\id EPH
\h EFESIOS
\toc1 Efesios
\toc2 Ef
\mt1 EFESIOS
\mt2 Efeso huaknopo̱e̱ʼeritaj Pabloa oʼmanigmadoyaʼuyate.
\c 1
\s Efeso huaknopo̱e̱ʼeritaj Pabloa oʼmanigmadoyaʼuyate.
\p
\v 1 Do Pablo i̱jje̱y. Jesucristoen kamanbatiaʼpakikeʼpo Diosa
oʼpakpo meʼtaʼmonaʼuyne. Opudomey Jesucristotaj
huaknopo̱e̱ʼeri moʼe̱ne. Diosen moʼe̱ne. Opudomey Efeso
huakkaʼ jak hua̱e̱ʼeritaj onʼnigmadoyaʼne.
\v 2 Oroʼomeyen Apag Dios, Jesucristo Huairiere opudomeytaj
dakaʼ mogkikaʼpo moʼnopoʼnoeyikeʼ.
\s Cristotaj moknopo̱i̱kaʼnok Diosa nogda nogda dakaʼ
mogkikaʼne.
\p
\v 3 Dios Jesucristo Huairien Apag ʼuruaʼnanada o̱ʼi̱kaʼ.
Oroʼomeya̱ moʼdaʼikaʼ. Cristotaj oknopo̱e̱nok Diosa kurudya̱ʼ
oroʼomeyen huanopoʼtaj dakaʼ mogkikaʼne.
Moʼnopoʼyareaʼikaʼne, moʼnopoʼnoeya̱ʼikaʼne kenpaʼti
moʼnoeanhuahuikaʼapone.
\v 4 Aʼnennada huadari kuruderetaj Diosa kahued o̱ʼe̱poed
aratbut Jesucristotaj oʼnoknopo̱e̱a̱po Diosa oʼnopo̱e̱po
oroʼomeytaj moʼbaktieʼeaʼuyate. Oroʼ kenpaʼda Diosen
a̱ʼe̱a̱ya̱ʼpo kentayoʼda menʼnigpe̱i̱keʼpo kenpaʼti oroʼomey
huadaknopoʼda a̱ʼe̱a̱ya̱ʼpo Diosa oroʼomeytaj
moʼbaktieʼeaʼuyate.
\v 5 Oroʼomeytaj diga̱ʼda diʼnada moʼe̱po, doʼhuedsiʼpo
o̱ʼneapo konig doʼhuedsiʼpo oroʼomeytaj ijbaeʼapoy Diosa
oʼnopo̱e̱ʼuyate. Kenda Diosa aʼkayaʼpo hua̱ʼensiʼpoda
Jesucristoa kamanigbueyeʼpo oʼtaʼmonaʼuyate. Diosa oʼpakpo
oʼkaʼuyate.
\v 6 Oroʼ Diosen huadiʼda Huasiʼpotaj huaknopo̱e̱ʼeritaj Diosa
diʼnanada moʼe̱po boeʼuynok “Dios ʼurunanada o̱ʼi̱kaʼ,”
oʼhuaaʼikaʼne.
\v 7 Diosa diʼnada moʼe̱po oroʼtaj aʼmanopoʼyareayaʼpo
oroʼomeyen dakhueaʼ eʼkaʼ aʼbakkahueayaʼpo hua̱ʼensiʼpoda
moʼnigbueyaʼuyate. Keʼnen mimi moʼnigmimihuaʼuyate. Ken
konig Diosa diʼnada moʼe̱po dakhueaʼ eʼkaʼ
moʼnopoʼyareaʼuyne. Oroʼomeyen dakhueaʼ eʼkaʼ
bokkahueaʼuyne.
\v 8 Diosa diʼnanada moʼe̱po huakkaʼ moʼmatinepahuiʼpo
oroʼomeytaj moʼmanopo̱e̱a̱ʼuyne. Nogi̱ti nogi̱ti
moʼmanopo̱e̱a̱ʼikaʼne.
\v 9 Oroʼomeytaj dakhueaʼ eʼkaʼ aʼmanopoʼyareayaʼpo
aʼbakkahueayaʼpo doʼhued Huasiʼpo ijtaʼmonaʼapoy Diosa kenda
soatayoʼ oʼnopo̱e̱ʼuyate. Kenda Diosa eʼkaʼtaʼ oʼpakpo
oʼnopo̱e̱ʼuyate. Kenda moʼnopo̱e̱a̱ʼuyne.
\v 10 Kenda Diosa eʼkaʼtaʼ oʼpakpo oʼnopo̱e̱ʼuyate. Nogok
kenmeʼnoe Diosa oʼpakpo ayaʼtada oʼbakupopakaʼapo. Ayaʼtada
kurudyo̱ hua̱e̱ʼeritaj ayaʼtada huadariyo hua̱e̱ʼeritaj
oʼbakupopakaʼapo. Cristoere kaʼnikeʼpo oʼbakupopakaʼapo.
Ayaʼenda huairi Cristo o̱ʼe̱a̱po. Cristotaj ayaʼada
onʼnigpe̱i̱kaʼapo.
\p
\v 11 Diosa oʼpakpo aʼnennada oroʼomey huaknopo̱e̱ʼeritaj
moʼbaktieʼeaʼuyate. Katepiʼ Diosen Huasiʼpoa oʼbaeʼaponig
oroʼomeya̱ Cristotaj huaknopo̱e̱ʼeriakon oʼbaeapone. Ayaʼda
huadakda o̱ʼe̱ Diosa oʼnopo̱e̱po kenda oʼpakpo oʼkikaʼ.
\v 12 Konige̱po oroʼ judío aratbut huakkuruda Cristotaj
oknopo̱e̱deʼuy ʼuruaʼda oʼnoepo ʼuruaʼda oʼkikaʼnok aratbut
oroʼtaj boʼtiahuaypo Dios ʼuruda o̱ʼe̱, onʼhuaaʼikaʼapo.
\v 13 Jesucristoen buttida huaʼa nopoʼyareaʼdik huaʼa
opudomeykon moʼpe̱e̱depo moknopo̱e̱ʼuyne. Kenpaʼti
Diosensiʼpo o̱ʼe̱y Diosen Noki̱re̱ga̱ dakaʼ
moʼnopo̱e̱a̱ʼuyne. “Doʼhued Noki̱re̱g onʼyokapone.”
Aʼnennada Diosa oaʼuyate.
\v 14 Diosen Noki̱re̱ga̱ oroʼomeytaj moʼnopoʼto̱e̱po Diosere
durugnanada o̱ʼe̱a̱pone ʼurunanada Diosa mogkikaʼapone
Diosen Noki̱re̱ga moʼnopo̱e̱a̱ʼikaʼne. Kenokaʼ ayaʼda
Diosen aratbut eʼmanopoʼkoreadeʼte Diosa kenda
moʼnigkikaʼapone. Kenda Diosen Noki̱re̱ga̱ oroʼomeytaj dakaʼ
moʼnopo̱e̱a̱ʼikaʼne. “Dios ʼuruaʼda o̱ʼe̱. Dios huairitoneʼ
o̱ʼe̱.” Ayaʼada onʼhuaaʼikaʼapo.
\s “Huaknopo̱e̱ʼeritaj dakaʼ eʼkaʼ yamanopo̱e̱a̱ʼ, Dios.”
Pabloa oʼmationaʼpakuyate.
\p
\v 15 Jesús Huairitaj moknopo̱i̱kaʼuy kenpaʼti Diosen
aratbuttaj ayaʼtada diʼ moʼi̱kaʼnok onʼtipe̱i̱kaʼpo
\v 16 Diostaj okkahuehueʼda dakiti kiriga̱yo̱ʼ i̱ji̱kaʼpo
opudomeytaj ijmanigtionaʼpakikay.
\v 17 Dios Jesucristo Huairien Apagtaj ijmanigtionaʼpakikay.
Ken ʼuruaʼnanada Apag Diostaj ijmanigtionaʼpakikay.
Jesucristotaj ʼuruaʼda kanoknopo̱i̱keʼ kenpaʼti Cristoen
eʼmanmadikaʼ kanoknopo̱i̱keʼ Diosa kamanopo̱e̱ʼpo kenpaʼ
ijtionaʼpakikay. Diosen Huasiʼpo Jesucristotaj nogi̱ti nogi̱ti
kanoknopoenkeʼ kenpaʼti Diostaj nogi̱ti nogi̱ti
kanoknopoenkikeʼ. Opudtehuapaʼ ijtionaʼpakikay.
\v 18 Kurudya̱ʼ kenda Diosa onʼnigkaʼapone, Diosa
monaʼuyne. Opudomey dakaʼ kanoknopo̱i̱keʼ, ijtionaʼpaki.
Opudomey Diosen moʼe̱nok Diosa dakhueaʼ eʼkaʼ
moʼnopoʼyareaʼpo kenpaʼti Jesús ʼuruaʼda o̱ʼe̱denig ʼuruaʼda
boʼkikaʼapone kenpaʼti kenere kurudyo̱ durugda
moʼnoeanhuahuikaʼapone. Kenda kanoknopo̱i̱keʼ
onʼnigtionaʼpakikaʼne.
