\id GAL
\h GÁLATAS
\toc1 Gálatas
\toc2 Gá
\mt1 GÁLATAS
\mt2 Galacia huaknopo̱e̱ʼeritaj Pabloa oʼmanigmadoyaʼuyate.
\c 1
\s Galacia huadaribayo huaknopo̱e̱ʼeritaj Pabloa oʼmanigmadoyaʼuyate.
\p
\v 1,2 Do Pablo i̱jje̱y. Opud Galacia huadaribayo
huaknopo̱e̱ʼeri moʼe̱po Diostaj aʼtionaʼpakyaʼpo
boʼkupopakikaʼnok opudomeytaj onʼnigmadoyaʼne. Ayaʼda
huaknopo̱e̱ʼeri huamaʼbuy doere o̱ʼnepo onʼnigmadoyaʼne.
Jesucristoen huadak huaʼa kamanbatiaʼpakikeʼpo Jesucristoa Apag
Dioserea menʼtaʼmonaʼuyne. Diosa Jesucristotaj kubarakyaʼ
oʼnoyhuada̱ʼuyate. Huakudakaʼda eʼbueytada oʼnoyhuada̱ʼuyate.
Huabokereka doʼtaj taʼmonahueʼ meʼnuyne.
\v 3 Apag Diosa oroʼen Huairi Jesucristoerea opudomeytaj dakaʼ
moʼmatinepahuiʼpo montihuapokikeʼ moʼmadurugpakikeʼ
kenpaʼti moʼmanoikeʼ.
\v 4 Ayaʼ huadaribayaʼ ayaʼ aratbut dakhueaʼda o̱gkikaʼ.
Konigti dakhueaʼ kikahueʼ kaʼnikeʼpo Jesucristoa oʼpakpo
oroʼen dakhueaʼ eʼkaʼtaj moʼnigbueyʼuyate. Oroʼen Apag Diosa
oʼpaknok Jesúsa moʼnigbueyʼuyate.
\v 5 “Dios huadaknada o̱ʼe̱.” “ʼUrunanada o̱ʼe̱ Dios.” Oroʼ
kiriga̱yo̱ʼ okbatikhueʼada monʼbatiaʼpakikaʼ. Dios huadaknada
o̱ʼi̱kaʼnok monʼbatiaʼpakikaʼ.
\s Kanʼnopoʼkoreʼpo nogda eʼmanmadikaʼ huaʼa ehueʼ o̱ʼe̱.
\p
\v 6 Diosa diʼ meʼe̱ʼpo, “yanʼnopoʼkoreaʼpo
meʼnoknopo̱e̱po doʼtaj menʼnigpe̱i̱katiʼ,” monaʼuyne.
Opudomey moknopo̱e̱po moʼnigpe̱e̱ʼuynigʼa oy i̱da
Jesucristoen hueretda eʼmanmadikaʼ moʼdikendepo nog
eʼmanmadikaʼkon moknopo̱e̱depo. Konig nog
eʼnoeanhuahuikaʼ eʼmanmadikaʼ moknopo̱e̱ʼdenigʼa. Kenda
nog eʼmanmadikaʼnayo noeanhuahuikahueʼdik moʼe̱ne.
Konige̱po diga̱ʼda ijmepuʼkey.
\v 7 Nog eʼmanmadikaʼ Diosere eʼmanoeanhuahuikaʼ huaʼa
ehueʼ e̱e̱ʼtada suhueʼada huabokereka namaʼda opudomeytaj
monmadikaʼnigʼa nogpaʼded eʼnoeanhuahuikaʼ huaʼa
namaʼda monmadikikaʼne.
\v 8 Aʼnounhuahuikayaʼpo kate kaʼdik moʼe̱. Oʼnonaʼuyne
doʼa. Aʼnounhuahuikayaʼpo Jesucristotaj oknopo̱e̱ʼdik
moʼe̱ne. Hueretda huadik oʼnonaʼuyne. Beʼapiʼ doʼapiʼ
Diosen huataʼmoneriapiʼ nogded eʼnoeanhuahuikaʼ huaʼa
namaʼda eʼmanmadikaʼnayo Diosa kentaj castiga diga̱ʼda
o̱gkaʼdik o̱ʼe̱a̱po.
\v 9 Konig huaboaʼda oʼnonaʼne onʼnigmadoyaʼpo onaʼti
oʼnonaʼne. Jesucristoen eʼnoeanhuahuikaʼ huaʼa
oʼnonmadikaʼuyne opudomeya̱ moʼpe̱e̱depo
moknopo̱e̱ʼuyne. Nogded eʼnounhuahuika huaʼa beʼapiʼ
eʼmanmadikaʼnayo Diosa castiga diga̱ʼda o̱gkaʼdik
oʼmaeapo, ijjay.
\p
\v 10 Kenpaʼ ijmanaʼpo aratbuttaj eʼmadurugpakaʼtaʼ pakhueʼ
i̱jje̱y. Kenpaʼti “Pablotaj ijpaki,” aratbuta eʼhuaaʼtaʼ
pakhueʼ i̱jje̱y. Diostayoʼda eʼdurugpakataʼ ijpakpo
Cristoenyoʼda ijkikaʼpo kenda huaboaʼda ijjay.
\s Cristotaj huadak huaʼa nogyo̱ nogyo̱ kamanmadikikeʼpo
Diosa Pablotaj oʼmanigtaʼmonaʼuyate.
\p
\v 11,12 Huanounhuahuikaʼ huaʼa Cristoen huadak huaʼa nogyo̱
nogyo̱ aratbuttaj ijmanmadikikaʼuy. Huanounhuahuikaʼ huaʼa
Cristoen huadak huaʼa huabokerekapiʼ onahueʼ meʼnuyne
kenpaʼti onmadikahueʼ meʼnuyne. Jesucristoayoʼda
meʼnopo̱e̱a̱ʼuyne.
Huanounhuahuikaʼ huaʼa Cristoen huadak
huaʼa meʼnopo̱e̱a̱ʼuyne. Kenda yanʼnopo̱i̱kaʼ, egomey,
pogomey.
\p
\v 13 Konig judío aratbut oʼnoknopo̱i̱kaʼpo o̱gkikaʼnig
doʼhuakon konigti ijkikaʼuy. Cristoen huaknopo̱e̱ʼeritaj
diga̱ʼda ijmagkikaʼuy. Huabakuda̱ʼ jakyo ijbakudikaʼuy kenpaʼti
kanʼbarakeʼ ijjaʼpo ijmataʼmonikaʼuy. Kenda opud Galacia
huaknopo̱e̱ʼeri onʼtipe̱i̱kaʼuyne.
\v 14 Konig oroʼen judío adhueaʼpaneʼ Diostaj
o̱gkikaʼuyatenig kenpaʼti oʼnoknopo̱i̱kaʼuyatenig dokon
huakkaʼ ijjeretpakpo dakaʼ ijkikaʼuy. Judío huabokerek do
konigok o̱ʼnepo suhueʼda onʼnopo̱e̱po suhueʼda o̱gkikaʼuy.
Donayo huakkaʼda ijnopo̱e̱po huakkaʼ ijkikaʼuy.
\v 15 Do siʼpoe̱hued e̱e̱ʼted Diosa bektieʼeaʼuyate. Huakkaʼ diʼ
meʼe̱po “Saulo, Saulo, doʼtaj oyda menigpe̱i̱katiʼ,”
menaʼuyne. Ken Diosa oʼpakpo
\v 16 Jesucristo keʼnensiʼpotaj meknopo̱e̱a̱ʼuyne. Judío
aratbut ehueʼ e̱ʼhua̱e̱ʼtaj Jesucristoen huadak huaʼa
kamanbatiaʼpakeʼpo kenpaʼti yanʼnopoʼkoreaʼ yanoknopo̱e̱ʼ
kenpaʼti yanʼnounhuahuikaʼ kamanikeʼpo Diosa Jesucristotaj
meknopo̱e̱a̱ʼuyne. Kenokaʼ kenda Diosa
meknopo̱e̱a̱ʼdeʼuyne aratbuttaj batiaʼpakhueʼ i̱jje̱ʼuy.
Jesucristotayoʼda yoknopo̱e̱po beʼtapiʼ batiaʼpakhueʼdik
i̱jje̱ʼuy.
\v 17 Kenpaʼti Jerusalényo̱ huakkurueri Jesúsen
huamataʼmoneritaj aʼmape̱e̱a̱yaʼpo kenokaʼ huahueʼ i̱jje̱po
aratbut ehueʼ e̱ʼi̱kaʼyo Arabia huadaribayo ijhuaʼuy. Diosayoʼda
buttida huaʼa Jesucristotaj meknopo̱e̱a̱ʼuyne. Nogok Damasco
huakkaʼ jakyo ijkumeʼuy.
\p
\v 18 Bapaʼ huabayok eʼpokdeʼte Pedrotaj aʼta̱ʼe̱ya̱ʼpo
Jerusalényo̱ ijhuaʼuy. Bottaʼ semana i̱jta̱e̱ʼuy Pedrotaj.
\v 19 Nog Jesúsen huamataʼmoneritaj tiahuayhueʼ
i̱jje̱ʼuynigʼa Jacobotayoʼda ijtiahuayʼuy. Jacobo Jesús
Huairien huamaʼbuy o̱ʼe̱.
\v 20 In onʼnigmadoyaʼnig buttida ijjay. Diosa buttida
meknopo̱e̱tane.
\p
\v 21 Nogok Siria huadaribayo kenpaʼti Cilicia huadaribayo
Cristoen huadak huaʼa ijmanbatiaʼpakikaʼuy.
\v 22 Huamaʼbuy Cristotaj huaknopo̱e̱ʼeri Judea huadaribayo
nogyo̱ nogyo̱ o̱gkupopakikaʼ doʼtaj o̱ki̱e̱hued o̱ʼnuy.
