\id 1TH
\h 1 تسالوُنيكي
\toc1 1 تسالوُنيكي
\toc2 1 تسالوُنيكي
\toc3 1 تسالوُنيكي
\mt1 مكتوب بولس الرَّسول الأوَّل لبيعة تسالوُنيكي
\c 1
\p
\v 1 بولس وْسلْوانس وْتيموُثاوُسْ لبيعَة اَهْل تْسالونيكي، لَ فَ الله الآب وْفَ رَبْنا يَسوُع المَسيحْ. نعْمِة مَعْكن وْسَلامْ.
\v 2 نشْكر اَلله ف كلْ وَقْت بْشانْكنْ كلّتْكنْ، وْنذْكرْكنْ دايمْ فَ صَلاواتْنا.
\v 3 وْنذْكرْ قدّام اَلله الآب اعْمال إيمانْكن وْتَعَب مْحَبّتْكنْ وْصَبرْ رَجاكنْ لَ فَ رَبْنا يَسوُع المَسيحْ.
\v 4 منْ لَ نعْرفْ مخْتارين انْتنْ يا اخوتي مَحْبوبين اَلله.
\v 5 منْ لَ بْشارتْنا موُ بْكَلامْ بَسْ كانتْ لكنْ، بَلىِ وبْقوِّة وبْروُح القدسْ وبْيَقينْ حَقيقي. وانْتنْ تعْرفون اَشْوَنْ كنّا بَيناتْكنْ لَخاطرْكنْ.
\v 6 وانْتنْ فينا اقْتَدَيتن وْفَ رَبْنا، منْ لَ ف ذيقْ عَظيمْ قبلْتن الكلْمِة بْفَرَحْ روُح القدسْ.
\v 7 وْصرْتنْ قدْوِة لكلّ المومنينْ لَ فَ مَكْدوُنْيّا وْآخائيّا،
\v 8 من لَ منْكن انْسَمَعتْ كلْمة رَبْنا، موُ بَسْ فَ مَكْدوُنْيّا وآخائيّا، بَلىِ ف كلْ موُضَعْ إيمانْكنْ فَ الله انْسَمَعْ، يعنىِ موُ محْتازين نْقولْ عَلَيكنْ شي.
\v 9 منْ لَ هنّاِ يحْكَونْ أَيش دْخولْ صار لْنا لَعنْدْكنْ وَاشْوَنْ رجعْتنْ لَعنْد اَلله منْ عبادة الاصْنام بْشانْ تعْبدون اَلله الحَيّ الحَقيقي،
\v 10 وانْتنْ تنْطرون ابْنو م السَّما، يَسوُعْ لَ قَيَّمْ منْ بَين المَيتينْ، لَ هوّاِ ينَجّينا م الغَضَب الجّاِييِ.
\c 2
\p
\v 1 وانْتنْ تعْرفونْ يا اخوتي، دْخولْنا لَعنْدْكنْ موُ عَ الفاضي كانْ.
\v 2 بَلىِ أَوَّلْ شي تْأَلَّمْنا وتْحَقَّرْنا، كَما لَ تعْرفونْ ف فيليبي، وْهاك الوَقْت بْجهْد گْبيرْ حَكينا لْكن بْجَسارَة من اَلله عَلى بْشارة المَسيحْ.
\v 3 منْ لَ كَلام التَّعزِيِة لَ وَعَظْنا لْكنْ موُ منْ بدْعَة وْلا نَجاسِة وْلا مكرْ كانْ.
\v 4 بَلىِ كَما ناِسْ مَفْحوصينْ من اَلله ومْأَمَّنينْ عَلى بْشارتو، كذاِ نحْكي موُ بْشان نْرَضّي بَشَرْ، بَلىِ اَلله لَ يفْحَص قْلوبْنا.
\v 5 وَابَدْ ما مَلّقْنا كَلامْ، كَما لَ تعْرفون، وْلا بْغايةْ طَمَعْ، أَلله يشْهَدْ.
