\id JAS
\h يعقوب
\toc1 يعقوب
\toc2 يعقوب
\toc3 يعقوب
\mt1 مكتوب القدّيس يعقوب
\c 1
\p
\v 1 يَعْقوبْ عَبْد اَلله وْرَبْنا يَسوُع المَسيحْ للاثْناعشْ قَبيلِة المَزْروُعينْ ف الامَمْ. سَلامْ.
\v 2 خَلّي يكون لْكنْ كلْ فَرَحْ يا اخوتي وَقْتْ لَ تدْخلونْ فَ تَجارب كْثير اشْكال الْوانْ.
\v 3 منْ لَ تعْرفون امْتحانْ إيمانْكنْ يعْطيكنْ صَبرْ.
\v 4 وللصَبرْ خَلّي يكونْ عَمَلْ كاملْ تَ تْكونونْ كامْلينْ تامّينْ ف شي موُ ناقْصينْ.
\v 5 لَ كانْ في انْسانْ منْكنْ ناقصْ حكْمِة، خَلّي يطْلبْ من اَلله هاكْ لَ يعْطي الكل بْسَخا وْموُ يخَجّل، وْتَ تنْعَطاهُ.
\v 6 بَسْ خَلّي يطْلبْ بايمان، وْهوّاِ موُ يشكْ، منْ لَ يشكْ يشْبَه امْواج البَحرْ لَ يخَضّا الهَوا.
\v 7 لا يفْتكرْ هاك الانْسانْ تَ ينال شي م الرَّبْ،
\v 8 هاذْ لَوّاِ مْقَسَّم بْفكْرو ومْقَلْقَلْ ف كلْ طرْقاتو.
\v 9 خَلّي الاَخ المتْواضعْ يرْفَعْ راسو بْعلوتْ مَقامو عنْد اَلله،
\v 10 بَسّ الغَني خَلّي يرْفَعْ راسو بْتَواضعو، منْ لَ كَما زَهرة الحَشيشْ تَ يزولْ.
\v 11 منْ لَ زَرَقت الشَّمْس بْحَرارتا وْنَشَّفت الحَشيش وْزَهْرتو وَقَعت وْكَواسْ مَنْظَرو زال. الغَني زاِ كذاِ يذْبَلْ ف طرْقاتو.
\p
\v 12 هَنيّةْ رجّالْ لَ يتْحَمَّل التَّجرِبِة، منْ لَ وَقْتْ لَ ينْفحص ينال اكْليل الحَياةْ لَ وَعَدْ فِيو اَلله لَوكْ لَ يحبّوهُ.
\v 13 انْسانْ لا يقولْ وَقْتْ لَ يتْجَرَّبْ ”من اَلله أَتْجَرَّبْ“، منْ لَ أَلله موُ مْجَرّبْ بالّشْرور واِ، وْهوّاِ لانْسانْ موُ يجَرّبْ.
\v 14 بَلىِ واِحدْ واِحدْ منْ شَهْوتو يتْجَرَّب وْينْغَش وْينْجَرْ.
\v 15 وهَالشَّهْوِة تحْبَل وْتولَدْ خَطيِّة، والخَطيِّة بَسْ تكْمَل تْجيبْ مَوتْ.
\v 16 لا تْضيِعون اخوتي المَحْبوُبينْ!
\v 17 كلْ عَطيِّة صالْحَة وْكامْلِة منْ فوُقْ تنْزَلْ منْ عنْدْ أَبو النّورانِيّينْ، هاكْ لَ ما عنْدو تَبْديل وْلا فَيلْ تَغْييرْ.
\v 18 هوّاِ راد وْولدْنا بْكلْمة الحَقْ تَ نْكونْ أَوَّل ثَمَرْ خَلايقو.
\v 19 وانْتن اخوتي المَحْبوبينْ! كلّ انْسانْ منْكنْ خَلّي يعَجّلْ للسَّمَع وْيبْطا للحَكي وْيبْطا للغَضَبْ.
