\id EPH
\h Efesios
\mt1 Carta na seicwanom Pablo na mꞌaⁿ nnꞌaⁿ tsjoom Éfeso
\c 1
\p
\v 1 Ja Pablo, ee na lꞌue tsꞌom Tyꞌo̱o̱tsꞌom, cwiluiindyo̱
apóstol, ñꞌoomwaaꞌ maꞌmo̱ⁿnaꞌ tsꞌaⁿ na majñom Cristo Jesús
tsꞌiaaⁿ ꞌnaaⁿꞌaⁿ. Matseicwano̱ⁿya cartawaa na mꞌaⁿꞌyoꞌ
tsjoom Éfeso na laꞌxmaⁿꞌyoꞌ cwentaaꞌ Tyꞌo̱o̱tsꞌom ndoꞌ
na cwilaꞌyuꞌyoꞌ ñꞌeⁿ Cristo Jesús.
\v 2 Nquii Tsotya̱a̱ya Tyꞌo̱o̱tsꞌom na cwilaꞌtꞌmaaⁿꞌndyo̱
ñequio Jesucristo na cwiluiiñê na matsa̱ꞌntjoom jaa, quiana
na nntoꞌñoomꞌyoꞌ juu naya na laxmaⁿna ñequio juu na
tjañomtiuu cꞌoom tsꞌaⁿ jo nda̱a̱na.
\s Matioꞌnaaⁿñe Cristo jaa
\p
\v 3 Cwilaꞌtꞌmaaⁿꞌndyo̱ nquii Tyꞌo̱o̱tsꞌom na cwiluiiñê
tsotye Jesucristo na matseixmaaⁿ na matsa̱ꞌntjoom jaa.
Ncꞌe na matseitjoomꞌnaꞌ jaa ñequio Cristo, joꞌ xjeⁿ cañoomꞌlueecheⁿ
ncꞌe Espíritu Santo matioꞌnaaⁿñê jaa ñequio cwii cwii
nnom na matseixmaaⁿ na mꞌaaⁿ cañoomꞌluee.
\v 4 Cwitjo̱o̱cheⁿ na tqueⁿ Tyꞌo̱o̱tsꞌom tsjoomnancue, jnda̱
tjeiiꞌñê jaa na nntseitjoomꞌnaꞌ jaa ñequio Cristo. Luaaꞌ
sꞌaaⁿ cha nlqueⁿnaꞌ jaa na ljuꞌndyo̱ jo nnoom, ndoꞌ na
tjaa jnaⁿ cwicolaxmaaⁿya jo nnoom.
\v 5 Ee na wiꞌ tsꞌoom jaa joꞌ chii xjeⁿ na jndyeecheⁿ
tjeiiꞌñê jaa na nluiindyo̱ ntseinaaⁿ ncꞌe Jesucristo,
ee luaaꞌ tqueeⁿ ee na ljoꞌ lꞌue tsꞌoom na nluii.
\v 6 Tuii na ljoꞌ chaꞌ cantyja ꞌnaaⁿꞌ joꞌ nntseitꞌmaaⁿꞌñenaꞌ
juu naya na matseixmaaⁿ, na cweꞌ yu tquiaaⁿ na laꞌxmaaⁿya
ncꞌe nquii Jnaaⁿ na jeeⁿ candyaꞌ tsꞌoom.
\v 7 Cantyja ꞌnaaⁿꞌ juu na jeeⁿ wiꞌ tsꞌoom jaa, joꞌ
na macwjiꞌnꞌmaaⁿñê jaa ee na tueꞌ Jnaaⁿ, na matseitꞌmaⁿ
tsꞌoom jnaaⁿya.
\v 8 Canda̱a̱ꞌya maꞌmo̱ⁿ Tyꞌo̱o̱tsꞌom na wiꞌ tsꞌoom jaa
na matseijno̱o̱ⁿꞌo̱ⁿ nꞌo̱o̱ⁿya ndoꞌ mañequiaaⁿ na cwilaꞌno̱o̱ⁿꞌa.
\v 9 Ndoꞌ jnda̱ tꞌmo̱o̱ⁿ nda̱a̱ya juu na lꞌue tsꞌoom na
wantyꞌiuuꞌ tyomꞌaaⁿnaꞌ, majuu cantyjati na jnaⁿ chaꞌtso
na seijndaaꞌñê na nncjaacanda̱a̱ꞌnaꞌ.
\v 10 Juu ñꞌoom wantyꞌiuuꞌñeeⁿ maꞌmo̱ⁿnaꞌ na quia nncueꞌntyjo̱
xjeⁿ nntseicanda̱a̱ꞌñeñꞌeⁿnaꞌ, matseijndaaꞌñê na chaꞌtso
na mꞌaⁿ cañoomꞌluee ñequio nnom tsjoomnancue ncꞌom joo
joꞌ nacje ꞌnaaⁿꞌ Cristo.
\p
\v 11 Ncꞌe na jnda̱ seitjoomꞌnaꞌ jaa ñꞌeⁿ Cristo, teiyo
tjeiiꞌñe Tyꞌo̱o̱tsꞌom jaa cha na ncꞌoomnaꞌ jaa na nndaaya
chaꞌna na nndaaꞌ jom, ndoꞌ na nncuaa na ljoꞌ matseiljoꞌyunaꞌ
ñequio na jnda̱ seijndaaꞌñê na nntsꞌaaⁿ ndoꞌ cwiluiinaꞌ
chaꞌxjeⁿ na cjaaweeꞌ tsꞌoom.
\v 12 Luaaꞌ waa na machꞌeeⁿ cha jâ nnꞌaⁿ judíos na
ñentyjaaꞌjndyee nꞌo̱o̱ⁿya Cristo, catseitꞌmaaⁿꞌñenaꞌ Tyꞌo̱o̱tsꞌom
cantyja ꞌnaaⁿyâ.
\v 13 Ndoꞌ mati ꞌo nnꞌaⁿ na nchii judíos quia na jndyeꞌyoꞌ
ñꞌoom na mayuuꞌ cantyja ꞌnaaⁿꞌ Cristo, majuu ñꞌoomxco
naya na macwjiꞌnꞌmaaⁿñenaꞌ ꞌo, jlaꞌyuꞌyoꞌ ñꞌeⁿñê, joꞌ
na jñoom sa̱yo ꞌo ñequio Espíritu Santo na tsoom na nntoꞌñoomꞌyoꞌ.
\v 14 Manquii Espíritu Santo na tjameiⁿntyjeeꞌ nnom
ñꞌoom na cwiljotyeⁿ na maxjeⁿ nntoꞌño̱o̱ⁿya ljoꞌ na nñequiaa
Tyꞌo̱o̱tsꞌom nda̱a̱ya quia na jnda̱ seicandyaañeñꞌeeⁿ nnꞌaⁿ
na nlaꞌxmaⁿ cwentaaⁿꞌaⁿ, cha na catseitꞌmaaⁿꞌñenaꞌ jom
na jeeⁿ tꞌmaⁿ cwiluiiñê.
\s Quiaa Tyꞌo̱o̱tsꞌom na jndo̱ꞌ nꞌom nnꞌaⁿ na cwilaꞌyuꞌ
\p
\v 15 Cantyja ꞌnaaⁿꞌ nmeiⁿꞌ mati ja quia na mandiiya
na cwilaꞌyuꞌya nꞌomꞌyoꞌ ñequio Ta Jesús ndoꞌ na mꞌaⁿꞌyoꞌ
na wiꞌ nꞌomꞌyoꞌ chaꞌtso nnꞌaⁿ na ljuꞌ nꞌom,
\v 16 tyoocjo̱meiⁿntyja̱a̱ꞌa na mañequiaya na quianlꞌuaaⁿꞌaⁿ
cantyja ꞌnaⁿꞌyoꞌ quia na matseina̱ⁿya nnoom.
\v 17 Tyꞌo̱o̱tsꞌom caxuee cwiluiiñê, nqueⁿ na cwiluiiñê
Tsotye Jesucristo na matsa̱ꞌntjoom jaa, macaⁿꞌa nnoom
na cantyja ꞌnaaⁿꞌ Espíritu quiaaⁿ na nlaꞌno̱ⁿꞌyoꞌ ñꞌoom
na maꞌmo̱o̱ⁿ nda̱a̱ya ndoꞌ yati ntsataꞌjnaⁿꞌyoꞌ jom.
\v 18 Mati catseicanaaⁿñê naquiiꞌ nqueⁿꞌyoꞌ cha na
nnda̱a̱ nlaꞌno̱ⁿꞌyoꞌ ljoꞌ tseixmaⁿ ñꞌoom na cwicantyjaaꞌ
nꞌomꞌyoꞌ na cantyja ꞌnaaⁿꞌ juunaꞌ maqueeⁿꞌñê ꞌo, ndoꞌ
juu na mañequiaaⁿ na cwicandaa nnꞌaⁿ na laxmaⁿ cwentaaⁿꞌaⁿ,
jeeⁿ cajndanaꞌ ndoꞌ jeeⁿ tꞌmaⁿ tseixmaⁿnaꞌ,
\v 19 ndoꞌ mati quiaaⁿ na caliuuya na jeeⁿcheⁿ ndyaꞌ
tꞌmaⁿ waa na jneiⁿ. Ñequio juu najndeii na matseixmaaⁿ
nnda̱a̱ nnteijneiⁿ jaa nnꞌaⁿ na cwilaꞌyuuꞌa ñꞌeⁿñê. Ndoꞌ
cantyja ꞌnaaⁿꞌ juu najneiⁿ luaaꞌ,
\v 20 sꞌaaⁿ na tandoꞌxco Cristo na tueꞌ, ndoꞌ sꞌaaⁿ
na tjacjoo ntyjaaꞌ tsꞌo̱o̱ⁿ ntyjaya laꞌñeⁿ cañoomꞌluee,
\v 21 tqueeⁿ juu na tꞌmaⁿti cwiluiiñe nchiiti chaꞌtso
na cwiluiitquiendye ndoꞌ mati jo nda̱a̱ chaꞌtso na cwitsa̱ꞌntjom
na mꞌaⁿ cañoomꞌluee ñequio chaꞌtso na waa najnda̱. Juu
cwiluiitꞌmaⁿñeti jo nda̱a̱ chaꞌtso na mꞌaⁿ jeꞌ ndoꞌ mati
ꞌio cha.
