\id MAT
\h متّى
\toc1 إنجيل متّى
\toc2 متّى
\toc3 متى
\mt1 انجيل يسوع المسيح للقدّيس متّى
\c 1
\s نَسَب يَسوُعْ
\r (لوقا 3‏:23‏–38)
\p
\v 1 كتاِبْ ميلادْ يَسوُع المَسيحْ ابنْ داهودْ ابن ابْراهيمْ:
\p
\v 2 ابْراهيمْ خَلَّف اسْحَقْ، واسْحَقْ خَلَّفْ يَعْقوب، وْيَعْقوبْ خَلَّفْ ياهوذا واخوتو.
\v 3 وْياهوذا خَلَّفْ فارِص وْزارَحْ منْ ثامار، وْفارِصْ خَلَّفْ حَصْرون، وْحَصْرونْ خَلَّفْ آرامْ،
\v 4 وآرامْ خَلَّفْ عَمّيناداب، وْعَمّينادابْ خَلَّفْ نَحْشون، وْنَحشون خَلَّفْ سَلْمونْ،
\v 5 سَلْمونْ خَلَّفْ بوعَز منْ راحابْ، بوعَزْ خَلَّفْ عوبيدْ منْ راعوثْ، عوبيدْ خَلَّفْ يَسّى،
\v 6 يَسّى خَلَّفْ داهود المَلكْ، داهود المَلكْ جاب سْليِمانْ منْ مَرْة اوريّا.
\v 7 سْليِمان خَلَّفْ رَحَبْعامْ، رَحَبْعامْ خَلَّفْ آبيّا، آبيّا خَلَّفْ آسا.
\v 8 آسا خَلَّفْ يَهوشافاطْ، يَهوشافاطْ خَلَّفْ يورامْ، يورامْ خَلَّفْ عُزّيّا.
\v 9 عُزّيّا خَلَّفْ يوثامْ، يوثامْ خَلَّفْ آحازْ، آحازْ خَلَّف حِزَقيّا،
\v 10 حَزْقِيّا خَلَّفْ مَنَسّى، مَنَسّى خَلَّفْ آمونْ، آمونْ خَلَّفْ يوشيّا،
\v 11 يوشيّا خَلَّفْ يَكُنْيا واخوتو فَ زَمان السَّوقيّاتْ لَبابلْ،
\v 12 وْبَعْد السَّوقيّاتْ لَبابلْ يَكُنْيا خَلَّفْ شَأَلتِئيلْ، شَأَلتِئيلْ خَلَّفْ زَرُبّابلْ،
\v 13 وزَرُبّابلْ خَلَّفْ أَبيهودْ، أَبيهودْ خَلَّفْ إلِياقيمْ، إلِياقيمْ خَلَّفْ عازورْ،
\v 14 عازورْ خَلَّفْ صادوقْ، صادوقْ خَلَّفْ أَخيمْ، أَخيمْ خَلَّفْ إلِيودْ،
\v 15 إلِيودْ خَلَّفْ إليعازَرْ، إليعازَرْ خَلَّفْ مَتّان، وْمَتّانْ خَلَّفْ يَعْقوبْ،
\v 16 يَعْقوبْ خَلَّفْ يوسفْ رجّالْ مَرْيَمْ لَ منّا ولدْ يَسوُعْ لَ يتْسَمّى المَسيحْ.
\p
\v 17 بَقى كلّ الاجْيالْ من ابْراهيمْ لَ داهودْ أَرْبَطَعْشْ جيل، وْمنْ داهودْ للسَّوقيّاتْ لَبابلْ أَرْبَطَعْشْ جيل، وْم السَّوقيّاتْ لَبابلْ دي لَمَنْ جا المَسيحْ أَرْبَطَعْشْ جيلْ.
\s ولادة يَسوُع المَسيحْ
\p
\v 18 ولادةْ يَسوُع المَسيحْ كذاِ صارتْ: لَمَنْ أمّو مَرْيَمْ كانتْ مَخطوُبِة لَيوسفْ، قَبلْ لَ يجْتمْعون، انْوَجَدتْ حبْلىِ منْ روُح القدسْ.
\p
\v 19 ويوسفْ رجّالا كانْ بار، وْما رادْ يطْلَعْلا صيتْ، وافْتَكَر يفكّا بالخفْيِة.
\v 20 وَقْتْ لَ افْتَكَرْ هَالافْكارْ، ظَهَرْلو مَلاك الرَّبْ ف المَنام وْقالْلو: ”يوسف ابنْ داهودْ، لا تْخافْ تاخذْ مَرْيَمْ مَرَتكْ، منْ لَ هاذْ لَ كلْحبْلتْ فِيو منْ روُح القدسْ واِ.
\v 21 وْتَ تولَدْ وَلَدْ، وتْسَمِّيو يَسوُعْ، منْ لَ هوّاِ تَ يخَلّصْ شَعْبو منْ خَطِيّاتنْ.“
\v 22 وْهاي كلّا صارتْ تَ يتمْ شي لَ انْقالْ م الرَّبْ عَلى لْساِن النَّبي لَ قالْ:
\v 23 ”هاي العَذْرا تحْبَل وْتولَدْ وَلَدْ، ويسَمَّوهُ عَمَنويِيلْ“ يعْنيِ: اَلله مَعْنا.
\p
\v 24 وْلَمَنْ قامْ يوسفْ منْ نَومو، سَوى كَما لَ أَمَرو مَلاك الرَّبْ، وَاخَذْ مَرَتو.
\v 25 وْما عَرَفا دي لَمَنْ وَلَدت ابْنا البكر، وْسَمَّتو يَسوُعْ.
\c 2
\s زيارة المَجوس
\p
\v 1 وَقْتْ لَ ولدْ يَسوُعْ فَ بَيتْ لَحمْ لَ ف ديرة الياهوديِّة عَلى إيّاِمْ هيروُدس المَلكْ، جَوا مَجوسْ م الشَّرْقْ للقدْسْ،
\v 2 يقولونْ: ”أَينْ واِ مَلك الياهودْ لَ ولدْ؟ منْ لَ ارَينا نجْمتو ف الشَّرْق، وْجينا تَ نسْجدْلو.“
\v 3 وْسمعْ هيروُدس المَلكْ، وانْهَزْ، والقدْسْ كلّا مَعو.
\v 4 وجَمَعْ كلّ گْباريّة الكَهَنَة ومْعَلْمين النّاموسْ تَبَع الشَّعْبْ، واسْتَخبَرْ منّنْ: ”أَين يولَد المَسيحْ؟“
\v 5 وْهنّاِ قالوا: ”فَ بَيتْ لَحمْ ياهوذا، منْ لَ كذاِ مَكْتوبْ ف سفْر النَّبي:
\v 6 ’وانْتِ يا بَيتْ لَحمْ ياهوذا! موُ قْلَيل انْتِ بَينْ ملوكْ ياهوذا، منْ لَ منْكِ تَ يطْلَعْ مَلكْ راعي لَشَعْبي اسْرائيلْ.‘“
\p
\v 7 هاك الوَقْتْ، هيروُدسْ، بالخفْيِة ساح المَجوس وْعَرَفْ منّنْ أَيمَتْ ظَهَرتْلن النّجمِة.
\v 8 وْبَعَثنْ لَبَيتْ لَحم، وْقالْلنْ: ”روُحوا، دَوروا عَ الوَلَد كْوَيّس، وْمنْ أَرَيتنو تَعوا خَبْروني بْشان اَنا زاِ أَروُح اَسْجدْلو.“
\p
\v 9 وْهنّاِ بَعدْ لَ سمْعوا م المَلكْ، راحوا. ولَيشْ موُ يرَونْ هاك نجمِةْ لَ ارَوا ف الشَّرق رايحَة قدّامنْ دي لَمَنْ جَتْ وَقَّفتْ فوُقْ موُضَعْ لَوّاِ الوَلَدْ.
\v 10 لَمَنْ أَرَوا النّجمِة، فرْحوا فَرْحَة گْبيرِة كْثيرْ.
\v 11 وْدَخَلوا للبَيتْ وَارَوا الوَلَدْ مَعْ مَرْيَمْ أمّو. وكَبَّوا سَجَدولو وْفَتَحوا خَزْناتن وْقَرَّبولو قَرابينْ: ذَهَب وْمر وْبَخّورْ.
\v 12 وَارَوا فَ مَنامْ لا يرْجَعونْ لَعَنْدْ هيروُدسْ، قاموا راحوا لبْلادنْ منْ غَيرْ طَريِقْ.
\s الهرَوب لَ مَصر
\p
\v 13 وْوَقْتْ لَ راحوا، ظَهَرْ مَلاك الرَّبْ فَ مَنامْ ليوسف وْقالْلو: ”قومْ خذ الوَلَدْ وامّو واهْربْ لَمَصرْ، وابْقى هَونَكْ دي لَمَن اَقلْ لكْ، منْ لَ هيروُدسْ تَ يدَوّر عَ الوَلَد بْشان يتَوبلو.“
\v 14 وْقامْ يوسفْ أَخَذْ الوَلَدْ وامّو باللَيلْ وْهَرَبْ لَمَصرْ.
\v 15 وْبَقى هَونَكْ دي لَمَنْ ماتْ هيروُدسْ، تَ يتمْ شي لَ انْقالْ م الرَّبْ بالنَّبي لَ قالْ: ”منْ مَصرْ دَعَيتُ ابْني.“
\r (هو 11‏:1)
\p
\v 16 هاك الوَقْتْ لَمَنْ أرى هيروُدسْ أشْوَن المَجوسْ ما اسْتَعبَروهُ، كْثير انْحَمَق، وْبَعَثْ عَسْكَرْ قَتَلْ كلّ اولادْ بَيتْ لَحم وْحَولا حَوالَيا، منْ ابنْ سَنْتَين وْلَتَحْت، عَلى موجبْ زَمانْ لَ عَقَّب وْعَرَفْ م المَجوسْ.
\v 17 هاك الوَقْتْ تَمْ شي لَ انْقال بْإرمْيا النَّبي لَ قالْ:
\v 18 ”سْياح انْسَمَعْ ف الرّامِة، بكا كْثير وْولاِويلْ، راحيِلْ تبْكي عَلى اولادا وْموُ تْريدْ تتْعَزّى، منْ لَ موُ مَوجودينْ ناِ.“
\s طَريِق الرَّجعَة منْ مَصر لَ النّاصْرَة
\p
\v 19 وْلَمَنْ ماتْ هيروُدسْ، ظَهَرْ مَلاك الرَّبْ فَ مَنامْ لَيوسفْ، فَ مَصرْ،
\v 20 وْقالْلو: ”قومْ، خذ الوَلَدْ وامّو وْروُحْ لاَرْض اسْرائيلْ، منْ لَ ماتوا هَوكْ لَ كان يريدونْ ياخْذونْ روُح الوَلَدْ.“
\v 21 قامْ يوسفْ أَخَذ الوَلَدْ وامّو وْجا لاَرْض اسْرائيلْ.
\v 22 بَسْ وَقْتْ لَ سمعْ أَرْخيلاوُسْ كصّارْ ملكْ عَ الياهوديِّة مْبَدال اَبوهُ هيروُدسْ، خاف يروُحْ لَونَكْ. وَارى فَ مَنامْ تَ يروُحْ لَديرة الجَّليلْ.
\v 23 وْجا سَكَنْ فَ بَلَدْ اسْمو النّاصْرَة، تَ يتمْ شي لَ انْقالْ بالنَّبي: ”تَ يتْسَمّى ناصري.“
\c 3
\s بشارة يوحَنّا المَعْمَذانْ
\r (مرقس 1‏:1‏–8، لوقا 3‏:1‏–18، يوحنّا 1‏:19‏–28)
\p
\v 1 وْفَوك الاِيّاِمْ جا يوحَنّا المَعْمَذانْ يكْرزْ فَ بَرّيِّة الياهوديِّة،
\v 2 ويقولْ: ”توبوا، مَلَكوت السَّماواتْ قربْ.“
\v 3 منْ لَ هاذْ واِ هاكْ لَ انْقالْ عَلَيو باِشعْيا النَّبي: ”صَوت يسيِحْ ف البَرّيِّة: ’حَضْروا طَريِق الرَّبْ، وْساِوَوا طرْقاتو.‘“
\p
\v 4 وْيوحَنّا كانْ لبْسو منْ شَعْر الّجْماِلْ، ويشدْ وسْطو ف جلْدْ، وَاكْلو جَراد وْعَسَل البَرّيِّة.
\v 5 وْكانْ يطْلَعونْ لَ عَنْدو ناِس القدْس وْكلّ الياهوديِّة وْكلّ الدّيرِة حَوالي الارْدنْ،
\v 6 ويتْعَمَّذونْ عَلى ايدو فَ نَهْر الارْدن، وْيعْترْفونْ فَ خَطيّاتنْ.
\p
\v 7 وْوَقْتْ لَ ارى كْثيرْ م الفَرّيسيِّة والصَّدّوقيِّة جاِيينْ تَ يتْعَمَّذونْ، قالْلن: ”اولاد الحَيّاتْ، منْ وَرّاكنْ تَ تهْربونْ منْ غَضَب الجّاِييِ؟
\v 8 بَقى سَوَوا ثَمَرْ يليق للتَّوبِة.
\v 9 وْلا تفْتكْرونْ وتْقلونْ فَ قَلْبْكنْ: ’لنا أَب، ابْراهيمْ واِ أَبونا.‘ أَقلْكن: اَلله يتيِقْ منْ هَالحجاِير يسَي اولادْ لابْراهيمْ.
\v 10 كْوا الفاسْ مَحْطوُطْ عَلى عَقب السّجَرْ. بَقى كلْ سجَرة ثَمَرْ كْوَيّس موُ تْسَي، تنْقطع وْتقَعْ ف النّارْ.
\v 11 أنا أَعَمّذْكن بْمَي للتَّوبِة، بَسْ هاكْ لَ بَعْدي جاِييِ، أَقْوى منّي واِ، هاكْ لَ موُ مسْتَحقّ اَنا أَحْملْ صَولو، هاكْ تَ يعَمّذْكن بْروُح القدسْ والنّارْ،
\v 12 هاكْ لَ رَفشو ف ايدو وينَقّي بيدَرو، ويلمّ الحنْطَة لَمَخازنو والتّبنْ يحْرقو بْنار موُ تنْطفي.“
\s يوحَنّا يعَمّذ يَسوُعْ
\r (مرقس 1‏:9‏–11، لوقا 3‏:21‏–22)
\p
\v 13 هاك الوَقْتْ جا يَسوُعْ م الجَّليلْ للارْدنْ لَ عَنْدْ يوحَنّا تَ يتْعَمَّذ منّو.
\v 14 بَسْ يوحَنّا ما خَلّاهُ، وْقالْ: ”أَنا بْحاجتكْ تَ تْعَمّذْني وانْتَ تجي لَعنْدي؟“
\v 15 يَسوُعْ جاِوَبو قالْلو: ”خَلّي السَّعْ، منْ لَ كذاِ لازم نْتَمّمْ كلْ بر.“ وْهاك الوَقْتْ خَلّاهُ.
\v 16 وَقْتْ لَ تْعَمَّذْ يَسوُعْ، راساً طَلَعْ م المَي وانْفَتَحْتْلو السَّما، وَارى روُح اَلله ناِزْلِة كَما الحَمامِة وْجَتْ عَلَيو.
\v 17 وْجا صَوت م السَّما يقولْ: ”هذا واِ ابْني الحَبيبْ لَ فِيو فرحْتُ.“
\c 4
\s إبْليس يجَرّب يَسوُعْ
\r (مرقس 1‏:12‏–13، لوقا 4‏:1‏–13)
\p
\v 1 هاك الوَقْتْ، يَسوُعْ انْساق بْروُح القدسْ للبَرّيِّة تَ يتْجَرَّبْ منْ إبْليسْ.
\v 2 وصامْ أَرْبْعينْ يَومْ وَارْبْعينْ لَيلِة، وْف الآِخرْ جاعْ.
\v 3 وْقَرَّبْ هاكْ لَ يجَرّب وْقالْلو: ”لَ ابْن اَلله أنْتَ، قَول تَ تْسيِرْ هَالحجاِير غْبَيزْ.“
\v 4 وْهوّاِ رَدّ وْقالْلو: ”مَكْتوبْ: ’موُ بالّغْبَيزْ بَسّ يعيش الانْسانْ، بَلىِ بْكلْ كلْمِة تطْلَعْ منْ ثمّ اَلله.‘“
\p
\v 5 وْوَدّاهُ إبْليسْ لَ بَلَدْ القدس، وْوَقَّفوا عَلى كتْف الهَيكَلْ،
\v 6 وْقالْلو: ”لَ ابْن اَلله أنْتَ، كبْ حالكْ لَتَحْتْ، منْ لَ مَكْتوُبْ واِ: ’يوَصّي مَلايكتو عَلَيك، وْعَلى ايدَينْ يحْملوك، بْشانْ لا تتْعَثوَرْ فَ حَجَر اجْركْ.‘“
\v 7 يَسوُعْ قالْلو: ”مَكْتوبْ زاِ: ’لا تْجَرّب الرَّبْ إلهكْ.‘“
\p
\v 8 وْوَدّاهُ إبْليسْ لَ جَبَلْ عاِلي كْثير، وْوَرّاهُ كلْ مَماِلك الدّنْياِ وْعَظامتا
\v 9 وْقالْلو: ”هَوذْ كلّنْ تَ اعْطيكْ ناِ لَ وَقَعتْ سَجَدْتْ لي.“
\v 10 هاك الوَقْتْ يَسوُعْ قالْلو: ”روُحْ يا شيِطانْ: مَكْتوبْ: ’للرَّبْ إلهكْ تسْجد وْلهُ بْوَحْدو تعْبدْ.‘“
\p
\v 11 هاك الوَقْتْ خَلّاهُ إبْليس، وْمَلايكِة قَرَّبوا وْبَقى يخْدموهُ.
\s يَسوُعْ يبَشّر ف الجَّليلْ
\r (مرقس 1‏:14‏–15، لوقا 4‏:14‏–15)
\p
\v 12 وْلَمَنْ يَسوُعْ سمعْ يوحَنّا تْسَلَّم، خَلّى وْراحْ للجَّليلْ.
\v 13 وعاف النّاصْرَة وْجا سَكَن فَ كَفَرْناحومْ عَلى شاطي البَحرْ ف حْدود زَبوُلوُن وْنَفْتالي،
\v 14 تَ يتمْ شي لَ انْقالْ باِشعْيا النَّبي لَ قالْ:
\v 15 ”أَرْضْ زَبوُلوُن وَارْضْ نَفْتالي، طَريِق البَحرْ، خَلْفْ نَهْر الارْدنْ، جَليل الامَمْ!
\v 16 شَعْب القاِعدْ ف العتْمِة، نورْ قَوي أَرى، القاِعْدين فَ اَرْض المَوت وْفَيّاتو، نورْ نَوَّرْ عَلَينْ.“
\p
\v 17 ومناك الوَقْتْ، بَدا يَسوُعْ يكْرزْ ويقولْ: ”توبوا، منْ لَ قَرَّب مَلَكوت السَّماواتْ.“
\s أَوَّل النّاِسْ لَ ساحنْ يَسوُعْ //تَ يسيِرونْ تَلاميذو
\r (مرقس 1‏:16‏–20، لوقا 5‏:1‏–11)
\p
\v 18 وَقْتْ لَ كانْ يَسوُعْ يمْشي عَلى شاطي بَحْر الجَّليلْ، أَرى اثْنَينْ اخْوِة: شَمْعون لَ تْسَمّى بطْرسْ وَانْدَراوُسْ أَخوهُ ينَزْلون الشَّبَكاتْ ف البَحرْ، منْ لَ صيّاِدينْ كانوا.
\v 19 وْقالْلنْ يَسوُعْ: ”تَعوا خَلْفي، تَ اسَويكنْ صيّاِدينْ ناِسْ.“
\p
\v 20 وْهنّاِ راساً عافوا شَبَكاتنْ وْراحوا خَلْفو.
\v 21 وْلَمَنْ قَطَعْ منَونَكْ، أَرى اثْنَينْ اخْوِة غَيرنْ: يَعْقوب ابنْ زَبَدي وْيوحَنّا أَخوهُ ف السَّفّينِة مَع زَبَدي أَبوون يصَلحونْ شَبَكاتنْ. وساحْنْ يَسوُعْ.
\v 22 وْهنّاِ راساً عافوا السَّفّينِة وَابوون وْراحوا خَلْفو.
\s يَسوُعْ يعَلّم وْيشْفي مَراضىِ
\p
\v 23 وْيَسوُعْ كانْ يروُح وْيجي ف كلّ الجَّليلْ، يعَلّمْ ف مجاِمعنْ، وْيكْرزْ ببْشارة المَلَكوتْ، وْيشْفي كلْ وَجَع وْمَرَضْ ف الشَّعْبْ.
\v 24 وانْسَمَعْ خَبَرو ف كلْ سوريّا، وْجابولو كلّ الّمْوَجَّعينْ بامْراضْ مخْتلفِة، والّمْعَذَّبينْ منْ شَياطينْ، والّمْصَرَّعينْ والّمْكَرْسَحين، وْشَفاهنْ.
\v 25 وْراحْ خَلْفو ناِس كْثيرْ م الجَّليلْ، وْم العَشرْ مدن، وْم القدْسْ، والياهوديِّة، وْخَلْف نَهْر الارْدنْ.
\c 5
\s وَعظَة يَسوُعْ عَ الجَّبَلْ
\p
\v 1 وْلَمَنْ أَرى يَسوُعْ لَمّات النّاِسْ، طَلَعْ للجَّبَلْ. وْلَمَنْ قعدْ، قَرَّبوا لَ عَنْدو تَلاميذو،
\v 2 وْفَتَح ثمّو يعَلّمنْ، قالْ:
\s السَّعادِة الحَقيقيِّة
\p
\v 3 ”هَنيّة المحْتازينْ لَالله بالرّوُحْ: لهنْ واِ مَلَكوت السَّماواتْ.
\v 4 هَنيّة الحَزانىِ: هنّاِ تَ يتْعَزَّونْ.
\v 5 هَنيّة المتْواضْعينْ: هنّاِ تَ يورَثون الاَرْضْ.
\v 6 هَنيّة الجَّواعىِ والعَطاشيِ للبرْ: هنّاِ تَ يشْبَعونْ.
\v 7 هَنيّة الرَّحومينْ: عَلَينْ تَ تْكونْ الرَّحْمِة.
\v 8 هَنيّة لَ قَلْبنْ طاهرْ: هنّاِ تَ يرَون اَلله.
\v 9 هَنيّة لَ يسَون سَلام: اولاد اَلله تَ يتْسَمَّونْ.
\v 10 هَنيّة لَ ينْطهْدونْ لَخاطرْ البرْ: لهنْ واِ مَلَكوت السَّماواتْ.
\p
\v 11 ”هَنيّتكنْ لَمَنْ يهينوكن وْيضْطهْدوكنْ ويقولونْ عَلَيكنْ كلْ كلْمِة عاطْلِة بالگذْبْ لَخاطري.
\v 12 هاك الوَقْتْ افْرَحوا وْهَلْهلوا، منْ لَ أَجرْكن گْبير واِ ف السَّماواتْ، منْ لَ كذاِ اضْطَهَدوا الاَنْبِيا قَبلْكنْ.
\p
\v 13 ”أنْتنْ واِ ملْح الاَرْضْ. لَ صارْ الملْحْ بَلا طَعْمِة بَلا فَكاهَة، فَ أَيشْ تَ يتْمَلَّحْ؟ لَ شي موُ ينْفَعْ غَيرْ تَ ينْكَبْ بَرّا وْينْداسْ م النّاِسْ.
\v 14 أنْتنْ واِ نور الدّنْياِ. موُ تْتيِقْ تتْخَبّا مَدينِة مْعَمَّرَة عَلى جَبَلْ.
\v 15 وْموُ يشعلون سْراجْ ويحطّوهُ تَحْتْ كَيلْ، بَلىِ عَلى كرْسي الضَّو ويضَوّي لَ كلْ لَنّاِ ف البَيتْ.
\v 16 كذاِ خَلّي يضَوّي ضَوكنْ قدّام النّاِسْ، تَ يرَون اعْمالْكن الصّالحَة ويسَبْحونْ لاَبوكنْ لَ ف السَّماواتْ.
\s راي المَسيحْ ف النّاموسْ
\p
\v 17 ”لا تفْتكْرونْ جيتُ تَ ابَطّل النّاموسْ يا الاَنْبِيا. ما جيتُ تَ ابَطّلْ، بَلىِ تَ اتَمّمْ.
\v 18 الحَقْ أَقولْكنْ: دي لَمَنْ تْزول السَّما والاَرْضْ، نقْطَة وحْدِة يا شَخْطَة موُ تزولْ م النّاموسْ دي لَمَنْ الكلّ يتمْ.
\v 19 بَقى كلْ منْ يبَطّلْ وحْدِة منْ هَالوَصيّات الّزْغار، وْكذاِ يعَلّم النّاِسْ، ناقصْ تَ يتْسَمّى فَ مَلَكوت السَّماواتْ. بَسْ كلْ واِحدْ يعْمَلْ ويعَلّمْ، هاذْ گْبير تَ يتْسَمّى فَ مَلَكوت السَّماواتْ.
\v 20 منْ لَ اقولْكنْ: لَ موُ يكثَرْ برْكنْ أَكْثَرْ منْ برّ مْعَلمين النّاموسْ والفَرّيسيِّة، موُ تدْخلونْ مَلَكوت السَّماواتْ.
\s الغَضَب
\p
\v 21 ”سمعْتن انْقالْ لَ ناِس الاَوَّلْ: لا تقْتلْ! وَاينا لَ يقْتلْ يسْتَحقّ الحكمْ.
\v 22 بَسّ اَنا أَقولْكنْ: كلْ واِحدْ يغْضَبْ عَلى أَخوهُ بَلا سَبَبْ يقَعْ تَحْت الحكمْ. وْلَ يقلْلو: ’راقا،‘ يسْتَحقْ حكم المَجْمَع، وْلَ يقول ’اَحْمَقْ،‘ يسْتَحقّ جْهَنَّم النّارْ.
\v 23 بَقى لَ جبْتْ قَرْبانكْ للمَذْبَح، وْهَونَكْ جا لَ بالكْ أَخوكْ لَ كلْبَقى فَ قَلْبو منّكْ،
\v 24 خَلّي قَرْبانكْ هَونَكْ قدّام المَذْبَح، وْروُح ف الاَوَّل تْصالَحْ مَع اَخوك، وْبَعْدا تَعا قَدّمْ قَرْبانكْ.
\v 25 خَفيفْ اتّفقْ مَع المدّعي عَلَيكْ وانْتَ بَعدْ مَعو ف الطَّريِقْ، بْشانْ لا يسَلّمك المدّعي للقاضي، والقاضي يسَلّمكْ للجّابي، وْتقَعْ ف الحَبْسْ.
\v 26 الحَقْ أَقولْ لكْ: موُ تطْلَعْ منْ هَونَكْ لَ موُ تعْطي آِخرْ فلْسْ عَلَيكْ.
\s الزّنىِ
\p
\v 27 ”وْسمعْتن انْقالْ: ’لا تزْني.‘
\v 28 بَسّ اَنا أَقولْكنْ: كلْ واِحدْ يطَلّعْ فَ مَرَة تَ يشْتهِيا، راساً يزْني فَ قَلْبو.
\v 29 بَقى لَ كانْ عَينك اليَمين تْعَثورك، اقْلَعا وْكبّا لَبْعيدْ منّكْ، منْ لَ أَحْسَنْ لك واِ يتْتَوبَلْ عضو واِحدْ منْ جَسَدك، وْلا جَسَدكْ كلّو يقَعْ ف جْهَنَّمْ.
\v 30 وْلَ كانْ ايدك اليَمين تْعَثْورك، اقْطَعا وْكبّا منّكْ، منْ لَ أَحْسَنْ لك يتْتَوبَلْ عضو واِحدْ منْ جَسَدك وْلا جَسَدك كلّو يقَعْ ف جْهَنَّمْ.
\s الطَّلاق
\p
\v 31 ”وانْقالْ: ’لَ يطَلّقْ مَرَتو، لازمْ يعْطِيا كْتاِبْ طَلاقْ.‘
\v 32 بَسّ اَنا أَقولْكنْ: كلْ منْ يطَلّقْ مَرَتو لَسَبَبْ غَير الزّنىِ، يسَوَيا تَ تزْني. وْلَ ياخذ مْطَلَّقَة يزْني.
\s الحلفان خَطيِّة
\p
\v 33 ”وْسمعْتن انْقال لَ ناِس الاَوَّلْ: ’لا تحْلف وْترْجَع ف حلْفانكْ، لازم تْسَي للرَّبْ شي لَ حَلَفْتْ تَ تْسَي.‘
\v 34 بَسّ اَنا أَقولْكنْ: لا تحْلفونْ أَبَدْ، لا بالسَّما منْ لَ كرْسي اَلله ياِ،
\v 35 وْلا بالاَرْضْ منْ لَيّاِ موُضَعْ دَوسة اجْرَيو، وْلا بالقدْسْ منْ لَيّاِ مَدينة المَلكْ العَظيمْ.
\v 36 وْلا بْراسكْ تحْلفْ، منْ لَ موُ تْتيِق تْسَي فِيو شَعْرَة وحْدِة سَودا يا بَيضا.
\v 37 خَلّي كَلامْكن يكون ’أيِ أيِ.‘ يا ’لا لا.‘ وْشي لَوّاِ أَكْثَرْ منْ هَوذْ م الشَّرّيرْ واِ.
\s أَخذ الحَيف
\r (لوقا 6‏:29‏–30)
\p
\v 38 ”سمعْتن انْقالْ: ’عَين بْعَين وْضرْس بْضرْسْ.‘
\v 39 بَسّ اَنا أَقولْكنْ: لا تْقومونْ ف وچّ الشَّرّيرْ. لَ يضْرَبكْ عَلى خَدّك اليَمينْ، ديرلو اللاخْ زاِ.
\v 40 وْلَ يريدْ يوَدّيك للمَحْكَمِة بْشان يشَلّحكْ قَميسكْ، عَبايتكْ زاِ خَلّيلو ياِ.
\v 41 منْ لَ يسَخّركْ ميلْ واِحدْ، روُحْ مَعو اثْنَينْ.
\v 42 منْ لَ يطْلبْ منّك، اعْطِيو. وْلَ يريدْ يتدَيَّنْ منّكْ، لا تْردّو.