\v 19 Diosnayo teynanada o̱ʼi̱kaʼ. Kentaj oknopo̱i̱kaʼnok
oroʼomeytaj teynanada boʼteypakikaʼne. Oroʼomey teyda
o̱ʼe̱depo Diostaj nigpe̱i̱kaʼdik o̱ʼe̱a̱pone huadakda kikaʼdik
o̱ʼe̱a̱pone. Kenpaʼ kanoknopo̱i̱keʼpo ijtionaʼpakikay. Ken
teynanada Diosa oʼkaʼuyatenig aratbuttaj oʼbatiahuayʼeaʼuy.
\v 20 Diosa teynanada o̱ʼe̱po kubarakyaʼ Cristotaj
oʼnoyhuada̱ʼpo kurudyo̱ oʼtobehuikuyate. Keʼnen huadaʼkopen
oʼhuada̱ʼuyate. Kente Cristotaj ayaʼada nigpe̱i̱kaʼdik
o̱ʼneapo.
\v 21 Kurudyo̱ Cristo huakkuruda hua̱e̱ʼeri huairi kenpaʼti
huadariyo huakkurueri huairi o̱ʼe̱. Ayaʼada gobierno huairi
Cristotaj nigpe̱i̱kaʼdik o̱ʼnikaʼapo. Oy nigpe̱i̱kaʼdik
o̱ʼne. Nogokkon nigpe̱i̱kaʼdik o̱ʼneapo.
\v 22 Ayaʼda Diosa oʼkaʼuyatenig ayaʼada Cristotaj
nigpe̱i̱kaʼdik o̱ʼne. Ayaʼada kuruderia ayaʼada huadarieria
Cristotaj nigpe̱i̱kaʼdik o̱ʼne. Apag Diosa oaʼuyate. Konig
hua̱so̱ʼa̱ huanopoʼtaj oʼnigpe̱i̱kaʼ, Cristo ayaʼ
huaknopo̱e̱ʼerien huanopoʼ o̱ʼe̱nok ayaʼada Cristotaj
nigpe̱i̱kaʼdik o̱ʼne. Diosa oaʼuyate.
\v 23 Ayaʼ huaknopo̱e̱ʼeria konig Cristoenso̱ʼ o̱ʼne. Cristo
oroʼomeytaj moʼmanopoʼto̱i̱kaʼnok oroʼomey
huaknopo̱e̱ʼeri ayaʼada Cristoen nogtida hua̱so̱ʼ o̱ʼe̱ne.
Cristo ayaʼbayoda o̱ʼi̱kaʼpo ayaʼtada dakaʼ oʼmato̱i̱kaʼ.
\c 2
\s Dios diʼ moʼe̱po oroʼomeytaj moʼnopoʼkoreaʼne.
\p
\v 1 Dios Cristoere moʼnopoʼkoreaʼpo moʼnopoʼnoeaʼuyne.
Aʼnenda Diostaj nigpe̱i̱kahueʼ moʼi̱kaʼuyne. Dakhueaʼ
boʼkikaʼuyne. Diostaj eʼbueyonig moʼi̱kaʼuyne.
\v 2 Kenpaʼda dakhueaʼ boʼkikaʼpo Diostaj nigpe̱e̱hueʼda
moʼi̱kaʼuyne. Konig noga̱ o̱gkikaʼnig opudomey konigti
boʼkikaʼuyne. Konig noga̱ onʼnopo̱i̱kaʼnig konigti
moʼnopo̱i̱kaʼuyne. Totoʼ huairitaj moʼnigpe̱i̱kaʼuyne.
Totoʼ kurudyo̱ hua̱e̱ʼeri o̱ʼe̱po namaʼda ayaʼtada
oʼmanaʼikaʼpo Diostaj nigpe̱e̱hueʼ hua̱i̱kaʼeritaj
oʼmanaʼikaʼ.
\v 3 Oroʼomey judío hua̱e̱ʼeri judío ehueʼ hua̱e̱ʼeriere
aʼnenda Diostaj nigpe̱e̱hueʼ o̱ʼi̱kaʼuyne. Ken oroʼen
hua̱so̱ʼa̱ katepiʼ oʼeretpakpo oʼkikaʼuyne. Katepiʼ oroʼen
huanopoʼ oʼpakpo, katepiʼ oroʼada oʼpakpo, dakhueapiʼ oʼpakpo
kenda oʼkikaʼuyne. Konigti nogomeytaj Diosa castiga
o̱gkaʼdik oʼmaeapo kenpaʼti Diosa oroʼomeytaj castiga
o̱gkaʼdik moʼe̱a̱yetnigʼa.
\v 4,5 Diosnayo huakkaʼda moʼtinepahuiʼpo oroʼomey Diostaj
nigpe̱e̱hueʼ e̱ʼi̱kaʼte ken konig Diostaj noehueʼ o̱ʼe̱po
Diostehuapaʼ konig eʼbueyonig oʼmauyne kenokaʼ Diosa
moʼtinepahuiʼpo huakkaʼda diʼ moeʼu̱yne. Diosa diʼ moʼe̱po
Cristo eʼbueydeʼte kubarakyaʼ moʼnignoyhuada̱ʼuyate.
Oroʼomeytakon moʼnoeaʼuyne. Diosa diʼ moʼe̱po kenpaʼti
oʼpakpo opudomeyen dakhueaʼ eʼkaʼ bokkahueaʼuyne kenpaʼti
moʼnoeaʼuyne kenpaʼti moʼnopoʼkoreaʼuyne.
\v 6 Kenpaʼti Cristotaj moknopo̱e̱nok Diosa moʼnoeaʼne.
Huaboaʼda Diostaj oʼnigpe̱i̱kaʼpo Cristoere Diostaj
oʼnoikaʼne. Cristoere kurudyo̱ oʼnoikaʼne. Cristoere
ʼuruda o̱ʼi̱kaʼne kenpaʼti durugda o̱ʼi̱kaʼne.
\v 7 Jesucristotaj moʼnigtaʼmonaʼuyne Diosa oroʼomeytaj
huakkaʼda diʼ moʼmaepo oroʼomeytaj moʼnoeaʼuyne. Huakkaʼ
moʼtinepahuiʼpo moʼnoeaʼuyne. Ken nogok ayaʼtada
aʼmanopo̱i̱kayaʼpo Diosa kenda moʼnigkaʼuyne.
\v 8 Oroʼomey dakhueaʼ huakaʼeritaj Diosa moʼtinepahuiʼpo diʼ
moʼe̱po moʼnopoʼkoreaʼuyne. Oroʼomey Cristotaj
oʼnopoʼkoreaʼpo oknopo̱e̱nok Diosa dakhueaʼ eʼkaʼ
moʼnopoʼyareaʼuyne. Huataʼda dakhueaʼ eʼkaʼ
nopoʼyareahueʼdikda o̱ʼi̱kaʼne. Diosa katetehueʼ dakhueaʼ eʼkaʼ
moʼnopoʼyareaʼuyne.
\v 9 Oroʼ huadakaʼda oʼnigkikaʼnok oroʼomeytaj Diosa
nopoʼyareahueʼdik moʼi̱kaʼapone. “ʼUruaʼda ijkikaʼnok
Diosa
meʼnopoʼyareaʼne.” Oroʼomeya̱ ahueʼdik o̱ʼe̱ne.
\v 10 Oroʼomey huaknopo̱e̱ʼeritaj Diosa ʼuruaʼda
moʼnopoʼkaʼuyne. Huadaknanada kanʼnopo̱i̱keʼpo huadakda
huaʼa kanʼbatiaʼpakikeʼpo, huadakda kanʼkikeʼpo, Diostaj
kanʼnigpe̱i̱keʼpo, nogomeytaj diʼ kanʼmaikeʼpo Diosa
aʼnennada oʼpakpo ʼuruaʼda moʼnopoʼkaʼuyne. Cristo Jesústaj
oknopo̱e̱nok Diosa ʼuruaʼda moʼnopo̱e̱a̱ʼikaʼne.
\s Cristotaj moknopo̱e̱nok Cristoa moʼmanopoʼnoeya̱ʼne.
Diostaj moʼmanoeya̱ʼuyne.
\p
\v 11 Opudomey judío aratbut ehueʼ moʼi̱kaʼuy. Judío aratbut
huabokerekensiʼdak oʼnoktegi̱kaʼ. Judío aratbuttaj huaktege̱ri
onʼbahuaaʼikaʼ. Opudomey okteghueʼ hua̱e̱ʼeri boʼhuaaʼikaʼne.
Kenda okkahuehueʼ yanikaʼ.
\v 12 Aʼnenda Cristotaj oknopo̱e̱hueʼ moʼi̱kaʼuyne. Cristoere
ehueʼ moʼi̱kaʼuyne. Diosen aratbut ehueʼ moʼi̱kaʼuyne.
Israel aratbut ehueʼda moʼi̱kaʼuyne. Israel aratbutyoʼda
Diosen aratbut o̱ʼnikaʼuy. Israel aratbuttaj ʼuruaʼda
ijmanigkikaʼapoy Diosa oʼmanaʼuyate. Opudomey kenda
nopo̱e̱hueʼ moʼi̱kaʼuyne. Diosa nopoʼkoreaʼdik kenpaʼti
Diosere nounhuahuikaʼdik o̱ʼe̱y oknopo̱e̱hueʼ moʼi̱kaʼuyne.
In
huadariyo moʼnoikaʼnigʼa Diostaj oknopo̱e̱hueʼ
moʼi̱kaʼuyne.
\v 13 Aʼnen Diostaj konig bidteda e̱ʼu̱o̱nig moʼi̱kaʼuyne.