\v 6 وْلا طَلَبْنا مَجْدْ م النّاِسْ، لا منْكن وْلا منْ غَيرْكنْ، مَعْ لَ كان نْتيِق نْكون مْكَرَّمينْ، منْ لَ رسل المَسيحْ نحْناِ.
\v 7 بَلىِ كنّا بَيناتْكنْ متْواضْعين. وْكَما لَ تْحنّ الّمْرَبّيِة عَلى اولادا الّزْغارْ،
\v 8 كذاِ نحْناِ زاِ نحنّ وْنشْتاقْ نعْطيكنْ موُ بَسّ بْشارة اَلله، بَلىِ نَفسْنا زاِ منْ لَ مَحْبوبينْنا انْتنْ.
\v 9 منْ لَ تتْذَكَّرونْ يا اخوتْنا، كنّا نْكدّ وْنتْعَبْ باللَيل وْبنْهار بْشانْ عَلى واِحدْ منْكنْ لا نْثَقّلْ.
\v 10 أنْتنْ تشْهَدونْ والله أشْوَنْ كَرَزْنا لْكن بْشارة اَلله بْطَهارَة وْبرّ، وْبَلا لَومْ كنّا عنْدْ كلّ المومنينْ.
\v 11 كَما لَ تعْرفونْ، منْ واِحدْ واِحدْ منْكنْ، كَما أَبْ من اولادو، كنّا نطْلبْ، ونْعَزّي قْلوبْكن وْنشْهَد لْكنْ قدّام اَلله،
\v 12 تَ تسْلكونْ كَما لَ لازمْ لَالله لَ دَعاكنْ لَمَلَكوتو وْمَجْدو.
\v 13 منْ هاي نحْناِ زاِ دايمْ نشْكر اَلله، منْ لَ كلْمة اَلله لَ قبلْتنْ منّا موُ كَما كلْمةْ ناِسْ قبلْتنا، بَلىِ كَما لَيّاِ بالحَقيقَة كلْمة اَلله، وْهيِّ بالعَمَلْ تفْعَلْ فيكن انْتن المومنينْ.
\v 14 أنْتنْ يا اخوتي تْشَبَّهْتنْ لَبِيَع اَلله ف الياهوديِّة، هَوذْ لَ فَ يَسوُع المَسيحْ، منْ لَ كذاِ تْحَمَّلْتنْ منْ بَني قَومْكنْ كَما لَ هنّاِ زاِ م الياهودْ.
\v 15 هَوكْ لَ قَتَلوا رَبْنا يَسوُع المَسيحْ والاَنْبِيا لَ منّن، وْلنا اضْطَهَدوا، والله موُ يرَضَّونْ ويسيِرونْ ضد لكلّ النّاِسْ.
\v 16 منْ لَ يمْنَعونا نحْكي مَع الامَم بْشانْ يخْلَصونْ. يمْنَعونا نحْكي بْشانْ تكْمَلْ خَطيّاتنْ ف كلْ زَمانْ. بَسْ وصلْ عَلَين الغَضَب دي للنّهايِة.
\v 17 بَسْ نحْناِ يا اخوتْنا صرْنا يَتامىِ بَلاكنْ ساعة وَقْت، بْوچْنا وْموُ بْقَلْبْنا، وْبالاَكْثَرْ جهدْنا تَ نّرى وچْكنْ بمْحَبِّة عَظيمِة.
\v 18 وْردْنا نجي لَعنْدْكنْ – أَنا بولسْ – كَرَّة وْكَرْتَين وْوَقَّفْ ف وچْنا الشّيِطانْ.
\v 19 لَيشْ أَيشْ واِ رَجانا وْفَرَحْنا واكْليلْ فَخرْنا غَير انْتنْ قدّامْ رَبْنا يَسوُعْ ف مجْوتو؟
\v 20 منْ لَ انْتنْ واِ مَجْدْنا وْفَرَحْنا.
