\id REV
\h Apocalipsis
\mt1 'Nan Na Tityincyoo' Nnon Juan Na Si'man
\mt2 Jesucristo
\c 1
\s Jñ'oon na si'man Jesucristo 'nan na
xejnda ngüentyja
\p
\v 1 Jñ'oonmin chuhan' jñ'oon na tyincyaa Tyo'ts'on nnon
Jesucristo na quitsi'man jonhan' ndëë nn'an na cotyentjonhan
nnon jon. Joo jñ'oonmin conan'quindyihan' ntyja 'naan' 'nan na
cje ro na ngüentyja. Ja Juan na matye'ntjön nnon Cristo, t'ua
jon ts'ian nnon ángel 'naan' jon na tyjee' tsan'ñeen na m'an 
na quitsiquindyi tsan'ñeen jñ'oonmin ja.
\v 2 Macüji' jndyoyu ntyja 'naan' tsoñ'en 'nan na tityincyoo'
nnön. Tsonvahin chuhan' jñ'oon ntyja 'naan' jñ'oon'
Tyo'ts'on yo jñ'oon na mayuu' na si'man nquii Jesucristo.
\p
\v 3 Ityio Tyo'ts'on jn'aan nquii ts'an na itsijnaan' joo
jñ'oon na chu tsonva. Ndo' mantyi ityio jon jn'aan joo nn'an na
condyehinhan' ndo' cota'nguee'hin nchu vaa tsi'manhan'. Ee
jndë mavaa xjen na nndui cha'xjen na conan'quindyi jñ'oonmin.
\s Incyaa Juan ts'on 'naan' jon ndëë nn'an
cüentaa' Tyo'ts'on ndyuaa Asia
\p
\v 4 Ja Juan matscüenön jñ'oonmin ndëë 'o' na conduiho'
ntyque' tmaan' nn'an na vantyja n'onho' Jesucristo na m'anho'
ndyuaa Asia. Nquii Tyo'ts'on mancüiixjen m'aan jon, mantyi
tom'aan jon ndyu na toxen'chen vitjachen na nc'oon tsonnangue,
ndo' ngüentyja xjen na nncüjee'non jon. Mac'an na nninncyaa
jon na ncy'onho' cüenta juu naya na tsixuan jon, yo nin'juu na
conduihin na tajñuaan' ts'onhin. Ndo' mantyi joo ntyque'
espíritus na m'anhan tonnon juu silla na manin' ts'iaan' 'naan'
jon, ncyahan na nan'xuanho' joo nayamin'.
\v 5 Ndo' mantyi nquii Jesucristo ncyaa jon na nndaho' joo
nayamin', nquii jon na conduihin na tocüji' jndyoyuhin
ntyja 'naan' Tyo'ts'on. Manquii Jesús na conduihin ts'an
navejndyee na jnanquintyja jon quii' nt'an nn'an na jndë
tjë na tando' xco jon. Conintquentyichenhin ndëë
tsoñ'en nn'an na conduihan nanm'ann'ian na cotoxenhan nn'an
tsonnangue. Vi'ntyjii jndyi jon jaa, ndo' ng'e na jnan'cuee'
nn'anhin na tcüe' neoon' jon, jo' juu jnan na tonan'xuan, 
jndë siquindyaa jon jaa na tonan'y'oonhan' jaa. 
\v 6 Ndo' nquii Cristo jndë tquen jon na condui jaa tmaan' nn'an
na itye'ntjon jon. Mantyi jndë tquen jon na condui jaa
ntyee na cotye'ntjön nnon tye jon, nquii ta Tyo'ts'on.
Ninnquii'chen cüit'maan'hin xeng'e juu najndei na conduihin yo
nin'juu na itye'ntjon jon tsoñ'en. Ninnquii'chen quindui na nnda'.
\q
\v 7 Quitquenho' cüenta, jndë mandyo Cristo quityquii'
chincyu. 
\q Tsoñ'en nn'an njnty'iahan jon
yo nque nn'an na jnan'jonhan na cue' jon,
ndo' yo nin'tsoñ'en nn'an na ninvaa tsonnangue.
\q Juu xjen na njnty'iahan jon, jndei nnan'xuaahan
na itsi'ndaa'han' ngiohan.
\q Mayuu' na nndui cha'xjen na matsjö.
\p Nnda' vaa na tso tsan'ñeen.
\p
\v 8 Nquii Tyo'ts'on na taquintyja najndei conduihin, itso jon:
\p “Ja m'an vitjachen na tui tsoñ'en, ndo' nc'önntyëchën vi na
jndë tenon tsoñ'en.” Ndö' vaa tso nquii jon na mancüiixjen m'aan
jon vitjachen na nguaa tsonnangue yo tsjö'ndue, ndo' mantyi
ngüentyja xjen na ncüjee'non jon.
\s Nnon Juan tityincyoo' Cristo na quixueehin
\p
\v 9 Ja Juan na macüji tsonvahin, condui ja ntyjeho' na mavantyja
ts'ön Jesucristo. Matsijon ja yoho' ntyja 'naan' na ico'xen jon.
Mantyi condui ja ts'an na itsijonhin yo navi' na coquenonho' ng'e
na vantyja n'onho' Jesús. Ndo' mantyi yo nin'juu na
contjotyenho' ntyja 'naan' jon yo na t'man n'onho' minninchen
nnon 'nan na inchjehan' 'o'. Tom'an ja tyuaa chjo na jndyu Patmos na
m'aan ndaandue xi'jndiohan'. Tyii' gobiernon ja jo' tsojnaan' na
toninncya jñ'oon' Tyo'ts'on ndo' na tocüji' jndyoyu ntyja
'naan' nquii Jesús.
\v 10 Juu xuee na covañjoon' nn'ön na
tando' xco Jesús, tom'an ja nacje 'naan' Espíritu Santo. Ndo'
juu xjen'ñeen tox'ën jndyi na cha'vijon jndyee' ts'an na c'uaa
jndyi tsinin. Itsijonhan' na c'uaahan' cha'vijon ya na icüja'
ts'an ndu.
\v 11 Jndyi na itso jon nnön:
\p —Joo 'nan na mandyia', chen jndyi cüji'han' nnon ncüii
tson. Quitscüenon'han' ndëë joo ntyque' ntmaan' nn'an na
vantyja n'on ja na m'anhan ndyuaa Asia, juu tsjoon Éfeso, yo
Esmirna, Pérgamo, Tiatira, Sardis, Filadelfia, ndo' yo
nin'Laodicea.
\p Ndö' vaa jñ'oon na jndyi.
\p
\v 12 Tequën cha' nty'ia nin nquii jon na itsinin yo ja. Yajo' 
jnty'ia ntyque' ncjo na jndëhan' yo s'on ijan na contyjo
chonhan'.
\v 13 Ndo' xoncüe quii' nt'anhan' jnty'ia
minntyjee' ncüii cha' vaa ts'an. Cüe jon ncüii ndiaa tco xjen
tyuaachen. Ndo' tsi'jndya jon, tyen ncüii 'nan na jndëhan' yo
s'on ijan.
\v 14 Soxquen jon quichi'tyenhan' cha'vijon soo'
quitsman quichi', cha'vijon quichi' tein. Ndo' tënnon jon
quixueehan' cha'vijon tsachon t'man.
\v 15 Mantyi ng'ee jon quixuee jndyihan' cha'na colo tsixuan s'on
ve xjen na jndë jndui'han' quityquii' ton' na conein ncjo
na sijnty'ui ya ts'anhan'. Ndo' jndyee' jon c'uaahan'
cha'vijon na c'uaa vja ndaa jndaa.
\v 16 Nt'ö jon tontyjaya too' ntyque' ncjuu, ndo' quii' 'ndyo jon
jndui' xjo na të ve ntyjaquio. Ndo' xuee jndyi nnon jon
cha'xjen naxuee ndo'cüjioon' na yajmin'.
\p
\v 17 Ndo' xjen na jnty'iahin, jnaan' na ty'uë jndyi, tyiooto
ja tong'ee jon cha'vijon ts'oo. Yajo' nt'ö jon ntyjaya tyio
jonhan' nacjö. Itso jon nnön:
\p —Tyi'nty'ue'. Ja condui nquii jon na tom'aan navejndyee vitjachen 
na nguaa tsonnangue ndo' min na quintycüiihan', majo' ja ninvaa m'an.
\v 18 Ja ninnquii'chen mavant'ö. Ndo' min na jndë t'iö, majo'
naneinhin m'an na tyi'quintycüii na mavant'ö. Ndo' juu na
co'xenhan' na covje nn'an, condui ja na matye'ntjönhan',
juuhan' ndo' mantyi naijon na m'an nn'an na jndë tjë na
tyí'c'onhan ntyja njan.
\v 19 Ndo' itsontyichen jon nnön: 'Nan na jndë jndyia' na tityincyoo'
nnon' yo mantyi tsoñ'en nnon na nnintyincyoo'ntyi na minhan' nanein yo
'nan na xejnda ndui, cüji'han'.
\v 20 Ndo' ntyja 'naan' juu
jñ'oon na vanty'iu m'aanhan' na tacovaa' n'on nn'anhan', ndö
vaa na itsi'manhan'. Joo ntyque' ncjuu na jndyia' na too' nt'ö
ntyjaya, conduihan' joo ntyque' ángeles na cotquenhan cüenta
joo ntyque' tmaan' nn'an na conduihan cüentaa' Tyo'ts'on. Ndo'
mantyi joo ntyque' ncjo na jndëhan' yo s'on ijan na contyjo
chon, joohan' conduihan' joo ntyque' tmaan' nn'an na
conduihan cüentaa' nquii Tyo'ts'on.
\c 2
\s Jñ'oon na tyincyaa Jesucristo ntyja 'naan
ntyque' tmaan' nn'an
Jñ'oon cüenta nn'an tsjoon Éfeso
\p
\v 1 Tsochen Jesús nnön: “'U' Juan, cüji' jñ'oon na matsjö
nnon' ndo' quitscüenon'han' na m'aan nquii ángel na ivantyjee'
jon tmaan' nn'an na conduihan cüenta na m'anhan tsjoon Éfeso.
Quitsu' ndëëhan:
Ndö vaa na matsjö ncö na too' ntyque' ncjuu nt'ö ntyjaya. Mancö 
na manty'i quii' nt'an joo ntyque' ncjo na jndëhan' yo s'on ijan na 
contyjo chonhan'. 
\v 2 Ja ntyji ya ncüii cüii nnon na cont'aho' ntyja njan, ndo'
mantyi yo na conan'jonho' na cotye'ntjonho' nnön. Ndo' mantyi
ntyji na contjotyenho' ntyja njan. Ntyji na tyi'quintjo ya
ngioho' yo joo nn'an na conan'jonhan yo 'nan tyia. Ndo' mantyi
maquën cüenta na joo nn'an na conduehan na nquii Jesucristo
jñon jonhan ndëë nn'an yo jñ'oon naya 'naan' jon, cotji'ho'
cüenta na condui nan'ñeen nn'an na ve' conan'vi'nn'anhin.
\v 3 'O' ng'e na njon jndyi ngioho' yo xuë, m'anho' na t'man n'onho'
conan'quii n'onho' quityquii' tsoñ'en navi' na coquenonho', min
tyi'qui'ndyeho' ntyja njan.
\v 4 Majo' ndö vaa na tyi'cavee'
ntyji ntyja 'naanho'. 'O' tyi'conan'vengioho' ja cha'xjen na
vejndyee.
\v 5 Ng'e na nnda', cañjoon' n'onho' nchu vaa na
tom'anho' na tonnön na toxen'chen, nanein jndë tycyaaho' na
nnda' tonan'xuanho'. Jo' quintcüe' n'onho' 'nan na
conan'tjaho' ndo' quint'a nnda'ho' cha'xjen na tont'a jndyeeho'.
Majo' xe na aa tyi'ntcüe' n'onho', yajo' ncüjenön ndo' ncüji'
ntcü'ë juu xjo cüentaho' na ntyjo chonhan'. 
\v 6 Majo' min na nnda', vaa ncüii nnon na nan'xuanho' na cavee'
ntyji. M'anho' na jndoho' joo ts'ian na cont'a nn'an tmaan'
nicolaítas. Ndo' mantyi ja jndö jndyi 'nan na cont'a
nan'ñeen.
\p
\v 7 “Min'cya ro ts'an na nin'cüaa' ts'on jñ'oonmin',
quindyii juu jñ'oon na itsinin nquii Espíritu Santo ndëë
joo nn'an na conduihan ntmaan' cüentaa' Tyo'ts'on. Juu
ts'an na condëë its'aa yo natyia, ninncya ja na ntquii juu
tëë' ts'on na incyaahan' na tyi'quintycüii na vando'
ñuaan' juu. Juu ts'oon'ñeen minntyjee'han' quii' paraíso
naijon na m'aan nquii Tyo'ts'on.”
\s Jñ'oon cüenta nn'an tsjoon Esmirna
\p
\v 8 Tsontyichen Jesús nnön: “Juu jñ'oon na matsjö nnon',
cüji'han', ndo' quitscüenon'han' na m'aan juu ángel na
ivantyjee' jon tmaan' nn'an na conduihan cüentaa' Tyo'ts'on
tsjoon Esmirna. Quitsu' ndëëhan:
Jñ'oonmin matsinën ncö, ja na mancüiixjen m'an navejndyee ndo' 
na mats'iañ'en. Mancö na jnan'cuee' nn'an ja, majo' vant'ö xcö.
\v 9 Joo navi' na
coquenonho', nchji jnt'a ntyja 'naan'han', ndo' mantyi nchji na
jñen' jndyiho'. Majo' na tonnon Tyo'ts'on conduiho' na tyaho'.
Manchji jñ'oon tsan' na conan'nein minndye nn'an nacjoho'.
Nan'ñeen tuihan tsjan nn'an judíos, majo' ng'e na cont'a vi'han
'o', jo' tsi'manhan' na chito conduihan nn'an judíos, conduihan
tmaan' cüentaa' Satanás.
\v 10 Tyi'nan'tyueho' ntyja 'naan'
juu navi' na mavaa xjen na ntquenonho'. Ee juu yutyia nts'aa juu
na ntyi' nn'an vendyeho' vancjo cha' quitsi'manhan' na aa mayuu'
na vantyja n'onho' ja. Juu navi'ñeen, nincüanntyi ro xuee na
ngenonho'han', majo' quintjotyenho' na vantyja n'onho' ja min xe
na aa nan'cüje nn'anho', ndo' nninncya na ncy'onho' cüenta na
tyi'quintycüii na cota'ndo'ho', na juuhan' tsixuanhan' cha'vijon
corona na njon jndyihan'.
\v 11 Minninchen ts'an na nincüaa' ts'on jñ'oonmin', quindyii
juu jñ'oon na itsinin nquii Espíritu Santo ndëë joo
nn'an na conduihan ntmaan' cüentaa' Tyo'ts'on. Nquii ts'an
na condëë its'aa yo 'nan tyia, juu na covje nn'an na vja ve,
tyi'je'quit'uiihan' tsan'ñeen”.
\s Jñ'oon cüenta nn'an tsjoon Pérgamo
\p
\v 12 Tsontyichen Jesús nnön ja Juan: “Joo jñ'oonmin na matsjö
nnon', cüji'han', ndo' quitscüenon'han' na m'aan juu ángel na
ivantyjee' jon nn'an na conduihan tmaan' cüentaa' Tyo'ts'on
tsjoon Pérgamo. Quitsu' ndëëhan: “Ndö vaa jñ'oon na matsjö
ncö na y'ön xjo na të ve ntyjaquio.
\v 13 Mantyji ya ntyja 'naan'
na cotsam'anho' xoncüe quii' nt'an nn'an na m'an tocje 'naan'
Satanás. Majo' min na nnda', contjotyenho' ntyja njan. Tacotjiho'
na vantyja n'onho' ja min na xoncüe quii' tsjoonho' jnan'cuee'
nn'an juu ntyjeho' Antipas. Juu tsan'ñeen yo mancha'chen ts'on
jon tocüji' jndyoyu jon ntyja njan ndëë nn'an tsjoonho' na
m'anhan nacje 'naan' Satanás.
\v 14 Majo' m'aan cüanntyi ro
jñ'oon na nchji na tyi'cotsam'anho' na tonnön cha'xjen na
chuhan'. Ndyii' ntyjeho' na tyi'nin'qui'ndyehan jñ'oon na
totsi'man Balaam. Tsan'ñeen si'man jon nnon Balac jñ'oon na
s'aahan' na tonan'tja nn'an Israel nnon Tyo'ts'on. Ee juu
Balaam'ñeen itso juu na ya quinan't'maan' nan'ñeen 'nan na ve'
tonan'ya nn'an. Ndo' tanin min na aa ntquiihan s'i quioo' na
conan'cüje nn'an na conan't'maan'han juu nan'ñeen. Min tanin xe
na aa m'anhan yo ntyjehan na ve' ndö' ro.
\p Ndö' ro jñ'oon na totsi'man juu Balaam'ñeen.
\v 15 Ndo'
tsontyichen Jesús: Mantyi vaa ncüiichen 'nan na ntyji yoho', na
ñ'en ntyjeho' na conan'jontyenhan yo juu jñ'oon na conan'man
nn'an tmaan' nicolaítas.
\v 16 Mang'e jo' quintcüe' n'onho' jnanho' nan'min', ee xe
tyi'ntcüe' n'onho', cje na nguënön ndo' ntsiquit'a ja
tyia' yo nan'ñeen yo xjo na ndyii'han' quii' 'ndyö.\v 17 Minninchen ts'an na nin'cüaa' ts'on joo jñ'oonmin', 
quindyii juu jñ'oon na itsinin nquii Espíritu
Santo ndëë joo nn'an na conduihan ntmaan' cüentaa' Tyo'ts'on.
Ncüii ncüii ts'an na xe'ncyaa juu na juu 'nan tyia ntco'xenhan'hin,
nninncya na ntcüa' juu 'nan na itsijonhan' juuhan' cha'vijon
maná, ncüii nnon na tyi'covaa' n'on nn'an ntyja 'naan'han'. Ndo' mantyi
nnon tsan'ñeen nninncya ja ncüii tsjö' chjo na quichi'. 
Nnonhan' nnintyincyoo' xuee' tsan'ñeen na xcohan' na tji ja na
xia'ntyi nquii juu ncüaa' ts'on juu nchu vaa tsi'manhan'.
\s Jñ'oon cüenta nn'an Tiatira
\p
\v 18 Tsontyichen Jesús nnön: “Joo jñ'oonmin na matsjö nnon',
cüji'han', ndo' quitscüenon'han' na m'aan juu ángel na
ivantyjee' jon nn'an na conduihan tmaan' cüentaa' Tyo'ts'on
tsjoon Tiatira. Quitsu' ndëëhan: “Ndö jñ'oon na matsinën
ncö na condui ja jnda Tyo'ts'on. Maja na quixuee jndyi tënnön
cha'vijon tsachon, manty'ia ata quityquii' n'on nn'an. Ndo'
quixuee ng'ë cha'vijon colo s'on ve xjen na jndë jndui'han'
quii' ton' na conein ncjo ndo' na sijnty'ui ya ts'anhan'.
\v 19 Chen jndyi ntyji 'nan na cont'aho'. Mantyji ntyja 'naan' na
conan'vengioho' nn'an yo juu na vantyja n'onho' ja. Ndo' maquën
ya cüenta na xoncüee' n'onho' na cotyentjonho' nnön na
conan'quii n'onho' navi' na coquenonho'. Mantyi maquën cüenta
nchu vaa na conan'jonho' yo ja, majndyentyi nnon 'nan na cont'aho' cha'xjen
na chuhan', chito cha'xjen na tom'an jndyeeho'.
\v 20 Majo' vaa
'nan na ntyji na tyi'quichuhan' ntyja 'naanho'. Ee tyquii' nt'anho'
m'aan ncüii tsanscu na itsi'man juu jñ'oon tsan' ndëëho'.
Ve' itso nquii juu na conduihin ts'an na incyaa juu jñ'oon'
Tyo'ts'on, majo' ve' its'aa juu cha' tots'aa tsanscu na jndyu
Jezabel, ndo' na nnda' joo nn'an na vantyja n'on ja,
itsivi'nn'an juu nan'ñeen. Ee itsi'man juu na tanin min na ve'
ndö' ro m'an nn'an yo ntyjehan, ndo' na cuaa nquii min na
conan't'maan'han 'nan na conan'ya nn'an, ndo' mantyi ya min xe na
aa cotquiihan s'i quioo' na conan'cüje nn'an na conan'tmaan'hin
joo nan'ñeen.
\v 21 Jndë tyincya xjen nnon juu tsanscu'ñeen na quintcüe' ts'on
juu na ve' ndö' ro m'aan juu yo nn'an, majo'
tyi'nin'qui'ndyii juu na nnda' vaa na vam'aan juu.
\v 22 Majnaan' jo' ntsquiö tycu v'ii nacjoo' juu. Ndo' nts'a na
nque nn'an na ve' ndö' ro m'anhan yohin, xe na aa
tyi'ntcüe' n'onhan 'nan na jndë cont'ahan na si'man juu
ndëëhan, cüejon t'man navi' ntquenonhan cha'xjen nquii
tsanscu'ñeen.
\v 23 Ndo' mantyi joo nn'an na conduihan cha'vijon ntsinda juu
ng'e na conan'jonhan yo jñ'oon na incyaa juu, ntscüjëhan.
Yajo' nque nn'an na conduihan ncüii ncüii tmaan' na
icüji Tyo'ts'on cüentaa' nquii jon, ncüaa' n'onhan na
chen chen ntyji ja nchu vaa 'nan itsitiu ts'an yo nchu vaa na
m'aan' ts'on juu. Ja ndyiön ncüii ncüii 'o' xi' ncüii
nchu vaa 'nan na cont'aho'.
\v 24 Majo' m'an
minndyeho' tsjoon Tiatira na tyi'conan'jonho' yo juu jñ'oon na
itsi'man juu tsanscu'ñeen. Joo nan'ñeen na conan'jonhin yo
juu, conduehin na min jñ'oon na njon jndyi nan'xuanhan' ntyja
'naan' Satanás. Majo' 'o' na tyi'conan'jonho' yo jñ'oon'ñeen,
tavi'nan ncüiichen xu na matyiö nacjoho'.
\v 25 Xia'ntyi na quintjotyenho' tyquii' na vantyja n'onho' ja ata
xjen na nguëntcü'ë na m'anho'.
