\id 2PE
\h 2 Pedro
\mt1 Tson Na Jndë Ve Na Tji Pedro
\c 1
\s Incyaa Pedro ts'on 'naan' jon
\p
\v 1 Ja Simón Pedro macüji tsonva. Condui ja ts'an na itye'ntjon 
nnon Jesucristo ndo' mantyi na i'ua jon ts'ian nnön na jöncya 
jñ'oon naya 'naan' jon ndëë nn'an. Matscüenön tsonva ndëë
'o' na mantyi conduiho' na vantyja n'onho' cha'xjen já. Juu na
vantyja nn'ön, njon jndyi conduihan'. Ng'e nquii Tyo'ts'on na
conan't'maan' yo nquii Jesucristo na conduihin na itye'ntjon jon
jaa, condui jon na jndyoyuhin, jo' conincyahan na nan'xuan juu na
vantyja nn'ön.
\v 2 Nquii Tyo'ts'on yo nin'nquii Jesucristo na
conduihin na itye'ntjon jon jaa, juu naya na nan'xuanhan yo
nin'juu na conduihan na tajñuaan' ts'onhan, mac'an
ndëëhan na nninncyahin na nan'xuanho'han'.
\s Ts'an na itsijonhin yo Jesucristo, nan'min
icanhan' na quitsixuan juu
\p
\v 3 Ee viochen xjen na cotsata'jn'aanho'hin, yo juu
najndei na taquintyja na conduihin, nninncyaa jon tsoñ'en na
icanhan'ho' cha' nta'ndo' 'o' na tonnon jon na ndit'maan' jon
ntyja 'naanho'. Nguaa na nnda' ng'e na cota'jn'aanho' nquii
Jesús na tqueen' jon 'o' na nnan'jonho' na ndit'maan'hin yo
nin'juu na taquintyja na quindë tsixuan jon.
\v 4 Ntyja 'naan
joo nan'min' incyaa Cristo jñ'oon na ico' jon 'ndyo jon ndëë.
Joo jñ'oon'ñeen njon jndyihan', ndo' taquintyja na t'man
nan'xuanhan'. Incyaa jon joo jñ'oon'ñeen cha' condëë
conan'jonho' yo juu na condui Tyo'ts'on ndo' cha' ntyja
'naan'han' nndëe nndyaaho' tsoñ'en nnon 'nan na min tsonnangue
na conan'ndaa'han' nn'an ng'e na nin'quint'a jndyihan 'nan tyia.
\v 5 Majo' chito xia'ntyi icanhan' na cantyja n'onho' Cristo.
Mantyi chuhan' na quinan'chonho' na quint'aho' ncüii cüii nnon
'nan ya. Ndo' yo joohan' quinan'quiñjon'ho' na ntsavaa' n'onho'
nchu vaa na nt'ue ts'on Tyo'ts'on yoho',
\v 6 Ndo' yo juuhan'
mantyi quinan'quiñjon'ho' nchu vaa na ntquen nqueho' xjen ncüii
cüii nnon na nt'ue ts'on si'ts'o 'naanho' na nin'quint'ahan'.
Ndo' yo juuhan' chuhan' na quinan'quiñjon'ho' na quinan'quii
n'onho' navi' na coquenonho'. Ndo' yo juuhan' chuhan' na
quinan'quiñjon'ho' na nnan't'maan'ho' Tyo'ts'on cha'xjen na
chuhan',
\v 7 Ndo' yo juuhan' mantyi chuhan' na quinan'quiñjon'ho' na m'anho' 
na neinho' nn'an, ndo' yo juuhan' na quinan'vengioho' tsoñ'en nn'an.
\p
\v 8 Ee ya na conan'xuanho' joo nan'min', ndo' na
vandyijndyentyichen joohan' ntyja 'naanho', nninncyaahan' na ya
nninjnt'ue Jesucristo 'o' na cotye'ntjonho' nnon jon. Ndo'
mantyi jndye nnon nnintyincyoo' na nnan'manhan' na covaa' ya
n'onho' ntyja 'naan' nquii jon na itye'ntjon jon jaa.
