\id JHN
\h SAN JUAN
\toc1 San Juan
\toc2 Jn
\mt1 SAN JUAN
\mt2 Jesucristoen huadak huaʼa Juana oʼmanigmadoyaʼuyate.
\c 1
\s Diosen huaʼa huamanaʼeri Jesucristo oʼsiʼpoe̱ʼuyate.
\p
\v 1 Aʼnennanada huakkuruda katepiʼ ehueʼ o̱ʼu̱yate. Cristo
Diosen huaʼa huamanaʼeri o̱ʼi̱kaʼuyate. Cristo Diosda
o̱ʼi̱kaʼ.
\v 2 Aʼnennada huakkuruda katepiʼ ehueʼ o̱ʼu̱yate, Cristo
Diosen huaʼa huamanaʼeri o̱ʼi̱kaʼuyate. Diosere
o̱ʼi̱kaʼuyate.
\v 3 Cristoa ayaʼtada oʼtiahuayikaʼnig oʼkaʼuyate. Konig Diosa
oʼpaknok ayaʼtada oʼkaʼuyate. Noga̱ sigpiʼ kahueʼ o̱ʼu̱yate.
Cristoayoʼda ayaʼtada oʼkaʼuyate.
\v 4 Cristo Diosen huaʼa oʼnoikaʼpo huamanoeaʼeri
o̱ʼi̱kaʼuyate. Cristokon konig Diosen Huakjey o̱ʼe̱. Huakjey
oʼtaʼtepo katetapiʼ tiahuaydik o̱ʼe̱ne, katetapiʼ nopo̱e̱ʼdik
o̱ʼe̱ne. Konigti Cristo konig Diosen huakjey o̱ʼe̱po Diostaj
moknopo̱e̱a̱ʼne kenpaʼti Diosen buttida huaʼataj
moknopo̱e̱a̱ʼne. Katepiʼ huadak Diosa oʼpak
moʼnopo̱e̱a̱ʼne.
\v 5 In huadariyo aratbut Diostaj pakhueʼ o̱ʼnikaʼ. Dakhueaʼ
o̱gkikaʼ. Konig sikki̱re̱gyo̱ o̱ʼnepo Diostaj oknopo̱e̱hueʼ
o̱ʼnikaʼ kenpaʼti Diostaj pakhueʼ o̱ʼnikaʼ. Cristo Diosen
Huakjey in huadari aratbuttaj oʼtaʼtepo Diostaj
moknopo̱e̱a̱ʼne. Diosen buttida huaʼataj moknopo̱e̱a̱ʼne.
Katepiʼ huadak Diosa oʼpak moʼnopo̱e̱a̱ʼne. Huakkaʼda
Cristotaj eknopo̱e̱ʼtaʼ pakhueʼ o̱ʼnepo kenpaʼda e̱ʼentaʼ
onʼpaknigʼa enhueʼdik o̱ʼnuyate. Cristo konig Diosen
Huakjey ʼuruaʼda oʼbataʼteonhuahuikaʼpo
oʼmaknopoeanhuahuikaʼapo.
\p
\v 6,7 Diosa aratbuttaj Juan Bautistataj oʼmataʼmonaʼuyate.
Cristotaj kamanbatiaʼpakikeʼpo Juantaj oʼmataʼmonaʼuyate.
Aratbuta Cristotaj kanoknopo̱e̱ʼpo Juana Cristotaj
oʼmanbatiaʼpakuyate. Diosen Huakjeytaj oʼmanbatiaʼpakuyate.
\v 8 Juan Diosen Huakjey ehueʼ o̱ʼu̱yate. Cristonayo Huakjey
o̱ʼu̱yate. Cristotaj kamanbatiaʼpakeʼpo Juantaj
oʼmataʼmonaʼuyate.
\v 9 Ken Juana Cristotaj oʼmanbatiaʼpakonhuahuaʼdepo indariyo
hua̱e̱ʼeriomeytaj Diosen Huakjeytaj oʼmanoki̱a̱ʼuyate.
Cristo Diosen hueretda Huakjeytaj aʼmaknopo̱e̱a̱yaʼpo
oʼbahuatiakdepo, Juana oʼmanbatiaʼpakuyate.
\p
\v 10 Cristo ayaʼ huadari oʼkaʼuyate. Huadariyo o̱ʼi̱kaʼnigʼa
huadari hua̱e̱ʼeria oknopo̱e̱hueʼ o̱ʼnuyate. Huadari
huakaʼeritaj oknopo̱e̱hueʼ o̱ʼnuyate.
\v 11 Diosyaʼ oʼtiakdepo keʼnen judío aratbutere
oʼnoikaʼuynigʼa Jesucristotaj eʼnigpe̱e̱taʼ pakhueʼ
o̱ʼnuyate. Aʼnenda Diosa judío aratbuten adhueaʼpaneʼtaj
oʼbaktieʼeaʼuyatenigʼa Cristo Diosen huaʼataj eknopo̱e̱ʼtaʼ
pakhueʼ o̱ʼnuyate. Judío aratbuta eknopo̱e̱ʼtaʼ pakhueʼ
o̱ʼnuyate.
\v 12 Sueʼada Jesucristotaj eʼnigpe̱i̱kaʼtaʼ onʼpakpo
oʼnoknopo̱e̱ʼuyate. Oʼnoknopo̱e̱po Diosen onʼsiʼpoe̱po
Diosensiʼpo o̱ʼneʼuyate.
\v 13 Kenaʼpo ettoneʼyaʼ onʼsiʼpopakmeʼtenok Diosensiʼpo
ehueʼ o̱ʼne. Kenaʼpo ettoneʼpiʼ huabokerekpiʼ eʼsiʼpopaktaʼ
onʼpakikaʼnok Diosensiʼpo ehueʼ o̱ʼne. Diosen Cristotaj
oʼnoknopo̱e̱po Diosen onʼsiʼpoe̱po Diosensiʼpo o̱ʼnuyate.
\p
\v 14 Ken Diosen huaʼa huamanaʼeri Jesucristo Diosere
o̱ʼunhuahuikaʼdepo nogok Diosa oʼpakpo oʼsiʼpoe̱ʼuyate.
Oroʼomeyere o̱ʼi̱kaʼuy. Jesucristo kenyoʼda huadaknanada
oʼkikaʼuy. Huakkaʼnanada diʼ oʼmaikaʼuy. Huakkaʼnanada
oʼmatinepahuikaʼpo buttida oaʼikaʼuy. Diosonig ʼuruaʼnanada
oʼkikaʼnok konigti Dios
o̱ʼe̱po Diosyaʼ oʼtiakpo Diosen
Huasiʼpo o̱ʼe̱ oʼnopo̱e̱ne.
\p
\v 15 —‍Aʼti Cristoa oʼtiakde. Keʼna oroʼen huairi o̱ʼe̱. Do
huairi ehueʼ i̱jje̱y. Do siʼpopakhued i̱jje̱po, Jesús Diosere
o̱ʼu̱yate. Ikkenda kentaj ijmanbatiaʼpakmey. —‍Juana
oʼmanbatiaʼpakuyate.
\p
\v 16 Jesucristo huakkaʼda diʼ moʼe̱ne. Oroʼtaj nogda nogda
dakaʼ moʼmatinoeaʼne.
\v 17 Aʼnennada Diosen huaʼa Moisésa moʼnigmadoyaʼuyate.
Jesucristonayo diʼnanada boʼhuatiakpo moʼmatinepahuiʼpo,
oroʼomeytaj dakhueaʼ eʼkaʼ aʼmanopoʼyareayaʼpo
boʼhuatiakuyate.
\v 18 Beʼapiʼ aratbuta Diostaj tiahuayhueʼ o̱ʼnikaʼuyate.
Cristonayo Diosensiʼpo o̱ʼe̱po diʼ oʼmaunhuahuikaʼpo Diosere
o̱ʼunhuahuikaʼpo konig Dios o̱ʼe̱ ʼuruaʼnanada oʼnopo̱e̱po
oroʼomeytaj ʼuruaʼnanada moknopo̱e̱a̱ʼuyne.
\s Juan bautiza huakaʼeria Jesucristotaj ʼuruda oʼmanbatiaʼpakuyate.
\r (Mt. 3.11-12; Mr. 1.7-8; Lc. 3.15-17)
\p
\v 19 Judío aratbut huairi Jerusalén huakkaʼ jakyo o̱ʼnuyate.
Juante onʼmataʼmonaʼuyate. Sacerdote Diostaj
huanigtionaʼpakeritaj onʼmataʼmonaʼuyate. Kenpaʼti levita
aratbuttaj
Juante onʼmataʼmonaʼuyate. Onʼhuatiakdepo,
\p —‍Nogbokerektida ijtaʼmonaʼapoy. Cristo ijtaʼmonaʼapoy.
Diosa oʼmanaʼuyate. ¿Menpaʼ Cristoda i̱ʼe̱? Kenda monaʼ.
—‍Juantaj oʼnonaʼuyate.
\p
\v 20 —‍Ehueʼ, Cristo ehueʼ i̱jje̱y. Diosa Cristotaj
oʼtaʼmonaʼapo. Oroʼtaj kabatihuapokeʼpo oʼtaʼmonaʼapo.
—‍Juana buttida oʼmanaʼuy. Dahueʼda oaʼuy.
\p
\v 21 —‍¿Beʼa i̱ʼe̱? ¿Elíaskudak Diosen huamanbatiaʼpakeri
menpaʼ i̱ʼe̱? —‍Oʼnonaʼuyate.
\p —‍Elíaskudak ehueʼ i̱jje̱y. —‍Juana oʼmanaʼuyate.
\p —‍¿Diosen huamanbatiaʼpakeritaj oʼmaboy, menpaʼ Diosen
huamanbatiaʼpakeri i̱ʼe̱? —‍Oʼnonaʼpo,
\p —‍Ehueʼ i̱jje̱y. —‍Juana oʼmanaʼuyate.
\p
\v 22 —‍Judío huairi oroʼtaj boʼtaʼmonaʼne kenomeytaj
batiaʼpakdik o̱ʼe̱nok, “¿Beʼa i̱ʼe̱?” “¿Kenda
kamanbatiaʼpakikeʼpo beʼa metaʼmonuy?” —‍Sacerdoteomeya̱
onteʼti Juantaj oʼnonaʼuy.
\p
\v 23 —‍Aratbut ehueʼ e̱ʼi̱kaʼyo nogtiaʼda ʼuttaʼda ijmanay,
Dios Huairi oʼtiakde, yanʼnopoʼkoreaʼ. Keʼna oʼtiakdepo
kentaj aʼnigpe̱e̱yaʼpo, yanʼnopoʼkoreaʼ. Aknopo̱e̱yaʼpo
yanʼnopoʼkoreaʼ. Ijmanaʼikaʼpo. Konig Isaíaskudak Apag
Diosen huaʼa huamanbatiaʼpakeria oaʼuyate. —‍Juana
oʼmanaʼuyate.
\p
\v 24 Kenomeya̱ Juantaj onʼhuatiakpo, fariseo aratbut huairia
onʼtaʼmonaʼuyatenok.
\p
\v 25 —‍¿O̱ʼna Cristo ehueʼ e̱e̱ʼnayo, Elíaskudak ehueʼ
e̱e̱ʼnayo, Apag Diosen huaʼa huamanbatiaʼpakeri ehueʼ
e̱e̱ʼnayo, menaʼpo bautiza imagkikaʼ? —‍Fariseoa Juantaj
oʼnonaʼuyate. (Diosa Juantaj oʼmataʼmonaʼuyate. Kenda
fariseo huairiomeya̱ oknopo̱e̱hueʼ o̱ʼnikaʼ.)
\p
\v 26 —‍Do hue̱ʼe̱ya̱ bautiza ijkikay. Nogtida huabokerek
opudenbayo o̱ʼe̱de, Cristo o̱ʼe̱de. Kentaj o̱ki̱a̱hueʼ moʼe̱.
\v 27 Diosa oʼtaʼmonaʼnok aʼti Cristoa Diosen huaʼa
oʼmanmadikaʼapo. Keʼna huadakda o̱ʼe̱nok keʼnen huanabaʼ
ehueʼdik i̱jje̱y, ijnopo̱e̱y. —‍Juana oʼmanaʼuyate.
\p
\v 28 Juan bautiza oʼkaʼpo, Betábara huakkaʼ jakyo kenpaʼ
onʼbatiaʼpakuyate. Betábara jak Jordánhue̱ akodpen o̱ʼe̱.
\s Jesús konig Diosen ovejasiʼponig o̱ʼe̱, Juana oʼmanaʼuyate.
\p
\v 29 Emeʼte Jesús Juantaj oʼhuahuaʼnok Jesús eʼtiakte Juana
oʼtiahuaydepo, oʼmanaʼpakpo,
\p —‍Ken huabokerek konig Apag Diosen Ovejasiʼponig o̱ʼe̱.
Konig aratbuten dakhueaʼ eʼkaʼ kabakkahueʼpo oveja ʼuhuataj
onʼnigarakikaʼ konigti aratbuten dakhueaʼ eʼkaʼ
aʼbakkahueayaʼpo Jesús konig ovejasiʼpo ʼuhua
oʼmanigbueyapo.
\v 30 Kentaj ijbatiaʼpakmey, “Jesústaj Diosa oʼtaʼmonaʼnok
aʼti Diosen huaʼa oʼmanmadikaʼapo. Oroʼen huairi o̱ʼe̱. Do
huairi ehueʼ i̱hue̱y. Do siʼpopakhued e̱e̱ʼte Jesús Diosere
o̱ʼu̱yate.” Ijbatiaʼpakmey.
\v 31 Ikken Jesústaj doʼhua o̱ki̱a̱hued e̱ʼe̱a̱da, Israel
aratbuta Cristotaj kanoknopo̱e̱ʼpo hue̱ʼe̱ya̱ bautiza
oʼnogkaʼpone. —‍Juana oʼmanaʼuy.
\p
\v 32-34 Juana kenpaʼti oʼmanaʼpo,
\p —‍Ken huabokerekte Apag Diosen Noki̱re̱g oʼkotpo,
o̱ʼi̱kaʼpo, kentaj boʼtiahuayapone. Ken Huabokereka Diosen
Noki̱re̱g aratbuttaj oʼmanopoʼto̱e̱a̱po. Diosa menameʼne.
Hue̱ʼe̱ya̱ bautiza kamagkeʼpo, Diosa meʼtaʼmonaʼuyne. Ken
kurudya̱ʼ Diosen Noki̱re̱g konig tukkuʼ oʼkotpo, Jesúste
oʼkotpo, ke̱yo̱ Diosen Noki̱re̱g o̱ʼi̱kaʼ. Kenda
ijtiahuaymey. Kenaʼpo “Jesús Diosen Huasiʼpo o̱ʼe̱.”
Ijjay. —‍Juana oʼmanaʼuyate.
\s Jesúsen huakkuruda huanigpe̱i̱kaʼeria onʼtahuaʼuyate.
\p
\v 35 Ken onteʼti emeʼte Juanere oroʼ Juanen bottaʼ
huanigpe̱i̱kaʼeriere oʼbopo,
\v 36 Jesús eʼpokte Juana oʼtiahuayʼuy. Jesústaj oʼtiahuaypo,
\p —‍Yanʼtiahuayʼ. Ken huabokerek konig Apag Diosen
Ovejasiʼponig o̱ʼe̱. —‍Juana monaʼuyne.
\v 37 Oroʼ Juanen bottaʼ huanigpe̱i̱kaʼeri oʼpe̱e̱dey,
Jesústaj oʼtahuaʼuy.
\v 38 Jesús boʼhuakorudpo, eʼtaʼtiakte oroʼtaj
boʼtiahuaymeʼne.
\p —‍¿Kate boʼpak? —‍Monameʼne.
\p —‍Ontaj eʼnigpe̱i̱kaʼtaʼ oʼpaki. ¿Meyo̱ i̱ʼi̱kaʼ,
Huamanmadikaʼeri? —‍Onaʼuy.
\p
\v 39 —‍Yanʼtiak. Yanʼtiahuayʼ. —‍Jesúsa monameʼne. Ken
oʼhuaʼpo, ke̱yo̱ e̱ʼhua̱i̱kaʼyo oʼtiahuayʼuy. Kenmeʼnoete
Jesúsere o̱ʼunhuaʼmey. Baysikmon o̱ʼe̱meʼ.
\p
\v 40 Doere Andrésere Juantaj oʼnigpe̱e̱ʼuy. Andrés Simón
Pedroen huamaʼbuy o̱ʼe̱po Jesústaj oʼtahuaʼuy.
\v 41 I̱dada keʼnen huamaʼbuya Simóntaj oʼukpo, oʼhuahuayʼuy.
Simóntaj oʼhuahuaydepo onaʼpo,
\p —‍Cristotaj oʼhuahuayi, “Cristotaj ijtaʼmonaʼapoy.”
Aʼnenda Diosa oaʼuyatenig. —‍Andrésa onaʼuy—‍. Jesús Diosen
Cristo o̱ʼe̱.
\p
\v 42 Jesúste oʼtotiakuyate. Jesúsa oʼtiahuaypo,
\p —‍Simón i̱ʼe̱, Jonásensiʼpo i̱ʼe̱. O̱ʼnen huadik Cefas
o̱ʼe̱a̱po. —‍Onaʼuy. Cefas konigdik Pedro o̱ʼe̱. Cefas huiddik
o̱ʼe̱. Ken konig Cefas Jesústaj huaboaʼda
oʼnigpe̱i̱kaʼuyate.
\s Felipe Natanaelere konig Jesúsen huanigpe̱i̱kaʼeri huaboaʼda onʼtahuaʼuyate.
\p
\v 43 Emeʼte Jesús Galilea huadariyo aʼhuayaʼ oʼnopo̱e̱po
Felipetaj oʼhuahuayʼuy. Oʼhuahuaydepo,
\p —‍Menigpe̱i̱kaʼpo betaʼhuaikaʼ. —‍Jesúsa onaʼuy.
\p
\v 44 Ken Felipe huakkaʼ jak Betsaidayo o̱ʼi̱kaʼuyate. Ke̱yo̱ti
Andrésere Pedroere o̱ʼnikaʼuyate.
\v 45 Ken Felipe Jesústaj oʼpe̱e̱depo oknopo̱e̱depo
Natanaeltaj oʼukdepo oʼhuahuayʼuy.
\p —‍Diosa huabokerek moʼnigtaʼmonaʼapone. Moiséskudak ken
huabokerektaj oʼtimadoyaʼuyate. Konigti Apag Diosen huaʼa
huamanbatiaʼpakeri onʼtimadoyaʼuyate. Ken huabokerek
boʼhuatiakdenok oʼhuahuaydene. Keʼnendik Jesús o̱ʼe̱.
Joséensiʼpo o̱ʼe̱. Nazaret huakkaʼ jak hua̱e̱ʼeri o̱ʼe̱.
—‍Felipea Natanaeltaj onaʼuy.
\p
\v 46 —‍Nazaret huakkaʼ jakyo huadakda aratbut ehueʼ o̱ʼnikaʼ.
—‍Natanaela oaʼuy.
\p —‍Yatiak. Yatiahuayʼ. —‍Felipea onaʼuy.
\p
\v 47 Natanael eʼtiakdeʼte Jesúsa Natanaeltaj oʼtiahuaypo,
\p —‍Yanʼtiahuayʼ. Keʼna oʼtiakdepo hueretda Israel aratbut
o̱ʼe̱. Keʼna ʼurunopoʼda da ahueʼ o̱ʼi̱kaʼ. Buttida oʼikaʼ.
—‍Jesúsa oʼhuaaʼuy.
\p
\v 48 Natanael Jesústaj oʼpe̱e̱depo,
\p —‍¿Menpaʼpiʼ doʼtaj o̱ki̱e̱ʼ? —‍Natanaela onaʼuy.
\p —‍Felipea ontaj totiakhued higuera o̱hue̱ytaʼpote onʼtaj
ijtiahuayi. —‍Jesúsa Natanaeltaj onaʼuy.
\p
\v 49 Natanaela Jesústaj oʼpe̱e̱depo oknoponpo,
\p —‍Diosen Huasiʼpo i̱ʼe̱. Israel aratbuten Huairi i̱ʼe̱,
Huamanmadikaʼeri. —‍Natanaela onaʼuy.
\p
\v 50 —‍Kenaʼpo higuera o̱hue̱ytaʼpote on tiakhued e̱e̱ʼte
ontaj ijtiahuayi. Kenda onaʼnok doʼtaj oknoponne. Kennayo
sigda ijjay. Doʼtaj nogi̱ti meknopo̱e̱ʼpo teynanada
ijkaʼapoy. —‍Jesúsa Natanaeltaj onaʼpo,
\p
\v 51 —‍Do Huabokerek i̱jje̱po, Diosyaʼ ijtiakuy, Diosa
meʼtaʼmonaʼuyne. Kurud Diosenbayaʼ ekhuikeʼ doʼte Diosen
huataʼmoneria mentihuarakatupo menokbehuikonapone,
opudomeya̱ boʼtiahuayapone, buttida ijjay. —‍Jesúsa
oʼmanaʼuyate.
\c 2
\s Galilea huadaribayo huakkaʼ jakyaʼ eʼto̱e̱pak aypo o̱ʼu̱yate.
\p
\v 1,2 Oroʼ huanigpe̱i̱kaʼeri Jesúsere Galilea huadaribayo
oʼhuaʼuy. Bottaʼaʼ eksik o̱ʼu̱y. “Eʼto̱e̱pak aypo
oʼbatobapeapoy, Caná huakkaʼ jakyaʼ oʼbatobapeapoy. O̱ʼnen
huanigpe̱i̱kaʼeriere yatiak.” Aypo huairia Jesústaj onaʼnok
Jesúsere oʼhuaʼuy. Jesúsen hua̱ye̱kon o̱ʼu̱y.
\v 3 Huakkaʼnada o̱ʼnepo eʼto̱e̱pak aypo onʼbapeʼpo ayaʼda
vino onʼmaiʼdepo,
\p —‍Vino ehueʼ o̱ʼe̱. —‍Jesúsen hua̱ye̱a̱ onaʼ, Jesústaj
onaʼuy.
\p
\v 4 —‍¿Menapo doʼtaj onaʼ, nag? Ken konig ʼuruda
ijkikaʼapoy, aratbuttaj tihuapokhued i̱jje̱y. —‍Jesúsa onaʼuy.
\p
\v 5 —‍Katepiʼ Jesúsa ya̱gkaʼ enaʼte ya̱gkaʼ. —‍Ken
Jesúsen hua̱ye̱a̱ vino hua̱hue̱tohuaʼeritaj oʼmanaʼuyate.
\p
\v 6 Huaboroʼ huidkoso judío aratbut onʼto̱i̱kaʼpo, hue̱ʼe̱y
onjoypo onʼbakoyoʼikaʼ. Kenda ekaʼnayo Diostaj ʼuruʼnopoʼda
o̱ʼe̱a̱poy oʼnoknopo̱i̱kaʼuy, ken. Kenteda seis boroʼhuidkoso
oʼbahuadʼuy.
\p
\v 7 —‍Huidkosoyo hue̱ʼe̱y yaʼnonjoiʼ. —‍Jesúsa oʼmanaʼuy.
\p Huakkaʼ hue̱ʼe̱y onʼtoegonpo hueda̱ʼda oʼnonjoyʼuyate.
Onʼoydepo,
\p
\v 8 —‍Huidkosoyo sigpiʼ yatoegpo. Aypo huairite yanʼtohuaʼ.
—‍Jesúsa oʼmanaʼuyate. Ken onʼtohuaʼuyate.
\v 9 Hue̱ʼe̱y e̱e̱ʼtada huaboaʼda vino o̱ʼeanuy. Aypo huairi
oʼmaiʼdepo ʼurunanada vino o̱ʼe̱ oʼnopo̱e̱po ke̱yan
onʼtotiak nopo̱e̱hueʼ o̱ʼu̱y. Vino hua̱hue̱tohuaʼeriayoʼda
onʼnopo̱e̱ʼuy.
\p —‍Yatiak. —‍Ken huabokerek hua̱to̱e̱pakeritaj onaʼpo,
\p
\v 10 —‍In vino huadaknanada o̱ʼe̱. Ayaʼ huabokerek vino
onʼmatomayʼikaʼdepo huakkuru huadak vino onʼbayokikaʼ.
Kenokaʼ huakkaʼaʼda onʼmamayʼdepo, sueʼda huadak vino
onʼbayokikaʼ. O̱ʼnanayo huakkuru sueʼda huadak vino
iʼmatomaydenigʼa, huaboaʼda huadak vino iʼtotiakne. —‍Aypo
huairia onaʼuyate.
\v 11 Ken Galileadariyo huakkaʼ jak Canáte Jesúsa kenda
oʼkaʼuy. Aratbuta Jesústaj oknopo̱e̱ʼdik kaʼneʼpo Diosa
Jesúsere o̱ʼe̱po oʼtihuapokpo kenda huakkuru ʼuruaʼda oʼkaʼuy.
Vino oʼkaʼuy. Konig Diosyoʼda ʼuruaʼnanada kaʼdik, konig
teyda oʼkaʼnok oroʼomey keʼnen huanigpe̱i̱kaʼeri oʼtiahuaypo
Jesús Diosen Huasiʼpo o̱ʼe̱ nogi̱ti oknopo̱e̱ʼuy.
\p
\v 12 Nogok Jesús Capernaum huakkaʼ jakyo oʼhuaʼpo, hua̱ye̱ere
huamaʼbuyere oroʼomey huanigpe̱i̱kaʼeriere oʼhuaʼuy. Capernaum
huakkaʼ jakyo o̱ʼi̱kaʼuy. Sueʼda huameʼnoe o̱ʼu̱y.
\s Apag Diosen jakyaʼ Jesúsa huabahuayaʼeritaj oʼmaoro̱kaʼuy.
\r (Mt. 21.12-13; Mr. 11.15-18; Lc. 19.45-46)
\p
\v 13 Aʼti judío huakkurueri isiʼpo mabueyhueʼ e̱e̱ʼ
okkahuehueʼ fiesta o̱ʼe̱deapo. Jerusalén huakkaʼ jak oteʼyo
Jesúsa oʼbehuikuy. Oroʼomey keʼnen huanigpe̱i̱kaʼeriere
oʼbehuikuy.
\v 14 Diosen jakki̱re̱gyo̱ oʼkudonpo, vaca ʼuhua oveja ʼuhua
tukkuʼ ʼuhua huabahuayaʼeritaj oʼbatiahuayatoʼuy. Huakupe
huakabiaʼeritakon oʼbatiahuayʼuy. Konig engaña huakaʼeri
o̱ʼnepo jakki̱re̱g akbogpete onʼbahuad.
\v 15 Eʼbia oʼbatinukupo huiokda huabitbitbia oʼkedpo, Jesúsa
Apag Diosen jakyaʼ ayaʼtada oʼmaoro̱kaʼuy. Oveja vacakon
oʼmaoro̱kaʼuy. Huakabiaʼerien huakupe onkutaʼtogʼuy. Mesa
oʼbakkubukaʼuy.
\p
\v 16 —‍Ayaʼda yanʼtohuaʼ. Doʼhued Apagen jak huationaʼpak jak
o̱ʼe̱. Huabahuayaʼ jak ehueʼ o̱ʼe̱. ʼUhuaeretaj huakupeeretaj
yanʼbato̱ro̱k. I̱ya̱ʼ bahuayahueʼ yaneʼ. —‍Tukkuʼ
huabahuayaʼeritaj oʼmanaʼuy.
\p
\v 17 “O̱ʼnen jak ijjeretpaki, Dios. O̱ʼnen jaktaj ijpaknok
huakkaʼ menhuadiayapone.” Apagbaʼte aʼnennada
oʼmadoyaʼuyate. Apagbaʼ oʼtiahuayʼuy oroʼ Jesúsen
huanigpe̱i̱kaʼeria huaboaʼda oʼnopoenʼuy. Jesústaj Apagbaʼa
oʼtiaʼpakuynok oʼnokotuy.
\p
\v 18 —‍“Huakupete huabahuayaʼeritaj yamaoro̱kaʼ.” Diosa
enaʼnayo oroʼomey kanʼtiahuayeʼpo konig Diosyoʼda kaʼdik
o̱ʼe̱ konigti yakaʼ. —‍Oknopo̱e̱hueʼ hua̱e̱ʼeri judío huairia
Jesústaj namaʼda oʼnonaʼuy.
\p
\v 19 —‍In jak yanʼsak. Bapaʼ huameʼnoe onteʼti ijkaʼapoy.
—‍Oʼmanaʼuy Jesúsa.
\p
\v 20 —‍In jak cuarenta y seis huabayok onʼkadhuahuaʼuy. Bapaʼ
huameʼnoe Diosen jak eʼsakte kahueʼdik i̱ʼe̱a̱po. —‍Judío
huairia oʼnonaʼuy.
\p
\v 21 Jesúsnayo Diosen huid jaktaj tiaʼpakhueʼ o̱ʼu̱y,
Jesúsenso̱ʼtaj oʼtiaʼpakuy, “Doʼtaj menarakapone.
Bapaʼmeʼnoe ijnoyhuadapoy.” Oʼtiaʼpakuy.
\v 22 Nogok Diosa Jesústaj eʼnoyhuada̱deʼte kenda Jesúsa
oʼmanaʼuy onteʼti kenda oʼnopoenʼuy. Kenpaʼti oroʼomey
huanigpe̱i̱kaʼeri Diosbaʼ Jesústaj buttida
onʼnigmadoyaʼuyate, oknopo̱e̱ʼuy. Jesucristo paiʼda
oʼnopoʼe̱a̱po, oʼbueyapo, oʼnoyhuadapo Diosbaʼ buttida
oʼbatiaʼpak oknopo̱e̱ʼuy. Kenpaʼti Jesúsa buttida oaʼ
oknopo̱e̱ʼuy.
\s Jesús ayaʼtada huanopoyaʼda oʼmaki̱e̱ʼ.
\p
\v 23 Judío huakkurueri isiʼpo mabueyhueʼ e̱e̱ʼ okkahuehueʼ
fiesta o̱e̱ʼuy. Jerusalén huakkaʼ jakyo huakkaʼnanada
o̱gkupopakpo Jesúskon o̱ʼe̱po, konig Diosyoʼda kaʼdik o̱ʼe̱
konig teyda Jesúsa oʼkaʼuyate. Onʼtiahuaypo, huakkaʼda
kentaj oʼnoknopo̱e̱ʼuyate. Jesús Diosen Cristo ya̱ʼe̱tpiʼ
oʼnoknopo̱e̱ʼuyate.
\v 24 Jesúsnayo ayaʼ aratbuttaj huanopoyaʼda oʼmaki̱e̱ʼpo
inomey huaboaʼda moknopo̱e̱ne, sueʼda moknopo̱e̱ne,
hueretda huaknopo̱e̱ʼeri ehueʼ o̱ʼne, Jesúsnayo oʼmaki̱e̱ʼuy.
“Inomey hueretda huaknopo̱e̱ʼeri ehueʼ o̱ʼne.” Beʼapiʼ
ahueʼdik o̱ʼe̱.
\v 25 Jesúsa ayaʼtada huanopoyaʼda oʼmaki̱e̱ʼ. Kenaʼpo
nogomeytaj,
“¿Monig ya̱ʼne in aratbut?” Ahueʼdik o̱ʼe̱. Kenaʼpo
ayaʼtada aratbut huanopoyaʼda oʼmaki̱e̱ʼuy.
\c 3
\s Jesúsere Nicodemo oʼbatiaʼpakuyate.
\p
\v 1 Huabokerek o̱ʼu̱yate. Keʼna fariseo Moisésenbaʼ
huaknopo̱e̱ʼeri huairi o̱ʼu̱yate. Fariseonayo Diosen huaʼa
eʼkikaʼtaʼ onʼpakikaʼpo kenpaʼti adhueaʼpaneʼen huaʼa
eʼkikaʼtaʼ onʼeretpakuyatenigʼa Diostaj ʼurunopoʼ nige̱hueʼ
o̱ʼnuyate. Ken huabokerek fariseo huairi o̱ʼe̱po keʼnen huadik
Nicodemo o̱ʼu̱yate. Nicodemo judío huairi kenpaʼti o̱ʼu̱yate.
\v 2 Sikyo Jesúste anʼbatiaʼpakyaʼpo oʼhuatiakbedʼuyate.
\p —‍Huamanmadikaʼeri i̱ʼe̱po, oroʼomeytaj aʼmanmadikayaʼpo
Apag Diosyaʼ iʼtiakuy, oroʼ oʼnopo̱e̱y. Kenda konig kahued
o̱ʼneonhuahuikaʼuyatenigʼa oyda iʼkikaʼ. Kenaʼpo Apag Dios
beʼtihuapoknok ʼuruaʼda iʼkikaʼ, Huamanmadikaʼeri. —‍Nicodemoa
Jesústaj onaʼuy.
\p
\v 3 —‍Beʼapiʼ onteʼti eʼsiʼpoe̱ʼtaʼ eʼpaknayo Dios Huairitaj
oknopo̱e̱ʼdik o̱ʼneapo. Diosensiʼpo e̱ʼdik o̱ʼneapo.
Onteʼti siʼpoe̱hueʼ e̱e̱ʼnayo Dios Huairitaj oknopo̱e̱hueʼdik
o̱ʼneapo. Diosensiʼpo ehueʼdik o̱ʼneapo. Buttida ijjay.
—‍Jesúsa onaʼuy.
\p
\v 4 —‍¿Monig huabokerek ettoneʼendapoyaʼ siʼpopakdik
ya̱ʼe̱t? Huabokerek hua̱yeendapoyo onteʼti kudhueʼdik o̱ʼe̱.
Onteʼti siʼpoe̱hueʼdik o̱ʼe̱. —‍Nicodemo nopoenkahueʼ o̱ʼe̱po
onaʼuy.
\p
\v 5 —‍ʼUrunopoʼ aʼnopoʼto̱e̱yaʼpo, kenpaʼti konig
Diosensiʼponig a̱ʼe̱ya̱ʼpo dakhueaʼ eʼkaʼ nopoʼkoreaʼdik
moʼe̱po, hue̱ʼe̱ya̱ bautiza o̱gkaʼdik moʼe̱po, kenpaʼti
Diosen Noki̱re̱ga̱ nopoʼto̱e̱dik moʼe̱po. Kenaʼpo
nopoʼkoreahueʼ e̱e̱ʼnayo hue̱ʼe̱ya̱ bautiza o̱gkahueʼ
e̱e̱ʼnayo kenpaʼti Diosen Noki̱re̱g nopoʼto̱e̱hueʼ e̱e̱ʼnayo
Diosensiʼpo ehueʼdik moʼe̱a̱po. Buttida ijjay.
\v 6 Ettoneʼso̱ʼyaʼ onʼsiʼpopakpo, aratbutda o̱ʼne. Diosen
Noki̱re̱g oʼmanopoʼto̱e̱po, ʼurunanada
onʼnoeonhuahuikaʼ.
\v 7 “Kutayaʼ Diosen Noki̱re̱gya̱ʼ siʼpoe̱ʼdik i̱ʼe̱.”
Ijjaʼdenok, meʼpukehueʼ ya̱e̱ʼ.
\v 8 Bapoka oʼadyak. Iʼpe̱e̱nigʼa, meya̱ʼ yatiak, meyon yahuaʼ
nopo̱e̱hueʼ i̱ʼe̱. Ayaʼda Diosen Noki̱re̱gya̱ʼ onʼsiʼpoe̱
konigti o̱ʼne. Onteʼti ʼuruaʼnanada o̱gkikaʼ. Monig Diosa
monigkaʼ nopo̱e̱hueʼ i̱ʼe̱. —‍Jesúsa Nicodemotaj onaʼuy.
\p
\v 9 —‍¿Monig Diosen Noki̱re̱gya̱ʼ siʼpoe̱ʼdik ya̱ʼe̱?
—‍Nicodemoa onaʼuy.
\p
\v 10 —‍Israel aratbuten huamanmadikaʼeri i̱ʼe̱. ¿Menaʼpo
kenda onaʼdene nopo̱e̱hueʼ i̱ʼe̱?
\v 11 Do ijnopo̱e̱po, ijbatiaʼpaki. Ijtiahuaypo, ijbatiaʼpaki.
Do ijmanaʼnigʼa, opud judío huairi doʼtaj eknopo̱e̱ʼtaʼ
pakhueʼ moʼe̱. Buttida ijjay.
\v 12 I̱yo̱da konig aratbut o̱gkikaʼ doʼa onʼbatiaʼpakdenigʼa
oknopo̱e̱hueʼ o̱ʼe̱ne. Konig Diosa moʼnigkikaʼne ontaj
eʼbatiaʼpaknayo dapiʼ oknopo̱e̱hueʼdik meʼe̱ne.
\p
\v 13 Diosenbayo kurudyo̱ opud behuikhued moʼe̱ne. Diosere
ehueʼ moʼi̱kaʼuyne. Donayo huabokerek i̱jje̱nok Diosa
meʼtaʼmonaʼuyne. Diosere i̱ji̱kaʼpo Diostaj dakaʼ
ijnopo̱e̱y. Diosyaʼ ijtiakuy.
\v 14 Aratbut ehueʼ e̱ʼi̱kaʼyo Moiséskudak siro bihui eʼketkaʼ
oʼbetaʼuyate. ʼIddute kutayo oʼbetaʼuyate. Kenomeynayo Diostaj
oʼnoknopo̱e̱po, bihuitaj onʼtiahuaynok, Diosa
oʼbayareaʼuyate. Konigti doʼtaj o̱gkaʼapo. Doa Huabokerek
i̱jje̱nok Diosa meʼtaʼmonaʼuyne, doʼtaj ʼiddute kutayo
menʼbetapone. Cruzte menʼbetapone.
\v 15 Doʼtaj cruzte eʼbetaʼdemeʼte ayaʼda doʼtaj
oʼnoknopo̱e̱po kenpaʼda bueyhueʼ o̱ʼneapo onteʼti Diosere
onʼnoeonhuahuikaʼapo. —‍Jesúsa onaʼuyate.
\s Dakhueaʼ huakaʼeritaj aʼmanopoʼyareayaʼpo Diosa huakkaʼnada diʼ oʼmaeʼuyate.
\p
\v 16 —‍Ayaʼ dakhueaʼ huakaʼeritaj Diosa huakkaʼda diʼ oʼmaepo
keʼnen nogtiyoʼda huasiʼpo oʼmanigtaʼmonaʼuyatenok,
kamanopoʼyareʼpo oʼmanigtaʼmonaʼuyatenok. Ayaʼada Diosen
Huasiʼpotaj eʼnoknopo̱e̱ʼnayo kenpaʼda bueyhueʼ o̱ʼnepo,
Diosere onʼnoeonhuahuikaʼapo.
\v 17 Dakhueaʼda bokikate aratbuttaj kamaneʼpo Diosa
keʼnensiʼpotaj taʼmonahueʼ o̱ʼu̱yate. Aratbuttaj
kamanopoʼyareʼpo Diosa oʼmanigtaʼmonaʼuynok.
\p
\v 18 Beʼapiʼ Diosen Huasiʼpotaj oʼnoknopo̱e̱de, “Dakhueaʼ
o̱gkaʼ.” Diosa bahuaahueʼ o̱ʼe̱. Beʼapiʼ Huasiʼpotaj
oknopo̱e̱hueʼda menta̱e̱nok, “Dakhueaʼ oʼkaʼ.” Diosa oaʼde
kenaʼpo Diosen nogtiyoʼda huasiʼpotaj oknopo̱e̱hueʼ o̱ʼne.
\v 19 Diosen Huasiʼpo konig Diosen huakjey o̱ʼe̱po Diostaj
oʼmaknopo̱e̱a̱ʼ. Indariyo aratbuttaj oʼbahuatiakuynigʼa
aratbuta Diostaj eknopo̱e̱ʼtaʼ pakhueʼ o̱ʼnepo dakhueaʼ
o̱gkikaʼpo sikki̱re̱gyo̱ e̱ʼi̱kaʼtaʼ oʼderetpakikaʼnok.
Konige̱po “Dakhueaʼ o̱gkikaʼ.” Diosa oʼmanaʼapo.
\v 20 Ayaʼada dakhueaʼ e̱gkaʼte nogomeytaj eʼtiahuayataʼ
pakhueʼ o̱ʼne. Kenaʼpo Diosen huakjeytaʼ pakhueʼ o̱ʼne.
Doʼtaj nigpe̱e̱hueʼ o̱ʼne.
\v 21 Hueretda huaknopo̱e̱ʼerinayo Diosen buttida huaʼa
o̱gkikaʼpo Diosen huakjeytaj onʼpakpo Diosen Huasiʼpotaj
oʼnoknopo̱e̱nok, Diosa oʼbatihuapokdenok ayaʼada tiahuaydik
o̱ʼne. —‍Jesúsa oʼmanaʼuy.
\s Onteʼti Juan bautiza huakaʼeria Jesúsen oʼmanbatiaʼpakuyate.
\p
\v 22 Nogok Judea huadariyo Jesús oroʼ keʼnen
huanigpe̱i̱kaʼeriere oʼhuaʼuy. Jesús oroʼere o̱ʼi̱kaʼpo,
bautiza oʼmagkikaʼuy.
\v 23 Enón huakkaʼ jakte kenpaʼti Salim huakkaʼ jak ibodteda
Juan kenpaʼti bautiza oʼmagkaʼuyate, ke̱yo̱ huakkaʼ hue̱ʼe̱y
o̱ʼe̱nok. Aratbut huakkaʼ enʼtiakte Juana bautiza
oʼmagkaʼuyate.
\v 24 Huabakuda̱ʼ jakyo Juantaj kuda̱hued o̱ʼnenok, bautiza
oʼmagkikaʼuyate.
\p
\v 25 “Beʼaen bautiza eʼmagkaʼ Diostaj ʼurunopoʼ kaʼdik
yaʼmae, Jesúsenpiʼ Juanenpiʼ.” Juanen huanigpe̱i̱kaʼeri
judío aratbutere onʼbatiaʼpakdepo,
\v 26 Juante onʼhuatiakonpo,
\p —‍Jordánhue̱ akodpen Jesús onere o̱ʼi̱kameʼne. Jesústaj
ʼuruda iʼmanbatiaʼpakmeʼne. Oy bautiza megkeʼpo ayaʼda
Jesústaj onʼhuahuaʼ, huamanmadikaʼeri. —‍Juanen
huanigpe̱i̱kaʼeria Juantaj oʼnonaʼuyate.
\p
\v 27 —‍Beʼ huabokerektapiʼ aratbuttaj eʼmanmadikaʼ Diosa
oʼpakpo taʼmonaʼdik o̱ʼe̱ kenpaʼti tihuapokikaʼdik o̱ʼe̱.
Jesústaj oʼtaʼmonaʼuyatepo Jesústaj oʼtihuapokikaʼ. Aratbuta
Jesústaj onʼhuahuaʼdenok.
\v 28 “Do Cristo ehueʼ e̱e̱ʼtada Cristo tiakhued e̱e̱ʼte Diosa
doʼtaj huakkuruda meʼtaʼmonaʼuyne.” Opudtaj oʼnonameʼne.
Kenda doʼtaj onʼpe̱e̱meʼne.
\v 29 Huabokerek huaboaʼda oʼto̱e̱pakpo hua̱to̱e̱ oʼto̱e̱depo
durugda o̱ʼe̱. Noga̱ ken huabokerektaj diʼ o̱ʼe̱po, kenpaʼti
durugda o̱ʼe̱. Ken konig do Jesústaj diʼ i̱jje̱po durugda
i̱jje̱y. Huakkaʼada Jesústaj onʼpakpo huaboaʼda
onʼnigpe̱i̱kaʼ. Kenda duruga̱ʼda ijmati̱pe̱e̱y.
