\id COL
\h كوُلوُسي
\toc1 كوُلوُسي
\toc2 كوُلوُسي
\toc3 كوُلوُسي
\mt1 مكتوب بولس الرَّسول لبيعة كوُلوُسي
\c 1
\p
\v 1 بولسْ رَسولْ يَسوُع المَسيح بْإرادة اَلله وْتيموُثاوُس الاَخْ.
\v 2 لَوذْ لَنّاِ ف كوُلوُسي الاخْوِة القَدّيسينْ والمومنين بْ يَسوُع المَسيحْ. سَلامْ مَعْكن وْنعْمِة من اَلله أَبونا.
\v 3 نشْكر اَلله أَبو رَبْنا يَسوُع المَسيحْ ف كلْ وَقْتْ ونْصَلّي بْشانْكنْ،
\v 4 منْ وَقْتْ لَ سمعْنا عَلى إيمانْكن بْيَسوُع المَسيحْ ومْحَبّتْكنْ لكلّ القَدّيسينْ،
\v 5 عَلى الرَّجا المَحْفوظْ لكنْ ف السَّما، لَ منْ قَبلْ سمعْتنْ عَلَيو بْكلْمة الحَقْ، كلْمة الّبْشارَة،
\v 6 هاي لَ انْكَرَزت لْكنْ كَما لكلّ الدّنْياِ، وْترْبى وْتعْطي ثْمارْ كَما لَ عَطَتْ فيكنْ منْ يَومْ لَ سمعْتن وْعَرَفْتنْ نعْمة اَلله بالحَقْ.
\v 7 كَما لَ تْعَلَّمْتنْ منْ أبَفْراسْ رَفيِقْنا العَزيزْ، لَوّاِ خادمْ أَمينْ للمَسيحْ لَخاطرْكنْ.
\v 8 وْهوّاِ عَرَّفْنا عَلى مْحَبّتْكنْ لَ بالرّوُحْ.
\p
\v 9 منْ هاي زاِ نحْناِ منْ يَومْ لَ سمعْنا، ما انْقَطَعْنا م الصَّلاة بْشانْكنْ، والطَّلَبْ تَ تتْعَبّونْ منْ مَعْرِفةْ إرادة اَلله بْكل حكْمِة وْكلْ فهمْ روُحاني.
\v 10 بْشانْ تسْلكونْ كَما لَ لازمْ وتْرَضَّون اَلله ف كلْ عَمَلْ صالح، وْتعْطَون ثْمار وْترْبَونْ فَ مَعْرفة اَلله،
\v 11 وْتتْقَوَّون بْكلْ قوِّة بْموجبْ جَلالْ قوّتو ف كلْ صَبر وْف طولْ بالْ. وبْفَرَحْ
\v 12 تشْكرون اَلله الآبْ لَ خَلّانا مسْتَحقّينْ حصّةْ ميراث القَدّيسينْ ف النّورْ.
\v 13 وْنَجّانا منْ سلْطَة العتْمِة، وْجابْنا لَمَلَكوت ابْنو الحَبيبْ،
\v 14 هاكْ لَ بْواسْطتو لنا الفدا وْغفْران الخَطيّاتْ.
\v 15 هاكْ لَوّاِ شَبَه اَلله لَ موُ ينْأَرى وْبكرْ كلّ الخَلايقْ.
\v 16 وْفِيو انْخَلَقْ كلْ شي لَ ف السَّما وْلَ ف الاَرْضْ، كلْ لَ ينْأَرى وْكلْ لَ موُ ينْأَرى، لَ كان عْروش، وْلَ سيادات، وْلَ رياسات، وْلَ سَلاطينْ، كلْ شي بيدو وْفِيو انْخَلَقْ.
\v 17 وْهوّاِ واِ لَ قَبل الكل، وْفِيو يقومْ كلْ شي.
\v 18 وْهوّاِ واِ راسْ جَسَد البيعَة، هوّاِ الرّاسْ والبكرْ منْ بَين المَيتين، بْشان يكون مْقَدَّمْ ف الكلْ،
\v 19 منْ لَ فِيو هوّاِ رادْ كلّ الكْمالْ يسْكنْ،
\v 20 وْبيدو راد يصاِلحْ كلْ شي، وْسالَم بْدَم صَليبو بيدو الاَرْضيينْ والسَّماويينْ.