\v 26 Ntyja 'naan nque ntyjeho' na cont'ahin 'nan na nt'ue ts'ön,
na tyi'xe'ncyahan na juu natyia ntquenhan' xjen
'naan'han'hin, ja nninncya na nditquehin ndëë tsoñ'en
nn'an tsonnangue.
\v 27 Joohan ngitoxenhan nan'ñeen yo naijndei'han', ndo' ya na
tyi'nin'quita'nguee' nan'ñeen, nan'tyuii'han joo
nan'ñeen cha'vijon ya na itsityuii' ts'an xuaa na jndëhan'
yo ts'oquichu. Nquii Tyëhö' jndë tyincyaa jon najndei na
tsixuan ja na ntco'xën. Ndo' cha'xjen na s'aa jon na nnda',
manda' vaa na ninncya na quinan'xuan nan'ñeen na jndë'han
na quitoxenhan.
\v 28 Ndo' mantyi nninncya na nndahan quixjuunco.
\v 29 Minninchen ts'an na nin'cüaa' ts'on jñ'oonmin',
quindyii juu jñ'oon na itsinin nquii Espíritu Santo ndëë
joo ntmaan' nn'an na conduihan cüentaa' Tyo'ts'on”.
\c 3
\s Jñ'oon cüenta nn'an tsjoon Sardis
\p
\v 1 Tsontyichen Jesús nnön: “Cüji' jñ'oon na matsjö nnon',
ndo' quitscüenon'han' na m'aan ángel na ivantyjee' jon nn'an na
conduihan tmaan' cüentaa' Tyo'ts'on na m'anhan tsjoon Sardis.
Quitsu' ndëëhan:
“Ndö jñ'oon matsjö, ncö na matsixuan ntyque' Espíritu cüentaa' 
Tyo'ts'on yo joo ntyque' ncjuu'ñeen. Ntyji
'nan na cont'aho' ndo' ntyji na condue nn'an na 'o' t'man cojoo'
n'onho' ntyja njan, majo' 'o' conduiho' cha'vijon nt'oo.
\v 2 Jo' quintcüiho' ndo' quinan'chonho' ntyja 'naan' na vantyja
n'onho' ja, na itsijonhan' juuhan' cha'vijon ts'an na vave'.
Ee juu na cotsam'anho', maquën cüenta na ncüii cüii
nnon ntyja 'naan' na cotye'ntjonho' nnon Tyo'ts'on,
tyi'quindëhan' cha'xjen na chuhan'.
\v 3 Jo' cañjoon' n'onho' juu jñ'oon na ty'onho'
cüenta. Quita'nguee'ho'han' ndo' quintcüe' n'onho'
jnanho'. Majo' xe tyi'nan'jñ'oon'ho' 'nan na matsjö
ndëëho', ninjonto ncüjënön cha'vijon na icüjee'
tsanch'uee, min tyixe'cüaa' n'onho' yuu xjen nguë.
\v 4 Majo' tsjoonho' Sardis m'an vendye ntyjeho' na tyi'cov'ahan
yo juu 'nan tyia ee cotsam'anhan cha'xjen na nt'ue ts'ön.
Mang'e jo' nninncya ndiaa quichi' na ntcüehan na
nnan'jonhan yo ja ee nan'xuanhan na ncy'onhan cüenta juu
naya'ñeen.
\v 5 Nque ntyjeho' na tyi'xe'ncyahan na ntco'xen 'nan tyiahan,
joohan ntcüehan ndiaa quichi'. Min tyi'xe'quitsint'u
ngueehan nnon tson na chuhan' nguee nn'an na incyaa
Tyo'ts'on na nan'xuanhan na tyi'quintycüii na vando'
ñuaanhan. Ndo' nnon Tyëhö' yo ndëë ángeles 'naan' jon,
ncüji' jndyoyu na condui nan'ñeen nn'an na m'anhin ntyja
njan.
\v 6 Min'ninchen ts'an na nin'cüaa' ts'on jñ'oonmin',
quindyii juu jñ'oon na itsinin nquii Espíritu Santo
ndëë joo ntmaan' nn'an na icüji Tyo'ts'on na conduihan
cüentaa' nquii jon.”
\s Jñ'oon cüenta nn'an tsjoon Filadelfia
\p
\v 7 Tsontyichen Jesús nnön: “Cüji' jñ'oonmin na matsjö
nnon', ndo' quitscüenon'han' na m'aan juu ángel na ivantyjee'
jon tmaan' nn'an na conduihan cüentaa' Tyo'ts'on na m'anhan
tsjoon Filadelfia. Quitsu' ndëëhan:
Condui ja ñuan nquii', ndo' mantyi juu jñ'oon na mayuu'. Nquii David 
totsixuan jon najndei na tocoxen jon ninvaa ndyuaa 'naan' jon. Cha'xjen na
totsixuan jon, mantyi ja vaa najndö na nninncya na
vanaan na ngaquee' ts'an quiñoon'ndue oo aa tyi'cüanaan. Ncö
matsiquinan ndo' tanin ts'an nndëë ntscu'tyen, oo matsc'utyën
ndo' ta'nan ts'an na ndëë ntsiquinaan.
\v 8 Ntyji nchu vaa na
cotsam'anho'. Quitquenho' cüenta, jndë siquinan tondëëho'
cha'vijon ncüii 'ndyo v'aa cha' ndëë ntji' jndyoyuho' ntyja
njan. Ndo' juu na jndë siquinan, ta'nan ts'an na nndëë
ntscu'han'. Ee min na tyi't'man najndei na nan'xuanho' quii'
nt'an nn'an, majo' conan'veho' jñ'oon njan ndo' min tyi'cotji
ntcüe'ho' ntyja njan.
\v 9 Ndö vaa na nts'a. Tsjoonho' m'an
nn'an judíos na conduehan na joohan mayuu' judíos conduihan.
Majo' 'nan na cont'ahan tsi'manhan' na tyi'yuu' na nnda'. Ee
ninnquii'chen quintu conan'neinhan. Joohan conduihan tmaan'
nn'an cüentaa' juu Satanás. Quitquenho' cüenta, nts'a na
ngonan'ndyoo'han na m'anho' na ntonquityehan tondëëho'. Ndo' na
ntsavaa' n'onhan na vi'ntyji ja 'o'.
\v 10 Ng'e 'o' jndë
jnan'quindëho' jñ'oon na tsjö ndëëho', ndo' yo na t'man
n'onho' conan'quii n'onho' ncüii cüii nnon 'nan na coquenonho'.
Ng'e na nnda', mantyi ja ngüantyjë' 'o' juu xjen na nndyohan'
na nt'uiivi'han' nn'an. Juu xjen'ñeen nn'an na ninvaa tsonnangue
na tyi'c'onhan ntyja 'naan' Tyo'ts'on, vaa t'man jndyi navi' na
ntquenonhan cha' ntsi'manhan' nchu vaa na nan'xuanhan
tonnon jon.
\v 11 Cje ro nguë ntcü'ë na m'anho'. Tsoñ'en naya na jndë
ty'onho' cüenta, quita'ntjee' yaho'han' na juuhan'
tsijonhan' cha'vijon corona na njon jndyihan',
tyi'nts'aahan' na ncüji' ts'anhan' ndueeho'.
\v 12 Ndëë joo ntyjeho' na tyi'xe'ncyahan na ntquen juu natyia
xjen 'naan'han'hin, nninncya na nntjotyenhan na tongiaa'
Tyo'ts'on. Ntsijonhan' joohan cha'vijon nont'eii' juu
vats'on quiñoon'ndue. Ndo' tyi'jon ncüji'han'hin na
m'anhan jo' yo jon. Ndo' nacjohan ncüji xuee' nquii
Tyëhö' Tyo'ts'on yo xuee' Jerusalén xco, tsjoon' nquii
jon na nnanhan' quiñoon'ndue na nndyocuehan'. Ndo' mantyi
ncüji xuë na xcohan' nacjo nan'ñeen.
\v 13 Minninchen ts'an na nin'cüaa' ts'on jñ'oonmin',
quindyii juu jñ'oon na itsinin nquii Espíritu Santo ndëë joo
nn'an na conduihan ntmaan' nn'an cüentaa' Tyo'ts'on.”
\s Jñ'oon cüenta nn'an tsjoon Laodicea
\p
\v 14 Tsontyichen Jesús nnön: “Joo jñ'oonmin na matsjö
nnon', cüji'han', ndo' quitscüenon'han' na m'aan juu ángel na
ivantyjee' jon nn'an na conduihan tmaan' cüentaa' Tyo'ts'on
tsjoon Laodicea. Quitsu' ndëëhan:
“Ndö jñ'oon na matsjö na condui ja jñ'oon na tyi'je'quitscüejndyohan' 
juuhan'. Condui ja jñ'oon na macüji' jndyoyu ja, mancö na
matsiquindëë, ncö na condui ja jñ'oon na nndëë ngantyja
ts'on ts'an. Ndo' condui ja x'ee jñ'oon ntyja 'naan tsoñ'en
na tquen Tyo'ts'on.
\v 15 Chen jndyi ntyji ntyja 'naan' tsoñ'en
na cotyentjonho' nnon Tyo'ts'on. 'O' min tyi'quitsijonhan' 'o'
cha'na ndaatioo tein, min cha'na ndaatioo jmin'. Nt'ue jndyi
ts'ön na ncüii na ve nan'min' na ntsijonhan' 'o'.
\v 16 Majnaan'
jo', ng'e na itsijonhan' 'o' cha'vijon ndaatioo na ngue ro vi,
min chito na tein nan'xuanho', min chito na jmin' nan'xuanho',
jo' na ncüji' 'o' ntyja njan, cha'xjen ya na itan ts'an. 
\v 17 Ee condueho': Condui jaa nn'an tya ntyja 'naan'
Tyo'ts'on yo ntyja 'naan' tsonnangue. Jndë tijndye 'nan nján.
Tanin 'nan vi itsitjahan' já. Ndö' vaa na condueho'. Majo'
ndicüaa' n'onho' na conduiho' nn'an na nty'iachen,
naninñen' jndyiho'. Itsijonhan' 'o' na cha'vijon
nannchjan, cha'vijon na ninquintseiho'.
\v 18 Mang'e jo'
matsiqui'man' ja 'o' na quijnt'ueho' naya na tsixuan. Ee na
nt'aho' na matsjö, cha'vijon na conan'jndaho' s'on ijan na
jndantyi njonhan', yajo' nnan'xuanho' na tyaho' na tonnon Tyo'ts'on.
Ndo' nnön quijnt'ueho' ndiaa quichi' na ntcüeho', cha' ntscu'han'
na jn'anho' na ninquintseiho'. Ndo' mantyi nnön quijnt'ueho' na
cha'vijon nchen' nasi na ndyionho'han' tëndëëho' cha' xuee
njnty'iaho'.
\v 19 Tsoñ'en nn'an na vi'ntyji, ya na conan'tjahin
nnön, jaa' jñ'oon na mamanhan ndo' mac'öyuhan. Mang'e jo',
cjoo' ya ya n'onho' na quintcüe' n'onho'.
\v 20 Quitquenho' cüenta, minntyjë' to'ndyo v'aa ndo'
matsicü'ahan'. Xe na aa m'aan nin juu na nndyii juu jndyëë
ndo' ntsiquinaan juuhan', ncjöc'ë na m'aan juu. Ndo'
ntsijon ja yohin na icüa' juu, ndo' mantyi ntsijonhin yo
ja.
\v 21 Ja tantjön yo juu 'nan tyia na nin'co'xenhan' ja. Mang'e jo'
jndë taquijman ngiaa' Tyëhö' juu silla na manin' ts'iaan'
'naan' jon naijon na ico'xen jon. Ndëë joo ntyjeho' na
mantyi tyi'xe'ncyahan na juu 'nan tyia quenhan' xjen
'naanhan'hin, nninncya na ntsacüendyuaahan juu silla na
manin' ts'iaan' njan naijon na maco'xën.”
\p
\v 22 Minninchen ts'an na nin'cüaa' ts'on jñ'oonmin',
quindyii juu jñ'oon na itsinin nquii Espíritu Santo ndëë
joo nn'an na conduihan ntmaan' cüentaa' Tyo'ts'on.”
\c 4
\s 'Nan na min quiñoon'ndue, tityincyoo'han'
nnon Juan
\p
\v 1 Vi na jndë jndyi jñ'oonmin', tityincyoo' ncüiichen nnon
'nan na jnty'ia. Jnty'ia ncüii 'ndyo v'aa quiñoon'ndue na
vanaanhan'. Ndo' juu ts'an na t'man jndyee ja na jndyi jndyee'
jon na itsijonhan' juuhan' cha'vijon na icüja' ts'an ndu, sinin
nnda' jon nnön. Itso jon:
\p —Quindyovaa' ntjoohin, ndo' ntsi'man nnon' 'nan na majnda' na ngüentyja 
na nnduihan' vi na jndë na tenoon' joo nan'min'.
\p
\v 2 Ndo' vi na jndë jndyi jñ'oonmin', ninñoon' t'ön ja
nacje 'naan' nquii Espíritu. Ndo' quityquii' quiñoon'ndue,
jo' jnty'ia na ventyjee' ncüii silla na manin' ts'iaan', ndo'
m'aan ncüii juu na vequityenhan'.
\v 3 Quixuee jndyihin. Itsijonhan' na nancoo'hin cha'vijon
tsjö' jaspe yo tsjö' cornalina na vando' jndyi colohan'.
Ndo' xi'jndio juu silla'ñeen ntyjo quitsujn'an
na itsijonhan' colo 'naan'han' cha'na tsjö' esmeralda na
nancoo'han'.
\v 4 Ndo' mantyi
xi'jndio juu silla'ñeen ventyjee' mañoon ntcyu ncho' nenque
silla na manin' ts'iaan'. Ndo' nacjohan' vendyuaa ntcyu
ncho' nenque nn'an na conintque. Cüehan ndiaa quichi' ndo'
nquenhan ñjon corona na jndëhan' yo s'on ijan.
\v 5 Juu silla na minntyjee' xoncüe, condui' chonntsuee ndo'
c'uaa na co'manhan'. Ndo' tonnon juu silla'ñeen ventyjee'
ntyque' lámparas na conan'xueehan'. Joohan' conduihan'
ntyque' espíritu cüentaa' nquii Tyo'ts'on.
\v 6 Mantyi tonnon juu silla'ñeen vaa ncüii na itsijonhan'
juuhan' ndaandue na quixuee jndyihan' cha'vijon ndioo.
\p Ndo' xi'jndio na nennque ngiaa' juu silla'ñeen, ncüii ncüii
ntyjaa'han' m'an nenque na cota'ndo'. Tondëëhan ndo' na
tonquen'hin, too'chen na t'uii' tëndëëhan.
\v 7 Juu na vejndyee na nenque na cotando'ñeen, itsijonhan'hin
cha'na lión. Ndo' juu na jndë ve, itsijonhan'hin cha'na
ncüii toro. Ndo' juu na jndë ndye, itsijonhan' nnon jon
cha'na nnon ts'an. Ndo' juu na jndë nenque, itsijonhan'hin
cha'na quichi na mantyja.
\v 8 Ncüii ncüii joo na nenque na cota'ndo'ñeen, min yon yon
ntsquiihin, ndo' ninvaañ'enhan chuu' tëndëëhan. Naxuee ndo'
natsjon tyi'quitsacüentyjee'han na conduehan:
\q Ñuan nquii', ñuan nquii', ñuan nquii' condui
nquii Tyo'ts'on na taquintyja najndei na conduihin.
\q M'aan ndo' m'aan jon, 
mancüiixjen m'aan jon
vitjachen na nguaa tsonnangue yo tsjö'ndue
ndo' mantyi ngüentyja xjen na ncüjee'non jon.
\p
\v 9 Ndo' nque joo na cotando'ñeen, ncüii ncüii jon na contcüii'han, 
conan't'maan'han ndo' coninncyahan na ya nnon nquii jon na m'aan 
ndo' m'aan jon na vaquityen jon juu silla'ñeen.
\v 10 Juu xjen na cont'ahin na nnda', yajo' joo
ntcyu ncho' nenque nn'an na conditque'ñeen, cotongityehan tonnon
nquii jon na m'aan ndo' m'aan jon na vaquityen jon juu
silla'ñeen na manin' ts'iaan'han'. Conan't'maan'han nquii jon
na tayuu ntycüii na vando' jon. Mantyi cotyiohan corona 'naanhan
tonnon juu silla'ñeen. Conduehan:
\q
\v 11 'U' na condui 'u' na matye'ntjon' já,
\q mancu' na condui 'u' nquii Tyo'ts'on na
conan't'mán', tsoñ'en na tquen' chuhan' na
quindit'maan' 'u' ntyja 'naanhan',
chuhan' na caquinjon 'u' ntyja 'naan'han'.
\q Ee ntyja 'naan' juu najndei na condui 'u',
jo' na tquen' tsoñ'en. 
\q Ntyja 'naan' na nt'ue tson',
jo' na tquen'han' ndo' na ninm'anhan'.
Maquen' xjen já. Tsoñ'en na tquen'
tsixuan' na quintcüii'han' 'u'.
\q 'U' tsoñ'en najndei na condui 'u'.
'U' tquen' tsoñ'en na min.
\q Tuihan' cha'xjen na nt'ue tson' ncu',
ndo' ninvaa m'aanhan' ng'e ntyja 'nan'.
\c 5
\s Tson na ty'oon Quitsman Chjo cüenta
\p
\v 1 Yajo' jnty'ia nquii jon na vaquityen jon silla'ñeen na
manin' ts'iaan'han', ndyii' ncüii tson nt'ö jon ntyjaya na
tentcüiihan' na ncha' ve ntyjaquiohan' chuu' ntji. Ntyque' joo
na të'tyenhan'.
\v 2 Ndo' jnty'ia ncüii ángel na m'aan jndyi najndei jon, jndei
tic'uaa 'ndyo jon, taxee' jon: “¿Nin ts'an chuhan' na
ntyjee na ntyque' joo na të'tyen tsonvahin?”
\v 3 Majo' min juu quiñoon'ndue, min nnon tsonnangue, min na quii'
nt'an nt'oo, min'ncüii tatijnda' na vaa najndei na conduihin
na ntsiquinaan juu tson'ñeen, min na ntsijnaan' juuhan'.
\v 4 Ndo' ng'e na nnda', tot'iö jndyi jnaan' na min'ncüii ts'an
tatijnda' na chuhan' na ntsiquinaan juu tson'ñeen, min na
ntsijnaan' juuhan'.
\v 5 Yajo' ncüii joo nantque'hin, tso jon nnön: “Nnda',
tant'io', ee nquii jon na jndë tju'cje jon juu natyia,
conduihin lión cüenta nn'an tmaan' Judá, ndo' conduihin
tsjan nquii David na jndyocahan'. Ng'e jo' tsixuan jon na
nquii jon ntyjee jon na ntyque' joo naijon na të'tyen
tson'va' ndo' na ntsijnaan' jonhan'.”
\p Nnda' jñ'oon tso tsan'ñeen nnön.
\p
\v 6 Ndo' jnty'ia ncüii ts'an na itsijonhan'hin cha'vijon
Quitsman Chjo na jndë jnan'cuee' nn'an. Ventyjee' jon na tonnon
juu silla'hin quii' nt'an joo nenque na cota'ndo'ñeen yo tondëë
nan'ñeen na conditque. Min ntyque' ndi'ndyee' jon ndo' ntyque'
tënnon jon. Joo ntyque' tënnon jon conduihan' ntyque' espíritu
na condui nquii Tyo'ts'on na i'ua jon ts'ian ndëëhan na cont'ahan
ts'ian 'naan' jon na ninvaa tsonnangue.
\v 7 Ndo' juu Quitsman
Chjo'ñeen sindyoo'hin na m'aan nquii jon na vaquityen jon juu
silla'ñeen. Tson'ñeen na ndyii'han' nt'ö jon ntyjaya, ty'oon
Quitsman Chjo cüentahan'.
\v 8 Ndo' vi na jndë ty'oon jon
cüentahan', yajo' joo nenque na cota'ndo'ñeen yo nin'nque
ntcyu ncho' nenque nantque'ñeen, tongityehan na tonnon jon.
Tsoñ'en nantque'ñeen ty'onhan arpa, ndo' y'onhan ngio na
jndëhan' yo s'on ijan na too'chenhan' yo su. Juu su'ñeen
conduihan' jñ'oon jndyue nn'an cüentaa' Tyo'ts'on na
conan'neinhan nnon jon.
\v 9 Ndö vaa alabanza xco na tahan
nnon jon:
\q 'U' tsixuan' na cyon' cüenta tsonva' ndo'
na ntyje' naijon na të'tyenhan'.
\q Ee jnan'cuee' nn'an 'u' ndo' yo neon' sijnda
ntcüe' Tyo'ts'on nn'an na ncüii ncüii
tmaan' na m'anhan nnon tsonnangue,
\q ndo' mantyi nn'an na ncüii ncüii nnon
jñ'oon na conan'nein yo manin'
nn'an na ncüii cüii tyuaa.
\q
\v 10 'U' jndë tquen' joohan ncüii tmaan' nn'an
na ico'xen Tyo'ts'on, 
\q ncüii tmaan' nn'an na
conduihan ntyee na cotye'ntjonhan nnon jon,
\q ndo' mantyi ngitoxenhan nn'an tsonnangue yo nquii jon.
\p
\v 11 Ndo' viochen xjen na jnty'ia, jndyi na c'uaa jndyue
ángeles na cam'anhan xi'jndio juu silla'ñeen yo nque nenque na
cota'ndo'ñeen ndo yo manin' joo nn'an na conditque. Joo
ángeles'ñeen, tenonntyjachen na jndye minhin ata vantjo'chen
minhan.
\v 12 C'uaa na conan'xuaa ángeles'ñeen, jnduehan:
\q Juu Quitsman Chjo na jnan'cuee' nn'an,
\q condui jon na co'xen jon tsoñ'en.
\q Condui jon na taquintyja cy'oon jon cüenta
tsoñ'en na quinan't'maan'han' jon,
\q condui jon na jnda' xquen jon.
\q Condui jon najndei na siquindë jon ts'ian
na t'ua Tyo'ts'on nnon jon.
\q Mantyi tsixuan jon na quindue nn'an
jñ'oon ya ntyja 'naan' jon
ndo' na nc'oon jon naijon na condit'maan'
Tyo'ts'on, 
\q tsoñ'en jaa, ninnquii'chen
quinduë na ya jndyi condui jon.