\v 30 Jesústanayo huakkaʼada nigpe̱i̱kaʼdik o̱ʼnikaʼapo.
Doʼtaj huaboaʼda sueʼda nigpe̱e̱ʼdik moʼe̱a̱pone. —‍Juana
oʼmanaʼuyate.
\s Jesús Diosen Huasiʼpo o̱ʼe̱po Diosyaʼ oʼtiakuyate.
\p
\v 31 Keʼna Diosyaʼ oʼtiakmeʼpo Diosen huairitoneʼ o̱ʼe̱.
Ayaʼtada mataʼmonaʼikaʼdik o̱ʼe̱. Aratbutnayo indari
hua̱e̱ʼeri o̱ʼnenigʼa indaritaj onʼnopo̱e̱po
onʼbatiaʼpakikaʼ. Jesúsnayo Diosen Huasiʼpo o̱ʼe̱po Diosyaʼ
oʼtiakpo ʼurunopoʼda o̱ʼe̱po ayaʼenda huairi o̱ʼe̱.
\v 32 Katepiʼ Diosyo oʼbatiahuayonhuahuikaʼnig, katepiʼ
oʼmapeeonhuahuikaʼnig, kenda oʼmanbatiaʼpakikaʼnigʼa,
suhueʼada Jesústaj oʼnoknopo̱i̱kaʼ.
\v 33 Kenomey Jesúsen huaʼa oʼnoknopo̱e̱po, Diosa buttida
oaʼikaʼ oʼnoknopo̱e̱nok.
\v 34 Diosa Jesústaj oʼtaʼmonaʼuyate. Diosa keʼnen
noki̱re̱gda oʼyok. Jesústaj oʼyok. Dakhuapa keʼnen noki̱re̱g
oʼyoknok. Diosen huaʼa oʼmanaʼikaʼ.
\v 35 Apag Huasiʼpotaj diʼ o̱ʼe̱. Ayaʼen huairida ka̱e̱ʼpo
oʼtaʼmonaʼuy.
\v 36 Kenomey Diosen Huasiʼpotaj oʼnoknopo̱e̱po onteʼti
Diosere onʼnoeonhuahuikaʼapo. Kenomey Huasiʼpotaj
oknopo̱e̱hueʼ o̱ʼnepo onteʼti Diosere noeonhuahuahueʼ
o̱ʼneapo. Diosa kenomeytaj castiga oʼmagkadhuahuikaʼapo.
\c 4
\s Jesús Samaria huadariyo hua̱e̱ʼeri ettoneʼere onʼbatiaʼpakuyate.
\p
\v 1,2 Ken, Jesústaj huakkaʼada onʼpe̱e̱depo huaboaʼda
onʼtahuaʼuyate. Huaboaʼda onʼnigpe̱i̱kaʼuyate. Bautiza
eʼmagkadeʼte Jesústaj onʼnigpe̱i̱kaʼuy. Jesúsnayo bautiza
kahueʼ e̱ʼe̱a̱da oroʼomeya̱ huanigpe̱i̱kaʼeria bautiza
oʼmagkikaʼuy. Juantaj sueʼada oʼnoknopo̱e̱ʼuyate. Kenda
fariseo huairia onʼtipe̱e̱demeʼte, Jesúsa oʼmaknokotuy.
\v 3 Ken oʼmaknokotpo, Judeayaʼ oʼbakhuaʼuy. Galilea huadariyo
oʼkumeʼuy.
\p
\v 4 Ken Galilea huadariyo oʼhuaʼpo, Samaria huadariyo pokdik
o̱ʼu̱y.
\v 5 Samaria huadariyo huakkaʼ jak Sicarte oʼtiakuy. Sicar
Jacobkudaken taʼbate ibodteda o̱ʼe̱. Taʼba Jacobkudaken
huasiʼpo Josékudaktaj oʼyokuyate.
\v 6 Kenteda Jacobkudaken hue̱ʼe̱y sorokkogya̱ʼ huaʼeg
o̱ʼu̱yate. Jesús bidteda oʼhuaʼepo o̱ʼa̱ro̱gpo, oʼhuaduy.
Tokhuada̱ʼ eʼhuadte oʼhuaduyate. Hue̱ʼe̱y sorokkogte
oʼmanighuadʼuy.
\v 7,8 Oroʼ Jesúsen huanigpe̱i̱kaʼeri aypo aʼbaetuyaʼpo,
huakkaʼ jakyo oʼhuaʼdemey. Samariaeri ettoneʼ hue̱ʼe̱y
aʼegatuyaʼpo oʼtiakuyate.
\p —‍Hue̱ʼe̱y beyok. —‍Jesúsa onaʼuyate.
\p
\v 9 Judío aratbuta Samaria hua̱e̱ʼeritaj batiaʼpakhueʼ
o̱ʼi̱kaʼnigʼa Jesústaj ettoneʼa̱ oʼpe̱e̱depo,
\p —‍O̱ʼna judío aratbut i̱ʼe̱nigʼa, Samaria hua̱e̱ʼeri do
i̱jje̱y. ¿Menpaʼ hue̱ʼe̱y beyokaʼ doʼtaj menaʼ? —‍Samaria
ettoneʼa̱ Jesústaj onaʼuyate.
\p
\v 10 —‍Diosa huanounhuahuikaʼ hue̱ʼe̱y eʼyoktaʼ beʼtipakne.
“Hue̱ʼe̱y beyok.” Ontaj onaʼnigʼa, “Huanounhuahuikaʼ
hue̱ʼe̱y beyok.” Doʼtaj meknopo̱e̱po enaʼnayo
huanounhuahuikaʼ hue̱ʼe̱y oʼyokapone. —‍Jesúsa ettoneʼtaj
onaʼuyate.
\p
\v 11 —‍Huaʼeg to̱e̱hueʼ i̱ʼe̱ne. Sorokkog huabidkogyoda
hue̱ʼe̱y o̱ʼe̱. ¿Meya̱ʼ huanoeanhuahuikaʼ hue̱ʼe̱y iʼegapo,
huairi?
\v 12 Oroʼen adhueaʼpaneʼa̱ Jacobkudak in sorokkog
boʼyokuyne. Keʼnada oʼmayikaʼuyatenig. Keʼnen huasiʼpo
kenpaʼti onʼmamayʼikaʼuyate. Keʼnen vacakon
oʼmamayʼikaʼuyate. Oroʼomeytaj in sorokkog boʼyokonʼuyne.
¿Menpaʼ Jacobkudakitipi sigda huairi o̱e̱ʼuynigʼa, o̱ʼna
huahuak huairi i̱ʼe̱? —‍Ettoneʼa̱ onaʼpo,
\p
\v 13 —‍Beʼapiʼ in sorokkog hue̱ʼe̱y oʼmaypo, onteʼti
maymaya̱ʼ oʼdaʼikanigʼa,
\v 14 ayaʼada doʼtaj moknopo̱e̱po Diosere onʼnoeonhuahuikaʼapo. Konig huanoeanhuahuikaʼ hue̱ʼe̱y
oʼyoknok onʼmayʼpo, huanopoyo o̱ʼunhuahuikaʼapo, onteʼti
“maymaya̱ ijjay” ahueʼ o̱ʼneonhuahuikaʼapo. Doʼtaj
moknopo̱e̱po Diosere onʼnoeonhuahuikaʼapo. —‍Jesúsa
onaʼuyate.
\p
\v 15 —‍Ken hue̱ʼe̱y beyok. Onteʼti maymaya̱ ahueʼdik
a̱ʼe̱ya̱ʼpo, i̱yo̱ sorokkogyo̱ hue̱ʼe̱y aʼegyaʼpo tiakhueʼdik
a̱ʼi̱kayaʼpo o̱ʼnen hue̱ʼe̱y ijmayapoy, huairi. —‍Ettoneʼa̱
onaʼpo, Jesúsen huaʼataj nopoenkahueʼda kenpaʼti Jesús
Diosen Huasiʼpo o̱ʼe̱ oknopo̱e̱hued o̱ʼe̱po kenda Jesústaj
onaʼuyate.
\p
\v 16 —‍Yahuatiʼ. O̱ʼnen hua̱to̱e̱ʼtaj yatotiak. —‍Jesúsa
onaʼuyate.
\p
\v 17 —‍Hua̱to̱e̱ to̱e̱hueʼ i̱jje̱y. —‍Ettoneʼa̱ onaʼuyate.
\p —‍Hua̱to̱e̱ to̱e̱hueʼ i̱jje̱y. Buttida iaʼ.
\v 18 Huabaniga̱ʼ iʼta̱e̱ʼuynigʼa. Oyda kentaj eʼdipakada o̱ʼnen
hua̱to̱e̱ ehueʼ o̱ʼe̱. Kenda buttida iaʼ. —‍Jesúsa onaʼuyate.
\p
\v 19 —‍Diosen huaʼa huamanbatiaʼpakeri o̱ʼe̱, oʼtinopo̱e̱ne,
huairi.
\v 20 In oʼteʼyo “Huaboroʼda i̱ʼe̱, Apag Dios.” Oroʼ
onaratbutyoʼ adhueaʼpaneʼkudak Samaria huadari
hua̱e̱ʼeriomeya̱ onʼtionaʼpakikaʼuyate. Jerusalén huakkaʼ
jakyo “Huaboroʼda i̱ʼe̱, Apag Dios.” Tionaʼpakdik moʼe̱ne.
Opuda̱ judío aratbut onʼmanaʼikaʼ. —‍Ettoneʼa̱ onaʼuyate.
\p
\v 21 —‍Menʼpe̱e̱ʼ, ettoneʼ. Aʼti meyo̱piʼ moʼe̱po Apag
Diostaj tionaʼpakdik moʼe̱ne. Apag Diostaj aʼtionaʼpakyaʼpo
in oteʼte tiakhueʼdik moʼe̱a̱pone. Kenpaʼti aʼtionaʼpakyaʼpo
Jerusalényo̱ huahueʼdik moʼe̱a̱pone.
\v 22 Opud Samaria hua̱e̱ʼeria Diostaj nopo̱e̱hueʼda namaʼda
moʼtionaʼpaknigʼa, oroʼomeynayo judío aratbut o̱ʼe̱po Diostaj
oknopo̱e̱po dakaʼ oʼtionaʼpakikay. Diosen
huamanopoʼkoreaʼeri judío aratbut o̱ʼe̱.
\v 23,24 Apag Dios noki̱re̱g o̱ʼe̱po buttida oaʼikaʼ. Apag
Diosen huaʼa buttida o̱ʼe̱. Oy kenpaʼti nogokkon aratbut
huadaknopoʼda Diosen buttida huaʼataj oʼnoknopo̱e̱po Apag
Diostaj onʼtionaʼpakapo. Diosen Noki̱re̱ga̱
oʼmanopoʼto̱e̱nok Apag Diostaj onʼtionaʼpakapo. Kenda Apag
Diosa oʼpak. —‍Jesúsa ettoneʼtaj onaʼuyate.
\p
\v 25 —‍Nogok Diosa Cristotaj oʼtaʼmonaʼapo, yoknopo̱e̱y.
Eʼtiakdeʼte ayaʼda oʼmanmadikaʼapo. —‍Ettoneʼa̱ onaʼuyate.
\p
\v 26 —‍Cristo do i̱jje̱y. Doa onʼbatiaʼpaknig Cristo i̱jje̱y.
—‍Jesúsa onaʼuyate.
\p
\v 27 Jesúsa ettoneʼtaj kenda eʼnadeʼte oroʼomey Jesúsen
huanigpe̱i̱kaʼeri Jesúste oʼtiakuy. Jesúsa ettoneʼtaj
oʼbatiaʼpaknok oroʼa oʼtiahuaypo oʼmeʼpukeʼuy. (Aʼnennada
judío huamanmadikaʼeri ettoneʼtaj batiaʼpakhueʼ
o̱ʼnikaʼuy.) “¿Kaʼtiaʼpo ettoneʼtaj inaʼpak?” “¿Kate
iʼpakpo iaʼ?” Jesústaj onahueʼ o̱ʼu̱y.
\v 28 Ettoneʼ sorokkoso oʼhuadanpo okhuaʼuyate. Keʼnen
huakkaʼ jakyo Sicar okhuaʼuyate. Huakkaʼ jakyo oʼkudondepo,
huakkaʼ jak hua̱e̱ʼeritaj oʼmanaʼpo,
\p
\v 29 —‍Sorokkogte huabokereka behuatiakpo doʼtaj ʼuruaʼda
menbatiaʼpakne. Nog huadaribayoeri o̱ʼe̱nigʼa ayaʼda nogok
nogok ijkikameʼnig kenda menaʼne. Ayaʼda oʼnopo̱e̱po
menaʼne. Keʼna Cristo ya̱ʼe̱tpiʼ. —‍Ettoneʼa̱ keʼnen ayaʼ
huakkaʼ jak hua̱e̱ʼeritaj oʼmanaʼuyate.
\p
\v 30 Ken huakkaʼ jakyaʼ huakkaʼada onʼmaoro̱konpo,
Jesústaj onʼhuatiakuyate.
\v 31 Huakkaʼda aratbut tiakhued e̱ʼneʼte,
\p —‍Yabapeʼ, Huamanmadikaʼeri. —‍Oroʼ keʼnen
huanigpe̱i̱kaʼeria onaʼuyne.
\p
\v 32 —‍Bapeahueʼ i̱jje̱y. Nogda aypo ijto̱e̱nig opud
nopo̱e̱hueʼ moʼe̱ne. —‍Monaʼuyne.
\p
\v 33 —‍Beʼapiʼ kentaj aypo yanigtotiaketpiʼ, oʼnopo̱e̱po
oroʼomey huanigpe̱i̱kaʼeria huayahuaya oʼbatiaʼpakuy.
\p
\v 34 —‍Diosa doʼtaj meʼtaʼmonaʼuyne. Katepiʼ Dios oʼpak
kenda ijkikay. Ayaʼda keʼnen ijkuhuitapoy. Keʼnen ijjeretpakpo
ijkikaʼpo, doʼhued aypo konig o̱ʼe̱.
\v 35 Opudomey aypotaj huakkaʼ moʼnopo̱e̱po, “Aypopiʼ
boyoghued e̱e̱ʼte aʼti bottaʼ bottaʼ puug oʼboyogaponok
jakyo
totiakdik o̱ʼe̱a̱poy.” Moʼbatiaʼpakikaʼnig. Oy konig eʼboyog
a̱ʼe̱ya̱ʼpo huakkaʼ aratbut onʼbatiakdenok, yanʼtiahuayʼ. Oy
huakkaʼada eʼnopoʼkoreaʼtaʼ onʼpak. Huakkaʼada Diostaj
eknopo̱e̱ʼtaʼ onʼpak.
\v 36,37 “Nogtiada oʼbatukeʼ. Noga̱ aypo oʼtotiak.” Ken
buttida onʼbatiaʼpakikaʼuy. Konig huabatukeʼeri i̱jje̱po
konig huakkuruda Diosen huaʼa dakaʼ ijmanmadikay. Opudomey
konig aypo huatotiakeri moʼe̱po doʼhued huaʼa
moʼmanmadikikaʼaponok huakkaʼada doʼtaj
moʼnigpe̱i̱kaʼapone. Doere Diosere
moʼnoeonhuahuikaʼapone. Konig dakhuapa opudomeya̱ doere
moʼdurugpakonhuahuikaʼapone.
\v 38 Nogomeya̱ onʼmanmadikadhuaʼdeʼuy. Aratbut i̱dada
oknopo̱e̱hueʼ o̱ʼnuypo kanoknopo̱e̱ʼpo opudomeya̱
kanʼmanmadikeʼpo doʼa onʼtaʼmonaʼuyne. Opudomey huakkuru
huamanmadikaʼeriere moʼmanmadikaʼnok
moʼmaknopo̱e̱a̱ʼapo. —‍Jesúsa oroʼtaj monaʼuyne.
\p
\v 39 Ken jakte huakkaʼ Samaria hua̱e̱ʼeri o̱ʼnikaʼpo, “Ayaʼ
nogok nogok ijkikaʼuynigda.” Menaʼne. Ettoneʼa̱
oʼmanbatiaʼpaknok, huakkaʼada Samariayo hua̱e̱ʼeria Jesústaj
oʼnoknopo̱e̱ʼuy.
\v 40 Samaria hua̱e̱ʼeri onʼhuatiakde. “Oroʼomeytaj
botaʼhuadunhuaʼ.” Jesústaj oʼnonaʼuy. Kente bottaʼ
huameʼnoe o̱ʼu̱ynok.
\v 41 Jesúsen huaʼataj onʼpe̱e̱po nogi̱ti huakkaʼada
oʼnoknopo̱e̱ʼuy.
\p
\v 42 —‍Ontayoʼda onʼpe̱e̱po oknopo̱e̱hueʼ o̱ʼe̱ʼnigʼa oy
Jesústakon onʼpe̱e̱depo oknopo̱e̱y. Jesús Diosen Cristo
o̱ʼe̱. Diosa moʼnigtaʼmonaʼuyne. Aratbuten dakhueaʼ eʼkaʼ
kabakkahueʼpo, huamanopoʼyareadhuaʼ o̱ʼe̱ monoknopo̱e̱y.
—‍Ettoneʼtaj oʼnonaʼuy.
\s Jesúsa gobierno huairiensiʼpotaj oʼyareaʼuy.
\p
\v 43 Botmeʼnoe Sicar huakkaʼ jakyo o̱ʼe̱depo oroʼomeyere
Jesúsa oʼbakhuaʼuy. Galilea huadariyo oʼhuaʼuy. Galilea
huadariyo Jesús oʼkerekuyate.
\v 44 Diosen huaʼa huamanbatiaʼpakerien jak
hua̱e̱ʼeriomeynayo Diosen huamanbatiaʼpakeritaj eʼpe̱e̱taʼ
pakhueʼ o̱ʼnikaʼ. Jesúsa Galilea hua̱e̱ʼeritaj
oʼmanbatiaʼpakuynigʼa.
\v 45 Galilea huadari hua̱e̱ʼeri Jerusalényo̱ aypo fiestate
o̱ʼnemeʼte. Jerusalényo̱ Jesúsa ʼuruaʼnanada konig Dios
ekapaʼ oʼkameʼnok onʼtiahuayʼuyate, Galilea hua̱e̱ʼeria.
Jesúsa teynanada oʼkameʼnok Galileayo eʼkumejdeʼte
durugteda Jesústaj oʼdeʼuy.
\p
\v 46 Ken, Caná huakkaʼ jak Galilea huadariyo ke̱yo̱
hue̱ʼe̱ytaj vino oʼkameʼ onteʼti Jesús oʼtiakuy. Capernaum
huakkaʼ jak meyo̱hueʼda o̱ʼe̱po Capernaum gobierno
huairiensiʼpo oʼdigpakuyate.
\v 47 Judea huadariyaʼ Jesúsa oʼtiakdepo, Galilea huadariyo
Jesús o̱ʼi̱kaʼ. Kenda Capernaum huairi oʼtipe̱e̱depo Jesústaj
oʼhuahuaʼdepo, “Capernaum huakkaʼ jakyaʼ doʼhuedsiʼpo oʼbueyapo.
Bohuaʼ. Betayareaʼ.” Diga̱ʼda onaʼuy.
\p
\v 48 —‍Opud Galilea hua̱e̱ʼeri doʼhued huaʼa eknopo̱e̱ʼtaʼ
pakhueʼ moʼe̱. ʼUruaʼda ekaʼnayo konig eʼbayareaʼnayo doʼhued
huaʼataj yanoknopo̱e̱a̱petpiʼ. —‍Jesúsa Capernaum huairitaj
onaʼuy.
\p
\v 49 —‍Bueyhued e̱e̱ʼte doʼhuedsiʼpote bohuaʼ, huairi.
—‍Jesústaj onaʼuy.
\p
\v 50 —‍Yahuatiʼ. O̱ʼnensiʼpo oʼyarede oʼnoe. —‍Jesúsa
onaʼuy. Jesúsen huaʼataj buttida oknoponpo jakyo
oʼkumeʼuyate.
\v 51 Jakyo eʼkumejte dagte keʼnen huanabaʼa onʼhuatiakpo,
onʼdejpo,
\p —‍O̱ʼnensiʼpo oʼyarede, oʼnoe. —‍Keʼnen huanabaʼa
oʼnonaʼuyate.
\p
\v 52 —‍¿Menokaʼ yaʼyarud? —‍Oʼmanaʼuy.
\p —‍ʼIkken niokpo tokhuad eʼhuadte oʼyaremeʼ. —‍Huanabaʼa
oʼnonaʼuyate.
\p
\v 53 Kente niokpo eʼhuadte “O̱ʼnensiʼpo oʼyarede oʼnoe.”
Jesúsa menameʼne. Huasiʼpoed huaoa oʼnoponpo. Keʼnen
huabetomeya Jesús Diosen Huasiʼpo Diosyaʼ oʼtiakuyate,
oʼnoknopo̱e̱ʼuyate.
\p
\v 54 Judea huadariyaʼ Jesús oʼkumejdepo Galilea huadariyo
oʼtiakuy. Galilea huadariyo hue̱ʼe̱ytaj vino oʼkaʼuy. Kenpaʼti
gobierno huairiensiʼpo oʼyareaʼuy.
\c 5
\s Ken ya̱kote huabokerektaj dakhueʼ o̱ʼeonhuahuaʼuyate. Jesúsa oʼyareaʼuy.
\p
\v 1 Nogok judío aratbut onteʼti onʼmabapeʼapo,
Jerusalénya̱ʼ onʼmabapeʼapo kenpaʼti onʼtionaʼpakapo.
Jesús Jerusalén huakkaʼ jakyo onteʼti oʼbehuikonʼuy.
\v 2 Jerusalén huakkaʼ jak kurupen huida̱ eʼtiokpakaʼ akbogpe
o̱ʼe̱. Akbogpedik oʼdikkaʼuy oveja. Oveja akbogpete ya̱ko o̱ʼe̱.
Ya̱kodik oʼdikkaʼ Betesda. Betesda ya̱ko aktaʼbogpete
huabaniga̱ʼ baʼak o̱ʼe̱.
\v 3 Baʼakyo huakkaʼda oʼnonpabahuedikaʼ. Onʼdigpakpo
oʼnonpabahuedikaʼ, ekpobig oʼnonpabahuedikaʼ, huakket
oʼnonpabahuedikaʼ, eʼhue̱tihuarotaj oʼnonmaboikaʼ.
\v 4 Ya̱kote nogok nogok Diosen huataʼmoneri
onʼhuarakatuikaʼ. Oʼtiakdepo ya̱kotaj oʼtihuaroaʼuynok. Ya̱ko
karogda eʼtihuaroyo beʼapiʼ huakkuruda yakudontaj
oʼbayareaʼikaʼuyate. Katepiʼ dakhueʼ e̱ʼneʼte
oʼbayareaʼikaʼuyate.
\v 5 Kente treinta y ocho huabayok nogbokerektida
dakhueʼ
enpahued o̱ʼunhuahuaʼuyate.
\v 6 Jesús okmapi̱e̱ʼahuaddik huameʼnoete ya̱kote
oʼtiakdepo, enpahuedikaʼtaj oʼtiahuaydepo onpahuedunhuahuikaʼ
oknopo̱e̱po,
\p —‍¿Eʼyareaʼtaʼ menpaʼ iʼpak? —‍Onaʼuy.
\p
\v 7 —‍Ya̱ko eʼtihuarote beʼapiʼ doʼtaj tohuahueʼdik meʼnene.
Doʼa dakaʼda ijhuaʼnok, noga̱ huakkuruda oʼkudikaʼ, Huairi.
—‍Jesústaj onaʼuy.
\p
\v 8 —‍Yaboʼ. Colchón yaʼudpo, yahuaeʼ. —‍Jesúsa onaʼuy.
\p
\v 9 Ijhuiti ehueʼ oʼyareadʼuy. Colchón oʼudpo oʼhuaʼudʼuy.
Okmapi̱e̱ʼahuaddik huameʼnoete oʼyareaʼuy.
\p
\v 10 Okmapi̱e̱ʼahuaddik huameʼnoete sigpiʼ kahueʼdik
moʼe̱ne. Judíoen adhueaʼpaneʼ namaʼda
onʼmanikaʼuynok,
\p —‍Okmapi̱e̱ʼahuaddik huameʼnoe o̱ʼe̱nok colchón
tohuahueʼdik o̱ʼe̱ne. —‍Judío huairia oʼnonaʼuy.
\p
\v 11 —‍Kenbokereka doʼtaj beʼyareaʼne. “Colchón yaʼudpo
yahuaeʼ.” Keʼna menaʼnok ijkay. —‍Judío huairitaj oʼmanaʼuy.
\p
\v 12 —‍“Yaʼudpo yahuaeʼ.” ¿Beʼa onʼtaj menaʼ? —‍Judío
huairia oʼnonaʼuy. Jesúsa dakhueʼda onaʼ onʼnopo̱e̱po
oʼnonaʼuy.
\p
\v 13 Jesúsendik nopo̱e̱hued o̱ʼe̱po kenpaʼti keʼna
beʼyareadne nopo̱e̱hueʼ o̱ʼu̱y. Kenpaʼti huakkaʼada aratbut
o̱ʼnenok Jesúsa okhuaʼnok Jesústaj tiahuayhueʼdik o̱ʼe̱po.
\v 14 Nogok Jesúsa Diosen jakyo oʼhuahuayʼuy. Huayareritaj
oʼhuahuayʼuy.
\p —‍E̱ya̱ʼ, oʼyaraddene. Dakhueaʼ onteʼti kahueʼ ya̱e̱ʼ.
Onteʼti dakhueaʼ ekaʼnayo nogi̱ti dakhueʼda i̱ʼe̱a̱pone.
—‍Jesúsa onaʼuy.
\p
\v 15 Kenokaʼ judío huairite oʼhuaʼuyate. “Jesúsa
beʼyareadne.” Huabokereka oʼbatiaʼpakuy.
\v 16 Okmapi̱e̱ʼahuaddik huameʼnoete Jesús kenda
oʼkaʼnok Judío huairia Jesústaj huaboaʼda diga̱ʼda onʼhuadiaypo
dakhueaʼ onʼhuaadhuahuikaʼpo, kenpaʼti eʼaraktaʼ
onʼtipakonhuahuikaʼuyate.
\p
\v 17 —‍Oy kenpaʼti doʼhued Apag Dios oʼkikaʼ doakon ijkikay.
—‍Jesúsa oʼmanaʼuy.
\p
\v 18 Okmapi̱e̱ʼahuaddik huameʼnoete judío aratbut kahueʼdik
yaneʼ, kenda judío huairien adhueaʼpaneʼa̱
onʼmanikaʼuynigʼa. Jesúsa manigpe̱e̱hueʼ o̱ʼe̱po
okmapi̱e̱ʼahuaddik
huameʼnoete oʼyareaʼpo. Kenpaʼti Dios
doʼhued Apag meʼta̱e̱ne, oaʼpo. “Konigti Dios i̱jje̱y.”
Jesúsa oaʼnok, judío huairia onʼnopo̱e̱po nogi̱ti diga̱ʼda
eʼaraktaʼ oʼderetpakuyate.
\s Katepiʼ Apag Diosa kenda oʼpaknok Diosen Huasiʼpoa oʼkaʼ.
\p
\v 19 —‍Do Diosen Huasiʼpo i̱jje̱po doʼhuedda kahueʼdik i̱jje̱y.
Katepiʼ Apaga oʼpaknok kenda do Diosen Huasiʼpo i̱jje̱po
ijkikay. Konig doʼhued Apag oʼkaʼ konigti ijkay. Buttida
ijjay.
\v 20 Kenpaʼti Diosen Huasiʼpo i̱jje̱nok doʼtaj diʼ meʼe̱ne.
Ayaʼda Diosa oʼkikaʼpo kenda doʼtakon meʼnopo̱e̱a̱ʼne.
Huabokerektaj ijyareaʼdey. Nogi̱ti ʼuruaʼda ijkaʼapoy.
¡Kenpihuay! Aʼdik moʼe̱a̱pone.
\v 21 Aratbut enʼbueydeʼte onteʼti Diosa manoeaʼdik o̱ʼe̱.
Konigti do Diosen Huasiʼpo i̱jje̱po eʼbueytapiʼ
eʼmanoeaʼtaʼ ijpakpo ijmanoeaʼapoy.
\v 22 “Dakhueaʼ iʼkaʼ.” Apagayoʼda aratbuttaj ahueʼ o̱ʼe̱.
Apaga oʼpaknok, “Dakhueaʼ iʼkaʼ.” Doa Apagen Huasiʼpo
i̱jje̱po aʼdik i̱jje̱a̱poy.
\v 23 Kenda Apaga oʼpaknok, “Diosen Huasiʼpo huadakda
o̱ʼe̱.” Ayaʼada doʼtaj onʼtiaʼpakapone. Konig Apagtaj
huadak
onʼtiaʼpakpo, konigti doʼtaj huadak onʼtiaʼpakapone.
“Huasiʼpo huadakda o̱ʼe̱.” Beʼapiʼ doʼtaj tiaʼpakhueʼ e̱e̱ʼnayo
konigti “Apag Dios huadakda o̱ʼe̱,” tiaʼpakhueʼda o̱ʼne.
Apaga doʼtaj meʼtaʼmonaʼuyne.
\p
\v 24 Ayaʼada doʼtaj dakaʼ onʼpe̱e̱po kenpaʼti Apaga
meʼtaʼmonaʼuyne, oʼnoknopo̱e̱po doere kurudyo̱
onʼnoeonhuahuikaʼapo. “Dakhueaʼ bokaʼne.” Diosa onahueʼ
moʼe̱a̱pone. Konig Diostaj enʼnopoʼbueyde onʼnige̱ʼnigʼa
Diosa moʼmanoeanhuahuikaʼapone. Buttida ijjay.
\v 25 Nogok kenpaʼti oyda kenomeya̱ konig Diostaj
onʼnopoʼbueydenigʼa Apag Diosen Huasiʼpotaj onʼpe̱e̱a̱po.
Onʼnigpe̱e̱po Diosere onʼnoeonhuahuikaʼapo. Buttida ijjay.
\v 26 Apag Dios oʼnoeonhuahuikaʼpo onteʼti
manoeanhuahuikaʼdik moʼe̱ne. Diosa oʼpaknok do Diosen
Huasiʼpo kenpaʼti aratbuttaj onteʼti manoeanhuahuikaʼdik
i̱jje̱y.
\v 27 Do huabokerek i̱jje̱nok Diosa meʼtaʼmonaʼuyne.
Konige̱po, “Dakhueaʼ iʼkaʼne.” Aratbuttaj manaʼdik
i̱jje̱y.
\v 28 Kenda mepuʼkehueʼ yaneʼ. Kenaʼpo nogok ayaʼ
huabueyeri kubarakyaʼ doʼtaj onʼpe̱e̱a̱po.
\v 29 Onʼmaoro̱konkaʼapo. Huadak huakikaʼeri onteʼti Diosere
onʼnoeonhuahuikaʼapo. Dakhueaʼ huakikaʼeri paiʼnanada
onʼnopoʼunhuahuikaʼapo. —‍Jesúsa oʼmanaʼuy.
\s Jesústaj kanoknopo̱e̱ʼpo “Jesús Diosen Huasiʼpo o̱ʼe̱nok Diosa oʼtaʼmonaʼuyate.” Juana oʼmanaʼuy. Kenpaʼti Jesústaj kanoknopo̱e̱ʼpo konig Diosenyoʼda kaʼdik o̱ʼe̱po Jesúsa oʼkaʼuy.
\p
\v 30 —‍Doʼhuada ijnopo̱e̱po kahueʼdik i̱jje̱y. Konigti Apag
Diosa menaʼnok ijjay. Buttida ijjaʼikay. Kenaʼpo katepiʼ do
ijpakpo kahueʼ i̱ji̱kay. Kenda Apag Dios oʼpaknok ijkikay. Apag
Diosa meʼtaʼmonaʼuynok.
\v 31 Doʼa Diosen Huasiʼpo i̱jje̱y. Doʼhuayoʼda ijnopo̱e̱po
eaʼnayo kenpaʼ ahueʼ i̱jje̱a̱ynigʼa konig buttida doʼhued
huaʼa pe̱e̱hueʼdik o̱ʼnene.
\v 32 “Doʼhued Huasiʼpo meʼta̱e̱ne.” Diosa beʼhuaaʼne.
Doʼtaj buttida beʼhuaaʼnok doʼtaj pe̱e̱ʼdik o̱ʼnene
ijnopo̱e̱y.
\v 33 “Jesús beʼati ya̱ʼe̱taʼpo.” Juantaj opudomeya̱
moʼtaʼmonameʼ. “Jesús Diosen Huasiʼpo o̱ʼe̱.” Juana
buttida doʼtaj beʼhuaameʼne.
\v 34 “Jesús Diosen Huasiʼpo o̱ʼe̱.” Huabokereka eʼhuaaʼte
donayo pe̱e̱hueʼdik i̱jje̱y. Opudomeya̱nayo Juantaj
nigpe̱e̱dik moʼe̱po doʼtaj oknopo̱e̱ʼdik moʼe̱ne Diosere
aʼnoeonhuahuikayaʼpo doʼtaj oknopo̱e̱ʼdik o̱ʼnene.
Oʼnonaʼne.
\v 35 Juan konig jeyda huakjey ʼuruda oʼtaʼte, Juana ʼuruda
oʼmanmadikikameʼpo. Opudomey judío aratbuttaj
monʼmadikikameʼne. Opudomey huakjeytaj
moʼdurugpakatumeʼne. Juantaj monʼpe̱e̱po
moʼdurugpakatumeʼne.
\v 36 Dios doʼhued Apag o̱ʼe̱po doʼtaj meʼtaʼmonaʼuyne.
Kenda Juana buttida behuaameʼne, opudomeytaj monameʼnok
doʼtaj oknopo̱e̱ʼdik moʼe̱nok. Kenpaʼti konige̱po katepiʼ
ʼuruaʼda Diosayoʼda kaʼdik o̱ʼe̱, doakon ijkikaʼnok Diosa
oʼtaʼmonaʼuy oknopo̱e̱ʼdik moʼe̱ne.
\v 37 Kenpaʼti Apaga Apagbaʼte doʼtaj beʼtiaʼpakuynigʼa
opudomey judío huairinayo Diostaj tiahuayhueʼ moʼi̱kaʼpo
kenpaʼti nigpe̱e̱hueʼ moʼi̱kaʼpo,
\v 38 keʼnen huaʼa eʼpe̱e̱taʼ pakhueʼ moʼe̱. Diosa
oʼtaʼmonaʼuy. Doʼtaj oknopo̱e̱hueʼ moʼe̱ne.
\v 39 Apagbaʼa doʼtaj beʼtiaʼpakne. Opudomeynayo doʼtaj
oknopo̱e̱hueʼ moʼe̱ne. Diosyaʼ oʼtiakuy oknopo̱e̱hueʼ
moʼe̱po Apagbaʼtayoʼda moʼmonaʼpakikaʼpo, Diosere
oʼnoeonhuahuikaʼapoy namaʼda moʼnopo̱e̱ne. Doʼtaj
oknopo̱e̱hueʼ moʼe̱nok Diosere noeonhuahuikahueʼ
moʼe̱a̱pone.
\v 40 Ayaʼada doʼtaj oʼnoknopo̱e̱po Diosere
onʼnoeonhuahuikaʼapo. Opud judío huairinayo doʼtaj
eknopo̱e̱ʼtaʼ pakhueʼ moʼe̱ne.
\p
\v 41 “Huadak o̱ʼe̱.” Huabokereka doʼtaj eʼhuaaʼtaʼ pakhueʼ
i̱jje̱y.
\v 42 Opud judío huairia Diostaj diʼ ehueʼ o̱ʼne doa
onʼtinopo̱e̱ne.
\v 43 Apag Diosa doʼtaj meʼtaʼmonaʼuyne. Opudomeya̱nayo
doʼtaj eʼnigpe̱e̱taʼ pakhueʼ o̱ʼnene. Nog huabokerektaj Diosa
taʼmonahueʼ e̱e̱ʼtada opudte eʼbahuatiaknayo kentanayo
moʼnigpe̱e̱a̱po.
\v 44 “Huadakda moʼe̱ne.” Aratbuta enataʼ eʼpe̱e̱taʼ
boʼpakikaʼ. “Huadakda moʼe̱ne.” Diosa enataʼ eʼpe̱e̱taʼ
pakhueʼ moʼe̱ne. Kenaʼpo Diosyaʼ oʼtiakuy oknopo̱e̱hueʼdik
o̱ʼnene.
\v 45 Opudtaj, “dakhueaʼ o̱gkikaʼ.” Apag Diostaj Jesúsa
beʼhuaaʼapone. Nopo̱e̱hueʼ yaneʼ. “Opuda̱ dakhueaʼ
bokikaʼuynig.” Moisésanayo kenda boʼhuaaʼapone. Moiséstaj
namaʼda boaʼikaʼ.
\v 46 Moisésa doʼtaj oʼtimadoyaʼuyate. Opuda̱ Moiséstaj
hueretda oknopo̱e̱hueʼ moʼe̱po kenaʼpo doʼtaj oknopo̱e̱hueʼ
o̱ʼnene.
\v 47 Kenda Moiséskudaka oʼmadoyaʼuyate oknopo̱e̱hueʼ
e̱e̱ʼnayo, doʼhued huaʼataj kenpaʼti oknopo̱e̱hueʼ
moʼe̱a̱pone. —‍Jesúsa judío huairitaj oʼmanaʼuyate.
\c 6
\s Jesúsa cinco mil huabokerektaj oʼbatobapeʼuyate.
\r (Mt. 14.13-21; Mr. 6.30-44; Lc. 9.10-17)
\p
\v 1 Ken, Galilea e̱ʼpo̱g konogda oʼdikkaʼ Tiberias. Nogok
Galilea e̱ʼpo̱g Jesús oktegʼuy. Oroʼomeyere okteguy.
\v 2 Jesús eʼhuaʼte huakkaʼada aratbut onʼtahuaʼpo, kenaʼpo
konig Diosyoʼda kaʼdik o̱ʼe̱, konigti Jesúsa nogok nogok
oʼkaʼpo, dakhueʼ e̱ʼnetaj oʼbayareaʼuy. Konige̱po huakkaʼada
onʼtahuaʼuy.
\v 3 Aʼti huakupayo oʼbehuikuy. Oroʼomey Jesúsen
huanigpe̱i̱kaʼeriere moʼbatohuaduyne.
\v 4 Aʼti judío huakurueri isiʼpo mabueyhueʼ e̱e̱ʼ okkahuehueʼ
aypo fiesta o̱ʼe̱a̱po. Konige̱po huakkaʼda aratbut o̱ʼnuy.
\v 5 Huakkaʼda aratbut o̱gkupopakdepo enʼbatiakte Jesúsa
oʼbatiahuayʼuy. Felipetaj
\p —‍¿Huakkaʼda onʼbatiakde kanʼbapeʼpo meya̱ʼ pan
oʼbaeyapet? —‍Jesúsa Felipetaj onaʼuy.
\p
\v 6 Menpaʼti Felipea oaʼapo eʼnopo̱e̱ʼtaʼ oʼpakpo onaʼuy.
Kenda ijkaʼapoy soatayoʼ Jesúsa oʼnopo̱e̱ʼuy.
\p
\v 7 —‍Pan huabaeʼ doscientos denarios huakupe e̱e̱ʼnayo ayaʼada
aratbuta sueʼpiʼ pan bapehueʼdik o̱ʼne. —‍Felipea onaʼuy.
\p
\v 8,9 —‍Huabokereksiʼpoa nogmanigtida cebadao̱gʼ pan bottaʼ
biigere oʼto̱e̱nigʼa kenniga aratbuta kate bapehueʼdik
o̱ʼnenok. —‍Andrésa, Simón Pedroen huamaʼbuy o̱ʼe̱po
onaʼuy. Jesústaj onaʼuy.
\p
\v 10 —‍“Yanʼbahuad.” Yanʼmanaʼ. —‍Jesúsa oroʼtaj
monaʼuyne.
\p Kenteda huakkaʼda mire̱ o̱ʼu̱yate. Ken ayaʼda onʼbahuaduy.
Cinco mil huabokerek o̱ʼnuy.
\v 11 Jesúsa pan oʼto̱e̱po Diostaj dakiti oʼtionaʼpakuy.
Oroʼomey keʼnen huanigpe̱i̱kaʼeritaj oʼposakeaʼpo boʼyokeʼpo
aratbut enʼbahuadte oroʼomeya̱
oʼbayokeʼuy. Konigti biig
oʼmanokpukpukpo boʼyokeʼnok oroʼomeya̱ oʼbayokeʼuy. Noga̱
huakkaʼ enpakok huakkaʼ oʼbayokeʼuy. Dapoteyaʼda onʼbapeʼuy.
\v 12 Kenokaʼ ayaʼda dapotey e̱ʼnedeʼte,
\p —‍Pan huaboroʼ huaenmo boroʼtaʼsujmonere bapehueʼ eneʼ
yanʼbaeaʼ. Ken sigpiʼ parahueʼdik ka̱e̱ʼpo. —‍Oroʼtaj
monaʼuyne.
\p
\v 13 Ken oʼbaeaʼuy. Doce kusogyo̱ cebada pan boroʼtaʼsujmon
hueda̱ʼhueda̱ʼda oʼkuda̱ʼuy.
\v 14 Kenda konig Diosayoʼda kaʼdik o̱ʼe̱ Jesúsa konigti
oʼkaʼnok aratbuta onʼtiahuaypo,
\p —‍Diosen huaʼa huamanbatiaʼpakeri oroʼomeytaj
moʼnigtiakapone, Apag Diosbaʼa oaʼ. Kentaj e̱kpo̱e̱ʼ
o̱ʼnigunhuahuikaʼuy. Dapiʼ Jesús Diosen huaʼa
huamanbatiaʼpakeri o̱ʼe̱. —‍Judío aratbuta onʼbatiaʼpakuy.
\p
\v 15 Jesústaj monʼtohuaʼ. Oroʼomeyen gobierno huairi ka̱e̱ʼ.
Huakkaʼ aratbut e̱gkupopakte huanopoyaʼda onʼnopo̱e̱ʼuy.
Jesúsa oʼnokotpo, oʼbakhuaʼpo nogtiaʼda oteʼyo
oʼbakbehuikuyate.
\s Jesús hua̱hue̱tiudte oʼhuaeʼuyate.
\r (Mt. 14.22-27; Mr. 6.45-52)
\p
\v 16 Ken osikdenok oroʼ Jesúsen huanigpe̱i̱kaʼeri
e̱ʼpo̱gte oʼhuaʼuy.
\v 17 Kusiʼpeyo
oʼbakudpo, Capernaum huakkaʼ jakyo e̱ʼpo̱g
oʼnoktegpo ektegte oʼbaksikpo, Jesús tiakhued e̱e̱ʼte
\v 18 diga̱ʼda oʼbapokpo e̱ʼpo̱g huakkaʼda oʼkutaʼhuaropakuy.
\v 19 Bidteda eʼhuadeʼte, e̱ʼpo̱g hua̱hue̱tiudte Jesús oʼhuaeʼpo
kusiʼpeyo Jesúsa eʼhuatiakte oroʼ oʼtiahuayʼuy. Jesústaj
oʼtiahuaypo oʼmeʼpukonʼuy.