\v 23 Kenyoʼda doʼtaj onʼtipe̱e̱po, “Aʼnenda Pablo diga̱ʼda
mogkikaʼuyne oroʼtaj. Oy nogyo̱ nogyo̱ oʼhuaʼpo, Cristoen
huadak huaʼa oʼmanbatiaʼpakpo Cristotaj oknopo̱e̱ʼdik moʼe̱.
Oʼmanaʼikaʼ. Aʼnenda Cristoen huaknopo̱e̱ʼeritaj
eʼmadakeaʼtaʼ oʼpakikaʼuyate.” Onʼtipe̱e̱ʼuyate.
\v 24 Pablo oʼnopoʼkoreaʼpo Cristotayoʼda oknopo̱e̱ʼuy.
Konige̱po “Dakiti Dios, huadakda i̱ʼe̱ne.” Cristoen
huaknopo̱e̱ʼeria oʼnonaʼonhuahuaʼuyate.
\c 2
\s Nog Jesúsen huamataʼmoneria Pablotaj oʼdeʼuy. Pablo
Jesúsen huamataʼmoneri o̱ʼe̱deʼuyatenok oʼdeʼuy.
\p
\v 1 Catorce huabayok eʼpokdeʼte Jerusalényo̱ onteʼti ijhuaʼuy.
Bernabéere Titotaj oʼtohuaʼuy.
\v 2 Jerusalényo̱ huaʼdik i̱ʼe̱. Diosa meʼnopo̱e̱a̱ʼuynok
ijhuaʼuy. “Pablo Jesúsen huamataʼmoneri ehueʼ o̱ʼe̱. Namaʼda
oʼmanmadikaʼ.” Judío huaknopo̱e̱ʼeri huairia onahueʼ
meʼneʼpo. Jerusalényo̱ Cristotaj huaknopo̱e̱ʼeri
huairitayoʼda ijmanbatiaʼpakuy. Jesucristo Diosen Huasiʼpo
o̱ʼe̱po moʼnigbueyʼuyate. Oʼnoyhuadʼuyate. Kentaj ayaʼada
oknopo̱e̱ʼdik kenpaʼti nigpe̱i̱kaʼdik ya̱ʼne. Oʼnoknopo̱e̱po
Diosere onʼnoeonhuahuikaʼapo. Nog aratbuttaj judío aratbut
ehueʼtaj ijmanmadikaʼikay. Kenda judío huairitaj
ijmanbatiaʼpakuy.
\v 3 Kenpaʼti Tito doere o̱ʼe̱po Tito judío aratbut ehueʼ
e̱e̱ʼpiʼ “Huabokerek i̱ʼe̱po huasiʼdak oktegdik i̱ʼe̱.”
Huaknopo̱e̱ʼeri huairia Titotaj onahueʼ o̱ʼnuy.
\v 4 “Titoensiʼdak oktegdik o̱ʼe̱.” Namaʼda
huaknopo̱e̱ʼeria huamaʼbuya onaʼuynigʼa. I̱re̱gi̱re̱g
oroʼomeyere o̱gkupopakpo kenpaʼti “Jesústaj oʼnoknopo̱e̱po
huabokereksiʼdak okteghueʼdik o̱ʼne.” Oroʼa eaʼte
aʼpe̱e̱yaʼpo
o̱gkupopakuy. Pablo namaʼda oaʼ enataʼ onpakpo kenpaʼti,
“Judío ehueʼ hua̱e̱ʼeri huabokereksiʼdak oktegdik o̱ʼne
yanʼmanmadikaʼ kenpaʼti Moisésen eʼmanaʼ nigpe̱i̱kaʼdik
kaʼneʼ, yanʼmanmadikaʼ.” Namaʼda huaknopo̱e̱ʼeria oroʼtaj
enataʼ onʼpakuynigʼa.
\v 5 Namaʼda huaknopo̱e̱ʼeri huamaʼbuytaj sigpiʼ
manpe̱e̱hueʼ o̱ʼu̱y. Jesucristotaj moknopo̱e̱nok Diosere
moʼnoeanhuahuikaʼapo buttida huaʼa o̱ʼe̱ yanʼnopo̱e̱ʼ
kenpaʼti Diosere aʼnounhuahuayaʼpo huasiʼdak bakteghueʼdik
moʼe̱po kenpaʼti Moisésen eʼmanaʼ huaʼataj
nigpe̱i̱kahueʼdik moʼe̱ne. Ken buttida o̱ʼe̱ oknopo̱e̱ʼdik
moʼi̱kaʼne.
\p
\v 6 Jesucristoen huadak huaʼa dakaʼ ijnopo̱e̱po
ijmanmadikikaʼdenok Jerusalényo̱ Cristotaj
huaknopo̱e̱ʼerien huairia doʼtaj nog eʼmanmadikaʼ
manmadikaʼdik ya̱ʼe̱ onahueʼ meʼnuyne. Huairi e̱e̱ʼpiʼ
huairi ehuepiʼ Dios eʼnopo̱e̱ʼtaʼ pakhueʼ o̱ʼi̱kaʼ. Doʼhuakon
kenpaʼ eʼnopo̱e̱ʼtaʼ pakhueʼ i̱jje̱y.
\v 7 Nogdikda yamanmadikaʼ hueretda judío huaknopo̱e̱ʼeri
huairia onahueʼ meʼnuyne. Judío aratbut ehueʼ e̱ʼhua̱e̱ʼtaj
Jesúsen huadak huaʼa kamanbatiaʼpakeʼpo Diosa do Pablotaj
oʼtaʼmonaʼuyate onʼnokotuyate. Konigti judío aratbuttaj
Jesúsen huadak huaʼa kamanbatiaʼpakikeʼpo Diosa Pedrotaj
oʼtaʼmonaʼuyate. Judío huaknopo̱e̱ʼeri huairia
onʼnopo̱e̱ʼuyate.
\v 8 Ken Diosa judío aratbuttaj oʼtaʼmonaʼuyate Pedrotaj.
Konigti kenda Dios judío aratbut ehueʼ e̱ʼhua̱e̱ʼtaj doʼtaj
meʼtaʼmonaʼuyne. Jesúsen huadak huaʼa huakkaʼ aratbuttaj
kamanbatiaʼpakikeʼpo meʼtaʼmonaʼuyne.
\p
\v 9 Konige̱po Jacobo Pedroere Juanere huaknopo̱e̱ʼerien
hueretda huairi o̱ʼnepo Diosa Pablotaj oʼtaʼmonaʼuy kenpaʼti
huakkaʼtada kamanopoʼkoreʼpo Diosa beʼtihuapokuyne
Jacoboomey onʼnopoenkaʼdepo “Jesucristotaj oknopo̱e̱po,
huamaʼbuy o̱ʼe̱y kenpaʼti oroʼtakon Diosa
moʼtaʼmonaʼuyne.” Doʼtaj Bernabétere monaʼpo kenpaʼti
“Nog aratbuttaj judío ehueʼ e̱ʼhua̱e̱ʼtaj Jesucristotaj
yanoknopo̱e̱ʼ kenpaʼti yanʼnopoʼkoreaʼ yanʼmanaʼ.
Oroʼomey judío aratbuttaj konigti oʼmanaʼapoy.” Oroʼtaj
monaʼpo,
\v 10 “Aratbut paiʼda e̱ʼi̱kaʼtaj bayokikaʼdik yaneʼ.
Kenpaʼti nog aratbuttaj yanʼmanaʼ.” Jacoboomeya̱
monaʼuyne. Kenda huakkaʼ eʼkikaʼtaʼ ijpakikay.
\s Antioquía huakkaʼ jakyaʼ “Namaʼda iʼkameʼne, Pedro.”
Pabloa onaʼuy.
\p
\v 11 Nogok Antioquíayo Pedro oʼtiakdepo dakhueaʼda
oʼkaʼuynok, “Namaʼda iʼkameʼne, Pedro.” Huakpoteda
onaʼuyne.
\v 12 Sueʼda judío huabokerektaj Jacoboa Pedrote
oʼmataʼmonaʼuyate. Huabokerek tiakhued o̱ʼnepo Pedro judío
ehueʼ huaknopo̱e̱ʼeriere oʼbapeʼikaʼuyate. Enhuatiakdeʼte
judío ehueʼ huaknopo̱e̱ʼeriere Pedro sigda sigda eʼbapeʼada
oʼbakbatikonhuaʼpo. Judío huabokerek onhuatiakdepo
huabokereksiʼdak baktega̱ʼdik o̱ʼne onʼmanopo̱i̱kaʼuy.
Kenomeytaj Pedro oʼmakmeʼpukpo judío ehueʼ
huaknopo̱e̱ʼeriere eʼbapeʼada oʼbakbatikuy.
\v 13 Pedroa huadakda ijkikay namaʼda huataʼda oʼtinopo̱e̱po
namaʼda oʼkaʼuy. Antioquíayaʼ nog judío huaknopo̱e̱ʼeri
Pedrotaj onʼtiahuayonhuaʼpo konigti o̱gkaʼpo huadak oʼkikay
namaʼda huataʼda onʼtinopo̱e̱nigʼa kenomeya̱ konigti
namaʼda o̱gkaʼuy. Bernabékon oʼtiahuayonhuaʼpo kenpaʼti
namaʼda oʼnopoenigʼa judío ehueʼ huaknopo̱e̱ʼeriere
oʼbapeʼpo oʼbakbatikuy.