\s محَبّة العَدو
\r (لو 6‏:27‏–28 و32‏–36)
\p
\v 43 ”سمعْتن انقالْ: ’حبْ قَرايبك وابْغَضْ عَدوكْ.‘
\v 44 بَسّ اَنا أَقولْكنْ: حبّوا عدْوانْكنْ، باِرْكوا عَلى لَ يتْنَعّلْ عَلَيكنْ، وْسَوَوا كْوَيّسْ لَهاذْ لَ يبْغَضْكن، وْصَلَّوا بْشانْ هَوذْ لَ يغْصبوكن وْيضْطهْدوكنْ،
\v 45 بْشان تْكونون اولادْ أَبوكن السَّماوي هاكْ لَ يخَلّي شَمْسو تزْرقْ عَ الصالْحينْ والطّالْحينْ، وينَزّلْ مَطَرو عَ البارّينْ والآثْمينْ.
\v 46 بَقى لَ كان تْحبّونْ هَوكْ لَ يحبّوكنْ، أَيشْ أَجرْ لكنْ؟ موُ كْوا لَ يلمّون الضَّرايبْ زاِ هاي نَفْسا يسَونْ؟
\v 47 وْلَ كان تْسَلْمونْ عَلى أخوتْكنْ بَسْ، أَيشْ زاِيدْ فوُق العادِة تْسَونْ؟ موُ كْوا هَوكْ لَ يلمّون الضَّرايب زاِ هاي نَفْسا يسَونْ؟
\v 48 بَقى أنْتنْ كونوا كامْلينْ كَما لَوّاِ أَبوكن السَّماوي كاملْ.
\c 6
\p
\v 1 ”طَلْعوا لَسَدَقتْكنْ، لا تْسَوا قدّام النّاِسْ لَخاطرْ يرَوكن، والّا واِ أَجرْ ما لكنْ عنْد اَبوكن لَ ف السَّماواتْ.
\v 2 بَقى أَيمَتْ لَ سَيتْ سَدَقَة، لا تْخَلّي يدقّونْ زرْنايِة قدّامكْ، كَما لَ يسَون هَوك الّمْنافْقينْ ف المجاِمعْ والطّرْقْات بْشانْ يوصفوون النّاِسْ. الحَقْ أَقولْكنْ: هَوكْ أَخَذوا أَجْرنْ.
\v 3 بَسّ انْتَ وَقْتْ لَ تْسَي سَدَقَة، لا تْخَلّي شْمالك تعْرفْ أَيشْ تْسَي يَمينكْ.
\v 4 بْشان تْكونْ سَدَقتك بالخفْيِة، وَابوكْ لَ يرى أَيشْ يسيِر بالخفْيِة، هوّاِ تَ يكافيكْ قدّام العَينْ.
\s الصَّلاة والصَّوم
\r (لوقا 11‏:2‏–4)
\p
\v 5 ”وْلَمَنْ تْصَلَّي لا تْكونْ كَما الّمْنافْقينْ لَ يحبّون يقمون يصَلَّونْ ف المجاِمع وْقَراني الطّرْقْات بْشان يرَوون النّاِسْ. الحَقّ اَقولْكنْ هَوك أَخَذوا أَجْرنْ.
\v 6 بَسّ انْتَ أَيمَتْ لَ صَلَّيت، ادْخل لَ أوُدتكْ واقْفل البابْ عَلَيك، وْصَلّي لاَبوكْ لَ ف الخفْيِة، وَابوك لَ يرى أَيشْ يسيِرْ ف الخفْيِة، هوّاِ تَ يكافيك اَشكَرا قدّام العَينْ.
\v 7 وْلَمَنْ تْصَلَّونْ، لا تْطَولونْ كَلامْ فاضي كَما الوَثَنيِّة لَ يقولونْ بَلْكي بْكثْرة الكَلامْ ينْسمعْلنْ.
\v 8 بَقى لا تتْشَبَّهونْ فِينْ، منْ لَ يعْرفْ أَبوكنْ أَيشْ يلْزَمْكنْ قَبلْ لَ تطْلبونْ منّو.
\s صَلاة الأبانا
\p
\v 9 ”كذاِ بَقى صَلَّوا أنْتنْ: أَبونا لَ ف السَّماواتْ! يتقَدَّس اسْمكْ،
\v 10 يجي مَلَكوتك، تْكونْ مَشيّتكْ، كَما لَيّاِ ف السَّما نَفس الشِّي عَ الاَرْضْ.
\v 11 اعْطينا غْبَيزْ لَ يكْفينا اليَومْ.
\v 12 وسامحْنا عَلى ذْنوبْنا كَما لَ نحْناِ زاِ سامَحْنا غَيرنْا عَلى ذْنوبنْ فَ حَقْنا.
\v 13 وْلا تْدَخّلْنا فَ تَجرِبِة، بَلىِ نَجّينا م الشَّرّيرْ، منْ لَ لكْ واِ الملكْ والقوِّة والتَّسْبِحَة لَ أَبَدْ الآبْدينْ.
\p
\v 14 ”بَقى لَ سامَحْتن النّاِسْ عَلى ذْنوبنْ، أَبوكن السَّماوي زاِ تَ يسامحْكنْ.
\v 15 بَسْ لَ ما سامَحْتن النّاِسْ، أَبوكنْ زاِ موُ يسامحْكنْ عَلى ذْنوبْكنْ.
\p
\v 16 ”وْوَقْتْ لَ تْصومون لا تْكنونْ عَبوسينْ كَما الّمْنافْقينْ لَ يقْلبونْ وچّن بْشان يوَرَّونْ روُحنْ للنّاِسْ صايمينْ ناِ. الحَقْ أَقولْكنْ هَوكْ أَخَذوا أَجْرنْ.
\v 17 أنْتَ وَقْتْ لَ تْصومْ، خَسّلْ وچّكْ وامْشَحْ راسكْ بالعطرْ،
\v 18 بْشانْ لا تْبَيّنْ لأحَّدْ صايمْ غَيرْ لاَبوكْ لَ ف الخفْيِة، وَابوكْ لَ يرى ف الخفْيِة، هوّاِ تَ يكافيكْ.
\s الزَّنگنِة
\r (لوقا 12‏:33‏–34)
\p
\v 19 ”لا تكْنزولْكن كْنوزْ ف الاَرْضْ، موُضَعْ لَ سوس وْآِكلِة يخَرْبون، وْحَراميِّة ينْقبون وْيشْبطونْ.
\v 20 بَلىِ اكْنزولْكن كْنوزْ ف السَّما، موُضَعْ لَ ما في لا سوسْ تَ يسَوّسن وْلا آِكْلِة تَ تاكلن، وْلا حَراميِّة تَ تنْقب وْتشْبطنْ.
\v 21 منْ لَ موُضَعْ لَوّاِ كَنْزْكنْ، هَونَكْ واِ قَلْبْكنْ زاِ.
\s ضَوّ الجَّسَدْ
\r (لوقا 11‏:34‏–36)
\p
\v 22 ”سْراج الجَّسَدْ ياِ العَينْ. بَقى لَ كانتْ عَينكْ بَسيطَة، جَسَدكْ كلّو زاِ ضَوي يكونْ.
\v 23 وْلَ كانتْ عَينكْ شَرّيرَة، جَسَدك كلّو عتْمِة يكونْ. بَقى لَ كانْ ضَو لَ فيكْ عتْمِة، عتْمتكْ أَشْقَدْ تَ تْكونْ؟
\s اَلله والمال
\r (لو 12‏:22‏–31 و16‏:13)
\p
\v 24 ”أحَّدْ موُ يتيِقْ يخْدمْ سَيّدَينْ، يا يكْرَهْ واِحدْ ويحبّ اللاخْ، يا يحْترمْ واِحدْ وْيحْتقرْ اللاخْ. موُ تْتيِقونْ تتْعَبَّدونْ لَالله والمالْ.
\v 25 منْ هاي أَقولْكنْ: لا تنْهَمّونْ لَ نَفسْكنْ أَيشْ تاكْلون وَايشْ تشْرَبون، وْلا لَ جَسَدْكنْ أَيشْ تلْبسونْ. لَيشْ النَّفس موُ أَحْسَنْ م الاَكلْ ياِ، والجَّسَدْ م اللبْسْ؟
\v 26 طَلْعوا ف طْيوُر السَّما، لا يزْرَعون وْلا يحْصدون وْلا يخْزنونْ، وَابوكن السَّماوي يرْزقنْ أَكْلنْ. وْموُ كْوا أنْتن أَحْسَنْ منّنْ انْتنْ؟
\v 27 وْمنْ واِ منْكنْ وَقْتْ لَ ينْهَمّ يتيِقْ يزيدْ عَلى قامتو ذْراع واِحدْ يا عَلى عمْرو شْوَيِّة وَقْتْ؟
\v 28 وهَمّ اللبْسْ لَيشْ تاكْلونْ؟ طَلْعوا زْهوُر البَرّيِّة أَشْوَنْ يگْبَرونْ، لا يتْعَبون وْلا يغْزلونْ.
\v 29 أَقلْكن: وْلا سْليِمانْ ف كلْ عزّو لبسْ كَما وحْدِة منّنْ.
\v 30 بَقى لَ حَشيش الچّوُل لَوّاِ اليَومْ وْغَداِ يقَعْ ف التَّنّوُر اَلله كذاِ يلَبّسو، أنْتنْ موُ اَفْرَضْ بكْثيرْ أنْتنْ يا قَليلين ايمانْ؟
\v 31 بَقى لا تاكْلونْ هَمْ وتْقلونْ: ’أَيشْ تَ ناكلْ وَايشْ تَ نشْرَبْ وَايشْ تَ نلْبسْ؟‘
\v 32 هَالمَسايلْ كلّا أمَم الدّنْياِ الوَثَنيِّة يطْلبووا، بَسْ أنْتنْ أَبوكن السَّماوي يعْرفْ لكنْ زاِ تلْزَمْ هاي كلا.
\v 33 اطْلبوا قَبلْ كلْ شي مَلَكوت اَلله وْبرّو، وْهاي كلّا تَ تنْزاد لْكنْ.
\v 34 لا تاكْلونْ هَمْ غَداِ. غَداِ ياكلْ هَمْ روُحو: اليَومْ شَرْ لَ فِيو يكْفيو.
\c 7
\s الحكمْ عَ النّاِسْ
\r (لوقا 6‏:37‏–38 و41‏–42)
\p
\v 1 ”لا تحْكمونْ عَلى أحَّدْ، موُ ينْحكمْ عَلَيكنْ:
\v 2 بْحكمْ لَ تحْكمونْ ينْحكمْ عَلَيكنْ، وبْكَيلْ لَ تْكيلونْ ينْكال لْكنْ.
\v 3 لَيشْ ترى القصْلايِة لَ فَ عَينْ أَخوك، وْقرْمة لَ فَ عَينكْ موُ تْفَسّرْ؟
\v 4 وَاشْوَن تْقول لاخوكْ: ’خَلّي تَ اطاِلع القصْلايِة منْ عَينك.‘ وْهاي قرْمِة فَ عَينكْ؟
\v 5 يا مْنافقْ، طاِلعْ أَوَّلْ شي القرْمِة منْ عَينك، وْهاك الوَقْتْ تَ تْفَسّر تْطاِلع القصْلايِة منْ عَينْ أَخوكْ.
\p
\v 6 ”لا تعْطَونْ شي لَوّاِ مْقَدَّسْ للْكلْاِب، وْلا تْكبّونْ جَواهرْكنْ قدّام الخناِزير بْشانْ لا يدَوسوونْ باجْرَين، وْينْدارون يشَطْفوكنْ.
\s اطْلبوا تنعَطَون
\r (لوقا 11‏:9‏–13)
\p
\v 7 ”اطْلبوا، تنْعَطَونْ. دَوروا، ترَونْ. دقّوا، ينْفتح لْكنْ:
\v 8 كلْ واِحدْ لَ يطْلبْ، ياخذ. وْلَ يدَوّرْ، يرى. وَاينا لَ يدقْ ينْفتحْلو.
\v 9 والّا أَينا زَلَمِة واِ منْكنْ يطْلبْ منّو ابْنو غْبَيزْ، ويروُح يناِولو حَجَرَة؟
\v 10 وْلَ طَلَبْ منّو سَمَكِة، حَيِّة يناِولو؟
\v 11 بَقى لَ كنْتنْ أنْتنْ لَ شَرّيرين أنْتنْ تعْرفونْ تعْطَونْ لاولادْكنْ عَطيّاتْ خَيرْ، أَشْقَدْ بَقى بالاَكْثَرْ أَبوكن السَّماوي يعْطي خَيراتْ لَوذْ لَ يطْلبونْ منّو.
\v 12 كلْ شي لَ تْريدونْ تَ يسَولْكن النّاِسْ، كذاِ أنْتنْ زاِ سَولنْ، منْ لَ هاي ياِ النّاموسْ والاَنْبِيا.
\s باب الذَّيّق
\r (لوقا 13‏:24)
\p
\v 13 ”ادْخلوا منْ باب الذَّيّقْ، منْ لَ عَريِضْ واِ الباب، وْوَسيِعْ واِ الطَّريِقْ لَ يوَدّي للتَّوبَلِة، وكْثيرْ ناِ هَوذْ لَ يروُحونْ فِيو.
\v 14 أَيشْ بابْ ذَيّق وْطَريِقْ ذَيّقْ صَعْبْ هاذْ لَ يوَدّي للحَياة، وقْلَيلْ ناِ هَوذْ لَ يرَوهُ.
\s منْ ثَمَرن تعْرفوون
\r (لوقا 6‏:43‏–44)
\p
\v 15 ”بالْكنْ وايّاكنْ م الاَنْبِيا الگذّاِبينْ لَ يجَوكنْ ف لبْسْ خواِريفْ، بَسْ منْ جَوّا ذْيوبِة مفْترْسِة ناِ.
\v 16 منْ ثَمَرنْ تعْرفوونْ. لَيشْ يقْطفونْ م الشَّوكْ عنبْ؟ والّا م القَرْطَبْ تينْ؟
\v 17 وْكذاِ كلْ سجَرَة طَيبِة، ثَمَرْ كْوَيّس تْسَي، وْسجَرَة الرَّديِّة، ثَمَرْ رَدي تْسَي.
\v 18 سجَرَة الطَّيبِة موُ تْتيِق تْسَي ثَمَرْ رَدي، وْلا سجَرَة الرَّديِّة ثَمَرْ طَيّبْ.
\v 19 كلْ سجَرَة موُ تْسَي ثَمَرْ طَيّبْ، تنْقطع وْتقَعْ ف النّارْ.
\v 20 بَقى منْ ثَمَرنْ تعْرفوونْ.
\s بالاعْمال موُ بالكَلامْ
\r (لوقا 13‏:25‏–27)
\p
\v 21 ”موُ كلْ لَ يقولْ لي: ’يا رَبْ، يا رَبْ،‘ يدْخلْ مَلَكوت السَّماواتْ، بَلىِ لَ يسَي إرادة أَبوي لَ ف السَّماواتْ.
\v 22 كْثيرْ تَ يقلولي فاك اليَومْ: ’يا رَبْ، يا رَبْ، موُ باسْمك تْنَبَّينا؟ وْباسْمكْ شَياطينْ طاِلَعْنا؟ وْباسْمكْ عَجايبْ كْثيرْ سَوَينا؟‘
\v 23 وْهاك الوَقْتْ تَ اقللن بْصَراحَة: أَبَدْ ما عَرَفْتوكنْ. بَعْدوا منّي يا عَبيد الإثمْ!
\s مَثَل البَيتين
\r (لوقا 6‏:47‏–49)
\p
\v 24 ”بَقى كلْ لَ يسْمَعْ كَلامي هاذْ ويسَيو، يشْبَه زَلَمِة حَكيمْ بَنى بَيتو عَلى كافْ حَجَرْ.
\v 25 وْنزل المَطَر وْجَوا الّنْهوُرَة وْقامْ الهَوا والقلْعان، وْضَرَبوا هاك البَيتْ، وْما وَقَعْ، منْ لَ أَساساتو عَلى كافْ حَجَرْ كانْ ك انْحَطّتْ.
\v 26 وْكلْ منْ لَ يسْمَعْ كَلامي هاذْ وْموُ يسَيو، يشْبَه زَلَمِة غَشيمْ عَمَّرْ بَيتو عَ الرَّملْ.
\v 27 وْنزل المَطَر وْجَوا الّنْهوُرَة وْقامْ الهَوا والقلْعان، وضَرَبوا هاك البَيتْ، وْوَقَع، وْوَقْعتو كات گْبيرِة.“
\v 28 وَقْتْ لَ خَلَّصْ يَسوُعْ كَلامو هاذْ، مَبْهوُتين كانوا لَمّات النّاِسْ منْ تَعْليمو.
\v 29 منْ لَ كانْ يعَلّمنْ كَما واِحدْ صاحبْ سلْطَة، موُ كَما مْعَلمين النّاموسْ تَبَعنْ والفَرّيسيِّة.
\c 8
\s شفا الاَبْرَصْ
\r (مرقس 1‏:40‏–45، لوقا 5‏:12‏–16)
\p
\v 1 وْلَمَنْ نزلْ م الجَّبَلْ، ناِس كْثير قَفلاتْ قَفلاتْ مشْيوا خَلْفو.
\v 2 والّا واِحدْ اَبْرَصْ جا سَجَدْلو، وْقالْ: ”سَيّدي! لَ رَدْت تْتيِق تْطَهّرني منْ بَرَصي.“
\v 3 وْمَدّ ايدو يَسوُعْ وْجَسّو، وْقالْ: ”أَريد، اطْهَرْ!“. وْفَ ساعتا طهرْ منْ بَرَصو.
\v 4 وْيَسوُعْ قالْلو: ”بالكْ وايّاك تْقولْ لاَحَّدْ. بَلىِ روُحْ رَوّي روُحكْ للكَهَنَة، وْقَدّم قرْبانْ كَما لَ وَصّى موسى، تَ يكونْ شَهادِة عنْدنْ.“
\s شفا غلام الضّابط
\r (لوقا 7‏:1‏–10، يوحنّا 4‏:43‏–54)
\p
\v 5 وَقْتْ لَ دَخَلْ يَسوُعْ لَ كَفَرْناحومْ، قَرَّبْ لَعنْدو ضابطْ وتْوَسَّلْلو
\v 6 وْقالْلو: ”سَيّدي، غْلامي واقعْ ف البَيتْ ومْكَرْسَحْ وكْثيرْ كْثيرْ يتْوَجَّعْ.“
\v 7 يَسوُعْ قالْلو: ”اَنا تَ آجي أَشْفِيو.“
\v 8 رَدْ هاك الضّابط وْقالْلو: ”سَيّدي، أَنا موُ اسْتاِهلْ تدْخلْ تَحْتْ سَقْفْ بَيتي. بَلىِ بَسْ كلْمِة قَولْ، تَ يتْعَدَّل غْلامي.
\v 9 منْ لَ انا زاِ زَلَمِة مامورْ حكومِة تَحْت سلْطَة اَنا، وفي تَحْت ايدي عَسْكَرْ: أَقولْ لاذْ: ’روُح‘ يروُح وْللاخْ: ’تَعانْ‘ يجي، وْلَعَبْدي: ’سَي هاي‘ ويسَي.“
\v 10 وَقْتْ لَ سمعْ يَسوُعْ، تْعَجَّب، وْقالْ للجّاِيينْ مَعو: ”الحَقْ أَقولْكنْ: وَلا ف اسْرائيلْ أَرَيتُ كَما هَالايمانْ.
\v 11 بَقى أَقولْكنْ: كْثير تَ يجَونْ م الشَّرقْ وْم الغَرب وْينْتَكَونْ مَع ابْراهيمْ واسْحاق وْيَعْقوبْ فَ مَلَكوت السَّماواتْ.
\v 12 واولاد المَلَكوتْ تَ يطْلَعونْ لَ العتْمِة البرّانيِّة. هَونَكْ تَ يكون البكا وْسَكّ الاضْراسْ.“
\v 13 وْقالْ يَسوُعْ لاك الضّابطْ: ”روُحْ، كَما لَ آمَنْتْ، خَلّي يكونْ لكْ.“ وْف ساعتا تْعَدَّل غْلامو.
\s يَسوُعْ يشْفي حَماِة بطْرسْ
\r (مرقس 1‏:29‏–34، لوقا 4‏:38‏–41)
\p
\v 14 وْجا يَسوُعْ لَ بَيتْ شَمْعونْ، وَارى حَماِتو مْشَطَّحَة كلْمسْكتا حمِّة.
\v 15 وجَسّ ايدا، وْفَلَّتتا الحمِّة. وْقامْ تْ تخْدمنْ.
\v 16 وَقْتْ لَ صارتْ المَسا جابوا لَ قدّامو كْثيرْ منَوذْ لَ فِينْ شَياطينْ، و طاِلع شَياطينن بْكلْمِة، وْكلّ المَراضىِ شَفاهنْ.
\v 17 تَ يتمْ شي لَ انْقالْ باِشعْيا النَّبي لَ قالْ: ”هوّاِ ياخذ اوجاعْنا وامْراضْنا يشيلا.“
\s يَسوُعْ وهَالدّنْياِ
\r (لوقا 9‏:57‏–62)
\p
\v 18 وَقْتْ لَ ارى يَسوُعْ لَمّاتْ ناِس گْبيرِة حَولو حَوالَيو، أَمَرْ تَ يقْطَعون البَحرْ لَ صوُب اللاخْ.
\v 19 وْقَرَّبْ واِحدْ منْ مْعَلْمين النّاموسْ وْقالْلو: ”مْعَلّمْ! تَ آجي خَلْفكْ لاَينْ لَ تْروُحْ.“
\v 20 يَسوُعْ قالْلو: ”الثّعاِلبْ لهن جْحوُرَة، وطْيوُر السَّما عْشوشِة، بَسّ ابْن الانْسانْ مالو موُضَعْ تَ يسْندْ راسو.“
\v 21 واِحدْ لخْ منْ تَلاميذو قالْلو: ”سَيّدي، اعْطيني أذنْ تَ اروُحْ أَوَّلْ شي أَقبر اَبوي.“
\v 22 يَسوُعْ قالْلو: ”تَعانْ خَلْفي وْعيف المَيتينْ يقْبرونْ مَيتيننْ.“
\s يَسوُعْ يهَدّي الزَّوبَعَة
\r (مرقس 4‏:35‏–41، لوقا 8‏:22‏–25)
\p
\v 23 وَقْتْ لَ طَلَعْ يَسوُعْ للسَّفّينِة، طَلَعوا مَعو تَلاميذو.
\v 24 وْف البَحرْ قامْ عَلَينْ هَوا وْقلْعانْ، والمَوجْ كانْ يغَطّي السَّفّينِة، بَسْ يَسوُعْ ناِيمْ كانْ.
\v 25 وْقَرَّبوا تَلاميذو يقاِعْدوهُ م النَّومْ، ويقولونْ: ”سَيّدْنا، نَجّينا! وَقْتْ ونتْتَوبَل.“
\v 26 يَسوُعْ قالْلنْ: ”لَيشْ خَوّيفين انْتنْ يا قَليلين ايمانْ؟“ هاك الوَقْتْ، قامْ وْزَعَقْ عَ الزَّوبَعَة والبَحر، وْصارْ هدو عَجيب وْما بَقْ لا هَوا وْلا هَبيبْ.
\v 27 و هَوك النّاِس تْعَجَّبوا وْقالوا: ”منْ واِ هاذْ؟ حتّى الزّواِبع والبَحرْ يسْمَعولو.“
\r (مرقس 5‏:1‏–20، لوقا 8‏:26‏–39)
\p
\v 28 وْلَمَنْ جا يَسوُعْ لَ شاطي اللاخْ، لَ ديرة الجَّدريِّة، طَلَعوا قدّامو اثْنَينْ مْجَنَّينْ فِينْ شَياطينْ، طالْعينْ م الّقْبوُرْ، وكْثيرْ شَرّيرينْ كانوا، منْ شَرّنْ أحَّدْ ما كانْ يسْتَرجي يفوتْ فاك الطَّريِقْ.
\p
\v 29 وْزَعَقوا قالوا: ”أَيشْ بينْنا وْبَينكْ يا يَسوُع ابْن اَلله؟ جيتْ لَون قَبل الوَقْتْ تَ تْعَذّبْنا؟“
\v 30 وْكانْ في بْعيدْ منّنْ كَرْية خناِزير كْثيرْ يرْعَونْ.
\v 31 وتْوَسَّلوا الشَّياطينْ لَ يَسوُع، وْقالولو: ”لَ تَ تْطاِلعْنا، خَلّينا نْروُحْ لَ كَرية الخناِزيرْ.“
\v 32 يَسوُعْ قالْلنْ: ”روُحوا!“ وْراساً طَلَعوا وْدَخَلوا ف الخناِزير، وْكلْ هاك الكَريِة هَجّتْ ساِوي لَ فوُقْ لَ راس الجَّبَلْ، وْوَقَعوا ف البَحر وْماتوا ف المَي.
\p
\v 33 وْهَوك الرّعْواِنْ لَ كانْ يرَعَّونْ، هَرَبوا وْراحوا للبَلَدْ وْحَكَوا عَلى كلْ شي لَ صار، وْعَلَوك الّمْجَنَّينْ.
\v 34 وْطَلَعْ كلّ البَلَدْ لَ قدّامْ يَسوُعْ. وْلَمَنْ أَرَوهُ تْوَسَّلولو تَ يروُحْ منْ أَراضيينْ.
\c 9
\s يَسوُعْ يشْفي مكَرسَح
\r (مرقس 2‏:1‏–12، لوقا 5‏:17‏–26)
\p
\v 1 وْطَلَعْ للسَّفّينِة وقَطَع وْجا لَ بَلَدو.
\v 2 وْجابولو مْكَرسَح مْشَطَّحْ عَلى تَخْتْ. وَارى يَسوُعْ إيمانن، وْقال لاك الّمْكَرْسَحْ: ”قَوّي قَلْبك ابْني! خَطِيّاتكْ مَغْفوُرَة“
\v 3 ناِسْ منْ مْعَلْمين النّاموسْ قالوا فَ قَلْبنْ: ”هاذْ يقولْ كَلامْ كفرْ.“
\v 4 يَسوُعْ عَرَفْ أَيشْ يفْتكْرونْ، قامْ قالْلنْ: ”لَيشْ تفْتكْرون افْتكاراتْ رَديِّة فَ قَلْبْكنْ؟
\v 5 أَينا أَهْيَنْ: واِحد يقولْ: ’خَطِيّاتكْ مَغْفوُرَة‘ والّا يقولْ: ’قوم امْشي‘؟
\v 6 بَسّ بْشانْ تعْرفونْ في سلْطَة لابْن الانْسانْ ف الاَرْضْ تَ يغْفر الخَطِيّاتْ.“ قالْ للّمْكَرسَحْ: ”قوم اشْقلْ تَخْتك وْروُحْ لَ بَيتكْ.“
\v 7 وْقامْ راحْ لَ بَيتو.
\v 8 وَقْتْ لَ ارَوا هَوكْ لَمّات النّاِسْ، خافوا وْسَبَّحوا لَالله لَ عَطى سلْطَة كَما هاي للبَشَرْ.
\s يَسوُعْ يسيِح مَتّى تَ يسيِرْ تَلْميذْو
\r (مرقس 2‏:13‏–17، لوقا 5‏:27‏–36)
\p
\v 9 وَقْتْ لَ فاتْ يَسوُعْ منَونَك، أَرى زَلَمِة قاِعدْ ف موُضَعْ هَوذْ لَ يلمّون الضَّرايب اسْمو مَتّى، وْقالْلو: ”تَعانْ خَلْفي.“ وْقامْ راحْ خَلْفو.
\v 10 وْهنّاِ منْتكْيينْ ف البَيتْ، جَوا ناِس كْثيرْ منْ هَوذْ لَ يلمّون الضَّرايب وْخاطْيينْ وانْتَكَوا مَعْ يَسوُع وْتَلاميذو.
\v 11 لَمَنْ الفَرّيسيِّة أَرَوا، قالوا لَتَلاميذو: ”لَيشْ مَعْ هَوذْ لَ يلمّون الضَّرايبْ والخاطْيينْ ياكل مْعَلّمْكنْ؟“
\p
\v 12 يَسوُعْ وَقْتْ لَ سمعْ قالْلنْ: ”الموُ مَراضىِ موُ يريدْلنْ حَكيمْ، بَلىِ المَراضىِ يريدْلنْ.
\v 13 روُحوا تْعَلَّموا وافْتهْموا أَيشْ واِ قَول الرَّبْ: ’أَريدْ رَحْمِة موُ ذَبيحَة.‘ أَنا ما جيتُ تَ ادْعي بارّينْ، بَلىِ خاطْيينْ.“
\s الصَّوم
\r (مرقس 2‏:18‏–22، لوقا 33‏:39)
\p
\v 14 هاك الوَقْتْ، جَوا لَعنْدو تَلاميذْ يوحَنّا وْقالولو: ”لَيشْ نحْناِ والفَرّيسيِّة نصوم كْثيرْ، وتَلاميذكْ موُ يصومونْ؟“
\v 15 يَسوُعْ قالْلنْ: ”لَيش يتيِقونْ ناِس العرْس يصومون مْقَد لَوّاِ الخَتَنْ مَعنْ؟ بَسْ جايِة إيّاِمْ فِيا ينْأخَذ الخَتَنْ منّن، وْهاك الوَقْتْ تَ يصومونْ.
\v 16 أحَّدْ موُ يحطْ رقْعَة جْديدِة عَلى لبسْ بالي، والّا واِ رقْعة الّجْديدِة تَ تنْتفْ م اللبْسْ، ويسيِرْ موُضَع الهاِري أَگْبَرْ.
\v 17 وْموُ يتْلَونْ خَمر الّجْديدْ ف قرَبْ بالْيِة، والّا واِ القرَبْ تَ تنْشرطْ، والخَمرْ ينْچفخْ والقرَبْ تخْرَبْ وتْسيِرْ للكَبْ. بَلىِ يتْلَونْ خَمر الّجْديدْ ف قرَب جْديدِة، واثْنَيننْ ينْحفْظونْ.“
\s يَسوُعْ يقَيّم بنْتْ م المَوت، وْيشْفي مَرَة دَقّت رَدّة زْبونو
\r (مرقس 5‏:21‏–43، لوقا 8‏:40‏–56)
\p
\v 18 وْهوّاِ كذاِ قايمْ يحْكي مَعنْ، جا واِحدْ م الّگْباريِّة وْقالْ: ”السَّعْ ماتتْ بنْتي. تَعانْ حطّ ايدكْ عَلَيا تَ تْطيبْ.“
\v 19 وْقامْ يَسوُع وْتَلاميذو وْراحوا خَلْفو.
\v 20 والّا مَرَة كانْ مَعا نَزيفْ دَمْ منْ اثْناعشْ سَنِة جَتْ منْ خَلْفو وْدَقّتْ رَدّة زْبونو.