\v 20 منْ لَ غَضَب الانْسانْ موُ يسَي برّ اَلله.
\v 21 منْ هاي بَعْدوا منْكنْ كلْ نَجاسِة وْكثْرةْ شَرْ، وبْتَواضع اقْبَلوا الكلْمِة المَغْروزِة فَ طَبيِعتْنا، منْ لَ تْتيِق تْخَلّص نْفوسْكنْ.
\v 22 كونوا عامْلينْ بالكلْمِة موُ سامْعينْ بَسّ، وْلا تْغشّون نْفوسْكنْ.
\v 23 لَ كانْ في انْسانْ سامعْ للْكلْمِة بَسْ موُ عاملْ فِيا، هاذْ يشْبَهْ لاكْ لَ ارى وچّو ف مْراِيِة.
\v 24 منْ لَ ارى نَفْسو وْمشي وْ{راساً} نسي أشْوَنْ كانْ.
\v 25 بَسْ كلْ واِحدْ يتْمَعَّنْ فَ ناموس الحرّيِّة الكامل وْيثْبتْ فِيو، موُ شَخْصْ سامعْ سَمَعْ ينْتَسى واِ، بَلىِ عامل اعْمال، وْهاذ مْطَوَّبْ تَ يكون بْعَمَلو.
\v 26 وْلَ كانْ في انْسانْ يفْتكرْ يخْدم اَلله وْهوّاِ موُ يمْسك لْساِنو، بَلىِ يغشْ قَلْبو، خدْمةْ هاذْ فاضْيِة ياِ.
\v 27 الخدْمِة الطّاهْرَة الّمْقَدَّسِة قدّام اَلله الآبْ هاي ياِ: تَ ينْعبرْ عَ اليَتاميِ والاَراملْ ف ذيقاتن وْيحْفظْ واِحدْ نَفْسو م الدّنْياِ بَلا فَسادْ.
\c 2
\p
\v 1 اخوتي لا بْكَولَكِة تْكونونْ ماِسْكينْ إيمانْ مَجْدْ رَبْنا يَسوُع المَسيحْ
\v 2 لَ دَخَلْ لَمَجْمَعْكن انْسانْ خواِتمو ذَهَبْ يا حَويسو كْواس، وْدَخَلْ فَقيِر بْحَويسْ وسْخينْ،
\v 3 وتطَلعون فاك اللاِبس حَويس كْواس وتْقولولو: ”أنْتَ هَونْ اقعَد كْوَيّسْ“، والفَقيِر تْقولولو: ”أنْتَ قومْ هَونَكْ“ يا ”اقْعَدْ هَونْ قدّامْ دَوسة اجْرَينا“،
\v 4 موُ كْوا شَكَّيتنْ ف نَفسْكن وْصرْتنْ حكّام افْكارْ شَرّيرَة؟
\v 5 اسْمَعوا اخوتي المَحْبوبينْ! موُ لَفَقارة الدّنْياِ الاَغْنِيا ف الايمان اخْتار اَلله تَ يكونونْ واِرثينْ ف المَلَكوتْ لَ وَعَد فِيو هَوكْ لَ يحبّوهُ؟
\v 6 بَسّ انْتن احْتَقَرتن الفَقيِرْ. موُ كْوا الاَغْنِيا يتْگَبَّرونْ عَلَيكن، وْهنّاِ يجرّوكنْ للمَحاكمْ.
\v 7 موُ هنّاِ يقولونْ كَلامْ كفرْ عَ الاسم الصّالحْ لَ تْسَمّى عَلَيكنْ؟
\v 8 وْلَ كانْ تْكَمْلونْ ناموس اَلله بْموجبْ هاذْ المَكْتوبْ: ”لازم تْحبْ قَرايبكْ كَما نَفسك“ كْوَيّس تْسَونْ.
\v 9 بَسْ لَ كان تْكَولكونْ، خَطيِّة تْسَون وْمنْلامين انْتنْ م النّاموسْ، تنْحسبونْ كَسَرتن النّاموسْ.
