\id 1TI
\h 1 TIMOTEO
\toc1 1 Timoteo
\toc2 1 Ti
\mt1 1 TIMOTEO
\mt2 Huakkuruda Pabloa Timoteotaj oʼnigmadoyaʼuyate.
\c 1
\s Pabloa Timoteotaj oʼnigmadoyaʼuyate.
\p
\v 1,2 Do Pabloa oʼnigmadoyaʼne, huadiʼda Timoteo. Diosa
Jesucristoerea meʼtaʼmonaʼuyne. Huadak huaʼa
kamanbatiaʼpakeʼpo meʼtaʼmonaʼuyne. Diosa oroʼomeytaj
oʼmanoeanhuahuikaʼ. Jesucristotaj oroʼomey e̱kpo̱e̱ʼ
oʼnigi̱kaʼne. Jesucristoen huataʼmonaʼeri i̱jje̱nok,
Jesucristotaj iknopo̱e̱denok konig doʼhued hueretda
huaknopo̱e̱ʼeri huasiʼpo o̱ʼta̱e̱ne, Timoteo. Oroʼen Apag Dios
Jesucristo Huairierea ʼurunanada megkadhuahuikeʼ
metinepahuiodhueʼ menopoʼnoeyanhueʼ.
\s Namaʼda enʼmanmadikaʼtaj yanʼbatik yamanaʼ, Pabloa
onaʼuyate.
\p
\v 3,4 Macedonia huadaribayo huaboaʼda akhuaʼdeyaʼpo nogi̱ti
dakaʼ oʼboroayonpo Efeso huakkaʼ jakyo ya̱i̱kaʼpo. Efeso
huaknopo̱e̱ʼeriere sueʼda huakkaʼahuiti namaʼda
onʼmanmadikaʼikaʼ kenpaʼti adhueaʼpaneʼendik batikhueʼada
onʼbatiaʼpakonhuahuikaʼ. Kenda manmadikahueʼ yaneʼ,
yamanaʼ. Dakaʼda onameʼne. Adhueaʼpaneʼendik
eʼbatiaʼpakonhuahuikaʼnayo onpapayoʼ maboiʼdik o̱ʼe̱ne.
Kenda eaʼnayo Diostaj eknopo̱e̱ʼ Diostaj eʼnigpe̱i̱kaʼ
tihuapokhueʼdik moʼe̱ne. Akhuaʼdeyaʼpo oʼboroayonʼuyne.
\p
\v 5 Kenda oʼboroayonʼuynok onaʼpo ʼurunopoʼda kenpaʼti
buttida monʼnopo̱i̱kaʼpo dakaʼ Diostaj moʼnoknopo̱i̱kaʼpo
aratbuttaj diʼnanada monʼmaikaʼ.
\v 6 Huakkitihueʼ huamanmadikaʼeri huadakda eʼmandikaʼ
nopoenkahueʼ o̱ʼnepo namaʼda onʼbatiaʼpakikaʼpo
onʼmaboiʼikaʼ.
\v 7 Moisésen eʼmanaʼ eʼmanmadikaʼtaʼ eʼpakada Moisésen
eʼmanaʼ nopo̱e̱hueʼada o̱ʼnepo kenomeyen
eʼmanmadikaʼkon nopoenkahueʼda o̱ʼnepo.
\p
\v 8 Ken Moisésen eʼmanmadikaʼ huadakda o̱ʼe̱ oʼnopo̱e̱ne.
Oroʼnayo dakhueaʼ oʼkikay nopo̱e̱ʼdik o̱ʼe̱ne.
\v 9,10 Huanigpe̱i̱kaʼeritaj kenpaʼti huadak huakikaʼeritaj
Moisésa manahueʼ o̱ʼu̱yate. Dakhueaʼ huakaʼeritaj
manigpe̱e̱hueʼ huakaʼeritaj Diosa oʼpaknok Moisésa
oʼmanaʼuyate. Dakhueaʼ eʼkaʼ kanʼnokoteʼpo kenpaʼti
kanʼnopoʼkoreʼpo oʼmanaʼuyate. Diostaj pakhueʼ hua̱e̱ʼeritaj
Diosen huaʼa huanigpe̱e̱hueʼ hua̱e̱ʼeritaj dakhueaʼ
huakaʼeritaj Diostaj oknopo̱e̱hueʼ hua̱e̱ʼeritaj Diostaj
tionaʼpakhueʼ hua̱e̱ʼeritaj huaojtaj hua̱ye̱tapiʼ huarakeritaj
i̱diaypo huabarakeritaj nogen hua̱to̱e̱ huabakdejeritaj nog
huabotbokerekaʼ huabakdejeritaj huabakbereeritaj da huaaʼeritaj
buttida ijjay namaʼda huaaʼeritaj Diosa oʼpaknok Moisésa
oʼmanaʼuyate. Kenpaʼti nogomey huadak eʼmanmadikaʼtaj
nigpe̱e̱hueʼ e̱e̱ʼnayo kanʼnopoʼkoreʼpo Moisésa
oʼmanaʼuyate.
\v 11 Kenda Jesucristoen huadak huaʼa dakaʼ oʼmanmadikaʼikay.
Jesucristoen huadak huaʼa kamanmadikeʼpo Diosa huadak huaʼa
yamanmadikaʼ menaʼpo meʼtaʼmonaʼuyne doʼtaj.
\s Jesucristoa diʼ o̱ʼe̱po Pablotaj oʼtinepahuiʼuynok
konige̱po dakiti Jesucristotaj onaʼuyate.
\p
\v 12 Diostaj doʼa dakaʼ oʼnigpe̱i̱kaʼapo Jesucristo Huairia
meknopo̱e̱nok huadak huaʼa huamanbatiaʼpakonhuahuikaʼ
Jesucristoa bektieʼeaʼuyne kenpaʼti teynanada
kamanmadikeʼpo beʼtihuapokikaʼne. Konige̱po “dakiti”
yonaʼikay.
\v 13 Aʼnenda Jesucristoendiktaj ijtidikeʼikaʼuy. Jesucristoen
huaknopo̱e̱ʼeritaj dakhueaʼnada ijmagkikaʼuy kenpaʼti
ijbatidikeʼikaʼuy. Kenda eʼkikaʼtada Diosa meʼtinepahuiʼpo
dakhueaʼ eʼkaʼ bekkahueaʼuyne. Diosensiʼpo Jesucristotaj
oknopo̱e̱hued i̱jje̱po kenpaʼti nopo̱e̱hueʼ i̱jje̱po dakhueaʼ
ijkikaʼuynok Diosa bekkahueaʼuyne.
\v 14 Kenpaʼti oroʼomeyen Huairia ʼuruaʼnanada megkaʼnok
Jesucristotaj yoknopo̱e̱po diʼ oʼmaey.