\v 21 منْ لَ قالتْ فَ قَلْبا: ”هَمن يكونْ بَسّ زْبونو أَدقْ، تَ اتْعَدَّلْ.“
\v 22 وانْدارْ يَسوُعْ وَاراها وْقالْلا: ”قَوَّي قَلْبْكِ بنْتي! إيمانْكِ خَلَّصْكِ.“ وتْعَدَّلتْ هاك المَرَة راساً منْ هاك السّاعَة.
\p
\v 23 وْجا يَسوُعْ لَ بَيتْ هَالزَّلَمِة الّگْبيرْ، وَارى الزّماِرين وْلَمّاتْ ناِسْ قايمِة قاِعْدِة.
\v 24 وْقالْلنْ: ”روُحوا! البنْتْ ما كلْماتتْ، بَلىِ ناِيمِة ياِ.“ وْبَقى يذْحَكونْ عَلَيو.
\v 25 وْلَمَنْ طاِلَعْ لَمّات النّاِسْ، دَخَلْ مسكا منْ ايدا وْقامت البنْتْ.
\v 26 وْطَلَعْ هَالخَبَرْ فاك الاَرْضْ كلّا.
\s يَسوُعْ يشْفي اثْنَينْ عَماية
\p
\v 27 وْلَمَنْ فاتْ يَسوُعْ منَونَك، لحْقوهُ اثْنَينْ عَمايِة يسيِحونْ ويقولونْ ”اشْفقْ عَلَينا ابنْ داهودْ!“
\v 28 وْلَمَنْ جا للبَيتْ، قَرَّبوا عَلَيو هَوك العَمايِة. يَسوُعْ قالْلنْ: ”تْآمنون اَتيِق اَسَي هاي.“ قالولو: ”نَعمْ سَيّدْنا.“
\v 29 هاك الوَقْتْ جَسْ عَينَين وْقالْ: ”كَما لَ آمَنْتنْ، خَلّي يكون لْكنْ“.
\p
\v 30 وْراساً تْفَتَّحوا عَينَينْ. ونَبَّهنْ يَسوُع بْقوِّة وْقالْ: ”طَلْعوا! بالْكنْ وايّاكنْ أحَّدْ يعْرفْ.“
\v 31 بَلىِ هنّاِ طَلَعوا نَشَروا الخَبَرْ ف كلْ هاك الاَرْضْ.
\s يَسوُعْ يشْفي واِحدْ اَخْرَسْ
\p
\v 32 وْلَمَنْ طَلَعْ يَسوُعْ، جابولو اَخْرَسْ فِيو شيِطانْ.
\v 33 وْمنْ دَقيِقَة لَ طَلَع الشّيِطانْ، قَچَمْ هاك الاخْرَسْ. وتْعَجَّبوا لَمّات النّاِس، وْقالوا: ”أَبَدْ ما انْأَرى كذاِ شي ف اسْرائيلْ.“
\v 34 بَسّ الفَرّيسيِّة كان يقولون: ”بْرَيّس الشَّياطين يطاِلع الشَّياطينْ.“
\s يَسوُعْ يشفق عَ النّاِسْ
\p
\v 35 وْكانْ يدوُرْ يَسوُعْ ف كلّ الّبْلادْ والّضْياعْ، ويعَلّمْ ف مجاِمعنْ وْيكْرزْ ببْشارة المَلَكوت وْيشْفي منْ كلْ مَرَض وْعلِّة.
\v 36 وْلَمَنْ أَرى يَسوُعْ لَمّات النّاِسْ حَنْ قَلْبو عَلَينْ، منْ لَ كانوا تعْبانينْ تلْفانين مْفَلَّتينْ كَما غَنَمْ لَ ما لنْ راعي.
\v 37 وْقالْ لَتَلاميذو: ”الّحْصاد كْثيرْ والشَّغّيلِة قْلَيلْ.
\v 38 بَقى تْوَسَّلوا لَ صاحب الّحْصادْ تَ يطاِلعْ شَغّيلِة لَ حْصادو.“
\c 10
\s الاثْناعشْ رَسول
\r (مرقس 3‏:13‏–19، لوقا 6‏:12‏–16)
\p
\v 1 وْساحْ تَلاميذو الاثْناعش وْعَطاهن سلْطَة عَلى ارْواح النّجْسِة، تَ يطاِلعون وْيشْفَونْ منْ كلْ وَجَع وْعلِّة.
\v 2 وْهاي ياِ اساِمي الاثْناعشْ رَسولْ: أَوَّلنْ شَمْعونْ لَ يقولولو بطْرسْ وَانْدَراوُسْ أَخوهُ وْيَعْقوب ابنْ زَبَدي وْيوحَنّا أَخوهُ.
\v 3 وفيلبُّس وْبَرْتلْماوُس، وْتوما وْمَتّى جابي الضَّرايب، وْيَعْقوب ابنْ حَلْفى وْلابي لَ تْسَمّى تَدّاوُسْ،
\v 4 وشَمْعون القانَوي وْياهوذا الاسْخَرْيوطي، هاكْ لَ سَلَّمو.
\s يَسوُعْ يبْعَثْ الاثْناعشْ
\r (مرقس 6‏:7‏–13، لوقا 9‏:1‏–6)
\p
\v 5 لَوذ الاثْناعشْ بَعَثْ يَسوُع، وْوَصّاهن وْقالْ: ”فَ طَريِق للوَثَنيِّة لا تْروُحون، وْبَلَدْ للسّامريِّة لا تدْخلونْ،
\v 6 بَلىِ روُحوا لَعنْدْ خواِريفْ لَ تْتَوبَلتْ منْ بَني اسْرائيلْ.
\v 7 وْوَقْتْ لَ تْروُحون، اكْرزوا وْقولوا: ’مَلَكوت السَّماواتْ قربْ.‘
\v 8 اشْفَوا المَراضىِ، وْطَهْروا البرْصين وْقَيموا المَيتين، وْطاِلعوا الشَّياطين. مْبَلاشْ أَخَذْتن، مْبَلاش اعْطَوا
\v 9 لا تقْنَونْ، لا ذَهَب وْلا فضَّة وْلا نْحاسْ ف اكْياسْكنْ.
\v 10 وْلا طوُرْبايِة للطَّريِقْ وْلا زْبونَين وْلا صَول وْلا خَيزَرانِة: الشَّغّيلْ يسْتَحقّ اَكْلو.
\v 11 وَاينا بَلَدْ يا ضيِعَة لَ دَخَلْتن، اسْتَخْبروا منْ واِ المسْتاِهل فِيا، وْهَونَك ابْقَوا دي لَمَنْ تطْلَعونْ.
\v 12 وْمنْ تدْخلونْ لَ بَيتْ سَلْموا عَلى ناِسو،
\v 13 لَ كانْ هاك البَيتْ مسْتاِهلْ، خَلّي يحلْ سَلامْكنْ عَلَيو، وْلَ ما كانْ مسْتاِهل، سَلامْكنْ يرْجَع لْكنْ.
\v 14 وْلَ موُ يسْتَقبلْكن، وْموُ يسْمَعْ كَلامْكنْ، وَقْتْ لَ تطْلَعونْ مناك البَيتْ يا مناك الضّيِعَة، انْفضوا غَبْرة اجْرَيكنْ.
\v 15 الحَقّ اَقلْكنْ: لَ ارْضْ سادوم وْعامورَة تَ تْكونْ أَهْيَنْ يَوم الّحْسابْ منْ هاك البَلَدْ.
\s زَمان التَّعَدّي والقَتل
\r (مرقس 13‏:9‏–13، لوقا 21‏:12‏–17)
\p
\v 16 ”كْوا اَنا قايمْ أَبْعَثْكنْ كَما الخواِريفْ لَ بَين الّذيوبِة. بَقى كونوا حَكيمينْ كَما الحَيّاتْ وْلَطيفينْ كَما الحَماماتْ.
\v 17 بَسْ ديروا بالْكنْ م النّاِسْ، تَ يسَلْموكنْ للمَحاكم، وْفَ مجاِمعنْ تَ يقَرْپچوكنْ،
\v 18 وْلَ قدّامْ حكّامْ ومْلوكْ تَ يجبوكنْ لَخاطري، وْتَ تشْهَدولي قدّامنْ وْقدّام الامَمْ.
\v 19 وأَيمَتْ لَ يسَلْموكنْ، لا تاكْلونْ هَمّ أشْوَنْ وَايشْ تَ تْقلونْ: تَ تنْعَطَونْ فاك السّاعَة أَيش تْقلونْ.
\v 20 منْ لَ موُ أنْتنْ تحْكَونْ، بَلىِ روُح اَبوكنْ يحْكي فيكنْ.
\v 21 الاَخ تَ يسَلّمْ أَخوهُ للمَوتْ، والاَب ابْنو، والاولادْ تَ يقمونْ عَلى أَبَّهاتن ويمَوتوونْ.
\v 22 وْتَ تْكونونْ مَبْغوُضينْ منْ كلّ انْسانْ لَخاطري. بَسّ اَينا لَ يصْبرْ دي للآِخرْ هوّاِ واِ لَ يخْلَصْ.
\v 23 وَقْتْ لَ يضْطهدوكنْ فَ هَالبَلَد، اهْربوا لَ اللاخْ: الحَقّ اَقلْكنْ: موُ تْكَمْلونْ كلْ مدنْ بَني اسْرائيلْ لَ موُ يجي ابن الانْسانْ.
\v 24 ما في تَلْميذْ أَحْسَنْ منْ مْعَلّمو، وْلا عَبْدْ منْ سَيّدو:
\v 25 يكْفى يكون التَّلْميذْ كَما مْعَلّمو والعَبْدْ كَما سَيّدو. لَ عَلى سَيّد البَيتْ قالوا بَعْلزْبولْ، أَينْ بَقَوا ناِسْ بَيتو!
\p
\v 26 ”بَقى لا تْخافونْ منّنْ، منْ لَ ما في شي مْغَطّى موُ ينْكشف، وْمَسْتوُر موُ ينْعرفْ،
\v 27 شي لَ اقلْكنْ ف العتْمِة، قلوهُ ف الضَّو، وْشي لَ فَ اذانْكنْ وَشوَشِة تسْمَعون، اكْرزوهُ منْ عَ الاساِطيحْ.
\v 28 وْلا تْخافونْ منْ هَوذْ لَ يقْتلون الجَّسَدْ، وْموُ يتيِقونْ يقْتلون النَّفْسْ. بَلىِ خافوا منْ هاكْ لَ يتيِقْ يتَوبل الجَّسَدْ والنَّفس اثْنَينتنْ ف جْهَنَّمْ.
\v 29 موُ عَصفوُرَينْ ينْباعون بْقرْشْ؟ وْواِحدْ منّنْ بَلا إرادة أَبوكنْ موُ يقَعْ عَ الاَرْضْ؟
\v 30 وانْتنْ، شَعرْ راسْكنْ زاِ مَعْدوُدْ واِ.
\v 31 بَقى لا تْخافونْ، أنْتنْ أَحْسَن انْتنْ منْ عصاِفير كْثيرْ.
\s الاعتراف ف المَسيحْ ضروري
\r (لوقا 12‏:8‏–9)
\p
\v 32 ”لَ يعْترفْ في قدّام النّاِسْ، أَنا زاِ أَعْترفْ فِيو قدّام اَبوي لَ ف السَّماواتْ.
\v 33 وْلَ ينْكرْني قدّام النّاِسْ، أَنا زاِ تَ انْكرو قدّام اَبوي لَ ف السَّماواتْ.
\s يَسوُعْ وهَالدّنْياِ
\r (لوقا 12‏:51‏–53، 14‏:26‏–27)
\p
\v 34 ”لا تفْتكْرونْ جيتُ تَ ارْمي سَلامْ عَ الاَرْضْ. ما جيتُ تَ ارْمي سَلامْ، بَلىِ حَرْبْ.
\v 35 منْ لَ جيتُ تَ افَرّقْ ’بَين الزَّلَمِة وَابوهُ، والبنْتْ وامّا، والكنِّة وْحَماِتا،
\v 36 وعدْوان الزَّلَمِة ناِسْ بَيتو.‘
\v 37 لَ يحبْ أَبو يا أمّ أَكْثَر منّي موُ يسْتاِهلْني. وْلَ يحب ابنْ يا بنْتْ أكْثَرْ منّي موُ يسْتاِهلْني.
\v 38 وْكلْ واِحدْ موُ يحْملْ صَليبو وْيجي خَلْفي موُ يسْتاِهلْني
\v 39 أَينا لَ كَ ارى نَفْسو، تَ يتَوبلا. وْلَ يتَوبلْ نَفْسو لَخاطري، تَ يراها.
\s الّمْكافاة
\r (مرقس 9‏:36‏–46)
\p
\v 40 ”لَ يقْبَلْكنْ، لي يقْبَل. وْلَ يقْبَلْني، لَ هاكْ لَ بَعَثْني يقْبَلْ.
\v 41 لَ يقْبَلْ نَبي باسمْ نَبي، أَجرْ نَبي ياخذْ. وْلَ يقْبَلْ بارْ باسمْ بارْ، أَجرْ بارْ ياخذْ.
\v 42 وَاينا لَ يسْقي واِحدْ منَوذ الّزْغارْ قَدَحْ مَي باِردْ بَسْ، باسمْ تَلْميذْ، أَقولْكنْ الحَقْ: أَجْرو موُ يضيِعْ.“
\c 11
\s يَسوُعْ وْيوحَنّا المَعْمَذانْ
\r (لوقا 7‏:18‏–35)
\p
\v 1 وْبَعدْ لَ وَصّى يَسوُعْ تَلاميذو الاثْناعش وْخَلَّصْ، طَلَعْ منَونَك تَ يعَلّم وْيكْرزْ ف بْلادنْ.
\v 2 يوحَنّا وَقْتْ لَ سمع، وْهوّاِ ف الحَبْسْ، عَلى اعْمال المَسيحْ، بَعَثلو خَبَرْ مَعْ تَلاميذو
\v 3 يقلْلو: ”أنْتَ واِ هاكْ لَ تَ يّجي والّا ننْطرْ غَيرْ واِحدْ؟“
\v 4 رَدْ يَسوُعْ قالْلنْ: ”روُحوا احْكَوا لَيوحَنّا عَلى شي لَ تسْمَعون وْترَونْ.
\v 5 العَمايِة يرَونْ، والعرْجينْ يمْشَونْ، والبرْصينْ يطْهَرونْ، والطّرْشينْ يسْمَعونْ، والمَيتين يقمونْ، والفَقاراِ يتْبَشَّرونْ.
\v 6 وهَنيّة أَينا لَ موُ يشكْ في.“
\v 7 وْلَمَنْ راحوا، بَدا يَسوُع يقولْ لَلَمّات النّاِسْ عَلى يوحَنّا: ”أَيشْ طَلَعْتنْ عَ البَرّيِّة تَ تّرَونْ؟ قَصَبِة م الهَوا تنْهَزْ؟
\v 8 والّا، أَيشْ طَلَعْتنْ تَ تّرَونْ؟ زَلَمِة لاِبسْ حَويسْ ناِعمين مْهَبْهَبينْ؟ كْوا هَوكْ لَ يلْبسونْ حَويسْ ناِعمين مْهَبهَبينْ ف قْصوُر الّمْلوكْ ناِ.
\v 9 والّا أَيشْ طَلَعْتن تَ تّرَون؟ نَبي؟ أَقولْكنْ: أيِ وَاكْبَرْ منْ نَبي
\v 10 منْ لَ هذا واِ لَ انْكَتَب عَلَيو: ’هاي اَنا أَبْعَثْ مَلاكي قدّامْ وچّكْ تَ يحَضّر الطَّريِقْ قدّامكْ.‘
\p
\v 11 ”الحَقّ اَقلْكنْ: ما قامْ بَينْ كلْ منْ ولْدتو مَرَة أَگْبَرْ منْ يوحَنّا المَعْمَذانْ، بَسّ الّزْغَيّرْ فَ مَلَكوت السَّما أَگْبَرْ منّو واِ.
\v 12 منْ اِيّاِم يوحَنّا المَعْمَذانْ وْدي للسَّعْ، مَلَكوت السَّماواتْ بالغَصْبْ ينْأخذ، وْل ياخْذوهُ بالغَصْبْ يتْمَلَّكوهُ.
\v 13 منْ لَ كلّ الاَنْبِيا والتَّوراة دي لَ يوحَنّا تْنَبَّوا.
\v 14 لَ رَدْ تن اقْبَلوا: هذا واِ ايِليّا الجّاِييِ.
\v 15 لَ لهُ أَذانْ تسْمَعْ خَلّي يسْمَعْ.
\v 16 فَ أَيشْ أَشَبّه هَالنَّسلْ هاذْ؟ يشْبَهونْ اولادْ لَ يقْعَدونْ ف الطَّريِقْ ويسيِحون عَلى رفَقنْ،
\v 17 ويقولونْ: ’زَمَّرْنا لْكنْ ما رقصْتنْ، وَلْوَلْنا لْكنْ ما عَدَّدْتنْ.‘
\v 18 منْ لَ جا يوحَنّا لا ياكل وْلا يشْرَبْ، قالوا: ’شيِطانْ فِيو.‘
\v 19 وْجا ابْن الانْسانْ ياكل وْيشْرَبْ، قالوا: ’كْوا زَلَمِة أَكّيلْ شرّيبْ خَمر، وْسَديقْ هَوذْ لَ يلمّون الضَّرايب والخاطْيينْ.‘ وتْبَرَّرت الحكْمِة منْ اعْمالا.“
\s بلاد الكفر
\r (لوقا 10‏:13‏–15)
\p
\v 20 هاك الوَقْتْ بَدا يَسوُع يخَزْبل بْلادْ لَ صارْ فِيا عَجايبو كْثير وْما تابوا.
\v 21 ”وْقالْ: يا وَيلْكِ يا كوُرَزين! وَيلْكِ يا بَيتْ صَيدا! يكون ف صور وْصَيدا صاروا عَجايبْ لَ صاروا فيكنْ، السَّعْ منْ زَمانْ فَ حَويس الشَّعر والّرمادِة كانْ تابوا.
\v 22 بَسّ اَقلْكنْ: لَصور وْصَيدا أَهْيَنْ تَ تْكونْ يَوم الّحْسابْ منْ لَ تَ تْكون لْكنْ.
\v 23 وانْتِ كَفَرْناحومْ! أنْتِ لَ دي للسَّما كلْعَلَّيتِ، دي لَلهاويِة تَ تتْنَزَّلينْ. يكونْ فَ سادومْ صاروا عَجايبْ لَ صاروا فيكِ، قايمِة كانْ تَ تْكونْ دي لَ اليَومْ.
\v 24 بَسّ اَقلْكِ: لَ ارْضْ سادومْ أَهْيَنْ تَ تْكون يَوم الّحْسابْ منْ لَ تَ تْكولْكِ.“
\s يَسوُعْ يفْرَح
\r (لوقا 10‏:21‏–22)
\p
\v 25 وْهاك الوَقْتْ كَمَّل يَسوُع وْقالْ: ”أَحْمدكْ يا أَبوي، يا رَبّ السَّما والاَرْضْ، عَلى لَ خَبَّيت هَوذْ عَ الحَكيمينْ والفهْمانين، وْبَيَّنتنْ لاولاد الّزْغارْ.
\v 26 نَعمْ أَبوي، منْ لَ كذاِ صارْ رضاكْ.
\v 27 كلْ شي تْسَلَّمْ لي منْ اَبوي. وَاحَّدْ موُ يعْرف الابنْ غَير الآب، وْلا للآبْ أحَّدْ يعْرفْ غَير الابن وْهاكْ لَ يريدْ الابن يكْشفْلو واِ.
\v 28 تَعوا لَعنْدي كلّتْكنْ أنْتنْ هَوذ الّتعْبانينْ، والّمْحَمَّلين احْمالْ، وَانا تَ ارَيّحْكنْ.
\v 29 احْملوا نيري عَلَيكنْ وتْعَلَّموا منّي، منْ لَ انا وَديع وْمتْواضعْ منْ قَلْبي، وْتَ تّرَونْ راحَة لَ نْفوسْكنْ،
\v 30 منْ لَ نيري طَيّبْ واِ وْحمْلي خَفيفْ واِ.“
\c 12
\s السَّبْتْ
\r (مرقس 2‏:23‏–28، لوقا 6‏:1‏–5)
\p
\v 1 فاك الوَقْتْ، يَسوُعْ كانْ ماِشي فَ يَومْ سَبْتْ بَين الّزروُع، وْتَلاميذو جاعوا وْبَدَوا يقَطْعونْ سنْبل وْياكْلونْ.
\v 2 وَقْتْ لَ ارَوون الفَرّيسيِّة قالولو: ”كْوا تَلاميذك يسَونْ شي لَ موُ يحلّ يسَيو أحَّدْ يَوم السَّبْتْ.“
\v 3 بَسْ هوّاِ قالْلنْ: ”ما قَرَيتنْ أَيشْ سَوى داهودْ وَقْتْ لَ جاعْ هوّاِ وْهَوكْ لَ مَعو؟
\v 4 أشْوَنْ دَخَلْ لَ بَيت اَلله، وغْبَيزْ صفْرة الرَّبْ أَكَلْ، هاكْ لَ موُ يحلْ أَكْلو، لا عَلَيو وْلا عَلى هَوكْ لَ مَعو، موُ يحلْ غَير عَ الكَهَنَة بَسْ؟
\v 5 يا ما كلْقَرَيتنْ ف التَّوراة: الكَهَنَة ف الهَيكَلْ يكْسرون السَّبْت وْمَعْ هاذْ ما في عَلَينْ لَومْ؟
\v 6 بَسّ اَقلْكنْ: أَعْظَمْ م الهَيكَلْ في هَونْ.
\v 7 يكونْ كانْ تعْرفونْ أَيشْ ياِ هاي الآيِة لَ تْقولْ: ’رَحْمِة أَريدْ موُ ذَبيحَة،‘ ما كانْ تَ تحْكمونْ عَلَوذْ لَ ما عَلَينْ لَومْ.
\v 8 منْ لَ سَيّد السَّبْتْ واِ ابْن الانْسانْ.“
\p
\v 9 وخَلّى وْراحْ منَونَك وْدَخَلْ لَ مَجْمَعنْ.
\v 10 وْهَونَكْ كانْ في رجّال ايدو مْيَبَّسِة، قاموا سَأَلوهُ: ”يحلْ شفا المَراضىِ يَوم السَّبْتْ والّا لا“، بْشانْ يشْتَكَونْ عَلَيو.
\v 11 وْهوّاِ قالْلنْ: ”أَينا زَلَمِة منْكنْ لهُ خاروفْ واِحد، وْوَقَعْ هَالخاروفْ ف جورَة يَومْ سَبْتْ، موُ يمْسك يخَلّصو م الجّورَة؟
\v 12 أَشْقَدْ أَحْسَنْ واِ الانْسانْ م الخاروفْ؟ بَقى يحلْ ف السَّبْتْ للانْسانْ تَ يسَي خَيرْ.“
\v 13 هاك الوَقْتْ قالْ للزَّلَمِة: ”مدّ ايدك“. وْمَدّ ايدو وتْعَدَّلتْ رجْعتْ صاغَة سَليمِة كَما رَفيِقتا.
\v 14 قاموا الفَرّيسيِّة طَلَعوا يشْتارونْ فَ بَعْضنْ أشْوَنْ تَ يتَوبلوهُ.
\p
\v 15 يَسوُعْ عَرَف، وْخَلّى وْراحْ منَونَك. وْراحْ خَلْفو ناِس كْثيرْ طَلْقاتْ طَلْقات، وْشَفاهنْ كلّنْ.
\v 16 وْزَعَقْ عَلَينْ نَبَّهنْ لا يكْشفوهُ،
\v 17 تَ يتمْ شي لَ انْقالْ باِشعْيا النَّبي لَ قالْ:
\v 18 ”هذا واِ خادمي لَ رضيتُ عَلَيو. عَزيزي لَ فرحْ فِيو قَلْبي. روُحي أَحطْ عَلَيو، وْتَ يكْرزْ بالعَدلْ للامَمْ.
\v 19 لا يتْقاتل وْلا يرْفَعْ صَوتْ، وَاحَّدْ موُ يسْمَعْ صَوتو فَ طَريِقْ.
\v 20 قَصَبِة مَرْضوُضَة موُ يكْسرْ. وسْراج يچَفْچفْ موُ يطْفي دي لَمَنْ ينْصر العَدلْ.
\v 21 وباسْمو يكونْ رَجا الامَمْ.“
\s يَسوُعْ وبَعْلزْبولْ
\r (مرقس 3‏:20‏–30، لو 11‏:14‏–23، 12‏:10)
\p
\v 22 هاك الوَقْتْ جابولو واِحدْ فِيو شَياطينْ، أَخْرَسْ وَاعْمي، وْشَفاهُ، وْبَقى هَالاخْرَسْ والاَعْمي يقْچم وْيرى.
\v 23 وْكلْ لَمّات النّاِسْ كانْ يتْعَجَّبونْ ويقولونْ ”عَجَبْ موُ هاذْ واِ ابنْ داهودْ؟“
\v 24 بَسّ الفَرّيسيِّة وَقْتْ لَ سمْعوا قالوا: ”هاذْ موُ يطاِلعْ شَياطينْ غَير بْبَعْلزْبولْ رَيّس الشَّياطينْ.“
\v 25 يَسوُعْ عَرَفْ أَيشْ يفْتكْرونْ. قامْ قالْلنْ: ”كلْ مَمْلَكِة تنْقسمْ عَلى بَعْضا تخْرَب، وْكلْ بَيتْ يا بَلَدْ ينْقسمْ عَلى بَعْضو موُ يقومْ.
\v 26 لَ شيِطانْ طاِلع شيِطان، انْقَسَمْ عَلى بَعْضو. أشْوَنْ بَقى تَ تْكونْ مَمْلَكتو قايمِة؟
\v 27 وْلَ انا بْبَعْلزْبولْ أَطاِلعْ شَياطين، اولادْكن بْمن يطاِلعوونْ؟ منْ هاي هنّاِ تَ يسيِرونْ عَلَيكنْ حاكمين يحاكْموكن وْيحْكمونْ عَلَيكنْ.
\v 28 وْلَ بْروُح اَلله اَنا أَطاِلع الشَّياطينْ، قَرَّبْ عَلَيكنْ مَلَكوت اَلله.
\v 29 وَاشْوَن يتيِقْ أحَّدْ يدْخلْ لَ بَيتْ زَلَمِة قَوي وْينْهَب امْوالو لَ موُ، قَبلْ كلْ شي، يشَدّد القَوي؟ وْهاك الوَقْتْ ينْهَب بَيتو.
\v 30 لَ موُ مَعي واِ عَلَي واِ، وْلَ موُ يلمْ مَعي بَذّير يبَذّرْ.
\p
\v 31 ”منْ هاي أَقولْكنْ: كلْ خَطيِّة وْكَلامْ كفرْ ينْغفرْ للبَشَرْ. بَسْ كَلامْ كفرْ عَلى الرّوُحْ، موُ ينْغفرْ للبَشَرْ.
\v 32 كلْ من يقولْ كلْمِة عَلى ابْن الانْسانْ، ينْغفرْلو. بَسْ هاكْ لَ عَلى روُح القدس يقولْ، موُ ينْغفرْلو، لا فَ هَالدّنْياِ وْلا فاك الدّنْياِ.
\s السّجَرَة وْثَمَرا
\r (لوقا 6‏:43‏–45)
\p
\v 33 ”يا سَوَوا السّجَرَة كْوَيسِة وْثَمَرا كْوَيّس، وْيا سَوَوا السّجَرَة رَديِّة وْثَمَرا رَدي: منْ ثَمَرا تنْعرف السّجَرَة.
\v 34 يا نَسْل الحَيّاتْ! أشْوَن تْتيِقونْ تحْكَونْ ف الخَيرْ وانْتنْ شَرّيرينْ؟: منْ شي لَ يفيضْ م القَلْبْ يحْكي الّلْساِنْ.
\v 35 انْسانْ الخَيرْ منْ كَنْز الخَير يطاِلعْ خَيرْ. والشَّرّيرْ منْ كَنْز الشَّرّ يطاِلعْ شَرْ.
\v 36 بَقى أَقولْكنْ: كلْ كلْمِة عاطْلِة باطْلِة يقلووا النّاِسْ تَ يتْحاسَبونْ عَلَيا يَوم الّحْسابْ:
\v 37 منْ كَلامكْ تطْلَعْ بَري وْمنْ كَلامكْ ينْحكَمْ عَلَيكْ.“
\s الفَرّيسيِّة يريدون عَجيبِة
\r (مرقس 8‏:11‏–12، لوقا 11‏:29‏–32)
\p
\v 38 هاك الوَقْتْ، ناِسْ منْ مْعَلْمين النّاموسْ والفَرّيسيِّة رَدّوا قالولو: ”مْعَلّم، نْريدْ نرى منّكْ عَلامِة عَجيبِة.“
\p
\v 39 بَسْ هوّاِ رَدْ عَلَينْ قالْلنْ: ”جيلْ شَرّيرْ زاني عَلامِة يريد، وْعَلامِة موُ ينْعَطاهُ غَيرْ عَلامة يونان النَّبي.
\v 40 كَما لَ بَقى يونانْ فَ جَوف الحوتْ ثَةّ اِيم وْثَثْ لواِلي، كذاِ تَ يبْقى ابْن الانْسانْ فَ جَوف الاَرْضْ ثَةّ اِيم وْثَثْ لواِلي.
\v 41 رْجاِلْ نَينَوى تَ يقمونْ يَوم الّحْسابْ مَعْ هَالنَّسلْ هاذْ وْيحْكمونْ عَلَيو، منْ لَ تابوا بكْرازة يونانْ، وكْوا أَگْبَرْ منْ يونانْ هَونْ.
\v 42 مَلِكة الجّنوبْ تَ تْقومْ يَوم الّحْسابْ مَعْ هَالنَّسلْ هاذْ وْتحْكمْ عَلَيو، منْ لَ جَتْ منْ آِخر الاَرْضْ تَ تسْمَعْ حكْمة سْليِمان، وكْوا أَعْظَمْ منْ سْليِمانْ هَونْ.
\s رَجعة روُح النّجْسِة
\r (لوقا 11‏:24‏–26)
\p
\v 43 ”وَقْتْ لَ تطْلَعْ روُح النّجْسِة منْ انْسانْ تْتوُه فَ مَواضعْ ما فِيا مَي، وْتطْلبْ راحَة وْموُ تلْقى.