\v 10 منْ لَ أَينا لَ يحْفظْ كلّ النّاموسْ وْف وحْدِة يزلْ، لكلّ النّاموسْ يكونْ مَدْيونْ.
\v 11 منْ لَ هاكْ لَ قالْ: ”لا تزْني“، هوّاِ قالْ: ”لا تقْتلْ“. بَقى لَ ما كانْ تزْني، بَليِ تقْتلْ، صرْتْ كاسرْ للنّاموسْ.
\v 12 كذاِ احْكَوا وْكذاِ افْعَلوا، كَما ناِس بْناموس البرْ تَ يتْحاكَمونْ.
\v 13 منْ لَ بَلا رَحْمِة واِ الحكمْ عَلى لَ موُ يسَي رَحْمِة. وانْتنْ بالرَّحْمِة تعْلَونْ فوُق الحكمْ.
\v 14 أَيش الفايدِة اخوتي لَ قال انْسانْ لي إيمان، بَسّ اعْمالْ مالو. يتيِق ايمانو يخَلّصو؟
\v 15 وْلَ أَخْ يا أخْت يكونونْ عَراياِ وْناقْصينْ قوتْ يَومنْ،
\v 16 ويقولْلن انْسانْ منْكنْ: روُحوا بْسَلام ادْفَوا واشْبَعوا، وْموُ تعْطوونْ عَوزة الجَّسَدْ، أَيشْ الفايدِة؟
\v 17 كذاِ زاِ إيمانْ لَ بَلا اعْمال مَيّتْ واِ بْوَحْدو.
\v 18 بَسْ واِحد يقولْ: ”أنْتَ لكْ إيمانْ وَانا لي اعْمال“. وَرّيني إيمانكْ بَلا اعْمال وَانا أَوَرّيكْ إيماني من اعْمالي.
\v 19 أنْتَ تْآمنْ واِحدْ واِ اَلله، مَليِح تْسَي! الشَّياطينْ زاِ يآمْنونْ ويرْتعْدونْ.
\p
\v 20 تْريدْ تعْرفْ، يا انْسانْ بطّال، الايمانْ بَلا اعْمالْ مَيّت واِ؟
\v 21 لَيشْ أَبونا ابْراهيمْ موُ م الاعْمال تْبَرَّرْ وَقْتْ لَ طاِلَع ابْنو اسْحاقْ عَ المَذْبَحْ.
\v 22 أنْتَ ترى إيمانو ساِعد اعْمالو. وْم الاعْمالْ إيمانو كملْ.
\v 23 وتَمّ الّكْتاِبْ لَ قالْ: ”آمَن ابْراهيم اَلله وانْحَسَبْلو بر،“ وْسَديق اَلله تْسَمّى.
\v 24 ترى م الاعْمالْ يتْبَرَّر الانْسانْ، موُ م الايمانْ بَسْ.
\v 25 وكذاِ زاِ راحاب الزّانيِة، موُ م الاعْمال تْبَرَّرتْ، وَقْتْ لَ اسْتَقبَلت الجَّواسيس وْمنْ غَيرْ طَريِقْ طاِلَعتنْ؟
\v 26 أشْوَن الجَّسَدْ بَلا روُح مَيّتْ واِ، كذاِ زاِ الايمانْ بَلا اعْمالْ مَيّتْ واِ.
\c 3
\p
\v 1 لا مْعَلْمين كْثير يكون فيكنْ يا اخوتي، بَلىِ اعْرفوا حكمْ أَقْوى يحقْ عَلَينا.
\v 2 منْ لَ زَلّات كْثير نْزلْ كلّتْنا. لَ موُ يزلْ ف كلْمِة، هاذْ رجّالْ كاملْ واِ يتيِقْ يضْبطْ كلْ جَسَدو زاِ.
\v 3 كْوا نْحطّ الرَّشْمِة ف ثمّ الدَّوابْ تَ يمْشَونْ عَلى كيِفْنا ونْديرْ جسْمنْ كلّو.
