\id EPH
\h Efesios
\mt1 Tson Na Scüenon Pablo Ndëë Nn'an
\mt2 Tsjoon Éfeso
\c 1
\s Incyaa Pablo ts'on 'naan' jon ndëë
nn'an Éfeso
\p
\v 1 Ja Pablo matscüenön tsonvahin ndëëho'. Ng'e na nt'ue
ts'on Tyo'ts'on, jo' condui ja ts'an na i'ua jon ts'ian nnön na
jöncya jñ'oon naya 'naan' jon ndëë nn'an. Matscüenön 
tsonvahin ndëë 'o' na covantyja n'onho' Jesucristo na m'anho' 
tsjoon Éfeso na conduiho' nn'an cüentaa' jon.
\v 2 Nquii Tyo'ts'on conduihin tyëëhë ndo'
nquii Jesucristo conduihin na itye'ntjon jon jaa. Juu naya na
nan'xuanhan yo nin'juu na conduihan na tajñuaan' ts'onhin,
mac'an ndëëhan na jndyentyichenhan' ninncyahan na 
ncy'onho' cüentahan'. 
\s Jndye nnon min na ityio Tyo'ts'on jn'aan jaa
ntyja 'naan' Espíritu Santo
\p
\v 3 Cüit'maan' nquii Tyo'ts'on na conduihin tye Jesucristo,
nquii jon na conduihin na itye'ntjon jon jaa. Ee na condui jaa
nn'an na m'an ntyja 'naan' Cristo, jo' ntyja 'naan' Espíritu
Santo, nquii Tyo'ts'on ityio jon jn'aan jaa xeng'e na m'aan
Cristo quiñoon'ndue.
\v 4 Vitjachen na ntquen Tyo'ts'on tsonnangue, ndo' juu xjen'ñeen
tji jon jaa na condui jaa cüentaa' nquii jon ng'e juu
ts'ian na siquindë Cristo. S'aa Tyo'ts'on na nnda' cha'
nnan'xuan ñuan nquii' yo na tajnan nan'xuan na tonnon jon.
Ng'e na vi'nchjii jon jaa,
\v 5 Jo' na tivio sijnda' jon na jaa na vantyja nn'ön
Jesucristo, iquen jon na condui jaa ntsinda nquii jon. S'aa
jon na nnda' ng'e tëvee' nchjii jon, ndo' mantyi ng'e na
nt'ue ts'on jon.
\v 6 Nnda' vaa its'aa jon cha' ninnquii'chen quinan't'maan'
jaahin ntyja 'naan' juu naya na tsixuan jon na juuhan'
tëquintyja na njon jndyi conduihan'. Tyi'vacuaa xjen na
incyaa jon naya na tsixuan jon ng'e na vi'nchjii jndyi jon
nquii Jesús.
\v 7 Ntyja 'naan' nquii jon sijnda ntcüe' Tyo'ts'on jaa yo
neoon' Cristo. Ndo' ng'e jo', itsit'man ts'on Tyo'ts'on jaa
tsoñ'en nnon jnan na nan'xuan. Its'aa jonhan' ng'e juu
naya na condui jon, njon jndyi conduihan'.
\v 8 Juu naya'ñeen, vantjo'chen itsiquindaa' jonhan'
jaa ntyja 'naan' juu na jnda' xquen jon na tëquintyja na njon
tsixuanhan', ndo' yo na ivaa' ts'on jon nin 'nan na icanhan' jaa.
\v 9 Tivio tyí'quindio nn'an nchu vaa na nt'ue ts'on jon na
quint'ahan cha' ndëë ntsin'man jon ñuaanhan. Majo' naneinhin
jndë si'man jonhan' ndëë xeng'e ntyja 'naan' nquii Cristo,
jo' na tëvee' nchjii jon na sijnda' jonhan'.
\v 10 Ntyjantyi na nnda' vaa na sijnda' jon, tsoñ'en na m'an
quiñoon'ndue yo nnon tsonnangue, ncju'cje jon joohan nacje
'naan' nquii Cristo. Ya na ntyjii jon na jndë tentyja xjen,
ntsiquindëñ'enhan' cha'xjen na sijnda' jon.
\p
\v 11 Tivio jndyi tji Tyo'ts'on jaa ndo' tquen jon na condui jaa
cüentaa' nquii jon. S'aa jon na nnda' ntyjantyi na nt'ue ts'on
jon na cuaa.
\v 12 S'aa jonhan' cha' quii' nt'an nn'an tsonnangue, nquii
jon na taquintyja na t'man conduihin, ndit'maan' jon ntyja
nján já na tye' jndyee na conan'qui n'ö́n Cristo.
\v 13 Ndo' 'o' nn'an na tyi'conduiho' tsjan já nn'an judíos,
mantyi tyii'han' 'o' ntyja 'naan' Cristo xjen na tondyeho' juu
jñ'oon naya na conduihan' na mayuu', jñ'oon'ñeen
itsiquindyihan' na itsin'man Tyo'ts'on ñuaanho' ng'e na vantyja
n'onho' Cristo. Juu xjen na tantyja n'onho'hin, tyincyaa Tyo'ts'on
na ty'onho' cüenta Espíritu Santo cha'xjen na jndë tco' jon
'ndyo jon cha' quitsi'manhan' na conduiho' nn'an cüentaa' nquii
Tyo'ts'on.
\v 14 Nquii jon incyaa jon Espíritu Santo quii'
n'onho', ncüii na tyuaa' ya coy'ön cüenta viochen xjen na 
covent'ö na ntsiquindyaa jon jaa na m'an nacje 'naan' jnan cha' 
nndui jaa nn'an na itsijnda jon. Juu 'nan'ñeen na itsiquindaa' 
jon jaa, taquintyja ndit'maan'hin ntyja 'naan'han'.
\s Jñ'oon na ican Pablo nnon Tyo'ts'on
\p
\v 15 Mang'e na nnda' vaa, ntyjantyi xjen na jndë jndyi na vantyja
n'onho' ta Jesús, yo na conan've'ngioho' nn'an na conduihan
cüentaa' Tyo'ts'on,
\v 16 Jo' tyi'cjöcüentyjë' na mancya na ya Tyo'ts'on ntyja
'naanho', ndo' xjen na matsinën nnon jon, mac'an na
quitejndei jon 'o'.
\v 17 Nquii Tyo'ts'on na totye'ntjon Jesucristo nnon jon, nquii
jon na conduihin Tyëëhë, m'aan jon naijon na taquintyja
na nancoo', mac'an nnon jon na ncyaa jon na jnda' nquenho'
cha' juu 'nan na ntyjii jon, ntscüenon jonhan' quii' ñuaan
'naanho' na ncüaa' n'onho' 'nan na itsi'manhan'. Ndo' na
yantyichen nta'jn'aanho'hin.
\v 18 Nnda'
vaa na mac'an cha' quii' n'onho' ndëë ncüaa' n'onho' nchu vaa
na nt'ue ts'on Espíritu na quint'aho' ndo' mantyi cha' nndëë
ntji'ho' cüenta na juu na t'man qui n'onho'hin, njon jndyihan',
ndo' na ncüaa' n'onho' na juu na ntsiquindaa' jon joo
nn'an na conduihan cüentaa' nquii jon, njon jndyihan'.