\v 44 هاك الوَقْت تْقولْ: ’تَ ارْجَعْ لَ بَيتي لَ طَلَعْتُ منّو.‘ وْترْجَعْ تراهُ فارغْ، مَقشوُش وْمَرْشوشْ، ومْزَيَّنْ.
\v 45 هاك الوَقْت تْروُح تْجيبْ مَعا سَبْع ارْواحْ أَشَرْ منّا، ويدْخلون ويقْعَدونْ فِيو. وتْسيِرْ آِخْرة هاك الانْسانْ أَشَر منْ أَوَّليّتو. كذاِ تَ يسيِرْ لَهَالنَّسْل الشَّرّيرْ هاذْ.“
\s أم يَسوُعْ واخوتو
\r (مرقس 3‏:31‏–35، لوقا 8‏:19‏–21)
\p
\v 46 وْهوّاِ يَسوُعْ كذاِ قايم يحْكي مَعْ هَوك النّاِسْ الملْتَمّينْ، جَوا أمّو واخوتو، وْقاموا بَرّا وْطَلَبوا تَ يحْكَونْ مَعو.
\v 47 واِحدْ قالْلو: ”كْنا أمّكْ واخوتكْ قايمينْ بَرّا يريدونْ يحْكَونْ مَعكْ.“
\v 48 بَسْ هوّاِ رَدْ قالْ لاك لَ قالْلو: ”منْ ياِ أمّي وْمنْ ناِ أخوتي؟“
\v 49 وْمَدّ ايدو صوُبْ تَلاميذو، وْقالْ: ”هاي أمّي وْهَوذ اخوتي.
\v 50 بَقى كلّ انْسانْ يسَي إرادة أَبوي لَ ف السَّماواتْ هوّاِ واِ أَخوي واخْتي وامّي.“
\c 13
\s مَثَل الفلّاح لَ طَلَعْ تَ يبْذر
\r (مرقس 4‏:1‏–9، لوقا 8‏:4‏–8)
\p
\v 1 هاك اليَومْ طَلَعْ يَسوُعْ م البَيت وْقعدْ جَنْب البَحرْ.
\v 2 والتَمّوا عنْدو لَمّاتْ ناِسْ كْثيرْ، دي لَمَنْ أَرى لازمْ يطْلَعْ يقْعَدْ فَ سَفّينِة، وْكلْ ناِس الملْتَمّينْ قاموا عَ الشّاطي.
\v 3 وْبَقى يحْكيلن كْثيرْ امْثال رْموز وْقالْ: ”كْوا الفلّاح طَلَعْ تَ يبْذرْ.
\v 4 وْوَقْتْ لَ بَذَرْ، في لَ وَقَعْ عَلى قَراغ الطَّريِق، وْجَت الّطْيوُرْ وَاكَلتو.
\v 5 وْغَيرو وَقَعْ عَلى أرْضْ حَجَرْ موُضَعْ لَ ما في تْراب كْثير، وْفَ ساعتا طَلَعْ، منْ لَ ما كانْ الّتْرابْ عَميِقْ.
\v 6 وْوَقْتْ لَ زَرَقت الشَّمْسْ ذبل، وْمنْ لَ ما كانْ فيلو عرْقْ، نشفْ.
\v 7 وْغَيرو وَقَعْ بَينَ الشَّوك، وْعَلّى الشَّوك وْخَنَقو.
\v 8 وْغَيرو وَقَعْ فَ ارْضْ طَيبِة، وْقَطَعْ منّو ميِّة، وْمنّو ستّين، وْمنّو ثاِثينْ.
\v 9 لَ فيلو أَذانْ تَ يسْمَعْ، خَلّي يسْمَعْ.“
\s لَيشْ ضَرَب يَسوُعْ امْثال؟
\r (مرقس 4‏:10‏–12، لوقا 8‏:9‏–10)
\p
\v 10 وْقَرَّبوا تَلاميذو وْقالولو: ”لَيشْ بامْثال رْموزْ تحْكي مَعنْ؟“
\v 11 رَدْ قالْلنْ: ”أنْتنْ ك انْعَطَيتنْ تَ تعْرفون اسْرارْ مَلَكوت السَّماواتْ، بَسْ هنّاِ ما ك انْعَطَوا:
\v 12 هاكْ لَعنْدو ينْعَطالو وْينْزادْلو.
\v 13 وْهاكْ لَ ما عنْدو، شي لَ في عنْدو زاِ ينْأخذْ منّو. منْ هاي بامْثال رْموز أَحْكي مَعنْ، منْ لَ يتيِقونْ يرَون وْموُ يرَون، ويتيِقونْ يسْمَعون وْموُ يسْمَعون وْلا يفْتهْمونْ.
\v 14 وتَمّتْ فِينْ نبوّة اِشعْيا لَ قالْ: ’سَمَعانْ تَ تسْمَعون وْموُ تفْتهْمونْ، وَارَيان تَ تّرَون وْموُ توعَونْ.
\v 15 منْ لَ عمي قَلْبْ هَالشَّعْبْ هاذْ. ثقْلوا أَذانْنْ بالزّوُر يسْمَعون، وْغَمَّضوا عَينَين، بْشانْ لا يرَون بْعَينَين، وْلا يسْمَعونْ بَاذانن، ويفْتهْمون بْقَلْبن وْيرْجَعونْ تَ اشْفِينْ.‘
\v 16 بَسّ انْتنْ، هَنيّة عَينَيكنْ لَ يرَونْ وَاذانْكنْ لَ يسْمَعونْ:
\v 17 الحَقّ اَقلْكن: كْثيرْ أَنْبِيا وْبارّين اشْتَهَوا يرَونْ شي لَ ترَونْ أنْتن وْما ارَوا، وْشي لَ تسْمَعونْ أنْتن وْما سمْعوا.
\s تَفسير مَثَل الفلّاح
\r (مرقس 4‏:13‏–20، لوقا 8‏:11‏–15)
\p
\v 18 ”أنْتنْ بَقى اسْمَعوا مَغْزى مَثَل الّبْذارْ:
\v 19 كلْ واِحدْ لَ يسْمَع الكَلامْ عَ المَلَكوت وْموُ يفْهَمو، يجي الشَّرّير ويشبط كَلام لَ انْبَذَرْ فَ قَلْبو. هاذْ واِ لَ انْبَذَرْ عَلى قَراغ الطَّريِقْ.
\v 20 وْهاكْ لَ عَ الحَجَر انْبَذَرْ، هوّاِ لَ يسْمَع الكَلامْ وْفَ ساعتا بْفَرَحْ يقْبَلو،
\v 21 بَسّ الكَلامْ مالو عْروُقْ فِيو، بَلىِ لَ وَقْتْ واِ. وْمنْ صارْ ذيقْ يا اضْطهادْ لَخاطرْ الكَلامْ، خَفيفْ يتْعَثْوَر وْيقْلبْ.
\v 22 وْهاكْ لَ بَين الشَّوك انْبَذَرْ، هوّاِ هاكْ لَ يسْمَعْ الكَلامْ، بَسْ فكْر الدّنْياِ وْغشّ الغنىِ يخْنقون الكَلام وْيبْقى بَلا ثَمَرْ.
\v 23 وْهاكْ لَ عَلى أَرْض الطَّيبِة انْبَذَرْ، هوّاِ لَ يسْمَعْ كَلامي وْيفْهَم وْيعْطي ثَمَرْ، منّو يقْطَعْ ميِّة وْمنّو ستّين وْمنّو ثاِثينْ.“
\s مَثَل الزّيوان
\p
\v 24 وضَرَبْلنْ يَسوُعْ مَثَلْ لخْ قالْ: ”مَلَكوت السَّماواتْ يشْبَهْ زَلَمِة بَذَر بْذارْ طَيّبْ فَ حَقْلو.
\v 25 وْوَقْتْ لَ ناموا النّاِسْ جا عَدوهُ وْبَذَرْ زيوانْ بَينات الحنْطَة وْراحْ.
\v 26 وْوَقْتْ لَ اخْضَرّ وْسَنْبَلْ، هاك الوَقْت الزّيوانْ زاِ بَيَّنْ.
\v 27 وقَرَّبوا خدّاِمينْ سَيّد البَيت وْقالولو: ’سَيّدْنا، موُ كْوا بْذارْ طَيّبْ بَذَرْتْ فَ حَقْلكْ؟ من اَينْ جاهُ زيوانْ؟‘
\v 28 قالْلنْ: ’زَلَمِة عَدو سَواها.‘ عَبيدو قالولو: ’تْريد نْروُحْ نْقَطّعو؟‘
\v 29 قالْلنْ: ’لا، بْشانْ لا وانْتنْ تْقَطعون الزّيوانْ، تقْلَعونْ حنْطَة زاِ مَعو.
\v 30 خَلَّوا يگْبَرون اثْنَينتنْ مَعْ بَعْضنْ دي لَلّحْصادْ. وْوَقْتْ الّحْصادْ تَ اقولْ للحصّادينْ: قَطْعوا لمّوا قَبلْ كلْ شي الزّيوان وْسَوَوهُ حَزْماتْ للحَرق، وْبَعْدا لمّوا الحنْطَة لَعَنابري.‘“
\s مَثَل حَبّاية الخَرْدَلْ
\r (مرقس 4‏:30‏–32، لوقا 13‏:18‏–19)
\p
\v 31 ومَثَلْ لخْ مَثَّلْلنْ قالْ: ”مَلَكوت السَّماواتْ يشْبَه حَبّاية خَرْدَلْ أَخَذْ زَلَمِة بَذَرا فَ حَقْلو.
\v 32 وْهاي أَنْعَمْ حَبّاية منْ كلْ حَبْ لَ ينْزرعْ، بَسْ وَقْتْ لَ تطْلَع وْتگْبَر تْسيِرْ أَگْبَرْ منْ كلّ الزَّرايع، تْسيِر سجَرَة تجي طْيوُر السَّما وتْعَشْعشْ ف شيقانا.“
\s مَثَل الخَميرِة
\r (لوقا 13‏:20‏–21)
\p
\v 33 وْقالْلنْ مَثَلْ لخْ: ”مَلَكوت السَّماواتْ يشْبَه هاك خَميرِة لَ اخَذْتْ حَطّتا مَرَة فَ عَجْنة ثَثْ كَيلاتْ دَقيِق دي لَمَنْ اخْتَمَر العَجينْ كلّو.“
\s يَسوُعْ والامْثال
\r (مرقس 4‏:33‏–34)
\p
\v 34 هَوذْ كلّنْ حَكاهنْ يَسوُعْ بامْثال رْموز لَلَمّات النّاِس، وْبَلا مَثَلْ رَمْزْ ما كانْ يحْكي مَعنْ.
\v 35 وْكذاِ تَ يتمْ شي لَ انْقالْ بالنَّبي لَ قالْ: ”أَفْتَحْ ثمّي بامْثالْ، وَاكْشف اسْرارْ مَستوُرَة منْ قَبلْ لَ تنْحَطّ أَساسات الكَونْ.“
\s تَفسير مَثَل الزّيوان
\p
\v 36 هاك الوَقْتْ، يَسوُعْ خَلّى لَمّات النّاِس وْجا للبَيت، وْقَرَّبوا تَلاميذو لَعنْدو وْقالولو: ”فَسّر لْنا هاكْ مَثَل الزّيوانْ والحَقلْ.“
\v 37 رَدْ عَلَينْ قالْلنْ: ”هاكْ لَ بَذَر بْذار الطَّيّب، ابْن الانْسانْ واِ.
\v 38 والحَقلْ، هَالدّنْياِ ياِ، وبْذار الطَّيّب اولاد المَلَكوتْ ناِ، والزّيوان اولاد الشَّرّيرْ ناِ،
\v 39 والعَدو لَ بَذَرن الشّيِطانْ واِ، والّحْصادْ، آِخر الدَّهرْ، والحصّاِدين المَلايكِة ناِ.
\v 40 بَقى كَما لَ ينْقطعْ ينْلَمّ الزّيوان وينْحرقْ ف النّارْ، كذاِ تَ يسيِرْ ف آِخْرة هَالدّنْياِ هاي.
\v 41 ابْن الانْسانْ تَ يبْعَثْ مَلايكتو، وْتَ يقْطَعون يلمّونْ منْ مَلَكوتو كلْ لَ يعَثْورون وْيتْعَثْوَرونْ ف الإثمْ.
\v 42 ويكبّوون فَ آتون النّار. هَونَكْ تَ يكون البكا وْسَكّ الاضْراسْ.
\v 43 هاك الوَقْت، البارّين تَ ينَورونْ كَما الشَّمْسْ فَ مَلَكوتْ أَبوونْ. لَ لهُ أَذانْ تَ يسْمَعْ، خَلّي يسْمَعْ!
\s مَثَل الكَنز والجَّوهَرَة والشَّبَكِة
\p
\v 44 ”ويشْبَه مَلَكوت السَّماواتْ كَنْزْ مَطْموُرْ فَ حَقلْ أَراهُ واِحدْ رجّال وْطَمَرو، وْمنْ فَرْحتو راحْ باعْ كلْ شي لَ لهُ واشْتَرى هاك الحَقلْ.
\p
\v 45 ”ويشْبَه زاِ مَلَكوت السَّماواتْ رجّالْ تاجرْ لولو يدَوّر عَلى حَبّات لولو كْوَيسِة،
\v 46 وْلَمَنْ أَرى حَبّةْ لولو كْثيرْ غالِّة، راحْ باعْ كلْ شي لَعنْدو واشْتَراها.
\p
\v 47 ”ويشْبَه زاِ مَلَكوت السَّماواتْ شَبَكة صَيدْ نَزَّلووا ف البَحر وْلَمّتْ منْ كلْ جنْسْ.
\v 48 ولَمَن انْتَلَتْ، طاِلَعووا للشّاطي، وْقعْدوا نَقَّوا، الّكْواسْ تَلَوونْ فَ فَرايغْ والموُ كْواس كَبّوونْ لَ بَرّا.
\v 49 كذاِ تَ يسيِرْ ف آِخر الدَّهرْ: تَ يطْلَعون المَلايكِة وْيطاِلعون الشَّرّيرينْ منْ بَين البارّين.
\v 50 ويكبّوونْ فَ آتون النّارْ. هَونَكْ تَ يكون البكا وْسَكّ الاضْراسْ.“
\p
\v 51 يَسوُعْ قالْلنْ: ”فهمْتنْ هَوذْ كلّنْ؟“ قالولو: ”نَعمْ سَيّدْنا.“
\v 52 قالْلنْ: ”منْ هاي كلْ واِحدْ منْ مْعَلْمين النّاموسْ يسيِر تَلْميذْ لَ مَلَكوت السَّماواتْ يشْبَه زَلَمِة سَيّد بَيتْ يطاِلعْ منْ كَنْزو جْدادْ وعْتاقْ.“
\s النّاصْرَة موُ تقبَل تضيف يَسوُعْ
\r (مرقس 6‏:1‏–6، 4‏:16‏–30)
\p
\v 53 وْبَعدْ لَ قالْ يَسوُعْ هَالامْثال وْخَلَّصْ،
\v 54 راحْ منْ هَونَك وْجا لَ بَلَدو، وْكانْ يعَلّمنْ فَ مجاِمعنْ، وْبَقى يتْعَجَّبونْ ويقولونْ: ”من اَيلو هاذْ هَالحكْمِة وْهَالعَجايبْ؟
\v 55 لَيشْ موُ ابْن النّجّار واِ هاذْ؟ وامّو اسْما مَرْيَمْ، واخوتو يَعْقوب وْيوسي وْشَمْعون وْياهوذا؟
\v 56 وْخَواتو كلّتنْ موُ كْوا عنّا ناِ؟ من اَيلو بَقى كلْ هَالشِّي هاذْ؟“
\v 57 وْكانْ يتْعَثْوَرونْ فِيو. يَسوُعْ قالْلنْ: ”ما في نَبي منْهانْ غَيرْ فَ بَلَدو وْفَ بَيتو.“
\v 58 وْما سَوى هَونَك كْثيرْ قوّاتْ عَجايبِيِّة منْ لَ ما كانْ عنْدنْ إيمانْ.
\c 14
\s قَطع راسْ يوحَنّا المَعْمَذانْ
\r (مرقس 6‏:14‏–29، لوقا 9‏:7‏–9)
\p
\v 1 فاك الوَقْتْ سمعْ هيروُدسْ رَيّس الرّبع اخْبارْ يَسوُعْ،
\v 2 وْقالْ لَ حاشيتو: ”هذا يوحَنّا المَعْمَذانْ واِ، قامْ منْ بَين المَيتينْ، وْمنْ هاي عَجايب تْسيِر عَلى ايدو.“
\p
\v 3 وْهيروُدسْ كانْ كلْمسكْ يوحَنّا وْشَدَّدوا وْكَبّو ف الحَبْسْ لَخاطرْ هيروُديّا مَرةْ أَخوهُ فيلبُّسْ،
\v 4 منْ لَ كانْ يوحَنّا يقوللو: ”موُ يحلّ تْسيِرْ لكْ مَرَة.“
\v 5 وْكان يريد يقْتلو بَسْ كانْ يخاف م الشَّعْبْ، منْ لَ كانْ نَبي عنْد الشَّعْبْ.
\v 6 وْلَمَنْ صارْ عيدْ ميلادْ هيروُدسْ، رقْصتْ بنْتْ هيروُديّا قدّام المنْتكْيين، وْطَيَّبت كيِفْ هيروُدسْ.
\v 7 وْمنْ هاي، حَلَفْلا حلْفاناتْ تَ يعْطِيا أَيشْ لَ طَلَبتْ.
\v 8 وهيِّ، كَما لَ كانْ كلْعَلَّمتا أمّا، قالتْ: ”اعْطيني هَونْ فَ طَبَقْ راسْ يوحَنّا المَعْمَذانْ.“
\v 9 المَلكْ صعْبتْلو، بَسْ لَخاطرْ الحلْفاتْ والحضّار المنْتكْيينْ أَمَرْ تَ تنْعَطى طَلَبا.
\v 10 وْبَعَثْ قَطَعْ راسْ يوحَنّا ف الحَبْسْ.
\v 11 وْبَعَثْ جابْ راسو فَ طَبَقْ، وانْعَطى للبنْتْ والبنْتْ جابتو لامّا.
\v 12 وْجَوا تَلاميذو وْشالوا جثّتو وْقَبَروهُ، وْجَوا خَبَّروا يَسوُعْ.
\s يَسوُعْ يطَعّم خَمْسة اَلاف رجّال
\r (مرقس 6‏:30‏–17، يوحنّا 6‏:1‏–14)
\p
\v 13 يَسوُعْ وَقْتْ لَ سمعْ، طَلَعْ منْ هَونَكْ فَ سَفّينِة لَ ارْضْ قافوُرَة بْوَحْدو. وْلَمَنْ عَرَفوا لَمّات النّاِسْ طَلَعوا خَلْفو م الّبْلادْ مَشي عَ الاجْرَينْ.
\v 14 وْطَلَّعْ يَسوُعْ أَرى النّاِسْ طَلْقاتْ طَلْقات، وْحَنْ قَلْبو عَلَين وْشَفى مَراضتنْ.
\v 15 وْلَمَنْ مَسَّت المَسا قَرَّبوا لَعنْدو تَلاميذو وْقالولو: ”أَرْضْ قافوُرَة ياِ، وْفاتْ فِيا وَقْتْ، قَولْ للنّاِسْ تَ يروُحونْ للّضياع وْيشْتَرَولنْ لقْمةْ أَكَلْ.“
\v 16 قالْلنْ: ”موُ يلْزَم يروُحونْ، انْتن اعْطَونْ تَ ياكْلونْ.“
\v 17 قالولو: ”ما في عنّا هَونْ غَيرْ خَمْسةْ رغْفِة وْسَمَكْتَينْ.“
\v 18 يَسوُعْ قالْلنْ: ”جبوا لي ناِ لَ هَونْ.“
\v 19 وأَمَر النّاِسْ تَ ينْتَكَونْ عَ الاَرْضْ، وَاخَذْ هَوك الخَمْسة رغْفِة والسَّمَكتَين وْطَلَّعْ ف السَّما وْباِرَك وْكَسَر وْعَطى لَتَلاميذو وْتَلاميذو حَطّوا قدّامْ لَمّات النّاِسْ.
\v 20 وكلّنْ أَكَلوا وْشبْعوا وْرَفَعوا اثْناعْشْ قفِّة متْليِّة فضْلاتْ كساِري.
\v 21 وْهَوك ناِسْ لَ اكَلوا كانوا خَمْسة اَلاف، غَير النّسْوانْ والصّبيانْ.
\s يَسوُعْ يمْشي عَ المَي
\r (مرقس 6‏:45‏–52، يوحنّا 6‏:15‏–21)
\p
\v 22 وْراساً، جَبَرْ يَسوُعْ تَلاميذو تَ يطْلَعونْ للسَّفّينِة ويروُحونْ قدّامو لَ شاطي اللاخْ عَلى قَدْ ما يصْرفْ لَمّات النّاِسْ.
\v 23 وْلَمَنْ صَرَف اللَمّات طَلَعْ عَ الجَّبَلْ بْوَحْدو تَ يصَلّي. وْوَقْتْ لَ عَتَّمَت، بْوَحْدو كانْ هَونَكْ.
\v 24 والسَّفّينِة كانْ كلْبَعَّدت كْثيرْ م الشّاطي والمَوجْ كانْ يوَدّيا وْيجيبا، منْ لَ ف الوچْ كانْ يضْرَب الهَوا.
\v 25 وْف آِخرْ ربعْ م اللَيلْ، جا لَ عنْدن يَسوُعْ ماِشي عَ المَي.
\v 26 وَارَوه تَلاميذو ماِشي عَ المَي وانْهَبَطوا، قالوا: ”رويا كاذْبِة واِ.“ وْمنْ خَوفنْ زَعَقْوا.
\v 27 بَسْ يَسوُعْ راساً حَكى مَعنْ وْقالْلنْ: ”قَوَّوا قَلْبْكنْ أَنا واِ، لا تْخافونْ.“
\p
\v 28 رَدْ بطْرسْ قالْلو: ”سَيّدي! لَ انْتَ واِ، أأمرْني تَ آجي لَ عنْدكْ عَ المَي.“
\v 29 يَسوُعْ قالْلو: ”تَعان.“ وْنزلْ بطْرسْ م السَّفّينِة وْمشي عَ المَي تَ يّجي لَ عنْدْ يَسوُعْ.
\v 30 بَسْ لَمَنْ أَرى الهَوا قَوي واِ، خاف وْبَدا يغْرَق، وْرَفَعْ صَوتو وْساحْ: ”سَيّدي نَجّيني.“
\v 31 وْراساً مدّ ايدو سَيّدْنا ومسْكوا وْقالْلو: ”يا قَلَيل ايمانْ لَيشْ شَكَّيتْ؟“
\p
\v 32 وْلَمَنْ طَلَعوا للسَّفّينِة وَقَّف الهَوا.
\v 33 وْجَوا هَوكْ لَ ف السَّفّينِة سَجَدولو وْقالوا: ”حَقّ اليَقين ابْن اَلله انْتَ.“
\s يَسوُعْ يشْفي كلّ المَراضىِ
\r (مرقس 6‏:53‏–56)
\p
\v 34 وْساقوا جَوا لَ ارْضْ جَنّيسارْ.
\v 35 وعَرَفوهُ اَهلْ هاك الدّيرِة، وْبَعَثوا يخَبْرونْ لَ كلّ الّضْياع حَولنْ حَوالَين، وْجابولو كلّ المَراضىِ.
\v 36 وْكانْ يتْوَسَّلولو تَ يخَلّيين يدقّونْ، هَمَنْ رَدّة زْبونو بَس. وْلَ دَقّوا انْشَفَوا.
\c 15
\r (مرقس 7‏:1‏–13)
\p
\v 1 هاك الوَقْتْ، قَرَّبوا لَ عنْدْ يَسوُعْ ناِسْ م الفَرّيسيِّة ومْعَلْمين النّاموسْ م القدْس وْقالولو:
\v 2 ”لَيشْ تَلاميذكْ يكْسرونْ تَقاليد الّشْيوُخَة، وْموُ يخَسْلون ايدَينْ وَقْتْ لَ ياكْلون غْبَيزْ؟“
\v 3 يَسوُعْ جاِوَبنْ قالْلنْ: ”وانْتنْ لَيشْ تكْسرونْ وَصيّة اَلله لَخاطرْ تَقاليدْكنْ؟
\v 4 أَلله قالْ: ’كَرّمْ أَبوك وامّك‘ وْ’هاكْ لَ يتْنَعَّلْ عَلى أَبوهُ وامّو مَوتْ تَ يموتْ.‘
\v 5 بَسّ انْتن تْقولونْ: أَينا لَ يقولْ لأبْ يا لأم: ’قَرْباني واِ شي لَ تنْتفعْ فِيو منّي،‘ وْموُ يكَرّمْ أَبوهُ وْلا أمّو.
\v 6 وبَطَّلتنْ كلْمة اَلله لَخاطرْ تَقْليدْكنْ.
\v 7 يا مْنافْقينْ! كْوَيّس تْنَبّا عَلَيكن اِشعْيا النَّبي وْقالْ:
\v 8 ’هَالشَّعْبْ هاذْ بْشفاِترو يكَرّمْني بَسْ قَلْبو كْثير بْعيد واِ منّي.
\v 9 وعْبادِة باطْلِة يعْبدوني، وَقْتْ لَ يعَلمون عْلومْ أَوامرْ بَشَر ياِ.‘“
\s شي لَ ينَجّس الانْسانْ
\r (مرقس 7‏:14‏–23)
\p
\v 10 وْساحْ لَمّات النّاِسْ وْقالْلن: ”اسْمَعوا وافْهَموا:
\v 11 موُ شي لَ يدْخلْ لَ الثّمّ ينَجّس الانْسانْ، بَلىِ شي لَ يطْلَع م الثّم هاك ينَجّس الانْسانْ.“
\v 12 هاك الوَقْتْ قَرَّبوا تَلاميذو وْقالولو: تعْرف الفَرّيسيِّة لَ سمْعوا هَالكلْمِة انْحَمَقوا؟
\v 13 رَدْ قالْلنْ: ”كلْ غَرْسِة ما غَرَزا أَبوي السَّماوي، تَ تنْقلعْ م العرْقْ.
\v 14 عيفوونْ عَمايِة يسوُقونْ عَمايِة. وَقْتْ لَ يمْسك اَعْمي ف ايد اَعْمي كَماهُ، اثْنَيننْ زاِ ف جورَة يقَعونْ.“
\v 15 رَدْ شَمْعونْ بطْرس وْقالْلو: ”سَيّدي! فَسّر لْنا هَالمَثَلْ.“
\v 16 رَدْ قالْلنْ: ”أنْتنْ زاِ دي للسَّعْ موُ تفْتهْمونْ؟
\v 17 موُ تعْرفونْ شي لَ يدْخلْ لَ الثّم للجَّوف يروُح، وْمنَونَك لَ بَرّا؟
\v 18 بَسْ شي لَ م الثّمْ يطْلَعْ، م القَلْبْ يطْلَع، وْهاذْ واِ لَ ينَجّس الانْسانْ:
\v 19 م القَلْبْ تطْلَع افْكار الشَّر: زنىِ، قَتلْ، فَجارَة، سرْقَة، شَهادِةْ زوُرْ، كفرْ،
\v 20 هَوذْ ناِ لَ ينَجسون الانْسانْ. بَسْ واِحدْ لَ اكَلْ بَلا خَسّيل ايدَينْ موُ يتْنَجَّسْ.“
\s إيمان المَرَة الكَنْعانِيِّة
\r (مرقس 7‏:24‏–30)
\p
\v 21 وْطَلَعْ يَسوُعْ منْ هَونَك وْجا لَ نَواحي صور وْصَيدا.
\v 22 والّا مَرَة كَنْعانِيِّة منْ هَوك النَّواحي، طَلَعت تْسيِح وتْقول: ”ارْحَمْني يا سَيّدي، يا ابنْ داهودْ! بنْتي بْقَسْوِة يسوُقا شيِطانْ.“
\v 23 بَسْ هوّاِ ما رَدْ عَلَيا بْكلْمِة. تَلاميذو قَرَّبوا وْطَلَبوا منّو وْقالوا: ”اصْرفا، تْسيِحْ خَلْفْنا.“
\v 24 بَسْ هوّاِ جاِوَبن وْقالْلنْ: ”ما انْبَعَثْتُ غَيرْ للخواِريف الضّايعَة منْ بَني اسْرائيلْ.“
\v 25 بَسْ هيِّ جَتْ سَجَدتْلو وْقالتْ: ”سَيّدي، عينْنيّ!“
\v 26 قالْلا: ”موُ كْوَيّس ينْأخذ غْبَيز الاولاد وْينْكَبْ للكْلاِبْ.“
\v 27 هيِّ قالتْ: ”نَعمْ سَيّدي، الّكْلاِبْ زاِ ياكْلونْ منْ فَتاتي لَ تقَعْ منْ صفْرة اسْيادنْ ويعيشونْ.“
\v 28 هاك الوَقْتْ يَسوُعْ قالْلا: ”يا مَرَة! عَظيم واِ إيمانْكِ. خَلّي يكون لْكِ شي لَ تْريدينْ.“ وانْشَفَتْ بنْتا مناك السّاعَة.
\s يَسوُعْ يشْفي مَراضىِ كْثيرْ
\p
\v 29 وانْتَقَلْ يَسوُعْ منْ هَونَك وْجا لَ شاطي بَحْر الجَّليلْ، وْطَلَعْ للجَّبَلْ وْقعدْ هَونَكْ.
\v 30 وْجَوا لَعنْدو ناِسْ طَلْقاتْ طَلْقات وْمَعنْ عرْجين وْعَمايِة وْخرْسين وْفلْجين وْغَيرنْ كْثير وْحَطّوونْ عنْد اجْرَينْ يَسوُع وْشَفاهنْ.
\v 31 وتْعَجَّبوا هَوكْ لَمّات النّاِس وْهنّاِ يرَون الخرْسينْ يحْكَون، والفلْجينْ ينْشَفَونْ والعرْجينْ يمْشَونْ، والعَمايِة يرَون، وْسَبَّحوا لإله اسْرائيلْ.
