\id 1TH
\h 1 Tesalonicenses
\mt1 Tson Na Vejndyee Na Scüenon Pablo Ndëë
\mt2 Nn'an Tsjoon Tesalónica
\c 1
\s Incyaa Pablo ts'on 'naan' jon ndëëhan
\p
\v 1 Maja Pablo matscüenön tsonvahin ndëë 'o' na m'anho'
tsjoon Tesalónica na conduiho' tmaan' nn'an na vantyja n'onho'
Jesucristo. Juu Silvano yo Timoteo conan'jonhan na conduihan'.
Coninncyá ts'on nján ndëë 'o' na conduiho' cüentaa' tyëëhë
Tyo'ts'on yo nquii Jesús na conduihin na itye'ntjon jon jaa. Juu
naya na conduihan yo nin'juu na tajñuaan'
ts'onhin, cotán ndëëhan na cy'onho' cüenta joohan'. 
\s Ncya ya Tyo'ts'on ng'e nn'an Tesalónica
vantyja n'onhan Jesucristo
\p
\v 2 Tsoñ'enho', 'io 'io coninncyá na ya Tyo'ts'on ntyja
'naanho'. Cotán nnon jon na quitejndei jon 'o'.
\v 3 Conan't'mán' Tyo'ts'on, nquii jon na conduihin Tyëëhë na
ninnquii'chen covañjoon' n'ö́n nchu vaa na cotye'ntjonho' nnon jon
ng'e na covantyja n'onho' Jesús. Min tyi'cotsuu' n'ö́n na
vengioho' jon na conan'chonho' quii' ts'ian 'naan' jon, ndo' ng'e
na t'man qui n'onho'hin min na coquenonho' navi', majo'
contjotyenho' ntyja 'naan' jon.
\v 4 'O' ntyjë na vantyja n'onho' nquii Jesús, mangiö́ na
vi'ntyjii Tyo'ts'on 'o', ndo' mantyi covityincyoo' jndyoyu
na nquii jon jndë tji jon 'o' na conduiho' cüentaa' jon.
\v 5 Ee xjen na squë́ na m'anho' na
toninncyá jñ'oon naya 'naan' jon ndëëho', chito ng'e jñ'oon
na tonan'në́n, jo' na tantyja n'onho'. 'O' tantyja n'onho'
xeng'e juu najndei na condui nquii Espíritu Santo.
Juu jon s'aa ts'ian na taa' ya n'onho' na juu jñ'oon'ñeen,
jñ'oon na mayuu'han'. Totquenho' cüenta nchu vaa na tonan'xuán
xjen na tom'án quii' nt'anho' cha' quitejndeihan'ho'.
\p
\v 6 Ndo' min na t'man navi' na toquenonho' na tont'a nn'anho',
majo' 'o' tye' na cotsam'anho' cha'xjen na cojnty'iaho' na
cotsam'án já, ndo' mantyi yo ntyja 'naan' nquii ta Jesús. Ndo'
yo na tyincyaa Espíritu Santo na nein jndyiho', jo' na ty'onho'
cüenta joo jñ'oon na toninncyá.
\v 7 Ndo' na nnda', tondëë
tsoñ'en nn'an ndyuaa Macedonia yo nin'Acaya na vantyja n'onhan,
conduiho' ncüii na itsi'manhan' ndëë nan'ñeen nchu vaa na
quinan'jonhan yo Jesucristo.
\v 8 Juu jñ'oon ntyja 'naan' ta
Jesús jnanhan' na m'anho', tëcyahan' ndëë nn'an na m'an
ndyuaaho', juu ndyuaa Macedonia, ndo' mantyi ndëë nn'an ndyuaa
Acaya, yo nin'nque nn'an na m'an xi'jndio. Naijon na cotsaconty'í,
conan'nein nan'ñeen ndë́ nchu vaa na vantyja n'onho' Cristo, min
tyi'icanhan' na quinan'në́n ndëëhan ntyja 'naanho'.