\v 22 Mati sꞌaaⁿ na chaꞌtso nnom cꞌom nacje ꞌnaaⁿꞌ
juu ndoꞌ sꞌaaⁿ na juu cwiluiiñe xqueⁿ ñꞌoom jo nnom
tmaaⁿꞌ nnꞌaⁿ na macwjiꞌ Tyꞌo̱o̱tsꞌom cwentaaⁿꞌaⁿ,
\v 23 ee tmaaⁿꞌ nnꞌaⁿ na macwjiꞌ Tyꞌo̱o̱tsꞌom cwentaaⁿꞌaⁿ
cwiluiiñenaꞌ seiiꞌ Cristo ndoꞌ matseicanda̱a̱ꞌñeñꞌeⁿnaꞌ
jom ncꞌe juu tmaaⁿꞌñeeⁿ ndoꞌ chaꞌtso na niom, canda̱a̱ꞌ
laxmaⁿnaꞌ ncꞌe Cristo.
\c 2
\s Cwiluiꞌnꞌmaaⁿndyo̱ ncꞌe na jeeⁿ wiꞌ tsꞌom Tyꞌo̱o̱tsꞌom jaa
\p
\v 1 Mañejuu xjeⁿ na tquiaa Tyꞌo̱o̱tsꞌom na taꞌndoꞌ xco
Cristo tquiaaⁿ na ꞌo tandoꞌyoꞌ meiiⁿ na jo nnoom tyolaꞌxmaⁿꞌyoꞌ
lꞌoo ncꞌe natia ñequio jnaⁿ na ñejlaꞌxmaⁿꞌyoꞌ,
\v 2 mati ꞌo ñetꞌomꞌyoꞌ naquiiꞌ natiameiⁿꞌ, ñesantyjo̱ꞌyoꞌ
ndoꞌ ñelꞌaꞌyoꞌ ljoꞌ na cwilꞌa nnꞌaⁿ tsjoomnancuewaa,
chaꞌxjeⁿ na lꞌue tsꞌom juu espíritu na waa najndeii
na mꞌaaⁿ naquiiꞌ jndye na maleichuu xjeⁿ ꞌnaaⁿꞌnaꞌ nnꞌaⁿ
na tiñeꞌcalꞌa chiuu na lꞌue tsꞌom Tyꞌo̱o̱tsꞌom.
\v 3 Mati tiempo na jnda̱ teinom ñejlaꞌjomndyo̱ naquiiꞌ
chaꞌtso natiameiⁿꞌ, ñelꞌaaya ljoꞌ na queeⁿ nꞌom seiiꞌa
ndoꞌ ñejlaꞌcanda̱a̱ꞌndyo̱ ñꞌomtiuu ꞌnaaⁿya. Ndoꞌ na ljoꞌ
ñelꞌaaya, juu na matseiwꞌiityeⁿ Tyꞌo̱o̱tsꞌom nnꞌaⁿ laxmaaⁿya
na catꞌuiinaꞌ jaa chaꞌxjeⁿ na nntꞌuiinaꞌ ntꞌomcheⁿ.
\v 4 Sa̱a̱ jeeⁿcheⁿ ndyaꞌ wiꞌ tsꞌom Tyꞌo̱o̱tsꞌom jaa. Tꞌmaⁿ
waa na candyaꞌ tsꞌoom ñꞌeⁿndyo̱,
\v 5 ee xjeⁿ na ñetꞌo̱o̱ⁿya na lꞌoo ncꞌe jnaaⁿya, xjeⁿꞌñeeⁿ
tquiaaⁿ na tando̱o̱ꞌxco̱o̱ya quia na tquiaaⁿ na tandoꞌxco
Cristo. Ndoꞌ na ljoꞌ, ncꞌe naya na matseixmaaⁿ, joꞌ na
cwiluiiꞌnꞌmaaⁿndyoꞌ.
\v 6 Ndoꞌ na tyolaxmaaⁿya lꞌoo tquiaaⁿ na tando̱o̱ꞌxco̱o̱ya
ñequio Cristo Jesús, ndoꞌ sꞌaaⁿ na cwimeiⁿndyuaandyo̱
ñꞌeⁿñe cañoomꞌluee.
\v 7 Luaaꞌ sꞌaaⁿ cha xuee na cwiwjaanaꞌ mꞌmo̱ⁿnaꞌ na
juu na mꞌaaⁿ na jnda ntyjeeⁿ jaa, jeeⁿ cajnda tseixmaⁿnaꞌ
ñequio juu naya na matseixmaaⁿ ncꞌe Cristo Jesús.
\v 8 Ncꞌe naya ꞌnaaⁿꞌ Tyꞌo̱o̱tsꞌom na cweꞌ yu, joꞌ chii
cwicaluiiꞌnꞌmaaⁿndyoꞌ ee na cwilaꞌyuꞌyaꞌ nꞌomꞌyoꞌ ñꞌeⁿñê.
Meiⁿ nchii laxmaⁿꞌyoꞌ na ljoꞌ ncꞌe cwii na jnda̱ lꞌaꞌ
ncjoꞌyoꞌ, laxmaⁿꞌyoꞌ naljoꞌ ncꞌe machꞌeeⁿ na cwicandaꞌyoꞌ
juunaꞌ.
\v 9 Nchii cweꞌ waa na jnda̱ sꞌaa tsꞌaⁿ joꞌ na cwiluiꞌnꞌmaaⁿñê,
cha nntseicuꞌnaꞌ na nntseisꞌañe cheⁿnqueⁿ.
\v 10 Ee cwiluiindyo̱ tsꞌiaaⁿ na machꞌee Tyꞌo̱o̱tsꞌom.
Jnda̱ tqueeⁿxcoom jaa cantyja ꞌnaaⁿꞌ Cristo Jesús cha
na calꞌaaya chaꞌtso nnom na matyꞌiomyanaꞌ na ndyuꞌñeeⁿcheⁿ
seijndaaꞌñê na calꞌaaya.
\s Cwiljoyaandyo̱ ñꞌeⁿ Tyꞌo̱o̱tsꞌom ncꞌe na tueꞌ Cristo
\p
\v 11 Joꞌ chii cjañjoomꞌ nꞌomꞌyoꞌ chiuu ñejlaꞌxmaⁿꞌyoꞌ
cwitjo̱o̱cheⁿ na cwilaꞌyuꞌyoꞌ. ꞌO nchii tsjaaⁿ judío ꞌo
ndoꞌ ncꞌe naljoꞌ joona na cwilꞌana ꞌnaaⁿ ntjaaⁿ yoꞌndaa
ndana na naⁿnom, cwiluena na ꞌo tilaꞌxmaⁿꞌyoꞌ cwentaaꞌ
Tyꞌo̱o̱tsꞌom ncꞌe na tiquilꞌaꞌyoꞌ naljoꞌ.
\v 12 Tiempoꞌñeeⁿ nchii cantyja ꞌnaaⁿꞌ Cristo ñetꞌomꞌyoꞌ,
ñetꞌomꞌndyo̱ꞌyoꞌ cantyja ꞌnaaⁿ nnꞌaⁿ Israel, ee wato̱ⁿꞌ
tyomꞌaⁿꞌyoꞌ cantyja ꞌnaaⁿꞌ ñꞌoomtyeⁿ na seijndaaꞌñe
Tyꞌo̱o̱tsꞌom ñequiondye joona, ndoꞌ mati ñꞌoom na tsoom
nda̱a̱na na nntsꞌaaⁿ. Xjeⁿꞌñeeⁿcheⁿ meiⁿ ticantyjaaꞌ nꞌomꞌyoꞌ
jom, meiⁿ na nncꞌomꞌyoꞌ cantyja ꞌnaaⁿꞌaⁿ.
\v 13 Sa̱a̱ jeꞌ jeꞌ tjoomꞌ mꞌaⁿꞌyoꞌ ñꞌeⁿ Cristo Jesús.
Joꞌ chii ꞌo na ñetꞌomꞌndyo̱ꞌyoꞌ ñꞌeⁿ Tyꞌo̱o̱tsꞌom jnda̱
seicandyooꞌñenaꞌ ꞌo cantyja ꞌnaaⁿꞌaⁿ ncꞌe na tquiaañe
Cristo na tueeⁿꞌeⁿ cwentaꞌyoꞌ.
\v 14 Ee Cristo cwiluiiñê na cwiljoya nꞌo̱o̱ⁿ jâ nnꞌaⁿ
judíos ñequio ꞌo na nchii joꞌ cwiluiindyoꞌ. Jom sꞌaaⁿ
na ñecwii tmaaⁿꞌ laxmaaⁿya na ñetꞌo̱o̱ⁿya na we tmaaⁿꞌ
jaa, ee seityueeⁿꞌeⁿ juu na ñetꞌo̱o̱ⁿ na wjeendyo̱ ntyja̱a̱
cwii na chaꞌcwijom tatiom na ñeto̱ⁿꞌnaꞌ jaa.