\s يَسوُعْ يطَعّم أَرْبَعة اَلاف رجّال
\r (مرقس 8‏:1‏–10)
\p
\v 32 وْساحْ يَسوُعْ تَلاميذو وْقالْلنْ: ”أَشْفقْ عَلى لَمّة النّاِسْ هاي، صارْلنْ ثَةّ اِيم عنْدي، وْما لن شي تَ ياكْلون، وْموُ اريد اَصْرَفنْ صايمين بْشانْ لا يخَورونْ م الجّوُع ف الطَّريِقْ.“
\v 33 تَلاميذو قالولو: ”من اَينْ لْنا ف الچّوُل غْبَيز يشَبّعْ هَاللَمِّة كلّا؟“
\v 34 يَسوُعْ قالْلنْ: ”كَمْ رَغيفْ عنْدْكنْ؟“ قالولو: ”سَبْعَة وشْوَيِّة سَمَك زْغارْ.“
\v 35 وَامَرْ لَمّات النّاِسْ تَ ينْتَكَونْ عَ الاَرْضْ،
\v 36 وَاخَذ السَّبعَة رغْفِة والسَّمَك وْسَبَّح وْكَسَر وْعَطى لَتَلاميذو وْتَلاميذو عَطَوا لَلَمّات النّاِسْ.
\v 37 وَاكَلوا كلّنْ وْشبْعوا، وْرَفَعوا سَبْع سْلاِل متْليِّة شي لَ فضلْ م الكساِري.
\v 38 وْهَوكْ لَ اكَلوا كانوا أَرْبَعْة اَلافْ رجّالْ غَير النّسْوانْ والاولادْ.
\v 39 وْوَقْتْ لَ صَرَف لَمّات النّاِسْ طَلَعْ للسَّفّينِة وْجا لَ نَواحي مَگدو.
\c 16
\s عَلامات الازمنِة
\r (مرقس 8‏:11‏–13، لوقا 12‏:54‏–56)
\p
\v 1 وْقَرَّبوا فَرِّيسيِّة وصَدّوقِيِّة تَ يجَربوهُ، وْطَلَبوا منّو يوَرّيينْ عَلامِة عَجيبِة م السَّما
\v 2 جاِوَبن قالْلنْ: ”وَقْتْ لَ تْمَسّي المَسا تْقولونْ: ’صَحو واِ، منْ لَ ك احْمَرّت السَّما.‘
\v 3 والصّبْحْ تْقولون: ’اليَومْ شتاِ واِ، منْ لَ ك احْمَرّت السَّما وْعَبستْ.‘ يا مْنافْقينْ، وچّ السَّما تعْرفونْ تفْحَصونْ، عَلاماتْ هَالزَّمانْ هاذْ موُ تعْرفونْ تفْرقونْ؟
\v 4 نَسلْ شَرّير وْزاني عَلامِة يطْلبْ، وعَلامِة موُ ينْعَطى لهُ غَيرْ عَلامةْ يونان النَّبي.“ وْعافن وْراحْ.
\s خَمير الفَرّيسيِّة والصَّدّوقِيِّة
\r (مرقس 8‏:14‏–21)
\p
\v 5 وَقْتْ لَ قَطَعوا تَلاميذو لَ شاطي اللاخْ نسْيوا ياخْذونْ مَعنْ غْبَيزْ.
\v 6 وْهوّاِ قالْلنْ: ”بالْكنْ وايّاكنْ منْ خَميرة الفَرّيسيِّة والصَّدوقِيِّة.“
\v 7 بَسْ هنّاِ بَقى يفْتكْرونْ فَ قَلْبنْ، ويقولونْ ما جبْنا مَعْنا غْبَيزْ.
\v 8 يَسوُعْ عَرَف وْقالْلنْ: ”يا قَليلين ايمانْ! لَيشْ تفْتكْرونْ فَ قَلْبْكنْ عَلى هاي لَ ما جبْتن غْبَيزْ؟
\v 9 للسَّعْ ما كلْفهمْتنْ؟ ما بَقْ يجي لَبالْكن الخَمْسة رغْفِة للخَمْسة اَلاف وْكَمْ قفِّةْ كساِري رَفَعْتنْ،
\v 10 وْلا هَوك السَّبْعَةْ رغْفِة للاَرْبَعْة اَلاف وْكَمْ سَلِّة رَفَعْتنْ؟
\v 11 أشْوَنْ ما فهمْتنْ موُ عَ الّغْبَيزْ قلْتولْكنْ، بَلىِ بْشان تْديرونْ بالْكنْ منْ خَميرة الفَرّيسيِّة والصَّدّوقِيِّة؟“
\v 12 هاك الوَقْتْ فهْموا موُ منْ خَميرة الّغْبَيزْ قالْلنْ تَ يديرونْ بالنْ، بَلىِ منْ تَعاليم الفَرّيسيِّة والصَّدّوقِيِّة.
\s بطْرسْ يقولْ لَ يَسوُعْ: أنْتَ واِ المَسيحْ
\r (مرقس 8‏:27‏–30، لوقا 9‏:18‏–21)
\p
\v 13 وَقْتْ لَ جا يَسوُعْ لَ ديرة قَيصَريّة فيلبُّس، سَأَل تَلاميذو قالْلنْ: ”أَيش يقولون النّاِسْ عَلَي اَنا ابْن الانْسانْ؟“
\v 14 قالوا: ”في لَ يقولون: ’يوحَنّا المَعْمَذانْ واِ،‘ وْغَيرنْ: ’ايِليّا‘ وْغَيرنْ: ’اِرميا، يا واِحدْ م الاَنْبِيا.‘“
\v 15 قالْلنْ: وانْتنْ منْ تْقولون اَنا؟
\v 16 رَدْ شَمْعونْ بطْرس وْقالْ: ”أنْتَ واِ المَسيح ابْن اَلله الحَي.“
\v 17 رَدْ يَسوُعْ قالْلو: ”هَنيّتك يا شَمْعون ابنْ يَونا! موُ لَحْم وْدَمْ كَشَفْ لكْ هَالسّرْ، بَلىِ أَبوي لَ ف السَّماواتْ.
\v 18 وَانا زاِ أَقولْ لكْ: أنْتَ كافْ حَجَر انْتَ، وْعَلى هَالكافْ تَ ابْني بيعتي، وابْواب الهاويِة ما تَ تْتيِق عَلَيا.
\v 19 ولك تَ اعْطي مفاِتيح مَلَكوت السَّماوات. وْكلْ شي لَ ترْبطو ف الاَرْضْ تَ يكونْ مَرْبوُط ف السَّما. وْشي لَ تْحلّو ف الاَرْضْ تَ يكونْ مَحْلولْ ف السَّما.“
\v 20 هاك الوَقْتْ وَصّى تَلاميذو لا يقولونْ لاَحَّدْ المَسيحْ واِ.
\p
\v 21 وْمنْ هاك الوَقْتْ بَدا يَسوُعْ يكْشفْ لَتَلاميذو ويقولْلنْ، تَ يروُحْ لَلقدْس وْيتْعَذَّب كْثيرْ م الّشْيوُخَة وگْباريّة الكَهَنَة ومْعَلْمين النّاموسْ وْينْقتل، وْثالثْ يَوم يقومْ.
\v 22 وَاخَذو بطْرس، وْبَدا يعَلّي صَوتو عَلَيو ويقولْلو: ”سَيّدي! حاشاك يسيِر لكْ هَالشِّي هاذْ!“
\v 23 بَسْ هوّاِ انْدار وْقالْ لَبطْرسْ: ”روُحْ منْ وچّي يا شيِطانْ! حَجَرةْ عَثْوَرَة أنْتَ لي، منْ لَ موُ تفْتكرْ فَ أمور اَلله، بَليِ فَ أمور البَشَرْ.“
\v 24 هاك الوَقْتْ يَسوُعْ قالْ لَتَلاميذو: ”لَ يريدْ يجي خَلْفي، لازمْ يكْفرْ فَ نَفْسو وْيحْملْ صَليبو وْيجي خَلْفي.
\v 25 لَ يريدْ يخَلّصْ نَفْسو، يتَوبلا. وْلَ يتَوبلْ نَفْسو لَخاطري تَ يلْقاها:
\v 26 أَيشْ ينْتفع الانْسانْ لَ ربح الدّنْياِ كلّا وْخسرْ نَفْسو؟ وَايشْ يعْطي الانْسانْ مْبَدالْ نَفْسو؟
\v 27 منْ لَ جاِييِ واِ ابْن الانْسانْ فَ مَجد اَبوهُ مَعْ مَلايكتو القَدّيسينْ، وْهاك الوَقْتْ تَ يحاِسبْ كلّ انْسانْ عَلى موجب اعْمالو.
\v 28 الحَقّ اَقولْكنْ: في ناِسْ قايمينْ هَونْ موُ يذوُقون المَوتْ لَ موُ يرَون ابْن الانْسانْ جاِييِ فَ مَلَكوتو.“
\c 17
\p
\v 1 وْبَعدْ سةّ اِيمْ، يَسوُع اَخَذْ بطْرس وْيَعْقوب وْيوحَنّا أَخوهُ وْطاِلَعنْ لَ جَبَلْ عاِلي بْوَحْدنْ.
\v 2 وتْغَيَّرْ يَسوُعْ قدّامن، وْنَوَّرْ وچّو كَما الشَّمْس، وْحَويسو ابيَضّوا كَما الضَّو.
\v 3 وْظَهَرْلنْ موسى وايِليّا وْهنّاِ يحْكَونْ مَعو.
\v 4 ورَدْ بطْرس وْقالْ لَيَسوُعْ: ”سَيّدي! كْوَيّس واِ لنا تَ نْكونْ هَون. وْلَ تْريدْ، تَ ننْصبْ هَونْ ثَثْ خِيَم، وحْدِة لك وْوحْدِة لَموسى وْوحْدِة لايِليّا.“
\v 5 وْهوّاِ بَعدْ يحْكي، والّا غَيمِة ضَويِّة فَيَّلتْ عَلَين، وْصارْ صَوتْ م الغَيمِة يقولْ: ”هذا واِ ابْني الحَبيبْ لَ فرحْتُ فِيو، لهُ اسْمَعوا.“
\p
\v 6 وَقْتْ لَ سمْعوا التَّلاميذْ، وَقَعوا عَلى وچّن وْخافوا كْثيرْ.
\v 7 قامْ يَسوُعْ قَرَّبْ منّن وْدَقّن وْقالْ: ”قوموا لا تْخافونْ.“
\v 8 وْرَفَعوا عَينَين، وْما ارَوا أحَّدْ غَيرْ يَسوُع بْوَحْدو.
\v 9 وْهنّاِ ناِزلينْ م الجَّبَلْ، وَصّاهنْ يَسوُعْ قالْلنْ: ”لاسْم انْسانْ لا تْقولون عَلى هَالرّويا لَ ارَيتنْ لَ موُ يقوم ابْن الانْسانْ م المَيتينْ.“
\v 10 وْسَأَلوهُ تَلاميذو قالولو: ”بَقى لَيش مْعَلْمين النّاموس يقولون: ايِليّا لازمْ يجي قَبلْ؟“
\v 11 رَدْ قالْلنْ: ”ايِليّا يجي قَبلْ تَ يكَمّلْ كلْ شي.
\v 12 بَسّ اَقلْكنْ: هاي ايِليّا جا وْما عَرَفوهُ، وْسَوا فِيو كلْ شي لَ رادوا. كذاِ ابْن الانْسانْ زاِ تَ يتْعَذَّبْ منّنْ.“
\v 13 هاك الوَقْت، افْتَهَموا التَّلاميذْ عَلى يوحَنّا المَعْمَذانْ قالْلنْ.
\s المَسيحْ يشْفي وَلَدْ فِيو شيِطانْ
\p
\v 14 وَلَمَنْ جَوا لَعنْدْ لَمّة النّاِسْ، قَرَّبْ لَعنْدو زَلَمِة وْرَكعْ عَلى ركَبو،
\v 15 وْقالْلو: ”سَيّدي ارْحَمْني! ابْني يقَعْ بالقَمَر، وْحالتو بالوَيلْ: وَقْتاتْ ف النّارْ يقَع وْوَقْتات ف المَي.
\v 16 جبْتوهُ لَعنْد تَلاميذكْ، بَسْ ما تاقوا يشْفوهُ.“
\v 17 رَدْ يَسوُعْ قالْ: ”آخْ يا جيلْ بَلا إيمانْ، جيل اَعْوَج، لأَيمَتْ تَ ابْقى مَعْكنْ؟ لأَيمَتْ تَ اتْحَمَّلكنْ؟ جبوا لي واِ لَهَونْ.“
\v 18 وْزَعَقْ يَسوُعْ عَلَيو صَوت وْطَلَعْ منّو الشّيِطانْ، وانْشَفى الوَلَدْ منْ هاك السّاعَة.
\v 19 هاك الوَقْتْ جَوا التَّلاميذْ لَعنْدْ يَسوُع وْهوّاِ بْوَحْدو وْقالولو: ”لَيشْ نحْناِ ما تقْنا نشْفِيو؟“
\v 20 يَسوُعْ قالْلنْ: ”منْ لَ ما عنْدْكنْ إيمان. الحَقّ اَقولْكن: يكونْ فيكنْ إيمان مْقَدْ حَبّايةْ خَرْدَلْ، تَ تْقولونْ لَهَالجَّبَلْ: ’روُحْ منْ هَون.‘ وْتَ يروُح. وْشي ما تَ يصْعَبْ عَلَيكنْ.
\v 21 بَسْ هَالجّنْسْ موُ يطْلَعْ غَيرْ بالصَّومْ والصَّلاة.“
\p
\v 22 وَقْتْ لَ كانوا ف الجَّليلْ، يَسوُعْ قالْلن: ”ابْن الانْسانْ تَ يتْسَلَّمْ لايدَين النّاِسْ.
\v 23 وْتَ يقْتلوهُ، وْثالثْ يَومْ تَ يقوم.“ وْصعْبتْلن وْحزْنوا كْثيرْ.
\s يَسوُعْ يدفَع ضَريبة الهَيكَلْ
\p
\v 24 وَقْتْ لَ جَوا لَ كَفَرْناحومْ، قَرَّبوا هَوكْ لَ يلمّونْ ضَريبة الدّرْهمَينْ عَ الرّاس وْقالوا لَبطْرس: ”مْعَلّمْكن موُ يعْطي درْهمَينو؟“
\v 25 قالْلنْ: ”بَلىِ.“ وَقْتْ لَ دَخَلْ بطْرسْ للبَيتْ، يَسوُعْ راساً قالْلو: ”أَيشْ رايكْ شَمْعونْ؟ منْ منْ ياخْذون مْلوك الاَرْضْ خَراجْ يا ضَريبةْ راسْ؟ منْ اولادنْ والّا م الاجانبْ؟“
\v 26 شَمْعونْ قالْلو: ”م الاجانبْ.“ يَسوُعْ قالْلو: ”بَقى الاولادْ حرّينْ ناِ.
\v 27 بَسّ بْشانْ لا نحْمقنْ، روُحْ للبَحر وْكبْ فِيو صنّارة الصَّيد، وْأوَّلْ سَمَكِة تطْلَع، افْتَحْ ثمّا تَ تّرى فِيو سْتار يساوي أَرْبَعْ دَراهم، خذو واعْطي شي لَ عَلَي وْعَلَيكْ.“
\c 18
\s أَگْبَرْ واِحدْ فَ مَلَكوت السَّما
\p
\v 1 فاك السّاعَة قَرَّبوا التَّلاميذْ لَعنْدْ يَسوُع وْقالوا: ”منْ واِ الاَگْبَرْ فَ مَلَكوت السَّماواتْ؟“
\v 2 يَسوُعْ ساحْ لَعنْد و وَلَدْ وْوَقَّفو بَيناتنْ،
\v 3 وقال: ”الحَقّ اَقولْكنْ لَ موُ ترْجَعونْ وتْسيِرونْ كَما الاولادْ، موُ تدْخلونْ لَمَلَكوت السَّماواتْ.
\v 4 بَقى لَ ينَخّي نَفْسو كَما هَالوَلَدْ هاذْ، هوّاِ واِ لَ تَ يكون الاَگْبَرْ فَ مَلَكوت السَّماواتْ.
\v 5 وْمنْ لَ يقْبَلْ كَما هَالوَلَدْ باسْمي، لي يقْبَلْ.
\v 6 وْكلْ من يسيِرْ عَثْوَرَة لواِحدْ منْ هَوذ الّزْغار المومنينْ في، كانْ أَحْسَنْلو تتْعَلَّقْ فَ رَقبتو فَرْشة الرَّحى لَ يدَوّرا الّحْمار، وْينْكَبْ لَعَقْب البَحرْ.
\v 7 وَيل الدّنْياِ م العَثْوَراتْ، منْ لَ اجْباري تجي العَثْوَراتْ، بَسْ وَيلو هاكْ لَ تجي عَلى ايدو العَثْوَراتْ.
\v 8 بَقى لَ عَثْوَرتك ايدكْ يا إجْرك، اقْطَعا وْكبّا لَبْعيدْ منّكْ. أَحْسَنْ لكْ واِ تدْخل الحَياةْ بيدْ يا باجرْ مَقْطوُعَة منْ لَ يكونْ لك ايدْتَينْ واجرْتَين وْتقَعْ ف النّار الأَبَديِّة.
\v 9 و لَ عَينكْ عَثْوَرتك، اقْلَعا وْكبّا لَبْعيدْ منّكْ. أَحْسَنْ لكْ واِ بْعَينْ وحْدِة تدْخلْ الحَياةْ منْ لَ يكونْ لكْ عَينْتَين وْتقَعْ ف جْهَنَّم النّارْ.
\v 10 بالْكنْ وايّاكنْ تحْتقْرونْ واِحدْ منْ هَوك الّزْغارْ. أَقولْكنْ: مَلايكتنْ ف السَّما فَ كلْ وَقْت يرَونْ وچّ اَبوي لَ ف السَّماواتْ،
\s مَثَل الخاروفْ الضّايع
\p
\v 11 ”منْ لَ بْشان يخَلّصْ شي لَ تْتَوبَلْ كجّا إبْن الانْسانْ.
\p
\v 12 ”أَيشْ رايكنْ؟ لَ واِحدْ كانْ عنْدو ميةْ خاروف وْضاعْ واِحدْ منّنْ، موُ يعيف التّسْعَة وْتسْعينْ خاروفْ ف الجَّبَلْ ويروُح يدَوّرْ عَلاكْ لَ ضاعْ؟
\v 13 وْلَ اراهُ، الحَقّ اَقولْكنْ: يفْرَحْ فِيو أكْثَرْ منْ فَرْحتو ف التّسْعَة وْتسْعينْ لَ ما ضاعوا.
\v 14 كذاِ، موُ شي لَ يريدْ اَبوكن السَّماوي واِ تَ يتْتَوبَلْ واِحدْ منْ هَوك الّزْغارْ.“
\s وَقْتْ لَ يخطى أَخوك فَ حَقّك
\p
\v 15 ”بَقى لَ غلط اَخوكْ فَ حَقّكْ، روُحْ عاِتبو بَينك وْبَينو بَسْ. لَ سمعْ منّك، تْكونْ ربحْت اَخوكْ.
\v 16 وْلَ ما سمعْ منّكْ، وَدّي مَعكْ واِحدْ يا اثْنَين بْشانْ عَلى ثمْ شاِهدَينْ يا ثَثّ شْهود تْقوم كلْ كلْمِة.
\v 17 وْلَ ما سمعْ لَهَوكْ زاِ، قَولْ للبيعَة. وْلَ ما سمعْ للبيعَة زاِ، احْسبو كَما واِحدْ منْ هَوكْ لَ يلمّون الضَّرايب يا كَما واِحدْ وَثَني.
\v 18 الحَقّ اَقولْكنْ كلْ شي لَ ترْبطوهُ ف الاَرْضْ تَ يكونْ مَربوُطْ ف السَّما، وْشي لَ تْحلّوهُ ف الاَرْضْ تَ يكونْ مَحْلولْ ف السَّما.
\v 19 وَاقولْكنْ زاِ: لَ اثْنَينْ منْكنْ ف الاَرْضْ يتّفقونْ عَلى كلْ شي لَ يطْلبونْ، تَ يكونْلنْ منْ اَبوي السَّماوي،
\v 20 منْ لَ أَينْ لَ اجْتَمَعوا اثْنَينْ يا ثاثِة باسْمي، هَونَكْ بَيناتن اَنا.“
\s الّمسامَحَة
\p
\v 21 هاك الوَقْتْ قَرَّبْ بطْرسْ لَعنْدو وْقالْلو: ”سَيّدي! كَمْ كَرَّة لَ خطي أَخوي فَ حَقّي أَسامحو؟ دي لَ سَبعْ طرْقْ؟“
\v 22 يَسوُعْ قالْلو: ”موُ اقولْ لكْ دي لَ سَبعْ طرْقْ، بَليِ دي لَ سَبْعينْ كَرَّة سَبعْ طرْقْ.
\p
\v 23 ”منْ هاي تْشَبَّه مَلَكوت السَّماواتْ لَواِحدْ مَلكْ راد يحاِسبْ عَبيدو.
\v 24 وْلَمَنْ بَدا يحاِسبنْ، قَرَّبْ لَعنْد و واِحدْ كانْ مَدْيونْ لهُ بْعَشرْة اَلافْ وَزْنِة،
\v 25 وْمنْ لَ ما كانْ عنْدو تَ يوَفّي الدَّينْ، سَيّدو أَمَرْ تَ ينْباعْ هوّاِ وْمَرَتو واولادو وْكلْ شي لَعنْدو بْشان يوَفّي الدَّينْ.
\v 26 وكَبْ روُحو هاك الْعَبْد وْسَجَدْلو وْقالْلو: ’سَيّدي، دَخيلكْ طَوّلْ بالكْ عَلَي، وْكلْ شي تَ اوَفّي لكْ.‘
\v 27 وحَنْ سَيّدْ هاك العَبْدْ عَلَيو وْفَلَّتو وْساِمَحو ف الدَّينْ.
\v 28 وْطَلَعْ راحْ هاك العَبْدْ وَارى عَبْدْ منْ رفَقو كانْ مَدْيونْ لهُ بْميةْ دينار، وْمسكو من خْناقو وْقالْلو: ’اعْطيني شي لَ في لي عَلَيكْ.‘
\v 29 قامْ هاك العَبْدْ رَفيِقو كَبْ روُحو عَلى اجْرَيو وتْوَسَّلْلو وْقالْلو: ’دَخيلكْ، طَوّلْ بالك عَلَي، وْكلْ شي تَ اوَفّي لكْ.‘
\v 30 بَسْ ما رضي، وْراحْ كَبّو ف الحَبْسْ دي لَمَنْ يوَفّي دَينْ لَ في عَلَيو.
\v 31 وَقْتْ لَ ارَوا العَبيدْ رفَقنْ شي لَ صار، كْثيرْ صعْبتْلنْ وكْثيرْ حزْنوا، وْراحوا حَكَوا لَسَيّدنْ عَلى كلْ شي لَ صارْ.
\v 32 هاك الوَقْتْ، سَيّدو ساحو وْقالْلو: ’يا عَبْدْ شَرّير انْتَ واِ. هاك الدَّينْ كلّو ساِمَحْتوكْ فِيو منْ لَ طَلَبْتْ منّي.
\v 33 ما كانْ لازم انْتَ زاِ يحنْ قَلْبكْ عَلى رَفيِقكْ كَما لَ انا حَنْ قَلْبي عَلَيكْ؟‘
\v 34 وغضبْ عَلَيو سَيّدو وْسَلَّمو للمْعَذْبينْ تَ يعَذْبوهُ دي لَمَنْ يوَفّي كلْ شي لَ لهُ عَلَيو.
\v 35 كذاِ تَ يعاِملْكن اَبوي السَّماوي لَ ما ساِمَحْتنْ منْ كلْ قَلْبْكنْ، كلْ واِحد اَخوهُ، عَلى غَلْطاتو.“
\c 19
\p
\v 1 وَقْتْ لَ خَلَّصْ يَسوُعْ كَلامو، راحْ م الجَّليلْ لَحَدّ الياهوديِّة، لَخَلْفْ نَهْر الارْدنْ.
\v 2 وْجَوا خَلْفو ناِس كْثيرْ طَلْقاتْ طَلْقات، وْشَفاهنْ هَونَكْ.
\s يَسوُعْ موُ يقْبَل الطَّلاق
\p
\v 3 وْقَرَّبوا لَعنْدو فَرِّيسيِّة يجَرْبوهُ وْيسْأَلوهُ لَ كانْ يسيِرْ واِحد يطَلّقْ مَرَتو لَ أَينا سَبَبْ لَ كانْ؟
\v 4 هوّاِ رَدْ عَلَينْ قالْلنْ: ”ما قَرَيتنْ، هاكْ لَ خَلَقْ م البدايِة، ذَكَرْ وانْثيِ خَلَقنْ،
\v 5 وْقالْ: ’منْ هاي الرّجّال يخَلّي أَبوهُ وامّو ويلْحَقْ مَرَتو واثْنَينتن يسيِرونْ واِحدْ.‘
\v 6 يعْنيِ موُ اثْنَينْ صاروا، بَلىِ جَسَد واِحدْ. بَقى شي لَ أَلله يجْمَعو، انْسانْ لا يفَرّقو.“
\v 7 قالولو: ”لَيشْ بَقى موسى وَصّى تَ يعْطِيا وَرَقة فَكْ ويطَلّقا؟“
\v 8 قالْلنْ: ”منْ قَساوةْ قَلْبْكنْ سَمَح لْكنْ موسى تَ تْطَلقونْ نسْوانْكنْ. بَسْ ف البدايِة موُ كذاِ كانتْ.
\v 9 وَانا أَقولْكنْ: لَ يطَلّقْ مَرَتو بَلا لَ تزْني، وْياخذْ غَيرا يزْني. وْلَ ياخذ مْطَلَّقَة يزْني.“
\v 10 تَلاميذو قالولو: ”لَ كذاِ في لَومْ ف العَلاقَة بَين الرّجّالْ والمَرَة، مَعْناتا موُ أَحْسَنْ واِ واِحدْ يتْزَوَّجْ.“
\v 11 قالْلنْ: ”موُ كلّ انْسانْ خَرْجْ هَالكلْمِة واِ، غَيرْ هاكْ لَ انْعَطى من اَلله.
\v 12 منْ لَ في مخْصييينْ، منْ بَطنْ أمّنْ ولْدوا كذاِ. وفي مخْصييينْ، ناِسْ خَصَوون. وْفي مخْصييينْ، هنّاِ خَصَوا روُحنْ لَخاطرْ مَلَكوت السَّماواتْ. لَ يتيِق يكونْ خَرْجْ خَلّي يكونْ خَرْجْ.
\s يَسوُعْ يباِرك اولاد الّزْغارْ
\p
\v 13 هاك الوَقْتْ، جابولو اولادْ تَ يحطّ ايدو عَلَينْ ويصَلّي، بَسْ تَلاميذو زَعْوَقوا عَلَينْ.
\v 14 بَسْ يَسوُعْ قالْلنْ: ”خَلَّوا اولاد الّزْغار يجَون لَعنْدي، لا تْوَقْفونْ ف وچّنْ. لَ كَما هَوذْ واِ مَلَكوت السَّماواتْ.“
\v 15 وحَطّ ايدو عَلَين وْراحْ منْ هَونَكْ.
\s شَبّ الزَّنْگينْ
\p
\v 16 وْجا واِحدْ، قَرَّب وْقالْلو: ”يا مْعَلّمْ يا صالحْ! أَيشْ عَمَلْ صالحْ أَسَي بْشانْ أَنالْ حَياة الاَبَديِّة.“
\v 17 جاِوَبو قالْلو: ”لَيش تْقولْ لي صالحْ؟ ما في صالحْ غَير اَلله الواِحدْ. بَسْ لَ ردْتْ تدْخل الحَياة احْفظ الوَصيّاتْ.“
\v 18 قالْلو: ”أينا وَصِيّاتْ؟“ يَسوُعْ قالْلو: ”لا تقْتلْ، لا تزْني، لا تسْرقْ، لا تشْهَدْ شَهادِة زوُرْ،
\v 19 كَرّم اَبوكْ وامّك، وْحبْ قَرايبكْ كَما نَفْسكْ.“
\v 20 الشَّبْ قالْلو: ”هَوذْ كلّنْ حَفَظتوونْ منْ زغْري. أَيشْ ينْقَصْني؟“
\v 21 يَسوُعْ قالْلو: ”لَ رَدْت تْكونْ كاملْ، روُحْ بيِع امْلاكك، وْفَرّقْ عَ الفَقاراِ تَ يسيِرْ لكْ كَنْزْ ف السَّما وْتَعا خَلْفي.“
\v 22 سمع الشَّب هَالكلْمِة، وْراحْ حَزينْ، منْ لَ كانْ لهُ امْلاك كْثيرْ.
\v 23 يَسوُعْ قالْ لَتَلاميذو: ”الحَقّ اَقولْكنْ صَعْبْ يدْخلْ زَنْگينْ لَ مَلَكوت السَّماواتْ.
\v 24 وَاقولْكنْ زاِ: أَهْيَنْ للجَّمَلْ يدْخلْ ف خرْم ابْرِة منْ زَنْگينْ يدْخلْ لَمَلَكوت اَلله.“
\v 25 التَّلاميذْ وَقْتْ لَ سمْعوا، تْعَجَّبوا كْثير وْقالوا: ”بَقى من يتيِقْ يخْلَصْ؟“
\v 26 يَسوُعْ طَلَّعْ فِين وْقالْلنْ: ”عنْد النّاِسْ هاي موُ ينْتاقْ عَلَيا. بَسّ اَلله قادرْ عَلى كلْ شي واِ.“
\v 27 هاك الوَقْتْ رَدْ بطْرس وْقالْلو: ”هاي نحْناِ خَلّينا كلْ شي وْجينا خَلْفكْ. أَيشْ بَقى تَ يكونْ نَصيبْنا؟“
\v 28 يَسوُعْ قالْلن: ”الحَقّ اَقولْكنْ: أنْتنْ لَ جيتنْ خَلْفي، ف الدّنْياِ الّجْديدِة لَمَنْ يقْعَد ابْن الانْسانْ عَلى عَرْشْ مَجْدو، تَ تقْعَدون انْتنْ زاِ عَلى اثْناعشْ كرْسي وتْحاِكْمون اسْباطْ بَني اسْرائيِل الاثْناعشْ.
\v 29 وْكلْ واِحدْ يخَلّي بيوتْ يا إخْوِة يا خَواتْ يا أَبْ يا أمْ يا مَرَة يا اولادْ يا حْقولْ لَخاطر اسْمي، تَ ياخذْ ميةْ طاق وْيورَثْ حَياة الأَبَديِّة.
\v 30 بَسّ كْثيرْ ناِس يكونونْ ف الاَوَّل يسيِرون ف الآِخر، وْف الآخر يسيِرون ف الاَوَّلْ.
\c 20
\s مَثَل البقْچَچيِّة والغَرْزْ
\p
\v 1 ”بَقى مَلَكوت السَّماواتْ يشْبَه انْسانْ سَيّد بَيتْ طَلَعْ الصّبح تَ يأجّرْ شَغّيلِة لَغَرْزو.