\p
\v 13 Ndo' nquii Tyo'ts'on, ncüii ncüii nnon na tquen
jon na m'an quiñoon'ndue, yo nnon tsonnanguevahin, yo naijon na
m'aan nt'oo, yo tsoñ'en na m'an ndaandue, tsoñ'en na tquen jon
na m'an joohan', ndö vaa jñ'oon na jndyi na jnduehan:
\q Conduë na taquintyja na ya condui nquii jon
na vaquityen juu silla na manin' ts'iaan'
yo nquii jon na conduihin Quitsman Chjo.
\q Conan't'maan' jaa joohan.
\q Xia'ntyi nquehan na taquintyja
t'manntyichen conduihan.
\q Ninnquehan conduihan na cotoxenhan nanein
ndo' ninvaañ'en na tonnonntyichen.
\p
\v 14 Ndo' joo nenque na cotando'ñeen jnduehan: “Ninnquii'chen
quindui na nnda'.” Mantyi joo ntcyu ncho' nenque nantque'ñeen,
tongityehan na tonan't'maan'han Tyo'ts'on.
\c 6
\s Ityjee Quitsman Chjo naijon na të'tyen tson
\p
\v 1 Ndo' jnty'ia na nquii Quitsman Chjo tyjee jon naijon na
vejndyee na të'tyen juu tson'ñeen. Yajo' ncüii joo na nenque
na cota'ndo'ñeen, sinin jon, tic'uaa jndyee' jon cha'na ya na
co'man ntsuee. Jndyi na tso jon nnön:
\p —Quindyo' ndo' quindyia'.
\p
\v 2 Jo' tëquinty'ia, ndo' jnty'ia ncüii quiso quichi'.
Vantjo ts'an juu o'. Juu tsan'ñeen y'oon jon ncüii isaa'.
Ndo' jndë ty'oon jon cüenta ncüii corona. Tomandyi' jon
na jndë tantjon jon na s'aa jon tyia' yo nn'an ncüii cüii
tsonnangue, ndo' nt'ue jon yuu vijon minchen ndyuaa na
nts'aantyichen jon tyia'.
\p
\v 3 Jndë jo' juu Quitsman Chjo tyjee jon naijon na jndë ve na
të'tyen juu tson'ñeen. Ndo' joo nenque na cota'ndo'ñeen,
nquii jon na jndë ve, tso jon nnön:
\p —Quindyo' ndo' quindyia'.
\p
\v 4 Ndo' jndi'non ncüiichen quiso quioo' ve. Ndo' ts'an na
vantjo o', ty'oon juu cüenta na tsixuan juu na quityii' juu
tyia' quii' nt'an nn'an tsonnangue cha' quintycüii na ya m'anhan
yo ntyjehan, cha' quinan'cüjehan ntyjehan. T'man jndyi xjo espada
na ty'oon tsan'ñeen cüenta.
\p
\v 5 Ndë jo' juu Quitsman Chjo tyjee jon naijon na jndë ndye
na të'tyen juu tson'ñeen. Yajo' joo nenque na cota'ndo'ñeen,
juu jon na jndë ndye tso jon nnön:
\p —Quindyo' ndo' quindyia'.
\p Jnty'ia nnt'a, ndo' minntyjee' ncüii quiso nton. Juu tsan na
vantjo o' y'oon jon ncüii tsö'xjo.
\v 6 Ndo' quii' nt'an joo nenque na cota'ndo'ñeen, jndyi na
tic'uaa cha'vijon jndyee' ts'an na tsohan':
\p —S'on na ivantjon ts'an na ncüii xuee, xia'ntyi nninnonhan' na ntsijnda 
juu ncüii kilo ntquen trigo, oo ninndye kilos ntquen cebada.
Majo' tyi'ntsa' na ntsitjahan' nchen' n'oon olivo yo vinon.
\p
\v 7 Jndë jo' juu Quitsman Chjo tyjee jon naijon na jndë nenque
na të'tyen juu tson'ñeen. Ya jo' nquii juu na jndë nenque na
cota'ndo'ñeen, tso jon nnön:
\p —Quindyo' ndo' quindyia'.
\p
\v 8 Tëquinty'ia nnt'a ndo' jnty'ia ncüii quiso colo ijan chioo.
Ndo' ts'an na vantjo o', jndyu jon nquii na vaa najndei na covje
nn'an. Ndo' yo jon itsijon nquii juu na co'xen naijon na cotoo'
nt'oo. Ve joohan ty'onhan najndëhan na ncüii ncüii na nenque
nn'an tsonnangue, cue' ncüii tsan'ñeen yo tyia', oo aa yo jndo'
t'man, oo aa yo ntycu na v'iichenhan' ndo' yo na nnan'cüje
quioo' vjehan.
\p
\v 9 Ndë jo' juu Quitsman Chjo tyjee jon naijon na jndë 'on na
të'tyen juu tson'ñeen. Yajo' tocje nnontyiu, jo' jnty'ia
ñuan 'naan nque nn'an na jnan'cüje nn'anhin ng'e na tontjotyenhan
ntyja 'naan' jñ'oon' Tyo'ts'on ndo' ng'e na totji' jndyoyuhan
ntyja 'naan' Jesús.
\v 10 Jndei tic'uaa jndyuehan, jnduehan:
\p —'U' ta, xia'ntyi ncu' maco'xen' tsoñ'en, 'u' na condui 'u'
ñuan nquii' ndo' na matsiquindë' jñ'oon na maco' 'ndyo'.
¿Tsa'nnda' xjen na ngacahan' ata nguee' xjen na ntco'xen' nn'an
tsonnangue tsojnaan' na jnan'cüjehan já? ¿Yuu xjen ntsa' na
quit'uiivi'han'hin tsojnaan' na nnda' tont'ahan?
\p
\v 11 Ndo' ncüii ncüii nan'ñeen, tyincyaa Tyo'ts'on ndiaa quichi' ndëëhan
na toncohan'. Ndo' tso jon ndëëhan na cüendoo' yahan chjo. Ee
tyi'cotsiquindëhan' xjen na tsa'nnda' ntyjehan na cotye'ntjonhan
nnon Cristo na mantyi nnan'cüje nn'an nan'ñeen cha'xjen na
tonan'cüje nn'an nquehan.
\p
\v 12 Nquii Quitsman Chjo, jnty'ia xjen na tyjee jon naijon na
jndë yon na të'tyen juu tson'ñeen. Yajo' jndei s'ii. Ndo'
s'aahan' na nton nnon ndo'cüjioon' cha'na ncüii ndiaa nton,
ndo' chi' je', s'aahan' na ve nnonhan' cha'na neon'.
\v 13 Ndo' ncjuu, jnan o' tsjö'ndue, tycyaa o' tsonnangue. Sijonhan'
ntyja 'naanhan' cha'vijon ya na jndei m'aan jndye na itscyaahan'
të higo 'nda.
\v 14 Ndo' juu tsjö'ndue tquenaan'han', itsijonhan' na tjonhan'
cha'na ya na itsintcüii ts'an tsue na tyen tëntcüiihan'.
Ndo' ncüii ncüii tyo' yo ncüii cüii tyuaa chjo na m'aan
ndaandue xi'jndiohan', tquenaan'han' naijon na mancüii xjen
m'aanhan'.
\v 15 Yajo' joo nn'an na t'manntyi condui na cotoxenhan 
nn'an, yo tsoñ'en ntyjehan na condui nanm'ann'ian yo nn'an
na cotquen xjen sondaro, yo nque nantya, yo joo nn'an na
jn'aan jndyi, yo nn'an na cotye'ntjontyen ndëë patrón, yo
nn'an na m'anhin xjen 'naan nquehan, tanty'iuhan quityquii'
ndë'ntjö' ndo' quii' nt'an ntjö' ngia' ntyo'.
\v 16 Tonan'xuaahan ndëë ntyo'ñeen yo ndëë ntjö'ty'a, tonduehan:
\p —Cüa, maninjon ro cyaho' nacjö́ cha' nndëë nta'nty'iu nnon
nquii jon na vequityen jon silla na manin' ts'iaan' yo nnon nquii
Quitsman Chjo na t'man vaa itsiv'ii jon já.
\v 17 Ee juu xuee t'man na conan'vjehan, jndë tuee' xjenhan'.
Ndo' ta'nan ts'an na nndëë ncüjihin quityquii'han' cha'
tyi'nt'uiihan'hin.
\c 7
\s T'ion ángeles sello ndö'quita nn'an Israel
\p
\v 1 Juu Quitsman Chjo, vi na jndë tenon na tyjee jon yon joo naijon na 
të'tyen juu tson'ñeen, yajo' jnty'ia nenque tontyja tsonnangue, jo'
min'ntyjee' nenque ángeles. Cotë'han joo nenque jndye cha'
tyi'ngioohan' nnon tsonnangue, min nnon ndaandue min nacjo n'oon.
\v 2 Joohan jndë tyincyaa Tyo'ts'on na vaa najndëhan na
quint'ahan natë' tsonnangue yo ndaandue. Ndo' mantyi jnty'ia
ncüiichen ángel na jnan jon tontyja na quindui' ndo'cüjioon'.
Tava jon na m'an nenque ángel'ñeen, y'oon jon sello 'naan'
nquii Tyo'ts'on na vando'. Jndei sixuaa jon ndëë joo nenque
ángel'ñeen.
\v 3 Tso jon ndëëhan:
\p —Tyi'nt'aho' natë' juu tsonnangue, min ndaandue min n'oon, ata na 
jndë t'iö́n sello 'naan' Tyo'ts'on ndö'quita joo nn'an cüentaa' jon na
cotye'ntjonhan nnon jon.
\p
\v 4 Ndo' jndyi nchu xjen jndye nn'an na t'ionhan sello ndö'quita.
Nan'ñeen tuee' ncüii ciento min vantjo' venn'an vantjo' nenque
minhan quii' nt'an na ncho've tmaan' nn'an Israel.
\v 5 Ncho've min nn'an tsjan Judá t'ionhan sello. Ndo' ncho've
min nn'an tsjan Rubén t'ionhan sello. Ndo' ncho've min
nn'an tsjan Gad t'ionhan sello.
\v 6 Ndo' ncho've min nn'an tsjan Aser t'ionhan
sello. Ndo' ncho've min nn'an tsjan Neftalí t'ionhan sello.
Ndo' ncho've min nn'an tsjan Manasés t'ionhan sello.
\v 7 Ndo'
ncho've min nn'an tsjan Simeón t'ionhan sello. Ndo' ncho've min
nn'an tsjan Leví t'ionhan sello. Ndo' ncho've min nn'an tsjan
Isacar t'ionhan sello.
\v 8 Ndo' ncho've min nn'an tsjan Zabulón
t'ionhan sello. Ndo' ncho've min nn'an tsjan José t'ionhan
sello. Mantyi yo nin'tsjan Benjamín t'ionhan sello ncho've
minhan. 
\s Tmaan' nn'an jndye jndyi na cüehan
ndiaa quichi'
\p
\v 9 Vi jndë na tenon nan'min', jnty'ia ncüii tmaan' nn'an na
jndye jndyi na tanin ts'an na nndëë nts'aa cüentahan. Ñ'en
nan'ñeen na jnanhan ncüii ncüii tsonnangue, ncüii ncüii
tsjan nn'an yo ncüii cüii nnon jñ'oon na conanein nn'an.
Minntyjee'han tonnon juu silla na manin' ts'iaan' naijon na m'aan
Tyo'ts'on yo nquii Quitsman Chjo. Cüehan ndiaa quichi' na
toncohan', ndo' ndueehan too' njon ntsqui tëncy'a.
\v 10 Jndei
jnan'xuaahan, jnduehan:
\q Nquii Tyo'ts'on cüenta jaa na
vaquityen jon silla na manin'ts'iaan'
yo nquii Quitsman Chjo, 
\q xia'ntyi ntyja 'naanhan
nan'xuan na n'man ñuan njanhan.
\v 11 Ndo' xi'jndio juu silla'ñeen ventyjee' tsoñ'en ángeles,
yo joo na conintque ndo' yo joo na nenque na cota'ndo'. Tsoñ'enhan
tyetangiohan tonnon juu silla'ñeen. Tque' ndö'quitahan tyuaa.
Jnan't'maan'han Tyo'ts'on.
\v 12 Jnduehan:
\q Quindui cha'xjen na conduë.
\q Tsoñ'en na jndë tquen Tyo'ts'on
quinduehan na taquintyja na ya its'aa jon.
\q Tsoñ'enhan quinan't'maan'hin nquii jon.
\q Tsoñ'enhan quitquenhan cüenta
na taquintyja na jnda' xquen jon.
\q Tsoñ'enhan quinduehan na ncya ya jon
yo na cüit'maan'hin.
\q Tsoñ'enhan quinduehan na quitsiquinjonhan' nquii jon;
mantyi tsoñ'enhan quitquenhan cüenta na nquii
jon taquintyja najndei conduihin.
\q Tyi'jon cjacüentyjee' na condui nan'min'
cha'xjen na conduë.
\q Quindui cha'xjen na conduë.
\p Ndö' ro jñ'oon na jnduehan.
\p
\v 13 Ndo' ncüii nque na conintque'hin, taxee' jon nnön, tso
jon:
\p —Joo nanmin' na cüehan ndiaa tonco na quichi'han', ¿Nin
nn'anhin, ndo' yuu jon jnanhan?
\p
\v 14 Jo' t'a, tsjö nnon jon:
\p —Aa ja tyi'quintji ta, 'u' nchji'.
\p Ndo' tso jon nnön:
\p —Nanmin' nn'an na jn'man na jndui'han quityquii' juu navi' na
t'manntyichenhan'. Ng'e na vantyja n'onhan nquii Quitsman Chjo,
jo' na jndë sintju' jonhan yo neoon' jon. Mang'e jo' na cüehan
ndiaa quichi' na ntju'han'.
\v 15 Mang'e jo' m'anhan na tonnon juu silla manin' ts'iaan'ñeen
na vequityen nquii Tyo'ts'on, naxuee ndo' natsjon
cotye'ntjonhan nnon jon, tyquii' vats'on na m'aan jon, ndo'
nquii jon na vequityen juu silla'ñeen, ninnquii'chen m'aan
jon yohan na ivantyjee' jonhan.
\v 16 Ndo' joo nan'ñeen tavijon jnda na nc'on nnda'han na
nin'jndo'han oo na nin'cüehan ndaa, min tyi'xe'quindyiaa'
ndo'cüjioon' nacjohan, min na ntscohan'hin.
\v 17 Ee nquii Quitsman Chjo na m'aan jon tonnon juu silla na
manin' ts'iaan', ngüantyjee' jonhan cha'xjen ivantyjee'
ts'an quinman, ngachu jon joohan naijon na m'aan tënnon
ndaa na nninncyaahan' na cota'ndo'han, ndo' nquii Tyo'ts'on
nngue' jon ndaa ndëëhan.
\c 8
\s Sello na jndë ntyque'
\p
\v 1 Nquii Quitsman Chjo tyjee jon juu sello na jndë ntyque' na
të'tyen juu tson'ñeen. Ndo' juu xjen'ñeen tsoñ'en na m'an
quiñoon'ndue, cha' na xoncüe hora tichen jndyuehan.
\v 2 Jndë jo' jnty'ia nnt'a nque ntyque' ángeles'ñeen na
ventyjee'han na tonnon Tyo'ts'on, ty'onhan cüenta ntyque'
ndu.
\v 3 Ndo' mantyi tyjee' ncüiichen ángel. Tacüentyjee' jon na
tonnon nnontyiu. Y'oon jon ncüii xiosu na jndëhan' yo s'on
ijan. Ndo' juu jon jndye su ty'oon jon cüenta, na ntsco
jonhan' nnon nnontyiu'ñeen na jndëhan' yo s'on ijan na
minntyjee'han' na tonnon silla na manin' ts'iaan' na
vequityen nquii Tyo'ts'on. Juu su'ñeen tijnt'ue
ángel'ñeenhan' yo jñ'oon jndyue nn'an cüenta Tyo'ts'on
na conan'neinhan nnon jon na yo joohan' itsit'maan'
ángel'ñeen jon.
\v 4 Ndo' na s'aa ángel'ñeen juu ts'ian'ñeen, ninncüii
tojnaan' tava tseonsu'ñeen yo jñ'oon na conan'nein nn'an
cüentaa' Tyo'ts'on nnon jon.
\v 5 Ndo' siquitoo'
ángel'ñeen xiosu yo ñon na cov'a na ntyjohan' nnontyiu'ñeen.
Jndë jo' tju' jonhan' xjen nnon tsonnanguechen, ndo' na nnda'
tui, tic'uaa na co'man ntsuee, conduindui' choon' tsuee ndo'
s'ii.
\s Ntyque' ndu na conan'cho ntyque' ángeles
\p
\v 6 Ndo' joo ntyque' ángeles'ñeen na chohan ntyque' ndu,
jnan'jnda'han na ntja'hinhan'.
\p
\v 7 Juu ángel na vejndyee tja' jon ndu 'naan' jon, ndo' tua'
tsan yo chon, tjon'han' yo neon', tycyaahan' nnon tsonnangue.
Ndo' ncüii ncüii ndyuaa, quii' nt'an tsoñ'en na min, joo na
vja ndye na nan'xuanhan', quii' nt'anhan' iscohan' ncüii
cüiihan'. Ndo' ncüii ncüii na ndye ts'oon, iscohan' ncüiihan'
ndo' majo'ntyi s'aahan' yo nin'tsoñ'en jndëë ndei.
\p
\v 8 Yajo' juu ángel na jndë ve, mantyi tja' jon ndu 'naan'
jon. Ndo' ncüii na itsijonhan' tyo' t'man na jndë t'ahan' yo
chon, tju' Tyo'ts'onhan' quii' ndaandue. Yajo' juu
ndaandue'ñeen, xjen joo ninvaañ'en quityquii'han'
scüaquenhan' neon'han'.
\v 9 Ndo' na nnda' tui, ncüii ncüii
na ndye quioo' na m'an juu ndaandue, tue' ncüii o', ndo' mantyi
ncüii ncüii na ndye nt'aandaa na min jo', sityuii'han'
ncüii joohan'.
\p
\v 10 Ndo' juu ángel na jndë ndye, mantyi tja' jon ndu
'naan' jon, jo' jnan ncüii quixjuu t'man tsjö'ndue. Cov'ahan'
cha'vijon ncüii sca t'man. Ndo' ncüii ncüii na ndye ndaa
jndaa yo tënnon ndaa na ninvaa tsonnangue, tycyaa quixjuu'ñeen
nacjoo' ncüii joohan'.
\v 11 Juu quixjuu'ñeen jndyuhan' Ndaa
Ja. Ndo' yuu na tacyaa quixjuu'ñeen, ncüii cüii na ndye
ndaatioo'ñeen scüaquenhan' na ja ncüiihan', ndo' joo nn'an na
tijnt'uehan ndaa'ñeen, jndyehan tjë.
\p
\v 12 Ndo' juu ángel na jndë nenque, tja' jon ndu 'naan'
jon, ndo' juu ndo'cüjioon', quii' nt'an na ndye tan'han',
si'ndaa'han' ncüii tan' nnonhan', majo'ntyi s'aahan' yo chi' yo
nin'ncjuu. S'aahan' na tyi'cüentyja na conan'xueehan'.
Juu ndo'cüjioon', s'aahan' na cha'na nenque hora na ncüii
ncüii xuee na tyi'cüixueehan', ndo' majo'ntyi chi',
tyi'quixueehan' nenque hora natsjon.
\p
\v 13 Ndo' jndë jo' jnty'ia ncüii quichi na mantyja o' xoncüe
tontyja na m'aan ndo'cüjioon' xjen na yajmin'. Jndei sixuaa o',
itso juu:
\p —Manndyo na ntja' minndyechen ángeles ndu 'naanhan. Ndo' na
nnda', ji vaa vi' jndyi ntquenon nn'an tsonnangue.
\c 9
\s Ncüiichen ángel tja' jon ndu
\p
\v 1 Ndo' juu ángel na jndë 'on tja' jon ndu 'naan' jon. Ndo'
jnty'ia ncüii quixjuu na jnan tsjö'ndue na tyioohan' nnon 
tsonnangue. Ndo' nnon juu quixjuu'ñeen, tyincyaa Tyo'ts'on
nt'ö v'aa cüentaa' ncüii tsë'tsjoon na tayuu ntycüii na
njoonhan'.
\v 2 Siquinaan juu quixjuu'ñeen 'ndyo tsë'tsjoon'ñeen. Yajo'
jndui' neonhan' cha'vijon ya na condui' neon ton' t'man.
Ndo' jnaan' joo neon'ñeen, sijaanhan' tsjö'ndue na
ndicüityincyoo' ndo'cüjioon'.
\v 3 Ndo' quityquii' joo neon'ñeen jndye jndyi quintycaa
ndyue' jnan'. Tcyaa o' nnon tsonnangue. Ty'on o' cüenta najndë
o' na quint'a vi' o' nn'an cha'xjen cont'a quintjö na m'an
nnon tsonnangue.
\v 4 Ty'on o'
cüenta ts'ian na xia'ntyi quint'a vi' o' joo nn'an na ta'nan
tëquiñoon sello 'naan' Tyo'ts'on ndö'quitahan. Tyi'ntcüa' o'
jndëë na min nnon tsonnangue, min ntjon, min tsco n'oon.
\v 5 Mantyi t'ua ts'ian ndëë cho'ñeen na vanaan na quint'a o' na
quiihan' nan'ñeen ncüii 'on chi'. Juu na ntquiihan' nan'ñeen, 
itsijonhan' juuhan' cha'vijon ya na ico' quitsjö ts'an.
Majo' cho'ñeen tyi'cüanaan na nnan'cüje o' joo nan'ñeen.
\p
\v 6 Viochen xjen joo na 'on chi'ñeen, njnt'ue jndyi nn'an nchu
ya nnt'ahan cha' na ncüjetohan, majo' tyi'je'quindiohan nchu vaa
nnt'ahan. Nt'ue jndyi n'onhan na nin'cüjehan, majo'
taje'quindëë ncüjehan.
\p
\v 7 Ndo' joo quintcaa'ñeen na jnty'ia, itsijonhan' joo o' cha'na
quitso na m'an chenjnaan' o' na nc'o o' tyia'. Juu 'nan ñjon
nquen o', sijonhan' joohan' cha'vijon corona na jndë yo s'on
ijan, ndo' itsijonhan' ndëë o' cha'na ndëë nn'an.
\v 8 Ndo'
sonquen o' itsijonhan' cha'na sonquen nanntcu. Ndo' ndi'n'on o'
itsijonhan' joohan' cha'na ndi'n'on lión.