\v 19 Nquë na vantyja nn'ön Cristo, nquii Tyo'ts'on na taquintyja
najndei conduihin, juuhan' taquityja t'man tsixuanhan', mac'an na
cüaa' n'onho' ntyja 'naan'han'. Juu najndei'ñeen mayo
juuntyihan'
\v 20 na tyincyaa jon na tando' xco Cristo vi na jndë
na tue' jon. Ndo' t'ua jon ts'ian na cacjo Cristo tongiaa' jon
quiñoon'ndue naijon tsoñ'en conan't'maan'han jon.
\v 21 Naijon
na m'aan jon, t'manntyichen conduihin, chichen ncüii cüii nnon na
cotoxen, min ángeles na nan'xuan najndë, min joo na
conditque na cotoxenhan jo'. T'manntyichen condui Cristo, chichen
cha'xjen na ncüii cüii na t'man condui nnon tsonnanguevahin,
min xjen neinhin, min 'nan na ngue'ntyja na tonnonchen.
\v 22 Ndo' tsoñ'en nnon na m'an, jndë tquen Tyo'ts'onhan na c'onhan
nacje 'naan' nquii Cristo. Ndo' jndë t'ua jon ts'ian na nquii
Cristo conduihin xquen jñ'oon ntyja 'naan' tsoñ'en, cha'
quitejndeihan' juu tmaan' nn'an na conduihan cüentaa' nquii jon.
\v 23 Jaa tmaan' nn'an na icüji Tyo'ts'on cüentaa' jon, condui
jaa si'ts'o 'naan' Cristo, juu tmaan'ñeen na ntyja 'naan'han'
itsiquindëhan' nquii jon. Manquiintyi jon na ntyja 'naan' jon
itsiquindëhan' tsoñ'en.
\c 2
\s Itsin'man Tyo'ts'on ñuaan nn'an ng'e t'man
vaa na vi'ntyjii jonhan
\p
\v 1 Na toxen'chen tonduiho' nt'oo tsojnaan' na
tonan'tjaho' ndo' na tom'anho' nacje 'naan' jnan.
\v 2 Juu
xjen'ñeen totsam'anho' cha'xjen na cotsam'an nn'an tsonnangue
Tonan'jonho' yo juu yutyia na conduihin na co'xen
juu tyquii' jndye, nquii juu na iquen juu xjen nn'an na conan'vehan
nacjoo' Tyo'ts'on.
\v 3 Ndo' nguee na toxen'chen, mantyi tsoñ'en jaa tonan'xuan
cha'na joo nan'ñeen. Ntyjantyi 'nan na toquen si'ts'o njanhan
xjen, joohan' tont'a. Tonan'jön yo min'cya ro nnon
'nan tyia na nt'ue ts'onhan', ndo' yo min'cya ro nnon natyia na
tonan'tiu nquë. Ndo' ng'e na nnda', tondui jaa nn'an na
quit'uii Tyo'ts'on jaa cha'xjen mantyi it'uii jon mañoon
nn'an na conan'tjahan nnon jon.
\v 4 Majo' nquii jon tenon ntyja xjen m'aan jon na nty'ia ro jaa
nchjii jon ndo' na t'man vaa na vi'ntyjii jon jaa,
\v 5 Ng'e na nnda', viochen xjen na tonan'xuan jaa nt'oo ng'e
jnan, majuu xjen'ñeen tyincyaa jon na nan'xuan jaa na
tyi'quintycüii na cotant'ö xeng'e Cristo. Ng'e juu
naya na condui Tyo'ts'on, jo' na jndë sin'man jon ñuan
njanhan.
\v 6 Ndo' ng'e na vantyja nn'ön Cristo Jesús, jo' xjen
na tondui jaa nt'oo, nquii Tyo'ts'on tyincyaa jon na
cota'nt'öxcö xeng'e Cristo, ndo' i'ua jon ts'ian na
conan'jön yo Jesús quiñoon'ndue naijon na vequityen jon na
ico'xen jon.
\v 7 Its'aa Tyo'ts'on na nnda' cha' joo ndyu na vacachen na m'aanhan', 
ndëë tsoñ'en na jndë tquen jon, ntsi'man jon na juu naya na 
conduihin na m'aan jon na vi'ntyjii jon jaa 
ng'e Cristo Jesús, tëquintyja na t'man conduihan'.
\v 8 Ee ntyja 'naan' juu naya na condui Tyo'ts'on,
jo' na itsin'man jon ñuaanho', ng'e na vantyja n'onho'
Jesucristo. Min chito its'aa jon na nnda' ntyja 'naan' ncüii
nnon na nan'xuan nqueho'. Nquii jon itsiquindaa' jonhan' 'o'.
\v 9 Min chito its'aa jon na nnda' ng'e ncüii nnon na cont'a
nqueho'. Its'aa jonhan' cha' quitscu'han' na ntsiquinjon ts'an
ntyja nchu vaa na its'aa nquii juu.
\v 10 Ndo' na conan'xuan na nnda' ng'e ts'ian na s'aa nquii jon,
ee tquen jon jaa na ntejndei jaa nn'an ng'e Cristo Jesús.
Tivio jndyi sijnda jon na cuaa na nnda' ntyja njanhan.
\s Ninncüii condui jaa na tonnon Tyo'ts'on ng'e
Cristo
\p
\v 11 Ñ'enho' na chito tuiho' tsjan nn'an judíos. Tyi'ngitsuu'
n'onho' nchu vaa na tonan'xuanho' xjen na tyí'quinan't'maan'ho'
Tyo'ts'on. Nque nn'an judíos conduehan na 'o' tyi'conduiho'
cüentaa' jon ng'e na tacont'aho' juu ts'ian na cont'a nquehan
yo yonon'ndaa ndahin.
\v 12 Majo' cañjoon' n'onho' na juu xjen'ñeen, 'o' tyí'c'onho'
ntyja 'naan' Cristo. Ntyja 'naan nn'an Israel na icüji
Tyo'ts'onhan na conduihan cüentaa' nquii jon, jnty'iihan'
'o', tyí'cacüja'han' 'o' ntyja 'naan' jñ'oon na tco' jon
'ndyo jon ndëëhan. Min tat'onho' na qui n'onho' jon, min
tyí'c'onho' ntyja 'naan' jon.
\v 13 Majo' nanein, 'o' na toxen'chen na tycya tom'anho' ntyja
'naan' Tyo'ts'on, jndë tyii' jon 'o' ntyja 'naan' nquii jon
ng'e na jndui' neoon' Cristo na tyincyaa jon na t'ion
nn'anhin tsonjn'aan.
\v 14 Ng'e ntyja 'naan' nquii jon, jo' condui jaa na tajñuaan' ts'on na tonnon
Tyo'ts'on. Ndo' ng'e ntyja 'naan' nquii Cristo, jaa nn'an
judíos yo 'o' nn'an na mañoon tsjan conduiho', s'aa
Tyo'ts'on na ninncüii tmaan' condui jaa, jndë sityuii' jon
juu jñ'oon na tovachuhan' tsoñ'en jaa na tyí'tjon' tom'an
na tonan'vjë ntyjë.
\v 15 S'aa jon na nnda' juu xjen na nquii Cristo na ts'anhin, tue' jon
nnon tsonjn'aan. Ndo' ntyja 'naan' jo', its'aahan' na juu jñ'oon
na tquen Moisés yo joo mañoon jñ'oon na tocanhan' na
quita'nc'uëëhan' tavi ntco'xenntyichenhan' jaa. S'aa Cristo
na nnda' cha' ve tmaan' jaa ninjnt'uehin na ntquen jon ninncüii
tmaan' xco cüentaa' nquii jon. Ndo' ng'e na s'aa jon na nnda', joo
na ve tmaan' jaa jndë ntycüii na m'an na tyi'quijnt'ö
ntyjëëhë.