\p
\v 15 Dakhueaʼ huakaʼeritaj aʼbakkahueayaʼpo
aʼmanopoʼyareayaʼpo Jesucristo Diosyaʼ kurudya̱ʼ
boʼhuatiakuyate. Kenda buttida oʼdaʼikaʼ. Dakaʼ oknopo̱e̱ʼdik
o̱ʼe̱ne. Nogomey sueʼda dakhueaʼ e̱gkikaʼtada donayo
dakhueaʼnanada ijkadhuahuikaʼuy.
\v 16 Dakhueaʼnanada eʼkikaʼtada Diosa diʼ meʼe̱po
meʼtinepahuiʼpo meʼnopoʼkoreaʼuyne. Aratbuttaj
diga̱ʼnanada oʼmatinepahuiʼudhuahuikaʼpo Diosa. Kenda
kamanopoeanhuahuikeʼpo bekkahueaʼuyne. Doʼtaj
dakhueaʼnanada huakaʼeri e̱e̱ʼtada bekkahueaʼuyne. Aratbut
onʼtipe̱e̱po Diosere noeonhuahuikaʼdik kanoknopo̱e̱ʼpo
Diosa menopoʼyareaʼuyne.
\v 17 Konige̱po “Dios Huairia ayaʼtada oʼmananhuahuikaʼ,
bueyhueʼ o̱ʼi̱kaʼ, kentaj tiahuayhueʼdik o̱ʼe̱y, kenyoʼda
hueretda Dios o̱ʼe̱, ayaʼnanada oʼnopo̱e̱, huadaknanada
ʼuruaʼnanada o̱ʼi̱kaʼ.” Monʼbatiaʼpakikaʼ.
\p
\v 18 Konig doʼhuedsiʼpo o̱ʼta̱e̱ne, Timoteo. “Diosa
beʼtihuapokikaʼapone, yaknopo̱i̱kaʼpo yanigpe̱i̱kaʼpo Diosen
huaʼa yamanmadikaʼ,” Diosen huamanbatiaʼpakeria
monaʼuyne. Okkahuehueʼ ya̱e̱ʼ. Yanopuenkaʼpo dakaʼ
yaknopo̱e̱po, ʼurunopoʼda yanopo̱e̱po huadakda yakikaʼpo,
meʼpukhueʼda buttida huaʼa yamanmadikikaʼ. Namaʼda
huamanmadikaʼeritaj “namaʼda manmadikahueʼ yaneʼ,”
yamanaʼ. Onaʼne, sion.
\v 19 Huakkaʼahuiti huadak ijkay namaʼda eʼnopo̱e̱a̱da
dakhueaʼ o̱gkaʼuy. Onteʼti Jesucristotaj oknopo̱e̱hueʼ o̱ʼnepo
namaʼda oʼnoknopo̱e̱ʼuy.
\v 20 Himeneo Alejandroere huabokerek o̱ʼnepo ken konig
o̱gkaʼuyate. Huadak ijkay eʼnopo̱e̱a̱da dakhueaʼ o̱gkaʼuy.
Diostaj dakhueaʼ onahueʼdik huaboaʼda kanopo̱e̱tpakeʼpo castiga
kamagkeʼpo totoʼ huairitaj ijbayokʼuy.
\c 2
\s Konig eʼtionaʼpak Pabloa oʼmanmadikaʼuyate.
\p
\v 1 Huakkuru huakkaʼ ijpakpo ijmanay. Yanʼmationaʼpakikaʼ
ijmanay. Ayaʼ aratbuttaj “yamatinepahuiʼpo,”
“yabatihuapokikaʼ, Dios” “dakiti, Dios”
monʼmationaʼpakikaʼ.
\v 2 Gobierno huairia oroʼomeytaj huadiayhueʼ moʼe̱ʼpo,
kenpaʼti oroʼomey ʼuruda a̱ʼe̱ya̱ʼpo, oroʼomeya̱
aʼmanopoʼnoeyayaʼpo, Diosenyoʼda aʼkikayaʼpo, huadak
aʼkikayaʼpo, gobierno huakhuairitaj monʼmationaʼpakikaʼ
kenpaʼti ayaʼ huairitada monʼmationaʼpakikaʼ.
\v 3 Ken konig eʼmationaʼpakikaʼ huadakda o̱ʼe̱. Diosa
kenda oʼpak. Diosa oroʼen huamanopoʼyareaʼeri o̱ʼe̱po kenda
oʼpak.
\v 4 Ayaʼtada eʼmanopoʼyareaʼtaʼ oʼpak kenpaʼti buttida huaʼa
Jesucristotaj ayaʼda eknopo̱e̱ʼtaʼ boʼtipakikaʼne.
\v 5 Diosyoʼda huadakda o̱ʼi̱kaʼ. Jesucristo nogbokerektida
o̱ʼe̱po, huamanopoʼnoeya̱ʼeri o̱ʼe̱po keʼnayoʼda Diostaj
manopoʼnoeyaʼdik moʼe̱ne.
\v 6 Ken Jesucristo huabokerek o̱ʼe̱po ayaʼtada dakhueaʼ eʼkaʼ
aʼbakkahueayaʼpo kenpaʼti castiga eʼkaʼtaj aʼbatiokayaʼpo
oʼpakpo moʼnigbueyʼuyate. Kenokaʼ Diosa oʼpakdepo kenda
moknopo̱e̱a̱ʼuy.
\v 7 Kenda aʼmanbatiaʼpakyaʼpo Diosa bektieʼeaʼuyne kenpaʼti
meʼtaʼmonaʼuyne. Nog aratbutte Diosa meʼtaʼmonaʼuyne.
Nog aratbut kanoknopo̱e̱ʼpo Jesucristotaj buttida huaʼa
yamanmadikaʼ menaʼuyne. Jesucristotaj yoknopo̱e̱po buttida
ijjay. Da ahueʼ i̱jje̱y.
\p
\v 8 Konige̱po meyo̱piʼ aratbut o̱gkupopakpo Diostaj
aʼbatadiʼkeayaʼpo o̱gkupopakpo huabokerek yanʼtionaʼpakikaʼ.
ʼUrunopoʼda konig dakhueaʼ kikahueʼ ya̱ʼnepo
yanʼtionaʼpakikaʼ. Kenpaʼti huadiayhueʼ ya̱ʼnepo, maboyhueʼ
ya̱ʼnepo Diostaj yanʼtionaʼpakikaʼ, kenda ijpakpo ijjay.
\v 9,10 Kenpaʼti ettoneʼ huaknopo̱e̱ʼeriere e̱gkupopakyaʼ
dakaʼ kanotikeʼpo, sueʼda huadak yudtaj kanotikeʼpo. ʼUru
yudtaj huabokereka meʼnontiahuayyeʼpo othueʼ kaʼnikeʼ. Diosen
o̱ʼnenok huadaknanada kanʼkikeʼpo. ʼUruaʼnanada huakuhuij
a̱ʼe̱ya̱ʼpo ijhueʼda kumore̱tkadhuahuikahueʼ kaʼneʼ. Kenpaʼti
siro oro huakaʼ kenpaʼti sakbij huakkaʼtenanada e̱e̱ʼtada
kenpaʼti yudtaj huakkaʼtenanada e̱e̱ʼtada othueʼ kaʼnikeʼpo
ijjay.