\v 14 Jesucristoen buttida huaʼa Pedroomey
oʼnoknopo̱e̱nigʼa namaʼda o̱gkikameʼnigtaj doʼhua
yoknokotdepo ayaʼ huaknopo̱e̱ʼeritaj “Judío e̱ʼe̱a̱da konig
judío ehueʼ hua̱e̱ʼeri iʼkikameʼ. Konig Diosere
aʼnoeanhuahuikayaʼpo Moisésen huaʼa kikahueʼ i̱ʼe̱meʼ.
Diosere aʼnoeanhuahuikayaʼpo Moisésen huaʼa kikaʼdik moʼe̱.
¿Judío ehueʼ aratbuttaj menaʼpo iʼmanameʼ? Namaʼda
iʼkameʼ.” Pedrotaj yonaʼuy.
\s Judío konigti nog aratbut Jesucristotaj oknopo̱e̱ʼdik
o̱ʼne. Jesucristotaj eknopo̱e̱ʼnayo Diosa dakhueaʼ eʼkaʼtaj
oʼbakkahueaʼpo Diosere oʼmanoeanhuahuikaʼapo.
\p
\v 15 Oroʼomey judío hua̱e̱ʼeri o̱ʼe̱po judío e̱ʼhua̱e̱yaʼ
oʼsiʼpoe̱ʼuy. Huadakda oʼkikaʼpo Moisésen huaʼa kikahueʼ
o̱ʼnepo dakhueaʼda o̱gkikaʼ oʼnopo̱e̱ne.
\v 16 Moisésen huaʼa eʼkikaʼnayo “Dakhueaʼ nigkahueʼ
meʼnene ijnopo̱e̱po.” Kenda Diosa onahueʼ moʼe̱a̱pone.
Kenyoʼda Jesucristotaj eʼnoknopo̱e̱ʼnayo “Dakhueaʼ
nigkahueʼ meʼnene, ijnopo̱e̱po.” Diosa monaʼapone.
Konige̱po “Dakhueaʼ nigkahueʼ meʼnene ijnopo̱e̱po.”
Diosa moneʼpo oroʼ judío hua̱e̱ʼeri kenpaʼti Jesucristotaj
oknopo̱e̱ʼdik o̱ʼe̱ne. Moisésen huaʼataj oʼkikaʼnok
“Dakhueaʼ nigkahueʼ meʼnene, ijnopo̱e̱po.” Diosa
onahueʼdik moʼe̱a̱pone. Konige̱po beʼapiʼ Moisésen huaʼa
eʼkikaʼnayo “Dakhueaʼ nigkahueʼ meʼnene ijnopo̱e̱po,”
Diosa onahueʼdik o̱ʼe̱a̱po.
\p
\v 17 Ken “Dakhueaʼ nigkahueʼ meʼnene, ijnopo̱e̱po.”
Diosa moneʼ oroʼ Cristotaj oknopo̱e̱denok konig judío ehueʼ
hua̱e̱ʼeri Moisésen huaʼataj nigpe̱e̱hueʼ o̱ʼnikaʼpo
oroʼomey dakhueʼ huakaʼerionig Cristoa
mogkaʼne beʼapiʼ
sigpiʼ ahueʼdik o̱ʼne.
\v 18 Konig dakhueaʼ nigkahueʼ meʼnene, Diosa
kaʼnopo̱e̱ʼpo Moisésen huaʼataj nigpe̱e̱hueʼdik moʼi̱kaʼne,
doʼa eʼmanaʼnayo kenpaʼti nogok konig dakhueaʼ nigkahueʼ
meʼnene, Dios kaʼnopo̱e̱ʼpo Moisésen huaʼataj nigpe̱e̱dik
moʼi̱kaʼapone doa nogpaʼdakon eʼmanaʼnayo dakhueaʼ
iʼkaʼne Diosa onaʼdik meʼe̱ne.
\v 19 “Konig dakhueaʼ nigkahueʼ meʼnene,
meʼtinopo̱e̱po.” Diosa meneʼpo Moisésen huaʼataj
nigpe̱i̱kahueʼdik i̱ji̱kaʼpo konig Moisésen huaʼataj konig
eʼbueyonig i̱jje̱po Moisésen huaʼataj menpaʼ
nigpe̱i̱kahueʼdik i̱jje̱ʼuynigʼa Jesucristotayoʼda
yoknopo̱i̱kaʼpo Diosen ʼuruʼnanada kikaʼdik i̱jje̱y.
\v 20 Jesucristo hue̱ypa cruzte oʼbueyʼuyate. Do Diostaj
eʼnopoʼkoreadeʼte konig Jesúsere cruzte eʼbueyonig i̱jje̱po
onteʼti dakhueaʼ kikahueʼ i̱jjeonhuahuikay. Doʼhuada katepiʼ
ijpakpo kikahueʼ i̱ji̱kaʼpo Jesucristoen Noki̱re̱ga̱
meʼnopoʼto̱e̱nok Diosenyoʼda ijkikay. Hua̱so̱ʼa̱da ijnoepo
Diosensiʼpotaj yoknopo̱e̱po ijnigpe̱i̱kaʼpo Diosen ijkikay.
Diosensiʼpo doʼtaj huakkaʼ diʼnada meʼe̱po meʼnigbueyʼuyate.
\v 21 Diosa huakkaʼ diʼnanada moʼe̱po oroʼtehuapaʼ Jesucristoa
moʼnigbueyʼuyne, Diosere ʼurunanada aʼnoeonhuahuikayaʼpo
Jesústayoʼda oknopo̱e̱ʼdik o̱ʼe̱ne. “Dakhueaʼ nigkahueʼ
o̱ʼe̱ne meʼtinopo̱e̱po.” Diosa menaye̱t Moisésen
huaʼataj do nigpe̱i̱kaʼdik e̱e̱ʼnayo Cristo namaʼda
moʼnigbueyaʼuyet. Konige̱po Moisésen huaʼataj
nigpe̱i̱kahueʼ i̱ji̱kaʼapoy. Jesucristotayoʼda
yoknopo̱i̱kaʼapoy.
\c 3
\s Moisésen huaʼa eʼkikaʼnayo “Dakhueaʼ nigkahueʼ
meʼnene, moʼtinopo̱e̱po.” Kennayo Diosa onahueʼdik
moʼe̱a̱pone. Cristotaj eknopo̱e̱ʼnayo “Dakhueaʼ nigkahueʼ
meʼnene, moʼtinopo̱e̱po.” Kennayo Diosa monaʼapone.
\p
\v 1 Opud Galacia huaknopo̱e̱ʼeri konig nopoenkahueʼ
hua̱e̱ʼeri moʼe̱ne. Nogomeya̱ namaʼda monʼmandikaʼnok
opudomey i̱da moʼpe̱e̱demeʼnigʼa, Jesústaj buttida
eʼmanmadikaʼ nigpe̱e̱hueʼdik yaneʼ, namaʼda
moʼnopo̱e̱a̱meʼne. Jesucristoa oroʼtaj hue̱ypa cruzte
moʼnigbueyʼuyate opudtaj huakpoteda dakaʼ
oʼnonbatiaʼpakʼuynok opuda̱ dakaʼ moʼpe̱e̱po
moknopoenkaʼuyne.
\v 2 Moisésen huaʼa moʼnigpe̱i̱kaʼuynok Diosen Noki̱re̱ga̱
opudtaj nopoʼto̱e̱hueʼ moʼu̱yne. Cristo cruzte
moʼnigbueyʼuyate onteʼti oʼnoyhuadʼuypo kurudyo̱ Diosere
oʼnoeonhuahuikaʼ. Kenda moʼpe̱e̱depo moknopo̱e̱ʼuynok
Diosen Noki̱re̱ga̱ opudtaj moʼnopoʼto̱i̱kaʼne.
\v 3 Aʼnenmon huaboaʼda Jesucristotaj moknopo̱e̱deʼuynok
Diosen Noki̱re̱ga̱ moʼnopoʼto̱i̱kaʼne Diostaj dakaʼ
moʼnigpe̱i̱kaʼuyne. Oy ʼuruʼnopoaʼda megkeʼpo nogda nogda
kaʼdik o̱ʼe̱ne, konig huabokereksiʼdak oktegdik o̱ʼe̱ne
kenpaʼnayo namaʼda moʼnopo̱i̱kaʼnigʼa Diosennayo
nopounkahueʼda moʼi̱kaʼne.
\v 4 Jesucristotaj moknopo̱e̱po huakkaʼda paiʼda
moʼnopoʼeonhuahuaʼdemeʼne. Namaʼda paiʼda nopoʼe̱hueʼ
moʼunhuahuameʼne ijnopo̱e̱y doʼhua. Jesucristotaj buttiaʼda
moknopo̱e̱ne, oknopo̱e̱batikhueʼ moʼe̱a̱pone ijnopo̱e̱y.
\v 5 Moisésen huaʼa moʼnigpe̱i̱kaʼnok Diosen Noki̱re̱ga̱
nopoʼto̱e̱hueʼ moʼi̱kaʼne kenpaʼti opudomeytaj bayareahueʼ
moʼi̱kaʼne. Jesucristotaj huadak huaʼa moʼpe̱e̱depo
moknopo̱e̱ʼuynok Diosen Noki̱re̱ga̱ moʼnopoʼto̱i̱kaʼne
kenpaʼti opudomeytaj moʼbayarikaʼne.
\p
\v 6 Ken, aʼnennada Diosen huaʼataj Abrahama
oknopo̱e̱ʼuynok “Konig dakhueaʼ nigkahueʼ meʼe̱ne,
oʼtinopo̱e̱po.” Diosa Abrahamtaj onaʼuyate.
\v 7 Konige̱po huabokerek Diosen huaʼataj dakaʼ
oʼnoknopo̱e̱po konigti Abrahamen hueretda huayayonig
o̱ʼnepo kenda nopoenkaʼdik moʼe̱ne.
