\id 1PE
\h 1 PEDRO
\toc1 1 Pedro
\toc2 1 Pe
\mt1 1 PEDRO
\mt2 Pedroa huakkuruda oʼmanigmadoyaʼate.
\c 1
\s Pedroa huaknopo̱e̱ʼeritaj nogyon nogyon oʼmanigmadoyaʼuyate.
\p
\v 1 Do Pedro i̱jje̱po onʼnigmadoyaʼne. Jesucristotaj
aʼmanbatiaʼpakikayaʼpo Dios Jesucristoere meʼtaʼmonaʼuyne.
Jesucristoen huanigpe̱i̱kaʼeri moʼe̱nok o̱ʼnenbayaʼ
moʼbakmonʼuyate. Nogenbayo moʼi̱kaʼpo Ponto huadaribayo
Galacia huadaribayo Capadocia huadaribayo Asia huadaribayo
Bitinia huadaribayo moʼi̱kaʼne.
\v 2 Aʼnenda Apag Dios oʼpakpo opudtaj bokbatieʼeaʼuyate. Oy
Jesucristotaj moknopo̱e̱ kenda Dios oʼnopo̱i̱kaʼuyate.
ʼUrunopoʼ yanʼnopoʼto̱i̱kaʼpo Jesucristoenyoʼda
yanʼnigpe̱i̱kaʼpo Diosen Noki̱re̱ga̱ moʼnopoʼto̱i̱kaʼne.
Kenpaʼti opudomeytaj bokkahueʼpo Jesús moʼnigbueypo
mimia moʼnopoʼtihuekeʼpo. Ken Dios ʼuruaʼda botihuapokikeʼ
kenpaʼti moʼnopoʼnoeyikeʼpo, ijtionaʼpaki ken.
\s Diosere ʼuruda oʼnoeonhuahuikaʼapoy kenda oknopo̱i̱kay.
\p
\v 3 Dios Jesucristoen Apag ʼurunanada o̱ʼe̱
monʼbatiaʼpakikaʼ. Oroʼomeytaj moʼmatinepahuieʼpo Diosen
Noki̱re̱ga̱ moʼnopoʼto̱e̱depo Diosensiʼpoaʼ oʼyahuedepo
kenpaʼti Dios Jesucristo eʼbueytada oʼnoyhuada̱ʼuynok
oroʼtakon moʼmanoyhuada̱ʼapone Diosere
oʼnoeonhuahuikaʼapone oknopounhuahuikaʼne.
\v 4 Kurudyo̱ Dios ʼurunanada moʼnigkadhuahuikaʼdepo dakaʼ
moʼmatounhuahuikaʼpo kenda Dios oʼkaʼ huadakda
o̱ʼunhuahuikaʼapo batitikhueʼdik o̱ʼe̱a̱ponok durugda
o̱ʼunhuahuikaʼapone.
\v 5 Diostaj oknopo̱e̱nok teyda boʼtiokikaʼpo
moʼtounhuahuikaʼpo nogok keneʼhua̱ya̱ʼ huameʼnoete
kurudyo̱ boʼtohuaʼapone.
\p
\v 6 Konige̱po durugnanada moʼe̱ne. Oypiʼ ijhueʼ ehueʼ
paiʼda eʼnopoʼe̱piʼ sueʼda dakhueaʼ eʼkaʼtaʼ eʼpakpiʼ dakaʼ
moknopo̱e̱po durugnanada moʼe̱ne.
\v 7 Diostaj opuden eknopo̱e̱ʼ Diosa huakkaʼ oʼpak. Eknopo̱e̱ʼ
konig huakkaʼteda o̱ʼunhuahuikaʼ. Oro sirokupenayo huakkaʼteda
e̱e̱ʼtada nogok ehueʼda o̱ʼe̱a̱po. Kenpaʼti oro menpaʼti
oroyoʼ ya̱e̱t aʼnopo̱e̱yaʼpo huatihueʼ taʼaka e̱ʼi̱kaʼyo
onʼtihuepo. Opudomeynayo hueretda moknopounhuahuikaʼ Diosa
moʼtinopo̱e̱ʼpo paiʼda moʼnopoʼe̱po batikhueʼ
moknopounhuahuikaʼpo nogok Jesucristo eʼtiakte “ʼUruda
moʼe̱ne.” “Huadakda o̱gkikaʼ.” Diosa boʼhuaaʼapone. ʼUruda
o̱ʼne ayaʼada moʼtinopo̱e̱a̱pone.
\p
\v 8 Jesucristotaj tiahuayhueʼpiʼ e̱ʼi̱kaʼda diʼ moʼe̱ne.
Kenpaʼti oy tiahuayhueʼ e̱ʼe̱a̱da moknopo̱e̱po diga̱ʼda
moʼmadurugpak.
\v 9 Moknopoeonhuahuikaʼnok dakhueaʼ eʼkaʼ Diosa
bokkahueaʼapopo moʼmanopoʼyareaʼapopo konig Diosensiʼpo
Jesúsere kurudyo̱ moʼnoeanhuahuikaʼapone.
\p
\v 10 “Opudomeytaj moʼmatinepahuiʼapone Diosa kenpaʼti
dakhueaʼ eʼkaʼ bokkahueaʼapone, onteʼti
moʼnoeanhuahuikaʼapone.” Aʼnennada Diosen
huamanbatiaʼpakeria kenda oʼmanaʼuyate. “Monig kenda
Diosa moʼnigkaʼapone.” Eʼnopo̱e̱ʼtaʼ onpakpo
onʼbatiaʼpakuyate.
\v 11 Cristo paiʼda oʼnopoʼe̱po oʼbueyapo oʼnoyhuadapo huairi
o̱ʼe̱po Diosere onteʼti oʼmanaʼapo, onteʼti huiyokda
oʼmanaʼapo. Ken Diosen huamanbatiaʼpakeria aʼnennada
onʼmanigmadoyaʼuyate. Cristoen Noki̱re̱ga̱
oʼmanopo̱e̱a̱ʼnok kenda onʼmanigmadoyaʼuyate. Jesús
siʼpoe̱hued onʼmanigmadoyaʼuyate. Nopoenkahueʼada
onʼmanigmadoyaʼpo beʼa paiʼda oʼnopoʼe̱a̱po moʼnigbueyapo
kenpaʼti menokaʼ oʼmanigbueyapo diga̱ʼ eʼnopo̱e̱ʼtaʼ
onʼpakuynigʼa.