Oynayo Jesucristotaj moknopo̱e̱depo Diosen aratbut
moʼi̱kaʼne. Cristo moʼnigbueyʼuynok judío aratbutere
Diosen aratbut moʼe̱dene.
\v 14 Oroʼ judío aratbuttaj kenpaʼti judío ehueʼ aratbuttaj
moʼmanoeynoeyʼuyne Cristoa. Aʼnen huayahuaya
oʼbahuadiayikaʼuy. Konig takaʼ o̱ʼi̱kaʼuy. Jesucristoa
moʼmanoeya̱ʼdepo nogaratbuttida boʼkaʼuyate.
\v 15 Jesús cruzte oʼmanigbueypo Moisésenbaʼ eʼnigpe̱i̱kaʼ
oʼdakeaʼuyate. Oʼmanigbueypo nogtida huaboaʼ aratbutaʼ
oʼkaʼuyate. Judío aratbut nog aratbut e̱ʼe̱a̱da nogtida huabo
aratbutaʼ oʼkaʼuyate. Ken konig oʼkaʼpo judío nog
aratbuttakon oʼmanoeya̱ʼuyate.
\v 16 Ken Cristo cruzte moʼnigbueyʼuynok judío aratbut
judío aratbut ehueʼ e̱ʼhua̱e̱ʼtaj huayahuaya eʼbahuadiayikaʼtada
Jesúsa kenpaʼda oʼmabatikaʼuyate, kenpaʼti
oʼmanoeya̱ʼuyate. Diostehuapakon oʼmanoeya̱ʼuyate. Kenpaʼti
bottaʼ aratbut e̱e̱ʼtada konig nogtida aratbut oʼkaʼuyate.
\p
\v 17 Cristo oʼtiakdepo, Diostaj yanoknopo̱e̱po
yanʼnopoʼnoeyʼ, Cristoa oʼmanaʼikaʼuyate. Judío aratbut
ehueʼ hua̱e̱ʼeritaj oʼmanaʼikaʼuyate. Kenpaʼti judío
aratbuttaj konigti oʼmanaʼikaʼuyate.
\v 18 Cristoa moʼnigbueyʼuyatenok Apag Diostaj huahuaʼdik
o̱ʼi̱kaʼne. Oroʼ ayaʼada judío kenpaʼti judío ehueʼ
hua̱e̱ʼeri Apag Diostaj huahuaʼdik o̱ʼi̱kaʼne. Diosen
Noki̱re̱ga̱ boʼtihuapokikaʼnok Diostaj huahuaʼdik o̱ʼi̱kaʼne.
\v 19 Konige̱po opudomey judío ehueʼ hua̱e̱ʼeri konig nog
aratbutenbayo hua̱e̱ʼeri ehueʼ moʼi̱kaʼne. Diosen aratbutere
opudomeykon Diosenbayo hua̱e̱ʼeri moʼe̱po Diosen aratbut
moʼi̱kaʼne.
\v 20 Opudomey Jesucristotaj huaknopo̱e̱ʼeri konig huaboroʼ
jakonig moʼi̱kaʼne. Jesúsen huamanbatiaʼpakeri kenpaʼti
Diosen huamanbatiaʼpakeri opudomeytaj monmadikikaʼpo
konig jak huakaʼerionig oneʼuy. Kenpaʼti Jesucristotaj
moknopo̱e̱po Jesucristo konig huidtoneʼteonig ayaʼ huaboroʼ
jaktoneʼo̱nig dakaʼ oʼhuadikaʼ.
\v 21 Cristotaj moknopo̱e̱po konig jak hue̱ypa nogtaj
nogtaj dakaʼ onʼtinukuikaʼnig konig onteteyoʼ
moknopo̱e̱po konig jak Diosa oʼdakeaʼdepo konig Diosen jak
moʼe̱po konig onpapayoʼ Diosenyoʼda nogi̱ti nogi̱ti
oʼkikaʼne.
\v 22 Ken opudomeykon Jesucristotaj moknopo̱i̱kaʼpo nog
huaknopo̱e̱ʼeriere moknopo̱i̱kaʼne Diosen Noki̱re̱ga̱
moʼnopoʼto̱i̱kaʼnok konig Diosen jak moʼi̱kaʼne.
\c 3
\s Nog aratbuttada Jesucristoen huadak huaʼa
kamanbatiaʼpakikeʼpo Pablotaj Diosa
\s oʼtaʼmonaʼuyate.
\p
\v 1 Konige̱po do Pabloa opudomeytehuapaʼ
onʼnigtionaʼpakikaʼne. Jesucristotaj ijnigpe̱i̱kaʼpo
kenpaʼti opudomey judío ehueʼ hua̱e̱ʼeritaj Jesucristoen
huadak huaʼa oʼnonbatiaʼpakikaʼnok konige̱po huabakuda̱ʼ
jakyo i̱jjeunhuahuikay.
\v 2 Opudtehuapaʼ Jesucristoen huadak huaʼa kamanmadikikeʼpo
Diosa moʼtinepahuiʼpo oʼtaʼmonaʼuy. Kenda moʼnopo̱e̱ne
ijnopo̱e̱y.
\v 3 Jesucristotaj eknokot soatayoʼ Diosayoʼda
oʼnopo̱i̱kaʼuyate. Kenda Diosa doʼtakon meʼnopo̱e̱a̱ʼuyne.
Kenda suhuigda onʼnigmadoyaʼuyne.
\v 4 Cristotaj konig i̱re̱gi̱re̱gte eknopo̱e̱ʼ ijnopo̱e̱y.
In berobaʼ oʼnigmadoyaʼnok opudomey boʼtiahuaydepo
moʼnokotapet.
\v 5,6 Nog aratbut
aʼnenda Diosen aratbut ehueʼ e̱ʼe̱a̱da oyda
nog aratbut huaknopo̱e̱ʼeri Diosen aratbut o̱ʼne. Judío
aratbutere konig nogtida aratbut o̱ʼnikaʼ. Kenda
judíomeytaj ijkaʼapoy Diosa oaʼuyatenig konigti nog aratbut
huaknopo̱e̱ʼeritaj oʼmanigkaʼapo. Jesucristoen huadak huaʼa
onʼpe̱e̱depo oʼnoknopo̱e̱. Aʼnenda kenda nopo̱e̱hueʼ
o̱ʼnikaʼuyate. Oynayo Jesucristoen huadakda huataʼmoneritaj
kenpaʼti huamanbatiaʼpakeritaj Diosen Noki̱re̱ga̱
oʼmanopo̱e̱a̱ʼikaʼuyate.
\p
\v 7 Doda huadakda ijkikaʼnok Diosa taʼmonahueʼ meʼu̱yne.
Diosa oʼpakpo Cristoen huadak huaʼa kamanbatiaʼpakikeʼpo Diosa
teyda o̱ʼe̱po meʼtaʼmonaʼuyne.
\v 8 Nog huaknopo̱e̱ʼeriata huadaknada o̱ʼnepo huadaknada
o̱gkikaʼnig donayo dakhueaʼda eʼkikaʼtada Diosa
meʼtinepahuiʼpo bekkahueaʼpo nog aratbuttaj Cristoen huadak
huaʼa kamanbatiaʼpakikeʼpo meʼtamonaʼuyne.
\v 9 Diosa ijkaʼapoy oʼnopo̱e̱ʼuynigda kenda Diosa aʼnennada
ayaʼda oʼkaʼuyate. Judío ehueʼ hua̱e̱ʼeri aratbut Cristotaj
oʼnoknopo̱e̱a̱po kenpaʼti judío ehueʼ hua̱e̱ʼeri aratbuttaj
Diosa oʼmanopoʼkoreaʼapo. Kenda Diosa aʼnennada soatayoʼ
oʼnopo̱i̱kaʼuyate. Kenda aratbuttaj kamanopo̱i̱keʼpo Diosa
doʼtaj beeʼuyne.
\v 10 Judío ehueʼ hua̱e̱ʼeri aratbut judío aratbutere
Jesucristotaj oʼnoknopo̱e̱po konig nogaratbuttida o̱ʼnikaʼ.
Kenda Kuruderi Huairi kenpaʼti Kuruderi Huataʼmonaʼeria
kanʼnopo̱e̱ʼpo kenpaʼti Diosa ʼuruaʼda oʼnopo̱e̱po kenpaʼda
huadaknada oʼkikaʼ kanʼnopo̱e̱ʼpo, ayaʼada Jesucristotaj
huaknopo̱e̱ʼeria kenda oʼmanopo̱e̱a̱ʼdene.
\v 11 Dios kenda eʼkaʼtaʼ oʼpakonhuahuikaʼuyate. Jesucristo
oroʼomeyen Huairitaj oʼtaʼmonaʼdepo Diosa huadakda
oʼkikaʼnig kenpaʼti ʼuruaʼda oʼnopo̱i̱kaʼnig
oʼmanopo̱e̱a̱ʼuyate.
\v 12 Jesucristotaj oknopo̱e̱po, meʼpukhueʼ o̱ʼe̱po, Diostaj
tionaʼpakdik o̱ʼi̱kay, dakaʼ oʼnopo̱e̱ne.
\v 13 Do Pabloa opudtehuapaʼ paiʼda onʼnignopoʼe̱po
huabakuda̱ʼ jakyo i̱jje̱po kenda eʼtipe̱e̱piʼ Cristotaj
oknopo̱e̱batikhueʼ yanikatiʼ. Pabloa opudomeytaj paiʼda
onʼnignopoʼe̱nok opudomey huadakda o̱ʼne aratbut
nopo̱e̱ʼdik o̱ʼneapo.
