\id COL
\h Colosenses
\mt1 Tson Na Scüenon Pablo Ndëë Nn'an
\mt2 Tsjoon Colosas
\c 1
\s Incyaa Pablo ts'on 'naan' jon ndëë nn'an
tsjoon Colosas
\p
\v 1 Ja Pablo mats'a ts'ian na condui tsonvahin. Ng'e na nt'ue ts'on
Tyo'ts'on, jo' na condui ja ts'an na i'ua jon ts'ian nnön na
mancya juu jñ'oon naya 'naan' jon ndëë nn'an. Juu ntyjëëhë 
Timoteo itsijonhin yo juu jñ'oonvahin.
\v 2 Nqueho' na vantyja n'onho' Cristo na conduiho' tmaan'
cüentaa' Tyo'ts'on na m'anho' tsjoon Colosas, ndëë 'o'
matscüenön tsonvahin. Nnon nquii tyëëhë Tyo'ts'on
mac'an na juu naya na condui jon yo nin'juu na conduihin na
tajñuaan' ts'onhin, ncyaa jon na nan'xuanho'han'.
\s Jñ'oon na ican Pablo ntyja 'naan nn'an
na vantyja n'on
\p
\v 3 Nquii Tyo'ts'on conduihin tye Jesucristo ndo' juu jon
conduihin na itye'ntjon jon jaa. Xjen na conan'në́n nnon
Tyo'ts'on, macha'chen xjen coninncyá na yahin ntyja 'naanho'.
\v 4 Cont'á na nnda' ntyjantyi xjen tye' na condyë́ na vantyja
n'onho' Cristo Jesús. Ndo' mantyi na conan'vengioho' tsoñ'en
nn'an na conduihan cüentaa' Tyo'ts'on.
\v 5 Juu na vantyja n'onho'hin, yo juu na conan've'ngioho' nn'an
na conduihan cüentaa' jon, joohan' nan'xuanho'han' xeng'e 
ntyja n'onho' nquii Tyo'ts'on. Juu na vantyja
n'onho' jon vavehan' quiñoon'ndue. Jndë macondyeho' ntyja
'naan'han' xeng'e juu jñ'oon naya 'naan' jon.
\v 6 Juu jñ'oon nayavahin na coninncya nn'an ndëëho', jndë
vjacyahan' ninvaa tsonnangue. Ndo' minyuuchen na ivee'han',
jndye nnon covityincyoo' na ico'yahan' nn'an. Ndo' mantyi
nqueho', xjen na tye' condyeho'han' ata xjen neinhin,
covityincyoo' na jndye nnon its'aahan' quii' nt'anho'
\v 7 Juu naya'ñeen, nquii ntyjëëhë Epafras totsi'man jon
ndëëho' ntyja 'naan'han'. Juu jon vengiö́
jndyihin, conduihin na itye'ntjontyen jon nnon Cristo yo
já. Xoncüee' ts'on jon na its'aa jon ts'ian'ñeen quii'
nt'anho'.
\v 8 Nquii jon jndë siquindyi jon já ntyja 'naanho',
na incyaa Espíritu Santo na conan'vengioho' nn'an.
\p
\v 9 Ndo' ng'e na nnda' vaa jñ'oon na condyë́, xjen na vejndyee
na jndyë́han' ata xjen neinhin, ninnquii'chen conan'në́n nnon
Tyo'ts'on ntyja 'naanho'. Cotán na nquii jon ntsijnda' jon
nquenho' nchu vaa na nt'ue ts'on jon na quitsam'anho' na tonnon
jon, yo na ncüaa' n'onho' nin 'nan chuhan' na quint'aho' ndo' 
nin 'nan na tyi'quichuhan'.
\v 10 Ndö' vaa na cotán cha' ntyja 'naanhan' nndëë
nc'onho' cha'xjen na chuhan' na c'on nn'an na conduihan
cüentaa' Cristo, cha' ngavee' ntyjii jon nchu vaa na
cotsam'anho' ndo' na nnt'aho' jndye nnon naya viochen xjen
na covaqueho' ntyja 'naan' Tyo'ts'on.
\v 11 Ndo' mantyi cotán na ngaqueho' ntyja 'naan' juu najndei na
conduihin na tëquintyja na tsixuanhan', cha' ntyja 'naan'
jo' nndëë nc'onho' na t'man n'onho' tsoñ'en navi' na
coquenonho', min tyi'xe'quityi'ho' cüenta yo 'nan na cont'a
nn'anho'. Ata nninncyaahan' na neinho' juu xjen na
covenonho' joo navi'ñeen.
\v 12 Ndo' na nninncyaho'
na ya nquii tyëëhë Tyo'ts'on. Nquii jon na sijnda' jon na
ngacüja'han' jaa na ncy'ön cüenta juu naya na itsiquindaa' jon
tsoñ'en nn'an na conduihan cüentaa' jon, naijon naxuee na
itye'ntjon Jesucristo.