\c 3
\p
\v 1 وْمنْ لَ ما تْحَمَّلْنا، ردْنا نبْقى فَ أَثينا بْوحدْنا،
\v 2 وْنبْعَث لْكنْ تيموُثاوُس اَخونا وْخادم اَلله ومْعاونْنا ف بشارة المَسيح، بْشان يثَبّتْكن وْيطْلبْ منْكنْ طَلَباتْ عَلى إيمانْكنْ،
\v 3 بْشانْ لا أَحَّدْ منْكنْ ييئسْ فَ هَالذّيقاتْ هَوذْ، منْ لَ تعْرفونْ لَهاي مْعَيَّنينْ نحْناِ من اَلله.
\v 4 وْوَقْتْ لَ كنّا عنْدْكنْ زاِ سَبَقْنا وْقلْنا لْكنْ تَ نتْذايَقْ بالشّكلْ لَ تعْرفونْ صارْ.
\v 5 بْشانْ هاي اَنا زاِ ما تْحَمَّلْتُ لَ ما بَعَثْتُ تَ اعْرفْ إيمانْكن، بْشانْ لا يجَرّبْكن الّمْجَرّبْ ويسيِرْ تَعَبْنا فاضي.
\v 6 بَسّ السَّعْ، منْ وَقْتْ لَ جا لَعنّا تيموُثاوُسْ منْ عنْدْكن وْبَشَّرْنا عَلى إيمانْكن وْعَلى مْحَبّتْكن وْعَلى لَ لنا ذكرْ طَيّبْ عنْدْكنْ ف كلْ وَقْت، وْمشْتاقين انْتنْ ترَونا كَما لَ نحْناِ زاِ مشْتاقينْ نراكنْ،
\p
\v 7 منْ هاي تْعَزَّينا فيكنْ يا اخوتْنا عَلى كلْ شَدّتْنا وْذيقتْنا لَخاطرْ إيمانْكنْ.
\v 8 والسَّعْ نحْناِ طَيبينْ نحْناِ لَ كنْتنْ قايمينْ ثابْتينْ فَ رَبْنا،
\v 9 أَيشْ شكر نْتيِقْ نشْكر اَلله عَلى فَرَحْ لَ فرحْنا بْشانْكنْ؟
\v 10 إلّا لَ قمْنا قدّام اَلله بالاَكْثَرْ نتْضَرَّع باللَيلْ وبنْهارْ تَ نّرى وچْكنْ، ونْكَمّلْ شي لَ ينْقَصْ إيمانْكنْ.
\v 11 والله أَبونا وْرَبْنا يَسوُع المَسيحْ يسَهّلْ طَريِقْنا لَعنْدْكنْ،
\v 12 ويكَثّرْ ويزيد مْحَبّتْكنْ لَبَعضْكن وْلكلّ انْسانْ، كَما لَ نحْناِ نْحبْكنْ،
\v 13 ويثَبّت قْلوبْكنْ بَلا لَومْ ف القَداسِة قدّام اَلله أَبونا ف مجْوةْ رَبْنا يَسوُع المَسيحْ مَعْ كلْ قَدّيسينو.
\c 4
\p
\v 1 بَقى اخوتي، نطْلبْ منْكن وْنتْوَسَّل لْكنْ، كَما تَعاليمْ لَ اسْتَلَمْتنْ منّا أشْوَنْ لازمْ تسْلكونْ وتْرَضَّون اَلله، أكْثَرْ زيدوا.
\v 2 منْ لَ تعْرفون اَيشْ وَصيّاتْ وَصَّيناكنْ فَ رَبْنا يَسوُعْ.
\v 3 منْ لَ هاي ياِ إرادة اَلله، قَداستْكن، وْتَ تْكونونْ مَفروُقينْ منْ كلْ زنىِ.
\v 4 وْتَ يكونْ كلْ واِحدْ منْكنْ يعْرفْ يقْني فْراغو بْقَداسِة وبْكَرامِة،
\v 5 لا فَ هَوا الشَّهوِة كَما باقي الامَمْ، هَوكْ لَ موُ يعْرفون اَلله.