\v 8 “Konig dakhueaʼ nigkahueʼ meʼnene,
moʼtinopo̱e̱po.” Judío ehueʼ hua̱e̱ʼeri huaknopo̱e̱ʼeritaj
ijmanaʼapoy, Diosa aʼnennada oʼnopo̱e̱po Abrahamtaj
“Meknopo̱e̱nok kenpaʼti menigpe̱i̱kaʼnok, konige̱po
huakkaʼ judío ehueʼ hua̱e̱ʼeria konigti eʼnoknopo̱e̱deʼte
‘Konig dakhueaʼ nigkahueʼ meʼnene, moʼtinopo̱e̱ʼpo,’
kenomeytaj ijmanaʼapoy.” Aʼnenda Diosa Abrahamtaj
onaʼuyate. Apagbaʼte kenda oaʼuynig Moisésa
oʼtimadoyaʼuyate.
\v 9 Ken Diosen huaʼataj Abraham oknopo̱e̱ʼuyate. Ayaʼda
huabokerek konigti oʼnoknopo̱e̱nok kenomeytaj
Abrahamtaere “Dakhueaʼ nigkahueʼ meʼnene,
moʼtinopo̱e̱po.” Diosa oʼmanaʼikaʼapo.
\p
\v 10 “Ayaʼ huadik Moisésa oʼnigmadoyaʼuyate ayaʼada
nigpe̱i̱kaʼdik o̱ʼnepo nogdiktida nigpe̱e̱hueʼ e̱e̱ʼnayo
‘Dakhueaʼ bokaʼne.’ Diosa oʼmanaʼpo castiga oʼmagkaʼapo.”
Apagbaʼa oaʼuyatenok. Moisésen huaʼa do eʼnigpe̱i̱kaʼnayo
“Dakhueaʼ nigkahueʼ meʼnene, meʼtinopo̱e̱po.” Diosa
menaʼapet. Ayaʼada kenpaʼ enʼnopo̱i̱kaʼnayo “Dakhueaʼ
bokaʼne.” Diosa monaʼpo castiga mogkaʼapone.
\v 11 “Diostehuapaʼ huadak huakikaʼeri Jesucristotaj
oʼnoknopo̱e̱po Diosere onʼnoeonhuahuikaʼapo.” Diosa
oaʼuynok Moisésenbaʼ huakikaʼeritaj “dakhueaʼ nigkahueʼ
menʼe̱ne,” Diosa onahueʼdik o̱ʼe̱a̱po.
\v 12 “Dakhueaʼ nigkahueʼ meʼe̱ne, meʼtinopo̱e̱po.” Diosa
moneʼpo Diostaj oknopo̱e̱ʼdik moʼe̱ne. Moisésen
huaʼanayo kenpaʼ onahueʼ moʼe̱ne. “Diosere
aʼnounhuahuikayaʼpo ayaʼnada Moisésen huaʼa nigpe̱i̱kaʼdik
moʼe̱.” Kenpaʼ Moisésen huaʼa enaʼtada ayaʼnada
nigpe̱i̱kahueʼdik moʼi̱kaʼne.
\p
\v 13 “Paiʼnanada kanʼnopoʼunhueʼpo dakhueaʼnanada
huakikaʼeritaj hue̱ypa cruzte onʼbetikaʼ.” Apagbaʼa kenpaʼ
oaʼ. Oroʼtehuapaʼ Cristo hue̱ypa cruzte moʼnigbueyʼuyatenok
oroʼomey Cristoen huaknopo̱e̱ʼeritaj castiga o̱gkahueʼdik
moʼe̱a̱pone. Kenpaʼda bueyhueʼdik o̱ʼe̱a̱pone.
\v 14 “O̱ʼnen adhueaʼsiʼpotaj ijmanopoʼto̱e̱a̱poy.” Diosa
Abrahamtaj onaʼuyate. Nog aratbut huaknopo̱e̱ʼeritakon
Diosen Noki̱re̱ga̱ kamato̱i̱keʼpo Jesucristo
moʼnigbueyʼuyate.
\s Moisésen huaʼa konig o̱ʼe̱ kenpaʼti
kenda Abrahamtaj ijnigkaʼapoy Diosa onaʼuyate.
\p
\v 15 Konig oʼkikaʼnig ijmanbatiaʼpakapoy, egomey,
pogomey. “Aʼti oʼnigkaʼapone.” Beʼapiʼ oʼmadoyaʼdepo
keʼnen huadik oʼmadoyaʼdepo nogda kahueʼdik o̱ʼe̱a̱po kenpaʼti
kenda oktihuekehueʼdik o̱ʼe̱a̱po.
\v 16 Oʼnigkaʼapone Diosa Abrahamtaj nogok nogok
onaʼikaʼuyate. O̱ʼnen huayayotaj ijnigkaʼapoy Diosa onaʼuyate.
Kenda Abrahamen ayaʼ huayayotaj ijmanigkaʼapoy onahueʼ
o̱ʼu̱yate. Kenda Abrahamen noghuayayotatida ijnigkaʼapoy,
onaʼuyate. Kenda Cristotaj oʼtiaʼpakuyate.
\v 17 Onteʼti dakaʼ oʼnonapone. Huakkuruda Diosa Abrahamtaj
onaʼuyate. O̱ʼnen huayayotaj ʼuruda ijnigkaʼapoy Diosa
onaʼuyate. Diosa kenda enadeʼte cuatrocientos treinta huabayok
eʼpokdeʼte judío aratbuttaj Diosen huaʼa Moisésa
oʼmanaʼuyate. Kenda Diosa huakkuruda Abrahamtaj
onaʼuyatenigda kenpaʼda Diosa oʼkaʼapo. Kenda Moisésa
oʼmanaʼuyatenig Abrahamtaj Diosa enaʼ dikenhueʼdik o̱ʼe̱po
kenda oʼkaʼapo.
\v 18 Moisésen huaʼa o̱ʼnen adhueaʼ huayayo
enʼnigpe̱i̱kaʼnayo ijmanoeanhuahuikaʼapoy Diosa
Abrahamtaj onahueʼ o̱ʼu̱yate. “Ijnoeanhuahuikaʼapoy,”
Abrahamtaj Diosa onaʼuyatepo katetehueʼ manoeanhuahuikaʼdik
oʼmaikaʼapone.
\p
\v 19 Moisésenbaʼtaj aratbuta nigpe̱i̱kahueʼdik o̱ʼnepo
dakhueaʼda o̱gkikaʼnig kamanopo̱e̱gkikeʼpo judío aratbuttaj
Diosen huaʼa Moisésa oʼmanaʼuyate. Konig Diosa Abrahamtaj
onaʼuyatenig adhueaʼ huayayo Jesucristo oʼtiakapo. Tiakhued
e̱e̱ʼted Moisésen huaʼa aratbut nigpe̱i̱kaʼdik yaneʼ
oʼmanaʼuyate. Cristo eʼtiakdeʼuyte onteʼti Moisésenbaʼtaj
nigpe̱i̱kahueʼdik o̱ʼneapo. Diosen huataʼmoneria Moiséstaj
oʼnopo̱e̱a̱ʼuyate. Diosa kenda oʼpaknok Moisésa aratbuttaj
oʼmanaʼuyate.
\v 20 Diosen huataʼmoneri Moisésere judío aratbuttaj
onʼmanaʼuyate. Diosayoʼda huayayo iʼta̱e̱a̱pone Abrahamtaj
onaʼpo, Jesucristotaj oʼtaʼmonaʼuyate.
\s Ayaʼada dakhueaʼ huakaʼeri o̱ʼe̱dene, Moisésenbaʼ
moʼnopo̱e̱a̱ʼne. Kenpaʼti Cristo tiakhued e̱e̱ʼted Moisésen
huaʼa oroʼomeytaj konig huamato̱e̱ʼerioniga̱
moʼto̱i̱kaʼuyne.
\p
\v 21 Diosa Abrahamtaj huayayo oʼyokapone onaʼuyate.
Moisésenbaʼ Abrahamtaj huaʼa enʼhueʼdik o̱ʼe̱. Abrahamtaj
huaʼa kenpaʼti Moisésen huaʼa huadaknada e̱ʼe̱a̱da
Moisésenbaʼnayo manoeanhuahuikahueʼdik o̱ʼe̱po kenpaʼti
ʼurunopoʼ kahueʼdik o̱ʼi̱kaʼ.
\v 22 Ayaʼada dakhueaʼda o̱gkikaʼdepo batikhueʼda dakhueaʼda
o̱gkikaʼapo. Kenpaʼ Diosbaʼa oaʼuyatenigʼa konig Diosa
Abrahamtaj onaʼuyatenig Jesucristotaj huaknopo̱e̱ʼeriomeytaj
Diosa moʼmanopoʼkoreaʼpo moʼnoeanhuahuikaʼapone.
\p
\v 23 Cristoen huadak huaʼa pe̱e̱hued o̱ʼe̱po Jesucristotaj
oknopo̱e̱hued o̱ʼe̱po oroʼ kenyoʼda Moisésenbaʼtaj
nigpe̱i̱kaʼdik o̱ʼu̱ynigʼa. Cristo eʼtiakdeʼte Diosa dakhueaʼ
eʼkaʼ moʼnopoʼyareʼpo Cristotaj oknopo̱e̱ʼuy oroa.
\v 24 Cristo tiakhued e̱e̱ʼted Moisésenbaa konig oroʼen
huamato̱e̱ʼerionig moʼto̱i̱kaʼuyne. Jesucristo eʼtiakdeʼte
kentaj oknopo̱e̱denok “dakhueaʼ nigkahueʼ meʼnene,
moʼtinopo̱e̱depo,” Diosa monaʼuyne.