\p
\v 20 —‍Do i̱hue̱y. Meʼpukhueʼ yaneʼ. —‍Jesúsa monaʼuyne.
\p
\v 21 “Kusiʼpeyo yakud.” Durugteda onaʼdepo, eʼkuddeʼte
ijhuiti ehueʼ akodpen oʼhuaʼdepo onʼbetuy.
\s Aratbuta Jesústaj oʼdukuy.
\p
\v 22 Ken emeʼte akodpen huakkaʼda aratbut o̱ʼnuyate. Kente
cinco miltaj oʼbatobapeʼuy. ʼIkken nogkusiʼpetida o̱ʼe̱meʼ.
Ken kusiʼpeyo Jesús kudhueʼ o̱ʼemeʼnok Jesúsen
huanigpe̱i̱kaʼeriomeynayo onʼbakudpo oʼnokbahuameʼnok
onʼbatiahuayaʼuy.
\v 23 Tiberias huakkaʼ jakyaʼ kusiʼpe oʼbatiakuyate. Huakkaʼda
aratbut onʼbatiakuy. Kente Jesús Huairi pantaj dakiti
oʼtionaʼpakmeʼ. Pankon onʼbapemeʼ kente ibodteda kusiʼpe
oʼbatiakuyate.
\v 24 Kente Jesústaj huahuayhueʼda keʼnen
huanigpe̱i̱kaʼeritaj huahuayhueʼda huakkaʼda aratbut kusiʼpeyo
onʼkudonpo Jesústaj oʼdukpo Capernaumyo onʼhuaʼuyate.
\s Jesús konig aypo huamanoeanhuahuikaʼeri o̱ʼe̱.
\p
\v 25 Ken akodpen kusiʼpete onʼbetdepo Capernaumyo Jesústaj
oʼdukpo, onhuahuaydepo,
\p —‍¿Menokaʼ i̱yo̱da iʼtiak, Huamanmadikaʼeri?
—‍Oʼnonaʼuy.
\p
\v 26 —‍Konig Diosyoʼda teyda kaʼdik o̱ʼe̱, do konigti
ijkaʼdemeʼnigʼa kenda doʼtaj oknopo̱e̱hueʼ o̱ʼnene. Pan
ijbiameʼnok opudomey dapoteyaʼda moʼbapemeʼpo, kenaʼpo
doʼtaj oʼdukne. Aypoyoʼda boʼpakne. Buttida oʼnonaʼne.
\v 27 Aypo kenpaʼti katetapiʼ boʼeretpakpiʼ, aʼbaeyaʼpo
moʼbaaʼpopiʼ, boʼkikaʼnigʼa aypo kenpaʼti nogda aʼti ehueʼ
o̱ʼe̱a̱po. Konige̱po aypoyoʼda kenpaʼti katetapiʼ eretpakhueʼ
yaneʼ. Kikahueʼ yaneʼ. Aypoanayo moʼmanoteypakpo sueʼpiʼ
moʼnoeaʼne. Doanayo Diosere manoeanhuahuikaʼdik
o̱ʼnene. Do huabokerek i̱jje̱nok Diosa meʼtaʼmonaʼuyne.
Doʼtaj mederetpakpo meʼnoknopo̱e̱ʼ. Diosa beʼtihuapoknok
ijbayareaʼmey kenpaʼti konig Diosyoʼda teyda kaʼdik o̱ʼe̱,
konigti ijkamey. —‍Jesúsa oʼmanaʼuy.
\p
\v 28 —‍Diosen eʼkaʼtaʼ oʼpaki. ¿Diosen huaʼa aʼkayaʼpo kate
kaʼdik o̱ʼe̱y oroʼ? —‍Jesústaj namaʼda oʼnonaʼuy.
\p
\v 29 —‍Opudte Diosa meʼtaʼmonaʼuyne. Doʼtaj
meʼnoknopo̱e̱ʼ. Kenda Diosa oʼpak. —‍Jesúsa oʼmanaʼuy.
\p
\v 30 —‍Oroʼomeya̱ ontaj meʼnoknopo̱e̱ʼpo konig Diosyoʼda
oʼkikaʼ, konigti yakaʼ. Konig Diosa ʼuruaʼnanada oʼkikaʼ
o̱ʼna konigti ekaʼnayo oknopo̱e̱a̱poy. Diosyaʼ oʼtiakuyate
oknopo̱e̱a̱poy.
\v 31 Aʼnennada oroʼomeyen adhueaʼpaneʼtaj Moisésa
oʼbatohuaeʼikaʼuyate. Aratbut ehueʼ e̱ʼhua̱e̱ʼi̱kaʼyo
oʼbatohuaʼikaʼuyate. “Maná aypo kurudya̱ʼ
oʼbatobapeʼikaʼuyate.” Apagbaʼ oaʼ. —‍Jesústaj oʼnonaʼuy.
\p
\v 32,33 —‍Aʼnennada kurudya̱ʼ maná aypo Moisésa
oʼbayokikaʼuyate namaʼda moʼnopo̱e̱nigʼa Moisésa bayokhueʼ
o̱ʼu̱yate. Kurudya̱ʼ Diosa maná aypo oʼbayokonhuahuaʼikaʼuyate.
Maná ayponayo manoeanhuahuikahueʼdik o̱ʼe̱. Kurudya̱ʼ
doʼhued Apag Dios meʼtaʼmonaʼuyne. Konig aypo
huamanoeanhuahuikaʼeri i̱jje̱y. Aratbuttaj
aʼmanoeanhuahuikayaʼpo ijtiakuy. —‍Jesúsa oʼmanaʼuy.
\p
\v 34 —‍Kenda aypo boʼyokikaʼne, huairi. —‍Jesústaj
nopoenkahueʼ e̱ʼe̱a̱da oʼnonaʼuy.
\p
\v 35 —‍Konig aypo huamanoeanhuahuikaʼeri i̱jje̱po
aratbuttaj manoeanhuahuikaʼdik i̱jje̱y. Ayaʼada
onʼnopoʼkorepo doʼtaj moknopo̱e̱po moʼnigpe̱i̱kaʼpo konig
noteyda durugnopoʼda o̱ʼneonhuahuikaʼapo.
Onʼnopoʼnoeyonhuahuikaʼapo.
\v 36 Opudomeynayo doʼtaj pakhueʼ o̱ʼnepo doʼtaj
oknopo̱e̱hueʼ o̱ʼnene. Konig huaboaʼda oʼnonaʼpo, doʼtaj
eʼtiahuaymeʼpiʼ oknopo̱e̱hueʼ o̱ʼnene.
\v 37 Apag Diosa doʼte ayaʼtada moʼtaʼmonaʼne doʼtaj
moknopo̱e̱a̱pone kenpaʼti doʼtaj moʼnigpe̱i̱kaʼapone.
Kenomeya̱ doʼtaj meʼnoknopo̱e̱nok ijbaeʼapoy, maenhueʼdik
i̱jje̱a̱poy.
\v 38 Kenaʼpo kurudya̱ʼ ijtiakuy Diosa meʼtaʼmonaʼuynok.
Keʼnen eʼkaʼtaʼ ijpakpo ijtiakuy. Do huataʼda eʼkaʼtaʼ pakhueʼ
i̱jje̱po ijtiakuy.
\v 39 Huakkaʼ Diosataj huaknopo̱e̱ʼeri meʼbayokuyne nogtipiʼ
titikhueʼ moʼe̱a̱pone. Keneʼhua̱ya̱ʼ huameʼnoete ayaʼtada
ijmanoyhuada̱ʼapoy. Kenda oʼpakpo Diosa meʼtaʼmonaʼuyne.
\v 40 Diosa oʼpakpo kenomey doʼtaj oʼnoknopo̱e̱ne, do
Diosen Huasiʼpo o̱ʼe̱ oʼnoknopo̱e̱po kenda moʼbatiaʼpakpo
Diosere onʼnoeonhuahuikaʼpo keneʼhua̱ya̱ʼ huameʼnoete
onteʼti kenomeytaj ijmanoeaʼapoy. —‍Jesúsa oʼmanaʼuy.
\p
\v 41 “Do konig aypo huamanoeanhuahuikaʼeri i̱jje̱y.
Kurudya̱ʼ doʼhued Apag Diosa meʼtaʼmonaʼuyne.” Jesúsa
oaʼnok judío huairia Jesústaj onʼhuadiaypo
onʼhuamahui̱ʼi̱a̱ʼpo,
\p
\v 42 —‍In huabokerek Jesús o̱ʼe̱. Joséensiʼpo o̱ʼe̱. Keʼnen huaoj
keʼnen hua̱ye̱kon o̱ki̱e̱y. “Kurudya̱ʼ Diosa meʼtaʼmonaʼuyne.”
¿Menaʼpo kenpaʼ aʼdik ya̱ʼe̱? —‍Judío huairia onpapayoʼ onʼbatiaʼpakuy.
\p
\v 43 —‍Onpapayoʼ huaahueʼ meneʼ.
\v 44 Apag Diosa meʼtaʼmonaʼuyne. Huakkaʼtada Diosa
oʼbatihuapokpo, doʼtaj huaknoponhuaʼ oʼbatihuapok. Kenomey
huaknopo̱e̱ʼeritaj ijmanoyhuada̱ʼapoy. Keneʼhua̱ya̱ʼ
huameʼnoete ijmanoyhuada̱ʼapoy. Diosere
onʼnoeonhuahuikaʼapo.
\v 45 “Diosa ayaʼtada oʼmanopo̱e̱a̱ʼapo.” Diosen huaʼa
huamanbatiaʼpakeria oʼmadoyaʼuyate. Konige̱po ayaʼada Apagtaj
onʼpe̱e̱po oʼnoknopo̱e̱po doʼtakon moʼnigpe̱i̱kaʼapone.
\p
\v 46 Apag Diosyaʼ ijtiakuy, doʼayoʼda Apagtaj ijtiahuayikaʼuy.
Nogomeynayo Apagtaj tiahuayhueʼ o̱ʼnikameʼte.
\v 47 Kenomey doʼtaj oʼnoknopo̱e̱po Diosere
onʼnoeonhuahuikaʼapo. Buttida ijjay.
\v 48 Do konig aypo huamanoeanhuahuikaʼeri i̱jje̱y.
Aratbuttaj ijmanoeanhuahuikaʼapoy.
\v 49 Aratbut ehueʼ e̱ʼi̱kaʼyo opuden adhueaʼpaneʼ
o̱ʼneonhuahuikaʼuyate. Diosa maná aypo eʼbayokikaʼtada Diosere
noeonhuahuikahueʼ o̱ʼnuyate. Onʼmabueyʼuyate.
\v 50 Nog aypo o̱ʼe̱. Huamanoeanhuahuikaʼ aypo o̱ʼe̱.
Donayo konig huamanoeanhuahuikaʼ ayponig i̱jje̱y.
Kurudya̱ʼ ijtiakuypo. Konig huamanoeanhuahuikaʼ aypo
enʼbapeʼnayo, bueyhueʼ onʼnoeonhuahuikaʼapo. Kenda
huamanoeanhuahuikaʼ ayponig i̱jje̱y.
\v 51 Aypo huamanoeanhuahuikaʼ do konig aypo i̱jje̱y.
Kurudya̱ʼ Diosenbayaʼ ijtiakuypo, ayaʼada in aypo eʼbapeʼnayo
Diosere onʼnoeonhuahuikaʼapo. Ken huamanoeanhuahuikaʼ
aypo konig doʼhued hua̱so̱ʼ o̱ʼe̱. Aratbut
kanʼnoeonhuahuikeʼpo ijmanigbueyapoy. Doʼtaj oknopo̱e̱ʼdik
moʼe̱ne. —‍Oʼmanbatiaʼpakpo kenda Jesúsa oʼmanaʼuy.
\p
\v 52 Huayahuaya judío huairia onʼbatiaʼpakpo,
\p —‍Menpaʼ keʼnen hua̱so̱ʼ peʼdik o̱ʼe̱nok yaaʼ.
—‍Onʼbatiaʼpakuy.
\p
\v 53 —‍Do Huabokerek i̱jje̱nok Diosa meʼtaʼmonaʼuyne doʼhued
hua̱so̱ʼ bapehueʼ e̱e̱ʼnayo, doʼhued mimi mayhueʼ e̱e̱ʼnayo
onteʼti Diosere noeonhuahuikahueʼ moʼe̱a̱pone.
\v 54 Kenomey doʼhued hua̱so̱ʼ onʼbapeʼpo kenpaʼti doʼhued
mimi onʼmaiʼpo Diosere onʼnoeonhuahuikaʼapo.
Diostehuapaʼ keneʼhua̱ya̱ʼ huameʼnoete kenomeytaj
ijmanoeaʼapoy.
\v 55,56 Kenda oʼnonaʼnig doʼhued hua̱so̱ʼ
huamanoeanhuahuikaʼ aypo o̱ʼe̱. Doʼhued mimi buttida
huamaiʼ mimi o̱ʼe̱. Ayaʼada doʼhued hua̱so̱ʼ onʼbapeʼpo
doʼhued mimi onʼmaiʼpo doyoyoʼ o̱ʼnikaʼ. Do kenpaʼti
kenomeyere i̱ji̱kay.
\v 57 Doʼhued Paga̱ meʼtaʼmonaʼuyne. Apaga
oʼnoeonhuahuikaʼpo doʼtakon meʼnoeanhuahuikaʼne. Ayaʼada
konig doʼtaj moʼbapeʼpo doʼtaj moknopo̱e̱po doere
onʼnoeonhuahuikaʼapo.
\v 58 Do konig aypo huamanoeanhuahuikaʼeri ka̱e̱ʼpo
kurudya̱ʼ Diosa meʼtaʼmonaʼuyne. Aʼnennada
adhueaʼpaneʼtaj Diosa maná aypo kurudya̱ʼ oʼbayokikaʼuyate.
Eʼbapeʼikaʼada nogok onʼmabueyʼuyate. Ayaʼda doʼtaj
moknopo̱e̱po konig huamanoeanhuahuikaʼ aypo onʼbapeʼpo
Diosere onʼnoeonhuahuikaʼapo. —‍Jesúsa judío huairitaj
oʼmanaʼuy.
\p
\v 59 Capernaum huakkaʼ jakyo judío aratbuten hua̱i̱takeʼ jakyo
Jesúsa oʼmanmadikaʼpo kenda oʼmanaʼuy.
\s Jesúsen huaʼa oʼmanoeanhuahuikaʼapo.
\p
\v 60 Sueʼda huakkaʼmon Jesúsen huanigpe̱i̱kaeria
onʼpeeondepo,
\p —‍Jesúsa oʼmanmadikaʼ kenda kahueʼdik o̱ʼe̱ne. Menpaʼ
beʼapi nigpe̱e̱ʼdik ya̱ʼnet. —‍Kenomeya̱ onʼbatiaʼpakʼuy.
\p
\v 61 Keʼnen huanigpe̱i̱kaʼeri kenda onʼbatiaʼpakpo Jesúsa
oʼnopo̱e̱po,
\p —‍¿Doʼhued huaʼataj menpaʼ nigpe̱e̱hueʼdik moʼe̱?
\v 62 ¿Do Huabokerek i̱jje̱nok Diosa meʼtaʼmonaʼuyne ke̱yo̱
kurudyo̱ i̱ji̱kaʼuy eʼbehuikte opuda̱ onʼtiahuaydepo menpaʼ
doʼtaj moknopo̱e̱a̱pet?
\v 63 Diosen Noki̱re̱ga̱ oʼmanoeanhuahuikaʼ.
Aratbuten
hua̱so̱ʼa̱nayo manoeanhuahuikahueʼ o̱ʼe̱. Doʼhued huaʼa
ijmanay konig Diosen Noki̱re̱g oʼmanoeanhuahuikaʼapo.
Doʼhued huaʼataj moknopo̱i̱kaʼpo moʼnigpe̱i̱kaʼpo Diosere
moʼnoeonhuahuikaʼapone.
\v 64 Kenda ijjaʼdenigʼa opudomey sueʼada oknopo̱e̱hueʼ
o̱ʼnene. —‍Jesúsa oʼmanaʼuy.
\p Ken huakkuruda Jesúsa aʼmanmadikayaʼpo tiakhued o̱ʼe̱poed
beʼati doʼtaj oknopo̱e̱hueʼ meʼneapone Jesúsa
oʼnopo̱i̱kaʼuyate. Kenpaʼti Judasa kadarakeʼpo
beʼtitotiakapone Jesúsa oʼnopo̱e̱ʼuyate.
\p
\v 65 —‍Do Diosen Huasiʼpo i̱jje̱nok Diosa meʼtaʼmonaʼuyne.
Doʼtaj kanoknopo̱e̱ʼpo Diosa eʼtihuapokenayo oknopo̱e̱ʼdik
moʼe̱ne. Doʼtaj kanoknopo̱e̱ʼpo Diosa tihuapokhueʼ e̱e̱ʼnayo
oknopo̱e̱hueʼdik moʼe̱ne. —‍Jesúsa oʼmanaʼuy.
\p
\v 66 Kenda eʼmanadeʼte huakkaʼada keʼnen
huanigpe̱i̱kaʼeriomeya̱ oʼnoknopo̱e̱batikuy. Onteʼti kenere
taʼhuaehueʼ o̱ʼneʼuy.
\p
\v 67 —‍¿Opud kenpaʼti menpaʼ eknopo̱e̱batiktaʼ boʼpak?
—‍Jesúsa oroʼ doce huamataʼmonaʼeritaj monaʼuyne.
\p
\v 68 —‍Ehueʼ, Huairi, o̱ʼna huanoeonhuahuikaʼ huaʼa
onaʼikaʼne.
\v 69 Cristo i̱ʼe̱po, Diosen Huasiʼpo i̱ʼe̱po ontaj Diosa
bektieʼeaʼuyate, Huairi. —‍Simón Pedroa onaʼuy.
\p
\v 70 —‍Opud, doce huamataʼmonaʼeri ijbaktieʼeaʼuynigʼa, opuda̱
nogtatida totoʼ huairia moʼnopoʼto̱e̱a̱pone. —‍Jesúsa
monaʼuyne.
\v 71 Simónensiʼpo Judas Iscariotetaj oʼbatiaʼpakpo kenaʼpo
ken doce huanigpe̱i̱kaʼeriyaʼ kadarakeʼpo oʼbatotiakapo Jesúsa
oʼnopo̱e̱ʼuy.
\c 7
\s Jesúsen huamaʼbuya Diosen Huasiʼpo o̱ʼe̱ oknopounkahueʼ o̱ʼnuy.
\p
\v 1 Nogok Galilea huadaribayo Jesúsa nogi̱ti
oʼmanmadikadhuahuikaʼuy. Nogyo̱ nogyo̱ oʼhuaʼepo
oʼmanmadikadhuahuikaʼuy. Kenokaʼ Judea huadaribayo nogyo̱
nogyo̱ eʼmanmadikaʼtaʼ pakhueʼ o̱ʼu̱y Jesúsa. Judeayo judío
huairia eʼaraktaʼ onʼtipaknok.
\v 2 Aʼtimon judíoen baak fiesta o̱ʼe̱a̱po, Jerusalénya̱ʼ
o̱ʼe̱a̱po. Siete huameʼnoe fiesta o̱ʼe̱a̱po. Ayaʼda judío
huabokerek onʼbahuaʼapo.
\v 3 Kenokaʼ Jesúsen huamaʼbuy Jesúste onʼhuatiakdepo,
oʼnonaʼpo,
\p —‍I̱yo̱ Galileayo i̱kahueʼ ya̱e̱ʼ, egʼ. Fiestate Judeayo
monhuaʼ. Huakkaʼda o̱ʼnen huanigpe̱i̱kaʼeri Judeayo o̱ʼne,
kenpaʼti ʼuruaʼda Diosen iʼkikaʼnig kanʼtiahuayeʼpo.
Konige̱po Judeayo monhuaʼ.
\v 4 Ontaj huakkaʼada eknopo̱e̱ʼtaʼ eʼpaknayo, ontaj
huakkaʼada eʼnigpe̱i̱kaʼtaʼ eʼpaknayo i̱yo̱ sueʼda aratbut
eʼnahue̱ʼyo̱ ehueʼdik i̱ʼe̱ne. Ke̱yo̱ huakkaʼda aratbut
eʼnahue̱ʼyo̱ huaʼdik i̱ʼe̱ne. Huairi o̱ʼe̱ aratbuta
meʼnoknopo̱e̱ʼpo huakkaʼ aratbut e̱gkupopakyaʼ ʼuruaʼnanada
yamanigkikaʼ, konig Diosayoʼda kaʼdik o̱ʼe̱ yamanigkikaʼ,
yabayareaʼ. —‍Jesúsen huamaʼbuya Jesústaj oʼnonaʼuyate.
\p
\v 5 Diosa Jesústaj oʼtaʼmonaʼuyate kenpaʼti Jesús Diosen
Huasiʼpo o̱ʼe̱ Jesúsen huamaʼbuy oknopo̱e̱hued e̱ʼe̱a̱da
kenpaʼ oʼnonaʼuyate. Jesúsere ehuaʼtaʼ onʼpakpoda kenpaʼ
oʼnonaʼuy.
\p
\v 6 —‍Oy huameʼnoenayo fiesta Jerusalényo̱ huahueʼdik
i̱jje̱y. Opudnayo menokapiʼ boʼpakpo huaʼdik moʼe̱ne.
\v 7 Huakkaʼ aratbuta doʼtaj oknopo̱e̱hueʼ o̱ʼne. Konigti
oknopo̱e̱hueʼ o̱ʼnene doʼtaj. Konige̱po kenomeya̱ opudtaj
huadiayhueʼ moʼe̱ne. “Diostaj dakhueaʼ boʼkikaʼne. Diostaj
nigpe̱e̱hueʼ moʼi̱kaʼne.” Kenomey oknopo̱e̱hueʼ
hua̱e̱ʼeritaj ijmanikaʼnok konige̱po doʼtaj diga̱ʼda
menhuadiayikaʼne.
\v 8 Fiestayo yanʼbahuatiʼ. Donayo huahued i̱jje̱y. Oy
huahueʼdik i̱jje̱y. —‍Jesúsa huamaʼbuytaj oʼmanaʼuy.
\p
\v 9 Kenda Jesúsa eʼnadeʼte huamaʼbuya oʼnokhuaʼuy.
Jesúsnayo Galileayo o̱ʼi̱kaʼuy.
\s Nogok baak fiestayo Jesús oʼhuaʼuy. Judío aratbuttaj
oʼmanmadikanhuaʼuy.
\p
\v 10 Jesúsen huamaʼbuy kenpaʼti ayaʼ huabokerekomey
fiestate Jerusalényo̱ onʼhuaʼdepo dagte aratbutbahueʼ o̱ʼnenok
Jesúskon Jerusalényo̱ oʼhuaʼuy. Aratbut Jesústaj tiahuayhueʼ
oʼmaepo Jesús oʼhuaʼuy.
\v 11 Jesús Jerusalényo̱ o̱kye̱hued e̱e̱ʼte judío huairiomeya̱
Jesústaj oʼnonmabopo,
\p —‍¿Kenbokerek meyon ya̱ʼe̱? —‍Judío huairia onʼhuaaʼpo.
\p
\v 12 Jesústaj huakkaʼada onʼtiaʼpakpo, “Huadakda o̱ʼe̱.”
Huakkaʼada onʼtiaʼpakpo, “Dakhueʼda o̱ʼe̱. Namaʼda
oʼmanmadikaʼ. Aratbuttaj engaña oʼmagkaʼ.” Nogomey
huakkaʼada onʼtiaʼpakuy.
\p
\v 13 Huayahuaya utak utakaʼ onʼbatiaʼpakpo judío huairitaj
onʼmeʼpukpo huakkaʼ aratbuttaj ʼuttaʼ batiaʼpakhueʼ o̱ʼnuy.
ʼUttaʼ Jesústaj batiaʼpakhueʼ o̱ʼnuy.
\p
\v 14 Fiesta bapaʼmeʼnoe o̱gkaʼdepo konig fiesta nopote
e̱e̱ʼte Diosen jakyo Jesús oʼhuaʼpo o̱kye̱depo huaboaʼda
oʼmanmadikaʼuy. Huakkaʼda aratbut e̱gkupopakdeʼte
oʼmanmadikaʼuy. ʼUruaʼnada oʼmanmadikaʼuy.
\v 15 Ken judío huairi Jesústaj onʼpe̱e̱depo onʼmepuʼkepo
onʼhuadiaypo,
\p —‍Oroʼen escuelayaʼ Diosbaʼ madoyahueʼ o̱ʼi̱kaʼuy Jesús.
Kentaj onmadikahueʼ o̱ʼi̱kaʼuy. Konige̱po sigpiʼ
nopo̱e̱hueʼ o̱ʼe̱. Buttida oʼnonaʼne. —‍Judío huairia
Jesústaj oknopo̱e̱hueʼ o̱ʼnepo huakkaʼ aratbuttaj namaʼda
onʼmanaʼuy.
\p
\v 16 —‍Doʼhuedda ijpakpo manmadikahueʼ i̱jje̱y. Diosa
meʼtaʼmonaʼuyne. Kenda Diosa meʼnopo̱e̱a̱ʼnok
ijmanmadikikay. Diosen buttida huaʼa ijmanmadikikay.
\v 17 Doʼtaj onʼpe̱e̱po ayaʼada Diostaj eʼnigpe̱i̱kaʼtaʼ
onʼpakpo kenda Diosa meʼnopo̱e̱a̱ʼnig ijmanmadikikay dakaʼ
kenda onʼnopo̱e̱a̱po. Doʼhuedda ijnopo̱e̱po manmadikahueʼ
i̱jje̱y kenomeya̱ kenpaʼti onʼnopo̱e̱a̱po.
\v 18 Nogomey huakkaʼada onda onʼnopo̱e̱po
onʼmanmadikikaʼ. “Keʼna huadakda huamanmadikaʼeri o̱ʼe̱.”
“Huadakda o̱ʼe̱.” “Huairi o̱ʼe̱.” Aratbuta eʼhuaaʼte
eʼpe̱e̱taʼ onʼpakpo onʼmanmadikikaʼ. Doʼtanayo Diosa
meʼtaʼmonaʼuyne. “Huadaknanada o̱ʼe̱ Dios.”
“Huaboroʼnanada huairi o̱ʼe̱ Dios.” Opuda̱ eʼhuaaʼte
eʼpe̱e̱taʼ ijpakpo buttida huaʼayoʼda ijmanmadikikay. Sigpiʼ da
ahueʼ i̱ji̱kay.
\p
\v 19 Moisésa Diosen huaʼa oʼmanaʼuyate. Diosen huaʼa
buttida o̱ʼe̱. Moisésbaʼ moʼbaʼto̱i̱kaʼne. Kenda
eʼnopo̱e̱a̱da ayaʼada nigpe̱e̱hueʼ moʼi̱kaʼne. Moisésbaʼtaj
nigpe̱e̱hueʼ moʼi̱kaʼne. ¿Doʼtaj menaʼpo eʼaraktaʼ
onʼtipak? —‍Jesúsa judío huairitaj oʼmanaʼuy.
\p
\v 20 —‍Dakhueʼ noki̱re̱ga̱ meʼnopoʼto̱e̱nok huasegda i̱ʼe̱po
iaʼne. Beʼapiʼ ontaj eʼaraktaʼ pakhueʼ o̱ʼne. —‍Aratbuta
Jesústaj namaʼda oʼnonaʼuy.
\p
\v 21 —‍Huabokerek treinta y ocho huabayok dakhueʼda o̱ʼe̱po
onpahuedonhuahuikaʼuyate. Okmapi̱e̱ʼahuaddik huameʼnoete
ijyareameʼnok huakkaʼ moʼmepuʼkeʼpo doʼtaj onʼhuadiayne.
\v 22 Huabokereksiʼpotaj yo̱bedtaj huasiʼdak oktegdik
yanikatiʼ, opudomeyen adhueaʼpaneʼa̱ monaʼuyate.
Moisésa konigti monaʼuyate. Konige̱po Moiséstaj
moʼnigpe̱e̱po huabokereksiʼpotaj ocho huameʼnoe eʼnoedeʼte
huasiʼdak boktegikaʼ. Okmapi̱e̱ʼahuaddik huameʼnoe e̱e̱ʼpiʼ
boktegikaʼne.
\v 23 Okmapi̱e̱ʼahuaddik huameʼnoete kahueʼdik moʼe̱
opudomey moʼmanaʼikaʼnigʼa okmapi̱e̱ʼahuaddik huameʼnoe
e̱e̱ʼpiʼ Moiséstaj moʼpe̱e̱po huabokereksiʼpoensiʼdak
boktegikaʼne. Huabokerek dakhueʼda o̱ʼe̱po treinta y ocho
huabayok enpahuedonhuahuikadeʼte okmapi̱e̱ʼahuaddik
huameʼnoete ijyareameʼnok doʼtaj onhuadiaymeʼne.
¿Menaʼpo onhuadiaymeʼ? Namaʼnanada onhuadiaymeʼne.
\v 24 Doʼa eʼyareaʼte onʼtiahuaymeʼpo dakhueaʼ oʼkaʼ namaʼda
onʼtinopo̱e̱po onʼhuadiaypo doʼtaj eʼaraktaʼ onʼtipakne.
Konige̱po Dios ken huabokerektaj oʼmatinepahuiʼpo diʼ
o̱ʼe̱nok ijyareaʼmey. Opudomey kenda nokotdik moʼe̱.
Okmapi̱e̱ʼahuaddik huameʼnoete eʼbayareaʼ huadakda o̱ʼe̱
yanʼnopo̱e̱ʼ. —‍Jesúsa oʼmanaʼuy.
\s Diosa buttida oaʼikaʼ. Diosyaʼ ijtiakuy. Jesúsa oaʼuy.
\p
\v 25 —‍In huabokerektaj judío huairia aʼarakyaʼpo
oʼderetpakpo
\v 26 i̱yo̱ Diosen jakyo eʼmanmadikaʼte judío huairinayo
tohuahueʼ o̱ʼne. Diosa oʼtaʼmonaʼuy, Diosen Cristo o̱ʼe̱.
Dapiʼ judío huairia kenda oknopo̱e̱hueʼ o̱ʼne.
\v 27 Keʼna Cristo ehueʼ o̱ʼe̱. Konige̱po Jesús Galileayo
hua̱e̱ʼeri o̱ʼe̱ oʼnopo̱e̱y. Cristo eʼtiakdeʼte meya̱ʼ
yaʼtiaket nopo̱e̱hueʼdik o̱ʼe̱a̱poy. —‍Sueʼda Jerusalényo̱
hua̱e̱ʼeria huaboaʼda namaʼda huayahuaya onʼmanbatiaʼpakuy.
\p
\v 28 Kenda aratbuta namaʼda onʼbatiaʼpakpo Jesúsa
oʼnopo̱e̱po huakkaʼ aratbut e̱gkupopakte oʼmanmadikaʼpo
ʼuttaʼda oʼmanaʼpo,
\p —‍Doʼtaj o̱ki̱e̱hueʼ o̱ʼnene kenpaʼti ke̱ya̱ʼ oʼtiakuy
opudomeya̱ oknopo̱e̱hueʼ o̱ʼnene. Do huataʼda ijpakpo
tiakhueʼ i̱jje̱ʼuy. Dios kurudyo̱, hueretda Diosa oʼpakpo
meʼtaʼmonaʼuyne. Opudomeynayo hueretda Diostaj
oknopo̱e̱hueʼ moʼe̱ne.
\v 29 Hueretda Diosa meʼtaʼmonaʼuynok Diosyaʼ ijtiakuy.
Konige̱po Diostaj yoknopo̱i̱kay. Diostaj yo̱ki̱e̱y. Buttida
aʼdik i̱jje̱y. —‍Jesúsa ʼuttaʼda oʼmanaʼuy.
\p
\v 30 Jesústaj judío huairia onʼhuadiaypo eʼbakuda̱ʼ jakyo
enʼtohuaʼtaʼ enʼtipaktada Diosa Jesústaj oʼtiokaʼnok
tohuahueʼdik o̱ʼnuy. Jesús kenok huabuey ehued o̱ʼta̱e̱nok.
\v 31 Nogomey huakkaʼ judío aratbut o̱gkupopakpo Jesústaj
onʼpe̱e̱po Jesústaj oʼnoknopo̱e̱ʼuy.
\p —‍Kenyoʼda Diosen Cristo ʼuruaʼda kikaʼdik o̱ʼe̱a̱po. In
huabokerek kenda oʼkikaʼpo. In huabokereka aratbuttaj
oʼbayareaʼ. Dapiʼ Diosen Cristo o̱ʼe̱ Jesús. —‍Aratbuta
onʼbatiaʼpakuy.
\s Diosen jakyo kente Jesúsa eʼmanmadikaʼte fariseo huairia sorotataj onʼmataʼmonaʼuyate. Jesústaj kanʼtohueʼpo onʼmataʼmonaʼuyate.
\p
\v 32 Jesús Diosen Cristo o̱ʼe̱. Aratbuta onʼbatiaʼpakpo
fariseo huairi kenpaʼti sacerdote huamationaʼpakikaʼeri
huairiomeya̱ onʼtipe̱e̱depo onʼhuadiaypo Jesústaj
kanʼtohueʼpo kenomeyen sorotataj onʼmataʼmonaʼuyate.
\v 33 Kenokaʼ huakkaʼ aratbut e̱gkupopakte Jesúsa
oʼmanaʼpo,
\p —‍Opudomeyere sueʼda puug i̱jje̱a̱poy. Kenokaʼ Diosyo
ijkumejapoy. Diosa meʼtaʼmonaʼuynig ke̱yo̱da ijhuaʼapoy.
\v 34 Nogok doʼtaj oʼdukaponigʼa huahuayhueʼdik o̱ʼneapone.
Doʼtaj oknopo̱e̱hueʼ o̱ʼnepo konige̱po doʼtaj huatiakhueʼdik
o̱ʼneapone. —‍Jesúsa oʼmanaʼuy.
\p
\v 35 Judío aratbuta onʼpe̱e̱depo huayahuaya onʼbatiaʼpakpo,
\p —‍¿In huabokerek kaʼtiaʼ yaaʼ? ¿Meyon yahuaʼapet oroʼ
huahuayhueʼdik o̱ʼe̱a̱pone? Nog huadaribayo ke̱yo̱ judío
aratbut onʼmamonʼuyate nog aratbuttaj kamanmadikeʼpo
yahuaʼapetdapiʼ.
\v 36 “Doʼtaj oʼdukaponigʼa huahuayhueʼdik o̱ʼneapone.”
“Doʼtaj oknopo̱e̱hueʼ o̱ʼneapo konige̱po doʼtaj
huatiakhueʼdik o̱ʼneapone.” Jesúsa oʼmanaʼ. ¿Kaʼtiaʼ
yaaʼ? —‍Judío aratbut huayahuaya onʼbatiaʼpakpo.
\s Diosen Noki̱re̱ga̱ huaknopo̱e̱ʼeriennopoʼtaj oʼmanopoʼto̱e̱apo. Diosa oʼmanoeanhuahuikaʼapo. Diosere onʼnoeonhuahuikaʼapo.
\p
\v 37 Fiesta keneʼhua̱ya̱ʼ huameʼnoete ʼuruaʼda
o̱gkikaʼuyate. ʼUrumeʼnoe o̱ʼi̱kaʼuyate. Kenmeʼnoete
Jesúsa oʼbopo huakkaʼ aratbuttaj ʼuttaʼda oʼmanaʼpo,
\p —‍Beʼapiʼ durugnopoʼ e̱e̱ʼtaʼ eʼpaknayo doʼtaj
kanʼnoknopo̱e̱ʼ doʼtaj kanʼnigpe̱e̱ʼ
ijmanopoʼdurugpakikaʼapoy. Konigti beʼapiʼ maymaya̱ʼ eaʼnayo
hue̱ʼe̱y ijbayoknok onʼdurugpakapo.
\v 38 Konig Diosbaʼ oaʼpo, konig huakkaʼ hue̱ʼe̱y
onʼmayikaʼpo durugda o̱ʼneonhuahuikaʼpo konigti kenomey
doʼtaj beknopo̱e̱po durugnanada onʼnoeonhuahuikaʼapo,
Diosere durugteda onʼnoeonhuahuikaʼapo. Nogomeytakon
onʼmanoeanhuahuikaʼapo. —‍Jesúsa oʼmanaʼuy.
\p
\v 39 Jesúsen huaknopo̱e̱ʼeritaj Diosen Noki̱re̱ga̱
oʼmanopoʼto̱e̱a̱po. Diosen durugteda o̱gkikaʼapo. Jesúsa
kenpaʼ oʼbatiaʼpakuy. Enʼbatiaʼpakte Diosa keʼnen Noki̱re̱g
huaknopo̱e̱ʼeritaj manigtaʼmonahued o̱ʼe̱po konige̱po
Jesús bueyhued o̱ʼe̱po, kurudyo̱ huahued o̱ʼe̱po, Diosere ehued
o̱ʼe̱po.
\s Jesús Diosen huamanbatiaʼpakeri o̱ʼe̱. Huakkaʼ oʼnoknopo̱e̱po. Diosa oʼtaʼmonaʼuyate, Diosen Cristo o̱ʼe̱. Nogomeya̱ oʼnoknopo̱e̱. Diosa taʼmonahueʼ o̱ʼe̱. Konige̱po Cristo ehueʼ o̱ʼe̱. Nogomeya̱ oʼnoknopo̱e̱po.
\p
\v 40 Kenda Jesúsa eadeʼte,
\p —‍Kentaj oʼnonmabodhuahuikaʼuy Diosen huamanbatiaʼpakeri
Jesús o̱ʼe̱. —‍Huakkaʼada oʼdaʼuy.
\p
\v 41 —‍Diosa oʼtaʼmonaʼuyate. Cristo o̱ʼe̱. —‍Nogomeya̱
oʼdaʼuy.
\p —‍Ehueʼ. Cristo ehueʼ o̱ʼe̱. Galilea hua̱e̱ʼeri o̱ʼe̱.
Galileayo hua̱e̱ʼeria Cristo ehueʼdik o̱ʼe̱a̱po.
\v 42 Cristo David huairien adhueaʼ huayayo o̱ʼe̱a̱po. Belényo
oʼsiʼpoe̱ʼapo kenteda David oʼsiʼpoe̱ʼuyate. —‍Nogomeya̱
oʼdaʼuy.
\p
\v 43 Huakkaʼada Jesústaj oʼnoknopo̱e̱ʼuy. Nogomeya̱
oknopo̱e̱hueʼ o̱ʼnuy.
\v 44 Huakkaʼada kanʼkude̱ʼpo eʼtohuaʼtaʼ eʼpakada tohuahueʼ
o̱ʼnuy.
\s Diosa Jesústaj oʼtaʼmonaʼuyate kenda judío huairia oknopo̱e̱hueʼ o̱ʼnuyate.
\p
\v 45 Fariseo huairitaj kenpaʼti sacerdote huairitaj
kenomeyen sorotataa onʼkumeʼuy. Jesústaj totiakhueʼada
onʼkumeʼuy.
\p —‍Jesústaj yanʼtotiak. Oʼnonaʼne. ¿Menaʼpo totiakhueʼ
moʼe̱? —‍Huairia onʼmanaʼuyate.
\p
\v 46 —‍In huabokerek ʼuruaʼnanada oʼmanaʼ. Ken konig
manahueʼ o̱ʼi̱kaʼuy. ʼUruaʼnanada oʼmanmadikaʼ. —‍Sorotataa
onʼmanaʼuyate.
\p
\v 47 —‍Menpaʼ Jesúsa opudomeytakon engaña mogkaʼde.
\v 48 Oroʼomey ayaʼ huairiada oknopo̱e̱hueʼ o̱ʼe̱y. —‍Fariseo
huairikon oknopo̱e̱hueʼ o̱ʼne.
\v 49 Jesúsen huaknopo̱e̱ʼeria Moisésen huaʼataj
nopo̱e̱hueʼ o̱ʼne. Diosa castiga kamagkeʼ. —‍Fariseo huairi
onʼhuadiaypo sorotataj huairitaj onʼmanaʼuyate.
\p
\v 50 Nicodemo fariseo huairi o̱ʼe̱po aʼnenda sikyo Jesústaj
aʼbatiaʼpakyaʼpo oʼtaʼhuadbedʼuyate. Nicodemoa nogomey fariseo
huairitaj oʼmanaʼpo,
\p
\v 51 —‍Betapiʼ, “Dakhueaʼ oʼkaʼ, castiga ka̱gkeʼpo.” Kenpaʼ
ahued kenbokerektaj pe̱e̱ʼdik moʼe̱. Katepiʼ dakhueaʼpiʼ oʼkaʼ
huakkuruda nopo̱e̱ʼdik moʼe̱. Kenpaʼ Moisésen eʼmanaʼ
o̱ʼe̱. Kenda opudomey moʼnopo̱e̱t. —‍Nicodemoa oʼmanaʼuy.
Nog fariseo huairitaj oʼmanaʼuy.
\p
\v 52 —‍Kaʼtiaʼ, o̱ʼnakon Galilea hua̱e̱ʼeri i̱ʼe̱po iaʼ.
Apagbaʼ yatiahuayʼ. Galilea hua̱e̱ʼeri Diosen huamanbatiaʼpakeri
ehueʼdik o̱ʼe̱a̱po. Cristo Galileayaʼ tiakhueʼdik o̱ʼe̱a̱po.
Apagbaʼtaj iʼtiahuaypo kenda nopo̱e̱ʼdik i̱ʼe̱. —‍Judío
huairia onʼdiaypo namaʼda oʼnonaʼuy. Nicodemotaj
oʼnonaʼuyate.
\c 8
\s Ettoneʼ nogbokerekereda oʼbakdeʼuyate.
\p
\v 53 Jak eʼtahua̱e̱ʼyo ayaʼda onʼbahuaʼuyate.
\v 1 Jesúsnayo oteʼ Olivosyo oʼhuaʼuy.
\v 2 Emeʼte Diosen jakyo oʼkumeʼuy. Huakkaʼda enʼtikupopakte
Jesús oʼhuadpo huaboaʼda oʼmanmadikaʼpo.
\v 3 Aʼtimon sueʼda Moisésenbaʼ huamanmadikaʼeri sueʼda
fariseo huairi hua̱e̱ʼeriere Jesúste onʼhuatiakuy. Ettoneʼtaj
onʼhuatotiakpo, ken ettoneʼ nogbokerekereda eʼbakdejte
beʼapiʼ huaboaʼda onʼhuahuaydepo aratbutnopoyoda onʼboaʼpo,
\p
\v 4 —‍In ettoneʼ nogbokerekereda eʼbakdejte onʼhuahuayate.
\v 5 Ettoneʼ nogbokerekereda eʼbakdejnayo kabueyeʼpo huida̱
yanʼbapaʼikaʼ. Moisésbaʼa kenpaʼ monaʼne,
huamanmadikaʼeri. ¿Menpaʼ kaʼdik o̱ʼe̱ oroʼ? ¿Menpaʼ
iʼnopo̱e̱ o̱ʼna? —‍Moisésbaʼ huamanmadikaʼeri fariseoere
Jesústaj namaʼda kaeʼpo oʼnonaʼuy.
\p
\v 6 Kenda namaʼda Jesúsa kaeʼpo namaʼda oʼnonaʼuy.
Jesústaj namaʼda enaʼtadapiʼ kaeʼpo oʼnonaʼuy. Kenokaʼ
kenda eʼnonaʼte Jesús ʼikutagpite oʼhuadpo soroktaʼ huabaʼpia
oʼmadoyaʼuy.
