\id JUD
\h Judas
\mt1 Tson Na Tji Judas
\c 1
\s Incyaa Judas ts'on 'naan' jon ndëë nn'an
cüentaa' Tyo'ts'on
\p
\v 1 Ja Judas condui ja ts'an na itye'ntjon nnon Jesucristo. Xiö
Santiago. Macüji tsonva na matscüenönhan' ndëë 'o' nn'an na
iqueen' tyëëhë Tyo'ts'on 'o' cha' nnduiho' ntsinda nquii jon,
nqueho' na vi'ntyjii jon na ivantyjee' jon 'o' ng'e Jesucristo.
\v 2 Juu na nty'ia ro nn'an na ntyjii Tyo'ts'on, yo juu na incyaa jon
na tajñuaan' ts'on ts'an na tonnon jon, yo nin'juu na vi'ntyjii
jon nn'an, ncyaa jon na ncy'onho' cüentahan'.
\s Ts'iaan' na tji Judas tsonva
\r (2 Pedro 2:1-17)
\p
\v 3 Tots'aa jndyihan' ts'ön na ncüji ncüii tson na
ntscüenönhan' ndëëho' ntyja 'naan' juu na conan'xuan na itsin'man
Tyo'ts'on ñuan njanhan. S'aahan' ts'ön na jndei' icanhan' na
quity'i 'ndyöho' na cüentyjee'tyenho' quityquii' na vantyja n'onho'
Jesucristo. Juuhan' ninjon tyincyaa Tyo'ts'on na nque nn'an na
ityii' jonhan ntyja 'naan' nquii jon, nan'xuanhinhan'.
\v 4 M'an nn'an na jndë squehin tyquii' nt'anho'. Joohan
conduihan nn'an na tyi'quita'nguee'hin tonnon Tyo'ts'on. Joohan
conan'cüejndyohan juu naya na condui nquii jon na
conan'manhan na tanin min na ve' ndö ro m'aan ts'an
yo ncüiichen tyje juu. Tivio jndui jñ'oon ntyja 'naan
nan'ñeen na nt'uivi' Tyo'ts'on joo nn'an na cont'a na nnda'.
Ndo' na nnda' conduehan, cotji ntcüe'han ntyja 'naan'
nquii Jesucristo na conduihin ty'öhö yo na 
co'xen jon jaa.
\s Min jñ'oon na conan'manhan' nchu vaa ntquenon
nn'an na conan'que'to n'onhan
\p
\v 5 Juu 'nan na s'aa Tyo'ts'on tivio, mangio yaho'han', majo'
min na nnda', mats'a na cañjoon' n'onho'han'. Siquindyaa jon
nn'an Israel navi' na tom'anhan ndyuaa Egipto, majo' ndëcya
jndyehan iscüje jonhan tsojnaan' na tatovantyja n'onhan jon.
\v 6 Ndo' mantyi cañjoon' n'onho' nchu vaa na tjon minndye
ángeles, tyí'quintjohin quityquii' juu ts'ian na t'ua Tyo'ts'on
ndëëhan, jnty'ehin naijon na sijnda' jon cüentahan. Jo' na jndë
tyii' jonhan ncüii joo na cha'vijon vancjo na taquintyja
najaanhan'. Sijnda' jon na quintjotyenhan jo' ata juu xuee t'man
ya na ntco'xen jon ángeles yo nque nn'an xeng'e na tonan'tjahan
nnon jon.
\v 7 Ndo' mantyi cañjoon' n'onho' ntyja 'naan nn'an
tsjoon Sodoma yo Gomorra yo nin'njoon tom'aan xi'jndio. Cha'xjen
joo ángeles tyia'ñeen tonan'tjahin, mantyi joo nn'an
njoon'ñeen tonan'tjatohan na ve' ndö' ro tom'anhan yo ntyjehan,
ata nannon tom'anhan yo ntyje nonhan. Ndo' tsojnaan' jo',
siquitsu Tyo'ts'onhan yo chon. Ndo' juu 'nan na tquenon
nan'ñeen, ata xjen nein conduihan' 'nan na itsi'manhan' ndëë
na nquii Tyo'ts'on nt'uiivi' jon nn'an na nan'xuan jnan yo chon na
tyi'je'quinduu'.
\p
\v 8 Min na nnda' vaa, joo nan'ñeen na tyi'xoncüe jñ'oon na
conan'manhin ndëëho', nquehan conan'ty'ahan si'ts'o 'naanhan na
ve' ndö' ro m'anhan yo nn'an. Ndo' juu najndei na condui ta
Jesús na co'xen jon, tyi'quitjue'cjehan ntyja 'naan'han'. Ndo'
ata conan'neinhan jñ'oon tsan' nacjo ángeles na conditque na
m'aan Tyo'ts'on.