\v 15 Ñꞌoom na tqueⁿ Moisés jndye nnom tyoqueⁿnaꞌ xjeⁿ
nnꞌaⁿ. Sa̱a̱ cantyja na tueꞌ Cristo seintycwiinaꞌ najndeii
na tyotseixmaⁿ ñꞌoomꞌñeeⁿ. Sꞌaaⁿ na ntycwii joꞌ cha
we ntmaaⁿꞌndyo̱ nncwilꞌueeꞌñê na nntsꞌaaⁿ cwii tmaaⁿꞌ
xco na tjoomꞌ mꞌaaⁿya cantyja ꞌnaaⁿꞌaⁿ. Laaꞌtiꞌ waa
na seintycweeⁿ na ticueeꞌ nꞌom nnꞌaⁿ cwii cwii tmaaⁿꞌ
ncꞌiaana.
\v 16 Ncꞌe na tueꞌ Cristo nacjooꞌ tsꞌoomꞌnaaⁿ joꞌ na
seintycwiiñꞌeeⁿ na mꞌaⁿntiaaꞌndye we ntmaaⁿꞌ nnꞌaⁿ, sꞌaaⁿ
na ñecwii tmaaⁿꞌ joona, ljoyaandyena ñꞌeⁿ Tyꞌo̱o̱tsꞌom.
\p
\v 17 Jndyo Cristo na jndyonquiaaⁿ ñꞌoom xco na machꞌeenaꞌ
na cwintycwii tiaꞌ quiiꞌntaaⁿꞌ ꞌo nnꞌaⁿ na tquia ñetꞌomꞌyoꞌ
cantyja ꞌnaaⁿꞌ Tyꞌo̱o̱tsꞌom, ndoꞌ mati quiiꞌntaaⁿ jâ nnꞌaⁿ
judíos na candyooꞌti ñetꞌo̱o̱ⁿyâ cantyja ꞌnaaⁿꞌaⁿ.
\v 18 Ncꞌe cantyja ꞌnaaⁿꞌ Cristo joꞌ na meiiⁿ we ntmaaⁿꞌ
jaa, wanaaⁿ na nntsaquia̱a̱ꞌa na mꞌaaⁿ Tyꞌo̱o̱tsꞌom, cwiluii
na ljoꞌ ncꞌe Espíritu Santo.
\v 19 Joꞌ chii ꞌo nnꞌaⁿ gentiles tacolaꞌxmaⁿꞌyoꞌ nnꞌaⁿ
na cweꞌ cwiquieya cwii tyuaa na nchii joꞌ tuiindyoꞌ.
Xeⁿ nchii jeꞌ jeꞌ mañecwii xjeⁿ cwiluiindyoꞌ ñequio
tmaaⁿꞌ na cwiluiiñe cwentaaꞌ Tyꞌo̱o̱tsꞌom, cwiluiindyoꞌ
nnꞌaⁿ na ñecwii wꞌaa ꞌo, ndoꞌ ñequii ꞌñeeⁿ ntseinda ꞌo.
\v 20 ꞌO cwiluiindyoꞌ chaꞌcwijom wꞌaa na jnaⁿnaꞌ nacjooꞌ
tsꞌiaⁿtsjo̱ꞌ, na tacatyeeⁿ nacjooꞌ ñꞌoom na tyoñequia
apóstoles ñequio profetas. Manquiiti Jesucristo cwiluiiñê
tsjo̱ꞌ nqui wꞌaaꞌñeeⁿ.
\v 21 Cristo cwiluiiñê tsiaⁿtsjo̱ꞌñeeⁿ. Nacjooꞌ juunaꞌ
chaꞌwaa wꞌaaꞌñeeⁿ cwijom wjaacanda̱a̱ꞌnaꞌ hasta na ncueꞌntyjo̱
na nluiiñenaꞌ cwii watsꞌom na ljuꞌ cwentaaꞌ Ta Tyꞌo̱o̱tsꞌom.
\v 22 Joꞌ chii chaꞌtsondyoꞌ ꞌo na seitjoomꞌnaꞌ ñꞌeⁿ
Cristo matseitjomnaꞌ ꞌo ñꞌeⁿ ncꞌiaaꞌyoꞌ na cwiluiindyoꞌ
cwii wꞌaa yuu na nncꞌoomñe Tyꞌo̱o̱tsꞌom ncꞌe Espíritu
Santo.
\c 3
\s Toꞌñom Pablo tsꞌiaaⁿ na nntsꞌaaⁿ
\p
\v 1 Jnaaⁿꞌ ñꞌoommeiⁿꞌ, joꞌ na ja Pablo mꞌaaⁿya pra̱so
cantyja ꞌnaaⁿꞌ Cristo Jesús cha cateijndeiinaꞌ ꞌo nnꞌaⁿ
gentiles,
\v 2 Ncꞌe na jeeⁿ yañe Tyꞌo̱o̱tsꞌom, matsonaꞌ na manquiuꞌyoꞌ
na tquiaaⁿ tsꞌiaaⁿwaa na catsꞌaaya juunaꞌ naquiiꞌntaaⁿꞌyoꞌ
cha na cateijndeiinaꞌ ꞌo.
\v 3 Ee tꞌmo̱o̱ⁿ no̱o̱ⁿya ñꞌoom na jeeⁿ wantyꞌiuuꞌ ñetuaa
chiuu jnda̱ seijndaaꞌñê, ndoꞌ tquiaaⁿ na catseiꞌno̱ⁿꞌa
juunaꞌ. Chjoowiꞌ ñꞌoomꞌñeeⁿ jnda̱ seiljeiya na matseicwano̱ⁿya
na mꞌaⁿꞌyoꞌ.
\v 4 Quia nlaꞌnaⁿꞌyoꞌ juunaꞌ quia joꞌ nlaꞌno̱ⁿꞌyoꞌ na
matseiꞌno̱ⁿꞌa ñꞌoom na wantyꞌiuuꞌ ñetuaa cantyja ꞌnaaⁿꞌ
Cristo.
\v 5 Juu na jeeⁿ wantyꞌiuuꞌ ñetuaa tînquiaa Tyꞌo̱o̱tsꞌom
na nliu nnꞌaⁿ na ñetꞌom teiyo juunaꞌ, chaꞌxjeⁿ jeꞌ ñequio
Espíritu Santo jnda̱ tꞌmo̱o̱ⁿ nda̱a̱ apóstoles na ljuꞌ nꞌom
ñequio profetas.
\v 6 Luaa waa ñꞌoom na wantyꞌiuuꞌ ñetuaanaꞌ: Nnꞌaⁿ
na nchii judíos joona, juu na nntsꞌaa Tyꞌo̱o̱tsꞌom na nndaa
nnꞌaⁿ judíos, mati nntoꞌñoomna. Matseitjoomꞌnaꞌ joona
ñequio seiiꞌ Cristo, mati mañꞌoomnaꞌ joona naquiiꞌ ñꞌoom
na tso Tyꞌo̱o̱tsꞌom na nntsꞌaaⁿ cantyja ꞌnaaⁿꞌ Cristo
Jesús.
\p
\v 7 Macantyja ꞌnaaⁿꞌ ñꞌoomwaaꞌ joꞌ na sꞌaa Tyꞌo̱o̱tsꞌom
na jndaya na mañequiaya juunaꞌ nda̱a̱ nnꞌaⁿ, ndoꞌ tquiaaⁿ
najndeii na matseixmaaⁿ na ñꞌeⁿ matsꞌaaya tsiaaⁿwaaꞌ.
\v 8 Quiiꞌntaaⁿ chaꞌtsondye nnꞌaⁿ cwentaaꞌ Tyꞌo̱o̱tsꞌom
na titꞌmaⁿ cwiluiindye, cantyja ꞌnaⁿya, ja titꞌmaⁿndyo̱tya̱,
nchiiti joona. Sa̱a̱ meiiⁿ na ljoꞌ, no̱o̱ⁿ ja tquiaaⁿ tsꞌiaaⁿ
na catseicandiiya nnꞌaⁿ na nchii judíos na chaꞌtso na
matseixmaⁿ Cristo jeeⁿ cajndanaꞌ meiⁿ xocanda̱a̱ nntseiꞌno̱ⁿꞌ
tsꞌaⁿ.
\v 9 Ndoꞌ tyꞌioom tsꞌiaaⁿ ja na catsꞌaaya na cꞌooliu
nnꞌaⁿ chiuu nncwjiꞌnꞌmaaⁿñê ꞌo nnꞌaⁿ na nchii tuiindyoꞌ
judíos. Quia na jnaⁿjndyeecheⁿnaꞌ na sꞌaa Tyꞌo̱o̱tsꞌom
chaꞌtsoti na maniom seijndaaꞌñê na luaaꞌ nncuaa, sa̱a̱
hasta quia jeꞌcheⁿ matseicano̱o̱ⁿ na ljoꞌ,
\v 10 cha cantyja ꞌnaaⁿꞌ juu tmaaⁿꞌ nnꞌaⁿ na macwjiꞌ
Tyꞌo̱o̱tsꞌom cwentaaⁿꞌaⁿ chaꞌtsondye na cwiluiitquiendye
na mꞌaⁿ cañoomꞌluee ñequio chaꞌtso na cwitsa̱ꞌntjom joꞌ
joꞌ, caliuna na jndye nnom na jndo̱ꞌ tsꞌom Tyꞌo̱o̱tsꞌom.