\s Cristoa aratbuttaj huakkaʼda diʼnada moʼe̱po.
\p
\v 14 Konige̱po Huairi Jesucristoen Apag Diostaj huikudate
ijtihuadpo opudtehuapaʼ onʼnigtionaʼpakne.
\v 15 Kurudyo̱ hua̱e̱ʼeri kenpaʼti huadari hua̱e̱ʼeri Apag
Diosen huabet o̱ʼne.
\v 16 Apag Dios huadaknanada o̱ʼe̱. Huakkaʼda
oʼmatinepahuiʼikaʼ. Opudomeyen huanopoʼtaj dakaʼ
yamanopoʼteypakikaʼ. Diosen Noki̱re̱ga̱ opud
huaknopo̱e̱ʼeritaj teyaʼnada kamanopoʼteypakikeʼ. Kenda
onʼnigtionaʼpakne.
\v 17 Diostaj moknopo̱e̱nok Cristoa opudtaj huanopoʼyo
kamata̱ʼi̱keʼpo, onʼnigtionaʼpakne. Diostaj kenpaʼti nog
aratbuttaj batikhueʼda diʼ kanʼmaikeʼ. Kenpakon
onʼnigtionaʼpakne.
\v 18,19 Jesucristoa huakkaʼda diʼ oʼmaeonhuahuikaʼ.
Huakkaʼnanada diʼ oʼmaenok Cristoa diʼ huakkaʼda
oʼmaikaʼnig oroʼomey nopoenkahueʼdik o̱ʼe̱ne. Konig
Cristo huakkaʼnanada diʼ oʼmaikaʼnig opudomey ayaʼda
huaknopo̱e̱ʼeriere nogi̱ti nogi̱ti kanʼnopoenkikeʼ
kenpaʼti konig Cristo huakkaʼnanada diʼ oʼmae nogi̱ti
nogi̱ti kanoknopo̱i̱keʼ onʼtionaʼpakne. Konig Dios
o̱ʼi̱kaʼnig opudomey huanopoʼyo kanʼnopo̱i̱keʼ. Diosayoʼda
opudomeytaj kamanopoʼto̱i̱keʼ. Diosa ʼuruaʼda oʼnoikaʼpo
opudomeytaj kenpaʼda kamanopoʼto̱i̱keʼ. Konig Diosen
eʼnoeʼ kanʼnopoʼto̱i̱keʼ. Kendakon onʼtionaʼpakne.
\p
\v 20 Oyda “ʼUruaʼda o̱ʼe̱ Dios. Dakiti Dios,” aʼdik
o̱ʼi̱kaʼne. Diosnayo teynanada o̱ʼe̱nok katepiʼ
oʼtionaʼpakikaʼne nogda nogda huakkaʼnanada oroʼtehuapaʼ
o̱gkikaʼdik moʼi̱kaʼne. Ken konig oroʼnayo nopo̱e̱hueʼdikda
o̱ʼe̱ne. Dios teynanada o̱ʼe̱po huakkaʼnanada
tihuapokikaʼdik moʼe̱ne.
\v 21 “Dios ʼuruaʼda o̱ʼe̱.” “Dakiti Dios.” Jesucristo
Jesucristoen huaknopo̱e̱ʼeriere kadaʼonhuahuikeʼ oy kenpaʼti
nogok kadaʼonhuahuikeʼ.
\c 4
\s Ayaʼ Cristoen huaknopo̱e̱ʼeritaj Diosen Noki̱re̱ga̱
oʼmanopoʼto̱e̱nok onpapayoʼ onʼpakpo Diostaj
eʼnigpe̱i̱kaʼtaʼ onʼpakikaʼ.
\p
\v 1 Konige̱po Jesucristotaj ijnigpe̱i̱kaʼpo Jesucristoen
huadak huaʼa ijmanbatiaʼpakikameʼnok huabakuda̱ʼ jakyo do
i̱ji̱kay. Do Pabloa opudomeytaj dakaʼ oʼnonaʼne. Opudomey
dakaʼ kanʼnopoʼkoreʼpo ʼuruaʼda kanʼnigpe̱i̱keʼpo Diosa
opudomeytaj moʼbaktieʼeaʼuyne. Konige̱po Diosen ʼuruaʼda
ya̱gʼkikaʼ, kenpaʼti Diostaj yanʼnigpe̱i̱kaʼ.
\v 2 “Huadakda i̱ji̱kay.” “Kenpaʼda huadak ijkikay.”
“Huairi i̱jje̱y,” nopo̱e̱hueʼ moʼnikaʼ. “Nogomeynayo
huadakda o̱ʼne,” monʼnopo̱i̱kaʼ. Paiʼda aratbuttaj dakaʼ
monʼmato̱i̱kaʼ. Nogtaj nogtaj diʼ monʼmaikaʼ. Nog
aratbuttaj huadiayhueʼ moʼnikaʼ. Nogomey dakhueaʼ e̱gkapiʼ
konigti pakhueʼ moʼnikaʼpo diʼ monʼmaikaʼ. Dig
mahuanopo̱e̱hueʼ moʼnikaʼ.
\v 3 Opudomey huaknopo̱e̱ʼeri Diosen Noki̱re̱ga̱
huatihuapokeriere onpapayoʼ batikhueʼada Diostaj diʼnanada
moʼi̱kaʼpo yanʼnigpe̱i̱kaʼ. Kenpaʼti huayahuaya
yanʼmanoeya̱ʼikaʼ.
\v 4 Oroʼomey Jesucristotaj konigti oknopo̱e̱po konig
nogso̱ʼtida o̱ʼe̱ne. Konig Jesucristo nogso̱ʼtida o̱ʼe̱nig
oroʼ huaknopo̱e̱ʼeri konigti nogso̱ʼtida o̱ʼe̱ne. Diosen
Noki̱re̱gkon nogtida o̱ʼe̱. “Kurudyo̱ Diosere
moʼnoeonhuahuikaʼapone.” Diosa monaʼuyne. Kenda
onpapayoʼ oknopo̱i̱kaʼne.
\v 5 Nogtida Dios Huairi o̱ʼe̱. Oroʼomeya̱ konigdayoʼ
Diostaj oknopo̱i̱kaʼne. Nogtiedda Cristoen huadikte
huaknopo̱e̱ʼeritaj bautiza oʼmagkikaʼne.
\v 6 Oroʼomey huaknopo̱e̱ʼeri nogtida Apag Dios moʼta̱e̱ne.
Kentayoʼda ayaʼada oʼnigpe̱i̱kaʼne. Apag Diosa ayaʼ
oroʼomeytaj boʼtihuapokpo oʼkikaʼ. Kenpaʼti oroʼomeyere
o̱ʼi̱kaʼ.
\p
\v 7 Cristonayo ayaʼda oʼnopo̱e̱ ayaʼda kaʼdik o̱ʼe̱po nogta
nogta oroʼomeytaj huaknopo̱e̱ʼeritaj nogda nogda kikaʼdik
moʼnopo̱e̱a̱ʼne.
\v 8 Konige̱po kenpaʼ Diosbaʼa Cristotaj oʼtiaʼpakuyate:
\q Oʼnoyhuaddepo keʼnen takaʼtaj kenpaʼda huayakhueʼ
oʼmagkaʼdepo kurudyo̱ oʼtobehuikuyate. Aratbuttaj katetehueʼ
konig nogda nogda kikaʼdik nogta nogta
oʼmanopo̱e̱a̱ʼuyate. Kenda Apagbaʼa oaʼuyate.
\p
\v 9 “Kurudyo̱ oʼbehuikuyate.” Apagbaʼte Diosa oaʼuy. In
kenpaʼ oaʼnigda: Huakkuruda Cristo kurudya̱ʼ oʼhuarakuyate.
\v 10 Keʼna oʼhuarakuyate onteʼti oʼbehuikuyate. Kurudyo̱
kutayonanada oʼbehuikuyate. Ayaʼbayoda a̱ʼi̱kayaʼpo
oʼbehuikuyate.
\v 11 Konig nogda nogda eʼkaʼ huanopo̱e̱te
oʼmanopo̱e̱a̱ʼuyate. Doce huamataʼmoneritaj doeretakon konig
Cristo o̱ʼe̱ kenpaʼti kenda Jesúsa oʼkaʼuyate,
huamanbatiaʼpakikaʼte moʼmanopo̱e̱a̱ʼuyne Cristoa. Diosen
huaʼa ʼuruaʼda manaʼdik kaʼnikeʼpo Cristoa nogomeytaj
oʼmanopo̱e̱a̱ʼuy. Nogomeykon nogbayo nogbayo huaʼdik
o̱ʼnepo, “Cristotaj yanʼnoknopo̱e̱po yanʼnopoʼkoreaʼ.”
ʼUruaʼda manaʼdik kaʼnikeʼpo Cristoa nogomeytakon
oʼmanopo̱e̱a̱ʼuy. Cristotaj manmadikaʼdik kaʼnikeʼpo
nogomeytakon oʼmanopo̱e̱a̱ʼuy Cristoa. Huaknopo̱e̱ʼeri
e̱gkupopakikaʼte huamato̱e̱ʼeritaj Cristoa oʼmanopo̱e̱a̱ʼuy.
\v 12 Cristoa ken konig oʼmanopo̱e̱a̱ʼuynok ayaʼ
huaknopo̱e̱ʼeri Diostaj nigpe̱i̱kaʼdik o̱ʼnikaʼpo kenpaʼti
nogi̱ti nogi̱ti teyda yanʼnoknopo̱i̱kaʼapet.
