8 Maho hahako, 'au rabasia domoi to'oraai ta'i 'ado'ado mamoi ahu
ta'ahi'amou hairiu ro'u. Moi ta'ahi'amou hairiu 'onaai ha'ido'orada,
moi hauai here na goro tanaraaui noni hako, ma ro'u, moi
ha'a-anoano'amou haari'amou.
\v 9 Moi abu su'uai ta'aa 'iniai ta'aa ma'ua su'uai ha'atee ta'aa
'iniai ha'atee ta'aa. Ma'ata, moi ha'angonia God maai
ha'agorohiraau. 'Inia 'oha na'ia God na soi'amou 'anai suria, 'a
durua do'ai ha'agorohi'amou ro'u.
\v 10 'A 'onaai ha'arangasia anai Usu-usu Maea o'ani,
\q “'Onaa 'o raba to'oraai tahinga goro
\q2 mana awa wa'ewa'e tarau,
\q 'oi abu haa'i ha'atee ta'a'i
\q2 mana pwapwaari'i.
\q
\v 11 'Oi nugasi'i baronga ta'a'i
\q2 ma'oi haa'i mwani baronga goro.
\q 'Oi bonasia do'oi awa goro beiraaui mwani noni hako.
\q
\v 12 'Inia 'ia Araha 'a wanasiraaui nei ra odo-odo
\q2 ma rongo'i ha'arahesi adaa'i,
\q2 ma ura bwarasiraaui nei ra ta'a'i.”
 \f † \fr 3:10-12 \ft Psalm 34:12-16 \f*
\p
\v 13 'Iatei nai matai ha'a-ta'ai'amou 'onaa moi bonasiai haa'i here
goro? Bwa'i ta sae'a!
\v 14 Ma'ata 'onaa moi rongomaata'i 'ini'i haa'i amoo'i maho odo-odo
mamou ga'i wa'ewa'e! Moi abu ta'aabemoou ma'ua mamaa'usiraaui sae,
\v 15 ma'ata moi ha'abwauodoa Kraest suri'i tahingamoo'i. Moi awa
ha'aagau 'anai arami'i heisonga'i adaa'i nei rai songa'ini'amou
'iniai taranai taha namou hinihinia 'inia Jisas.
\v 16 Ma'ata moi haua beiai ahu manego mana ha'ahou. Moi awasuri'i
taha namou aidangisi'i do ra odo-odo neina 'oha rai ha'atee
ha'a-ta'ai'amou 'ini'i maho goro mou haa'i 'iniai suria amooua
Kraest, rai ninima 'ini'i maho rau 'unu'i.
\v 17 'Onaa 'ia God 'a 'irisia dogai rongomaata'i 'ini'i mareho goro
gau haa'i, 'a goro baania rongomaata'i 'ini'i mareho ta'a'i nagau
haa'i.
\v 18 Mou wai'ado'ado ga'u suria Kraest. 'Iia 'a odo-odo na'i maana
God maagu mae 'ini'i ora-ora'a agaa'i sae nagau ai'a odo-odo.
Rei'uaa na ai'a ora-ora'a, 'a mae 'inigiai noni ora-ora'a 'anai
wai'agaau 'ari beia God. 'A mae ha'atai moi, ma 'agu bwa'i mae'a
ro'u 'ini'i ora-ora'a agaa'i ta 'oha. Ra ha'amaesiai abena, ma'ata
ni aungana 'a tahi mau.
\v 19 Mana aungana 'a 'ari heitaroha'i tanaraaui aunga na'i
rumaniho'o.
\v 20 Aunga 'isi, naasi aungadaa'i nei ra hairaesi beia God na'i 'oha
na mamasiraau dorai rihosi, na'i madoraa na'ia Noa 'a tagoraai haka.
Ma'e waira waru moi narau ta'e na'i haka narau tahi 'iniai wai.