\v 9 Ee nquehan conan'neinhan ndë́ ntyja 'naan' na ty'onho' cüenta já xjen na
squë́ na m'anho'. Conduehan ntyja 'naan' nchu vaa navejndyee na
tonan't'maan'ho' 'nan na tonan'ya nn'an na chito Tyo'ts'onhan'.
Majo' ntcüe' n'onho' ntyja 'naanhan' cha' ntye'ntjonho' nnon
nquii Tyo'ts'on na vando' na conduihin na mayuu'.
\v 10 Ndo' na
covendoo'ho' na nndyo ntcüe' jnda jon na nnan juu quiñoon'ndue,
manquii Jesús na tyincyaa Tyo'ts'on na tando' xco jon jndë na
tue' jon. Manquiintyi jon na ntsiquindyaa jon jaa quii' navi'
t'man juu xjen ya na ngüentyja na nt'uiivi' Tyo'ts'on nn'an
ntyja 'naan' jnanhan.
\c 2
\s Totye'ntjon Pablo nnon Tyo'ts'on tsjoon
Tesalónica
\p
\v 1 'O' ntyjë na vantyja n'onho' Jesús, mangioho' na
tyi've'jn'aan na squë́ na m'anho'.
\v 2 Ee mangioho' juu xjen na tom'án tsjoon Filipos, nque
nn'an tsjoon'ñeen tenonntyja xjen jnt'a vi'han já, ndo' na
jnan'cüejnaan'hin já. Majo' vi na jndë squë́ na m'anho',
nquii Tyo'ts'on na conan't'mán', tyincyaa jon na xoncüii'
n'ö́n na toninncyá jñ'oon naya 'naan jon ndëëho' min na
jndye jndyi nn'an ty'ehan nacjö́.
\v 3 Ee juu jñ'oon na coninncyá, tyi'conduihan' ncüii na
ngachuhan' nn'an ncüii nato na tyi'cüijnt'ue, min chito
coninncyáhan' ng'e na nin'quint'á ncüii nnon 'nan na
tyi'quichuhan' oo na nin'quinan'vi'nn'án nn'an.
\v 4 Majo' cha'xjen nquii Tyo'ts'on jndë tji' jon cüenta na
conan'quindë́ ts'ian na i'ua jon ndë́, jo' conan'chö́n na
coninncyá jñ'oon naya 'naan' jon ndëë nn'an. Min chito
cont'áhan' cha' ngavee' ngiohan yo já, cont'áhan'
cha' nquii Tyo'ts'on ngavee' ts'on jon, ee nquii jon
ntquen jon cüenta na aa cont'á ts'ian'ñeen yo mancha'chen
n'ö́n.
\v 5 Ee mangio yaho' na min'jon taconan'në́n
jñ'oon na ve' nnon jndyuë́ na quinan'jonho' yo já, min
tyi'cont'á 'nan na ve'nty'iu cha' nta'ntjö́n 'naanho', ndo' 
nquii Tyo'ts'on ncüji' jndyoyu jon na mayuu' na nnda'.
\v 6 Min taconan'chö́n na ntsiquinjonhan' já
tondëëho', oo tondëë mañoon nn'an.
\v 7 Majo' ng'e na condui já nn'an na ijñon Cristo yo juu
jñ'oon naya 'naan' jon, vaa najndë na condui já na
ngitán na quitixee'ho' já. Majo' tyí'quint'á na nnda'. Ee
juu xjen na tom'án quii' nt'anho', tom'án cha'vijon ncüii
tsanscu na ya ñuan tsixuan jon na itixee' jon ntsinda jon.
\v 8 Ng'e na në́n jndyiho' ngiö́, jo' chito xia'ntyi na tom'án
cjë́ na nninncyá jñ'oon naya 'naan' Tyo'ts'on ndëëho',
majo' ng'e na vi'ngiö́ho', mantyi tanin min xe na aa
ncüjë́ na cotye'ntjö́n ndëëho', majo' contjo ngiö́.
\v 9 'O' ntyjë, covañjoon' n'onho' na t'man vaa
totscüejndyaa'han' já na tont'á ts'ian, chjo ro xjen na
tota'jndyë́. Tont'áhan' cha' tyi'quityiö́ xu nacjoho' na
quitixee'ho' já viochen xjen na toninncyá jñ'oon' Tyo'ts'on
ndëëho'. Jo' naxuee ndo' natsjon tont'á ts'ian cha'
nta'ntjö́n 'nan na tocanhan' já.
\p
\v 10 Nqueho' na vantyja n'onho' Jesucristo, conduiho' nn'an na
cotji' jndyoyuho' nchu vaa na totsam'án quii' nt'anho', ndo' mantyi
nquii Tyo'ts'on jndyiaa' jon na nnda' tonan'xuán. Tom'án na
ji'ua tonan'xuán tondëëho'. Tont'á cha'xjen na chuhan', min
min'ncüii nnon tatonan'tja já ndëëho'.
\v 11 Ncüii cüiiho'
mangioho' na cha'xjen ncüii tsans'a na incyaa jon jñ'oon ya
ndëë ntsinda jon, mannda' vaa totsam'án quii' nt'anho'.
\v 12 Juu xjen'ñeen na tonty'e nn'an 'o', toninncyá na t'onho'
na nan'xuanho' ñuaanho'. Ndo' xjen na si'ndaa'han' ngioho' ng'e 'nan na
toquenonho', toninncyá na t'man n'onho'. Tonan'jnt'á nquenho'
na c'onho' quii' nt'an nn'an tsjoonho' ncüii cüii nnon na
ndit'maan' Tyo'ts'on ntyja 'naanho', nquii jon na iqueen' jon 'o'
na quinan'jonho' ntyja 'naan' juu na itye'ntjon jon naijon na
taquintyja na quixuee na m'aan jon.
\p
\v 13 Ndo' mantyi tyí'quitsacüentyjë́' na coninncyá na ya
Tyo'ts'on, ng'e juu xjen na toninncyá jñ'oon naya 'naan' jon
ndëëho', ty'onho' cüentahan' na mayuu' conduihan' jñ'oon'
jon, chito ve' jñ'oon na tonan'jnda' nn'an. Juuhan' mayuu'
conduihan' jñ'oon na mayuu', na 'o' na vantyja n'onho' na
its'aahan' yo 'o' cha'xjen na nt'ue ts'on nquii jon.
\v 14 Mantyi nqueho', 'o' ntyjë, cüejon toquenonho' cha'xjen na
toquenon ntmaan' nn'an na vantyja n'on Cristo na m'anhan
ndyuaa Judea. Ee nque nn'an ndyuaaho', mantyi tont'avi'han
'o' cha'xjen joo nn'an judíos'ñeen tont'ahan yo nque
ntyjehan na vantyja n'on Jesucristo.
\v 15 Ee manque nn'an judíos'ñeen jnan'cuee'han nquii ta Jesús.
Ndo' manincüajon tont'ahan yo nque ntyjehan na ndyu na
toxen'chen toninncya nan'ñeen jñ'oon' Tyo'ts'on ndëëhan
ntyja 'naan' nchu vaa 'nan na nguaa, ndo' mantyi jnty'ehin já. Ndo'
juu na nnda' cont'a nn'an judíos'ñeen, tyi'cavee' ntyjii
Tyo'ts'onhan', ndo' mantyi m'anhan na conan'vehan cjo
tsochen nn'an.
\v 16 Ata nin'quitë'hin já na tavinan'në́n jñ'oon naya ndëë
nn'an na mañoon tsjan conduihan cha' ntyja 'naan' jo'
nndëë ntsin'man Tyo'ts'on ñuan 'naan nan'ñeen. Ndo' na
cont'a nn'an judíos na nnda', covaquintoo'chen jnanhan. Ndo' naneinhin,
juu na itsiv'ii Tyo'ts'onhan, quindë ya it'uiihan'hin
ntyja 'naan' na conan'tjahin nnon jon.
\s Nn'an Tesalónica na vantyja n'on,
nin'quindyiaa' nnda' Pablohin
\p
\v 17 'O' ntyjë na vantyja n'onho', min na ve' chjovi' xjen na
tji'han' já tondëëho', majo' ta'nan cotsuu' ts'ön 'o'. Ee
s'aahan' na nt'ue jndyi n'ö́n na njnty'iá nnt'áho', jo' jndye
jnda tonan'chö́n na ntsquë́ nnt'á na m'anho'.
\v 18 Tojoo'
n'ö́n na ngitsá nnt'á, ja Pablo jndye jnda totsichö́n na nguë
nnt'a na m'anho', majo' iscu' Satanás na nnt'áhan'.
\v 19 Ee
juu xjen ya na nndyo nnda' ta Jesús, ntsit'maan' jon já ntyja
'naanho'. Ee xeng'e ntyja 'naanho', jo' na incyaahan' na ntyja
n'ö́n na ntsit'maan' jon já yo na incyaahan' na në́n rö́ na
tonnon jon. Juu xjen'ñeen ntsi'man jndyoyuhan' na taquinjon'
ts'ian 'naan' jon na tont'á quii nt'anho'.
\v 20 Jñ'oon na
mayuu', ng'e ntyja 'naanho', jo' na itsi'manhan' na taquinjon'
ts'ian na cont'á, ndo' na incyaahan' na në́n ntyja 'naan'han'.
\c 3
\s M'aan' jndyi ts'on Pablo ntyja 'naan nn'an
na vantyja n'on
\p
\v 1 Ndo' juu xjen na tandiquindëë na nnan'quiintyichen n'ö́n na
iscu'han' na ntsaquijnty'iá nt'aho', sijnt'a na ntjo nquii ja tsjoon
Atenas.
\v 2 Jo' t'ua ts'ian nnon juu ntyjëëhë Timoteo na cja
jon na m'anho'. Conduihin ts'an na its'aa jon ts'ian yo já na
itye'ntjon jon nnon Tyo'ts'on na coninncyá jñ'oon naya ntyja
'naan' Cristo ndëë nn'an. T'ua ts'ian nnon jon na cja jon na m'anho' 
cha' quitejndei jon 'o' na ngaquentyichenho' quityquii' na vantyja n'onho' 
ta Jesús yo na nninncyaahan' na t'man n'onho' ntyja 'naan'han'.
\v 3 Jnt'á na
nnda' cha' joo navi' na coquenonho' na conty'e nn'anho',
tyi'ntji' ntcüe'ho' na vantyja n'onho'. Ee mangioyaho' na
joo navi'min' na coquenön, coquenönhan' xeng'e nt'ue ts'on
jon.
\v 4 Covañjoon' n'onho' na viochen xjen na tom'án quii'
nt'anho', tonan'quindyího' na mayuu' ntquenön navi', ndo' juu
jñ'oon'ñeen jndë tiyuu'han'.
\v 5 Mang'e na nnda', ng'e na
tajñ'oon jndyi ntyja 'naanho', xjen na tandiquindëë na
ntsiquiintyichen ts'ön, jo' jñön Timoteo na caquindyiaa'
jon na aa ninvaa na vantyja n'onho' Cristo. Ee tom'an ja na ncya
na aa ndëë nts'aahan' na nquii yutyia jndë tyii' juu ng'ee juu
'o', ndo' xe na aa nnda', nts'aahan' na ve' jn'aan na toninncyá
jñ'oon ndëëho'.
\p
\v 6 Majo' naneinhin, jndë tyjee' ntcüe' juu Timoteo na tja jon
na m'anho', ndo' na ya jndyi jñ'oon na jndyoy'oon jon ntyja
'naanho'. Ee tso jon na ninvaa na vantyja n'onho' Jesús ndo' na
conan'vengioho' jon. Mantyi tso jon na neinho' na covañjoon'
n'onho' já ndo' na nin'quijnty'ia nnda'ho' já cha'xjen mantyi
nquë́ nin'quitsaquijnty'iáho'.
\v 7 'O' ntyjë mang'e na nnda',
jo' coy'ö́n na t'man n'ö́n ntyja 'naanho' min na jndye nnon
navi' na coquenö́n, juu na vantyja n'onho' Cristo incyaahan' na
xoncüii' n'ö́n.
\v 8 Ng'e na contjotyenho' tyquii' na vantyja
n'onho' ta Jesús, jo' cha'vijon na incyaahan' na vant'ö́ xcö́.
\v 9 Xe'cüinon cha'xjen na ntyji na ninncya na ya Tyo'ts'on
ntyja 'naanho', ng'e na nën jndyi tonnon jon. 
\v 10 Naxuee ndo' natsjon, cotquen já na cotán vi naya nnon jon na
nninncyaa jon na njnty'iá nt'áho' na ntejndeintyë́ho' ncüii
nnon na icanchenhan'ho' ntyja 'naan' na vantyja n'onho' Jesús.
\p
\v 11 Nquii tyëëhë ta Tyo'ts'on yo nin'nquii ta Jesús na
conduihin na itye'ntjon jon jaa, cotán ndëëhan na nquehan
nnan'jnda'han nato cha' nndëë ntsaquijnty'iá nnt'áho'.
\v 12 Ncyaa ta Jesús na cüit'manntyichen na ve'ngioho' ntyjeho' na
vantyja n'onhan jon ndo' na vantjo'chen na quinan'xuanho'han', 
ndo' mantyi yo tsoñ'en nn'an. Nnda' cotán cha' nnan've'ngioho' 
nn'an cha'xjen na conan'vengiö́ho'.
\v 13 Ncyaa jon na quintjotyenho'
ntyja 'naan' jon cha' juu xjen ya na nndyo nnda' jon yo tsoñ'en
nn'an na conduihan ñuan nquii', min'ncüii jnan tyi'nan'xuanho'
na tonnon nquii tyëëhë ta Tyo'ts'on.
\c 4
\s Nan'min quint'a cha' ngavee' ts'on
Tyo'ts'on yo jaa
\p
\v 1 Ndo' naneinhin 'o' ntyjë na vantyja n'onho', co'nan'mán
ndëëho' ndo' conan'qui'maan'ho' nchu vaa na icanhan' na
c'onho' na tondëë nn'an cha' ngavee' ntyjii Tyo'ts'on yoho'.
Ndo' mayuu' na conan'quindëho' juuhan'. Majo' naneinhin yo xuee'
ta Jesús coty'í jndy'uë́ho' na quint'antyichenho'han'.
\p
\v 2 Ee mangio yaho' jñ'oon na toninncyá ndëëho' yo juu
najndei na condui nquii jon.
\v 3 Juu 'nan na nt'ue ts'on
Tyo'ts'on yoho', na c'onho' na ñuan nquii'ho' na tonnon jon,
chito na ve' ndö' ro na nc'onho' yo ncüiichen ts'an.
\v 4 'O'
nannon na m'an ntcuho', cüaa' n'onho' na chuhan' na c'onho'
yohan yo na ji'uaho' na tonnon Tyo'ts'on ndo' yo na t'man ngioho'
yohin na conduihin ntcuho'.
\v 5 Min chito na nc'onho' yohan na
jen venonchen na its'aa jndyihan' n'onho' cha'xjen cont'a nn'an
na tyi'c'onhan nacje 'naan' Tyo'ts'on.
\v 6 Ntyja 'naan'
juu jñ'oonva', 'o' nannon, min'ncüiiho' tyi'nt'a vi'ho' ncüiichen
ntyje nnonho', na ntsitjon' 'u' yo scuu' tsan'ñeen. Ee
jaa' jñ'oon na tonduë́ ndëëho' na nt'uiivi' ta Jesús nque
nannon na cont'a na nnda'.
\v 7 Ee chito tqueen' Tyo'ts'on jaa na
nc'ön yo nn'an na ve' ndö' ro. Tqueen' jon jaa na quinan'xuan
ñuan nquii' nchu vaa na cotsam'an na tonnon jon.
\v 8 Ndo' 
min'ninchen ts'an na tyi'quitsijñ'oon' juu jñ'oonva' na
conan'mán, chito já its'aa tsan'ñeen na tyi'cuee' ts'on juu.
Its'aa juu na tyi'cuee' ts'on juu nquii Tyo'ts'on na incyaa jon
Espíritu Santo quii' nn'ön.
\p
\v 9 Nque ntyjeho' na vantyja n'onhan, tyi'icanhan' na cüji
nnt'a jñ'oon na quinan'vengioho'han, ee nquii Tyo'ts'on jndë
si'man jon ndëëho' na quinan'vengioho'hin, ndo' jndë
macont'aho'han'.
\v 10 Ndo' na mayuu', 'o' conan'vengioho'
tsoñ'en nn'an na vantyja n'on Cristo na m'anhan ndyuaa
Macedonia. Majo' coty'í jndy'uë́ 'o' na cüive'ngiontyichenho'hin.
\v 11 Quinan'chonho' na ya ro c'onho' yo nn'an cha' ndiya ngiohan
yoho'. Ndo' 'o' quint'aho' ts'ian cha' nninjnda' 'nan na icanhan'
'o' cha'xjen jñ'oon na tonduë́ ndëëho' xjen na tom'án quii'
nt'anho'.
\v 12 Ee xe na aa nnt'aho' na nnda', yajo' joo nn'an
na tyi'covantyja n'on Tyo'ts'on nt'ahan na njonho'. Min
tyi'xe'canhan' na ngitanho' ndëë nn'an na quitejndeihanho'.
\s Mandyo nnda' ta Jesús
\p
\v 13 'O' ntyjë na vantyja n'onho' Cristo, nt'ue jndyi n'ö́n na
cüaa' ya n'onho' nchu vaa na mayuu' na coquenon nn'an na jndë
tjë, cha' tyi'nc'onho' na chjoo' n'onho' cha' na coquenon joo
nn'an na tyi'quintyja n'onhin na nnta'ndo' xcohin. 
\v 14 Jaa vantyja nn'ön na tue' Jesús ndo' na tyincyaa
Tyo'ts'on na vando' xco jon. Mang'e na nnda', mantyi covantyja
nn'ön xjen na nndyo nnda' jon, ndo' nque nn'an na jndë tjë
na tovantyja n'onhan jon, juu xjen'ñeen nninncyaa Tyo'ts'on na
ntando' xcohan.
\p
\v 15 Maninjoo jñ'oon na toninncyaa ta Jesús, joohan' conduë́
ndëëho' na jaa nn'an na ninvaa na cota'nt'ö xjen na nndyo
nnda' jon, chito jaa na ncju' jndyeehan' na tondëë joo
ntyjëëhë na jndë tjë.
\v 16 Ee nndye nn'an jndyee' nquii
jon na itye'ntjon jon tsoñ'en, ndo' yo jndyee' nquii ángel na
conintque ndo' na nninc'uaa ndu 'naan' Tyo'ts'on, juu xjen'ñeen
nnan ta Jesús quiñoon'ndue, nndyocue jon, ndo' joo nn'an na
jndë tjë na tovantyja n'onhan na nquii jon conduihin Cristo,
joohan ntando' xcohan navejndyee.
\v 17 Ndë jo' jaa nn'an na
ninvaa m'an, ntsitjon Tyo'ts'on jaa na ngancüi jaa yo joo
nan'ñeen quityquii' chincyu naijon na ntjon jaa yo Jesús, ndo'
ninnquii'chen na ntjo jaa yo jon.
\v 18 Mang'e na nnda', joo
ntyjeho' na m'aan' jndyi n'onhan ntyja 'naan ntyjehan na jndë
tjë, quinan'njoon'ho'hin yo jñ'oonmin'.
\p
\c 5
\s C'ön cjëhë na ncüjee' nnda' ta Jesús
\p
\v 1 'O' ntyjë, tyi'icanhan' na cüji ja jñ'oon na ntsi'man
ndëëho' ntyja 'naan' ndo'cüan oo nin xuee na itsijnda'han' na
nndyo nnda' ta Jesús.