\v 11 Tyꞌo̱o̱tsꞌom sꞌaaⁿ chaꞌtso nmeiⁿꞌ chaꞌxjeⁿ nqueⁿ
jnda̱ seijndaaꞌñê na ticantycwii na lꞌue tsꞌoom na nncuaa,
ndoꞌ seicanda̱a̱ꞌñenaꞌ naljoꞌ ee Taya Jesucristo.
\v 12 Ndoꞌ ncꞌe na cwilaꞌyuꞌya nꞌo̱o̱ⁿ ñꞌeⁿ Jesucristo
ndoꞌ cwicantyjaaꞌ nꞌo̱o̱ⁿya jom, joꞌ na matseicanaaⁿñenaꞌ
na cwilaꞌcandyooꞌndyo̱ na mꞌaaⁿ Tyꞌo̱o̱tsꞌom.
\v 13 Joꞌ chii macaⁿꞌa nda̱a̱ꞌyoꞌ na tintseiꞌndaaꞌnaꞌ
nquiuꞌyoꞌ nawiꞌ na matjo̱ⁿya cantyja ꞌnaⁿꞌyoꞌ ee na ljoꞌ,
matseitꞌmaaⁿꞌñenaꞌ ꞌo.
\s Cristo candyaꞌ tsꞌoom jaa
\p
\v 14 Macweꞌ joꞌ na maco̱ꞌa xtya̱ya jo nnom Tsotye Taya
Jesucristo,
\v 15 na cantyja ꞌnaaⁿꞌ jom chaꞌtso yo na mꞌaⁿ cañoomꞌluee
ñequio yo na mꞌaⁿ tsjoomnancue, cwilcwiiꞌna xueⁿꞌeⁿ na
cwiluiiñê Tsotyena.
\v 16 Nquii Tsotya̱a̱ya waa na jeeⁿ cajnda na tjaa ljoꞌ
cwii macaⁿnaꞌ na matseixmaaⁿ. Macaⁿꞌa na cantyja ꞌnaaⁿ
joonaꞌ, naquiiꞌ nꞌomꞌyoꞌ nñequiaaⁿ na nnaⁿndyoꞌ ndoꞌ
nlaꞌxmaⁿꞌyoꞌ najndeii na cwiluiiñê ncꞌe Espíritu,
\v 17 cha nnda̱a̱ nncꞌoomñe Cristo naquiiꞌ nꞌomꞌyoꞌ ncꞌe
na cwilaꞌyuꞌya nꞌomꞌyoꞌ ñꞌeⁿñê cha caljotyeⁿ na mꞌaⁿꞌyoꞌ
naquiiꞌ na mꞌaaⁿ Tyꞌo̱o̱tsꞌom na wiꞌ tsꞌom ꞌo, chaꞌxjeⁿ
njoom tyꞌe nchꞌiooꞌ tsꞌoom.
\v 18 Mati macaⁿꞌa nnom Tyꞌo̱o̱tsꞌom na calaꞌno̱ⁿꞌyaꞌyoꞌ
ñequio chaꞌtsondye nnꞌaⁿ na cwilaꞌyuꞌ cwanti na tꞌmaⁿ
na mꞌaaⁿ Cristo na wiꞌ tsꞌoom nnꞌaⁿ, ndoꞌ na tco, ndoꞌ
na njoom, ndoꞌ na ndye.
\v 19 Juu na mꞌaaⁿ Cristo na wiꞌ tsꞌoom ꞌo luaa, macaⁿꞌa
na calaꞌno̱ⁿꞌyoꞌ na waljooꞌcheⁿ na tꞌmaⁿnaꞌ, ndoꞌ na luaaꞌ
nlaꞌno̱ⁿꞌyoꞌ joꞌ na nncꞌomꞌyoꞌ na chawaañꞌeⁿ naquiiꞌ
nꞌomꞌyoꞌ mꞌaaⁿñe Tyꞌo̱o̱tsꞌom.
\p
\v 20 Catseitꞌmaaⁿꞌñenaꞌ Tyꞌo̱o̱tsꞌom na jom jndyeti
nnda̱a̱ nntsꞌaaⁿ nchii cweꞌ chaꞌxjeⁿ cwitaaⁿ jaa meiⁿ
nchii cweꞌ cha na cwilaꞌtiuutya̱a̱ya ndoꞌ na mateijneiⁿ
jaa ncꞌe najndeii na matseixmaaⁿ mꞌaaⁿnaꞌ naquiiꞌ nꞌo̱o̱ⁿya.
\v 21 Jom catseitꞌmaaⁿꞌñenaꞌ naquiiꞌ tmaaⁿꞌ nnꞌaⁿ na
macwjiꞌ Tyꞌo̱o̱tsꞌom cwentaaⁿꞌaⁿ ncꞌe Cristo Jesús chaꞌtso
ndyu ndoꞌ chaꞌwaati xuee na cwii wjaatinaꞌ. Amén.
\c 4
\s Tjoomꞌ mꞌaⁿꞌyoꞌ ncꞌe Espíritu Santo
\p
\v 1 Ja mꞌaaⁿya wꞌaancjo jnaaⁿꞌ na cwiluiindyo̱ tsꞌaⁿ
na mꞌaaⁿñe cantyja ꞌnaaⁿꞌ Jesucristo, matsꞌaaya tyꞌoo
nda̱a̱ꞌyoꞌ na cꞌomꞌyoꞌ quiiꞌntaaⁿ nnꞌaⁿ chaꞌxjeⁿ na macaⁿnaꞌ
na cꞌom nnꞌaⁿ na maqueeⁿꞌñe Tyꞌo̱o̱tsꞌom cwentaaⁿꞌaⁿ ee
mancjoꞌyoꞌ joꞌ.
\v 2 Cꞌomꞌyoꞌ na nioomꞌ nꞌomꞌyoꞌ ndoꞌ yannꞌaⁿndyoꞌ,
cꞌomꞌyoꞌ na tꞌmaⁿ nꞌomꞌyoꞌ, canaⁿndyoꞌ ñꞌeⁿ ncꞌiaaꞌyoꞌ
ñequio na wiꞌ nꞌomꞌntyjeeꞌyoꞌ.
\v 3 Ñequio na mateijndeii Espíritu Santo ꞌo, calajnda̱ꞌyoꞌ
na ñecwii nꞌomꞌyoꞌ ñequio nnꞌaⁿ na cwilaꞌyuꞌ ncꞌe na
matseitjoomꞌnaꞌ ꞌo na ya mꞌaⁿꞌyoꞌ ñequiondye joona.
\v 4 ꞌO ncꞌe Cristo ñecwii seiꞌ cwiluiindyoꞌ ndoꞌ ñecwii
Espíritu Santo na mꞌaaⁿñê naquiiꞌ nꞌomꞌyoꞌ, chaꞌxjeⁿ
jnda̱ tqueeⁿꞌñe Tyꞌo̱o̱tsꞌom ꞌo na ñecwii waa na cwicantyjaaꞌ
nꞌomꞌyoꞌ,
\v 5 mꞌaaⁿ ñecwiiñe Jesucristo na cwiluiiñê na matsa̱ꞌntjoom,
ndoꞌ ñecwii na cwilaꞌyuꞌya nꞌo̱o̱ⁿya ñꞌeⁿñê, ndoꞌ ñeꞌcwii
na cwileitsꞌoomndye nnꞌaⁿ cantyja ꞌnaaⁿꞌaⁿ,
\v 6 ndoꞌ mꞌaaⁿ ñecwii Tyꞌo̱o̱tsꞌom na nqueⁿ cwiluiiñe
Tsotya̱a̱ya na chaꞌtsondyo̱, jom chaꞌtso matsa̱ꞌntjoom ndoꞌ
machꞌeeⁿ tsꞌiaaⁿ ꞌnaaⁿꞌaⁿ naquiiꞌ nꞌo̱o̱ⁿya ndoꞌ mꞌaaⁿñê
joꞌ joꞌ.
\p
\v 7 Cwii cwiindyo̱ cantyjati na jnda̱ jndaaꞌ nnom Cristo
na ꞌnaaⁿꞌ tsꞌiaaⁿ na matseixmaⁿ, cantyjati joꞌ naya na
macoꞌñom.
\v 8 Ncꞌe na luaaꞌ joꞌ matso ñꞌoomꞌ Tyꞌo̱o̱tsꞌom na teiljeii:
\q Quia na tjawaaⁿ cañoomꞌluee jnda̱ na tandoꞌxcoom na
tueeⁿꞌeⁿ,
\q tjachom chaꞌtso joo na ñetꞌom nacjoomꞌm,
\q ndoꞌ nda̱a̱ nnꞌaⁿ tquiaaⁿ cwii cwii nnom na ꞌnaaⁿna.
\p
\v 9 ¿Ljoꞌ ñeꞌcaꞌmo̱ⁿnaꞌ na matsonaꞌ na tjawaaⁿ? Matsonaꞌ
naljoꞌ ee najndyee jndyocueeⁿ nnom tsjoomnancuewaañe.
\v 10 Jom na jndyocueeⁿ majuutyeeⁿ tjawannaaⁿꞌaⁿ cañoomꞌluee
cha na chaꞌtsoti na niom, canda̱a̱ꞌ maꞌmo̱ⁿnaꞌ na mꞌaaⁿñê.