\v 21 Mana waisi 'e heiha'auu 'iniai wai na'i bwareomaea na matai
ha'atahigaau baaniai ha'a-mama'ai. Mana bwareomaea, 'a ai'a 'anai
dori gaasinga'ini'i do'o ni abe, me'e duruduru gau haua tanaa God
'anai awasuri'i taha nagau aidangisi'i do ra odo-odo. Ma gau matai
to'oraai tahi 'inia, suriai suruta'e aho'i ana Jisas Kraest baaniai
mae.
\v 22 'Ia Jisas 'a ara'ai aro ma awa na'i aba odona Godi Ama ma
marungi'i enjel hako mana mwani maho ra heimarungi mara mena na'i
aro.
\c 4
\s Tahinga Haoru Adaa'i Noni Hinihini
\p
\v 1 'Ia Kraest 'a rongomaata'i na'i madoraa na awa na'i marewanani.
Naasi 'i'amou ro'u moi ha'aagau 'anai rongomaata'i 'onaai
rongomaata'i na haua. 'Inia 'onaa moi rongomaata'i, 'a ha'ata'inia
do 'i'amou mou nugasiai ora-ora'a.
\v 2 Ma naasi, 'oha mou awa na'i marewanani, moi nugasi'i
hei'irisimoo'i mamoi suriai maho na'ia God na 'irisia.
\v 3 Na tahingamoou na'i na'o mou awa 'onaai sae ahurodo. Na'i
'ohasi, mou to'ora'i mwani hei'irisi ta'a'i, mou awa 'onaai mwamwaa,
mamou hano hairiu 'anai gonogono mana haa'i kae ngaugoni 'anai haa'i
here wawaasua'a. Mana mareho na ta'aa di'u na mou haua, mou
ha'arahesi'i araaranunu.
\v 4 Na'i 'ohani 'iraaui nei namou ta'i haa'i ga'u i here o'asi, 'a
kakui ahudaau 'iniai taranai taha namougu nugasi'i 'ini'i here 'isi
marau 'unu'unu'amou 'iniai haa amoou o'asi.
\v 5 Ma'ata 'iraau rai ha'arangasi'i haariraau taha rau haa'i tanaa
God na ha'aagau 'anai hiiriraaui nei ra tahi mana nei nara bwani
mae.
\v 6 'Inia naia nara taroha'inia ro'u 'iniai Taroha Goro tanaraaui
nei ra bwani mae,
 \f † \fr 4:6 \fk Nei ra bwane mae: \ft 'Iraau noni hinihini nara rongoa i Taroha Goro ga'u maraugu mae, ma'ua 'iraau sae nara mae na'i ahe raha na'i madoraa anai Noa. \f*
 neina rei'uaa abedaa'i ra
mae 'onaai mae nai to'o beigaau hakoi noni, ni aungadaa'i rai tahi
marai awa beia God.
\p
\v 7 Na hahakodi mwani maho 'a gaarangi'a. Naasi moi 'omesuri'amou
haarimoou baaniai ora-ora'a mamoi wai'ado'ado goro neina mou matai
ha'arahesi goro.
\v 8 Maho na ororiu di'u, moi ha'ata'iniai heita'ahi na raha
tana'amou hairiu, 'iniai heita'ahi 'a matai 'a'auhi'o 'anai 'adoma'i
nugasiai ora-ora'a nara haua tana'o.
\v 9 Moi ha'amaoto'amou hairiu suri'i ruma amoo'i mamoi haua beiai
wa'ewa'e mana ahu mwa'emwa'e.
\v 10 'Adonai nei 'ini'amou 'ia God 'a banea tanaa 'e ta'i 'ini'i bane
ana'i. Naasi moi tau'aro goro 'ini'i bane 'isi 'anai 'a'auhiraaui
noni mamoi haua suriai ringe na odo-odo.
\v 11 'Iraaui nei ra to'oraai bane 'anai heitaroha'i, rai heitaroha'i
'onaai nei na taroha'ini'i huudi ha'atee ana'ia God. 'Iraaui nei
nara to'oraai bane 'anai hei'a'auhi, rai 'a'auhiraaui noni 'iniai
wetewete na haua God tanaraau. Neina 'ado mareho namoi haa'i, rai
ha'atee ha'agorohia God 'inia, na'i atana Jisas Kraest. Gau magai
ha'a-aneanea God, 'ia mo'o na to'o mena tarau tarau. Amen.