\v 25 Cristo oʼtiakdeuynok oynayo kentaj oknopo̱i̱kaʼnok
Moisésenbaa oroʼtaj to̱e̱hueʼ o̱ʼi̱kaʼ. Oynayo
Moisésenbaʼtaj nigpe̱i̱kahueʼdik o̱ʼi̱kaʼne.
\p
\v 26 Oyda Jesucristotaj moknopo̱e̱po Diosensiʼpo moʼe̱ne.
Ayaʼada moknopo̱e̱po Jesucristoere Diosensiʼpoda moʼe̱ne.
\v 27 Opudomey Jesucristotaj moknopo̱e̱denok bautiza
mogkaʼdeʼuyne. Cristoa moʼnopoʼto̱i̱kaʼnok Jesucristonig
moʼi̱kaʼpo Diosensiʼpo moʼi̱kaʼne.
\v 28 Oroʼ Jesucristotaj huaknopo̱e̱ʼeri o̱ʼe̱po Diostaj konig
nogaratbuttida o̱ʼe̱ne. Judío aratbut e̱e̱ʼpiʼ, griego aratbut
e̱e̱ʼpiʼ, huanabaʼ e̱e̱ʼpiʼ, huanabaʼ ehueʼ e̱e̱ʼpiʼ, huabokerek
e̱e̱ʼpiʼ, ettoneʼ e̱e̱ʼpiʼ, oroʼomey huaknopo̱e̱ʼeri Diostaj
nogaratbuttida o̱ʼe̱ne.
\v 29 Abrahamtehuapaʼ ijnigkaʼapoy Diosa onaʼuyatenig
konigti opudomey huaknopo̱e̱ʼeritakon Diosa mogkaʼapopo
moʼnoeanhuahuikaʼapone.
\c 4
\p
\v 1,2 Nogi̱ti dakaʼda oʼnonaʼapone. Huasiʼpo kerekhued
e̱e̱ʼted huaoen eʼtamaeʼ huabaeʼeri e̱e̱ʼpiʼ konig
huanabaʼ o̱ʼe̱po huaoen huatamato̱e̱ʼeritaj nigpe̱i̱kaʼdik
o̱ʼne. Kenokaʼ baeʼdik huaoa oʼdikkaʼuyatenok ayaʼda
huaojkudaken oʼtabaeapo.
\v 3 Oroʼ konigti o̱ʼi̱kaʼuy. Cristo tiakhued e̱e̱ʼted oroʼ
konig huasiʼpo o̱ʼe̱po konig huabokerek ehued o̱ʼu̱y.
Oroʼen adhueaʼpaneʼen eʼmanmadikaʼtaj konig huanabaʼ
oʼnigpe̱i̱kaʼuyne.
\v 4 Kenmeʼnoete Diosa oʼpakpo keʼnen huasiʼpo
oʼtaʼmonaʼuyate. Ettoneʼa̱ Diosen Huasiʼpo oʼsiʼpopakuyate.
Huasiʼpo judío aratbutda oʼsiʼpoe̱po Moisésenbaʼtaj
nigpe̱i̱kaʼdik o̱ʼi̱kaʼuyate.
\v 5 Oroʼ judío hua̱e̱ʼeriomey huanabaʼonig o̱ʼe̱po
Moisésenbaʼtaj nigpe̱i̱kaʼdik o̱ʼi̱kaʼuyate. Moisésenbaʼtaj
aʼbakkayyaʼpo osiʼpoe̱ʼuyate. Kenpaʼti oroʼomey Diosensiʼpo
kaʼnikeʼpo osiʼpoe̱ʼuyate.
\p
\v 6 Oroʼomey huaknopo̱e̱ʼeri Diosensiʼpo o̱ʼe̱denok Diosa
oroʼomeytaj Huasiʼpoen Noki̱re̱ga̱ moʼnopoʼto̱e̱ne,
“Doʼhued Apag” Diostaj Cristoen Noki̱re̱ga̱ oroʼennopoyaʼ
oʼokuy.
\v 7 Ken Diosensiʼpo o̱ʼe̱depo Moisésenbaʼtaj nigpe̱i̱kaʼdik
hua̱e̱ʼeri huanabaʼ ehueʼ o̱ʼe̱depo Jesucristotaj
moknopo̱e̱nok. “Konig dakhueaʼ nigkahueʼ meʼnene,
moʼtinopo̱e̱po,” Diosa monaʼpo moʼnoeanhuahuikaʼapone.
\s Galacia huaknopo̱e̱ʼeritaj Pabloa oʼmatinepahuiʼpo
oʼmatimepuʼkeʼuyate.
\p
\v 8 Aʼnenda huerettaʼda Diostaj oknopo̱e̱hued e̱e̱ʼted
totoʼtaj moʼmeʼpukikaʼuyate.
\v 9 Oynayo Diostaj moknopo̱e̱dene kenpaʼti Diosa
moʼbaktieʼeaʼdeʼuyne.
Konig judío adhueaʼpaneʼ
o̱gkikaʼuynig menaʼpo konig huanabaʼ onteʼti eʼkikaʼtaʼ
boʼpaknigʼa. Ken konig eʼkikaʼnayo nopoʼyareahueʼdik
moʼi̱kaʼapone.
\v 10 Diosa moʼnopoʼyareʼpo menaʼpo ayaʼ Moisésenbaʼ fiesta
boʼkikaʼnigʼa huameʼnoe fiesta, sábado fiesta, puug fiesta
huabayok fiesta kenpaʼ boʼkikaʼnigʼa, Diosa meʼnopoʼyareʼpo
namaʼda boʼkikaʼne.
\v 11 Konige̱po opudtaj onʼmatinepahuiʼpo
onʼtomepuʼkene, huakkaʼaʼda namaʼda opudtaj
oʼnonmadikaʼonhuahuaʼuyne.
\p
\v 12 Ken “Dakhueaʼ nigkahueʼ meʼnene, moʼtinopo̱e̱po.”
Diosa moneʼpo Moisésenbaʼ nigpe̱i̱kaʼdik moʼe̱ne. Judío
aratbuta namaʼda monaʼikaʼnigʼa. Konig judíomey
o̱gkikaʼnig opud konig kikahueʼ moʼu̱yne. Opudonigti
i̱jje̱po oy kenda judíomey onʼmanaʼikaʼ kahueʼ i̱ji̱kay.
Konig do ijkikaʼnig konigti ya̱gʼkikatiʼ. Kenda
ijjeretpakpo oʼnonaʼne, egomey pogomey. Aʼnenda opudere
e̱e̱ʼte doʼtaj diʼnada o̱ʼnepo dakaʼ onʼto̱e̱ʼuyne.
\v 13 Aʼnenda opudere dakhueʼda i̱jje̱po Jesucristotaj
huaknopo̱e̱ʼeri Diosere onʼnoeonhuahuikaʼapo kenda
huakkuruda opudtaj oʼnonbatiaʼpakonhuaʼuyne.
\v 14 Do dakhueʼda e̱e̱ʼpiʼ konig paiʼda eʼnopoʼe̱tepiʼ doʼtaj
dig huahuayhueʼ o̱ʼnuyne kenpaʼti tibiraehueʼ o̱ʼnuyne.
Konig
Diosen huataʼmoneritaj e̱gkapaʼ doʼtaj oʼdeʼuyne.
Konig Jesucristotanig doʼtaj oʼdeʼuyne.
\v 15 Aʼnenda Jesucristoen huadak huaʼa
oʼnonmadikaʼonhuahuaʼuyne. Doʼhua eʼnonmadikaʼonhuahuaʼte
durugnada moʼu̱yne. Doʼtaj durugnada moʼu̱yne. Oy menaʼpo
doʼtaj durugda ehueʼ moʼe̱. Aʼnenda katepiʼ ijpakikaʼuynok
onʼyokikaʼuyne. Doʼa opuden huakpo eʼpakuynayo opuda̱
okpotokdik e̱e̱ʼnayo opuden huakpo onʼyokayʼuyyet. Oyda menpaʼ
doʼtaj eʼnigpe̱e̱taʼ pakhueʼ moʼe̱ne.
\v 16 Oy buttida oʼnonmadikaʼpo opudomeytaj meʼhuadiayne,
menpaʼ moʼnopo̱e̱.
\p
\v 17 Judío namaʼda huamanmadikaʼeriomey konig judío
aratbut Moisésenbaʼ o̱gkikaʼnig opudomey konigti
ka̱gkikeʼpo namaʼda boʼpakne. Kenpaʼti kenomey opudtaj
huakkaʼ onʼeretpakpo opudomeya̱ onteʼti doʼtaj nigpe̱e̱hueʼ
kaʼnikeʼpo kenda onʼpak.
\v 18 Beʼapiʼ opudtaj huadak eʼkikaʼtaʼ eʼpaknayo opudtaj
eʼtihuapoktaʼ eʼpaknayopiʼ kenda huadakda o̱ʼe̱. Do opudere
e̱e̱ʼte opudere ehueʼ e̱e̱ʼtepiʼ huadak eʼkikaʼtaʼ eʼpaknayo
kenda huadakda o̱ʼe̱.
\v 19 Doʼhua Jesucristoen huadak huaʼa opudtaj aʼnen
eʼmanmadikaʼonhuahuaʼdeʼte moknopo̱e̱ʼuynok doʼhued
huasiʼponig moʼe̱ne. Oy onteʼti opudtaj diga̱ʼ
onʼtinepahuiʼpo onʼtomepuʼkene. Cristoa onteʼti dakaʼ
moʼmanopoʼto̱e̱deapet opudtaj huakkaʼ onʼtinepahuikaʼne.
\v 20 Huakkaʼ opudtaj onʼtinepahuiʼpo a̱yo̱ opudere huakkaʼ
e̱e̱ʼtaʼ ijpaki. Nogpaʼda ʼuruaʼdakon opudtaj eʼmanataʼ
ijpaki. Monig moet opudomeytaj tinopo̱e̱hueʼ i̱jje̱y.