\v 13 Kenda onʼmanmadikaʼonhuahuaʼnok kenpaʼti
Jesucristoen onʼmabatiaʼpakonhuahuaʼnok kenpaʼti
huaknopo̱e̱ʼeritaj onʼmantihuapokonhuahuaʼnok ayaʼda
oroʼomey huaknopo̱e̱ʼeria konigti Cristotaj kaknopo̱i̱keʼpo.
Oroʼomey huaknopo̱e̱ʼeri konigti oknopo̱e̱po konig
nogi̱ti nogi̱ti oknopo̱i̱kaʼapone, nogi̱ti nogi̱ti
oʼnigpe̱i̱kaʼapone. Kenda Diosa oʼpaknok oʼkikaʼapone. Ken
nogi̱ti nogi̱ti konig Cristo o̱ʼi̱kaʼnig oroʼomeykon
konigti o̱ʼi̱kaʼapone. Kenpaʼti nogi̱ti nogi̱ti konig
Cristo oʼkikaʼuyatenig oroʼomeya̱kon konigti oʼkikaʼapone.
\v 14 Konig isiʼpo e̱ʼi̱kapaʼ ehueʼ moʼnikaʼ. Isiʼpo nogda
nogda eʼmanmadikaʼtaj onʼmape̱i̱kaʼ. Kenpaʼti namaʼda
eʼmanmadikaʼtada onʼmanigpeunkikaʼ. Ken konig isiʼpo
e̱e̱ʼpaʼ ehueʼ moʼnikaʼ. Oroʼnayo nogded eʼmanmadikaʼ
oknopo̱e̱hueʼ o̱ʼi̱kaʼne. Sueʼada huamanmadikaʼeria namaʼda
onʼmanmadikaʼapo. Kenomeytaj pe̱e̱hueʼdik o̱ʼe̱ne.
\v 15 Diʼ monʼmaepo Diosen buttida huaʼa monʼbatiaʼpakikaʼ.
Cristotaj nogi̱ti nogi̱ti moʼnoknopo̱i̱kaʼ. Konig Cristoa
oʼkikaʼuyatenig konigti nogi̱ti nogi̱ti mogkikaʼ.
Oroʼomey huaknopo̱e̱ʼeri konig Cristoen hua̱so̱ʼ o̱ʼe̱ne.
Cristo konig oroʼomeyen huanopoʼ o̱ʼe̱.
\v 16 Cristo oroʼomeyen huanopoʼ o̱ʼe̱nok ayaʼada onpapayoʼ
Cristotaj oʼnigpe̱i̱kaʼne. Huayahuaya Cristotaj
aknopo̱i̱kayaʼpo oʼbatihuapokikaʼne. Konig Cristoenso̱ʼ
Cristotaj nogi̱ti nogi̱ti oknopo̱e̱po konig eʼkerekonig
o̱ʼi̱kaʼne. Onpapayoʼ Cristoen dakaʼ oʼkikaʼne. Kenpaʼti
nogi̱ti nogi̱ti, huayahuaya diʼ oʼmaikaʼapone.
\s Cristotaj oknopo̱e̱po konig huabonopoʼda Diosen ʼuruaʼda
mogkikaʼ.
\p
\v 17 Kenda Cristo Huairia menaʼuynig opudomeytaj
oʼnonaʼne. Konig oknopo̱e̱hueʼ hua̱e̱ʼeri o̱gkikaʼ
konigti opudomey boʼkikaʼuy. Oynayo konig oknopo̱e̱hueʼ
hua̱e̱ʼeri o̱gkikaʼnig konigti kikahueʼ yanikaʼ.
Kenomeynayo namaʼda onʼnopo̱i̱kaʼpo namaʼda o̱gkikaʼpo
\v 18 oknopo̱e̱hueʼ hua̱e̱ʼeri Cristotaj eknopo̱e̱ʼtaʼ pakhueʼ
o̱ʼnikaʼ. Konig ekpobig o̱ʼnepo Diostaj oknoponkahueʼda
o̱ʼnikaʼ. Huadak eʼkaʼ noponkahueʼ o̱ʼnepo konig
sikki̱re̱gyo̱nig o̱ʼnepo Diostaj oknopo̱e̱hueʼdik o̱ʼnikaʼ.
Konig Dios oʼkikaʼnig kenomey kikahueʼdik o̱ʼnikaʼ.
Konige̱po Diostaj oknopo̱e̱hueʼ hua̱e̱ʼeritaj ʼuruaʼda
manoeanhuahuikahueʼdik oʼmaikaʼapo.
\v 19 Dakhueaʼ eʼkikaʼada oynayo dakhueaʼ kahueʼ i̱jje̱y
namaʼda onʼnopo̱e̱po birahueʼda o̱ʼnikaʼ. “Katepiʼ ijpakpo
ijkaʼapoy.” Onʼnopo̱i̱kaʼpo. Nogtaj nogtaj ettoneʼpiʼ
huabokerekapiʼ eʼbakdejtaʼ onʼeretpakikaʼ. Nogda nogda
dakhueaʼ eʼkikaʼtaʼ enʼeretpakikaʼtada.
\v 20 Ken konig huakikaʼ Cristoanayo onmadikahueʼ
moeʼuyne.
\v 21,22 Jesucristoen huadak huaʼa eʼpe̱e̱nayo kenpaʼti
Jesústaj buttida eʼmanmadikaʼtaj eʼnigpe̱e̱ʼnayo konig
aʼnen huanopoyaʼda dakhueaʼnanada moʼnopo̱i̱kaʼpo
dakhueaʼda eʼkikaʼtaʼ boʼeretpakikaʼpo konig dakhueaʼ
bokikaʼnig kenpaʼda yanʼbatiktiʼ.
\v 23 Nogpaʼda konig huabonopoʼda huaboaʼda
yanʼnopo̱i̱kaʼpo yanʼeretpakpo huadakyoʼnanada
ya̱gʼkikatiʼ.
\v 24 Konig Dios oʼpaknig huabonopoʼda ʼuruda
yanʼnopoʼto̱i̱kaʼ. Konig Diosennopoʼ yanʼnopoʼto̱i̱kaʼ.
Diosa eʼtihuapokte dakaʼ yanʼnigpe̱i̱kaʼ. Diosenyoʼda dakaʼ
ya̱gʼkikaʼ. Konig Diosa huadakda oʼkikaʼnig konigti
ya̱gʼkikatiʼ.
\p
\v 25 Konige̱po da ahueʼ yanikaʼ. Oroʼomey Cristotaj
oknopo̱e̱po konig nogso̱ʼtida o̱ʼe̱nok huayahuaya buttida
modaʼikaʼ.
\p
\v 26 Eʼhuadiaynayo dakhueaʼ kahueʼ yaneʼ. Dakhueaʼ onahueʼ
yaneʼ. I̱da eʼdiay yanʼbatik. Kenmeʼnoeteda yanʼbatik.
\v 27 Opuda̱ kanʼdiayeʼ kenpaʼti dakhueaʼ ka̱gkeʼ totoʼ huairia
oʼpakikaʼ. Kentaj nigpe̱e̱hueʼ yanikaʼ. I̱da eʼdiay
yanʼbatikikaʼ. Dakhueaʼ kahueʼ yanikaʼ.
\p
\v 28 Opudomey sueʼada huabereeri moʼi̱kaʼuy. Kenpaʼda
yanʼbatik onteʼti berehueʼ yanikaʼ. Berehueʼada huadakda
yanʼbaaʼikaʼ. Dakaʼ yanʼbaaʼpo katepiʼ paiʼda aratbuttaj
bayokikaʼdik moʼe̱a̱pone.
\p
\v 29 Huaʼa dakhueʼdik ahueʼ yanikaʼ. Huaʼa huadakdik
e̱ʼhua̱e̱ʼ yanʼmanaʼikaʼ. Ken huaʼa huadakdik aratbuttaj
nogi̱ti nogi̱ti yanʼmaknopo̱e̱a̱ʼikaʼ kenda
yanʼmanaʼikatiʼ. Ken huaʼa huadakdik aratbuttaj
yanʼmadurugpakaʼ kenda yanʼmanaʼikaʼ.
\v 30 Dakhueʼdik huaʼa eʼmanaʼnayo Diosen Noki̱re̱gtaj suhueʼ
o̱ʼe̱a̱ʼnok dakhueʼdik huaʼa ahueʼ yanikaʼ. Diosen o̱ʼe̱y
Diosen Noki̱re̱ga̱ oroʼomeytaj moʼnopo̱e̱a̱ʼikaʼne. Ken
huameʼnoe nogok Cristo eʼtiakdeʼte kurudyo̱ Diosere
kaʼnikeʼpo aʼtohuayaʼpo kenokaʼ Diosen o̱ʼe̱y Diosen
Noki̱re̱ga̱ moʼnopoeanhuahuaʼapone.
\p
\v 31 Dig nopo̱e̱hueʼ yanikaʼ. Sigpiʼ bahuadiayhueʼ yanikaʼ.
Yanʼdiaypo ʼuttaʼda maboyhueʼ yanikaʼ. Matidiʼkehueʼ
yanikaʼ. Kenpaʼti nogomeytaj dakhueaʼ kahueʼ yanikaʼ.