\s Rongomaata'i 'Iniai Ha'i Sae Hinihini
\p
\v 12 Arai do'ora mana asigu'i beia Kraest, moi abu heimwaota'i 'iniai
siri amoou na'i rongomaata'i, 'onaa do'e maho haoru tana'amou.
Mahosi 'a boi 'ana moi ha'a-ohooho'amou.
\v 13 Ma'ata moi wa'ewa'e, 'inia mou rongomaata'i 'onaai rongomaata'i
ana Kraest, neina wa'ewa'e amoou 'ai honu aharau na'i 'oha na 'ia
Kraest 'ai boi aho'i beiai mena mana raraha.
\v 14 Mou ga'i wa'ewa'e 'onaa ra here ha'a-ta'ai'amou 'iniai suria
amooua Kraest, 'inia 'a ha'ata'i dona Hi'ona Maea ana God na mena
di'u, 'a awa bei'amou.
\v 15 'Inau 'au ai'a raba rongoa domou rongomaata'i 'iniai heingahu
ma'ua beri, ma'ua raesiai ringe, ma'ua hadahada rago siri suri'i
mareho na ai'a ta'isada do'oi 'a'au siriwou suri'i.
\v 16 Ma 'onaa mou rongomaata'i 'inia 'i'amou ra'i sae ana'ia Kraest,
ma ai'a ta'isada domoi ninima 'iniai mahosi. Mou ga'i ha'atee
ha'agorohia God, 'inia 'i'amou ra'i sae ana'ia Kraest.
\p
\v 17 Na madoraa anai taraawa'a hihiiri 'a boi'a, miraaui sae tahamora
na 'ia God nai hiiriraau, 'iraaui sae ana'ia God. Ma 'onaa 'ai
taraawa'a beigaau, 'ai 'ome he'ua 'oha nai hako beiraaui nei ra ai'a
hinihiniai Taroha Goro ana God?
\v 18 Mana Usu-usu Maea 'a o'ani,
\q “'Onaa 'a ai'a mwada'u tanaraaui sae goro 'anai dauai tahi
tarau,
\q2 ma'ai he'ua tanaraaui ahurodo narau ora-ora'a?”
 \f † \fr 4:18 \ft Proverbs 11:31 \f*
\p
\v 19 Naasi 'onaa namou rongomaata'i suriai hei'irisina God, mamoi abu
agoheta'i haa'i maho ra goro. Moi 'u'uria taraua God na
ha'a-pwa'ara'amou, 'iia 'a bwa'i kakua'amou mwada'u.
\c 5
\s Tanaraaui Na'otara Na'i Heisoi
\p
\v 1 Tana'amou na'otara na'i heisoi, 'au raba ha'a-ta'u'u'amou. 'Inau
'e na'otara na'i heisoi ro'u, mau 'omesia 'iniai maagu i
rongomaata'i ana Kraest. Ma na'i maadi mwani noni hako rai ha'ahouau
ro'u bei'amou na'i 'oha na 'ia Kraest 'ai aho'i mai.
\v 2 Naasi wai ha'a-ta'u'u'amou. 'Onaai 'omesuri siip na
'omesuriraaui siip ana'i, 'i'amou ro'u moi 'omesuriraaui nei na 'ia
God na ha'a-'u'uri'amou 'iniraau. Moi haua ha'i mwa'emwa'e 'inia
naasi hei'irisina God. Moi abu haua 'onaai nei nara ha'a-'usu'usua
moi. 'A ai'a goro domoi hauai tau'arosi 'iniai 'irisia moi amoou i
ha'a. Moi abui haua o'asi, ma'ata moi haua 'inia mou raba
'a'auhiraaui nei ra ha'a-'u'uri'amou 'iniraau.