\v 2 واتَّفَقْ مَع الشَّغّيلِة عَلى دينار يَوميِّة، وْبَعَثنْ لَغَرْزو.
\v 3 وْطَلَعْ ساعَة ثاثِة، وَارى غَيرنْ ف العَرَصَة قايمينْ عاطْلينْ باطْلينْ.
\v 4 وْقالْلنْ: ’روُحوا أنْتنْ زاِ للغَرْز، وْشي لَ يحقْ تَ اعْطيكنْ.‘
\v 5 هنّاِ زاِ راحوا. وْرجعْ طَلَعْ ساعَة ستِّة وْساعَة اثْناعش وْسَوى نَفْس الشِّي.
\v 6 وحَوالي ساعَة احْداعشْ، رَدْ طَلَعْ وَارى غَيرنْ قايمينْ عاطْلينْ باطْلين. وْقالْلنْ: ’أَيشْ قايمينْ انْتنْ طول الّنْهارْ عاطْلينْ باطْلينْ؟‘
\v 7 قالولو: ’منْ لَ أحَّدْ ما شَغَّلْنا.‘ قالْلنْ: ’روُحوا أنْتنْ زاِ للغَرْز، وْشي لَ يحقّ لْكنْ تَ تاخْذونْ.‘
\v 8 وَقْتْ لَ صارتْ المَسا، صاحب الغَرْزْ قالْ لَوَكيلو: ’سيِح الشَّغّيلِة واعْطِينْ حَقّنْ، وابْدي منْ هَوذْ لَ جَوا ف الآِخرْ واختمْ ف هَوكْ لَ جَوا ف الاَوَّلْ.‘
\v 9 وْجَوا جَماعَة ساعَة احْداعْشْ وَاخَذوا دينارْ دينارْ.
\v 10 وْوَقْتْ لَ جَوا الاَوَّلانِيِّة، قالوا بَلْكي أكْثَرْ تَ ياخْذونْ، بَسْ هنّاِ زاِ دينارْ دينارْ أَخَذوا.
\v 11 وَقْتْ لَ اخَذوا، تْأَفْأَفوا عَلى سَيّد البَيتْ.
\v 12 قالوا: ’هَوك الآِخراِنِيِّة ساعَة وحْدِة اشْتَغَلوا، وْساويتنْ مَعْنا، نحْناِ لَ تْحَمَّلْنا ثقل الّنْهار وْحَرّو.‘
\v 13 بَسْ هوّاِ رَدْ قالْ لواِحدْ منّنْ: ’سَديقي، أَنا موُ اظْلمكْ. موُ عَلى دينار اتَّفَقتْ مَعي؟
\v 14 خذْ شي لَ لك وْروُحْ! أَنا أَريدْ أَعْطي هاذْ لَ جا ف الآخر مْقَدّكْ.
\v 15 والّا مالي حَقّ أَسَي فَ مالي شي لَ اريدْ؟ والّا عَينكْ شَرّيرَة ياِ، منْ لَ طَيّبْ (صالح) اَنا؟‘
\v 16 كذاِ الآِخراِنيِّة يسيِرون أَوَّلانيِّة، والاَوَّلانيِّة اِخْراِنيِّة. بَقى كْثيرْ ناِ المدْعيّينْ وقْلَيلْ ناِ المخْتارينْ.“
\s يَسوُعْ ثالثْ كَرَّة يتْنَبّا عَلى مَوتو
\p
\v 17 يَسوُعْ كانْ ك تْحَضَّرْ تَ يطْلَعْ للقدْسْ. وَاخَذْ تَلاميذو الاثْناعشْ عَلى خاصْرَة ف الطَّريِق وْقالْلنْ:
\v 18 ”هاي طالْعينْ نحْناِ للقدْسْ، وابْن الانْسانْ تَ يتْسَلَّمْ لَ گْباريّة الكَهَنَة ومْعَلْمين النّاموسْ وْتَ يحْكمونْ عَلَيو بالمَوتْ.
\v 19 ويسَلموهُ للامَم وْتَ يتْمَهزَونْ فِيو ويقَرْپچوهُ وْيصْلبوهُ، وْثالثْ يَومْ تَ يقومْ.“
\s طَلَب أم يَعْقوب وْيوحَنّا
\p
\v 20 هاك الوَقْتْ قَرَّبتْ لَعنْدو أمّ اولادْ زَبَدي هيِّ وْوَلَدَينا، وْسَجَدتْلو وْطَلَبتْ منّو شي.
\v 21 قالْلا: ”أَيش تْريدينْ؟“ قالتْ: ”قَولْ تَ يقْعَدونْ وَلَدَيني هَوذْ واِحدْ منْ يَمينك وْواِحدْ منْ شمالكْ فَ مَلَكوتكْ.“
\v 22 رَدْ يَسوُعْ قالْ: ”أنْتنْ موُ تعْرفونْ أَيشْ تطْلبونْ. أنْتن تْتيِقونْ تشْرَبونْ كاسْ لَ أَنا تَ اشرَبْ، يا مَعْموُذيِّة لَ اتْعَمَّذْ تتْعَمَّذونْ؟“ قالولو: ”نْتيِقْ.“
\v 23 قالْلنْ: ”كاسي تشْرَبون، وْمَعْموُذيِّة لَ اتْعَمَّذْ تتْعَمَّذونْ، بَسْ هاي لَ تَ تقْعَدونْ منْ يَميني وْمنْ شمالي، موُ لي ياِ تَ اعْطِيا، بَلىِ لَهَوكْ لَ ك تْحَضَّرتْلنْ منْ أَبوي.“
\v 24 وَقْتْ لَ سمْعوا العَشَرَة، غضْبوا عَلى هَالاَخَّين الاثْنَينْ.
\v 25 قامْ يَسوُعْ ساحن وْقالْلنْ: ”تعْرفونْ رُوَسا الامَم اسْيادنْ ناِ، وگْبارِيّتنْ يتْسَلَّطونْ عَلَينْ.
\v 26 لا كذاِ يسيِرْ بَيناتْكنْ، بَلىِ لَ يريدْ منْكن يكون گْبيرْ، خَلّي يسيِر لْكنْ خادمْ.
\v 27 وْلَ يريدْ منْكن يكون الاَوَّلْ، خَلّي يسيِر لْكنْ عَبدْ.
\v 28 كَما ابْن الانْسانْ، ما جا تَ ينْخدمْ، بَلىِ تَ يخْدم وْيعْطي نَفْسو فدْيِة مْبَدال كْثيرْ.“
\s يَسوُعْ يشْفي اثْنَينْ عَمايِة فَ اريحا
\p
\v 29 وَقْتْ لَ طَلَعْ يَسوُعْ منْ اَريحا، طَلَعْ خَلْفو ناِس كْثيرْ طَلْقاتْ طَلْقاتْ.
\v 30 والّا اثْنَينْ عَمايِة قاِعْدينْ عَلى قَراغ الطَّريِق. وْوَقْتْ لَ سمْعوا يَسوُعْ واِ فاِيتْ، بَدَوا يزْعَقونْ ويقولونْ: ”ارْحَمْنا سَيّدي إبنْ داهودْ.“
\v 31 لَمّات النّاِسْ زَعْوَقوا عَلَينْ تَ يسْكتونْ. بَسْ هنّاِ بالاَكْثَرْ بَقى يعَلَّونْ صَوتنْ ويقولونْ: ”سَيّدْنا، ارْحَمْنا يا ابنْ داهودْ.“
\v 32 قامْ يَسوُعْ ساحْن، وْقالْ: ”أَيش تْريدون اَسَي لْكنْ؟“
\v 33 قالولو: ”سَيّدْنا! تَ تْفَتَّحْ عَينَينا.“
\v 34 وحَنْ قَلْبو عَلَين، وْجَسْ عَينَين، وْفَ ساعتا تْفَتَّحوا عَينَين، وْراحوا خَلْفو.
\c 21
\p
\v 1 وَقْتْ لَ قربْ م القدْس وْجا لَ ضيِعَة بَيتْ فاجي عَلى جَنْبْ جَبَل الزَّيتونْ، يَسوُعْ بَعَث اثْنَينْ منْ تَلاميذو
\v 2 وْقالْلنْ: ”روُحوا لَلضّيِعَة هاي لَ مْقابلْكن، وْراساً تَ تّرَون حْمارَة مَرْبوُطَة وْمَعا جَحْشْ، حلّوا جبوا لي.
\v 3 وْلَ أحَّدْ قالْكنْ شي، قولولو: ’يلْزَمونْ للرَّب،‘ وْراساً تَ يبْعَثْنْ لَهَونْ.“
\v 4 وْهاي كلّتا صارتْ تَ يتمْ شي لَ انْقالْ بالنَّبي لَ قالْ:
\v 5 ”قولوا لَبنْتْ صَهْيونْ: ’هاي مَلكْكِ جاِييكِ، وَديعْ راِكبْ عَلى آتان وْجَحْش ابنْ آتانْ.‘“
\v 6 وراحوا التَّلْميذَينْ وْسَووا كَما لَ وَصّاهنْ يَسوُعْ.
\v 7 وْجابوا الّحْمارَة والجَّحْش، وْحَطّوا حَويسنْ عَ الجَّحْش، وْركب يَسوُعْ.
\v 8 ولَمّة ناِس گْبيرِة كانْ يفْرشونْ حَويسنْ ف الطَّريِقْ. غَيرنْ كانْ يقْطَعونْ شيقانْ م السّجَرْ، ويكبّونْ ف الطَّريِقْ.
\v 9 وطَلْقات النّاِسْ الرّايحينْ قدّامو والجّاِيينْ خَلْفو كانْ يسيِحونْ ويقولونْ: ”أوُشَعْنا لابنْ داهود! مْبارَك الجّاِييِ باسْم الرَّبْ. أوُشَعْنا ف السَّماوات العاِلْيِة.“
\v 10 وْوَقْتْ لَ دَخَلْ لَلقدْس، البَلَدْ كلّو انْهَز. وْكانْ يقولونْ: ”منْ واِ هاذْ؟“
\v 11 وطَلْقات النّاِسْ كان يقولونْ: ”هذا يَسوُع النَّبي لَ منْ ناصرَة الجَّليلْ.“
\s يَسوُعْ يسَحّت البيّاِعين م الهَيكَلْ
\p
\v 12 وْدَخَلْ يَسوُعْ لَهَيكَل اَلله وْطاِلَعْ كلْ هَوكْ لَ كانْ يشْتَرَونْ ويبيِعونْ ف الهَيكَل، وْقَلَّبْ طاولات الصّرّاِفين وْكراِسي بيّاِعين الحَمامْ.
\v 13 وْقالْلنْ: ”مَكْتوبْ واِ: ’بَيتي بَيت الصَّلاة يتْسَمّى، وانْتنْ سَوَيتنو مْغارةْ قطّاِعينْ طرْقْ.‘“
\v 14 وْف الهَيكَلْ قَرَّبوا لَعنْدو عَمايِة وْعرْجين وْشَفاهنْ.
\v 15 وَقْتْ لَ ارَوا گْباريّة الكَهَنَة والفَرّيسيِّة عَجايبْ لَ يسَي، واولادْ لَ يسيِحونْ ف الهَيكَلْ ويقولونْ ”أوُشَعْنا لابنْ داهود،“ انْزَعَجوا.
\v 16 وقالولو: ”تسْمَعْ أَيش يقولونْ هَوذْ؟“ يَسوُعْ قالْلنْ: ”بَلىِ! أَبَدْ ما قَرَيتنْ نبوّة لَ تْقولْ: ’منْ ثمّ اولاد الّزْغارْ والمرْضعينْ حَضَّرْتْ طاِلَعْتْ تَسْبيحْ‘؟“
\v 17 وعافن وْطَلَعْ لَبَرّات البَلَدْ لَبَيتْ عَنْيا وْباتْ هَونَكْ.
\s يَسوُعْ ينعَل سجَرة تين
\p
\v 18 والصّبْحْ، وَقْتْ لَ كانْ راِجعْ لَلبَلَدْ، جاعْ.
\v 19 وَارى سجَرةْ تينْ ف الطَّريِق، وْجا لَعنْدا، وْما ارى فِيا شي غَيرْ وَرَق، وْقالْلا: ”لا بَق يكونْ فيكِ ثَمَرْ للاَبَد.“ وْراساً هاكْ سجَرة التّينْ نشْفت وْقشْفتْ.
\v 20 وَارَوا التَّلاميذْ وتْعَجَّبوا وْقالوا: ”أشْوَنْ فَ ساعتا نشْفت وْقشْفتْ سجَرة التّينْ؟“
\v 21 يَسوُعْ رَدْ عَلَينْ قالْلن: ”الحَقّ اَقولْكن: يكونْ فيكنْ إيمان وْموُ تتْشَكَّكونْ، موُ بَسْ هاي مَسَلةْ سجَرة التّينْ تَ تْسَونْ، بَليِ حتّى لَ قلْتنْ لَ هَالجَّبَلْ هاذ: ’انْقلع وْقَعْ ف البَحرْ،‘ تَ تْسيِرْ.
\v 22 وْكلْ شي لَ تطْلبونْ ف الصَّلاة بايمانْ تَ تْنالونْ.“
\s سلْطَة يَسوُعْ
\p
\v 23 وْوَقْتْ لَ جا يَسوُعْ لَلهَيكَلْ، قَرَّبوا لَعنْدو گْباريّة الكَهَنَة وشْيوُخة الشَّعْب، وْهوّاِ يعَلّم، وْقالولو: ”فَ أَينا سلْطَة تْسَي هَوذ، وْمنْ واِ لَ كلْعَطاكْ هَالسَّلطَة؟“
\v 24 يَسوُعْ رَدْ قالْلنْ: ”وَانا تَ اسْأَلكنْ سُؤالْ واِحدْ. لَ جاِوَبْتنّي، تَ اقولْكنْ فَ أَينا سلْطَة أَسَي هَوذْ.
\v 25 مَعْموذيّةْ يوحَنّا من اَينْ ياِ؟ م السَّما والّا م البَشَرْ؟“ هنّاِ افْتَكَروا قالوا فَ قَلْبنْ: ”لَ قلْنا: ’م السَّما،‘ تَ يقولْنا: ’بَقى لَيشْ ما سَدَّقْتنو؟‘
\v 26 وْلَ قلْنا: ’م البَشَر،‘ نْخافْ منْ ناِس الملْتَمّينْ، منْ لَ كلّنْ كَما نَبي واِ عنْدنْ يوحَنّا.“
\v 27 وْرَدّوا وْقالولو: ”موُ نعْرفْ.“ يَسوُعْ قالْلنْ: ”وَلا أَنا أَقولْكنْ فَ أَينا سلْطَة أَسَي هَوذْ.
\s الطّاعَة
\p
\v 28 ”أَيشْ رايكنْ؟ واِحدْ رجّالْ كانْ عنْدو وَلَدَينْ. قَرَّبْ لَعنْد الاَوَّل وْقالْلو: ’ابْني، روُح اليَومْ اشْتغلْ ف الغَرْزْ.‘
\v 29 ورَدْ قالْلو: ’ما لي خلْقْ.‘ بَسْ ف الآخر تْنَدَّم وْراحْ.
\v 30 وْقَرَّبْ لَعنْد اللاخ وْقالْلو كذاِ. جاِوَبو وْقالْلو: ’حاضرْ سَيّدي.‘ وْما راحْ.
\v 31 منْ واِ منْ هَالاثْنَينْ لَ سَوى إرادةْ أَبوهُ؟“ قالولو: ”الاَوَّلاني.“ يَسوُعْ قالْلن: ”الحَقّ اَقولْكنْ: هَوذْ لَ يلمّون الضَّرايب والزّانْياتْ يسْبقوكنْ لَمَلَكوت اَلله،
\v 32 منْ لَ جا لَعنْدْكنْ يوحَنّا فَ طَريِق البر، وْما سَدَّقتنو. بَسْ هَوذْ لَ يلمّون الضَّرايبْ والزّانْياتْ سَدَّقوهُ. بَسّ انْتن، وْلا بَعدْ لَ ارَيتن، تْنَدَّمتنْ ف الآخرْ وْآمَنْتنْ فِيو.
\s مَثَل البقْچَچيِّة المجرمين القاتْلين
\p
\v 33 ”اسْمَعوا مَثَلْ لخ: انْسانْ سَيّدْ بَيتْ غَرَزْ غَرْز وْسَيَّجْ حَولو وْحَفَرْ فِيو مَعْصَرَة وْبَنى فِيو برْج، وْسَلَّمو لَ بقْچَچيِّة وْراحْ لَغَيرْ بَلَدْ.
\v 34 وْلَمَنْ صارْ موسم الثَّمَرْ، بَعَثْ عَبيدو لَعنْد البقْچَچيِّة تَ يبْعَثولو منْ ثَمَرْ الغَرْزْ.
\v 35 والبقْچَچيِّة مسْكوا عَبيدو، واِحدْ ضَرَبوهُ وْواِحدْ رَجَموهُ وْواِحدْ قَتَلوهُ.
\v 36 وْرجعْ كَرْة لخْ بَعَثْ عَبيدْ غَيرنْ أكْثَرْ م الاَوَّلانيِّة. وْنَفس الشِّي سَوَوا فِينْ.
\v 37 آِخرْ شي بَعَثْلن ابْنو. قالْ: ’يمْكنْ يسْتَحَونْ منْ ابْني.‘
\v 38 بَسّ البقْچَچيِّة وَقْتْ لَ ارَوا الابنْ قالوا لَبَعْضنْ: ’هذا واِ الواِرثْ. تَعوا نقْتلو وْناخذْ وَراثَتو.‘
\v 39 ومسْكوا طاِلَعوهُ لَ بَرّات الغَرْز وْقَتَلوهُ.
\v 40 بَقى لَ جا صاحب الغَرْزْ أَيشْ تَ يسَي فَوك البقْچَچيِّة؟“
\v 41 قالولو: ”يا وَيلْ يا وَيلْ! تَ يتَوبلنْ، ويسَلّم الغَرْزْ لَبقْچَچيِّة غَيرنْ يعْطَوهُ الثَّمَرْ فَ موسمو.“
\v 42 يَسوُعْ قالْلنْ: ”أَبَدْ ما قَرَيتنْ ف الّكْتاِبْ نبوّةْ لَ تْقولْ: ’حَجَرة لَ ما وَقَعتْ فَ عَقْل المعْمارچيِّة هيِّ صارتْ لَراس القرْنيِّة؟ منْ عنْد الرَّبْ كانتْ هاي، وْعَجيبِة ياِ فَ عَينَينا‘.
\v 43 بَقى أَقولْكنْ: مَلَكوت اَلله تَ ينْأخذْ منْكن وْينْعَطى لأَمِّة تْسَي ثَمَرو.
\v 44 وْمنْ لَ يقَعْ عَلى هَالحَجَرَة يتْرَضْرَضْ. وَاينا لَ تقَعْ هيِّ عَلَيو تَ تذْرِيو.
\v 45 وَقْتْ لَ سمْعوا گْباريّة الكَهَنَة والفَرّيسيِّة امْثالو، عَرَفوا عَلَينْ قالْ.
\v 46 وْرادوا يمْسكوهُ، بَسْ خافوا منْ ناِس الملْتَمّينْ، منْ لَ كَما نَبي كانْ عنْدنْ.
\c 22
\p
\v 1 ورَدْ يَسوُعْ يحْكي بامْثال، قالْ:
\v 2 ”مَلَكوت السَّماوات تْشَبَّهْ لَمَلكْ سَوى حَفْلة عَرْسْ لابْنو.
\v 3 وْبَعَث عَبيدو تَ يسيِحون المدْعيّينْ لَحَفْلة العرْسْ، بَسْ ما رادوا يجَونْ.
\v 4 رجعْ بَعَثْ عَبيدْ غَيرن وْقالْ: ’قولوا للمدْعيّين: كْوا غَداتي حاضْرَة، ثوراِني وْفَطايمي انْذَبَحوا، وْكلْ شي حاضرْ، تَعوا للعرْسْ.‘
\v 5 بَسْ هنّاِ اسْتَخَفّوا وْراحوا، واِحدْ لَبَقْچتو، والْلاخْ لَتجارتو،
\v 6 والباقي مسْكوا عَبيد المَلكْ وتْمَهْزَوا وْقَتَلوا.
\v 7 وَقْتْ لَ سمع المَلكْ، غضب وْبَعَث عَسْكَرو وْتَوبَلْ هَوك القاتْلين وْحَرَقْ بَلَدنْ.
\v 8 هاك الوَقْتْ قالْ لَعَبيدو: ’العرْسْ حاضرْ واِ، وْهَوكْ لَ كانوا مدْعيّينْ موُ مسْتاِهلينْ كانوا.
\v 9 بَقى روُحوا لَروس الطّرْقْ، وَاينا لَ ترَونْ سيِحوا للعرْسْ.‘
\v 10 وْطَلَعوا هَوك العَبيدْ للطّرْق، وْلَمّوا كلْ لَ ارَوا، طالْحين وْصالْحينْ، وانْتَلى بَيت العرْسْ منْتكْيينْ مدْعيّينْ.
\v 11 ودَخَل المَلكْ تَ يّرى المنْتكْيين المدْعيّينْ، وَارى هَونَكْ زَلَمِة موُ لاِبسْ حَويس العرْسْ.
\v 12 قالْلو: ’سَديقي، أشْوَنْ دَخَلْتْ لَهَونْ، بَلا حَويس العرْسْ؟‘ بَسْ هوّاِ انْعَقَد لْساِنو.
\v 13 هاك الوَقْتْ المَلكْ قالْ للخدّاِمينْ: ’شَدّدوا ايدَيو واجْرَيو وْطاِلْعوهُ للعتْمِة البرّانيِّة. هَونَكْ تَ يكون البكا وْسَكّ الاضْراسْ.‘
\v 14 منْ لَ كْثيرْ ناِ المدْعيّينْ، وقْلَيلْ ناِ المخْتارينْ.
\s ضَريبة قَيصَر
\p
\v 15 هاك الوَقْتْ راحوا الفَرّيسيِّة واشْتاروا فَ بَعْضنْ أشْوَنْ تَ يصيدوهُ ف كلْمِة.
\v 16 وْبَعَثولو تَلاميذنْ مَعْ ناِسْ منْ جَماعَةْ هيروُدس، وْقالولو: ”مْعَلّمْ! نحْناِ نعْرفْ زَلَمِة حَقّاني أنْتَ، وْبالحَقْ تْعَلّمْ طَريِق اَلله، وْموُ يهمّكْ أحَّدْ، منْ لَ موُ تتْمَلَّقْ لانْسانْ منْ لَ كان يكونْ.
\v 17 بَقى قل لْنا: أَيشْ رايكْ؟ حَلالْ واِ ندْفَعْ ضَريبِة لَقَيصَر والّا لا؟“
\v 18 يَسوُعْ عَرَفْ شَرّن، وْقالْ: ”لَيشْ تْجَرْبوني يا مْنافْقينْ؟
\v 19 وَرَّوني دينار الضَّريبِة.“ قاموا جابولو دينارْ.
\v 20 وْقالْلنْ يَسوُعْ: ”صوُرةْ منْ ياِ هاي وْهَالّكْتاِبة؟“
\v 21 قالولو: ”لَقَيصَر.“ قالْلنْ: ”اعْطَوا بَقى شي لَوّاِ لَقَيصَرْ لَقَيصَرْ، وْشي لَوّاِ لَالله لَالله.“
\v 22 وَقْتْ لَ سمْعوا، أَرَوا العَجَبْ. وْخَلَّوهُ وْراحوا.
\s قياِمة المَيتينْ
\p
\v 23 هاك اليَومْ جَوهُ ناِسْ م الصَّدوقِيِّة ل يقولون: ما في قْياِمةْ مَيتين. وْسَأَلوهُ،
\v 24 قالولو: ”مْعَلّمْ! موسى قالْنا: ’لَ ماتْ رجّال وْما خَلَّفْ، لازم أَخوهُ ياخذْ مَرَتو وْيجيب منّا نَسلْ لاخوهُ.‘
\v 25 بَقى كانْ في عنّا سَبْع اخْوِة، الاَوَّلْ أَخَذْ مَرَة وْمات، وْمنْ لَ ما كانْ لهُ اولادْ خَلّى مَرَتو لاخوهُ.
\v 26 وْكذاِ زاِ هاك الثّاِني، ونَفْس الشِّي الثّالث، وْدي لَ سَبْعتنْ.
\v 27 وآِخر الكلْ، هاك المَرَة زاِ ماتتْ.
\v 28 بَقى ف الّقْياِمِة لاَينا منْ هَوذ السَّبعَة تَ تْسيِرْ مَرَة، وْكلّنْ أَخَذووا؟“
\v 29 يَسوُعْ رَدْ عَلَينْ قالْلنْ: ”ضايعين انْتنْ، منْ لَ موُ تعْرفون الّكْتاِب وْلا قوّة اَلله.
\v 30 ف قياِمة المَيتينْ موُ ياخْذونْ نسْوان، وْلا النّسْوان يسيِرونْ لرْجاِلْ، بَلىِ كَما مَلايكة اَلله لَ ف السَّما ناِ.
\v 31 وْعَلى قياِمة المَيتينْ، ما قَرَيتنْ شي لَ انْقالْكن من اَلله لَ يقولْ:
\v 32 ’أَنا واِ إله ابْراهيم وْإله اسْحاق وْإلهْ يَعْقوبْ؟‘ بَقى أَلله موُ إله مَيتينْ واِ، بَلىِ إلهْ طَيبينْ.“
\v 33 وَقْتْ لَ سمْعوا لَمّات النّاِسْ، أَرَوا العَجَبْ ف تَعْليمو.
\p
\v 34 الفَرّيسيِّة وَقْتْ لَ سمْعوا سَكَّت الصَّدوقِيِّة، اجْتَمَعوا مَعْ بَعْضنْ،
\v 35 وْسَأَلو واِحدْ منّنْ، عالمْ ف النّاموسْ تَ يجَرّبو، قالْلو:
\v 36 ”مْعَلّمْ! أَينا وَصيِّة ياِ أَگْبَرْ شي ف النّاموسْ؟“
\v 37 يَسوُعْ قالْلو: ”’حبّ الرَّبْ إلهكْ منْ كلْ قَلْبك وْكلْ نَفْسك وْكلْ قوّتك وْكلْ فكْركْ.‘
\v 38 هاي ياِ الوَصيِّة العَظيمِة وْأوَّلْ وَصيِّة.
\v 39 والثّاِنيِة لَ تشْبَها: ’حبْ قَرايبكْ كَما نَفْسكْ.‘
\v 40 بهَوذ الوَصيتَين الّثنْتَينْ تتْعَلَّق التَّوراة والاَنْبِيا.“
\s المَسيحْ وداهودْ
\p
\v 41 وَقْتْ لَ كانوا الفَرّيسيِّة مجْتمْعينْ سَأَلنْ يَسوُعْ،
\v 42 وْقالْ: ”أَيش تْقولونْ عَ المَسيحْ، ابنْ منْ واِ؟“ قالولو: ”إبنْ داهودْ.“
\v 43 قالْلنْ: ”وَاشْوَنْ بَقى داهودْ بالرّوُحْ يسَمّيو ’رَبْ‘؟ منْ لَ يقولْ:
\v 44 ’الرَّبْ قالْ لَرَبّي: ”اقْعَدْ عَلى يَميني تَ احطْ عَدْوانكْ دَوسِة تَحْت اجْرَيكْ“‘؟
\v 45 بَقى لَ داهود يسَمّيو رَبْ، أشْوَن ابْنو واِ؟“
\v 46 وْلا واِحدْ منّنْ تاقْ يعْطِيو جَواب. وْلا أحَّدْ كَرْة لخ اسْتَرْجى مناك اليَومْ يسْأَلو سُؤالْ تَ يجاِدلو.
\c 23
\s بالْكنْ وايّاكنْ منْ مْعَلْمين النّاموسْ والفَرّيسيِّة
\p
\v 1 هاك الوَقْتْ، يَسوُعْ حَكى مَعْ لَمّات النّاِس وْمَعْ تَلاميذو،
\v 2 وْقالْلنْ: ”عَلى كرْسي موسى قعْدوا مْعَلْمين النّاموسْ والفَرّيسيِّة.
\v 3 بَقى كلْ شي لَ يقولولْكنْ تَ تحْفَظون احْفَظوا وافْعَلوا، بَسْ كَما افْعالنْ لا تفْعَلونْ، منْ لَ يقولون وْموُ يفْعَلونْ.
\v 4 يشدّون احْمالْ ثَقيلِة ويحطّونْ عَلى اكْتاف النّاِسْ، بَسْ هنّاِ باصْباعتنْ موُ يريدون يدقّووا.
\v 5 وْكلّ اعْمالنْ يعْمَلووا تَ يرَوون النّاِسْ: يعَرْضونْ تَعويذاتن ويطَولونْ شراِشيب زْبوناتنْ.
\v 6 ويحبّون ينْتَكَونْ ف السّدرْ ف العَشاوات، وْكراِسي القدّاِميِّة ف المجاِمع،
\v 7 والسَّلامْ ف العَرَصات، وْتَ يقولولن النّاِسْ: ’رابي.‘
\v 8 بَسْ أنْتنْ لا تْخَلَّونْ ينْقالْكنْ: ’رابي،‘ منْ لَ واِحدْ واِ رابيكن، وانْتنْ كلّتْكن اخْوِة أنْتنْ.
\v 9 وَابْ لا تْسَمَّولْكنْ ف الاَرْضْ، منْ لَ واِحدْ واِ أَبوكنْ لَ ف السَّماواتْ.
\v 10 وْلا تْخَلَّونْ ينْقالْكنْ ’مدَبْرينْ،‘ منْ لَ واِحدْ واِ مْدَبّركن المَسيحْ.
\v 11 بَسْ لَوّاِ گبيرْ فيكنْ خَلّي يسيِر لْكنْ خادمْ:
\v 12 لَ يعَلّي روُحو يتْنَخّى، وْلَ ينَخّي روُحو يتْعَلّا.
\p
\v 13 ”وَيلْكنْ يا مْعَلْمين النّاموس وْيا فَرِّيسيِّة يا مْنافْقينْ: تاكْلون بْيوت الاَرامل بْحجّةْ لَ تْطَولونْ صَلاواتْكنْ. وبْشانْ هاي عْقوبتْكنْ تَ تْكونْ قاسْيِة كْثيرْ.
\v 14 وَيلْكنْ يا مْعَلْمين النّاموس وْيا فَرِّيسيِّة، يا مْنافْقينْ! منْ لَ تقْفلونْ بابْ مَلَكوت السَّما ف وچّ النّاِسْ، بَقى لا أنْتنْ تدْخلون وْلا القايمينْ تَ يدْخلون تْخَلَّوونْ يدْخلونْ.