\v 9 Ndi'ndya o'
të'han' yo ncjo ntuen. Ndo' c'uaa jndyi ntsquii o', cha'vijon
na jndye jndyi carreta c'uaahan' xjen najndei conan'non quitso na
contyja o'han' na co'o o' tyia'.
\v 10 Ndo' n'aan joo
quintcaa'ñeen, itsijonhan' joohan' cha'na n'aan quintjö. Ndo'
ndaa x'ioon o' vje jndyihan'. Vaa najndei na nan'xuan
quioo'ñeen na vanaan na nnt'a vi' o' nn'an ncüii 'on chi'.
\v 11 M'aan ncüii ángel na taquintyja na t'man conduihin na co'xen
jon joo quintcaa'ñeen. Tsixuan jon na iquen jon cüenta juu
tsë'tsjoon na tayuu ntycüii na njoonhan'. Xuee' ángel'ñeen,
yo jñ'oon hebreo jndyu jon Abadón, majo' yo jñ'oon griego
Apolión. Xuee' jon tsi'manhan' nquii na ntyja 'naan' juu cotsu
nn'an.
\p
\v 12 Jndë tenon juu navi' t'man na vejndyee, majo' ninm'aan ve
nnon navi' t'man na xejnda ngüentyja.
\s Angel na jndë yon tja' jon ndu
\p
\v 13 Ndo' juu ángel na jndë yon, tja' jon ndu 'naan' jon.
Jndë jo' jndyi jndyee' ts'an. Jnanhan' tontyja nenque nqui juu
nnontyiu'ñeen na jndëhan' yo s'on ijan na mintyjee'han' na
tonnon Tyo'ts'on.
\v 14 Juu ángel'ñeen na jndë yon na y'oon
jon ndu'ñeen, itso tsan'ñeen nnon juu:
\p —Joo nenque ángeles na m'antyenhan tontyja jndaa t'man
Eufrates, quitsiquindya'hin.
\p
\v 15 Ndo' juu ángel'ñeen, tatsiquinan' jon joo nenque
ángeles'ñeen cha' ncüii ncüii na ndye nn'an na ninvaa nnon
tsonnangue, nnan'cuee'han ncüii joo nan'ñeen. Jndë tijnda' na
c'on chenjnaan' ángeles'ñeen na nnt'ahan ts'ian'ñeen juu
horava', ndo' yo xueeva', ndo' yo chi'va', yo nin'chuva'.
\v 16 Ndo' jndyi
ntyja 'naan sondaro 'naanhan na tantjohan quitso, joo nan'ñeen
jndë ve ciento minyonhan.
\p
\v 17 Ndo' quityquii' 'nan na tityincyoo' nnön, jnty'ia
quitso'ñeen yo sondaro na tantjohan joo o'. Ndi'ndya nan'ñeen
cüe ncjo na ivañoon'han'hin na tyi'ntc'ehan. Chu ncjo'ñeen
colo chon ve, yo colo su cha'na colo tsjö' jacinto yo colo ijan
cha'na sufre. Ndo' quitso'ñeen, nquen o' itsijonhan' joohan'
cha'na nquen lión. Quii' jndyue o' condui' chon yo neon yo
sufre.
\v 18 Ntyja 'naan joo ndye nnon navi'ñeen na jndui' quii'
jndyue quitso'ñeen, chon yo neon yo sufre, jo' ncüii ncüii na
ndye nn'an na ninvaa nnon tsonnangue, tjë ncüii joo nan'ñeen.
\v 19 Juu najndei na nan'xuan quitso'ñeen na nnan'cüje o'
nn'an, m'aanhan' quii' jndyue o' yo n'aan o'. Ee tontyja na
tantycüii n'aan o', jo' ntyjo nquen quindu. Yo joohan'
cont'a o' natë' nn'an.
\p
\v 20 Majo' joo nn'an na jnty'iihan' na tatjëhan yo navi'ñeen,
ta'nan ntcüe' n'onhan. Min tatecüentyjee'han na conan't'maan'han
'nan na tonan'ya nquehan. Ninvito conan't'maan'han yotyia yo
'nan na jndëhan' yo s'on ijan, s'on xuee, s'on ve, ntjö', yo
nin'ts'oon. Nan'min' na conan't'maan'han ndiquijnty'iahan' min
ndiquindyehan', min na ndicondyi'han'.
\v 21 Majo' min na
nnda', ta'nan ntcüe' n'on nan'ñeen na conan'cüjehan ntyjehan.
Min ta'nan jnty'ehan ts'ian quindua' na cont'ahan, min juu na
m'anhin yo nn'an na ve' ndö' ro, min na conty'ueehan.
\c 10
\s Ángel na y'oon tson chjo na tëntcüiihan'
\p
\v 1 Jndë jo' jnty'ia ncüiichen ángel na t'man jndyi
conduihin. Jnan jon quiñoon'ndue. Ninvaahin ndyii' jon chincyu.
Xquen jon ntyjo nduii' quitsujn'an cha'vijon tjan na ñjon xquen
ts'an. Xuee nnon jon cha'xjen naxuee ndo'cüjioon', ndo' ng'ee
jon itsijonhan' joohan' cha'vijon colo tsachon na toncohan'.
\v 2 Ndo' ncüii nt'ö jon, ndyii' ncüii tson chjo na jndë sinueen'
jonhan'. X'ee jon ntyjaya tco' jonhan' nnon ndaandue, ndo' x'ee
jon ntyjatymaan', juuhan' tco' jonhan' tyuaa tcüi.
\v 3 Jndei sixuaa jon cha'na itsixuaa lión. Ndo' vi na jndë
sixuaa jon, yajo' joo ntyque' ntsuee, tic'uaa co'manhan'.
\v 4 Ndo' vi na jndë na t'man joo ntyque' ntsuee'ñeen, sijnt'a
na ncüji juu jñ'oon na jnduehan, majo' tic'uaa ncüiichen
jndye na jndyi na jnanhan' quiñoon'ndue. Itsohan':
\p —Joo jñ'oon na jndyi' na jnan'nein joo ntyque' ntsuee'ñeen,
min tyi'ntsi'manhan', min tyi'ncüji'han'.
\p
\v 5 Ndo' juu ángel'ñeen na jnty'ia na minntyjee' ncüii x'ee
jon nnon ndaandue ndo' ncüiichenhan' nnon tyuaa tcüi, sue jon
nt'ö jon ntyjaya toquiñoon'ndue.
\v 6 Tji' jon xuee' nquii Tyo'ts'on na tayuu ntycüii m'aan jon
na tquen jon quiñoon'ndue yo tsonnangue yo tsoñ'en na min
nnonhan', yo ndaandue yo tsoñ'en na min jo'. Ndö jñ'oon
na tso jon:
\p —Taxe'cüendoo'ntyichen Tyo'ts'on.
\v 7 Ee ya na ngüentyja xjen na juu ángel na jndë ntyque'
ncüja' jon ndu 'naan' jon, yajo' ntsiquindëhan' juu jñ'oon na
ntyjii Tyo'ts'on, cha'xjen joo jñ'oon na siquindyii jon nn'an na
totye'ntjonhan nnon jon na toninncyahan jñ'oon' jon ntyja nchu
vaa na itsijnda' jon na nguaa.
\p
\v 8 Jndë jo' jndyi nnt'a jndyee' nquii jon na c'uaahan'
toquiñoon'ndue. Tso jon nnön:
\p —Cja', cacyon' juu tson chjo na minnueen'han' na ndyii'han'
nt'ö juu ángel'ñeen na minntyjee' jon nnon ndaandue yo nnon
tyuaa tcüi.
\p
\v 9 Ndo' tyjëntyj'a nnon juu ángel'ñeen. Tsjö nnon jon na
nninncyaa jon tson chjo'ñeen nnön. Yajo' tso jon nnön:
\p —Cyon' cüentahan' ndo' cüa'han', nts'aahan' na chi quii'
'ndyo', majo' ndëcya nts'aahan' na ja quitson quii' tsia'.
\p Ndö' jñ'oon na tso jon nnön.
\p
\v 10 Ndo' ty'ön cüenta juu tson chjo'ñeen na ndyii'han'
nt'ö juu ángel'ñeen, ndo' vi na jndë tcü'ahan', s'aahan' na
chi quii' 'ndyö, majo' ndëcya s'aahan' na ja quitson quii'
tsia.
\v 11 Ndo' jndyi na icanhan' na quitsinën nnt'a jñ'oon
na itsiquindyi Tyo'ts'on ntyja nchu vaa ngenon nn'an na ninvaa
tsonnangue. Quitsinën ntyja 'naan jndye nnon gobiernon na m'an
nn'an ndo' jndye nnon jñ'oon na conan'neinhan, ndo' ntyja
'naan jndye nn'an na conditquehan ndëë nan'ñeen.
\c 11
\s Ve ts'an na tji' jndyoyu ntyja 'naan'
Tyo'ts'on
\p
\v 1 Ndo' ty'ön cüenta ncüii ts'oon. Ts'iaan' na
covijnt'uehan' na icüji' ts'an xjen 'nan. Ndo' jndyi na cjö
cüji' xjen juu vats'on cüentaa' Tyo'ts'on yo nnontyiu 'naan'han'.
Ndo' mantyi na quits'a cüenta nchu xjen jndye nn'an na
conan't'maan'han jon jo'.
\v 2 Ndo' viochen xjen na macüji' ja xjen juu vats'on'ñeen,
tyí'ncüji' ja xjen toch'een'han', ee jndë tyincyaa
Tyo'ts'on na joo nn'an na chito nn'an judíos conduihan, vanaan
na ngondyi'han juu tsjoon'ñeen venn'an vantjo' ve chi. Ndo'
na ntquenhan xjen 'naanhan juu tsjoon'ñeen, tsjoon na ji'ua
cüentaa' nquii Tyo'ts'on 
\v 3 Ndo' tso jon na nc'ua jon ts'ian ndëë ve ts'an na ntji'
jndyoyuhan ntyja 'naan' jon ncüii min vantjo' ve ciento vantjo'
ndyenn'an xuee. Nan'ñeen ntcüehan ndiaa nton na të.
\p
\v 4 Ve joo nan'ñeen ninnquii'chen m'anhan na tonnon Tyo'ts'on.
Conduihan ve ts'oon olivo ndo' yo ve ncjo na ntyjo chon na
minntyjee'han' tonnon nquii jon na iquen jon xjen ninvaa
tsonnangue.
\v 5 Ndo' xe na aa m'aan nin juu na nin'quits'aa
natë' ve joo nan'ñeen, yajo' nndui' chon jndyuehan na
ntscohan' ts'an na jndoo'han. Mannda' ro vaa na ntscuee'han'
minninchen ts'an na ntsichon juu na nts'aa juu natë'han.
\v 6 Joo nanmin' viochen xjen na conincyahan jñ'oon' Tyo'ts'on, vaa
najndei na conduihan na ngitë'han tsjö'ndue na tyi'ngua'. Ndo'
mantyi vaa najndëhan na juu ndaatioo ngüequen neon'han'. Ndo'
min'cya ro xjen na nt'ue n'onhan, nndëë nnan'quioohan
mincya ro nnon navi' nacjo nn'an tsonnangue.
\p
\v 7 Vi jndë jndë joo ts'ian na t'ua Tyo'ts'on ndëëhan na
cotji' jndyoyuhan, yajo' juu quioo'jndyi t'man na m'aan o' tsë'tsjoon
na tayuu ntycüii na njoonhan', nndui' o' jo', ntsiquita' o'
tyia' yo ve joo nan'ñeen. Ndo' ngüantjon o' joohan ndo'
ntscüje o' nan'ñeen.
\v 8 Ndo' si'ts'o 'naanhan
ngüendyuaatohan' nata quii' tsjoon t'man naijon na t'ion nn'an
ta Jesucristo tsonjn'aan. Nquii jon conduihin na itye'ntjon
jon joo ve nan'ñeen. Yo jñ'oon na tyi'quitso nquii'han'
itsiquijndyuhan' juu tsjoon'ñeen Sodoma ndo' Egipto.
\v 9 Ndo'
si'ts'o 'naan ve nan'ñeen, ndye xuee xoncüe ngüendyuaahan'
quii' tsjoon'ñeen. Ndo' nque nn'an tsonnangue na ncüii cüii
tsjan condui, ndo' nn'an na ncüii cüii nnon tmaan' na nan'xuan,
ndo' nn'an na ncüii cüii nnon jñ'oon na conan'nein yo
nin'nn'an na ncüii cüii tyuaa, ve' na njnty'iatohan si'ts'o
'naan nan'ñeen, min tyi'je'ncyahan na nganty'iu nan'ñeen.
\v 10 Ndo' nque nn'an tsonnangue nc'onhan na nein jndyihan na jndë
iscüje quioo' t'man'ñeen ve nan'ñeen. Nnan't'maan'han ndo' nnt'ahan
naya ntyjehan ng'e conduehan na ve joo nan'ñeen na tyincyahan
jñ'oon' Tyo'ts'on, t'man vaa na tonan'cüetë'han nn'an
tsonnangue.
\p
\v 11 Majo' vi na jndë ndye xuee xoncüe na minndyuaato si'ts'o
'naan nan'ñeen, ndo' s'aa Tyo'ts'on na tja nnda'hin jndyee na
tyincyaahan' na tando' xcohan. Ndo' quintyjachen sacüentyjee'han.
Ndo' tsoñ'en nn'an na jnty'ia na tui na nnda', tyue jndyihan.
\v 12 Ndo' joo ve nan'ñeen jndyehan ncüii jndye na jndei
tic'uaahan' tondye quiñoon'ndue, itsohan':
\p —Quindyovaho' ntjoohin.
\p Ndo' joo nn'an na vjehan nan'ñeen, viochen xjen na
cojnty'iahan, teva ntcüe' nan'ñeen quiñoon'ndue quii' chincyu.
\v 13 Ndo' majuuto xjen'ñeen, jndei jndyi s'ii, ndo' ncüii cüii na
nqui nt'aa nn'an na minntyjee'han' quii' tsjoon'ñeen, tyuii'ñ'en
ncüiihan'. Ndo' nn'an na m'an juu tsjoon'ñeen, tjë ntyque'
minhan. Ndo' nn'an na jnty'ihan', tyue jndyihan. Ta'han na
ntcüii'han nquii Tyo'ts'on na m'aan quiñoon'ndue.
\p
\v 14 Juu navi' t'man na jndë ve, jndë tenonhan'. Majo' cje
ro ngüentyja navi' t'man na jndë ndye.
\s Tja' ndu na jndë ntyque'
\p
\v 15 Ndo' juu ángel na jndë ntyque', tja' jon ndu 'naan'
jon. Yajo' quityquii' quiñoon'ndue jndei tic'uaa na condinein.
Conduehan:
\q Ndyu na toxen'chen, 
\q nque nn'an na ncüii cüii
tsonnangue totoxenhan ntyjehan. 
\q Naneinhin nquii
Tyo'ts'on na conan't'mán', 
\q yo nquii Cristo na
conduihin ntyja 'naan' jon, 
\q joohan ncy'onhan
cüenta juu ts'ian'ñeen.
\q Ndo' nquii Cristo tyi'jon quintycüii
na itye'ntjon jon tsoñ'en.
\v 16 Yajo' joo ntcyu ncho' nenque nn'an na conintque na
minndyuaahan silla na manin' ts'iaan' na tonnon Tyo'ts'on,
tyetangiohan, ndo' tque' ndö'quitahan nnon tyuaa, ndo'
mantyi tonan't'maan'han Tyo'ts'on.
\v 17 Jnduehan:
\q 'U' ta Tyo'ts'on na tsoñ'en najndei na matsixuan',
'U' m'an' na toxen'chen ndo' m'an' nanein,
\q 'U' ntyja 'naan' juu najndei na matsixuan'.
\q Jo' jndë tye' na matye'ntjon'.
\q Ncya ya 'u' na nnda' vaa.
\p
\v 18 Nn'an tsonnangue tonan'vjehan 'u',
\q majo' jndë tentyja xjen na ntsiv'i'han,
\q ndo' na ntco'xen' nn'an na jndë tjë nchu 
vaa na tonan'tjahan nnon'.
\q Ndo' mantyi nque nn'an na totyentjonhan nnon'
na toninncyahan jñ'oon 'nan' ntyja nchu vaa
'nan na nguaa, ndyion'han.
\q Joohan yo nque nn'an na maquen'han
cüenta' na conan't'maan'han xue',
\q nque nn'an na tyi'tque ndo' mantyi joo
nn'an na jndë tque, 
\q yo manin' joo nn'an
na conan'ndaa'hin nn'an na ninvaa tsonnangue,
\q nanein jndë tentyja xjen na ntsityui'han.
\p
\v 19 Yajo' juu vats'on cüentaa' Tyo'ts'on na m'aanhan'
quiñoon'ndue jnaanhan', ndo' quityquii'han' tityincyoo' juu iston
na ji'ua tsixuanhan'. Jñ'oon na sijnda' jon na
tyi'je'quitscüejndyo jonhan', jo' vavehan'. Yajo' tota' ntsuee
chon ndo' to'manhan'. S'ii tyuaa ndo' tycyaa tsan tman.
\c 12
\s Juu tsanscu yo quitsoontyia colo ve
\p
\v 1 Yajo' quii' tsjö'ndue tityincyoo' ncüii jn'aan t'man na
s'aahan' na vacue na m'aan' n'on nn'an. Jnty'ia ncüii tsanscu,
cüe ndo'cüjioon'hin, cha'vijon na cüe ts'an ndiaa. Minntyjee'
juu nacjoo' chi' ndo' corona na ñjon xquen juu chu' ncho've
ncjuuhan'.
\v 2 Ndo' ñjon jnda juu. Ta' juu na itsixuaa juu na
iquiihan'hin na mavaa xjen na ntsingui juu.
\v 3 Ndo' quen' cüenta, juu xjen'ñeen tityincyoo' ncüiichen jn'aan
t'man tsjö'ndue. Mantyi jnty'ia ncüii quitsoontyia na
t'man o' ndo' ve o' cha' colo chon. Vaa ntyque' xquen o'
ndo' nqui ndi'ndyee' o'. Ndo' ncüii cüii na ntyque' xquen
o' ñjon corona.
\v 4 Ya na tuein'
o' ts'aan o' tsjö'ndue, ncüii cüii na ndye ncjuu na m'an jo',
ncüii quixjuu'ñeen tatyjohan', ndo' tju' o' joohan' tyuaa.
Jndë jo' juu quitsoontyia'ñeen, tacüentyjee' o' na tonnon
tsanscu'ñeen na mavaa xjen na ntsingui juu, cha' vi na jndë tui
jnda juu, maquintyjachen ntquii o' juu yujnt'a'ñeen.
\v 5 Ndo'
juu tsanscu'ñeen, yujnt'a na singui juu, yus'ahin. Juu
yujnt'a'ñeen, tsixuan jon na quitye'ntjon jon nn'an ncüii cüii
tsonnangue yo jñ'oon najndei'han', cha'vijon na y'oon jon
tsonjnt'ei xjo. Majo' nquii Tyo'ts'on tji' jon juu yujnt'a'ñeen
nt'ö tsanscu'ñeen. Tay'oon jonhin naijon na vaa silla na
manin' ts'iaan' 'naan' jon.
\v 6 Ndo' juu tsanscu'ñeen, jnannon
jon ncüii joo na tojndëë naijon na jndë sijnda' Tyo'ts'on na
ntjohin. Jo' m'an nn'an na ntixee'han jon ncüii min vantjo' ve
ciento vantjo' ndyenn'an xuee.
\p
\v 7 Ndë jo' tye' tyia' tsjö'ndue. Nquii Miguel yo ángeles
'naan' jon jnt'ahan tyia' yo juu quitsoontyia'ñeen. Ndo' mantyi
juu quitsoontyia'ñeen yo ángeles na ico'xen juu, jnan'chonhan,
jnt'ahan tyia' yo nquii Miguel yo ángeles 'naan' jon.
\v 8 Majo' juu quitsoon'ñeen yo ángeles 'naan' juu, ta'nan
jndë s'aa juu, min tajndëë na ntjontyichenhin tsjö'ndue yo 
ángeles'ñeen. 
\v 9 Ndo'
tji'han juu jo', jnan'quioohanhin nnon tsonnanguechen.
Mantyi jnan'cyaahan ntyje yotyia juu. Xjen na tye' tsoñ'en,
itsiquijndyuhan'hin quitsu tque, yutyia ndo' Satanás.
Itsivi'nn'an juu nn'an na ninvaa tsonnangue.
\p
\v 10 Jndë jo' jndyi na jndei tic'uaa na conan'nein nn'an na
m'an quiñoon'ndue. Ninncüii tjon' jndyeehan, jnduehan:
Nquii Tyo'ts'on cüenta jaa, nanein jndë
siquindë jon na itsin'man jon ñuan njanhan
quii' najndei na totsixuan juu yutyia tque.
Na s'aa jon na nnda', itsi'manhan' juu najndei
na conduihin yo nin'ntyja na ityentjon jon,
yo juu na conduihin Cristo.
Ee nquehan jndë tji'han juu yutyia tque.
Majuu juu naxuee ndo' natsjon na tots'aa
juu ts'ian toninncyaa juu jnan ntyjëëhë
na tonnon Tyo'ts'on.
\v 11 Joo nn'an cüentaa' jon jndë tantjonhan
juu yutyia yo ntyja 'naan' neoon' nquii
Quitsman Chjo na tovantyja n'onhan jon,
ndo' mantyi yo jñ'oon na totji' jndyoyuhan
ndëë nn'an nchu vaa na s'aa Tyo'ts'on
yo joohan. Tom'anhan na tanin ngiohan
min na jnan'cüje nn'anhin.
\v 12 Mang'e na nnda', tsoñ'enho' na m'anho'
quiñoon'ndue, c'onho' na neinho'.
Majo' 'o', nn'an na m'anho' nnon tsonnangue,
yo 'o' na m'anho' ndaandue, nty'ia jndyiho'
ee juu yutyia jndë isquioohan'hin na m'anho'.
V'ii jndyi juu ng'e nchjii ya juu na jndë tichjo
xuee ntyja 'naan' juu.
\p
\v 13 Ndo' juu quitsoontyia'ñeen, vi na jndë jndyiaa' juu na
tjue'hanhin nnon tsonnangue, yajo' tantyja juu toxen' juu
tsanscu'ñeen na singui jon yujnt'a na yus'a.
