\id 2JN
\h 2 Juan
\mt1 Tson Na Jndë Ve Na Tji Juan
\c 1
\s Ntyja 'naan' jñ'oon na mayuu' yo na
quitsivi'ntyjii ts'an tyje juu
\p
\v 1 Mancö na conintque ja quityquii' ts'ian 'naan' Tyo'ts'on,
macüji tsonva na matscüenönhan' ndëë 'o' na conduiho' tmaan'
nn'an na icüji jonho' cüentaa' nquii jon yo nin'nque nn'an na
conan'jon yo 'o'. Vi'ntyji ja 'o' yo na xoncüee' ts'ön, ndo'
min chito xia'ntyi ncö, mantyi tsoñ'en nn'an na conan'jonhan
ntyja 'naan' juu jñ'oon na mayuu'.
\v 2 Mayuu' na vi'ntyji jndyi
ja 'o' ee juu jñ'oon na mayuu'ñeen m'aanhan' quii' nn'ön ndo'
mancha'chen xjen nc'oonhan' yo jaa.
\v 3 Nquii tyëëhë
Tyo'ts'on yo nquii Jesucristo na conduihin jnda jon, mac'an
ndëëhan na nnan'quindaa'hin 'o' juu naya na conduihan yo juu
na nty'ia ro nn'an ngiohan, yo nin'juu na conduihan na tajñuaan'
ts'onhan. Ncyahan na nan'xuanho' joo nan'min' viochen xjen na
cotsam'anho' ntyja 'naan' juu jñ'oon na mayuu' yo na
conan'vengioho' nn'an.
\p
\v 4 T'man incyaahan' na nën jndyi jnty'ia vendye ntyjeho' na
cotsam'anhan ntyja 'naan' juu jñ'oon na mayuu' cha'xjen nquii
tyëëhë Tyo'ts'on tquen jon jñ'oon na quint'a.
\v 5 Ndo'
nanein 'o' ntyjë na vi'ntyjiho', vaa jñ'oon na
nin'quitsiqui'man' ja 'o' na quinan'vengiö ntyjë na vantyja
n'onhan Jesús. Juu jñ'oonva chito jñ'oon xcohan', majo'
maninjuuntyihan' na jndë tondyeho' xjen na tye' na condyeho'
ntyja 'naan' Jesucristo.
\v 6 Ndö vaa na itsi'manhan' na vi'ntyjii ts'an Tyo'ts'on, na
vanguee' juu jñ'oon na iquen jon na ico'xenhan'. Ndo' juu
jñ'oon'ñeen cüejonhan' cha'xjen juu jñ'oon na tondye
jndyeeho' na quinan'vengiö nn'an.
\s Nn'an na conan'vi'nn'an
\p
\v 7 Nnda' matsjö ndëëho' ng'e jndye nn'an m'an na
coma'ndyi'han tsonnangue na conduehan na nquii Jesucristo
tyi'yuu' na jndyo jon na ts'anhin cha'xjen nquë. Majo'
min'ninchen ts'an na itsi'man juu jñ'oonva', itsivi'nn'an
tsan'ñeen nn'an. Conduihin ts'an na v'ii' ts'on juu Cristo.
\v 8 Majo' quitquenho' cüenta na tyi'nan'vi'nn'an jñ'oon'ñeen 'o'.
Ee xe nnda' vaa 'nan na ntquenonho', juu ts'ian na jndë jnt'aha,
nts'aahan' na ve' jn'aanhan'. Quinan'chonho' na quindë ya
ncy'onho' cüenta tsoñ'en nnon na ntsiquindaa' Tyo'ts'on 'o'.
\p
\v 9 Min'ninchen ts'an na nin'cüenoon' juu nchu vaa na
itsiquindyi jñ'oon na si'man Cristo, tyi'quitsixuan tsan'ñeen
ntyja 'naan' nquii Tyo'ts'on. Majo' minninchen ts'an na contjohin
yo jñ'oon'ñeen, condui tsan'ñeen ntyja 'naan'
tyëëhë Tyo'ts'on ndo' yo jnda nquii jon.
\v 10 Xe na aa
nguee' ts'an na m'anho' na ngitso juu na incyaa juu jñ'oon'
Tyo'ts'on, majo' juu jñ'oon na incyaa juu ntyja 'naan' Cristo,
xe na aa tyi'cüejonhan' cha'xjen na matsjö ndö', yajo' min
tyi'ntixee'ho'hin nt'aaho', min tyi'ninncyaho' ts'onhin.
\v 11 Ee
xe na aa ngitso ts'an nnon tsan'ñeen: 'U' ntyjë, cüenoon', xe
na aa nts'aa juu na nnda', itsijonhin yo juu ts'ian tyia na
tsixuan tsan'ñeen.
\s Jñ'oon na mats'ia na chu tsonva na tji Juan
\p
\v 12 Jndye jñ'oon min na icanhan' na quitsjö ndëëho', majo'
xia'ntyi jñ'oonmin' na macüji nanein. Ee ntyja ts'ön na
ncjö quinty'iaho', yajo' nnan'nën yo ntyjë, ndo' na nnda',
nninncyaahan' na nën jndyihi.
\p
\v 13 Nque nn'an na mantyi icüji Tyo'ts'on cüentaa' nquii
jon na m'anhin ntjoohin, mantyi coninncyahin ts'on 'naanhin ndëëho'.