\id PHP
\h فيليبي
\toc1 فيليبي
\toc2 فيليبي
\toc3 فيليبي
\mt1 مكتوب بولس الرَّسول لبيعة فيليبي
\c 1
\p
\v 1 بولس وْتيموُثاوُسْ عَبيدْ يَسوُع المَسيحْ لكلّ القَدّيسينْ ف فيليبي، مَع شْيوُخَة وْشماِمْسِة.
\v 2 نعْمِة مَعْكن وْسَلامْ من اَلله أَبونا وْمنْ رَبْنا يَسوُع المَسيحْ.
\v 3 أَشْكرْ إلهي عَلى ذكرْكن الدّايم،
\v 4 ف كلْ دَعْواتي بْشانْكنْ، واتْضَرَّعْ وَانا فرْحانْ
\v 5 بمْشارَكتْكنْ ف الّبْشارَة منْ أَوَّلْ يَوم وْدي للسَّعْ،
\v 6 منْ لَ لي ثقَة، ألله هاكْ لَ بَدا يعْمَلْ فيكن اعْمالْ صالْحَة، هوّاِ تَ يكَمّلْ دي لَيَومْ يَسوُع المَسيحْ.
\v 7 كذاِ يحقْ لي أَفْتكرْ فيكنْ كلّتْكنْ، منْ لَ فَ قَلْبي مَحْطوُطين انْتن. وْف زناِجيري وْف دفاعي عَلى حَقّ الّبْشارَة، شَراكتي ف النّعْمِة أنْتنْ.
\v 8 أَلله يشْهَدْ لي أشْوَنْ أَحبْكنْ منْ قَلْبْ يَسوُع المَسيحْ.
\v 9 وْهاي ياِ صَلاتي بْشانْكنْ: تَ تكْثَرْ بَعدْ وتْزيد مْحَبّتْكنْ بالمَعْرِفِة وبْكلْ فهمْ روُحاني،
\v 10 بْشان تْمَيزون الواجبات، وتْكونونْ طاهْرينْ بَلا عَثْوَرَة ف يَومْ يَسوُع المَسيحْ.
\v 11 ومْعَبّايين ثْمارْ برْ فَ يَسوُع المَسيحْ لَمَجد وْكَرامة اَلله.
\p
\v 12 وَاريدْ تعْرفونْ يا اخوتي، قَضيّتي مشْيتْ ف الّبْشارَة لَقدّامْ.
\v 13 كذاِ حتّى بَيَّنتْ زناِجيرْ حَبْسي لَخاطر المَسيحْ ياِ لكلْ قَصر الحاكم وْباقي النّاِسْ.
\v 14 وَاكثَر الاخْوِة لَ فَ رَبْنا، اتَّكَلوا عَلى زناِجيري، وتْجاسَروا بَلا خوفْ تَ يقولونْ كلْمة اَلله.
\v 15 ناِسْ ناِسْ منْ حَسَدْ ومْخاصَمِة وْناِسْ ناِس بْإرادِة صالْحَة وْبمْحَبِّة للمَسيحْ يكْرزونْ،
\v 16 منْ لَ يعْرفون بْشانْ أداِفعْ عَ الّبْشارَة مْعَيَّن اَنا.
\v 17 بَسْ هَوكْ لَ بمْخاصَمِة يكْرزونْ للمَسيحْ، موُ بْنَقاوِة يكْرزونْ، بَلىِ يفْتكْرون يزيدونْ ذيقْ لَزناِجيري.
\v 18 وبْهاي فرحْتُ وَافْرَحْ، منْ لَ ف كلْ فرْصَة – بْغاية والّا بْحَقْ – المَسيحْ ينْكرزْ.
\v 19 منْ لَ أَعْرفْ هَوذْ لَخَلاصْ يطْلَعوا لي بْصَلاةْ طَلَبْكنْ وبْعَطيِّة روُحْ يَسوُع المَسيحْ،
\v 20 عَلى موجبْ لَ أرجي وَانْطرْ ف شي ما تَ اطْلَعْ مَخْجولْ، بَلىِ بْجَسارَة، كَما فَ كلْ وَقْت، السَّعْ زاِ يتْعَظَّم المَسيحْ فَ جَسَدي، لَ بْحَياةْ يا بْمَوتْ.
\v 21 منْ لَ الحَياةْ لي المَسيحْ ياِ، وْلَ تَ اموتْ، ربْحْ واِ.
