\id ROM Chamacoco NT - Paraguay 2000 (web 2013)
\h Romanos
\toc1 Romanos
\toc2 Romanos
\toc3 Ro
\mt1 Romanos
\c 1
\s Pablo ɨshɨm Porrosht aabo õr saludo uje ode dɨt Roma.
\p
\v 1 Yok Pablo uje tuu ochichew pahwoso ochɨbɨte ana hutɨta. Yok Jesucristo ɨr ɨbɨk. Porrosht chiihla yok hn chiyuhu yokɨhɨ laabo õr ehet par uje yok ɨr apóstol hn shuu tanɨmɨrãha lahwoso titɨm oso uje Jesucristo ɨshɨ õr hnɨtewɨhɨ Porrosht ahɨrkite.
\v 2 Porrosht tatɨm erze israel oso uu õr profeta poruwo wɨshɨ par uje ochichew ɨr ahwoso. Tatɨm õrkite uje chɨbɨte lahwoso par uje tyenɨj Cristo taachɨ̃hɨ ɨ̃rmo nehe.
\v 3 Shɨ Porrosht tata uje tyenɨj shuu Deyjɨt tãra erze israel oso õr porokkite rey David par uje shuu wɨchɨ tokole hnakɨrap.
\v 4 Porrosht chɨbɨte orhõta uje Jesús wɨchɨ uu ɨr Ijɨt pisht uje shuu ɨkponi tokolɨhɨ erze topo õr ahɨr. Porrosht Ɨchɨbich yelɨj niyokõr mɨ̃hnɨk. Wɨchɨ uje ɨshɨm Porrosht Ijɨt ukurbo. Ɨr Ijɨt wɨchɨ Jesucristo uu eyok Ɨrhĩch.
\v 5 Cristo wɨchɨ uje sosɨr yok par uje shuu tomsaha par ɨr apóstol hn tanɨmɨrãha ɨr ahwoso titɨm erze oso uje ode ɨ̃rmo lekɨtiyo par uje ye olotiis Jesucristope hn par uje oshuu Jesucristo dich.
\v 6 Olak ɨtso õr, Porrosht chiihla olak par uje uhulo Jesucristo masaha par uje wɨchɨ uu olak Yɨnsɨrc.
\v 7 Tuu ochichew pahwoso ochɨbɨte ana hutɨta par tokosɨm olak uje olak dechɨ dɨt Roma. Porrosht sahmũr olak. Chiihla olak par uje amsahalo par ɨr aabo. Sehe tuu Porrosht uu eyok Deych hn eyok Ɨrhĩch Jesucristo odosɨr olak hn oduhu olak aho kɨɨs.
\s Pablo sehe tekɨrɨhɨ Porrosht aabo uje ode dɨt Roma.
\p
\v 8 Sehe titɨm olak kuche ich kɨhniya per wap tɨkɨnshɨp Porrosht tɨ̃ra eyok Ɨrhĩch Jesucristo ɨr iich par nos wɨr olak pork oso uje ode lekɨtiyo otata uje olak uje ebuhulo dɨt Roma ich ye otiislo eyok Ɨrhĩch Jesucristope.
\v 9 Ich tɨnaha yok uje tiyokõr Porrosht ɨr ɨbiyo pork tanɨmɨrãha ɨr ahwoso titɨm õr uje Jesucristo ɨshɨ õr hnɨtewɨhɨ Porrosht ahɨrkite. Porrosht wɨchɨ uje chɨraha uje shish yok orar tapur ɨre par olak.
\v 10 Shish yok orar tapur Porrosht kɨmɨjɨ nahmũr ich shuu takaha tekɨrɨhɨ olak shɨchish.
\v 11 Shish sehe takaha par uje tekɨrɨhɨ olak par uje tokosɨr olak. Shɨ sehe ma tuu olak duurapo,
\v 12 hn yok ɨtspo, pork sehe tuu akashɨmlo yok par tukuurapo hn takashɨm olak par uje ma ye yotiislo eyok Ɨrhĩch.