\v 32 Nogpaʼdakon ʼuruaʼda ya̱gʼkikaʼ. Huayahuaya diʼda
yanʼmaikaʼpo huadakda ya̱gʼkikaʼ. Huadakda yanʼbatiaʼpakikaʼ.
Huayahuaya yanʼmatinepahuiʼpo. Huayahuaya yanʼbakkahueaʼikaʼ
Cristotaj moknopo̱e̱nok Diosa opudomeytaj bokkahueaʼuyne
konigti noga̱ namaʼda e̱gkaʼnayo yaʼnokkahueaʼikaʼ.
\c 5
\s Diosensiʼpo moʼe̱po sigpiʼ dakhueaʼ kahueʼ ya̱ʼnepo
huadakyoʼ yanikatiʼ.
\p
\v 1 Opudomey Diosensiʼpo moʼe̱nok Diosa huakkaʼ diʼ
moʼi̱kaʼne. Konig Dios o̱ʼi̱kaʼnig konigti opud a̱ʼe̱ya̱ʼ
yanʼnopo̱i̱kaʼpo konig Diosa oʼkikaʼnig konigti
ya̱gʼkikatiʼ.
\v 2 Huayahuaya diʼ yanʼmaikaʼ. Konig Cristoa diʼ
moʼi̱kaʼne konigti huayahuaya diʼ yanʼmaikaʼ. Cristoa diʼ
moʼmaepo oroʼtaj oʼpaknok huabokereka onʼtohuaʼpo
oroʼomeyen dakhueaʼ eʼkaʼ oʼto̱e̱nok Cristotaj
moʼnigarakuyate. Konig ʼuru ovejataj onʼarakikaʼpo Diostaj
onʼyokikaʼpo, ken konig o̱gkaʼpo konig ʼuruʼhui̱e̱da Diosa
durugda oʼhui̱ri̱kuy. Ken konig Cristoa diʼ moʼmaepo
moʼnigbueyʼuyatenok huayahuaya diʼ yanʼmaeʼikaʼ.
\p
\v 3 Diostaj moknopo̱e̱po Diosensiʼpo moʼe̱depo nogen
hua̱to̱e̱ʼtaj bakdejhueʼ yanikaʼ. Kenpaʼti to̱e̱pakhueda̱da
nogtaj nogtaj bakdejhueʼ yanikaʼ. Nogda katepiʼ dakhueʼda
e̱e̱ʼnayo kahueʼ yanikaʼ. Katetapiʼ nogenpiʼ eretpakhueʼ
yanikaʼ. Opudomeytaj dakhueaʼ oʼkaʼ huaahueʼdik kaʼnikeʼ.
\v 4 Konig dakhueʼdik manahueʼ yanikaʼ. Konig namaʼda
huasegeapaʼ batiaʼpakhueʼ yanikaʼ. Kanʼerikeʼpo dakhueʼdik
manbatiaʼpakhueʼ yanikaʼ. Ken konig eʼikaʼnayo dakhueʼda
o̱ʼe̱. Dios huadakda o̱ʼe̱ yanʼhuaaʼikaʼ. Kentaj dakiti
ya̱ʼnonaʼikaʼ.
\v 5 Aratbut nogen hua̱to̱e̱ʼtaj enʼbatohuedikaʼnayo, nogtaj
nogtaj dakhueaʼda eʼkikaʼnayo aratbut nogentaʼ
eʼeretpakikaʼnayo Cristoere kenpaʼti Diosere
noeonhuahuikahueʼ o̱ʼneapo. Kenomey konig Diosensiʼpo
ehueʼ o̱ʼneapo. Kenda opudomey dakaʼ moʼnopo̱e̱ne.
Nogentaʼ eʼeretpak konigti eʼketkaʼ diostaj eʼeretpakonig
o̱ʼe̱.
\v 6 “Katepiʼ boʼpakpo kaʼdik moʼe̱ne dakhueaʼ eʼkaʼ ehueʼ
o̱ʼe̱.” Sueʼada namaʼda monaʼapetpiʼ. Ken namaʼda
eʼmanaʼ o̱ʼe̱. Pe̱e̱hueʼ yanikatiʼ. Aratbut ken konig
dakhueaʼ o̱gkikaʼpo Diostaj nigpe̱e̱hueʼ hua̱e̱ʼeritaj Diosa
oʼbahuadiaypo diga̱ʼ castiga oʼmagkaʼapo.
\v 7 Kenomey Diostaj nigpe̱e̱hueʼ hua̱e̱ʼeriere dakhueaʼ
kahueʼ yanikaʼ.
\p
\v 8,9 Aʼnenda Diostaj oknopo̱e̱hueʼ moʼi̱kaʼuy. Konig
sikki̱re̱gya̱ʼ dakhueaʼ bokikaʼuynigʼa oyda Jesucristo Huairitaj
moknopo̱e̱po huakjeyyo moʼi̱kaʼne. Aratbut Cristotaj
oʼnoknopo̱e̱po huakjeyyo onʼnoikaʼpo huadakda o̱ʼnikaʼ,
Diostaj onʼnigpe̱i̱kaʼ. Buttida huaʼa onʼpe̱i̱kaʼ. Buttida
onʼbatiaʼpakikaʼ. Oyda Jesús Huairitaj moknopo̱e̱po.
Huakjeyyo yanikaʼpo, huadakda yanʼkikaʼpo, Diostaj
yanʼnigpe̱i̱kaʼ. Kenpaʼti buttida yanʼbatiaʼpakikaʼ.
\v 10 Kenda Jesús Huairi oʼpakikaʼnig aʼnopo̱e̱yaʼpo
nogi̱ti nogi̱ti yanʼpakpo yanʼnopo̱i̱kaʼ.
\v 11 Diostaj oknopo̱e̱hueʼ hua̱e̱ʼeri konig sikki̱re̱gyo̱
o̱ʼnikaʼpo dakhueaʼda o̱gkikaʼpo namaʼda o̱gkikaʼnig.
Kenomeyere konig o̱gkikaʼ konigti kikahueʼ yanikaʼ.
Opudomeynayo Cristotaj moknopo̱e̱po, moʼnigpe̱i̱kaʼpo
huadakda boʼkikaʼnok kenomey dakhueaʼ huakikaʼeri i̱jje̱ya̱ʼ
huataʼ yaʼnoknopo̱a̱petpiʼ.
\v 12 Oknopo̱e̱hueʼ hua̱e̱ʼeriomey konig sikki̱re̱gyo̱
o̱ʼnikaʼpo konig i̱re̱gi̱re̱g dakhueaʼnanada o̱gkikaʼ.
Kenda o̱gkikaʼnig
batiaʼpakhueʼdik, o̱ʼe̱ne. Kenda
eʼbatiaʼpaknayo biraʼdik o̱ʼe̱a̱pone. Kenda o̱gkikaʼnig
dakhueʼnanada o̱ʼe̱nok.
\v 13 Opudomeynayo huadakda boʼkikaʼpo Cristo Huairitaj
moʼnigpe̱i̱kaʼpo konig huakjey moʼe̱ne. Huakjeyyaʼ katinig
tiahuaydik o̱ʼneaponok, opudomeytaj onʼtiahuaydepo
dakhueaʼda oʼkikay huataʼ yanʼtinopo̱a̱pet.
\v 14 Konige̱po,
\q Dakhueaʼda boʼkikaʼpo eʼbueyonig konig eʼtaiʼonig
moʼe̱ne. Yanʼmaboʼ yanʼnopoʼkoreaʼ. Cristoa o̱ʼnen huakjey
o̱ʼe̱a̱po. Kenpaʼ onʼbatadiʼkeaʼikaʼ.
\p
\v 15 Dakaʼ yanʼnopo̱e̱po ya̱gʼkikaʼ. Konig Diosenbaʼtaj
nopo̱e̱hueʼ hua̱e̱ʼeri o̱gkikaʼ konigti kikahueʼ yanikaʼ.
Konig aratbut Diosen buttida huaʼa onʼnopo̱e̱po ʼuruaʼda
o̱gkikaʼ konigti ʼuruaʼda ya̱gʼkikatiʼ.
\v 16 Ayaʼ huameʼnoete menokapiʼ huadak kaʼdik ya̱ʼnepo
huadakda ya̱gʼkikatiʼ. Beʼtapiʼ dakaʼ yanʼbatihuapokikatiʼ.
\v 17 Huasego̱nig ehueʼ yanikaʼpo kenda Jesús Huairia
oʼpakikaʼnig dakaʼ yanoknopo̱e̱po ya̱gʼkikaʼ.
\v 18 Borracho kikahueʼ yanikaʼ. Beʼapiʼ borracho eʼkikaʼnayo
dakhueaʼnada̱ kikaʼdik ya̱ʼneapet. Dakhueaʼ manaʼpakdik
yanikaʼapet kenpaʼti Diostaj Jesucristotere oknopo̱i̱kahueʼ
ya̱ʼneapet. Konige̱po borracho opud ehueʼ moʼe̱nok
opudomeyennopoʼtaj Diosa kamanopoʼto̱i̱keʼ. Diosen
Noki̱re̱ga̱ moʼnopoʼdurugpakikaʼapone.
\v 19 Diosa moʼnopoʼto̱e̱nok, “Dios huadakda o̱ʼe̱.”
“Jesucristo Huairi ʼuruaʼda o̱ʼe̱.” Huayahuaya
yanʼmanbatiaʼpakikaʼpo yanʼbatadiʼkikaʼ. Jesucristo Huairitaj
yanʼbatadiʼkikaʼ. Huanopoyaʼda durugda ya̱ʼnepo
yanʼbatadiʼkikaʼ.