\v 22 بَسْ لَ فَ حَياة الجَّسَدْ هاي لي ثْمارْ، موُ اعْرفْ أَيش اَخْتارْ،
\v 23 منْ لَ مَحْصوُر اَنا م الطَّرَفَينْ، رَواح اَشْتهي أَروُحْ واكونْ مَع المَسيح، وْهاي صالْحَة كْثيرْ كانْ تَ تْكونْ لي.
\v 24 بَلىِ هاي لَ تَ ابْقى في الجَّسَدْ زاِ تجْبرني لَخاطرْكنْ.
\v 25 وْهاي أَعْرف بْثقَة، تَ اباتْ وابْقى مَعْكنْ كلّتْكنْ لَفَرَحْكن وْتَربيةْ إيمانْكنْ.
\v 26 بْشانْ بَسّ آجي كَرْةْ لخْ لَعنْدْكنْ، يزيد بْسَبَبي افْتخارْكنْ لَ بْيَسوُع المَسيحْ بَسْ.
\v 27 بَسْ كَما لَ يليقْ لَبْشارةْ المَسيحْ عيشوا، بْشانْ لَ جيتُ أَراكن، وْلَ بْعيدْ كنْتُ منْكنْ، أَسْمَعْ عَلَيكنْ قايمين انْتنْ بْروُحْ وحْدِة وْنَفْسْ وحْدِة وْتتْشَرَّفونْ مَعْ بَعضْكنْ ف إيمان الّبْشارَة،
\v 28 وْف شي موُ خايفينْ منْ هَوكْ لَ يقومونْ ضدْنا، برْهانْ لهَلاكن وْخَلاصْكنْ.
\v 29 وْهاي من اَلله انْعَطَيتنْ موُ بَسْ إيمانْ تَ تْآمْنونْ بالمَسيحْ، بَلىِ لَخاطرو زاِ انْعَطَيتنْ تَ تتْأَلَّمونْ،
\v 30 وتتْحَمَّلون مْقاساة، كَما هاكْ لَ ارَيتنْ في والسَّعْ تسْمَعونْ عَلَي.
\c 2
\p
\v 1 بَقى لَ كانْ في عنْدْكنْ تَعزِيِة ف المَسيحْ، لَ كانْ في عنْدْكنْ تَطْييبْ خاطرْ بمْحَبِّة، يا شَراكِة ف الرّوُحْ، يا رَحْمِة وْحنّيِّة،
\v 2 كَمْلوا فَرَحي، وْكونوا براي واِحدْ ومْحَبِّة وحْدِة وْنَفسْ وحْدِة وْفكرْ واِحدْ.
\v 3 وْشي بْخصامْ وبْعَظامِة فارغَة لا تْسَونْ، بَلىِ بْتَواضعْ فكرْ كلْ واِحدْ خَلّي يحْسبْ رَفيِقو أَحْسَنْ منّو،
\v 4 وْلا الواِحدْ فَ نَفْسو يهْتمْ، بَلىِ كلْ واِحدْ فَ رَفيِقو زاِ.
\v 5 وْفَكْروا فَ نَفسْكنْ فَ هاي: يَسوُع المَسيحْ زاِ،
\v 6 هاكْ لَ وَقْتْ لَوّاِ ف شَبَه اَلله، موُ سَلْبْ حَسَبا هاي لَوّاِ كَما أَلله.
\v 7 بَلىِ نَفْسو فَرَّغ، وْصورةْ عَبْدْ أَخَذ، وْصارْ ف شَبَه البَشَر، وْفَ حلّة الانْسانْ انوَجَدْ.
\v 8 وتْواضَع وْطاعْ دي للمَوتْ، مَوتْ عَ الصَّليبْ.
\v 9 منْ هاي زاِ اَلله عَلّاهُ كْثير وْعَطاهُ اسمْ أشْرَفْ منْ كلّ الاساِمي.
\v 10 بْشانْ باسمْ يَسوُعْ كلْ ركْبِة ترْكَع، ف السَّما والاَرْض وْتَحْت الاَرْضْ،
\v 11 وْكلّ لْساِن يقرْ رَبْ واِ يَسوُع المَسيحْ لَمَجد اَلله أَبوهُ.
\p
\v 12 بَقى يا عَزيزيني، كَما لَ دايمْ طعْتنْ، موُ بْحضوري بَسْ، بَلىِ السَّعْ وَانا بْعيدْ منْكن، بْخَوف وْرَجْفِة أكْثَر اشْتغْلوا شغلْ خَلاصْكنْ،
\v 13 منْ لَ الله يقَوِّي فيكنْ إرادتْكنْ و(يقَوّيكنْ) تَ تفْعَلونْ شي لَ تْريدونْ.