\v 15 وَيلْكنْ يا مْعَلْمين النّاموس وْيا فَرِّيسيِّة يا مْنافْقينْ: تْدَورون البَرْ والبَحرْ تَ تْسَون واِحدْ غَريبْ ياهودي، وْلَ صار، تْسَوهُ ابنْ لَجْهَنَّمْ طاقْ طاقَينْ عَلَيكنْ.
\v 16 وَيلْكنْ يا مرْشدينْ عَمايِة، لَ تْقولونْ: ’لَ يحْلفْ بالهَيكَلْ موُ شي واِ حلْفانو، بَسْ لَ يحْلف بْذَهَب الهَيكَلْ ينْربط بْحلْفانو.‘
\v 17 يا غَشيمين وْعَمايِة! لَيشْ أَينا أَعْظَم، الذَّهَبْ والّا الهَيكَلْ لَ يقَدّس الذَّهَبْ؟
\v 18 وتْقولونْ: ’لَ يحْلفْ بالمَذْبَحْ موُ شي واِ حلْفانو، بَلىِ لَ يحْلف بْقرْبانْ لَ عَلَيو ينْربطْ.‘
\v 19 يا غَشيمين وْعَمايِة! لَيشْ أَينا أعْظَم، القرْبانْ والّا المَذْبَحْ لَ يقَدّس القرْبانْ؟
\v 20 بَقى منْ لَ يحْلفْ بالمَذْبَحْ، يحْلفْ فِيو وْف كلْ شي لَ في عَلَيو.
\v 21 وْلَ يحْلفْ بالهَيكَلْ يحْلفْ فِيو وبْهاذ السّاِكنْ فِيو.
\v 22 ول يحْلفْ بالسَّما، يحْلف بْكرْسي اَلله وْبالقاِعدْ عَلَيو.
\v 23 وَيلْكنْ يا مْعَلْمين النّاموس وْيا فَرِّيسيِّة، يا مْنافْقينْ، لَ تعْطَون عْشور النّعْناعْ والشّبْثْ والكَمّون، وْعفْتن الّمْهمْ ف النّاموس: العَدلْ والرَّحْمِة والأمانِة. كانْ لازم تْسَون هَوذ وْموُ تْعيفونْ هَوكْ.
\v 24 يا مرْشدينْ عَمايِة! تْصَفَّونْ م البَقّ، وْتبْلَعون الّجْماِلْ.
\v 25 وَيلْكنْ يا مْعَلْمين النّاموس وْيا فَرِّيسيِّة يا مْنافْقينْ! تْنَظْفونْ بَرّات القَدَحْ والصَّحنْ، بَسْ منْ جَوّا متْليّينْ سَلْب وْنَهْب وْنَفس-سزّيِّة.
\v 26 فَرِّيسيِّة يا عَمايِة! نَظْفوا أَوَّلْ شي جوّاتْ القَدَحْ والصَّحنْ، بَرّاتنْ زاِ تَ ينْظَفْ.
\v 27 وَيلْكنْ يا مْعَلْمين النّاموس وْيا فَرِّيسيِّة يا مْنافْقينْ! كَما قْبوُر الّمْبَيَّضَة بالكلس انْتنْ، منْ بَرّا تْبَيّن كْوَيسِة، بَسْ منْ جَوّا متْليِّة عظْماِنْ مَيتين وْكلْ نَجاسِة.
\v 28 أنْتنْ زاِ كذاِ: منْ بَرّا تْبَينون للنّاِس بارّينْ، بَسْ منْ جَوّا متْليّينْ إثم وْنفاق انْتنْ.
\v 29 وَيلْكنْ يا مْعَلْمين النّاموس وْيا فَرِّيسيِّة، يا مْنافْقين! تْعَمْرون قْبوُرْ للاَنْبِيا وتْزَينون قْبوُر البارّينْ،
\v 30 وتْقولون: ’يكونْ كنّا ف اِيّاِمْ أَبَّهاتْنا، ما كانْ تَ نشْتركْ مَعنْ فَ دَم الاَنْبِيا.‘
\v 31 بَقى تشْهَدونْ عَلى روُحكن اولادْ هَوكْ لَ قَتَلوا الاَنْبِيا أنْتنْ.
\v 32 وانْتنْ زاِ اتْلَوا كَيلْ أَبَّهاتْكنْ.
\v 33 يا حَيّات اولادْ حَيّاتْ! أشْوَنْ تَ تهْربونْ م الحكمْ عَلَيكنْ بجْهَنَّمْ؟
\p
\v 34 ”منْ هاي كْوا اَنا أَبْعَثْ لَعنْدْكنْ أَنْبِيا وْحكَما ومْعَلْمينْ، منّنْ تقْتلْون وْتصْلبون وْمنّنْ تْقَرْپچونْ ف مجاِمعْكنْ يا تعْدَونْ خَلْفنْ منْ بَلَدْ لَ بَلَدْ.
\v 35 بْشانْ يجي عَلَيكنْ دَمْ كلْ بارْ سَرى عَ الاَرْضْ، منْ دَمْ هابيِل البارْ دي لَ دَمْ زَكَرِيّا ابنْ بَرَخْيا لَ قَتَلْتنو بَين الهَيكَلْ والمَذْبَحْ.
\v 36 الحَقّ اَقولْكنْ: هَوذْ كلّنْ تَ يجَونْ عَلى هَالجّيلْ هاذْ.
\p
\v 37 ”يا قدْسْ يا قدْسْ، أنْتِ لَ قَتَلْتِ الاَنْبِيا وْرَجَمْتِ رسلْ لَ انْبَعَثوا لْكِ! كَمْ كَرَّة ردْتُ أَلمّ اولادْكِ كَما لَ تْلمّ الجّاِجِة زيغانا تَحْت جْناحا، وْما قبلْتنْ؟
\v 38 كْوا ينْعاف لْكنْ بَيتْكنْ خَرابْ.
\v 39 منْ لَ اقولْكنْ: موُ ترَوني م السَّعْ دي لَمَنْ تْقولون: ’مْبارَك الجّاِييِ باسْم الرَّبْ.‘“
\c 24
\p
\v 1 وْطَلَعْ يَسوُعْ م الهَيكَلْ تَ يروُح، وْقَرَّبوا لَعنْدو تَلاميذو يوَرَّوهُ عْمارات الهَيكَلْ.
\v 2 هوّاِ قالْلنْ: ”موُ قايمينْ ترَون هَوذْ كلّنْ؟ الحَقّ اَقولْكنْ موُ ينْعاف هَونْ حَجَرْ عَلى حَجَرْ لَ موُ يقَعْ.“
\s عَلامات آِخر الدّنْياِ
\p
\v 3 وْوَقْتْ لَ قعدْ يَسوُعْ عَلى جَبَل الزَّيتونْ، قَرَّبوا تَلاميذو، وْقالولو بَينن وْبَينو: ”قل لْنا: أَيمَتْ هَوذْ تَ يسيِرونْ؟ وَايشْ ياِ عَلامةْ مجْوتك وْنهاية الدَّهرْ؟“
\v 4 رَدْ عَلَينْ يَسوُع وْقالْلنْ: ”ديروا بالْكنْ لا أحَّد يضَيّعْكنْ.
\v 5 منْ لَ كْثيرْ تَ يجَونْ باسْمي ويقولون: ’اَنا واِ المَسيحْ،‘ ويضَيعون كْثيرْ ناسْ.
\v 6 تَ تسْمَعون اخْبار قْتاِلات وْسَمَعيّات حْروبْ. ترى لا تقْلَقونْ! منْ لَ لازم كلّنْ يسيِرون، بَلىِ هاي موُ النّهايِة ياِ بَعدْ:
\v 7 أمِّة تَ تْقومْ عَلى أَمِّة، وْمَمْلَكِة عَلى مَمْلَكِة، وْتَ يسيِرْ جوُع وْلوُع وْطاعون وْزناِزلْ ف موُضَعْ بَعدْ موُضَعْ.
\v 8 بَسْ كلْ هَوذْ أَوَّل اوجاع الولادِة ناِ.
\v 9 هاك الوَقْتْ، تَ يسَلْموكنْ للذّيق وْيقْتلوكن، وْتَ تْكونونْ مَكْروُهينْ منْ كلّ الامَمْ لَخاطرْ اسْمي.
\v 10 هاك الوَقْتْ، كْثيرْ تَ يتْعَثْوَرون، وْيكْرَهونْ واِحد اللاخْ.
\v 11 وكْثيرْ أَنْبِيا دجّاِلينْ تَ يقومونْ ويضَيعون كْثيرْ.
\v 12 وْمنْ كثْر الإثمْ، تبْرَد مْحَبِّة كْثيرْ.
\v 13 بَسْ لَ يصْبرْ دي للآِخرْ، هوّاِ واِ لَ يخْلَص.
\v 14 وْتَ تنْكرز بْشارة المَلَكوتْ هاي ف الدّنْياِ كلّا بْشان تْكونْ شَهادِة لكلّ الامَم. وْهاك الوَقْتْ، تَ تّجي النّهايِة.
\s ذيقَة الّگْبيرِة
\p
\v 15 ”بَقى لَمَنْ ترَون عَلامة الخَراب النّجْسِة، لَ انْقالْ عَلَيا فَ دانْيال النَّبي، قايمِة ف موُضَع الّمْقَدَّسْ، هاكْ لَ يقْرا خَلّي يفْهَمْ،
\v 16 هاك الوَقْتْ، هَوكْ لَنّاِ ف الياهوديِّة، خَلّي يهْربونْ للجَّبَلْ.
\v 17 وْهاكْ لَوّاِ عَ الّسْطوُحْ، لا ينْزَلْ ياخذْ شي لَ فَ بَيتو.
\v 18 وَاينا لَوّاِ ف الحَقلْ، لا يرْجَعْ لَ خَلْف بْشانْ ياخذْ لبْسو.
\v 19 وَيل للحَبالىِ والمرْضعينْ فَوك الاِيّاِم!
\v 20 صَلَّوا لا يكونْ هَرَبْكنْ ف شتاِ وْلا يَومْ سَبْتْ.
\v 21 منْ لَ تَ يسيِرْ هاك الوَقْتْ ذيقَة گْبيرِة، ما صارْ كَماها منْ بداية الكَون وْدي للسَّعْ، وْلا تَ يسيِرْ.
\v 22 ويكونْ موُ تتْقَصَّرْ هَوك الاِيّاِمْ، ما كانْ تَ يخْلَصْ أحَّدْ. بَسْ لَخاطرْ المخْتارينْ تَ يتْقَصَّرونْ هَوك الاِيّاِمْ.
\v 23 هاك الوَقْتْ، لَ أحَّدْ قالْكن: ’كْوا هَونْ واِ المَسيحْ‘ يا ’هَونَكْ واِ،‘ لا تْسَدقونْ.
\v 24 منْ لَ تَ يقومونْ مسَحا دجّاِلينْ وَانبِيا گذّاِبين، وْتَ يوَرَّونْ عَلاماتْ عَظيمِة بْشان يضَيعونْ لَ طَلَعْ بايدنْ حتّى المخْتارينْ.
\v 25 هاي سَلَفاً قلْتولْكنْ.
\v 26 بَقى لَ قالولْكن: ’كْوا ف البَرّيِّة واِ،‘ لا تطْلَعونْ، يا ’كْوا ف بْيوت الجّوّاِنيِّة واِ،‘ لا تْسَدْقونْ.
\v 27 منْ لَ كَما لَ يطْلَع البَرْقْ م الشَّرق، وْينْأَرى دي لَ الغَرْبْ، كذاِ تَ تْكونْ مجْوة ابْن الانْسانْ.
\v 28 وَاينْ لَ تْكون الجّثِّة هَونَكْ تلْتَمّ الّنْسوُرَة.
\p
\v 29 ”وْراساً بَعدْ ذيقَة هَوك الاِيّاِم، الشَّمْسْ تَ تعَتّمْ، والقَمَرْ موُ يوَرّي ضَوّيِتو، والّنْجومْ تَ تقَعْ م السَّما، وْكلْ قوّات السَّما تَ تتْزَرْزَعْ.
\v 30 وْهاك الوَقْتْ تَ تظْهَرْ عَلامة ابْن الانْسانْ ف السَّما، وْهاك الوَقْتْ تَ تْنوُحْ كلْ قَبايل الاَرْضْ، وْتَ يرَون ابْن الانْسانْ جاِييِ عَلى غْيوم السَّما بْقوِّة وْمَجْدْ عَظيمْ.
\v 31 وْتَ يبْعَثْ مَلايكتو مَعْ صَوتْ قرنْ عَظيم، ويلمّونْ مخْتارينو منْ أَرْبَع قَراني الدّنْياِ، منْ أَوَّل الدّنْياِ لآِخرا.
\p
\v 32 ”منْ سجَرة التّين تْعَلَّموا مَثَل: أَوَّلْ لَ تْلينْ شيقانا وتْفَتّح اوراقا، تعْرفونْ قرَّب الصَّيفْ.
\v 33 أنْتنْ زاِ كذاِ، لَ أَرَيتنْ هَوذْ كلّن، اعْرفوا قرْبتْ للبابْ.
\v 34 الحَقّ اَقولْكنْ موُ يعْبر يروُحْ هَالجّيل هاذْ، لَ موُ هَوذْ كلّن يسيِرونْ.
\v 35 السَّما والاَرْضْ يعْبرون يروُحونْ وْكَلامي موُ يعْبرْ.
\p
\v 36 ”بَسْ هاك اليَوم وْهاك السّاعَة انْسانْ موُ يعْرفْن، وْلا مَلايكة السَّما. موُ يعْرفْنْ غَير الآب.
\v 37 بَقى كَما لَ صارْ ف اِيّاِم نوحْ، كذاِ تَ تْسيِرْ مجْوة ابْن الانْسانْ:
\v 38 كَما لَ كانوا قَبل الطّوُفانْ ياكْلون وْيشْرَبون وْياخْذونْ نسْوان وْيعْطَونْ لَرْجاِلْ، دي لَيَومْ لَ دَخَلْ نوحْ للسَّفّينِة.
\v 39 وْما عَرَفوا دي لَ جا الطّوُفان وْوَدّاهنْ كلّنْ. كذاِ تَ تْكونْ مجْوة ابْن الانْسانْ.
\v 40 هاك الوَقْتْ اثْنَينْ يكونونْ ف المَزْرَعَة، واِحدْ ينْأخذ وْواِحدْ ينْعافْ.
\v 41 وثنْتَين يكونونْ قاِعْدينْ يطْحَنونْ ف الجّاروشِة، وحْدِة تنْأخذ وْوحْدِة تنْعافْ.
\v 42 اصْحَوا بَقى، منْ لَ موُ تعْرفونْ فَ أَينا ساعَة يجي سَيّدْكنْ.
\v 43 وْهاي اعْرفوا: يكونْ كانْ يعْرفْ سَيّد البَيتْ فَ أَينا نَطْرَة يجي الحَرامي، كانْ تَ يصْحى وْموُ يخَلّي بَيتو ينّقبْ.
\v 44 بْشانْ هاي أنْتنْ زاِ كونوا مسْتَعدّينْ، منْ لَ فَ ساعَةْ لَ موُ عَلى بالْكنْ تَ يّجي ابْن الانْسانْ.
\p
\v 45 ”بَقى من واِ الْعَبْد الاَمين والحَكيمْ لَ وَكَّلو سَيّدو عَلى ناِسْ بَيتو تَ يجيبْلنْ أَكْلنْ فَ وَقْتْو؟
\v 46 هَنيّةْ هاك العَبْدْ لَ يجي سَيّدو ويراهُ يسَي كذاِ.
\v 47 الحَقّ اَقولْكنْ تَ يوَكّلو عَلى كلْ شي لَ لهُ.
\v 48 بَسْ لَ قالْ هاك الْعَبْد الشَّرّيرْ فَ قَلْبو: ’سَيّدي بَطي تَ يّجي،‘
\v 49 ويبدي يضْربْ رفَقو العَبيدْ وْياكل وْيشْرَب مَع السّكْرَچيِّة،
\v 50 تَ يّجي سَيّد هاك العَبْدْ فَ يَومْ لَ موُ عَلى بالو وْساعَة لَ موُ يعْرفْ،
\v 51 ويقَلّعو منْ شغْلو ويحطْ نَصيبو مَع الّمْنافْقينْ. هَونَكْ تَ يكون البكا وْسَكّ الاضْراسْ.
\c 25
\p
\v 1 ”هاك الوَقْتْ تَ يتْشَبَّه مَلَكوت السَّماواتْ لَعَشرْ بَناتْ، أَخَذوا سْروجتن وْطَلَعوا لاسْتقْبال الخَتَنْ [والعَروسْ].
\v 2 خَمْسِة منّنْ حَكيمينْ كانوا وْخَمْسِة غَشيمينْ.
\v 3 وْهَوك الغَشيمينْ أَخَذوا سْروجتن، وْما أَخَذوا مَعنْ زَيتْ.
\v 4 بَسّ الحَكيمينْ أَخَذوا زَيتْ فَ فَرايغ مَع سْروجتنْ.
\v 5 وْوَقْتْ لَ تْأَخَّر الخَتَنْ، نعْسوا كلّتن وْناموا.
\v 6 ونصّ اللَيلْ صارْ صَوت: ’كْوا الخَتَنْ جاِييِ، اطْلَعوا لَقدّامو.‘
\v 7 هاك الوَقْتْ قاموا كلْ هَوكْ البَنات، وْحَضَّروا سْروجتنْ.
\v 8 وبَنات الغَشيمين قالوا للحَكيمين: ’اعْطَونا منْ زَيتكن، كْوا انْطَفَت سْروجتْنا.‘
\v 9 هَوك الحَكيمينْ رَدّوا عَلَين وْقالوا: ’يمْكنْ موُ يكْفى لنا وْلكنْ. روُحوا لَعنْد البيّاِعين واشْتَرَوا لْكنْ.‘
\v 10 وْوَقْتْ لَ راحوا تَ يشْتَرَونْ، جا الخَتَن، وْلَ كانوا حاضْرينْ دَخَلوا مَعو لَ أوُدة العرْسْ وانْقَفَل البابْ.
\v 11 وْف الآِخرْ، هَوكْ بَنات الاخَرْ زاِ جَوا يقولونْ: ’سَيّدْنا، سَيّدْنا، افْتَح لْنا.‘
\v 12 بَسْ هوّاِ رَدْ عَلَين وْقالْلن: ’الحَقّ اَقولْكنْ أَنا موُ اعْرفْكنْ.‘
\v 13 اصْحَوا بَقى، منْ لَ موُ تعْرفونْ هاك اليَوم وْلا السّاعَة.
\s مَثَل الوَزنات
\p
\v 14 ”وكَما زَلَمِة قامْ تَ يروُحْ لَغَير بَلَدْ، ساحْ عَبيدو وْسَلَّمن امْوالو،
\v 15 واِحدْ عَطاهُ خَمْسْ كيساتْ مال، وْواِحدْ كيستَين وْواِحدْ كيسِة وحْدِة، كلْ واِحدْ عَلى قَدْ قَدارتو، وْخَلّى وْراح.
\v 16 هاكْ لَ اخَذْ خَمْسْ كيساتْ، راحْ تاِجَرْ فِيا وْربحْ خَمْسْ كيساتْ فوُقا.
\v 17 وكَماهُ هاكْ أَبو الكيستَينْ، تاِجَر وْربحْ كيسْتَينْ فوُقنْ.
\v 18 بَسْ هاكْ لَ اخَذْ كيسِة وحْدِة، راحْ حَفَرْ ف الاَرْض وْطَمْ مالْ سَيّدو.
\v 19 وْبَعدْ زَمانْ طَويلْ، جا سَيّدْ هَوك العَبيد وْطَلَبْ منّن حْسابْ.
\v 20 قَرَّبْ هاكْ لَ كانْ كَ اخَذْ خَمْسْ كيسات وْقَدَّمْ خَمْسةْ لخْ فوُقن وْقالْ: ’سَيّدي، خَمْسْ كيساتْ عَطَيتْني، هاي خَمْسةْ لخْ ربحْتُ فوُقنْ.‘
\v 21 سَيّدو قالْلو: ’عَفْيَة عَلَيك يا عَبْدْ صالحْ وَامينْ. ف الّقْلَيلْ أَمينْ كنْتْ، عَ الّكْثيرْ تَ اوَكّلك، ادْخلْ لَ فَرَحْ سَيّدكْ.‘
\v 22 وقَرَّبْ هاكْ أَبو الكيسْتَين وْقالْ: ’سَيّدي! كيسْتَينْ عَطَيتْني، هاي كيسْتَين لخْ ربحْتُ فوُقنْ.‘
\v 23 سَيّدو قالْلو: ’عَفْيَة عَلَيكْ يا عَبْدْ صالح وَامينْ. ف الّقْلَيلْ أَمينْ كنْتْ، عَ الّكْثيرْ تَ اوَكّلك، ادْخلْ لَفَرَحْ سَيّدكْ.‘
\v 24 وْهاكْ لَ اخَذْ كيسِة وحْدِة زاِ قَرَّب وْقالْ: ’سَيّدي! كانْ اَعْرفكْ زَلَمِة قاسي أنْتَ، تحْصدْ موُضَعْ لَ موُ تزْرَعْ، وتْلم منْ موُضَعْ لَ موُ تْذَرّي.
\v 25 وخفْتُ وْرحْتُ طَمَّيتُ كيستكْ ف الاَرْض، وْهاذْ شي لَ لكْ.‘
\v 26 سَيّدو جاِوَبو قالْلو: يا عَبْدْ شَرّيرْ كسْلان انْتَ واِ، كانْ تعْرفْ أَحْصدْ موُضَعْ لَ موُ ازْرَعْ وَالمْ منْ موُضَعْ لَ موُ اذَرّي،
\v 27 كانْ لازم تْحطْ مالي عَلى طاولة الصّرّاِفينْ، وَانا كانْ تَ آجي أطْلبْ مالي مَعْ فايضو.
\v 28 خذوا بَقى منّو الكيسِة واعْطَوا لاكْ لَ لهُ عَشْرْ كيساتْ.
\v 29 هاكْ لَ لهُ، ينْعَطى وْينْزادْلو. وْهاكْ لَ مالو، شي لَ لهُ زاِ ينْأخذْ منّو.
\v 30 وعَبد البطّالْ طاِلْعوهُ للعتْمِة البرّانيِّة. هَونَكْ تَ يكون البكا وْسَكّ الاضْراسْ.
\s المَسيحْ قاضي الدّنْياِ كلّا
\p
\v 31 ”وبَسْ يجي ابْن الانْسانْ فَ مَجْدو وْكلْ مَلايكتو القَدّيسينْ مَعو، هاك الوَقْتْ تَ يقْعَدْ عَلى عَرْش مَجْدو.
\v 32 وْتَ يلْتَمّونْ قدّامو كلّ الامَم، وْيفْرقنْ واِحدْ منْ واِحدْ، كَما راعي لَ يفْرق الغَنَم م الماِعزْ.
\v 33 يوَقّف الغَنَم عَلى يَمينو، والماِعزْ عَلى شمالو.
\v 34 هاك الوَقْتْ تَ يقول المَلكْ لَهَوكْ لَ عَلى يَمينو: ’تَعوا يا مْبارَكين اَبوي، اورَثو مَلَكوتْ لَ كانْ مْحَضَّر لْكنْ منْ يَومْ لَ تْكَوَّن الكَونْ،
\v 35 منْ لَ جعْتُ وْعَطَيتنّي تَ آكل، وْعطشْتُ وْسَقَيتنّي، غَريبْ كنْتُ وْحَوَيتنْني،
\v 36 عرْيانْ كنْتُ وْكَسَيتنْني، مَريِضْ كنْتُ وْعَبَرْتنْ عَلَي، مَحْبوسْ كنْتُ وْجيتنْ لَعنْد ي.‘
\v 37 هاك الوَقْتْ تَ يقولولو هَوك البارّينْ: ’رَبْنا، أَيمَتْ أَرَيناكْ جوعان وْطَعَّمناكْ، يا عطْشان وْسَقَيناكْ؟
\v 38 وأَيمَتْ أَرَيناكْ غَريب وْحَوَيناكْ، يا عرْيان وْكَسَيناكْ؟
\v 39 وأَيمَتْ أَرَيناكْ مَريِضْ يا مَحْبوسْ وْجينا لَعنْدكْ؟‘
\v 40 ويجاِوبن المَلكْ ويقولْلن: ’الحَقّ اَقولْكنْ كلْ شي سَوَيتنْ لَواِحدْ منْ هَوك اخوتي الّزْغارْ، لي سَوَيتنو.‘
\v 41 هاك الوَقْتْ، لَ هَوكْ لَنّاِ عَلى شمالو زاِ تَ يقولْ: ’روُحوا منْ عنْدي يا مناِعيلْ لَنار الاَبَدْ هاك الّمْحَضَّرَة لابليس وْمَلايكتو.
\v 42 منْ لَ جعْتُ وْما عَطَيتنْني تَ آكل، وْعطشْتُ وْما سَقَيتنْني،
\v 43 وغَريبْ كنْتُ وْما حَوَيتنْني، وعرْيانْ كنْتُ وْما كَسَيتنْني، وْمَريِضْ كنْتُ وْمَحْبوسْ كنْتُ وْما عَبَرْتنْ عَلَي.‘
\v 44 هاك الوَقْتْ هَوكْ زاِ تَ يردّونْ عَلَيو ويقولونْ: ’رَبْنا، أَيمَتْ أَرَيناكْ جوعانْ يا عطْشانْ يا غَريبْ يا عرْيانْ يا مَريِضْ يا مَحْبوس وْما خَدَمْناكْ؟‘
\v 45 هاك الوَقْتْ تَ يردّ يقولْلن: ’الحَقّ اَقولْكن: كلْ شي ما سَوَيتنْ لَواِحدْ من اخوتي هَوذ الّزْغارْ، لي زاِ ما سَوَيتنو.‘
\v 46 ويروُحونْ هَوكْ لَ عَذاب الاَبَدْ، والبارّينْ لَحَياة الاَبَدْ.
\c 26
\s دُبارَة عَلى يَسوُعْ
\p
\v 1 وْبَعدْ لَ حَكى يَسوُعْ هَالكَلامْ كلّو وْخَلَّصْ، قالْ لَتَلاميذو:
\v 2 ”تعْرفونْ بَعد نْهارَين الفصْحْ واِ، وابْن الانْسانْ تَ يتْسَلَّم وْينْصلبْ.“
\v 3 هاك الوَقْت اجْتَمَعوا گْباريّة الكَهَنَة ومْعَلْمين النّاموسْ وشْيوُخة الشَّعْبْ ف بَيت گْبير الكَهَنَة لَ كان اسْمو قَيافا.
\v 4 وْسَوَوا دُبارَة عَلى يَسوُعْ تَ يمْسكوهُ بالحيلِة وْيقْتلوهُ.
\v 5 وْكانْ يقولونْ: ”موُ ف العيد بْشانْ لا يسيِر قَلابالغْ بَين الشَّعْبْ.“
\s مَرَة تصب عطر عَ المَسيحْ
\p
\v 6 وَقْتْ لَ كانْ يَسوُعْ ف بَيتْ عَنْيا فَ بَيتْ شَمْعون الاَبْرَصْ،
\v 7 قَرَّبتْ لَعنْدو مَرَة مَعا شوشايةْ عطرْ غال كْثير وْصَبّتو عَلى راسْ يَسوُع، وْهوّاِ منْتكي.
\v 8 التَّلاميذْ اَرَوا وانْزَعَجوا وْقالوا: ”لَيشْ هَالدَّوهيرْ هاذْ؟
\v 9 كانْ واِحد يتيِق يبيِعْ هَالعطر بْمَبْلَغْ مال وْينْعَطى للفَقاراِ.“
\v 10 يَسوُعْ عَرَف وْقالْلنْ: ”لَيشْ تزْعَجون المَرَة؟ عَمَل كْوَيّسْ سَوَت مَعي:
\v 11 ف كلْ وَقْتْ لكنْ فَقاراِ عنْدْكنْ، بَسّ اَنا موُ ف كلْ وَقْتْ عنْدْكن اَنا.
\v 12 هاي لَ صَبّت هَالعطرْ عَلى جَسَدي، لَدَفْني سَوَتْ هَالشِّي.
\v 13 والحَقّ اَقولْكنْ أَينْ لَ انْكَرَزت بْشارتي، ف الدّنْياِ كلّا، تَ ينْحَكى زاِ عَلى شي لَ سَوَتْ هَالمَرَة، وْيبْقالا تذْكارْ.“
\s خيانة ياهوذا
\p
\v 14 هاك الوَقْتْ راحْ واِحدْ م الاثْناعشْ لَ يقولولو ياهوذا الاسْخَرْيوطي، لَعنْد گْباريّة الكَهَنَة،
\v 15 وْقالْلنْ: ”أَيش تْريدونْ تعْطَوني وَانا تَ اسَلّمْكنْ واِ؟“ وْهنّاِ قَرَّرولو ثاِثينْ قطْعةْ فضَّة.
\v 16 وْمنْ هاك الوَقْتْ، كانْ يدَوّرلو عَلى فرْصَة تَ يسَلّمو.
\s عَشات الفصْحْ مَع التَّلاميذْ
\p
\v 17 فَ أوَّلْ يَومْ من إيّاِمْ عيد الفَطيِرْ، قَرَّبوا التَّلاميذْ لَعنْدْ يَسوُع وْقالولو: ”أَين تْريد نْحَضّر لكْ تَ تاكلّ الفصْحْ؟“
\p
\v 18 قالْلنْ: ”روُحوا للبَلَدْ لَعنْد فْلان وْقولولو: ’مْعَلّمْنا يقولْ: زَماني جا، وْعنْدك تَ اسَوي الفصْحْ مَعْ تَلاميذي.‘“
\v 19 وْتَلاميذو سَوَوا كَما لَ وَصّاهنْ يَسوُع، وْحَضَّروا الفصْحْ.
\v 20 وْوَقْتْ لَ مَسَّت المَسا انْتَكا مَعْ تَلاميذو الاثْناعشْ.
\v 21 وْهنّاِ ياكْلونْ، قال: ”الحَقّ اَقولْكنْ واِحدْ منْكنْ تَ يسَلّمْني.“
\v 22 وصعْبتْلن كْثير، وْبَدَوا واِحدْ واِحدْ يسْأَلوهُ يقولولو: ”أَنا واِ يا رَبْ؟“
\v 23 رَدّ وْقالْلنْ: ”هاكْ لَ يغْمزْ بيدو مَعي ف الصَّحن هوّاِ تَ يسَلّمْني.