\v 7 “¿Menpaʼ kaʼdik o̱ʼe̱ oroʼ?” “¿Menpaʼ iʼnopo̱e̱?”
Onteʼti Jesústaj namaʼda oʼnonaʼpo,
\p —‍Beʼapiʼ dakhueaʼ kahueʼ eʼhua̱ʼi̱kaʼa huakkuru huida̱
kapaʼeʼ. —‍Jesúsa judío huairitaj oʼmanaʼpo.
\p
\v 8 Onteʼti ʼikutagpite oʼhuadpo soroktaʼ huabaʼpia
oʼmadoyaʼpo.
\v 9 Ettoneʼ dakhueaʼ oʼkaʼ. Ayaʼada kenda enadeʼ nogtiaʼ
nogtiaʼ huaboaʼda oʼnokbahuukaʼpo oroʼomeykon Diostaj
dakhueaʼ oʼkaʼuy onʼnoponpo oʼnokhuaʼuy. Huakkuruda
huatoneʼa̱ oʼnokbahuaʼpo nogti nogtiaʼ oʼnokbahuukaʼpo
ayaʼada oʼnokbahuaʼdenok ettoneʼyoʼda oʼyahueʼuy.
Ettoneʼere Jesúsereyoʼda oʼnunʼuy.
\v 10 Jesúsa oʼbopo onaʼpo,
\p —‍¿Dakhueaʼ oʼkaʼ boʼhuaaʼnig men ya̱ʼne? Sigpiʼ castiga
o̱gkay huaahueʼ moʼe̱ne, ettoneʼ. —‍Jesúsa onaʼuy.
\p
\v 11 —‍Ayaʼ menokbahuaʼne. Sigpiʼ castiga o̱gkay huaahueʼ
meʼnene, Huairi. —‍Ettoneʼa̱ Jesústaj onaʼuy.
\p —‍Castiga kanogkeʼ dokon huaahueʼdik i̱jje̱y. Yahuatiʼ.
Onteʼti dakhueaʼ kahueʼ ya̱e̱ʼ. —‍Jesúsa ettoneʼtaj onaʼuy.
\s Jesús konig Diosen huakjey o̱ʼe̱. Diostaj oʼmaknopo̱e̱a̱ʼikaʼ. Jesúsen huanigpe̱i̱kaʼeri Diosere onʼnoeonhuahuikaʼapo.
\p
\v 12 Diosen jakyo huakkaʼ aratbut o̱gkupopakuy. Onteʼti
Jesúsa oʼmanmadikaʼapo,
\p —‍Diostaj huamaknopo̱e̱a̱ʼeri konig Diosen huakjey
i̱jje̱y. Konig Diosen huakjey i̱jje̱po aratbuttaj
ijmaknopo̱e̱a̱ʼikay. Konig o̱ʼe̱ Dios huanopo̱e̱ʼ
ijmaknopo̱e̱a̱ʼikay. Doʼtaj ayaʼada moknopo̱e̱po
moʼnigpe̱i̱kaʼpo Diostakon oʼnoknopo̱e̱a̱po. Huadakda
o̱gkikaʼpo Diosere onʼnoeonhuahuikaʼapo. Huakjeyyo
o̱ʼneonhuahuikaʼapo. Dakhueaʼ kikahueʼda sikki̱re̱gyo̱ ehueʼ
o̱ʼneonhuahuikaʼapo. —‍Jesúsa oʼmanaʼuy.
\p
\v 13 —‍Onda iʼnopo̱e̱po huataʼ iʼtiaʼpakne noga̱ konigti
kenda iaʼ tiaʼpakhueʼ o̱ʼnenok namaʼdapiʼ iaʼnok ontaj
nigpe̱e̱hueʼdik o̱ʼe̱y. —‍Fariseo huairiomeya̱ Jesústaj
oʼnonaʼuy.
\p
\v 14 —‍Do huataʼda ijtiaʼpaknig buttida o̱ʼe̱. Doʼtaj
nigpe̱e̱dik moʼe̱ konige̱po Apag Diosere i̱ji̱kaʼuy, Apag
Diosyaʼ ijtiakuy ijnopo̱e̱y. Onteʼti Diosyo ijhuaʼapoy
ijnopo̱e̱nok konige̱po doʼhued huaʼa buttida o̱ʼe̱
oknopo̱e̱dik moʼe̱ kenpaʼti doʼtaj nigpe̱i̱kaʼdik moʼe̱ne.
Opudomeynayo ke̱ya̱ʼ oʼtiakuy nopo̱e̱hueʼ moʼe̱. Ke̱yo̱
oʼhuaʼapo nopo̱e̱hueʼ moʼe̱ne.
\v 15 Konig aratbuta onʼnopo̱i̱kaʼ opuda̱ moʼnopo̱e̱.
Diosyaʼ oʼtiakuy nopo̱e̱hueʼ moʼe̱ne. Da oaʼ
oʼnoknopo̱i̱kaʼne. “Dakhueaʼ boʼkikaʼpo bueydik moʼe̱ne,”
kamanikeʼpo Diosa taʼmonahueʼ meʼu̱yne.
\v 16 Aratbut oknopo̱e̱hueʼ e̱ʼneʼnayo nopoʼkoreahueʼ
e̱ʼneʼnayopiʼ “Dakhueaʼ boʼkaʼnok Diosa castiga kamagkeʼ.”
Aʼdik i̱jje̱a̱poy. Konige̱po nogtiaʼda ahueʼ i̱jje̱y. Apag
Dios doere konigti oʼmanaʼikaʼ. Buttida oaʼ ayaʼada
nopo̱e̱ʼdik o̱ʼne.
\v 17 Aʼnennada Diosen huaʼa Moisésa oʼmanigmadoyaʼuyate.
Opudomey Moisésbaʼ moʼto̱e̱ne. Huabokerekpiʼ dakhueaʼ
ekaʼnayo dakhueaʼ oʼkaʼ bottaʼbokereka konigti eʼhuaaʼnayo
buttida onʼhuaaʼ moʼnopo̱e̱po dakhueaʼ huakaʼeritaj castiga
o̱gkaʼdik moʼe̱ne. Moisésa oaʼuyate.
\v 18 Ken do konig Diosen huakjey i̱jje̱po Diostaj
huamaknopo̱e̱a̱ʼeri i̱jje̱po ijtiakuy. Diosa
meʼtaʼmonaʼuyne. Kenda huataʼ ijhuaʼikay. Doʼhued Apaga
Diosa konigti beʼhuaaʼikaʼne. Konige̱po buttida oaʼ
oknopo̱e̱ʼdik moʼe̱ne. —‍Fariseo huairitaj Jesúsa
oʼmanaʼuynigʼa Jesús Diosen Huasiʼpo o̱ʼe̱ oknopo̱e̱hueʼda
o̱ʼnuy.
\p
\v 19 —‍Kaʼtiaʼ iaʼ, ¿O̱ʼnen Apag men i̱ta̱e̱? —‍Fariseoa
oʼnonaʼuy.
\p —‍Diosen Cristo o̱ʼe̱ oknopo̱e̱hueʼ moʼe̱ne. Aratbuten
dakhueaʼ eʼkaʼ huamanopoʼyareaʼeri o̱ʼe̱ nopo̱e̱hueʼ
moʼe̱ne. Kenpaʼti Apag Diostaj konigti oknopo̱e̱hueʼ
moʼe̱ne. —‍Jesúsa oʼmanaʼuy.
\p
\v 20 Diosen jakyo kenteda Diostaj huakupe huanigkuda̱ʼ cajaʼpo
oʼhuadikaʼ, ke̱yo̱ Jesúsa kenokaʼ eʼmanmadikaʼte Jesús
bueyhueʼ ka̱e̱ʼ Diosa oʼnopo̱e̱nok tohuahueʼdik o̱ʼnuy.
\s Ke̱yo̱ ijhuaʼapoy huahueʼdik moʼe̱a̱pone. Jesúsa oʼmanaʼuy.
\p
\v 21 —‍Kenpaʼda oʼnokhuaʼapone. Doʼtaj oʼdukaponigʼa
oknopo̱e̱hueʼda moʼe̱po kenpaʼda moʼbueyapone.
Nopoʼkoreahueʼda dakhueaʼ eʼkaʼ moʼto̱e̱po moʼbueyapone.
Ke̱yo̱ ijhuaʼapoy huahueʼdik moʼe̱a̱pone. —‍Judío
oknopo̱e̱hueʼ hua̱e̱ʼeritaj Jesúsa oʼmanaʼuy.
\p
\v 22 —‍“Ke̱yo̱ ijhuaʼapoy huahueʼdik moʼe̱a̱pone.” Jesúsa
monaʼne. Menpaʼ huataʼda arakdikpiʼ ya̱ʼe̱po ya̱ʼe̱t.
—‍Judíomeya̱ nopo̱e̱hueʼ o̱ʼnepo onʼbatiaʼpakuy.
\p
\v 23 —‍Huadariyo hua̱e̱ʼeri moʼe̱po konig dakhueaʼ huakaʼeri
aratbut moʼe̱po, konig opudda boʼpakpo moʼnopo̱i̱kaʼpo,
konigti boʼkikaʼ. Donayo kurudya̱ʼ ijhuarakuy. Apag Diosyaʼ
ijtiakuy. Indariyo hua̱i̱kaʼeri ehueʼ i̱jje̱y.
\v 24 Diosen Huasiʼpo i̱jje̱nok Diosa meʼtaʼmonaʼuyne. Do
Diosen Huasiʼpo e̱e̱ʼtada doʼtaj oknopo̱e̱hueʼ e̱e̱ʼnayo
dakhueaʼ eʼkaʼ moʼto̱e̱po kenpaʼda moʼbueyapone. Diosa
castiga mogkaʼapone. —‍Jesúsa judío huairitaj oʼmanaʼuy.
\p
\v 25 —‍¿Beʼa i̱ʼe̱ on? —‍Kenda eʼnopo̱e̱ʼtaʼ pakhueʼ o̱ʼnepo
namaʼda oʼnonaʼuy.
\p —‍Kenda huakkuruda oʼnonaʼuyne. Menaʼpo onteʼti
enaʼtaʼ boʼpak.
\v 26 “Inomey huairia dakhueʼda o̱gkikaʼ, ontaj
oknopo̱e̱hueʼ moʼe̱ne.” Diostaj huaaʼdik e̱ʼe̱a̱da oynayo
huaahueʼdik o̱ʼnene. Keʼna meʼtaʼmonaʼuyne buttida
oaʼikaʼ. Kenda Diosen ijpe̱e̱po aratbuttaj ijmanikay.
—‍Jesúsa oknopo̱e̱hueʼ hua̱e̱ʼeri judío huairitaj
oʼmanaʼuy.
\p
\v 27 Jesúsa Apag Diostaj oʼmanmadikikaʼ. Judío huairianayo
nopoenkahueʼ o̱ʼnuy. Kenpaʼti Apag Diosa oʼtaʼmonaʼuyate
judíomey nopo̱e̱hueʼ o̱ʼnuynok,
\p
\v 28 —‍Cruzte doʼtaj enʼdarakdeʼte Diosa oʼtaʼmonaʼuyate
moʼnopo̱e̱a̱pone. Doʼhuedda sigpiʼ kahueʼ i̱ji̱kay. Kenda
Diosa meʼnopo̱e̱a̱ʼne kenda ijmanikay.
\v 29 Doʼhued Apag Diosa meʼtaʼmonaʼuyne. Nogtiaʼda e̱a̱hueʼ
meʼi̱kaʼne. Doere kenpaʼda o̱ʼi̱kaʼ. Kenda Diosa oʼpak
ijkikay. —‍Jesúsa Judío huairitaj oʼmanaʼuy. Kenomeya̱
Jesústaj onʼhuadiaypo eʼaraktaʼ onʼtipakuy.
\p
\v 30 Kenda Jesúsa eʼmanadeʼte huakkaʼada Jesústaj
oʼnoknopo̱e̱ʼuy.
\s Diosensiʼpomey Jesústaj diʼ o̱ʼne. Aratbut Jesústaj nigpe̱e̱hueʼ o̱ʼnepo konig totoʼen huanabaʼ o̱ʼnepo dakhueaʼ o̱gkikaʼ.
\p
\v 31,32 —‍Ayaʼada doʼhued huaʼa moʼnigpe̱i̱kaʼpo doʼhued
hueretda huanigpe̱i̱kaʼeri moʼe̱ne. Doʼhued huaʼa buttida
o̱ʼe̱ moknopo̱e̱po onteʼti totoʼtaj konig huanabaʼ
nigpe̱e̱hueʼ moʼi̱kaʼpo onteʼti dakhueaʼ kikahueʼdik
moʼe̱a̱pone. —‍Judío huaknopo̱e̱ʼeritaj Jesúsa oʼmanaʼuy.
\p
\v 33 —‍Oroʼomey Abrahamen adhueaʼ huayayo o̱ʼe̱y. Nog
aratbuten huanabaʼ ehueʼda o̱ʼi̱kay. Konig dakhueaʼ huakaʼeri
huanabaʼ ehueʼda o̱ʼi̱kay. Onteʼti konig huanabaʼ dakhueaʼ
kikahueʼdik o̱ʼe̱a̱poy. Namaʼda oroʼtaj kenpaʼ onaʼne.
—‍Jesústaj oʼnonaʼuy.
\p
\v 34 —‍Ayaʼada dakhueaʼ o̱gkikaʼpo, batikhueʼda dakhueaʼ
o̱gkikaʼpo dakhueaʼ huakikaʼeri huanabaʼ o̱ʼne.
\v 35 Huabokereken huasiʼpo huaojyoda o̱ʼnikaʼapo.
Huanabaʼnayo huairiyoda i̱kahueʼ o̱ʼneapo. Nogok meyo̱piʼ
kenpaʼda huaʼdik o̱ʼnikaʼ.
\v 36 Do Diosen Huasiʼpo i̱jje̱y. Konig totoʼen huanabaʼ
dakhueaʼ boʼkikaʼne. Doʼhua dakhueaʼ eʼkaʼ eʼmanopoʼyareaʼnayo
Diostaj nigpe̱i̱kaʼdik moʼe̱a̱pone.
\v 37 Buttida boaʼne Abrahamen adhueaʼ huayayo moʼe̱ne
ijnopo̱e̱y. Abrahamen adhueaʼ huayayo e̱ʼe̱a̱da doʼhued huaʼa
pakhueʼ moʼe̱po doʼtaj eʼaraktaʼ onʼtipakne.
\v 38 Kurudyo̱ doʼhued Apagere i̱ji̱kaʼuy. Apagtaj
ijtiahuayikaʼuy. Ijpe̱i̱kaʼuy. Kenda ijtiahuayikaʼuy
ijpe̱i̱kaʼpo opudomeytaj oʼnonaʼne. Doʼtaj nigpe̱e̱hueʼ
moʼe̱ne. O̱ʼnen huaojtaj moʼnigpe̱i̱kaʼpo dakhueaʼ
boʼkikaʼne. —‍Judíotaj Jesúsa oʼmanaʼuy.
\p
\v 39 —‍Ehueʼ, dakhueaʼ huakaʼeri ehueʼ o̱ʼe̱y. Huadakda o̱ʼe̱y.
Abraham oroʼen huaoj o̱ʼe̱. —‍Jesústaj oʼnonaʼuy.
\p —‍Abraham Diostaj oʼnigpe̱i̱kaʼuyate. Abrahamen hueretda
huasiʼpo ehueʼ moʼe̱ne. Abrahamensiʼpo e̱e̱ʼnayo Diostaj
moʼnigpe̱i̱kaʼyet. Kenpaʼti Diosen huaʼa boʼpakikaʼyet.
\v 40 Diosa meʼtaʼnonaʼuyne. Diosyaʼ ijtiakuy. Buttida huaʼa
Diosa meʼnopo̱e̱a̱ʼuyne. Diosen buttida huaʼa eʼnonaʼtada
doʼtaj onʼhuadiaypo doʼtaj eʼaraktaʼ onʼtipakne. Ken konig
Abrahama kahueʼ o̱ʼu̱y. Abraham Diostaj oknopo̱e̱po
Diosen
huataʼmoneritaj oʼmanigpe̱i̱kaʼuyate.
\v 41 Konig opuden huaoj dakhueʼyoʼda oʼkikaʼ opudomeykon
dakhueaʼ boʼkikaʼ. —‍Jesúsa judíotaj oʼmanaʼuy.
\p —‍Oroʼ kate bahuetaʼ eʼsiʼpoe̱ʼ ehueʼ o̱ʼe̱y. Abrahamen
hueretda adhueaʼ huayayo o̱ʼe̱y. Nogtida Apag Dios oʼte̱ne.
Diostaj oʼnigpe̱i̱kay. —‍Judíoa Jesústaj oʼnonaʼuy.
\p
\v 42 —‍Dios opuden huaoj e̱e̱ʼnayo doʼtaj diʼ moʼe̱a̱ye̱t
konige̱po Diosyaʼ ijtiakuy. Doda ijpakpo tiakhueʼ i̱jje̱ʼuy.
Diosa oʼpakpo meʼtaʼmonaʼuyne. Opudnayo doʼtaj diʼ ehueʼ
o̱ʼnene.
\v 43 Dakhueʼda moʼe̱po Diostaj eʼnigpe̱e̱taʼ pakhueʼ
moʼe̱ne. Huadak eʼkaʼtaʼ pakhueʼ moʼe̱ne. Konige̱po doʼhued
huaʼa eʼpe̱e̱taʼ pakhueʼ moʼe̱ne. Kenpaʼti doʼhued huaʼa
eʼnopoenkaʼtaʼ pakhueʼ moʼe̱ne.
\v 44 Katepiʼ opudomeyen huaoj oʼpaknok kenda boʼkikaʼne.
Opudomeyen huaoj totoʼ moʼta̱e̱ne. Kentayoʼda
moʼnigpe̱i̱kaʼ. Huakkuruda totoʼa oʼbahuadiayikaʼpo huakkaʼtada
oʼmanopoʼarakikaʼpo. Diosen buttida huaʼa totoʼa eʼnopo̱e̱ʼtaʼ
pakhueʼ o̱ʼi̱kaʼ. Buttida huaʼa nopo̱e̱hueʼ o̱ʼe̱po ahueʼ
o̱ʼi̱kaʼ. Da oaʼikaʼ. Da huaaʼeri o̱ʼe̱. Aratbuttaj da huaaʼeri
oʼmaeaʼikaʼ. Aratbuttaj engaña huakaʼeri o̱ʼe̱.
\v 45 Konige̱po o̱ʼnen huaoj totoʼ da huaʼayoʼda eʼpe̱e̱taʼ
boʼpakikaʼpo Diosen buttida huaʼa eʼmanaʼte eʼpe̱e̱taʼ pakhueʼ
moʼi̱kaʼne. Diosen Huasiʼpo i̱jje̱nok doʼtaj eknopo̱e̱ʼtaʼ
pakhueʼ o̱ʼnene.
\v 46 Namaʼda oameʼ. Huaahueʼdik o̱ʼnene. Dakhueaʼ oʼkameʼ.
Huaahueʼdik o̱ʼnene. Buttida oʼikaʼ. Doʼtaj oknopo̱e̱hueʼ
o̱ʼnene.
\v 47 Diostaj oknopo̱e̱hueʼ moʼe̱po konige̱po doʼtaj
oknopo̱e̱hueʼ o̱ʼnene. Diosen aratbut Diosen
huanigpe̱i̱kaʼeriomey Diostaj onʼnigpe̱i̱kaʼ. Opudomeynayo
Diosen huanigpe̱i̱kaʼeri ehueʼ moʼe̱ne. Diostaj
eʼnigpe̱e̱taʼ pakhueʼ moʼe̱ne. —‍Jesúsa judío aratbuttaj
oʼmanaʼuy.
\s Aʼnennanada Abraham oʼsiʼpoe̱ʼuyate. Abraham siʼpoe̱hued e̱e̱ʼte Cristo o̱ʼi̱kaʼuy.
\p
\v 48 —‍Dapitaʼ dakhueʼnanada i̱ʼe̱ne. Samaria hua̱e̱ʼeri
i̱ʼe̱ne. Totoʼa menopoʼto̱e̱ne. Buttida onaʼne. —‍Judío
huairia huakkaʼ onʼhuadiaypo Jesústaj onʼtidiʼkepo
oʼnonaʼuy.
\p
\v 49 —‍Doʼtaj totoʼa nopoʼto̱e̱hueʼ meʼe̱ne. Diostaj
diʼnanada i̱ji̱kay. Ijnigpe̱i̱kay. Dios huadaknanada
o̱ʼi̱kaʼ ijbatiaʼpakikay. Diostaj pakhueʼ moʼe̱po doʼtaj
onʼhuadiaypo dakhueaʼda onʼhuaaʼne.
\v 50 “Jesús huadakda o̱ʼe̱.” Menhuaikaʼ. Manahueʼ
i̱ji̱kay. Apag Diosnayo doʼtaj buttida beʼtinopo̱e̱po,
“Huadakda o̱ʼi̱kaʼ.” Beʼhuaikaʼne.
\v 51 Doʼhued huaʼataj ayaʼada oʼnoknopo̱e̱po
onʼnigpe̱i̱kaʼpo kenpaʼda bueyhueʼ o̱ʼneapo, Diosere
onʼnoeonhuahuikaʼapo. —‍Judío huairitaj Jesúsa oʼmanaʼuy.
\p
\v 52 —‍Totoʼ oʼnopoʼto̱e̱. Oynayo buttida oʼnopo̱e̱y.
Oroʼomeyen adhueaʼpaneʼ Abrahama Diostaj eʼnigpe̱i̱kada
oʼbueyʼuyate. Diosen huamanbatiaʼpakeriakon Diostaj
e̱ʼnigpe̱i̱kada onʼmabueyʼuyate. “Doʼhued huaʼataj ayaʼada
oʼnoknopo̱e̱po onʼnigpe̱i̱kaʼpo kenpaʼda bueyhueʼ
o̱ʼneapo.” Namaʼda iaʼ.
\v 53 Oroʼen huaoj Abraham teyda huairitoneʼ o̱ʼu̱y. Abraham
oʼbueyʼuyate. Diosen huamanbatiaʼpakerikon onʼmabueyʼuyate.
Menpaʼ Abrahamtaj nogi̱ti hueretda huairitoneʼ o̱ke̱hueʼdik
i̱ʼe̱ne. Diosen huamanbatiaʼpakeritaj o̱ʼnayoʼda teyda
huairitoneʼ make̱hueʼdik i̱ʼe̱ne. “Huairi i̱jje̱y,”
namaʼda iʼnopo̱e̱po, da iaʼ, huairi ehueʼ i̱ʼe̱. —‍Judío
huairia oknopo̱e̱hueʼda o̱ʼnepo Jesústaj oʼnonaʼuy.
\p
\v 54 —‍“Aratbuttaj manoeanhuahuikaʼdik i̱jje̱y.” Doda
ijpakpo manahueʼ i̱ji̱kay. “Jesús huadakda o̱ʼe̱,” aratbuta
menʼbatiaʼpakeʼpo manahueʼ i̱ji̱kay. Diosa oʼpaknok kenda
ijmanikay. “Huairitoneʼ i̱ʼe̱ne. Doʼhued Huasiʼpo
i̱ʼe̱ne.” Diosa menaʼikaʼne. “Oroʼen Dios o̱ʼe̱,”
namaʼda boaʼikaʼne.
\v 55 Diostaj oknopo̱e̱hueʼ moʼe̱ne. “Diostaj yoknopo̱e̱y.”
Buttida ijjay. “Diostaj oknopo̱e̱hueʼ i̱jje̱y.” Doa eaʼnayo
opud konigti da huaaʼeri i̱jje̱a̱yet. Dapitaʼ Diostaj
yoknopo̱e̱po ijnigpe̱i̱kay.
\v 56 Doʼtaj oʼtiaʼpakpo Abrahamtaj Diosa onaʼuyate. “O̱ʼnen
huayayo huaboroʼ huairitoneʼ o̱ʼe̱a̱po.” Doʼtaj oʼtiaʼpakpo
Abrahamtaj onaʼuyate. Diostaj Abraham kenda oknopo̱e̱po do
i̱jje̱a̱ponok durugnanada o̱ʼu̱yate. —‍Judío huairitaj Jesúsa
oʼnanaʼuy.
\p
\v 57 —‍Ehueʼ. Abraham aʼnennanada o̱ʼi̱kaʼuyate. Onnayo
huatoneʼ ehueʼ i̱ʼe̱ne. Menpaʼ Abrahamtaj iʼtiahuayʼuy.
Ehueʼ. Abrahamtaj tiahuayhueʼ i̱e̱ʼuy. Da iaʼne. —‍Jesústaj
oʼnonaʼuy.
\p
\v 58 —‍Abraham siʼpoe̱hued Diosere i̱ji̱kay. Buttida ijjay.
—‍Jesúsa oʼmanaʼuy.
\v 59 Onʼpe̱e̱depo Jesústaj kadarakeʼpo huid onʼbaeʼeadpo
Jesústaj kanʼpaʼeʼpo huid onʼbaeʼeadnigʼa. Jesúsa
oʼmaki̱re̱gpo Diosen jakyaʼ oʼbakhuaʼuy.
\c 9
\s Huabokerek ekpobig oʼsiʼpoe̱ʼuyate. Jesúsa kentaj okpoyareaʼuyate.
\p
\v 1 Nogok okmapi̱e̱ʼahuaddik huameʼnoete Jesús oʼhuaʼepo
Jerusalényo̱ oʼhuaʼepo huabokerek ekpobigtaj oʼtiahuayʼuy.
Keʼna ekpobig oʼsiʼpoe̱ʼuy ekpobig o̱ʼe̱ʼuy.
\p
\v 2 —‍¿Menaʼpo inbokerek ekpobig yasiʼpoe̱ʼuyate? ¿Beʼa
dakhueaʼ yakuyet? ¿Huaoapiʼ hua̱ye̱a̱piʼ keʼnadapiʼ dakhueaʼ
yakuyetpiʼ huamanmadikaʼeri? —‍Oroʼomey Jesúsen
huanigpe̱i̱kaʼeria Jesústaj onaʼuy.
\p
\v 3 —‍Ehueʼ, keʼna dakhueaʼ kahueʼ o̱ʼu̱y. Keʼnen huaoa
hua̱ye̱erea dakhueaʼ kahueʼ o̱ʼnuyate. Konige̱po dakhueaʼ
o̱gkuypo ekpobig ehueʼ o̱ʼe̱. Diosa teyda kikaʼdik ka̱e̱ʼpo
bakpoyareaʼdik ka̱e̱ʼpo aratbuta kanʼtiahuayeʼpo
kanʼnopo̱e̱ʼpo konige̱po ekpobig oʼsiʼpoe̱ʼuyate.
\v 4 Kenda Diosa oʼpak kakikeʼpo kenpaʼti Diostaj
kanigpe̱i̱keʼpo Diosa meʼtaʼmonaʼuyne. Konige̱po oyedda
Diosen kikaʼdik i̱jje̱y. Sueʼda huameʼnoe meke̱nok oyda
Diosen kikaʼdik i̱jje̱y. Aʼti nogok kahueʼdik i̱jje̱a̱poy.
Konig sikyonig o̱ʼe̱a̱po kahueʼdik i̱jje̱a̱poy.
\v 5 In huadariyo i̱jje̱depo konig Diosen huakjey i̱jje̱po
Diostaj ijmaknopo̱e̱a̱ʼdey, Diosen huaʼa ijmanopo̱e̱a̱ʼdey.
—‍Jesúsa oroʼtaj keʼnen huanigpe̱i̱kaʼeritaj monaʼuyne.
\p
\v 6 Kenda oaʼdepo barakte oʼsupupo igkusi̱ʼhue̱ oʼdukutaʼpo
soroka ekpobigtaj okpodukutaʼuy.
\p
\v 7 —‍Yahuatiʼ. Siloé ya̱koyo yahuatiʼ. Yakpokoyoaʼ.
—‍Ekpobigtaj onaʼuy. (Siloé judíoen huadik eʼdiktaʼmonaʼ
o̱ʼe̱.)
\p Ken, oʼhuaʼpo okpokoyodepo okpoyarudʼuy. Oʼtiakpo dakaʼ
oʼmaboʼuy.
\v 8 Yareahued ekpobig jak eretnopoyoda oʼhuadikaʼpo “huakupe
menʼyok,” oʼmanaʼikaʼuy. Ayaʼada kentaj onʼnoki̱e̱ʼuy.
Ekpobig o̱ʼi̱kaʼ ayaʼada onʼtiahuayikaʼuy.
\p —‍Dapiʼ inbokerek oʼhuadpo “huakupe menʼyok,”
oʼmanaʼikaʼuynig. —‍Sueʼada oʼdaʼuy.
\p
\v 9 —‍E̱e̱ʼ, keʼna o̱ʼe̱. —‍Nogomeya̱ oʼdaʼuy.
\p —‍Ehueʼ, nogda o̱ʼe̱. Konigti o̱ʼe̱. —‍Nogomeya̱
oʼdaʼuy.
\p —‍Do ekpobig i̱ji̱kaʼuynig i̱jje̱y. —‍Kenbokerek okpoyaredepo
oʼmanaʼuy.
\p
\v 10 —‍¿Monig ikpoyarudmeʼ? ¿Moniga̱ʼ iʼmabodmeʼ?
—‍Oʼnonaʼuy.
\p
\v 11 —‍Jesúsa barakte oʼsupupo oʼdukutaʼpo soroka
bekpodukutaʼpo, “Siloé ya̱koyo yahuatiʼ. Yakpokoyoaʼ.”
Menaʼne. Ken ijhuaʼdepo yokpokoyodepo huaboaʼda ijmabodi.
—‍Oʼmanaʼuy.
\p
\v 12 —‍¿Men ya̱ʼe̱ kenbokerek? —‍Oʼnonaʼuy.
\p —‍Nopo̱e̱hueʼ i̱jje̱y. —‍Oʼmanaʼuy.
\s ¿Menpaʼ i̱ʼe̱po ikpoyarud? Fariseo judío huairia ekpobigtaj oʼnonaʼuy.
\p
\v 13,14 Okmapi̱e̱ʼahuaddikte huameʼnoete Jesúsa soroka
oʼdukutaʼpo okpoyareadnok kenbokerek ekpoyareadtaj onʼtohuaʼpo
judío hua̱i̱takeʼ jak
huairitaj onʼtohuaʼpo fariseo huairitaj
onʼtohuaʼuyate.
\p
\v 15 —‍Ekpobig i̱ʼunhuahuikaʼuy. ¿Monig oyda huaboaʼda
iʼtiahuay? —‍Fariseo huairia oʼnonaʼuy.
\p —‍Soroka samibia bekpodukutaʼpo yokpokoyopo huaboaʼda
ijtiahuayoni. —‍Fariseo huairitaj oʼmanaʼuy.
\p
\v 16 —‍Okmapi̱e̱ʼahuaddik huameʼnoete aratbut katepiʼ
kahueʼdik o̱ʼne. Oʼmanmadikikay. Inbokerek nigpe̱e̱hueʼda
o̱ʼe̱po okmapi̱e̱ʼahuaddik huameʼnoete oʼyareaʼnok keʼna
Diosen huamanbatiaʼpakeri ehueʼdik o̱ʼe̱, oʼnopo̱e̱y.
—‍Sueʼada onʼbatiaʼpakuy.
\p —‍Dakhueaʼ huakaʼeri e̱e̱ʼnayo bayareahueʼdik o̱ʼe̱. Keʼna
oʼyareaʼde dakhueaʼ huakaʼeri ehueʼdik o̱ʼe̱, oʼnopo̱e̱y.
—‍Noga̱ onʼbatiaʼpakuy.
\s Noga̱ nogpaʼ nogpaʼ onʼbatiaʼpakpo konigti ahueʼ o̱ʼneʼuyate.
\p
\v 17 —‍¿On menpaʼ iʼnopo̱e̱ ken huabokerek huakpo
beyareatenigtaj? —‍Huabokerek huakpoyareritaj judío huairia
oʼnonaʼuy.
\p —‍Diosen huamanbatiaʼpakeri o̱ʼe̱, oʼnonaʼne.
—‍Oʼmanaʼuy.
\p
\v 18 Aʼnenda ekpobig o̱ʼi̱kaʼuy. Oyda okpoyaredepo tiahuaydik
o̱ʼe̱. Kenda Judío huairia oknopo̱e̱hueʼdik o̱ʼnepo,
“Keʼnen huaoj hua̱ye̱tere yanʼtotiak.” Onʼmanaʼuy.
Enʼtiakdeʼte.
\p
\v 19 —‍¿In huabokerek menpaʼ o̱ʼnensiʼpo ya̱ʼe̱? ¿Menpaʼ
ekpobig oʼsiʼpoe̱ʼuy, boʼtiaʼpakikaʼ? ¿Menaʼpo oyda
tiahuaydik ya̱ʼe̱? —‍Judío huairia keʼnen huaojtaj hua̱ye̱tere
onʼmanaʼuy.
\p
\v 20 —‍E̱e̱ʼ, keʼna oroʼensiʼpo o̱ʼe̱. Ekpobig oʼsiʼpoe̱ʼuy
oʼnopo̱e̱y.
\v 21 Menaʼpo oyda tiahuaydik o̱ʼe̱ oroʼnayo nopo̱e̱hueʼ
o̱ʼe̱y. Kenpaʼti beʼa yakpoyaret nopo̱e̱hueʼ o̱ʼe̱y. “¿Beʼa
bekpoyareaʼ?” Ya̱ʼnonaʼ. Huabokerek o̱ʼe̱. Keʼnada aʼdik o̱ʼe̱.
—‍Keʼnen huaoa hua̱ye̱erea onʼmanaʼuy.
\p
\v 22 Judío huairitaj onʼmakmeʼpukpo huaojerea hua̱ye̱erea
kenda namaʼda huairitaj onʼmanaʼuy. “Jesús Diosen Cristo
o̱ʼe̱. Diosa oʼtaʼmonaʼuyate.” Beʼapiʼ eaʼnayo Apagbaʼtaj
aʼpe̱e̱yaʼpo judíoen hua̱i̱takeʼ jakyo onteʼti kudhueʼdik
o̱ʼneapo. Judío huairia onpapayoʼ ondaʼpo. Konige̱po
huabokereken huaojere hua̱ye̱ere onʼmeʼpukpo, namaʼda
onʼmanaʼuy.
\p
\v 23 “Huabokerek o̱ʼe̱. Keʼna aʼdik o̱ʼe̱. Kentaj
ya̱ʼnonaʼ.” Judío huairitaj namaʼda onʼmanaʼuy.
\p
\v 24 “Keʼna huabokerek ekpobig oʼsiʼpoe̱ʼuy. Kentaj
yanʼtotiak.” Judío huairia onʼmanaʼuy. Eʼtiakdeʼte
oʼnonaʼpo,
\p —‍Buttida yaaʼ. “Diosa beʼyareaʼne.” Yaaʼ. Jesús dakhueaʼ
huakaʼeri o̱ʼe̱, oʼtinopo̱i̱kay. Bayareahueʼdik o̱ʼe̱. Oroʼ
oʼnopo̱i̱kay. —‍Judío huairia oʼnonaʼuy.
\p
\v 25 —‍Dakhueaʼ huakaʼeripiʼ o̱ʼe̱piʼ ʼuruda huakaʼeri o̱ʼe̱piʼ
nopo̱e̱hueʼ i̱jje̱y. Nogtida ijnopo̱e̱y. ʼIkken ekpobig
i̱jje̱mey. Oynayo ijtiahuay. —‍Oʼmanaʼuy.
\p
\v 26 —‍¿Ontaj moniga̱ʼ megkaʼ? ¿Monig bekpoyareaʼ?
—‍Onteʼti judío huairia oʼnonaʼuy.
\p
\v 27 —‍Kenda huaboaʼda oʼnonaʼdene. ¿Menaʼpo onteʼti
eʼpe̱e̱taʼ boʼpak? ¿Jesúsen huanigpe̱i̱kaʼeri e̱e̱ʼtaʼ
menpaʼ boʼpak? —‍Oʼmanaʼuy.
\p
\v 28 —‍O̱ʼna kentaj huanigpe̱i̱kaʼeri i̱ʼe̱. Oroʼnayo
Moisésen huanigpe̱i̱kaʼeri o̱ʼe̱y.
\v 29 Moiséstaj Diosa onaʼikaʼuyate oknopo̱i̱kay. In
huabokereknayo meya̱ʼ yaʼtiakuyet nopo̱e̱hueʼ o̱ʼe̱y. —‍Fariseo
huairiomeya̱ diga̱ʼda onʼhuadiaypo i̱ghuaʼda oʼnonaʼuy.
\p
\v 30 —‍¡Kenpihuay! Kentaj menaʼpo oknopo̱e̱hueʼ moʼe̱.
Ken huabokereka bekpoyareaʼne. Ke̱ya̱ʼ oʼtiakuy nopo̱e̱hueʼ
moʼe̱ne.
\v 31 Dakhueaʼ huakaʼeritaj Diosa manigpe̱e̱hueʼ o̱ʼi̱kaʼ.
Diostaj huanigpe̱i̱kaʼeritaj Diosa oʼmanigpe̱i̱kaʼ. Katepiʼ
onʼpaknok Diosa oʼmanigkikaʼ.
\v 32 Aʼnennanadapiʼ huakkuruda ekpobigtaj eʼsiʼpoe̱ʼ
okpoyareaʼuy tipe̱e̱hueʼ o̱ʼi̱kay.
\v 33 Dapitaʼ Diosyaʼ oʼtiakuyate. Diosyaʼ tiakhueʼ e̱ʼu̱ynayo
in huabokereka kenda sigpiʼ kahueʼdik o̱ʼe̱. Bakpoyareahueʼdik
o̱ʼe̱. —‍Judío huairitaj oʼmanaʼuy.
\p
\v 34 —‍Dakhueʼ eʼeretkaʼ iʼsiʼpoe̱ʼuy. Dakhueaʼ iʼkikaʼuy.
Oroʼtaj onmandikahueʼdik o̱ʼe̱ne. —‍Judío huairia
onʼhuadiaypo oʼnonaʼuy.
\p Judío aratbuten hua̱i̱takeʼ jakyaʼ oʼnenʼuy.
\s Diostaj oknopo̱e̱hueʼ hua̱e̱ʼeri konig ekpobig o̱ʼne.
\p
\v 35 Huabokerek ekpoyareʼtaj hua̱i̱takeʼ jakyaʼ oʼnende Jesúsa
oʼnopo̱e̱po oʼdeatopo,
\p —‍¿Diosen Huasiʼpo, ken huabokerektaj Diosa
oʼtaʼmonaʼuyate menpaʼ oknopo̱e̱ʼ? —‍Jesúsa onaʼuy.
\p
\v 36 —‍¿Beʼa ya̱ʼe̱, huairi? Eknopo̱e̱ʼtaʼ ijpaki. —‍Jesústaj
onaʼuy.
\p
\v 37 —‍Kentaj iʼtiahuayne. Diosa meʼtaʼmonaʼuyne. In do
i̱jje̱y. Diosen Huasiʼpo i̱jje̱po onaʼne. —‍Jesúsa onaʼuy.
\p
\v 38 Jesús Diosen Huasiʼpo o̱ʼe̱ oknopo̱e̱po huikudate
oʼtihuadpo,
\p —‍Diosen huataʼmonaʼeri i̱ʼe̱. Diosen Huasiʼpo i̱ʼe̱.
Yoknopo̱e̱y, Huairi. —‍Jesústaj onaʼuy.
\p
\v 39 —‍Huakkaʼada konig tiahuayhueʼdik o̱ʼnepo konig
ekpobig o̱ʼnepo Diostaj oknopo̱e̱hued o̱ʼnepo doʼtaj
oʼnoknopo̱e̱a̱popo Diosere onʼnoeonhuahuikaʼapo.
Nogomeya̱ “Ekpobig ehueʼ o̱ʼe̱y. Tiahuaydik o̱ʼe̱y. Diostaj
huadakda oknopo̱i̱kay.” Namaʼda onʼbatiaʼpakpo hueretda
huaknopo̱e̱ʼeri ehueʼ o̱ʼnepo konig ekpobig o̱ʼnenok Diosa
castiga magkaʼdik o̱ʼi̱kaʼapo. Konige̱po Diosa indariyo
meʼtaʼmonaʼuyne. —‍Jesúsa oaʼuy.
\p
\v 40 Ken, sueʼada fariseo huairi kenteda o̱ʼnepo Jesústaj
onʼpe̱e̱depo,
\p —‍Dapiʼ oroʼomeynayo Diostaj oknopo̱e̱hueʼ hua̱e̱ʼeri ehueʼ
o̱ʼe̱y. Oroʼomey ekpobig ehueʼ o̱ʼe̱y. Diostaj oknopo̱e̱y.
—‍Jesústaj oʼnonaʼuy.
\p
\v 41 —‍“Diostaj oknopo̱e̱hueʼ hua̱e̱ʼeri o̱ʼe̱y,” eaʼnayo
o̱ʼnen dakhueaʼ eʼkaʼ Diosa bakkahueaʼdik moʼe̱a̱ynigʼa
“Diostaj oknopo̱e̱hueʼ hua̱e̱ʼeri ehueʼ o̱ʼe̱y,” namaʼda
boaʼnok Diosa bakkahueahueʼdik moʼe̱ne. —‍Jesúsa fariseo
huairitaj oʼmanaʼuy.
\c 10
\s Ovejaen huakpa ekbiriktaj Jesúsa oʼmanbatiaʼpakuy.
\p
\v 1 Diosen huanigpe̱e̱ʼeriomeytaj hueretda huamato̱e̱ʼeri
doa i̱ji̱kay. Jesúsa oʼmanbatiaʼpakpo,
\p —‍Buttida ijjay. Ovejataj kabatiokeʼpo oveja huamato̱e̱ʼeria
huakpa ekbirikyo oʼbakuda̱ʼikaʼ. Bisik oʼbakuda̱ʼikaʼ.
Oʼbakuda̱ʼdepo akbogpe huato̱e̱ʼeria teyaʼda okhuikikaʼ. Oveja
huabereeri onʼtiakdepo akbogpeyaʼ kudhueʼdik o̱ʼnikaʼ.
Nogyaʼda o̱gkudikaʼ. Huakpakuyaʼ onʼbehuikpo onʼkudikaʼ,
\v 2,3 Hueretda oveja huamato̱e̱ʼeria ovejataj oʼmatiokikaʼpo
oʼmato̱i̱kaʼpo sikyoedda ovejataj aʼbaeyaʼpo akbogpete
oʼhuahuaʼdepo kentaj akbogpe huato̱e̱ʼeria o̱ki̱e̱ʼpo
oʼnigokhuike. Ken hueretda oveja huamato̱e̱ʼeri oʼkudde
keʼnen ovejaa onʼnigpe̱e̱. Ayaʼ ovejaen huadik
oʼmadikkaʼdepo oʼmaoro̱kaʼpo.
\v 4 Ayaʼtada oʼmaoro̱kandepo huakkuru oʼmanighuaʼikaʼ.
Oveja hueretda huamato̱e̱ʼeritaj onʼpe̱e̱po oʼnoki̱e̱ʼpo
konige̱po onʼtahuaʼikaʼ.
\v 5 Noga̱da eʼhuatiakte oveja oʼnokmamonapo. Keʼna
menʼtahuaʼ enaʼte onʼpe̱e̱po o̱ki̱e̱hueʼ onʼe̱po
oʼnokmamonapo. —‍Ken konig oveja huamato̱e̱ʼeritaj
Jesúsa oʼmanbatiaʼpakuy.