\p
\v 14 سَوَوا كلْ شي بَلا تَشَكّي واخْتلافْ،
\v 15 بْشان تْكونون وَديعينْ بَلا عَيبْ كَما اولادْ طاهرينْ لَالله يسْكنونْ مَعْ جيلْ صَعْبْ أَعْوَج، وْبَينوا بَيناتنْ كَما انْوار ف الدّنْياِ.
\v 16 منْ لَ مَكانْ حَياة انْتنْ لهن، بْشانْ فَخْري فَ يَوم المَسيحْ، منْ لَ موُ عَ الفاضي عديتُ وْلا عَ الفاضي تعبْتُ.
\v 17 بَلىِ حتّى لَ كانْ أَنصَبْ سَكيبْ ذَبيحَة عَلى ذَبيحة وْخدْمةْ إيمانْكنْ، أَفْرَحْ وَاهَلهلْ مَعْكنْ كلّتْكنْ.
\v 18 كذاِ أنْتنْ زاِ افْرَحوا وْهَلْهلوا مَعي.
\p
\v 19 ولي رَجا فَ رَبْنا يَسوُعْ تَ ابْعَثْ لَعنْدْكنْ طيموُثاوُسْ خَفيف، بْشان اَنا زاِ يرْتاحْ بالي وَقْتْ لَ اعْرفْ عَلَيكنْ.
\v 20 منْ لَ ما لي هَون اَحَّدْ غَيرو كَماي منْ كلّ القَلْبْ يعْتني فيكنْ.
\v 21 منْ لَ كلّتنْ شَغْلاتْ لَ تخصْ نَفْسنْ يطْلبونْ موُ شي لَ يخصْ يَسوُع المَسيحْ.
\v 22 وْهاذْ زَلَمِة مْجَرَّبْ تعْرفونْ أشْوَنْ كَما ابنْ مَعْ أَبوهُ خَدَمْ مَعي ف الّبْشارَة.
\v 23 لاذْ أَريد اَبْعَثْ لَعنْدْكنْ خَفيفْ منْ أَرَيتُ أَيشْ في عنْدي.
\v 24 وْلي ثقَة فَ رَبّي أَنا زاِ خَفيفْ تَ آجي لَعنْدْكنْ.
\v 25 بَسّ السَّعْ جَبَرْني الظَّرْفْ تَ ابْعَثْ لَعنْدْكنْ أبَفرديطُس الاَخ لَوّاِ مْعاون وْعَسْكَري مَعي، بَسْ لكنْ رسول وْخادمْ عازتي.
\v 26 منْ لَ مشْتاق يراكنْ كلّتْكنْ كان، وْمَغْمومْ كانْ منْ لَ عَرَفْ سمعْتنْ مرضْ.
\v 27 منْ لَ مرض وْقَرَّبْ عَ المَوتْ، بَلىِ أَلله رَحَمو، وْموُ بَسْ لهُ، لي زاِ، بْشانْ لا يسيِرْ لي غَمْ عَلى غَمْ.
\v 28 بَقى بْهمِّة بَعَثْتُ لْكنْ واِ بْشانْ ترْجَعونْ تفْرَحون وَقْتْ لَ ترَوهُ، وْلي يسيِر شْوَيِّة أَخْذْ نَفَسْ.
\v 29 بَقى اسْتَقْبلوهُ ف الرَّب بْكل فَرَح، وْلَوذْ لَنّاِ كذاِ بْكَرامِة خذوونْ.
\v 30 منْ لَ بْشانْ عَمَل المَسيحْ دي للمَوتْ وَصل، وخاطَر بْنَفْسو تَ يكَمّلْ شي لَ نَقَّصْتنْ ف الخدْمِة لي.
\c 3
\p
\v 1 م السَّعْ يا اخوتي افْرَحوا فَ رَبْنا، موُ اكلّ ولا أملّ وَانا أَكْتب لْكنْ هَالأمورْ نَفسا، منْ لَ تْنَبّهْكنْ تَ تْديرونْ بالْكنْ.
\v 2 ديروا بالْكنْ م الّكْلاِبْ، ديروا بالْكنْ من فْعول الشَّرْ، ديروا بالْكنْ منْ جَماعةْ قَطْع اللَحمْ.
\v 3 منْ لَ نحْناِ واِ الّمْطَهَّرينْ، نحْناِ لَ نعْبد اَلله بالرّوُح، وْنفْتخر بْيَسوُع المَسيح، وْموُ متّكْلينْ نحْناِ عَ اللَحمْ.
