\id 2TH
\h 2 Tesalonicenses
\mt1 Tson Na Jndë Ve Na Scüenon Pablo
\mt2 Ndëë Nn'an Tsjoon Tesalónica
\c 1
\s Incyaa Pablo ts'on 'naan' jon ndëëhan
\p
\v 1 Ja Pablo matscüenön tsonvahin ndëë 'o' na m'anho' tsjoon
Tesalónica na conduiho' tmaan' nn'an na vantyja n'onho'
Jesucristo. Juu Silvano yo nin'Timoteo conan'jonhan juu
tsonvahin. Coninncyá ts'on nján ndëë 'o' na conduiho'
cüentaa' tyëëhë ta Tyo'ts'on yo ta Jesucristo na conduihin na
itye'ntjon jon jaa.
\v 2 Nquii tyëëhë Tyo'ts'on yo nquii Jesucristo na conduihin na 
itye'ntjon jon jaa, juu naya na nan'xuanhan yo nin'juu na 
conduihin na tajñuaan' ts'onhan, cotán ndëëhan na 
na cy'onho' cüenta joohan'.
\s Xjen na nndyo nnda' Cristo ntco'xen
Tyo'ts'on nn'an
\p
\v 3 'O' ntyjë na vantyja n'onho' Cristo, 'io 'io chuhan' na
concyá na ya Tyo'ts'on ntyja 'naanho'. Chuhan' na cont'á
na nnda' ng'e na vandit'manntyi na vantyja n'onho' Cristo ndo' na
ncüii cüiiho' conan'vengiontyichenho' ntyjeho' na vantyja
n'onhan jon.
\v 4 Mang'e jo' ncüii cüii tmaan' nn'an cüentaa'
Tyo'ts'on, conan'në́n jñ'oon ya ntyja 'naanho' ndëëhan.
Cotji's'a já ndëëhin ntyja 'naanho' na conan'quii n'onho' min
na conty'e nn'anho' ndo' mantyi yo navi' na coquenonho'.
Conduë́ ndëëhan na contjotyenho' na vantyja n'onho' Jesús min
na it'uiivi' nan'min' 'o'.
\v 5 Ndo' na conan'quii n'onho'
quityquii' navi'min', joohan' conan'man
jndyoyuhan' na juu na ico'xen Tyo'ts'on nn'an ntyja 'naan' jnanhan,
its'aa jonhan' cha'xjen na chuhan'. Ndo' joo navi'min' na
coquenonho', covijnt'ue jonhan' na itsijnda'han' na conan'jonho'
ntyja 'naan' juu na itye'ntjon jon nn'an. 
\p
\v 6 Condui Tyo'ts'on na its'aa jon 'nan na chuhan'. Ng'e na
nnda', nque nn'an na cont'avi'han 'o', nts'aa jon na quityion
nan'ñeen na mantyi quenonhan navi'.
\v 7 Ndo' 'o' na coquenonho' navi', ntsiquindyaa jon 'o' na
nndui'ho' quityquii'han', nqueho' ndo' mantyi yo nquë́,
nguaa na nnda' juu xjen na nnaan jon quiñoon'ndue yo tsachon
t'man na ncüjee' ntcüe' jon yo ángeles 'naan' jon na
jndë jndyi conduihan.
\v 8 Juu xjen'ñeen nnt'uiivi' jon joo nn'an na tyi'c'onhan ntyja
'naan' Tyo'ts'on, min tyi'quinan'jñ'oon'han juu jñ'oon
naya ntyja 'naan' nquii ta Jesús na conduihin na itye'ntjon
jon jaa.
\v 9 Juu na nt'uiivi' Tyo'ts'on joohan, tyi'jon quintycüiihan' ndo'
ntscu'han' na nc'onhan naijon na m'aan nquii jon na
taquintyja najndei conduihin.
\v 10 Juu xuee t'man'ñeen, xjen na nndyo nnda' jon,
tsoñ'en nn'an na nan'xuan ñuan nquii', ndit'maan' jon ntyja
'naanhin. Tsoñ'en nn'an na vantyja n'on jon, jndye jndyi
nc'oon' n'onhan ntyja 'naan' jon. Ndo' mantyi 'o' iv'ahan' 'o' yo
nan'ñeen ee jndë tantyja n'onho' jñ'oon na tonan'quindyího'.
\p
\v 11 Ndo' ng'e na nndui nan'min', nquii Tyo'ts'on na tqueen' jon
'o' cha' nan'xuanho' cüentaa' jon, mancha' xjen cotán nnon jon
na ninnquii'chen ngotsam'anho' cha'xjen na cavee' nchjii jon. Ndo'
ntyja 'naan' juu najndei na conduihin, mantyi cotán na nndëë nnt'aho'
ncüii cüii nnon 'nan ya tondëë nn'an ndo' mantyi yo tsoñ'en
nnon na cont'aho' ng'e na vantyja n'onho' Cristo.
\v 12 Ndö' vaa
jñ'oon na cotán cha' cüit'maan' xuee' ta Jesús ntyja 'naanho'
ndo' mantyi nquii jon ntsiquinjon jonho'. Nguaa na nnda' ng'e juu naya na
condui nquii Tyo'ts'on na conan't'maan' jaa yo nquii ta
Jesucristo na conduihin na itye'ntjon jon jaa.
 
\c 2
\s Nquii ts'an na nninncyaañ'enhin yo jnan
\p
\v 1 'O' ntyjë na vantyja n'onho', conan'ntcüí nnt'á
jñ'oonva ndëëho' ntyja 'naan' na nndyo nnda' ta Jesucristo na
ntsitjon jon jaa naijon na m'aan jon.
\v 2 Cotán ndëëho' na tyi'ninncyaho' na ntsiquijñ'eenhan'ho'
na coninc'uaa jñ'oon na jndë tyjee' ntcüe' jon. Min
tyi'ninncyaho' na ntsi'ndaa'han' ngioho' ya na condyeho'
jñ'oonmin'. Min xe aa cotsque nn'an na m'anho' na conduehan
na ntyja 'naan' nquii Espíritu Santo na si'man Tyo'ts'on
jñ'oon'ñeen ndëëhan, oo min na aa conduehan na jndë tji
jahan' nnon tson, majo' tyi'nan'jñ'oon'ho' jñ'oon na
condue nan'ñeen.
\v 3 Minchjo tyi'ninncyaho' na nan'vi'nn'an nn'anho' ntyja 'naan'
na aa jndë tyjee' ntcüe' ta Jesús. Ee vitjachen na nndyo
ntcüe' jon, jndye nn'an ncy'on tanhin ntyja 'naan' juu
jñ'oon' Tyo'ts'on. Ndo' mantyi nnintyincyoo' nquii ts'an na
nninncyaañ'enhin yo jnan. Nquii Tyo'ts'on ncju' jon
tsan'ñeen quii' v'io ng'e tsixuan juu na ngitsuhin.
\v 4 Juu
tsan'ñeen ngitso jon na min'chjo tayuu jnt'ue na conan't'maan'
nn'an Tyo'ts'on, min tyi'quinjon 'nan na cotji'hin cüenta na njon
jndyihan'. Ndo' mantyi ngitso tsan'ñeen na njonntyichen
condui nquii jon, chichen tsoñ'en na conan't'maan' nn'an. Ata ntquen
jon silla na manin' ts'iaan' 'naan' jon quityquii' v'aa t'man 
vaa' Tyo'ts'on na ngacjo jon jo', ndo' ngitso jon na manquii jon
conduihin nquii Tyo'ts'on.
\p
\v 5 Mangioho' viochen xjen na tom'an yoho', totsjö ndëëho' na
nguaa nan'min', ndo' nt'ue ts'ön na cañjoon' n'onho'han'.
\v 6 Majo' naneinhin m'aan nquii jon na itscu' na ncüjee' tsan'ñeen,
ndo' covaa' n'onho' nchu vaa na itscu'han' na tyi'cüjee'non juu
ata na jndë tentyja xjen na ngacüja'han' na nndyo juu.
\v 7 Juu natyia na vanty'iu m'aanhan', vaa najndei na
tsixuanhan'. Juuhan' its'aahan' 'nan na nt'ue ts'onhan'
quii' n'on nn'an, majo' nquii jon na itscu' jon na juu
natyia'ñeen nts'aañ'enhan' 'nan na nt'ue ts'onhan',
ninvito ntscu' jonhan' ata nguee' xjen na ncüji'
Tyo'ts'onhin.
\v 8 Ndo' vi na jndë tji' jonhin, yajo'
nnintyincyoo' juu tsan'ñeen na vja nacjo tsoñ'en jñ'oon na
jndë tso Tyo'ts'on. Majo' vi na jndë tyjee' nnda' ta Jesús,
ntscuee' jonhin yo jndye 'ndyo jon ndo' yo juu na nancoo' na
quixuee na conduihin. Ndo' juu najndei na tsixuan
tsan'ñeen, ntsityuii'ñ'en jonhan'.
\v 9 Ya na ncüjee' juu na conduihin natyia'ñeen, nquii Satanás
nninncyaa na quitsixuan tsan'ñeen najndei na conduihin.