\v 21 وْلكنْ زاِ لَ منْ قَبلْ غرْبْ كنْتن وْعدْوان بْفكرْكن بْسَبَب اعْمالكن الشَّرّيرَة سالَمْكن السَّعْ،
\v 22 بْجَسَدو لَ منْ لَحمْ وبْمَوتو بْشان يقَيّمْكنْ قدّامو قَدّيسينْ بَلا عَيبْ وَلا لَومْ،
\v 23 لَ بَقَيتنْ ف إيمانْكنْ وَاساسْكنْ ثابتْ موُ تتْزَرْزَعونْ منْ رَجا الّبْشارَة، هاي لَ سمعْتن انْكَرَزتْ ف كلْ خَليقَة تَحْت السَّما، هاي لَ انا بولسْ صرْتُ خادما.
\v 24 وَافْرَحْ بالوَجَعْ لَخاطرْكنْ، وَاكَمّلْ نَقْصْ شَدايد المَسيحْ فَ لَحْمي مْبَدالْ جَسَدو لَوّاِ البيعَة،
\v 25 هاي لَ انا صرْتُ خادما بْموجبْ تَدْبير اَلله، لَ انْعَطى لي تَ ادَبّرْ فيكنْ وَاكَمّلْ كلْمة اَلله،
\v 26 هاك السّرْ لَ كانْ مخْفي م الدّهورْ والاجْيال والسَّع انْكَشَفْ لَقَدّيسينو،
\v 27 لَوذْ لَ راد اَلله يعَرّفنْ أَيشْ واِ غنى هَالسّرْ هاذْ ف الامَمْ، هَالسّرْ لَوّاِ المَسيحْ لَ فيكنْ رَجا مَجْدْنا.
\v 28 هاكْ لَ عَلَيو نكْرزْ ونْعَلّمْ ونْفَهّم بْكلْ حكْمِة، تَ نْقَيّمْ كلّ انْسان وْهوّاِ كامل بْيَسوُع المَسيحْ.
\v 29 وْفَ هاذْ زاِ أَنا أتْعَبْ وَاجْهَد بْعَون القوِّة لَ ك انْعَطَتْ لي.
\c 2
\p
\v 1 أَريدْ تعْرفونْ أَيشْ جهْدْ أَجْهَد بْشانْكنْ وبْشانْ هَوذْ لَ ف اللاذقيِّة، وبْشان الباقي لَ ما كَ ارَوا وچّي بالجَّسَدْ،
\v 2 بْشانْ تتْعَزّى قْلوبن وْيقْترْبونْ بمْحَبِّة لكلْ غنى اليَقين وْلفهمْ مَعْرِفةْ سرّ اَلله الآبْ والمَسيحْ،
\v 3 هاكْ لَ فِيو مخْفيِّة كلّ كْنوز الحكْمِة والمَعْرِفِة.
\v 4 أَقولْ هاي بْشانْ لا أَحَّدْ يلْعَبْ فَ عَقلْكن بْقَنّيعْ كَلامْ.
\v 5 مَعْ لَ بْعيد اَنا بالجَّسَدْ، بالرّوُحْ مَعْكن اَنا، وَافْرَحْ منْ لَ ارى تَرْتيبْكن وْثَباتْ إيمانْكنْ ف المَسيحْ،
\v 6 بَقى كَما لَ قبلْتنْ يَسوُع المَسيحْ رَبْنا اسْلكوا فِيو!
\v 7 وانْتنْ ثابْتينْ بعْروُقْكنْ وَاساساتْ بَيتْكنْ فِيو، وْقايمينْ بايمانْ لَ تْعَلَّمْتنْ لَ فِيو يزيدْ شكرْكنْ.
\v 8 ديروا بالْكنْ لا اَحَّد يسْبيكنْ للعبوديِّة بْفَلْسَفِة وبْبدْعَة فاضْيِة بْموجبْ تَعْليمْ بَشَر، بْموجبْ مَبادي الدّنْياِ، وْموُ بْموجب المَسيحْ،
\v 9 لَ فِيو يسْكنْ كلْ تَمام الألوهَة، ف جَسَدو،
\v 10 وْفِيو أنْتنْ زاِ تكْمَلونْ، منْ لَ هوّاِ واِ راسْ كلّ الرّياساتْ والسَّلاطينْ.