\v 2 Ee nqueho' ngio yaho' na cha'xjen na tyi'quintjii ts'an yuu
xjen na nndyoquee' tsanch'uee vaa' juu, mannda' vaa
itsijonhan' na tyi'quindiö ndo'cüan na nndyo nnda' jon.
\v 3 Ee majuuto xjen na conan'tiu nn'an na ta'nan na toncuu',
ya ro m'anhan, juu xjen'ñeen ninjonto nnt'uii navi' t'manhin, ndo'
min tanchu ya nnt'ahan na tyi'nt'uiityenhan'hin. Juu nan'ñeen na
ntquenonhan, itsijonhan' juuhan' cha'xjen na ninjonto na ngitye'
na iquiihan' tsanscu na ntsingui jon.
\v 4 Majo' o' ntyjë na vantyja n'onho' Cristo, tyi'nan'xuanho'
ntyja 'naan' juu najaan. Joo nn'an na tyi'c'onhan ntyja
'naan' jon, tyi'cjehin yuu xjen na nncüjee' nnda' jon. Ntyja 
na nnda' ngenonhan, itsijonhan' juuhan'
cha'na ntjon ts'an na ninjonto ncüjee' tsanch'uee vaa' juu.
\v 5 Ee 'o' conduiho' ntsinda nquii jon na
conduihin naxuee. Jaa chito condui jaa cha'na nn'an na
cotsam'anhan nacje 'naan' najaan.
\v 6 Mang'e na nnda', nan'xuan na quitquën ya cüenta cha'vijon
ts'an na tyi'tso. Ee m'an nn'an na tyi'c'onhan ntyja 'naan'
Cristo, ve' m'antohan, min tyi'c'oon' n'onhan na aa nndyo
nnda' jon.
\v 7 Ng'e natsjon conda nn'an, ndo' natsjon condyehan.
\v 8 Majo' ng'e condui jaa nn'an na cotsam'an ntyja naan' juu 
naxuee, icanhan' na quitquën ya cüenta tsoñ'en yo nquë. C'ön na
t'man covantyja nn'ön Tyo'ts'on yo na conan'vengiö nn'an
ee joohan' nta'ñoon'han' jaa na nin'quitsi'ndaa' yutyia
jaa. Ndo' ng'e na covent'ötyën na ntsin'man Tyo'ts'on
ñuan njanhan, juuhan' ivañoon'han' juu na m'aan' nn'ön.
\v 9 Ee nquii Tyo'ts'on, chito tji jon jaa cha' nt'uiivi' jon
jaa. Tji' jon jaa quii' navi' t'man. Its'aa jon na nnda'
cha' cy'ön cüenta juu na itsin'man jon ñuan njanhan
ntyja 'naan' nquii Jesucristo, nquii jon na conduihin na
itye'ntjon jon jaa.
\v 10 Tue' jon ntyja njanhan
cha' nta'nt'ö yo nquii jon, tanin min xe na aa jndë tjëhë oo
aa ninvaa na cota'nt'ö xjen na ncüjee' ntcüe' jon.
\v 11 Mang'e
na nnda', nque ntyjeho' na jndë tjë nn'an 'naanhin, yo
joo jñ'oonmin' quinan'njoon'ho'hin, cha' ntyja 'naan'han'
ngaquehan quityquii' na vantyja n'onhan, cha'xjen na mancüiixjen
cont'aho'.
\s Jñ'oon ma mats'ia na itsiqui'maan'
Pablo joohan
\p
\v 12 'O' ntyjë, joo nn'an na m'anhan quii' nt'anho' na cojoo'
n'onhan na cont'ahan ts'ian 'naan' ta Jesús, quinan'njonho'
nan'ñeen. Ee iquen jon joohan na conintquehin ndëëho' na
conan'qui'maan'hinho' nchu vaa na ngom'anho' na tonnon jon.