\v 16 Ng'e ntyja 'naan na tyincyaa Cristo na tue' jon nnon
tsonjn'aan, jo' sintycüii jon na tyi'ya tom'an nn'an judíos yo
nn'an na mañoon tsjan conduihan. Ndo' na nnda', ntjo ntyjii
Tyo'ts'on yohan. S'aa jon na ninncüii si'ts'o conduihan tonnon
jon.
\p
\v 17 Ndëë 'o' na tyí'cacüja'han' 'o' ntyja 'naan' Tyo'ts'on, jndyo 
Cristo ndo' tyincyaa jon jñ'oon naya cha' ndëë nan'xuanho' 
na tajñuaan' ts'on c'onho' na tonnon jon. 'O' ndo' mantyi ndëë 
nn'an judíos na ndyontyi tom'anhan ntyja 'naan' jon.
\v 18 Ee ntyja 'naan' nquii Cristo, tsoñ'en jaa, tanin min
na aa condui nn'an judíos ndo' aa condui jaa nn'an na mañoon
tsjan, naneinhin condëë conan'ndyoo' jaa na m'aan tyëëhë 
Tyo'ts'on ng'e nquii Espíritu cüentaa' jon.
\v 19 Mang'e na nnda', naneinhin
na tonnon jon taviquinan'xuanntyichenho' cha'vijon nn'an na cotsque
ya, oo cha'na nn'an na ve' m'an yahan tsjoon mañoon nn'an.
Naneinhin na tonnon jon, cüejon conduiho' yo nn'an cüentaa'
jon cha'xjen mañoon nn'an na vantyja n'onhan Cristo, maninnquii'
conduiho' nn'an vaa' jon.
\v 20 Nque nn'an na jñon Jesucristo yo
jñ'oon naya 'naan' jon, yo nin'nque nn'an na tonan'neinhan
juuhan' ndëëho', ntyja na vantyja n'onho' jon, joo nan'ñeen
conduihan cha'vijon tsjaan' v'aa. Ndo' quityquii' juu
ts'ian'ñeen, nquii Cristo Jesús conduihin tsjö' nqui v'aa.
\v 21 Ntyja 'naan' nquii jon, juu vaa' jon na condui jaa,
vandëhan'. Vandit'manhan' na conduihan' ncüii vats'on na ji'ua
tsixuanhan' cüentaa' Tyo'ts'on naijon na m'aan jon.
\v 22 Ndo' ng'e na conan'jonho' yo Cristo, mantyi itsitjon'han'ho' yo
tsoñ'en nn'an na vantyja n'on jon. Ntyja 'naan' jo'
conduiho' ncüii v'aa naijon m'aan Tyo'ts'on ndo' 
nquii Espíritu na conduihin na m'aan jon quityquii' juu 
v'aa'ñeen.
\c 3
\s Chu Pablo ts'ian na incyaa jon jñ'oon naya
ndëë nn'an na tachito judíos
\p
\v 1 Mang'e na nnda' vaa na itsijnda' Tyo'ts'on, ja Pablo nty'i
vancjo naneinhin ng'e na mancya jñ'oon ntyja 'naan' Cristo
Jesús ndëë 'o' na chito conduiho' tsjan nn'an judíos.
\v 2 M'aan' ts'ön na jndë condyeho' na ng'e juu naya na condui 
Tyo'ts'on, jo' na i'ua jon ts'ianvahin nnön cha'
quitejndeihan' 'o'.
\v 3 Juu jñ'oon na tyi'quindio nn'an ndyu na
toxen'chen, jo' si'man jndyoyu jonhan' nnön. Juu jon incyaa jon
na mavaa' ts'önhan', juuhan' jndë tji jaa vendye 'ndyo jñ'oon
nnon tsonvahin.
\v 4 Vi na jndë jnan'jn'aanho' jñ'oonva na
macüji, ndëë ntji'ho' cüenta na mavaa' ts'ön juu jñ'oon
ntyja 'naan' Cristo, jñ'oon na tacondye nn'anhan' ndyu' na
toxen'chen. 
\v 5 Ee joo ndyu na jndyocahan', tyí'quitsiquindyi Tyo'ts'on nn'an
juu jñ'oonva. Majo' naneinhin ntyja 'naan' nquii Espíritu Santo, 
jndë si'man jonhan' ndëë joo nn'an na ncho've nn'an na totsay'onhan 
yo jñ'oon na toninncyaa Jesús na conduihan ñuan nquii' na tonnon 
Tyo'ts'on yo manin' nque nn'an na coninncyahin jñ'oon'ñeen ndëë nn'an.
\v 6 Juu jñ'oonvahin na tyí'quindye nn'anhan', ndö vaa na
itsiquindyihan'. Ng'e ntyja 'naan' jñ'oon naya 'naan'
Jesucristo, jo' nque nn'an na chito conduihan nn'an judíos,
cüejon coy'onhan cüenta juu naya na incyaa Tyo'ts'on
cha'xjen juu naya na itsiquindaa' jon joo nn'an judíos.
Nque nn'an na chito conduihan nn'an judíos, cüejon
conduihan si'ts'o 'naan' Cristo cha'xjen nque nn'an judíos
conduihinhan'. Nincüejon coy'onhan cüenta jñ'oon na ico'
Tyo'ts'on 'ndyo jon na ndyio jon jn'aan nque nn'an na
m'anhan ntyja 'naan' Cristo Jesús.
\p
\v 7 Min ncüii tyi'tsixuan ja na nc'ua jon ts'ian nnön, majo' tyii' jon
ja quityquii'han' na ninncya jñ'oon naya 'naan' jon ndëë nn'an
ntyja 'naan' juu najndei na conduihin.
\v 8 Min na tyi'njon condui ja cha'na condui vendye nn'an cüentaa'
Tyo'ts'on, majo' i'ua jon ts'ian nnön na ninncya jñ'oon
naya 'naan' jon ndëë nn'an na chito conduihan nn'an
judíos, na quitsiquindyihan ntyja 'naan' joo jñ'oon na taquintyja
na njon conduihan' ntyja 'naan' Cristo.
\v 9 I'ua Tyo'ts'on ts'ian nnön na joo nn'an na m'an ncüii cüii
joo, quits'a na ngovaa' n'onhan nchu vaa na sijnda' jon na ntsin'man
jon ñuaan nque nn'an na chito judíos conduihan. Nnda' vaa
sinchu' nquii jon na tquen jon tsoñ'en na min, majo' ata
ngueemin si'man jon na ndui na nnda'.
\v 10 Its'aa jon na nnda', cha' neinhin xeng'e ntyja 'naan' juu
tmaan' nn'an na conduihan cüentaa' jon, ndëë joo ángeles
na cotoxen quiñoon'ndue yo mañoon nnon na conintque na
m'anhan jo', ntsi'man jon ndëëhan ncüii cüii nnon na
conduihin na jnda' xquen jon.
\v 11 Juu xjen na vitjachen na tquen jon tsonnangue, sijnda' jon
na ndui na nnda'. Ndo' ntyja 'naan' nquii Jesucristo na
conduihin na itye'ntjon jon jaa, jo' siquindë jonhan'.
\v 12 Nein nquii jon incyaa jon na qui nn'önhin ndo' ng'e jo',
itsijnda' jon nquën na quinan'ndyoo' jaa na tonnon
Tyo'ts'on, yo na min'ncüii tyi'quindyii' nn'ön na nnt'a na
nnda' ng'e na vantyja nn'önhin.
\v 13 Mang'e na nnda', mac'an ndëëho' na tyi'ntsichjoo'han'
n'onho' ntyja 'naan' juu navi'va na maquenön na nty'i ja vancjo
ntyja 'naanho', na ntyja 'naan'han' itsiquinjonhan' 'o'.
\s Vi'ntyjii Cristo jaa
\p
\v 14-15 Ya na ndyii' ts'ön ntyja 'naan' juu na jnda'
xquen Tyo'ts'on na sijnda' jon na ntsin'man jon nn'an, maco'xtyë 
tonnon nquii jon na conduihin Tye tondëë tsoñ'en na 
tquen jon, ñ'en joohan na m'an quiñoon'ndue ndo' mantyi 
ñ'enhan na m'an nnon tsonnanguevahin.
\v 16 Tsoñ'en joo na conan'manhan' na taquintyja na njon
conduihin, mac'an nnon jon na ntyja 'naan joohan' nninncyaa jon
na ntsay'onho' na jndëho' ntyja 'naan' juu najndei na conduihin
ng'e nquii Espíritu Santo.
\v 17 Nnda' vaa na mac'an cha' ninvito nc'oon Cristo quii' n'onho'
ng'e na vantyja n'onho' jon. Mantyi mac'an na nninncyaa
Tyo'ts'on na juu na m'aan jon na vi'ntyjii jon 'o',
quintjotyen na nan'xuanho'han'.
\v 18 Nnda' vaa na mac'an cha' 'o' yo nin'tsoñ'en nn'an cüentaa'
Tyo'ts'on na ngaqueho' na ncüaa' n'onho' tsa'nnda' t'man
tsixuan juu na vi'ntyjii Cristo 'o'. Juuhan' t'manntyichen
tsixuanhan', chintyi na ve' ntyja 'naan juu na tuen nnon tsonnangue. Ntyja
na vi'ntyjii jon 'o' tcontyichenhan', chintyi xueechuu'
ts'an. Ndyentyihan', chito ve' cha'na nandye tsjö'ndue.
Ndo' ndaandue min na njoonhan', juu na vi'ntyjii jon nn'an
tjantyichen na njoonhan', chichen ndaandue.
\v 19 Mantyi mac'an na juu na vi'ntyjii Tyo'ts'on
nn'an na nnintyincyoo' yahan' ntyja 'naanho'. Juuhan' ivenoon'han'
nchu vaa na nndëë ncüaa' nn'ön. Nnda' vaa na mac'an cha'
quindë ya nnan'xuanho' tsoñ'en na condui Tyo'ts'on.
\p
\v 20 Nquii jon jndyentyichen ndëë nts'aa jon, chintyi na cotan
na quits'aa jon oo na ndyii' nn'ön na aa ndëë nts'aa jon.
Condëë its'aa jonhan' ntyja 'naan' juu najndei na conduihin na
m'aanhan' quityquii' nn'ön.
\v 21 Cüit'maan' nquii Tyo'ts'on na
m'aan jon quii' nt'an nn'an na conduihan tmaan' cüentaa' jon,
ndo' mantyi cüit'maan' Cristo Jesús. Mancha'xjen quindui na
nnda' ndo' min tyi'jon cacüentyjee' na quinduihan'.
\c 4
\s Ninncüii tmaan' condui jaa ng'e
Espíritu Santo
\p
\v 1 Ng'e na matye'ntjön nnon Jesucristo, jo' na m'an vancjo
ntjoohin. Jo' mac'an vi naya'ñeen ndëëho' na viochen xjen na
cotsam'anho', c'onho' cha'xjen na chuhan' ng'e na tqueen'
Tyo'ts'on 'o' na quinan'jonho' yo Cristo.
\v 2 Quinan'ndyia' n'onho' tondëë nn'an. C'onho' na cüiya
ngioho' yo nn'an. C'onho' na t'man n'onho' tsoñ'en 'nan na
tyi'ya na cont'a nn'an 'o'. Nque ntyjeho' na vantyja
n'on Cristo, yo na conan'vengioho'hin quinan't'man n'onho'hin 
yo 'nan na cont'ahinho'. 
\v 3 Quita'nguee'ho' na nquii Espíritu Santo ngotsi'man jon ndëho' 
nchu vaa na quitsam'anho', yajo' ya nc'onho' yo ntyjeho'.
\v 4 Ee jaa na vantyja nn'ön Jesucristo, ninncüii si'ts'o
'naan' jon condui jaa. Ndo' ninncüii Espíritu m'aan,
cha'xjen na ninncüii vaa na t'man qui nn'ön Tyo'ts'on xjen
na tqueen' jon jaa na quinan'jön ntyja 'naan' na ico'xen jon.
\v 5 Tondëë jaa na vantyja nn'ön Cristo,
xia'ntyi nquii jon conduihin na itye'ntjon jon tsoñ'en jaa, ndo'
ninncüii jñ'oon na vantyja nn'ön na nquii jon conduihin na
itsin'man jon ñuan njanhan, ndo' juu na cont'ëhë yo xuee'
jon, ninncüiihan'. 
 \v 6 Tondëë tsoñ'en jaa, ninncüii
Tyo'ts'on na conduihin tyëëhë ng'e na vantyja nn'ön Cristo.
Xia'ntyi nquii jon co'xen jon tsoñ'en. Its'aa jon yo tsoñ'en
cha'xjen na nt'ue ts'on jon, ndo' m'aan jon yo ncüii
ro ncüii jaa.
\p
\v 7 Majo' ncüii cüii jaa, nquii Cristo itsiquindaa' jon ts'ian
'naan' jon na quint'ahan' cha'xjen na jndë sijnda' jon.
\v 8 Ng'e na nnda', nnon tson salmos vaa jñ'oon' Tyo'ts'on na jndui
na itsohan':
\q Xjen na tëva ntcüe' Cristo quiñoon'ndue vi
jndë na tando' xco jon jndë na jnan'cuee'
nn'anhin, 
\q tsoñ'en joo na conduihan na jndë 
tju' cje jon, tëchu jonhan, ndo' itsiquindaa' jon 
jaa ncüii cüii nnon na itejndeihan' jaa.
\m Mannda' itsiquindyi tson salmos.
\p
\v 9 Ndo' ng'e na itso jñ'oon'ñeen na tëva ntcüe' jon
quiñoon'ndue, mantyi itsiquindyihan' na jo' jnan jon, na jndyocue
jon nnon tsonnangueva.
\v 10 Nquii jon na jnan quiñoon'ndue na
jndyocue jon nnon tsonnanguevahin, manquiintyi jon tëva ntcüe'
jon quiñoon'ndue na ndyentyichen, cha' condëë c'oon jon na
ninvaañ'en.
\v 11 Jaa na vantyja nn'önhin, manquii jon itsiquindaa' jon 
ncüii cüii nnon ts'ian jaa cha' condëë cotye'ntjön nnon
jon, cha' ntejndeihan' nn'an na conduihan tmaan' cüentaa'
jon. Ñ'en já na condui nn'an na i'ua jon ts'ian ndë́ na
cotsay'ö́n jñ'oon naya 'naan' jon ndëë nn'an, ndo' ñ'en
vendye nn'an na coninncyaa jñ'oon' jon ndëë nn'an nchu
vaa 'nan na nguaa, ndo' ñ'en vendye nn'an na comandyi'han ndëë nn'an
na coninncya jñ'oon' Tyo'ts'on cha' ntcüe' n'onhan
jnanhan. Ndo' ñ'en vendyehan na itsiquindaa' jon ts'ianhan
na coninncyahan jñ'oon' jon yo nin'nn'an na conan'man yahin
juuhan' ndëë nn'an na vantyja n'on, cha ngaquehan ntyja 'naan' jon.
\v 12 Ts'ianmin' i'ua Cristo ndëë nan'ñeen cha' cüijnda' ncüii
cüii nnon ts'ian na cotye'ntjon nn'an cüentaa' Tyo'ts'on nnon
jon, cha' ntyja njan jaa na condui sits'o 'naan' Cristo, ngaque
jaa quityquii' na vantyja nn'önhin.
\v 13 Its'aa jon na nnda' cha' tsoñ'en jaa cüejon c'ön na
vantyja nn'ön yo nquii jon na conduihin jnda Tyo'ts'on,
ndo' cha' cüejon cüaa' nn'ön ntyja 'naan' na condui jnda
jon. Yajo' nnan'xuan jaa nn'an na jndë tque ntyja 'naan'
Cristo na quindë ya nan'xuan jaa cha'xjen na tsixuan nquii
jon.
\v 14 Ya na nan'xuan nan'min, taxe'quitsijonhan' jaa cha'na
yotsca, ee joo yo'ñeen majndye jnda conan'cüejndyo joo
nchu vaa na m'aan' n'on joo. Min tyi'xe'quinan'jñ'öön'
jaa ncüii cüii nnon jñ'oon na conan'man nn'an na ndyii'
manyan nquenhan na yo joo jñ'oon'ñeen conan'vi'nn'anhan
ntyjehan.
\v 15 Majo' tyi'quichuhan' na nnda' vaa nnc'ön. Icanhan' na
quinan'nën jñ'oon na mayuu' ndëë nn'an ndo' mantyi
quinan'man na conan'vi'ngiöhan. Ya na cont'aha na
nnda', yajo' ngaque jaa ntyja 'naan' Cristo, na nquii jon
conduihin xquen ntyja 'naan' tmaan' jaa na vantyja nn'ön
jon.
\v 16 Juu si'ts'o 'naan' ts'an, it'uii'han' jndye nnon
ndui, yo jndye nnon quinjon'han'. Ncüii cüiihan' 
itejndeihan' ntyjehan'. Mannda' vaa na itsijonhan' ntyja njanhan
na condui jaa ntyja 'naan' Cristo. Ncüii cüii jaa, vaa ncüii cüii
nnon na itsijnda' Tyo'ts'on na ntyja 'naan'han' cotejndei
ntyjëëhë na vantyja n'on Cristo. Ya na cont'a na nnda', yajo'
tsoñ'en jaa covaque jaa ntyja 'naan' Tyo'ts'on ndo' m'an na
conan'vi'ngiö ntyjë na vantyja n'on.
\s Cüixco ntyja na cotsam'an
\p
\v 17 Mang'e na nnda', ndö ro jñ'oon na matsjö ndëëho' ndo'
maquënhan' ndëëho' ng'e juu najndei na condui nquii ta Jesús.
Quitsacüentyjee'ho' na itsijonhan' 'o' cha'na nn'an na
tyi'c'onhan nacje 'naan' Tyo'ts'on. Ee joohan ve' jn'aan
jñ'oontiu 'naanhan nchu vaa na cotsam'anhan.
\v 18 Ee juu na covaa' n'onhan nchu vaa na condui Tyo'ts'on,
tsijonhan' juuhan' cha'vijon juu najaan tsue'. Ndo' ng'e na
nnda' nan'xuanhin, jo' jndë sitycyaa'han'hin ntyja 'naan' na
ntsixuan ts'an na vando' ñuaan' juu na tonnon
Tyo'ts'on. Ndö' vaa na coquenonhan ng'e na m'anhan na
que' n'onhan na tonnon jon.
\v 19 Ndo' jnaan' jo', tyi'tyia ngiohan nin ncüii nnon natyia na
nin'quint'ahan. Coninncyatohan na nt'ahan min'cya ro nnon na
its'aa jndyihan' n'onhan na nin'quint'ahan. Min
tyi'quinan'xjen n'onhan, m'anhan na cotquenhan na cha'chen
n'onhan na nin'quint'antyichenhan natyia.
\v 20 Majo' 'o' na conan'jonho' ntyja 'naan' Cristo, chito
nan'min' na tonan'man nn'an ndëëho' na ntsanan'jonho'.
\v 21 Ee 'o' tondye yaho' jñ'oon na mayuu' ntyja 'naan' Jesús, ndo'
jndë tonan'man nn'an ndëëho' jñ'oon ntyja 'naan' jon na
conduihan' jñ'oon na mayuu'.
\v 22 Ee ntyja 'naan' na totsam'anho' na toxen'chen, jndyeho'
jñ'oon na quitji ntcüe'ho' ntyja 'naanhan'. Ee xe na aa
ngacachen na nnda' m'anho', ndi'ndaa'ñ'en nchu vaa na cotsam'anho', 
ee joo nan'ñeen conan'vi'nn'anhan'.
\v 23 Chuhan' na ncyaho' na ntsixco Tyo'ts'on tsoñ'en nchu vaa na m'aan'
n'onho'.
\v 24 Quityquii' na cotsam'anho', chuhan' na nnintyincyoo' na
conduiho' nn'an xco, ts'ian na nquii Tyo'ts'on its'aa jonhan', na
cüityincyoo'han' nchu vaa na its'aa ts'an 'nan na chuhan' ndo' na
vam'aan juu na ñuaan nquii'hin cha'xjen condui nquii jon.
\p
\v 25 Mang'e na nnda', tavinan'neinntyiho' jñ'oon quintu ndëë
nn'an. Xia'ntyi quinan'neinho' jñ'oon na mayuu'. Ee
jaa nn'an na vantyja nn'ön Cristo, ninncüii tmaan' condui jaa
cha'xjen ninncüii tsixuan ts'an min na jndye vaa na
quiñjon'hin.
\p
\v 26 Xe na aa conan'vjeho' ncüii ts'an, taninncyaho' na juuhan'
ngay'oonhan' 'o' na nnan'tjaho' nnon Tyo'ts'on. Vitjachen na ngua
ndo'cüjioon', quint'aho' na quintycuii na conan'vjeho' nn'an.
\v 27 Ee xe na aa mavio na conan'vjeho' ts'an, nninncyaho'
xjen nnon juu yutyia na ntquen juu xjen 'naan' juu 'o'.
\p
\v 28 Minninchen ts'an na toch'uee juu, tanch'ueentyichen juu.
Quits'aa juu ts'ian cha'xjen na chuhan' cha' nninjnda' 'nan na
icanhan'hin, ndo' mantyi cha' nndëë ntejndei juu nn'an yo 'nan na
itsitjahan'hin.
\p
\v 29 Tanan'neinho' jñ'oon tsan'. Ninnquii'chen quinan'neinho'
jñ'oon ya na ntejndeihan' nn'an ntyjantyi na icanhan'hin.
Quint'aho' na nnda' cha' ntyja 'naan'han' ngaquehan na
conan'jonhan yo Cristo.
\v 30 Min'ncüii nnon 'nan tant'aho' na ntsichjoo'han' ts'on nquii
Espíritu Santo. Ee incyaa Tyo'ts'on jon quii' n'onho', cha'
juu xuee ya na quindë ya nndyotsin'man Tyo'ts'on 'o', vaa
na tsi'manhan' na conduiho' cüentaa' jon.