\v 12 Ontehuapaʼda madoyahueʼ e̱ʼe̱a̱da oroʼomeytaj
moʼnigmadoyaʼuyate. Kenda Diosa oʼmanopo̱e̱a̱ʼuyate
moʼnigmadoyaʼuyate. Oy huabokerek Diosen Noki̱re̱ga̱
oʼmanopoʼto̱e̱nok huadak huaʼa monʼbatiaʼpakdepo oroʼomeytaj
dakhueaʼ eʼkaʼ kanʼnopoʼyareʼpo Jesús oʼsiʼpoe̱ʼpo paiʼda
oʼnopoʼe̱po moʼnigbueypo moʼnignoyhuadpo kenda
onʼmanbatiaʼpakuyate. Kenda Diosen huataʼmoneriakon
kurudya̱ʼ eʼnopo̱e̱ʼtaʼ onʼpak.
\s Dios kenyoʼda huadaknanada o̱ʼi̱kaʼ. Oroʼomey konigti
huadaknanada mogkikaʼne.
\p
\v 13 Konige̱po katepiʼ mogkaʼpo dakaʼ monʼnopo̱e̱po
mogkikaʼ. Jesucristo eʼtiakte Diosa moʼmatinepahuiʼapone.
ʼUruaʼnanada mogkaʼapone. Dakaʼ moʼnonmaboikaʼpo huadak
mogkikaʼ.
\v 14 Aʼnenda Diostaj oknopo̱e̱hueʼ e̱e̱ʼte nogtaj nogtaj
oʼeretpakikaʼuyne. Dakhueaʼ eʼkaʼ oʼeretpakikaʼuyne. Oynayo
Diosensiʼpo o̱ʼe̱po dakhueaʼ eʼkaʼ pakhueʼ moʼne.
\v 15 Dios kenyoʼda huadakda o̱ʼi̱kaʼpo kenpaʼda ʼuruaʼnanada
oʼkikaʼnok oroʼomeykon Diosensiʼpo o̱ʼe̱po ʼuruaʼnanada
mogkikaʼ.
\v 16 Apagbaʼ oʼmanaʼpo, “Dios kenpaʼda huadak oʼkikaʼnok.
Diosenyoʼda ʼuruaʼda ya̱gʼkikaʼ.” Apagbaʼte kenpaʼ
moʼnigmadoyaʼuyate.
\p
\v 17 Kenda katepiʼ oʼkikaʼnok Apag Diosa ayaʼtada konigti
diga̱ʼ magkaʼdik moʼe̱a̱pone. Dakhueaʼ ekaʼnayo diga̱ʼ
o̱gkaʼdik moʼe̱a̱pone. Diostaj “Pag” beʼapiʼ enaʼnayo
okmeʼpukdik o̱ʼi̱kaʼpone.
\v 18,19 Oroʼomeyen adhueaʼpaneʼ Diostaj nigpe̱e̱hueʼada
namaʼda o̱gkikaʼuyate. Aʼnen oroʼ konigti namaʼda
oʼkikaʼuynigʼa moʼnopoʼyarepo Diosere moʼnoeanhuahuikeʼpo
Jesucristoa moʼnigbueyʼuyate. Jesús konig oveja ʼuruso̱ʼda
o̱ʼe̱po moʼnigbueypo mimi oʼhuaʼuyate. Orokupe sirokupepiʼ
oroʼomeytaj kanʼnopoʼyareʼpo Diosa yokhueʼ o̱ʼu̱yate.
\v 20 Huadari niokpo siokpo ayaʼ oʼtiahuayikaʼnig Diosa kahued
“Aratbuttaj kamanigbueyeʼpo huadariyo iʼsiʼpoe̱ʼapo.” Diosa
onaʼuyate. Huaboaʼda oʼsiʼpoe̱depo boʼhuahuayaʼuyne
oroʼomeytaj.
\v 21 Jesús eʼbueytada Diosa oʼnoyhuada̱ʼpo kurudyo̱
oʼtobehuikpo ʼurunanada oʼyahueʼuyate. Jesucristotaj
oknopo̱e̱po Diostakon oknopo̱e̱ne. Diosaʼ
moʼnoeanhuahuikaʼapone oknopo̱e̱ne.
\p
\v 22 Kenpaʼti oy Diosen Noki̱re̱ga̱ moʼnopoʼto̱e̱nok
Diosen buttida huaʼa oʼnigpeeonhuaʼdepo ʼurunopoʼ
oʼnopoʼto̱e̱depo huamaʼbuy huidpoeretaj diʼ monʼmaikaʼ.
Huayahuaya diʼ monʼmaikaʼpo huanopoabetaʼ monʼeretpakpo diʼ
monʼmaikaʼ. Diga̱ʼ diʼ monʼmaikaʼ.
\v 23 Huaoj hua̱ye̱ere onʼmabueyikaʼnig keʼnanayo oroʼtaj
noeanhuahuikahueʼdik e̱ʼe̱a̱da Diosbaʼtaj oknopo̱e̱nok Diosa
moʼsiʼpoe̱a̱ʼuyne. Diosbaʼa moʼnoeanhuahuikaʼnok
oroʼomeya̱ oknopo̱e̱po oʼnoeonhuahuikaʼapone.
\v 24 Kenpaʼ Apagbaʼte oʼmanigmadoyaʼuyate oaʼpo,
\q Toket huakpi i̱da oʼay. Aratbut konigti i̱da oʼtoneʼpakpo
oʼbuey. Kenpaʼti huakhuen ʼurunanada e̱ʼe̱a̱da i̱da oʼkot.
Eʼhueʼda o̱ʼe̱a̱po. Aratbut konigti ʼurunanada e̱ʼe̱a̱da
onʼbueyapo. ʼUrunanada katepiʼ eʼkaʼada ehueʼda o̱ʼneapo
\v 25 Dios Huairien huaʼanayo o̱ʼunhuahuikaʼapo. Batikhueʼdik
o̱ʼe̱a̱po. Kenpaʼda o̱ʼunhuahuikaʼapo. Kenda Apagbaʼ
oaʼuyate.
\m Ken huaʼa Jesucristoen huadak huaʼa Cristoen
huamataʼmonaʼeria monʼbatiaʼpakonhuaʼuyne opudomeytaj.
\c 2
\p
\v 1 Konige̱po dakhueaʼ eʼkaʼ kenpaʼda yaʼnenpo yanʼbatik.
Onteʼti dakhueaʼ kahueʼ yaneʼ. Namaʼda onahueʼ yaneʼ.