\v 9 Majo' minninchen ts'an na tyi'quitsixuan juu joo nan'min', 
tonnon Tyo'ts'on itsijonhan' ntyja 'naan' juu cha'vijon ts'an na 
tsë tënnon, jndë ntjohin na nchjaan' juu ntyja 'naan' jon. Ndo' 
jndë tsuu' tycya ts'on juu na sintju' jon jnan na totsixuan juu.
\v 10 Mang'e na nnda', 'o' ntyjë na vantyja n'onho' Cristo,
quinan'chon yantyiho' na juu na cotsam'anho' ntsi'manhan'
na jndë tqueen' Tyo'ts'on 'o' ndo' jndë tji jon 'o' na conduiho'
cüentaa' nquii jon. Ee xe na aa nt'aho' cha'xjen na matsjö ndö',
tyi'xe'cüji' ntcüe'han' 'o' ntyja 'naan' jon.
\v 11 Xe na aa
cont'aho' nan'min', jo' neiin' jndyi Tyo'ts'on na nninncyaa
jon ts'on 'o' juu xjen ya na ntsqueho' naijon na tyi'jon
quintycüii na itye'ntjon nquii Jesucristo tsoñ'en, nquii jon na
conduihin na itye'ntjon jon jaa ndo' na itsin'man jon ñuan
njanhan.
\s Ts'iaan' na tji Pedro tsonva
\p
\v 12 Mang'e jo', ninvito ntsintcüi jñ'oonmin' ndëëho' min
na mangioho' joohan', ndo' na contjotyenho' ntyja 'naan' jñ'oon
na mayuu' na jndë ty'onho' cüenta.
\v 13 Ee macüji' cüenta
na chuhan' na quitsintcüintyëchënhan' ndëëho' viochen xjen
na ninvaa vant'ö cha' tyi'ngitsuu' n'onho'han'.
\v 14 Ng'e
mantyji ya na tajndye vitja ndo' ncü'iö, cha'xjen nquii
Jesucristo na itye'ntjon jon jaa jndë si'man jon nnön.
\v 15 Ndo' ntsichön yantyë na ntsijnt'a nchu ya na nts'a cha' vi na
jndë t'iö, tyi'ngitsuu' n'onho' jñ'oonmin'.
\s Pedro ñ'enhin xjen na sit'maan' Tyo'ts'on
Jesucristo
\p
\v 16 Ee juu xjen na jnan'quindyího' ntyja 'naan' juu najndei na
condui Jesucristo na conduihin na itye'ntjon jon jaa, ndo' yo
ntyja 'naan' na ncüjee' ntcüe' jon, juu jñ'oon'ñeen na
jnan'quindyího', chito ve' cüento na conan'jnda' nn'anhan'.
Ee nquë́ jnty'iá ndë́ juu na t'man conduihin. 
\v 17 Ñ'en já yo
jon juu xjen'ñeen na nquii tyëëhë Tyo'ts'on sit'maan' jonhin.
Ndo' jndyë́ jndyee' nquii jon na jnanhan' naijon na taquintyja
na quixuee na m'aan jon, xjen na tso jon ntyja 'naan' Jesús:
“Tsanvahin conduihin jnda na vi'ntyji jahin. Cavee' jndyi nchji
yohin.”
\v 18 Ndo' manquë́ntyë́ jndyë́ juu jndye'ñeen na
jnanhan' quiñoon'ndue xjen na ninm'án yo Jesús juu tyo'ñeen
na ji'uahan'.