\v 6 وْلا يتْجاسَر اَحَّدْ يتْعَدّى يطْمَعْ عَلى أَخوهُ فَ هَالمَسَلِة، منْ لَ رَبْنا واِ الّمْعاقبْ عَلى كلْ هَوذْ، كَما لَ قلْنا لْكنْ زاِ منْ قَبلْ زَمان وْشهدْنا لْكنْ.
\v 7 منْ لَ ما دَعاكن اَلله للنَّجاسِة، بَلىِ للقَداسِة.
\v 8 بَقى لَ يظْلمْ موُ لانْسانْ يظْلمْ، بَلىِ لَالله، هاكْ لَ عَطى وْحَطْ فيكنْ روُحو القَدّوسْ.
\v 9 وْعَلى مْحبّة الاخْوِة موُ يلْزَمْ ينْكْتب لْكنْ، منْ لَ انْتن بْنَفسْكن مْعَلَّمينْ من اَلله أنْتنْ تَ تْحبّونْ بَعضْكنْ،
\v 10 منْ لَ كذاِ زاِ تْسَوَون مَعْ كلّ الاخْوِة ف كلْ مَكْدوُنْيّا. بَسّ اَطْلبْ منْكنْ يا اخوتي تَ تْزيدونْ ف مْحَبّتْكنْ.
\v 11 وْديروا بالْكنْ تَ تْكونونْ هاِدْيين وْمهْتَمّينْ باشْغالْكنْ، واشْتغْلوا بايدَيكنْ كَما لَ وَصَّيناكنْ،
\v 12 تَ يكونْ سلوكْكنْ محْتَرَمْ عنْد البرّانِيِّة، وْلاَحَّدْ موُ تحْتازونْ.
\v 13 وَاريدْ تعْرفون اخوتي بْشانْ عَلى هَوذْ لَ ينامونْ (نَومة المَوتْ) لا تحْزَنونْ كَما باقي النّاِسْ لَ رَجا ما لنْ.
\v 14 لَ كنّا نْآمنْ يَسوُعْ مات وْقامْ، كذاِ زاِ أَلله لَوذْ لَ ناموا فَ يَسوُع يجيبْ مَعو.
\v 15 وْهاي نْقول لْكن بْكلْمةْ رَبْنا: نحْناِ لَ نبْقى ف مجْوةْ رَبْنا طَيبينْ، موُ نلْحَقْ هَوذْ لَ ناموا،
\v 16 منْ لَ رَبْنا بْأَمرْ وبْصَوتْ رَيّس المَلايكِة وبْصَوت بوق اَلله ينْزَلْ م السَّما، والمَيتينْ لَ ف المَسيحْ تَ يقومونْ ف الاَوَّلْ.
\v 17 وْهاك الوَقْتْ نحْناِ لَ نبْقى طَيبينْ تَ ننْخطفْ مَعنْ، كلّتْنا مَعْ بَعضْنا، ف الّغْيومْ ونْلاقي رَبْنا ف الهَوا، وْكذاِ ف كلْ وَقْتْ مَعْ رَبْنا نْكونْ.
\v 18 بَقى عَزَّوا واِحدْكن اللاخ بْهَالكلاِمي هَوذْ.
\c 5
\p
\v 1 بَسْ عَ الزَّماناتْ والعدّانات اخوتي موُ محْتازين انْتن اَكْتب لْكنْ.
\v 2 منْ لَ تعْرفون انْتن بْحَقْ يَومْ رَبْنا كَما الحَرامي باللَيلْ كذاِ تَ يّجي.
\v 3 وَقْتْ لَ يقولونْ: ”سَلامْ واِ وْأمانْ،“ فَ هاك الوَقْتْ، عَلى غَفْلِة، يقومْ عَلَينْ الهَلاك كَما وَجَع الولادِة عَ الحبْلىِ، وْموُ ينْجَونْ.