\v 11 Ndoꞌ manquiityeeⁿ tquiaaⁿ na ntꞌom nnꞌaⁿ cwiluiindye
apóstoles. Ntꞌom cwiluiindye nnꞌaⁿ na cwitꞌmo̱o̱ⁿ ñꞌoom
cantyja ꞌnaaⁿꞌaⁿ cha calaꞌyuꞌ nnꞌaⁿ. Ntꞌom cwiluiindye
na cwiñeꞌquia ñꞌoom xco na ya cantyja na nluiꞌnꞌmaaⁿñe
tsꞌaⁿ, ndoꞌ ntꞌom cwiluiindye na cwiteiꞌxꞌee ntmaaⁿꞌ
nnꞌaⁿ na macwjiꞌ Tyꞌo̱o̱tsꞌom cwentaaⁿꞌaⁿ ndoꞌ ntꞌomcheⁿ
cwitoꞌñoom na ꞌnaaⁿ na cwitꞌmo̱o̱ⁿ nda̱a̱ ncꞌiaa.
\v 12 Luaaꞌ sꞌaa Cristo, joꞌ na ya teiꞌnaaⁿ nnꞌaⁿ na
cwilaꞌxmaⁿ cwentaaⁿꞌaⁿ na nlꞌana tsꞌiaaⁿ na macaⁿnaꞌ
cha na nncjaawijndyeendye nnꞌaⁿ na nncꞌom cantyja ꞌnaaⁿꞌaⁿ,
\v 13 hasta xjeⁿ na nncueꞌntyjo̱ na chaꞌtsondyo̱ tjoomꞌ
nncꞌo̱o̱ⁿya na cwilaꞌyuꞌya nꞌo̱o̱ⁿya ñꞌeⁿñê ndoꞌ na canda̱a̱ꞌya
na cwitaꞌjnaaⁿꞌa nquii Jnda Tyꞌo̱o̱tsꞌom. Ndoꞌ na ljoꞌ
nlaxmaaⁿya nnꞌaⁿ na jnda̱ tquiee nꞌom na canda̱a̱ꞌ nntseijomnaꞌ
jaa cantyja ꞌnaaⁿꞌ Cristo.
\v 14 Quia joꞌ taxocatseijomnndaꞌnaꞌ jaa chaꞌna yocanchꞌu
na tiyo yo cwilaꞌchuiiꞌ chiuu waa na mꞌaaⁿꞌ nꞌom. Meiⁿ
taxonquiandyo̱ na nleichuunaꞌ jaa cantyja ꞌnaaⁿꞌ ñꞌoom
xco na cweꞌ cantu na cwiñeꞌquia nnꞌaⁿ na jeeⁿ jndo̱ꞌ
nꞌom na joo ñꞌoomꞌñeeⁿ cwiꞌoochoondyenaꞌ nnꞌaⁿ nato
na tixcwe.
\v 15 Quia joꞌ ncꞌe na wiꞌ nꞌo̱o̱ⁿya nnꞌaⁿ, calana̱a̱ⁿya
ñꞌoom na mayuuꞌ, matsonaꞌ na catsanajnda̱a̱ya cantyja ꞌnaaⁿ
chaꞌtso nnom chiuu waa na mꞌaaⁿya ncꞌe na matseitjoomꞌnaꞌ
jaa ñꞌeⁿ Cristo na cwiluiiñê xqueⁿ tmaaⁿꞌ jaa na laxmaaⁿya
seiiⁿꞌeⁿ.
\v 16 Ndoꞌ cantyja ꞌnaaⁿꞌ Cristo, jaa na cwiluiindyo̱
seiiⁿꞌeⁿ, matseijomnaꞌ chaꞌna tjacañjoomꞌñe seiiꞌ tsꞌaⁿ,
ndoꞌ juu joꞌ quia ya tꞌuiiꞌnaꞌ ñequio cwii cwii nnom
na tjacañjoomꞌñe tsꞌaⁿ, quia joꞌ tjoomꞌ mꞌaaⁿnaꞌ, ndoꞌ
ncꞌe joꞌ ya wjanajndeii juunaꞌ. Ndoꞌ jaa na cwiluiindyo̱
seiiⁿꞌeⁿ, nntsawijnda̱a̱ya na wiꞌ nꞌo̱o̱ⁿya nnꞌaⁿ.
\s Cwiluiindyo̱xco̱o̱ na cwilaꞌyuuꞌa ñꞌeⁿ Cristo
\p
\v 17 Joꞌ chii ncꞌe nquii Ta Jesús matsa̱ꞌntjoom jaa,
luaa ñꞌoom na matsjo̱o̱ nda̱a̱ꞌyoꞌ. Tsacwiꞌntyjeꞌyoꞌ na
matseijomnaꞌ ꞌo chaꞌna nnꞌaⁿ na tyootioondye lꞌo̱ Tyꞌo̱o̱tsꞌom.
Ee joona mꞌaⁿna ñomtiuu ꞌnaaⁿna na cweꞌ tsꞌiaaⁿꞌndyo
joonaꞌ.
\v 18 Ee juu na cwilaꞌno̱ⁿꞌna matseijomnaꞌ chaꞌcwijom
na jaaⁿñe. Ee juu na wandoꞌ Tyꞌo̱o̱tsꞌom ticuaanaꞌ ñꞌeⁿndyena
ee ticalaꞌno̱ⁿꞌna cantyja ꞌnaaⁿꞌaⁿ ncꞌe na quieꞌ nꞌomna.
\v 19 Jnda̱ sꞌaanaꞌ na tajnaaⁿtona natia na cwilꞌana,
cwiñequiandyena nnom ljoꞌ na queeⁿ tsꞌom seiina cha
ñequio na neiiⁿna nnda̱a̱ nlꞌañꞌeⁿna chaꞌtso nnom ljoꞌ
na ticatyꞌiomyanaꞌ.
\v 20 Sa̱a̱ ꞌo nchii luaaꞌ waa ñꞌoom na tyotꞌmo̱o̱ⁿ nnꞌaⁿ
cantyja ꞌnaaⁿꞌ Cristo nda̱a̱ꞌyoꞌ,
\v 21 xeⁿ na mayuuꞌ jndyeꞌyaꞌyoꞌ ñꞌoomꞌm ndoꞌ jlaꞌno̱ⁿꞌyoꞌ
na ñꞌoom na mayuꞌcheⁿ juunaꞌ,
\v 22 quia joꞌ cantyja ꞌnaaⁿꞌ chiuu waa na ñetꞌomꞌjndyeeꞌyoꞌ,
catjeiꞌndyoꞌ cantyja ꞌnaaⁿꞌ natia na ñeseiqueeⁿ tsꞌom
seiiꞌyoꞌ ee juu joꞌ tseixmaⁿnaꞌ cwii na jnda̱ teiꞌndaaꞌñꞌeⁿ
na joo natiaꞌñeeⁿ cwinquioꞌnnꞌaⁿnaꞌ tsꞌaⁿ.
\v 23 Macaⁿnaꞌ na calaꞌxcoꞌyoꞌ cantyja ꞌnaaⁿꞌ espíritu
ꞌnaⁿꞌyoꞌ ñequio na mꞌaaⁿꞌ nꞌomꞌyoꞌ,
\v 24 ndoꞌ na cꞌomxcondyoꞌ chaꞌcwijom tsꞌaⁿ na macwee
liaa xco na juu joꞌ cwiluiiñenaꞌ cantyja na lꞌue tsꞌom
Tyꞌo̱o̱tsꞌom na cwiwitquiooꞌ joꞌ quia na machꞌee tsꞌaⁿ
na matyꞌiomyanaꞌ ndoꞌ ljuꞌ wjaamꞌaaⁿ.
\p
\v 25 Joꞌ chii tacalaneiⁿꞌyoꞌ cantu, cwii ndoꞌ cwiindyoꞌ
catseineiⁿ ñꞌoom na mayuuꞌ ñꞌeⁿ ncꞌiaaꞌ ee chaꞌtsondyo̱
cwiluiindyo̱ cwii cwii nnom ljoꞌ na tjacañjoomꞌñe seiiꞌ
Cristo.
\p
\v 26 Quia matseiꞌwꞌiiꞌ xꞌiaꞌ, tintseitjo̱o̱ndyuꞌtiꞌ nnoom
na jndaaꞌjom nntseicamaaⁿndyuꞌ na tincjaꞌcwaaⁿꞌyaꞌ jom.
\v 27 Tiñenquiaꞌyoꞌ meiⁿcwii nnom na tsaⁿjndii nnda̱a̱
nntsꞌaaⁿ xjeⁿ ꞌo.
\p
\v 28 ꞌÑeeⁿ ꞌo na ñexꞌuee, jeꞌ tanchꞌueeti, jeꞌ catsꞌaayaaⁿ
tsꞌiaaⁿ na yati cha nncuaa ljoꞌ na nnda̱a̱ nnteijneiⁿ
ntꞌomcheⁿ na matseitjo̱o̱naꞌ joona.
\p
\v 29 Meiⁿcwii ñꞌoomntjeiⁿ talaneiⁿꞌyoꞌ, macanda̱ calaneiⁿyoꞌ
ñꞌoom naya na nnteijndeiinaꞌ tsꞌaⁿ na nncjaawijndeiityeeⁿ,
ndoꞌ nnꞌaⁿ na nndye ñꞌoomꞌñeeⁿ nntioꞌnaaⁿñenaꞌ joona.
\v 30 Ndoꞌ tilꞌaꞌyoꞌ cwii nnom na nntseichjooꞌnaꞌ tsꞌom
Espíritu Santo na cwiluiiñe Tyꞌo̱o̱tsꞌom, nquii na ñequio
juu tyꞌioom sa̱yo ꞌo, cha jndaaꞌ ꞌñeeⁿ ꞌo xuee quia na
nnluiꞌnꞌmaaⁿndyeñꞌeⁿ nnꞌaⁿ.
\p
\v 31 Caꞌndyeꞌyoꞌ chaꞌtso nnom na cwilꞌa na matseiꞌndaaꞌnaꞌ
nꞌomꞌyoꞌ, chaꞌna nntseiwꞌii tsꞌaⁿ xꞌiaaⁿꞌaⁿ, nntseiliooꞌñe
tsꞌaⁿ ñꞌeⁿ xꞌiaaⁿꞌaⁿ, cꞌuaa cꞌuaati ꞌñom na matseijmeiⁿꞌñê
nnom xꞌiaaⁿꞌaⁿ, majuꞌ tsꞌaⁿ ñꞌoom wiꞌ nacjooꞌ xꞌiaaⁿꞌaⁿ,
ñequio chatso nnom ljoꞌ na tisꞌa.
\v 32 Calꞌaꞌyoꞌ na ya nnꞌaⁿndyoꞌ ñꞌeⁿ ncꞌiaaꞌyoꞌ, cꞌoom
na wiꞌ nꞌomꞌyoꞌ joona, calaꞌtꞌmaⁿ nꞌomꞌyoꞌ ncꞌiaaꞌyoꞌ
chaꞌxjeⁿ mati matseitꞌmaⁿ tsꞌom Tyꞌo̱o̱tsꞌom ꞌo ncꞌe Cristo.
\c 5
\s Luaa macaⁿnaꞌ na cꞌom ntseinda Tyꞌo̱o̱tsꞌom
\p
\v 1 Ncꞌe na cwiluiindyoꞌ ntseinda Tyꞌo̱o̱tsꞌom na mꞌaaⁿ
na jeeⁿ candyaꞌ tsꞌoom ꞌo, joꞌ na macaⁿꞌa na caluiiꞌndyoꞌ
chaꞌxjeⁿ nqueⁿ.
\v 2 Cꞌomꞌyoꞌ na jnda nquiuꞌyoꞌ meiⁿquia nnꞌaⁿ chaꞌxjeⁿ
Cristo tyꞌoom na candyaꞌ tsꞌoom jaa, ndoꞌ tquiaañê na
tueeⁿꞌeⁿ cwentaaya. Ndoꞌ na ljoꞌ sꞌaaⁿ sꞌaanaꞌ ntyjii
Tyꞌo̱o̱tsꞌom ñꞌeⁿñê chaꞌcwijom catsmaⁿ na cwilaꞌcueeꞌ
nnꞌaⁿ judíos cha nntseitꞌmaⁿ tsꞌoom joona jnaaⁿna. Mancꞌe
joꞌ chii tioo na jeeⁿ tjaweeꞌ ntyjii Tyꞌo̱o̱tsꞌom ñꞌeⁿñê
chaꞌcwijom cwii jndye cachi.
\p
\v 3 Sa̱a̱ quiiꞌntaaⁿꞌ ꞌo na cwiluiindyoꞌ nnꞌaⁿ cwentaaꞌ
Tyꞌo̱o̱tsꞌom ticatsonaꞌ meiⁿ cweꞌ na nlaneiⁿꞌyoꞌ ñꞌoom
cantyja ꞌnaaⁿꞌ na cweꞌ nncꞌoomya tsꞌaⁿ ñꞌeⁿ xꞌiaaꞌ ndoꞌ
chaꞌtso nnom ñꞌoomtia, oo aa queeⁿ tsꞌom tsꞌaⁿ na ñeꞌcwityañê.
\v 4 Ticatyꞌiomnaꞌ na nlaneiⁿꞌyoꞌ meiⁿquia nnom ñꞌoom
ntjeiⁿ oo ñꞌoom wiꞌ, oo ñꞌomjnaaⁿꞌ na cwilaꞌneiⁿ nnꞌaⁿ.
Nchii joꞌ na nlꞌaꞌyoꞌ. ꞌO cjaañjoomꞌ nꞌomꞌyoꞌ cwii cwii
nnom na cantyja ꞌnaaⁿ joo joꞌ nñeꞌquiaꞌyoꞌ na quianlꞌuaaꞌ
Tyꞌo̱o̱tsꞌom.
\v 5 Ee manquiuꞌyoꞌ na juu tsꞌaⁿ na cweꞌ nncꞌoomya
ñequio xꞌiaaꞌ oo na nntseiqueeⁿ tsꞌom na ñeꞌcwityañe,
joꞌ joꞌ matseijomnaꞌ chaꞌna quia na matseitꞌmaaⁿꞌñe
tsꞌaⁿ cwii na cweꞌ nnꞌaⁿ nlꞌa, ndoꞌ na ljoꞌ nntseicuꞌnaꞌ
na nncjaaquieeꞌ tsaⁿꞌñeeⁿ cantyja na matsa̱ꞌntjom Cristo
ñꞌeⁿ Tyꞌo̱o̱tsꞌom.
\v 6 Meiⁿcwii tsꞌaⁿ tinquioꞌnnꞌaⁿꞌyoꞌ na nnduꞌyoꞌ ñꞌoom
ntjeiⁿ nnom, ee macweꞌ jnaaⁿꞌ joꞌ juu na tꞌmaⁿ nntseiwꞌii
Tyꞌo̱o̱tsꞌom nntꞌuiinaꞌ nnꞌaⁿ na tilañꞌoomꞌndyena chiuu
na matseicañeeⁿ joona.
\v 7 ꞌO tilꞌaꞌyoꞌ chaꞌxjeⁿ na cwilꞌana.
\p
\v 8 Ee ꞌo jnda̱ ñetꞌomꞌyoꞌ cantyja ꞌnaaⁿꞌ na jaaⁿñe
sa̱a̱ jeꞌ na jnda̱ seitjoomꞌnaꞌ ꞌo ñequio Ta Jesucristo,
cꞌomꞌyoꞌ cantyja ꞌnaaⁿꞌ naxueeñe,
\v 9 ee juu naxueeñe quia na matseixueeñenaꞌ naquiiꞌ
tsꞌom tsꞌaⁿ, machꞌeenaꞌ na yatsꞌaⁿñê, xcwe machꞌeeⁿ ndoꞌ
mayomꞌm ñꞌoom na nntseineiiⁿ.
\v 10 Calaꞌjnda̱ꞌyoꞌ na nntsawiꞌnaⁿꞌyoꞌ na nlꞌaꞌyoꞌ
chaꞌtso yuu na macjaaweeꞌ ntyjii Ta Jesús ñꞌeⁿndyoꞌ.
\v 11 Ticalaꞌjomndyoꞌ ñequio ljoꞌ na tjaa yuu lꞌue
na cwilꞌa nnꞌaⁿ na mꞌaⁿ cantyja ꞌnaaⁿꞌ na jaaⁿñe. ꞌO
calaꞌcano̱o̱ⁿꞌyoꞌ na tixcwe ljoꞌ cwilꞌana.
\v 12 Ee machꞌeenaꞌ na jnaaⁿꞌ tsꞌaⁿ na nntseineiⁿ ljoꞌ
na cweꞌ ntyꞌiu cwilꞌa naⁿꞌñeeⁿ,
\v 13 sa̱a̱ quia na jnda̱ seicano̱o̱ⁿ naxueeñe chaꞌtso ljoꞌ
na cweꞌ ntyꞌiu cwiluii, quia joꞌ cwiwitquiooꞌya. Ee juu
naxuee matseicano̱o̱ⁿnaꞌ chaꞌtsoñꞌeⁿ ljoꞌ na wantyꞌiuuꞌ
niom.
\v 14 Cantyja ꞌnaaⁿꞌ luaaꞌ, luaa matsonaꞌ:
\q Calcwiꞌ ꞌu na watsuꞌ,
\q quicantyjaꞌ na waꞌ quiꞌntaaⁿ lꞌoo
\q cha na nñequiaa Cristo na xuee nncꞌoomꞌ.
\p
\v 15 Cantyja ꞌnaaⁿꞌ nmeiⁿꞌ calꞌandyoꞌ cwenta cantyja
chiuu waa na tsamꞌaⁿꞌyoꞌ. Tincꞌomꞌyoꞌ na cweꞌ tijndo̱ꞌto
nꞌomꞌyoꞌ, ꞌo cꞌomꞌyoꞌ na jndo̱ꞌya nꞌomꞌyoꞌ.
\v 16 Joꞌ chii queⁿndyoꞌ na nlꞌaꞌyoꞌ yuu na matyꞌiomyanaꞌ.
Meiⁿ tilaꞌcatsuuꞌyoꞌ xuee ꞌnaⁿꞌyoꞌ na cweꞌ chutindyo,
ee cwii cwii xuee jaawiwiꞌti.
\v 17 Tilꞌaꞌyoꞌ cwii nnom na cweꞌ nlꞌaꞌtoꞌyoꞌ, calaꞌno̱ⁿꞌyaꞌyoꞌ
ljoꞌ lꞌue tsꞌom Ta Tyꞌo̱o̱tsꞌom na nlꞌaꞌyoꞌ.
\v 18 Tincꞌomꞌyoꞌ na candyeꞌyoꞌ, ee na luaaꞌ nlꞌaꞌyoꞌ
wjaachunaꞌ ꞌo na nntsuundyoꞌ, ꞌo cꞌomꞌyoꞌ na tooꞌndyoꞌ
ñꞌeⁿ Espíritu Santo.
\v 19 Calaꞌnaⁿꞌyoꞌ ñꞌoom na cho salmos na nndyeꞌyoꞌ
ñꞌeⁿ ncꞌiaaꞌyoꞌ ndoꞌ cataꞌyoꞌ chaꞌtso nnom na ya nnta
tsꞌaⁿ na cwilaꞌtꞌmaaⁿꞌndyoꞌ Ta Tyꞌo̱o̱tsꞌom ñequio na
xcweeꞌya nꞌomꞌyoꞌ.