\v 9 Min tyi'quint'a nan'ñeen cha'xjen s'aa juu
ángel na conditque, tsan na jndyu Miguel. Sijndei' 'ndyo yutyia
tque nnon juu Miguel'ñeen na nin'cay'oon juu si'ts'o 'naan'
Moisés. Majo' tyí'quitsinin Miguel jñ'oon tsan' nnon yutyia
tque'ñeen na quitscüejnaan'han'hin. Xia'ntyi tso jon: “Nquii
Tyo'ts'on quitsityia' jon 'u'.”
\p Mannda' jñ'oon tso jon nnon juu. Tyí'c'oon' ts'on jon na
ntscüejnaan' jonhin na ngitso jon na tyi'ya its'aa juu.
\v 10 Majo' nanmin' na m'anhin quii' nt'anho' na tyi'yuu' jñ'oon na
coninncyahan, conan'manhan jñ'oon na itscüejnaan'han'
min'ninchen jñ'oon na ndicüaa' n'onhan joohan'. Tyquii' na covaa'
n'on nan'ñeen joo jñ'oonmin', itsijonhan'hin cha'vijon quioo'
na ve' cont'ato o', na ndiquindëë ntji' o' cüenta 'nan na
chuhan'. Ndo' jnaan' na nnda' vaa na cont'a nan'ñeen,
tyi'je'quintycüii na it'uiivi' Tyo'ts'onhan.
\p
\v 11 Joo nanmin' na conan'vi'nn'anhan 'o' yo jñ'oon na
conan'manhan ndëëho', nt'uiivi' jonhan ee cüejon cont'ahan
cha'xjen tots'aa Caín. Ndo' cha'xjen juu Balaam nin'cüantjon
jon xoquitu' yo juu natyia na si'man jon ndëë nn'an
Israel, majo'ntyi cont'a nanmin'. Ndo' cha'xjen t'uiivi'han'
Coré na suehin cjoo' Moisés, mantyi nt'uiivi'han' nanmin' na
cüajon conan'vehan cjoo' Tyo'ts'on.
\v 12 Nanmin' ñ'enhan quii' nt'anho' xjen covancüiho' na
tojnaan' cocüa'ho' ntyja 'naan' na vi'ngioho' ntyjeho' na vantyja
n'on Cristo. Ndo' na conan'jon nan'ñeen yoho',
itsijonhan'hin cha'vijon 'nan ty'a quii' nt'anho', ndo' jo'
itscüejnaan'han'ho'. Majo' nan'ñeen min tyi'jn'anhin
na cocüa'hin ndo' covehin yoho'. Joohan conduihan cha'vijon
quito na ve' xia'ntyi na m'an n'onhin na cotixee' 
nquehan. Itsijonhan'hin cha'vijon chincyu na itscyaa jndyehan' na
tandaatsua' quichuhan'. Itsijonhan'hin cha'vijon n'oon na
tatë cove', itsijonhan'hin cha'vijon 'nan ve jnda jndë tjëhan',
cüii nnon na jndë tye ts'anhan'.
\v 13 Mantyi itsijonhan'hin cha'na ndaandue na ndicüichen na
ijuuhan'. 'Nan na cont'a nan'ñeen, jnaan' jndyi vaahan',
itsijonhan' joohan' cha'na chon' ty'a na icüji' ndaandue
xjen na ijuuhan'. Ndo' mantyi itsijonhan' nan'ñeen cha'na ncjuu na
tajnda'to yuu jon co'ohan'. Ndo' na nnda' xjen nn'anhin, jndë sijnda' 
Tyo'ts'on na nt'uiivi' jonhan. Ntyii' jonhan yuu jon na taquintyja 
najaan na quintjotyenhan jo'. Tyi'jon vi nndui'han jo'.
\p
\v 14 Nquii Adán, jon ts'an na tom'aan jndyee. Ndo' Enoc
conduihin ts'an na jndë ntyque' jnda na jndyocahan' tsjan 'naan'
juu Adán. Juu Enoc'ñeen sinin jon jñ'oon na si'man Tyo'ts'on
nnon jon ntyja 'naan nanmin' na m'anhan quii' nt'anho'. Tso jon:
“Quitquenho' cüenta, nquii jon na conduihin na itye'ntjon jon
tsoñ'en, jndë ndyo jon yo jndye min ángeles cüentaa' jon na
ñuan nquii' conduihin.
\v 15 Ndyoco'xen jon tsoñ'en nn'an ntyja 'naan' na tonan'tjahan.
Nnts'aa jon na quit'uiityenhan' nque nn'an na tyi'c'onhan
ntyja 'naan' Tyo'ts'on, tsojnaan' tsoñ'en nnon na tont'ahan na
tonan'vehan cjoo' jon. Ndo' mantyi ntyja 'naan' tsoñ'en
jñ'oon tsan' na tonduehan cjoo' jon.”
\p Ndö' vaa jñ'oon sinin Enoc'ñeen.