\p
\v 6 Jesúsa kenda oʼmanbatiaʼpaknigʼa judío aratbuta
eʼpe̱e̱a̱da nopo̱gkahueʼ o̱ʼneʼuy.
\s Jesús konig oveja huamato̱e̱ʼeri o̱ʼe̱po huanigpe̱i̱kaʼeritaj dakaʼ oʼmato̱i̱kaʼ.
\p
\v 7 Onteʼti Jesúsa oʼmanbatiaʼpakpo,
\p —‍Buttida ijjay. Do konig ovejaen akbogpe i̱jje̱y. Do
konig oveja ijbatokudi. Ayaʼda huaknopo̱e̱ʼeri doʼtaj
oʼnoknopo̱e̱po doere kuddik o̱ʼne.
\v 8 Huakkaʼada konig huamanbatiaʼpakeri do tiakhued e̱e̱ʼted
kenomey konig huabereeri engaña huakaʼeri o̱ʼneʼuyate.
Hueretda ovejaa taʼhuahueʼ o̱ʼnikaʼuyate.
\v 9 Do oveja eʼtiokpakaʼ akbogpe konig i̱jje̱y. Ayaʼada doʼtaj
oʼnoknopo̱e̱po konig onʼkudpo Diosere
onʼnoeonhuahuikaʼapo. Diostaj dakaʼ kanʼnigpe̱i̱keʼpo
ijbatihuapokikay. Dakhueaʼ kahueʼ kaʼneʼpo kenomeytaj
ijbatiokikaʼapoy.
\p
\v 10 Namaʼda huamanmadikaʼeri konig huabereeri o̱ʼne.
Onʼberikaʼ. Onʼbarakikaʼ. Onʼbakbasakikaʼ. Donayo
ijmanoeanhuahuikay. Hueretda huaknopo̱e̱ʼeritaj
ijmanoeanhuahuikay. Huakkaʼda ijmatinepahuiʼpo
ʼuruaʼnanada ijmanoeanhuahuikay.
\v 11 Do konig oveja huamato̱e̱ʼeri i̱jje̱y. Huadakaʼda
huamato̱e̱ʼeri i̱jje̱y. Huanigpe̱i̱kaʼeritaj dakaʼnanada
ijmato̱i̱kay. Ovejataj aʼbatiokayaʼpo, ovejataj
aʼmanoeanhuahuikayaʼpo ijmanigbueyapoy.
\v 12,13 Sueʼada huakupetaʼ huakkaʼ oʼderetpakpo nogen ovejataj
onʼmatamato̱i̱kaʼ. Nubakuhuaa eʼhuatiakte
onʼmatiokmonikaʼ. Oveja nogen onʼta̱e̱nok huakupeyoʼda
oʼderetpakpo ovejataj pakhueʼ o̱ʼnepo onʼmatiokmonikaʼ.
Nubakuhua onʼbahuatiakpo oʼmabokeʼpo oʼmamonaʼikaʼ.
\p
\v 14,15 Doa konig ovejataj dakaʼ huamato̱e̱ʼeri i̱jje̱y. Apag
Diosa doʼtaj meki̱e̱ʼne konigti Apag Diostaj doa yo̱ki̱e̱y.
Kenpaʼti doʼhued huanigpe̱i̱kaʼeritaj ijmaki̱e̱y konigti
doʼhued huanigpe̱i̱kaʼeria doʼtaj meʼnoki̱e̱ʼne. Dakhueaʼ
eʼkaʼ aʼmanopoʼyareayaʼpo huanigpe̱i̱kaʼeritaj
ijmanigbueyapoy.
\v 16 Nog huanigpe̱i̱kaʼeritakon
ijmato̱e̱i̱kaʼapoy. Judío
aratbut ehueʼ o̱ʼne. Nog aratbut o̱ʼne. Ken aratbuttakon
manopoʼkoreaʼdik i̱jje̱y. Doʼtaj onʼnigpe̱i̱kaʼapo.
Kenomeyere judíomeyere konig nogaratbuttida o̱ʼneapo.
Kenpaʼti do kenomeytaj nogtiada huamato̱e̱ʼeri
i̱jje̱a̱poy.
\p
\v 17,18 Diostaj ijnigpe̱e̱nok, doʼtaj menʼtohuaʼ doʼtaj
menʼarakeʼ ijnopo̱e̱po. Ken ijbueydeapoy onteʼti
ijnoyhuada̱poy onteʼti ijnoeapoy. Konige̱po Apag Diosa diʼ
meʼe̱ne. Huabokereka doʼtaj eʼaraktaʼ onʼpakpo arakhueʼdik
meʼneapone. Konige̱po doada eʼnigbueytaʼ ijpakpo
ijnigbueyapoy. Eʼnigbueytaʼ ijpakpo bueydik i̱jje̱a̱poy.
Onteʼti eʼnoyhuadtaʼ ijpakpo noyhuaddik i̱jje̱a̱poy. Kenda
doʼhued Apag Diosa menaʼuyne. —‍Jesúsa oʼmanaʼuyate.
\p
\v 19 Judíomeya̱ Jesústaj onʼpe̱e̱depo nogpaʼ nogpaʼ
onʼnopo̱e̱po nogpaʼ nogpaʼ onʼbatiaʼpakuy.
\p
\v 20 —‍Totoʼa oʼnopoʼto̱e̱ʼnok Jesús huasegda o̱ʼe̱ Katiaʼpo
kentaj moʼnigpe̱e̱ʼ. —‍Huakkaʼada kenpaʼ onʼbatiaʼpakʼuy.
\p
\v 21 —‍ʼUruaʼnanada oʼmanbatiaʼpak. Totoʼa nopoʼto̱e̱hueʼ
o̱ʼe̱. Totoʼa eʼnopoʼto̱e̱ʼnayo ʼuruda batiaʼpakhueʼ
ya̱ʼe̱a̱yet. Kenpaʼti ekpobigtaj okpoyareahueʼdik o̱ʼe̱ totoʼa.
—‍Nogomeya̱ onʼbatiaʼpakʼuy.
\s Judío huairia Jesústaj eknopo̱e̱ʼtaʼ pakhueʼ o̱ʼnuy.
\p
\v 22 Nogok Jerusalényo̱ Diosen jak onʼtoʼkaʼdepo fiesta
okkahuehueʼ hua̱e̱ʼ o̱ʼu̱y. Huahuiʼok o̱ʼu̱y.
\v 23 Diosen jak kurute Salomóna dagtaj jakaʼ oʼtikaʼuyate.
Ken dagte Jesús eʼhuaʼete
\v 24 judío huairia Jesústaj onʼtikupobopo,
\p —‍¿Meniga̱ʼ puug oroʼomey nigunhuahuaʼdik o̱ʼe̱? Diosa
eʼtaʼmonuyʼnayo buttida oyedda monaʼ. Cristo buttida e̱e̱ʼnayo
monaʼ. —‍Jesústaj oʼnonaʼuy.
\p
\v 25 —‍Kenda oʼnonameʼniga̱ doʼtaj oknopo̱e̱hueʼ o̱ʼnene.
Opudomeya̱ doʼtaj dakaʼ kanoknopo̱e̱ʼpo konig Diosyoʼda
kaʼdik o̱ʼe̱ ijkikamey. Diosa kenda beʼtihuapoknok ʼuruaʼda
ijkikamey. Konigda eʼbayareaʼ ijkikamey. Cristo o̱ʼe̱ doʼtaj
dakaʼ oknopo̱e̱ʼdik ʼuruaʼda ijkikamey.
\v 26 Konig Dios ʼuruaʼnanada oʼkikaʼ konigti ijkikaʼnigʼa
opuda̱ doʼtaj oknopo̱e̱hueʼ o̱ʼnikaʼne. Doʼhued oveja
huanigpe̱i̱kaʼeri ehueʼ moʼe̱po, doʼtaj eknopo̱e̱ʼtaʼ pakhueʼ
o̱ʼnene.
\v 27 Doʼhued oveja huanigpe̱i̱kaʼeria doʼtaj menaʼ o̱ki̱a̱ʼpo
onʼnigpe̱i̱kaʼ. Doʼhued huanigpe̱i̱kaʼeri doʼa ijmata̱e̱po
dakaʼ ijmaki̱kay. Doʼtaj oʼnoknopo̱e̱po onʼnigpe̱i̱kaʼ.
\v 28 Diosere durugnada ijmanoeanhuahuikaʼapoy. Kenpaʼda
bueyhueʼdik o̱ʼneapo. Dakaʼ ijbatiokaʼnok beʼapiʼ sigpiʼ
okkayhueʼdik meʼneapone.
\v 29 Oveja huanigpe̱i̱kaʼeri meʼbayokuyne. Doʼhued Apag Diosa
meʼbayokuyne. Teynanada o̱ʼe̱. Diosyoʼda teynanada o̱ʼe̱.
Noga̱piʼ konig teyti ehueʼ o̱ʼnepo okkayhueʼdik o̱ʼnikaʼ.
\v 30 Apagere doere nogtida o̱ʼe̱y. —‍Jesúsa huairitaj
oʼmanaʼuy.
\p
\v 31 Judío huairia huida̱ Jesústaj aʼpaʼeaʼyaʼpo onʼbaeaʼuy.
\p
\v 32 —‍Opuda̱ onʼtiahuayikaʼne nogda nogda ʼuruaʼnanada
ijkikay. Apaga̱ beʼtihuapoknok konig Diosayoʼda kaʼdik o̱ʼe̱
ijkikay. ¿Kateaʼpo menapoata doʼtaj onpaʼeapo? —‍Jesúsa
oʼmanaʼuy.
\p
\v 33 —‍Ehueʼ. Huadakda iʼkikaʼnok paʼeahueʼ o̱ʼe̱a̱poy. Diostaj
dakhueaʼnada iaʼnok huida̱ oʼpaʼeaʼapoy. Huabokerek e̱ʼe̱a̱da
Dios i̱jje̱y iaʼnok huida̱ oʼpaʼeaʼapoy. —‍Judíoa oʼnonaʼuy.
\p
\v 34 —‍“Oy opudomey Diostaj huanigpe̱i̱kaʼeri moʼe̱po
diosdik moʼto̱e̱ne.” Diosa oʼmanaʼuyate. Kenpaʼ
opudomeyen Diosbaʼte oʼmadoyaʼuyate.
\v 35 Diosbaʼnayo namaʼda ahueʼdik o̱ʼe̱. Kenpaʼda buttida
o̱ʼi̱kaʼ. “Oy opudomey Diostaj huanigpe̱i̱kaʼeri moʼe̱po
diosdik moʼto̱e̱ne.” Apagbaʼa buttida oʼmanaʼuyate.
\v 36 Apagtaj meʼnigpe̱i̱keʼpo Diosa meʼtaʼmonaʼuyne.
Dakhueaʼ huakaʼerite meʼtaʼmonaʼuyne. Konige̱po “Diosen
Huasiʼpo i̱jje̱y,” aʼdik i̱ji̱kay. Konige̱po “Diostaj
dakhueʼda oʼtiaʼpak.” Doʼtaj huaahueʼ ya̱ʼnikaʼ.
\v 37 Kenda doʼhued Apaga̱ menikaʼnig ijkikay. Do Diosen
kikahueʼ e̱e̱ʼnayo doʼtaj oknopo̱e̱hueʼdik moʼe̱ne.
\v 38 Doʼa Diosen eʼkikaʼtada opudomeya̱ doʼtaj oknopo̱e̱hueʼ
e̱e̱ʼpiʼ kenda do ijkikaʼnige̱yo̱ kenda yanoknopo̱e̱ʼ.
Diosensiʼpo o̱ʼe̱ nopo̱e̱ʼdik moʼe̱. Konig Diosa oʼnopo̱e̱
konigti ijnopo̱e̱y. Konig do i̱jje̱y konigti Dios o̱ʼe̱.
Konig doʼa ijnopo̱e̱y konigti Diosa oʼnopo̱e̱. Kenda
nopo̱i̱kaʼdik moʼe̱a̱po. —‍Jesúsa judío huairitaj
oʼmanaʼuy.
\p
\v 39 Onteʼti Jesústaj kanʼkude̱ʼpo eʼtohuaʼtaʼ enʼpaktada
Jesúsa oʼmakmonʼuy.
\p
\v 40 Onteʼti Jordánhue̱ akodpen Jesúsa oʼhuaʼuy. Kenteda
Juana huakkuruda bautiza oʼmagkadhuaʼuyatenig. Kenteda Jesús
o̱ʼunhuahuaʼpo.
\v 41 Jesúste huakkaʼada onʼhuatiakuy.
\p —‍Konig tiahuayhued o̱ʼi̱kaʼ konig Diosayoʼda kaʼdik o̱ʼe̱
Juananayo kahueʼ o̱ʼu̱y. Ayaʼda inbokerektaj oʼtiaʼpakikaʼuy,
buttida oaʼikaʼte. —‍Aratbuta onʼhuaaʼuy.
\p
\v 42 Ke̱ya̱ʼ Jesústaj huakkaʼada oʼnoknopo̱e̱ʼuy.
\c 11
\s Lázaro oʼbueyʼuyate.
\p
\v 1-3 Lázaro huabokerek o̱ʼu̱y. Jesúsa Lázarotaj diʼda
o̱ʼi̱kaʼuy. Betania huakkaʼ jakyo hua̱e̱ʼeri o̱ʼi̱kaʼuy.
Betaniayo huidpo Maríaere Martaere o̱ʼnikaʼuy. Lázaro
dakhueʼda o̱ʼe̱nok María Martaere Jesúste onʼtaʼmonaʼuy.
\p —‍Lázarotaj diʼda i̱ʼi̱kaʼne. Dakhueʼda o̱ʼe̱, Huairi.
Jesústaj yanatiʼ. —‍Oʼnonaʼuy. María Jesús huairien
huaʼitaj huasihuaj ʼuruʼhui̱e̱a̱da ʼitioyhued kenpaʼti huakuhuiʼa
ʼitidukuthued o̱ʼu̱y.
\p
\v 4 Jesúsa kenda oʼpe̱e̱depo,
\p —‍Dakhueʼda o̱ʼe̱nigʼa kenpaʼda bueyhueʼ o̱ʼe̱a̱po. “Diosa
ʼuruaʼda oʼkaʼ. Huadaknanada o̱ʼe̱,” aratbuta kanʼnopo̱e̱ʼpo
keʼna dakhueʼ o̱ʼe̱. Kenpaʼti “Diosen Huasiʼpoa huadaknanada
oʼkikaʼ. ʼUrunanada o̱ʼe̱.” Aratbuta kanʼhuaeʼpo keʼna
dakhueʼda o̱ʼe̱. —‍Jesúsa oʼpe̱e̱depo oʼmanaʼuy.
\p
\v 5-7 Ken Martataj Martaen huamaʼbuytaj kenpaʼti Lázarotaj
diʼda oʼmaepo Jesús ke̱ya̱da nog bottaʼmeʼnoe
o̱ʼe̱a̱huadpo Lázaro dakhueʼda o̱ʼe̱ eʼpe̱e̱deada bottaʼ
huameʼnoe o̱ʼe̱depo,
\p —‍Judea huadaribayo monhuaʼ. —‍Oroʼ huanigpe̱i̱kaʼeritaj
monaʼuy.
\p
\v 8 —‍Huaboaʼda huida̱ onʼtaj eʼpaʼeaʼtaʼ boʼtipakmeʼne
judío huairia Judeayaʼ. ¿Ke̱yo̱ menpaʼ onteʼti iʼhuaʼapo,
huamanmadikaʼeri? —‍Oroʼ huanigpe̱i̱kaʼeria onaʼuy.
\p
\v 9 —‍Huameʼnoe jeyda o̱ʼe̱nok aratbuta katepiʼ kahuaddik
o̱ʼnikaʼ. Diostaj nigpe̱i̱kaʼdik o̱ʼne. Nogmeʼnoetida doce
horas oʼtaʼtenok kahuaddik o̱ʼnikaʼ. Doʼtaj huaarak
huameʼnoe ehued o̱ʼe̱nok doʼtaj arakhueʼdik meʼnene.
Nogok ken horate huabuey Diosa baktieʼeaʼuyne ayaʼ Diosen
eʼkadeʼte eʼkuhuitdeʼte doʼtaj arakdik meʼneapone.
\v 10 Sikyo taʼtehueʼ o̱ʼe̱nok katepiʼ kahueʼdik o̱ʼnikaʼ.
—‍Jesúsa monaʼuyne.
\p
\v 11 —‍Doʼhued huadiʼ Lázaro oʼtaynigʼa, monhuaʼ,
ijmaboaʼapoy. —‍Jesúsa monaʼuyne.
\p
\v 12 —‍Eʼtaynayo oʼyareapo oʼnopo̱e̱y, Huairi. —‍Oroʼ
huanigpe̱i̱kaʼeria Jesústaj onaʼuy.
\p
\v 13 O̱ʼa̱ro̱gpo oʼtay oroʼomeya̱ oʼnopo̱e̱po Jesústaj
oknopo̱e̱gkahueʼ o̱ʼu̱y. Eʼbueytada “Oʼtay,” oaʼpo Jesúsa
oʼbatiaʼpakuy.
\v 14 Konige̱po,
\p —‍Lázaro oʼbueymeʼte.
\v 15 Opud nogi̱ti doʼtaj menoknopo̱e̱ʼpo Lázarote i̱da
ikken huahuahueʼ i̱jje̱mey. Konige̱po durugda i̱jje̱y.
Lázarote monhuaʼ. —‍Jesúsa monaʼuyne.
\p
\v 16 —‍Oroʼomeykon monhuaʼ. Jesúsere aʼbueyyaʼpo monhuaʼ.
—‍Oroʼomey huanigpe̱i̱kaʼeritaj Tomása monaʼuyne. Tomás
konogda oʼdikkaʼ Gemelo.
\s Jesúsa aratbuttaj huamanoyhuada̱ʼeri o̱ʼe̱po aratbuttaj durugteda oʼmanoeanhuahuikaʼapo. Diosere onʼnoeonhuahuikaʼapo.
\p
\v 17 Ken Jesúsere oʼhuaʼuy. Betaniayo e̱kye̱deʼte “Bottaʼ
bottaʼ huameʼnoe Lázaro kubarakyo oʼhuedde.” Jesústaj
oʼnonaʼuy.
\v 18 Betaniayo Jerusalén meyo̱hueʼda o̱ʼe̱. Konig dos
kilómetros y medio o̱ʼe̱nok
\v 19 María Martaeretaj aʼbataʼhuade̱ya̱ʼpo huakkaʼ judío huairi
Betaniayo onʼtiakdepo, Jerusalénya̱ʼ onʼtiakdepo,
aʼmanoeynoeya̱ʼpo onʼtiakuyate. Huidpoa oʼbakbueynok
eʼmanoeynoeytaʼ onʼpakuyate.
\v 20 Jesús oʼtiakde Marta oʼpeeondepo aʼeyaʼpo o̱ʼo̱ro̱kʼuy.
Maríanayo jakyo o̱ro̱khueʼ o̱ʼu̱y.
\p
\v 21 —‍Aʼnen bottaʼ bottaʼ huameʼnoete o̱ʼna i̱yo̱ ehueʼ
i̱ʼe̱meʼne. On i̱yo̱ e̱ʼe̱meʼnayo doʼhued huidpo Lázaro
bueyhueʼ o̱ʼe̱aymeʼ, Huairi.
\v 22 Oy kenpaʼti katepiʼ iʼpakpo Diostaj eʼtionaʼpaknayo
beyokapone, ijnopo̱e̱y. —‍Martaa Jesústaj onaʼuy.
\p
\v 23 —‍O̱ʼnen huidpo oʼnoyhuadapo. —‍Jesúsa onaʼuy.
\p
\v 24 —‍Nogok keneʼhua̱ya̱ʼ huameʼnoete ayaʼada
onʼnoyhuada̱po. Keʼnakon oʼnoyhuadapo ijnopo̱e̱y. —‍Martaa
onaʼuy.
\p
\v 25,26 —‍Huamanoyhuada̱ʼeri i̱jje̱po aratbut eʼbueyʼuytaj
ijmanoyhuada̱ʼapoy. Diosere aratbuttaj durugda
ijmanoeanhuahuikaʼapoy. Ayaʼada doʼtaj meʼnoknopo̱e̱po
enʼbueynayo onteʼti kurudyo̱ Diosere onʼnoeonhuahuikaʼapo.
Durugda onʼnoeonhuahuikaʼapo. Doʼtaj meʼnoknopo̱e̱po
onʼnoeonhuahuikaʼapo. Onteʼti bueyhueʼdik o̱ʼneapo.
¿Kenda menpaʼ iʼnopo̱e̱, Marta? —‍Jesúsa onaʼuy.
\p
\v 27 —‍E̱e̱ʼ, kenda do ijnopo̱e̱y, Huairi. “Aratbuttaj
kamanopoʼkoreʼpo Cristotaj ijtaʼmonaʼapoy. Doʼhued Huasiʼpo
ijtaʼmonaʼapoy.” Aʼnennada Diosa oʼmanaʼuyate. Diosyaʼ
oʼtiakuyate. O̱ʼna Cristo o̱ʼe̱. Diosen Huasiʼpo o̱ʼe̱,
ijnopo̱e̱y, Huairi. —‍Martaa Jesústaj onaʼuy, ken.
\s Kubarakyo Lázarobuey eʼhuedtaʼda Jesúsa oʼhuikonʼuy.
\p
\v 28 Kenda Martaa onaʼdepo huamaʼbuy Maríataj atotiakyaʼpo
Maríate oʼhuahuaʼuyate.
\p —‍Huamanmadikaʼeri oʼtiakdepo ontaj katiakeʼ behuaaʼne.
—‍Jutakaʼ Martaa onaʼuyate.
\p
\v 29 María oʼpeundepo i̱da oʼbodpo Jesústaj oʼhuahuaʼuyate.
\v 30 Huakkaʼ jakyo Jesús kudhued o̱ʼu̱y. Kenteda Martataj
oʼbatiaʼpakpo kenteda o̱ʼe̱po.
\v 31 Ken María i̱da oʼbodpo i̱da o̱ʼo̱ro̱konpo. Judío huairi
onʼbataʼhuadpo, onʼmanoeynoeypo Maríataj onʼtiahuaydepo
kubarakyaʼ aʼhuikyaʼpo oʼhuaʼ onʼnopo̱e̱po onʼtaʼhuaʼuyate.
\p
\v 32 Jesústaj oʼhuatiakdepo Jesúsen huaʼitaʼpote huikudate
oʼtihuadpo.
\p —‍Aʼnen bottaʼ bottaʼ huameʼnoete o̱ʼna i̱yo̱ ehueʼ
i̱ʼe̱meʼne on i̱yo̱ e̱ʼe̱meʼnayo doʼhued huidpo Lázaro
bueyhueʼ o̱ʼe̱aymeʼ, Huairi. —‍María Jesústaj onaʼuy.
\p
\v 33 Kenda María onaʼdepo oʼhuik. Lázarotaj oʼhuikuy. Judío
huairi kenere onʼhuatiakdepo kenere onʼbahuikpo. Maríaomey
enhuikte Jesúsa oʼbatiahuaydepo sueʼe̱a̱da o̱ʼe̱po
oʼmepuʼketuʼuy.
\p
\v 34 —‍¿Lázarotaj meyo̱ ya̱gkubarakkameʼ? —‍Jesúsa
oʼmanaʼuy.
\p —‍Yatiak. Yatiahuayʼ, Huairi. —‍María Martaerea oʼnonaʼuy.
\p
\v 35 Ken Jesúskon oʼhuikonʼuy.
\p
\v 36 —‍Dapitaʼ Lázarotaj diʼnanada o̱ʼunhuahuikaʼ. —‍Judíoa
onʼhuaaʼuy.
\p
\v 37 —‍Huabokerek ekpobigtaj okpoyareameʼ. ¿Lázarotaj
bueyhueʼ ka̱e̱ʼpo menpaʼ Jesúsa yareahueʼdik o̱ʼe̱meʼte?
—‍Sueʼada judíoa onʼbatiaʼpakuy.
\s Lázaro oʼnoyhuaduy.
\p
\v 38 Onteʼti Jesúsa huanopoyaʼda sueʼnanada o̱ʼe̱po
kubarakte oʼhuatiakonpo Lázarotaj kubarakyo onʼhueda̱meʼte.
Huaboroʼhuida̱da kubarak onʼtinokbetaʼuyate.
\p
\v 39 —‍Huaboroʼhuid yanokpokoreaʼ. —‍Jesúsa oʼmanaʼuy.
\p —‍Aʼnenda bottaʼ bottaʼ huameʼnoe oʼbueymeʼpo oyda pa̱gda
o̱ʼe̱deta, Huairi. —‍Eʼbueyen huidpoa Martaa onaʼuy.
\p
\v 40 —‍“Eknopo̱e̱ʼnayo Diosa ʼuruaʼnanada oʼkaʼapo. Dios
ʼurunanada o̱ʼe̱ ayaʼada onʼtiahuaypo onʼnopo̱e̱a̱po,”
onaʼdene. —‍Jesúsa Martataj onaʼuy.
\p
\v 41 Ken huaboroʼhuid eʼtinokbetaʼ oʼnokpokoreaʼuy. Jesúsa
kurudyon oʼmabopo,
\p —‍Doʼtaj oʼnigpe̱e̱nok, Apag, dakiti onaʼne.
\v 42,43 Doʼtaj kiriga̱yo̱ʼ menigpe̱e̱ne, ijnopo̱e̱y. Doʼtaj
oʼtaʼmonaʼuyne in aratbuta kanoknopo̱e̱ʼpo “dakiti, Apag”
onaʼne. —‍Jesúsa oʼtionaʼpakdepo,
\p —‍Ya̱o̱ro̱k, Lázaro. —‍ʼUttaʼda onaʼuy.
\p
\v 44 Eʼbueymeʼada oʼnoyhuaddepo o̱ʼo̱ro̱kpo huaʼitaj huabaʼtaj
huakoktakon huabid telaa eʼtihui̱yi̱g o̱ʼo̱ro̱konʼuy. Ken
konig Lázaroa o̱ʼo̱ro̱kuy.
\p —‍Yanʼtikuj, kahuaʼeʼ. —‍Jesúsa oʼmanaʼuy.
\s Jesústaj aʼarakyaʼpo monig oʼkaʼapo sacerdote huairiere fariseo huairiomeya̱ onʼbatiaʼpakuyate.
\r (Mt. 26.1-5; Mr. 14.1-2; Lc. 22.1-2)
\p
\v 45 Judíomey Maríataj aʼtaʼhuade̱yaʼpo
onʼhuatiakmeʼtenigʼa kenda Jesúsa oʼkaʼ onʼtiahuaydepo
huakkaʼada oʼnoknopo̱e̱ʼuy.
\v 46 Sueʼada fariseo huairitaj onʼbahuahuaʼpo, kenda Jesúsa
oʼkaʼde fariseo huairiomeytaj onʼbatiaʼpakuyate.
\v 47 Ken fariseoere sacerdote huairiere nog judío huairiere
onʼkupopakdepo,
\p —‍¿Kate oʼkaʼapo? Ken huabokerek konig Diosayoʼda kaʼdik
o̱ʼe̱nig oʼkaʼ. Oʼbayareaʼ. Kenpaʼti oʼnoyhuada̱ʼ.
\v 48 Kentaj batikahueʼ e̱e̱ʼnayo ayaʼada kentaj
oʼnoknopo̱e̱a̱po, kentaj ayaʼada onʼnigpe̱i̱kaʼapo. Jesús
oroʼen huairi o̱ʼe̱. Aratbuta onʼbatiaʼpakapo Roma huairia
kenda onʼtipe̱e̱dete boʼhuadiayapone, sorotataj
moʼtitaʼmonaʼapone. Oroʼtaj mogkaʼapone. Kenpaʼti oroʼen
Diosen jak onʼsakaʼapo. —‍Judío huairi huayahuaya
onʼbatiaʼpakuyate.
\p
\v 49,50 —‍Opudomeya̱ sigpiʼ nopo̱e̱hueʼda moʼe̱ne.
Aratbuttaj nogtiada eʼmanigbueynayo oroʼtehuapaʼ huadakda
o̱ʼe̱a̱po. Ayaʼda judío aratbut mabueyhueʼ kaʼneʼpo nogtiada
manigbueydik o̱ʼe̱a̱po. Kenda nopo̱e̱hueʼ moʼe̱ne.
—‍Caifása oʼmanaʼuyate. Caifás kenbayokte huaboroʼ sacerdote
huairi o̱ʼu̱yate.
\p
\v 51,52 Caifásada oʼnopo̱e̱po kenda manahueʼ o̱ʼu̱ynigʼa
kenbayok sacerdote huairi e̱e̱ʼte Diosa oʼnopo̱e̱a̱ʼnok
“Ayaʼtada judío aratbuttaj Jesúsa oʼmanigbueyapo. Kenpaʼti
Diosen aratbut, judío aratbut kenpaʼti nog aratbuttaj
kamanopoʼkoreʼpo Diostaj konigti kanoknopo̱e̱ʼpo Jesúsa
oʼmanigbueyapo.” Kenda sacerdote huairia oʼbatiaʼpakuy.
\v 53 Caifás kenda eʼmanadeʼte “Jesústaj monig
oʼarakapo.” Judío huairia huaboaʼda onʼbatiaʼpakuyate.
\p
\v 54 Judío huairia eʼaraktaʼ onʼtipaknok ke̱yo̱ huakkaʼ
judío aratbut e̱gkupopakyo onteʼti Jesús huahueʼ o̱ʼu̱y.
Nogyo̱ oʼhuaʼuy. Efraín huakkaʼ jakyo oʼhuaʼuy. Oroʼ
huanigpe̱i̱kaʼeriere oʼhuaʼuy. Efraínyo sueʼda aratbut
o̱ʼneʼuy. Kenpaʼti Efraín kurute sueʼada aratbut o̱ʼnuy.
Oroʼomeyere o̱ʼi̱kaʼuy.
\p
\v 55 Aʼti judío huakkurueri isiʼpo mabueyhueʼ e̱e̱ʼ
okkahuehueʼ fiesta o̱ʼe̱a̱po. Nogya̱ʼ nogya̱ʼ nog huakkaʼ
jakyaʼ nog huakkaʼ jakyaʼ Jerusalényo̱ huakkaʼda judío aratbut
onʼbahuaʼuy. Fiesta ehued onʼbahuaʼuyate. Fiestayaʼ aʼbapeyaʼpo
aʼmayaʼpo Diostaj ʼuru ʼuhua e̱ʼhua̱e̱ʼ onʼnigbatiarakuyate
ʼurunopoʼda Diostaj aʼnigeyapo. Konige̱po fiesta kahued
konig huakkuruda onʼhuaʼuyate.
\v 56 Jerusalényo̱ o̱ʼnedepo onʼhuaʼepo Jesústaj
oʼnonmabopo. Diosen jakyo o̱ʼnedepo,
\p —‍¿Menpaʼ moʼnopo̱e̱? ¿Menpaʼ Jesús fiestate
yatiakapet? ¿Tiakhueʼ ya̱ʼe̱a̱petpiʼ? —‍Judío aratbuta
huayahuaya onpayoʼ onʼbatiaʼpakuy.
\p
\v 57 “Beʼapiʼ Jesústaj eʼtiahuaynayo oroʼtaj monatiʼ.”
Sacerdote huairiomey fariseo huairiere onʼmanaʼuyate.
Jesústaj huabakuda̱ʼ jakyo kanʼtohueʼpo kenda
onʼmanaʼuyate.
\c 12
\s Ettoneʼ Jesúsen huaʼitaj huasihuaj ʼuruʼhui̱e̱a̱da oʼitioyʼuyate.
\r (Mt. 26.6-13; Mr. 14.3-9)
\p
\v 1 Aʼtimon seis huameʼnoe eʼpokdeʼte judío aratbuten
huakkurueri isiʼpo mabueyhueʼ e̱e̱ʼ okkahuehueʼ fiesta
o̱ʼe̱a̱po, Jesús Betania huakkaʼ jakyo oʼtiakuy. Ke̱yo̱ Lázaro
o̱ʼi̱kaʼuy. Jesúsa Lázarotaj eʼbueymeʼtada oʼnoyhuada̱ʼuy.
\v 2 Jesústaj ʼuru aypo onʼnigmanhuada̱ʼuy. Martaa aypo
oʼmabayokeʼuy. Jesúsere Lázaro oʼbapeʼuy.
\v 3 Ken onʼbapeʼdepo ʼuruʼhui̱e̱da huasihuaj María oʼtotiakpo,
konig medio litro oʼtotiakpo nardo huasihuaj huakkaʼteda
e̱e̱ʼtada oʼtotiakpo Jesústaj huakkaʼ oʼpakpo María
Jesúsenʼitaj oʼitioypo oʼihuekedepo, huakuhuiʼakon
oʼitidukutʼuy. Jakyaʼ ayaʼada huasihuaj ʼuruʼhui̱e̱ʼtaj
onʼhui̱ri̱kuy.
\p
\v 4,5 —‍¿Menaʼpo kenda yakaʼ? ¿Menaʼpo ken ʼurusihua
bahuayahueʼ ya̱ʼe̱meʼ? Paiʼda aratbuttaj kanʼyokeʼpo
¿Menaʼpo bahuayahueʼ ya̱ʼu̱y? Huakkaʼteda e̱e̱ʼtada o̱ʼe̱.
Konig trescientos denarioshuapa huakupe e̱e̱ʼtada o̱ʼe̱.
—‍Judasa oʼmanaʼuy. Judas Simónensiʼpo o̱ʼu̱y. Judas
Jesúsen huanigpe̱i̱kaʼeri e̱ʼe̱a̱da Judío huairia kadarakeʼpo
Judasa oʼbayokapo.
\p
\v 6 Paiʼda aratbuttaj matinepahuihueʼada huabereeri o̱ʼe̱po
eʼberetaʼ oʼpakpo kenda oʼmanaʼuy. Huabereeri o̱ʼe̱ kenda
oroʼomeya̱ Jesúsen huanigpe̱i̱kaʼeria nopo̱e̱hueʼ o̱ʼu̱y.
Judas oroʼen huakupe huamato̱e̱ʼeri o̱ʼi̱kaʼnigʼa oroʼen
huakupe oʼberikaʼuyate.
\p
\v 7 —‍Kejeʼ, dakhueʼ huaahueʼ ya̱e̱ʼ Maríataj. Aʼti oʼbueyapo
María oʼnopo̱e̱po ʼuruʼhui̱e̱da huasihuaj
meʼnigtoeonhuahuikaʼpo beʼitihuekene. ʼUruso̱ʼda
kanʼkubarakkeʼpo meʼso̱ʼtihuekene.
\v 8 Paiʼda aratbuttanayo moʼmato̱i̱kaʼapone. Doʼtanayo
to̱e̱hueʼ o̱ʼnunhuahuikaʼapone. —‍Jesúsa onaʼuy.
\s Judío huairia Lázarotakon eʼaraktaʼ onʼpakuyate.
\p
\v 9 Jesús Betania huakkaʼ jakyo o̱ʼe̱a̱ʼ, huakkaʼ judío
aratbuta onʼtipe̱e̱po Betaniayo Jerusalénya̱ʼ onʼbahuaʼpo.
Jesústayoʼda aʼtiahuayaʼpo huahueʼ o̱ʼnuy kenpaʼti
Lázarotabetaʼ eʼtiahuaytaʼ onʼpakpo Betaniayo onʼhuaʼuy.
Lázarotaj oʼnoyhuada̱meʼte Jesúsa.
\v 10,11 Huakkaʼada judío aratbuta onteʼti judío huairitaj
eʼnigpe̱i̱kaʼtaʼ pakhueʼ o̱ʼnepo onʼbakhuaʼpo Jesústaj
oʼnoknopo̱e̱ʼuy. Konige̱po judío sacerdote huairi
Lázarotakon onʼhuadiaypo “Lázarotaj moʼdarak,” konigti
onpapayoʼ onʼnopo̱e̱ʼuyate.
\s Jesúsa konig judío aratbuten gobiernonig huairitoneʼ Jerusalényo̱ oʼbahuahuaʼpo oʼkudʼuy.
\r (Mt. 21.1-11; Mr. 11.1-11; Lc. 19.28-40)
\p
\v 12 Judío huakkurueri isiʼpo mabueyhueʼ e̱e̱ʼ okkahuehueʼ
fiesta aʼbapeyaʼpo huakkaʼada aratbut Jerusalényo̱
onʼbahuaʼdepo oʼnokye̱depo. Emeʼte “Jerusalényo̱ Jesúsa
oʼtiakonyakde,” huakkaʼada onʼtipe̱e̱depo
\v 13 huabotod onʼbaktegandepo Jesúste onʼto̱ro̱konpo
onʼnigtohuaʼpo,
\p —‍Oroʼomeytaj kabatiokeʼpo Diosa moʼnigtaʼmonaʼuyate.
Dios huairia moʼnigtaʼmonaʼuyate. Huadaknanada o̱ʼe̱.
Israel aratbuten gobierno huairitoneʼ o̱ʼe̱. Dakiti Dios.
—‍Jesústaj onʼhuahuaʼpo ʼuttaʼnanada onʼdaʼuy.
\p
\v 14 Jesúsa burrotaj oʼhuahuaypo kentaʼpite oʼhuaduy. Jesús
siʼpoe̱hued e̱e̱ʼte Apagbaʼte kenpaʼ o̱ʼe̱a̱po oaʼuyate.
\q
\v 15 Jerusalényo̱ hua̱e̱ʼeria moʼe̱po opuden huairi eʼtiakte
meʼpukhueʼdik moʼe̱. Burrote oʼhuadpo opudomeyen huairi
oʼtiakapo. 
\m Apagbaʼte kenpaʼ oʼmadoyaʼuyate.
\p
\v 16 Jesús burrote eʼhuaddeʼte kenda Apagbaʼte Jesústaj
oʼtiaʼpakuynig oroʼomey Jesúsen huanigpe̱i̱kaʼeria
nopoenkahueʼ o̱ʼu̱y. Nogoknayo Jesús kurudyo̱ oʼbehuikdepo
kenpaʼti Diosen Noki̱re̱g moʼnopoʼto̱e̱denok kenda
Jesústaj Apagbaʼte oʼtimadoyaʼuyate konigti Jesúsa kenda
oʼkaʼuynok huaboaʼda oʼnopoenkaʼuy.
\p
\v 17 Kenokaʼ Jesúsa Lázarotaj eʼbueytaʼ eʼnoyhuada̱ʼte
kenpaʼti “Ya̱o̱ro̱k, Lázaro,” enaʼte huakkaʼada judío
aratbuta onʼtiahuayʼuy. ʼUruaʼnanada Jesúsa oʼkaʼnok kenda
Jerusalényo̱ diga̱ʼda onʼmanbatiaʼpakuyate.
\v 18 Konig Diosayoʼda kaʼdik o̱ʼe̱ Jesúsa oʼkaʼdenok
huakkaʼada aratbuta onʼnopo̱e̱depo Jesústaj onʼhuahuaʼuyate.
\p
\v 19 —‍Paj, kentaj batikahueʼdik o̱ʼe̱y oroʼ. Yanʼtiahuayʼ,
ayaʼada kentaj onʼpakpo onʼnigpe̱i̱kaʼ. —‍Fariseo huairia
huayahuaya onʼbatiaʼpakuyate.
\s Sueʼda griego huaʼa huaaʼpakeria Jesústaj oʼdukuy.
\p
\v 20 Fiestate Jerusalényo̱ huakkaʼda onʼbatiakuyate. Diostaj
aʼtionaʼpakyaʼpo onʼbatiakuyate. Judíoere griego huaʼa
huaaʼpakeri onʼbatiakuyate.
\v 21 Felipe Jesúsen huataʼmonaʼeri o̱ʼe̱po Betsaida huakkaʼ
jak hua̱e̱ʼeri kenpaʼti Galilea huadarieri o̱ʼe̱nok sueʼda
griego huaʼa huaaʼpakeria Felipetaj onʼhuatiakpo,
\p —‍Jesústaj eʼbatiaʼpaktaʼ oʼpaki, huairi. —‍Felipetaj
oʼnonaʼuy.
\p
\v 22 Felipe Andréste oʼbakhuaʼpo kenda griego huaʼa
huaaʼpakeria oʼnonaʼde Andréstaj onaʼuy. Felipe Andrésere
onokteyoʼ Jesúste onʼhuaʼuy. Kenda griegoa oʼnonaʼ
Jesústakon oʼnonaʼuy.
\p
\v 23 —‍Aʼti Diosa oʼtaʼmonaʼuy ayaʼada onʼnopo̱e̱a̱po.
Ayaʼtada ijmanigbueyapoy. Ayaʼtada ijmanignoyhuadapoy.
Konig Huairitoneʼ Apag Diosere i̱jjeunhuahuikaʼapoy.
\v 24 Doʼa ayaʼtada manigbueyhueʼ e̱e̱ʼnayo kenpaʼti kubarakyo
kudhueʼ e̱e̱ʼnayo Diosere noeonhuahuikahueʼdik o̱ʼneapo.
Ken konig toketkid o̱ʼe̱, ijmanbatiaʼpaki. Toketkid
batukehueʼ e̱e̱ʼnayo konig kidpoaghueʼ e̱e̱ʼnayo tipakbohueʼ
o̱ʼe̱a̱po, huakkaʼ toket boyoghueʼdik o̱ʼe̱a̱po. Sorokyo ʼuruaʼda
eʼbatukeʼnayo nogok huakkaʼ toket oʼboyogapo. Huakkaʼda toket
o̱ʼe̱a̱po.
\v 25 Doʼtaj kenpaʼti Apag Diostaj pakhueʼ o̱ʼnepo ayaʼada
hua̱ʼenda onʼeretpakpo, katetapiʼ oʼderetpakpo, aratbuttaj
oʼderetpakpo, huabettaj oʼderetpakpo kenpaʼda onʼmabueyapo.
Nogomeynayo ayaʼtada huataʼda pakhueʼ o̱ʼnepo, katetaʼpiʼ
eretpakhueʼ o̱ʼnepo doʼtayoʼda onʼpakpo doʼtayoʼda
onʼnigpe̱i̱kaʼpo Diosere onʼnoeonhuahuikaʼapo.
\v 26 Beʼapiʼ doʼtaj eʼnigpe̱i̱kaʼtaʼ eʼpaknayo konig ijkikay
konigti kanʼkikeʼ, konig do paiʼda ijnopoʼi̱kay konigti
paiʼda kanʼnopoʼi̱keʼ, konig do huataʼda ijpakpo kahueʼ
i̱ji̱kay konigti huataʼda kanʼpakpo kahueʼ kaʼnikeʼ kenokaʼ
doere doʼhued Apagere kurudyo̱ o̱ʼneonhuahuikaʼapo. Kenomey
doʼtaj onʼnigpe̱i̱kaʼ kenomeytaj Diosa oʼbakkahueaʼapo,
“Huadakda moʼe̱ne.” Diosa oʼmanaʼapo. —‍Jesúsa
oʼmanaʼuy.
\s “Cruzte menʼbehuikaʼapone. Cruzte ijbueyapoy.” Jesúsa oʼbatiaʼpakuyate.
\p
\v 27 Huakkaʼtada paiʼda ijmanignopoʼe̱a̱poy. Huakkaʼtada
ijmanigbueyapoy. Huakkaʼda eʼmeʼpukeada “Bueyhueʼ a̱ʼe̱ya̱ʼpo
beʼtiokaʼ, Apag” onahueʼ o̱ʼe̱ne. Aʼmanigbueyyaʼpo kurudya̱ʼ
ijtiakuy.