\v 20 Ñequiiꞌcheⁿ quiaꞌyoꞌ na quianlꞌuaaꞌ Tsotya̱a̱ya
Tyꞌo̱o̱tsꞌom cantyja chaꞌtsoti na matioꞌñaaⁿñê ꞌo ñequio
xueeꞌ Taya Jesucristo.
\s Ñꞌoom cantyja ꞌnaaⁿ nnꞌaⁿ na tꞌunco.
\p
\v 21 Catueꞌndyoꞌ cjeꞌyoꞌ nda̱a̱ ncꞌiaaꞌyoꞌ na cwilaꞌyuꞌ
ncꞌe na tꞌmaⁿñe Tyꞌo̱o̱tsꞌom nquiuꞌyoꞌ.
\p
\v 22 ꞌO yolcu na mꞌaⁿ sꞌaaꞌyoꞌ calꞌaꞌyoꞌ ljoꞌ na lꞌue
nꞌomna chaꞌcwijom cwindyeꞌntjomꞌyoꞌ nnom nquii Ta Jesucristo.
\v 23 Ee tsaⁿsꞌa cwiluiiñê xqueⁿ scoomꞌm, chaꞌxjeⁿ Cristo
cwiluiiñê xqueⁿ tmaaⁿꞌ nnꞌaⁿ na macwjiꞌ Tyꞌo̱o̱tsꞌom cwentaaⁿꞌaⁿ
ndoꞌ na macwjiꞌnꞌmaaⁿñê tmaaⁿꞌñeeⁿ, ee cwiluiiñenaꞌ seiiⁿꞌeⁿ,
\v 24 ndoꞌ chaꞌxjeⁿ tꞌmaaⁿꞌ nnꞌaⁿ na cwilaꞌyuꞌ majuꞌñecje
nnom Cristo, maluaaꞌ macaⁿnaꞌ na joo yolcu na jnda̱ tꞌunco
catueeꞌndyecjena nda̱a̱ sꞌaana.
\p
\v 25 Naⁿnom na mꞌaⁿ lcuu cꞌomna na jnda nquiuna joo
chaꞌxjeⁿ Cristo tyꞌoom na candyaꞌ tsꞌoom tmaaⁿꞌ nnꞌaⁿ
na macwjiꞌ Tyꞌo̱o̱tsꞌom cwentaaⁿꞌaⁿ ndoꞌ na tquiaañê na
tueeⁿꞌeⁿ cwentaana.
\v 26 Luaaꞌ sꞌaaⁿ cha na nntseixmaⁿ tmaaⁿꞌñeeⁿ cwentaaꞌ
Tyꞌo̱o̱tsꞌom ndoꞌ tqueⁿ ljoomꞌm juunaꞌ quia na teitsꞌoomndyena
ndoꞌ ñequio na tyondyena ñꞌoomꞌm,
\v 27 cha nñequiaa cheⁿnqueⁿ tmaaⁿꞌñeeⁿ nnoom na neiⁿncooꞌ
caxuee tseixmaⁿnaꞌ, na tjaa yuu na cwajndii cantyja ꞌnaaⁿꞌnaꞌ
meiⁿ tjaaꞌnaⁿ na cantseiiⁿꞌnaꞌ meiⁿ tjaa cwiicheⁿ na
nljeiꞌ na ticuaaya cantyja ꞌnaaⁿꞌnaꞌ, na ñequiiꞌcheⁿ
tseixmaⁿnaꞌ cwentaaꞌ Tyꞌo̱o̱tsꞌom ndoꞌ canda̱a̱ꞌñꞌeⁿ matseixmaⁿnaꞌ
cwentaaⁿꞌaⁿ.
\v 28 Maluaaꞌ waa na matsonaꞌ na cꞌoom tsaⁿsꞌa na wiꞌ
tsꞌoom scoomꞌm chaꞌxjeⁿ jnda ntyjeeⁿ seiiⁿꞌeⁿ. Ee tsꞌaⁿ
na wiꞌ tsꞌom scuuꞌ maꞌmo̱ⁿ na jnda ntyjiiñe cheⁿnquii.
\v 29 Ee tjaa ꞌñeeⁿ quichꞌee na jndooꞌñe cheⁿnquii.
Macwaaⁿꞌaⁿ nantquie cha nncꞌoom na yaaⁿꞌaⁿ. Ndoꞌ chaꞌxjeⁿ
Cristo machꞌeeⁿ cwenta jaa tmaaⁿꞌ nnꞌaⁿ na macwjiꞌ Tyꞌo̱o̱tsꞌom
cwentaaⁿꞌaⁿ, maluaaꞌ matseijomnaꞌ na cateixꞌee tsꞌaⁿ
scoomꞌm.
\v 30 Ee jaa tmaaⁿꞌ nnꞌaⁿ na macwjiꞌ Tyꞌo̱o̱tsꞌom cwentaaⁿꞌaⁿ,
cwiluiindyo̱ seiiꞌ Cristo na chaꞌwaañê. Ndoꞌ cwii cwiindyo̱
matseijomnaꞌ cwii cwii nnom na matseicañjoomꞌnaꞌ jom.
\v 31 “Joꞌ chii tsaⁿsꞌa nꞌñeeⁿ tsotyeeⁿ tsoñeeⁿ cha
na nntseitjoomꞌnaꞌ jom ñꞌeⁿ scoomꞌm ndoꞌ wendyena nlaꞌxmaⁿna
ñecwii tsꞌaⁿ.”
\v 32 Jeeⁿ tꞌmaⁿ matseixmaⁿ ñꞌoomwaaꞌ na jeeⁿ wantyꞌiuuꞌ
waanaꞌ. Sa̱a̱ ja matseijoomꞌndyo̱ ñꞌoommeiⁿꞌ cantyja ꞌnaaⁿꞌ
Cristo ñequio tmaaⁿꞌ nnꞌaⁿ na macwjiꞌ Tyꞌo̱o̱tsꞌom cwentaaⁿꞌaⁿ.
\v 33 Sa̱a̱ ñꞌoom na macanda̱, cwii ndoꞌ cwiindyoꞌ ꞌo cꞌoom
na jnda ntyjii scuuꞌ chaꞌxjeⁿ na jnda ntyjiiñe cheⁿnquii
ndoꞌ mati ꞌo naⁿlcu calaꞌlꞌueeꞌndyoꞌ sꞌaaꞌyoꞌ.
\c 6
\s Luaa macaⁿnaꞌ na cꞌom nda nnꞌaⁿ na cwilaꞌyuꞌ
\p
\v 1 ꞌO yonchꞌu, ncꞌe na cwilaꞌyuꞌyoꞌ ñequio Jesucristo,
laxmaⁿꞌyoꞌ na cꞌomꞌyoꞌ na ndyaandyoꞌ jo nda̱a̱ nnꞌaⁿ na
nda oꞌ ee matyꞌiomyanaꞌ na nlꞌaꞌyoꞌ naljoꞌ.
\v 2 Ee ljeii najndyee na matsa̱ꞌntjomnaꞌ chuunaꞌ ñꞌoom
na tso Tyꞌo̱o̱tsꞌom na nntsꞌaaⁿ. Matsonaꞌ: “Catseitꞌmaaⁿꞌndyuꞌ
tsotyeꞌ ñꞌeⁿ tsoꞌndyoꞌ
\v 3 cha na nncꞌoomꞌ na neiⁿꞌ ndoꞌ tco xueechuꞌ nnom
tsjoomnancuewaa.”
\v 4 Ndoꞌ ꞌo jeꞌ, na mꞌaⁿ ndaꞌyoꞌ tilꞌaꞌyoꞌ cwii nnom
na nlaꞌliooꞌndyena, ꞌo calaꞌquieꞌyoꞌ joona ñequio ñꞌoom
na matseijndo̱ꞌnaꞌ nꞌomna chiuu nncꞌomna ndoꞌ catꞌmo̱ⁿꞌyoꞌ
nda̱a̱na na candyaꞌ tsꞌom Ta Jesucristo joona.
\s Ñꞌoom cantyja ꞌnaaⁿ nnꞌaⁿ na teilꞌuandye na cwindyeꞌntjomtyeⁿ
\p
\v 5 ꞌO nnꞌaⁿ na teijndandyoꞌ, cꞌomꞌyoꞌ na ndyaandyoꞌ
nda̱a̱ patrom ꞌnaⁿꞌyoꞌ, catueꞌndyoꞌcjeꞌyoꞌ nda̱a̱na ndoꞌ
ñequio na nquiaꞌyo calaꞌtꞌmaaⁿꞌndyoꞌ joona ñequio na
xcweeꞌ nꞌomꞌyoꞌ chaꞌxjeⁿ nquiuꞌyoꞌ na cwindyeꞌntjomꞌyoꞌ
nnom nquii Cristo.
\v 6 Nchii cweꞌ quia na jndooꞌna joꞌ na cwiqueⁿndyoꞌ
tsꞌiaaⁿ na cwilꞌaꞌyoꞌ. ꞌO calꞌaꞌyoꞌ na ljoꞌ ee na manquiuꞌyoꞌ
na nnom nquii Cristo mꞌaⁿꞌtyeⁿꞌyoꞌ moso, ndoꞌ ñequio
na xcweeꞌ nꞌomꞌyoꞌ cwilꞌaꞌyoꞌ yuu na lꞌue tsꞌom Tyꞌo̱o̱tsꞌom.