\s Agarkudak konig oʼkikaʼuyate kenpaʼti Sarakudak konig
oʼkikaʼuyate Pabloa oʼmanbatiaʼpakpo, oʼmanmadikaʼuyate.
\p
\v 21 “Dakhueaʼ nigkahueʼ moʼe̱ne moʼtinopo̱e̱po.” Diosa
moneʼ. Opudomeya̱ sueʼada Moisésenbaʼtaj eʼnigpe̱i̱kataʼ
boʼpakikaʼnigʼa Moisésenbaʼtaj nopoenkahueʼda moʼe̱ne.
\v 22 Moisésenbaʼ sigpiʼ eʼmanopo̱e̱a̱ʼtaʼ ijpaki. Abraham
bottaʼsiʼpo oʼto̱e̱ʼuyate. Agarkudak ettoneʼ huanabaʼ o̱ʼe̱po
nogsiʼpotida Abrahamensiʼpo oʼsiʼpopakuyate. Abrahamen
hueretda hua̱to̱e̱ Sarakudak o̱ʼe̱po huanabaʼ ehueʼ o̱ʼe̱po
nogsiʼpotida oʼsiʼpopakuyate. Apagbaʼte kenpaʼ oʼmadoyaʼuyate.
\v 23 Saraen huanabaʼ ettoneʼa̱ oʼsiʼpopakuyate. Konig ayaʼ
ettoneʼ onʼsiʼpopakikaʼnig Agar konigti oʼsiʼpopakuyate.
“Huasiʼpo iʼto̱e̱a̱pone.” Diosa Abrahamtaj onaʼuyatenok
Abrahamen hueretda hua̱to̱e̱nayo konig huanabaʼ ehueʼ
e̱ʼe̱a̱da oʼsiʼpopakuyate. “Huasiʼpo iʼto̱e̱a̱pone.” Diosa
onaʼnok oʼsiʼpopakuy.
\v 24,25 Abrahamen bottaʼ hua̱to̱e̱ konig bottaʼ Diosen huaʼa
o̱ʼne. Oteʼ Sinaíte Arabia huadaribayo Diosa Moiséstaj
onaʼuyate. Konig Agar huasiʼpoere huanabaʼ o̱ʼnikaʼnig ayaʼ
Moisésenbaʼ huanigpe̱i̱kaʼeri konigti huanabaʼ o̱ʼnikaʼ.
Kenpaʼti Jerusalényo̱ hua̱i̱kaʼeri aʼnoeonhuahuikayaʼpo
Moisésenbaʼ onʼnigpe̱i̱kaʼnigʼa huanabaʼnig o̱ʼnikaʼ.
\p
\v 26 Oroʼomey huaknopo̱e̱ʼerinayo Diosen jak kurudyo̱
hua̱e̱ʼeri o̱ʼi̱kaʼpo Diosensiʼpo o̱ʼe̱ne.
Aʼnounhuahuikayaʼpo Jesucristotayoʼda oknopo̱i̱kaʼne.
Moisésenbaʼtaj nigpe̱i̱kahueʼdik o̱ʼi̱kaʼne.
\q
\v 27 Siʼpopakhueʼdik i̱ʼe̱po huasiʼpo to̱e̱hueʼ i̱ʼe̱po
yadurugpak, ettoneʼ. Siʼpopakhueʼ i̱ʼe̱po diga̱ʼ noehueʼ
i̱ʼe̱po nogok huakkaʼ huasiʼpo iʼta̱e̱a̱po. Huakkaʼ
huaknopo̱e̱ʼeri huasiʼpo iʼmato̱e̱a̱pone. Nog ettoneʼ
hua̱to̱e̱bet e̱ʼe̱a̱da sueʼda huasiʼpo oʼto̱e̱a̱po. Apagbaʼa
kenpaʼ oaʼ. Saraen huakkaʼnada adhueaʼsiʼpo o̱ʼta̱e̱. Agaren
sueʼda oʼto̱e̱.
\p
\v 28 Ken oroʼomey Jesucristoen huaknopo̱e̱ʼeri konig
Diosensiʼpo o̱ʼe̱ne. “Huasiʼpo iʼta̱e̱a̱po.” Diosa Abrahamtaj
onaʼuyatenok, Abraham Isaacsiʼpo o̱ʼta̱e̱ʼuyate. Oroʼomey
konig Saraensiʼpo Isaac o̱ʼe̱ne. Ken Diosa Abrahamtaj
onaʼuyatenok oroʼkon huaknopo̱e̱ʼeri Diosensiʼpo o̱ʼe̱ne
egomey pogomey.
\v 29 Ken konig ayaʼda isiʼpo onʼsiʼpopakikaʼnig konigti
aʼnennada Ishmael Agarensiʼpo oʼsiʼpopakuyate. Abrahamen
Saraenere nogsiʼpotida Isaactaj Ishmaela dakhueaʼ oʼkikaʼuyate.
“Huasiʼpo iʼta̱e̱a̱po.” Diosen Noki̱re̱ga̱ Abrahamtaj
o̱ʼnuynok Isaac oʼsiʼpoe̱ʼuyate. Oy konigti o̱ʼe̱. Cristotaj
oknopo̱e̱hueʼ hua̱e̱ʼeriomeya̱ oroʼtaj dakhueaʼ mogkikaʼne.
Oroʼ huaknopo̱e̱ʼeri Diosensiʼpo o̱ʼe̱nok dakhueaʼ
mogkikaʼne.
\v 30 “Ettoneʼ huanabaʼensiʼpotaj pakhueʼ i̱jje̱po
noeanhuahuikahueʼ ijmaeapoy.” Diosa oaʼuynok Apagbaʼte,
“Doʼhued ettoneʼ huanabaʼ yaen. Doʼhuedsiʼpoere Diosere
noeonhuahuikahueʼdik o̱ʼneapo.” Sara Abrahamtaj onaʼuyate.
\v 31 Oroʼomey huaknopo̱e̱ʼeri konig Saraensiʼpo o̱ʼe̱ne.
Huanabaʼensiʼpo ehueʼ o̱ʼe̱po aʼnopoʼkoreayaʼpo
Moisésenbaʼtaj nigpe̱i̱kahueʼdik o̱ʼe̱ne.
\c 5
\s Oroʼomey onteʼti konig huanabaʼnig ehueʼ o̱ʼe̱po
“Dakhueaʼ nigkahueʼ moʼe̱ne moʼtinopo̱e̱po.” Diosa
moneʼpo onteʼti Moisésenbaʼtaj kikahueʼdik o̱ʼe̱ne.
\p
\v 1 Jesucristotaj oknopo̱e̱nok Diosa dakhueaʼ eʼkaʼ
moʼnopoʼyareaʼne. Aʼnopoʼyareayaʼpo Moisésenbaʼ onteʼti
nigpe̱i̱kahueʼdik o̱ʼe̱ne. Aʼnopoʼyareayaʼpo Moisésenbaʼ
nigpe̱i̱kahueʼ yanikaʼ.
\p
\v 2 Menʼpe̱e̱ʼ. Do Pabloa opudtaj oʼnonaʼne menʼnigpe̱e̱ʼ.
“Dakhueaʼ nigkahueʼ meʼnene, moʼtinopo̱e̱po.” Diosa
moneʼ. “Doʼhued bokereksiʼdak bekteg.” Opuda̱ enaʼnayo
opudtehuapaʼ Cristoa hue̱ypa cruzte moʼnigbueyʼuyatenigʼa
opudtaj dakhueaʼ eʼkaʼ nopoʼyareahueʼdik moʼe̱a̱pone.
\v 3 “Dakhueaʼ nigkahueʼ meʼnene moʼtinopo̱e̱po.” Diosa
moneʼpo ayaʼda huabokereka bokereksiʼdak eʼnoktegnayo ayaʼ
Moisésenbaʼtaj kenpaʼda nigpe̱i̱kaʼdik o̱ʼneonhuahuikaʼapo.
Onteʼti opudtaj oʼnonaʼne.
\v 4 “Dakhueaʼ nigkahueʼ meʼnene, moʼtinopo̱e̱po.” Diosa
moneʼpo opudomeypiʼ Moisésenbaʼtaj moʼnigpe̱i̱kaʼnok
konig onteʼti Diosensiʼpo ehueʼ moʼe̱depo Cristoen ehueʼ
moʼe̱depo Diosa opudomeytaj matinepahuihueʼ moʼe̱deapone.
“Dakhueaʼ nigkahueʼ meʼe̱ne moʼtinopo̱e̱po.” Diosa
onahueʼdik moʼe̱a̱pone.
\v 5 Oroʼtanayo Diosensiʼpotaj kanʼnigi̱keʼpo Diosen
Noki̱re̱ga̱ boʼtihuapokikaʼne. Kenpaʼti dakaʼ Jesucristotaj
oknopo̱e̱nok “Dakhueaʼ nigkahueʼ meʼnene
moʼtinopo̱e̱po.” Diosa monaʼapone. Kenda oroa
oknopo̱i̱kaʼpo Diostaj oʼnigi̱kaʼne.
\v 6 Oroʼomey Cristotaj dakaʼ eʼmaknopo̱e̱deʼte Cristoen
o̱ʼe̱dene.
Huabokereksiʼdak eʼnoktegpiʼ huabokereksiʼdak
okteghueʼ e̱e̱ʼpiʼ Diostaj konigti huadak o̱ʼnige̱ne. Oroa
Jesucristotaj eknopo̱i̱kataʼ Diosa huakkaʼ oʼpak. Cristotaj oroʼ
oknopo̱e̱po ayaʼtada diʼ oʼmaikaʼne.