\v 28 Ontaj ijnigpe̱i̱kaʼpo ijmanigbueynok “Huadaknanada
o̱ʼe̱ Dios. Huakkaʼ diʼda oʼmaikaʼ. Huakkaʼ
oʼmatinepahuiʼikaʼ.” Ayaʼada aratbuta kenda
kanʼbatiaʼpakikeʼpo. Jesúsa kenpaʼ oʼtionaʼpakuy.
\p —‍Doʼtaj meʼnigpe̱i̱kaʼnok “Huadaknanada o̱ʼe̱ Dios.”
Ayaʼ aratbutada kanʼnopo̱i̱keʼ nogok onaʼti konigti
kanʼnopo̱i̱keʼ. —‍Kurudya̱ʼ Diosa ʼuttaʼda onaʼnok Jesúsa
oʼpe̱e̱ʼuy.
\p
\v 29 Huakkaʼada aratbuta o̱gkupobopo onʼpe̱e̱depo, “Kuruda
oaʼ,” onʼbatiaʼpakpo. “Diosen huataʼmoneria oʼdaʼ.”
Nogomeya̱ onʼbatiaʼpakuy.
\p
\v 30 —‍Doʼtayoʼda kenda Diosa onahueʼ meʼe̱ne. Opudomey
doʼtaj kaʼnoknopo̱e̱ʼpo kenda menaʼne.
\v 31 Doʼtaj eknopo̱e̱ʼtaʼ pakhueʼ o̱ʼnepo doʼtaj
eʼnigpe̱e̱taʼ pakhueʼ o̱ʼnepo aʼti doʼtaj enʼarakdeʼte
“Dakhueaʼnanada boʼkaʼne. Doʼtaj nigpe̱e̱hueʼ moʼe̱ne.
Castiga o̱gkaʼdik o̱ʼneapone.” Diosa oʼmanaʼapo. Kenpaʼti
totoʼtaj Diosa konigti o̱gkaʼapo onteʼti huairitoneʼ ehueʼ
o̱ʼe̱a̱po. Ayaʼtada onteʼti namaʼda manahueʼdik o̱ʼe̱a̱po.
\v 32 Do cruzte ijbueyapoy. Cruzte ijbueydepo ijnoyhuadapoy.
Kurudyo̱ Dioste ijhuaʼapoy. Ayaʼ aratbuta doʼtaj
eʼnoknopo̱e̱deʼ Diosensiʼponig o̱ʼneapo. Kurudyo̱
ijbatobehuikapoy. —‍Jesúsa oʼmanaʼuy.
\p
\v 33 Cruzte ijbueyapoy Jesúsa dakaʼ oʼmanbatiaʼpakuy.
\p
\v 34 —‍Oroʼen Apagbaʼ eʼmonaʼpakte oʼpe̱e̱po Dios Cristotaj
oʼtaʼmonaʼaponok oroʼtaj boʼtiokadhuahuikaʼapone. Kenpaʼda
Cristo bueyhueʼ o̱ʼe̱po oʼnoeonhuahuikaʼapo. Diosa ontaj
eʼtaʼmonaʼnayo, “Cruzte ijbueyapoy.” ¿Menaʼpo iaʼ kenpaʼ?
Diosa huabokerektaj oʼtaʼmonaʼapo. ¿Beʼa ya̱ʼe̱a̱po?
—‍Aratbuta o̱gkupopakpo nogtiada Jesústaj kenpaʼ onaʼuy.
\p
\v 35 —‍Sueʼda huameʼnoe opudomeyere i̱jje̱a̱poy. Konig
huakjey i̱jje̱po Diostaj kanoknopo̱e̱ʼpo oʼnonmadikaʼne.
Konig Diostaj eknopo̱e̱ʼ kenpaʼti eʼnigpe̱e̱ʼ
onʼtiahuayaʼne. Sueʼda huameʼnoe opudere i̱jje̱a̱ponok
opudere e̱e̱ʼte doʼtaj dakaʼ menʼpe̱e̱ʼ kenpaʼti dakaʼ Diostaj
yanoknopo̱e̱ʼ. Doʼtaj dakaʼ nigpe̱e̱hueʼ e̱e̱ʼnayo konig
sikki̱re̱gyo̱da moʼe̱a̱pone. Diostaj menpaʼ oknopo̱e̱hueʼdik
moʼe̱a̱pone. Diosen dag huahuayhueʼdik moʼe̱a̱pone.
\v 36 Do opudomeyere e̱ʼe̱deʼte doʼtaj meʼnoknopo̱e̱ʼ.
Diosen aratbut a̱ʼe̱ya̱ʼpo doʼtaj meʼnoknopo̱e̱ʼ. —‍Jesúsa
oʼmanaʼuy.
\p Kenda oʼmanaʼdepo Jesús oʼbakhuaʼpo oʼi̱re̱ge̱ʼuy.
\s Menaʼpo huakkaʼ judío aratbuta Jesústaj oknopo̱e̱hueʼ o̱ʼnikaʼ. Juana oʼbatiaʼpakuyate.
\p
\v 37 Konig Diosayoʼda kaʼdik o̱ʼe̱ aratbut kanʼtiahuayeʼpo
Jesúsa nogda nogda oʼkikaʼuynigʼa aratbuta enʼtiahuayte
oʼbayareaʼuy. Nogtaj oʼnoyhuada̱ʼuynigʼa Jesústaj
oknopo̱e̱hueʼ o̱ʼnuyate. Huakkaʼ judío aratbuta oknopo̱e̱hueʼ
o̱ʼnuyate.
\v 38 Konig Diosen huamanigbatiaʼpakeri Isaíasa oaʼuyate,
aʼnennanada oaʼuyate konigti o̱gkaʼuy. Jesústaj
oknopo̱e̱hueʼ o̱ʼnuy. Isaías oʼmadoyaʼpo,
\q O̱ʼnen huaʼa onʼpe̱i̱kaʼnigʼa konig huabokereknayo
kahueʼdik o̱ʼnikaʼ konig teyda iʼkikaʼnig
onʼtiahuayikaʼnigʼa oknopo̱e̱hueʼ o̱ʼnikaʼ. O̱ʼnen huaʼa
oʼmanaʼnigʼa oknopo̱e̱hueʼ o̱ʼne, Dios Huairi. Isaías
aʼnennanada oʼmanigmadoyaʼuyate.
\m
\v 39 Menaʼpo oknopo̱e̱hueʼdik o̱ʼne onteʼti Isaías
oʼmadoyaʼuyate,
\q
\v 40 Diostaj pakhueʼ o̱ʼnenok Diosa oʼbakpobiga̱ʼuy. Kenpaʼti
nopoenkahueʼ e̱ʼhua̱e̱ʼ oʼmagkaʼnok onteʼti ʼuruda Diosen
eʼkaʼ menpaʼ tiahuayhueʼdik ya̱ʼneapet. Diosen huaʼa menpaʼ
nopoenkahueʼdik ya̱ʼneapet. Dakhueaʼ eʼkaʼ
aʼnopoʼkoreayaʼpo Diostaj menpaʼ nopoʼkoreahueʼdik
ya̱ʼneapet. Isaíasa oʼmanaʼuyate.
\m
\v 41 Jesús paiʼnanada oʼmanignopoʼe̱po oʼmanigbueypo
oʼnoyhuadpo Diosyo oʼbehuikpo kenda Diosa Isaíastaj
oʼnopo̱e̱a̱ʼuyate. Konige̱po judío aratbuta Jesús, Diosen
Huasiʼpotaj eknopo̱e̱ʼtaʼ pakhueʼ ya̱ʼneapet. Kenpaʼti
eʼnigpe̱e̱taʼ pakhueʼ ya̱ʼneapet. Isaíasa aʼnennanada
oʼmanaʼuyate.
\p
\v 42 Huakkaʼamon judío aratbut Jesústaj
oʼnoknopo̱e̱ʼuynigʼa sueʼda huakkaʼ huairiakon
oʼnoknopo̱e̱ʼuyatenigʼa Jesústaj yoknopo̱e̱y aratbuta
kanʼpe̱e̱ʼpo batiaʼpakhueʼda fariseo huairitaj onʼmeʼpukpo
batiaʼpakhueʼ o̱ʼneʼuyate. Jesústaj yoknopo̱e̱y aratbuta
eaʼpaknayo onteʼti judíoen hua̱i̱takeʼ jakyo kudhueʼdik
o̱ʼneapo. Fariseo huairia onʼmanaʼuynok.
\v 43 Kenpaʼti “Huadakda i̱ʼe̱ne.” “ʼUruda huairi i̱ʼe̱.”
Aratbuta eaʼtada ekpe̱e̱taʼ oʼderetpakpo Diosa kenda eaʼtaʼ
ekpe̱e̱taʼ pakhueʼ o̱ʼnepo Jesústaj yoknopo̱e̱y ahueʼ
o̱ʼnuy.
\s Jesústaj pakhueʼ hua̱e̱ʼeria dakhueaʼ o̱gkikaʼ. Jesúsen huaʼa oaʼnok Diosa castiga oʼmagkaʼapo.
\p
\v 44 —‍Apag Diosa oʼtaʼmonaʼuy. Ayaʼada doʼtaj eknopo̱e̱nayo
Diostaere oknoponhuaʼdik moʼe̱ne.
\v 45 Kenpaʼti ayaʼada doʼtaj mentiahuaypo Diostakon
onʼtiahuay. Keʼna meʼtaʼmonaʼuynigtaj.
\v 46 Huadariyo aratbutte ijtiakuy. Konig huakjey Diostaj
aʼmaknopo̱e̱a̱yaʼpo ijtiakuy. Doʼtaj huaknopo̱e̱ʼeria
Diostakon oʼnoknopo̱e̱a̱po. ʼUruda kikaʼdik o̱ʼneapo. Konig
sikki̱re̱gyo̱ ehueʼ o̱ʼnikaʼapo. Dakhueaʼ onteʼti kikahueʼ
o̱ʼneapo.
\v 47 Sueʼda huakkaʼ doʼhued huaʼataj nigpe̱e̱hueʼ
moʼe̱a̱pone. “Dakhueaʼ bokaʼne,” manahueʼdik i̱jje̱a̱poy.
“Dakhueaʼ iʼkaʼne,” aʼmanayaʼpo tiakhueʼ i̱jje̱ʼuy.
Aratbuttaj aʼmanopoʼkoreayaʼpo ijtiakuy. Aratbuttaj
aʼmanoeanhuahuikayaʼpo ijtiakuy.
\v 48 Doʼtaj pakhueʼ hua̱e̱ʼeritaj kenpaʼti doʼhued huaʼataj
nigpe̱e̱hueʼ hua̱e̱ʼeritaj “Dakhueaʼ boʼkikaʼuyne.”
Keneʼhua̱ya̱ʼ huameʼnoete doʼhued huaʼaʼa oʼmanaʼapo. Diosa
castiga oʼmagkaʼapo.
\v 49 Konig doada ijnopo̱e̱po konig doada ijpakpo manahueʼ
i̱ji̱kay. Apag Diosa meʼtaʼmonaʼuyne. Kenda Apaga
menaʼuynig ijmanmadikikaʼpo oʼnonaʼne.
\v 50 Diosen huaʼa oʼnonaʼikaʼnig keʼna
moʼnoeanhuahuikaʼapone. Doʼtaj eknopo̱e̱ʼnayo
moʼnoeonhuahuikaʼapone. Apag Diosen huaʼa oʼnonaʼikaʼne.
—‍Jesúsa judío aratbuttaj ʼuttaʼda oʼmanaʼuy.
\c 13
\s Huanigpe̱i̱kaʼeritaj huaʼi Jesúsa oʼbaʼikoyoaʼuy.
\p
\v 1 Aʼti judío huakkurueri isiʼpo mabueyhueʼ e̱e̱ʼ okkahuehueʼ
fiesta o̱gkaʼapo. Fiesta aypo onʼbapeʼapo. Bapehued e̱ʼneʼte,
“Indaritaj yokhuaʼapoy. Doʼhued Apagtaj onteʼti
ijkumejapoy.” Jesúsa oʼnopo̱e̱ʼuy. Oroʼtaj keʼnen
huanigpe̱i̱kaʼeritaj diʼ moʼi̱kaʼpo oynayo huakkaʼnada diʼ
moʼe̱po moʼnigbueydeapone.
\p
\v 2-4 Oroʼomey Jesúsen huanigpe̱i̱kaʼeri Jesúsere judío
huakkurueri isiʼpo mabueyhueʼ e̱e̱ʼ okkahuehueʼ fiesta aypo
huaboaʼda oʼbapeʼdeapoy. Totoʼa Judas Iscariotetaj engaña
o̱gkaʼdepo, oʼnopoʼto̱e̱po Jesústaj judío huairitaj aʼbayoki
oʼnopo̱e̱a̱ʼuy totoʼa. Judas Iscariote Simónensiʼpo o̱ʼu̱y.
Jesúsere Judas Iscariote oʼbapeʼpo. Kenokaʼ Diosyaʼ ijtiakuy.
Diosyo ijhuaʼapoy. Diosen ayaʼda ijtamato̱e̱apoy. Ayaʼada
doʼtaj nigpe̱e̱dik o̱ʼneapo. Jesúsa oʼnopo̱e̱ʼuy. Ken
Jesús oroʼere oʼbapeʼpo oʼbopo, huaok oʼkirokaʼpo oʼhueda̱ʼpo
hua̱so̱ʼtidukuta oʼteyi̱gaʼuy.
\v 5 Huaʼikoyoaʼ hue̱ʼe̱y kosoyo onoydepo huaboaʼda oroʼen
huaʼi boʼikoyoaʼpo boʼikoyoaʼdepo hua̱so̱ʼtidukuta eʼteyi̱ga̱ʼa̱
boʼitidukutaʼuyne.
\p
\v 6 Simón Pedrotakon eʼhuatiakte aʼikoyoyaʼpo
\p —‍Huairi i̱ʼe̱ne. Doʼhued huaʼi menpaʼ iʼikoyoaʼapo, doʼhued
Huairi. —‍Simón Pedroa onaʼuy.
\p
\v 7 —‍Kenda ijkay oyda noponkahueʼ i̱ʼe̱nigʼa nogoknayo
iʼnopo̱e̱a̱po. —‍Jesúsa onaʼuy.
\p
\v 8 —‍Kejeʼ. Menokapiʼ doʼhuedʼi ʼikoyoahueʼdik o̱ʼe̱ne.
—‍Pedroa onaʼuy.
\p —‍O̱ʼnenʼi ʼikoyoahueʼ e̱e̱ʼnayo doere Apag Diosere ehueʼdik
i̱ʼunhuahuikaʼapone. —‍Jesúsa Pedrotaj onaʼuy.
\p
\v 9 —‍Kenda menaʼne. Hua̱so̱ʼ ayaʼda bekoyoʼ. Huaʼi, huabaʼ,
huakukon bekoyoʼ, Huairi. —‍Simón Pedroa onaʼuy.
\p
\v 10 —‍Huaboaʼda e̱ʼo̱o̱ʼdeʼte ayaʼda eʼkoyodeʼ onteʼti
koyohueʼdik moʼe̱po. Jakyo eʼtiakdeʼte huaʼiyoʼda sorokda
o̱ʼe̱nok huaʼiyoʼda koyoaʼdik moʼe̱ne. Opudomeytaj Diosa
moʼbakkahueaʼdepo ʼurunopoʼda moʼe̱nigʼa nogtiada dakhueʼda
o̱ʼe̱. —‍Jesúsa onaʼuy.
\p
\v 11 —‍Nogtiada dakhueʼda o̱ʼe̱. —‍Onaʼuy. Nogtiada dakhueaʼ
oʼkaʼapo. Judío huairitaj meʼbahuayaʼapone Jesúsa
oʼnopo̱e̱ʼuy.
\p
\v 12 Oroʼen huaʼi boʼikoyoaʼdepo oʼkuhuitdepo Jesús onteʼti
huaok oʼotpo oroʼomeyere kutopate oʼhuadʼuy. Oʼhuaddepo,
\p —‍Kenda opudtaj huaboaʼda oʼnogkaʼdepo opudtaj
eʼnopoenkaʼtaʼ ijpaki.
\v 13 “Huamanmadikaʼeri” doʼtaj oʼnonikaʼne, kenpaʼti
“Huairi” oʼnonikaʼne. Kenda buttida oʼnonikaʼne. Kenda
i̱jje̱y.
\v 14 Ken do opueden Huairi i̱jje̱po opuden Huamanmadikaʼeri
i̱jje̱po konig huanabaʼ opuden huaʼitaj onʼikoyoaʼdenok
opudomeya̱kon konigti huayahuaya baʼikoyoaʼdik yanikatiʼ.
Huayahuaya batihuapokikaʼdik yanikatiʼ.
\v 15 Opuden huaʼi konig huanabaʼniga̱ onʼikoyoaʼne doʼtaj
onʼtiahuaydene. Konig do ijkay konigti ya̱gʼkikaʼ. Konig
huanabaʼniga̱ huayahuaya yanʼbatiahuapokikaʼ.
\v 16 Opud huanabaʼ e̱ʼe̱a̱da “Huaboroʼ huairi i̱jje̱y.”
Nopo̱e̱hueʼ yaneʼ. “Doʼhued huairinayo sueʼda huairi o̱ʼe̱.”
Nopo̱e̱hueʼ yaneʼ. Huamataʼmonaʼerinayo huairi o̱ʼne.
Huahuaʼerinayo huairionig ehueʼ o̱ʼne. Yanʼnopo̱e̱ʼ. Buttida
ijjay.
\v 17 Kenda huaboaʼda oʼnonaʼnig opud eʼnopo̱e̱ʼnayo
kenpaʼti dakaʼ menigpe̱i̱kaʼnayo durugnanada moʼe̱a̱pone.
\p
\v 18 Opudomey doʼtaj moʼpe̱e̱po durugda moʼe̱a̱ponigʼa
nogtiada durugda ehueʼdik o̱ʼe̱a̱po. Opudomeytaj
oʼnoktieʼeaʼuynigʼa nogtiada dakhueaʼ megkaʼapone. Kentaj
Apagbaʼa oʼhuaaʼ. “Keʼna doere oʼbapeʼikaʼ doʼtaj dakhueaʼ
megkaʼapone.” Kenpaʼ Apagbaʼa oaʼ.
\v 19 Dakhueaʼ megkaʼapone. Dakhueaʼ o̱gkahued e̱e̱ʼted
oʼnonaʼne. E̱gkadeʼte doʼtaj oʼnoknopoeonhuahuaʼpo
batikhueʼ moʼe̱po Diosa oʼtaʼmonaʼuy, kenda
kanoknopoeonhuahuikeʼpo konige̱po oyda oʼnonaʼne.
Konig huakkuruteda oʼnonaʼne.
\v 20 Huadak huaʼa kanʼmanbatiaʼpakeʼpo opudomeytaj
onʼtaʼmonaʼne. Nogomeytakon ijmataʼmonaʼapoy.
Opudomeya̱ eʼmanmadikaʼte eknopo̱e̱ʼnayo doʼtaj eeʼpaʼti
unhuaʼdik o̱ʼneapo. Kenpaʼti Diostaj eeʼpaʼti unhuaʼdik
o̱ʼneapo. Diosa meʼtaʼmonaʼuynigtaj. Buttida ijjay.
—‍Jesúsa monaʼuyne.
\s Judasa doʼtaj meʼbahuayapone. Jesúsa oʼmanaʼuy.
\r (Mt. 26.20-25; Mr. 14.17-21; Lc. 22.21-23)
\p
\v 21 Jesúsa kenda monaʼdepo huakkaʼda oʼnopomeʼpukatupo,
\p —‍Opuda̱ nogtiada meʼbahuayapone. Judío huairitaj
menʼyokapone. Buttida oʼnonaʼne. —‍Jesúsa oroʼ doce
huanigpe̱i̱kaʼeriomeytaj dakaʼ monaʼuyne.
\p
\v 22 Betaj Jesúsa yaʼhuaet oroʼ nopo̱e̱hueʼ o̱ʼe̱po huayahuaya
oʼbatiahuayeʼuy.
\v 23 Jesús diʼnanada meʼe̱ne doʼtaj Jesúsere onokteteyoʼ
ijbapeʼnok,
\v 24 doʼtaj Simón Pedroa baʼbaʼ menepo, “¿Beʼtaj yaʼhuaet?
Kenda menaʼ.” Simóna menaʼuyne.
\v 25 Ken Jesústaj ijtipebetpo,
\p —‍¿Beʼa ontaj dakhueaʼ mogkaʼapone, Huairi? —‍Jesústaj
yonaʼuy.
\p
\v 26 —‍Pan hue̱ʼe̱yyo̱ ijtaʼbutapo ijyokapoy. Keʼna dakhueaʼ
megkaʼapone. —‍Jesúsa menaʼuyne.
\p Ken pan oʼtaʼbutaʼdepo Judas Iscariotetaj oʼyokuy. Judas
Iscariote Simónensiʼpo o̱ʼu̱y.
\v 27 Ken Judas pan onbaʼpokdepo oʼbapeʼpo eʼbapeʼdeʼ totoʼa
Judastaj oʼnopoʼto̱e̱ʼpo Jesústaj dakhueaʼda ka̱gkeʼpo
namaʼda oʼnopo̱e̱a̱ʼuy. Ken Judasa namaʼda oʼnopo̱e̱nig kenda Jesús oʼnopo̱e̱po,
\p —‍Kenda doʼtaj megkaʼaponig i̱da megkatiʼ. —‍Jesúsa
Judastaj onaʼuy.
\p
\v 28 Oroʼomey kutopate Jesúsere Judasere oʼbapeʼpo kenda
Jesúsa Judastaj enaʼte nopo̱gkahueʼ o̱ʼu̱y.
\v 29 Judas oroʼen huakupe huato̱e̱ʼeri o̱ʼe̱nok, “Fiesta aypo
nogi̱ti yabaeʼ.” Jesúsa onaʼ. Sueʼada onʼnopo̱e̱ʼuy.
“Paiʼda aratbuttaj huakupe yayoktiʼ.” Onaʼ. Nogte
onʼnopo̱e̱ʼuy.
\v 30 Judas pan oʼbapokdepo oʼbapeʼpo oʼo̱ro̱konpo
oʼbakhuaʼbedʼuy.
\s “Huayahuaya diʼ yanʼmaeʼ.” Jesúsa huaboaʼda oʼmanaʼuy.
\p
\v 31 Judas ehuadeʼte,
\p —‍Huabokerek i̱jje̱nok Diosa meʼtaʼmonaʼuyne, Diostaj
dakaʼ ijnigpe̱e̱po oyda huakkaʼda aratbuten dakhueaʼ eʼkaʼtaj
ijmanigbueyapoy. Konige̱po huadaknanada ijkaʼdenok
huakkaʼada onʼnopo̱e̱po, “Dakiti, Dios,” kenpaʼti
“Huadaknanada o̱ʼe̱ Dios,” huakkaʼada onʼbatiaʼpakapo.
\v 32 Do Diosen Huasiʼpo Diostaj ijnigpe̱e̱po huakkaʼtada
ijmanigbueypo Dios huadaknanada o̱ʼe̱, huakkaʼtada
ijmanopo̱e̱a̱y Diosakon huakkaʼtada oʼmanopo̱e̱a̱ʼ. Keʼnen
Huasiʼpo huadaknanada oʼkikaʼ, huadaknanada o̱ʼi̱kaʼ,
oʼmanopo̱e̱a̱ʼ. I̱da oʼmanopo̱e̱a̱ʼapo.
\v 33 Huadiʼnanada onʼta̱e̱ne, doʼhuedsiʼpo. Opudere sueʼda
hora i̱jje̱a̱poy. Onteʼti doʼtaj huahuayhueʼ o̱ʼneapone.
Eʼukada huahuayhueʼ o̱ʼneapone. Ijhuaʼapoy. “Ke̱yo̱da
ijhuaʼapoy tiakhueʼdik moʼe̱ne.” Aʼnen kenda judío
huairitaj ijmanaʼmey konigti opudomeytakon oʼnonaʼne.
\v 34 Konig huabodikda eʼmanmadikaʼ eʼmanaʼtaʼ ijpaki.
Huayahuaya diʼ yanʼmaikaʼ. Konig doʼa diʼ o̱ʼnikaʼne
konigti huayahuaya diʼ yanʼmaikaʼ.
\v 35 Huayahuaya diʼ eʼmaikaʼnayo Jesúsen huaknopo̱i̱kaʼeri
o̱ʼne ayaʼada aratbuta onʼnopo̱e̱a̱po. —‍Jesúsa oroʼomey
huanigpe̱i̱kaʼeritaj monaʼuyne.
\s Jesústaj o̱ki̱a̱ʼhue̱ʼyaj i̱jje̱y. Iaʼapo. Pedrotaj Jesúsa onaʼuy.
\r (Mt. 26.31-35; Mr. 14.27-31; Lc. 22.31-34)
\p
\v 36 —‍¿Meyon iʼhuaʼapo, Huairi? —‍Jesústaj Simón Pedroa
onaʼuy.
\p —‍Ke̱yo̱ ijhuaʼapoy oyda taʼhuahueʼdik o̱ʼe̱ne. Nogoknayo
doʼtaj oʼtahuaʼapone. —‍Jesúsa onaʼuy.
\p
\v 37 —‍¿Menaʼpo oy taʼhuahueʼdik o̱ʼe̱, Huairi? Ontaj
aʼtahuayaʼpo bueydik i̱jje̱y. —‍Pedroa onaʼuy.
\p
\v 38 —‍Onere eʼbueytaʼ ijpaki iaʼnigʼa. Huatahuaj sipoghued
“Jesústaj o̱ki̱a̱ʼhue̱ʼyaj i̱jje̱y.” Bapaʼa iaʼapone. Bapaʼ
eadeʼte huaboaʼda huatahuaj oʼsipogapo. Buttida ijjay. —‍Jesúsa
Pedrotaj onaʼuy.
\c 14
\s Jesúsa Diosyo huabatohuaʼ dag o̱ʼe̱.
\p
\v 1,2 —‍Doʼhued Apagenbayo ijhuaʼapoy. Oʼnokhuaʼapone. Onteʼti
opudomeyere ehueʼ i̱ji̱kaʼapoy. Do eʼhuadeʼte mepuʼkehueʼ
yanikatiʼ. Mididhueʼ yanikatiʼ. Mepuʼkehueʼ ya̱ʼnepo
Diostaj dakaʼ yanoknopo̱i̱kaʼ. Diosa boʼtihuapokapone.
Doʼtakon dakaʼ yanoknopo̱i̱katiʼ. Onʼtihuapokapone. Dakaʼ
huaknopo̱i̱kaʼ onʼtihuapokikaʼapone. Diosenbayo Diosen jakyo
huaboroʼda o̱ʼe̱po ayaʼada huaknopo̱e̱ʼeriomey
noeonhuahuikaʼdik o̱ʼneapo. Diosen huakkaʼ jakyo
ijhuaʼapoy. Dios e̱ʼi̱kaʼyo kenteda Diosen huakkaʼ jakyo
opudomeytaj huakkaʼ jak onʼnigkaʼapone, buttida ijjay.
\v 3 Opudomeytaj ayaʼda onʼnigkaʼdepo ayaʼda ijkuhuitdepo
opudomeytakon aʼbaeyaʼpo ijkumejapoy. Doere
onʼbatohuaʼapone. Doere kaʼnunhuahuikeʼpo onʼbatohuaʼapone.
\v 4 Kente ijhuaʼapoy moʼnopo̱e̱. Ken dagte ijhuaʼapoy
moʼnopo̱e̱. Kenteda i̱ji̱kaʼapoy moʼnopo̱e̱. —‍Oroʼ
Jesúsen huanigpe̱i̱kaʼeritaj monaʼuyne Jesúsa.
\p
\v 5 —‍Kenteda iʼhuaʼaponig nopo̱e̱hueʼ o̱ʼe̱y. Ken dag
o̱ki̱e̱hueʼ o̱ʼe̱y, Huairi. —‍Tomása Jesústaj onaʼuy.
\p
\v 6 —‍Konig buttida huaaʼeri do i̱jje̱po Diosyo huabatohuaʼ
dag i̱jje̱y. Doa konig huamanoeanhuahuikaʼeri i̱jje̱po
aratbuttaj ijmanoeanhuahuikaʼnok Diosere
onʼnoeonhuahuikaʼapo. Konig Apag Diosyo huaodhuaʼ dago̱nig
i̱jje̱y. Doʼtayoʼda oʼnoknopo̱e̱nok Apag Diosyo huaʼdik
moʼe̱a̱pone.
\v 7 Doʼtaj dakaʼ e̱ʼki̱e̱ʼnayo doʼhued Apagtakon
moki̱e̱ʼapone. Oyda kenpaʼti nogok
moki̱e̱ʼonhuahuikaʼapone. Apag Diostaj
moki̱e̱ʼonhuahuikaʼapone. Oyda kenpaʼti nogok Apagtaj
boʼtiahuayapone. —‍Jesúsa monaʼuyne.
\p
\v 8 —‍Apag Diostaj eʼtiahuaytaʼ oʼpaki. Apag Diostaj
boʼtiahuayʼeaʼ. Eʼtiahuaynayo durugnanada o̱ʼe̱a̱poy, Huairi.
—‍Felipea onaʼuy.
\p
\v 9 —‍Ijhueʼnanada opudomeyere i̱jjunhuahuikaʼnigʼa menpaʼ
doʼtaj o̱ki̱e̱hued o̱ʼe̱, Felipe. Beʼapiʼ doʼtaj mentiahuaypo,
doʼtaj meʼnoki̱e̱ʼpo Apagtakon oʼnoki̱e̱ʼde. “Apagtaj
boʼtiahuayʼeaʼ.” ¿Menaʼpo onaʼ?
\v 10 Doere Apag Diosere nogtida o̱ʼe̱y. Apag Diosyo i̱ji̱kay.
Kenpaʼti Apag Dios doyo o̱ʼi̱kaʼ, dapitaʼ yaknopo̱e̱ʼ. Diosen
huaʼayoʼda ijmanikay. Doʼhuada ijnopo̱e̱po ahueʼ i̱ji̱kay.
Apag Dios doyo o̱ʼi̱kaʼpo konig Diosa oʼpaknok Apag Diosen
ijkikay.
\v 11 Do Apag Diosere nogtida o̱ʼe̱y. Apag Diosyo i̱ji̱kay
kenpaʼti Apag Dios doyo o̱ʼi̱kaʼ, kenda dakaʼ yanoknopo̱e̱ʼ.
Kenda oknopo̱e̱hueʼdik e̱e̱ʼnayo Diosen ijkikaʼnige̱yo̱
doʼtaj yanoknopo̱e̱ʼ.
\v 12 Diosen ijkikay. Konig Diosayoʼda kaʼdik o̱ʼe̱ konigti
ijkikay. Konig aratbut tiahuayhued o̱ʼi̱kaʼuynig kenda
ijkikay. Teyda ijkikay. Ayaʼada doʼtaj oʼnoknopo̱e̱po konig
ijkikay konigti o̱gkaʼapo. Doʼhued Apag Dioste ijhuaʼaponok
huaknopo̱e̱ʼeria nogdakon ʼuruaʼnanada o̱gkaʼapo. Buttida
ijjay.
\v 13,14 Kenpaʼti katepiʼ ijpakikaʼnig opudomey konigti
yanʼpakpo doʼtaj yanʼtionaʼpakikaʼ, doʼhueddikte
yanʼtionaʼpakikaʼ. Ken konig eʼtionaʼpakte “Apag Dios
huadakda o̱ʼe̱po ʼuruaʼnanada oʼkikaʼ,” aratbuta
kanʼbatiaʼpakeʼpo kenda mentionaʼpakikaʼnig
onʼnigkaʼapone. —‍Jesúsa monaʼuy.
\s Diosen Noki̱re̱ga̱ opudtaj kamanopoʼto̱e̱ʼpo ijmanigtaʼmonaʼapoy. Jesúsa oʼmanaʼuy.
\p
\v 15 —‍Doʼtaj diʼ e̱e̱ʼnayo doʼhued huaʼatakon nigpe̱i̱kaʼdik
moʼe̱a̱pone.
\v 16 Diosen Noki̱re̱ga̱ kabatihuapokikeʼpo. Doʼhued huaʼa
huanigpe̱e̱ʼ kabatihuapokikeʼpo Diosen Noki̱re̱g opudomeyere
kaʼnikeʼpo kenpaʼti kamanopoʼto̱i̱keʼpo “O̱ʼnen
Huatihuapokeri yabayoktiʼ, Apag,” ijnigtionaʼpakapoy.
\v 17 Diosen Noki̱re̱ga̱ buttida huaʼa moʼnopo̱e̱a̱ʼapone.
Diostaj monoki̱a̱ʼapone. Diostaj oknopo̱e̱hueʼ
hua̱e̱ʼeriomey Diosen Noki̱re̱ga̱ nopoʼto̱e̱hueʼdik
moʼe̱a̱pone konige̱po Diosen Noki̱re̱gtaj o̱ki̱e̱hueʼ
o̱ʼnenok. Diosen Noki̱re̱g opudere o̱ʼi̱kaʼaponok kenpaʼti
oʼnopoʼto̱e̱a̱ponok opudomeynayo Diosen Huatihuapokeritaj
moki̱e̱ʼapone.
\v 18 Opudomeytaj kenpaʼda maenhueʼ i̱jje̱a̱poy. Konig
doʼhued ayhuayo ehueʼ moʼe̱a̱pone. Opudte noki̱re̱gada
ijtiakapoy.
\v 19 Aʼtimon doʼtaj pakhueʼ i̱jje̱y huaaʼeria tiahuayhueʼdik
meʼneapone, doere ehueʼdik o̱ʼneapo. Opudomeynayo doʼtaj
moknopo̱i̱kaʼpo doere moʼi̱kaʼapone. Konige̱po
ijnoeonhuahuikaʼaponok doere moʼnoeonhuahuikaʼapone.
\v 20 Aʼti Diosen Noki̱re̱ga̱ eʼnopoʼto̱e̱deʼte doʼhued
Apagere o̱ʼi̱kaʼ moʼnopo̱e̱a̱pone. Doʼhued Apag doʼere
konig nogtida o̱ʼe̱ moʼnopo̱e̱a̱pone. Kenpaʼti doʼtaj
moknopo̱e̱po konig doʼhuedso̱ʼ doere moʼi̱kaʼne kenpaʼti
opudere i̱jje̱nok meʼnopoʼto̱i̱kaʼne moʼnopo̱e̱a̱po.
\v 21 Ayaʼada doʼhued huaʼataj onʼpe̱i̱kaʼpo doʼtaj hueretda diʼ
moʼe̱ne. Ayaʼada doʼta diʼ moʼe̱nok doʼhued Apaga̱kon diʼ
moʼmaeapone. Doʼhuakon diʼ o̱ʼneapone. Do konig o̱ʼe̱
onʼnopo̱a̱ʼapone. —‍Jesúsa monaʼuyne.
\p
\v 22 —‍¿Menaʼpo on konig o̱ʼe̱ oroʼomeyyoʼda
onʼnopo̱e̱a̱po? ¿Menaʼpo nogomey on konig o̱ʼe̱
nopo̱e̱hueʼ o̱ʼneapo? —‍Nog Judasa Jesústaj onaʼuy. (Judas
Iscariotea ahueʼ nog Judasa onaʼuy.)
\p
\v 23 —‍Ayaʼada doʼtaj diʼ o̱ʼnikaʼniga̱ doʼhued huaʼataj
onʼnigpe̱i̱kaʼapo. Kenomeytaj doʼhued Apaga diʼ
oʼmaikaʼapo. Doʼhued Apag doere kenomeyennopoʼyo
o̱ʼi̱kaʼapoy.
\v 24 Ayaʼada doʼtaj diʼ ehueʼ moʼe̱po doʼhued huaʼataj
pe̱e̱hueʼ o̱ʼnikaʼ. Ken huaʼa moʼpe̱e̱denig doʼhuedda ehueʼ
o̱ʼe̱nok Apaga meʼtaʼmonaʼuyne keʼnen huaʼa
oʼnonaʼikaʼne. Konige̱po ayaʼda oʼnonaʼdeʼuy, ayaʼda
oʼnonmadikaʼdeʼuy dakaʼ yanʼnigpe̱i̱kaʼ.
\p
\v 25 Opudomeyere e̱ʼi̱kadeʼte huakkaʼda
oʼnonmadikanhuahuikaʼdenigʼa suhueʼda huadak moʼnopo̱e̱.
\v 26 Do Apagyo ijhuaʼdepo do ijpaknok Diosa keʼnen Noki̱re̱g
moʼnigtaʼmonaʼapone. Opudtehuapaʼ moʼnigtaʼmonaʼapone.
Diosen Noki̱re̱ga̱ doʼhued huaʼataj dakaʼ
moʼnopoeanhuaʼapone. Moʼmaboroayonhuaʼapone. Doʼhued
huaʼa okkahuehueʼ kaʼnikeʼpo boʼtihuapokikaʼapone. Doʼhued
eʼmanmadikaʼ onaʼti moʼnopo̱e̱a̱ʼapone.
\p
\v 27 Opudomeytaj onʼnopoʼnoeynoeyonpo oʼnokhuaʼapone.
Doʼhuayoʼda onʼmanopoʼnoeyikaʼne. Aratbutnayo konigti
manopoʼnoeyahueʼdik moʼi̱kaʼne. Do eʼhuadeʼte mepuʼkehueʼ
ya̱ʼnepo mididhueʼ ya̱ʼnikaʼ.
\v 28 “Doʼhued Apagte kurudyo̱ ijhuaʼapoy. Nogok onteʼti
ijtiakapoy. Opudere a̱ʼi̱kayaʼpo ijkumejapoy.” Kenda doʼtaj
opuda̱ eʼpe̱e̱te oʼnonaʼdene. Diosnayo nogi̱ti teynanada
Huairi o̱ʼe̱. Donayo suhueʼda tey huairi i̱jje̱y. Konige̱po
nogi̱ti diʼ meneʼ. Nogi̱ti diʼ e̱ʼe̱deʼte Apagyo oʼhuaʼapo
moʼnopo̱e̱po durugnanada moʼe̱a̱pone.
\v 29 Kenda ijkaʼapoy kahued i̱jje̱nig oʼnonaʼne. Nogok
kenda do eʼkadeʼte opudomey oʼtiahuaydepo doʼtaj dakaʼ
moknopo̱e̱a̱po, konige̱po kenda kahued i̱jje̱nig
oʼnonaʼne.
\p
\v 30 Totoʼ huairia boʼhuatiakdeaponok oy nogi̱ti huakkaʼ
batiaʼpakhueʼ i̱jje̱a̱poy. Totoʼanayo doʼtaj dakhueaʼ o̱gkahueʼdik
e̱e̱ʼtada
\v 31 doda ijpakpo ayaʼtada aʼmanigbueyyaʼpo Apagtaj
ijnigpe̱e̱nok medarakapone. Kenda eʼnogkadeʼte Apag Diostaj
diʼ o̱ʼi̱kaʼ ayaʼada nopo̱e̱ʼdik o̱ʼneapo. Yanboʼ, monhuaʼ.
—‍Jesúsa monaʼuyne.
\c 15
\s Konig uva huakpi i̱jje̱y kenpaʼti huanigpe̱i̱kaʼeri konig uva huaʼopi o̱ʼne. Jesúsa kenda oʼmanbatiaʼpakpo oʼmanmadikaʼuyate.
\p
\v 1 Onteʼti oroʼ keʼnen huanigpe̱i̱kaʼeriomeytaj Jesúsa
monbatiaʼpakpo monmadikaʼuy. Jesúsen huaknopo̱e̱ʼeriomey
Diosen ʼuruaʼda ka̱gkikeʼpo konig kaʼdik yanikaʼ oroʼtaj
monaʼpo,
\p —‍Diosen aratbuta Diosen ʼuruaʼda ka̱gkikeʼpo doayoʼda
tihuapokdik o̱ʼnene. Ken Diosen hueretda uva huakpi konig
i̱jje̱po kenpaʼti doʼhued aratbut konig uva huaʼopi o̱ʼnepo
doʼhued huaʼataj onʼnigpe̱i̱kaʼpo doʼtaj oʼnoknopo̱i̱kaʼapo.
Doʼhued Apaga̱ta konig uva huakpi huato̱e̱ʼeri o̱ʼi̱kaʼ. Doʼhued
huaknopo̱e̱ʼeritaj dakaʼ oʼmato̱i̱kaʼ.
\v 2 Uva huakpi huato̱e̱ʼeria huakutataj dakaʼ oʼtiahuayikaʼ.
Huakutaa uva huada onhuadhueʼ e̱ʼi̱kaʼnayo ken huakutataj
oʼkutege̱po oʼen. Ken huakutataj huada onhuadikaʼnok dakaʼ
oʼto̱e̱po huakkaʼda onhuadapo. Ken konigti doʼhued Apaga
doʼhued huaknopo̱e̱ʼeritaj dakaʼ oʼbatiahuaypo doʼhued huaʼataj
onteʼti pakhueʼ e̱ʼneʼnayo Diosen onteʼti dakaʼ kahueʼ
e̱ʼnikaʼnayo oʼmaenapo. Nogomeynayo doʼhued huaʼa
onʼnigpe̱i̱kaʼpo, Diosen dakaʼ onʼkikaʼpo, Diosa
oʼmanopoʼkoyoikaʼnok dakaʼ oʼmanopoʼto̱i̱kaʼnok nogi̱ti
ʼuruaʼda Diosen kikaʼdik o̱ʼneapo.
\v 3 Opudomeytaj oʼnonmadikikaʼnok doʼhued huaʼa
moʼnigpe̱i̱kaʼdepo ʼurunopoʼda moʼe̱depo Diosen dakaʼ
kikaʼdik moʼe̱a̱pone.
\v 4 Uva huatiʼoj ontiokteghueʼ e̱e̱ʼnayo huada onhuaddik
o̱ʼi̱kaʼapo, enʼtiokteg e̱e̱ʼnayo huada onhuadhueʼdik o̱ʼe̱a̱po.
Konigti doʼhued huaʼataj dakaʼ nigpe̱i̱kahueʼ e̱e̱ʼnayo
kenpaʼti doʼtaj dakaʼ oknopo̱i̱kahueʼ e̱e̱ʼnayo Diosen ʼuruda
kikahueʼdik moʼe̱a̱pone. Konige̱po doʼhued huaʼataj dakaʼ
yanʼnigpe̱i̱kaʼ, doʼtaj dakaʼ yanoknopo̱i̱kaʼ, kenda
boʼkikaʼnok opudomeyere i̱ji̱kaʼapoy onʼnopoʼto̱i̱kaʼapone.
Kenokaʼ Diosen ʼuruaʼnanada kikaʼdik moʼe̱a̱pone.
\p
\v 5 Do konig uva huakpi i̱jje̱po opudomey konig uva
huantiʼoj moʼe̱ne. Opudomey Diosen ʼuruaʼnanada
ka̱gkikeʼpo onʼtihuapokikaʼne. Ayaʼada doʼhued huaʼataj
onʼnigpe̱i̱kaʼpo doʼtaj dakaʼ moknopo̱i̱kaʼne kenpaʼti
kenomeyere i̱ji̱kaʼpo ijmanopoʼto̱i̱kaʼnok Diosen dakaʼ
kikaʼdik o̱ʼneapo. Doʼhua tihuapokhueʼ e̱e̱ʼnayopiʼ doʼhua
nopoʼteypakahueʼ e̱e̱ʼnayo dapitaʼ Diosen ʼuruda kikahueʼdik
o̱ʼneapo.