Dakhueʼda e̱ʼe̱a̱da “huadakda i̱jje̱y,” batiaʼpakhueʼ yaneʼ.
Kenpaʼti dig bahuahuayhueʼ yaneʼ. Kenpaʼti bahuaʼehueʼ
yaneʼ.
\v 2 Aʼkerekyaʼpo yo̱bed diga̱ʼda eʼmiʼnogta onʼpak. Opud
huaboaʼda huaknopo̱e̱ʼeri moʼe̱po konig Diosen yo̱bed
moʼe̱po Diosensiʼpo moʼe̱po Diosen huaʼa yaderetpakikaʼ.
Diostaj dakaʼ aknopo̱i̱kayaʼpo Diosen huaʼa yanʼnopo̱i̱kaʼpo
yanʼnigpe̱i̱kaʼ. Nogi̱ti nogi̱ti Diostaj yanoknopo̱e̱ʼ.
\v 3 Jesús Huairia moʼmatinepahuiʼnok nogi̱ti boʼeretpakpo
nogi̱ti yanoknopo̱e̱ʼ.
\s Jesucristo konig jak huakaʼ huid o̱ʼe̱. Oroʼ
huaknopo̱e̱ʼeri konig jak huakaʼ huidsiʼpo o̱ʼe̱ne. Konig
Diosen jak o̱ʼe̱po Jesucristo moʼnoeanhuahuikaʼne.
\p
\v 4 Jesucristo Huairi konig jak iddu entaʼpoeda̱ʼ huid
o̱ʼe̱po ayaʼ jak huid ontaʼtihuedikaʼnig. Aratbutanayo Jesús
Huairitaʼ pakhueʼ e̱e̱ʼtada Diosnayo huakkaʼ oʼpakpo konig
huamanoeaʼ huid oktieʼeaʼuyate. Jesucristo Huairi
huamanoeanhuahuikaʼeritaj dakaʼ yanoknopo̱e̱ʼ.
\v 5 Opudnayo konig Diosen huid huakpa moʼe̱po
moʼnigpe̱i̱kaʼpo Diosen Noki̱re̱ga̱ moʼnopoʼto̱e̱po Diostaj
moʼnoeonhuahuikaʼpo Diostayoʼda yanʼnigpe̱i̱kaʼ.
Nogomey nogomeytaj yanʼmaknopo̱e̱po Diosa
kamanopoʼyareʼpo yanʼmanigtionaʼpakikaʼ. Kenpaʼti
Jesucristotaj moknopo̱e̱po huadakyoʼ ya̱gʼkikatiʼ. Huayahuaya
diʼ yanʼmaikaʼ. Dakiti Dios ya̱ʼnonaʼikaʼ. Kenda Diosa
oʼpak.
\v 6 Kenpaʼti aʼnenda Apagbaʼ oaʼpo, Jesucristotaj
oʼbatiaʼpakpo,
\q Ke̱yo̱ Jerusalén jakyo, ken judío aratbutenbayo
ijtaʼmonaʼapopo keʼna konig doʼhued jak entaʼpoeda̱ʼ huid
ijhuada̱ʼapoy. Kentaj yoktieʼeaʼpo huakkaʼ ijpaki. Ayaʼada
kentaj oʼnoknopo̱e̱po durugda o̱ʼneapo. Birahueʼ
o̱ʼneapo.
\m
\v 7 Opudomey Jesucristotaj moknopo̱e̱po huakkaʼda
boʼpakikaʼne. Oknopo̱e̱hueʼ hua̱e̱ʼeritaj Apagbaʼ
oʼbatiaʼpakpo,
\q Jak huakaʼeriomey ʼuru jak entaʼpoeda̱ʼ huid onʼtiahuaypo
pakhueʼ e̱ʼneʼtada keʼna konig Diosen ʼuru jak entaʼpoeda̱ʼ
huid o̱ʼe̱. Apagbaʼ oaʼ.
\m
\v 8 Kenpaʼti
\q Keʼna konig dagte huid eʼhuedte o̱ʼe̱po aratbut onʼpakpo
konig tiahuayhueʼ o̱ʼnepo onʼtikudepo onʼhueda̱toʼ.
\m Kenda Cristotaj oʼbatiaʼpakuy, aratbut huadak huaʼa
Jesucristotaj eʼnigpe̱e̱taʼ pakhueʼ o̱ʼnepo dakhueaʼ o̱gkaʼpo
kenpaʼda ehueʼda o̱ʼneapo. Kenda aʼnenda Diosa
oʼnopo̱e̱ʼuyate.
\s Diosen aratbut oʼmaene.
\p
\v 9 Oroʼomeynayo Jesucristotaj oʼpakpo oknopo̱e̱nok Diosa
moʼbaktieʼeaʼuyne. Kenpaʼti Dios Huairien
huamanigtionaʼpakeri o̱ʼe̱ne. ʼUrunopoʼ monopoʼkaʼpo
Diosenyoʼda ʼuruaʼnada kikaʼdik o̱ʼe̱ne. Diosen aratbut
oʼmaene. Aʼnenda oknopo̱e̱hueʼ o̱ʼe̱po dakhueaʼ oʼkikaʼuyne
konig sikki̱re̱gyo̱ o̱ʼi̱kaʼuyne oroʼomey. Diosa
moʼtinepahuiʼpo moʼnopoʼyareaʼpo konig Diosen huakjeyyo
moʼbakuda̱ʼuyne. “ʼUruaʼnanada Diosa mogkaʼne. ʼUrunanada
Dios o̱ʼe̱po oʼkikaʼ. Dakiti Dios.” Oy batiaʼpakdik o̱ʼe̱ne.
Kenda Diosa oʼpak.
\v 10 Aʼnennayo Diosen aratbut ehueʼ e̱ʼe̱a̱da oynayo Diosen
aratbut o̱ʼe̱ne. Aʼnenda Dios moʼtinepahuiʼuyne
oknopo̱e̱hued o̱ʼu̱ynigʼa oynayo moʼtinepahuiʼne
oknopo̱e̱po Diosensiʼpo o̱ʼe̱ne oroʼomey.
\s Diosenyoʼda ya̱gʼkikaʼpo ʼuruaʼnanada ya̱gʼkikatiʼ.
\p
\v 11 Nogda eʼmanaʼtaʼ ijjeretpaki, huadiʼda egomey.
