\id 3JN
\h 3 JUAN
\toc1 3 Juan
\toc2 3 JN
\mt1 3 JUAN
\mt2 Juana bapaʼaʼ oʼnigmadoyaʼuyate.
\c 1
\s Gayotaj Juana huadak oʼtimadoyaʼuyate.
\p
\v 1 Do Juan huaknopo̱e̱ʼeritaj huamanmadikaʼeri i̱jje̱po
Gayotaj oʼnigmadoyaʼne. Buttida huaʼa iknopo̱e̱nok diʼda
o̱ʼe̱ne.
\p
\v 2 Ayaʼda katepiʼ iʼkikaʼ huadakda ka̱e̱ʼ. Kenpaʼti
huadaknopoʼ ka̱e̱ʼ. Ontehuapaʼ ijnigtionaʼpakikay. Diostaj
durugda oʼnigpe̱i̱kaʼ ijnopo̱e̱po, huadiʼda egʼ.
\v 3 Jesucristotaj huaknopo̱e̱ʼeri sueʼda oʼnokye̱po i̱yo̱.
“Gayo Jesucristoen buttida huaʼa oknopo̱e̱po huadakyoʼ
oʼkikaʼ.” Boʼhuaaʼnok huakkaʼ ijdurugpakmey.
\v 4 Doʼhued huaknopo̱e̱ʼeri huasiʼpo Cristoen buttida huaʼa
oʼnoknopo̱e̱po onʼnigpe̱i̱kaʼnigtaj ijtipe̱e̱po huakkaʼnada
ijdurugpaki.
\p
\v 5 Cristoen huadak huaʼa huamanmadikaʼeri enʼtiakdeʼte
dakaʼ iʼmato̱i̱kaʼ. Kenpaʼti sueʼda huaknopo̱e̱ʼeritaj
nogbayaʼ iʼmato̱i̱kaʼ. Kenda iʼkaʼpo Diosen huaʼa dakaʼ
iʼkikaʼpo, huadiʼda egʼ.
\v 6 Gayoa diʼ moʼi̱kaʼne moʼmato̱i̱kaʼne.
Cristotaj
huaknopo̱e̱ʼeri e̱gkupopakyaʼ boʼtiaʼpakmeʼne. Huadak
huamanmadikaʼeri onteʼti enʼhuaʼte yabatihuapok. Aypopiʼ
yabayoktiʼ. Diosa betiahuaypo oʼdurugpakapo.
\v 7 Cristotaj onʼnigpe̱i̱kaʼpo Cristoen huaʼa
aʼmanmadikayaʼpo onʼhuaʼudhuahuaʼpo oknopo̱e̱hueʼ
hua̱e̱ʼeried katepiʼ bakehueʼda o̱ʼnikaʼ.
\v 8 Kenaʼpo oroʼ huaknopo̱e̱ʼeriayoʼda bayokikaʼdik o̱ʼe̱ne.
Oroʼ oʼbatihuapoknok kenomey buttida huaʼa manmadikikaʼdik
o̱ʼnikaʼ.
\s Diótrefes dakhueaʼ oʼkikaʼ.
\p
\v 9 Cristoen huaknopo̱e̱ʼeri o̱ʼnenbayo e̱gkupopakikaʼyo
berobaʼ ijnigmadoyaʼpo ijnigtaʼmonameʼnigʼa Diótrefes
huabokerek opudya̱ʼ o̱ʼnada huairi e̱e̱ʼtaʼ oʼpakpo doʼtaj
nigpe̱e̱hueʼ o̱ʼe̱meʼ.
\v 10 Do ijtiakdepo ayaʼda kenda dakhueaʼ oʼkikaʼnig
ijhuaaʼapoy. Doʼtaj dakhueʼdikaʼda beʼhuaaʼpo da beʼhuaameʼne.
Nog kenpaʼti dakhueʼ oʼkaʼpo Jesucristoen huadak huaʼa
huamanmadikaʼeritaj totayhueʼ o̱ʼi̱kaʼ. Jakyo kenpaʼti
nogomeya̱ eʼbatotaytaʼ enʼpakte “kejeʼ,” oʼmanikaʼ.
Kenomeya̱ onʼbatotaynok Cristoen huaknopo̱e̱ʼeri
e̱gkupopakyaʼ oʼmaenikaʼ.
\p
\v 11 Konig dakhueaʼ huakikaʼeri o̱gkikaʼnig konigti
kikahueʼ ya̱i̱kaʼ. Huadakda huakikaʼeri konig huadak
o̱gkikaʼnig konigti yakikaʼ. Kenomey huadak o̱gkikaʼpo
Diosensiʼpo o̱ʼne. Kenomey namaʼda o̱gkikaʼpo Diostaj
oknopo̱e̱hueʼ o̱ʼne, ontaj onaʼne, huadiʼda egʼ.
\s Demetrio huadakaʼda oʼkikaʼ.
\p
\v 12 Demetrio huadakbokerek o̱ʼe̱. Huadakda oʼkikaʼ. Ayaʼada
onʼhuaaʼ. Diosen buttida huaʼa oʼkikaʼ. Huadakda o̱ʼe̱
oroʼakon oʼhuaay. Buttida oʼdikaʼ opuda̱ moʼnopo̱e̱ne.
\s Juana taʼpote keneʼhua̱ya̱ʼkon oʼnigmadoyaʼuyate.
\p
\v 13 Huakkaʼ nogi̱ti enataʼ eʼpakada eʼnigmadoyaʼtaʼ pakhueʼ
i̱jje̱y.
\v 14 Aʼti etaʼhuade̱taʼ ijpaki. Kenokaʼ hua̱so̱ʼteda
meʼbatiaʼpak.
\p
\v 15 Diosa menopoʼnoeye̱ʼ. Huadiʼda aratbut i̱ya̱ʼda saludos
moʼdiktaʼmonaʼne. Kenpaʼti doʼhued huadiʼ ke̱yo̱da saludos
ijmadiktaʼmonay.