\id 2TH
\h 2 تسالوُنيكي
\toc1 2 تسالوُنيكي
\toc2 2 تسالوُنيكي
\toc3 2 تسالوُنيكي
\mt1 مكتوب بولس الرَّسول الثّاني لبيعة تسالوُنيكي
\c 1
\p
\v 1 بولس وْسلوانوُس وْطيموُثاوُس لَبيعَةْ أَهْل تْسالونيكي لَ فَ الله أَبونا وْرَبْنا يَسوُع المَسيحْ.
\v 2 نعْمِة مَعْكن وْسَلامْ من اَلله أَبونا وْمنْ رَبْنا يَسوُع المَسيحْ.
\v 3 مَلْزومينْ نحْناِ نشْكر اَلله ف كلْ وَقْتْ لَخاطرْكنْ، كَما لَ لازمْ، منْ لَ كْثيرْ يگْبَرْ إيمانْكن وْتكْثَر مْحَبّتْكنْ كلْ واِحدْ للاخْ.
\v 4 حتّى نحْناِ بَفسْنا نفْتخرْ فيكنْ ف كلْ بِيَع اَلله عَلى إيمانْكن وْعَلى صَبرْكنْ ف كلّ اضْطهادْ لَ عَلَيكن وْذيقْكنْ لَ تتْحَمَّلونْ.
\v 5 برْهانْ لَحكْم اَلله العادلْ لَ حَكَمْ: تسْتَحقّونْ مَلَكوتو هاذْ لَ بْشانو تتْعَذَّبونْ،
\v 6 لَ كانْ عَدلْ قدّام اَلله يجاِزي بالذّيقْ هَوذْ لَ يذايقوكنْ.
\v 7 وانْتنْ لَ تتْذايَقون، يرَيّحكنْ مَعْنا فَ يَومْ كَشْفْ رَبْنا يَسوُع المَسيحْ م السَّما مَعْ قوِّة مَلايكتو،
\v 8 وَقْتْ لَ يعاقب بْلَهيبْ نارْ هَوكْ لَ ما عَرَفوا اَلله، وْهَوكْ لَ ما اعْتَرَفوا ببْشارة رَبْنا يَسوُع المَسيحْ.
\v 9 هنّاِ ف الحكمْ يتْجازَونْ بالهَلاك الأَبَدي منْ وچْ رَبْنا وْمنْ مَجْدْ قوّتو،
\v 10 وَقْتْ لَ يجي تَ يتْمَجَّدْ فَ قَدّيسينو، ويوَرّي عَجايبو ف مومنينو، منْ لَ تسْدقْ شَهادتْنا لكنْ فاك اليَومْ.
\v 11 بْشانْ هاي ف كلْ وَقْت نْصَلّي بْشانْكنْ تَ يسَيكن اَلله مسْتَحقّينْ للدَّعوِة لَ دَعاكنْ، ويعَبّيكنْ كلْ إرادةْ خَيرْ واعْمال إيمان بْقوِّة.
\v 12 بْشانْ يتْمَجَّدْ فيكن اسمْ رَبْنا يَسوُع المَسيحْ، وانْتنْ زاِ تتْمَجَّدونْ فِيو، بْموجب نعْمةْ إلهْنا وْرَبْنا يَسوُع المَسيحْ.
\c 2
\p
\v 1 نطْلبْ منْكنْ اخوتي عَلى مجْوةْ رَبْنا يَسوُع المَسيح وْعَلى اجتماعنا عنْدو،
\v 2 لا خَفيفْ تنْهَزّون بْفكرْكن وتْتوُهونْ، لا منْ كلْمِة وْلا منْ روُح وْلا منْ مَكْتوبْ كَما لَ يكونْ منّا يقول: كْوا وصلْ يَومْ رَبْنا.
\v 3 لا اَحَّد يضَيّعْكن بْشكلْ م الاشْكالْ، منْ لَ موُ يجي لَ موُ يجي أَوَّلْ شي العصْيان وينْكشف انْسان الخَطيِّة ابن الهَلاكْ.
\v 4 هاكْ لَوّاِ ضدْ ويعَلّي روُحو عَلى كلْ شي يتْسَمّى إله وْمَعْبودْ، حتّى فَ هَيكَل اَلله زاِ يقْعَدْ ويوَرّي روُحو كَما إلهْ،
\v 5 موُ يجي لَبالْكنْ، وَقْتْ لَ كنْتُ عنْدْكنْ، قلْتُ لْكنْ عَلى هَوذْ؟
\v 6 والسَّعْ تعْرفونْ أَيشْ يمْنَعْ ينْكشفْ فَ وَقْتْو.
\v 7 منْ لَ سرّ الإثمْ بَدا ينْشَطْ. بَسْ لَ انْشالْ م النّصْ هاكْ لَ يمْنَع السَّعْ،
\v 8 هاك الوَقْتْ تَ ينْكشف الأثيمْ، هاكْ لَ رَبْنا يَسوُعْ تَ يزيلو بْنَفْخةْ ثمّو ويبَطّلو بانْكشافْ مجْوتو.
\v 9 منْ لَ مجْوةْ هاك بْفعْل الشّيِطانْ ياِ، بْكلْ قوِّة وْعَلامات وْعَجايبْ كلّا گذْبْ،
\v 10 وبْكلْ غشّ الإثمْ لَ يسيِرْ ف الهالْكينْ منْ لَ ما قبْلوا مْحَبّة الحَقّ بْشانْ يخْلَصونْ.