\v 3 Moi abu na'otara beiai ha'a-ta'eta'e, ma'ata na'otara 'anai
ha'ata'iniai huunai herehere tanaraau 'anai suria.
\v 4 Ma na'i 'oha nai aho'i mai 'i bwauododaaui 'omesuri siip, 'ai
tahari'amou 'iniai heitahari na bwa'i ai'aa mwada'u. Moi awa tarau
na'i rarahana ma na'i gorohana.
\s Tanaraaui Sae Mwane Haoru
\p
\v 5 'I'amoui sae mwane haoru, moi awa bahaidi heimarungi adaa'i sae
wari amoo'i, mamoi ha'a-anoano'amou haarimoou 'anai 'a'auhi'amou
hairiu. 'Iniai Usu-usu Maea 'a 'unua o'ani, “'Ia God 'a 'itaai nei
na ha'aba'o, ma 'a'auhiai nei na ha'a-anoanoa haaria.”
 \f † \fr 5:5 \ft Proverbs 3:34 \f*
\v 6 Moi ha'a-anoano'amou haarimoou 'anai awa na'i rimana God na mena
di'u, neina 'ia God 'ai ha'a-hauasa'amou na'i 'oha nai tari madoraa
'ana.
\v 7 Moi nuga'i hako tanaa God i taha ra torakoke 'ini'i
'adoma'imoo'i, 'inia 'iia na 'adoma'ini'amou ma 'omesuri'amou.
\p
\v 8 Moi awa ha'aagau tarau mamoi 'ome'ome goro. 'Iniai maerongamoou,
'ia Saetan, 'a hano hairiu 'anai 'ome'ome 'inia tanei do'ai
ha'ata'aia. 'A 'onaai laeon na ngurunguru 'anai raba haingau.
\v 9 Moi ura baabau na'i hinihinimoou mamoi ura bwarasia. 'Inia
'onaai 'iraraa amoou, ai'a do 'i'amou moi, me'iraau ro'u i sae
hinihini hako na'i marewana narau siri ro'u na'i raronai
rongomaata'i o'asi.
\v 10 'Ia God 'ai 'a'auhigaau tarau 'iniai heita'ahi ana na raha di'u.
Ma 'iniai hagu amoou beia Kraest, 'a soi'amou 'anai to'oraa beia
Kraest i ha'ahou mana ha'aasaa na matai awa tarau. Ma na'i 'oha
naigui hakoi rongomaata'i namou haua 'ohani suriai gere madoraa, 'ia
God 'ai ha'a-haoru'i tahingamoo'i, 'ai ha'ababauai hinihinimoou
ma'ai ha'a-wetewete'i 'adoma'imoo'i.
\v 11 Gaau magai ha'aasaa God 'iniai mena ana na awa tarau tarau.
Amen.
\s Mareho Hahako
\p
\v 12 'Ia Saelas na 'a'auhiau 'anai usuai gere usu-usuni. 'Iia 'e
do'oragaau na'i Kraest nau 'u'uria. Hoita, 'inau 'au hauai usu-usuni
'anai ha'a-wetewete'i hinihinimoo'i ma 'anai ha'arangasia tana'amou
dona mwani mareho nau usu'i na'i usu-usuni rai ha'ata'iniai huunai
goro na haa God 'ini'amou. Naasi, moi ura baabau na'i gorohana God.
\p
\v 13 Ha'atee wa'ewa'e tana'amou baaniraaui sae hinihini na'i Babilon
na 'ia God 'a 'ome sigihiraau 'onaai 'ome sigihi'amou ro'u ana. 'Ia
Mak 'a haua ro'u i ha'atee wa'ewa'e ana tana'amou. 'Iiasi 'a 'onaa
do'e gare agua.
\v 14 Moi ha'atee wa'ewa'e tana'amou hairiu beiai haingoni ni
heita'ahi ni heisoi.
\p 'Io, mau ha'arahesi mia God 'ai ha'a-awahi'amou goro, 'i'amou
hakoi nei ana'ia Kraest.