Jesucristo huaknopo̱e̱ʼeri moʼe̱po Diosensiʼpo moʼe̱po i̱yo̱
indariyo konig esoeri moʼe̱nok konig huanopoʼa namaʼda
oʼeretpakikaʼ kahueʼ yanikaʼ. Dakhueaʼ kikahueʼ yaneʼ. Totoʼ
Diostaj eʼbaktiparattaʼ boʼeretpakikaʼne.
\v 12 Huakkaʼada Diostaj oknopo̱e̱hueʼ o̱ʼne. “Dakhueʼda
moʼe̱ne,” namaʼda opudomeytaj eʼhuaaʼpiʼ ʼurunanada
ya̱gʼkikaʼ. Huadakda ya̱gʼkikaʼ. Kenda boʼtiahuayapone.
Kenmeʼnoe Dios eʼtiakte “Dakiti Dios.” “Dios ʼuruda
oʼkaʼ.” Onʼhuaaʼpakapo.
\p
\v 13 Jesús Huairi oʼpaknok ayaʼada gobierno huairitaj
yanʼnigpe̱i̱kaʼ. Presidente huairitaj yanʼnigpe̱i̱kaʼ.
\v 14 Kenpaʼti Presidenteen huairi kaʼyahueʼ teniente
gobernadortaj sorotatataj yanʼnigpe̱i̱kaʼ. Ken huairi dakhueaʼ
huakaʼeritaj castiga onʼmagkaʼikaʼ. Huadak huakaʼeritaj
“Huadak o̱gkikaʼ,” onʼbahuaaʼikaʼ.
\v 15 Huadakda eʼkikaʼte oknopo̱e̱hueʼ hua̱e̱ʼeri namaʼda
bahuaahueʼdik o̱ʼne. Kenda Diosa oʼpak.
\p
\v 16 Jesucristotaj moknopo̱e̱po oy totoʼen huanabaʼ ehueʼda
moʼe̱po katepiʼ boʼpakpo kikaʼdik moʼe̱. Katepiʼ huadak
e̱ʼhua̱e̱ʼ kikaʼdik moʼe̱. “Katepiʼ ijpakpo kaʼdik i̱jje̱y.
Dakhueaʼ kaʼdik i̱jje̱y.” Nopo̱e̱hueʼada Diostaj
yanʼnigpe̱i̱kaʼ.
\v 17 Ayaʼtada huadakda yanʼmaknopo̱i̱kaʼ. Jesucristoen
huaknopo̱e̱ʼeritaj diʼ yanʼmaikaʼ. Diosa dakhueaʼ huakaʼeritaj
huiyoknanada oʼmagkaʼapo kenpaʼti huadaknanada o̱ʼi̱kaʼ.
Diostaj dakaʼ yanoknopo̱i̱kaʼ. Gobierno huakhuairitaj huadakda
yanʼmaknopo̱i̱kaʼ.
\s Jesucristo oʼbueypo paiʼda oʼnopoʼe̱po bahuadiayhueʼada
oʼbueyʼuyate. Oknopo̱e̱hueʼ hua̱e̱ʼeria dakhueaʼ e̱gkaʼte paiʼda
yanʼnopoʼe̱po Jesucristonig bahuadiayhueʼ yanikaʼ.
\p
\v 18 Huanabaʼ e̱e̱ʼnayo o̱ʼnen huairitaj huadakda
yanoknopo̱i̱kaʼpo yanʼnigpe̱i̱kaʼ. Huadak e̱ʼhua̱e̱ʼtaj
yanʼnigpe̱i̱kaʼ. Dakhueaʼ huaaʼeri huairitakon
yanʼnigpe̱i̱kaʼ.
\v 19 Diostaj moʼnigpe̱i̱kaʼpo huadakda eʼkikaʼte ontaj noga̱
namaʼda dakhueaʼ e̱gkayo̱ bahuadiayhueʼ yaneʼ. Bahuadiayhueʼ
e̱e̱ʼnayo Diosa durugda moʼto̱e̱a̱pone.
\v 20 Opud dakhueaʼ ekaʼnayo kenaʼpo castiga e̱gkaʼte diayhueʼ
e̱e̱ʼnayo “Huadak i̱ʼe̱,” Diosa onahueʼdik e̱e̱ʼtada huadak
eʼkaʼtada huairia castiga e̱gkaʼnayo, huadiayhueʼ e̱e̱ʼnayo
“Huadak i̱ʼe̱,” Diosa onaʼapo.
\v 21 Huadak eʼkikaʼte dakhueʼ e̱gkaʼnayo huadiayhueʼ yaneʼ.
Kenda Diosa oʼpak. Jesucristoa moʼnigbueyʼuyate. Paiʼda
moʼnignopoʼe̱ʼuyate. Kentaj monoknopo̱e̱po paiʼda
monʼnopoʼe̱po huadiayhueʼ moʼneunhuaʼ.
\v 22 Jesúsnayo dakhueaʼ kahueʼ o̱ʼi̱kaʼuyate. Sigpiʼ namaʼda
ahueʼ o̱ʼi̱kaʼuyate.
\v 23 Dakhueaʼ enaʼtepiʼ madeahueʼ o̱ʼu̱yate. Paiʼda
eʼnopoʼe̱a̱ʼte bahuadiayhueʼ o̱ʼu̱yate. Apag Diosa dakaʼ
meʼto̱i̱kaʼne oknopo̱i̱kaʼpo Dios buttida oʼnopo̱i̱kaʼpo
dakaʼ oʼmatinopo̱e̱po castiga oʼmagkaʼapo Jesúsa
oknopo̱e̱ʼuyate.
\v 24 Oroʼen dakhueaʼ eʼkaʼ aʼbatikayaʼpo onteʼti huadakdakon
akikayaʼpo hua̱so̱ʼ oroʼen dakhueaʼ eʼkaʼ oʼto̱e̱po hue̱ypa
cruzte moʼnigbueyʼuyate. Oroʼtaj moʼnopoʼyareaʼpo
moʼnigenhuaduyate.
\v 25 Oroʼ konig oveja o̱ʼi̱kaʼuyne. Ovejaomey i̱da
oʼyoyahueʼ. Dag meyon ya̱ʼe̱ nopo̱e̱hueʼ o̱ʼne. Oroʼ
konigti Diosendagyaʼ diga̱ʼda oʼyoyahueʼikaʼpo dakhueaʼ
eʼkikaʼtada oynayo Jesucristo oroʼen huairitaj oʼkumejdene.
Oroʼomeytaj boʼtiokikaʼne.
\c 3
\s In konig hua̱to̱e̱ʼtaj kikaʼdik moʼne.
