\id 1PE
\h 1 Pedro
\mt1 Tson Navejndyee Na Tji Pedro
\c 1
\s Incyaa Pedro ts'on 'naan' jon ndëë nn'an na
jndë tycya
\p
\v 1 Ja Pedro macüji tsonva. Condui ja ts'an na i'ua Jesucristo 
ts'ian nnön na jöncya jñ'oon naya 'naan' jon ndëë 
nn'an. 'O' ntyjë na vantyja n'onho' jon, matscüenön
tsonvahin ndëëho' xeng'e juu navi' na coquenonho' na jndë
tycyaho', ndo' naneinhin ve' m'an yaho' ndyuaa Ponto, yo
Galacia, yo Capadocia, ndo' Asia yo nin'Bitinia. 
\v 2 Vitjachen na tquen tyëëhë Tyo'ts'on tsoñ'en, ndo' ntyjii
ya jon na ncüji jon 'o' na nnduiho' cüentaa' nquii jon.
Ndo' neinhin, majndë conduiho' cüentaa' jon ng'e nquii
Espíritu Santo ityii' jon 'o' ntyja 'naan' Tyo'ts'on.
Condui na nnda' cha' nnan'quindëho' tonnon jon ndo' na
ntsintju' jon ñuaanho' yo neoon' Jesucristo. Mac'an nnon
Tyo'ts'on na juu naya na tsixuan jon, jndyentyichenhan'
cy'onho' cüenta yo nin'juu na conduihin na tajñuaan'
ts'onhin.
\s Ncya ya Tyo'ts'on juu na contyja nn'önhin
vando'han'
\p
\v 3 Nquii Tyo'ts'on na conduihin tye nquii Jesucristo na juu jon
conduihin na itye'ntjon jon jaa, cüit'maan'hin. Juu jon
taquintyja na t'man vaa na nty'ia ro jaa ntyjii jon. Ntyja 'naan'
juuhan', jo' jndë tyincyaa jon na tui xco jaa ng'e na tando' xco
Jesucristo. Ng'e na nnda', jo' juu na contyja nn'ön, mantyi
vando'han'.
\v 4 Na ntyja 'naan' juuhan' ninncyaa Tyo'ts'on na
nndaho' ncüii naya na vavehan' quiñoon'ndue na ncy'onho'
cüentahan'. Juu na ntsiquindaa' jonho', je'quintycüiihan', min
je'cüi'ndaa'han', ndo' juu na nanncoo' tsixuanhan', mancha' xjen
m'anhan'.
\v 5 Ng'e na vantyja n'onho' Jesucristo, jo' ivantyjee'
Tyo'ts'onho' yo maninjuu najndei na conduihin. Ng'e na ntyja
'naan'han', ntsin'man jon ñuaanho'. Ntsi'man jon na nts'aa
jonhan' juu xuee na mats'ia.
\p
\v 6 Mang'e na ngioho' na ntsin'man jon ñuaanho', jo' t'man
incyaahan' na neinho', min na chjo ro xjen itsichjoo'han' n'onho'
ng'e jndye nnon navi' na coquenonho'.
\v 7 Ee juu na vantyja
n'onho' itsijonhan' juuhan' cha'xjen ts'ian na condui yo s'on
ijan. Conan'co nn'an juuhan' quityquii' chon na jmin'ntyichen
cha' ntsixuan s'on'ñeen na njonntyichenhan'. Majo' juu na
covantyja nn'ön Cristo xjen na covenön 'nan na nin'quenhan'
xjen 'naan'han' jaa, juuhan' njonntyichen tsixuanhan' na tonnon
Tyo'ts'on, chichen s'on ijan, 'nan na ndëë ntycüii na
njonhan'. Juu na vantyja n'onho' Jesús, vi na jndë covityincyoo'
na ya jndui' 'o' quityquii' joo navi'min' na coquenonho', juu
xjen na ncüjee' ntcüe' Jesucristo, ntsiquinjon Tyo'ts'on 'o',
ndo' nts'aa jon na nnan'jonho' yo Cristo naijon condit'maan' jon.
\p
\v 8 Nquii Jesucristo, min na tacojnty'ia ndëëho'hin, majo'
conan'vi'ngioho'hin. Ndo' min nanein tacojnty'iaho'hin, 
mancüiixjen covantyja n'onho'hin, ndo' juuhan' incyaahan' na
nein jndyiho' ngioho' ata ndicüijnda' nchu vaa nquii jñ'oon na
nndueho' na ntyja 'naan' jo' ntsi'manhan' na taquintyja na njon
jndyihin ngioho', ndo' ndit'maan'hin ntyja 'naan'han'.
\v 9 Ee
ng'e juu na vantyja n'onho' Jesucristo, jo' na coy'onho' cüenta
juu na itsin'man Tyo'ts'on ñuaanho'.
\p
\v 10 Ntyja 'naan' juu jñ'oon'ñeen, nque nn'an na tom'an ndyu
na toxen'chen na toninncyahan jñ'oon' jon ntyja 'naan 
'nan na nguaa, tojoo' yantyi n'onhan na nin'cüaa' n'onhinhan'
ntyja 'naan'han'. Chen jndyi tonan'jn'aanhan jñ'oon'
Tyo'ts'on na jndui na nincüaa' n'onhan ntyja 'naan'
juu na itsin'man jon ñuaan nn'an.
\v 11 Nquii Espíritu na condui nquii Cristo na
itscüenon jonhin quii' nn'ön, tom'aan jon yo nan'ñeen.
Mantyi totsi'man jon ndëëhan joo navi' t'man na ngenon Cristo,
ndo' mantyi yo ntyja 'naan' na ndëcya ndit'maan' nquii jon.
Tonan'chon jndyi nan'ñeen na nin'cüaa' ya n'onhan nin ts'an
tsi'manhan' na ntsixuan juu ts'ian'ñeen ndo' cüan na
nnduihan'.
\v 12 Majo' totsi'man Tyo'ts'on ndëë nan'ñeen na
joo jñ'oon na toninncyahan, tyí'vacüja'han' joohan. Joo
jñ'oon'ñeen na jndë macondyeho'han' nanein, macüenta
nqueho'han'. Nque nn'an na jndë tonan'neinhan jñ'oon naya
ntyja 'naan' Cristo ndëëho', tonan'quindyihan 'o' ntyja 'naan
jñ'oonmin' yo maninjuu najndei na tsixuan nquii Espíritu Santo.
Joo jñ'oonmin', nque ángeles nin'cüaa' jndyi n'onhinhan'.
\s Iqueen' Tyo'ts'on jaa na quinan'xuan ñuan
nquii' na tonnon jon
\p
\v 13 Ng'e na nnda' vaa ntyja 'naan jñ'oonmin', quitquen
xoncüeho' 'nan na m'aan' n'onho' yo na jnda' nquenho'. Juu
na cotsam'anho', quitquen nqueho' xjenhan'. Xia'ntyi c'onho'
na cüendoo' tcüiho' juu naya na ntsiquindaa' Tyo'ts'on 'o' 
xjen na nndyo nnda' Jesucristo.
\v 14 Ndo' ng'e na conduiho' ntsinda Tyo'ts'on, jo'
quita'nguee'ho' na tonnon jon. Min tyi'nan'jonho' yo joo 'nan
tyia na tonan'jontoho' yohan' juu xjen na tyí'quitajn'aanho'hin.
\v 15 Nquii Tyo'ts'on na tqueen' jon 'o', conduihin ñuan
nquii'. Mang'e na nnda', tsoñ'en ntyja na cotsam'anho', mantyi
'o' quinan'xuanho' ñuan nquii' na tonnon jon.
\v 16 Ee jndui jñ'oon' jon na itsohan': “Ng'e na condui Ja ñuan nquii',
mantyi 'o' quinan'xuanho'han'.”
\p
\v 17 Ya na conan'neinho' nnon Tyo'ts'on, condueho' tyeho'hin
ndo' na ngioho' na cüejon ntco'xen jon ncüii cüii ts'an nchu vaa 
na its'aa juu. Mang'e na nnda', xuee na tonnonchen na ve' m'an
yaho' ncüii cüii tyuaa naijon jndë tycyaho', jo' c'onho' na
cüincyaa' n'onho' jon.
\v 18 Ee mangioho' na nque ndochiho'
tonduehan jñ'oon nchu vaa 'nan na quint'aho' cha' ntsiquindyaa
Tyo'ts'on ñuaanho'. Majo' juu jñ'oon'ñeen tyi'cüijnt'ue
jonhan', ve' jn'aanhan'. Ee mangio yaho' na chito sin'man jon
ñuaanho' yo s'on ijan oo yo s'on xuee, joohan' contycüii na
njonhan'.
\v 19 Sin'man jon ñuaanho' yo juu neoon' nquii
Cristo, na taquintyja na njon conduihan'. Nquii jon conduihin
Quitsman Chjo na jnan'cuee' nn'anhin na min'ncüii jnaan' jon,
min'ncüii nnon ta'nan its'aahan' na tyi'ntju' conduihin. 
\v 20 Vitjachen na ntquen Tyo'ts'on tsonnangue, ndo' jndë t'ua jon
ts'ian nnon Cristo na ngenon jon na nnda'. Majo' ata ndyumin na
mats'ia, tyincyaa jon na jndyo Cristo na ntejndei jon 'o'.
\v 21 Naneinhin ntyja 'naan' jon na vantyja n'onho' Tyo'ts'on.
Nquiintyi jon tyincyaa jon na vando' xco Cristo vi na jndë 
tue' jon ndo' sijnda' Tyo'ts'on na cüit'maan'hin. Ndo' ng'e na
s'aa jon na nnda', ninnquii'chen ntyja 'naan' Cristo m'anho' na
vantyja n'onho' Tyo'ts'on ndo' na t'man qui n'onho'hin.
\p
\v 22 Nein na co'ndyiiho' na juu jñ'oon na mayuu' co'xenhan'
'o', juuhan' jndë tquenhan' na ntju' ñuaanho' na conan'vengioho'
ntyjeho' na vantyja n'onhan Jesucristo, jo' cjoo' yaya n'onho' na
cüivengioho'hin yo na xoncüii n'onho'.
\v 23 Ee chito jndë
tui xcoho' ntyja 'naan' ncüii nnon tsjan na contycüiihan'. 'O'
ntyja 'naan' juu jñ'oon' Tyo'ts'on na vando'han' na
je'quintycüii na m'aanhan', ntyja 'naan' juuhan' jndë tui
xcoho'.
\v 24 Cha'na jñ'oon' jon na tji Isaías na itsohan':
\q Itsijonhan' ncüii cüii ts'an cha'vijon
tsco jndëë. 
\q Ndo' tsoñ'en ntyja 'naanhan na njon conduihan'
itsijonhan' juuhan' cha'vijon ntjaa' jndëë,
\q ee vi na jndë t'uaa tsco jndëë,
\q cocyaa ntjaa' 'naanhan'.
\q
\v 25 Majo' juu jñ'oon' Tyo'ts'on,
\q tyi'jon quintycüi m'aanhan'.
\p Ndö' vaa itsiquindyi jñ'oon na tji Isaías. Ndo' majuuntyi
jñ'oon'ñeen, conduihan' jñ'oon na toninncya nn'an ndëëho' na
ntyja 'naan'han' na itsin'man Tyo'ts'on ñuaanho'.
\c 2
\p
\v 1 Mang'e jo', tsoñ'en nnon natyia yo nin'tsoñ'en na
itsivi'nn'anhan' nn'an, quinan'tcyaa'ho' ntyja 'naanhan'.
M'an nn'an na cont'a nquehan na conan't'maan'han Tyo'ts'on cha'
quitscu'han' ncüii nnon natyia na cont'ahan, majo' 'o'
tavint'aho'han'. Tyi'nan'tëë' n'onho' joo nn'an na min 'naan,
ndo' 'o' na ta'nanhan'. Quitsacüentyjee'ho' na conan'neinho'
jñ'oonvi' nacjo nn'an.
\v 2 Yo'ndaa na xe jnda xco na tuihin,
ninnquii'chen ndaatsu ndyee yo'ñeen na nin'quitei' joo. Juu
jñ'oon' Tyo'ts'on conduihan' ndaatsu ninnquii'. Quitquen
yantyiho' na cüijnt'ueho' juu jñ'oon'ñeen cha' ngaqueho' ntyja
na itsin'man jon ñuaanho'.
\v 3 Quint'aho' na nnda' xe na aa
mayuu' cotquen yaho' cüenta na nquii jon na conduihin na
itye'ntjon jon 'o', t'man vaa na nty'ia roho' nchjii jon.
\s Condui Cristo tsjö' na vando'
\p
\v 4 Ninnquii'chen quinan'ndyoo'ho' na m'aan Jesucristo, nquii
jon na conduihin tsjö' na vando'. Nque nn'an tji'han cüenta na
tyí'cüijnt'ue jon, majo' nquii Tyo'ts'on tji jonhin na
conduihin tsjö' na njon jndyi.
\v 5 Mantyi nqueho' na vantyja n'onho' Cristo, conduiho' ntjö'
na cota'ndo'. Ng'e jo' ncyaho' na nquii Tyo'ts'on ninjnt'ue
jon 'o' na ntsia jon v'aa naijon na nc'oon nquii jon.
Quityquii'han' i'ua jon ts'ian ndëëho' na conduiho' ntyee
na ji'ua nan'xuanhan na xia'ntyi nnon jon na cotye'ntjonho',
yo na ninncyaho' na nquii Espíritu Santo ntco'xen jon 'o'
yo ntyja 'naan' na cotsam'anho'. Joo ts'ianmin' na cavee' ntyjii
Tyo'ts'on ng'e Jesucristo.
\v 6 Mang'e jo' nacjoo' jñ'oon' Tyo'ts'on na tji Isaías vaa
jñ'oon na itsiquindyihan':
\q Quitquenho' cüenta, quityquii' juu tsjoon
Sión, jo' maquën tsjö' naijon na tji'han' nqui
tsjaan' v'aa, ncö tji tsjö'ñeen ntyja njan,
ndo' njon jndyi conduihin. 
\q Minninchen ts'an na vantyja ts'on juu jon, 
tyi'je'quits'aahan' na ncüji' tsan'ñeen 
cüenta na ve' jn'aanhan'.
\p
\v 7 Ntyja 'naan 'o' na vantyja n'onho', nquii jon na conduihin
tsjö'va', njon jndyihin ngioho'. Majo' ntyja 'naan joo nn'an na
tyi'covantyja n'on, itsiquindëhan' ncüiichen jñ'oon'
Tyo'ts'on na itsohan:
\q Nque nn'an na conan'va v'aa, tyque'han tsjö',
jnduehan na tyi'je'cüijnt'uehan'. 
\q Majo' nquii Tyo'ts'on tquen jon na conduihin
tsjö' nqui tsjaan' v'aa.
\m
\v 8 Ndo' mantyi vaa ncüiichen jñ'oon ntyja 'naan' jo' na
itsohan':
\q Juu tsjö'vahin conduihin ncüii na ntyja
'naan' jon itscyaahan' nn'an.
\m Ee jnaan' na tyí'cantyja n'onhan nchu vaa na itso juu
jñ'oon' Tyo'ts'on ntyja 'naan' nquii jon na conduihin juu
tsjö'ñeen, jo' na itscyaahan'hin. Nnda' vaa na sijnda' jon na
ntquenonhan ng'e tajnan'quindëhan cha'xjen juu jñ'oon na tquen
jon.
\s Nn'an na condui cüentaa' Tyo'ts'on
\p
\v 9 Majo' 'o' conduiho' nn'an na icüji Tyo'ts'on cüentaa'
nquii jon. Ndo' mantyi conduiho' ncüii tmaan' ntyee na
cotyentjon nnon nquii jon na taquintyja na conintquehin, jo'
nquii Cristo. Ndo' mantyi conduiho' ncüii tmaan' nn'an na iquen
Tyo'ts'on na nan'xuan ñuan nquii'. Conduiho' nn'an na sijnda
jon cüentaa' nquii jon. Nquii jon na tqueen' jon 'o', nan'min'
its'aa jon yoho' cha' quitji' jndyoyuho' ndëë nn'an na
taquintyja nquii jon t'man conduihin. Nquii jon tqueen' jon 'o' na
jndui'ho' ntyja 'naan' najaan na tsixuan jnan ndo' na saque'ho'
ntyja 'naan' juu naxuee na condui nquii Cristo na taxjen ya jndyi
conduihan'.
\v 10 Ndyu na toxen'chen tyí'conduiho' nn'an cüentaa' Tyo'ts'on,
majo' naneinhin manqueho' conduiho' nn'an cüentaa' nquii
jon. Toxen'chen tyí'quindioho' na nty'ia roho' ntyjii jon,
majo' naneinhin covaa' n'onho' na nnda' vaa nchjii jon yo
'o'.
\s Ndö vaa c'onho' tondëë nn'an na tyi'c'onhan
nacje 'naan' Tyo'ts'on
\p
\v 11 'O' ntyjë na vantyja n'onho' Cristo na vi'ntyji 'o',
conduiho' nn'an na ve' m'an yaho' ndyuaamin' naijon jndë
tcyaho'. Mats'a ty'oho' na taninncyaho' xjen ndëë joo 'nan na
tyia na nt'ue jndyi n'on nn'an.
\v 12 Juu na cotsam'anho'
quii' nt'an nn'an na tyi'c'onhan nacje 'naan' Tyo'ts'on,
quint'aho' cha'xjen na chuhan' cha' min na aa conan'neinhan
jñ'oon tsan' ntyja 'naanho', jo' mancüiixjen ntquenhan cüenta
na cotsam'anho' ntyja 'naan' na itye'ntjon Tyo'ts'on, ndo' na nnda', juu
xuee na ntco'xen jon nn'an ntyja 'naan' jnanhan, nnan't'maan'
nan'ñeen jon xeng'e na jndyoyu na totsam'anho' quii' nt'anhan.
\s Quitjue'cje jaa ndëë nanm'ann'ian
\p
\v 13 Ng'e na conduiho' cüentaa' ta Jesús, jo' quitjue'cjeho'
ndëë tsoñ'en nn'an na conduihan nanm'ann'ian. Navejndyee nnon
nquii tsanm'aants'ian t'man, ee nquii jon taquintyja t'man
conduihin na ico'xen jon.
\v 14 Ndo' mantyi nque nn'an na
co'ontyja na i'ua jon ts'ian ndëëhan na mantyi conduihan
nanm'ann'ian yo jon. Ee i'ua jon ts'ian ndëëhan na
quit'uevi'han joo nn'an na tyi'ya cont'a, ndo' nnan'neinhan
jñ'oon ya ntyja 'naan nn'an na cotsam'anhan cha'xjen na
chuhan'. 
\v 15 Ee Tyo'ts'on
nt'ue ts'on jon na quint'aho' cha'xjen na chuhan' cha' ntyja
'naan'han' ntsichenhan' jndyue nn'an na tyi'jnda' nquen na ve'
jñ'oon tsan' na conduehan cjoho'.
\p
\v 16 'O' conduiho' nn'an na jndë siquindyaa Tyo'ts'on
quityquii' juu 'nan natyia. Majo' tyi'ntji'ho' cüenta na s'aa jon na
nnda' cha' nninncyaahan' na vanaan na nnt'achenho' 'nan natyia.
Quint'aho' tsoñ'en 'nan na ntsi'manhan' na conduiho' nn'an na
cotyentjontyenho' nnon jon.
\v 17 Ncüii cüii ts'an, quinan'manho' nnon juu na njonhin
ngioho'. Quinan'vengioho' nn'an na vantyja n'on Jesús.
Ninnquii'chen quinan't'maan'ho' Tyo'ts'on na
quitsincyaa'han' n'onho' na nnt'aho' 'nan na tyi'quichuhan'
ntyjii jon. Ndo' mantyi nquii ta tsanm'aants'ian t'man,
quint'aho' na njonhin.
\s Juu navi' na tenon Cristo, vaa na
itsi'manhan' ndëë
\p
\v 18 'O' na conduiho' moso ndëë patrón 'naanho', yo na
xoncüee' n'onho' quitjue'cjeho' ndëëhan na quita'nguee'ho'
tsoñ'en 'nan na conduehan. Chito xia'ntyi na quint'aho' na
nnda' ndëë joo nan'ñeen na ya nn'anhan ndo' na vi'ngiohan 'o',
majo'ntyi quint'aho'han' yo joo patrón na tëë' n'onhan 'o'.
\v 19 Ee nquii Tyo'ts'on cavee' nchjii jon xe na aa nan ts'an joo navi'
na iquenon juu min na tyi'yuu' na sitjahin ng'e na ntyjii juu na
nquii jon m'aan jon yohin.
\v 20 Ee tyi'tsit'maan'han' Tyo'ts'on xe na aa conan'quii n'onho' na
cotja' patrón 'o' jnaan' na jnan'tjaho' ndëëhan. Majo' xe
na aa cotja'han 'o' ng'e ncüii nnon 'nan naya na cont'aho',
ndo' na conan'quii n'onho' na nnda' coquenonho', juu
nan'ñeen na cont'aho' cavee' ntyjii jonhan'.
\v 21 Ee nqueho' na tqueen' jon 'o', sijnda' jon
na ntquenonho' navi'min', ng'e mantyi nquii Cristo tquenon jon
navi' ntyja 'naanho'. Ndo' na nnda' tjon jon, itsi'manhan' na
cotsanan'jonho' ntyja 'naan' na tots'aa nquii jon.
\v 22 Juu jon
min'ncüii tacotsitjahin min tacotsinin jon jñ'oon quintu.
\v 23 Ee juu xjen ya na tonan'cüejnaan' nn'anhin, tajñ'oon jnaan'
sintcüe' jon. Min juu xjen na tont'avi' nn'anhin, ta'nan tso jon
na ndyionhan nnon jon. Jnty'ii jon na nquii Tyo'ts'on na ico'xen
jon tsoñ'en cha'xjen na chuhan', quitsijnda' jon tsoñ'en ntyja
'naan' juu cha'xjen na nt'ue ts'on nquii jon.
\v 24 Manquiintyi Cristo, tëchu jon jnan jaa juu xjen na t'ion nn'an
jon nnon tsojn'aan, cha' nndëë nnan'xuan jaa nt'oo ntyja
'naan'han' ndo' ngotsam'an ntyja 'naan' na jndyoyu condui nquii
Tyo'ts'on. Cüii cüiii nnon joo na tquee' Cristo, yo joohan' na itsin'man
Tyo'ts'on ñuaanho'.
\v 25 Ee ntyja 'naan nqueho', totsijonhan' 'o'
cha'vijon quinman na 'io 'io cocya o', majo' naneinhin jndë
ntcüe'ho' yo nquii Cristo. Conduihin na ivantyjee' jon 'o' ndo'
ic'ioo' jon ndëëho' cha' na its'aa ts'an na ivantyjee' quinman.
\c 3
\s Ndö vaa na icanhan' na c'on nn'an na jndë tonco
\p
\v 1-2 Mantyi 'o' nanntcu na m'an s'aho', quita'ngue'ho' 'nan na n'onhan 
jñ'oon' Tyo'ts'on, xjen na cotquenhan cüenta nchu vaa na
cotsam'anho' tondëëhan na conan't'maan'ho' jon yo na xoncüee' 
n'onho', jo' ntcüe' n'onhan ndo' ngantyja n'onhan
ta Jesús min na taty'oo cont'aho'hin.
\v 3 Chito xia'ntyi yo 'nan na cojnt'ue nqueho' na cüinancoo'ho' ndëëhan, 
cha' ntyja 'naan' na conan'tycüi'ho' sonquenho', oo na conan'tycüi'ho' yo
'nan na jndë yo s'on ijan, oo na cocüeho' ndiaa na ya
jndyi.
\v 4 Chuhan' na quityquii' n'onho' quinan'xuanho' ncüii nnon na
tyi'covityincyoo'han' ndëë nn'an. Juu nan'ñeen na c'onho'
na nancoo'ho' na tonnon Tyo'ts'on na vengioho' nn'an, min
tyi'nan'tëë' n'onho'hin, ya na nnda' vaa na conduiho' na nancoo' 
'o', juuhan' njon jndyihan' ntyjii jon.
\v 5 Ndyu na toxen'chen nque nanntcu na yo ji'ua tonan'xuanhin na
tonan'qui n'onhan jon, mannda' vaa tont'ahan na
sinancoo'han'hin. Totjue'cjehan ndëë nnonhan.
\v 6 Nquii Sara, mannda' vaa tots'aa jon. Tovanguee' jon
jñ'oon na totso Abraham. Totso juu ntyja 'naan' jon na
conduihin na toco'xen jonhin. Ndo' naneinhin 'o' nanntcu,
conduihin cha'vijon ndyeeho' xe na aa cont'aho' 'nan ya
min tyi'c'onho' na ncyaa' n'onho'.
\p
\v 7 Ndo' mantyi 'o' nannon na m'an ntcuho', manincüajon
quitsam'anho' yohan yo na jnda' nquenho'. C'oon' n'onho' ntyja
'naanhan ng'e na tyi'jndëchenhan cha'na nqueho', ng'e jo'
cüinjonhin ngioho' cha' tyi'ntscu'han' na nndyii Tyo'ts'on
jñ'oon na conan'neinho' nnon jon. Ee cüejon incyaa jon naya na
cota'ndo' xcoho' ntyja 'naan' jon cha'xjen incyaa jon na
conan'xuanhinhan'.
\s Coquenon nn'an navi' ng'e na cont'ahin
'nan ya
\p
\v 8 Jñ'oon na mats'ia na matsjö ndëëho' ntyja 'naan'
jñ'oonmin, nque ntyjeho' na vantyja n'on Jesús na vi'
coquenonhan, tsoñ'enho' c'onho' na ninncüii m'aan' n'onho'
ntyja 'naan nan'ñeen. Juu 'nan na coquenonhan, quint'aho' na
conduihan' cha'vijon xu na cho nqueho'. Mantyi
quinan'vengioho'hin. C'onho' na conan'ndyia' n'onho' ndëë
nn'an. Min tyi'nan's'aho', tyi'nan'ntcuho' ndëëhan.
\v 9 Natyia na cont'a nn'anho', tyi'nan'ntcüe'ho'han', min na
cotjue'han jñ'oon tsan' nacjoho', tyi'nan'ntcüe'ho'han'. 'O'
vandya' 'nan quint'aho', quitanho' nnon Tyo'ts'on na quityio jon
jn'aan joo nan'ñeen. Ee jo' ts'ian na tqueen' jon 'o' cha'
tsoñ'en nnon na nin'quitsiquindaa' jonho' na ndyio jon
jn'aanho', ncy'onho' cüentahan'.
\v 10 Ee nnon tson Salmos vaa jñ'oon na itsohan':
\q Minninchen ts'an na nt'ue ts'on juu na ya
ngam'aan juu, ndo' na nin'c'oon juu na neiin' juu,
\q chuhan' na quen nquii jon xjen tsa juu,
\q min tyi'ntsinin juu quintu.
\q
\v 11 Chuhan' na cüjihin ntyja 'naan' 'nan tyia
ndo' quits'aa juu 'nan ya. 
\q Ndo' quint'ue juu
\q na c'oon juu na tatyia' quichu juu yo nn'an.
Ninnquii'chen nnda' quits'aa juu.
\q
\v 12 Ee nque nn'an na jndë tquen Tyo'ts'onhin
na tajnan nan'xuanhan, 
\q iquen jon cüenta
'nan na coquenonhan. 
\q Ndo' mantyi iquen jon cüenta jñ'oon 
na conduehan nnon jon.
\q Majo' nque nn'an na cont'a 'nantyia, vja jon nacjo
nan'ñeen yo 'nan na cont'ahan.
\p Mannda' itsiquindyi juu jñ'oon'ñeen.
\p
\v 13 Xe cojoo' n'onho' na nt'aho' 'nan ya, ta'nan ts'an nts'aa
vi' 'o'.
\v 14 Majo' min xe na aa cont'avi' nn'anho' ng'e na
cont'aho' cha'xjen na chuhan', majnda' ityio Tyo'ts'on jn'aanho'.
Tyi'ndyueho' na nin 'nan na nndëë nnt'a nan'ñeen 'o', min
tyi'ninncyaho' na ntsiquijñ'eenhan' 'o' na nnda' vaa na
coquenonho'.
\v 15 Majo' quii' n'onho' quitquenho' Cristo na
nquii jon conduihin na itye'ntjon jonho'. Ndo' nque nn'an na
cota'xee'han ndëëho' ntyja 'naan' juu jñ'oon na contyja
tycüii' n'onho' Cristo, c'oncjeho' na nndueho' jñ'oon'ñeen
ndëëhan.
\v 16 Majo' quint'aho'han' yo na ndyia' n'onho' ndo'
yo na cont'aho' na njonhin min ta'nan ncüii nnon na
itsi'ndaa'han' na covicjeho' quii' ñuaanho'. Quint'aho' na nnda'
cha' nque nn'an na conan'tja'han quintu cjoho',
ntscüejnaan'han'hin na cotquenhan cüenta na cotsam'anho'
cha'xjen na nt'ue ts'on Cristo.
\p
\v 17 Ee yantyichen na njnty'iaho' navi' na ngüejn'anho' ng'e
na cont'aho' ncüii nnon naya xe na aa nquii Tyo'ts'on nt'ue
ts'on jon na nnda', chito na ngüejn'anho' jnaan' ncüii nnon
natyia na jndë jnan'tjaho'.
\v 18 Ee mantyi nquii Cristo
ninjon tquenon jon navi' na tue' jon ntyja 'naan' jnan na
nan'xuan. Nquii jon conduihin ts'an na min'ncüii jnaan'. Jaa na
condui nn'an jnan na tonnon Tyo'ts'on, tue' jon ntyja njanhan.
S'aa jon na nnda' cha' ndëë ngachu jon jaa na m'aan Tyo'ts'on.
Ntyja 'naan' na ts'anhin, jnan'cuee' nn'anhin, majo' ntyja 'naan' nquii
Espíritu, jo' tyincyaa Tyo'ts'on na tando' xco jon.
\v 19 Ndo'
vitjachen na tyincyaa Tyo'ts'on na tando' xco jon ntyja 'naan'
nquii Espíritu, tja jon naijon na m'antyen nt'oo. Jo' tyincyaa
jon jñ'oon ndëëhan.
\v 20 Joo nan'ñeen, ndyu na toxen'chen,
tominndoo'chen Tyo'ts'on na ntcüe' n'onhan jnanhan. Juu Noé,
viochen xjen na totsia jon v'aandaa t'man, toninncyaa jon jñ'oon
ndëë nan'ñeen. Xjen na siquitoo'han' tsonnangue yo ndaa,
tyi'jndye nn'an jn'man quii' juu navi'ñeen, ninnenhan.
\v 21 Juu
ndaa'ñeen vat'uiihan' juuhan' yo ndaa na cont'ë, na ntyja
'naan' jo' naneinhin itsin'man Tyo'ts'on ñuan njanhan. Chito
ng'e na itsintju'han' juu na ty'a na chuu' si'ts'o njanhan, majo'
ntyja 'naan' juuhan' mantyi incyaahan' na ya covicjëhë quii'
ñuan njanhan na tonnon Tyo'ts'on. Ntyja 'naan' na cont'ëhö'
itsin'man jon 'o' ng'e na tyincyaa jon na vando' xco Jesucristo.
\v 22 Naneinhin jndë tjantcüe' jon quiñoon'ndue. Jo' m'aan
jon ngiaa' Tyo'ts'on tontyjaya naijon nque ángeles yo nin'nque
na conintque ndëë ángeles tyia, yo nin'tsoñ'en na cotoxenhin
jo', cotjue'cjehan nnon nquii jon.
\c 4
\s Xia'ntyi cha'xjen na itsiquindaa' Tyo'ts'on jaa,
jo' condëë na cotye'ntjön nnon jon
\p
\v 1 Ng'e nquii Cristo tyincyaahin na tquenon jon navi' ata
iscuee'han'hin, mantyi 'o' quintjo ya ngioho' navi' na
coquenonho'. Ee juu ts'an na jndë tquenon navi' yo si'ts'o
'naan', juu najndei na tsixuan jnan, jndë ntycüii na
ico'xenhan'hin.
\v 2 Mang'e na nnda', viochen xjen na m'anntyë, c'ön
cha'xjen na nt'ue ts'on nquii Tyo'ts'on, chito cha'xjen juu
'nan natyia na njnt'ue jndyi n'on nn'an na cotsam'anhan ntyja
nchu vaa na tsixuan tsonnangue. 
\v 3 Nque nn'an tsonnangue, jndye nnon min na cont'ahan na
tyi'cuaa ya ntyjii Tyo'ts'on yohan'. Mantyi 'o' ndyu na
toxen'chen, majndye xjen na tacahan' na tonan'jonho' yo joo
natyia na cont'a nan'ñeen. Cha'na totquenhan na
nin'c'onhan yo nn'an na ve' ndö' ro. Nin'quint'a jndyihan
'nan na tyi'quichuhan'. Tondyeho' na toveho'. Xjen na tocüa' quintcu
nn'an ndo' na tove quintcuhan, tonan'jonho' yohan. Ndo'
mantyi tonan't'maan'ho' 'nan na chito Tyo'ts'on conduihan',
ndo' juu nan'ñeen, jndë tquen jon jñ'oon na tavinduihan'.
\v 4 Majo' naneinhin nque nan'ñeen ndicüaa' n'onhan
ndu na cotji ntcüe'ho' na toninncyañ'enho' na
tonan'jonho' yo 'nantyia na cont'ahan. Ndo' ng'e na nnda'
cont'aho', jo' na conan'cüejnaan'han 'o'.
\v 5 Majo'
ngüentyja xjen na yo na ijndei'han' ntji' jndyoyuhan nnon nquii
jon na m'aan cje jon na ntco'xen jon nn'an ntyja 'naan' jnanhan,
min na aa cotando'han ndo' min na aa jndë tjëhan.
\v 6 Mang'e
na nnda', jo' sijnda' Tyo'ts'on na joo nn'an na jndë tjë, jndyehan
juu jñ'oon naya 'naan' jon. S'aa jon na nnda' cha' ntyja
'naan' na tonan'xuanhan xjen na tom'anhan, nincüajon ntco'xen
jonhan cha'xjen na ntco'xen jon min'cya ro ts'an. Nnda' vaa na
s'aa jon cha' nndëë nnan'jonhan yo juu na incyaa jon na tsixuan
ts'an na tyi'quintycüii na vando' ñuaan' juu yo ntyja 'naan'
espíritu 'naanhan.
\p
\v 7 Jndë vavindyo na ntycüii tsoñ'en. Mang'e na nnda',
quinan'xuanho' na xoncüii' n'onho', ndo' na conan'chonho' na
conan'neinho' nnon Tyo'ts'on.
\v 8 Ndo' na t'manntyichen na
tsoñ'en, yo na mancha'chen n'onho', cüivengioho' ntyjeho' na
vantyja n'onhan Cristo, ee ya na cont'aha na nnda',
itsiquinaanhan' na conan't'man nn'önhan ntyja 'naan' na
conan'tjahin ndëëhë.
\v 9 Nque ntyjëëhë na cotsque yahin
na m'anho', ncüii ro cüiiho' quitixee'ho'hin, yo na xoncüii'
n'onho' ntyja 'naanhan.
\v 10 Minninchen nnon ts'ian na
itsiquindaa' Tyo'ts'on 'o', cüijnt'ueho' joohan' na ntejndeihan'
ntyjeho'. Ee na nt'aho' na nnda', ntsi'manhan' na cota'ntyjee' yaho'
juu naya na condui Tyo'ts'on.
\v 11 Min'ninchen ts'an na jndaa'
juu na incyaa juu jñ'oon' Tyo'ts'on ndëë nn'an, quitscüenon
juuhan' cha'xjen na itsinin nquii Tyo'ts'on. Ndo' min'ninchen
ts'an na jndaa' juu na ityentjon juu ndëë nn'an na conduihan
tmaan' cüentaa' jon, quitsiquindë juu ts'ian'ñeen yo najndei
na condui nquii jon. Xe na aa nts'aa juu na nnda', tsoñ'en
ndit'maan' Tyo'ts'on ntyja 'naan' Jesucristo. Xia'ntyi nquii jon
vacüja'han'hin na mancha'chen xjen cüit'maan'hin. Taquintyja
nquii jon conduihin tsoñ'en najndei. Quindui cha'xjen na
conduë.
\s Juu ts'an na vantyja ts'on na conty'e
nn'anhin, ndö vaa quits'aa juu
\p
\v 12 'O' ntyjë na vi'ntyji 'o', naneinhin coquenonho' ncüii
nnon na jaa' jndyihan' ngioho' na itsichonhan' na ngacüaa' 'o'.
Itsijonhan' juuhan' cha'vijon na covenonho' quii' chon.
Majo' tyi'nc'oon' n'onho' ntyja 'naan'han' na jen mañoonhan'.
\v 13 Majo' cüineiin' n'onho' na coquenonho' na nnda', ee ntyja
'naan' jo' conan'jonho' juu navi' na tquenon Cristo, cha' juu
xjen na ntsi'man Tyo'ts'on na taquintyja na t'man condui nquii
Cristo, mantyi 'o' juu xjen'ñeen nc'onho' na nein jndyiho'.
\v 14 Xjen na conan'cüejnaan' nn'an 'o' ng'e na conduiho' nn'an
cüentaa' Cristo, vaa t'man jndyi na ityio Tyo'ts'on jn'aanho'.
Ee na coquenonho' na nnda', itsi'manhan' na nquii Espíritu
na condui jon na taquintyja na njon conduihin, m'aan jon yoho'.
\v 15 Xe na aa ngüejn'aan ncüii 'o', chito ntjon juu na nnda'
ng'e conduihin ts'an na iscuee' juu ts'an, oo ng'e na x'uee juu
'naan' ts'an, oo ng'e ncüiichen nnon na sitjahin ndëë
nanm'ann'ian, oo na ityii' yahin nchu vaa na tsixuan ncüiichen
ts'an.
\v 16 Majo' xe na aa ng'e na condui ts'an cüentaa'
Cristo, ndo' ng'e jo' cont'avi' nn'anhin, tyi'nc'oon juu na
jnaan' jndyi juu na nnda' vaa iquenon juu. Quitsit'maan' juu
nquii Tyo'ts'on yo ncya juu naya jon na condui juu ntyja 'naan' Cristo.
\p
\v 17 Ee jndë tentyja xjen na quit'uiihan' jaa nn'an na condui
cüentaa' Tyo'ts'on. Ndo' xe aa yo jaa cotye'han', yajo' jantyichen
'nan na ntquenon joo nn'an na tyi'ta'nguee'han jñ'oon' jon.
\v 18 Cha'na juu jñ'oon' Tyo'ts'on na jndui na itsohan': “Juu
ts'an na itsin'man Tyo'ts'onhin na jndë tquen jonhin na tajnan
tsixuan juu, xe ve' yo nc'ua na n'man ñuan 'naan' juu, yajo'
juu ts'an na tyia ts'anhin yo nin'juu ts'an na vaa jnaan',
vi'ntyichen ngenon tsan'ñeen.”
\p Mannda' itsiquindyi juu jñ'oon'ñeen.
\v 19 Mang'e na nnda', 'o' na coquenonho' navi'
ntyjantyi yo 'nan na nt'ue ts'on Tyo'ts'on, ninvito quint'aho' 'nan ya ndo'
juu na cotsam'anho', qui'ndyeho'han' nt'ö nquii jon na tquen
jon 'o'. Ee joo jñ'oon na jndë tco' jon 'ndyo jon,
tsoñ'enhan' ntsiquindë jonhan'.
\c 5
\s Itsiqui'maan' Pedro nn'an na conintque quii'
nt'an nn'an tmaan' cüentaa' Tyo'ts'on
\p
\v 1 Naneinhin, 'o' ntyjë na conintqueho' quii' nt'an nn'an na
conduihan cüentaa' Tyo'ts'on, matsiqui'man' ja 'o'. Ee mantyi
ja ndö, cüejon condui ja ts'an na conintque yoho'. Ncö
jnty'ia nnön juu navi' t'man na tquenon Cristo na jñon nn'anhin
tsonjn'aan. Ndo' juu xjen na nndityincyoo nnda'hin, mantyi
ntsijon ja yo na ntsit'maan' Tyo'ts'on jon.
\v 2 Nquii Tyo'ts'on i'ua jon ts'ian ndëëho' na cota'ntyjee'ho'
nn'an na conduihan tmaan' cüentaa' jon, ee nquii jon nt'ue
ts'on jon na nnda'. Quinan'quindëho' juu ts'ian'ñeen yo na
xoncüee' n'onho', chito yo na ijndei'han', min chito ng'e
na nt'ue jndyi n'onho' na ngioo xoquitu' ndueeho'.
\v 3 'O' na i'ua Tyo'ts'on ts'ian ndëëho' na quitquenho'
cüenta nn'an na conduihan tmaan' cüentaa' nquii jon,
tyi'nan'quinjon nqueho' ndëë nan'ñeen. Juu na
cotsam'anho', quinduihan' 'nan na ntsi'manhan' ndëëhin 
nchu vaa nc'onhan.
\v 4 Nquii Cristo conduihin na
taquintyja na conintquehin na ivantyjee' jon nn'an na conduihan
tmaan' cüentaa' nquii Tyo'ts'on. Xjen na nndyo nnda' Jesús,
nqueho' na cotyentjonho' nnon jon ncy'onho' cüenta na
tyi'xe'quintycüii na ntsit'maan' jon 'o'.
\p
\v 5 Mantyi 'o' nn'an ndyua, quita'nguee'ho' jñ'oon na
conan'jnda' nque nn'an na conintque ndëë nn'an na conduihan
tmaan' cüentaa' Tyo'ts'on, quitjue'cjeho' ntyja 'naan' na
conan'jnda'han. Tsoñ'enho' c'onho' na ndyia' n'onho' yo nn'an na
conduihan tmaan' cüentaa' jon. Ee vaa jñ'oon' jon na itsiquindyihan':
\q Joo nn'an na conan'quinjon nquehin, nquii
Tyo'ts'on ico'hin ndëë nan'ñeen, 
\q majo' nque nn'an na conan'ndyia' n'onhan, incyaa jon
juu naya na condui jon ndëëhan.
\p Nnda' vaa na itsiquindyi juu jñ'oon'ñeen.
\v 6 Nquii
Tyo'ts'on vaa najndei na conduihin na itye'ntjon jon tsoñ'en,
mang'e jo', quinan'ndyia'ho' na tonnon jon. Ee na nt'aho' na
nnda', yajo' ntsiquinjon jon 'o' juu xjen na ivaa' ts'on jon na
jndë tentyja xjen.
\v 7 Tsoñ'en 'nan na ndyii' jndyi n'onho',
ncyaho' na nquii Tyo'ts'on ngichu jonhan' ee ninnquii'chen m'aan'
jndyi ts'on jon ntyja 'naanho' ndo' iquenchen jon cüenta
tsoñ'en 'nan na coquenonho'.
\p
\v 8 Quitquen nqueho' xjen nchu vaa na cotsam'anho' ndo'
ninnquii'chen quitquen ya yaho' cüenta, ee m'aan ncüiichen na
ninnquii'chen v'ii' ts'on juuho', nquii yutyia. Imandyi' juu na
int'ue juu nin ts'an na ntsi'ndaa' juu. Itsijonhan'hin cha'vijon
lión na itsixuaa o', na imandyi' o' na int'ue o' quioo' na
ntquii o'.
\v 9 Xjen na nin'quen yutyia xjen 'o', tyi'ndyicjeho' nnon juu,
tyen cüentyjee'ho' quityquii' na vantyja n'onho'. Yajo'
xe'quindëë ngüantjon juu yoho'. Nque ntyjeho' na m'anhin
ninvaa tsonnangue na mantyi vantyja n'onhan Cristo,
mangioho' cüejon vi' coquenonhan cha'xjen juu 'nan na
coquenonho'.
\v 10 Nquii Tyo'ts'on na tsoñ'en naya tsixuan jon, nquii jon
tqueen' jon 'o' na quinan'jonho' ntyja 'naan' juu na tyi'quintycüii na
ntsit'maan' jon Cristo. Chjo ro xjen na coquenonho' navi',
ndo' ndë jo' manquiintyi jon nts'aa jon na ntco' ya
ntcüe'han' 'o'. Nninncyaa jon najndëho' cha' nnanho' yo
tsoñ'en nnon na coquenonho' ndo' cha' ntjotyenho' ntyja
'naan' jon.
\v 11 Xia'ntyi nquii jon tsixuan jon na iquen jon
xjen nanein ndo' na ninvaa na tonnonchen. Quindui na nnda'.
\s Incyaa Pedro ts'on 'naan' jon ndëë nn'an
\p
\v 12 Majñön tsonvahin na m'anho' yo nt'ö Silvano. Yo na
macüji' cüenta, conduihin ts'an na xoncüee' ts'on jon na
vantyja ts'on jon Jesucristo. Nnonhan' jndë tsjö ncüii ve
'ndyo jñ'oon na ntejndeihan' na ngüentyjee'tyenho' quityquii'
juu navi' na coquenonho'. Ndo' na macüji' jndyoyu na juu
nayavahin na condui Tyo'ts'on na jndë conan'jonho' ntyja
'naan'han', conduihan' na mayuu'. Quintjotyenho' ntyja
'naan'han'.
\p
\v 13 Joo nn'an na m'an tsjoon Babilonia na mantyi icüji
Tyo'ts'onhan na conduihan cüentaa' jon, coninncyahin ts'on
'naanhan ndëëho'. Ndo' mantyi nquii Marcos. Conduihin jnda.
\v 14 Ncüii cüiiho' ncyaho' ts'on ntyjeho' yo na xoncüee' n'onho' 
na conan'manho' na conan'vengioho'han.
\p Tsoñ'enho' na conan'jonho' yo Cristo, ncyaa Tyo'ts'on na
nan'xuanho' na tajñuaan' ts'onho' na tonnon jon.