\s Porrosht ukurbo de par shuu oso omasaha par ɨr aabo.
\p
\v 13 Pɨshɨbo watsaklo, sehe tuu erahalo uje shish sehe takaha par uje tekɨrɨhɨ olak per shish kuchẽrk sontew yok heke ye yok pwele tɨtɨ̃r olakpe. Sehe tuu oso ma okɨhniya omasaha par Porrosht aabo par õya olak shɨ ɨtso uje tiyokorãha erze Porrosht aabo yewo uje õr dihipo kɨnãho.
\v 14 Porrosht ɨshɨm yok lahwoso par uje tanɨmɨrãha heke titɨm erze griego yewo hn erze dihipo kɨnãho, hn titɨm erze uje õr eykdeyo hn erze uje ye õr eyuwɨ̃rsh,
\v 15 heke sehe tɨtɨ̃r olakɨhɨ wahacha dɨt Roma shɨchish par uje titɨm olak hn erze oso yewo Porrosht ahwoso uje Jesús ɨshɨ olak hnɨtewɨhɨ Porrosht ahɨrkite.
\v 16 Ye tɨkɨpookpe uje titɨm oso uje Jesús ɨshɨ õr hnɨtewɨhɨ Porrosht ahɨr, pork kɨmɨjɨ ye olotiis erze ahwoso uje ich ɨhɨ̃rtso ich Porrosht ɨr ukurbo shuu omasaha par ɨr aabo. Titɨm erze israel oso wap hn titɨm erze dihipo kɨnãho toy.
\v 17 Uje Jesús tooho krus eeychkite par uje ɨshɨ eyok hnɨtewɨhɨ Porrosht ahɨr ich shuu ɨmeheeych uje Porrosht shiyokõr uje ich om per shɨ ɨmeheeych par erze uje ye olotiis ɨrpe. Porrosht ahwoso tata shuu ɨtsorz ɨm: —Shɨ erze uje ye olotiis ɨrpe ich nĩhyok õr hnɨtew uje de Porrosht ahɨr heke õr owich de ɨre ahɨr.—
\s Porrosht tyenɨj sepyẽr oso uje oshiyokõr mɨhnũwo.
\p
\v 18 Titɨm olak uje nos wɨr oso uje ye onahmũr Porrosht hn oshiyokõr uje ich mɨhnũwo ich otsontew erze ahwoso uje ich ũru uje tãra Porrosht, heke oshuu Porrosht chesdelpa hn sɨtak õr. Tyenɨj shuu ochɨraha uje sepyẽr õr nehe ich shuu dospa.
\v 19 Nos wɨr uje oshiyokõr uje ich mɨhnũwo ochɨraha uje Porrosht de pork Porrosht sowa õr.
\v 20 Uje ɨ̃rmo tenitkite ɨchii Porrosht nos shiyokõr kuche heke nos oso ochɨraha uje ɨre shish de. Ye õr pwelpe uje onomo ɨre per ochɨraha uje ɨr ukurbo deyo de, heke ich nĩhyok uje yeẽk pwele sata ɨrehe Porrosht ɨle ɨkɨch.
\v 21 Õr ɨre ochɨraha uje Porrosht de, per ye oduhu Porrosht dichpe, hn ye onɨna ɨrpe. Shɨ oshuu deyuwo tɨsɨrɨ̃hɨ erze kuche uje ye jukur heke õr eyuwo ich shɨ ɨtso dɨhlele.
\v 22 Otata uje ich õr eykdeyo per wɨr shɨ oshuu ɨre ɨtso uje õr totihlo.
\v 23 Porrosht ich hũre hn yelɨj nɨhna ɨre, per oym Porrosht hn oshiyokõr kojano po ochii wɨr ɨr porroshtɨhɨ. Erze kojano po oshiyokõr oshuu ɨtso oso hn shɨ ɨtso chɨpɨrme hn shɨ ɨtso loshɨpo hn shɨ ɨtso echɨ̃re.