\p
\v 1,2 Ettoneʼ hua̱to̱e̱ʼtaj yanʼnigpe̱i̱kaʼ. Huakkaʼiti
Jesucristoen huadak huaʼa oknopo̱e̱hued e̱e̱ʼnayo
kanoknopo̱e̱ʼpopiʼ dakaʼ yanʼnigpe̱i̱kaʼ. Dakaʼ yanʼbaaʼikaʼ.
Dakaʼ yanʼmanhuada̱ʼikaʼ. Nogbokerektaj muneʼbohueʼ yaneʼ.
Madiʼpakhueʼ yaneʼ. Kenpaʼda Diostaj yanʼpakpo huadak
ya̱gʼkikaʼ. Hua̱to̱e̱a̱ boʼtiahuaypo apakhueʼda Diostaj
yanoknopo̱e̱a̱petpiʼ.
\v 3 Sueʼada ettoneʼ hua̱ʼenda kenpaʼda ʼurunanada e̱e̱ʼtaʼ
oʼderetpakikaʼ. Huakuhuij ʼurunanada eʼkikaʼtaʼ oʼderetpak.
Huakkaʼ oro sakbij eʼmatihua̱ktaʼ oʼderetpakikaʼ. Huakkaʼteda
e̱ʼhua̱e̱ʼ huaok eʼbaottaʼ oʼderetpakikaʼ. Ken konig pakhueʼ
yaneʼ. Ken konigti meʼpukehueʼ yaneʼ.
\v 4 Kenyoʼda ʼurunopoʼda yanʼpakikaʼ. ʼUrunopoʼda
o̱ʼunhuahuikaʼapo. Batikhueʼ o̱ʼe̱a̱po. Dakaʼ oʼnopo̱i̱kaʼpo
diayhueʼ o̱ʼe̱. Kenpaʼti yanʼnopoʼnoeyʼ. Kenda Diosa
oʼpak.
\v 5 Konigti aʼnenda aʼneneri ettoneʼ Diostaj
huaknopo̱e̱ʼeri o̱gkikaʼuyate. ʼUrunopoʼda Diosen huadakda
o̱gkikaʼpo hua̱to̱e̱ʼtaj onʼnigpe̱i̱kaʼuyate.
\v 6 Sarakon Abrahamen hua̱to̱e̱ oʼnigpe̱i̱kaʼuyate. “Doʼhued
huairi” onaʼpo oʼnigpe̱i̱kaʼuyate. Konigti huadak
eʼkikaʼnayo kenpaʼti meʼpukhueʼda hua̱to̱e̱ʼtaj
eʼnigpe̱i̱kaʼnayo konig Sara i̱ʼe̱a̱po. Diosa dakaʼ
boʼkikaʼapone.
\p
\v 7 Huabokerekkon hua̱to̱e̱ere dakaʼ yanikatiʼ. Dakaʼ
yanʼtinopo̱e̱po yanʼto̱i̱kaʼ. Ettoneʼ sueʼda tey o̱ʼe̱nok
dakaʼ yanʼto̱i̱kaʼ. Hua̱to̱e̱ere moknopo̱e̱po Diosere
moʼnoeonhuahuikaʼapo. Eʼtionaʼpakte Diosa moʼpe̱e̱ʼpo
hua̱to̱e̱ʼtaj ʼuruaʼda yanʼto̱i̱kaʼ.
\p
\v 8 Kenpaʼti opudomeytaj ijmanaʼapoy. Konigti noga̱
noga̱ yanʼnopo̱i̱kaʼ. Huayahuaya yanʼmatinepahuikaʼpo
huaknopo̱e̱ʼeri huayahuaya diʼ yanʼmaikaʼ. Huayahuaya dakaʼ
yanʼmato̱i̱kaʼ. “Donayo huadakda i̱jje̱y,” huataʼda
tinopo̱e̱hueʼ yaneʼ.
\v 9 Beʼapiʼ dakhueaʼ e̱gkaʼnayo konigti eʼkaʼtino ehueʼ
yaneʼ. Kentaj dakhueaʼ kahueʼ yaneʼ. Noga̱ eʼtidikeʼnayo
kentaj dakhueaʼ huaahueʼ ya̱e̱po huadakaʼda yanatiʼ. Kenpaʼti
kentaj dakaʼ yationaʼpakikatiʼ. Diosa dakaʼ ya̱gkaʼ
yationaʼpakikatiʼ. Kenda Dios oʼpakpo oroʼtakon huadak
mogkaʼapone.
\v 10 Konigti Apagbaʼ oaʼpo,
\q Durugda eʼnoikaʼtaʼ eʼpaknayo dakhueaʼ ahueʼ yaneʼ
kenpaʼti da ahueʼ yaneʼ.
\v 11 Dakhueaʼ eʼkaʼ yanʼnopoʼkoreaʼpo huadakda ya̱gʼkikatiʼ.
Ayaʼtada yanʼmanoeynoeypo huadiayhueʼ yaneʼ.
\v 12 Jesús Huairi huadak huakaʼeritaj dakaʼ oʼmato̱i̱kaʼnok
huadak huakaʼerien eʼtionaʼpaktaj oʼpe̱i̱kaʼ. Dakhueaʼ
huakaʼeritaj mape̱e̱hueʼ o̱ʼi̱kaʼ. Kenda Apagbaʼa oaʼ.
\s Huadak o̱gkikaʼdepo huaknopo̱e̱ʼeri o̱ʼnenok paiʼda
onʼnopoʼe̱a̱po. Oknopo̱e̱hueʼ hua̱e̱ʼeria onʼhuadiaypo
dakhueaʼ oʼmagkaʼpo paiʼda onʼmanopoʼe̱a̱ʼapo.
\p
\v 13 Huadakda eʼkikaʼnayo dakhueaʼ o̱gkahueʼ moʼe̱apetpiʼ.
\v 14 Huadak iʼkaʼpo Jesucristotaj iknopo̱e̱nok beʼapiʼ
dakhueaʼ e̱gkaʼnayo paiʼda eʼnopoʼe̱a̱ʼnayopiʼ durugda yaneʼ.
Mididhueʼ yaneʼ kenpaʼti meʼpukhueʼ yaneʼ.
\v 15 Jesucristo Huairitaj dakaʼ yanoknopo̱e̱po konig
doʼhued huakhuairi moʼta̱e̱ne huanopoyaʼda dakaʼ
yanoknopo̱i̱kaʼ. “¿Menaʼpo Jesucristotaj moknopo̱e̱?”