\v 4 وسَفّينات القَويِّة زاِ وَقْتْ لَ هَوا زعج يسوُقنْ، فَ تَخْتايِة زْغَيرِة ينْدارونْ لَ موُضَعْ لَ يريدْ هاكْ لَ يسوُقنْ.
\v 5 وكذاِ زاِ الّلْساِنْ، عضو زْغَيّرْ واِ وْيتْگَبَّرْ. نَفس الشِّي شْوَيِّةْ نارْ تحْرقْ غابات كْثيرْ.
\v 6 الّلْساِنْ نارْ واِ. وْدنْية الخَطيِّة كَما الغابِة ياِ. والّلْساِنْ لَ فَ أَعْضانا ينَجّسْ كلْ جَسَدْنا وْيحْرق انْسابْ قَبايلنا لَ تعْدي كَما الدّواِليب. وْهوّاِ يحْترقْ بالنّارْ.
\v 7 كلْ طَبايع الحَيوانات والّطْيوُر، وْدَبايب المَي والاَرْضْ يخْضَعونْ لَطَبيِعة الانْسانْ.
\v 8 بَسّ الّلْساِن انْسانْ ما تاقْ يضْبطو. شَرْ واِ هاذْ لَ موُ يذلْ، متْلي سَمّ المَوتْ.
\v 9 منْ لَ فِيو نْباِرك الرَّبْ والآب، وْفِيو ننْعَل النّاِسْ لَ عَلى صورة اَلله ناِ مَعْمولينْ.
\v 10 ومنّو م الثّمْ تطْلَع النَّعْلاتْ والبَرَكاتْ. موُ يسيِرْ يا اخوتي هَوذْ كذاِ ينْعمْلونْ.
\v 11 لَيشْ ممْكنْ منْ نبعْ واِحدْ يطْلَعْ مَي حلو وْمَي مرْ؟
\v 12 يا سجَرةْ تين تْتيِق تْسَي زَيتونْ، يا سجَرةْ عنبْ تينْ؟ كذاِ زاِ مَيّاِت الماِلْحَة موُ تْسيِرْ حلْوِة.
\p
\v 13 أَينا لَوّاِ منْكنْ حَكيمْ ومْأَدَّبْ، خَلّي يوَرّي اعْمالو بسلوك كْوَيّس، بْحكْمِة وْتَواضعْ.
\v 14 بَسْ لَ حَسَدْ مرْ كانْ فيكنْ يا قْتاِلْ ف قْلوبْكنْ، لا تتْگَبَّرونْ عَ الحَقّ وْتگْذبونْ.
\v 15 منْ لَ هَالحكْمِة موُ منْ فوُقْ نزْلتْ، بَلىِ أَرْضيِّة ياِ من افْكار النَّفس وْم الشَّياطينْ.
\v 16 منْ لَ اينْ لَ في حَسَدْ وقْتاِلْ، هَونَكْ في قَلابالغْ زاِ وْكلْ شي خَرابْ.
\v 17 بَسْ حكْمِةْ لَيّاِ منْ فوُقْ طاهْرَة ياِ وْمتْليِّة سَلام وْمتْواضْعَة ومْطيعَة وْمتْليِّة رَحْمِة وثْمارْ صالْحَة، وْبَلا شقاق وْنفاقْ.
\v 18 بَسّ ثْمار البرْ بالاَمانْ تنْزرعْ لَوذْ لَ يسَونْ سَلامْ.
\c 4
\p
\v 1 من اَينْ فيكن حْروبْ وقْتاِلاتْ؟ موُ منْ شَهْواتْ لَ تْحاِربْ فَ أَعْضا جَسَدْكنْ؟
\v 2 تشْتَهَون، وْما لْكن. وْتقْتلون وْتحْسدون، وْموُ يطْلَعْ بيدْكنْ شي. تتْقاتَلونْ وحْروب تْسَون، وْما لْكنْ، منْ لَ موُ تطْلبونْ.
\v 3 تطْلبون، وْموُ تاخْذونْ، منْ لَ رَدي تطْلبونْ تَ تْشَبْعونْ شَهْواتْكنْ.