\p
\v 24 Heke Porrosht iim õr par uje oshiyokõr erze kuche mɨhnũwo uje shɨ õr ɨre otsahmũr. Oshiyokorɨ̃hɨye erze uje shuu opook.
\v 25 Porrosht ich ũru per wɨr okoswãha heke ohno oteeychãha erze uje ye Porroshtpe. Shɨ oteeychãha erze uje Porrosht shiyokõrkite hn oshiyokõr erze kuche ɨr ɨbiyo. Porrosht wɨchɨ uje nos shiyokõr erze kuche. Wɨchɨ uje tyenɨj onarim ɨre hn oteeychãha. Ich om uje oniyokõr oduhu ɨlorz.
\p
\v 26 Heke Porrosht iim õr par uje oshiyokõr erze kuche mɨhnũwo uje otsahmũrpa uje shuu oso opook. Tɨmcher oym dabiyo par uje õhyiyer ahɨr.
\v 27 Hnakɨrbo õr ɨtspo oym nerẽhte par uje õhyiye ahɨr hn ye opookpe. Otsahmũrpa oshiyokõr erze mɨhnũwo per ich oshye leshɨ̃ro hn masaha õr aho.
\p
\v 28 Otata uje nĩhyok ye Porroshtɨkɨsh, heke Porrosht iim õr par uje shɨ oshiyokõr erze kuche mɨhnũwo uje shish oshuu deyuwo tɨsɨ̃r.
\v 29 Shish õr eyuwo tɨsɨ̃r erze kuche mɨhnũwo uje ich kɨnãho kɨnãho hn ye shɨ erzepe, ich otsahmũr oshuu yewo doso. Ich otsahmũr uje ochukutɨrãha ɨre kuche, hn wɨr õr ɨljaabo. Shish opota kuche, hn oshuu yewo oshuu otoy. Otsahmũr uje oshiyokosye, hn otsehnyẽrye. Wɨr õr ehnito, hn ich otsahmũr uje otat lare.
\v 30 Otsahmũr uje otatɨm yet lekushiĩ par uje oshuu sɨtak yet. Wɨr shɨ otsɨtak Porrosht, hn ye oduhu yewo õr jukur. Wɨr shɨ sehe oduhu ɨre ma deyo, hn otsahmũr uje otatɨm oso uje oshiyokõr erze kuche shɨ par uje onarim ɨre. Shish oshuu deyuwo tɨsɨ̃r erze kuche ahlo uje ich ma mɨhnũwo par uje oshiyokõr. Ye oniyokõrpe uje õr deych hn õr data otatɨm õr.
\v 31 Wɨr shɨ oshuu deyuwo tɨsɨ̃r erze kuche uje ye jukur, hn shish oyehi lahwoso, ye oniyokõrpe. Yelɨj onuuna uje yewo õr losuhlaabo, per wɨr otsahmũr uje oshuu oso dospa.
\v 32 Ochɨrahapa uje Porrosht chɨbɨte uje yeẽk shiyokõr erze mɨhnũwo shuu ɨtsorz ich tyenɨj tɨ̃r urhuta bahluta ehet per wɨr shish oshiyokõr. Hn ye shɨ erzepe, ich otsahmũr uje yewo oshiyokõr erze kuche mɨhnũwo ɨtso õr.
\c 2
\s Porrosht shuu israel oso hn dihipo kɨnãho õr ɨtsye.
\p
\v 1 Heke titɨm olak uje olak israel oso. Uje olak yeẽk tata uje dihipo kɨnãho oshiyokõr uje ich mɨhnũwo ich chɨbɨte orhõta uje ɨr ɨluu ich mɨhnũ toy pork shiyokõr ɨtso õr heke ye pwelpe uje sata ɨre.
\v 2 Yɨrahalo uje Porrosht shiyokõr om uje sepyẽr erze oso uje oshiyokõr erze mɨhnũwo uje titɨm olakɨke.