\v 11 وبْواسْطتو تْطَهَّرْتن طْهوُرْ، موُ بالايدَين، بْشَلْحْ لَحم الخَطيّاتْ، بطْهوُر المَسيحْ.
\v 12 وانْدَفَنْتنْ مَعو ف المَعْموذيِّة، وبْواسْطتو قمْتنْ مَعو، منْ لَ آمَنْتن بْقوّة اَلله لَ قَيَّمو منْ بَين المَيتينْ.
\v 13 وانْتنْ لَ كنْتنْ مَيتينْ فَ خَطيّاتْكن وْفَ جَسَدْكن الموُ مْطَهَّرْ، حَياكنْ مَعو وْغَفَر لْنا كلْ خَطيّاتْنا.
\v 14 وْمَحا بْأوامرو صَكّ دْيونْنا لَ كانْ ضدْنا وْشالو م النّص وْبَسْمَرو ف صَليبو،
\v 15 وبْعري جَسَدو فَضَح الرّياساتْ والسَّلاطين، وْخَزاهنْ قدّام العَين بْأقْنومو.
\v 16 بَقى لا اَحَّدْ يزْعَجْكنْ فَ مَسايلْ أَكْل وْشرْبْ، يا بْتَقْسيم اعْياد وْراس شْهورْ وسْبوتْ.
\v 17 هَوذْ لَنّاِ خَيالاتْ لأمورْ ف المسْتَقْبَلْ، بَسّ الجَّسَد المَسيحْ واِ.
\v 18 وْديروا بالْكنْ لا أحَّد يريد بْتَواضعْ فكر يوَجّبْ عَلَيكنْ تسْتَعْبَدونْ لخدْمةْ مَلايكِة، منْ لَ يتْجاسَرْ يتْدَخَّلْ ف شي لَ ما ارى وْعَ الفاضي ينْتفخ بْفكرْ لَحْمو.
\v 19 وْموُ يتْمَسَّكْ بالرّاسْ لَ منّو كلّ الجَّسَدْ يتْرَكَّب وْيمْسكْ بَعْضو بالمَفاصل وْبالاَعْضا وْيرْبى تَرْبا أَلله.
\v 20 بَقى لَ متّنْ مَع المَسيحْ منْ مَبادي الدّنْياِ، لَيشْ كَما لَ يكونْ ف الدّنْياِ تْعيشونْ تنْحكْمون بْتَعاليمْ؟
\v 21 ”لا تْجس، وْلا تْذوُق، وْلا تنْدَقْ.“
\p
\v 22 وْهَوذ التَّعاليم بْشان اسْتعْمالْ شَغْلاتْ زايلِة ناِ، وْوَصيّات وْتَعاليمْ بَشَرْ ناِ،
\v 23 تَعاليم تْبَيّنْ كَما لَ يكونْ فِيا كلْمةْ حكْمِة بْتَواضعْ إرادي وْخَوف اَلله وْقَسوِة عَ الجَّسَدْ، موُ بشي مْكَرَّمْ غَيرْ فَ هَوذْ لَنّاِ حاجات الجَّسَدْ.
\c 3
\p
\v 1 بَقى لَ قمْتنْ مَع المَسيحْ، شي لَوّاِ فوُق اطْلبوا، موُضَعْ لَوّاِ المَسيحْ قاِعدْ عَلى يَمين اَلله.
\v 2 ف شي لَوّاِ فوُق افْتكروا، موُ ف شي لَوّاِ ف الاَرْضْ،
\v 3 منْ لَ متّن انْتن، وْحَياتْكنْ مخْفيِّة ياِ مَع المَسيحْ فَ الله.
\v 4 وْأَيمَتْ لَ انْكَشَف المَسيحْ، لَوّاِ حَياتْنا، هاك الوَقْت انْتنْ زاِ تَ تنْكشْفونْ مَعو ف المَجْدْ.