Beʼapiʼ enaʼte dakaʼ yanʼnopo̱e̱po buttida huadik yanʼmadeaʼ.
Diostaj dakaʼ yanoknopo̱e̱po ʼuruda yanʼmadeaʼ kenpaʼti
huataʼda ‘huadakda i̱jje̱y’ tinopo̱e̱hueʼada yanʼmadeaʼ.
\v 16 Diayhueʼ moʼe̱po huadak yanʼmadeaʼpo huadakyoʼ
ya̱gʼkikaʼpo birahueʼdik moʼe̱a̱po. Jesucristotaj
moknopo̱e̱nok enʼtidikeʼnayo namaʼda ijjay onʼnopo̱e̱po
yanʼbiraʼapetpiʼ.
\v 17 Huadaknada eʼkaʼada. Diosa eʼpaknayo paiʼda
nopoʼe̱ʼdikpiʼ kenda huadakda o̱ʼe̱. Dakhueʼ iʼkaʼpo paiʼda
eʼnopoʼe̱nayo kennayo dakhueʼnanada o̱ʼe̱.
\p
\v 18 Jesucristo kenpaʼda huadakda e̱ʼi̱kaʼtada oroʼnayo
dakhueaʼnanada oʼkikaʼpo Diostaj nigpe̱e̱hueʼ o̱ʼi̱kaʼuynigʼa
oroʼen dakhueaʼ eʼkaʼ aʼbakkahueayaʼpo moʼnigbueyʼuy. Diosere
aʼmanoeanhuahuikayaʼpo moʼnigbueyʼuyate. Nogaʼtida
oʼbueyʼuyate. Hua̱so̱ʼnayo eʼbueyada Jesúsen Noki̱re̱g
oʼnoeonhuahuikaʼapo.
\v 19,20 Aʼnenda Noé eʼnoeʼokaʼ kusiʼpetoneʼ
eʼkadhuahuikaʼte Diosa oʼmanigunhuahuikaʼpo huakkaʼda Diosen
huaʼataj enʼpeunhuahuaʼtada nigpe̱e̱hueʼda onʼbaʼtakotpo
onʼmabueyʼuyate. Noki̱re̱gomey huanoki̱re̱g huakudbayo
e̱ʼnikaʼyo Jesús Noki̱re̱g oʼhuaʼdepo huadak huaʼa
oʼmanbatiaʼpokonhuaʼuyate. Huanoki̱re̱gtaj
oʼmanbatiaʼpakonhuaʼuyate. Kusiʼpetoneʼyo Noéere ocho
aratbut bataʼkothueʼ o̱ʼnepo. Diosa oʼmato̱e̱nok hue̱ʼe̱yya̱ʼ
bueyhueʼ o̱ʼnuyate.
\v 21 Konigti oy Diosa oroʼomeytaj moʼnopoto̱e̱po
moʼnopoʼyareaʼne. Hue̱ʼe̱ya̱ bautiza e̱gkaʼte Diosa ʼurunopoʼ
mogkaʼne. Bautiza e̱gkaʼ
so̱ʼkoyoahueʼ e̱ʼe̱a̱da konig
eʼnopoʼtihuekeʼ o̱ʼe̱. Oroʼen dakhueaʼ eʼkaʼ
moʼnopoʼyareayaʼpo Jesucristo oʼnoyhuaduyate.
\v 22 Kurudyo̱ oʼhuaʼdepo Diosere o̱ʼi̱kaʼ. Diosa Jesucristo
huairi oʼyahueaʼnok ayaʼtada huiyoka oʼmanaʼikaʼ. Ayaʼada
Jesucristotaj nigpe̱i̱kaʼdik o̱ʼne Diosen huataʼmoneri, nog
huairiomey. Ayaʼda onʼnigpe̱i̱kaʼ Jesucristotaj.
\c 4
\s Konig Diosa moʼnopo̱e̱a̱ʼne Diosen ya̱gʼkadhuahuikatiʼ.
\p
\v 1 Hue̱ypa cruzte Jesucristo paiʼda oʼnopoʼe̱ʼuyatenok Dios
eʼpaknayo oroʼomeykon paiʼda nopoʼe̱ʼdik o̱ʼe̱ne. Paiʼda
eʼnopoʼe̱deʼ onteʼti dakhueaʼ kahueʼ o̱ʼe̱a̱pone.
\v 2 In huadariyo eʼnoeonhuahuikadeʼte kenyoʼda katepiʼ
hua̱ʼenda boʼeretpakikaʼnig nopo̱e̱hueʼada kenda Dios oʼpak
yanʼnopo̱i̱kaʼpo ya̱gʼkikatiʼ.
\v 3 Konig Diostaj oknopo̱e̱hueʼ hua̱e̱ʼeri oʼderetpakpo
o̱gkikaʼpo dakhueaʼ o̱gkikaʼnig opudomeykon konigti
boʼkikaʼuy aʼnenda. Nogen hua̱to̱e̱ʼtaj nogtaj nogtaj
moʼbaktohuedikaʼpo sinea moʼbakkuda̱ʼikaʼpo,
moʼbatuktukikaʼpo kenpaʼti eʼketkaʼ diostaj namaʼde
boʼeretpakikaʼuyate. Kenpaʼda konig boʼkikaʼuyate.
\v 4 Oynayo Diosen boʼkikaʼnok “Kenpihuay, menaʼpo inomey
huaknopo̱e̱ʼeri oroʼere mayhueʼ o̱ʼne, menaʼpo oroʼere
bokerekbohueʼ o̱ʼne. Dakhueʼda o̱ʼne.” Oknopo̱e̱hueʼ
hua̱e̱ʼeria onʼhuaaʼpo opudtaj moʼbatidikeʼpo.
\v 5 Kenomeytaj pe̱e̱hueʼ yaneʼ. Nogok Diosa castiga
oʼmagkaʼapo. Huanoeʼeri eʼbueytaeri katepiʼ dakhueaʼ o̱gkaʼuy.
Nogda nogda o̱gkaʼuy. Buttida oʼbahuaaʼdepo Diosa castiga
oʼmagkaʼapo.
\v 6 Konige̱po kanʼmanopoʼkoreʼpo Jesucristo huadak huaʼa
ayaʼtada onʼmanbatiaʼpakuyate. Aʼnen aratbutkudaktakon huadak
huaʼa oʼmanbatiaʼpakuyate Jesúsa. Eʼbueya oʼnoknopo̱e̱depo
noki̱re̱gyoʼda Diosere durugda onʼnoeonhuahuikaʼapo.