\v 24 وابْن الانْسانْ رايح واِ كَما لَوّاِ مَكْتوبْ عَلَيو، بَسْ وَيلو هاكْ زَلَمِةْ لَ بيدو تَ يتْسَلَّم ابْن الانْسانْ. يكونْ هاك الزَّلَمِة ما كانْ كلْولدْ أَحْسَنْلو كانْ.“
\v 25 رَدْ ياهوذا لَ سَلَّمو قالْلو: ”أَنا واِ مْعَلّمْ؟“ يَسوُعْ قالْلو: ”أنْتَ قلْتْ.“
\s عَشات الرَّبْانيِّة
\p
\v 26 وْهنّاِ ياكْلونْ، يَسوُعْ أَخَذْ رَغيف وْباِرَك وْكَسَر وْعَطى للتَّلاميذ وْقالْ: ”خذوا كلوا. هذا جَسَدي واِ.“
\v 27 وَاخَذْ كاس وْشَكَر وْعَطاهن وْقالْ: ”خذوا اشْرَبوا منّو كلّتْكنْ.
\v 28 هذا دَمّي واِ بْشانْ عَهْد جْديدْ، يسْري لَخاطرْ كْثيرْ ناِس بْشانْ تنْغفر الخَطيّاتْ.
\v 29 وَاقولْكنْ: م السَّعْ ما بَق اَشْرَبْ منْ ثَمَرْ الغَرْزْ هاذْ دي لَ يَومْ لَ تَ اشْرَبو مَعْكن جْديدْ فَ مَلَكوت اَبوي.“
\v 30 وْسَبَّحوا لَالله وْطَلَعوا لَ جَبَل الزَّيتونْ.
\s يَسوُعْ يتْنَبّا بطْرسْ تَ يتبَرّا منّو
\p
\v 31 هاك الوَقْتْ يَسوُعْ قالْلنْ: ”كلّتْكنْ تَ تتْعَثوَرونْ في فَ هَاللَيلِة، منْ لَ مَكْتوبْ: ’أضْرب الرّاعي وْتَ يتْفَرَّقونْ خَواِريفو.‘
\v 32 بَسْ بَعدْ لَ اقومْ تَ اسْبقْكنْ للجَّليلْ.“
\v 33 رَدْ بطْرسْ قالْلو: ”لَ كلّنْ تْعَثْوَروا فيك، اَنا أَبَدْ موُ اتْعَثْوَرْ فيكْ.“
\v 34 يَسوُعْ قالْلو: ”الحَقّ اَقولْ لكْ: فَ هَاللَيلِة هاي، قَبلْ لَ يسيِح الدّيك، ثَةْ طرْقْ تَ تنْكرْني.“
\v 35 بطْرسْ قال: ”يكون يسيِر لي تَ اموتْ مَعكْ، موُ انْكرك.“ وْكذاِ زاِ كلّ التَّلاميذْ قالوا.
\s يَسوُعْ يصَلّي فَ جَدسيمان
\p
\v 36 هاك الوَقْتْ، جا مَعنْ يَسوُعْ لَموُضَعْ لَ يقولولو: جَدْسيمان، وْقالْلن: ”اقْعَدوا هَونْ عَلى قَدْ ما أَروُح اَصَلّي.“
\v 37 وْوَدّى مَعو بطْرس وولَدَينْ زَبَدي اثْنَينتن، وْبَدا ينْهَم وْينْغَمْ.
\v 38 وْقالْلنْ: ”حَزينِة ياِ نَفْسي دي للمَوت. ابْقَوا لي هَونْ واسْهَروا مَعي.“
\v 39 وبَعَّدْ منّن شْوَي، وْوَقَعْ سَجَدْ عَلى وچّو، وْصَلّى وْقالْ: ”أَبوي! لَ كانْ ممْكنْ، خَلّي يفوتْني هَالكاسْ هاذْ، بَسْ موُ كَما لَ انا أَريدْ، بَلىِ كَما لَ انْتَ تْريدْ.“
\v 40 وْجا لَعنْدْ تَلاميذو وَاراهنْ نِيّام، وْقالْ لَبطْرسْ: ”كذاِ ما تقْتنْ ساعَة وحْدِة تسْهَرونْ مَعي؟
\v 41 اصْحَوا وْصَلَّوا بْشانْ لا تدْخلونْ فَ تَجْرِبِة. الرّوُحْ مسْتَعدِّة ياِ، مسْتَعدِّة، بَسّ الجَّسَدْ ضَعيفْ ضَعيفْ واِ.“
\v 42 وْرجعْ راحْ كَرْةْ لخْ صَلّى وْقالْ: ”أَبوي! لَ ما كانْ ممْكن يفوتْني هَالكاسْ بَلا لَ اشْرَبو، خَلّي تْكون إرادتكْ.“
\v 43 وْجا كَرْة لخْ أَراهنْ ناِيمينْ، منْ لَ كانْ ك تْشَكَّلوا عَينَينْ.
\v 44 وخَلّاهن وْراح. وْثالثْ كَرَّة صَلّى وْقالْ نَفْس الكَلامْ.
\v 45 وْبَعْدا جا لَ عنْدْ تَلاميذو وْقالْلن: ”م السَّعْ بَقى ناموا ارْتاحوا! كْوا جَتّ السّاعَة، وابْن الانْسانْ يتْسَلَّمْ ف ايدَين الخاطْيينْ.
\v 46 قوموا تَ نْروُحْ! كْوا وصلْ هاكْ لَ تَ يسَلّمْني.“
\s الياهودْ يمْسكون يَسوُعْ
\p
\v 47 وْهوّاِ بَعدْ قايمْ يحْكي، والّا ياهوذا الّمْسَلّمْ لَ كانْ واِحدْ م الاثْناعشْ، جا وْمَعو طَلْقةْ ناِس گْبيرِة حاِمْلين سْيوفِة وْخَيزَراناتْ، منْ عنْد گْباريّة الكَهَنَة وشْيوُخة الشَّعْبْ.
\v 48 وْياهوذا لَ سَلَّمو كانْ كلْعَطاهنْ عَلامِة قالْلنْ: ”هاكْ لَ ابوسو هوّاِ واِ، لهُ امْسكوا.“
\v 49 وراساً قَرَّبْ لَعنْدْ يَسوُع وْقالْ: ”سَلام مْعَلّم.“ وْباسو.
\v 50 يَسوُعْ قالْلو: ”بْشانْ هاي لَ جيتْ يا سَديقي.“ هاك الوَقْتْ قَرَّبوا وْمدّوا ايدَينْ لَيَسوُع وْمسْكوهُ.
\v 51 واِحدْ منْ هَوكْ لَ مَعْ يَسوُعْ مَدّ ايدو وْسَحَبْ سَيف زْغَيّر وْضَرَبْ عَبْد گْبير الكَهَنَة وْقَطَع اذْنو.
\v 52 هاك الوَقْتْ يَسوُعْ قالْلو: ”رَجّعْ سَيفكْ لَموُضَعو. كلْ هَوكْ لَ اخَذوا سْيوفِة، بالّسْيوفِة تَ يموتونْ.
\v 53 والّا تفْتكرْ موُ اتيِق اَطْلبْ منْ أَبوي ويقَيّمْ لي السَّعْ أكْثَرْ من اثْناعشْ جَيشْ م المَلايكِة؟
\v 54 أشْوَنْ بَقى تَ يتمّ المَكْتوبْ ف الاسْفارْ لَ تْقولْ: كذاِ لازم يسيِرْ؟“
\v 55 فاك السّاعَة، يَسوُعْ قالْ لَهَوكْ طَلْقات النّاِسْ: ”كَما لَ يكون عَلى واِحدْ منْ قطّاع الطّرْقْ، طَلَعْتنْ بسْيوفِة وْخَيزَراناتْ تَ تمْسكوني. كلْ يَومْ عنْدْكنْ ف الهَيكَلْ كانْ أَقعَدْ أَعَلّم، وْما مسكتنْني.
\v 56 بَسْ هاي صارتْ تَ تتمّ اسْفار الاَنْبِيا.“ هاك الوَقْتْ، التَّلاميذْ كلّتنْ خَلَّوهُ وْهَرَبوا.
\s مَحكَمة يَسوُعْ فَ مَجلس الياهودْ
\p
\v 57 هَوكْ لَ مسْكوا يَسوُعْ ساقوهُ لَعنْدْ قَيافا گْبير الكَهَنَة، موُضَعْ لَ كانْ ك اجْتَمَعوا مْعَلْمين النّاموسْ والّشْيوُخَة.
\v 58 وْشَمْعونْ بطْرسْ كانْ رايحْ خَلْفو من بْعيدْ دي لَ دار گْبير الكَهَنَة، وْدَخَلْ قعدْ جَوّا مَع الحرّاسْ تَ يّرى النّهايِة.
\p
\v 59 گْباريّة الكَهَنَة والّشْيوُخَة والمَجلس كلّو كان يدَورونْ عَلى شْهود زوُر عَلى يَسوُعْ تَ يمَوتوهُ،
\v 60 وْما ارَوا. وْجَوا كْثير شْهودْ زوُرْ. آِخرْ شي قَرَّبوا اثْنَينْ،
\v 61 وقالوا: ”هذا قالْ: ’أَتيِق اَخَرّبْ هَيكَل اَلله وَاعَمّرو فَ ثَةّ اِيم.‘“
\v 62 وْقامْ گْبير الكَهَنَة وْقالْلو: ”موُ تْجاِوبْ شي؟ أَيشْ يشْهَدونْ عَلَيك هَوذْ؟“
\v 63 بَسْ يَسوُعْ ساِكتْ كانْ. رجع گْبير الكَهَنَة قالْلو: ”أَحَلّفكْ بَالله الحَي تَ تْقول لْنا لَ انْتَ واِ المَسيح ابْن اَلله.“
\v 64 يَسوُعْ قالْلو: ”أنْتَ قلْتْ، وَاقولْكنْ: م السَّعْ تَ تّرَون ابْن الانْسانْ قاِعدْ عَلى يَمين القوِّة، وْجاِييِ عَلى غْيوم السَّما.“
\v 65 هاك الوَقْت گْبير الكَهَنَة شَرَّطْ حَويسو وْساحْ: ”هاي كَفَرْ. أَيش شْهودْ بَقى يريد لْنا؟ كْوا السَّعْ سمعْتنْ كفْرو.
\v 66 أَيشْ تْريدونْ؟“ رَدّوا وْقالوا: ”يسْتَحقّ المَوتْ.“
\v 67 هاك الوَقْتْ بَزَقوا ف وچّو وْبَقى يلْطموهُ وْغَيرنْ يضْربوهُ،
\v 68 ويقولون: ”تْنَبّا لْنا يا مَسيحْ، منْ واِ لَ ضَرَبكْ؟“
\s بطْرسْ يتبَرّا منْ يَسوُعْ
\p
\v 69 بطْرسْ كانْ قاِعدْ بَرّا ف الحَوش. وْقَرَّبْت لَعنْدو وحْدِة خدّاِمِة وْقالتْلو: ”وانْتَ زاِ مَعْ يَسوُع النّاصري كنْتْ.“
\v 70 بَسْ هوّاِ نَكَرْ قدّامْ كلّنْ وْقالْ: ”موُ اعْرفْ أَيش تْقولينْ؟“
\v 71 وْلَمَنْ طَلَعْ صوُبْ باب الحَوش، اَرَتو غَيرْ وحْدِة وْقالتْلنْ: ”هاذْ زاِ هَونَكْ كانْ مَعْ يَسوُع النّاصري.“
\v 72 وْرجعْ نَكَر وْحَلَف وْقالْ: ”موُ اعْرف الزَّلَمِة.“
\v 73 وبَعْد شْوَي، هَوك القيّامْ قَرَّبوا وْقالوا لَبطْرسْ: ”حَقا أنْتَ زاِ منّن انْتَ، لَهْجتكْ تكْشفكْ.“
\v 74 هاك الوَقْتْ بَدا يتْنَعَّل وْيحْلفْ ويقولْ: ”أَنا موُ اعْرف الزَّلَمِة.“ وْفَ ساعتا ساح الدّيك.
\v 75 وْجا لَبالْ بطْرسْ كلْمةْ يَسوُعْ لَ قالْلو: ”قَبلْ لَ يسيِح الدّيك، ثَةْ طرْقْ تَ تنْكرْني.“ قامْ طَلَعْ لَبَرّا وْبكي بْمَرارَة.
\c 27
\s وَقْتْ لَ تسَلَّم يَسوُعْ لَبيلاطُسْ
\p
\v 1 وَقْتْ لَ صارتْ الصّبح، گْباريّة الكَهَنَة وشْيوُخة الشَّعْبْ، اشْتاروا فَ بَعْضنْ واتَّفَقوا عَلى مَوتْ يَسوُعْ.
\v 2 وشَدَّدوهُ وْساقوهُ وْسَلَّموهُ لَبيلاطُسْ الوالي.
\s ياهوذا يخنق حالو
\p
\v 3 هاك الوَقْتْ لَمَنْ ياهوذا أَرى يَسوُع انْحَكَمْ، ندم، وْراحْ رَجَّعْ هَوك ثاِثينْ قطْعة الفضَّة لَگْباريّة الكَهَنَة والّشْيوُخَة،
\v 4 وْقالْ: ”خطَيتُ لَ سَلَّمْتوكنْ دَم بَري.“ قالولو: ”نحْناِ أَيشْ؟ أنْتَ تعْرفْ.“
\v 5 قامْ كَبّ الفضَّة ف الهَيكَل وْطَلَعْ وْراحْ خَنَقْ روُحو.
\v 6 گْباريّة الكَهَنَة أَخَذوا الفضَّة وْقالوا: ”موُ يسيِر نْحطّا فَ خَزْنة القَرابينْ، منْ لَ حَقْ دَمْ ياِ.“
\v 7 واشْتاروا فَ بَعْضنْ، واشْتَرَوا فِيا حَقل القوّاق وْسَوَوهُ مَقبَرَة للغرْبْ.
\v 8 منْ هاي هاك الحَقلْ يتْسَمّى حَقل الدَّمْ دي لليَومْ.
\v 9 هاك الوَقْتْ تَمْ شي لَ انْقالْ بالنَّبي لَ قالْ: ”وَاخَذْتُ الثّاِثينْ قطْعةْ فضَّة حَقّ العَزيز الغالي لَ قَدَّروا حَقّو بَني اسْرائيلْ.
\v 10 ودَفَعتوونْ حَقْ حَقل القوّاقْ، كَما لَ أَمَرْني الرَّبْ.“
\s بيلاطُسْ يحَقّق ويدَقّق مَعْ يَسوُعْ
\p
\v 11 وقامْ يَسوُعْ قدّام الوالي، وْسَأَلو الوالي قالْلو: ”أنْتَ واِ مَلك الياهودْ؟“ يَسوُعْ قالْلو: ”أنْتَ قلْتْ.“
\v 12 ولَمَن گْباريّة الكَهَنَة والّشْيوُخَة كانْ يتْهموهُ تهَم كْثيرْ، هوّاِ ما رَدّ وْلا كلْمِة.
\v 13 هاك الوَقْتْ بيلاطُسْ قالْلو: ”موُ تسْمَعْ أَشْقَدْ يشْهَدونْ عَلَيكْ؟“
\v 14 بَسْ ما عَطاهُ جَواب وْلا بْكلْمِة وحْدِة، وْعَلى هاي تْعَجَّب كْثيرْ.
\s الحكمْ عَلى يَسوُعْ بالمَوت
\p
\v 15 وْف كلْ عيد مْعَوَّدْ كانْ الوالي يفَلّتْ واِحدْ م الّمْحَبَّسينْ للشَّعبْ، أَينا لَ هنّاِ كان يريدونْ.
\v 16 وْكانْ لهنْ مَحْبوسْ مَعروف يقولولو بارابا.
\p
\v 17 وْهنّاِ ملْتَمّينْ بيلاطُسْ قالْلنْ: ”من تْريدون اَفَلّت لْكنْ، بارابا والّا يَسوُعْ لَ يقولولو المَسيحْ؟“
\v 18 منْ لَ كانْ يعْرفْ بيلاطُسْ منْ حَسَدنْ سَلَّموهُ.
\v 19 وَقْتْ لَ كان الوالي قاِعدْ عَ البيما، بَعَثتْ مَرَتو تْقولْ: ”بالكْ وايّاك تْضرْ هاك البارْ، منْ لَ كْثير تْعَذَّبْتُ فَ مَنامي اليَومْ لَخاطرو.“
\v 20 بَسّ گْباريّة الكَهَنَة والّشْيوُخَة قَنَّعوا ناِس الملْتَمّينْ تَ يطْلبونْ بارابا ويتَوبلونْ يَسوُعْ.
\v 21 ورَدّ الوالي وْقالْلنْ: ”لَمن تْريدونْ أَفَلّت لْكنْ م الاثْنَينْ؟“ قالوا: ”بارابا.“
\v 22 بيلاطُسْ قالْلن: ”وْيَسوُعْ لَ يقولولو المَسيحْ أَيش اَسَي فِيو؟“ كلّنْ قالوا: ”خَلّي ينْصلبْ.“
\v 23 الوالي قالْلنْ: ”أَيشْ شَرْ سَوى؟“ بَسْ هنّاِ أكْثَرْ بَقى يزْعَقونْ ويقولونْ: ”خَلّي ينْصلبْ.“
\v 24 لَمَنْ بيلاطُسْ أَرى شي موُ ينْفَعْ، بَلىِ أكْثَر يهيجونْ، أَخَذْ مَي وْخَسَّل ايدَيو قدّامْ ناِس الملْتَمّينْ كلّن، وْقالْ: ”أَنا بَري منْ دَمْ هَالبار. أنْتنْ تعْرفونْ.“
\v 25 وْرَدّوا كلّ الشَّعْب وْقالوا: ”دَمّو عَلَينا وْعَلى اولادْنا.“
\v 26 هاك الوَقْتْ طاِلَعْلنْ بارابا وْقَرْپَچْ يَسوُع وْسَلَّمو تَ ينْصلبْ.
\s العَسْكَرْ يتْمَهزَونْ ف يَسوُعْ
\p
\v 27 قاموا عَسْكَر الوالي وَدَّوا يَسوُعْ لَدار الحكومِة وْلَمّوا عَلَيو الطّابورْ كلّو.
\v 28 وشَلَّحوهُ وْلَبَّسوهُ قَميسْ طَويلْ قرْمزي.
\v 29 وْضَفَروا اكْليلْ شَوك وْحَطّوا فَ راسو، وْعَصايةْ قَصَبْ ف ايدو اليَمين، وْرَكَعوا عَلى ركَبنْ قدّامو يتْمَهزَونْ فِيو ويقولونْ: ”سَلامْ يا مَلك الياهودْ.“
\v 30 وبَزَقوا ف وچّو وَاخَذوا عَصاية القَصَب وْضَرَبوهُ عَلى راسو.
\v 31 وْبَعدْ لَ تْمَهْزَوا فِيو، شَلَّحوهُ القَميس وْلَبَّسوهُ حَويسو وْوَدَّوهُ تَ ينْصلبْ.
\s يَسوُعْ عَ الصَّليبْ
\p
\v 32 وْهنّاِ طالْعينْ أَرَوا زَلَمِة قيرَواني اسْمو شَمْعون، وْلَهاذْ سَخَّروا تَ يحْملْ صَليبو.
\v 33 وْجَوا لَموُضَعْ لَ يقولولو الجّلجلِة، وْمَعْنات الاسمْ جمْجمِة،
\v 34 وعَطَوهُ تَ يشْرَبْ مَخْلوُط بْمر. وْذاق وْما رادْ يشْرَبْ.
\p
\v 35 وْلَمَنْ صَلَبوهُ تْقَسَّموا حَويسو بالقرْعَة.
\v 36 وقعْدوا يحْرسوهُ هَونَكْ.
\v 37 وعَلَّقوا فوُقْ راسو سَبَبْ مَوتو مَكْتوبْ ف لوُحْ: ”هذا واِ يَسوُعْ مَلك الياهودْ.“
\v 38 وانْصَلَبْ مَعو اثْنَينْ قطّاِعينْ طرْقْ، واِحدْ منْ عَلى يَمينو وْواِحدْ منْ عَلى شمالو.
\v 39 وْهَوكْ لَ كان يفوتونْ منْ هَونَكْ كانْ يكْفرونْ فِيو، ويهزّونْ روسنْ،
\v 40 ويقولونْ: ”أنْتَ هاذْ لَ تَ يخَرّب الهَيكَلْ ويعَمّرو فَ ثَةّ اِيم! خَلّصْ روُحكْ، لَ ابْن اَلله أنْتَ وانْزَلْ منْ عَ الصَّليبْ.“
\p
\v 41 ونَفس الشِّي گْباريّة الكَهَنَة زاِ كانْ يتْمَهزَونْ مَع مْعَلْمين النّاموسْ والّشْيوُخَة والفَرّيسيِّة، ويقولونْ:
\v 42 ”لَغَيرو خَلَّصْ، نَفْسو موُ يتيِق يخَلّصْ. لَ مَلك اسْرائيلْ واِ، خَلّي ينْزَل السَّعْ منْ عَ الصَّليبْ تَ نْآمنْ فِيو.
\v 43 اتَّكَلْ عَلى اَلله، خَلّي ينَجّيو السَّعْ لَ كانْ راضي عَلَيو، منْ لَ قال: ’ابْن اَلله اَنا.‘“
\v 44 ونَفس الشِّي هَوكْ قطّاِعين الطّرْقْ زاِ لَ انْصَلبوا مَعو كان يهينوهُ.
\s يَسوُعْ يسَلّم الرّوُحْ
\p
\v 45 وْمنْ ساعَة ستِّة صارْ عتْمِة عَلى كلّ الاَرْضْ دي لَ ساعَة تسْعَة.
\v 46 وحَوالي ساعَة تسْعَة، يَسوُعْ ساحْ صَوتْ عاِلي وْقالْ: ”إيلْ إيلْ! لَيشْ عفْتْني.“
\v 47 ناِسْ منْ هَوكْ لَ كانوا قايمينْ هَونَكْ، لَمَنْ سمْعوا قالوا: ”هاذْ لإيِليّا ساحْ.“
\v 48 وْفَ ساعتا عدي واِحدْ منّنْ، وَاخَذ اسْفنْجِة وْغَطّا ف الخَلّ وْحَطّا عَلى عَصايِة وْبَقى يسْقِيو.
\v 49 بَسّ الباقي كان يقولونْ: ”خَلَّوا نرى حَقا تَ يّجي إيِليّا يخَلّصو؟“
\v 50 وْرجعْ يَسوُعْ ساح بْصَوتْ عاِلي وْخَلّى الرّوُحْ.
\v 51 وراساً سترْ باب الهَيكَلْ انْشَقْ لَ اثْنَينْ، منْ فوُقْ دي لَ تَحْتْ، والاَرْض تْزَرْزَعتْ والحجاِير تْشَقْشَقتْ،
\v 52 والّقْبوُرْ تْفَتَّحتْ، واجْساد كْثيرْ قَدّيسينْ لَ كانوا ناِيمينْ قاموا،
\v 53 وْطَلَعوا. وبَعْد قْياِمتو، دَخَلوا لَ مَدينة الّمْقَدَّسِة، وْظَهَروا لَكْثيرْ.
\v 54 قايد الميِّة وْعَسْكَرْ لَ مَعو، لَ كانْ يحْرسونْ يَسوُعْ، وَقْتْ لَ ارَوا الزَّنزَلِة وْشي لَ صارْ، خافوا كْثير وْقالوا: ”حَقّ اليَقينْ هاذ ابْن اَلله كانْ.“
\p
\v 55 وْكانْ في هَونَكْ نسْوان كْثير يرَونْ من بْعيدْ، هَوذْ لَ كانْ كجَّوا خَلْفْ يَسوُعْ م الجَّليل وْكانْ يخْدموهُ.
\v 56 ووحْدِة منّنْ مَرْيَمْ المَجْدَليِّة، وْمَرْيَمْ أم يَعْقوب وْيوسي، وامّ اولاد زَبَدي.
\s دَفن جثمان يَسوُعْ
\p
\v 57 وَقْتْ لَ مَسَّت المَسا، جا زَلَمِة زَنْگينْ م الرّامِة اسْمو يوسف، وْهوّاِ زاِ تَلْميذْ لَ يَسوُعْ كانْ كصّارْ،
\v 58 هاذْ قَرَّبْ لَعنْدْ بيلاطُسْ وْطَلَبْ جَسَدْ يَسوُع، وْبيلاطُسْ أَمَرْ تَ يعْطَوهُ الجَّسَدْ.
\v 59 وَاخَذْ يوسف الجَّسَد وْلَفّو فَ لَفّة كتّانْ نَظيفْ،
\v 60 وْحَطّو فَ قَبْر جْديدْ لهُ مَنْقوُرْ فَ كافْ حَجَر. وْگنْدَروا كاف گْبيرْ عَلى باب القَبْر، وْراحوا.
\v 61 وْكانْ في هَونَكْ مَرْيَمْ المَجْدَليِّة وْمَرْيَمْ اللخْ، كانوا قاِعْدين مْقابل القَبرْ.
\s حراسة القَبر
\p
\v 62 وثاِني يَومْ، لَوّاِ بَعْد الجّمعَة، اجْتَمَعوا گْباريّة الكَهَنَة والفَرّيسيِّة عنْدْ بيلاطُسْ،
\v 63 وقالولو: ”سَيّدْنا! جا لَبالنا هاك الغشّاشْ، وَقْتْ لَ كانْ طَيّبْ قالْ: ’بَعدْ ثَةّ اِيم تَ اقومْ.‘
\v 64 بَقى طاِلعْ أَمَرْ تَ يحْرسون القَبرْ دي لَ ثَةّ اِيم، بْشانْ لا يجَونْ تَلاميذو يشْبطوهُ باللَيلْ، ويقولونْ للشَّعبْ: ’منْ بَين المَيتينْ قامْ،‘ وتْسيِرْ صَرْعة الآخرْ أَشَرْ م الاَوَّليِّة.“
\v 65 بيلاطُسْ قالْلنْ: ”في عنْدْكنْ حرّاسْ، روُحوا أَمْنوا كَما لَ تعْرفونْ.“
\v 66 وْهنّاِ راحوا أَمَّنوا القَبر، وْخَتَموا هاك الكاف مَع الحرّاسْ.
\c 28
\s قياِمة يَسوُعْ منْ بَين المَيتينْ
\p
\v 1 وْبَعدْ مَسات السَّبْتْ، وَقْتْ لَ يبْدي نْهار الاحَّدْ، جَتْ مَرْيَمْ المَجْدَليِّة وْمَرْيَمْ اللخْ تَ يرَون القَبرْ.
\v 2 والّا زَنْزَلِة قَويِّة صارْ، منْ لَ مَلاك الرَّبْ نزلْ م السَّما، وْقَرَّبْ گَنْدَر الكافْ منْ عَلى الباب وْقعدْ عَ الكافْ.
\v 3 مَنْظَرو كَما البَرْقْ كان، وْلبْسو اَبْيَضْ كَما السَّلجْ.
\v 4 وْمنْ هَيبتو رجْفوا لَ كانْ يحْرسون وْصاروا كَما المَيتينْ.
\v 5 رَدّ المَلاكْ قالْ للمَرْتَينْ: ”أنْتنْ لا تْخافونْ، منْ لَ أَعْرفْ يَسوُعْ لَ انْصَلَب تْريدونْ.
\v 6 موُ هَونْ واِ. قامْ كَما لَ قال. تَعَوا رَوا موُضَعْ لَ كانْ مَحْطوُطْ فِيو سَيّدْنا.
\v 7 وْروُحوا خَفيفْ قولوا لَتَلاميذو: ’قامْ منْ بَين المَيتينْ، وكْوا تَ يروُح قَبلْكنْ للجَّليلْ، هَونَكْ تَ تّرَوهُ.‘ هاي اَنا قلْتُ لْكنْ.“
\p
\v 8 وراحوا خَفيفْ منْ عنْد القَبر بْخَوف وْفَرَحْ عَظيم، وْعدْيوا تَ يقولونْ لَتَلاميذو.
\v 9 والّا يَسوُعْ يطْلَعْ قدّامنْ، ويقولْلنْ: ”سَلامْ لكنْ.“ هنّاِ قَرَّبوا لَعنْدو وْمسْكوا اجْرَيو وْسَجَدولو.
\v 10 هاك الوَقْتْ يَسوُعْ قالْلنْ: ”لا تْخافونْ! روُحوا قولوا لاخوتي تَ يروُحونْ عَ الجَّليل وْهَونَكْ تَ يرَوني.“
\s گذب رُوَسا الياهودْ
\p
\v 11 وَقْتْ لَ كانوا رايحينْ، جَوا ناِسْ منْ هَوك الحرّاسْ للمَدينِة وْقالوا لَگْباريّة الكَهَنَة عَلى كلْ شي لَ صارْ.
\v 12 واجْتَمَعوا مَع الّشْيوُخَة واشْتاروا فَ بَعْضنْ، وْعَطَوا الحرّاس فضَّة موُ شي قْلَيلْ.
\v 13 وقالولنْ: ”قولوا: ’تَلاميذو جَوا شَبَطوهُ باللَيلْ، وْنحْناِ نِيّامْ.‘
\v 14 وْلَ انْسَمَعت هاي قدّام الوالي، نحْناِ تَ نْقَنّعو، وانْتنْ لا يكولْكنْ فكرْ.“
\v 15 وْهنّاِ وَقْتْ لَ اخَذوا الفضَّة، سَوَوا كَما لَ عَلَّموون. وْطَلَعتْ هَالكلْمِة بَين الياهودْ دي لَ اليَومْ.
\s المَسيحْ يظْهَر لتَلاميذو
\p
\v 16 قاموا التَّلاميذْ الاحْداعشْ راحوا لَديرة الجَّليلْ، للجَّبَلْ موُضَعْ لَ واِعَدنْ يَسوُعْ.
\v 17 وْوَقْتْ لَ ارَوهُ سَجَدولو. بَسْ ناِسْ منّنْ شَكّوا.
\v 18 وْقَرَّبْ يَسوُعْ حَكى مَعن وْقالْلن: ”انْعَطَيتُ كلْ سلْطَة ف السَّما والاَرْض. وْكَما لَ بَعَثْني أَبوي، اَنا زاِ أَبْعَثْكنْ.
\v 19 بَقى روُحوا سَوَوا كلّ الامَمْ تَلاميذ، وْعَمْذوونْ باسْم الآبْ والابن وْروُح القدسْ،
\v 20 وعَلموونْ تَ يطيعونْ كلْ شي لَ وَصَّيتوكنْ فِيو. وْهاي اَنا مَعْكنْ اَنا كلّ الاِيّاِم دي لآِخر الدَّهرْ.“ آمّينْ.