\v 14 Majo'
tyincyaa Tyo'ts'on ve ntsquii quichi t'man nnon juu tsanscu'ñeen
cha' nndëë nnanva jon na nnannon jon juu quitsu tque'ñeen.
Yajo' juu tsanscu'ñeen, tja jon ncüii joo ndyuaa naijon
ta'nan nn'an c'oon naijon na ndiquindëë na 
nts'aa quitsu tque'ñeen natë'hin. Jo' ntixee' Tyo'ts'on jon ndye 
chu xoncüe.
\v 15 Ndo' juu quitsu tque'ñeen, s'aa juu na jndui' ndaa jndye
jndyi 'ndyo juu na tantyjahan' toxen' juu tsanscu'ñeen.
S'aahan' cha'vijon ncüii jndaahan' cha' ntyja 'naan'han'
ngavja tsanscu'ñeen.
\v 16 Majo' nquii tyuaa tejndeihan' juu tsanscu'ñeen na sinueen'han'
'ndyohan', na t'uhan' jndaa'ñeen na jndui'han' 'ndyo juu
quitsoontyia'ñeen
\v 17 Mang'e na nnda', juu quitsoontyia'ñeen, tyionhan' na
quindya' ntyjii juu ntyja 'naan' nquii tsanscu'ñeen. Jndë
jo' tja juu, tëquits'aa juu tyia' nacjo tsoñ'en nn'an na
conduihan tsjan 'naan' tsanscu'ñeen na conan'quindëhan
jñ'oon na tquen Tyo'ts'on na ico'xenhan', ndo' na
contjotyenhan ntyja 'naan' jñ'oon na toninncyaa Jesús.
\c 13
\p
\v 1 Yajo' juu quitsoontyia'ñeen tacüentyjee' juu 'ndyo
ndaandue.
Ndo' jnty'ia quityquii' ndaandue, jo' vandui' ncüii quioo'jndyi
t'man. Min nqui ndi'ndyee' o' yo ntyque' xquen o'. Ndo' ncüii cüii
tsi'jndyee' o' ñjon ncüii corona. Ndo' cjoo' ncüii cüii
xquen o', jndë jndui jñ'oon tsan' na itscüejnaan'han' nquii
Tyo'ts'on.
\s Ve quioo'jndyi t'man na jndui' quii' ndaandue
\p
\v 2 Juu quioo'jndyi t'man'ñeen na jnty'ia, itsijonhan'
juu o' cha'vijon ncüii quitsian ntji. Majo' ng'ee o' cha'vijon
ng'ee oso, ndo' 'ndyo o' cha'vijon 'ndyo lión. Ndo' juu
quitsoontyia'ñeen, tyincyaa juu juu najndei na tsixuan juu nnon
quioo'jndyi t'man'ñeen. Mantyi tyincyaa juu na ngüaquityen o' juu
silla na manin' ts'iaan' 'naan' juu, ndo' yo nin'juu na t'man conduihin
na co'xen juu.
\v 3 Ncüii xquen juu quioo'jndyi t'man'ñeen,
mioon jndyi tquee'han' ata mavaa xjen na ngue'han', s'aahan' na
tyi'je'cüiyahan'. Majo' jndë ntyjaa' naijon na mioon tquee' xquen
juu o'. Ndo' tsoñ'en nn'an na ninvaa tsonnangue, vacue tom'aan'
n'onhan ntyja 'naan' na mioon jndyi na tquee' juu cho'ñeen, majo'
ta'nan tue' o'. Ndo' tëvee' jndyi ngio nan'ñeen, ndo' tonan'jonhan yo
juu quioo'jndyi t'man'ñeen.
\v 4 Ndo' juu quitsoontyia'ñeen, tonan't'maan' nn'anhin na
cha'vijon nquii Tyo'ts'onhin na ngiohan ng'e na jndë
tyincyaa juu juu najndei na tsixuan juu nnon juu
quioo' jndyi'ñeen. Mantyi tonan't'maan'han juu quioo'ñeen.
Tonduehan ndëë ntyjehan na tanin juu na itsijonhan' na
t'man conduihin cha'xjen nquii quioo'jndyi t'man. Tanin juu na
nndëë ntsuehin nacjoo' o'.
\p
\v 5 Mantyi jnty'ii Tyo'ts'on na vanaan na quitsinin o' jñ'oon
tsan' nacjoo' nquii jon yo jñ'oon na icüji' s'a nquii o'. Ndo'
jndaa' o' na quits'aa o' nin 'nan na nin'quits'aa juu ncüii
venn'an vantjo' ve chi'.
\v 6 Ndo' juu quioo'jndyi'ñeen, ta' juu na itsinin juu jñ'oon ji vaa 
nacjoo' nquii Tyo'ts'on ndo' nacjoo' xuee' jon yo nacjoo' quiñoon'ndue 
naijon na m'aan jon yo nin'tsoñ'en joo na m'an jo'.
\v 7 Ndo' mantyi jndaa' o' na
vanaan na quits'aa juu tyia' nacjo nn'an na conduihan cüentaa'
Tyo'ts'on ndo' na ngüantjon o' joohan. Ndo' mantyi jndaa' o' na
co'xen juu ncüii ncüii tmaan' tsjan nn'an tsonnangue, yo ncüii
cüii nnon nn'an na m'an ncüii ncüii ndyuaa yo ncüii cüii
tmaan' nn'an na mañoon jñ'oon na conan'nein ndo' yo nn'an na
ncüii cüii tsonnangue.
\v 8 Tsoñ'en nn'an tsonnangue na
tyi'quinan'xuanhan cüentaa' Tyo'ts'on, nnan't'maan'han juu
quioo'jndyi t'man'ñeen na cha'vijon nquii Tyo'ts'onhin na ngiohan.
Manque nn'an na tajndui ngueehan nnon tson 'naan' juu Quitsman
Chjo na jnan'cuee' nn'an. Ee ntyjantyi xjen na tquen Tyo'ts'on
tsoñ'en, vaa tson na jndui nguee nn'an na
nan'xuanhan na tyi'quintycüii na cota'ndo'han.
\p
\v 9 Minninchen ts'an na nin'cüaa' ts'on juu, cüa, quindyii juu
jñ'oonvahin:
\v 10 Ncüii cüii ts'an na tijnda' na
quit'uiivi'han'hin, majnda' na nndui na nnda',
ndo' ncüii cüii ts'an na tijnda' na ngue'
yo xjo, mayo xjo ngue' juu.
Mang'e na nnda' vaa na itsiquindyi juu jñ'oonva', joo nn'an
na conduihan cüentaa' Tyo'ts'on, icanhan' na quinan'quii n'onhan
navi' na ngoquenonhan ndo' yo na xoncüee' n'onhan cantyjatyen
n'onhan jon.
\s Quioo'jndyi t'man na jndui' o' quii' tyuaa
\p
\v 11 Jndë jo' jnty'ia ncüiichen quioo'jndyi t'man na vandui' o'
quii' tyuaa. Juu quioo'ñeen ntyjo ve ndi'ndyee' o' cha'na
ndi'ndyee' ncüii quitsman chjo. Majo' sinin o' cha'na itsinin
nquii juu quitsoontyia.
\v 12 Tsoñ'en najndei na totsixuan juu
quioo'jndyi t'man na vejndyee, majuuntyihan' tsixuan juu o' na m'aan
juu ntyja 'naan' quioo'jndyi tque t'man'ñeen. Yo naijndei'han' its'aa
o' na joo nn'an na ninvaa tsonnangue na quinan't'maan'han juu
quioo'jndyi tque, majuu quioo'ñeen na mioon jndyi tquee' xquen
na jndë jn'man ntcüe'.
\v 13 Ndo' jndye jndyi nnon ts'ian t'man na tots'aa o' na
tyi'je'quindëë nduihan' yo najndei nquii ts'an. Mantyi
yo jn'aan t'man na tots'aahan' na vacue tom'aan' n'on nn'an.
Ata s'aa o' na jnty'ia nn'an na jnan chon tsjö'ndue,
tyioohan' tyuaa.
\v 14 Ndo' ng'e ntyja 'naan joo ts'ian t'man'ñeen na tots'aa o'
na tonnon juu quioo'jndyi t'man na vejndyee, jo' totsivi'nn'an o'
joo nn'an tsonnangue. Mantyi t'ua o' ts'ian na quinan'ya
nn'an ncüii 'ndyonnon juu quioo'jndyi tque t'man'ñeen na
quinan't'maan' nn'anhan' na cha'vijon conduihan' nquii Tyo'ts'on.
Majuuntyi quioo' na mioon jndyi tquee' xquen yo xjo, majo'
ninvaa vando' juu.
\v 15 Ndo' vi na jndë jnan'ya nn'an juu
'ndyonnon quioo'jndyi tque t'man'ñeen, juu quioo'jndyi na jndë ve
jndaa' o' najndei o' cha' nninncyaa o' na ndëë ncüjahan' jndye
ndo' na ntsininhan'. Ndo' minninchen ts'an na
tyi'nin'quitsit'maan' juu 'ndyonnon juu quioo'jndyi tque t'man'ñeen,
its'aa juu quioo' jndyi na jndë ve na cue' tsan'ñeen.
\v 16 Ndo' mantyi tyincyaahan' na tsixuan o' na yo naijndei'han' ncüii
cüii ts'an quiñoon jn'aan nt'ö juu ntyjaya oo tsö'sta juu.
Tanin min xe na aa ts'an tyi'tquehin oo min na aa jndë tquehin.
Tanin min na aa tyahin oo min na aa jñen'hin. Tanin min xe na
aa ts'an na ityentjontyen juu nnon patrón, oo min xe na aa nquii
patrón.
\v 17 Ndo' minninchen ts'an na tyi'coñoon jn'aan'ñeenhin,
je'quindëë ntsijnda juu oo na njndëë juu 'nan. Juu jn'aan'ñeen
tsi'manhan' xuee' juu quioo'jndyi tque t'man oo juu número na tsixuan
xuee' o'.
\v 18 Juu jñ'oonva icanhan' na c'oon ts'an na jnda' xquen juu.
Ncüii cüii ts'an na ivaa' ts'on juu, cüji' juu cüenta ntyja
'naan' juu número na tsixuan juu quioo'jndyi'ñeen, ee tsi'manhan'
xuee' ncüii ts'an. Juu número 'naan' tsan'ñeen ndö vaahan',
yon ciento vantjo' ndyenn'an vantjo' yon.
\c 14
\s Alabanza xco na cota minchen nn'an
\p
\v 1 Jndë jo' jnty'ia nnon tyo' Sión, jo' ventyjee' juu
Quitsman Chjo. Yo nquii jon tojnaan' m'an ncüii tmaan' nn'an na
jndye jndyihan. Tuee' número joo nan'ñeen ncüii ciento min
vantjo' venn'an vantjo' nenque minhan. Quitahan, jo' jndë
jndui xuee' nquii jon yo xuee' Tye jon.
\v 2 Ndo' tondye quiñoon'ndue jndyi na tic'uaa. Juuhan'
sijonhan' cha'vijon na coquioo jndaa t'man ndo' cha'vijon na
jndei co'man ntsuee. Juu jndye'ñeen na jndyi, sijonhan'
juuhan' cha'na na cotja' nn'an jndye jndyi arpa.
\v 3 Joo nan'ñeen minntyjee'han na tonnon juu silla na manin'
ts'iaan' na vaquityen nquii Tyo'ts'on yo na tondëë nenque
na cota'ndo'ñeen yo joo na conditque. Cotahan ncüii
alabanza xco. Ndo' xia'ntyi nque joo nn'an na
ncüii ciento min vantjo' venn'an vantjo' nenque min na
sijnda Tyo'ts'onhan quityquii' nt'an nn'an tsonnangue, joohan
vanaan na nnan'jn'aanhan juu alabanza'ñeen, tanin ncüiichen
ts'an.
\v 4 Joo nanmin' nn'an na tyi'conan'ndaa'hin na nc'onhan yo nanntcu na
ve' ndö' ro, tota'ntyjee' nquehan cha' nan'xuanhan ñuan
nquii' na tonnon Tyo'ts'on. Co'onan'jonhan yo nquii jon na
conduihin Quitsman Chjo minyuuchen na vja jon. Sijnda Tyo'ts'on
nan'ñeen quii' nt'an nn'an ndo' tquen jonhan na conduihan nn'an
navejndyee cüentaa' nquii jon yo cüentaa' juu Quitsman Chjo.
\v 5 Nan'ñeen taconan'neinhan jñ'oon quintu. Ndo' min'ncüii nnon
taconan'tjahan nnon Tyo'ts'on.
\s Jñ'oon na coninncya ndye ángeles
\p
\v 6 Jndë jo' jnty'ia ncüiichen ángel. Mantyja jon na tondye.
Y'oon jon juu jñ'oon naya na tyi'quintycüii na m'anhan' na
nquii Tyo'ts'on sijnda' jonhan' vitjachen na tquen jon tsoñ'en.
Incyaa ángel'ñeenhan' ndëë nn'an tsonnangue, mantyi ndëë
joo nn'an na ncüii cüii tsonnangue, yo joo nn'an na
xi'jndui' nnon tsjan, ndo' yo joo nn'an ncüii cüii nnon
jñ'oon na conan'neinhan.
\v 7 Jndei sinin jon, itso jon:
\p —Xia'ntyi nquii Tyo'ts'on cüinjonhin ngioho'.
Quinan't'maan'ho'hin, ee jndë tentyja xjen na ntco'xen jon nn'an
ntyja 'naan' na conan'tjahan nnon jon. Quinan't'maan'ho'hin na nquii
jon na tquen ntjö'ndue yo tsonnanngue yo ndaandue yo nin'ncüii
cüii joo naijon na m'aan tëndëë ndaa.
\p
\v 8 Ndo' ncüiichen ángel, tsan na jndë ve, tantyja jon
toxen' juu ángel'ñeen. Tso jon:
\p —Tsjoon t'man Babilonia, jndë tyuii', jndë tyuii'han'. Ntyja
'naan joo natyia na cont'a nn'an juu tsjoon'ñeen, jndë
conan'ndaa'han nn'an na ninvaa tsonnangue. Juu natyia'ñeen
tsijonhan' juuhan' cha'vijon vinon na totsc'u jon nn'an na
si'ndaa'han'hin, s'aahan' joohan cha'vijon na quindyehan.
\p
\v 9 Jndë jo' ncüiichen ángel na jndë ndye, tëntyja jon na
nquen' ve joo ángel'ñeen. Jndei sinin jon, tso jon:
\p —Minninchen ts'an na ntsit'maan' juu quioo'jndyi tque yo 'ndyonnon
o', vi' jndyi ngenon tsan'ñeen. Ndo' majo'ntyi ngenon juu
ts'an na ninncyaa na nñoon jn'aan tsö'sta juu oo nt'ö juu
ntyja 'naan' juu quioo'ñeen.
\v 10 Ee xe na aa nñoon jn'aanhin,
majnda' na nt'uiityen Tyo'ts'onhan, na juuhan' ji vaa
tsixuanhan'. Juu na itsiv'ii matyen jonhan, itsijonhan' juuhan'
cha'vijon vinon nquii' na ntsiquitoo' jon vaso yohan' na ntsc'u
jonhan' joo nan'ñeen. T'man jndyi navi' na ngenon nan'ñeen na
ntcohin quii' chon yo sufre tondëë ángeles cüentaa' jon na
ji'ua nan'xuanhan ndo' mantyi na tonnon nquii Quitsman Chjo.
\v 11 Quii' chon na ñjon nan'ñeen na cojnty'iahan navi', ninvito
cotsava neonhan'. Min naxuee ndo' min natsjon, tyi'je'ncyaahan'
na nta'jndyeehan chjo, jnaan' na tonan't'maan'han juu quioo'
jndyi tque'ñeen yo 'ndyonnon o', joohan ndo' mantyi
minninchen ts'an na nñoon jn'aan xuee'
quioo' jndyi'ñeenhin.
\p Ndö' vaa jñ'oon na tso nquii ángel'ñeen.
\p
\v 12 Mang'e na nnda' vaa, joo nn'an na conduihan cüentaa'
Tyo'ts'on, icanhan' na quita'nguee'han jñ'oon na iquen jon na
ico'xenhan', ndo' quintjotyenhan ntyja 'naan' na vantyja n'onhan Jesús,
ndo' yo na t'man n'onhan, quinan'quii n'onhan navi' na
coquenonhan.
\p
\v 13 Ndo' jndyi ja ncüii jndye na jnanhan' toquiñoon'ndue,
itsohan' nnön:
\p —Ndö ro jñ'oon cüji': “Nanein na tonnonchen, joo nn'an na
m'anhan ntyja 'naan' ta Jesucristo xjen na ncüjehan, ityio
Tyo'ts'on jn'aan nan'ñeen.”
\p Ndo' nquii Espíritu Santo sintcüe' jon jñ'oon. Itso jon:
Mayuu' nnda' ee nta'jndyeehan quiñoon'ndue ng'e na tonan'chonhan
quityquii' joo ts'ian na i'ua Tyo'ts'on ndëëhan. Min tyi'co'tsuu'
ts'on jon nchu vaa na totyentjonhan nnon jon.
\s Cont'a ángeles cha'na ts'an na ityjee juu
ntjon na jndë tue'
\p
\v 14 Jndë jo' jnty'ia ndo' na tonnön tityincyoo' ncüii chincyu
quichi'. Nacjoo'han' vequityen ncüii cha'vijon ts'an. Xquen jon
ñjon ncüii corona na jndëhan' yo s'on ijan ndo' nt'ö jon
ndyii' ncüii xjo quix'en na të 'ndyohan'.
\v 15 Jndë jo' quii' vats'on quiñoon'ndue naijon na m'aan
Tyo'ts'on, jo' jndui' ncüiichen ángel. Juu ángel'ñeen
jndei sixuaa juu nnon nquii jon na vequityen nacjoo'
chincyu'ñeen. Itso juu:
\p —Cüa je', cju' xjo quix'en 'nan'. Quityje' ntjonmin', ee jndë
tentyja xjen na nt'uiihan' nque nn'an tsonnangue tsojnaan' na
conan'tjahan. Itsijonhan' ntyja 'naanhan cha'vijon ntjon na
jndë tman.
\p
\v 16 Ndo' nquii jon na vequityen nacjoo' juu chincyu'ñeen, tju'
jon xjoo' jon nnon tsonnangue, jo' tyjee jon ntjon na min jo',
juu nan'ñeen, conduihan' nn'an.
\p
\v 17 Jndë jo' jndui' ncüiichen ángel quityquii' juu vats'on
quiñoon'ndue. Mantyi y'oon juu ncüii xjo quix'en na të
'ndyohan'.
\v 18 Ndo' mantyi jndui' ncüiichen ángel na ivantyjee' juu chon
na ntyjo nnontyiu quii' juu vats'on'ñeen. Jndei tic'uaa
'ndyo juu nnon nquii jon na y'oon xjo'ñeen. Itso juu:
\p —Cüa, cju' xjo quix'en 'nan'. Quityje' n'ein tëndöndyoo'
tsjan, joo nt'öö na ventyjee' nnon tsonnangue, ee të na
chuu'han', jndë jndëëhan'.
\p
\v 19 Ndo' ta' juu ángel'ñeen na iju' jon xjo'ñeen nnon tsonnangue. Sitjon 
jon n'ein tëndöndyoo' tsjan'ñeen, joo nt'öö na ventyjee' jo'. Ndo'
tyion jon të'ñeen nnon ncüii tsjö' na quinjoon yuu na nndui'
ndaa'han'. Ts'ian'ñeen itsijonhan' juuhan' juu navi' t'man
jndyi na ntquenon nn'an na itsiv'ii Tyo'ts'onhan.
\v 20 'Ndyo
tsjoon, jo' m'an joo na tondyuehan tëndöndyoo' tsjan'ñeen.
Ndo' na tui ts'ian'ñeen, jo' jndui' n'eon nn'an ata sijonhan'
juu neon'ñeen cha'vijon ncüii jndaa. Njoonhan' ata tuee'han'
frenon jndyue quitso. Ndo' tycya tanoonhan', tuee' ndye ciento
kilómetros na tjahan'.
\c 15
\s Ntyque' navi' t'man na conan'cyaa ntyque' ángeles
\p
\v 1 Ndo' jnty'ia ncüiichen jn'aan t'man quiñoon'ndue.
S'aahan' na vacue m'aan' ts'ön na ndicüaa' ts'önhan'.
Jnty'ia ntyque' ángeles na conan'y'onhan ntyque' nnon navi'
t'man. Joohan' nan'xuanhan' navi' na mats'ia, ee ya na
ngüenon na nnduihan', mana contycüii na itsiv'ii Tyo'ts'on
nn'an.
\p
\v 2 Mantyi jnty'ia ncüii ndaandue na sijonhan' juuhan'
cha'vijon ndioo na tjon'han' yo chon. To'ndyohan', jo' jnty'ia
ventyjee' nn'an na jndë tantjonhan yo juu quioo' jndyi tque yo
'ndyonnon juu o' ndo' yo número na tsixuan xuee' o'. Nduee
nan'ñeen, jo' too' arpa na tyincyaa Tyo'ts'on ndëëhan.
\v 3 Cotahan alabanza ntyja 'naan na sin'man jon ñuaanhan. Juu jñ'oon'ñeen
itsijonhan' juuhan' cha'na juu jñ'oon na si'man Moisés ndëë
nn'an Israel xjen na totye'ntjon jon nnon Tyo'ts'on. Mantyi
juu alabanza'ñeen itsit'maan'han' nquii Quitsman Chjo. Conduehan:
\q 'U' ta Tyo'ts'on, tsoñ'en najndei condui 'u'. 
\q Joo ts'ian na matsa', 
\q t'man jndyi nan'xuanhan',
\q ndo' cavee' jndyi ngiöhan'.
\q 'U' condui 'u' na matye'ntjon' nn'an na
ninvaa tsonnangue. 
\q 'U' ninnquii'chen
matsa' cha'xjen na chuhan', 
\q tsoñ'en
ntyja 'nan' conduihan' na mayuu'.
\q
\v 4 'U' ta, ta'nan ts'an c'oon na tyi'ncyaa' juu
'u', tsoñ'en nn'an nnan't'maan'han xue'.
\q Ee xia'ntyi ncu' condui 'u' ñuan nquii'. 
\q Nn'an ncüii cüii tsonnangue nninncyohan na
nnan't'maan'han 'u', 
\q ee ndëë tsoñ'en nn'an
covityincyoo' na matsa' cha'xjen na chuhan'.
\p Ndö' vaa jñ'oon na ta nan'ñeen.