\v 5 بَقى مَوتوا أعْضاكنْ لَ ف الاَرْض، الزّنىِ، والنَّجاسِة، وافْكارْ نجْسِة، وْشَهْوِة شَرّيرَة وْشَبَقْ لَوّاِ عْبادة اصْنامْ.
\v 6 منْ لَ منْ هَوذْ يجي غَضَب اَلله عَلى اولاد المَعْصِيِة.
\v 7 وْفَ هَوذ انْتنْ زاِ مشيتنْ منْ قَبلْ، وَقْتْ لَ كانْ تتْقَلَّبونْ فِينْ.
\v 8 بَسّ السَّعْ كبّوا منْكنْ كلْ هَوذْ، غَضَبْ، سخْطْ، شَرّانيِّة، كَلامْ كفرْ، كَلامْ نجسْ.
\v 9 وْلا تگْذبونْ واِحدْ عَ اللاخْ، بَلىِ اشْلَحوا انْسان العَتيِقْ مَع كلْ طرْقاتو.
\v 10 والْبسوا الّجْديدْ لَ يتْجَدَّدْ بالمَعْرِفِة عَلى شَبَهْ خالقو.
\v 11 موُضَعْ لَ ما في ياهودي وْيوناني، وْلا مْطَهَّر وْموُ مْطَهَّر، وْلا سَكّيثي وْبَرْبَري، وْلا عَبْد وْحرْ، بَلىِ الكلّ وْف كلّ انْسان المَسيحْ واِ.
\v 12 الْبسوا بَقى كَما مخْتارين اَلله القَدّيسينْ والمَحْبوبينْ، رَحْمِة وْشَفَقَة وْطيبِة وْتَواضعْ فكر وْوَداعَة وْطولْ بالْ.
\v 13 وتْحَمَّلوا بَعضْكن، وْسامْحوا بَعضْكنْ. لَ كانْ في لاَحَّدْ شَكْوى عَلى رَفيِقو، أشْوَن المَسيحْ ساِمَحْكنْ، أنْتنْ زاِ كذاِ ساِمْحوا.
\v 14 وْمَعْ هَوذْ كلّن، (الْبسوا) الّمْحَبِّة لَيّاِ رباط الكَمالْ.
\v 15 وْسَلام المَسيح يدَبّر قْلوبْكنْ، لَ لهُ انْدَعَيتنْ فَ جَسَدْ واِحد، وْكونوا شاكْرينْ للمَسيحْ.
\v 16 بْشانْ كلْمتو تسْكنْ فيكن بْغنى بْكلْ حكْمِة، وْعَلْموا وْأَدْبوا نْفوسْكن بْمَزامير وْتَسابيحْ وَاغاني الرّوُحْ. وبْنعْمِة رَتْلوا بقْلوبْكنْ لَالله.
\v 17 وْكلْ شي لَ تْسَون، بْكَلامْ يا بْعَمَلْ، باسم رَبْنا يَسوُع المَسيح اعْمَلوا واشْكروا بْواسْطتو اَلله الآبْ.
\v 18 يا نسْوان، اخْضَعوا لازْواجْكنْ كَما لَوّاِ الواجبْ ف المَسيحْ.
\v 19 يا رْجاِلْ، حبّوا نسْوانْكن وْلا تْكونونْ قاسْيينْ عَلَينْ.
\v 20 يا اولاد، اسْمَعوا لابوكنْ وامْكنْ ف كلْ شي، منْ لَ كذاِ كْوَيّسْ واِ قدّامْ رَبْنا.
\v 21 يا أَبَّهاتْ، لا تحْمقون اولادْكن، بْشانْ لا يتْذايَقونْ.
\v 22 يا عَبيد، اسْمَعوا ف كلْ شي لاسْيادْكن البَشَرْ، موُ بْخدْمة العَينْ كَما هَوكْ لَ يرَضَّونْ بَشَرْ، بَلىِ بْقَلْبْ مسْتَقيمْ وبْخَوف الرَّبْ.
\v 23 وْكلْ شغلْ لَ تْسَونْ، منْ كلْ قَلْبْكنْ سَوهُ، كَما لَ يكونْ لَرَبْنا موُ لَبَشَرْ.