\v 13 Juu naijon ico'xen nquii yutyia,
jaan jndyihan'. Majo' nquii Tyo'ts'on, jndë siquindyaa jon jaa
na tom'an nacje 'naan'han', ndo' tyii' jon jaa ntyja 'naan'
juu na ityentjon jnda nquii jon na vi'ntyjii jndyi jonhin, na
nnan'jön yo juu na itye'ntjon jon.
\v 14 Ng'e ntyja 'naan' jnda jon, jo' jndë siquindyaa jon jaa
ntyja 'naan' jnan, ndo' jndë sit'man ts'on jon jaa na nnda'
nan'xuan.
\s Cristo taquintyja na t'man conduihin
\p
\v 15 Cristo conduihin na jnduihin nquii Tyo'ts'on na nquii jon
ndiquijnty'ia nn'an jon. Quii' nt'an tsoñ'en na tquen Tyo'ts'on,
nquii Jesús taquintyja na t'man conduihin.
\v 16 Ee ntyja 'naan' jon, jo' tquen Tyo'ts'on tsoñ'en na min
quiñoon'ndue yo nnon tsonnangue, 'nan na covityincyoo' yo
na tyi'covityincyoo'. Mantyi yo ncüii cüii nnon na
cotando' na tonnon Tyo'ts'on na cotoxen, yo mañoon nnon na
conintque na chito conduihan nn'an. Ntyja 'naan' Cristo
tquen Tyo'ts'on tsoñ'en joohan, cha' ntyja 'naanhan
ndit'maan' nquii Cristo.
\v 17 Vitjachen na tquen Tyo'ts'on
tsoñ'en, mancüiixjen m'aan Cristo, ndo' ntyja 'naan' nquii jon,
tsoñ'en na tquen Tyo'ts'on, contjo na m'anhan' cha'xjen na tquen
jon.
\v 18 Ndëë jaa tmaan' nn'an na vantyja nn'ön, Cristo conduihin tsö'xquenhan'. 
Ntyja 'naan' nquii jon tye' tsoñ'en.
Manquii jon na tyincyaa Tyo'ts'on na tando' xco jon na vejndyee
quii' nt'an tsoñ'en nn'an na jndë tjë. S'aa Tyo'ts'on na nnda'
cha' quii' nt'an tsoñ'en na m'an, nc'oon Cristo na
tëquintyja na t'man conduihin.
\v 19 Ee nquii Tyo'ts'on tavee' ntyjii jon na tsoñ'en na
condui nquii jon, mantyi juu jnda jon Cristo, cüejon
quinduihin.
\v 20 Ndo' ntyja 'naan' na tue' jon na jndui' neoon' jon na jñon
nn'anhin tsonjn'aan, jo' na sijnda' Tyo'ts'on na ntyja
'naan' jo' ntjo ya ntcüe' nchjii jon yo tsoñ'en. Its'aa
jon na nnda', yo manquëntyë na m'an tsonnanguevahin, ndo'
majo'ntyi yo nque joo na m'an quiñoon'ndue.
\p
\v 21 Xjen na toxen'chen tatom'anho' ntyja 'naan' Tyo'ts'on. Juu
xjen'ñeen tonduiho' nn'an na v'ii' n'onho'hin nchu vaa na
tonan'tiuho', ndo' yo ntyja 'naan natyia na tont'aho'.
\v 22 Majo' naneinhin ng'e na tquiihan' si'ts'o 'naan' Cristo na
tue' jon, jo' jndë ntjo nchjii Tyo'ts'on yoho'. Tyincyaa
jon na tennon Cristo na nnda', cha' nndëë ntquen jon
'o' na ñuan nquii' 'o' na tonnon jon na min'ncüii jnanho',
na ta'nan ts'an na nndëë ngitso na vaa ncüii nnon ntyja
'naanho' na nt'uiivi'han' 'o'.
\v 23 Ndo' na nnda', icanhan' na ninvito cantyja n'onho' Cristo,
ndo' na quintjotyenho' ntyja 'naan' juuhan'. Min
tyi'nan'vee' n'onho' yo juu jñ'oon naya na condyeho' na
incyaahan' na t'man qui n'onho' Tyo'ts'on na ntsin'man jon
ñuaanho'. Maninjuu jñ'oon naya na jndë macondyeho' na
coninncya nn'anhan' ndëë nn'an tsonnangue. Ndo' mantyi ja
Pablo, i'ua Tyo'ts'on ts'ian nnön na matye'ntjön nnon jon
na mancya jñ'oon'ñeen ndëë nn'an.
\s Itye'ntjon Pablo ndëë nn'an tmaan'
cüentaa' Tyo'ts'on
\p
\v 24 M'an na nën quityquii' joo navi' na maquenön ntyja
'naanho'. Ng'e na nnda' vaa na maquenön yo si'ts'o njan,
itsiquindëhan' joo navi' na iquenon Cristo ntyja 'naan navi'
na coquenon nn'an na conduihan tmaan' cüentaa' jon.
\v 25 Nquii
Tyo'ts'on i'ua jon ts'ian nnön na condui ja ts'an na
matye'ntjön ndëë nn'an na conduihan tmaan' cüentaa' jon. Its'aa
jon na nnda' cha' juu jñ'oon' jon, quindë ya ndyeho'han', ndo' 
na ntejndeihan' 'o'.