\p
\v 19 Ndo' na jndyë́ juu jñ'oon'ñeen, itsinchu'han' na mayuu'
joo jñ'oon na toninncya nque nan'ñeen na tonan'neinhan jñ'oon'
Tyo'ts'on ntyja 'naan' nchu vaa 'nan na nguaa. Mang'e jo', joo jñ'oon'ñeen
quitquen yaho' cüenta nchu vaa conan'quindyihan'. Ee joohan'
conduihan' cha'vijon ncüii lámpara na itsixueehan' chon naijon
najaan ata xjen na nnonnco. Nquii Cristo na conduihin
quixjuu nco, ncüjee' ntcüe' jon, ndo' na nninncyaa jon na
ncüaa' n'onho' tsoñ'en.
\v 20 Ee joo jñ'oon na toninncya nan'ñeen nchu vaa 'nan na
nguaa, ndö vaa na icanhan' na cüaa' n'onho' ntyja
'naanhan', na chito nque nan'ñeen tonan'jnda'han nchu
vaa na conan'man jñ'oon na tjihan.
\v 21 Ee joohan chito tonan'neinhan nchu vaa na tont'ue n'on nquehan.
Joo jñ'oon'ñeen na nin'quitsiquindyi Tyo'ts'onhan, nquii
Espíritu Santo totsinchu' jonhan' quii' n'onhan, jndë jo'
tonan'neinhan joohan' ndëë nn'an.
\c 2
\s Ntyja 'naan nn'an na tyi'yuu' jñ'oon
na conan'man
\r (Judas 4—13)
\p
\v 1 Ndyu na toxen'chen quii' nt'an nn'an Israel tom'an nn'an
na toninncyahan jñ'oon ndëë nan'ñeen, majo' tyi'yuu' na nquii 
Tyo'ts'on t'ua jon ts'ian'ñeen ndëëhan. Mannda' ro itsijonhan' 
na nnc'on nn'an na tyi'yuu' jñ'oon na nnan'manhan ndëëho'. 
Cüenta cüenta ro ntsatyi'han jñ'oon'ñeen ndëëho' na joohan' 
nnan'tyuii'han' juu na vantyja n'onho'. Ata nnduehan na tyi'yuu' 
na sijnda ta Jesús joohan yo neoon' jon. Ndo' na nnda', nquehin 
nnt'ahan na ninjonto na quit'uiityen Tyo'ts'onhin na ngitsuhan.
\v 2 Nan'ñeen nnduehan na ta'nan jnan tsixuan
ts'an na ve' ndö' ro m'aan juu yo mañoon ts'an. Ndo' juu
jnan'ñeen, jndye nn'an nnan'jonhan yohan'. Ndo' ng'e na nnt'ahan
na nnda', nnan'cüejnaan' nn'an juu nato na mayuu' ntyja 'naan'
Cristo.
\v 3 Ndo' joo nan'ñeen na ve' conan'vi'nn'anhin, ng'e na
conan'cjaa' jndyi n'onhan na nta'ntjonhan s'on 'naanho', jo' na
nnan'manhin ndëëho' jñ'oon na nnan'jnda' nquehan min na
tyi'yuu'han'. Majo' tivio ndyu tso Tyo'ts'on na nt'uiityen
jonhan ntyja 'naan' na nnt'ahan na nnda'. Ndo' juu jñ'oon'ñeen
vaa cjehan' na ntsiquindëhan' juuhan'.
\p
\v 4 Ee joo ángeles na jnan'tjahin nnon jon, ta'nan sit'man
ts'on jonhan, ata tyii' jonhan quityquii' v'io naijon najaan
tsue', tyen tyenhan yo carena. Sijnda' jon na quintjotyenhan jo'
ata juu xuee ya na ngüentyja xjen na ntco'xen jon tsoñ'en nnon
jnan.
\v 5 Min ta'nan sit'man ts'on jon nque nn'an na tom'anhan
xjen na s'aa jon na tsu tsonnangue, isquioo
jon ndaatsua' na tua' ty'a. Yo juuhan' siquitsu jon nan'ñeen na
tyí'quint'ahan na njon jon. Juu xjen'ñeen tom'aan Noé.