\v 24 واعْرفوا منْ رَبْنا تْنالون مْكافاة ف الميراثْ، منْ لَ للرَّبّ المَسيحْ تشْتغْلونْ.
\v 25 والغلْطانْ يتْجازى بْموجبْ غَلَطْ لَ غلط، وْما في معْلشْ لَخاطر فْلانْ يا علّانْ.
\c 4
\p
\v 1 يا اسْيادْ، سَوَوا مْساواة وْعَدالِة لَعَبيدْكنْ، واعْرفوا أنْتنْ زاِ لكنْ سَيّدْ ف السَّما.
\v 2 ف الصَّلاة كونوا دايم، وْساهْرينْ كونوا ف الصَّلاة وْشاكْرينْ!
\v 3 وْصَلَّوا زاِ بْشانْنا، تَ يفْتَح لْنا أَلله بابْ للْكلْمِة تَ نحْكي عَلى سرّ المَسيحْ لَ بْشانو مَحْبوس اَنا.
\v 4 بْشان اَكْشفو وَاحْكي عَلَيو كَما لَ لازمْ.
\v 5 بْحكْمِة امْشَوا مَع البرّانِيِّة، واشْتَروا زَمانْ بَلاويكنْ.
\v 6 وْكلْمتْكنْ ف كلْ وَقْت بْنعْمِة، كَما لَ تْكون بْملح مْمَلَّحَة، واعْرفوا أشْوَنْ لازمْ لكلْ واِحدْ تعْطَونْ جَوابْ.
\v 7 وْشي لَ في عنْدي، تَ يخَبّرْكن طوُخيكوُس الاَخ العَزيزْ والخادم الاَمين وْرَفيِقْنا ف الرَّبْ،
\v 8 هاذْ لَ بَعَثْتُ لْكنْ واِ بْشانْ هاي، بْشانْ يعْرفْ أَيشْ في عنْدْكنْ ويعَزّي قْلوبْكنْ.
\v 9 مَع أونيسيموُس الاَخ الاَمين والعَزيز لَوّاِ واِحدْ منْكنْ. هنّاِ تَ يخَبروكن عَلى شي لَ في عنّا.
\v 10 يسَلّم عَلَيكنْ أَريسطَرخوُس المَأسوُر مَعي، وْمرْقس ابنْ عَم بَرْنابا، هاكْ لَ توَصَّيتن عَلَيو لَ جا لعنْدْكنْ تستَقبْلوهُ.
\v 11 ويشوع لَ يقولولو يسطوُس، هَوذْ لَنّاِ م الّمْطَهَّرين، وْهنّاِ بَسْ عاِوَنوني فَ مَلَكوت اَلله وْهنّاِ صاروا لي تَعزِيِة.
\v 12 يسَلّم عَلَيكنْ أبَفراس لَوّاِ اِحد منْكنْ، وعَبد يَسوُع المَسيحْ، دايم يكدَح لَخاطرْكن ف الصَّلاة بْشان تْكونون كامْلينْ ومكَمَّلين ف كلّ إرادة اَلله.
\v 13 منْ لَ اشْهَدْلو، كْثيرْ يغار عَلَيكنْ وْعَلى هَوكْ لَ ف اللاذقيِّة وْفَ هيرابوليس.
\v 14 يسَلّم عَلَيكنْ دَكتوُر لوقا العَزيز وديماس.
\v 15 سَلْموا عَ الاخْوِة لَ ف اللاذقيِّة، وْعَلى نمفاس والبيعَة لَ فَ بَيتو.
\v 16 بَسّ انقَرا هَالمَكْتوبْ عنْدْكنْ، خَلَّوا ف بيعة اللاذقيِّة زاِ ينْقَرا. وْهاكْ لَ انْكَتَبْ م اللاذقيِّة اقرَوهُ أنْتنْ.
\v 17 قولوا لاَركيفوُس: ”ديرْ بالكْ عَلى خدْمةْ لَ قبلْتْ فَ رَبْنا بْشان تْكَمّلا.
\v 18 وهاذْ سَلامْ بيدي اَنا بولس. تذَكَّروا قيودي. والنَّعْمِة مَعْكنْ آمّينْ.