\v 3 Uje olak yeẽk tata uje erze yewo oshiyokõr uje ich mɨhnũwo per ɨre shiyokõr toy ¿ɨnaapo heke chɨbɨte uje Porrosht ye depyẽr ɨre toy petɨk nehe?
\v 4 Porrosht shish hneta wɨchɨ hn sosɨr heke chɨbɨte uje ye depyẽr ɨrpe per ye duhu deyuwo tɨsɨ̃rpe par uje chɨraha uje Porrosht sosɨr ɨre shɨ par uje shuu dehet chuuna uje shiyokõr uje ich mɨhnũwo hn iim hn shiyokõr uje Porrosht sahmũr.
\v 5 Shish shuu dehet kata hn ye noympe uje shiyokõr erze uje ich mɨhnũwo par uje shiyokõr uje ich om uje Porrosht sahmũr. Shish shuu Porrosht chesdelo hn ich ehmũrc dich. Uje terɨhɨ ese ɨshɨrĩt uje sepyẽr oso nehe ich sepyẽr pishɨ wɨchɨ shuu dospa. Porrosht wɨchɨ jwe uje shish shiyokõr uje ich om.
\v 6 Nos sepyẽr erze uje oshiyokõr uje ich mɨhnũwo. Ye duhu sowepe uje sepyẽr õr, hn ye noympe.
\v 7 Per erze oso uje shish ohneta oso hn otsõsɨr õr, hn shish oshiyokõr uje ich om par uje oshuu Porrosht tatɨm õr uje õr ɨbiyo tokole om ich Porrosht tyenɨj ɨshɨm wɨr õr ɨkɨrĩt uje yelɨj nɨhna ɨre. Wɨr uje shish oyem Porrosht par uje wɨchɨ narim õr, hn shish oyem ese ɨkɨrĩt uje yelɨj nɨhna ɨre.
\v 8 Uje terɨhɨ ɨshɨrĩt nehe ich Porrosht sowãha erze uje oshuu oso otsɨtakye. Chesdelpa uje sepyẽr õr uje ye onahmũr oniyokõrpe uje ich ũru uje Porrosht ahwoso tata. Shɨ sehe oniyokõr uje ich mɨhnũwo.
\v 9 Nos wɨr erze oso uje oshiyokõr uje ich mɨhnũwo ich tyenɨj shuu kuche mɨhnũwo tɨ̃r õr. Wɨr tyenɨj ochuuna uje ich dospa. Wap shuu tɨ̃r erze israel oso hn par nos wɨr yewo uje ye õr israel osope.
\v 10 Per nos wɨr uje oshiyokõr uje ich om Porrosht tyenɨj tatɨm õr uje oshiyokõr uje ich om, hn Porrosht narim õr hn shuu õr aho kɨɨs. Porrosht tyenɨj tatɨm erze israel oso shuu ɨtsorz wap hn shuu erze dihipo kɨnãho oyehe israel oso õr nẽr,
\v 11 pork Porrosht ye duhu yet kɨnãhape hn duhu yet kɨnaha. Nos shuu õr ɨtsye.
\v 12 Nos wɨr uje oshiyokõr uje ich mɨhnũwo uje ye Porrosht nahmũrpe hn erze ley uje Moisés chichewkite nihyokɨ̃hɨ õr ahɨr ich Porrosht tyenɨj shuu otɨ̃r urhuta bahluta ehet, per ye tatɨm õr uje oyuwe erze leype. Per erze uje oshiyokõr uje ich mɨhnũwo uje ye Porrosht nahmũrpe hn asa ley waa je Moisés chichewkite de õr ahɨr ich Porrosht tyenɨj tatɨm õr uje oyuwe asa ley heke tyenɨj sepyẽr õr toy shuu ɨtsorz.
\v 13 Erze uje ochunt asa ley per ye oniyokõrpe wɨr uje nĩhyok õr owich Porrosht ahɨr. Shɨ erze uje ye otsowepe asa ley hn oshiyokõr uje Porrosht sahmũr wɨr uje Porrosht tyenