\id COL
\h COLOSENSES
\toc1 Colosenses
\toc2 Col
\mt1 COLOSENSES
\mt2 Pabloa Colosas huakkaʼ jak huaknopo̱e̱ʼeritaj oʼmanigmadoyaʼuyate.
\c 1
\s Pabloa Colosas huaknopo̱e̱ʼeritaj oʼmanigmadoyaʼuyate.
\p
\v 1 Do Pablo i̱jje̱y. Jesucristoen huadak huaʼa
kamanbatiaʼpakikeʼpo Diosa meʼtaʼmonaʼuyne. Huamaʼbuy
Timoteoere o̱ʼe̱po
\v 2 Cristoen huaknopo̱e̱ʼeri huamaʼbuy moʼe̱ne.
Diosensiʼpo moʼe̱ne. Huakkaʼ jak Colosasyo moʼi̱kaʼne. Do
Pabloa onʼnigmadoyaʼne. Opudomeytaj Apag Diosa
kamatinepahuieʼpo diʼ kamaeʼ kamanopoʼnoeye̱ʼ.
\s Pabloa huaknopo̱e̱ʼeritaj oʼmationaʼpakikaʼuyate.
\p
\v 3-5 Jesucristotaj dakaʼ moknopo̱i̱kaʼpo moʼnigpe̱i̱kaʼpo
ayaʼ nog Jesústaj huaknopo̱e̱ʼeriomeytaj diʼ moʼmaikaʼne.
Kenpaʼti kurudyo̱ Diosere durugnanada o̱ʼunhuahuikaʼapoy
moʼnopo̱e̱po moʼnigi̱kaʼ. Kenda onʼtipe̱e̱depo
oʼtionaʼpakpo Apag Diostaj Jesucristoen Apagtaj dakiti
onaʼikay. Jesucristoen huadak huaʼa, buttida huaʼa Diosere
durugda huanoeanhuahuikaʼ huaʼa moʼpe̱e̱depo Diosere
durugnanada o̱ʼunhuahuikaʼapoy moʼnopo̱i̱kaʼne.
\v 6 Nogbayo nogbayo huabada meyo̱piʼ aratbut o̱ʼnikaʼnig
Jesucristoen huadak huaʼa onʼmanbatiaʼpaknok huakkaʼamon
huaboaʼda oʼnoknopo̱e̱po onʼnopoʼkoreaʼpo Diostaj
onʼnigpe̱i̱kaʼ. Kenpaʼti buttida huaʼa Dios diʼnanada
moʼe̱po moʼtinepahuiʼpo konigti opudomeya̱ moʼpe̱e̱depo
buttida huaʼa o̱ʼe̱ moʼnopo̱e̱po moʼnigpe̱i̱kaʼuyne.
\v 7 Jesucristoen huadak huaʼa Epafrasa opudomey Colosenses
aratbuttaj monmadikaʼuyne. Keʼna oroʼere Cristoen huadak
huaʼa oʼmanmadikanhuamey. Oroʼ oʼpakuynok opudomeytaj
dakaʼ monmadikikaʼuy.
\v 8 Opudomeytaj Diosen Noki̱re̱ga̱ moʼnopoʼto̱i̱kaʼnok
diʼ moʼmaikaʼne. Kenda Epafrasa oroʼtaj
monbatiaʼpakmeʼne.
\p
\v 9,10 Jesús Huairitaj moknopo̱e̱po kenpaʼti nog
huaknopo̱e̱ʼeritaj diʼ moʼmaikaʼ. Kenmeʼnoete kenda
onʼtipe̱e̱depo huaboaʼda opudomeytaj onʼnigtionaʼpakikaʼpo,
konig Dios Huairien Huasiʼpo ʼuruaʼda oʼkikaʼuyate opudomey
konigti ya̱gʼkikatiʼ kenpaʼti konig Diosa oʼpaknig nogi̱ti
nogi̱ti ya̱gʼkikatiʼ, kenpaʼti nog aratbut paiʼdapiʼ
eneʼnayo yanʼbayokikatiʼ, yanʼtihuapokikatiʼ kenpaʼti
nogi̱ti nogi̱ti Diostaj yanoknopo̱e̱ʼ. Kenda Diosa
oʼpaknig opudomeytaj Diosa kamanopo̱e̱ʼ. Kenda
onʼnigtionaʼpakikaʼne. Kenpaʼti huadak dakhueapiʼ eʼkaʼ
kanʼnopo̱e̱ʼ kenpaʼti ʼuruaʼda kanʼnopoenkeʼ Diosen
Noki̱re̱ga̱ opudtaj kabatihuapokikeʼ. Kenpaʼ
onʼnigtionaʼpakikaʼne.
\v 11 Dios ʼuruaʼda o̱ʼe̱po konig huakjey o̱ʼe̱po teynanada
o̱ʼe̱po opudennopoʼtaj moʼmanopoʼteypakikeʼ teynanada
moʼmaikeʼ. Kenpaʼ opudomeytaj onʼtionaʼpakikaʼne. Ken
eʼmanopoʼteypakdeʼte aratbut opudomeytaj dakhueaʼ e̱gkaʼte
paiʼda eʼnopoʼe̱a̱da batikhueʼada moknopo̱e̱po huadiayhueʼada
durugda moʼi̱kaʼapone. Onʼtionaʼpakikaʼne.
\v 12 Kenpaʼti Apag Diostaj dakiti kaʼnonaʼikeʼ
onʼtionaʼpakikaʼne. Oroʼomey huakjeyyo Diosere nog
huaknopo̱e̱ʼeriere aʼnoeanhuahuikayaʼpo oroʼen dakhueaʼ
eʼkaʼ Apag Diosa bokkahueaʼuyne kenpaʼti oroʼtaj dakhueaʼ eʼkaʼ
moʼmanopoʼyareaʼuyne. Konige̱po, dakiti Dios, onaʼikaʼdik
o̱ʼe̱ne.
\v 13 Oroʼomey Diostaj nigpe̱e̱hueʼ o̱ʼi̱kaʼuyne. Konig
huanabaʼ o̱ʼe̱po totoʼ huairitaj oʼnigpe̱i̱kaʼuyne. Konig
sikki̱re̱gyo̱ oʼnoikaʼpo, oroada dakhueaʼ eʼkikaʼ batikahueʼdik
o̱ʼi̱kaʼuyne. Apag Diosa boʼtihuapokuynok dakhueaʼ eʼkaʼ
oʼmabatikuyne. Diosa huasiʼpotaj diʼnanada o̱ʼi̱kaʼpo
oroʼomeytakon keʼnensiʼpo boʼyahueaʼdene.
\v 14 Jesús Diosen Huasiʼpoa moʼnigbueyʼuypo oroʼomeytaj
eʼmanopoʼkoreadeʼte oroʼomeyen dakhueaʼ eʼkaʼ bokkahueaʼpo
moʼnopoʼyareaʼuyne.
\s Opudomey Diostaj nigpe̱e̱hueʼ o̱ʼi̱kaʼpo dakhueaʼda
oʼkikaʼpo konig Diosen takaʼ o̱ʼi̱kaʼuyne. Cristoa
moʼnigbueyʼuypo Diostaj moʼmanopoʼnoeya̱ʼuyne.
\p
\v 15 Apag Diostaj tiahuayhueʼdik o̱ʼe̱ne. Diosen Huasiʼpo
Jesucristo Diosonigtiʼ o̱ʼe̱po oʼtiakuypo Dios konig o̱ʼe̱nig
oroʼtaj moʼmanopo̱e̱a̱ʼuyne. Diosen Huasiʼpo Cristo Diosere
huakkuruda oʼnoikaʼuyate. Ayaʼda oʼtiahuayikaʼnig konig
huadari, huadariyo hua̱e̱ʼeri, siokpo, niokpo, puug, aratbut,
ayaʼda hua̱e̱ʼeri kahued Cristo oʼnoikaʼuyate. Cristo
huakkuruda o̱ʼi̱kaʼuyate.
\v 16 Dios oʼpaknok Diosen Huasiʼpoa ayaʼda oʼkaʼuyate. Katepiʼ
o̱ʼi̱kaʼnig kurudyo̱ ayaʼda oʼkaʼuyate. Katepiʼ huadariyo ayaʼda
oʼkaʼuyate. Katepiʼ tiahuaydik o̱ʼi̱kaʼnig ayaʼda oʼkaʼuyate.
Kenpaʼti ayaʼda katepiʼ tiahuayhueʼdik o̱ʼi̱kaʼnig oʼkaʼuyate.
Diosen Huasiʼpoa kurudyo̱ noki̱re̱g huairi hua̱e̱ʼdiktaj
oʼkaʼuyate. Diosen huataʼmoneri huairi hua̱e̱ʼdiktakon
oʼkaʼuyate. Huataʼda oʼnigkaʼuyate.
\v 17 Indari, kurudyo̱ hua̱e̱ʼerikon katepiʼ ehued e̱e̱ʼted
Cristonayo oʼnoeʼikaʼuyate. Ayaʼda katepiʼ kahued e̱e̱ʼted
kennayo oʼnoeʼikaʼuyate. Keʼna teynananada o̱ʼe̱po
ayaʼda oʼmato̱i̱kaʼnok ayaʼda oʼmaunhuahuikaʼapo.
\v 18 Ayaʼ huaknopo̱e̱ʼerien huairi Cristo o̱ʼe̱.
Huaknopo̱e̱ʼeria Cristotaj onʼnigpe̱i̱kaʼ, Cristoa ayaʼtada
oʼmanoeaʼikaʼ. Cristo huakkuruda kubarakyaʼ oʼnoyhuaduyate.
Huakkurueri o̱ʼe̱po ayaʼenda huairi o̱ʼe̱.
\v 19 Konig Dios o̱ʼe̱nig Diosa oʼpakpo konigti Cristo
o̱ʼe̱. Cristo konig Dios o̱ʼe̱.
\v 20 Diosa ayaʼtada kamanoeye̱ʼpo cruzte Cristo oʼbueyʼuy.
Huadariyo hua̱e̱ʼeritaj kenpaʼti kurudyo̱ hua̱e̱ʼeritaj ayaʼtada
Diosa eʼmanoeyaʼtaʼ oʼpakpo, Cristo cruzte oʼbueyʼuy.
\p
\v 21 Opudomey aʼnenda nog aratbutda Diosen ehueʼ
moʼi̱kaʼuyne. Konig Diosen takaʼ moʼe̱po Diostaj
nigpe̱i̱kahueʼ moʼe̱po dakhueaʼ boʼkikaʼuynigʼa oynayo
Diosa opudtaj moʼmanopoʼnoeya̱ʼdene. Oy Diosen huadiʼ
moʼi̱kaʼne.
\v 22 Cristo hua̱so̱ʼa̱da paiʼda oʼnopoʼe̱po moʼnigbueypo
Diostaj moʼmanopoʼnoeya̱ʼuyne. Daknopoʼda kenpaʼda
Diosenyoʼda
moʼi̱kaʼpo kentayoʼda moʼnigpe̱i̱kaʼne. Konig
dakhueaʼ da ahueʼ moʼe̱nig, “Dakhueaʼ o̱gkaʼ.” Huaahueʼdik
moʼe̱a̱pet. Ken konig opudomeytaj Diostaj kabayokeʼpo
Cristo paiʼda moʼnignopoʼe̱po moʼnigbueyʼuyne.
\v 23 Konige̱po dakaʼ Jesucristotaj
yanoknopoeonhuahuikaʼ. Oknopo̱e̱batikhueʼada
yanoknopoeonhuahuikaʼ. Oroʼen dakhueaʼ eʼkaʼtaj Cristo
moʼnigbueyʼuyne. Oroʼtaj aʼmanopoʼyareayaʼpo
moʼnigbueyʼuyne kenpaʼti kenere moʼnoeonhuahuikaʼapo.
Kenda moʼpe̱e̱deikaʼnig, moknopoeonhuahuikaʼpo batikhueʼ
yaneʼ, “Oroʼen dakhueaʼ eʼkaʼtaj Cristo moʼnigbueyʼuyne.
Oroʼtaj aʼmanopoʼyareayaʼpo moʼnigbueyʼuyne kenpaʼti
kenere moʼnoeonhuahuikaʼapo.” Ayaʼ huadariyo hua̱e̱ʼeri
aratbuttaj onʼmanbatiaʼpakuyate. Doa Pabloakon konigti
ijmanbatiaʼpakikay.
\s Cristoen huaknopo̱e̱ʼeritaj yamanmadikikatiʼ. Diosa
Pablotaj onaʼuyate.
\p
\v 24 Oy durugda i̱jje̱po opudomeytehuapaʼ paiʼda
onʼnignopoʼe̱ne. Ayaʼ Cristoen huaknopo̱e̱ʼeritaj Cristo
paiʼda oʼmanignopoʼe̱ʼuy. Opud huaknopo̱e̱ʼeritehuapaʼ
Jesucristoen ayaʼ aʼdakeayaʼpo doʼhuakon
hua̱so̱ʼda paiʼda
onʼnignopoʼunhuahuikaʼne. Ayaʼ huaknopo̱e̱ʼeriomey
Cristoen hua̱so̱ʼ konigti o̱ʼne.
\v 25 Opudtehuapaʼ nog huaknopo̱e̱ʼeritere ayaʼda Diosen huaʼa
kamanmadikadhuahueʼpo Diosa meʼtaʼmonaʼuyne.
\v 26,27 Opud judío ehueʼ hua̱e̱ʼeritaj ʼurunanada
oʼmagkikaʼpo Cristoen Noki̱re̱ga̱ moʼnopoʼto̱i̱kaʼ. Diosere
durugnanada moʼnoeonhuahuikaʼapo Diosa
moʼnopo̱e̱a̱ʼdene. Aʼnennada kenda ijkaʼapoy Dios
eʼnopo̱i̱kaʼada judío aratbuttaj manopo̱e̱a̱hueʼ
o̱ʼi̱kaʼuyate. Judío ehueʼ hua̱e̱ʼeritaj ʼurunanada
ijmagkaʼapoy manopo̱e̱a̱hueʼ o̱ʼi̱kaʼuyate. Oynayo keʼnen
huaknopo̱e̱ʼeritaj oʼmanopo̱e̱a̱ʼde.
\p
\v 28 Ayaʼ huaknopo̱e̱ʼeri Cristotaj dakaʼ kanoknopo̱i̱keʼ
kenpaʼti Cristotaj dakaʼ kanʼnigpe̱i̱keʼ, konig
huaknopo̱e̱ʼeri nogi̱ti nogi̱ti kanoknopo̱i̱keʼpo Cristoen
huadak huaʼa oʼmanmadikikay. “Diostaj yanʼpe̱e̱ʼ.” “Diostaj
yanʼnigpe̱e̱ʼ.” “Diostaj yanʼnopoʼkoreaʼ.” Ayaʼtada
oʼmaboroayikay. Dakaʼ kanʼnopoenkeʼpo ayaʼtada dakaʼ
oʼmanmadikikay.
\v 29 Kenda diga̱ʼda ijkikay. Teyda ijkikay. Kenda kakikeʼpo
Diosa beʼteypakikaʼne.
\c 2
\p
\v 1 Opudomeya̱ Laodiceaomeya̱ nogomeya̱kon doʼtaj
tiahuayhued o̱ʼnene. Opudomeytaj kenomey
huaknopo̱e̱ʼeritere huakkaʼda ijmepuʼkeʼikaʼpo
onʼnigtionaʼpakikaʼne.
\v 2 Opudomey nogi̱ti nogi̱ti Diostaj yanʼpakikaʼapet
kenpaʼti huayahuaya diʼda yanʼmaikaʼapet, Cristotaj huakkaʼda
yanoknopo̱i̱kaʼapet. Cristotaj moknopo̱e̱po Diostaj dakaʼda
yanoknopoenkaʼapet. Kenpaʼti Cristotaj huaknopo̱e̱ʼ Diosa
oʼi̱re̱ganhuahuikaʼuynig kendakon kanoknopo̱e̱ʼpo, doʼhua
diga̱ʼ onʼtionaʼpakikaʼne.
\v 3 Cristo Diosen ayaʼda oʼnopo̱i̱kaʼ. Cristotaj dakaʼ
eknopo̱e̱ʼnayo ʼuruaʼda eʼkaʼ moʼnopo̱i̱kaʼapone kenpaʼti
huakkaʼnada moʼnopoenkikaʼapone. Cristo Diostere
moknopoenkaʼapone.
\v 4 Nog aratbuta ʼuruaʼda eʼmanmadikaʼte engaña o̱gkahueʼdik
ya̱ʼneapet. Kenda opudomeytaj oʼnonaʼne.
\v 5 Opudenbayo opudere ehueʼ e̱ʼe̱a̱da opudomeytaj huakkaʼda
ijpaki. Opudomey Cristotaj dakaʼ moknopo̱i̱kaʼnok kenpaʼti
oknopo̱e̱batikhueʼ moʼi̱kaʼnok doʼa durugda i̱ji̱kay.
\p
\v 6 Huairi Jesucristotaj konig huaboaʼda moknopo̱e̱deʼuynig
kenpaʼti huaboaʼda durugda moʼnopoʼkoreaʼdeʼuynig konigti
dakaʼ yanoknopo̱i̱kaʼpo yanʼnigpe̱i̱kaʼ.
\v 7 Konig hue̱ymey huaʼihuit sorokyo o̱ʼe̱po oʼkerekpo
oʼmeybiaʼpo, teyda o̱ʼe̱po. Konigti kenpaʼda Cristoen
yanʼpakikaʼpo dakaʼ yanoknopo̱i̱kaʼpo, nogi̱ti nogi̱ti
yanoknopo̱i̱kaʼ. Cristotaj aʼnenda
monmadikaʼonhuahuikaʼuynigtaj nogi̱ti nogi̱ti
yanoknopo̱i̱kaʼpo Diostaj dakiti ya̱ʼnonikatiʼ.
\s Cristotaj oknopo̱e̱nok Cristotere Diosa moʼnoeanhuahuikaʼne.
\p
\v 8 Keyoj oʼnonaʼne. Opudomeyere namaʼda
huamanmadikaʼeri o̱ʼnepo engaña e̱gkataʼ onʼpakpo konig
aratbutada namaʼda onʼnopo̱i̱kaʼnig opudomeytaj
enmadikataʼ boʼtipakne. Dakaʼ Cristotayoʼda yanoknopo̱e̱po
kenomeytanayo manigpe̱e̱hueʼ yanikatiʼ. Konig
adhueaʼpaneʼ o̱gkikaʼuyatenig kenpaʼti onʼnopo̱i̱kuyatenig
namaʼda monmadikapetnig manigpe̱e̱hueʼ yanikatiʼ. Kenda
Cristo oʼmanmadikaʼuyatenig ken konig onmadikahueʼ
moʼe̱a̱pet.
\p
\v 9 Ayaʼtehuapaʼda Dios o̱ʼe̱ konigti Cristodation o̱ʼe̱.
\v 10 Opudomey Cristotaj moknopo̱e̱po Diosen Noki̱re̱ga̱
moʼnopoʼto̱e̱po, opudomeytaj moʼnoeaʼikaʼne. Cristo ayaʼ
huairien huairi o̱ʼe̱. Cristoa ayaʼtada kuruderi huairitaj
mataʼmonaʼdik oʼmaikaʼ. Ayaʼada Cristotaj nigpe̱i̱kaʼdik
o̱ʼnikaʼ.
\v 11 Judío huabokerektaj onʼsiʼdakoktegikaʼpo.
Opudomeynayo Cristotayoʼda moknopo̱e̱po Diosensiʼpo
hueretda moʼe̱ne. Konig boʼeretpakikaʼpo dakhueaʼ
eʼkikameada onteʼti kikahueʼ moʼe̱ne.
\v 12 Kenpaʼti Jesucristo eʼbueydeʼte e̱gkubarakkaʼuytada Diosa
teyda o̱ʼe̱po oʼnoyhuada̱ʼuyate. Opudomey kenda
moknopo̱e̱po bautiza mogkaʼpo konigti Cristoere
eʼkubarakkaʼnig Cristoere Diosa moʼnopoʼnoeaʼuyne.
\v 13 Aʼnen Diostaj o̱ki̱e̱hued moʼe̱po dakhueaʼda boʼkikaʼpo
Diostaj nigpe̱e̱hueʼ moʼi̱kaʼuy. Huabokereksiʼdak okteghueʼ
hua̱e̱ʼeri moʼe̱po Diosensiʼpo ehueʼ moʼu̱yne. Diostaj
oknopo̱e̱hueʼda moʼu̱yne. Oynayo ayaʼ dakhueaʼ
boʼkaʼuyatenigtaj Diosa bokkahueaʼdepo Cristoere
moʼnoeanhuahuikaʼne.
\v 14 Diosen huaʼa Moisésa oʼmanigmadoyaʼuyate. Opudomey
kenda nigpe̱e̱hueʼada dakhueaʼ boʼkikaʼuyne. Moisésenbaʼtaj
nigpe̱e̱hueʼ hua̱e̱ʼeritaj castiga magkaʼdik o̱ʼe̱. Oroʼomeya̱
dakhueaʼ oʼkikaʼnok Cristotaj hue̱ypa cruzte moʼnigbetaʼuyne
siropia moʼnigbetaʼuynok moʼbakkahueaʼuyne.
\v 15 Aratbuta enʼtiahuayaʼte Cristo cruzte oʼbueydepo totoʼ
huairitaj okbiraepo oʼteyhueʼpakaʼuyatenok. Konige̱po
oroʼomey huaknopo̱e̱ʼeri dakhueaʼ o̱gkaʼ totoʼ huairia onteʼti
huaahueʼdik moʼe̱a̱pone.
\s Kenda Cristo kurudyo̱ oʼpakikaʼnigtaj yanʼpakpo ya̱gʼkikaʼ.
\p
\v 16 Oynayo Cristotaj moknopo̱e̱po “Ken aypo moʼbapeʼpo
pehueʼdik moʼe̱ne.” Beʼapiʼ enaʼnayo manigpe̱e̱hueʼ
yanikatiʼ. “Ken huamaiʼ mayhueʼdik moʼne.” Beʼapiʼ
enaʼnayo manigpe̱e̱hueʼ yanikatiʼ. Huabayok judíoen
Diostaj eʼdurugpak fiestate huahueʼ e̱e̱ʼnayo, huabo puug
judíoen Diostaj eʼdurugpak fiestate huahueʼ e̱e̱ʼnayo
judíoen Diostaj eʼdurugpak okmapi̱e̱ʼahuaddik fiestate huahueʼ
e̱e̱ʼnayo “Huaʼdik moʼne.” Beʼapiʼ eʼnaʼnayo
manigpe̱e̱hueʼ yanikatiʼ.
\v 17 Kenda fiestate aypote huamaiʼtakon judíoa
onʼmanaʼikaʼpo o̱gkikaʼuynigʼa Cristo cruzte eʼbueydeʼte
onteʼti kikahueʼdik moʼe̱ne. Cristoen hueretda huaʼa
o̱ʼe̱nok Cristotayoʼda yanʼnigpe̱i̱katiʼ.
\v 18 Huaʼikudate yanʼhuadpo Diosen huataʼmoneritaj
tionaʼpakdik yanikatiʼ. Sueʼada namaʼda huamanmadikaʼeria
onʼmanaʼnigʼa tiahuayhueda̱da namaʼda onʼnopo̱e̱po
onʼmanaʼnigʼa. “Kenda oʼnonaʼnig nigpe̱e̱hueʼ
e̱e̱ʼnayo namaʼda bokaʼ. Diosensiʼpo ehueʼ moʼe̱ne.”
Kenomeya̱ enaʼnayo pe̱e̱hueʼdik yanikatiʼ. Konig
aratbut Diostaj oknopo̱e̱hueʼ hua̱e̱ʼeri o̱ʼnepo namaʼda
onʼnopo̱i̱kaʼpo. Huadakda i̱jje̱y, huadaknada ijkikay
namaʼda onʼnopo̱i̱kaʼpo.
\v 19 Cristotaj dakaʼ oknopo̱e̱hueʼ o̱ʼnikaʼ. Cristo konig
huaknopo̱e̱ʼerien huanopoʼ o̱ʼe̱. Huaknopo̱e̱ʼeri konig
Cristoen hua̱so̱ʼ o̱ʼne. Huaknopo̱e̱ʼerinayo Cristotayoʼda
onʼnigpe̱i̱kaʼ. Namaʼda huaaʼeri Cristotaj nigpe̱e̱hueʼ
o̱ʼnikaʼ. Oroʼomey huaknopo̱e̱ʼeri konig Cristoen hua̱so̱ʼ
o̱ʼe̱ne. Konig nogso̱ʼtida o̱ʼe̱po nogi̱ti nogi̱ti
moknopo̱e̱a̱ʼne Cristoa. Nogi̱ti nogi̱ti oʼnigpe̱i̱kaʼne.
Kenpaʼti konig nogso̱ʼtida konigti Cristotaj
moknopo̱e̱a̱ʼne Diosa.
\p
\v 20 Cristoa oroʼomeytaj moʼnigbueyʼuyatenok opudomey
aʼnopoʼyareayaʼpo moknopo̱e̱depo konig Cristoere
moʼbueydepo konig oknopo̱e̱hueʼ hua̱e̱ʼeria namaʼda
onʼnopo̱i̱kaʼnig onteʼti nopo̱e̱hueʼ yanikatiʼ. Konig
oknopo̱e̱hueʼ hua̱e̱ʼeria namaʼda onʼnopo̱e̱po
onʼmanaʼikaʼnig manigpe̱e̱hueʼ yanikaʼ.
Aʼnopoʼyareayaʼpo kenda pe̱e̱hueʼdik yaneʼ. Konig
oknopo̱e̱hueʼ hua̱e̱ʼeriomey nogen eʼmanmadikaʼ o̱gkikaʼ
kenda kahueʼ yanikaʼ.
\v 21 “In nejhueʼ yanikatiʼ.” “Ken aypo pehueʼ
yanikatiʼ.” “Kentaj huabaʼapiʼ to̱e̱a̱hueʼ yanikaʼ.” Ken
konig onʼmanaʼikaʼnig manigpe̱e̱hueʼdik yanikatiʼ.
\v 22 Nejhueʼdik, pehueʼdik, bapadhueʼdik huabokerekayoʼda
onʼmanaʼikaʼnig kenda onʼmanaʼikaʼnig ehueʼ o̱ʼe̱a̱po.
\v 23 Kenda onʼmanikaʼnig ʼuruaʼda eʼnopo̱e̱ʼo̱nig
aratbuta namaʼda onʼnopo̱e̱po. Aratbuta onʼmanigpe̱i̱kaʼpo
namaʼda huaʼikudate onhuadpo Diosen huataʼmoneritaj
onʼtionaʼpakikaʼpo, Diostaj onʼtionaʼpakikaʼpo, sueʼda
i̱jje̱y huairihueʼ i̱jje̱y namaʼda onʼnopo̱i̱kaʼpo, kenpaʼti
namaʼda Diostaʼ paiʼda onʼnopoʼe̱po. Kenda o̱gkikaʼpo
huadakda o̱ʼe̱y aratbuta namaʼda onʼnopo̱e̱po kenpaʼda
dakhueaʼ eʼkaʼtaʼ onʼeretpakikaʼ. Kenda huabokereka namaʼda
onʼmanaʼikaʼnig kenpaʼti namaʼda onʼkikaʼnigʼa dakhueaʼ
boʼkikaʼnigtaj batikhueʼdik o̱ʼnikaʼ.
\c 3
\p
\v 1 Ken, Cristo eʼbueytada kubarakyaʼ Diosa oʼnoyhuada̱ʼpo
onteʼti oʼnoeaʼuyate. Cristoere Diosa opudomeytaj
moʼnoeaʼuyne. Konig Diosen ʼurunanada huaknopo̱e̱ʼeri
moʼnoeaʼuyne. Konige̱po kenda Cristo kurudya̱ʼ
oʼpakikaʼnig monʼpakpo mogkikaʼ. Cristo kurudyo̱ Diosere
teynanada ʼurunanada o̱ʼi̱kaʼnok keʼnenyoʼda
moderetpakikaʼ.
\v 2 Kurudyo̱ Dios oʼnoikaʼpo Cristoere oʼnoikaʼ. Kenda
Cristo oʼpaknig konigti monʼpakikaʼ. Konig Cristo o̱ʼe̱po
oʼkikaʼnig monʼnopo̱i̱kaʼ. Katepiʼ indariyo o̱ʼi̱kaʼnig
kenpaʼti katepiʼ aratbuta o̱gkikaʼnig nopo̱i̱kahueʼ
moʼnikaʼ.
\v 3 Cristo oroʼomeytaj moʼnigbueyʼuyate oroʼomeya̱
oʼnopo̱e̱depo konig aratbut kubarakyaʼ katetapiʼ onteʼti
dakhueaʼ kahueʼ o̱ʼnenig, oroʼomeya̱kon onteʼti dakhueaʼ
kahueʼ moʼnikaʼ. Oy huaboaʼda oknopo̱e̱po Cristoere Diosyo
oʼnoikaʼne. Diosa dakaʼ moʼnopoʼto̱e̱nok Cristoere
oʼnoeonhuahuikaʼapone.
\v 4 Ken Cristo oroʼen huamanoeanhuahuikaʼeri o̱ʼe̱. Keʼna
onteʼti kurudya̱ʼ eʼtiakte kenokaʼ oroʼomey huaknopo̱e̱ʼeri
Cristoere ʼurunanada o̱ʼeonhuahuikaʼapone.
\s Aʼnenda Cristotaj oknopo̱e̱hued moʼe̱po dakhueaʼda
boʼkikameʼnigʼa. Oynayo Cristotaj moknopo̱e̱depo huadakda
ya̱gʼkikaʼ. Diosenyoʼda ya̱gʼkikaʼ.
\p
\v 5 Katepiʼ dakhueaʼda eʼkaʼtaʼ eʼpaknayo Jesucristotaj
yoknopo̱e̱po Cristoere doʼhuedso̱ʼ oʼbueyde, doʼhued eʼnopo̱e̱ʼ
oʼbueyde, onteʼti dakhueaʼ kahueaʼdik i̱jje̱y,
yanʼnopo̱i̱katiʼ. Ken konig moʼnopo̱e̱po, nogen
hua̱to̱e̱ʼtaj bakdejhueʼ yanikaʼ. Huabokerek nogtaj nogtaj
ettoneʼtaj bakdejhueʼ yanikaʼ. Ettoneʼ nogtaj nogtaj
huabokerektaʼ bakdejhueʼ yanikatiʼ. Katepiʼ dakhueaʼda konig
oroʼenso̱ʼ oʼpakikaʼ, onteʼti pakhueʼ yanikaʼ kenpaʼti
kahueʼ yanikaʼ. Kenpaʼti katetapiʼ eʼtamaetaʼ eretpakhueʼ
yanikatiʼ. Katetapiʼ eʼeretpaknayo konig eʼketkaʼ diostaj
eʼpak o̱ʼe̱. Dakhueʼda o̱ʼe̱.
\v 6 Aratbut ken konig dakhueaʼda o̱gkikaʼpo Diostaj
nigpe̱e̱hueʼ o̱ʼnikaʼnok Diosa diga̱ʼnada castiga
oʼmagkaʼapo.
\v 7 Kenda dakhueaʼda
o̱gkikaʼnig opudomeya̱
boʼkikaʼuynigʼa konig Cristotaj oknopo̱e̱hued moʼe̱po
boʼkikaʼuynigʼa.
\v 8 Oy Cristoere moʼnoedepo ayaʼ in konig onteʼti kahueʼ
yanikaʼ: Nogomeytaj bahuadiayhueʼ yanikaʼ. Maboyhueʼ
yanikaʼ. Mahui̱ʼi̱a̱hueʼ yanikaʼ. Batidiʼkehueʼ yanikaʼ.
Dakhueaʼda bahuaaʼpakhueʼ yanikaʼ.
\v 9 Huayahuaya da bahuaahueʼ yanikaʼ. Aʼnenda Cristotaj
oknopo̱e̱hued moʼe̱po namaʼda moʼnopo̱i̱kaʼpo dakhueaʼda
boʼkikaʼuyate. Oynayo Cristotaj moknopo̱e̱depo onteʼti
konigti dakhueaʼ kikahueʼ moʼi̱kaʼne.
\v 10 Oy konig huabonopoʼ moʼe̱depo konig Diosa
oʼnopo̱i̱kaʼnig huaboaʼda moʼnopo̱i̱kaʼpo. Konig Diosa
oʼpaknig nogi̱ti nogi̱ti boʼpakpo moʼnopo̱i̱kaʼne. Diosa
aratbuttaj huamatimeaʼeri o̱ʼe̱nok nogi̱ti nogi̱ti dakaʼ
moknopo̱e̱a̱pone.
\v 11 Ken konig Cristoere oʼnoepo huaboaʼda oʼnopo̱e̱po
ken konig huaboaʼda oʼkikay, “Judío ehueʼ i̱jje̱y.” Ahueʼ
o̱ʼe̱ne. “Judío i̱jje̱y.” Ahueʼ o̱ʼe̱ne. “Doʼhuedsiʼdak
oktegʼuy.” Ahueʼ o̱ʼe̱ne. “Doʼhuedsiʼdak okteghueʼ o̱ʼu̱y.”
Ahueʼ o̱ʼe̱ne. “Nog aratbut i̱jje̱y.” Ahueʼ o̱ʼe̱ne.
“Esoeri i̱jje̱y.” Ahueʼ o̱ʼe̱ne. “Huanabaʼ i̱jje̱y.” Ahueʼ
o̱ʼe̱ne. “Huanabaʼ ehueʼ i̱jje̱y.” Ahueʼ o̱ʼe̱ne. “Kenyoʼda
Cristoen i̱jje̱y. Kenyoʼda
Cristotaj ijpaki. Kenyoʼda
Cristotaj eʼnigpe̱i̱kaʼtaʼ ijpaki.” Kenda ayaʼada aʼdik
o̱ʼe̱ne.
\p
\v 12 Diosa opudomeytaj diʼ moʼe̱po moʼbaktieʼeaʼuynok
Diosenyoʼda moʼe̱ne. Konige̱po ayaʼtada
yanʼmatinepahuikaʼpo. Daknopoʼda huadakaʼda
yanʼmanigkikaʼ. Donayo huairi ehueʼ i̱jje̱y,
yanʼnopo̱i̱kaʼ. Nogomeytaj dakaʼ yanʼmanigpe̱i̱kaʼ.
Nogomeya̱ dakhueaʼ e̱gkaʼnayo bahuadiayhueʼ yanikaʼ.
\v 13 Nogomeytaj dig mahuanopo̱e̱hueʼ yanikaʼ. Noga̱
dakhueaʼ e̱gkaʼnayo kentaj yanʼbakkahueaʼpo huadiayhueʼ
yanikaʼ. Konig Cristo Huairi oroʼtaj bokkahueaʼuynig
konigti nogomeytaj yanʼbakkahueaʼikaʼ.
\v 14 Huakkaʼ diʼ yanʼmaikaʼ. Huayahuaya diʼ yanʼmaikaʼ.
Kenda Diosa huakkaʼ oʼpak. Diʼnada eʼmaikaʼnayo konig
onpapayoʼ moʼi̱kaʼpo konigti Diostaj boʼpakikaʼpo ayaʼda
ʼurunanada boʼkikaʼapone.
\v 15 Opudomeyennopoʼtaj Diosa kamanopoʼnoeye̱ʼ. Kenda
Diosa oʼpak. Ayaʼada konigti yanʼnopo̱i̱kaʼ. Konigti
yanʼpakikaʼ. Konigti ya̱gʼkikatiʼ. Ken konig nogso̱ʼtida
kaʼneʼpo Diosa moʼbaktieʼeaʼuyne. Kenpaʼti Diostaj dakiti
ya̱ʼnonikaʼ.
\p
\v 16 Ayaʼda Cristo oʼmanmadikaʼuyatenigtaj
yanʼnopo̱i̱kaʼpo, huanopoyaʼda yanʼdikto̱i̱katiʼ. Kenda
nogtaj nogtaj yanʼmanmadikikaʼ. Kenpaʼti Cristoen
eʼmanmadikaʼtaj yanʼnigpe̱i̱kaʼ. Nogomeyere huayahuaya
yanʼmanikatiʼ. Diosen eʼmanmadikaʼ ʼuruaʼda yanʼnopo̱e̱po
huayahuaya yanʼmandikikaʼ. Diostaj dakiti monaʼpo daknopoʼda
Diostaj yanʼbatadiʼkeaʼikaʼ. Huanopoyaʼda dakiti yaʼnonaʼpo
yanʼbatadiʼkeaʼikatiʼ. Dios Jesucristoere ʼuruaʼda
moʼto̱i̱kaʼne yanʼbatadiʼkikaʼ.
\v 17 Katepiʼ boʼkikaʼnig katiaʼpiʼ boaʼ kenda Huairi Jesús
oʼpakikaʼnig yadikaʼpo ya̱gʼkikaʼ. Jesústaj moknopo̱e̱po
Diostaj dakitiaʼ yanʼtionaʼpakikatiʼ.
\s Konig Cristoen huaknopo̱e̱ʼeria huayahuaya Cristotaj
ʼuruaʼda nigkaʼdik o̱ʼne.
\p
\v 18 Ettoneʼa̱ Jesús Huairitaj eknopo̱e̱ʼnayo Huairi
Jesúsen moʼe̱po, Jesús oʼpakikaʼnigda opuden hua̱to̱e̱ʼtaj
yanʼnigpe̱i̱kaʼ.
\v 19 Huabokereka opuden hua̱to̱e̱ʼtaj diʼda yanikaʼ.
Hua̱to̱e̱ʼtaj huadiayhueʼ yanikaʼ. Kenpaʼti huiyokaʼda onahueʼ
yanikaʼ.
\v 20 Apag Diosa oʼpaknok huasiʼpoa opudomeyen huaojtaj
hua̱ye̱tere yanʼmanigpe̱i̱kaʼ. Huaojtaj hua̱ye̱tere
eʼnigpe̱i̱kaʼnayo Diosa durugda o̱ʼi̱kaʼapo.
\v 21 Huaoa huasiʼpotaj diga̱ʼda barakhueʼ yanikaʼ.
Huasiʼpotaj diga̱ʼda eʼbitbitnayo huasiʼpo paiʼda
ya̱ʼneapetpiʼ. Onteʼti dakaʼ nigpe̱e̱hueʼ ya̱ʼneapetpiʼ.
\v 22 Opudomey huanabaʼ moʼe̱po opuden huairitaj
yanʼnigpe̱i̱kaʼ. Huairia eʼtiahuayteyoʼda dakaʼ nigpe̱e̱hueʼ
yaneʼ. Huairia eʼtiahuayte kenpaʼti huairia tiahuayhueʼ
e̱e̱ʼtepiʼ dakaʼ yanʼnigpe̱i̱kaʼ. ʼUrunopoʼda Diostaj dakaʼ
yanoknopo̱e̱po dakaʼ yanʼnigpe̱i̱kaʼ.
\v 23 Katepiʼ boʼkikaʼnig dakaʼ ya̱gʼkikaʼ. Jesústehuapaʼ ijkay
yanʼnopo̱e̱po ʼuruaʼnanada ya̱gʼkikaʼ. Huabokerektayoʼda
ijmanigkay nopo̱e̱hueʼ yanikaʼ.
\v 24 Cristo opuden Huairi o̱ʼe̱nok kentayoʼda
yanʼnigpe̱i̱kaʼ. Diosen Huasiʼpoere moʼnoeonhuahuikaʼapo.
Kenda moʼnopo̱e̱ne.
\v 25 Beʼapiʼ dakhueaʼ e̱gkaʼnayo paiʼda onʼnopoʼe̱a̱po.
Beʼapiʼ huairi huanabaʼpiʼ dakhueaʼ e̱gkaʼnayo Diosa castiga
diga̱ʼda yaʼmagkaʼapet.
\c 4
\p
\v 1 Huairia huanabaʼtaj moʼmato̱i̱kaʼpo dakaʼ
yanʼmato̱i̱kaʼ. Dakhuapa yanʼbayokikaʼ. Huairi
moʼta̱i̱kaʼnok okkahuehueʼ yanikaʼ.
\p
\v 2 Kiriga̱yo̱ʼ yanʼtionaʼpakikaʼ. Tayhueʼada dakaʼ
yanʼtionaʼpakikaʼ. Dakiti Dios, yanʼtionaʼpakikaʼ.
\v 3 Kenpaʼti oroʼtaj motionaʼpakikaʼ. Cristoen huadak huaʼa
aʼnenda Diosa soatayoʼ eʼnopo̱e̱a̱da manopo̱e̱a̱hueʼ
o̱ʼu̱yate. Oy Cristoen huadak huaʼa oroʼa eʼmanbatiaʼpaktaʼ
oʼpaki. Oroa kanʼmanbatiaʼpakeʼpo Jesús Huairia oroʼtaj
boʼtihuapokikeʼpo yanʼtionaʼpakikaʼ. Cristoen huadak huaʼa
ijmanbatiaʼpakikameʼnok huabakuda̱ʼ jakyo megkuda̱meʼne.
Huabakuda̱ʼ jakyo i̱jje̱y.
\v 4 Pabloa Cristoen huadak huaʼa aratbuttaj ʼuruaʼda
kamanopo̱e̱a̱ʼikeʼpo doʼtaj menʼtionaʼpakikatiʼ.
