\id PHM
\h FILEMÓN
\toc1 Filemón
\toc2 Flm
\mt1 FILEMÓN
\mt2 Filemóntaj Pabloa oʼnigmadoyaʼuyate.
\c 1
\s Filemóntaj Pabloa oʼnigmadoyaʼuyate.
\p
\v 1 Do Pablo i̱jje̱y. Cristo Jesústaj ijnigpe̱i̱kaʼpo Roma
aratbuten huabakuda̱ʼ jakyo i̱ji̱kay. Doʼhued huamaʼbuy
Timoteoere i̱jje̱po oʼnigmadoyaʼne. O̱ʼna Filemón huadiʼda
o̱ʼe̱ne, oroʼomeyere huadak huaʼa huamanbatiaʼpakeri
i̱ʼe̱ne.
\v 2 Kenpaʼti Cristotaj huaknopo̱e̱ʼeri o̱ʼnen jakyo
o̱gkupopakikaʼ, kenomeytaere oʼnigmadoyaʼne. Kenpaʼti
oroʼomeyen huaidpo Apiataj Arquipotakon oʼnigmadoyaʼne.
Arquipo konig Cristoen huanabaʼ oroʼere huadak huaʼa
oʼmanbatiaʼpakikaʼ.
\v 3 Oroʼomeyen Apag Diosere Huairi Jesucristoerea
opudomeytaj oʼmatinepahuiʼpo moʼnopoʼdurugpakeʼpo
moʼnopoʼnoeyeʼpo.
\s Huaknopo̱e̱ʼeritaj Filemóna diʼ oʼmaikaʼpo Huairi
Jesústaj dakaʼ oknopo̱i̱kaʼne.
\p
\v 4,5 Diostaj huaknopo̱e̱ʼeri ayaʼtada on Filemón diʼ
iʼmaikaʼ kenpaʼti Huairi Jesústaj dakaʼ iknopo̱i̱kaʼ
oʼtipe̱e̱ʼuypo Diostaj ijtionaʼpakpo doʼhued Diostaj dakiti
yonaʼikay.
\v 6 Huairi Jesústaj dakaʼ iknopo̱i̱kaʼnok aratbuta
ʼuruaʼnanada oʼnoknopo̱i̱kaʼ kenpaʼti Cristotaj
onʼeretpakpo dakaʼ onʼnigpe̱i̱kaʼ. Cristo Jesústaj
oʼnoknopo̱e̱po durugda o̱ʼneonhuahuikaʼapo kenpaʼti Diosa
dakaʼ moʼnigkikaʼapone kanʼnopo̱e̱ʼpo
ijmanigtionaʼpakikay.
\v 7 Huakkaʼ huaknopo̱e̱ʼeritaj diʼ iʼmaepo
iʼbatihuapokikaʼnok nogi̱ti nogi̱ti dakaʼ Diostaj
oʼnoknopo̱e̱. Kenda ijtipe̱e̱depo Diostaj nogi̱ti durugda
i̱jje̱y kenpaʼti nogi̱ti Diosen eʼkikaʼtaʼ ijpaki.
\s Konig doʼtaj oeʼuynig, konigti o̱ʼnen huanabaʼ
Onésimotaj dakaʼ yaeʼtiʼ Pabloa Filemóntaj onaʼuyate.
\p
\v 8 Cristoen huataʼmonaʼeri i̱jje̱po “Onésimotaj dakaʼ
yaeʼ,” onaʼdik e̱e̱ʼpiʼ o̱ʼe̱nigʼa
\v 9 diʼ iʼmaikaʼnok “Eʼpaknayo Onésimotaj dakaʼ yaeʼ,”
onaʼne. Do Pablo i̱jje̱y. Toneʼbokerek i̱jje̱po Jesucristotaj
huadak huaʼa ijmanmadikikaʼpo oyda huabakuda̱ʼ
jakyo i̱ji̱kay.
\v 10 “Onésimotaj ʼuruaʼda yaeʼ.” Kenda huakkaʼ ijpakpo
onaʼne. I̱yo̱ huabakuda̱ʼ jakyo i̱jje̱po Jesucristotaj doʼhua
eʼmanmadikaʼte oknopo̱e̱ʼuynok Onésimo konig
doʼhuedsiponig o̱ʼe̱ konig keʼnen huaojonig ijnigʼu̱ynok.
\p
\v 11 Aʼnenda Onésimo o̱ʼnen huanabaʼa ontaj nigpe̱e̱hueʼ
e̱ʼe̱a̱da oynayo ontaj kenpaʼti doʼtaj eʼnigpe̱e̱taʼ
oʼpakikaʼ. Oy Cristotaj huaknopo̱e̱ʼeri o̱ʼe̱po ontaj
eʼnigpe̱e̱taʼ oʼpak.
\v 12 Onte kahueʼpo ijtaʼmonay. Onésimotaj ʼuruteda yaetiʼ.