\v 11 O̱gkupopakpo ettoneʼ soataʼ kaʼneʼpo huadak huaʼataj
dakaʼ kanʼpe̱e̱ʼpo huaknopo̱e̱ʼeri huairitaj kanʼnigpe̱e̱ʼ.
\v 12 E̱gkupopakte ettoneʼa̱ huabokerektaj manmadikahueʼ
kaʼneʼ. Konig huairia manahueʼ kaʼneʼ. Utakaʼ kaʼneʼ.
Ijjay.
\v 13 Konige̱po huakkuruda Adántaj oʼkaʼuyate Diosa. Taʼpotaʼ
Evataj oʼkaʼuyate.
\v 14 Totoʼa da enaʼte Adán dakhueaʼ kahueʼ o̱ʼu̱yate. Totoʼa
da enaʼte ettoneʼnayo oʼnigpe̱e̱po dakhueaʼ oʼkaʼuyate.
Diostaj nigpe̱e̱hueʼ o̱ʼe̱po dakhueaʼ oʼkaʼuyate.
\v 15 Ettoneʼ Diostaj oʼnoknopo̱e̱po onsiʼpopakpo Diosen
durugda o̱ʼneonhuahuikaʼapo. Nogomeytaj diʼ o̱ʼnepo, Diosen
dakaʼ o̱gkikaʼpo, dakaʼ onʼnopo̱e̱po dakaʼ o̱gkikaʼpo, Diostaj
dakaʼ oʼnoknoponhuahuikaʼpo Diosere durugda
o̱ʼneonhuahuikaʼapo.
\c 3
\s Huaknopo̱e̱ʼeritaj huamato̱e̱ʼeri huairi konig e̱ʼdik o̱ʼne.
\p
\v 1 Huaknopo̱e̱ʼeritaj huamato̱e̱ʼeri huairi e̱e̱ʼtaʼ
eʼpaknayo beʼapiʼ huadak e̱ʼdik o̱ʼe̱. Huaknopo̱e̱ʼeritaj
huamato̱e̱ʼeri huairi huadik o̱ʼne obispo. Huaknopo̱e̱ʼeritaj
huamato̱e̱ʼeri huairi ʼurunanada o̱gkikaʼ oʼnopo̱e̱y. Kenda
buttida o̱ʼe̱.
\v 2 Konige̱po huaknopo̱e̱ʼeritaj huamato̱e̱ʼeri huairi
huadakda e̱ʼdik o̱ʼne. Huadak o̱ʼnenok huaknopo̱e̱ʼeria
dakhueaʼ huaahueʼdik o̱ʼnikaʼ. Nogtida ettoneʼ hua̱to̱e̱
to̱e̱ʼdik o̱ʼne. Sueʼda katetapiʼ huapakeri e̱ʼdik o̱ʼne.
Huakkaʼ huamaiʼhue̱ mayhueʼdik o̱ʼne kenpaʼti katepiʼ
oʼkaʼpo dakaʼ oʼnopo̱e̱po kadhuaʼdik o̱ʼne. ʼUruda kikaʼdik
o̱ʼne. Huadakda o̱ʼne nogomeya̱ onʼmaknopo̱i̱kaʼ.
Huaknopo̱e̱ʼeritaj huamato̱e̱ʼeri huairi esoeri
huaknopo̱e̱ʼeritaj batokudikaʼdik o̱ʼne jakyo. Apagbaʼ ʼuruda
manmadikaʼdik o̱ʼne.
\v 3 Huamaiʼhue̱ okkuda̱hueʼ i̱kaʼdik o̱ʼne. Huabatuktukeri
ehueʼdik o̱ʼne. Huamanoeynoeyeri e̱ʼdik o̱ʼne. Huakupe
engaña eʼmagkaʼtaʼ eretpakhueʼdik o̱ʼne. Sonnopoʼda e̱ʼdik
o̱ʼne.
\v 4 Huaknopo̱e̱ʼeritaj huamato̱e̱ʼeri huairi keʼnen huabettaj
keʼnen hua̱to̱e̱ʼtaj huasiʼpoeretaj dakaʼ mato̱i̱kaʼdik o̱ʼne.
Dakaʼ manikaʼdik o̱ʼne.
Keʼnensiʼpoa dakaʼ nigpe̱i̱kaʼdik
o̱ʼnepo huaojtaj dakaʼ oknopo̱e̱po onikaʼdik o̱ʼne.
\v 5 Huabokerekpiʼ hua̱to̱e̱ʼtaj huasiʼpoeretaj dakaʼ
mato̱e̱hueʼdik e̱e̱ʼnayo kenpaʼti huaknopo̱e̱ʼeritaj dakaʼ
mato̱e̱hueʼdik ya̱ʼneapet.
\v 6 Jesucristotaj huaboaʼda eknopo̱e̱ʼnayo keʼna hueretda
huaknopo̱e̱ʼeritaj huamato̱e̱ʼeri huairi ehueʼdik o̱ʼne.
Konig aʼnennanada totoʼ huiri namaʼda oʼnopo̱e̱ʼuyate.
ʼUrunanada i̱jje̱y namaʼda oʼnopo̱e̱ʼuyate, konige̱po
Diosa castiga oʼmagkaʼpo tototaj oʼmaenʼuyate. Kenpaʼti
hueretda huaknopo̱e̱ʼeri huamato̱e̱ʼeri huairi huaboaʼda
eknopo̱e̱a̱da namaʼda huadakda i̱jje̱y nopo̱e̱ʼdik
o̱ʼneapo. Dakhueʼapiʼ kaʼdikpiʼ o̱ʼneapo.
\v 7 Kenpaʼti huadakda oʼkikaʼ oknopo̱e̱hueʼ hua̱e̱ʼeria
oknopo̱e̱ʼdik o̱ʼne. Kenpaʼ oknopo̱e̱hueʼ e̱e̱ʼnayo huairitaj
dakhueaʼ huaʼadik o̱ʼne. Kenpaʼti totoʼ huairia engaña kaʼdik
oʼmaeapo.
\s Huaknopo̱e̱ʼerien huatihuapokeri huairi konig e̱ʼdik
o̱ʼne.
\p
\v 8 Jesucristotaj huaknopo̱e̱ʼerien huatihuapokeri huairi,
diáconos o̱ʼnepo ʼuruda kikaʼdik o̱ʼne. ʼUruda dakaʼ
nopo̱i̱kaʼdik o̱ʼne. Nogpaʼ nogpaʼ huaaʼeri ehueʼdik o̱ʼne.
Huakkaʼ huamaiʼhue̱ mayhueʼ o̱ʼnikaʼ. Huakupe engaña
eʼmagkaʼ eretpakhueʼdik o̱ʼne.
\v 9 Jesucristotaj buttida huaʼa Diosa moʼnopo̱e̱a̱ʼuyne.
Oroʼa oknopo̱e̱y huaknopo̱e̱ʼerien huatihuapokeri huairikon
dakaʼ oknopo̱e̱ʼdik o̱ʼne. ʼUrunopoʼada oknopo̱e̱ʼdik
o̱ʼne.
\v 10 Diáconostaj oktieʼeaʼhued kenomeytaj dakaʼ
yanʼbatiahuayonhuaʼpo yanʼmatinopo̱e̱po huadakda
e̱ʼneʼnayo huaknopo̱e̱ʼerien huatihuapokeri kaʼneʼpo.
\v 11 Kenomeyen hua̱to̱e̱kon ʼuruda kikaʼdik o̱ʼne.
Ettoneʼen huanopoʼa dakaʼda oʼnoknopo̱e̱po kikaʼdik o̱ʼne.
Huamahui̱a̱ʼeri ehueʼdik o̱ʼne. Huamaiʼhue̱ huapakeri
ehueʼdik o̱ʼne. Dakaʼ huanopo̱e̱ʼeri e̱ʼdik o̱ʼne. Namaʼda
ahueʼda keʼnen huaʼa kenda huakikaʼeri e̱ʼdik o̱ʼne.
\v 12 Huaknopo̱e̱ʼerien huatihuapokeri huairi nogtida
ettoneʼ hua̱to̱e̱ to̱e̱ʼdik o̱ʼne. Hua̱to̱e̱ huasiʼpoeretaj
dakaʼ mato̱i̱kaʼdik o̱ʼne.
\v 13 Jesucristoen huaknopo̱e̱ʼerien huatihuapokeri huairi
ʼuruda enʼtihuapokikaʼnayo huadakda o̱ʼne aratbuta
onʼtinopo̱e̱a̱po. Kenpaʼti nogi̱ti dakaʼ onʼnopo̱e̱po
Jesucristoen huadak huaʼa onʼmanbatiaʼpakapo.
\s Buttida huaʼa Diosa moknopo̱e̱a̱ʼuyne ʼurunanada o̱ʼe̱.
\p
\v 14 Onte i̱da ijhuahuaʼapetdapiʼ Timoteo. In
oʼnigmadoyaʼnig
\v 15 ijhueʼtada eʼhuahuaʼnayopiʼ Jesucristotaj huaknopo̱e̱ʼeri
huairi beʼa ya̱ʼneapet huabaktieʼeaʼ kenda aʼnopo̱e̱a̱yaʼpo
ontaj oʼnigmadoyaʼne. Oroʼomey Diosen aratbut o̱ʼe̱y. Ken
Dios oʼnoeonhuahuikaʼpo kenpaʼti buttida huaʼa dakaʼ
moʼtounhuahuikeʼ. Kenpaʼti buttida huaʼaʼa dakaʼ
boʼtiokaʼikaʼne.
\v 16 Buttida Jesucristoen huaʼa Diosa moknopo̱e̱a̱ʼuyne
ʼuruaʼnanada o̱ʼe̱. Aʼnenda nopo̱e̱hueʼ o̱ʼi̱kaʼuyne.
\q Kurudya̱ʼ Dios oʼsiʼpoe̱ʼuyate aratbutenso̱ʼnigda.
Jesucristo kenpaʼda huadak o̱ʼi̱kaʼpo kenyoʼda buttida oaʼikaʼ.
Diosen Noki̱re̱ga̱ moʼnopo̱e̱a̱ʼuyne. Diosen huataʼmoneria
onʼtiahuayikaʼpo dakaʼ onʼtihuapokonhuahuikaʼuyate.
Jesucristoen huadak huaʼa ayaʼ aratbuttaj ayaʼ huadaribayaʼ
onʼmanbatiaʼpakonhuahuaʼde. Nogbayaʼ nogbayaʼ nogdari
nogdaribayaʼ aratbut Jesucristotaj oʼnoknopounhuahuikaʼde.
Kurudyo̱ onteʼti oʼhuaʼuyate.
\c 4
\s Nogok huaknopo̱e̱ʼeri hueretda eknopo̱e̱ʼ
oʼnoknopo̱e̱batikapo. Namaʼda eknopo̱e̱ʼkon onʼpakapo.
\p
\v 1 Nogok Jesucristotaj hueretda eknopo̱e̱ʼ huakkaʼahuiti
oʼnoknopo̱e̱denigʼa oʼnoknopo̱e̱batikapo. Onteʼti
Jesucristotaj oknopo̱e̱hueʼ o̱ʼneapo. Da huaaʼeri totoʼ
noki̱re̱gtaj onʼpe̱i̱kaʼapo. Totoʼen namaʼda
huamanmadikaʼeritaj onʼnigpeonhuahuikaʼapo. Diosen
Noki̱re̱ga̱ kenda dakaʼ monaʼuyne.
\v 2 Da huaaʼikaʼeri da ijjayaʼ nopo̱e̱hueʼ o̱ʼe̱po namaʼda
onʼmanmadikaʼapo. Huakkaʼahuiti
onʼmanigpeonhuahuikaʼapo.
\v 3 “To̱e̱pakhueʼdik yaneʼ.” Namaʼda onʼmanaʼikaʼ.
Kenpaʼti “nogda nogda o̱jpaiʼ aypopiʼ bapehueʼ yanikaʼ,”
onʼmanaʼapo. Kenda namaʼda onʼmanaʼapo. Diosa ken
o̱jpaiʼ aypoere oʼkaʼuyatenok Jesucristotaj huaknopo̱e̱ʼeri
buttida huaknopo̱e̱ʼeri o̱ʼnepo Diostaj dakiti oʼnonaʼdepo
aypo o̱jpaiʼeritaj kanʼbapeʼikeʼ.
\v 4,5 Kenaʼpo Diosa ayaʼtada oʼkaʼuyatenok ayaʼda huadakda
o̱ʼe̱. “Huadak o̱ʼe̱.” Diosa oaʼuyate. Kenpaʼti dakiti Dios
monʼtionaʼpakdepo monʼbapeʼ. Bapokhueʼ ehueʼdik o̱ʼe̱ne.
\s Jesucristoen huamanmadikaʼeri dakaʼ nopo̱i̱kaʼdik o̱ʼne.
Huadak oknopo̱i̱kaʼdik o̱ʼne. Huadakda kikaʼdik o̱ʼne.
\p
\v 6 Efeso jak huaknopo̱e̱ʼeri huamaʼbuytaj kenda dakaʼ
yamanmadikaʼ. Iʼmanmadikaʼpo Jesucristoen ʼuruda
iʼnigpe̱e̱po huadak huaʼa iknopo̱e̱po Diostaj nogi̱ti
teynopoʼda i̱ʼe̱a̱po. Kenpaʼti buttida eknopo̱e̱ʼ dakaʼ
iknopo̱e̱po Diostaj ʼurunopoʼda i̱ʼi̱kaʼapo.