\v 4 مَعْ لَ كانْ لي اتّكالْ عَ اللَحمْ زاِ: لَ كان اَحَّدْ يفْتكر اتّكالو باللَحمْ واِ، أَنا أكْثَرْ منّو؛
\v 5 مْطَهَّر ابْن ثْمنْة اِيمْ، منْ جنْس اسْرائيلْ، منْ قَبيلةْ بنْيامين، عبْراني ابنْ عبْراني، وْف النّاموسْ فَرّيسي.
\v 6 ف الغيرِة، مضْطهد البيعَة، وْف برّ النّاموسْ بَلا لَومْ كنْتُ.
\v 7 بَسْ هَوذْ لَ مَرْبَحْ كانوا لي، خْسارَة حَسَبْتوونْ لَخاطر المَسيحْ.
\v 8 واحْسبنْ زاِ كلّن خْسارَة لَخاطرْ عَظَمةْ مَعْرِفةْ يَسوُع المَسيحْ، هاكْ لَ بْشانو كلْ شي خسرْتُ، وْكَما الزّبلْ حَسَبْتُ بْشان اَرْبَح المَسيحْ،
\v 9 وانْوجدْ فِيو بَلا برّي هاكْ لَ م النّاموسْ بَلىِ هاكْ لَ منْ إيمان المَسيحْ لَوّاِ برّ من اَلله،
\v 10 لَ فِيو أَعْرفْ يَسوُع وْقوّة قْياِمتو وَاشْترك بْآلامو وَاتْشَبَّه بْمَوتو.
\v 11 وْرَجاي تَ اتيِقْ أَصلْ للّقياِمِة منْ بَين المَيتينْ.
\v 12 ما كلْنلْتُ بَعدْ يا كلْكملْتُ، بَلىِ أَعْدي وْرَجاي تَ احَصّلْ شي لَ بْشانو حَصَّلْني يَسوُع المَسيحْ.
\p
\v 13 اخوتي، أَنا عَلى نَفْسي موُ افْتكرْ حَصَّلْتُ، بَسْ شي واِحد اَعْرفْ: أنْسى شي لَ خَلْفي وْلَقدّامي أتْقَدَّمْ.
\v 14 وَاعْدي صوُب النّيشان، بْشانْ آخذ الجايزِة، جايزةْ دَعْوة اَلله لَ دَعاني بْيَسوُع المَسيحْ للعلو.
\v 15 بَقى لَنّاِ كامْلينْ هَالافْكارْ خَلّي يفْتكْرونْ، وْلَ كانْ تفْتكْرونْ غَيرْ شكلْ، هاي زاِ اَلله تَ يكْشف لْكنْ.
\v 16 بَسْ لَهاي لَ وصلْنا، فَ طَريِقْ واِحدْ خَلّي نْكَمّل، وْباتّفاقْ واِحدْ.
\v 17 اقْتَدَوا في يا اخوتي، وْطَلْعوا فَ لَ يمْشَونْ كَما قدْوةْ لَ ترَونْ فينا،
\v 18 منْ لَ في كْثيرْ غَيرْ شكلْ يمْشَونْ، هَوكْ لَ كْثير اوقاتْ قلْتُ لْكنْ عَلَينْ، بَسّ السَّعْ وَانا أَبْكي أَقولْ: هَوكْ عدْوانْ ناِ لَ لَصَليب المَسيحْ.
\v 19 نهايتن الهَلاكْ ياِ هَوكْ لَ إلهنْ بَطْنن وْمَجْدنْ خزْينْ، هَوذْ لَ فكْرنْ ف الاَرْضْ واِ.
\v 20 بَسْ نحْناِ شغلْنا ف السَّما واِ، وْمنْ هَونَكْ ننْطر مْخَلّصْ، رَبْنا يَسوُع المَسيحْ.
\v 21 لَ هوّاِ تَ يغَيّرْ جَسَدْ وَضاعتْنا تَ يسيِرْ عَلى شكلْ جَسَدْ مَجْدو، بْموجبْ قوّتو لَ فِيا الكلْ خَضَعْلو.
\c 4
\p
\v 1 بَقى يا اخوتي العزيزين المَحْبوبين وْفَرْحتي واكْليلي، كذاِ قوموا فَ رَبْنا يا عَزيزيني!
\v 2 منْ إوَهَديّا أطْلب وْمنْ سنْطيخي، فكرْ واِحدْ تَ يكونْلنْ فَ رَبْنا.
\v 3 وْمنّكْ زاِ أطْلبْ يا شْريكي المخْلصْ تَ تْساعدنْ، منْ لَ تعْبوا مَعي في الّبْشارَة مَع اقْليميس وْباقي مْعاونيني، هَوكْ لَ اساِميينْ مَكْتوبْين ف كْتاِب الحَياةْ.
\v 4 افْرَحوا فَ رَبْنا ف كلْ وَقْتْ وَاردّ اَقول افْرَحوا!
\v 5 وْتَواضعْكنْ خَلّي ينْعرفْ عنْد كلّ انْسانْ. رَبْنا قْرَيَّبْ واِ.
\v 6 لشي لا تقْلَقونْ، بَلىِ ف كلْ وَقْتْ بالصَّلاة وْبالدّعا وْبالشّكرْ، خَلّي طَلَباتْكنْ تنْعرفْ قدّام اَلله.
\v 7 وْسَلام اَلله لَوّاِ أَعْظَمْ منْ كلْ فكرْ يحْفظ قْلوبْكنْ وافْكارْكنْ ف يَسوُع المَسيحْ.
\v 8 م السَّعْ يا اخوتي! كلْ شي حَقّ وْشَرَف وْطَهارَة وْينْحَب وْيتْمَجَّدْ، واعْمالْ تتْمَجَّد وْتنْمدحْ، هَوذ افْتكْروا.
\v 9 هَوذ التَّعاليمْ والفَضايلْ لَ تْعَلَّمتن وْقبلْتن وْسمعْتنْ وَارَيتنْ في، هَوذْ سَوَوا، وْإله السَّلامْ يكونْ مَعْكنْ.
\v 10 كْثير كْثيرْ فرحْتُ فَ رَبْنا عَلى لَ بَدَيتنْ من جْديدْ تهْتَمّونْ في كَما لَ كنْتنْ زاِ مهْتَمّينْ، بَلىِ موُ فاضْيينْ كنْتنْ.
\v 11 بَسْ موُ منْ لَ عازْني أَقولْ: أَنا تْعَلَّمْتُ تَ اخَلّي يكْفاني شي لَ لي.
\v 12 أَعْرف اَتْواضَعْ وَاعْرفْ زاِ أَفَضّلْ، ف كلْ شي وبْكلْ شي مْدَرَّب اَنا، ف الشَّبَعْ زاِ وْف الجّوُعْ زاِ، ف الكثْرِة وْف القلِّة.
\v 13 كلْ شي أَتيِق بْقوّة المَسيحْ لَ يقَوّيني.
\v 14 بَسّ كْوَيّسْ سَوَيتن اشْتَرَكْتنْ ف ذيقي.
\v 15 وانْتنْ زاِ تعْرفونْ يا أَهلْ فيليپي، منْ بداية الّبْشارَة، وَقْتْ لَ طَلَعْتُ منْ مَكْدوُنْيّا، وْلا وحْدِة م البِيَعْ شاِرَكتْني ف حْسابْ أَخْذ وْعَطا غَير انْتنْ بَسْ.
\v 16 حتّى لتْسالونيكي كَرَّة وْكَرْتَينْ بَعَثْتنْ لي حاجتي.
\v 17 موُ عَطيِّة أطْلبْ، بَلىِ أطْلب ثْمارْكنْ تَ تكْثَرْ.
\v 18 كلْ شي اسْتَلَمْتُ وْزاِيدْ عَلَي ومْعَبّا أَنا، وَاخَذْتُ كلْ شي بَعَثْتنْ لي بيدْ أبَفْروُديطوُسْ ريحَة طَيبِة وْذَبيحَة مَقْبولِة ترْضي اَلله.
\v 19 وْإلهي يعَبّي كلْ عازتْكن عَلى قَدْ غناهُ فَ مَجْدْ يَسوُع المَسيحْ.
\v 20 وْلَالله أَبونا المَجْدْ والكَرامِة لأَبَد الآبْدينْ آمّينْ.
\v 21 سَلْموا عَلى كلّ القَدّيسينْ لَ فَ يَسوُع المَسيحْ. يسَلْمونْ عَلَيكن الاخْوِة لَ مَعي.
\v 22 يسَلْمونْ عَلَيكنْ كلّ القَدّيسينْ، وْخصوصي هَوذْ لَنّاِ منْ بَيتْ قَيصَرْ.
\v 23 نعْمِةْ رَبْنا يَسوُع المَسيحْ مَعْ كلّتْكنْ آمّينْ.