\p
\v 5 Vi jndë na tenon nan'min', yajo' jnty'ia na jndë vanaan
quityquii' juu vats'on quiñoon'ndue na quiñoon'ntyichen naijon
na m'aan nquii Tyo'ts'on. Majuuhan' yuu na tonan've nn'an Israel
ntjö' na jndui joo nqui jñ'oon na ico'xenhan' xjen
na tonan'y'onhan juu vats'on ndiaa.
\v 6 Quityquii' juu
vats'on'ñeen jndui' ntyque' ángeles'ñeen. Conan'chohan ntyque'
nnon navi' t'man na ntquenon nn'an. Joo ángeles'ñeen cüehan
ndiaa ntju' na jndëhan' yo tsan lino quichi' jndyi. Ndo'
ndi'ndyahan tyen ncüii 'nan na jndëhan' yo s'on ijan.
\v 7 Ndo'
ncüii joo na nenque na cota'ndo'ñeen, ndëë joo
ángeles'ñeen tyincyaa jon ntyque' xio na jndëhan' yo s'on ijan.
Ngio'ñeen too'chenhan' na ñjon navi' t'man na ntquenon nn'an
tsonnangue ng'e nquii Tyo'ts'on na ninnquii'chen vando' jon,
itsiv'ii matyen jonhan.
\v 8 Ndo' juu vats'on naijon na m'aan jon,
siquitoo'han' juuhan' yo neon ntyja 'naan' na quixuee jndyi na condui
nquii jon yo na taquintyja najndei na tsixuan jon. Ndo' ata xjen
na jndë tenon joo na ntyque' navi' t'man'ñeen na conan'cho joo
ntyque' ángeles'ñeen, tanin juu na nndëë ngaquee' naijon na
m'aan Tyo'ts'on.
\c 16
\s Ntyque' ngio na too'han' ñjon juu na
v'ii jndyi Tyo'ts'on
\p
\v 1 Ndo' jndyi ja na jndei itsinin Tyo'ts'on quityquii'
vats'on quiñoon'ndue. Tso jon ndëë joo ntyque' ángeles'ñeen:
\p —Joo ntyque' ngio na choho' na t'man vaa na matsiv'i nn'an
tsonnangue, c'oho' na quitsanan'cüetanho'han' jo'.
\p
\v 2 Ndo' juu ángel navejndyee tja jon, ndo' xio 'naan' jon
na ñjon navi', tatscüetan jonhan' nnon tsonnangue. Ndo' na
nnda', joo nn'an na ñoon jn'aan 'naan' juu quioo'jndyi
tque'ñeen oo nn'an na tonan't'maan'han 'ndyonnon o', joo
nan'ñeen, jnan' ntyje'han. Tsojnaan' ntyje'ñeen, mioon
jndyi toquiihan'hin.
\p
\v 3 Ndo' juu ángel na jndë ve, xio 'naan' jon na ñjon navi',
tatscüetan jonhan' nnon ndaandue, ndo' ndaandue'ñeen 
scüequenhan' cha'vijon tyoncüe neon'. Ndo' tsoñ'en na
cota'ndo' quityquii' ndaandue'ñeen, tjëhan.
\p
\v 4 Ndo' juu ángel na jndë ndye, xio 'naan' jon na ñjon
navi', mantyi tatscüetan jonhan' nacjo ndaa jndaa yo tsoñ'en joo
naijon na m'aan tëndëë ndaa. Ndo' ndaa'ñeen, scüaquenhan'
neon'han'.
\v 5 Ndo' jndyi na itsinin juu ángel na tsixuan
juu na ivantyjee' juu ndaa. Itso juu nnon Tyo'ts'on:
\p —'U' ta Tyo'ts'on, condui 'u' ñuan nquii'.
'U' m'an' ndo' m'an'. Vitjachen na ngitye'
tsoñ'en, mancüiixjen m'an'.
'U' matsa' cha'xjen na chuhan' ndo' ng'e na
conan'tja nn'an nnon', jo' na maco'xen'han yo
joo nanvi'min'.
\v 6 Ee nque nn'an na tji'han cüenta',
yo joo nn'an na tonan'neinhan jñ'oon na
totsi'man' ndëëhan ntyja nchu vaa 'nan na nguaa,
jndë jnan'cüje nn'anhin.
Ndo' na nnda' tont'ahin yo nan'ñeen, nanein
mancya' n'eon nn'an na covehinhan'.
Cuaa nquii ee chuhan' na nnda' quitjonhan.
Nnda' tso ángel'ñeen.
\p
\v 7 Ndo' nquii ángel na iquen cüenta chon na ntyjo nnontyiu,
jndyi na itsinin jon. Tso jon:
\p —'U' ta Tyo'ts'on na matye'ntjon' na taquintyja najndei na
condui 'u' ntyja 'naan' na mayuu' ndo' yo na chuhan' na maco'xen'
nn'an ng'e na conan'tjahin nnon'.
\p
\v 8 Jndë jo' juu ángel na jndë ninque, xio 'naan' jon na
ñjon navi', tatscüetan jonhan' nnon ndo'cüjioon'. Ndo' ng'e
na nnda', s'aahan' na jmin'ntyichen ndo'cüjioon' na iscohan'
nn'an.
\v 9 Ata siquineinhan'hin. Majo' min na nnda',
tyi'quintcüe' n'onhan min tyí'quinan't'maan'han jon. Majndeichen
totji'han jñ'oon ntjein, jñ'oon tsan', nacjoo' xuee' nquii jon
na vaa najndei jon na tyi'nt'uii navi'min'han.
\p
\v 10 Jndë jo' juu ángel na jndë 'on, xio 'naan' jon na ñjon
navi', tatscüetan jonhan' nacjoo' silla na manin' ts'iaan' naijon
na vequityen nquii quioo'jndyi tque'ñeen. Ndo' sijaanhan'
ninvaañ'en naijon na iquen jon xjen. Ndo' joo nan'ñeen
totquiihan ndahan ng'e na vi' jndyi na coquenonhan.
\v 11 Majo' min na nnda', ta'nan ntcüe' n'onhan 'nan natyia na cont'ahan.
Ndo' jnaan' joo ntyje'ñeen yo na iquii jndyihan'hin, jo'
totji'ntyichenhan jñ'oon tsan' cjoo' nquii Tyo'ts'on na m'aan
jon quiñoon'ndue.
\p
\v 12 Jndë jo' juu ángel na jndë yon, xio 'naan' jon na ñjon
navi', tatscüetan jonhan' nacjoo' juu jndaa t'man Eufrates.
Mana iscanhan' juu jndaa'ñeen. Nnda' tui cha' joo nn'an na
cotoxenhan nn'an ndyuaa tontyja na ndyova ndo'cüjioon', ndëë
ngüet'iohinhan'.
\p
\v 13 Ndo' jnty'ia ndye jndyetyia. Cüiihan' jndui' 'ndyo
juu quitsoontyia. Ncüiichenhan' jndui' 'ndyo juu quioo'jndyi
tque, ndo' ncüiichenhan' jndui' 'ndyo juu tsan na incyaa jñ'oon
quintu ntyja 'naan' nchu vaa 'nan na nguaa. Itsijonhan' joo
espíritu'ñeen cha'vijon quinda.
\v 14 Joo jndyetyia'ñeen
conduihan' yotyia na condëë cont'ahan jn'aan t'man.
Cotsanan'ndyoo'han na m'an nque nn'an na conditquehin na cotoxenhan 
nn'an na ninvaañ'en tsonnangue. Nquii Tyo'ts'on na tsoñ'en najndei 
na conduihin, nnguaa ncüii xuee na taquintyja na t'manhan' ntyja
'naan' jon. Joo jndyetyia'ñeen conan'ncüihan nan'ñeen na
nt'ahan tyia' cjoo' jon.
\p
\v 15 Ndo' jndyi na tso nquii Jesucristo:
“Quitquenho' cüenta, ninjonto ncüjënön na m'anho' cha' na 
its'aa tsanch'uee. Neiin' jndyi juu ts'an na m'aan chenjnaan' juu 
xjen'ñeen na ivantyjee' ya juu ndiaa' juu. Ee xe na aa nndui' 
ndiaa' juu, nc'oon juu na jnaan' juu na cojnty'ia nn'an na 
ninquisihin.”
\v 16 Yajo' joo ndye espíritu'ñeen, jnan'ncüihan nque nn'an
na cotoxenhan nn'an ncüii cüii tsonnangue ncüii joo na yo
jñ'oon hebreo jndyuhan' Armagedón.
\p
\v 17 Jndë jo', juu ángel na jndë ntyque', xio 'naan' jon na
ñjon navi', tatscüetan jonhan' nacjoo' jndye. Ndo' nquii
Tyo'ts'on na vequityen jon silla na manin' ts'iaan' quityquii'
vats'on quiñoon'ndue, jndei tic'uaa na sinin jon. Tso jon:
\p —Jndë siquindëhan' tsoñ'en.
\p
\v 18 Ndo' cota' chon ntsuee ndo' chen to'manhan', c'uaa jndyi
s'aahan' ndo' jndei jndyi s'ii. Ntyjantyi xjen na m'an
nn'an nnon tsonnangue, min'jon tacots'ii cha'xjen na s'ii
juu xjen'ñeen.
\v 19 Ndo' ng'e na nnda' tui,
juu tsjoon t'man tji'han' ndye tan'han' na tiuuhan'. Ndo' joo
njoon na m'aan xi'jndio tsonnangue, tyuii'han'. Majo' tañjoon'
ts'on Tyo'ts'on nn'an tsjoon t'man Babilonia. Ndo' s'aa jon na
joo nan'ñeen cüeñ'enhan juu vinon na ñjon vaso 'naan' jon
ntyja 'naan' na t'man vaa na itsiv'ii jonhan.
\v 20 Ndo' ncüii cüii
tyuaa chjo na m'aan ndaandue xi'jndiohan', tsuhan'. Ndo' tsoñ'en
ntyo' tyuii'han'.
\v 21 Ndo' totsjö'ndue jnan tsan t'man na
tycyaahan' cjo nn'an. Joo tsan'ñeen, tenon venn'an kilos xjen na
ja na ncüiihan'. Ndo' jnaan' na tycyaahan' nacjohan, jo'
tonan'neinhan jñ'oon tsan' cjoo' nquii Tyo'ts'on, ee juu
navi'ñeen ji vaa jndyihan'.
\c 17
\s It'uiivi'han' tsanscuntjaa' na ji vaa its'aa
\p
\v 1 Ndo' ncüii joo na ntyque' ángeles'ñeen na tonan'chohan
ntyque' xio'ñeen, tyjee'non jon na m'an. Tso jon nnön:
\p —Cja yo ja ndo' ntsi'man nnon' na nt'uiivi' Tyo'ts'on joo nn'an
na m'anhan tsjoon t'man na vequityenhan' naijon na jndye ndaa
m'an. Itsijonhan' juu tsjoon'ñeen cha'vijon ncüii tsanscuntjaa'
na ji vaa jndyi its'aa juu.
\v 2 Cha'xjen nque nn'an na ve' ndö ro m'anhan yo ncüii
tsanscuntjaa', mannda' vaa itsijonhan' na conan'ntjein
nanm'ann'ian t'man tsonnangue yo na conan'jonhan yo juu
tsjoon t'man'ñeen. Cotsantyjahan tsoñ'en nnon jnan na
cotquenhan cüenta na cont'a joo nn'an tsjoon'ñeen. Nque
nn'an na ninvaa tsonnangue na conan'jonhan yo 'nan natyia
jndyi na tsixuan juu tsjoon'ñeen, its'aahan' na cha'vijon
na jndë jndyehan na tëhin vinon.
\p
\v 3 Yajo' quityquii' juu na tityincyoo' nnön, yo ntyja 'naan'
nquii Espíritu, tay'oon juu ángel'ñeen ja ncüii joo naijon na
tann'an c'oon, jo' jnty'ia ncüii tsanscu na ntjo juu ncüii
quioo' jndyi na ve o'. Ninvaa o' chuu' jñ'oon tsan' na
conan'cüejnaan'han' Tyo'ts'on. Juu cho'ñeen min ntyque' xquen
o' ndo' nqui ndi'ndyee' o'.
\v 4 Juu tsanscu'ñeen je', cüe
juu ndiaa colo venton yo colo ve, ndo' tycüi'hin yo s'on ijan yo
jndye nnon të' ntjö' na njon jndyihan', yo të' perlas. Nt'ö
juu ndyii' ncüii vaso na jndëhan' yo s'on ijan. Too'chen juu
vaso'ñeen na ñjon 'nan ty'a vaa yo na ve' ndö' ro
m'aan juu yo nn'an.
\v 5 Ndo' tsö'sta juu tsanscu'ñeen, jo' jndui jñ'oon na
tyi'quitso nquii'han' ntyja nchu vaa na tsixuan juu. Ndö
vaa na itsohan': “Ndö juu tsjoon t'man Babilonia. Juu tsjoon'ñeen 
conduihan' ndyee nanntcuntjaa' ndo' mantyi x'ee tsoñ'en nnon 'nan na ji
vaa na condui nnon tsonnangue.”
\v 6 Ndo' tquën cüenta na itsijonhan' juu tsanscu'ñeen
cha'vijon ncüii tsanquindyi jnaan' na jndye jndyi nn'an
cüentaa' Tyo'ts'on na totscüje juuhin ndo' mantyi nque
nn'an na totji' jndyoyuhan ntyja 'naan' Jesús.
\p Ya na jnty'iahin, t'man vaa na vacue m'aan' ts'ön.
\v 7 Ndo' ta'xee' ángel'ñeen nnön: 
\p —¿Ndu na vacue m'aan' tson'? Ja ntsi'man nnon' ntyja 'naan' juu
jñ'oon na vanty'iu m'aanhan' na tsixuan tsanscuva' yo ntyja
'naan' juu quioo'jndyi na ntjo juu na min ntyque' xquen o' ndo'
nqui ndi'ndyee' o'.
\v 8 Juu quioo'jndyi'ñeen na jndyia', nintovando' o' ndo'
naneinhin tyi'cüando' o', majo' ngüentyja xjen na nndui'
nnda' o' quii' tsë'tsjoon na tayuu ntycüii na njoonhan',
ndo' ncju' Tyo'ts'on juu o' naijon na cotsu ñuaan nn'an. Ee
ntyjantyi xjen na tui tsonnangue, vaa tson na jndui nguee
nn'an na nan'xuanhan na tyi'quintycüii na cota'ndo'
ñuaanhan. Majo' nque nn'an na tacondui ngueehan nnon juu
tson'ñeen, nts'aahan' vacue nc'oon n'onhin na ndicüaa'
n'onhan na njnty'iahan quioo'jndyi'ñeen na tom'aan o' ndyu
na toxen'chen, ndo' tyi'cüando' 'o' nanein, majo'
nnintyincyoo' nnda' o'.
\p
\v 9 “Jñ'oonva' icanhan' na c'oon ts'an na jnda' xquen juu.
Joo ntyque' xquen juu quioo' jndyi'ñeen, tsi'manhan' ntyque'
ntyo' naijon na vequityen juu na conduihin tsanscu'ñeen. Ndo'
mantyi tsi'manhan' ntyque' rey na cotoxen.
\v 10 'On nan'ñeen
yo na ijndei'han' tji'han'hin na cotoxenhan, ncüiihan ninvaa na
ico'xen jon, ndo' ncüiichenhin xejnda nc'oon jon. Majo' ya na
nc'oon jon, tyi'jndye xjen na ntco'xen jon.
\v 11 Ndo' juu
quioo'jndyi'ñeen na tovando' o' ndyu na toxen'chen, majo'
tyi'cüando' o' nanein, juu o' condui ncüiichen ts'an na condë
nen na co'xen ndo' mantyi conduihin ncüii joo na ntyque' joo
nan'ñeen. Majo' ncju' Tyo'ts'on juu naijon na cotsu ñuaan
nn'an.
\p
\v 12 “Ndo' joo nqui ndi'ndye na jndyia' na ntyjo xquen o',
conduihan' nqui nn'an na ndëcya na ngüentyja xjen na ngotoxenhan nn'an. 
Majo' tojnaan' ncy'onhan cüenta na ntoxenhan nn'an yo juu 
quioo'jndyi'ñeen, majo' tyi'vio xjen, nin'ncüii hora.
\v 13 Joo nqui nan'ñeen ninncüii nnon 'nan conan'jnda'han.
Tsoñ'en juu najndei na conduihan na m'anhan ts'ian,
nninncyahinhan' nnon nquii quioo'jndyi'ñeen.
\v 14 Ndo' joo nqui nan'ñeen yo nquii quioo'jndyi, nnt'ahan
tyia' nacjoo' nquii jon na conduihin Quitsman Chjo, majo'
ngüantjon jon joohan. Ngüantjon jonhin ng'e nquii jon
conduihin na ico'xen jon nn'an na condui nanm'ann'ian yo na
taquintyja conduihin na ico'xen jon nanm'ann'ian na
njonchenhan. Nque nn'an na iqueen' jon na icüji jonhan 
cüentaa' nquii jon na contjotyenhan ntyja 'naan' jon,
nnan'jon nan'ñeen yo jon.” 
\p
\v 15 Ndo' tsontyichen ángel'ñeen nnön:
\p —Joo ndaa jndye jndyi na jndyia' naijon na vequityen tsanscuntjaa'ñeen,
conduihan' nn'an na jndye jndyi na m'anhan ncüii cüii tsonnangue,
yo xi'jndui' nnon tsjan nn'an, yo nn'an na ncüii cüii
jñ'oon na conan'nein.
\v 16 Ndo' joo ndi'ndye na jndyia' na ntyjo xquen
quioo' jndyi'ñeen, conan'manhan' nqui nn'an na cotoxen,
ngüentyja xjen na nc'onhan na jndohan juu
tsanscuntjaa'ñeen. Nnan'tyuii'han juu ndo' n'ndyehanhin na
quisihin. Nntquiihan sii' juu ndo' nnan'cohanhin yo chon.
\v 17 Ee nan'ñeen na cotoxen, s'aa Tyo'ts'on quii' n'onhan na
nnta'nguee'han cha'xjen na sijnda' jon na nguaa. Mang'e jo',
nque ntyjehan na mantyi cotoxenhan ncüii cüii tsonnangue,
jnan'jonhan jñ'oon yo nan'ñeen na nninncyahan juu najndei na
conduihan nnon juu quioo' jndyi'ñeen. Mannda' nguaa ata xjen na
jndë siquindëhan' tsoñ'en na tso Tyo'ts'on.
\v 18 Ndo' juu tsanscuntjaa'ñeen na jndyia', itsi'manhan' juu
tsjoon t'man'ñeen na iquenhan' xjen tsoñ'en nn'an na
taquintyja na t'man conduihan na cotoxenhan nn'an
tsonnangue.
\c 18
\s Juu tsjoon Babilonia tyuii'han'
\p
\v 1 Jndë tenon na tui nan'min', jnty'ia ncüiichen ángel na
jnan jon quiñoon'ndue, jndyocue jon. T'man jndyi najndei na
tsixuan jon. Ndo' juu na nancoo' quixuee'hin, sixueehan' nnon
tsonnangue.
\v 2 Jndei sinin jon, tso jon:
\p —Juu tsjoon t'man Babilonia, ji vaa na jndë
tjonhan', jndë tyuii'han'.
Nanein tsixuanhan' v'aa cüenta yotyia yo
naijon na m'an tsoñ'en jndyetyia na ji min.
Naijon na contjo ncüii cüii nnon quintsa
na jen n'ian o'.
\v 3 Ee tsoñ'en nn'an tsonnangue jndë tëhan
vinon na tsixuan jon, jnaan' na ve' ndö ro m'anhan
yo jon na ntyja 'naan' jo' itsintjeinhan'hin.
Nque nn'an tsonnangue na taquintyja na t'man
conduihan na cotoxenhan, juu na tonan'jonhan ntyja
'naan' Babilonia, itsijonhan' juuhan'
cha'vijon ts'an na ve' ndö ro m'aan juu yo
ncüiichen ts'an, ndo' joo nn'an ncüii cüii
tsonnangue, na cont'ahan jnda s'on, tityahan ng'e
nque nn'an tsjoon'ñeen jnan'jndahan 'nan na
taquintyja na yahan', min tajnt'ahan xjen.
Ndö' jñ'oon na tso ángel'ñeen.
\p
\v 4 Jndë jo' jndyi jndyee' nquii Tyo'ts'on na itsinin jon
toquiñoon'ndue, itso jon:
\p —'O' nn'an na conduiho' ntyja njan,
quindui' 'o' quii' nt'an nn'an tsjoonva' cha'
tyi'ngacüja'han' 'o' jnanhan,
ee xe tyi'nt'aho' 'nan na matsjö, juu navi'
t'man na ntquenonhan, mantyi nt'uiihan' 'o'
\v 5 Ee ata quiñoon'nduechen jndë taquinto'
jnanhan, ndo' vañjoon' ts'ön tsoñ'en
natyia na jndë cont'ahan.
\v 6 Jo' quityionho' joo nn'an tsjoon'ñeen
cha'xjen na tyincyahan na tjon nn'an.
Ve jnda ncyaho' na quitjon joo nan'ñeen
cha'xjen na tont'ahan yo nn'an.
Quii' vaso na concya nan'ñeen na cove nn'an,
quinan'tjon'ho' 'nan na ncüehan na ve vee'
jnda na v'iichenhan'.
\v 7 Ntyjantyi na tont'a nan'ñeen na tondit'maan'hin,
ndo' cha'xjen na taquintyja na ya tom'anhan
min tyi'quint'a nquehan xjen, mannda'
ro quint'aho' na quii jndyihan'hin
yo na quitsi'ndaa'han' ngiohan.
Ee jnan'tiu nan'ñeen cha'xjen na itsitiu
ts'an quii' ts'on juu:
Ndö mavaquityën, condui ja tsanscu na
macoxën, tyic'ön na itsi'ndaa'han' ntyji
cha'na ncüii tsanscu na jndë tue' saa'.
Tyi'je'quits'aahan' na ntsit'ioohan' ja
na ncüje ntsinda.
\v 8 Mang'e na nnda' na itsiscuhin, jo'
na ninncüii xuee nt'uii joo navi'ñeenhin,
ncüje ntsinda juu ndo' ntsit'ioohan'hin.
Ndo' jndo' t'man nt'uiihan'hin, ndo'
ntcohin yo chon, ng'e nquii Tyo'ts'on
na ico'xen jon jnaan' juu,
tëquintyja najndei conduihin.