\v 7 Tsꞌiaaⁿ na nlꞌaꞌyoꞌ, calꞌaꞌyoꞌ juunaꞌ ñequio na
tincꞌuaaꞌ nꞌomꞌyoꞌ, chaꞌxjeⁿ nnom nquii Ta Jesucristo
na cwindyeꞌntjomꞌyoꞌ, nchii cweꞌ nda̱a̱ nnꞌaⁿ.
\p
\v 8 Ee manquiuꞌyoꞌ na cwii cwii tsꞌaⁿ, aa mꞌaaⁿtyeeⁿ
moso oo aa mꞌaaⁿ xjeⁿ ꞌnaaⁿꞌ nqueⁿ, sa̱a̱ Ta Jesús nñequiaaⁿ
na nncoꞌñom cantyjati na ya na ñesꞌaa.
\v 9 Ndoꞌ ꞌo jeꞌ patrom, majoꞌti calꞌaꞌyoꞌ ñequio nnꞌaⁿ
na mꞌaⁿtyeⁿ moso ꞌnaⁿꞌyoꞌ meiⁿ nchii na nnduꞌyoꞌ cwii
ñꞌoom na ntseicatyꞌuenaꞌ joona. Ee cjañjoomꞌ nꞌomꞌyoꞌ
na ꞌo ñꞌeⁿndye joona cañoomꞌluee mꞌaaⁿ Ta Jesús na matsa̱ꞌntjoom
jaa. Ndoꞌ jo nnom jom ñecwii xjeⁿ cwilaꞌxmaaⁿya.
\s Lꞌo̱ tsꞌiaaⁿmeiiⁿ cwilꞌueeꞌndyo̱
\p
\v 10 ꞌO nnꞌaⁿya, Ta Jesús tjacantyja najndeii na matseixmaaⁿ.
Cantyja ꞌnaaⁿꞌ joꞌ cꞌoomꞌ jndeiiꞌ nꞌomꞌyoꞌ ncꞌe matseitjoomꞌnaꞌ
ꞌo ñꞌeⁿñê.
\v 11 Cwilꞌueeꞌndyoꞌ chaꞌtso nnom lꞌo̱ tsꞌiaaⁿ ndiaꞌ
na jnda̱ tquiaa Tyꞌo̱o̱tsꞌom nda̱a̱ꞌyoꞌ, cha na nnda̱a̱ nnaⁿndyoꞌ
nacjooꞌ chaꞌtso nnom na manquiuꞌnnꞌaⁿ tsaⁿjndii ꞌo.
\v 12 Ee nchii cweꞌ ñequio nnꞌaⁿ na laꞌxmaⁿ seii ñequio
ndeii cwilꞌaaya tiaꞌ. Jaa mꞌaaⁿya nacjoo najnda̱ na wiꞌndye
na titquiooꞌ na mꞌaⁿ jo ndoꞌ ljo̱ꞌluee, joo na waa najnda̱
na cwiqueⁿ xjeⁿ, na cwitsa̱ꞌntjom, ndoꞌ ntꞌomcheⁿ na cwitsa̱ꞌntjom
tsjoomnancue jaaⁿwaañe.
\v 13 Joꞌ chii cwilꞌueeꞌndyoꞌ chaꞌtsoñꞌeⁿ lꞌo̱ tsꞌiaaⁿ
cwentaa ndiaꞌ na mañequiaa Tyꞌo̱o̱tsꞌom cha quia na nncueꞌntyjo̱
xuee na wiꞌ nntjomꞌyoꞌ nnda̱a̱ nnaⁿndyoꞌ ndoꞌ na jnda̱
jnda̱a̱ jnaⁿndyoꞌ tiaꞌ, ndicwaⁿ meiⁿntyjeꞌtyeⁿꞌyoꞌ.
\v 14 Cwintyjeꞌtyeⁿꞌyoꞌ cwentaaⁿꞌaⁿ na cwilꞌueeꞌndyoꞌ
ñꞌoomꞌm chaꞌxjeⁿ sondaro matseityeeⁿ xcweeⁿꞌeⁿ ñequio
tjaⁿ, calꞌaꞌyoꞌ na matyꞌiomyanaꞌ ee juunaꞌ nncwañoomꞌnaꞌ
ꞌo chaꞌxjeⁿ cotom xjo wañoomꞌnaꞌ sondaro.
\v 15 Chaꞌxjeⁿ mꞌaaⁿcꞌeeñe sondaro na mañjoom lcoomꞌm
na wjaⁿ tiaꞌ, mati ꞌo ñequiiꞌcheⁿ cꞌomꞌcꞌeendyoꞌ na nntsanquiaꞌyoꞌ
ñꞌoom na ya na mañequiaanaꞌ na cwiljoya ntyjii Tyꞌo̱o̱tsꞌom
ñꞌeⁿ nnꞌaⁿ.
\v 16 Tsaⁿjndii majoomꞌm ndo̱ nacjoꞌyoꞌ na tooꞌ chom.
Chaꞌxjeⁿ tjaⁿ tmeiⁿ mawañoomꞌnaꞌ sondaro na tincꞌoom
ndo̱ jom, maluaaꞌ cwilꞌueeꞌndyoꞌ juu na cwilayuꞌya nꞌomꞌyoꞌ
cha nlanduꞌyoꞌ ndo̱ na majuꞌ tsaⁿjndii nacjoꞌyoꞌ.
\v 17 Juu na macwjiꞌnꞌmaaⁿꞌñe Tyꞌo̱o̱tsꞌom nnꞌaⁿ cwilꞌueeꞌndyoꞌ
juunaꞌ na nncwañoomꞌnaꞌ ꞌo chaꞌxjeⁿ tjaⁿxqueⁿ xjoꞌ mawañoomꞌnaꞌ
xqueⁿ sondaro ndoꞌ mati cwilꞌueeꞌndyoꞌ ñꞌoomꞌm chaꞌxjeⁿ
xjo espada na mañequiaa Espíritu Santo nda̱a̱ꞌyoꞌ.
\v 18 Tintsacwintyjeꞌyoꞌ na cwilaneiⁿꞌyoꞌ nnom Tyꞌo̱o̱tsꞌom
chaꞌxjeⁿ na mañequiaa Espíritu Santo naquiiꞌ nꞌomꞌyoꞌ,
ñequiiꞌcheⁿ calaꞌtyꞌoondyoꞌ ndoꞌ cataⁿꞌyoꞌ nnoom, tincwintqueⁿꞌyoꞌ,
ñequiiꞌcheⁿ na cꞌomꞌcꞌeendyoꞌ na calaneiⁿꞌyoꞌ nnoom
cantyja ꞌnaaⁿ nnꞌaⁿ na mꞌaⁿ cwentaaⁿꞌaⁿ.
\v 19 Mati calaneiⁿꞌyoꞌ nnom Tyꞌo̱o̱tsꞌom cantyja ꞌnaⁿya
na cateijneiⁿ ja ñꞌoom na nntseina̱ⁿya nnda̱a̱ nnꞌaⁿ meiⁿ
tintseicatyꞌuenaꞌ ja na nñequiaya na caliu nnꞌaⁿ chiuu
waa ñꞌoom na jeeⁿ wantyꞌiuuꞌ waa na nluiꞌnꞌmaaⁿñe tsꞌaⁿ.
\v 20 Jnda̱ tyꞌioom tsꞌiaaⁿ ja na mañequiaya ñꞌoom naya
ꞌnaaⁿꞌaⁿ, ndoꞌ cweꞌ jnaaⁿꞌ joꞌ na mꞌaaⁿya wꞌaancjo, calaneiⁿꞌyoꞌ
nnoom na cꞌo̱ⁿtꞌmaaⁿꞌndyo̱ tsꞌo̱o̱ⁿya na nntseina̱ⁿya juunaꞌ
nda̱a̱ nnꞌaⁿ chaꞌxjeⁿ matsonaꞌ na catsꞌaa.
\s Ñꞌoom na jaantycwii na matseiljeii Pablo cartawaañe
\p
\v 21 Tiꞌnnꞌaⁿya Tíquico, tsaⁿ na jeeⁿ jnda ntyjiiya,
jom jeeⁿ xcweeꞌ tsꞌoom tsꞌiaaⁿ ꞌnaaⁿꞌ Ta Jesús, jom ntseicañeeⁿ
ꞌo chiuu waa na mꞌaaⁿya cha caliuꞌyoꞌ ljoꞌ matsꞌaaya.
\v 22 Cweꞌ joꞌ na majño̱o̱ⁿya jom na mꞌaⁿꞌyoꞌ na catseicañeeⁿ
ꞌo chiuu waa na mꞌaaⁿya ñjaaⁿ cha na nñequiaanaꞌ na
tꞌmaⁿ nꞌomꞌyoꞌ.
\p
\v 23 ꞌO nnꞌaⁿya na cwilaꞌyuꞌyoꞌ, nquii Tyꞌo̱o̱tsꞌom na
cwiluiiñê Tsotya̱a̱ya ñequio Jesucristo na cwiluiiñê na
matsa̱ꞌntjoom jaa, quiana na nndaꞌyoꞌ na meiⁿcwii ñomtiuu
ticꞌomꞌyoꞌ jo nda̱a̱na ndoꞌ na catoꞌñoomꞌyoꞌ na mꞌaⁿna
na wiꞌ nꞌomna ꞌo ee cwilaꞌyuꞌya nꞌomꞌyoꞌ ñꞌeⁿndyena,
\v 24 juu naya na matseixmaⁿ Tyꞌo̱o̱tsꞌom, quiaaⁿ juunaꞌ
nda̱a̱ chaꞌtsondye nnꞌaⁿ na ticalaꞌchuiiꞌ na mꞌaⁿ na jnda
nquiu Taya Jesucristo.