Konig doʼhuednopoʼ oʼnigtaʼmonaʼnigtaj diʼnanada
Onésimotaj yaeʼ.
\v 13 Jesucristoen huadak huaʼa ijmanbatiaʼpakikaʼuynok
bokuda̱meʼnok huabakuda̱ʼ jakyo i̱jjunhuay. On i̱yo̱
e̱e̱ʼnayo doʼtaj oʼtihuapokikaʼayetnigʼa i̱yo̱ ehueʼ i̱ʼe̱nok
ontehuapaʼ o̱ʼnen huanabaʼ Onésimo doʼtaj beʼtihuapokikeʼ
doʼhua
eʼpakada
\v 14 “Katihuapokeʼpo meʼta̱to̱e̱ʼ,” onahueʼ o̱ʼu̱ynok
kenpaʼti kentaʼ iʼpaketpiʼ onte ijnigtaʼmonaʼapoy. Katepiʼ
doʼtaj nigkaʼdik meʼe̱ne enaʼtaʼ pakhueʼ o̱ʼe̱ne.
\v 15 Diosa oʼpaknok oy kenpaʼti nogok nogok onere onteʼti
Onésimo o̱ʼunhuahuikaʼapo konige̱popiʼ ontaj sueʼda
huapuugte oʼbakhuaʼuyate.
\v 16 O̱ʼnen huanabaʼ iʼtaeonhuahuikaʼaponigʼa
huanabaʼyoʼda ehueʼdik iʼta̱e̱a̱po. Konig o̱ʼnen
huadiʼnanada huamaʼbueykon iʼta̱e̱a̱po. Doʼhued huamaʼbuy
konig i̱jta̱e̱po huakkaʼ diʼ i̱jje̱y. O̱ʼnanayo Onésimotaj
nogi̱ti diʼ ya̱e̱ʼ. Ken o̱ʼnen huanabaʼ iʼta̱e̱ nogi̱ti diʼ
ya̱e̱ʼ. Ken Huairi Jesucristotaj huaknopo̱e̱ʼeri huamaʼbuy
o̱ʼe̱nok nogi̱ti diʼ ya̱e̱ʼ.
\p
\v 17 Ken Jesucristotaj oroʼ onokteyoʼ oknopo̱e̱po konig
doʼtaj dakaʼ beʼikaʼnig konigti Onésimotaj dakaʼ yaeʼ.
\v 18 Ontaj aʼnenda Onésimo dakhueaʼ ekaʼnayo dehueaʼ
e̱e̱ʼnayopiʼ doʼhua oʼyokapone.
\v 19 Do Pabloa huabaʼa oʼnigmadoyaʼne. Kenda Onésimo
dehueaʼ o̱ʼe̱po ontaj oʼyokapone. Jesucristoen huadak huaʼa
ontaj onaʼuynok iknopo̱e̱po Diosere iʼnoeonhuahuikaʼapo.
Konige̱po doʼtaj dehueaʼ o̱ʼe̱ne. Kenda on iʼnopo̱i̱kaʼnok
onahueʼdik o̱ʼe̱ne.
\v 20 E̱e̱ʼ, egʼ do Huairi Jesústaj yoknopo̱e̱po do
kanopoʼdurugpakeʼpo huaknopo̱e̱ʼeri huamaʼbuy i̱ʼe̱po
Onésimotaj dakaʼ yadeʼtiʼ.
\p
\v 21 Kenda onaʼnig iʼnigpe̱e̱a̱pone dakaʼ ijnopo̱e̱po
oʼnigmadoyaʼne. Kenpaʼti nogi̱ti menigkaʼ enaʼnayo
oʼnigkaʼapone dakaʼ ijnopo̱e̱y.
\v 22 Onésimotaj eeʼte kenpaʼti doʼtaj o̱ʼnen jakyo adkorepen
huatay dakaʼ menigkatiʼ. Doʼtehuapaʼ onʼtionaʼpakikaʼnok
Diosa meʼo̱ro̱kapetpiʼ. Ijjo̱ro̱kpo opudomeytaj huahuaʼdik
i̱jje̱a̱petpiʼ.
\s Saludos onʼmanigdiktaʼmonaʼpo kenpaʼti Huairi Jesucristo
dakaʼ kanʼmaikeʼpo.
\p
\v 23 Epafras Cristo Jesústaj oknopo̱e̱nok kenpaʼti
oʼnigpe̱i̱kaʼnok doere huabakuda̱ʼ jakyo o̱ʼe̱po opudomeytaj
saludos oʼmanigdiktaʼmonaʼ.
\v 24 Marcos Aristarcoere Demasere Lucasere doere huadak huaʼa
onʼmanbatiaʼpakikaʼ saludos oʼmanigdiktaʼmonaʼ.
\p
\v 25 Oroʼomeyen Huairi Jesucristoa opudomeytaj dakaʼ
kamanikeʼ, ken.