\v 4 بَسّ انْتنْ يا اخوتي موُ ف العتْمِة انْتنْ، تَ يلْحَقْكنْ هاك اليَومْ كَما الحَرامي.
\v 5 منْ لَ كلّتْكن اولاد النّور انْتنْ واولاد الّنْهارْ، موُ اولاد اللَيلْ والعتْمِة.
\v 6 بَقى لا نْنامْ كَما الباقي، بَلىِ خَلّي نْكونْ صاحْيين وْواعْيينْ.
\v 7 هَوكْ لَ ينامونْ، باللَيل ينامون، وْلَ يسْكَرونْ باللَيلْ يسْكَرونْ.
\v 8 بَسْ نحْناِ اولاد الّنْهارْ، خَلّي نْكونْ صاحْيين بْعَقلْنا وْلاِبْسينْ درْع الايمانْ والّمْحَبِّة، ونْحطْ خوذةْ رَجا الخَلاصْ،
\v 9 منْ لَ الله ما حَطْنا للغَضَبْ، بَلىِ بْشانْ نقْني الخَلاص بْرَبْنا يَسوُع المَسيحْ،
\v 10 هاكْ لَ ماتْ لَخاطرنا، بْشانْ صاحْيين وْناِيمينْ مَعو كَما واِحد نْعيشْ.
\v 11 بْشانْ هاي عَزَّوا واِحدْكن اللاخْ، وابْنَوا واِحدْكن اللاخْ، كَما لَ قايمينْ زاِ تْسَوَونْ.
\v 12 وْنطْلبْ منْكنْ يا اخوتي، تَ تْكونونْ عارْفينْ لَوذْ لَ يتْعَبونْ فيكنْ ويقومون بْشانْكن فَ رَبْنا ويعَلْموكنْ،
\v 13 خَلّي يكونونْ مَحْسوبينْ منْكنْ بمْحَبِّة زاِيدِة، وبْشانْ عَمَلن تْسالَمو مَعنْ.
\v 14 وْنطْلبْ منْكنْ يا اخوتي، أَدْبوا الغلْطانينْ، شَجْعوا لَ قَلْبنْ ضَعيفْ، عاِونوا الّضْعاف، وْطَولوا بالْكنْ عَلى كلّ انْسانْ.
\v 15 وْديروا بالْكنْ لا أحَّدْ منْكن يجاِزي بْشَرْ عَلى شَرْ، بَلىِ ف كلْ وَقْت اعْدَوا خَلْف الخَيرْ لَبَعضْكن وْلكلّ انْسانْ.
\v 16 كونوا فرْحانينْ ف كلْ وَقْتْ.
\v 17 وْصَلَّوا بَلا انْقطاعْ.
\v 18 وْف كلْ شي كونوا شاكْرين، منْ لَ هاي ياِ إرادة اَلله بْيَسوُع المَسيحْ فيكنْ.
\v 19 الرّوُحْ لا تطفَون.
\v 20 لا تكبّون النّبوّات خَلْف ظَهركن.
\v 21 كلْ شي افْحَصوا، وْف الّكْوَيّس تْمَسَّكْوا.
\v 22 وْمنْ كلْ شي شَرّ اهْربوا.
\v 23 وْإله السَّلامْ يقَدّسكن بالتَّمام، وْيحْفظ روُحكن ونَفسكن وجَسَدْكن بَلا لَوم لَمجْوة رَبْنا يَسوُع المَسيحْ.
\v 24 مأَمَّن واِ هاكْ لَ دَعاكن تَ يعْمَل.
\v 25 اخوتي، صَلَّوا بْشانْنا.
\v 26 سَلْموا عَلى اخوتْنا كلّنْ ببَوسِة مقَدَّسِة.
\v 27 واحَلّفكن بْرَبْنا تَ ينْقَرا هَالمَكْتوبْ هاذْ لكلّ الاخْوِة القَدّيسينْ.
\v 28 نعْمِة رَبْنا يَسوُع المَسيحْ مَعْكنْ آمّينْ.