\p
\v 7 Indariyo ayaʼ Diosa katepiʼ eʼkaʼtaʼ oʼpakpo oʼkaynigʼa
aʼti oʼdakeaʼapo. Aʼti keneʼhua̱ya̱ʼ huameʼnoe o̱ʼe̱a̱po.
Konige̱po dakaʼ yanʼnopo̱e̱po nogta nogta eretpakhueʼ
ya̱ʼnikaʼpo dakaʼ Diostayoʼda yanʼtionaʼpakikaʼ.
\v 8 Diga̱ʼda yanʼpakpo huayahuaya diʼ yanʼmaikaʼ. Kenda
Diosa oʼpak. Diʼ eʼmaikaʼnayo nogomeytaj
moʼmanoeya̱ʼapo. Nogen dakhueaʼ eʼkaʼ okkahueaʼdik
moʼi̱kaʼapone.
\v 9 Durugda huanopoyaʼda ya̱ʼnepo esoeri huaknopo̱e̱ʼeritaj
huayahuaya o̱ʼnen jakyo yanʼbatokudikaʼpo aypo yanʼbatobapikaʼ.
\v 10 Nogpaʼ nogpaʼ kaʼdik kaʼneʼpo Diosa boʼtihuapokikaʼne.
Diostaj moknopo̱i̱kaʼpo konig Diosen huadak
huamanigtihuapokeri moʼmatinepahuiʼpo huayahuaya
yanʼbatihuapokeʼ.
\v 11 Huaknopo̱e̱ʼeritaj beʼapiʼ eʼmanmadikaʼnayo konig
Apagbaʼ oʼikaʼnig konigda kanʼmanmadikikeʼ.
Huaknopo̱e̱ʼeritaj eʼtihuapoknayo Diosa boʼteypakaʼnok
monʼbatiahuapokikaʼ. Ken konig ʼurunanada boʼkikaʼnok
huakkaʼada Jesucristotaj oʼnoknopo̱e̱a̱po onʼbatiaʼpakpo,
“ʼUruaʼda o̱ʼe̱ Dios.” “Diga̱ʼda boʼtihuapokikaʼ.”
“Teynanada Huairi o̱ʼe̱.” Huakkaʼada onʼbatiaʼpakikaʼapo.
\s Jesucristotaj moknopo̱e̱nok konig Jesucristo paiʼda
oʼnopoʼe̱ʼuy konigti paiʼda moʼnopoʼe̱a̱po.
\p
\v 12 Ken, diga̱ʼda mogkaʼaponigʼa meʼpukehueʼ moʼne.
Menpaʼti Jesucristotaj hueretda huaknopo̱e̱ʼeri ya̱ʼnetaʼpo
diga̱ʼ mogkaʼapone, huadiʼda egomey.
\v 13 Paiʼda moʼnopoʼe̱depo mepuʼkehueʼ ya̱ʼnepo
yanʼdurugpaktiʼ. Jesucristo cruzte paiʼnanada
oʼnopoʼe̱ʼuyate. Ken Jesucristoere paiʼda eʼnopoʼe̱nayo
durugda moʼe̱a̱po. Jesucristo ʼurunanada o̱ʼe̱po teynanada
o̱ʼe̱po oʼtiakapo. Eʼtiakdeʼte durugnanada moʼe̱a̱po.
\v 14 Jesucristoen huanigpe̱i̱kaʼeri moʼe̱nok opudtaj
enʼtidikeʼnayo durugda moʼe̱, Diosen ʼuru Noki̱re̱ga̱
moʼnopoʼto̱e̱nok durugda moʼne. Kenomey Jesucristotaj
dakhueaʼda enʼbatiaʼpaktada opudnayo huadakda
yanʼbatiaʼpakikaʼ.
\v 15 Yanʼhuadiaypo barakhueʼ yanetiʼ. Nogen enʼtamaeʼ
berehueʼ yaneʼ. Nogomeytaj dakhueaʼ kahueʼ yanetiʼ. Kenda
dakhueʼda o̱ʼe̱. Ken konig ekaʼnayo paiʼda nopoʼe̱dik
moʼe̱ne.
\v 16 Jesucristotaj moknopo̱e̱nok dakhueaʼ e̱gkaʼnayo bakbiraʼ
ehueʼ ya̱ʼnepo, “Dakiti Dios, huadakda iʼkikaʼ.”
Yanʼtionaʼpakikatiʼ.
\p
\v 17 Oyda Diosa castiga oʼmagkaʼdepo huakkuruda Diosen
huaknopo̱e̱ʼeritaj kanʼnopo̱e̱tpakeʼpo sueʼda castiga
oʼmagkaʼdepo. Oroʼomeytaj castiga eʼmagkaʼnayo oknopo̱e̱hueʼ
hua̱e̱ʼeriataj diga̱ʼda castiga oʼmagkaʼapo paiʼnanada
onʼnopoʼunhuahuikaʼapo.
\v 18 Huadak huakikaʼeri paiʼda eʼnopoʼunhuahuikaʼpiʼ dakaʼ
oknopo̱i̱kaʼpo Diosere durugda onʼnoeonhuahuikaʼapo.
Dakhueaʼ huakaʼerinayo kenpaʼda paiʼda
onʼnopoʼunhuahuikaʼapo.
\v 19 Konige̱po kenda Dios oʼpaknok paiʼda
eʼnopoʼunhuaʼnayo huadakyoʼda mogkikaʼpo, “Dakaʼ boʼtiokaʼ,
huadak moʼnopoʼto̱e̱ʼ,” Diostaj dakaʼ monoknopo̱e̱po
monʼtionaʼpakikaʼ. Diosa ayaʼda oʼkaʼuyate. Kenda katepiʼ oaʼ
oʼkaʼapo dakaʼ oknopo̱e̱ʼdik o̱ʼe̱ne.
\c 5
\s Pedroa huaknopo̱e̱ʼeri huairitaj ayaʼ huaknopo̱e̱ʼeritakon
oʼmaboroayʼuy.
\p
\v 1 Jesucristotaj huaknopo̱e̱ʼerien huairitaj oʼmaboroayne.