\p
\v 5 Dakaʼ yanʼnopo̱i̱kaʼpo ya̱gʼkikaʼ. Ken oknopo̱e̱hueʼ
hua̱e̱ʼeri opudomeyere o̱ʼnikaʼpo opudomeytaj
boʼtiahuayikaʼnok dakaʼ yanʼnopo̱e̱po ya̱gʼkikatiʼ.
Nogomeytaj kiriga̱yo̱ʼ yanʼmantihuapokikaʼ.
\v 6 ʼUruaʼda yanʼbatiaʼpakikaʼ. Nogomeytaj aʼbatihuapokyaʼpo
huadakda yanʼbatiaʼpakikaʼ. Dakaʼ yanʼnopo̱e̱po dakteynopoada
nogomeytaj dakaʼ yanʼmanbatiaʼpakatokikaʼ.
\s Saludos onʼmanigdiktaʼmonaʼuyate.
\p
\v 7 Tíquico oroʼomeyen huadiʼda huamaʼbuy o̱ʼe̱. Doʼtaj
dakaʼ beʼtihuapokikaʼuyne. Doere Jesús Huairitaj
oʼnigpe̱i̱kaʼuy. Do konig o̱ʼe̱a̱ʼ montiaʼpakapone.
\v 8 Konige̱po Tíquicotaj opudomeytaj
onʼnigtaʼmonaʼne. Konig o̱ʼe̱a̱ʼ doʼtaj beʼhuaeʼpo
kenpaʼti nogi̱ti nogi̱ti Cristotaj kanoknopo̱e̱ʼpo
onʼnigtaʼmonaʼne.
\v 9 Kenere Onésimoeretaj onʼnigtaʼmonaʼne. Onésimo
oroʼomeyen huamaʼbuytion o̱ʼe̱. Diʼda moʼta̱e̱ne.
Diostayoʼda oʼnigpe̱i̱kaʼ. Opudomeyen aratbut o̱ʼe̱. Keʼna
Tíquicoere monbatiaʼpakapone. I̱yo̱da ayaʼda huaknopo̱e̱ʼeria
o̱gkikaʼnig kenda opudomeytaj monbatiaʼpakapone.
\p
\v 10 Aristarco doere huabakuda̱ʼ jakyo o̱ʼe̱po, opudomeytaj
saludos moʼnigdiktaʼmonaʼne. Marcosakon saludos
moʼnigdiktaʼmonaʼne. Marcos Bernabéen huamaʼbuy o̱ʼe̱.
Marcos huadaktion huaknopo̱e̱ʼeri o̱ʼe̱nok kenpaʼti
opudomeyte ehuaʼte dakaʼ yadetiʼ.
\v 11 Kenpaʼti Jesús Justoa saludos moʼnigdiktaʼmonaʼne.
Aristarco Marcosere Jesús Justoere judío huaknopo̱e̱ʼeri
o̱ʼne. Kenomeyyoʼda judío huaknopo̱e̱ʼeri doerea
onʼmanmadikikaʼpo, “Yanʼnopoʼkoreaʼpo Jesucristo Huairitaj
yanʼnoknopo̱e̱po yanʼnigpe̱i̱kaʼ.” Doerea
onʼmanaʼikaʼnok doʼtaj onʼdurugpakanhuameʼne.
\v 12 Epafras saludos moʼnigdiktaʼmonaʼne. Konig Cristoen
huanabaʼ Cristoenyoʼda oʼkikaʼpo opudomeyen aratbut o̱ʼe̱.
Opudomeytaj huakkaʼda moʼtionaʼpakikaʼne. Opudomey Diostaj
dakaʼ moknopo̱i̱kaʼpo batikhueʼda yanoknopo̱i̱kaʼ. Ayaʼda
Diosa oʼpak dakaʼda moknopo̱i̱kaʼpo ayaʼda boʼkikaʼapo. Kenda
Epafrasa moʼtionaʼpakikaʼne.
\v 13 Epafras opudomeytaj moʼtimepukepo diga̱ʼda
moʼtionaʼpakikaʼne. Kenpaʼti Laodicea huaknopo̱e̱ʼeritaj
kenpaʼti Hierápolis huaknopo̱e̱ʼeritaj oʼmatimepukepo
oʼmanigtionaʼpakikaʼ. Kenda ijtiahuayikaʼpo opudomeytaj
oʼnonaʼne.
\v 14 Lucas huamadakkaʼeri o̱ʼe̱. Diʼda moʼe̱ne. Opudomeytaj
saludos moʼnigdiktaʼmonaʼne. Demasakon saludos
moʼnigdiktaʼmonaʼne.
\p
\v 15 Laodicea huamaʼbuytaj saludos ijmanigdiktaʼmonay.
Ninfastakon saludos ijmanigdiktaʼmonay. Kenpaʼti Cristoen
huaknopo̱e̱ʼeri Ninfasen jakyo o̱gkupopakikaʼnigtaj saludos
ijmanigdiktaʼmonay.
\v 16 In berobaʼ ijnigmadoyaʼdey opuda̱ yanʼmonaʼpakdepo
Laodicea huaknopo̱e̱ʼeritaj yanʼbataʼmonaʼ. Nogda berobaʼ
Laodicea
huaknopo̱e̱ʼeritaj ijnigmadoyaʼpo ijtaʼmonaʼmey
eʼmokye̱deʼte yanʼmonaʼpaktiʼ.
\v 17 “Huairi Jesús ayaʼda onaʼuyate, Arquipo, ʼuruda
yanopo̱e̱po dakaʼ yakadhuahuikaʼ.” Kenda Arquipotaj
yaʼnonatiʼ.
\p
\v 18 In saludo huadik onʼnigtaʼmonaʼne doʼhued huabaʼa
onʼnigmadoyaʼne. Huabakuda̱ʼ jakyo i̱jjeonhuahuikay. Doʼtaj
okkahuehueʼ menikaʼ. Dios opudomeytaj dakaʼ moʼto̱i̱keʼ,
ken.