\v 20 Apag Diostaj dakiti ya̱ʼnonaʼikaʼ. Ayaʼda katepiʼ
huadakpiʼ dakhueʼ e̱e̱ʼpiʼ dakiti ya̱ʼnonaʼikaʼ. Oroʼomeyen
Jesucristo Huairi kenda oʼpaknok dakiti ya̱ʼnonaʼikaʼ.
\s Huabokereka hua̱to̱e̱ʼtaj diʼ e̱ʼdik yanikaʼ. Ettoneʼa̱
hua̱to̱e̱ʼtaj nigpe̱i̱kaʼdik yanikaʼ.
\p
\v 21 Diostaj yanʼnigpe̱i̱kaʼpo huayahuaya diʼ yanʼmaikaʼ.
Huayahuaya yanʼmanigpe̱i̱kaʼ. Yanʼbatihuapokikaʼ.
\p
\v 22 Opudomey ettoneʼ konig Jesús Huairitaj
moʼnigpe̱i̱kaʼ konigti hua̱to̱e̱ʼtaj yanʼnigpe̱i̱kaʼ.
\v 23 Konige̱po ettoneʼen hua̱to̱e̱ keʼnen huairi o̱ʼe̱.
Huabokerek hua̱to̱e̱ʼtaj diʼ o̱ʼe̱po, oʼtiokikaʼpo, kenpaʼti
oʼtihuapokikaʼ. Konigti Cristoen huaknopo̱e̱ʼerien huairi
o̱ʼe̱. Huaknopo̱e̱ʼeritaj oʼbakkahueaʼpo,
oʼmanoeanhuahuikaʼpo, oʼbatiokikaʼ. Huaknopo̱e̱ʼeri konig
Cristoen hua̱so̱ʼ o̱ʼne. Cristo konig huaknopo̱e̱ʼerien
huanopoʼ o̱ʼe̱.
\v 24 Konig ayaʼ huaknopo̱e̱ʼeri Cristotaj oʼnoknopo̱e̱po
onʼnigpe̱i̱kaʼ. Konigti ettoneʼa̱ hua̱to̱e̱ʼtaj
nigpe̱i̱kaʼdik yanikaʼ.
\p
\v 25 Konig Cristo ayaʼ huaknopo̱e̱ʼeritaj diʼ moʼe̱po
moʼnigbueyʼuyate. Konigti opudomey huabokereka hua̱to̱e̱ʼtaj
diʼnada yanikaʼ.
\v 26 Huaknopo̱e̱ʼeritaj ʼuruda huanopoʼ kaʼnikeʼpo kenpaʼti
Diosenyoʼda kaʼnikeʼpo Cristo diʼda moʼe̱po
moʼnigbueyʼuyate. Ayaʼ huaknopo̱e̱ʼeritaj diʼda moʼe̱po
moʼnigbueyʼuyate. Konig hue̱ʼe̱ya̱ bautiza e̱gkaʼ kenpaʼti
Cristotaj huadak huaʼa onʼnigpe̱i̱kaʼpo Cristoa
huaknopo̱e̱ʼeritaj moʼmanopoʼtihuekeaʼuyate.
\v 27 ʼUruaʼda huaknopo̱e̱ʼeritaj kurudyo̱ Cristote eʼbatohuataʼ
Diosa oʼpak. Huaknopo̱e̱ʼeri ʼurunopoʼda onʼto̱e̱nok dakhueaʼ
kahueʼda diayhueʼda ken konig huaknopo̱e̱ʼeritaj Cristote
eʼbatohuataʼ Diosa oʼpak. Kurudya̱ʼ eʼbaetaʼ oʼpak. Cristo kenda
oʼpakpo oroʼomey huaknopo̱e̱ʼeritaj moʼnigbueyʼuyate.
\v 28 Ken huabokerekpiʼ konig huataʼda diʼda o̱ʼi̱kaʼnig
konigti hua̱to̱e̱ʼtaj diʼnada yanikaʼ. Konige̱po
huabokerek hua̱to̱e̱ere konig nogtida o̱ʼe̱po hua̱to̱e̱ʼtaj
diʼ o̱ʼe̱po konigti huataʼda diʼ e̱e̱ʼonigti o̱ʼe̱.
\v 29,30 Beʼapiʼ huataʼ huadiayhueʼ o̱ʼnikaʼ. Huataʼ onʼpakpo
onʼbapeʼikaʼ, dakaʼ onʼo̱o̱ʼi̱kaʼ, kenpaʼti yudtaj onʼotikaʼ.
Kenpaʼti konig Jesucristo ayaʼ huaknopo̱e̱ʼeritaj diʼ
oʼmaepo dakaʼ moʼmato̱e̱ʼikaʼne.
Huaknopo̱e̱ʼeri keʼnen
hua̱so̱ʼ konig o̱ʼnenok.
\v 31 “Aʼto̱e̱pakyaʼpo huabokerekpiʼ huaojtaj hua̱ye̱tere
oʼmakke̱ypo oʼto̱e̱pakdepo, bottaʼ e̱ʼe̱a̱da konig
nogso̱ʼtida o̱ʼne.” Kenda Apagbaʼa oaʼ.
\v 32 Konigti Cristo oroʼomeyere o̱ʼe̱. Oroʼomey ayaʼada
huaknopo̱e̱ʼeri oknopo̱e̱po oʼnigpe̱i̱kaʼpo konig
Cristoenso̱ o̱ʼe̱ne. Kenere nogso̱ʼtida o̱ʼe̱ne. Kenda
i̱re̱gi̱re̱g o̱ʼi̱kaʼuyniga oynayo oʼnopo̱e̱ṉe. Ijjay.
\v 33 Onteʼti oʼnonapone. Opudomey huabokerek ayaʼada
o̱ʼnen hua̱to̱e̱ʼtaj diʼda i̱kaʼdik moʼe̱ne. Konig huataʼ
diʼda moʼi̱kaʼ konigti hua̱to̱e̱ʼtaj diʼda yanikaʼ.
Opudomey ettoneʼ o̱ʼnen hua̱to̱e̱ huadakda meʼte̱ne
yanʼnopo̱i̱kaʼpo yanʼnigpe̱i̱kaʼ.
\c 6
\p
\v 1 Huasiʼpo Jesús Huairitaj moknopo̱e̱po opuden huaojtaj
hua̱ye̱tere yanʼnigpe̱i̱kaʼ. Kenda huadakda o̱ʼe̱nok kenda
kikaʼdik moʼe̱ne.
\v 2,3 Opuden huaoj hua̱ye̱ere huadakda meʼta̱e̱ne
yanʼnopo̱i̱kaʼpo yanʼmanigpe̱i̱kaʼ. “Apag hua̱ye̱tere
huadakda meʼta̱e̱ne eʼnopo̱i̱kaʼnayo kenpaʼti
eʼmanigpe̱i̱kaʼnayo Diosa moʼdurugpakikaʼapone kenpaʼti
huakkaʼda huabayok moʼnoeanhuahuikaʼapone in huadariyo.”
Ken konigyoʼda huakkuruteda Apagbaʼte Diosa oaʼuyate.
\p
\v 4 Opud huaoa o̱ʼnensiʼpotaj yanʼmahuadiaypo diga̱ʼda
mabitbithueʼ yanikaʼ. Diga̱ʼda eʼmabitbitnayo huasiʼpoa
boʼhuadiayapone. Huasiʼpo nigpe̱e̱hueʼ e̱e̱ʼnayo sueʼdapiʼ
castiga yanʼmagkikaʼ. Huasiʼpotaj yanʼmanmadikikaʼpo Jesús
Huairitaj dakaʼ eknopo̱e̱ʼ nogi̱ti nogi̱ti eknopo̱e̱ʼ
yanʼmanmadikikaʼ. Jesús Huairitaj nogi̱ti nogi̱ti
eʼnigpe̱i̱kaʼ dakaʼ yanʼmanmadikikaʼ.
\p
\v 5 Opudomey huanabaʼa o̱ʼnen huairitaj yanʼnigpe̱i̱kaʼ.
Dakaʼ yanʼnopo̱e̱po yanʼnigpe̱i̱kaʼ. Yanʼmakmeʼpukpo
yanʼnigpe̱i̱kaʼ. Konig Cristotaj moʼnigpe̱i̱kaʼ konigti
o̱ʼnen huairitaj dakaʼ yanʼnigpe̱i̱kaʼ.
\p
\v 6 O̱ʼnen huairia eʼtiahuayteyoʼda dakaʼ kahueʼ yanikaʼ.
Huairia tiahuayhueʼ e̱e̱ʼpiʼ huadakaʼda ya̱gʼkikaʼ. Konig
Cristoen huanabaʼ Diostaj aʼdurugpakayaʼpo yanʼpakpo dakaʼ
ya̱gʼkikaʼ.
\v 7 Huabokerek huairitaj moʼbaaʼpo moʼnigpe̱e̱po,
“Huabokerektayoʼda ijnigkay.” Nopo̱e̱hueʼ ya̱ʼnepo, “Dios
Huairitakon ijnigbaay.” Yanʼnopo̱e̱po durugnopoʼda huadakda
yanʼbaaʼikaʼ.
\v 8 Huanabaʼpiʼ huanabaʼ ehuepiʼ nogaʼti katepiʼ huadak
eʼkikaʼnayo Jesús Huairiakon konigti huadak
moʼnigkikaʼapone. Kenda moʼnopo̱e̱ne.
