\id 2JN
\h 2 JUAN
\toc1 2 Juan
\toc2 2 JN
\mt1 2 JUAN
\mt2 Juana bottaʼaʼ oʼmanigmadoyaʼuyate.
\c 1
\s Buttida huaʼa oknopo̱e̱po huayahuaya diʼ monʼmaikaʼ.
\p
\v 1 Do Juan huaknopo̱e̱ʼeritaj huamanmadikaʼeri i̱jje̱po
onʼnigmadoyaʼne. Huidpo Cristoen huaktieʼeaʼeritaj
oʼnigmadoyaʼne. O̱ʼnen huasiʼpo huaknopo̱e̱ʼeritaj
ijmanigmadoyay. Buttida huaʼa yoknopo̱e̱po dakaʼ diʼ
onʼmaene. Ayaʼ buttida huaʼa huaknopo̱e̱ʼeria diʼerea
moʼe̱ne.
\v 2 Kenaʼpo Jesucristoen buttida huaʼa oroʼomeyen
huanopoyaʼ oknopo̱i̱kaʼne. Buttida huaʼa
oknopounhuahuikaʼpo diʼ o̱ʼnene.
\v 3 Jesucristo Huairi Diosen Huasiʼpo o̱ʼe̱po Apag Diosere
oroʼtaj dakaʼ kamatinoikeʼ. Oroʼtaj kamatinepahuieʼpo
kenpaʼti kanopoʼnoeye̱ʼ. Diosa kenda moʼnigkikapone
buttida huaʼa oknopo̱e̱po huayahuaya diʼ monʼmaikaʼ.
\p
\v 4 Huakkaʼmon huaknopo̱e̱ʼeri huasiʼpotaj ijbatiahuaypo Apag
Diosen buttida huaʼa dakaʼ onʼnigpe̱i̱kaʼpo o̱gkikaʼnok
ijdurugpakmey.
\v 5 Oy ijjeretpakpo oʼnonaʼne, huayahuaya diʼ yanʼmaikaʼ.
Aʼnennada kenda Diosa oʼmanaʼuyate. Onteʼti doʼhuakon
oʼnonaʼne.
\v 6 Diostaj diʼ o̱ʼe̱po keʼnen huaʼa oʼnigpe̱e̱po oʼkikaʼne.
Huayahuaya diʼ yanʼmaikaʼ. Ken Diosen huaʼa aʼnennada
oʼpe̱e̱ʼuyne.
\p
\v 7 Huakkaʼda da huamanmadikaʼeri aratbutere o̱ʼnikaʼ.
Oroʼtehuapaʼ Diosyaʼ Jesús tiakhueʼ o̱ʼu̱yate. Jesús hueretda
huabokerek ehueʼ o̱ʼu̱yate. Namaʼda onʼmanmadikikaʼ.
Jesucristotaj pakhueʼ o̱ʼne.
\v 8 Diosen ʼuruda boʼkikaʼdepo Diosyaʼ huadakhuapa aʼbaeyaʼpo
da huamanmadikaʼeritaj pe̱e̱hueʼ yanikaʼ. Kenomeytaj
pe̱e̱hueʼ moʼi̱kaʼpo huadakhuapa moʼbaeʼapone.
\p
\v 9 Cristoen eʼmanmadikaʼtaj ayaʼada eʼpe̱e̱unhuaʼdeʼada
onʼbatikpo Diostaj oknopo̱e̱hueʼ o̱ʼne. Cristoen
eʼmanmadikaʼtaj ayaʼada onʼnigpeeonhuahuikaʼpo Apag
Diostaj Diosen Huasiʼpoeretaj dakaʼ oʼnoknopo̱i̱kaʼ.
\v 10 Cristoen hueretda eʼmanmadikaʼ manmadikahueʼ
e̱ʼi̱kaʼnayo o̱ʼnen jakyo enʼtiaknayo o̱ʼnen jakyo bakuda̱hueʼ
yanʼmaikaʼ. “Boʼtiak,” manahueʼ yanikaʼ.
\v 11 “Boʼtiak,” opuda̱ eʼmanaʼnayo namaʼda
huamanmadikaʼeriere dakhueaʼ bokikaʼapone.
\s Juana keneʼhua̱ya̱ʼ huaʼa oʼnigmadoyaʼuyate.
\p
\v 12 Huakkaʼda eʼnonaʼtaʼ ijpaknigʼa oy berobaʼte
nigmadoyahueʼdik o̱ʼnene. Aʼti opudte eʼhuataʼ ijpaki.
Oroʼomey huakkaʼ aʼdurugpakyaʼpo opudtaj eʼtaʼhuadetaʼ ijpaki.
\v 13 O̱ʼnen huamaʼbueyen huasiʼpo huabaktieʼeaʼeria saludos
moʼnigtaʼmonaʼne.