Dokon huaknopo̱e̱ʼeri huairi i̱jje̱po Jesucristo cruzte paiʼda
eʼbueyte ijtiahuayʼuy. Onteʼti ʼuruaʼnanada eʼtiakdeʼte
kenere huairi i̱jje̱a̱poy. Kenaʼpo huaknopo̱e̱ʼerien
huairitaj ijmanaʼpo,
\v 2 Diostaj huaknopo̱e̱ʼeri opudere e̱gkupopakikaʼte dakaʼ
yanʼmato̱i̱kaʼpo yanʼmanmadikikaʼpo ʼuruda
yanʼmaboroayikaʼ. Diosa huamaboroay boʼyokuyne.
Kamato̱i̱keʼpo moʼbayokuyne. Manmadikahueʼ ahueʼada
manmadikahueʼ yaneʼ. Huanopoyaʼda yanʼeretpakpo
yanʼmanmadikaʼ. Kenda Dios oʼpak. Huakkaʼ huakupe pakhueʼ
ya̱ʼnepo yanʼmanmadikaʼ.
\v 3 Huiyokda manahueʼada huaknopo̱e̱ʼeritaj dakaʼ
yanʼmanmadikaʼ. ʼUrunanada Diosen boʼkikaʼnok
huaknopo̱e̱ʼeri boʼtiahuayikaʼpo konigti ʼuruda kikaʼdik
o̱ʼneapo.
\v 4 Jesucristo oroʼ huaknopo̱e̱ʼerien huamato̱e̱ʼeri Huairi
eʼtiakte opud Jesucristoen huaknopo̱e̱ʼerien huairitaj
ʼurunanada moʼnigkadhuahuikaʼapone. Batikhueʼda
moʼnigkadhuahuikaʼapone.
\p
\v 5 Jesucristoen huaknopo̱e̱ʼeri huairitaj yanʼnigpe̱i̱kaʼ.
Nogomey huadakda o̱ʼnepo donayo sueʼda huadak
i̱jje̱y, huayahuaya yanʼmatinopo̱e̱po huayahuaya
yanʼbatihuapokikaʼ. Konige̱po,
\q ʼUruda i̱jje̱y huanopo̱e̱ʼeritaj Dios pakhueʼ e̱e̱ʼtada.
Sueʼda huadak i̱jje̱y huanopo̱e̱ʼeritaj Diosa
oʼmatinepahuiʼikaʼ. Apagbaʼa oaʼ.
\m
\v 6 Paiʼda eʼnopoʼe̱nayo Diostaj huadiayhueʼ yaneʼ. Diosnayo
teynanada o̱ʼi̱kaʼ. Dakaʼ yanʼnigpe̱i̱kaʼ. Nogok ʼuruda
moʼnigkaʼapone. ʼUrunanada moʼe̱a̱po.
\v 7 Katetapiʼ meʼpukehueʼ ya̱ʼnepo Diosa moʼtinepahuiʼpo
boʼtihuapokapone yanoknopo̱e̱ʼ.
\p
\v 8 Dakaʼ yanoknopo̱i̱kaʼ. Totoʼ oroʼen takaʼ da eaʼtaʼ
boʼtipakikaʼne. Engaña e̱gkaʼtaʼ boʼeretpakikaʼne. Konig
huiyokda apetpet o̱ʼi̱kaʼ. Aʼbarakyaʼpo oʼhuaeʼikaʼa. Konigti
totoʼa aratbut huaknopo̱e̱ʼeritaj oʼkaʼpo huaknopo̱e̱ʼeritaj
eʼbatikaʼtaʼ boʼtipakikaʼne. Konige̱po Apagbaʼ dakaʼ
ya̱gʼkikatiʼ. Dakaʼ yanonmaboikaʼpo ʼuruda yanoknopo̱i̱kaʼ.
\v 9 Totoʼtaj nigpe̱e̱hueʼ yanikaʼ. Jesucristotayoʼda
yanʼnigpe̱i̱kaʼpo dakaʼ yanoknopo̱i̱kaʼ. Jesucristotaj
moknopo̱e̱nok paiʼda moʼnopoʼe̱a̱popiʼ. Doʼtayoʼda dakhueaʼ
megkaʼne. Doyoʼda paiʼda ijnopoʼe̱y, nopo̱e̱hueʼ yaneʼ.
Konigti nogbayaʼ nogbayaʼ huaknopo̱e̱ʼeritaj konigti
diga̱ʼda onʼmagkaʼ. Huaknopo̱e̱ʼeri paiʼda onʼnopoʼi̱kaʼ
yanʼnopo̱e̱ʼ.
\v 10 Oroʼtaj diʼda moʼe̱ne Diosa. Oʼmatinepahuiʼnok
ijhueʼmon paiʼda oʼnopoʼeonhuaʼdepo oroʼtaj
moʼnopoʼteypakapone. Dakaʼ eknopo̱e̱ʼ boʼtihuapokapone.
Jesucristotaj
oknopo̱e̱nok kurudyo̱ boʼtohuaʼapone.
Jesucristoere moʼnoeonhuahuikaʼapone.
\v 11 Diosyoʼda teynanada o̱ʼe̱po ayaʼtada
oʼmanaʼonhuahuikaʼ. Ayaʼada Diostaj nigpe̱i̱kaʼdik o̱ʼne.
\s Oʼdiktaʼmonaʼpo dakhuapa oʼmanigmadoyaʼuy.
\p
\v 12 Silvano dakaʼ huaknopo̱e̱ʼeri huamaʼbuy o̱ʼe̱
ijnopo̱e̱y. Keʼna beʼtihuapokpo in berobaʼte
moʼnigmadoyaʼne. Opudomeytaj sueʼda oʼnigmadoyaʼne.
Diosen huaʼa nogi̱ti eknopo̱eʼ onʼmaboroayne. Kenpaʼti
Dios
diga̱ʼ diʼ moʼmaikaʼpo moʼmatinepahuiʼne.
Moʼmatinepahuiʼpo durugnanada mogkaʼne. Buttida ijjay.
Dakaʼ moʼnoknopo̱e̱po batikhueʼ yanetiʼ.
\p
\v 13 Babilonia huakkaʼ jakyaʼ huaknopo̱e̱ʼeri Diosa
oʼbaktieʼeaʼuyate. Opudere oʼbaktieʼeaʼuyate. Opudomeytaj diʼ
o̱ʼnepo onʼdiktaʼmonaʼne. Marcos doʼhuedsiʼponig o̱ʼe̱po
moʼdiktaʼmonaʼne.
\v 14 Diʼda yanʼmaepo huayahuaya yanʼmabajbaj.
\p Dakaʼ moknopo̱i̱keʼpo meʼpukehueʼda dakaʼ
moʼmanopoʼnoeynoeyikeʼ, ken.