\v 13 Quint'a jndyiho' na njonhin yo na conan'vengioho'hin ng'e
cont'ahin ts'ian 'naan' jon. Ndo' mantyi quitsam'an yaho' yo
tsoñ'en ntyjeho' na vantyja n'on.
\p
\v 14 'O' ntyjë, jñ'oonmin conduë́ ndëëho', joo nn'an na
conan'ntyquen, quindueho' ndëëhan na quint'ahan ts'ian. Joo
nn'an na m'anhan na chjoo' n'onhan na coquenonhan navi', ncyaho'
na t'man n'onhan. Joo nn'an na min 'nan na nchjehan'hin na
i'ndyiihan' joohan na tavijndëhan na tonnon Tyo'ts'on,
quitejndeiho'hin na ntjo tyenhan ntyja 'naan' jon. Ndo' c'onho'
na t'man n'onho' yo tsoñ'en nn'an.
\p
\v 15 Xe ncüii ts'an nts'aa vi' juu 'o', tyi'nan'ntcüe'ho' navi'
cjoo' tsan'ñeen. Ninnquii'chen quint'aho' na ya nn'anho' yo
ntyjeho' na vantyja n'onhan ndo' mantyi yo tsoñ'en nn'an.
\p
\v 16 Ninnquii'chen c'onho' na neinho'.
\v 17 Ndo' mancha'chen
xjen quinan'neinho' nnon Tyo'ts'on tsoñ'en na coquenonho'.
\v 18 Min'ninchen na coquenonho', quindueho' na ncya ya jon ntyja
'naan'han' ee nquii jon nnda' vaa na nt'ue ts'on jon na
quitsam'anho' ng'e na vantyja n'onho' Cristo Jesús.
\p
\v 19 Tyi'quitë'ho' juu Espíritu yo ntyja 'naan' ts'ian na
its'aa jon.
\v 20 Min tyi'nt'aho' na tyi'cuee' n'onho' jñ'oon na
conan'nein nn'an na conduehin na Tyo'ts'on tyincyaa jñ'oon na
conan'manhin ndëëho'.
\v 21 Quitji'ho' cüenta na aa mayuu' na
nquii jon incyaa jon jñ'oon na conan'neinhan, ndo' tsoñ'en
jñ'oon na itejndeihan'ho', quinan'veho'han'.
\v 22 Ndo' mantyi
quinan'tycaa'ho' yo tsoñ'en nnon natyia.
\p
\v 23 Nquii Tyo'ts'on na conduihin na tajñuaan' ts'onhin, ncyaa
jon na quindë ya na nan'xuanho' ñuan nquii'. Juu na ndyii'
na vando' 'o', yo juu ñuaan 'naanho' yo nin'juu si'ts'o
'naanho', cüantyjee' jon tsoñ'enhan'. Quindui na nnda', cha'
juu xjen na ncüjee' ntcüe' nquii Jesucristo na conduihin na
itye'ntjon jon jaa, ta'nan min'ncüii nnon jñ'oon na nts'aahan'
jnanho'.
\v 24 Nquii Tyo'ts'on na iqueen' jon 'o', conduihin na itsiquindë jon, 
juu jon nts'aa jon tsoñ'en jñ'oon na ico' jon 'ndyo jon.
\s Coninncyahin ts'on 'naanhin
\p
\v 25 'O' ntyjë, ninnquii'chen quinan'neinho' nnon Tyo'ts'on
ntyja nján.
\p
\v 26 Xjen na covatjonho' yo ntyjeho' na covantyja n'onhan,
ncyaho' ts'onhin na conan'manho' na xoncüee' n'onho' na
conan'vengioho'hin.
\p
\v 27 Nquii ta Jesús tyincyaa jon juu najndei na matsixuan ja.
Mang'e jo' mat'iön ts'ianho' na quinan'jn'aanho' tsonva
ndëë tsoñ'en nn'an na vantyja n'onhan.
\p
\v 28 Quityio ta Jesucristo jn'aanho' ntyja 'naan' juu naya na
condui jon.