\p
\v 9 Ndo' nque nn'an na taquintyja na t'man conduihan na
cotoxenhan nn'an tsonnangue, mantyi ve' ndö' ro tom'anhan yo juu
na conduihin tsanscu'ñeen. Mantyi tonan'jonhan yohin yo juu na
tëquintyja na ya tovam'aan jon. Xjen na njnty'iahan na cotsava
neon na coco juu tsjoon'ñeen, nndyueehan ndo' nnan'chjoo'
jndyihan' n'onhan.
\v 10 Tcya ngüentyjee'han ng'e m'anhan na
coquityuehan xe juu navi' t'man na iquenon juu, mantyi aa na
nnt'uiihan' joohan. Nnan'xuaahan, nnduehan:
\p —'U' tsjoon t'man Babilonia, ay, ay,
ji vaa jndyi maquenoon'.
'U' na t'man jndyi najndei na totsixuan'.
Taxjen jndye jndë tyjee' na it'uiihan' 'u'.
\p Mannda' ro jñ'oon na nnan'xuaahan.
\p
\v 11 Ndo' mantyi nque nn'an tsonnangue na cont'ahin jnda s'on,
nndyueehan ndo' ntsi'ndaa'han' ngiohan ntyja 'naan' juu
tsjoon'ñeen. Nnt'ahan na nnda' ng'e tanin ncüiichen ts'an na
ntsijnda joo quichu t'man na condëëhan.
\v 12 Quichu s'on
ijan, yo s'on xuee, ntjö' na njon jndyihan', ndo' yo të' perlas.
Quichu ndiaa lino na tëquintyja na yahan' yo ndiaa seda, yo
ndiaa colo venton yo ndiaa ve. Yo ncüii cüii nnon quichu n'oon
na quichi, yo 'nan na jndëhan' yo tsi' 'ndyo elefante, yo 'nan
na jndëhan' yo n'oon na njon jndyihan', yo 'nan na jndëhan' yo
s'on ve, yo xjo hierro, ndo' yo tsjö' mármol,
\v 13 Quichu
ntcüa canela yo jndye nnon 'nan na quichi, ndo' yo su, yo ntsue
n'oon mirra ndo' yo ndaa quichi, ndo' yo quichu vinon, ndo' yo
aceite, ndo' yo quichu jndë tyoo' na yantyichen, ndo' yo quichu
ntquen trigo. Yo quichu quitsondye yo quinman, quitso yo carreta
na contyja joo o' ndo' yo quichu nn'an na condëëhan na
ntye'ntjontyen nan'ñeen ndëë nn'an na juu ts'ian'ñeen
itsijonhan' juuhan' na cha'vijon condëëhan ñuaan nque nn'an.
\v 14 Joo nan'ñeen na cont'ahin jnda s'on, nnduehan nnon juu
tsjoon'ñeen:
\p —Tsoñ'en të na taquintyja na ya jndyihan' na
nt'ue jndyi tson' na cuenhan',
tsoñ'en 'nan na toqui' na tëquintyja
na yahan', jndë ti'ndaa'han'.
\q Ndo' mantyi tsoñ'en 'nan na njon jndyi na totsitycüi'
'u', tajon jnda na nguaa nnda'han' nt'ö'.
\p Nnda' ro jñ'oon na jndue nan'ñeen.
\p
\v 15 Ndo' nque nan'ñeen na cont'ahin jnda s'on yo nan'min',
jndë tityahin na tondëëhan joohan' ndëë nn'an juu
tsjon'ñeen, tycya ngüentyjee'han ng'e mantyi ncyaahan juu navi'
t'man na coquenon nn'an juu tsjoon'ñeen. Nndyueehan ndo'
nnan'xuaahan na ntsichjoo' jndyihan' n'onhan.
\v 16 Ndo' mantyi nnduehan:
\p —'U' tsjoon t'man, ay, ay, ji vaa jndyi matjon'.
Totsijonhan' 'u' cha'vijon ncüii tsanscu na
tocüe jon ndiaa lino na yantyichen.
Tocüe' ndiaa colo venton yo ndiaa colo ve.
Totsintycüi' 'u' yo s'on ijan yo të' perlas
yo ntjö' na njon jndyi.
\v 17 Majo' ninvitan' xjen jndë tsu tsoñ'en
'nan na s'aahan' na tya jndyi 'u'.
\p Nnda' vaa jñ'oon na nndue nan'ñeen ndëë nn'an juu
tsjoon'ñeen.
\p Ndo' cüii cüii nn'an na conan'chohan nt'aandaa, yo tsoñ'en
nn'an na ñjonhinhan', yo nanntjon cüentahan', yo nin'tsoñ'en
nn'an na cota'ntjon ntyja 'naanhan', tycya tentyjee'han.
\v 18 Ndo' viochen xjen na cojnty'iahan neon na coco juu tsjoon'ñeen,
tonan'xuaahan, tonduehan:
\p —Min'ncüii tsjoon tacovaahan' cha'na juu tsjoon t'manvahin.
\p Ndö' ro jñ'oon na jndue nan'ñeen.
\v 19 Totyiohan ts'ojndë nquenhan cha' quitsi'manhan' na
itsi'ndaa'han' ngiohan. Totyueehan na chjoo' n'onhan.
Tonan'xuaahan, tonduehan:
\p —Joo nn'an tsjoon t'man, ay, ay,
vi' jndyi coquenonhan.
Ng'e na tya jndyi nn'an tsjoonvahin,
jo' tsoñ'en jaa na cotantjön yo nt'aandaa,
mantyi s'aahan' na titya jaa ntyja
'naan nque nn'an juu tsjoon'ñeen.
Majo' ninvitan' xjen jndë tsuñ'en
ntyja 'naan'han'.
\p Ndö' vaa jñ'oon na jnan'xuaa nan'ñeen.
\p
\v 20 Ndo' mantyi jndyi ja ncüiichen jñ'oon na itsohan':
'O' na m'anho' quiñoon'ndue, yo 'o' na conduiho'
cüentaa' nquii Tyo'ts'on, yo 'o' nn'an na t'ua
Jesucristo ts'ian ndëëho' na cotsancyaho' jñ'oon 
naya 'naan' Tyo'ts'on, yo nin'o' na toninncyaho' 
jñ'oon' jon ntyja nchu vaa 'nan na nguaa, cüineiin' 
n'onho', ee xeng'e nquii Tyo'ts'on jndë it'uiivi' 
jon joo nn'an tsjoon'ñeen, jndë sijnda' jon
jñ'oon 'naanho' cha'xjen na chuhan'.
\p Nnda' vaa jñ'oon na jndyi.
\p
\v 21 Jndë jo' jnty'ia ncüii ángel na m'aan jndyi najndei jon.
Sue jon ncüii tsjö' t'man na itsijonhan' juuhan' cha'vijon tosu
t'man na cotua. Tju' jonhan' quityquii' ndaandue. Tso jon:
\p —Juu tsjoon t'man Babilonia,
mannda' vaa itsijonhan' ntyja 'naan'han'.
Cha'xjen na tju' tsjö'va,
min taje'cüityincyoo' nnda'han'.
\v 22 Quii' tsjoon 'naanho' taje'cüic'uaa nnda'
na icüja' ts'an arpa, oo tsman, oo ndu.
Min'ncüii ts'an taje'c'oon tsjoonho'
na nts'aa ncüii nnon ts'ian, min
taje'cüic'uaa nnda' na cotua yo tosu t'man.
\v 23 Tajon jnda na nninxuee nnda' chon
lámpara quii' tsjoonho'.
Ndo' min taxe'cüic'uaa nnda' jo'
na conint'maan' na cotonco nn'an.
Nn'an tsjoonho' na tont'ahan jnda s'on,
tom'anhan na t'man tonduihan quii'
nt'an nn'an tsonnangue. Ndo' joo
ts'ian quindua' na tont'aho', yo juuhan'
tonan'vi'nn'anho' nn'an na ninvaa tsonnangue.
Ndö' vaa itsiquindyi jñ'oon na sinin juu ángel'ñeen.
\p
\v 24 Ee joo nn'an tsjoon'ñeen, jnan'cüjehan nn'an na toninncya
jñ'oon' Tyo'ts'on nchu vaa 'nan na nguaa, ndo' mantyi yo nn'an
na conduihan cüentaa' jon. Nque nn'an tsjoon'ñeen,
nnt'uiihan'hin ntyja 'naan tsoñ'en nn'an na vantyja n'on
Cristo na jnan'cüje nn'an tsonnanguehan.
\c 19
\s Joo na m'an quiñoon'ndue, conan't'maan'hin
\p
\v 1 Jndë na tenon nan'min', jndyi na jndei tic'uaa
quiñoon'ndue cha'vijon jndyee ncüii tmaan' t'man nn'an.
Jnduehan:
\q Cüit'maan' Tyo'ts'on,
\q conduihin na itsin'man jon ñuan njanhan.
\q Nquii jon tsixuan jon na conan'vë xuee' jon.
\q Xia'ntyi nquii jon taquintyja najndei conduihin.
\q
\v 2 Ico'xen jon nn'an ntyja 'naan' na conan'tjahan
cha'xjen na chuhan' ndo' yo jñ'oon na mayuu'.
\q Nanein jndë t'uiityen jon juu tsanscuntjaa'ñeen
na t'man vaa na totsitjahin. 
\q Nquii juu na jndë
totsi'ndaa' juu nn'an tsonnangue
yo ts'ian 'naan' juu natyia jndyihan'.
\q Ndo' nanein its'aa Tyo'ts'on yohin
cha'xjen na totscüje juu joo nn'an na
totye'ntjonhan nnon jon, mannda' vaa
quit'uiihan'hin na quityion juuhan'.
\p
\v 3 Ndo' ncüiichen jon jnduehan:
\q Cüit'maan' nquii ta Tyo'ts'on. 
\q Tyi'caminntyjee'
na cotsava neon na coco juu tsjoon'ñeen.
\p
\v 4 Ndo' joo ntcyu ncho' nenque nn'an na conintque yo nin'joo
nenque na cota'ndo'ñeen, tyetangiohan tonnon nquii jon na
vequityen jon silla na manin' ts'iaan'ñeen. Jnan't'maan'han
jon, jnduehan:
\p —Quindui na nnda'. Cüit'maan' nquii ta Tyo'ts'on.
\p
\v 5 Ndo' tonnon juu silla'ñeen tic'uaa jndyee'
ncüii na itso:
\q Tsoñ'enho' na cotyentjonho' nnon Tyo'ts'on,
quinan't'maan'ho'hin. 
\q Tsoñ'enho' na njon jndyihin
ngioho', 
\q 'o' na tyi'tqueho', 
\q ndo' 'o' na tqueho',
\q quinan't'maan'ho' nquii jon.
\s Nguee na ngoco nquii Quitsman Chjo
\p
\v 6 Ndo' jndyi ncüii na itsijonhan' cha'na conan'nein ncüii
tmaan' nn'an, cha'vijon na c'uaa yuu na coquioo ndaa jndaa t'man
ndo' cha'vijon na jndei co'man ntsuee. Jnduehan:
\q Cüit'maan' nquii ta Tyo'ts'on.
Ee juu jon conduihin Tyo'ts'on ntyja njanhan,
ndo' nquii jon taquintyja najndei na conduihin. 
Jndë tye' na ico'xen jon.
\q
\v 7 Cüa, c'ön na nën, tyi'nc'ön na
chjoo' nn'ön. Quinan't'maan' jaa nquii jon,
ee jndë tentyja xjen na ngoco
nquii jon na conduihin Quitsman Chjo.
\q Ee nquii juu na conduihin scuu' jon
jndë sijnda' juu.
\q
\v 8 Cüe juu ndiaa lino na ya jndyihan'
na quixueehan' ndo' ntju' jndyihan'.
\m Juu ndiaa lino'ñeen tsi'manhan' joo ts'ian
na cont'a nn'an na conduihan cüentaa'
Tyo'ts'on na totsam'anhan cha'xjen na chuhan'.
\p
\v 9 Ndo' itso ángel'ñeen nnön:
\p —Joo jñ'oon na matsjö nnon', cüji'han': “Nque nn'an na
iqueen' Tyo'ts'on na quinan'jonhan na ngoco nquii Quitsman
Chjo, nein jndyihan.”
\p Ndo' mantyi tsontyichen ángel'ñeen nnön:
\p —Jñ'oonmin' conduihan' jñ'oon na mayuu' na itsinin nquii
Tyo'ts'on.”
\p
\v 10 Ndo' tëco'xtyë tong'ee juu ángel'ñeen na ntsit'man'hin.
Majo' tso jon nnön:
\p —Tyi'ntsa' na nnda', ee mantyi nnon nquii Tyo'ts'on
matye'ntjön cha'xjen ncu', 'u' ndo' mantyi nque nty'iu' na
contjotyenhan yo jñ'oon na toninncyaa Jesús. Xia'ntyi
nquii Tyo'ts'on quitsit'man'. 
\p Ee juu jñ'oon ntyja 'naan'
Jesús conduihan' jñ'oon na totsijnda'han' nquen joo nn'an
na toninncyahin jñ'oon ntyja 'naan' nchu vaa na nguaa.
\s Ts'an na ntjo quiso quichi'
\p
\v 11 Ndo' jnty'ia na vanaan quiñoon'ndue ndo' tityincyoo'
ncüii quiso quichi'. Ndo' nquii jon na ntjo o',
itsiquijndyuhan'hin nquii jon na ivanguee' jon ndo' mantyi na
conduihin jñ'oon na mayuu'. Nque nn'an na conan'tjahan na tonnon
Tyo'ts'on, ico'xen jonhan cha'xjen na chuhan', ndo' mantyi its'aa
jon tyia' yo nque nn'an na conan'vehan nacjoo' jon.
\v 12 Xuee
tënnon jon cha'xjen tsachon ndo' jndye corona na ñjon xquen
jon. Vaa ncüii xuee' jon na jnduihan' na xia'ntyi nquii jon
ntyjii nchu vaa tsi'manhan'.
\v 13 Cüe jon ncüii ndiaa tco na
tcoo' neon'han'. Ndo' xuee' jon na cotajn'aan nn'an jon, jo'
jñ'oon' Tyo'ts'on.
\v 14 Ndo' nque na conduihan sondaro quiñoon'ndue tentyjahan
toxen' jon, tantjohan quitso quichi'. Cüehan ndiaa lino
ya, na quichi'han' ndo' na ntju'han'.
\v 15 Quii' 'ndyo jon condui' ncüii xjo na të jndyihan', yo juuhan'
its'aavi' jon nn'an tsonnangue. Ntco'xen jonhan yo
naijndei'han'. Cha'xjen na condyue nn'an tëndöndyoo' tsjan cha'
cüji'han' ndaa'han', mannda' ro itsijonhan' na nts'aa jon yo
nn'an na tyi'nin'quitjue'cjehan ntyja 'naan' jon. Ee nquii
Tyo'ts'on na taquintyja najndei conduihin, ntyjantyi xjen na
itsiv'ii jndyi jon nn'an, mannda' vaa itsijonhan' na nts'aa jon na
quit'uiivi'han' joo nan'ñeen.
\v 16 Ndo' cjoo' ndiaa' jon yo cjoo' tcüi' jon, jo' jndë jndui
xuee' jon na itsohan': “Ncö condui tsan na taquintyja na
coxen tsoñ'en nn'an na cotoxen. Tëquintyja na t'man
condui ja ndëë tsoñ'en nn'an na t'man condui.”
\p
\v 17 Jndë jo', jnty'ia ncüii ángel na minntyjee' jon nnon
ndo'cüjioon'. Jndei itsixuaa jon ndëë quintsa na ma'ntyja o'
tsjö'ndue. Itso jon:
\p —Ncyoho', cancüiho' na ntquiiho' jndye nnon si' na itsijnda' 
Tyo'ts'on cüentaho'.
\v 18 Ncyoho' na ntquiiho' si'ts'o 'naan nn'an na taquintyja na
t'man conduihan na cotoxenhan, yo si'ts'o 'naan nn'an na
t'man condui na cotquenhan xjen sondaro, yo si'ts'o 'naan
nn'an na taxjen vaa m'aan jndyi na jndëhan. Ndo' yo si'ts'o
'naan quitso yo nque nn'an na tantjohan joo o', si'ts'o
'naan nn'an na cotye'ntjontyen ndo' mantyi yo nn'an na
m'anhan xjen 'naan nquehan. Nn'an na quijndë ndo' mantyi
nn'an na jndë tque.
\p
\v 19 Ndo' jnty'ia juu quioo'jndyi tque'ñeen yo joo nn'an na
taquintyja na cotoxenhan nn'an tsonnangue ndo' yo nin'sondaro
'naanhan. Tëncüihan na nnt'ahan tyia' yo nquii jon na ntjo juu
quiso quichi'ñeen ndo' yo sondaro 'naan' jon.
\v 20 Ndo' t'uehan juu quioo'jndyi tque'ñeen yo juu tsan'ñeen
na toninncyaa jñ'oon quintu na tonnon nquii jon. Tots'aa
tsan'ñeen jn'aan t'man yo najndei nquii quioo' jndyi
tque'ñeen. Ntyja 'naan joo jn'aan t'man'ñeen,
totsivi'nn'an juu joo nan'ñeen na tyincyahan na tëquiñoon
jn'aan 'naan' quioo'ñeen ndö'quitahan oo ndueehan, ndo' na
tonan't'maan'han 'ndyonnon juu cho'ñeen. Yajo' nquii jon
na ntjo jon quiso quichi'ñeen, joo ve nan'ñeen, ninvaa
vando'han, tju' jonhan quityquii' ndaandue chon na coco
sufre.
\v 21 Ndo' nquii jon na ntjo
quiso quichi'ñeen, iscüje jon tsoñ'en sondaro 'naan nan'ñeen
yo xjo të na jndui'han' 'ndyo jon. Ndo' tsoñ'en quintsa tcüa'
quintcu o' si'ts'o 'naan joo nan'ñeen.
\c 20
\s T'uiityenhan' Satanás ncüii min ndyu
\p
\v 1 Jndë jo' jnty'ia ncüii ángel na jnan jon quiñoon'ndue,
jndyocue jon. Y'oon jon nt'ö v'aa cüentaa' tsë'tsjoon na
tyi'quintycüii na njoonhan' ndo' mantyi y'oon jon ncüii carena
t'io.
\v 2 Ndo' t'uii jon juu quitsoontyia'ñeen na mantyi
jndyu juu nquii quitsu tque na tivio jndyi m'aan juu jo', nquii
yutyia ndo' Satanás. Sityen jon juu yo carena'ñeen na
quintjotyenhin ncüii min ndyu.
\v 3 Ndo' tju' jonhin quii' tsë'tsjoon'ñeen na tayuu ntycüii
na njoonhan'. Jndë jo' iscu'tyen jonhan' ndo' cha'
quitsi'manhan' na vaa najndei na conduihin, t'ion jon sello
'ndyo juu tsë'tsjoon'ñeen, cha' tanin juu na
ntsiquinaanhan' ndo' na nndui' ntcüe' juu yutyia na
ntsivi'nn'anntyichen juu nn'an tsonnangue. Ya na nndë
ncüii min ndyu'ñeen, yajo' chuhan' na quindyaa yahin chjo
ro xjen.
\p
\v 4 Jndë jo' jnty'ia silla cüenta jndye na manin' ts'iaan'han'.
Ndo' nque joo na vendyuaahan joo silla'ñeen, jndë ty'onhan 
cüenta na jndëhan na ngitoxenhan nn'an ntyja 'naan' na jndë tont'a nan'ñeen.
Ndo' mantyi jnty'ia ñuaan nque nn'an na jndë tyje nn'an
nquenhan tsojnaan' na totji' jndyoyuhan ntyja 'naan' Jesús
ndo' mantyi ng'e na toninncyahan jñ'oon' Tyo'ts'on. Nan'ñeen
tajnan't'maan'han juu quioo' jndyi'ñeen, min 'ndyonnon juu. Min
tatyincyahan na nñoon jn'aan 'naan' juu quioo'ñeen ndö'quitahan
oo ndueehan. Jnty'ia na ta'ndo' nnda'han ndo' tonan'jonhan yo
nquii Cristo na ngocoxen jon nn'an ncüii min ndyu.
\v 5 Nan'va'
tsixuanhan' juu navejndyee na cota'ndo' xco nnda' nn'an. Majo'
mañoon nn'an na jndë tjë, tyi'contcüi nnda'han ata xjen jndë
tenoon' joo ncüii min ndyu'ñeen.
\v 6 Joo nn'an na conan'jonhan yo nn'an na cotando' xco
navejndyee, nein jndyihan ee jndë tquen Tyo'ts'onhan
cüentaa' nquii jon. Juu na its'aa na covje nn'an na jndë
ve, min taxe'cacüja'han'hin, ee juuhan' tavinajndeihan' 
na nt'uiihan'han. Joohan conduihan ntyee
cüentaa' Tyo'ts'on yo nquii Cristo. Ndo' mantyi
ngitoxenhan yo jon ncüii min ndyu.
\s Iju'cjeñ'enhan' Satanás
\p
\v 7 Vi na jndë tenon joo ncüii min ndyu'ñeen, nndyaa ntcüe'
Satanás na jndë t'uiityenhan'hin.
\v 8 Ndo' ngondyi' juu quii' nt'an nn'an na ninvaa tsonnangue na
ntsivi'nn'anntyichen juuhan yo nque nn'an Gog yo Magog.
Nts'aa juu na ngancüi nan'ñeen na nnt'ahan tyia'.
Tenonntyja xjen vaa jndye jndyi nan'ñeen, cha'vijon na
jndye tei' 'ndyo ndaandue.
\p
\v 9 Jnan nan'ñeen ninvaa tsonnangue, jnt'ahan tjon joo nn'an
cüentaa' Tyo'ts'on ndo' mantyi yo juu tsjoon na vi'ntyjii jon.
Majo' isquioo jon chon nacjo nan'ñeen, iscoñ'enhan'hin.
\v 10 Ndo' juu yutyia na sivi'nn'an juuhan, tju' Tyo'ts'onhin quityquii'
ndaandue chon na coco sufre. Jo' m'aan quioo'jndyi tque yo juu
tsan na toninncyaa jñ'oon quintu. Jo' naxuee ndo' natsjon,
ninvito coquenonhan navi'.