Mang'e jo' ngondëë ngots'aa tsan'ñeen ncüii cüii nnon
ts'ian t'man na tyi'je'quinduihan' na ve' yo najndei na tsixuan
ts'an. Mantyi nts'aa tsan'ñeen jn'aan t'man yo 'nan na
nnts'aahan' na vacue nc'oon' n'on nn'an, joo ts'ian'ñeen
chito conduihan' ntyja 'naan' nquii Tyo'ts'on, ata
nts'aahan' na nnan'tiuhin na m'aan tsan'ñeen ntyja 'naan'
nquii jon.
\v 10 Ndo' mantyi nts'aa tsan'ñeen ncüii cüii nnon
ts'ian tyia na ngonan'vi'nn'anhan' nque nn'an na mancüiixjen
cotsuhan. Nnda' vaa na ngenonhan ng'e tyi'cy'onhan cüenta
jñ'oon na mayuu', tyi'njonhan' ngiohan cha' na
ndëë ntsin'man Tyo'ts'on ñuan 'naanhin.
\v 11 Mang'e na nnda', njñon jon ncüii nnon na ntsivi'nn'anhan'
nan'ñeen na nts'aahan' na ngantyja n'onhan juu quintu na
itsi'man juu tsantyia'ñeen.
\v 12 Its'aa jon na nnda' cha' tsoñ'en nn'an na
tyi'covantyja n'on jñ'oon na mayuu', majo' tovineiin'
n'onhan yo 'nan tyia, ntco'xen jonhan na vaa jnan nan'xuanhan na
ngitsuhan.
\s Tji Tyo'ts'onho' na ntsin'man jon
ñuan 'naanho'
\p
\v 13 'O' ntyjë na vi'ntyjii ta Jesús, chuhan' na ninnquii'chen
concyá na ya Tyo'ts'on ntyja 'naanho'. Itsohan' na cont'á na
nnda' ng'e juu xjen'ñeen na tye' tsoñ'en, nquii jon tji jon 'o' na
ntsin'man jon ñuan 'naanho'. Ee ntyja 'naan' nquii Espíritu
iquen jon 'o' na conduiho' nn'an cüentaa' nquii jon xeng'e juu
jñ'oon na mayuu' 'naan' jon na vantyja n'onho'han'.
\v 14 Ee ntyja 'naan' juu jñ'oon naya na toninncyá ndëëho',
jo' tqueen' jonho' na conduiho' cüentaa' nquii jon. S'aa
jon na nnda' cha' nndëë nnan'jonho' ntyja 'naan' na ntsit'maan'
Tyo'ts'on nquii ta Jesucristo na conduihin na itye'ntjon
jaa.
\p
\v 15 Yajo' 'o' ntyjë, quintjotyenho' ntyja 'naan' na vantyja n'onho'.
Tyi'ndyeho' juu jñ'oon naya na tonan'mán ndëëho' xjen na tom'án
quii' nt'anho', ndo' mantyi yo juu tson'ñeen na jnan'cüanö́n jndyë́
ndëëho'.
\v 16 Nquii Jesucristo conduihin na itye'ntjon jon jaa
ndo' nquii Tyo'ts'on conduihin Tyëëhë. Juu jon m'aan na
ve'nchjii jon jaa, na ntyja 'naan' juuhan' conda na
tyi'quintycüii na itsinjoon' jon jaa ndo' mantyi ng'e juu naya
na condui jon incyaa jon na coy'ön juu na contyja nn'önhin na
ya jndyihan'.
\v 17 Mac'an na ninncyaa jon na t'man n'onho' quityquii' joo navi'
na coquenonho', ndo' ntyja 'naan nquehan ntsay'onho'
najndëho' cha' tsoñ'en na nnan'neinho' ndo' na nnt'aho',
nndui' yahan'. 
\c 3
\s Quitanho' na quitejndei Tyo'ts'on já
\p
\v 1 'O' ntyjë, jñ'oon na mats'ia na conduë́ ndëëho',
quinan'neinho' nnon Tyo'ts'on ntyja nján. Quitanho' na cje ro
ngocya jñ'oon naya 'naan' ta Jesús ndo' na ndit'maan' Tyo'ts'on
ntyja 'naan'han', cha'xjen na s'aahan' quii' nt'anho'.
\v 2 M'an nn'an na tyia jndyi nan'xuanhan. Mantyi quitanho' na
tyi'ninncyaahan' na nt'a vi' nan'ñeen já, ee tyi'tsoñ'en
nn'an vantyja n'onhan jñ'oon ntyja 'naan' ta Jesús.
\v 3 Majo' nquii jon na itye'ntjon jon jaa conduihin na
itsiquindë jon. Nts'aa jon na ntsay'onho' na jndëho' ntyja
'naan' na vantyja n'onho'hin ndo' mantyi ngüañoon' jonho'
quityquii' tsoñ'en nnon navi' na nin'quits'aa yutyia 'o'.
\v 4 Incyaa ta Jesús na coy'ö́n na t'man qui n'ö́n na
cota'nguee'ho' jñ'oon na conduë́ ndëëho', ndo' mantyi na
ninvito ngotsam'anho' ntyja 'naan'han'.
\v 5 Quitejndei ta Jesús 'o' na nan've'ngioho' nn'an cha'xjen
nquii Tyo'ts'on itsivi'ntyjii jonhan. Ndo' na nnan'xuanho' na ntsay'onho'
najndëho' quityquii' navi' na coquenonho' cha'xjen tots'aa Cristo.
\s Chuhan' na quint'a ya ts'ian njanhan
\p
\v 6 'O' ntyjë, min'ninchen ntyjeho' na vantyja ts'on juu Cristo
na tyi'nin'quits'aa juu ts'ian, min tyi'nin'quitsindë juu
jñ'oon na tonan'mán ndëëho', yo xuee' ta Jesucristo coty'í
jndy'uë́ 'o' na tyi'nan'jonho' yo juu tsan'ñeen.
\v 7 Ee
nqueho' mangioho' na icanhan' na c'onho' cha'xjen na tojnty'iaho'
na tont'á xjen na tom'án quii' nt'anho'. Ee juu xjen'ñeen,
chito t'ö́n na tats'ian tont'á.
\v 8 Min chito tocü'á 'naan' ncüiichen ts'an na
tyí'quityiö́nhan', min tyi'jndye xjen na tota'jndyë́.
Xjen'ñeen vaa xjen naxuee ndo' natsjon na tont'á ts'ian
cha' na tyí'quityiö́ xu cjo min'ncüiiho'.
\v 9 Min chito tont'á na nnda' ng'e na tyi'cüanaan na
ninncyaho' 'nan na nninjnt'ue já. Tont'áhan' cha'
quitsi'manhan' ndëëho' na quint'aho' cha'xjen na tont'á.
\v 10 Ee viochen xjen na tom'án quii' nt'anho', totquë́n
jñ'oonva' ndëëho', xe na aa m'aan nin juu na
tsinchqueen'hin, tanin, min tyi'cüa' juu.
\v 11 Majo' naneinhin condyë́ na ñ'en ntyjeho' na jndë jnty'ehan
na cont'ahin ts'ian cha' nnan'jnda'hin 'nan na icanhan'hin, majo'
coma'ndyi'tohan na cot'ioo'hin ts'ian na cont'a ntyjehin.
\v 12 Cotquë́n jñ'oon ndëë nan'ñeen yo xuee' ta Jesucristo, ndo'
conan'jnt'á nquenhin, ijndei'han' na quint'ahin ts'ian cha' cuen
'nan na nninjnt'uehin na ntixee'hin nn'an 'naanhin. Ndo' mantyi
c'onhin quii' nt'an ntyjehin cha'xjen na chuhan', min
tyi'ntyii'hin na nt'ioo'hin nchu vaa na m'an nan'ñeen.
\p
\v 13 Ndo' ndëë mañoonchen 'o' ntyjë, maninjuu tmaan' na
m'anho', tyi'nan'ntyquenho' na cont'aho' 'nan ya.
\v 14 Mantyi quitquenho' cüenta xe na aa m'aan nin juu na
tyi'nin'cüanguee' juu jñ'oon na conduë́ nnon tsonvahin,
min tyi'nan'quiiho' yohin cha' c'oon juu na jnaan' juu.
\v 15 Majo' tyi'nt'aho' yohin cha'vijon na conduihin ts'an na
jndoho'hin. 'O' quinan'qui'maan'ho'hin xeng'e na conduihin
ntyjeho' na vantyja ts'on juu Jesús.
\s Jñ'oon na mats'ia na tji Pablo tsonva
\p
\v 16 Nquii ta Jesús conduihin na tajñuaan' ts'onhin.
Mancha'xjen ncyaa jon na c'onho' na tajñuaan' ts'onho' tsoñ'en
nnon 'nan na coquenonho'. Ninnquii'chen c'oon jon yo tsoñ'enho'.
\p
\v 17 Ncö Pablo macüji jñ'oonva na mancya ts'on njan
ndëëho'. Ndö vaa na maquën xuë ncüii cüii tson na macüji,
cha' quita'jn'aanho' na ja matscüenönhan'.
\v 18 Mac'an nnon ta Jesucristo na quityio jon jn'aanho' na
tsoñ'enho' ntyja 'naan' juu naya na tsi'xuan jon.