\p
\v 31 Tant'antyiho' na ntji'ho' jñ'oonvi' nacjo nn'an na
ntsi'ndaa'han' ngiohan. Tanan'jmiin'toho' ndëëhan min
tanan'vjeho'hin. Tanc'onho' na ve' c'uaato jndyueho' ndëëhan.
Tanan'neinho' jñ'oon tsan' na itscüejnaan'han'hin. Min
min'ncüii nnon tyi'nan'tëë' n'onho' nn'an.
\v 32 'O' c'onho'
na ya nn'anho' yo nn'an. Ncüii cüiiho' na vantyja n'onho',
c'onho' na nty'ia rohan ngioho'. Ndo' cha'xjen nquii Tyo'ts'on
jndë sit'man ts'on jon 'o' xeng'e Cristo, mantyi quinan't'man
n'onho' joo nan'ñeen.
\c 5
\s Jaa na condui ntsinda Tyo'ts'on, ndö vaa
na ichuhan' na quitsam'an
\p
\v 1 Ng'e na conduiho' ntsinda Tyo'ts'on na vi'ntyjii jonho',
quitsam'anho' cha'xjen na condui nquii jon.
\v 2 Tsoñ'en ntyja 'naan' na cotsam'anho', quinan'vengioho' nn'an
cha'xjen nquii Cristo m'aan jon na vi'ntyjii jon 'o', na
tyincyaa nquiihin na tue' jon ntyja njanhan. Na tyincyaa jon
na tui na nnda', itsijonhan' na nchjii Tyo'ts'on yo jon
cha'vijon ya na conan'cuee' nn'an judíos quitsman cha'
ntyja 'naan' juu ts'ian'ñeen ntsit'man ts'on jon jnanhan.
Juu na nnda' s'aa Cristo, tsixuanhan' cha'vijon cüii jndye quichi na tonnon
Tyo'ts'on.
\p
\v 3 Ng'e na conduiho' nn'an tmaan' cüentaa' Tyo'ts'on, jo'
tyi'jon ninncyaho' na ninc'uaa jñ'oon na ncüiiho' m'aan juu yo
ts'an na ve' ndö' ro. Tant'aho' min'ncüii nnon 'nan na
tyi'ji'ua tsixuanhan' na tonnon Tyo'ts'on, min tyi'nan'cjaa'
n'onho' 'naan' ncüiichen ts'an.
\v 4 Min tyi'quichuhan' na nnan'neinho' ntyja 'naan nan'min'. Min
tyi'nan'xuanho' na nnan'neinho' jñ'oon na jnaan' jndyi
vaahan' oo jñ'oon tsan', min jñ'oon na nninncyaahan'
natyia ngio nn'an na condyehinhan'. Jñ'oonmin' tyi'ya na
ntsinin ts'anhan'. Majo' 'o' quinan'neinho' jñ'oon na
ntsit'maan'han' Tyo'ts'on na yo concyaho' na ya jon.
\v 5 Ee ngio yaho' ncüii ts'an na m'aan ya juu yo ts'an na ve'
ndö' ro, je'quindëë ntsijonhin tyquii' juu na
ico'xen Tyo'ts'on yo Cristo nchu vaa na cotsam'an nn'an. Min joo
nn'an na conan'jonhan yo 'nan na ji vaahan' ntyjii Tyo'ts'on, 
je'quindëë nnan'jonhan yohan', min nn'an na conan'cjaa' n'onhin 
'naan mañoon nn'an. Ee ts'an na its'aa na nnda', conduihin ts'an 
na itsit'maan' juu 'nan, chito nquii Tyo'ts'on.
\v 6 Min'ncüii ts'an tyi'ninncyaho' na ntsivi'nn'an juu 'o'
ntyja 'naan jñ'oonmin', na ngitso juu na tanin, cuaa nquii
na jaa na vantyja nn'ön Cristo na nt'aha nan'min'. Ee
tsojnaan' joohan' na nt'uiivi' Tyo'ts'on joo nn'an na
tyi'nin'quitañguee'hin ntyja 'naan' na ico'xen jon.
\v 7 Mang'e na nnda', min'chjo tyi'nan'jonho' yo
nn'an na cont'ahin joo jnanmin'.
\p
\v 8 Ndyu na toxen'chen, tonan'jonho' yo nan'min' na conduihan'
ntyja 'naan' najaan, majo' naneinhin conduiho' ntyja 'naan' juu
naxuee na condui nquii Jesucristo. Quinan'jonho' ntyja
'naan'han'.
\v 9 Ee ts'an na vam'aan juu ntyja 'naan' jon na
conduihin naxuee, its'aa juu 'nan ya, yo 'nan na chuhan' na
tonnon Tyo'ts'on. 'Nan na its'aa juu yo juu 'nan na ndyii' ts'on
juu, m'aanhan' ntyja 'naan' juu na mayuu'.
\v 10 'O' quinan'chonho' na ncüaa' n'onho' na nt'aho' ncüii cüii nnon 
'nan na nquii Cristo ngavee' ts'on jonhan'.
\v 11 Tanan'jonho' yo joo 'nan na tyi'cüijnt'ue na ve' jn'aanhan'
na nque nn'an na tyi'c'onhan nacje 'naan' Tyo'ts'on
conan'jonhin yohan'. Ndo' chito xia'ntyi jo', mantyi
quinan'quinaanho' joo 'nan tyia'ñeen.
\v 12 Ee itscüejnaan'han' xe na aa nnan'nën ntyja 'naan joo
natyia na ve' nty'iu cont'a nan'ñeen.
\v 13 Ee nquii Cristo condui jon naxuee. Jo' ncüii cüii nnon natyia, 
vi na jndë itsiquinaan jon ntyja nchu vaa na tsixuanhan', covityincyo 
jndyoyu ntyja 'naan'han'.
\v 14 Ee juu naxuee itsiquinaanhan' na ji vaa na tsixuan natyia'ñeen. 
Mang'e jo' vaa jñ'oon na jndui na itsohan':
\q 'U' ts'an na matsitja 'u' nnon Tyo'ts'on,
itsijonhan' 'u' cha'vijon ts'an na itso ndo'
cha'na ts'oo.
\q Ng'e na tsixuan' nan'min', quinaquintyja'.
\q Ndo' nninncyaa Cristo na ncüaa' tson',
cha'vijon na incyaa jon naxuee ntyja na vam'an'.
\m Nnda' itsiquindyi jñ'oon'ñeen.
\p
\v 15 Mang'e jo' nqueho' quitquen yaho' cüenta nchu vaa na
cotsam'anho', tyi'nc'onho' cha'na nn'an na ve' cotsam'antohan.
'O' tyquii' na cotsam'anho', quitsi'manhan' na conduiho' nn'an na
jnda' nquen.
\v 16 Ncüii cüii jon na incyaahan' na nt'aho' 'nan
na chuhan', cüijnt'ue yaho' juuhan', ee joo ndyumin tyia jndyi
'nan na condui. 
\v 17 Ndo' tyi'nc'onho' cha' na nque nn'an na 
nan' cont'ahan. 'O' cjoo' ya ya n'onho' na ncüaa' n'onho' 'nan
na nt'ue ts'on Tyo'ts'on na quint'aho'.
\v 18 'O' tyi'ncüeho'
ntajmin', ee juuhan' vay'oonhan' ts'an na ngitsu ñuaan' juu.
Majo' 'io 'io ncyaho' na juu Espíritu Santo ntquen jon xjen 'o'
na ninvaañ'en quii' n'onho' cha'xjen juu ntajmin' iquenhan' xjen
'naan'han' juu tsanquindyi.
\v 19 Xjen na conan'neinho' yo ntyjeho' na vantyja
n'onhan Cristo, cüijnt'ueho' jñ'oon na chuu' tson salmos. Ndo'
mantyi quitaho' alabanzas na cüit'maan' Cristo ntyja
'naanhan', yo mañoon nnon na cont'aho' na ntyja 'naan'
ndit'maan'hin. Quint'aho'han' yo na xoncüee' n'onho',
\v 20 Nquii Tyo'ts'on na conduihin Tyëëhë, ninquii'chen
quindueho' nnon jon na ncya yahin ntyja 'naan' tsoñ'en yo xuee'
nquii Jesucristo na conduihin na itye'ntjon jon jaa.
\s Nan'min chuhan' na c'oon tsanscu tonnon saa' juu 
ndo' na c'oon tsans'a tonnon scuu' jon
\p
\v 21 Yo na njon ngiö nquii Cristo, jo' quitjue'cjeho' ndëë
ntyjeho' na vantyja n'onhan jon.
\p
\v 22 'O' nanntcu na jndë toncoho', quita'nguee'ho' jñ'oon na
condue nnonho' ndëëho' cha'xjen na cotjue'cjeho' nnon nquii
Jesucristo, nquii jon na conduihin na itye'ntjon jon jaa.
\v 23 Ee nquii tsans'a conduihin xquen jñ'oon ntyja 'naan' scuu'
jon cha'xjen nquii Cristo conduihin xquen jñ'oon ntyja
'naan' nque nn'an na conduihan tmaan' cüentaa' Tyo'ts'on.
Nquii Cristo conduihin na itsin'man jon ñuaan nan'ñeen na
conduihan si'ts'o 'naan' jon.
\v 24 Ndo' cha'xjen jaa nn'an na condui tmaan' cüentaa' Tyo'ts'on m'an
nacje 'naan' Cristo, mannda' chuhan' na nque nanntcu na jndë
tonco, quitjue'cjehan tondëë nnonhan ntyja 'naan tsoñ'en.
\p
\v 25 Cha'xjen nquii Cristo t'oon jon na vi'ntyjii jon jaa nn'an na
condui tmaan' cüentaa' jon, ndo' tyincyaa nquiihin na tue' jon
cha' ndëë ntsin'man jon jaa, mannda' quinan'vengioho' ntcuho'.
\v 26 S'aa Cristo na nnda' cha' ntquen jon na ntju' condui jaa na
tonnon Tyo'ts'on xeng'e juu jñ'oon naya 'naan' jon ndo' yo
na jnt'ë jaa yo ndaa yo ntyja 'naan' xuee' jon.
\v 27 Tue' jon cha' nquëhë na condui tmaan' cüentaa' Tyo'ts'on,
nndëë ncy'oon jon cüenta jaa cha'xjen juu tsans'a ncy'oon
jon cüenta yuscu yo na icoco jon. Ndo' cha'xjen juu
yuscu'ñeen na tëquintyja na nancoo' na tycüi'hin na
min'ncüii nnon 'nan tity'a na itsi'ndaa'han' ndiaa' juu,
ndo' cha'xjen tijnty'ui ya ndiaa' juu, min tavi 'nan
ncüiichen nnon na ntyja 'naan'han' na nts'aahan' na
tyi'nancoo'hin na minntyjee' juu na tongiaa' ts'an na nndui
saa' juu, mannda' vaa itsijonhan' jaa tmaan' cüentaa'
Tyo'ts'on. Ngüentyjë' na tonnon jon na ninvaañ'en
ntyja njanhan cüentaa' jon, na minncüii ta'nan
itsi'ndaa'han' jaa na tonnon jon.
\v 28 Ndo' cha'xjen na vi'ntyjii tsans'a si'ts'o 'naan' nquii
jon, mannda' ro chuhan' na c'oon jon na vi'ntyjii jon scuu' jon.
Juu ts'an na vi'ntyjii scuu', vi'ntyjii nquiihin.
\v 29 Ee ta'nan ts'an na jndoo' jndyi juu yo si'ts'o 'naan'. Chito
jo'. Int'ue juu 'nan na ntquii juu ndo' ivantyjee' ya juu
si'ts'o 'naan' juu. Mannda' vaa its'aa Cristo yo tmaan'
nn'an na vantyja n'onhan jon,
\v 30 Ee jaa na vantyja nn'ön jon condui jaa si'ts'o 'naan' jon,
ndo' ncüii cüii jaa itsijonhan' ntyja njanhan ncüii cüii nnon
na itsiquiñjon'han' jon.
\v 31 Cha'xjen juu jñ'oon' Tyo'ts'on na jndui itsiquindyihan': “Ng'e na
nnda' vaa, juu tsans'a n'ndyii juu tye juu ndyee juu na
nc'oon jon yo scuu' jon, ndo' ve joohan ninncüii si'ts'o
nduihan.”
\v 32 Jñ'oonva' na matsjö, t'man tsi'manhan'. Ndëë nn'an na
tom'an ndyu na toxen'chen, juu jñ'oon'ñeen vanty'iu
tom'aanhan'. Majo' ja mavaa' ts'ön na vacy'oonhan' ntyja
'naan' Cristo yo juu tmaan' nn'an na conduihan cüentaa'
jon.
\v 33 Ng'e na nnda', mantyi 'o' ntyjënnön, ncüii cüiiho'
quinan'vengioho' ntcuho' cha'xjen na conan'vengio nqueho'. Ndo'
mantyi 'o' nanntcu na m'an nnonho', ncüii cüiiho' icanhan' na
quint'aho' na njon s'aho'.
\c 6
\s Ndö vaa icanhan' na c'on nda nn'an na
vantyja n'on
\p
\v 1 'O' yotsca, quita'nguee'ho' 'nan na condue tyeho' yo
ndyeeho', ee tonnon Cristo ya icüji'han' na quint'aho' na nnda'.
\v 2 Ee quii' jñ'oon' Tyo'ts'on na tquen Moisés, vaa jñ'oon na
ico'xenhan' na tco' Tyo'ts'on 'ndyo jon na itsohan': “Juu
tye' yo 'ndyo', cüinjonhan ntyji'.” 
\v 3 Quitsa'han' cha' nninjnda' 'nan na
icanhan' 'u', ndo' cha' tco xeechu' nnon tsonnangueva.”
Juu jñ'oon'ñeen ndö' vaa na itsiquindyihan'.
\p
\v 4 'O' nannon na m'an ndaho', chito ninnquii'chen nt'aho' na
conan'tyia'toho'hin ee xe na aa nt'aho' na nnda', nc'on 
yo'ñeen na vje joo 'o'. Majo' 'o' quinan'queho'hin yo jñ'oon na 
nnan'jnda'han' nquen joo nchu vaa na nnan'jonhin yo Cristo.
\s Jñ'oon na itsiqui'maan'han' nn'an na
cotye'ntjon ndëë patrón
\p
\v 5 'O' nn'an na conduiho' moso ndëë patrón 'naanho', yo na
xoncüii' n'onho' quita'nguee'ho' ts'ian na cot'ua nan'ñeen
ndëëho'. Quint'aho' na njonhin, ndo' cjoo' ya n'onho' na
quint'aho' cha'xjen 'nan na nt'ue n'onhan. Quint'aho'han' na cha'vijon
nnon nquii Cristo na cotye'ntjonho'.