\v 4 يا زانْيينْ! موُ تعْرفون مْحَبّة الدّنْياِ عَداوة اَلله ياِ. بَقى لَ يريد يسيِر مْحبْ لَهَالدّنْياِ هاي، عَدو يسيِرْ لَالله.
\v 5 يا عَ الفاضي تفْتكْرون الّكْتاِب يقولْ: ”بالغيرِة تشْتهي روُحْ لَ تسْكنْ فينا“؟
\v 6 بَسْ نعْمِة گْبيرِة عَطانا رَبْنا. بْشانْ هاي قال: ”اَلله ينَخّي المتْگَبْرين، وْللمتْواضْعينْ يعْطي نعْمِة.“
\v 7 اخْضَعوا بَقى لَالله. وْقوموا ف وچّ الشّيِطانْ تَ يهْربْ منْكنْ.
\v 8 وقَرْبوا لَعنْد اَلله، تَ يقَرّب لْكنْ. طَهْروا ايدَيكنْ يا خاطْيينْ. قَدْسوا قْلوبْكن انْتنْ لَ لكنْ نَفْسَينْ.
\v 9 تْواضَعوا وْنوحْوا. خَلّي ذحكْكن يسيِر نوح، وْفَرَحكنْ غَمْ.
\v 10 تْواضَعوا قدّام الرَّب، وْتَ يعَلّيكنْ.
\p
\v 11 لا تحْكَونْ عَلى بَعضْكنْ يا اخوتي، منْ لَ هاكْ لَ يحْكي عَلى أَخوهُ يا يحاكم اَخوهُ، يحْكي عَ الناموسْ ويحاِكم النّاموسْ. وْلَ كنْت تْحاكم النّاموسْ ما صرْتْ عامل النّاموسْ بَلىِ حاكمو.
\v 12 منْ لَ واِحدْ واِ لَ حَطّ النّاموسْ والحاكمْ لَ هوّاِ يتيِق يخَلّص وْيهْلَكْ، بَسّ انْتَ منْ أنْتَ لَ تْحاِكمْ قَرايبكْ؟
\p
\v 13 أَيش نْقولْ عَلَوذْ لَ يقولونْ: اليَومْ يا غَداِ رايحينْ نحْناِ للمَدينِة الفلانيِّة وْنبْقى هَونَكْ سَنِة وحْدِة ونْتاجر وْنرْبَحْ.
\v 14 وْموُ يعْرفونْ أَيش يسيِرْ غَداِ. لَيشْ أَيشْ ياِ حَياتْنا غَيرْ بَوخَة تْبَيّنْ لَشْوَيّة وَقْتْ وتْروُحْ وتْزوُلْ.
\v 15 مْبَدالْ لَ يقولونْ: لَ راد اَلله وْعشْنا تَ نْسَي هاذْ يا هاكْ.
\v 16 {بَسّ السَّعْ} يفْتخْرون بْكبْرِياهنْ. كلْ فَخرْ كَما هاذْ شَرْ واِ.
\v 17 بَقى أَينا لَ يعْرف يسَي خَير وْموُ يسَيو، خَطيِّة يسيِرْ عَلَيو.
\c 5
\p
\v 1 يا غَناياِ وَلْولوا وابْكَوا عَلى بَلاوي الجّايِة عَلَيكنْ.
\v 2 منْ لَ غناكنْ فَسَد وْنتن وْحَويسكنْ أَكَلا العثْ.
\v 3 وذَهَبْكن وْفضّتكنْ زَنْجَروا، وْزنْجارنْ تَ يسيِرْ شَهادِة ضدْكن، وْهوّاِ تَ ياكلْ لَحمْكنْ. نارْ جَمَعْتنْ لكنْ للاِيّاِم الآِخْرانِيِّة.
\v 4 هاي حَقْ لَ اكَلْتنو عَ العمّالْ لَ حَصَدوا أَرْضْكنْ يزْعَقْ، وْزَعْقة الحصّاِدين لاَذانْ رَبّ الصَّبؤوتْ دَخَلتْ.