\v 26 Juu jñ'oonva, nn'an
na tom'an ndyu na toxen'chen, tyí'quindyehan juuhan', majo'
naneinhin jndë itsi'man jndyoyu Tyo'ts'onhan' ndëë tsoñ'en
nn'an na iquen jon na conduihan cüentaa' jon.
\v 27 Juu
jñ'oon'ñeen, nquii jon jndë sijnda' jon na ntsi'man jonhan'
ndëë tsoñ'en nn'an na chito conduihan nn'an judíos. Juu
jñ'oonva na tyí'condye nn'anhan', taquintyja njon jndyi
conduihan'. Ndö vaa na itsiquindyihan', nquii Cristo m'aan jon
quii' n'onho'. Juuhan' incyaahan' na t'man qui n'onho' na
nnan'jonho' yo Tyo'ts'on naijon na tëquintyja na t'man
conduihin.
\p
\v 28 Mang'e jo', min'cya ro naijon na cotsá, coninncyá jñ'oon
ntyja 'naan' Cristo. Yo na jnda' nquë́n conan'qui'mán' nn'an na
cantyja n'onhan jon ndo' mantyi yo na conan'mán ndëëhan nin 'nan
itsiquindyihan' ntyja 'naan' jon. Cont'á na nnda' cha' ncüii
cüiihan ntquenhan'hin na quindë conduihan na tonnon Tyo'ts'on
ntyja 'naan' Cristo.
\v 29 Ndo' ng'e ntyja 'naan'han', jo'
matsichön yantyë yo ntyja 'naan' juu najndei na taquintyja na
condui Cristo na incyaa jon na matsixuan jahan'.
Cüityincyoo'ntyichenhan' yo ntyja njan.
\c 2
\s M'aan' jndyi ts'on Pablo ntyja 'naan
nn'an Colosas
\p
\v 1 'O' ntyjë na vantyja n'onho' Cristo, nt'ue ts'ön na cüaa'
n'onho' na yo na ninvaa najndö, maquen yantyi ja ntyja 'naanho',
ndo' mantyi ntyja 'naan nque ntyjëëhë na m'anhan tsjoon
Laodicea. Ndo' majo'ntyi ntyja 'naan tsoñ'en nn'an na vantyja
n'on Cristo min na tyi'quitajn'aanhan ja.
\v 2 Mats'a na nnda' cha' quitsay'onhan na jndëhan ndo' na
quinan'vengiontyichenhan ntyjehan na vantyja n'on Cristo.
Mats'ahan' cha' ngüentyja na nan'xuanhan tsoñ'en nnon na
ntquenhan'hin na cha'vijon na tyahin ntyja 'naan' Cristo, na
quindë ya ncüaa' n'onhan ntyja 'naan' juu jñ'oon na
tacotsi'man Tyo'ts'onhan' ndëë nn'an ndyu na toxen'chen.
Juuhan' itsiquindyihan' na nquii Cristo m'aan jon quii'
n'onho'.
\v 3 Ntyja 'naan' nquii jon, tsoñ'en na njon jndyi conduihan' na
jnda' xquen Tyo'ts'on yo juu na ivaa' ts'on jon, vanty'iuu'
m'anhan'.
\v 4 Matsjö na nnda' ndëëho' cha' joo
jñ'oon na conan'nchu' nn'an na coninncyahan ndëëho',
tyi'nan'vi'nn'anhan' 'o', tanin min na aa its'aahan' ngioho' na
njon jndyi nan'xuan joo jñ'oon'ñeen.
\v 5 Ee min na tyi'c'oon ja quii' nt'anho', nndëë ntji'ho'
cüenta na cha'vijon na m'an yoho'. Ndo' incyaahan' na nën
rö na maquën cüenta na nchu' vja 'nan na cont'aho' ntyja
'naan' Cristo, ndo' na cotsanan'chonho' na vantyja
n'onho'hin.
\s Ng'e na vantyja nn'ön, jo' juu na cotsam'an
covixcohan'
\p
\v 6 Ndo' cha'xjen na ty'onho' cüenta Cristo Jesús na
itye'ntjon jon 'o', ninvito quitsam'anho' na conan'jonho' yohin.
\v 7 Quitsam'antyenho' ntyja 'naan' jon, cha'xjen na tyen too'
nch'ioo' ts'oon quii' tyuaa. Ndo' juu na vantyja n'onho'hin,
ncyaho' na ngaqueho' ntyja 'naan' jon cha'xjen jñ'oon na
totsi'man Epafras ndëëho'. Ndo' na ninnquii'chen
quinan't'maan'ho' Tyo'ts'on na ncya ya jon ntyja 'naan' tsoñ'en.
\p
\v 8 Ndo' quint'aho' cüenta na tanin ts'an ngachu juuho' na
cha'vijon ts'an na m'aan navi' yo jñ'oon na incyaa juu. Ee
nin'quinan'vi'nn'an nan'ñeen 'o' yo jñ'oon na cotji'han cüenta
na juuhan' ve' jn'aanhan'. Ee juu jñ'oon na coninncyahin, x'eehan' 
na m'aan' n'on nn'an nchu vaa na icanhan' na quint'ahan cha' ntjo
ya ntyjii Tyo'ts'on yohan, majo' juu jñ'oon'ñeen vat'io vjahan',
chito cha'xjen juu jñ'oon ntyja 'naan' Cristo.
\p
\v 9 Ee nquii Tyo'ts'on, tsoñ'en na conduihin, mantyi nquii
Cristo quindë ya condui jonhan' xjen na tom'aan jon tsonnangue
na ts'anhin.
\v 10 Ndo' juu na quindë na condui Cristo, nquii Tyo'ts'on incyaa jon 
na nan'xuanho'han'. Ee nquii Cristo tëquintyja na
t'man conduihin tondëë tsoñ'en na conintque quiñoon'ndue yo
mañoon nnon na cotoxen, majo' chito conduihan ntyja 'naan' tsonnanguevahin.
\v 11 Ntyja 'naan' jon jndë tui yoho' ncüii nnon na itsijonhan' juuhan'
cha'vijon juu ts'ian na cont'a nn'an judíos yo yonon'ndaa ndahin.
Juu natyia na toquenhan' xjen 'naan'han' 'o' xjen na
tyí'covantyja n'onho' Cristo, itsijonhan' ntyja
'naan'han' cha'vijon na jndë jnanhan'. Xia'ntyi nquii Cristo
its'aa jon ts'ian'ñeen quii' n'onho'.
\v 12 Juu xjen na
jnt'ëho' yo xuee' jon, sijonhan' 'o' cha'vijon nt'oo,
tanty'iuho' yohin. Ndo' yo najndei na condui nquii Tyo'ts'on
na tyincyaa jon na tando' xco Cristo, mantyi incyaa jon na
cotando' xcoho' yo Cristo ng'e na vantyja n'onho'hin.
\v 13 Na
toxen'chen tonduiho' nt'oo ng'e juu jnan na tonan'xuanho'. Xjen'ñeen
juu 'nan na toquioo' jndyi n'onho' na tont'aho' jnan, cha'vijon
tacotyjeho'han'. Majuu xjen'ñeen tyincyaa Tyo'ts'on na cota'ndo'ho' 
xeng'e Cristo, ndo' sit'man ts'on jonho' tsoñ'en jnanho'.
\v 14 Juu ntji 'naan' Tyo'ts'on na toco'xenhan' jaa, yo
joo jñ'oon na tonan'jnda'han' nin 'nan na quint'aha, nquii
Cristo sityuii' jonhan'. Joohan' jndë tyii' jon co'han' nnon tsonjn'aan.
\v 15 Ndo' tsoñ'en na tonditque na toco'xenhan' na conan'tja
jaa, sityuii' jon najndë na tonan'xuanhan'. Ndo' ndëë tsoñ'en
na tquen Tyo'ts'on, si'man tyincyo jon na nquii jon tantjon
jonhan' xjen na tue' jon nnon tsonjn'aan.
\s Quijnt'uë yantyë jaa na ncy'ön cüenta tsoñ'en
na min na m'aan Cristo
\p
\v 16 Mang'e na s'aa Cristo na nnda', tyi'nan'jñ'oon'ho' joo jñ'oon na 
ngitso ts'an ndëëho' na conan'tjaho' yo 'nan na cocüa'ho' yo 
'nan na coveho'. Min tyi'ntyi'ho' cüenta ya na conduehan na 
conan'tjaho' tsojnaan' na tyi'cont'aho' na njon ncüii xuee na
condue nn'an judíos na t'man tsixuanhan', oo ya na covee' chi'
jnt'a, oo xuee na cota'jndyee nan'ñeen.
\v 17 Ee tsoñ'en
jñ'oonmin', ve' cha'vijon ncüan'han', chito 'nan nquii'han'. Joo
jñ'oon'ñeen tonan'manhan' 'nan na nguaa vi na jndë tyjee'
Cristo. Majo' juu 'nan na mayuu' na conan'man jñ'oon'ñeen,
itsiquindëhan' joohan' ntyja 'naan' nquii Cristo.
\v 18 Ndo'
m'an nn'an na cont'a ya na conduihan nn'an na nty'ia jndyi na
conan't'maan'han ángeles. Taninncyaho' na ngitë' nan'ñeen 'o'
ntyja 'naan' juu naya na nan'xuanho' ng'e na vantyja n'onho'
Cristo. Nn'an na nnda' vaa nan'xuan, jndye jñ'oon conan'neinhan
ntyja 'naan' jñ'oon na jndë jnty'iahan quii' tsantsjon, ndo' ntyja
'naan'han' conan'quinjon nquehan.
\v 19 Ndo' na nnda' xjen
nn'anhin, jndë t'ioo'hin ntyja 'naan' nquii Cristo na conduihin
tsö'xquen na co'xen jon jaa. Ntyja 'naan' nquii jon, nquë na condui
si'ts'o 'naan' jon, tsoñ'en jaa na quiñjon' ntyja 'naan' jon,
covaque jaa cha'xjen nquii Tyo'ts'on incyaa jon.
\p
\v 20 Ntyja 'naan' na tue' Cristo, mantyi itsijonhan' ntyja 'naanho' cha'vijon 
na jndë tjëho'. Mang'e na nnda', joo jñ'oon na cotji' nan'ñeen
cüenta na cotoxenhan' na nin 'nan na quint'aha cha' ntsin'man
Tyo'ts'on ñuan njanhan, conduiho' nt'oo ntyja 'naan joo jñ'oon'ñeen. 
Jo' ndö vaa jñ'oon na mavax'ë ndëëho': ¿Ndu na cotsam'anho' na
cha'vijon ninvaa nan'xuanho' ntyja 'naan' tsonnangue? Ndo' ¿Ndu
na ninvaa na conan'veho' jñ'oon na condue nan'ñeen?
\v 21 Cha'na conduehan: “Tyi'cüanaan na nt'ui' 'nanva'. Nan'min
tyi'cüanaan na ntqui'han' ee t'man xuee. Min tyi'ninncyu'
'nanvahin ee ntsiv'ii Tyo'ts'on.” Joo jñ'oonmin' jñ'oon na njon
jndyi ngio nan'ñeen.
\v 22 Ee joo 'nan na icüa' ts'an ndo' na
i'u juuhan', contycüiihan' na covijnt'ue ts'anhan'. Majo'
jñ'oonmin' na cotquenhin na ico'xenhan', ve' jñ'oon na cotquen
nquehinhan' na conan'manhin joohan' ndëë nn'an.
\v 23 Its'aahan' ntyjii ts'an na jnda' jndyi nquen nan'ñeen na nnda'
vaa jñ'oon na cotquenhan na cotoxenhan'. Ee cojoo' n'onhan yo 'nan 
na conan't'maan'han na conan'quindëhan jñ'oon na cotquenhan.
Cont'a nquehan na ndyia' jndyi n'onhan ndo' jaa' m'aanhan' na
cotquen nquehan xjen si'ts'o 'naanhan ntyja nchu vaa na cotsam'anhan.
Majo' jñ'oon'ñeen min'chjo tyi'quitejndeihan' ts'an na ntquen
juu xjen si'ts'o 'naan' juu na juuhan' nin'quits'aahan' 'nan na nt'ue
ts'onhan'.
\c 3
\s Jñ'oon na cotoxenhan' cha' nc'ön na ñuan
nquii' jaa tonnon Tyo'ts'on
\p
\v 1 'O' conan'jonho' ntyja 'naan' na tyincyaa Tyo'ts'on na tando' xco
Cristo. Quiñoon'ndue naijon vequityen Cristo silla na manin'
ts'iaan' tontyjaya ngiaa' Tyo'ts'on, jndye nnon min na condui 
jon na ntejndeihan' 'o'. Jo' quijnt'ue yantyiho' tsoñ'en
nnon na itsijnda' jon ntyja 'naanho'.
\v 2 Ninvito quindyi' n'onho' ntyja
'naan joo naya na m'anhan' naijon m'aan nquii jon. Tyi'ntyi'ho'
cüenta 'nan na coquenonho' nnon tsonnanguevahin.
\v 3 Ee ng'e na
tue' Cristo, nein nan'xuanho' cha'vijon nt'oo tondëë 'nan na
itsixuan tsonnangue. Ndo' ng'e na conan'jonho' yo Cristo, juu
na cotsam'anho' na tonnon Tyo'ts'on, vanty'iuu'
m'anhan' tondëë nn'an tsonnangue.
\v 4 Nquii Cristo conduihin
na cotando' ñuan 'naanho'. Juu xjen na nndyo nnda' jon,
ndo' mantyi tojnaan' nc'onho' yohin naijon na taquintyja na t'man
conduihin.
\s Juu na totsam'anho' tejndyohan'
yo na cotant'ö xcö
\p
\v 5 Yajo' tsoñ'en natyia na nt'ue jndyi n'on nn'an tsonnangue,
quitji'ho' cüenta na nan'xuanhan' nt'oo ntyja 'naanho'. Cha'na
juu 'nan tyia na nin'c'oon ya ts'an yo ncüiichen ts'an na ve' ndö'
ro, ndo' na iquen ts'an na itsitiu ya juu 'nan tyia na
ninquits'aa jndyi juu yo ncüiichen ts'an, yo juu 'nan tyia na
incyaatohin yo 'nan na nt'ue jndyi ts'on si'ts'o 'naan' juu,
tyi'nin'quen nquiihin xjen ntyja 'naan'han', yo na itscjaa' ts'on
juu 'naan' ts'an, ee juu ts'an na nnda' vaa na itsitjahin, jnaan'
juu cüejon tsixuanhan' cha'xjen jnaan' ts'an na itsit'maan' juu
'nan na jnan'ya nn'an na chito Tyo'ts'onhan'.
\v 6 Joo 'nan tyiamin'
jndë tso Tyo'ts'on na tyi'nt'a nn'anhan'. Majo' jnaan' na cont'a
yahin na cont'ahinhan', jo' nt'uii matyen jon nque nn'an na
tyi'cota'nguee'hin na tonnon jon.
\v 7 Mantyi 'o' na toxen'chen
cüejon totsantyjaho' ntyja 'naan joo jnan'ñeen cha'xjen cont'a
mañoon nn'an.
\v 8 Majo' naneinhin ijndei'han' na
quitsacüentyjee'ho' na cont'aho' nan'min. Nein tyi'nan'vje
matyenho' nn'an, min tyi'nan'vjeho'hin na ninjonto. Min
tyi'nan'tiuho' na nt'avi'ho' nn'an. Min tyi'nan'cüejnaan'ho'hin.
Min tyi'nan'neinho' jñ'oon tsan' cjoo' ncüiichen ts'an.
\v 9 Tavi nnan'neinho' quintu ndëë ntyjeho'. Ee joo natyia na
tonan'jonho' yohan vitjachen na ngantyja n'onho' Cristo, jndë
siquindyaa Tyo'ts'on 'o' ntyja 'naanhan'.
\v 10 Ndo' ncyaho' na nquii Cristo ntsixco jon tsoñ'en nchu vaa na
cotsam'anho'. Juuhan' ninvito quindixcohan' cha'
ncüaa'ntyichen n'onho' nchu vaa na chuhan' na ntsam'anho'
cha'xjen na nt'ue ts'on nquii Tyo'ts'on.
\v 11 Ntyja 'naan' juu ts'ian xco na its'aa jon, tanin min na aa
condui ts'an ts'an judío oo min na aa conduihin ts'an na mañoon
tsjan. Na m'aan ts'an ntyja 'naan' Cristo, tanin min na aa jndë
tui yo si'ts'o 'naan' juu cha'xjen na cont'a nn'an judíos yo
yonon'ndaa ndahin, ndo' tanin min na aa tyi'conduihan'. Tanin min na aa
conduihin ts'an na jnda' jndyi xquen, oo min na tyi'jnda' xquen
juu. Tanin min na aa conduihin ts'an na itye'ntjonhin nnon patrón 'nan' 
juu oo aa m'aan juu xjen 'naan' nquii. Na m'aan Cristo, xia'ntyi juuhan' 
taquintyja njon conduihan', ndo' juu jon m'aan jon quii' n'onho'.
\p
\v 12 Ng'e na icüji Tyo'ts'on 'o' na conduiho' nn'an 'naan'
jon, na iquen jon 'o' na ñuan nquii' conduiho' ndo' na vi' 
ntyjii jndyi jon 'o', jo' c'onho' na nty'ia ro nn'an
ngioho', ndo' quitejndeiho'hin. Tyi'nan'ntsaho' na njonchen
conduiho', chichen mañoon nn'an. Quinan'ndyia' n'onho'
ndëë nn'an. Nque nn'an na conan'cüejnaan'han 'o',
tyi'nan'tëë' n'onho'hin. Ndo' min tyi'ninncyaho' na
ntsi'ndaa'han' ngioho' ya na conan'vje nn'anho'.
\v 13 Nque ntyjeho' na mantyi vantyja n'onhan Cristo,
tyi'ndyioon' n'onho' ya na conan'tjahan ndëëho'. Ndo'
quinan't'man n'onho'hin ya na vaa ncüii nnon na tyi'quichuhan'
na jnt'ahin yo 'o'. Ndo' cha'xjen nquii Cristo Jesús sit'man
ts'on jonho', mannda' ro quinan't'man n'onho' nan'ñeen.
\v 14 Ndo' ndö jñ'oon na njonntyichen quii' nt'an tsoñ'en
jñ'oonmin', quinan'vengioho' ntyjeho' na vantyja n'on Cristo
ee juu na conan'vengioho'hin itsiquindëhan' tsoñ'en
jñ'oonmin' na tonnon Tyo'ts'on.
\v 15 Nquii Cristo condui jon na
tajñuaan' ts'onhin. Ncyaho' na juuhan' co'xenhan' tsoñ'en ntyja
na m'aan' n'onho'. Ee ng'e na nnda' tsixuan jon, jo' tqueen' jon
'o' na conduiho' na ninncüii tmaan' cüentaa' nquii jon, ndo' nt'ue
ts'on jon na quitsam'anho' na tajñuaan' ts'onho' yo ntyjeho'
nn'an na conduihan cüentaa' jon. Ndo' ninvito ncyaho' na yahin.
\p
\v 16 Quint'aho' na juu jñ'oon na tyincyaa Cristo, quintjo
tyenhan' quii' n'onho' yo tsoñ'en na taquintyja na njon
tsixuanhan'. Quint'aho' na nnda' viochen xjen na conan'manho'
jñ'oon ntyja 'naan' jon ndëë nn'an na conduihan cüentaa' jon
ndo' yo na jnda' nquenho' na conan'qui'maan'ho'hin nchu vaa na
ngonan'jonhan yo jon. Quint'aho'han' viochen xjen na cotaho'
salmos yo alabanzas na njon jndyi ngioho' Tyo'ts'on, ndo' yo mañoon
nnon jñ'oon na conan't'maan'ho'hin. Ndo' na concyaho' na ncya ya
jon ntyja 'naan'han'.
\v 17 Ndo' tsoñ'en na cont'aho', min xe na
aa jñ'oon na conan'neinho' oo aa ncüii nnon 'nan na cont'aho',
tsoñ'enhan' quint'aho'han' na concyaho' naya nquii Tyëëhë
Tyo'ts'on ntyja 'naan' jon.
\s Ng'e na condui xco jaa, icanhan' na
quinan'vëhë jñ'oonmin
\p
\v 18 'O' nanntcu na jndë toncoho', quinan'quindëho' jñ'oon na
condue s'aho' ndëëho', ee na tonnon nquii jon na itye'ntjon jon
jaa, ya icüji'han' na quint'aho' na nnda'.
\v 19 Ndo' mantyi 'o'
nannon na m'an ntcuho', quinan'vengioho'hin. Tant'aho' na ve'
vat'io na m'anho' yo joohan.
\p
\v 20 'O' yotsca, nque nn'an na ndahin 'o', quita'nguee'ho'
tsoñ'en nnon 'nan na conduehan ndëëho', ee nquii Tyo'ts'on cavee'
ts'on jon na quint'aho'han'.
\v 21 Ndo' mantyi 'o' nannon na m'an
ndaho', tyi'nt'aho' na ninnquii'chen condueho' ndëë yo'ñeen na
tyi'cüijnt'ue 'nan na cont'a joo, ee xe na aa cont'aho' na
nnda', nts'aahan' na taje'quinan'chonhan na nt'ahan 'nan na
cavee' n'onho' yohan.
\p
\v 22 Ndo' 'o' na conduiho' nn'an na cotye'ntjonho' ndëë
patrón 'naanho', tsoñ'en na condue nan'ñeen ndëëho',
quinan'quindëho'han'. M'an nn'an na xia'ntyi xjen na cotquen
patrón cüenta, jo' cota'nguee'han ts'ian na cot'ua
nan'ñeen ndëëhan cha' ngavee' n'on nan'ñeen yohan. Majo' 'o'
tyi'nt'aho' na nnda'. 'O', ng'e na njon jndyi Cristo ngioho', yo
mancha'chen n'onho' quita'nguee'ho' ts'ian na cot'uahan ndëëho'.
\v 23 Min'cya ro nnon 'nan na cont'aho',
quint'aho'han' yo na mancha'chen n'onho'. Quint'aho'han' na
cotji'ho' cüenta na nnon nquii ta Jesús cotye'ntjonho', chito
xia'ntyi ndëë nn'an.
\v 24 Ee mangioho' na nquii Jesucristo
ntsiquindaa' jonho' ncüii na njon jndyihan'. Manquiintyi jon na
conduihin na i'ua jon ts'ian ndëëho', nnon jon cotye'ntjonho'.
\v 25 Majo' mincya ro ts'an na its'aa juu 'nan natyia, ndyion
Tyo'ts'onhin ntyja 'naan'han' ee nincüajon ntco'xen jon tsoñ'en
jaa, chito ve' jnda' ro ts'an na vay'oon jon jñ'oon yohin, majo'
yo ncüiichen ts'an tyi'cuee' ts'on jon. 
\c 4
\p
\v 1 Ndo' mantyi 'o' na m'an nn'an na cotye'ntjonhan ndëëho',
tyi'nan'tjaho' ndëë nan'ñeen, quint'aho' yohan cha'xjen na
chuhan' na tonnon Tyo'ts'on. Cañjoon' n'onho' na joo 'nan na
cont'aho' na mantyi nninncyaho' cüenta nnon nquii jon na
conduihin ty'ööhö na m'aan jon quiñoon'ndue.
\s Jñ'oon na mats'ia na itsiqui'maan' Pablo joohan
\p
\v 2 Ninnquii'chen quinan'neinho' nnon Tyo'ts'on,
tyi'ndintyquenho' ntyja 'naan'han'. C'oon' ya n'onho' na
cont'aho' na nnda' ndo' ninvito ncyaho' na ya jon.
\v 3 Ndo' mantyi nquë́, quitanho' nnon jon ntyja nján na
ntsiquinaan jon na nninncyá jñ'oon naya 'naan' jon ndëë
nn'an. Juu jñ'oon'ñeen ndyu na toxen'chen, sijnda'
Tyo'ts'onhan' na ntsin'man jon ñuaan nn'an xeng'e Cristo,
majo' naneinhin itsi'man jndyoyu jonhan' ndëë nn'an. Ee
tsojnaan' na tsixuan ts'ianva, jo' na nty'i ja vancjo
ntjoohin.
\v 4 Quitanho' nnon
jon na ntejndei jon ja na ntsinën jñ'oon naya'ñeen cha'xjen na
chuhan' na quits'a cha' ngovaa' n'on nn'anhan'.
\p
\v 5 C'onho' na jnda' nquenho' na cotsam'anho' quii' nt'an nn'an
na tyi'covantyja n'onhan Cristo, tyi'nts'aahan' na ncüii nnon
ntyja 'naanho' ntscu'han' na ngantyja n'onhan jon. Ndo'
cüijnt'ueho' ncüii cüii jon na incyaa Tyo'ts'on na vanaan na
nnan'neinho' ndëëhan ntyja 'naan' na vantyja n'onho' Cristo.
\v 6 Ya na covatjonho' yo nan'ñeen, ninnquii'chen quinan'neinho'
ndëëhan jñ'oon na ntsi'manhan' na m'anho' na neinho' na
conduiho' ntyja 'naan' Cristo. Ya na nt'aho' na nnda',
ntsijnda'han' nquenho' nin jñ'oon na nnan'ntcüe'ho'
ndëëhan xjen na cota'xee'han ndëëho' ntyja 'naan' na vantyja
n'onho' jon.
\s Incyaa Pablo ts'on 'naan' jon ndëëhan
\p
\v 7 Juu ntyjëëhë Tíquico ntsiquindyi jon 'o' nchu vaa na
maquenön. Vi'ntyji jndyi jahin. Yo mancha'chen ts'on jon na
itejndei jon ja na itye'ntjon jon nnon ta Jesús.
\v 8 Mang'e na
nnda' vaa, ma'ua ja ts'ian nnon jon na chi ncja nnda' jon na
m'anho' cha' ncüaa' jnda' n'onho' nchu vaa na jöm'an, ndo' 
yo joo jñ'oon na ntsiquindyi jon 'o' nninncyaahan' na
jndëho'.
\v 9 Mantyi yo juu jon vja Onésimo. Juu juu ncüii ts'an tsjoonho'. 
Vi'nchji jndyihin ndo' yo mancha'chen ts'on juu na vantyja ts'on 
juu ta Jesús. Chen chen nnan'neinhan ndëëho' tsoñ'en na 
maquenön ntjoohin tsjoon Roma.
\p
\v 10 Aristarco m'aan jon navi' vancjo ntjoohin yo ja. Incyaa jon
ts'on 'naan' jon ndëëho'. Ndo' mantyi juu Marcos, ts'an
chuu'hin yo Bernabé. Jndë jndyeho' jñ'oon ntyja 'naan' 
Marcos xe na aa nguee' jon na m'anho', cy'onho' cüentahin yo na
njon jndyihin ngioho'.
\v 11 Ndo' mantyi juu Jesús, tsan na xuee' juu vja ve Justo, incyaa juu
ts'on 'naan' juu ndëëho'. Quii' nt'an nn'an judíos na
covantyja n'onhan Cristo, xia'ntyi ndye nanmin' conan'jonhan
yo ja na coninncyá jñ'oon naya ntyja 'naan' nchu vaa na itye'ntjon
Tyo'ts'on nn'an juu na cotsam'aanhan. Ntyja 'naan joo
nan'ñeen t'man vaa na itsinjoon' jon ja quityquii' 'nan na
maquenön.
\v 12 Mantyi ncüii nqueho', juu Epafras, incyaa jon ts'on 'naan'
jon ndëëho'. Conduihin ts'an na itye'ntjon juu nnon Cristo
Jesús. Iquen yantyihin na ican juu nnon Tyo'ts'on na ncyaa jon
na ngaqueho' tonnon jon cha'xjen na nt'ue ts'on jon, ndo' mantyi yo
na covaa' ya n'onho' na quindë ya nan'xuanho' ntyja 'naan' jon.
\v 13 Macüji' jndyoyu ja ntyja 'naan' juu na ijoo' jndyi ts'on juu
ts'ian na its'aa juu ntyja 'naan nqueho' na m'anho' Colosas ndo'
yo nque ntyjëëhë na vantyja n'on na m'anhan tsjoon Laodicea
yo tsjoon Hierápolis.
\v 14 Nquii Lucas, tsan na incyaa nasi
nn'an, incyaa jon ts'on 'naan' jon ndëëho'. Vi' nchji jndyi
jahin. Ndo' mantyi juu Demas incyaa jon ts'on 'naan' jon
ndëëho'.
\p
\v 15 Ncyaho' ts'on njan ndëë nque ntyjëëhë na vantyja
n'onhan Cristo na m'anhan tsjoon Laodicea, ndo' mantyi nnon juu
Ninfa yo nn'an na conduihan tmaan' cüentaa' Tyo'ts'on na
covatjonhan vaa' tsanscu'ñeen na conan't'maan'han Tyo'ts'on.
\v 16 Ndo' vi na jndë jnan'jn'aanho' tsonva, yajo'
quinan'cüenonho'han' na m'an nn'an na conduihan tmaan' cüentaa'
Tyo'ts'on na m'anhin tsjoon Laodicea, na quinan'jn'aan
nan'ñeen juuhan'. Ndo' mantyi juu tson na matscüenön
ndëëhan, quinan'jn'aanho'han'.
\v 17 Ndo' nnon nquii Arquipo, quindueho' na matsjö quenhin na 
quitsiquindë jon ts'ian na i'ua ta Jesús nnon jon.
\p
\v 18 Maja Pablo macüji jñ'oonva na mancya ts'on njan
ndëëho'. Cañjoon' ya n'onho' na tyen m'an ja vancjo ntjoohin.
Nquii Tyo'ts'on quityio jon jn'aanho'.