\p
\v 7 Dakaʼ Cristotaj moknopo̱i̱kaʼuyne kenpaʼti Jesucristoen
buttida huaʼa dakaʼ moʼnigpe̱i̱kaʼuynigʼa menpaʼ namaʼda
huamanmadikaʼeritaj moʼpe̱e̱po Cristoen buttida huaʼataj
eknopo̱e̱ʼ bokkahueʼdemeʼne.
\v 8 “Moisésenbaʼtaj nigpe̱i̱kaʼdik moʼe̱.” Diosa oroʼtaj
onahueʼ moʼu̱yne. “Cristotaj oknopo̱e̱ʼdik moʼe̱ne.”
Diosa monaʼuyne.
\v 9 Sueʼada namaʼda huamanmadikaʼeria eʼmanmadikaʼnayo
i̱da huakkaʼda namaʼda oʼnoknopo̱e̱a̱po, namaʼda
o̱gkikaʼapo. Kenda okkahuehueʼ yanikaʼ.
\v 10 Opud Galacia huaknopo̱e̱ʼeri nogpaʼda oknopo̱e̱hueʼ
moʼe̱a̱pone do Jesucristo Huairitaj yoknopo̱e̱po kenda
onʼtinopo̱e̱ne. Kenpaʼti beʼapiʼ namaʼda monmadikikaʼne
kentaj Diosa castiga kamagkeʼ.
\p
\v 11 O̱ʼnen judío aratbuta dakhueaʼ mogkikaʼne. “Diosa
dakhueaʼ eʼkaʼ moʼnopoʼyareʼpo huabokereksiʼdak oktegdik
moʼe̱.” Pabloa oʼmanmadikikaʼ. Sueʼada namaʼda doʼtaj
menʼhuaaʼne. Kenpaʼ do manmadikahueʼ i̱ji̱kay. Kenpaʼ
Jesucristoen huadak huaʼaere eʼmanmadikaʼnayo doʼtaj
dakhueaʼ o̱gkikahueʼ ya̱ʼneayet.
\v 12 Opud Jesucristotaj
huaknopo̱e̱ʼeritaj eknopo̱e̱batikaʼtaʼ oʼderetpakpo opudtaj
namaʼda monmadikikaʼ. Kenpaʼda kanʼbahueʼ onteʼti opudere
kupopakhueʼ kaʼnikeʼ. Kenda ijpaki.
\p
\v 13 Diosa moʼbaktieʼeaʼuynok Moisésenbaʼtaj konig
huanabaʼ ehueʼ moʼe̱po nigpe̱i̱kahueʼdik moʼe̱ne. Kenpaʼti
konig judío o̱gkikaʼnig konigti kikahueʼdik moʼe̱ne.
Cristotayoʼda yanoknopo̱i̱kaʼ. Diosa oʼmanaʼuyate.
Konige̱po “Moisésbaʼtaj konig huanabaʼ ehueʼ i̱jje̱po
katepiʼ ijpakpo kikaʼdik i̱jje̱y,” nopo̱e̱hueʼ yanikaʼ. Diosa
diʼ moʼe̱nok huayahuaya yanʼbatihuapokikatiʼ.
\v 14 “Konig opud huataʼda diʼda moʼi̱kaʼnig konigti nog
aratbuttakon huakkaʼda diʼda yanʼmaikaʼ.” Diosbaʼa
oʼmanaʼnok kenda oʼnigpe̱i̱kaʼpo konigti ayaʼ Diosen
huaʼataj oʼnigpe̱i̱kaʼne.
\v 15 Opudomey huayahuaya dig eʼbahuadiayikaʼnayo, dig
eʼbahuahuaynayo, huayahuaya eʼmamahui̱ʼi̱a̱ʼnayopiʼ, keyoj,
oʼnonaʼne. Ken konig kikahueʼ yanikaʼ. Eʼkikaʼnayo
Cristoen huaknopo̱e̱ʼeri ehueʼ moʼe̱a̱pone.
\s Konig dakhueaʼ eʼkaʼtaʼ oʼeretpakikaʼuynig konigti
kikahueʼ o̱ʼe̱po konig Diosen Noki̱re̱ga̱ oʼpaknigda
mogkikaʼ.
\p
\v 16 Diosen Noki̱re̱ga̱ oʼpaknigda mogkikaʼ. Kenda oroʼ
namaʼda oʼeretpakikaʼnig ken konig kikahueʼ moʼne.
\v 17 Oroʼennopoada dakhueaʼ eʼkaʼtaʼ oʼeretpakikaʼ konigti
Diosen Noki̱re̱ga̱ konig eʼnigkataʼ pakhueʼ o̱ʼi̱kaʼ. Kenda
Diosen Noki̱re̱ga̱ oʼpak konig oroʼennopoada eʼkaʼtaʼ pakhueʼ
o̱ʼi̱kaʼne. Konige̱po kenda oʼpakikaʼnig menpaʼ kikahueʼdik
o̱ʼe̱ne.
\v 18 Diosen Noki̱re̱ga̱ eʼnopoʼto̱e̱ʼnayo Moisésenbaʼ
nigpe̱i̱kahueʼdik o̱ʼi̱kaʼne. Ken konig oʼnonaʼne,
egomey, pogomey.
\p
\v 19 Diosen Noki̱re̱ga̱ nopoʼto̱e̱hueʼ e̱e̱ʼnayo konig
oroʼnopoada oʼpakpo dakhueaʼ kikaʼdik o̱ʼe̱ne, dakaʼ
oʼnopo̱e̱ne. Kenpaʼti Diosen Noki̱re̱ga̱ nopoʼto̱e̱hueʼda
e̱e̱ʼnayo oroʼada oʼpakpo nogen hua̱to̱e̱ʼtaj onʼbakdeʼikaʼ,
huabokerekere nog ettoneʼere dakhueaʼda kaʼdik o̱ʼi̱kaʼne.
Kenpaʼti nogen hua̱to̱e̱ʼtaj eʼbokerekboʼ nogen
hua̱to̱e̱ʼtaj ettoneʼa̱kon eʼmuneʼboʼ.
\v 20 Kenpaʼti Diosen Noki̱re̱ga̱ nopoʼto̱e̱hueʼda e̱e̱ʼnayo
eʼketkaʼ diostaj eretpakdik o̱ʼi̱kaʼne. Kenpaʼti tidig
eretpakdik o̱ʼe̱ne. Kenpaʼti huayahuaya maboyikaʼdik o̱ʼe̱ne.
Nogtaj nogtaj dig bahuahuaydik o̱ʼe̱ne. Nogomeytaj
bahuadiaydik o̱ʼe̱ne. Kenpaʼti Diosen Noki̱re̱ga̱
nopoʼto̱e̱hueʼ e̱e̱ʼnayo huataʼda oʼeretpakikaʼne. Nogpaʼda
oʼpakpo oʼkikaʼpo maundik o̱ʼe̱ne.
\v 21 Kenpaʼti Diosen Noki̱re̱ga̱ nopoʼto̱e̱hueʼda e̱e̱ʼnayo
oʼpakpo nogen katepiʼ enʼta̱e̱ʼ batihuadiayeʼdik o̱ʼe̱ne.
Kenpaʼti nogomeytaj oʼhuadiaypo, barakdik o̱ʼe̱ne, kenpaʼti
fiestate diga̱ʼda borracho e̱ʼdik o̱ʼi̱kaʼne. Kenpaʼti Diosen
Noki̱re̱ga̱ nopoʼto̱e̱hueʼda e̱e̱ʼnayo oʼpakpo nogda nogda
dakhueaʼ kikaʼdik o̱ʼe̱ne. Ken konig eʼkikaʼnayo Dios
oroʼen huairi to̱e̱hueʼ o̱ʼe̱a̱pone. Kenpaʼti Diosensiʼpo
ehueʼdik o̱ʼe̱a̱pone. Diosere ehueʼdik o̱ʼe̱a̱pone. Kenda
aʼnenda onʼboroayʼuyne konigti onteʼti onʼboroayne.
\p
\v 22 Diosen Noki̱re̱ga̱ moʼnopoʼto̱e̱denok nog aratbuttaj
diʼ oʼmaikaʼapone, durugnada o̱ʼunhuahuikaʼapone,
oʼnopoʼnoeyne, oynayo nog aratbuttaj huadiayhueʼ
oʼmaene, nogomeya̱ oroʼomeytaj dakhueaʼ enaʼte i̱da
bahuadiayhueʼ o̱ʼe̱ne, nogomeytaj dakaʼ oʼbatihuapokikaʼne,
huadak katepiʼ nogomeytaj oʼbayokikaʼne, katepiʼ
“Ijkaʼapoy,” enaʼnayo kenda oʼkaʼapoy.
\v 23 Diosen Noki̱re̱ga̱ moʼnopoʼto̱e̱denok oroʼtaj dakhueaʼ
e̱gkaʼnayo bahuadiayhueʼ o̱ʼi̱kaʼapone. Oroʼennopoʼa
dakhueaʼ eʼkataʼ eʼpaknayo kikahueʼ o̱ʼe̱a̱pone. Diosen
Noki̱re̱ga̱ moʼnopoʼto̱e̱nok huadakyoʼnada kikaʼdik
o̱ʼi̱kaʼapone. Ken konig oʼkikaʼpo Diosen huaʼa ayaʼ
oʼkikaʼne.
\v 24 Kenpaʼti oroʼomey Jesucristotaj oknopo̱e̱po Diosen
Noki̱re̱ga̱ moʼnopoʼto̱e̱nok onteʼti konig
oroʼomeyennopoʼ dakhueaʼ eʼkaʼtaʼ oʼeretpakikaʼuynigʼa konig
cruzte Jesúsere oʼbueyʼuy onteʼti kenda oroʼ
oʼeretpakikaʼuynig kahueʼ o̱ʼi̱kaʼapone.