\v 5 كَيَّفتنْ ف الاَرْض وْبطرْتن وْرَبَّيتن اجْسادْكنْ كَما لَ يكونْ لَيَوم الذَّبحْ.
\v 6 حَكَمْتنْ عَ البارّ وْقَتَلْتنو وْما قامْ ضدْكنْ.
\p
\v 7 بَقى أنْتنْ يا اخوتي طَولوا بالْكنْ دي لَمَنْ يجي الرَّبْ. كَما صاحب الزَّرْعْ لَ ينْطر الّثمار الغالْيِة، ثْمارْ أَرْضو ويطَوّلْ بالو عَلَينْ دي لَمَنْ يسْتلمْ أَوَّلْ مَطْرَة وْآِخرْ مَطْرَة،
\v 8 كذاِ أنْتنْ زاِ طَولوا بالْكن وْثَبْتوا قْلوبْكنْ منْ لَ قرَّبتْ مجْوةْ رَبْنا.
\v 9 لا تتْأَفْأَفونْ واِحدْ عَ اللاخْ يا اخوتي بْشانْ لا ينْحكمْ عَلَيكنْ، منْ لَ هاي القاضي عَ البابْ قايمْ.
\v 10 مَثَلْ خذولْكن الاَنْبِيا يا اخوتي بْشانْ تتْحَمَّلونْ شَدايدْكنْ، هَوك الاَنْبِيا لَ حَكَوا باسْم الرَّبْ.
\v 11 منْ لَ كْوا نعْطي الطّوبى لَوكْ لَ صَبَروا. سمعْتنْ فَ صَبْر اَيّوبْ وَارَيتنْ أَيشْ آِخرَة سَوالو الرَّبْ، منْ لَ رَحومْ واِ الرَّب وْحَنونْ.
\v 12 بَسْ قَبلْ كلْ شي يا اخوتي لا تحْلفونْ لا بالسَّما وْلا بالاَرْض، وْلا بْغَيرْ حلْفانْ، بَلىِ خَلّي كلْمتْكن تْكونْ نَعمْ نَعم وْلا لا بْشانْ لا تقَعونْ تَحْتْ حكمْ.
\p
\v 13 وْلَ كانْ أحَّدْ منْكنْ ف شدِّة خَلّي يصَلّي وْلَ كانْ فرْحانْ خَلّي يرَنّمْ.
\v 14 وْلَ كانْ مَريِضْ، خَلّي يبْعَثْ خَلْف شْيوُخة البيعَة ويصَلَّونْ عَلَيو وْيمْشَحوهُ مَشْحةْ زَيتْ باسْم الرَّبْ.
\v 15 وصَلاة الايمانْ تشْفي المَريِض وْرَبْنا يشْفِيو وْلَ كانْ كسَّوى خَطِيّاتْ تنْغفرْلو.
\v 16 بَقى اعْترْفوا لَبَعضْكن بْجَهالاتْكن، وْصَلَّوا واِحد بْشان اللاخْ تَ تنْشَفَونْ، منْ لَ عَظيمِة ياِ قوّة الصَّلاة لَ يصَلّيا البارْ.
\v 17 إِيليّا زاِ انْسان يحسْ كَمانا كانْ. وْصَلّى لا ينْزَلْ مَطَرْ عَ الاَرْض، وْما نزلْ ثَثّ سْنين وْسةّ اشرْ.
\v 18 ورَدْ صَلّى والسَّما عَطَتْ مَطرْ والاَرْضْ عَطَتْ ثَمَرْ.
\v 19 اخوتي! لَ أحَّدْ منْكنْ ضاعْ منْ طَريِق الحَقْ، وْرَدّو أحَّدْ منْكنْ منْ ضَيَعانو،
\v 20 خَلّي يعْرفْ هاكْ لَ يرد خاطي منْ ضَيَعانو م الطَّريِقْ، يخَلّصْ نَفْسو م المَوت وْيسْترْ خَطيّاتو الّكْثيرْ.