\v 6 Kenomeya̱ doʼtaj oknopo̱i̱kahueʼ o̱ʼnepo, doʼhued
huaʼataj nigpe̱i̱kahueʼ o̱ʼnenok kenomeytaj ijmaenapoy.
Castiga ijmagkadhuahuikaʼaponok paiʼnanada
onʼnopoʼunhuahuikaʼapo. Kenomey konig uva huantiʼoj
huada onhuadhueʼ e̱e̱ʼte huato̱e̱ʼeria oʼkutege̱po, oʼmaenapo,
eʼbaaydeʼte taʼakyo oʼmaenpo oʼbakpakaʼapo.
\p
\v 7 Doʼtaj moknopo̱i̱kaʼpo, doʼhued huaʼataj
moʼnigpe̱i̱kaʼpo katepiʼ boʼpakpo moʼtionaʼpakikaʼnok Diosa
moʼnigkaʼapone.
\p
\v 8 Doʼtaj dakaʼ eknopo̱i̱kaʼte doʼhued huaʼataj
eʼnigpe̱i̱kaʼte ken konig Diosen ʼuruaʼnanada boʼkikaʼnok
doʼhued hueretda huanigpe̱i̱kaʼeri moʼe̱nok kenpaʼti aratbut
opudomeytaj boʼtiahuaypo “Dios ʼurunanada o̱ʼe̱po
huadaknanada oʼkikaʼ,” onʼbatiaʼpakapo.
\v 9,10 Apaga doʼtaj huakkaʼ diʼ meʼi̱kaʼne. Konigti doa diʼ
o̱ʼnikaʼne. Doʼtaj oʼnoknopo̱i̱kaʼnok onʼnigpe̱i̱kaʼnok
opudomeytaj dakaʼ diʼ o̱ʼnikaʼne. Do konigti Apagtaj
ijnigpe̱i̱kaʼnok doʼtaj diʼ meʼi̱kaʼne.
\p
\v 11 Kenda oʼnonaʼdenok doʼtaj monigpe̱i̱kaʼpo
durugnanada moʼi̱kaʼapone.
\v 12 Huayahuaya diʼ yanʼmaikaʼ, huayahuaya huakkaʼ diʼ
yanʼmaikaʼ. Konig doʼa huakkaʼ diʼ o̱ʼnikaʼne konigti
huayahuaya diʼ yanʼmaikaʼ kenpaʼ doʼhued eʼmanaʼ o̱ʼe̱.
\v 13 Doʼhued huadiʼtaj huakkaʼnanada diʼ ijmaepo
ijmanigbueyapoy. Konig do huakkaʼ diʼ o̱ʼnikaʼne konigti
huayahuaya diʼ yanʼmaikaʼ.
\v 14 Doʼhued huaʼataj eʼnigpe̱i̱kaʼnayo doʼhued huadiʼ
moʼi̱kaʼapone.
\v 15 Doʼhued huanabaʼ ehueʼ moʼe̱a̱pone. Doʼhued huadiʼ
moʼe̱a̱pone. Kenda keʼnen huairi oʼnopo̱i̱kaʼ huanabaʼnayo
nopo̱e̱hueʼ o̱ʼnikaʼ. Doʼhued huadiʼ moʼe̱nok ayaʼda doʼhued
Apaga menanhuahuikaʼne kenda opudomeytakon
oʼnonanhuahuikaʼne.
\v 16 Konig opuden huamanmadikaʼeri huairi hua̱ta̱e̱ʼ doʼtaj
oktieʼeahueʼ o̱ʼneʼuyne. Diosen huaʼa ʼurunanada
ka̱gkikeʼpo, huadakda ka̱gkikeʼpo huayahuaya diʼ kanʼmaikeʼpo
kenpaʼti huakkaʼtada Diosen huadak huaʼa
kanʼmanmadikanhuahuikeʼpo huakkaʼtada kanʼmanopoʼkoreʼpo
opudomeytaj onʼbaktieʼeaʼuyne. Aratbut Diostaj
kanoknopounhuahuikeʼpo oʼnokbatieʼeaʼuynok. Ken konig
boʼkikaʼpo konig do ijpaki moʼtionaʼpakikaʼnok Apaga
moʼnigpe̱i̱kaʼapone boʼtihuapokikaʼapone.
\v 17 Konige̱po huayahuaya diʼ yanʼmaikaʼ onteʼti
oʼnonaʼne, ken. —‍Jesúsa oroʼ huanigpe̱i̱kaʼeriomeytaj
monaʼuyne.
\s Oknopo̱e̱hueʼ hua̱e̱ʼeri aratbuta Jesústaj onʼhuadiaypo Jesúsen huanigpe̱i̱kaʼeritakon yanʼbahuadiayapet.
\p
\v 18 —‍Doʼtaj moknopo̱e̱nok doʼhued huanigpe̱i̱kaʼeri
moʼe̱nok oknopo̱e̱hueʼ hua̱e̱ʼeriomeya̱ moʼhuadiayapone
meʼpukehueʼ yaneʼ. Doʼtaj huakkuruda menhuadiayʼuyne kenda
okkahuehueʼ yanikaʼ.
\v 19 Konig dakhueaʼ huakaʼeriomey onʼnopo̱e̱po o̱gkikaʼ
opudomey nopo̱e̱hueʼ moʼe̱po kikahueʼ moʼe̱nok dakhueʼda
eʼnopo̱e̱ʼnayopiʼ eʼkikaʼnayopiʼ dakhueaʼ huakaʼeria diʼ
maeʼdik moʼe̱ne. Opudomeytanayo Diosa boktieʼeaʼuyne.
Dakhueaʼ eʼkaʼtaj moʼnopoʼyareaʼdenok dakhueaʼ
huakikaʼeriomeya̱ boʼhuadiayne. Oyda Diosen ʼuruaʼnanada
boʼkikaʼnok boʼhuadiayne.
\v 20 Huanabaʼ huataʼ huairionig yahueʼeahueʼdik o̱ʼe̱.
Oʼnonaʼnig okkahuehueʼ yanikaʼ. Oknopo̱e̱hueʼ hua̱e̱ʼeria
doʼtaj onʼhuadiaypo dakhueaʼ meʼnogkaʼapone. Opudomeytakon
boʼhuadiaypo dakhueaʼ mogkaʼapone. Doʼtaj nigpe̱e̱hueʼ
meʼnikameʼnigʼa opudomeytakon nigpe̱e̱hueʼdik
moʼe̱a̱pone.
\v 21 Cristo i̱jje̱nok moknopo̱e̱po moʼmanbatiaʼpaknok
oknopo̱e̱hueʼ hua̱e̱ʼeriomeya̱ boʼhuadiaypo dakhueaʼ
mogkaʼapone. Doʼhued Apaga meʼtaʼmonaʼuynigtaj o̱ki̱a̱hueʼ
o̱ʼnepo boʼhuadiayapone.
\v 22 Do tiakhueʼ e̱e̱ʼuynayo doʼtaj oknopo̱e̱hueʼ hua̱e̱ʼeria
dakhueaʼ meʼnogkameʼne huaahueʼdik o̱ʼnene. Do ijtiakdeʼuypo
ijmanmadikaʼdeʼuypo dakhueaʼ meʼnogkameʼne huaaʼdik
o̱ʼnene.
\v 23 Do Apag Diosere nogtida o̱ʼe̱nok beʼapiʼ doʼtaj
onʼhuadiaypo konigti Apagtakon onʼhuadiay.
\v 24 Konig Diosayoʼda kaʼdik o̱ʼe̱ doʼhua kahueʼ e̱e̱ʼuynayo
oknopo̱e̱hueʼ hua̱e̱ʼeria dakhueaʼ meʼnogkameʼne huaahueʼdik
o̱ʼnene. Konig Diosayoʼda kaʼdik o̱ʼe̱ doʼhua ijkaʼdeʼuynok
oknopo̱e̱hueʼ hua̱e̱ʼeria kenda eʼkaʼte mentiahuaydepo
menhuadiaypo Apagtakon onʼhuadiay.
\v 25 Kenda o̱gkaʼapo adhueaʼpaneʼa̱ huamanbatiaʼpakeria
oʼmadoyaʼuyate konigti o̱gkaʼ. “Dakhueaʼ kahueʼda e̱e̱ʼtada
menhuadiayapone.” Apagbaʼa oaʼuyate.
\p
\v 26 Oknopo̱e̱hueʼ hua̱e̱ʼeriomeya̱ opudomeytaj eʼhuadiayte
mepuʼkehueʼ ya̱ʼnepo Apag Dios oʼpaknok Diosen Noki̱re̱g
onʼnigtaʼmonaʼapone. Diosen Noki̱re̱g buttida doʼtaj
moknopo̱e̱a̱ʼapone. Opudomeya̱ huadak huaʼa
kanʼbatiaʼpakikeʼpo Diosen Noki̱re̱ga̱ boʼtihuapokikaʼapone.
\v 27 Huakkurunada doere moʼi̱kaʼuyne.
Ayaʼda ijkikamey
boʼtiahuayikameʼne. Ayaʼda ijmanmadikaʼuynig
moʼpe̱i̱kaʼuypo doʼhued huaʼa moʼbatiaʼpakikaʼapone.
\c 16
\p
\v 1-4 Doʼhued huanigpe̱i̱kaʼeri moʼe̱nok judío huairiomeya̱
dakhueʼnanada mogkaʼapone. Opudtaj diga̱ʼ boʼhuadiaypo
judíoen hua̱i̱takeʼ jakyaʼ mokenapone. Kenpaʼda
moʼenapone. Nogokkon boʼarakapone. Diostaj oknopo̱e̱hueʼ
o̱ʼnikaʼpo, doʼtakon oknopo̱e̱hueʼ o̱ʼnikaʼpo, onʼarakpo
Diostaj dakaʼ oʼnigpe̱e̱y namaʼda onʼnopo̱e̱a̱po. Kenpaʼ
huaboaʼda oʼnonaʼpo e̱gkadeʼte meʼpukehueʼ kaʼneʼpo kenpaʼti
dakaʼ moknopo̱e̱po oknopo̱e̱batikhueʼ kaʼneʼpo kenpaʼ
oʼnonaʼne. Kenokaʼ opudtaj eʼhuadiayte diga̱ʼ e̱gkaʼte
kenda oʼnonaʼnig moʼnoponapet.
\s Huaknopo̱e̱ʼeritaj Diosen Noki̱re̱g ijtaʼmonaʼapoy. Jesúsa oʼmanaʼuyate.
\p Aʼnenda opudere i̱ji̱kameʼpo kenda onahueʼ
o̱ʼnikaʼuyne.
\v 5,6 Oynayo doʼtaj meʼtaʼmonaʼuynigte ijhuahuaʼdeapoy.
Doʼhued Apag Diostaj ijhuahuaʼdeapoy. Kenda moʼpe̱e̱depo suhueʼ
e̱ʼe̱a̱da ¿Meyon iʼhuaʼapo? onahueʼ o̱ʼnene.
\v 7 Opudomeytaj huadaknanada aʼkikayaʼpo e̱ʼe̱a̱da kenpaʼti
aʼtihuapokikayaʼpo e̱ʼe̱a̱da doʼhued huaojtaj ijhuaʼapoy. Do
huahueʼ e̱e̱ʼnayo kabatihuapokeʼpo Diosen Noki̱re̱gtaj
mataʼmonahueʼ o̱ʼneaynigʼa. Apagtaj ijhuaʼapopo Diosen
Noki̱re̱g opudomeytaj onʼnigtaʼmonaʼapone.
\v 8-11 Diosen Noki̱re̱g onʼnigtaʼmonapone. Opudomeytaj
oʼtiakpo oʼmanopoʼto̱e̱a̱po. ʼUruaʼnanada boʼkikaʼnok
dakhueaʼ huakaʼeriomey boʼtiahuaydepo dakhueaʼ huakkaʼeri o̱ʼe̱y
onʼnopo̱a̱po. Kenpaʼti huadak huaʼa moʼmanikaʼnigʼa
onʼpe̱e̱denigʼa doʼtaj oknopo̱e̱hueʼ o̱ʼnepo dakhueaʼ
huakkaʼeri o̱ʼe̱y onʼnopo̱e̱a̱po. Diosen Noki̱re̱ga̱
oʼmanopo̱e̱a̱ʼapo. Kenpaʼti do Apagyo eʼhuadeʼte Diosen
ʼuruaʼnanada oʼkikaʼuy dakhueaʼ huakaʼeriomeya̱
onʼnopo̱e̱a̱po. Diosen Noki̱re̱ga̱ oʼmanopo̱e̱a̱ʼapo.
Diosyo do eʼhuadeʼte onteʼti tiahuayhueʼ o̱ʼneapone. Totoʼ
huairi dakhueaʼ huakaʼeretaj namaʼda onʼnigpe̱e̱po doʼtaj
medarakapone. Dakhueaʼ oʼnogkaʼdeʼuynok Diosa castiga
oʼmagkaʼapo. Diosen Noki̱re̱ga̱ kenda oʼmanopo̱e̱a̱ʼapo.
Konige̱po totoʼ dakhueaʼ oʼkaʼ Diosa oaʼdepo castiga
o̱gkaʼapo, kenda onʼnopo̱e̱a̱po. Ken konig Diosen
Noki̱re̱ga̱ oʼkaʼapo. Buttida ijjay.
\p
\v 12 Nogi̱ti huakkaʼ huadak huaʼa opudomeytaj
eʼmanmadikaʼtaʼ ijpaknigʼa oynayo nogi̱ti manmadikahueʼdik
o̱ʼnene konige̱po oy nogi̱ti menpaʼ nopo̱e̱gkahueʼdikda
moʼe̱ne.
\v 13 Diosen Noki̱re̱ga̱ opudomeytaj boʼhuatiakapone.
Diosen Noki̱re̱g buttida huaaʼeri o̱ʼi̱kaʼ. Eʼhuatiakdeʼte
doʼtaj huanopo̱e̱ʼ doʼhued huaʼa buttida monmadikikaʼapone.
O̱ʼnenda oʼnopo̱e̱po onahueʼ moʼe̱a̱pone. Kenda Diosa oaʼ
monaʼapone. Kenda o̱ʼe̱a̱ponig oʼmanopo̱e̱a̱ʼapo.
\v 14 Doʼhued huadak huaʼa opudomeytaj moʼnopo̱e̱a̱ʼaponok
do huadakda i̱ji̱kaʼnig huadakda ijkikaʼnig Diosen
Noki̱re̱ga̱ oʼmanopo̱e̱a̱ʼapo.
\v 15 Ayaʼda Apaga oʼnopo̱e̱ doʼhuakon ijnopo̱e̱y. Ayaʼda
Apaga oʼto̱i̱kaʼnig doʼhuakon ijto̱i̱kay. Ayaʼda Apaga
oʼkikaʼnig doʼhuakon ijkikay. Konige̱po Diosen Noki̱re̱ga̱
doʼhued eʼnopo̱e̱ʼ moʼnopo̱e̱a̱ʼapone. Dios konig o̱ʼe̱
moʼnopo̱e̱a̱ʼapone. —‍Jesúsa oroʼtaj monaʼpo.
\s Jesúsen huanigpe̱i̱kaʼeri suhueʼ e̱ʼi̱kaʼ aʼti moʼmadurugpakapo. Jesúsa oʼbatiaʼpakuy.
\p
\v 16 —‍Apag Diosyo ijhuaʼaponok aʼtimon doʼtaj onteʼti
tiahuayhueʼ o̱ʼneapone. Nogokda onteʼti onʼtiahuayapone.
—‍Jesúsa monaʼuyne.
\p
\v 17 —‍¿Katiaʼ yaaʼ. Beʼa moʼnopoenkaʼ? “Aʼtimon doʼtaj
onteʼti tiahuayhueʼ o̱ʼneapone. Nogokda aʼtimon onteʼti
onʼtiahuayapone, Apag Diosyo ijhuaʼaponok.” Oroʼtaj kenpaʼ
monaʼne.
\v 18 “Aʼtimon doʼtaj tiahuayhueʼ o̱ʼneapone,” monaʼne
kenda nopo̱gkahueʼ o̱ʼe̱y. —‍Jesúsen huanigpe̱i̱kaʼeria
suhueʼada huayahuaya onʼbatiaʼpakuy.
\p
\v 19 Kenda oroʼ huayahuaya oʼbatiaʼpakʼuynig Jesúsa
moknopo̱e̱po monaʼpo,
\p —‍Aʼtimon doʼtaj onteʼti tiahuayhueʼ o̱ʼneapone. Nogokda
aʼtimon onteʼti onʼtiahuayapone. Oʼnonaʼdene. ¿Katiaʼ
yaaʼ? ¿Beʼa moʼnopoenkaʼ? Kenda eʼnopo̱e̱ʼtaʼ boʼpakpo
huayahuaya moʼbatiaʼpaknigʼa.
\v 20 Do eʼbueydeʼte suhueʼnada moʼe̱a̱pone. Paiʼnada
moʼbahuikapone. Oknopo̱e̱hueʼ hua̱e̱ʼerinayo durugda
o̱ʼneapo. Paiʼnanada e̱ʼe̱a̱da onteʼti durugnanada
moʼe̱a̱pone. Eʼnoyhuaddeʼte doʼtaj onʼtiahuaypo durugnanada
moʼe̱a̱pone.
\v 21 Ettoneʼ onʼsiʼpopakpo paiʼnanada onʼnopoʼe̱nigʼa
onʼsiʼpopakdepo paiʼnanada eʼnopoʼendeʼ oʼnokkahueʼapo.
Yo̱bed onʼto̱e̱depo onʼdurugpak.
\v 22 Ken konig moʼe̱ne. Aʼti ijbueyapoy moʼnopo̱e̱depo
paiʼnanada moʼe̱a̱ponigʼa onteʼti ijnoyhuaddepo doʼtaj
boʼtiahuayapopo durugnanada moʼe̱a̱pone. Durugnopoʼda
moʼe̱a̱pone. Beʼapiʼ durugnopoʼ e̱ʼi̱kaʼ batikahueʼdik
moʼe̱a̱pone. Buttida ijjay. —‍Jesúsa monaʼpo.
\p
\v 23 —‍Nogok Diosen Noki̱re̱ga̱ moʼnopoʼto̱e̱denok doʼhued
huaʼa ʼurunanada moʼnopo̱e̱a̱po. Oʼnonaʼnig, ¿katiaʼ iaʼ?
doʼtaj onahueʼdik o̱ʼneapone kenokaʼ. Doʼhued
huanigpe̱i̱kaʼeri moʼe̱po doʼtaj moknopo̱e̱po katepiʼ
boʼpakpo Apagtaj eʼtionaʼpakdeʼte boʼyokikaʼapone. Buttida
ijjay.
\v 24 Doʼhueddiktaj dakaʼ yanoknopo̱e̱po, konig do ijpaknig
Apagtaj tionaʼpakhued moʼe̱depo, doʼhueddiktaj dakaʼ
yanoknopo̱e̱po konig ijpaknok Diostaj yanʼtionaʼpakikatiʼ.
Diosa moʼpe̱i̱kaʼpo moʼnigkaʼapone. Durugnanada kaʼnikeʼpo
Diosa moʼpe̱i̱kaʼpo mogkaʼapone.
\s Jesucristo totoʼ huairitaj kenpaʼti oknopo̱e̱hueʼ hua̱e̱ʼeritaj nigpe̱e̱hueʼ o̱ʼi̱kaʼuy. Konig huayakhueʼ huakaʼeri o̱ʼu̱yate.
\p
\v 25 Aʼnen konig o̱ʼe̱ oʼnonbatiaʼpakpo
oʼnonmadikikameʼne. Aʼtinayo onteʼti ken konig
onmadikahueʼ o̱ʼneaponigʼa Apagtaj dakaʼda
oʼnoknopo̱e̱a̱ʼapone.
\v 26 Nogok doʼhueddik dakaʼ moknopo̱e̱po do konig ijpaknok
Apagtaj moʼtionaʼpakikaʼapo. Donayo Apagtaj
nigtionaʼpakhueʼdik i̱ji̱kaʼapoy.
\v 27 Apag Diosada diʼ moʼe̱po. Doʼtaj diʼ o̱ʼnenok doʼtaj
oʼnoknopo̱e̱nok Apag Diosyaʼ oʼtiakuy oʼnoknopo̱e̱nok
Apaga̱da
diʼ moʼe̱po moʼpe̱i̱kaʼapone.
\v 28 Apagere i̱ji̱kaʼuy. Apag Diosyaʼ ijjo̱ro̱kpo aratbutte
ijtiakuy. Aratbutere ijmaunhuahuikaʼdepo onteʼti aratbutyaʼ
ijbakhuaʼapoy. Apagte ijhuaʼapoy. —‍Jesúsa monaʼuyne.
\p
\v 29 —‍Oynayo dakaʼda onaʼne. Nopoenkaʼdik o̱ʼe̱y. Aʼnen
konig o̱ʼe̱ onʼbatiaʼpakikameʼnig noponkahueʼdik
o̱ʼi̱kaʼuy oroʼ. Oynayo konig o̱ʼe̱ onbatiaʼpakhueʼ o̱ʼe̱ne.
\v 30 Ayaʼda oʼnopo̱e̱ oroʼomey oynayo oʼnopo̱e̱y.
Huanopoyaʼda kateapiʼ oʼnopo̱i̱kay soatayoʼ oʼnopo̱i̱kaʼnig
ayaʼda kenda iʼnopo̱i̱kaʼnok Diosyaʼ oʼtiakuyate oʼnopo̱e̱y.
—‍Oroʼomey Jesúsen huanigpe̱i̱kaʼeria onaʼuy.
\p
\v 31 —‍Menpaʼ oy doʼtaj hueretda yoknopo̱e̱ eaʼada
\v 32 oyda nogyon nogyon oʼnokbahuaʼapone. Ayaʼada
oʼnokbahuaʼapone. Opudomeyen jakyoda oʼnokbahuaʼapone.
Nogtiaʼda oʼnenonaponigʼa nogtiaʼda ehueʼ i̱jje̱y doʼhued
Apagere i̱jje̱a̱poy.
\v 33 Kenda oʼnonaʼdenok Diostaj ʼurunopoʼda moʼi̱kaʼapone
kenpaʼti Diostaj moʼnopoʼnoeyapone. Oknopo̱e̱hueʼ
hua̱e̱ʼeriomeya̱ boʼhuadiaypo dakhueaʼ mogkaʼaponigʼa
yanʼnopoʼteypakpo doʼtaj dakaʼ yanoknopo̱i̱kaʼ. Doa totoʼ
huairitaj kenpaʼti oknopo̱e̱hueʼ hua̱e̱ʼeritaj nigpe̱e̱hueʼ
i̱ji̱kaʼuy. Totoʼtaj huayakhueʼ huakaʼeri i̱jje̱y. —‍Jesúsa
oroʼ
huanigpe̱i̱kaʼeritaj monaʼuyne.
\c 17
\s Jesúsa huaknopo̱e̱ʼeritaj oʼnigtionaʼpakuyate.
\p
\v 1 Oroʼomeytaj Jesúsa kenda monaʼdepo kurudyo̱ oʼmabopo
Apag Diostaj oʼtionaʼpakpo,
\p —‍O̱ʼnensiʼpo i̱jje̱po, Apag. Oy o̱ʼnensiʼpoa
kamanigbueyeʼpo, kamanignoyhuadeʼpo, kurudyo̱ onere
kabehuikeʼpo, onere teyda kamanikeʼpo kenpaʼti “huadakda
oʼkaʼ,” ayaʼada kanʼbatiaʼpakikeʼ. Kenda do eʼkadeʼte “Dios
ʼuruaʼnanada oʼkikaʼ,” ayaʼada kanʼbatiaʼpakikeʼ.
\v 2 O̱ʼna oʼpakpo ayaʼtada meʼbayokne. Diosere
kamanoeanhuahuikeʼpo. Teyaʼda megkaʼnok ayaʼtada manaʼdik
i̱jje̱nok konige̱po ayaʼada aratbut nigpe̱i̱kaʼdik
moʼi̱kaʼapone.
\v 3 Hueretda Dios i̱ʼi̱kaʼ, ayaʼen huairida i̱ʼi̱kaʼne,
ayaʼtada diʼ iʼmaikaʼne, buttida iʼikaʼne, ayaʼada ontaj
dakaʼ moknopo̱e̱po, do Jesucristotakon moknopo̱e̱po oroʼere
durugda moʼnoeonhuahuikaʼapone. Doʼtaj meʼtaʼmonaʼuyne.
\v 4 In huadariyo aratbutere i̱jjunhuahuikaʼdepo o̱ʼnen huaʼa
ijkadhuahuikaʼdepo ontaj ijnigpeunhuahuikaʼdepo ayaʼda
iʼpaknig kenda ijkuhuitdenok konige̱po “Apag Dios
huadaknanada o̱ʼe̱. ʼUruaʼnanada oʼkikaʼ,” aratbuta
onʼbatiaʼpakapo.
\v 5 Oyedda o̱ʼnenbayo onte beʼtobehuik. Onere meto̱i̱kaʼ.
Durugtenanada meto̱i̱kaʼ. Konig aʼnennanada onere
i̱ji̱kaʼpo teynanada ijmanikaʼnig onteʼti konigti
megkaʼ.
\p
\v 6 Huakkaʼ huadariyo hua̱e̱ʼeri meʼnigbaktieʼeaʼuyne, Pag.
O̱ʼnen o̱ʼnenok “doʼhued huadak huaʼa dakaʼ
yamanmadikikatiʼ,” onaʼuyne. O̱ʼnen huadak huaʼa
ijmanmadikadhuahuaʼdey, ontaj ijmaknopo̱e̱a̱ʼdenok o̱ʼnen
huadak huaʼa onʼnigpe̱e̱de.
\v 7 Ayaʼda ijkikaʼnig, beʼtihuapokikaʼnok ijkikay kenpaʼti
beʼteypakikaʼnok ʼuruaʼnanada ijkikay. O̱ʼnen huadak huaʼa
meʼnopo̱e̱a̱ʼikaʼnok. Kenda doʼhued huaknopo̱e̱ʼeriomeya̱
onʼnopo̱e̱de.
\v 8 O̱ʼnen huaktieʼeaʼeriomeytaj o̱ʼnen huadak huaʼa doʼhua
ijmananhuahuikaʼdenok onʼpakpo onʼnigpe̱i̱kaʼde.
Meʼtaʼmonaʼuyne kenpaʼti Diosyaʼ oʼtiakuy onʼnopo̱e̱.
\v 9 Doʼhued huaknopo̱e̱ʼeritaj ijmationaʼpakpo, nog
aratbuttaj mationaʼpakhueʼ i̱jje̱po. O̱ʼnendation o̱ʼnenok
dakaʼ yamato̱i̱kaʼ
\v 10 O̱ʼnen huaknopo̱e̱ʼeri doʼtaj meʼbayokuyne. Doʼhued
onmaenig oʼnenkon iʼtamaikaʼne. O̱ʼnen dakaʼ
moʼnigpe̱i̱kaʼnok o̱ʼnen ʼuruaʼda o̱gkikaʼnok huadakda o̱ʼe̱
kenpaʼti Diosen Huasiʼpo o̱ʼe̱ aratbuta onʼnopo̱e̱po ‘Dakiti
Dios’ onʼbatiaʼpakikaʼ.
\v 11 In huadariyo noikahueʼ i̱jje̱a̱popo o̱ʼnen
huaknopo̱e̱ʼeritaj ijbakhuaʼapopo onte ijbaktiakapoy. O̱ʼnen
indariyo o̱ʼnikaʼponok huadaknanada i̱ʼi̱kaʼpo teynanada
i̱ʼi̱kaʼpo o̱ʼnen huaknopo̱e̱ʼeritaj dakaʼ yabatihuapokikaʼ.
Dakaʼ ka̱gkikeʼpo yabatihuapokikaʼ. Dakhueaʼ kahueʼ kaʼnikeʼpo
yabatiokikaʼ. O̱ʼnen huaknopo̱e̱ʼeri dakaʼ kanoknopo̱i̱keʼpo
yabatihuapokikaʼ. Kenpaʼti huayahuaya diʼ kanʼmaikeʼpo
yabatihuapokikaʼ, Pag. Oroʼ onpapayoʼ ondikyoʼ oʼpakikay
kenomeykon konigti kanʼpakeʼpo yabatihuapokikaʼ.
\v 12 Indariyo o̱ʼnen huanigpe̱i̱kaʼeriere i̱ji̱kaʼpo doʼtaj
teyda oʼyoknok o̱ʼnen huabaktieʼeaʼeritaj huadakyoʼ ka̱gkikeʼpo
ijbatihuapokikaʼpo, ijbatiokikaʼpo, dakaʼ ijmato̱i̱kaʼuy.
Okbatikhueʼda ayaʼada dakaʼ oʼnoknopo̱i̱kaʼdepo nogtiaʼda
oknopo̱e̱batikdepo kenpaʼda oʼbueyapo. Diosyo huahueʼdik
o̱ʼe̱a̱po. Kenda Apagbaʼa oaʼuy.
\p
\v 13 Oy onte ijbakbehuikapoy. O̱ʼnen huabaktieʼeaʼeri huakkaʼ
kanʼdurugpakeʼpo konig do ontaj ijnigpe̱i̱kaʼpo
durugnanada i̱ji̱kay kenomey konigti durugnanada
kaʼnikeʼpo konige̱po ontaj dakaʼ ijtionaʼpakonhuaʼpo, onte
huahued ijtionaʼpakonhuay.
\v 14 O̱ʼnen huaʼa ijmanmadikadhuahuikaʼuy. O̱ʼnen huaʼa
huakkaʼ onʼpakpo onʼnigpe̱i̱kaʼpo, konig oknopo̱e̱hueʼ
hua̱e̱ʼeriomey o̱gkikaʼnig onteʼti kahueʼ o̱ʼnikaʼpo
kenpaʼti doʼhua konig oknopo̱e̱hueʼ hua̱e̱ʼeri o̱gkikaʼnig
kahueʼ i̱ji̱kay. Do konig ijkikay konigti o̱ʼnen
huaknopo̱i̱kaʼeria o̱gkikaʼnok konige̱po oknopo̱e̱hueʼ
hua̱e̱ʼeria diga̱ʼ onʼbahuadiaypo.
\v 15 O̱ʼnen huabaktieʼeaʼeritaj ijmato̱i̱kaʼpo in huadariyo
dakhueaʼ huakkaʼeriomeyere o̱ʼnikaʼ. Oknopo̱e̱hueʼ
hua̱e̱ʼeriyaʼ yamakto̱ro̱k tionaʼpakhueʼ i̱jje̱nok totoʼ
engaña huakaʼeritaj yabatiokikaʼ. Totoʼ engaña kahueʼdik
kamaeʼpo, ijtionaʼpaki.
\v 16 Konig oknopo̱e̱hueʼ hua̱e̱ʼeriomey o̱gkikaʼnig
konigti kahueʼ i̱ji̱kay. O̱ʼnen huaknopo̱e̱ʼeriomey kenpaʼti
dakhueaʼ kikahueʼ o̱ʼnikaʼpo.
\v 17 O̱ʼnen huaʼa buttida o̱ʼi̱kaʼ. Buttida huaʼa onʼpe̱e̱nok
ʼurunopoaʼda yamagkikaʼ. O̱ʼnen buttida huaʼa
kanʼnigpe̱i̱keʼpo yabatihuapokikaʼ. Ontayoʼda kanʼpakikeʼpo
yabatihuapokikaʼ.
\v 18 Oknopo̱e̱hueʼ hua̱e̱ʼeriomeyte meʼtaʼmonaʼuyne.
Konig doʼtaj meʼtaʼmonaʼuyne konigti o̱ʼnen
huabaktieʼeaʼeritaj oknopo̱e̱hueʼ hua̱e̱ʼeriomeyte
ijmataʼmonaʼdey.
\v 19 O̱ʼnen buttida huaʼayoʼda kanʼnigpe̱i̱keʼpo, do konig
huakkurueria o̱ʼnen huaʼayoʼda ijnigpe̱i̱kay.
\p
\v 20 Inomey o̱ʼnen huabaktieʼeaʼeriomey doʼhued huadak huaʼa
oʼnonbatiaʼpakonhuahuikaʼapone. Nogok nogok doʼtaj
huakkaʼananada moknopo̱e̱a̱pone. Huakkaʼananada doʼtaj
moʼnigpe̱i̱kaʼapone. Kenomeytakon ijmationaʼpaki.
\v 21 Doʼhuednopoʼyo i̱ʼi̱kaʼne. On konig iʼpakikaʼ
konigti do ijpakikay. On konig diʼ iʼmaikaʼ konigti do
diʼ ijmaikay, onpapayoʼ o̱ʼi̱kaʼne. Konigti ayaʼada oroʼen
huaknopo̱e̱ʼeri oroʼomeytaj konigti kanoknopo̱i̱keʼpo,
konig oroʼ diʼ oʼmaikay konigti diʼ kanʼmaikeʼpo,
konig oroʼ konigti oʼpakikay kenomeya̱kon konigti
kanʼpakikeʼpo ijmationaʼpaki, Pag. Ken, ayaʼada kenomeytaj
onʼbatiahuaydepo onʼpe̱e̱depo doʼtaj Apag Diosa oʼtaʼmonaʼuy
nopo̱e̱ʼdik ya̱ʼneapet.
\v 22,23 Doʼhuednopoʼyo i̱ʼi̱kaʼne, meʼnopoʼto̱i̱kaʼne.
Konig nogtida o̱ʼe̱ne. Konigyoʼ oʼpakikaʼne. Konigyoʼ
oʼnopo̱i̱kaʼne. Oroʼ konig nogtida kanʼpakikeʼpo, oroʼ
konig diʼ kanʼmaikeʼpo, oroʼ konig nogtida kaʼnikeʼpo
ijmanopoʼto̱i̱kay. Ontaj konigti kanoknopo̱i̱keʼpo,
konigti kanʼnigpe̱i̱keʼpo doʼtaj meʼtaʼmonaʼuyne, doʼtaj
diʼ meʼi̱kaʼne, konigti huaknopo̱e̱ʼeritaj diʼ moʼi̱kaʼne,
ayaʼ aratbuta nopo̱e̱ʼdik ya̱ʼneapetpiʼ.
\p
\v 24 Ayaʼ doʼhued huaknopo̱e̱ʼ doʼtaj meʼbayokuyne,
huakkurunada diʼ o̱ʼe̱nok doere kaʼnikeʼpo on huakkuruda
iʼpaknok doʼhua onere huaboroʼ huairi i̱ji̱kaʼpo, onere
ʼurunanada i̱ji̱kaʼpo, onere teynanada i̱ji̱kaʼnok
tiahuaydik meʼnikeʼpo, Pag.
\v 25 Ayaʼ oknopo̱e̱hueʼ hua̱e̱ʼeriomey ontaj o̱ki̱e̱hueʼ
moʼe̱nigʼa doʼhuanayo ontaj o̱ki̱e̱ʼne kenpaʼti doʼtaj
oʼtaʼmonaʼuy doʼhued huanigpe̱i̱kaʼeria moknopo̱e̱ne, Pag.
Kenpaʼda huadaknanada i̱ʼi̱kaʼne, Pag.
\v 26 O̱ʼna konig o̱ʼe̱, doʼhued huanigpe̱i̱kaʼeritaj
ijmanopo̱e̱a̱ʼdemey. Kenpaʼti nogi̱ti nogi̱ti
ijmanopo̱e̱a̱ʼapoy. Doʼtaj huakkaʼ diʼda o̱ʼi̱kaʼne.
Kenomeykon konigti huakkaʼ diʼ kanʼmaikeʼ kenpaʼti
doʼhua kamanopoʼto̱i̱keʼpo nogi̱ti nogi̱ti
ijmanopo̱e̱a̱ʼapoy, Pag. —‍Jesúsa Apagtaj oʼtionaʼpakuy.
\c 18
\s Jesústaj sorotataj onʼtohuaʼuyate.
\r (Mt. 26.47-56; Mr. 14.43-50; Lc. 22.47-53)
\p
\v 1 Jesús kenda oʼtionaʼpakdepo oʼhuaʼuy. Oroʼ keʼnen
huanigpe̱i̱kaʼeriere oʼhuaʼuy. Oʼhuaʼpo Cedrón huatotaʼpote
oʼpokonpo taʼbayo oʼkudonʼuy. Jesús huanigpe̱i̱kaʼeriere
onʼkudonʼuy.
\v 2 Judas judío huairitaj Jesústaj namaʼda oʼbayokapopo,
ken taʼbayo o̱ʼe̱taj oʼnopo̱e̱ʼuy. Nogok nogok oroʼ
huanigpe̱i̱kaʼeriere Jesúsa ke̱yo̱ oʼkupopakikaʼuypo kenaʼpo
Jesús ke̱yo̱ o̱ʼe̱taj oʼnopo̱e̱ʼuy.
\v 3 Ken taʼbayo Judas oʼhuaʼpo, huakkaʼ sorotataj oʼbatohuaʼpo,
Diosen jak huato̱e̱ʼeri sorotatatakon oʼbatohuaʼuyate. Diosen
jak huato̱e̱ʼeri sorotatatakon fariseo huairia sacerdote
huairierea onʼmataʼmonaʼuyate. Siro kenpaʼti hue̱ypa
onʼtohuaʼpo. Sikyo o̱ʼe̱nok huakjey onʼtohuaʼbedʼuyate.
Taʼbayo Jesúste onʼhuatiakbedʼuyate.
\v 4 Oʼnokye̱depo Jesúsa ayaʼda kenda meʼnogkaʼapone
eʼnopo̱e̱ʼada oʼmadejpo,
\p —‍¿Beʼtaj boʼuk? —‍Jesús oʼmanaʼuy.
\p
\v 5 —‍Jesús Nazareteritaj oʼuki. —‍Oʼnonaʼuy.
\p —‍In do i̱jje̱y. —‍Jesúsa oʼmanaʼuy.
\p Judas judío huairitaj Jesústaj namaʼda oʼbayokpo
sorotataere onʼtoboʼuy.
\v 6 “In do i̱jje̱y.” Jesúsa eʼmanaʼte onʼmididonpo
onʼtaʼnionpo onʼhue̱konʼuy.
\p
\v 7 —‍¿Beʼtaj boʼuk? —‍Onteʼti oʼmanaʼuy.
\p —‍Jesús Nazareteritaj oʼuki. —‍Oʼnonaʼuy.
\p
\v 8 —‍In do i̱jje̱y. Huaboaʼda oʼnonaʼdene. Doʼtaj eʼuknayo
inomey doʼhued huanigpe̱i̱kaʼeritaj magkahueʼ ya̱ʼnepo
kentaj batohuahueʼ yaneʼ. —‍Jesúsa oʼmanaʼuy.
\p
\v 9 Kenda huaboaʼda oaʼmeʼnig magkahueʼ kaʼneʼpo kenda
oʼmanaʼ. “Kenomeytaj Diosa doʼtaj beyokuyne nogtipiʼ
ehueʼ okbatikhueʼ o̱ʼneapone.” Huaboaʼda Jesúsa
monameʼne.
\v 10 Kenokaʼ Simón Pedroa siroa e̱ʼta̱e̱ʼ oʼedpo oʼbapadenpo
sacerdoteen huanabaʼtaj huapesod huadaʼkopen oʼpesodokhueʼuy.
Keʼnendik Malco o̱ʼu̱y.
\p
\v 11 —‍Kejeʼ, kahueʼ ya̱e̱ʼ. Siro huato̱e̱ʼyo yakuda̱ʼ. Kenda
Apag Diosa oʼpaknok paiʼnanada nopoʼe̱dik i̱jje̱a̱poy.
—‍Jesúsa Pedrotaj onaʼuy.
\s Sacerdote huairite Jesústaj onʼtohuaʼuy.
\r (Mt. 26.57-58; Mr. 14.53-54; Lc. 22.54)
\p
\v 12 Ken huakkaʼ sorotataj sorotataj huairiere, Diosen jak
huato̱e̱ʼeria sorotataj Jesústaj onʼtaʼkuypo, huabaʼ
onʼbaʼtinukuʼuy.
\v 13 Huakkuruda Anástaj onʼhuatohuaʼuy. Anás Caifásen
huahue̱yhue̱y o̱ʼe̱nok, onʼhuatohuaʼpo, Caifás kenbayokte
sacerdote huairi o̱ʼu̱yate.
\v 14 Ayaʼ judío aratbut mabueyhueʼ kaʼneʼpo nogtiada
eʼmanigbueynayo oroʼtaj huadakda o̱ʼe̱a̱po. Kenpaʼ Caifás
judío huairitaj oʼbatiaʼpakmeʼte.
\s “Jesúsen huanigpe̱i̱kaʼeri ehueʼ i̱jje̱y.” Pedroa oaʼuy.
\r (Mt. 26.69-70; Mr. 14.66-68; Lc. 22.55-57)
\p
\v 15 Simón Pedro doere Jesústaj oʼtahuaʼuy. Sacerdote huairi
doʼtaj huadak meki̱e̱ʼnok sacerdote huairien jak eʼtiokpakaʼyo
Jesúsere ijkudonʼuy.
\v 16 Eʼtiokpakaʼ kurute akbogpete Pedro oʼboatoʼnok, do
muneʼyo̱taj akbogpe huato̱e̱ʼeritaj ijhuahuaʼpo, “Yakuda̱ʼ,”
yonaʼpo Pedrotaj ijtokudonʼuy.
\p
\v 17 —‍¿Ken huabokereken huanigpe̱i̱kaʼeri o̱ʼna menpaʼ
i̱ʼe̱? —‍Muneʼyo̱ akbogpe hua̱ta̱e̱ʼeria Pedrotaj onaʼuy.
\p —‍Do ehueʼ i̱jje̱y. —‍Pedroa onaʼuy.
\p
\v 18 Jujuʼ o̱ʼe̱nok, huanabaʼere Diosen jak huato̱e̱ʼeriere
taʼak o̱gkaʼuy. Aso̱ʼukkayaʼpo onʼtimaboʼuy. Pedrokon
kenomeyere aso̱ʼukkayaʼpo taʼakte oʼboʼuy.
\s Sacerdote huairia Jesústaj onaʼuy.
\r (Mt. 26.59-66; Mr. 14.55-64; Lc. 22.66-71)
\p
\v 19 “¿O̱ʼnen huanigpe̱i̱kaʼeri menigaʼ iʼta̱e̱? ¿Kate
iʼmanmadikikaʼ?” Sacerdote huairia Jesústaj onaʼuy.
\p
\v 20 —‍Ayaʼ aratbuta menʼpe̱e̱po ijmanmadikanhuahuaʼmey.
Judíoen hua̱i̱takeʼ jakyo ijmanmadikikaʼmey. Kenpaʼti
Diosen jakyo ijmanmadikikaʼmey. Judío o̱gkupopakikaʼ
ke̱ya̱ʼti ijmanmadikikaʼmey. I̱re̱gi̱re̱g manmadikahueʼ
i̱ji̱kaʼmey.
\v 21 “¿Kate iʼmanmadikikaʼ?” ¿Menaʼpo doʼtaj onaʼ?
Ayaʼada doʼtaj menʼpe̱e̱i̱kaʼne, “¿Jesúsa kateaʼ
monmadikameʼ?” Kenomeytaj yamanaʼ. Kenda ijmanaʼmey
kenomeya̱ onʼnopo̱e̱. —‍Jesúsa sacerdote huairitaj
onaʼuy.