\p
\v 9 Opudomey huairi moʼe̱po huanabaʼ moʼto̱e̱po daknopoʼda
huanabaʼtaj yanʼmato̱i̱kaʼ. “Huakkaʼda baahueʼ e̱e̱ʼnayo
castiga o̱gkaʼapone.” Huanabaʼtaj i̱ghuaʼda manahueʼ
yanikaʼ. Opudomey huairi huanabaʼere Jesucristo Huairien
huanabaʼ moʼe̱ne. Okkahuehueʼ yanikaʼ. Jesucristo kurudyo̱
o̱ʼi̱kaʼ. Jesucristo Huairi ayaʼ huabokerektaj konigti oʼpak.
Huairitaj konigti oʼpak. Huanabaʼtaj konigti oʼpak.
\s Oroʼomeya̱ Cristotaj oknopo̱e̱nok totoʼ huairia oroʼtaj
eʼbatikataʼ boʼtipakikaʼne. Totoʼtaj dakaʼ yanʼtiokaʼikaʼ. Pabloa monmadikaʼuyne.
\p
\v 10 Oydakon oʼnonapone, egomey. Jesucristo Huairi
teynanada o̱ʼe̱. Kentaj oknopo̱i̱kaʼnok teyda totoʼtaj
moʼnoki̱kaʼ.
\v 11 Takaʼtaj huatiokaʼ Romano sorotataj siro akumoot
onʼotikaʼpo, bakaʼbijtoneʼ onʼotikaʼpo sirope̱g huaka̱gkate
onʼbetaʼpo teyda huaʼiot onʼotpo sirope̱g huatiokaʼ
onʼbapadpo, kenpaʼti huabid siro onʼbapadikaʼ. Hua̱so̱ʼ ayaʼda
keʼna beʼtiokeʼpo onʼotpo. Opudomeyen takaʼ totoʼ huairi
o̱ʼne. Opudomey dakhueaʼ ka̱gkikeʼpo totoʼa namaʼda
monikaʼne. Diostaj eknopo̱i̱kaʼ eʼbatikataʼ huakkaʼ
boʼtipakikaʼnok Diostaj dakaʼ aknopo̱i̱kayaʼpo
oknopo̱e̱batikhueʼ a̱ʼe̱ya̱ʼpo Diosen huatiokaʼ yanʼotikaʼ.
Diosa opudomeytaj kabatiokikeʼ.
\v 12 Konige̱po oroʼomeyen takaʼ
aratbuten hua̱so̱ʼnig
ehueʼ o̱ʼne. Oroʼomeyen takaʼtaj tiahuayhueʼdik o̱ʼe̱ne.
Ken oroʼomeyen takaʼ totoʼ huairi o̱ʼne. Huiyokda o̱ʼne.
Teyda o̱ʼne. Huakkaʼnanada aratbuta totoʼtaj
onʼnigpe̱i̱kaʼpo dakhueaʼda o̱gkikaʼ. Sikki̱re̱gya̱ʼ totoʼ
dakhueaʼ huakaʼeri o̱ʼne. Ayaʼyoda huabada totoʼa dakhueaʼ
onʼmanaʼikaʼ.
\v 13 Kenokaʼ totoʼ huiyoknanada eʼmanataʼ
oʼeretpakikaʼnok, kenokaʼ da eʼmanataʼ oʼeretpakikaʼnok
namaʼda kahueʼ a̱ʼe̱ya̱ʼpo oknopo̱e̱batikhueʼ a̱ʼe̱ya̱ʼpo
Diosen teyda huatiokaʼ dakaʼ monʼotikaʼ.
\v 14 Diostaj buttida eʼmanmadikaʼ oʼnigpe̱i̱kaʼpo konig
boʼtiokaʼnok totoʼtaj pe̱e̱hueʼ moʼnikaʼ. Suigpiʼ dakhueaʼ
kahueʼ moʼnikaʼ. Suigpiʼ da ahueʼ moʼnikaʼ. Kenpaʼti buttida
moʼdaʼikaʼ. Kenda buttida huamanmadikikaʼ konig
bakaʼbijtoneʼ boʼtiokeʼpo monʼotikaʼ. Huadakda
mogkikaʼ.
Diostaj monʼnigpe̱i̱kaʼ. Ken konig oʼkikaʼpo konig Romano
sorotataj sironokbeta huaka̱gkataʼ onʼtiokaʼikaʼnig. Ken
konig Diostaj monʼnigpe̱i̱kaʼpo totoʼ huairitaj
monʼnopoʼtiokikaʼ.
\v 15 Jesucristoen huadak huaʼa aʼmanbatiaʼpakyaʼpo nogi̱ti
nogi̱ti Cristotaj yanoknopo̱i̱kaʼ. Konig Romano sorotataj
aʼhuayaʼpo huaʼi teyda onʼiotikaʼ. Ken konig yanʼotikaʼ.
\v 16 Oroʼomeyen huanopoʼ huanopoʼkoreaʼeritaj Jesucristotaj
dakaʼ moʼnoknopo̱i̱kaʼ. Ken konig oknopo̱i̱kaʼpo konig
Romano sorotataen sirope̱g huatiokaʼ onʼto̱i̱kaʼpo takaʼen
pi̱ya̱ʼtaj onʼtiokaʼikaʼ. Totoʼ oroʼomeyen takaʼ oroʼomeytaj
engaña e̱gkikaʼtaʼ oʼeretpakpo konig pi̱ya̱ʼ eʼbakpaka
oroʼomeytaj eʼtinajdajonig o̱ʼe̱. Cristotaj dakaʼ
oknopo̱i̱kaʼpo konig huatiokaʼ o̱ʼe̱. Totoen pi̱ya̱ʼ eʼbakpaka
huekhueʼdik moʼe̱ne. Dakhueaʼ kikahueʼ o̱ʼe̱a̱pone.
\v 17 Diosa oroʼomeytaj moʼnopoʼkoreʼpo Jesucristotaj dakaʼ
moʼnoknopo̱i̱kaʼ ken konig Romano sorotataen siro akumoot
onʼta̱e̱po huakutaʼ beʼtiokeʼpo onʼkumootikaʼ. Apagbaʼ
monʼtiahueyikaʼpo monʼmanaʼikaʼ. Apagbaʼ monʼnopo̱i̱kaʼpo
moʼnoknopo̱i̱kaʼ. Apagbaʼ konig Diosen Noki̱re̱gen huabid
sironig totoʼtaj huatiokaʼ o̱ʼi̱kaʼ.
\v 18 Kenda mogkikaʼpo Diostaj monʼtionaʼpakikaʼ. Kenda
Diosa oʼpaknok monʼtionaʼpakikaʼ. Diosen Noki̱re̱ga̱
boʼtihuapoknok monʼtionaʼpakikaʼ. Taytayaʼ ahueʼada
monʼtionaʼpakikaʼ. Batikhueʼada monʼtionaʼpakikaʼ. Ayaʼ
Cristotaj huaknopo̱e̱ʼeritaj monʼmationaʼpakikaʼ.
\v 19 Doʼtakon menʼtionaʼpakikaʼ. Do eʼmanmadikaʼte Dios
doʼtaj keʼnen huaʼa meʼnopoenkeʼpo Cristoen
huamanopoʼkoreaʼ huaʼa doʼhua meʼpukhueʼada
kamanbatiaʼpakikeʼpo menʼtionaʼpakikaʼ. Aʼnenda Cristoen
huamanopoʼkoreaʼ huaʼa Diosayoʼda oʼnopo̱i̱kaʼuyate.
\v 20 Cristoen huadak huaʼa nog aratbuttaj judío ehueʼ
e̱ʼhua̱e̱ʼtaj kamanbatiaʼpakeʼpo Dios huairia meʼtaʼmonaʼuyne.
Huadak huaʼa ijmanbatiaʼpakikameʼpo huabakuda̱ʼ jakyo i̱ji̱kay.
Meʼpukhueʼda Cristoen huadak huaʼa manbatiaʼpakdik
i̱ji̱kaʼnok doʼtaj menʼtionaʼpakikaʼ.
\s Keneʼhue̱a̱ʼ Pabloa saludos oʼdiktaʼmonaʼuy.
\p
\v 21 Tíquico huaknopo̱e̱ʼeri huamaʼbuy huadiʼda moʼta̱e̱ne.
Jesús Huairien huadak huaʼa doere batikhueʼada
oʼmanbatiaʼpakikaʼ. Do konig i̱ji̱kaʼnig opudtaj
monbatiaʼpakapet. Kenda ijkikaʼnig monbatiaʼpakapet.
\v 22 Konige̱po opudomeyte Tíquicotaj onʼnigtaʼmonaʼne.
I̱yo̱ konig oʼmaikaʼnig monbatiaʼpakpo opudomeytaj
moʼmanopoʼdurugpakeʼ.
\p
\v 23 Apag Dios Jesucristoerea huamaʼbuy huaknopo̱e̱ʼeritaj
moʼmanoeyi̱keʼ, huayahuaya diʼ moʼmaikeʼ, kenpaʼti dakaʼ
yanoknopo̱i̱katiʼ.
\v 24 Ayaʼda Jesucristo Huairitaj batikhueʼda diʼ o̱ʼnenok
kenomeytaj Diosa moʼmadurugpakikeʼ kenpaʼti
moʼmatinepahuikeʼ. Kenegda ijjay.