\v 7 Sueʼda huamanmadikaʼeriomey namaʼda
onʼmanbatiaʼpakonhuahuaʼ. Konig judío adhueaʼpaneʼ
onʼmanbatiaʼpakonhuahuaʼ. Kenomeytaj manigpe̱e̱hueʼ
ya̱e̱ʼ. Diostaj yamationaʼpakikaʼ. Diosenyoʼda yakikatiʼ.
\v 8 Hua̱so̱ʼ aʼteypakyaʼpo eʼketeʼnayo sueʼda huadak
moʼe̱a̱ʼne. Diostaj oʼnigpe̱i̱kaʼpo huadaknanada
moʼe̱a̱ʼne. Diostaj oʼnigpe̱i̱kaʼnok oy Diosa boʼtihuapokne.
Durugda o̱ʼi̱kay kenpaʼti nogok Diosere durugnanada
oʼnoeonhuahuikaʼapoy.
\v 9 Kenda buttida o̱ʼe̱. Ayaʼada oknopo̱e̱ʼdik moʼe̱ne.
\v 10 Konige̱po Diosen diga̱ʼda oʼkikay kenpaʼti oroʼtaj
eʼtidiʼkudhuaʼte diayhueʼ o̱ʼe̱po dakaʼ oʼnigi̱kay. Kenaʼpo
Dios huanoeonhuahuikaʼeri o̱ʼe̱ dakaʼ oknopo̱e̱y. Ayaʼ
hueretda huaknopo̱e̱ʼeritaj Diosa oʼmanopoʼtoeonhuahuikaʼpo
oʼnopoʼnoeanhuahuikaʼapo.
\p
\v 11 Kenda yamanaʼikaʼ kenpaʼti yamanmadikikaʼ.
\v 12 ʼUrudikyoʼ yabatiaʼpakikaʼ. Huaknopo̱e̱ʼeria ontaj
boʼtiahuaypo konigti huadakdikyoʼ batiaʼpakdik o̱ʼneapo.
Huadakyoʼ yakikaʼ. Ontaj boʼtiahuaypo konigti huadakyoʼ
kikaʼdik o̱ʼneapo. Diostaj aratbuttere diʼ yamaikaʼ. Ontaj
boʼtiahuaypo konigti diʼ onʼmaeapo. Cristoen noki̱re̱ga̱
ʼurunopoʼda ya̱i̱kaʼ kenpaʼti dakaʼ yaknopo̱i̱kaʼ. Ontaj
boʼtiahuaypo ʼurunopoʼda
o̱ʼnikaʼapo kenpaʼti dakaʼ
oʼnoknopo̱i̱kaʼapo. Sueʼda huatoneʼmon e̱e̱ʼpiʼ ontaj
nigpe̱e̱dik o̱ʼneapo.
\v 13 Aʼti ijhuahuaʼapoy. Ontaj huatiakhued e̱e̱ʼte
huaknopo̱e̱ʼeri e̱gkupopakte Apag Diosbaʼ yamanikaʼ,
yamaboroayʼikaʼ, yamanmadikikaʼ.
\v 14 Diosen Noki̱re̱ga̱ huaknopo̱e̱ʼeri huairitaj
oʼmanopo̱e̱a̱ʼnok “Diosa beʼtihuapokikaʼapone, eʼmaboroayʼ,
eʼmanmadikaʼ, eʼmato̱e̱ʼ kenda beʼtihuapokapone.” Huairia
boʼtibataʼteʼpo monaʼuyne. Kenda okkahuehueʼ ya̱e̱po
mepuʼkehueʼ i̱ʼe̱po dakaʼ yamaboroayʼikaʼ.
\p
\v 15 Kenda huairia monaʼuyne kenda yanopo̱i̱kaʼpo dakaʼ
yakikaʼ. Nogi̱ti nogi̱ti ʼuruda Diosen iʼkikaʼnok ayaʼada
tiahuaydik meʼneʼpo.
\v 16 Dakhueaʼpiʼ ijkay huataʼ yatinopo̱i̱kaʼ. Menpaʼ
namaʼdapiʼ ijmanmadikay huataʼda yatinopo̱i̱katiʼ. Dakaʼ
yanopo̱e̱po ʼurunanada Diosen huaʼa yamanmadikikaʼ. Kenda
eʼkikaʼnayo Diosere durugda iʼnoeonhuahuikaʼapo. Ontaj
huanigpe̱i̱kaʼerikon Diosere durugda onʼnoeonhuahuikaʼapo.
\c 5
\s Huaknopo̱e̱ʼeritaj monig magkaʼdik o̱ʼe̱ne.
\p
\v 1 Huaknopo̱e̱ʼeritoneʼtaj i̱ghuaʼ onahueʼ ya̱e̱po
konig
huadiʼ huaojtaj enapaʼ dakaʼ yamaboroay. Huabokerek sueʼda
huatoneʼmon hua̱e̱ʼeri konig huamaʼbuytaj enapaʼ ʼuruda
yamaboroayʼikaʼ.
\v 2 Ettoneʼtoneʼtaj konig o̱ʼnen hua̱ye̱taj enapaʼ dakaʼ
yamaboroayʼikaʼ. Kenpaʼti muneʼyo̱taj konig huaidpotaj
bokerekbohueʼ ya̱e̱po dakaʼ yamaboroay.
\p
\v 3 Ayhuatoneʼen huabet ehueʼda o̱ʼta̱e̱ʼnok konig paiʼda
e̱e̱ʼo̱k ayhuatoneʼtaj katepiʼ kanʼbayokikeʼ
huaknopo̱e̱ʼeria.
\v 4 Bepiʼ ayhuaen huasiʼpo eʼkerekdeʼ hua̱yo̱bupiʼ eʼkerekdeʼ
eʼtamaenayo huasiʼpo hua̱yo̱bupiʼ huaojen hua̱ye̱ereen aʼnen
moʼnigbaeʼikaʼuynig huakkaʼda dehueaʼ o̱ʼne. Huaojtoneʼtaj
hua̱ye̱toneʼtapiʼ kanʼtihuapokikeʼ Diosa kenda oʼpaknok
kanʼbayokikeʼ.
\v 5 Ken ayhua huabet to̱e̱hueʼda konig paiʼda o̱ʼnepo Diosa
beʼtihuapokapone onʼnopo̱e̱po, kenpaʼti huameʼnoe sikyoere
Diostaj onʼtionaʼpakikaʼ. Kenomey hueretda ayhua o̱ʼne.
Kenomeytaj huaknopo̱e̱ʼeria kanʼbatihuapokikeʼ.
\v 6 Nog ayhuanayo hua̱ʼenda diga̱ʼda oʼderetpakikaʼ, huakkaʼda
oʼderetpakikaʼ, kenomeynayo konig nopoʼnoeyhueʼ o̱ʼne.
Hueretda ayhua ehueʼ o̱ʼnenok batihuapokhueʼ kaʼnikeʼ.
\v 7 Kenda huaknopo̱e̱ʼeritaj yamanaʼ. Ayhuaensiʼpoapiʼ
huayayoapiʼ katepiʼ aypopiʼ yanʼbayokikaʼ. Yamanaʼ.
Eʼbayokikaʼnayo
beʼapiʼ dakhueaʼ bahuaahueʼdik o̱ʼneapo.
\v 8 Huabet konig paiʼda huapaneʼtoneʼpiʼ
huamamatoneʼpiʼ kenpaʼti hua̱ye̱ ayhuapiʼ paiʼda
e̱ʼta̱e̱tada beʼapiʼ dakaʼ mato̱e̱hueʼ e̱e̱ʼnayo kennayo
dakhueʼnanada o̱ʼe̱. Kenomey namaʼda Diostaj
oʼnoknopo̱e̱nigʼa konig oknopo̱e̱hueʼ hua̱e̱ʼeri
nogi̱tinada dakhueaʼnada o̱ʼne.
\p
\v 9,10 ¿Huaknopo̱e̱ʼeria beʼ ayhuatataj aypo yudtapiʼ
bayokikaʼdik ya̱ʼne? Paiʼda ayhua huatoneʼnada konig
sesenta nogi̱tipiʼ huabayok e̱e̱ʼnayo, nogtida hua̱to̱e̱
eʼto̱e̱ʼuynayo, “huadakda oʼkikaʼ,” aratbuta enʼbatiaʼpaknayo,
keʼnensiʼpotaj dakaʼ eʼmato̱e̱ʼikaʼuynayo, esoeri
huaknopo̱e̱ʼeritaj jakyo eʼbatokudikaʼnayo, paiʼda
huaknopo̱e̱ʼeritaj eʼtihuapokikaʼnayo, dakhueʼtaj
eʼmatinoikameʼnayo, kenpaʼti katepiʼ nogda nogda huadak
eʼkikameʼnayo kenomey ayhuataj aypo yudtapiʼ
huaknopo̱e̱ʼeria kanʼbayokikeʼ.
\p
\v 11 Ayhua sesenta huabayok ehued e̱e̱ʼtaj aypopiʼ katetapiʼ
bayokhueʼ kanʼmaikeʼ huaknopo̱e̱ʼeria. “Onteʼti
to̱e̱pakhueʼ i̱jje̱po Jesucristotayoʼda ijnigpe̱i̱kaʼapoy,”
eaʼada huabokerektaj eʼmuneʼboʼ o̱ʼnepo Cristotaj oʼnendepo
onteʼti eʼto̱e̱paktaʼ yanʼpakapetpiʼ.
\v 12 Keʼnada onʼdikjenonpo dakhueaʼda o̱gkaʼ. Ayaʼada
onʼtipe̱e̱a̱po
dakhueaʼda oʼkaʼ, bahuaaʼdik o̱ʼneapo.
\v 13 Kenpaʼti kenomey ayhuataj eʼbayokikaʼnayo katepiʼ
kahueʼdikda o̱ʼneapo. Nog jak nog jakyo onʼhuaʼepo,
onʼmahui̱ʼi̱a̱ʼpo nogtaj nogtaj namaʼda onʼbahuaaʼapo.
\v 14 Konige̱po ayhua huatoneʼ ehued e̱e̱ʼted
kanʼto̱e̱pakpo kansiʼpopakpo taʼba jakeretaj dakaʼ
kanʼmato̱e̱ʼ. Huadakda o̱gkikaʼnok oknopo̱e̱hueʼ
hua̱e̱ʼeriomeya̱ sigpiʼ dakhueaʼ bahuaahueʼdik o̱ʼneapo
ijnopo̱e̱y.
\v 15 Totoʼ engaña e̱gkak huakkaʼahuiti ayhua Jesucristotaj
e̱ʼnigpe̱e̱i̱kaʼada o̱ʼnokbatikpo totoʼtakon
onʼnigpe̱e̱depo. Cristotaj oʼnoknopo̱e̱batikmeʼte.
\p
\v 16 Huabokerek ettoneʼpiʼ huaknopo̱e̱ʼeri o̱ʼnepo paiʼda
ayhua huabeta enʼta̱e̱ʼnayo yudtaj kenpaʼti aypo
kanʼbayokikeʼ, huaknopo̱e̱ʼeri huakupopakerianayo ayaʼada
bayokhueʼdik kaʼnikeʼ. Nog huerettayoʼda ayhuataj bayokikaʼdik
kaʼneʼ.
\p
\v 17 Huaknopo̱e̱ʼerien huairi huadakda huaknopo̱e̱ʼeritaj
huadak huaʼa eʼmanaʼikaʼnayo dakhuapa kanʼbayokikeʼpo
huaknopo̱e̱ʼeria kenpaʼti huadak o̱ʼne kanʼmatinopo̱i̱keʼ.
Eʼmanbatiaʼpakikaʼnayo kenpaʼti eʼmanmadikikaʼnayo nogi̱ti
dakhuapa kanʼbayokikeʼ.
\v 18 “Vacapiʼ huakidtaj trigokidpiʼ onʼti̱o̱gkubereʼepo
onʼtikaaʼikaʼ,
hua̱o̱jpataj tinukuhueʼdik kaʼneʼ. Vacaa
sueʼpiʼ huakid bapikaʼdik kaʼneʼ.” Kenpaʼti “Huanabaʼtaj
dakhuapa bayokikaʼdik kaʼneʼ.” Kenda Apagbaʼa oʼmanaʼnok
konigti huairitaj dakhuapa kanʼbayokikeʼpo huaknopo̱e̱ʼeria.
\p
\v 19 Huaknopo̱e̱ʼerien huairitaj “Dakhueaʼ oʼkaʼ,”
nogtiadapiʼ eʼhuaaʼnayo pe̱e̱hueʼdik kaʼneʼ. “Dakhueaʼ
oʼkaʼ,” bottaʼa bapaʼapiʼ enʼhuaakda pe̱e̱ʼdik kaʼneʼ.
\v 20 Huairia dakhueaʼ o̱gkaʼnok batikhueʼda o̱gkaʼnok ayaʼ
huaknopo̱e̱ʼeria onpe̱e̱depo “Namaʼda bokaʼ.
Yanʼnopoʼkoreaʼpo onteʼti huadakda ya̱gʼkikaʼ.” O̱ʼna i̱ghuaʼ
yamanaʼ. Ayaʼada moʼpe̱e̱po onmeʼpukpo dakhueaʼ eʼkaʼtaʼ
pakhueʼ o̱ʼneapo.
\v 21 Diosa menʼtiahuayne, Jesucristoa menʼtiahuayne. Diosen
huataʼmoneria kurudya̱ʼ boʼtiahuayne, i̱ghuaʼda yonay. Kenda
huaboaʼda oʼnigmadoyaʼne huadakda yanopo̱e̱po, yakikatiʼ.
Hua̱ʼenda yapakpo kikahueʼ ya̱e̱ʼ. O̱ʼnen huadiʼtaj
matinepahuihueʼ ya̱e̱po yakaʼ. Ayaʼtada konigti yakikatiʼ.
\v 22 Dakaʼ ya̱ʼnako̱kienpo huaknopo̱e̱ʼerien huairi hua̱e̱ʼ
baeʼdik ya̱e̱ʼikaʼ. I̱da maki̱e̱a̱hueda̱da baehueʼ ya̱i̱kaʼ.
I̱dada maki̱e̱a̱hueʼada eʼbaeʼnayo dakhueaʼ kaʼdikpiʼ ya̱ʼnet
kenpaʼti namaʼda oʼbaey nogomeya̱ moʼtinopo̱e̱a̱pet.
Huadakda o̱ʼe̱ yatinopoeonhuahuikaʼpo namaʼda kikahueʼ
ya̱e̱ʼ. Dakhueʼen kikahueʼ ya̱e̱ʼ. Huadakyoʼ yakikaʼ.
\p
\v 23 Nogok nogok o̱ʼnen huadapo dakhueʼ i̱ʼi̱kaʼnok kenpaʼ
i̱ʼi̱kaʼnok hue̱ʼe̱y sueʼda vinoere yakmayikatiʼ.
\p
\v 24 Aratbuta enʼtiahuaytada sueʼda huakkaʼa dakhueaʼ o̱gkikaʼ.
Dakhueaʼ o̱gkikaʼ ayaʼada onʼmatinopo̱e̱. Dakhueʼda o̱gkikaʼ
eʼtinopo̱e̱ʼnayo konig huaknopo̱e̱ʼerien huairi hua̱e̱ʼ
baehueʼdik ya̱e̱ʼ. Aratbuta tiahuayhueʼ e̱e̱ʼte nogomey
konig i̱re̱gi̱re̱g dakhueaʼ o̱gkikaʼnok menpaʼ dakhueaʼ
o̱gkikapiʼ menpaʼ huadak o̱gkikapiʼ dakaʼ yamaknopo̱e̱po.
Dakaʼ yabatiahuayikaʼ. Dakhueaʼ o̱gkikaʼ eʼmatinopo̱e̱ʼnayo
kentaj huairi hua̱e̱ʼ baehueʼ ya̱e̱ʼ.
\v 25 Kenpaʼti aratbuta enʼtiahuaytada huabokerekpiʼ huadakda
o̱gkikaʼ. Kenda ayaʼda onʼtinopo̱e̱po huairi hua̱e̱ʼ baeʼdik
ya̱e̱ʼ. Soatayoʼ huadakda e̱gkikapiʼ nogok huadakda o̱gkikaʼ
ayaʼ onʼmatinokotdepo huaknopo̱e̱ʼerien huairi hua̱e̱ʼ
baeʼdik ya̱e̱ʼ.
\c 6
\p
\v 1 Huakkaʼahuiti huairien huanabaʼ huaknopo̱e̱ʼeri o̱ʼne.
Ayaʼada huanabaʼ huairitaj ʼuruda kanʼmanigkikeʼ. Huairi
oknopo̱e̱hueʼ hua̱e̱ʼeri o̱ʼe̱piʼ dakaʼ kanʼtinopo̱i̱keʼ
huadiayhueʼ kaʼnikeʼ, dakaʼ kanʼnigpe̱i̱keʼ. Ken konig
e̱gkikaʼnayo aratbuta huanabaʼtaj onʼbatiahuaypo Diosendiktaj
tidikehueʼ o̱ʼneapo kenpaʼti Jesústaj huadak huaʼa
tierikikahueʼ o̱ʼneapo.
\v 2 Huairi huaknopo̱e̱ʼeri e̱e̱ʼnayo “Doʼed huamaʼbuy huairi
sueʼda huadak tinopo̱e̱ʼdik i̱jje̱po kenpaʼti sueʼda
nigpe̱e̱dik i̱jje̱y,” huanabaʼa ahueʼ kaʼneʼ. Diosa huairitaj
diʼ o̱ʼta̱e̱nok kenpaʼti huairi huaknopo̱e̱ʼeri huamaʼbuy
o̱ʼe̱nok nogi̱ti nogi̱ti huadak kanʼtihuapokikeʼ
kanʼnigpe̱i̱keʼ. Kenda yamanmadikaʼ kenpaʼti yamanaʼ.
Huaknopo̱e̱ʼeritaj yamanaʼ.
\s Diostaj eʼnigpe̱i̱kaʼ huadakda o̱ʼe̱nok durugnopoʼda
o̱ʼneonhuahuikaʼapo.
\p
\v 3 Sueʼmon huamanmadikaʼeri Jesucristo Huairitaj buttida
eʼmanmadikaʼtaj eʼnigpe̱e̱taʼ pakhueʼ o̱ʼnepiʼ kenpaʼti
Diosen huamanmadikaʼ pakhueʼ o̱ʼnepiʼ nogpaʼda
eʼmanmadikaʼtaʼ eʼpaknayo kenomey konig o̱ʼne
onʼbatiaʼpakapone.
\v 4 Kenomey huakkaʼda ijnopo̱e̱y namaʼda onʼnopo̱e̱nigʼa
nopo̱e̱hueʼ o̱ʼne. Dakhueʼnopoada nogpaʼ nogpaʼ namaʼda
eʼbatiaʼpaktaʼ oʼderetpak. Huadiktaj eʼbatiaʼpaktaʼ
oʼderetpaknok kenomeytaj onʼpe̱e̱po onʼbahuadiayo̱gkaʼapo,
huayahuaya dakhueaʼ onʼmanaʼapo, onʼmahui̱ʼi̱a̱ʼapo
namaʼda huayahuaya onʼmatinopo̱e̱a̱po.
\v 5 Kenpaʼti namaʼda huamanmadikaʼeria huayahuaya
onʼmaboyikaʼapo. Namaʼda huanopo̱e̱ʼeritaj kenpaʼti buttida
huaʼa nopo̱e̱hueʼ hua̱e̱ʼeritaj onʼmaboyikaʼapo. Diosen
ekaʼnayo huakkaʼda katepiʼ ijmato̱e̱a̱poy namaʼda
onʼnopo̱e̱. Kenomeytaj yabakhuatiʼ.
\v 6 Huakkaʼ katepiʼ eʼmato̱e̱ʼtaʼ pakhueʼ o̱ʼe̱po Diosen
eʼkikaʼnayo durugnanada o̱ʼunhuahuikaʼapone.
\v 7 Ken eʼsiʼpoe̱ʼte katepiʼ mato̱e̱hueʼda o̱ʼu̱yne kenpaʼti
oʼbueydepo sigpiʼ tohuahueʼdik o̱ʼe̱a̱pone.
\v 8 Huakkaʼda katepiʼ mato̱e̱hueʼ e̱ʼe̱a̱da aypo yudtaereyoʼda
oʼto̱e̱po durugnada e̱ʼdik o̱ʼe̱a̱pone.
\v 9 Nogomeynayo huakkaʼnada eʼmato̱e̱ʼtaʼ oʼderetpaknigʼa
namaʼda nogda nogda baeʼdik ya̱ʼneapet. Totoʼtaj namaʼda
yanʼnigpe̱e̱a̱petpiʼ. Kenpaʼti nogtaʼ nogtaʼ yanʼderetpakpo
dakhueaʼ ya̱gkaʼapetpiʼ. Diosa castiga oʼmagkaʼpo kenpaʼda
oʼmaenapo.
\v 10 Beʼapiʼ huakupetaʼ onʼeretpakpo nogda nogda dakhueaʼ
o̱gkikaʼapo. Huakkaʼahuiti huakupe oʼderetpakpo namaʼda
o̱gkaʼdepo Jesucristotaj oʼnoknopo̱e̱denigʼa oʼnokbatikdepo
paiʼnanada onʼnopoʼunhuahuaʼ.
\s Jesucristotaj dakaʼ yanigpe̱i̱kaʼpo yaknopo̱i̱kaʼ.
\p
\v 11 Onnayo Diosen huanigpe̱i̱kaʼeri i̱ʼe̱nok, Timoteo,
kenda huaboaʼda onaʼne kahueʼ ya̱e̱ʼ, dakhueaʼ kahueʼ
ya̱i̱kaʼ. Huakkaʼ yapakpo huadakda yakikaʼ, Diostaj diʼ ya̱e̱po
dakaʼ yanigpe̱i̱kaʼ, Diostaj dakaʼ yaknopounhuahuikaʼ,
ayaʼtada diʼ yamaikaʼ, huaknopo̱e̱ʼeriapiʼ dakhueaʼ e̱gkaʼnayo
huadiayhueʼ ya̱e̱po dakaʼ yaknopo̱e̱po yamanaʼ.
\v 12 Oknopo̱e̱hueʼ hua̱e̱ʼeria eʼtieriknayo, batikhueʼ ya̱e̱ʼ.
Dakhueaʼ eʼkaʼtaʼ eʼpaknayo kahueʼ ya̱e̱ʼ. Jesucristotaj dakaʼ
yaknopounhuahuikaʼpo Diostaj yanigpe̱i̱kaʼ. Diosere durugda
ijnoeonhuahuikaʼapoy diga̱ʼ yaknopo̱i̱kaʼ. Huakkaʼ aratbut
onʼpe̱e̱po “Ijnopoʼkoreʼuypo Jesucristotaj yoknopo̱i̱kay,”
o̱ʼna dakaʼ eʼmanaʼte “Doere yanoeonhuahuikaʼ.” Kenpaʼ
Diosa menuyne.
\v 13,14 Diosa ayaʼtada oʼmanoeaʼikaʼ. Poncio Pilatotaj
Jesucristoa meʼpukhueʼada “Judíoen Huairi i̱jje̱y,” buttida
onaʼne. Diosen huaʼa yanigpe̱i̱kaʼ. Ayaʼda onaʼdenig dakaʼ
yakikaʼ. “Dakhueaʼ iʼkaʼ,” beʼapiʼ onahueʼdik moʼe̱ne.
Jesucristo Huairi tiakhued e̱e̱ʼted huadaknada yakikaʼ.
\v 15 Nogok Diosa oʼpakdepo oʼtaʼmonaʼapo Jesucristotaj
oʼbatiahuayʼeaʼapo. Dios huamadurugpakaʼeri o̱ʼe̱po kenyoʼda
huamananhuaʼ huairitoneʼ o̱ʼi̱kaʼnok. Kenpaʼti teynanada
o̱ʼi̱kaʼ. Ayaʼ gobiernoen huairi o̱ʼe̱. Huamataʼmonaʼerien
huairi o̱ʼe̱. Diosnayo huaboroʼ huairida o̱ʼi̱kaʼ.
\v 16 Diosyoʼda bueyhueʼdik o̱ʼe̱po oʼnoeonhuahuikaʼ.
Huakjeyyo oʼnoeonhuahuikaʼ. Ke̱yo̱ beʼapiʼ huahuahueʼdik
o̱ʼe̱ne. Kenpaʼti Diostaj nogtiapiʼ aratbuta tiahuayhueʼda
o̱ʼnikaʼ. Oydapiʼ tiahuayhueʼdik o̱ʼnikaʼ. Keʼnayoʼda
huadaknanada o̱ʼi̱kaʼ ayaʼada kanʼbatiaʼpakikeʼ. Kentaj
kanʼnigpe̱i̱keʼ ayaʼtada Diosa kamananhuahuikeʼpo.
\p
\v 17 Huakkaʼda huamato̱e̱ʼeri huairitaj yamanatiʼ. “Huakkaʼ
ijmato̱e̱y, huairi i̱jje̱y, huadak i̱jje̱y.” Huataʼda
tinopo̱e̱hueʼ yaneʼ, yamanatiʼ. “Huakkaʼ ijmato̱e̱y
katetapiʼ meʼpukehueʼdik i̱jje̱y,” nopo̱e̱hueʼ yaneʼ,
yamanikatiʼ. Menokapiʼ kenda mato̱e̱hueʼdikda ya̱ʼneapet.
“Oroʼtaj boʼtihuapokikaʼpo Diosa dakhuapa boʼyokikaʼne. Diosa
dakhuapa beyokikaʼapone,” yanoknopo̱i̱kaʼ. Yamanaʼ.
\v 18 “Nogomeytaj huadakda ya̱gʼkikaʼ, yanʼbatihuapokikatiʼ,
daknopoʼda ya̱ʼnepo yanʼbayokikatiʼ.” Kenda yamanikaʼ.
\v 19 Ken konig e̱gkikaʼnayo Diosa ʼuruaʼnanada
oʼmato̱i̱kaʼapo kenpaʼti Diosere durugnanada
onʼnoeonhuahuikaʼapo.
\s Taʼpote kenpaʼda Timoteotaj onaʼuyate.
\p
\v 20 Diosa ʼurudikda huakkaʼ meʼnopo̱e̱a̱ʼuyne. Dakaʼ
yadikto̱i̱kaʼ. Dakaʼ yanigpe̱i̱kaʼ. Dakaʼ yamanmadikikaʼ.
Nogomey namaʼda enʼmanbatiaʼpakonhuaʼte pe̱e̱hueʼ
yamaikaʼ. ʼUrunanada oʼnopo̱e̱y namaʼda
onʼbatiaʼpakikaʼ.
\v 21 Kenomey ʼurunanada ijnopo̱e̱y onʼnopo̱e̱nigʼa
onteʼti Diosen hueretda eknopo̱e̱ʼ oknopo̱e̱hueʼ o̱ʼne.
Kenomeytaj pe̱e̱hueʼ yamaikaʼ, Timoteo.
\p Ontaj Diosa dakaʼ meʼtounhueʼ.