\p
\v 22 Kenda eaʼte nogtida Diosen jak huato̱e̱ʼeria sorotataj
Jesústaj huabaʼa oʼpebaspo,
\p —‍Sacerdote huairitaj dakhueaʼ iaʼ. —‍Jesústaj
kameʼpukoneʼpo onaʼuy.
\p
\v 23 —‍Namaʼda onahueʼ i̱jje̱ynigʼa, namaʼda doa enaʼnayo
kenda namaʼda iaʼne menaʼ. Huadakda doa yonaʼnigʼa
menaʼpo oʼpebas. —‍Jesús onaʼuy.
\p
\v 24 Caifás sacerdote huairite Anása oʼtaʼmonaʼuy.
Onʼtinukupo oʼtaʼmonaʼuy.
\s Onteʼti bottaʼaʼte “Jesúsen huanigpe̱i̱kaʼeri ehueʼ i̱jje̱y.” Pedroa onaʼuy.
\r (Mt. 26.71-75; Mr. 14.69-72; Lc. 22.58-62)
\p
\v 25 Kenokaʼ Pedro taʼakte aso̱ʼukkayaʼpo eʼbote,
\p —‍¿Jesúsen huanigpe̱i̱kaʼeri menpaʼ i̱ʼe̱?
—‍Oʼnonaʼuy.
\p —‍Ehueʼ, Jesúsen huanigpe̱i̱kaʼeri ehueʼ i̱jje̱y. —‍Pedroa
oʼmanaʼuy.
\p
\v 26 Ken, nogtida sacerdote huairien huanabaʼ o̱ʼe̱po.
Keʼnen huabettaj Pedroa oʼpesodʼoktegnig. Keʼnakon Pedrotaj
onaʼpo,
\p —‍¿Jesúsere taʼbayo onʼtaj oʼtiahuaynig menpaʼ i̱ʼe̱?
—‍Onaʼuy.
\p
\v 27 —‍Ehueʼ. —‍Onteʼti Pedroa onaʼuy. Kenpaʼ eadeʼte
huatahuaja oʼsipogʼuy.
\s Jesústaj Pilatotekon onʼtohuaʼuy.
\r (Mt. 27.1-2, 11-14; Mr. 15.1-5; Lc. 23.1-5)
\p
\v 28 Caifásen jakyaʼ Jesústaj onʼtohuaʼpo, Roma huairien
jakyo onʼtohuaʼ. Judío huairi eʼaraktaʼ oʼderetpakpo
onʼtohuaʼuy. Sikyoednada o̱ʼu̱y. Roma huairien jakyo judío
aratbut kudhueʼdik o̱ʼneʼuy. Judío aratbut nog aratbuten
jakyo kudhueʼdik o̱ʼneʼuynok, judío huakkurueri isiʼpo
mabueyhueʼ o̱ʼnuy okkahuehueʼ fiesta aypo eʼbapeʼtaʼ onʼpakpo,
Roma huairien jakyo kudhueʼdik o̱ʼne, eʼkudnayo, judío
huakkurueri isiʼpo mabueyhueʼ o̱ʼnuy fiesta aypo bapehueʼdik
o̱ʼneʼuy.
\v 29 Jakyo kudhueʼdik o̱ʼneʼnok jak kurute Pilato
oʼmahua̱o̱ro̱konpo,
\p —‍¿In huabokerek kate dakhueaʼ yakaʼ? ¿Katiaʼ boʼhuaaʼ?
—‍Pilatoa judío huairitaj oʼmanaʼuy.
\p
\v 30 —‍Dakhueaʼ huakaʼeri o̱ʼe̱nok onte oʼtotiaki. Dakhueaʼ
kahueʼ e̱e̱ʼnayo ontaj yokhueʼ o̱ʼe̱a̱ynigʼa. —‍Judío huairia
oʼnonaʼuy.
\p
\v 31 —‍Yanʼtohuaʼ. Konig opuden adhueaʼpaneʼ
onʼmanaʼuyate castiga ya̱gʼkatiʼ. —‍Pilatoa oʼmanaʼuy.
\p —‍Dakhueaʼ huakaʼeritaj oroʼnayo arakhueʼdik o̱ʼe̱y. Opuda̱
Roma jak hua̱e̱ʼeria dakhueaʼ huakaʼeritaj cruzte arakdik
moʼe̱ne. —‍Judío huairia oʼnonaʼuy.
\p
\v 32 “Cruz hue̱ypate nog aratbut meʼdarakapone.” Jesúsa
oameʼnig. Konige̱po “Cruzte kabueyeʼpo,” Judío huairia
oʼderetpakpo kenpayoʼ Pilatotaj oʼnonaʼuy.
\v 33 Roma huairien jakyo Pilato oʼkudonpo onteʼti. Jesústaj
oʼtokudpo onaʼpo,
\p —‍¿Judío aratbuten gobierno huairi menpaʼ i̱ʼe̱?
—‍Jesústaj onaʼuyate.
\p
\v 34 —‍¿Menpaʼ onda iʼnopo̱e̱po doʼtaj menaʼ? ¿Menpaʼ
nogomey kenpaʼ monaʼnok menaʼ? —‍Jesúsa Pilatotaj
onaʼuyate.
\p
\v 35 —‍Ehueʼ, kenda eʼnopo̱e̱ʼtaʼ pakhueʼ i̱jje̱po judío
aratbut ehueʼ i̱jje̱y. O̱ʼnen aratbuta sacerdote huairierea
doʼtaj mennigtotiakne. ¿Kate iʼkameʼ? —‍Pilatoa onaʼuyate.
\p
\v 36 —‍In huadariyo aratbuten gobierno huairi ehueʼ i̱jje̱y.
In huadariyo gobierno huairi doa e̱e̱ʼnayo judío huairia
doʼtaj enʼtohuaʼte doʼhued huanigpe̱i̱kaʼeria doʼtaj
menʼtiokaʼpo yanʼmagkaymet. In huadariyo gobierno huairi
ehueʼ i̱jje̱y. —‍Jesúsa onaʼuyate.
\p
\v 37 —‍¿Huairi i̱ʼe̱ on? —‍Ken Pilatoa onaʼuyate.
\p —‍E̱e̱ʼ, doa huairi i̱jje̱y. Kenda iaʼne.
Huaknopo̱e̱ʼerien huairi a̱ʼe̱ya̱ʼpo kurudya̱ʼ ijhuarakpo
isiʼpoe̱ʼuypo. Konig Dios o̱ʼe̱ aratbuttaj buttida
aʼmanopo̱e̱a̱yaʼpo Diosyaʼ ijhuarakʼuy. Diostaj buttida huaʼa
ayaʼada eʼpe̱e̱taʼ onʼpakpo doʼtaj onʼnigpe̱i̱kaʼ. Nogomey
buttida huaʼa pakhueʼ o̱ʼnepo doʼtaj pe̱e̱hueʼ meʼnikaʼne.
—‍Jesúsa onaʼuyate.
\p
\v 38 —‍¿Kate buttida huaʼa ya̱ʼe̱? —‍Pilatoa onaʼuyate.
\s Jesústaj cruzte yadaraktiʼ Pilatoa oʼmanaʼuyate.
\r (Mt. 27.15-31; Mr. 15.6-20; Lc. 23.13-25)
\p Kenda eaʼte judío aratbuttaj oʼmahua̱o̱ro̱konpo,
\p —‍Jesúsa katepiʼ dakhueaʼ kahueʼda o̱ʼi̱kameʼte,
yoknopo̱e̱y.
\v 39 Ken konig opuda̱ boʼkikaʼ judío huakkurueri isiʼpo
mabueyhueʼ o̱ʼnuy okkahuehueʼ fiestate opud boʼpaknok nogtida
huabakuda̱ʼ jakyaʼ oʼnigo̱ro̱kaʼikaʼne. ¿Judíoen huairi
hua̱e̱ʼ menpaʼ eʼnigo̱ro̱kaʼtaʼ boʼpak? —‍Pilatoa oʼmanaʼuy.
\p
\v 40 —‍Ehueʼ, kentaj pakhueʼ o̱ʼe̱y. Barrabástaj
moʼnigo̱ro̱kaʼ. —‍Ayada oʼnokoyʼuy. Barrabás huabereʼeri
o̱ʼu̱yate.
\c 19
\p
\v 1 Kenokaʼ “Jesústaj yanʼtohuaʼ, yanʼbitbittiʼ.”
Oʼmanaʼpo Pilatoa sorotatataj oʼmataʼmonaʼuy.
\v 2 Sorotataj onʼbitbitdepo eʼpidonbij onʼkuokkaʼpo Jesústaj
onʼkuotaʼuyate. Okayagda huaok onʼotaʼuy. Okayag huaok
gobierno huairiayoʼda onʼotikaʼ konig.
\v 3 Onʼhuahuaʼpo,
\p —‍¡Yanoeunhuahuikatiʼ, judío gobierno huairi! —‍Sorotataa
onʼtierikpo oʼnonaʼpo, huabaʼa onʼpebasʼuyate.
\p
\v 4 Onteʼti Pilato oʼmahua̱o̱ro̱konpo,
\p —‍E̱ya̱ʼ, opudte Jesústaj ijto̱ro̱kdey. Dakhueaʼ sigpiʼ
kahueʼ o̱ʼi̱kaʼ, yanʼnopo̱e̱ʼ. —‍Judío aratbuttaj
oʼmanaʼuy.
\p
\v 5 Ken, eʼpidonbij huakuok oʼkuotdepo okayag oʼotdepo,
Jesúsa o̱ʼo̱ro̱kʼuy.
\p —‍¡In huabokerek o̱ʼe̱! Yanʼtiahuayʼ. —‍Pilatoa
oʼmanaʼuy.
\p
\v 6 Sacerdote huairiere Diosen jak huato̱e̱ʼeri Jesústaj
onʼtiahuaydepo, oʼdokoypo,
\p —‍Hue̱ypa cruzte yadarak. Hue̱ypa cruzte yadarak. —‍ʼUttaʼda
oʼdokoyʼuy.
\p —‍Opuda̱ yanʼpakpo yanʼtohuaʼ. Hue̱ypa cruzte yanʼpakpo
yadarak. Keʼna dakhueaʼ sigpiʼ kahueʼ o̱ʼi̱kaʼ ijnopo̱e̱y.
—‍Pilatoa oʼmanaʼuy.
\p
\v 7 —‍Oroʼen huadik eʼmanaʼ oʼto̱e̱y. Keʼna bueydik o̱ʼe̱,
oaʼ. “Diosen Huasiʼpo i̱jje̱y.” Oaʼnok bueydik o̱ʼe̱.
—‍Judío huairia oʼnonaʼuy.
\p
\v 8 Kenpaʼ oʼpe̱e̱depo Pilato nogi̱ti oʼmididpo
\v 9 onteʼti gobierno huairien jakyo oʼkudonpo,
\p —‍¿Meyo̱ hua̱e̱ʼeri i̱ʼe̱? ¿Beʼa i̱ʼe̱? —‍Jesústaj
enaʼtada Jesúsa aʼtokhueʼda o̱ʼu̱yate.
\p
\v 10 —‍¿Menapaʼ doʼtaj aʼtokhueʼ o̱ke̱? Do gobierno huairi
i̱jje̱po, ontaj o̱ro̱kaʼdik meʼe̱ne. Kenpaʼti hue̱ypa cruzte
arakdik meʼe̱ne. ¿Menpaʼ iʼnopo̱e̱? —‍Pilatoa Jesústaj
onaʼuy.
\p
\v 11 —‍Diosa oʼpaknok gobierno huairi i̱ʼe̱po doʼtaj hue̱ypa
cruzte arakdik o̱ʼe̱ne. Judío huabokereka onʼtaj boʼyokne
kenaʼtaj dakhueaʼda meʼnogkaʼne. O̱ʼnanayo suhueʼda dakhueaʼ
o̱gkaʼne. —‍Jesúsa onaʼuyate.
\p
\v 12 Kenda Pilato oʼpe̱e̱depo eʼo̱ro̱kaʼtaʼ oʼpakpo, monig
o̱ro̱kaʼdik i̱jje̱y oʼnopo̱e̱po oʼukʼuynigʼa, judíoa
oʼdokoypo,
\p —‍Kentaj o̱ro̱kahueʼ ya̱e̱ʼ, kentaj eʼo̱ro̱kanayo Roma
gobierno huantopa huairia ontaj onteʼti pakhueʼ o̱ʼe̱po
oʼenapo. César o̱ʼnen huantopa o̱ʼe̱nok. Beʼapiʼ “Do huairi
i̱jje̱y,” huataʼda eʼhuaaʼnayo Césaren takaʼ o̱ʼe̱nok arakdik
o̱ʼe̱. —‍Judío huairia ʼuttaʼda oʼdokoyʼuy.
\p
\v 13 Kenda Pilato oʼpe̱e̱depo Jesústaj oʼto̱ro̱konpo
huantopa huahuadte oʼhuadatoʼuy. Kenda judíoen huaʼa oʼdikkaʼ
Gabata. Huidʼaytate o̱ʼu̱y.
\v 14 Aʼti tokhuada̱ʼ oʼhuadapo kenpaʼti emeʼte judíoen
okmapi̱e̱ʼahuaddik huameʼnoe o̱ʼe̱a̱ponok,
\p —‍In o̱ʼnen huairi moʼta̱e̱ne. —‍Pilatoa judío huairitaj
oʼmanaʼuy.
\p
\v 15 —‍Yaarak. Yaarak. O̱hue̱yen cruzte yabetaʼ. —‍Judío
huairia oʼdokoyʼuy.
\p —‍¿Opuden huairitaj menpaʼ o̱hue̱yen cruzte doa eʼbetaʼtaʼ
boʼpak? —‍Pilatoa oʼmanaʼuy.
\p —‍Roma huantopa César kenyoʼda mota̱e̱ne. —‍Sacerdote
huairiomeya̱ oʼnonaʼuy.
\p
\v 16 Kenokaʼ Pilato kenomeytaj oʼmanigpe̱e̱po o̱hue̱yen
cruzte kanʼarakeʼpo oʼmanaʼuy.
\s Roma sorotataj hue̱ypa cruzte siropia onʼti̱o̱gkoʼeaʼpo onʼbetaʼuy.
\r (Mt. 27.32-44; Mr. 15.21-32; Lc. 23.26-43)
\p
\v 17 Ken Jesústaj onʼtohuaʼuy. Keʼnen hue̱ypa cruz Jesús
oʼtohuaʼuy. Oteʼ huadik Huakuaiʼte oʼtohuaʼuy. Ken oteʼ
judíoen huadik o̱ʼe̱ Gólgota.
\v 18 Kente e̱kye̱deʼte Roma sorotataj hue̱ypa cruzte siropia
onʼti̱o̱gkoʼeaʼpo onʼbetaʼuy. Kenpaʼti nog bottaʼ
huabokerektaj hue̱ypa cruzte onʼmabetaʼpo, nogkoreʼ
nogkoreʼpen onʼmabetaʼuy. Jesústaj nopoyo cruzte
onʼbetaʼuy.
\v 19 “Jesús Nazareteri judíoen gobierno huairi o̱ʼe̱.”
Huaente yanʼmadoyaʼpo, cruz kutapen yanʼbetaʼ, Pilatoa
oʼmanaʼnok onʼmadoyaʼpo onʼbetaʼuy.
\v 20 Huakkaʼada judíoa eʼmadoyaʼ onʼtiahuayʼuy. Ken hue̱ypa
cruzte enʼbettaʼte huakkaʼ jak Jerusalén ʼibodteda o̱ʼe̱nok,
kenaʼpo huakkaʼada judíoa eʼmadoyaʼ onʼtiahuayʼuy. Judíoen
huaʼate onʼmadoyaʼpo, Roma hua̱e̱ʼerien huaʼate
onʼmadoyaʼpo, kenpaʼti griego huaʼate onʼmadoyaʼuy.
\p
\v 21 —‍“Judíoen huairi o̱ʼe̱,” madoyahueʼ ya̱e̱ʼ.
“Judíoen huairi i̱jje̱y,” in huabokerek oameʼte. Kenpaʼ
yamadoyaʼ. —‍Judío sacerdote huairia Pilatotaj oʼnonaʼuy.
\p
\v 22 —‍Kejeʼ, kenda ijmadoyay kenpaʼda ijmadoyaʼdey.
—‍Pilatoa oʼmanaʼuy.
\p
\v 23 Sorotataj Jesústaj onʼbetaʼdepo bottaʼ bottaʼa keʼnen
yudtaj nogti nogti onʼdeʼeʼuy. Kenpaʼti keʼnen huaok
tiokhuihuihueʼ nogtida huaok o̱ʼe̱nok,
\p
\v 24 —‍Huishueʼ moʼne. Beʼa eʼdik aʼnopo̱e̱yaʼpo huid okmo
moʼnenʼe̱. —‍Onpapayoʼ sorotataj oʼdadpo, ken konig
Apagbaʼte oaʼuyate, “Doʼhued yudtaj nogti nogti yanʼdeʼeapet.
Doʼhued huaoktaj beʼa yaʼeyapet aʼnopo̱e̱yaʼpo huid okmo
yaʼnenʼe̱a̱pet.” Kenda Apagbaʼ oaʼuyatenig kenda o̱gkaʼuy.
\p
\v 25 Onteyoʼ Jesúsen cruzte o̱ʼnepo, Jesúsen hua̱ye̱,
huamaʼbuyere o̱ʼnepo, kenpaʼti María, Cleofasen hua̱to̱e̱
o̱ʼe̱po kenpaʼti María Magdalena o̱ʼe̱ʼuy.
\v 26 Jesúsen hua̱ye̱ doere oʼbonok Jesúsa boʼtiahuaypo,
\p —‍In o̱ʼnen huasiʼpo iʼta̱e̱ne ettoneʼ. —‍Hua̱ye̱taj
onaʼuy.
\p
\v 27 —‍In o̱ʼnen hua̱ye̱ iʼta̱e̱ne. —‍Do Juantaj menaʼuyne.
Kenokaʼ Jesúsen hua̱ye̱taj doʼhued jakyo ijtohuaʼuy, doʼhued
jakyo ijto̱i̱kaʼuy.
\s Konig Jesús oʼbueyʼuyate.
\r (Mt. 27.45-56; Mr. 15.33-41; Lc. 23.44-49)
\p
\v 28 Kenda Jesúsa oaʼdepo, ayaʼda Diosen huaʼa ijkuhuitdey
Jesúsa oʼnopo̱e̱po,
\p —‍Maymaya̱ ijjay. —‍Jesúsa oaʼuy. Kenda Apagbaʼa
oʼbatiaʼpakuynig Jesúsa oaʼuy.
\p
\v 29 Kosoyo vino paiʼ hueda̱ʼda onhuadʼuy. A̱pon esponja
oʼnigoyeʼepo, hue̱ypate onʼbetaʼpo huakittaʼte oʼnigokteaʼuy.
\v 30 Vino paiʼ oʼmaiʼdepo,
\p —‍Ayaʼda Diosa oʼpaknig ijkaʼdepo ijkuhuiti. —‍Jesúsa
oaʼdepo, oʼkutaʼboypo oʼbueyʼuy.
\s Siro huiʼdaka Jesústaj onʼpidtukaʼuy.
\p
\v 31 Emeʼte okmapi̱e̱ʼahuaddik o̱ʼe̱a̱po kenpaʼti judío
huakkurueri isiʼpo mabueyhueʼ o̱ʼnuy okkahuehueʼ fiesta
o̱ʼe̱a̱po, Diostaj ʼurumeʼnoe o̱ʼe̱a̱ponok kenaʼpo hue̱ypa
cruzte hua̱so̱ʼ e̱a̱hueʼdik o̱ʼnepo “Hue̱ypa cruzte
huabeterien huabopi yanʼmabopiokketekpo yanʼbahuarakaʼ
kenpaʼti yanʼbatohuaʼ.” Judío huairia Pilatotaj
oʼnonaʼuy.
\v 32 Oʼnonaʼnok sorotataj onʼhuaʼpo huakkuru huabokerektaj
huabopi oʼnokketekpo, nogtakon Jesúsere cruzte eʼbetaʼtaj
huabopi oʼnokketekʼuy.
\v 33 Ken onʼbakketekdepo Jesústekon onʼhuahuaʼpo
eʼbueyondeʼ onʼtiahuayatoʼpo keʼnen huabopi okketekhueʼ
o̱ʼneʼuy.
\v 34 Okketekhueʼada sorotataj nogtiada keʼnen siro huiʼdaka
Jesústaj onʼpidtukaʼuy. Enpidtukaʼte i̱da mimi hue̱ʼe̱yere
oʼmimihuaʼuy.
\v 35 Do Juan ayaʼtada ijtiahuayʼuy, buttida ijjay, ijnopo̱e̱y.
Opudomey dakaʼ Jesústaj oknopo̱e̱ʼdik moʼi̱kaʼaponok
buttida ijtimadoyay.
\v 36 “Keʼnen huaʼay nogayʼtipiʼ okketekhueʼ o̱ʼneapo.”
Apagbaʼa oaʼuyatenok Jesúsen huabopi okketekhueʼ o̱ʼnuy.
\v 37 “Kentaj onʼpidtukapo kenda onʼtiahuayapo.” Nogya̱ʼ
Apagbaʼte onʼtimadoyaʼuyate.
\s Jesústaj o̱gkubarakkaʼuy.
\r (Mt. 27.57-61; Mr. 15.42-47; Lc. 23.50-56)
\p
\v 38 Jesústaj enpidtukaʼdeʼte,
\p —‍Hua̱so̱ʼ kakubarakkeʼpo beyok. —‍Pilatotaj José Arimatea
huakkaʼ jakyo hua̱e̱ʼeria onaʼuy. José Jesústaj
huaknopo̱e̱ʼeri o̱ʼe̱po judío huairitaj oʼmididpo soatayoʼ
Jesústaj huaknopo̱e̱ʼeri o̱ʼu̱yate.
\p —‍Yatohuaʼ. —‍Pilatoa onaʼuynok cruzte oʼhuaʼpo, hua̱so̱ʼ
oʼhuarakaʼpo oʼtohuaʼuy.
\v 39 Nicodemo kenpaʼti oʼhuaʼuy. Keʼna aʼnenda sikyo
Jesústaj aʼbatiaʼpakyaʼpo oʼhuahuaʼuyate. Ken mirraere
áloesere oʼtohuaʼpo, mirra kenpaʼti áloes konig
ʼuruʼhui̱e̱da e̱ʼe̱o̱k treinta kilos oʼtohuaʼpo,
\v 40 Joséere Nicodemoere Jesúsenso̱ʼ onʼtohuaʼpo konig
mirra áloesere ʼuruʼhui̱e̱da yudtaʼbia onʼtihui̱yi̱gonpo. Ken
konig judíoa onʼbakubarakkikaʼnig konigti Jesústaj
onʼkubarakkaʼuy.
\v 41 Kenteda Jesústaj yaarakteda taʼba o̱ʼu̱y. Kenteda
taʼbayo huaboda kubarak hua̱e̱ʼ eʼkogkaʼ o̱ʼe̱po ke̱yo̱ sigpiʼ
bakubarakkahued e̱e̱ʼyo̱.
\v 42 Jesústaj onʼkubarakkaʼuy. Kenaʼpo emeʼte judíoen
okmapi̱e̱ʼahuaddik huameʼnoe o̱ʼe̱a̱po kenpaʼti kubarak
eʼkogkaʼ ʼibodteda o̱ʼe̱nok kenteda Jesústaj
onʼkubarakkaʼuy.
\c 20
\s Kubarakyaʼ Jesús oʼnoyhuadʼuyate.
\r (Mt. 28.1-10; Mr. 16.1-8; Lc. 24.1-12)
\p
\v 1 Domingote eʼmeunyakte sikki̱re̱genteda kubarak eʼkogkaʼyo
María Magdalena oʼhuaʼpo, huakogyo̱ huakhuida̱
eʼtinokbetaʼmeʼyo ekpokoreaʼ oʼtiahuayʼuyate.
\v 2 Oʼtiahuaydepo oʼketonyakpo Simón Pedrotaj doeretaj
boʼhuatiakuyne.
\p —‍Kubarak huakogya̱ʼ Huairitaj onʼtohuaʼte. Ke̱yo̱
onʼhueda̱ʼtaj nopo̱e̱hueʼ o̱ʼe̱y. —‍María monaʼuyne.
\p
\v 3,4 Pedroere doere oʼhuaʼpo kubarakyo oʼhuaʼpo oroʼ bottaʼ
oʼketpo donayo i̱da ijketpo huakkuruda kubarakyo i̱jji̱a̱toʼuy.
\v 5 Yonoktoatoʼpo ijtiahuayʼuy. Yudtaʼbijyoʼda eʼhued
ijtiahuaypo Jesúsbueytaj tiahuayhueʼ i̱jje̱po kudhueʼ i̱jju̱y.
\v 6 Taʼpotaʼ Simón Pedro oʼtiakatopo kubarakkogyo oʼkudonpo
yudtaʼbijyoʼda eʼbahued oʼtiahuaypo
\v 7 yudtaʼbia onʼkutihui̱yi̱gʼuynig huataʼ oʼhuedʼuyate.
\v 8 Doa huakkuru e̱ʼe̱a̱toada taʼpote ijkudonpo ijtiahuaypo
kenpaʼti yoknopo̱e̱ʼuy. Jesús onteʼti oʼnoyhuadde
yoknopo̱e̱ʼuy.
\v 9 Eʼbueyada onteʼti noyhuaddik o̱ʼe̱a̱po konig Apagbaʼ oaʼ
oroʼ nopo̱e̱hued o̱ʼe̱ʼuynigʼa huaboaʼda oknopo̱e̱ʼuy.
\v 10 Oʼtiahuaydepo oroʼen jakyo oʼhuaʼuy.
\s María Magdalenataj Jesúsada oʼtiahuayʼeaʼuyate.
\r (Mr. 16.9-11)
\p
\v 11 Kubarakkogte kurute María onteʼti oʼtiakdepo oʼbopo
oʼhuikuyate. Oʼhuikpo kubarak eʼkogkaʼyo oʼkubuypo
oʼnoktoatoʼpo oʼtiahuayʼuyate.
\v 12 Bottaʼ Diosen huataʼmoneritaj oʼtiahuayʼuyate. Yereda
onʼotpo kente Jesúsbuey oʼhuedmeʼte onʼhuad. Nogtida
huakupen oʼhuadʼuy. Nogtida huaʼipen oʼhuadʼuy.
\p
\v 13 —‍¿Menaʼpo iʼhuik, ettoneʼ? —‍Oʼnonaʼuy.
\p —‍Doʼhued Huairitaj onʼtohuaʼtenok ijjay. Ke̱yon onʼhueda̱ʼ
nopo̱e̱hueʼ i̱jje̱y. —‍María oʼmanaʼuyate.
\p
\v 14 Kenda oʼmanaʼdepo oʼbatipekorudpo Jesús eʼbote
oʼtiahuayʼuynigʼa, Jesús o̱ʼe̱ o̱ki̱e̱hueʼ o̱ʼu̱yate.
\p
\v 15 —‍¿Menaʼpo iʼhuik, ettoneʼ? ¿Beʼtaj iʼuk? —‍Jesúsa
onaʼuyate.
\p —‍O̱ʼna eʼtohuaʼnayo ke̱yo̱ ijhueda̱y menaʼ. Doʼhua
ijtohuaʼapoy. —‍María onaʼuyate. Taʼba huato̱e̱ʼeri keʼna
o̱ʼe̱ namaʼda oʼnopo̱e̱po kenda Jesústaj onaʼuyate.
\p
\v 16 —‍¡María! —‍Jesúsa onaʼuyate.
\p Kentaj oʼtikorudpo, o̱ki̱e̱ʼdepo,
\p —‍Huamanmadikaʼeri. —‍María onaʼpo oʼdokoatoʼuyate.
\p
\v 17 —‍Doʼtaj so̱ʼto̱e̱a̱hueʼ meeʼ. Apag Diosyo behuikhued
i̱jje̱y. Doʼhued huamaʼbuyte yahuatiʼ. “Doʼhued Apag Dioste
kenpaʼti opuden Dioste ijbehuikapoy,” oaʼ, yamanaʼ.
—‍Jesúsa Maríataj onaʼuyate.
\p
\v 18 Ken María Magdalena oroʼ huanigpe̱i̱kaʼeriomeytaj
boʼhuatiakdepo, “Huairitaj ijtiahuay.” Oroʼtaj monaʼpo kenda
Jesúsa Maríataj enʼbatiaʼpak María monbatiaʼpakuyne.
\s Oroʼtaj huanigpe̱i̱kaʼeritaj Jesúsa hua̱so̱ʼda boʼtiahuayʼeaʼuyne.
\r (Mt. 28.16-20; Mr. 16.14-18; Lc. 24.36-49)
\p
\v 19 Kenda huameʼnoe, domingo sikyo oroʼ huanigpe̱i̱kaʼeri
jakyoda oʼkupopakpo judío huairitaj oʼmididpo akbogpe
oʼyahuekaʼpo. Jesús ihuiti ehueʼ oroʼ eʼkupopaknopoyo oʼbopo,
\p —‍Meʼpukhueʼ yaneʼ. —‍Jesúsa monaʼuyne.
\p
\v 20 Kenda eadeʼte keʼnen huabaʼ eʼbati̱o̱gkoaʼ
boʼtiahuayʼeaʼuyne. Keʼnen huapid eʼpidtukaʼ
boʼtiahuayʼeaʼuyne. Huairitaj oʼtiahuaypo oʼnoki̱a̱ʼdepo
oʼdurugpakuy.
\p
\v 21 —‍Yanʼnopoʼnoeyʼ meʼpukhueʼ yaneʼ. Konig doʼhued
Apag doʼtaj meʼtaʼmonaʼuyne, ayaʼtada huadak huaʼa
kamaneʼpo ijmataʼmonaʼapoy. —‍Onteʼti monaʼuyne.
\p
\v 22 Kenpaʼ oaʼpo oroʼtaj boʼtipoapo,
\p —‍Diosen Noki̱re̱ga̱ moʼnopoʼto̱e̱ʼ.
\v 23 Opuda̱ nogen dakhueaʼ eʼkaʼ eʼbakkahueaʼnayo Diosakon
kenomeyen dakhueaʼ eʼkaʼ oʼbakkahueaʼdeapo. Nogen
dakhueaʼ
eʼkaʼ opudomeya̱ okkahueahueʼ e̱e̱ʼnayo Diosakon okkahueahueʼ
oʼmaeapo. —‍Jesúsa monaʼuyne.
\s Tomása Jesús Huairi eʼnoyhuaddeʼte oʼtiahuayʼuyate.
\p
\v 24 Tomás, nogtiada doce huanigpe̱i̱kaʼeri o̱ʼe̱po,
nogdikda Gemelo. Jesús huakkuruda oroʼere eʼbote Tomás ehueʼ
o̱ʼu̱y.
\p
\v 25 —‍Jesús Huairitaj oʼtiahuay. —‍Nog huanigpe̱i̱kaʼeria
Tomástaj oʼnonaʼuy.
\p —‍Huabaʼtaʼ siropi onʼbati̱o̱gkoameʼte tiahuayhueʼ e̱e̱ʼnayo
kenpaʼti siropia eʼti̱o̱gkoaʼe̱yo̱ doʼhued huabaʼpiʼ kudhueʼ
e̱e̱ʼnayo kenpaʼti doʼhued huabaʼ keʼnen huapidte eʼpidtukaʼyo
bakudhueʼ e̱e̱ʼnayo Huairi oʼnoyhuadmeʼte oknopo̱e̱hueʼdik
i̱jje̱a̱poy. —‍Tomása oroʼtaj monaʼuyne.
\p
\v 26 Ocho huameʼnoe eʼpokdeʼte oroʼ huanigpe̱i̱kaʼeri
onteʼti jakyo eʼkupopakte Tomásere o̱ʼe̱po akbogpe
okyahueʼkaʼnigʼa Jesúsa oʼkudonpo oroʼ nopoyo oʼboatoʼuy.
\p —‍Meʼpukhueʼ yaneʼ, yanʼmanopoʼnoeyʼ. —‍Monaʼuyne.
\p
\v 27 —‍Intaʼ menej. Doʼhued huabaʼ yatiahuayʼ. Huapidyo
mebakud. Oknopo̱e̱hueʼ e̱e̱ʼ yabatikpo doʼtaj meknopo̱e̱ʼ.
—‍Tomástaj onaʼuy.
\p
\v 28 —‍Doʼhued Huairi o̱ʼta̱e̱ne. Doʼhued Dios o̱ʼta̱e̱ne.
—‍Tomása onaʼuy.
\p
\v 29 —‍Doʼtaj beʼtiahuaypo kenaʼpo doʼtaj meknopo̱e̱ne. Do
Diosen Huasiʼpo o̱ʼe̱ meknopo̱e̱ne. Nogomeya̱ doʼtaj
tiahuayhueʼ e̱ʼe̱a̱da meʼnoknopo̱e̱po durugda o̱ʼneapo.
—‍Jesúsa onaʼuy.
\s Juana in oʼmadoyaʼnok huakkaʼada Jesucristotaj oknopo̱e̱ʼdik ya̱ʼneapet.
\p
\v 30 Jesúsa huakkaʼda oʼbayareaʼuy. Kenpaʼti konig
Diosayoʼda kaʼdik o̱ʼe̱nig Jesúsa oroʼere huakkaʼ oʼkikaʼuy.
In berobaʼte ayaʼ madoyahueʼ i̱jje̱y. In berobaʼte suhueʼda
ijmadoyay.
\v 31 In ijmadoyaʼnok Jesús Diosen Huasiʼpo o̱ʼe̱ kenpaʼti
Cristo o̱ʼe̱po Diosyaʼ oʼtiakʼuyate oknopo̱e̱ʼdik moʼe̱ne.
Ayaʼada kenda oʼnoknopo̱e̱po onteʼti Diosere
onʼnoeunhuahuikaʼapo.
\c 21
\s Jesúsa hua̱so̱ʼda siete huanigpe̱i̱kaʼeritaj oʼbatiahuayʼeaʼuy.
\p
\v 1 Nogok onteʼti Jesúsa hua̱so̱ʼda oroʼ
huanigpe̱i̱kaʼeritaj boʼtiahuayʼeaʼuyne. E̱ʼpo̱g Tiberiaste
Jesúsa hua̱so̱ʼda oroʼ huanigpe̱i̱kaʼeritaj boʼtiahuayʼeaʼpo.
\v 2 Simón Pedroere Tomásere, Natanaelere, doere, doʼen
huamaʼbuyere, kenpaʼti bottaʼ nog huanigpe̱i̱kaʼeriere
onteteyoʼ o̱ʼu̱y. (Tomás konogda oʼdikkaʼ Gemelo.) (Natanael
Caná Galileaeri o̱ʼu̱y.) (Doere doʼen huamaʼbuyere Zebedeoen
huasiʼpo o̱ʼe̱y.) Oroʼ onteteyoʼ o̱ʼu̱y.
\p
\v 3 —‍Biig yo̱gkaʼapoy. —‍Simón Pedroa monaʼuyne.
\p —‍Oroʼtion oʼhuaʼapoy. —‍Onaʼuy.
\p Ken, oʼhuaʼpo kusiʼpeyo oʼkudpo, e̱ʼpo̱g nopote
okenʼe̱bedpo sigpiʼ biig ontotokhueʼda o̱ʼe̱bedʼuy.
\v 4 Huaboaʼda eʼmeunyakte aktaʼbogpete Jesústaj eʼhuahuayada
Jesús o̱ʼe̱ o̱ki̱e̱hueʼ o̱ʼu̱y.
\p
\v 5 —‍¿Menpaʼ biig boʼkuda̱ʼ, huadiʼ? —‍Jesúsa monaʼnok
\p —‍Kuda̱hueʼ o̱ʼe̱y. —‍Onaʼuy oroʼa.
\p
\v 6 —‍Nogkorepen huadaʼkopen yanoken, huakkaʼda
montotokapone. —‍Jesúsa monaʼuyne.
\p Ke̱yon okenpo, huakkaʼda biig oʼkudpo ontotokhueʼdik
o̱ʼe̱ʼuy.
\p
\v 7 —‍¡Huairi o̱ʼe̱! —‍Doʼa Pedrotaj yonaʼuynok othueʼ
o̱ʼe̱po biig okenepo, ken Huairi o̱ʼe̱, Simón Pedro
oʼpeeonpo oʼotonpo hua̱hue̱yo̱ oaʼuy.
\v 8 Oroʼ kusiʼpete oʼhuaʼuy. Aktaʼbogpeyo oʼhuaʼuy.
Huakeneʼyo̱ biig hueda̱ʼda onʼtotokʼuy. Aktaʼbogpe
meyo̱hueʼda o̱ʼu̱y.
\v 9 Oʼbetanpo taʼak oʼtiahuaypo, biigere panere taʼakte
eʼtiayaʼ oroʼ oʼtiahuayatoʼuy.
\p
\v 10 —‍Suhueʼda biig huaboaʼda huakeneʼyo̱ montotoknig
yanʼtotiak. —‍Jesúsa monaʼuyne.
\p
\v 11 Simón Pedro kusiʼpeyo oʼhuaʼpo aktaʼbogpete huakeneʼ
onʼtotokʼuyate. Hueda̱ʼda onʼtotokpo ciento cincuenta y tres
boroʼbiig e̱ʼe̱a̱da huakkaʼda e̱ʼe̱a̱da 
huakeneʼ onokpukonhueʼ o̱ʼu̱yate.
\p
\v 12 —‍Yanʼtiak. Yanʼbapeʼ. —‍Jesúsa monaʼuyne.
\p Huairi o̱ʼe̱ eʼnopo̱a̱da. “¿Beʼa i̱ʼe̱?” Anayʼ
eʼnopo̱a̱da oroʼ oʼmeʼpukpo ahueʼ o̱ʼu̱y.
\v 13 Ken Jesúsa taʼakyo oʼtiakpo pan oʼetupo boʼyokeʼuyne.
Kenpaʼti biig oʼetupo, boʼyokeʼuyne.
\p
\v 14 Jesúsa oʼnoyhuaddepo oroʼ huanigpe̱i̱kaʼeritaj kenokaʼ
bapaʼaʼ bohuahuayʼuyne.
\s Simón Pedrotaj Jesúsa oʼbatiaʼpakuyate.
\p
\v 15 Ken onʼbapuddepo,
\p —‍¿Menpaʼ inomeya̱ doʼtaj sueʼda diʼ meʼnene. Menpaʼ
o̱ʼnanayo doʼtaj nogi̱ti huakaʼda diʼ o̱ʼe̱ne, Simón,
Jonásensiʼpo? —‍Jesúsa onaʼuy.
\p —‍E̱e̱ʼ, Huairi. Onʼtaj diʼda i̱jje̱y, kenda iʼnopo̱e̱ne.
—‍Simóna onaʼnok,
\p —‍Doʼhued huanigpe̱i̱kaʼeri konig oveja o̱ʼnenok dakaʼ
yabatiokikaʼ. —‍Jesúsa onaʼuy.
\p
\v 16 —‍¿Menpaʼ doʼtaj diʼda o̱ʼe̱, Simón Jonásensiʼpo?
—‍Onteʼti Jesúsa onaʼuy.
\p —‍E̱e̱ʼ, Huairi. Ontaj diʼda i̱jje̱y. Kenda iʼnopo̱e̱ne.
—‍Simóna onaʼnok,
\p —‍Doʼhued huanigpe̱i̱kaʼeri dakaʼ yamato̱i̱kaʼ. —‍Jesúsa
Pedrotaj onaʼuy.
\p
\v 17 —‍¿Menpaʼ diʼ o̱ʼe̱, Simón, Jonásensiʼpo? —‍Bapaʼaʼ
Jesúsa onaʼuy. “¿Menpaʼ diʼ o̱ʼe̱?” Bapaʼaʼ Jesúsa
jenak Pedro huaboaʼda suhueʼ o̱ʼunpo,
\p —‍On ayaʼda iʼnopo̱e̱, Huairi. Onʼtaj diʼda o̱ʼe̱ne
iʼnopo̱e̱. —‍Simóna onaʼuy.
\p —‍Doʼhued huanigpe̱i̱kaʼeritaj dakaʼ yamato̱i̱kaʼ.
\v 18 Huabo i̱ʼe̱po konig iʼpakpo iʼotikaʼuy, meyo̱piʼ
ehuaʼtaʼ iʼpakpo iʼhuaeʼikaʼuy. Nogok toneʼda e̱ʼe̱deʼte
huabaʼ boʼosaddaapo noga̱ moʼtinukuʼapet. Ke̱yo̱ ehuaʼtaʼ
pakhueʼ e̱e̱ʼtada boʼtohuaʼapet. Buttida ijjay. —‍Jesúsa
onaʼuy.
\p
\v 19 Ken konig oʼbueyapo. Jesúsa moʼnopoenkaʼuy.
Kenpaʼti Pedro oʼbueydepo Dios ʼuruda o̱ʼe̱
oʼmanopo̱e̱a̱ʼapo. Jesúsa oʼbatiaʼpakʼuy. Kenpaʼti onaʼpo,
\p —‍Doʼtaj menigpe̱i̱kaʼ. —‍Jesúsa onaʼuy.
\s Jesúsa Juantaj diʼda o̱ʼu̱yate.
\p
\v 20 Jesúsa doʼtaj diʼnanada meʼi̱kaʼuyne. Aʼnen Jesúsere
oʼbapeʼpo Jesústaj ijtipebetpo, “¿Beʼa ontaj judío huairitaj
yaʼbayokapet, Huairi?” Doʼhua yonaʼmey. Ken oʼhuaʼdepo doʼtaj
Pedro oʼkorepo huataʼpipen beʼtiahuayʼuyne.
\v 21 Pedroa beʼtiahuaydepo,
\p —‍¿Juanataj monig bueydik ya̱ʼe̱, Huairi? —‍Pedroa
onaʼuy.
\p
\v 22 —‍Doʼa kurudyo̱ ijhuaʼapoy. Doʼhua eʼpaknayo doʼhua
nogoknanada onteʼti eʼtiakdeʼte Juan bueyhued eʼnoeʼnayo
meʼpukehueʼada doʼtaj menigpe̱i̱kaʼ. —‍Jesúsa Pedrotaj
onaʼuy.
\v 23 Juan bueyhueʼ o̱ʼe̱a̱po. Nog huanigpe̱i̱kaʼeria namaʼda
onʼbatiaʼpakuy, “Juan bueyhueʼ o̱ʼe̱a̱po.” Jesúsa ahueʼ
o̱ʼu̱ynigʼa, “Doʼa eʼpaknayo kurudya̱ʼ onteʼti eʼtiakdeʼte Juan
bueyhued eʼnoeʼnayo meʼpukehueʼ ya̱e̱ʼ.” Kenpaʼ Jesúsa
Pedrotaj onaʼuy.
\p
\v 24 Doa Juan ayaʼda ijtiahuayikaʼpo, ijpe̱i̱kaʼpo kenpaʼti
ijnopo̱e̱po onʼnigmadoyaʼne. Buttida ijmadoyay, buttida
oʼnopo̱e̱y.
\p
\v 25 Jesúsa huakkaʼda nogda nogda oʼkaʼuyate. Kenpaʼti
huakkaʼda oʼmanmadikikaʼuyate. Kenda ayaʼda
eʼmadoyadhuahuikaʼnayo in huadari ayaʼ berobaʼ dakhuapa
to̱e̱hueʼdik o̱ʼe̱, ijnopo̱e̱y, ken.