\v 16 Nanmin' na tyi'yuu' jñ'oon na coninncyahan, nin'quii'chen
conan'ncyjoo'hin, cota'jñ'oonhan 'nan na cont'a nn'an, joo
nn'an na conduihan nn'anjnan na tyi'xe'ncyahan na ntco'xen
Tyo'ts'onhan. Cotsam'anhan yo ntyja 'naan' natyia na nt'ue
jndyi n'onhan. Ndo' conan'ntsa jndyihin nchu vaa na
conduihin. Mantyi conan'neinhan jñ'oon ntyja 'naan nquehin
ndëë nn'an cha' quitji' nan'ñeen cüenta na t'manntyichen
na vaquinjon' 'nan cont'ahan. Nnda' cont'ahan cha' nninncya
nan'ñeen yo 'nan na ninjnt'uehan.
\s Itsiqui'maan' Judas nn'an na vantyja n'on
\p
\v 17 Majo' 'o' ntyjë na vantyja n'onho' Cristo na vi'ntyji
jaho', cañjoon' n'onho' joo jñ'oon na jndë tondyeho'. Nquii
Jesucristo na conduihin na itye'ntjon jon jaa, t'ua jon
ts'ian ndëë nn'an na tji jon, ty'ecyahan jñ'oon naya
'naan' jon.
\v 18 Jndue nan'ñeen ndëëho' na joo ndyu na mats'ia nc'on nn'an
na nnan'cüejnaan'han nn'an na vantyja n'on Tyo'ts'on. Joohan
xia'ntyi na nta'nguee'han yo 'nan natyia na nt'ue jndyi
n'onhan.
\p Nnda' vaa jñ'oon na tonan'quindyii nan'ñeen 'o'.
\v 19 Joo nanmin' na tyi'yuu' jñ'oon na coninncyahin, cont'ahin
na joo nn'an na vantyja n'on Cristo, cot'on nan'ñeen yo
ntyjehan. Cotsam'an nanmin' cha'xjen na nt'ue jndyi n'on
s'ihan, min tyi'c'oon Espíritu Santo quii' n'onhan.
\p
\v 20 Majo' 'o' ntyjë na vantyja n'onho' Jesucristo na vi' ntyji
jndyi 'o', juu na vantyja n'onho' jon na ji'uahan', caqueho'
ntyja 'naan'han'. Xjen na conan'neinho' nnon Tyo'ts'on, nquii
Espíritu Santo quitsi'man jon ndëëho' nin jñ'oon ndueho'.
\v 21 Nquii Tyo'ts'on m'aan jon na vi'ntyjii jon 'o'. Ninnquii'chen
quintjotyenho' ntyja 'naan'han'. Viochen xjen na covendoo'
tcüiiho' juu xuee na yo na nty'ia roho' ntyjii Jesucristo na
nndyoy'oon jon na nnan'xuanho' na tyi'quintycüii na cota'ndo'
ñuaanho'. Nquii jon na conduihin na itye'ntjon jon jaa.
\p
\v 22 M'an nn'an na ve vaa na m'aan' n'onhan yo juu jñ'oon'
Tyo'ts'on. C'onho' na nty'ia ro nan'ñeen ngioho'.
\v 23 Ñ'en
ntyjehan na juu 'nan na conan'tjahin itsijonhan' juuhan'
cha'vijon ts'an na jndë tyioohin quityquii' chon. Juu na
vay'oonhan'hin na itsi'ndaa'han' joohan, quitji' ntcüe'ho'han
quityquii'han' cha' ndëë ntsin'man Tyo'ts'on ñuaanhan. Ndo'
ndëë mañoon ntyjehan na t'man jndyi na jndë jnan'tjahan,
quinan'manho' na nty'ia rohan ngioho', majo' quitsincyaa'
jndyihan' n'onho' na juu jnan na nan'xuanhan, tyi'ngachuhan'ho'. 
Tsoñ'en nnon 'nan na itsi'ndaa'han'hin yo 'nan na
itsity'ahan'hin na tonnon Tyo'ts'on, cüijndo' jndyiho'han'.
\s Jñ'oon na mats'ia na itsit'maan'han'
Tyo'ts'on
\p
\v 24 Nquii Tyo'ts'on vaa najndei na conduihin na ngüantyjee'
jon 'o' na juu jnan tyi'ntscyaahan'ho'. Na mayo juu najndei'ñeen
nninncyaa jon na nc'onho' naijon na nancoo' jndyi na m'aan jon na
min'ncüii jnan tyi'nan'xuanho'. Na nndui na nnda', nninncyaahan'
na nein jndyiho'.
\v 25 Xia'ntyi nquii Tyo'ts'on conduihin na
itsin'man jon ñuan njanhan, cüit'maan'hin. Ntyja 'naan' nquii
Jesucristo na conduihin na itye'ntjon jon jaa, quitji' nn'an
cüenta na nquii Tyo'ts'on taquintyja t'man conduihin. Juu jon
tsoñ'en najndei conduihin. Xia'ntyi nquii jon conduihin na
co'xen jon. Vitjachen na tui tsoñ'en, nan'min' conduihin, ndo'
macüajon conduihin nanein yo ninvaa na tonnonchen. Quindui na
nnda'.