\v 11 بْشانْ هاي، تَ يبْعَثْلن اَلله فعل الغش، بْشان يسَدقون الگذْبْ،
\v 12 وينْحكْمونْ كلْ هَوذْ لَ موُ يآمْنونْ بالحَقْ، بَلىِ يكَيفونْ بالإثمْ.
\p
\v 13 بَسْ نحْناِ مَلْزومينْ نشْكر اَلله ف كلْ وَقْتْ لَخاطرْكن اخوتي يا مَحْبوبينْ رَبْنا، منْ لَ اخْتارْكن اَلله م البدايِة للخَلاص بْقَداسة الرّوُح وْبايمان الحَقْ.
\v 14 منْ لَ بْشانْ هَوذْ دَعاكنْ ببْشارتْنا، تَ تْسيِرونْ مَجْدْ لَرَبْنا يَسوُع المَسيحْ.
\v 15 بَقى يا اخوتي! كونوا ثَبوتينْ، وتْمَسَّكْوا بالوَصِيّاتْ لَ تْعَلَّمْتنْ منّا بْكَلامْ يا بْمَكْتوبْنا.
\v 16 وْرَبْنا يَسوُع المَسيح بْنَفْسو، والله أَبونا لَ حَبْنا، وْعَطانا تَعْزِيِة أَبَدِيِّة وْرَجا صالح بْنعْمتو،
\v 17 يعَزّي ويثَبّت قْلوبْكنْ ف كلْ كَلام وْكلْ عَمَلْ صالحْ.
\c 3 
\p \v 1 م السَّع اخوتي! صَلَّوا بْشانْنا، بْشانْ كلْمة رَبْنا تعدي وتتمَجَّد ف كلْ موُضَعْ 
كَما لَيّاِ عنْدْكنْ، 
\v 2 وبْشانْ نتنَجّى م النّاِسْ الشَّرّيرين الرَّديين، منْ لَ موُ لَكلّ انْسانْ واِ 
الايمان. 
\v 3 أَمينْ واِ الرَّبْ لَ تَ يحْفظكن وينَجّيكن م الشَّرّير. 
\v 4 واثقين نحْناِ فيكنْ فَ رَبْنا، شي لَ نوَصّيكن سَوَيتن وْتَ تسَوَون. 
\v 5 وْرَبْنا يهدي قْلوبْكنْ لَمْحَبّة اَلله وصَبر المَسيحْ. 
\v 6 ونوَصّيكن اخوتي باسم رَبْنا يَسوُع المَسيحْ، تَ تبَعدون منْ كلّ أَخ يسلك سلوك موُ 
كْوَيّس، وْموُ بْموجب وَصيّات لَ استَلم منّا. 
\v 7 منْ لَ انْتن نَفسكن تعْرفونْ أشْوَنْ لازم تقتَدَون فينا، نحْناِ لَ ما سَلَكنا موُ 
كْوَيّس بَيناتْكنْ. 
\v 8 وْلا غْبَيزْ البَلاش أَكَلنا منْ عنْد اَحَّدْ منْكنْ، بَلىِ بتَعَب وجهد باللَيلْ 
وبنْهار اشتَغَلنا، بْشانْ عَلى اَحَّدْ منْكنْ لا نثَقّل. 
\v 9 موُ منْ لَ موُ يحقّ لنا، بَلىِ بْشانْ نعْطيكن قدْوِة بنَفسنا تَ تقتَدَون فينا. 
\v 10 منْ لَ وَقْتْ لَ كنّا عنْدْكنْ زاِ بْهاي كنّا نوَصّيكن: لَ موُ يريد يشْتغلْ، لا ياكل 
زاِ. 
\v 11 منْ لَ نسمَع في بَيناتْكنْ ناِسْ موُ كْوَيّس يسلكون، وشَغْلِة عَملِة موُ يسَوَون 
غَير شَغلات باطْلِة. 
\v 12 لهن لَوذ نوَصّي ونطْلب منّنْ، فَ رَبْنا يَسوُع المَسيحْ، تَ يشْتغْلونْ بهدو وياكْلون 
غْبَيزْن. 
\v 13 وانْتنْ يا اخوتي! لا تتراخَون فَ عَمَل الّكْوَيّس! 
\v 14 وَاينا لَ موُ يسْمَعْ لَكلماتنا هَوذْ لَ ف المَكْتوبْ، هاذْ فارقوهُ وْلا تتخالَطون 
مَعو بْشانْ يسْتحي 
\v 15 وْموُ كَما عَدو تاخذوهُ، بَلىِ اوعَظوهُ كَما لأَخ. 
\v 16 ورَبّ السَّلامْ نَفْسو يعْطيكن السَّلامْ ف كلْ وَقْتْ ف كلْ شي. رَبْنا مَع كلّتْكنْ. 
\v 17 سَلامْ بخَطّ ايدي، اَنا بولس، كَتَبْتُ، لَوّاِ عَلامِة ف كلْ مكاِتيبي. كذاِ 
أَكْتب. 
\v 18 نعْمِة رَبْنا يَسوُع المَسيحْ مَع كلّتْكنْ آمّينْ.