\v 25 Ken Diosen Noki̱re̱ga̱ oroʼtaj Diosen eʼkikaʼ
boʼtihuapokikaʼne. Diostaj eknopo̱i̱kaʼtaj boʼtihuapokikaʼne.
Diosen Noki̱re̱ga̱ moʼnopoʼto̱e̱nok ayaʼda Diosa oʼpaknig
mogkikaʼ.
\p
\v 26 Ken, “Donayo huadaknada i̱jje̱y,” nopo̱e̱hueʼdik
moʼnikaʼ. Huataʼda eretpakhueʼ moʼnikaʼ. Huataʼda
eʼeretpaknayo huayahuaya dig oʼbahuahuayapetpiʼ kenpaʼti
huayahuaya dig oʼmahuanopo̱e̱a̱petpiʼ.
\c 6
\s Diostaj dakaʼ yanʼnigpe̱i̱kaʼpo huayahuaya
yanʼbatihuapokikatiʼ.
\p
\v 1 Opudere Cristoen huaknopo̱e̱ʼeri nogtiada namaʼda
dakhueaʼ ekaʼnayo Diostaj nigpe̱e̱hueʼ e̱e̱ʼnayo, egomey,
Diosen Noki̱re̱ga̱ moʼnopoʼto̱e̱nok opudomey kenda Diosa
oʼpaknig boʼkikaʼpo dakhueaʼ huakaʼeri kanopoʼkoreʼpo dakaʼ
yanʼtihuapoktiʼ. Onteʼti Diostaj kanigpe̱i̱keʼpo
yanʼtihuapokikatiʼ, yanʼtinepahuiʼpo dakaʼ ya̱ʼnonatiʼ.
Opudnayo dakaʼ ya̱gʼkikatiʼ. Keyoj konigti dakhueaʼ kahueʼ
yanetiʼ.
\v 2 Diostaj kanʼnigpe̱i̱keʼpo huayahuaya
yanʼbatihuapokikatiʼ. Kenpaʼti dakhueaʼ kahueʼ kaʼnikeʼpo
yanʼbatihuapokikatiʼ. Ken konig moʼbatihuapokikaʼpo diʼnada
yanʼmaikatiʼ. Kenda Cristoa oʼmanaʼuyate.
\p
\v 3 “Huadakda ijkikay, dakhueaʼ kahueʼ a̱ʼe̱ya̱ʼpo
menʼtihuapok ahueʼdik i̱jje̱y.” Beʼapiʼ kenda
eʼnopo̱e̱ʼnayo namaʼda oʼnopo̱e̱nigʼa namaʼdapiʼ
kikaʼdik o̱ʼneapo. Huataʼda namaʼda kenpaʼ onʼtinopo̱e̱po.
\v 4 Kenda ijkikaʼnig menpaʼ huadak ya̱ʼe̱tpiʼ dakhueʼ
ya̱ʼe̱tpiʼ oroʼa ayaʼada nogti nogtiada nopo̱e̱ʼdik o̱ʼe̱ne.
Huadakaʼ eʼkikaʼnayo Cristotaj eʼnigpe̱i̱kaʼnayo durugda
e̱ʼdik o̱ʼe̱ne. “Nogomeya̱ dakhueaʼ o̱gkikaʼnigʼa donayo
huadak ijkikay.” Nopo̱e̱hueʼdik o̱ʼe̱ne.
\v 5 Ken oroʼenyoʼda dakhueaʼ eʼkaʼtaj ayaʼ nogti nogtiada
nopoʼkoreaʼdik o̱ʼe̱ne kenpaʼti “doʼtaj dakhueaʼ eʼkaʼ
bekkahueaʼ, Dios,” tionaʼpakikaʼdik o̱ʼe̱ne.
\p
\v 6 Opudomeyen huadak huaʼa huamanmadikaʼeritaj katepiʼ
aypo huakupepiʼ yanʼbayokikatiʼ.
\p
\v 7 Huataʼda namaʼda tinopo̱e̱hueʼ yanikaʼ. Kenpaʼti
Diostaj da huaahueʼdik o̱ʼe̱ne. Oroʼ huadak eʼkikaʼnayo
huamanmadikaʼeritaj eʼbayokikaʼnayo Diosa oroʼtaj huadakda
moʼnigkaʼapone. Dakhueaʼ eʼkikaʼnayo bayokhueʼ e̱e̱ʼnayo
Dios konigti huadakaʼ o̱gkahueʼ moʼe̱a̱pone.
\p
\v 8 Kenpaʼti konig oroʼennopoʼ oʼpakpo eʼkikaʼnayo nogok
keʼpoda o̱ʼe̱a̱po, kenpaʼda bueydik o̱ʼe̱a̱pone. Oy kenda
Diosen Noki̱re̱ga̱ oʼpaknig eʼkikaʼnayo nogok Diosen
Noki̱re̱ga̱ moʼnoeanhuahuikaʼapone.
\v 9 Ken nogomeytaj monʼbatihuapokonhuahuikaʼ huadakaʼda
monʼbatihuapokonhuahuikaʼ. A̱ro̱ghueʼada huadakaʼda
monʼnigkadhuahuikaʼ. Batikhueʼda huadak eʼkikaʼnayo Diosa
oroʼtaj huadakda moʼnigkikaʼapone durugda
o̱ʼunhuahuikaʼapone.
\v 10 Konige̱po menokapiʼ kaʼdik o̱ʼe̱depo ayaʼ aratbuttaj
beʼtapiʼ huadakda monʼbatihuapokikaʼ. Huakkuruda
huaknopo̱e̱ʼeri huamaʼbuytaj dakaʼ monʼbatihuapokikaʼpo
huadaknada mogkikaʼ.
\s Taʼpotaʼ Pabloa oʼmaboroaypo saludos oʼdiktaʼmonaʼuyate.
\p
\v 11 Huaboaʼda doʼhued huabaʼa onʼnigmadoyaʼne. Doʼhued
huabaʼa huaboroʼdikaʼda
onʼnigmadoyaʼne. Yanʼtiahuaytiʼ.
\v 12 Huabokereksiʼdak oktegdik moʼe̱ne, huamanmadikaʼeria
onʼmanaʼikaʼnok judíomeya̱ diga̱ʼ o̱gkahueʼ moʼe̱a̱pone
onʼnopo̱e̱po kenpaʼti “Huamanmadikaʼeri huadakda o̱ʼne.”
Kenpaʼ aratbuta eʼhuaaʼtaʼ onʼpakikaʼ. “Kamanopoʼyareʼ
kamanoeanhuahuikeʼ Jesucristo hue̱ypa cruzte
moʼnigbueyʼuyate.” Kenyoʼda eʼmanmadikaʼnayo judío
aratbuta oroʼtaj diga̱ʼ mogkaʼapet onʼnopo̱e̱po.
\v 13 Kenomey huabokereka huabokereksiʼdak ektega̱da ayaʼ
Moisésen huaʼataj nigpe̱e̱hueʼ e̱ʼe̱a̱da opuden
huabokereksiʼdak ektegtaʼ huakkaʼ oʼderetpakikaʼ. Opuden
huabokereksiʼdak oʼnoktegde eʼmanbatiaʼpaktaʼ onʼeretpak.
\v 14 Oroʼen Huairia Jesucristo hue̱ypa cruzte paiʼda
moʼnignopoʼe̱po moʼnigbueyʼuyate. Oroʼen dakhueaʼ eʼkaʼ
aʼbakkahueayaʼpo moʼnigbueyʼuyate. Donayo kenyoʼda
yoknopo̱e̱po eʼmanbatiaʼpakikaʼtaʼ ijpaki. Konige̱po
Jesucristo cruzte moʼnigbueyʼuyate yoknopo̱e̱po ken konigti
indariyo aratbut dakhueaʼ o̱gkikaʼnig, oʼderetpakikaʼnig,
kenpaʼti onʼbatiaʼpakikaʼnig donayo onteʼti eʼkikaʼtaʼ
pakhueʼ i̱ji̱kay. Cristoenyoʼda ijkikay.
\v 15 Huabokereksiʼdak ekteg e̱e̱ʼpiʼ okteghueʼ e̱e̱ʼpiʼ
konigti huadak o̱ʼe̱. Konigti Diosa oʼpakikaʼ. Diosen
Noki̱re̱ga̱ oroʼtaj moʼnopoʼto̱e̱nok kenpaʼda Diostaj
eʼnigpe̱i̱kaʼtaʼ oʼpaki. Kenpaʼda huadakaʼda eʼkikaʼtaʼ oʼpaki.
\v 16 Jesucristotaj moknopo̱i̱kaʼnok Diosen Noki̱re̱ga̱
moʼnopoʼto̱e̱po dakaʼ Diostaj moʼnigpe̱i̱kaʼnigtaj Diosa
opudomeytaj kenpaʼti ayaʼ Diosen aratbuttaj
kamanopoʼnoeyanhuahuikeʼpo kenpaʼti
kamatinepahuionhuahuikeʼ.
\p
\v 17 Jesucristoen hueretda huataʼmoneri ehueʼ o̱ʼe̱ oyda
kenpaʼti nogok beʼapiʼ huaahueʼ menikatiʼ. Jesucristoen
huadak huaʼa ijmanmadikikaʼpo huakkaʼ paiʼda
ijnopoʼeonhuahuaʼdepo, doʼhuedso̱ʼtaʼ konig eʼtipaybahued.
Jesúsen hueretda huanabaʼ i̱jje̱y ayaʼada tiahuaydik
meʼnene.
\p
\v 18 Opud huaknopo̱e̱ʼeritaj Huairi Jesucristoa
kamatinepahuionhuahuikeʼ diʼda kamaikeʼ ijtionaʼpakikay,
egomey, pogomey.