\v 6 Min chito xia'ntyi na
cont'aho' na nnda' ya na cotquenhan cüenta nchu vaa na
cont'aho', cha' ngavee' ngiohan yo 'o'. 'O' quitye'ntjonho'
ndëëhan yo na xoncüee' n'onho' ng'e na conduiho' nn'an na
cotye'ntjontyen nnon nquii Cristo. Na nt'aho' na nnda', mantyi
nt'aho' 'nan na nt'ue ts'on Tyo'ts'on.
\v 7 Joo patrón 'naanho', quitye'ntjonho' ndëëhan yo na
xoncüee' n'onho', cha'vijon na cotye'ntjonho' nnon
nquii Cristo.
\v 8 Ee mangio yaho' na ncüii cüii nnon ts'ian ya na cont'aho',
ndyion ta Jesús 'o' ntyja 'naan'han', tanin min na aa ts'an na m'aan
tyen juu moso ndo' aa ts'an na m'aan juu xjen 'naan' nquii.
\p
\v 9 Ndo' mantyi 'o' na m'an nn'an na cotye'ntjonhan
ndëëho', ninncüii xjen quint'aho' yohan cha'xjen na jndë
tsjö na quint'ahan na tondëëho'. Min tavint'a yaho' na
nnan'ty'ueho'hin na nndueho' jñ'oon vi' ndëëhan. Quiñjontyen
n'onho' na juu Cristo na m'aan jon quiñoon'ndue, xia'ntyi nquii
jon conduihin ty'ooho', nqueho' ndo' mantyi joohan. Min tyi'quits'aa jon
na njon nchjii jon ncüii ts'an, majo' ncüiichenhin xe'quits'aa
jonhan'.
\s Min nt'ö ts'ian na ninjnt'ue jaa na nc'ö
cjoo' juu yutyia
\p
\v 10 'O' ntyjë, ndö jñ'oon na mats'ia na matsjö ndëëho'.
Nquii ta Jesús conduihin na taquintyja najndei jon, jo' c'onho'
najndëho' ntyja 'naan' juuhan'.
\v 11 Incyaa Tyo'ts'on ncüii cüii nnon na icanhan' jaa cha'
nndëë nnan'ty'ui joo 'nan na itsijnda' juu yutyia na
nin'quitsi'ndaa' juu jaa. Cüijnt'ueho'han' cha' nndëë
ngüentyjee'tyenho' quityquii' tsoñ'en na itsijnda' juu na
nin'cju'cjehan' 'o'.
\v 12 Juu tyia' na m'an, chito yo nn'an m'anhan', Juuhan' m'anhan'
nacjoo joo yotyia na coto'xen na vaa najndë na conduihan,
joohan na coto'xenhan nn'an tsonnanguevahin na conduihan' na
jaan. Juu tyia' na cotsam'an m'aanhan' yo joo natyia
na m'an ntjö'ndue.
\v 13 Ng'e na nnda' vaa, cüijnt'ueho' tsoñ'en nt'ö ts'ian tyia'
na incyaa Tyo'ts'on ndëëho', cha' juu xjen na vja yutyia
cjoho' yo ntyje yotyiahin, nndëë nta'ntjonho'hin. Ndo' vi
na jndë tenon tyia' na co'oho' cjohan, nnintyincyoo' na
coventyjee'tyenho'.
\p
\v 14 Cha'xjen ncüii sondaro itsityen juu tsiaa', mantyi 'o'
quintjotyenho' yo jñ'oon na mayuu' 'naan' Tyo'ts'on. Ndo'
cha'xjen juu coton xjo na cüe sondaro ivañoon'han'hin na
tyi'ntquee' juu, mantyi cüijnt'ueho' juu na iquen Tyo'ts'on 'o'
na tajnan nan'xuanho' na cüañoon'han'ho'.
\v 15 Ndo' cha'xjen ncüii sondaro m'aan cje jon na ñjon ntcoon'
jon ng'ee jon, mantyi ninnquii'chen c'oncjeho' na
nnan'quindyiiho' nn'an juu jñ'oon naya ntyja 'naan' Cristo
na incyaahan' na ntjo ya ntyjii ntcüe' Tyo'ts'on yohan.
\v 16 Ndo' vantjo'chen nan'min', cantyjatyen
n'onho' jon ee juuhan' ntsityuii'han' tsoñ'en navi' na iju'
yutyia nacjoho', cha'xjen juu tjan t'man na ñooncjehan' nt'ö
sondaro, itsinduu'han' chon na ntjo nnon ncjo isaa' cha'
tyi'ntjon sondaro'ñeen natë'.
\v 17 Cüijnt'ueho' juu na
itsin'man Tyo'ts'on ñuaanho' na ngüañoon'han' nquenho' yo joo
jñ'oon na m'aan' n'onho'. Ndo' mantyi cüijnt'ueho' juu jñ'oon'
jon na incyaa Espíritu na juuhan' conduihan' xjotë.
\v 18 Tsoñ'en na coquenonho', ncyaho' na nquii
Espíritu ntsi'man jon ndëëho' nin jñ'oon na ngitanho' nnon
Tyo'ts'on. Quindueho' nnon jon 'nan na coquenonho' yo 'nan na
icanhan' 'o'. Ndo' tyi'ntsacüentyjee'ho' na quitanho' na
quitejndei jon tsoñ'en nn'an na conduihan cüentaa' Tyo'ts'on.
\v 19 Ndo' mantyi quitanho' nnon jon ntyja njan na ya ntsixuan
ñuan njan, na ninncya jñ'oon naya 'naan' Tyo'ts'on ndëë
nn'an, juu jñ'oon'ñeen ndyu na toxen'chen, vanty'iuu'
tom'aanhan' ndëë nn'an. Ndo' mantyi quitanho' na ntejndei jon
ja na ya ntsitjön' jñ'oon na mancya ndëëhan.
\v 20 Ndo' mantyi juu xjen na conan'neinho' nnon Tyo'ts'on,
cañjoon' n'onho' ja cha' na min'cya ro xjen na
ntsiquinaanhan' na ntsinën ntyja 'naan' Cristo ndëë
nn'an, nts'ahan' yo na ntsixuan ñuan. Juu jñ'oon'ñeen na
vanty'iuu' tom'aanhan' ndyu na toxen'chen.
\s Jñ'oon na mats'ia na incyaa Pablo
\p
\v 21 Juu ntyjëëhë Tíquico vay'oon jon tsonvahin na m'anho'.
'O' na njon jndyihin ngioho' ndo' mantyi ja. Xoncüee' ts'on jon
quityquii' ts'ian 'naan' ta Jesús. Chen chen ntsiquindyi jon 'o'
tsoñ'en ntyja njan cha' ncüaa' jnda' n'onho' nchu vaa 'nan na
maquenön yo juu na jöm'an.
\v 22 Majuu ts'ianva' na
majñönhin na m'anho', cha' nndëë ncüaa' n'onho' nchu vaa na
coquenö́n, cha' nninncyaahan' na xoncüii' n'onho'.
\p
\v 23 Nquii tyëëhë ta Tyo'ts'on yo Jesucristo na conduihin na
itye'ntjon jon jaa, juu na conduihan na tajñuaan' ts'onhan, 
mac'an ndëëhan na c'oonhan' yo 'o', ndo' mantyi yo na
quinan'vengioho' ntyjeho' na m'anhan ntyja 'naan' Cristo, yo juu
na covantyja n'onho' jon.
\v 24 Juu naya na condui ta Tyo'ts'on,
c'oonhan' yo tsoñ'en nn'an na tyi'quintycüii na conan'vengiohan
nquii Jesucristo na conduihin na itye'ntjon jon jaaha.