Conduihin ts'an na toninncyaa jon jñ'oon ndëë nan'ñeen na
c'onhan na jndyoyuhin na tonnon Tyo'ts'on. Xia'ntyi nquii jon sin'man
Tyo'ts'onhin yo ntyque' nn'an 'naan' jon quityquii' juu
navi'ñeen.
\v 6 Ndo' mantyi joo nn'an tsjoon Sodoma yo Gomorra, sijnda' jon na t'uiityenhan' 
nan'ñeen na iscohan'hin. Ninnquii' tsjaa' scüequenhan' joo njoon'ñeen 
jnaan' na tenon ntyja xjen na ji vaa 'nan natyia na tont'ahan. Ndo' na nnda' tui,
itsi'manhan' ndëëhë nin 'nan na ntquenon nn'an na conan'jonhan
yo 'nan tyia.
\v 7 Majo' juu tsan na jndyu Lot, sin'man Tyo'ts'onhin
quityquii' juu navi'ñeen. Ee tsan'ñeen tonduihin ts'an na
jndyoyuhin na tonnon jon. Totsi'ndaa'han' nchjii juu ntyja 'naan'
natyia jndyi na tont'a joo nan'ñeen yo ntyjehan.
\p
\v 8 Juu Lot'ñeen tonduihin ts'an na jndyoyuhin. Tom'aan ya
jon quii' nt'an nn'an juu tsjoon'ñeen. 'Io 'io tondyiaa' jon
'nan tyia na tont'a nan'ñeen ndo' tondyii jon jñ'oon tsan' na
tonan'neinhan, ndo' na nnda', totsi'ndaa'han' nchjii jon.
\v 9 Ng'e na nnda' conan'quindyi jñ'oonmin', itsi'manhan' na nchjii
Tyo'ts'on nchu vaa nts'aa jon yo nn'an na conduihin cüentaa'
nquii jon na ntsiquindyaa jonhan quityquii' navi' na ityii'han'
ng'eehan'hin. Ndo' mantyi ntyja 'naan joo nn'an na cont'a
'nan natyia, nchjii jnda' jon nchu vaa nts'aa jon yo nan'ñeen ee juu
na nt'uiivi'han'hin, m'aan cjehan'. Nndui na nnda' juu xuee ya na
ntco'xen jon nn'an na ninvaa tsonnangue ntyja 'naan' na conan'tjahin.
\v 10 Majndeichen nts'aa jon na nnda' yo joo nn'an na ve'
coninncyatohin yo 'nan natyia jndyi na nt'ue n'onhan. Min
tyi'cuee' n'onhan na quen jon xjenhan. Ee joo nan'ñeen na ve'
quintu jñ'oon na coninncyahin, tyi'ncyaahan min nquii Tyo'ts'on,
majndeichen nn'an. Tyi'je'ncyahin na ntsixjen ts'an 'nan na
cont'ahan. Min tyi'tsity'uehan'hin na conan'cüejnaan'hin joo
ángeles na t'man jndyi conduihin na m'anhin naijon na nancoo' na
m'aan nquii Tyo'ts'on.
\v 11 Majo' nque ángeles na
cota'nguee'han na tonnon Tyo'ts'on, min na t'manntyi conduihin
ndo' jndëntyichenhan, chito joo nan'ñeen, joo ángeles'ñeen
tyi'c'onhan na saa' n'onhan, min tyi'conan'neinhan jñ'oon tsan'
nacjo ntyjehan na tonnon nquii Tyo'ts'on.
\p
\v 12 Majo' joo nan'ñeen na tyi'yuu' jñ'oon na coninncyahin,
tanin min jñ'oon na ndicüaa' n'onhan, conan'cüejnaan'hinhan'.
Itsijonhan'hin cha'vijon quioo' na tyi'jnda' nquen o', ee quioo'
ve' cont'ato o'. Tui o' na ve' na ncy'on nn'an o' ndo' na
nnan'cüjehan o'. Ndo' cha'na conan'cüje nn'an quioo', mannda'
vaa nt'uiityenhan' joo nan'ñeen na ngitsu ñuan 'naanhan.
\v 13 Juu navi' na coquenon nn'an tsojnan nan'ñeenhan', ndyionhinhan'.
Ee joohan xia'ntyi m'aan' n'onhan na ninncyatohan yo min'cya ro
nnon 'nan na its'aahan' na neiin' si'ts'o 'naanhan min na aa naxuee.
Ndo' na nnda' xjen nn'anhin, jo' ya na tojnaan' na cocüa'ho' yo
ntyjeho' na vantyja n'on Cristo, ndo' na ñ'en nan'ñeen quii'
nt'anho', itsijonhan' joohan cha'vijon ndiaa na jndë t'a 'nan
ty'ahan'.
\p
\v 14 Joo nan'ñeen ve' na njnty'iahan nanntcu, nin'c'on
jndyihan yo nan'ñeen. Tyi'c'ocüentyjee'han na conan'tjahan. Yo
jñ'oon na conan'neinhan, cot'uehan nn'an na tyi'tyen m'anhan
natoo' 'naan' Tyo'ts'on, cha'vijon na jndë ty'oon xiu' quioo'.
Conan'cjaa' jndyi n'onhan 'naan nn'an na cojnt'ue nchu vaa nquii nnt'ahan
cha' nnin'naanhinhan'. Ndo' ng'e na nnda' xjen
nn'anhan, m'anhan nacje 'naan' na iju'vi' Tyo'ts'onhan.
\v 15 Juu nato jndyoyu na ntsiquindë ts'an na tonnon jon, jndë jnty'e
nan'ñeenhan'. Vat'io cont'ahan, ve' cotsantyjatohan ntyja 'naan'
juu natyia na s'aa juu Balaam, tsan na totso nchu vaa 'nan na nguaa.
Tye juu tsan na jndyu Beor. Juu Balaam'ñeen nt'ue jndyi ts'on
juu na ngüantjon juu s'on na ncju' juu jñ'oonvi' nacjo nn'an
'naan' Tyo'ts'on.
\v 16 Ndo' ng'e na tyí'quint'ue ts'on
Balaam'ñeen na ntsiquindë juu jñ'oon na tso Tyo'ts'on nnon
juu, jo' na sityia' jonhin yo jñ'oon 'ndyo snon tsjuen' juu,
quioo' na ndiquitsinin. Ee tic'uaa jndyee' ts'an 'ndyo juu
cho'ñeen. Ndo' na tui na nnda', sitsan'han' juu Balaam'ñeen na
tsan' sitiu juu yo 'nan na nin'quits'aa juu.
\p
\v 17 Nque nan'ñeen na tyi'yuu' jñ'oon na coninncyahin,
itsijonhan'hin cha'vijon ndui' na tandaa quindui', cha'vijon
chincyu na itscyaato jndyehan' na min'chjo ndaa tsua'
taquichuhan'. Nquii Tyo'ts'on jndë sijnda' jon na ntyii' jon
nan'ñeen naijon na taquintyja najaan.
\v 18 Joo nan'ñeen, jñ'oon na conan'neinhan, min'ncüii ta'nan
itejndeihan' ts'an. Conan'quinjon nquehin nchu vaa na
conduihan. Tsoñ'en 'nan tyia na nt'ue ts'on si'ts'o 'naan'
ts'an, covijnt'uehin joohan'. Nnda' vaa na cont'ahan cha'
nque nn'an na tyi'covijndye xuee na jndui'han quiityquii' nt'an
nn'an na tyi'c'onhin nacje 'naan' Tyo'ts'on, quitsintcüe'
nnda'han' nan'ñeen.
\v 19 Joo nanmin' na tyi'yuu' jñ'oon na conaneinhan, conduehan xe
na aa ntsijon ts'an yo jñ'oon na coninncyahin, vanaan na
c'oon juu cha'xjen na cavee' ntyjii nquii juu. Ndo' na nnda'
jñ'oon na conan'manhin, ninvaa na cotye'ntjonhan
nnon jnanhan. Ndo' min'cya ro ncüii nnon na vay'oonhan'
ts'an xjen 'naan'han', condui tsan'ñeen ts'an na
itye'ntjontyen juu ntyja 'naan'han'.
\v 20 Ee vi na jndë tajnaan' ts'an Jesucristo na conduihin na
itye'ntjon jon ts'an, ndo' na itsin'man jon ñuaan' juu, na ntyja
'naan' jo' jndë jndyaahin joo 'nan ty'a na tsixuan tsonnangue,
xe na aa ntsijon nnda'hin yo nan'min' na ji minhan', ndo' na
nninncyaa juu na joohan' ntye'ntjon nnda'han'hin, jen vantyichen
ntsixuan tsan'ñeen, chichen na totsixuan juu vitjachen na
tëntyja ts'on juu Jesús.
\v 21 Ee na nnda' nan'xuan nan'ñeen, juu jñ'oon na iquenhan'
ts'an cha'xjen na chuhan' na tonnon Tyo'ts'on, yantyichen xe
na aa tatajn'aan nan'ñeenhan', chito vi na jndë tajn'aanhin juu 
jñ'oon'ñeen, ndo' na ntji ntcüe'hin ntyja 'naan'han'.
\v 22 Ndo' na nnda' cont'ahan, itsi'manhan' na mayuu' juu jñ'oon
na tyi'quitso nquii'han' na itsohan': “Juu quitsë', 'nan
na jndë tan o', i'u ntcüe' o'han'. Ndo' quitscu xque, 
vi na jndë siquindëë' ts'an o', ivantcüe' o' quii'
ndoo'.”
\c 3
\s Ntyja 'naan' na nndyo nnda' Jesucristo
\p
\v 1 'O' ntyjë na vantyja n'onho' Jesucristo na vi'ntyji jaho',
ndö tson na jndë ve na matscüenön na m'anho'. Yo vehan' na
mats'a na ninvito quinan'chonho' na ninncüii quitquenho' na
c'oon' n'onho' ntyja 'naan' joo jñ'oonmin'.
\v 2 Tivio tom'an
nn'an na tji Tyo'ts'onhan na tonan'xuanhan ñuan nquii' na
toninncyahin jñ'oon' jon ntyja 'naan' nchu vaa 'nan na nguaa. Joo
jñ'oon'ñeen nt'ue ts'ön na cañjoon' n'onho'han'. Ndo' mantyi
icanhan' na cañjoon' n'onho' juu jñ'oon na ico'xenhan' na
toninncyaa Jesucristo, nquii jon na itye'ntjon jon 'o' yo na conduihin
na itsin'man jon ñuaan nn'an. Nque nn'an na jñon jon yo jñ'oon
naya 'naan' jon, jnan'manhan joo jñ'oon'ñeen ndëëho'.
\p
\v 3 Ndö 'nan quitquen jndyeeho' cüenta, nguee na mats'ia
nc'on nn'an na ngom'anhan yo natyia na nt'ue n'on nquehan.
Nnan'cüejnaan'han 'o'.
\v 4 Nndue nan'ñeen ndëëho' na juu jñ'oon na tco' ta Jesús
'ndyo jon ndëëho' na nncüjee' ntcüe' jon,
tyi'xe'quitsiquindëhan' juuhan'. Ee conduehan na nque nn'an
na tovantyja jndyee n'onhan jon, tovjehan, ndo' cüejon vja
tsoñ'en cha'xjen na jndyocahan' xjen na tquen Tyo'ts'on
tsonnangue, ndo' maninjuu ro xjen vacahan' xjen nein.
\p Nnda' nndue nan'ñeen.
\v 5 Majo' ya na conduehan na nnda', cont'a yahan na cotsuu'
n'onhan na tiviontyichen na tquen Tyo'ts'on jñ'oon na cuaa
ntjö'ndue yo tsonnangue. Quityquii' ndaa ndo' ntyja
'naan'han', jo' sia jon tyuaa tcüi.
\v 6 Ndo' mantyi yo ndaa na tova' ty'a, jo' siquitoo'han' juu
tsonnangue na tovaa juu xjen'ñeen, ndo' ntyja 'naan' juu
ndaa'ñeen, tsu tsonnangue'ñeen.
\v 7 Ndo' mantyi joo ntjö'ndue yo tsonnangue na vaahan' nanein,
iquen Tyo'ts'on jñ'oon na c'oonntyichenhan' ata na nguee'
xjen na jndë sijnda' jon na ntcohan'. Ntsco chonhan' juu
xuee ya na ntco'xen jon nn'an ntyja 'naan' na jndë tonan'tjahin
ndo' na nt'uiivihan' nan'ñeen na ngitsuhin.
\s Xuee na ncüjee' ntcüe' ta Jesús
\p
\v 8 Mantyi 'o' ntyjë na vantyja n'onho' Cristo na vi'ntyji
jaho', nt'ue ts'ön na cañjoon' n'onho' juu jñ'oonva. Nquii
Tyo'ts'on, mavio ncüii xuee ntyjii jon cha'xjen na ngiö na
mavio ncüii min ndyu, ndo' ncüii min ndyu itsijonhan' juuhan'
na nchjii jon cha'na ngiö na vio ncüii xuee.
\v 9 M'an minndye
nn'an na cotji'hin cüenta na jen nion na itsiquindë Cristo
jñ'oon na tco' jon 'ndyo jon ntyja 'naan' na ncüjee' ntcüe' jon.
Majo' tyi'tsichju jon na ntsiquindë jon jñ'oon'ñeen. Juu jon
t'man vaa na ivendoo' jon na ntcüe' n'on nn'an yo jnan na
nan'xuanhan. Ee min'chjo tyi'quint'ue ts'on jon na ngitsu ñuaan'
ts'an.
\p
\v 10 Majo' ya na ngüentyja xuee na ncüjee' ntcüe' ta Jesús,
itsijonhan' juu xuee'ñeen cha' ya na icüjee' tsanch'uee. Juu
xjen'ñeen nninc'uaa vi na jndei na ntycüii ntjö'ndue,
cha'vijon na c'uaa chon t'man na coco ncüii jndëë tque. Ndo'
'nan na sinchu' Tyo'ts'on na tijnt'uehin na tquen jon
tsonnangue, nndyi'ñ'enhan' yo ncüii chon na tenonntyja xjen na
jmin'han', ntcohan'. Ndo' tsonnangue yo tsoñ'en na tquen jon
na min nnonhan', nndyuii'ñ'enhan'.
\p
\v 11 Ng'e na nnda' vaa na jndë sijnda' jon na nndyuii'
tsoñ'en nan'min', chuhan' na joo xuee na tonnonchen,
quitsam'anho' na cota'nguee'ho' na conan'xuanho' ñuan nquii' na
tonnon Tyo'ts'on yo na cont'aho' na njon ngioho' jñ'oon' jon.
\v 12 Quint'aho' na nnda' viochen xjen na cominndoo'tyenho' na
ngüentyja xuee ya na ncüjee' ntcüe' ta Jesús. Tsoñ'en na
ico'xen jñ'oon' jon, quita'nguee'ho'han' cha' ntsityuaa'han'
na ngüentyja juu xuee'ñeen. Juu xjen'ñeen nninc'uaa ntjö'ndue
ndo' ntcoñ'enhan', ndo' 'nan na sinchu' jon na yo na tquen jon
tsonnangue, nndyi'han' na tenon ntyja xjen na jmin' juu
chon'ñeen.
\v 13 Majo' nquii Tyo'ts'on jndë tco' jon 'ndyo jon
ndëehë na nguaa ntjö'ndue xco yo tsonnangue xco. Cominnt'ö
joohan' yo na t'man qui nn'ön. Ndo' joo na nnc'on juu
quiñoon'ndue xco yo tsonnangue xco, tsoñ'enhan ninnquii'chen
nnc'onhan cha'xjen na chuhan' na tonnon jon.
\s Jñ'oon na mats'ia na itsiqui'maan' Pedrohin
\p
\v 14 Mang'e jo' 'o' ntyjë na vi'ntyjiho', viochen xjen na
cominndoo' 'o' na ngüentyja joo nan'min', quinan'chon yantyiho'
na juu na tsixuan tsonnangue tyi'ncü'ahan' 'o', min
min'ncüii nnon na nts'aahan' na va jnaanho', cha' nc'onho' na
tajñuaan' ts'onho' na tonnon jon.
\v 15 Cañjoon' n'onho' ntyja 'naan'
na iminndoo' ta Jesús na ncüjee' ntcüe' jon, ng'e na nnda' vaa
incyaahan' na jndyentyi nn'an ntsin'man jon ñuaanhan. Juu
tsanntyjëëhë Pablo, cha'xjen na incyaa Tyo'ts'on na jnda'
xquen jon, mannda' ro jñ'oon na tji jon na scüenon jonhan' na
m'anho'. Joo jñ'oon'ñeen itsijonhan' joohan' cha'xjen juu
jñ'oon na jndë tsjö ndö'. Juu Pablo'ñeen, ve'ngiö́'
jndyihin.
\v 16 Tsoñ'en tson na icüji jon na itscüenon jon
ndëë nn'an na vantyja n'on, itsinin jon ntyja 'naan' na nndyo
nnda' ta Jesús na ntco'xen jon nn'an ntyja 'naan' na
conan'tjahin. Joo tson'ñeen, ñ'en jñ'oon na chuhan' na jndyaa'
na ncüaa' n'on nn'anhan'. Joo nn'an na tyi'covaa' n'on nin
tsi'man jñ'oon' Tyo'ts'on, yo joo nn'an na chjo vantyja n'on,
joo nan'ñeen vandya' cotji'han cüenta na conan'man joo
jñ'oon'ñeen, cüajon cont'ahan cha'xjen cont'a yo vendyechen
jñ'oon' jon. Ndo' na cont'ahan na nnda', nquehin cont'ahan na
quit'uiihan'hin.
\p
\v 17 Ng'e jo' 'o' ntyjë na vi'ntyjiho', mangioho' na nc'on
nn'an na tyi'yuu' jñ'oon na coninncyahin. Mang'e jo', ninvito
quitquen jndyiho' cüenta ntyja 'naanho', tyi'nts'aahan' na joo
jñ'oon'ñeen na coninncya nan'ñeen na tyia nn'anhin na
conan'vi'nn'anhan, ntscyaahan' 'o', ndo' na nnda' ntji' 
ntcüe'han' 'o' ntyja 'naan' na tyen m'anho' yo Jesucristo.
\v 18 Mac'an na nninncyaa jon na ngaquentyichenho' ntyja 'naan'
juu naya na condui nquii Jesucristo na conduihin na itye'ntjon
jon jaa, yo na itsin'man jon ñuan njanhan. Ncyaa Tyo'ts'on
na t'manntyichen na ncüaa' n'onho' ntyja 'naan' nquii
Jesucristo. Cüit'maan' jon nanein, ndo' mancha'xjen
quinduihan'. Quindui na nnda'.