\s Nn'an na jndë tjë, ico'xen Tyo'ts'onhan xeng'e
na tonan'tjahan
\p
\v 11 Jndë jo' jnty'ia ncüii silla quichi' na manin' ts'iaan'
na t'man jndyi najndei tsixuanhan', ndo' mantyi jnty'ia nquii jon
na vaquityen jon nacjoo'han'. Ndo' juu tsonnangue yo tsjö'ndue,
tsuhan' na tonnon jon. Tavi tityincyoo'ntyichenhan'.
\v 12 Ndo' mantyi jnty'ia nt'oo, joo nn'an na t'man tonduihan yo
joo nn'an na cje tonan'xuanhan. Tsoñ'enhan minntyjee'han na
tonnon juu silla quichi'ñeen na manin' ts'iaan'han'. Jndë
jo' sinueen' Tyo'ts'on joo tson na chohan' jñ'oon na
tsiquindyihan' xi' ncüii 'nan na tont'a nt'oo'ñeen. Ndo'
ntyja 'naan joo jñ'oon na cho tson'ñeen, jo'
ntco'xenhan'hin ntyja 'naan' 'nan na jndë tonan'tjahin.
Ndo' mantyi vaa ncüiichen tson na sinueen' jon na chuhan'
nguee nn'an na nan'xuanhan na tyi'quintycüii na
cotando'han.
\v 13 Ndo' nn'an na tjëhan quityquii' ndaandue, mantyi ta'ndo'
nnda'han. Tëntyjee'han na tonnon Tyo'ts'on. Ndo' mantyi yo
nn'an na jndë tjë na covendoo'han na ntco'xen
Tyo'ts'onhin. Ncüii cüii nan'ñeen tco'xen jonhan yo xi'
ncüii cüii nnon 'nan na jndë tont'ahan.
\v 14 Jndë jo' juu na its'aa na covje nn'an, yo nin'juu naijon na
contjo nt'oo na vitjachen na ntsijnda' Tyo'ts'on ntyja
'naanhan, mantyi tju' jonhin quii' ndaandue chon. Juu
ndaandue chon'ñeen tsixuanhan' juu na jndë ve na covje
nn'an.
\v 15 Ndo' minninchen ts'an na tyi'condui xuee' juu nnon juu tson
na chuhan' nguee nn'an na nan'xuanhan na cota'ndo'
ñuaanhan, mantyi tju'han' nan'ñeen quii' ndaandue
chon'ñeen.
\c 21
\s Tsjö'ndue xco yo tsonnangue xco
\p
\v 1 Ndo' jnty'ia tsjö'ndue xco yo tsonnangue xco. Ee juu
tsjö'ndue yo tsonnangue na tom'aan jndyeehan', jndë tsu ntyja
'naan'han'. Ndo' min tavindaandue cuaa.
\v 2 Ndo' mantyi jnty'ia juu tsjoon Jerusalén xco, tsjoon
cüentaa' nquii Tyo'ts'on jnanhan' tondye na m'aan nquii
jon, jndyocuehan'. Tycüi'han' cha'vijon na tycüi' ncüii
yuscundyua na ngoco juu yo ts'an na ndisaa' juu.
\v 3 Ndo' jndyi na jndei tic'uaa cha'vijon
jndyee' ts'an tontyja na minntyjee' juu silla na manin'
ts'iaan'ñeen na m'aan Tyo'ts'on, itso:
\p —Nanein m'aan Tyo'ts'on yo nn'an. Nc'oon jon yohan ndo' joohan 
nnan'xuanhan nn'an cüentaa' nquii jon. Ntjohin yo nan'ñeen ndo' 
nnduihin Tyo'ts'on cüentahan.
\v 4 Ncüii cüiihan ngue' jon ndaa
ndëëhan. Juu xjen'ñeen tavi'nan ts'an na ngue', min
taje'c'onhan na chjoo' n'onhan. Taje'quityueehan min
taje'quiihan'hin. Ee tsoñ'en na tomin navejndyee, jndë
tenonhan'.
\p
\v 5 Ndo' nquii jon na vequityen juu silla'ñeen na manin'
ts'iaan'han', sinin jon. Tso jon:
\p —Matsixcö ja tsoñ'en.
\p Ndo' mantyi jndyi na tso jon nnön:
\p —Cüji' jñ'oonmin ee conduihan' jñ'oon na mayuu' na nndëë
ngantyja ts'on ts'anhan'.
\p
\v 6 Jndë jo' tsontyichen jon nnön:
\p Jndë jndë tsoñ'en cha'xjen na tijnda'. Tsoñ'en nnon na min, vitjachen 
na nduihan', ja mancüiixjen m'an ndo' ninm'an ja xjen na ntycüiihan'.
Mancö na condui ja navejndyee ndo' nc'önntyëchën na
ntycüii tsoñ'en. Minninchen ts'an na ivaa' ts'on juu na ja matejndeihin,
itsijonhan' tsan'ñeen cha'vijon ts'an na ninc'u juu ndaa. Ja
ve' yu nninncyahan' na nc'u tsan'ñeen. Juu ndaa'ñeen conanhan'
tsui' na incyaahan' na tyi'quintycüii na cotando' ñuaan nn'an.
\v 7 Minninchen ts'an na condëë ivantjon juu yo 'nan natyia,
ntsiquindahin tsoñ'en joo jñ'oonmin'. Ndo' nndui ja Tyo'ts'on
cüentaa' juu ndo' juu juu nduihin jnda.
\v 8 Majo' joo nn'an
na ncyaahin na nt'uiivi'han'hin na nnan'jonhan ntyja njan,
ncju'han'hin quii' ndaandue chon na coco sufre. Majo'ntyi ngenon
joo nn'an na tyi'cantyja n'onhan ja, joohan ndo' mantyi yo tsoñ'en
nn'an na tyi'ntju' nan'xuanhan na tonnön. Ndo' nn'an na
conan'cüjehan ntyjehan, majo'ntyi ntjonhan, ndo' majo'ntyi nn'an
na ve' ndö ro m'anhan yo nn'an. Ndo' nque nn'an na cont'ahan
ts'ian quindua', majo'ntyi ncju'han'hin jo', ndo' mantyi yo joo
nn'an na conan't'maan'han 'nan na chito Tyo'ts'on conduihan',
ndo' manin' yo nn'an na conan'neinhan quintu. Tsoñ'en nan'ñeen
majnda' na ncju'han'hin quii' ndaandue chon'ñeen. Juu nan'ñeen
tsixuanhan' na jndë ve na covje nn'an.
\s Tsjoon Jerusalén xco
\p
\v 9 Ndo' ncüii joo na ntyque' ángeles'ñeen na nintonan'chohan
ntyque' xio na toquiñjon joo ntyque' nnon navi' na mats'ia,
tyjee'non jon na m'an. Ndo' tso jon nnön:
\p —Quindyo' ndöhin, ndo' ntsi'man ja nnon' nquii jon na nduihin scuu' 
Quitsman Chjo.
\p
\v 10 Yajo' quityquii' na tityincyoo' na s'aa nquii Espíritu na
jnty'ia, tay'oon ángel'ñeen ja na m'aan ncüii tyo' t'man
na ndyehan'. Ndo' juu tsjoon Jerusalén na conduihan'
cüentaa' nquii Tyo'ts'on, jo' si'man ángel'ñeenhan'
nnön. Quiñoon'ndue jnanhan', jndyocuehan'.
\v 11 Juu tsjoon'ñeen quixuee jndyihan' yo juu na quixuee na
condui nquii Tyo'ts'on. Juu na quixueehan', itsijonhan'
juuhan' cha'vijon tsjö' jaspe, tsjö' na njon jndyihan',
ndo' juu tsjoon'ñeen, quixueehan' cha'vijon ndioo cristal.
\v 12 Xejndio juu tsjoon'ñeen vaa teonntjö' t'man na ndye
jndyihan'. Ndo' m'aan ncho've 'ndyohan', ndo' ncüii cüii
'ndyohan' minntyjee' ncüii cüii ángel na cota'ntyjee'han
joohan'. Ncüii cüii 'ndyo juu teon'ñeen jndë jndui
ncüii cüii nguee na ncho've ntsinda Israel.
\v 13 Ndye jndyuent'aa'ñeen cojnty'iahan' tontyja na quindui'
ndo'cüjioon', ndo' ndyehan' cojnty'iahan' tontyja na m'an
ncjuu ntyque', ndo' ndyehan' cojnty'iahan' tontyja na m'an
ncjuu tsonjn'aan, ndo' ncüiichen ndyehan' cojnty'iahan'
tontyja na vacue ndo'cüjioon'.
\v 14 Ndo' juu tsjaan' teonntjö' tsjoon'ñeen, tequee' ncho've
tsjö' t'man. Nacjo joo ntjö'ñeen jndui nguee nque ncho've
nn'an na juu Quitsman Chjo t'ua jon ts'ian ndëëhan na
totsay'onhan yo jñ'oon na toninncyaa jon.
\p
\v 15 Nquii ángel'ñeen na sinin jon yo ja, y'oon jon ts'oon na
condui' xjen na jndëhan' yo s'on ijan. Yo juuhan' ncüji' jon
xjen juu tsjoon'ñeen yo teonntjö' na ndyii' xi'jndiohan', ndo'
yo jndyuent'aa 'naan'han'.
\v 16 Juu tsjoon'ñeen nincüajon xjen na ninque nquihan',
ninncüii xjen na tcohan' yo na tuenhan'. Ya na
tji' jon xjen ncüii ntyjaa' juu tsjoon'ñeen yo juu
ts'oon'ñeen, tuee' cha'na ve min vantyjo' ve ciento
kilómetros na tcohan'. Ninncüii xjen na tcohan' yo
na tuenhan' yo na ndyehan'.
\v 17 Mantyi tji' jon xjen juu teonntjö'ñeen tsa'nnda' xjen na
ndyehan'. Ndo' tuee' ndyenn'an ncho'nqui vantjoo' 'on metros
na ndyehan'. Juu ts'oon'ñeen na condui' xjen na tijnt'ue
ángel'ñeen, itsijonhan' na tcohan' cha'xjen ts'oon na
coninjnt'ue nn'an na cotji'han xjen.
\p
\v 18 Juu teonntjö'ñeen, jndëhan' yo tsjö' jaspe, ndo' nquii
tsjoon je', jndëhan' yo s'on ijan nquii'. Itsijonhan' juu s'on
ijan'ñeen cha'vijon ndioo na quixuee.
\v 19 Ndo' juu tsjaan' teonntjö' juu tsjoon'ñeen, tycüi'han' yo
jndye nnon ntjö' na njon jndyi. Tsjö' navejndyee na
tequee'han' tsjaan' juu teonntjö'ñeen, jo' tsjö'
quichuii' na jndyuhan' jaspe. Tsjö' t'man na jndë ve na
tequee'han' jo', juuhan' tsjö' zafiro. Tsjö' t'man na
jndë ndye, jo' tsjö' ágata. Tsjö' t'man na jndë
nenque, jo' tsjö' esmeralda.
\v 20 Tsjö' t'man na jndë 'on, juuhan' tsjö' ónice. Tsjö'
t'man na jndë yon, jo' tsjö' cornalina. Tsjö' t'man na
jndë ntyque', juuhan' tsjö' crisólito. Tsjö' t'man na
jndë nen, jo' tsjö' berilo. Tsjö' t'man na jndë ñjen,
juuhan' tsjö' topacio. Tsjö' t'man na jndë nqui, jo'
tsjö' crisoprasa. Tsjö' t'man na jndë nqui ncho' ncüii,
juuhan' tsjö' jacinto. Ndo' juu tsjö' t'man na jndë
ncho've, jo' tsjö' amatista.
\v 21 Joo ncho've jndyue nt'aa na min juu teonntjö'ñeen,
jndëhan' yo të' perlas. Ncüii cüii 'ndyo v'aa jndëhan'
yo ncüii të' perla t'man. Ndo' juu nata t'man quii' juu
tsjoon'ñeen, jndëhan' yo s'on ijan nquii'. Itsijonhan' juu
s'on ijan'ñeen cha'vijon ndioo na quixuee.
\p
\v 22 Majo' juu tsjoon'ñeen, tavi vats'on na jnty'ia tyquii'han'
ee nquii ta Tyo'ts'on na taquintyja najndei na conduihin yo
nquii Quitsman Chjo, joohan conduihan juu vats'on cüentaa' juu
tsjoon'ñeen.
\v 23 Ndo' tsjoon'ñeen min tyi'icanhan' ndo'cüjioon' min chi',
ee juu na quixuee na condui nquii Tyo'ts'on, itsixueehan'
jo'. Ndo' mantyi nquii Quitsman Chjo na conduihin cha'vijon
lámpara, incyaa jon naxuee jo'.
\v 24 Joo nn'an tsonnangue nc'onhan ntyja 'naan' juu naxuee chon
juu tsjoon'ñeen. Ndo' mantyi nque nn'an na taquintyja na
cotoxenhan tsonnangue, ninnquii'chen na nc'ohan 
tsjoon'ñeen cha' juu na njon conduihin, cüit'maan' nquii
Tyo'ts'on ntyja 'naanhan.
\v 25 Juu tsjoon'ñeen, tavi'nan natsjonhan', min tyi'quitë' jndyue
nt'aa teonntjö' xi'ndiohan', ee quii' tsjoon'ñeen mancha' xjen
xueehan'.
\v 26 Ndo' tsoñ'en nn'an nc'ohan juu tsjoon'ñeen na
nnan't'maan'han nquii Tyo'ts'on, tsoñ'en juu na
tondit'maan'han, nnt'ahan na nquii jon cüit'maan' ntyja
'naanhan'.
\v 27 Min'ncüii 'nan na tyi'ntju' tsixuanhan', tyi'je'caquee'han'
juu tsjoon'ñeen, min min'ncüii ts'an na its'aa juu ncüii
nnon na ji vaahan', min ts'an na itsivi'nn'an. Vaa tson
cüentaa' Quitsman Chjo na jndui na chuhan' nguee nn'an na
conan'xuanhan na tyi'quintycüii na cota'ndo'han. Xia'ntyi
nque nan'ñeen ngoque'han juu tsjoon'ñeen.
\c 22
\s Jndaa na ntyja 'naan'han' na cota'ndo' nn'an
\p
\v 1 Ndo' juu ángel'ñeen si'man jon nnön juu ndaa jndaa na
incyaahan' na cota'ndo' ñuaan nn'an. Quixuee jndyihan' cha'vijon
ndioo. Juuhan' jnanhan' naijon vaa silla na manin' ts'iaan'
'naan' Tyo'ts'on ndo' mantyi yo nquii Quitsman Chjo.
\v 2 Juu jndaa'ñeen vjahan' xoncüe nata t'man quii'
tsjoon'ñeen. Ncüii cüii ntyjaa' jndaa'ñeen, jo' minntyjee'
juu ts'oon na incyaahan' na tyi'quintycüii na cota'ndo' nn'an.
Juu ts'oon'ñeen t'uii' ncho've nnon tëhan', ndo'
ncüii cüii nnon të'ñeen condëëhan' ncüii cüii chi'. Ndo'
tsco juu ts'oon'ñeen conduihan' nasi na itsin'manhan' nn'an
tsonnangue.
\v 3 Nquii Tyo'ts'on taje'quitsquioontyichen jon navi' cha'xjen
na s'aa jndyee jon. Ndo' juu silla na manin' ts'iaan' 'naan'
jon yo Quitsman Chjo, quii' tsjoon'ñeen, jo' m'aanhan',
ndo' nque nn'an na cotye'ntjonhan nnon jon, nnan't'maan'han
jon jo'.
\v 4 Njnty'ia ndëëhan jon ndo' xuee'
jon, nñoonhan' ndö'quitahan.
\v 5 Min taje'c'oonntyichen
natsjon, ndo' nn'an na m'an jo', taje'canhan' chon lámpara min
ndo'cüjioon', xe ng'e nquii ta Tyo'ts'on conduihin chon na
tsixueehan' ndëëhan. Min je'quintycüii na conan'jonhan na
cotoxenhan yo jon.
\s Manndyo na nndyo nnda' Jesucristo
\p
\v 6 Ndo' tsontyichen ángel'ñeen nnön:
\p —Jñ'oonmin' conduihan' jñ'oon na ngatsiquindëhan' joohan'. Conduihan'
jñ'oon na mayuu'. Nquii ta Tyo'ts'on incyaa jon Espíritu
na condui jon quii' n'on nn'an na coninncyahan jñ'oon ntyja 'naan' nchu
vaa nguaa na tonnonchen. Ng'e jo', jndë t'ua jon ts'ian nnon
ángel cüentaa' jon na quitsi'man juu ndëë nn'an na
cotye'ntjonhan nnon jon joo 'nan na mavaa xjen na ndui.
\p
\v 7 Itso Jesucristo:
\p —Quitquenho' cüenta, macje ncüjënön na m'anho'. Juu ts'an 
na itsue jñ'oon na jndui nnon tsonvahin ntyja 'naan' nchu vaa
'nan na nguaa, neiin' jndyi tsan'ñeen.
\p
\v 8 Maja Juan, tsoñ'en nan'min' tityincyoo'han' nnön. Ndo' vi
na jndë jnty'ia ndo' jndyi, jo' tëco'xtyë na tonnon
ángel'ñeen na ntsit'man' jahin ng'e na si'man jonhan' nnön.
\v 9 Majo' tso jon nnön:
\p —Tyi'ntsa' na nnda' ee mantyi condui ja na matye'ntjön nnon Tyo'ts'on cha'xjen 'u'. 'U' ndo' mantyi
nque nty'iu' na coninncyahan jñ'oon' jon ntyja 'naan' nchu vaa
'nan na nguaa, ndo' yo nin'tsoñ'en nn'an na conan'vehan joo jñ'oon na
chu tsonvahin. 'U' xia'ntyi nquii Tyo'ts'on quitsit'man'.
\p
\v 10 Mantyi itsontyichen jon nnön:
\p —Joo jñ'oon na chu juu tsonvahin ntyja 'nan na xejnda na
nguaahan', ncya' na c'oon tyincyohan' ndëë nn'an, ee ng'e
jndë tichjo xjen na ntsiquindëñ'ehan' joohan'.
\v 11 Juu ts'an na its'aa natyia, quits'aatochen juu 'nan natyia.
Ndo' juu ts'an na min'cyantyi vam'aan, quintjohin ntyja
'naan'han'. Ndo' juu ts'an na vam'aan juu ntyja 'naan' na
ya, ninvito c'oon juu ntyja 'naan'han. Ndo' mantyi juu ts'an
na itsiji'ua Tyo'ts'onhin, ninvito cam'aan jon ntyja
'naan'han'.
\p
\v 12 Itso Jesucristo:
\p —Quitquenho' cüenta macje ncüjënön. Ndo' na ncjöy'ön naya na 
ngacüja'han' ncüii cüii ts'an xi' ncüii yo 'nan na tots'aa juu.
\v 13 Ja mancüiixjen m'an vitjachen na nguaa tsoñ'en, ndo' nc'ön
xjen na jndë tenon tsoñ'en. Ja m'an navejndyee ndo' mantyi
juu xjen na mats'ia, ninvaa m'an. Condui ja x'ee tsoñ'en
ndo' mantyi ntyji nchu vaa contycüiihan'.”
\p Nnda' jñ'oon na tso jon nnön.
\p
\v 14 “Nein jndyi joo nn'an na cotmanhan ndiaahan cha' na
nnincyaahan' na vanaan na ngüenonhan jndyuent'aa na ngoque'han
quii' juu tsjoon Jerusalén xco naijon na m'aan juu ts'oon na
nninncyaahan' na cota'ndo'han, na ntquiihan tëë'han'.
\v 15 Majo' na toxen' teonntjö' juu tsjoon'ñeen, jo' m'an joo nn'an
na ntjein cont'ahan yo ntyjehan yo joo nn'an na cont'a ts'ian
quindua', yo joo nn'an na ve' ndö ro m'anhan yo nn'an, ndo'
nn'an na conan'cüjehan ntyjehan, ndo' mantyi yo nn'an na
conan't'maan'han 'nan na chito Tyo'ts'onhan', yo nin'tsoñ'en
nn'an na conan'vi'nn'anhan ntyjehan ndo' na conan'neinhan jñ'oon
quintu.
\s Jñ'oon na mats'ia na icüji' jndyoyuhan'
\p
\v 16 —Ja Jesús jndë jñön juu ángel cüenta na m'anho' na
quitsi'man jon tsoñ'en jñ'oonmin' ndëë 'o' na conduiho'
tmaan' nn'an na icüji Tyo'ts'on cüentaa' nquii jon. Ja condui
tsjan 'naan' David na jndyocahan'. Ndo' mantyi condui ja
quixjuunco na quixuee jndyihan'.
\p
\v 17 Nquii Espíritu Santo yo joo nn'an na conduihan scuu'
Quitsman Chjo conduehan:
\p —'U' ta Jesús, quindyo'.
\p Ndo' minninchen ts'an na indyii juu jñ'oonmin', mantyi
quitso juu:
\p —Quindyo' ta Jesús.
\p Ndo' min'cya ro ts'an na nin'c'u juu ndaa, quitsindyoo'hin.
Na ve' yu quindyoc'u juu ndaa na incyaahan' na cota'ndo'
nn'an.
\p
\v 18 Tsonvahin chuhan' jñ'oon ntyja 'naan' nchu vaa 'nan na nguaa. Nnon
ncüii cüii ts'an na indyiihan', macüji' jndyoyu ja jñ'oon
na toncuu'. Xe na aa ntscüantjo' juu jñ'oon na itsiquindyi
jñ'oonmin', yajo' nacjoo' tsan'ñeen ntscüantjo' Tyo'ts'on
ncüii cüii nnon navi' na itsiquindyi tsonvahin.
\v 19 Ndo' mantyi xe na aa ncüji' ndya' ts'an minndye jñ'oon na
chu tsonvahin ntyja nchu vaa 'nan na nguaa, taxe'ncyaa Tyo'ts'on
na vanaan na ntquii tsan'ñeen tëë' juu ts'oon na
incyaahan' na cota'ndo' nn'an, min tyi'je'ncyaa jon na
vanaan na ngaquee' tsan'ñeen quii' tsjoon cüentaa' jon.
Juu tsonvahin itsiquindyihan' ntyja 'naan ve nnon
jñ'oonmin'.
\p
\v 20 Manquiintyi Jesús na icüji' jndyoyu jon jñ'oonmin', itso
jon:
\p —Jñ'oon na mayuu', cje na ncüjënön na m'anho'.
\p Quindui na nnda'. Quindyo' 'u' ta Jesús.
\p
\v 21 Juu naya na condui nquii ta Jesús, c'oonhan' yo nque nn'an
na conduihan cüentaa' Tyo'ts''on.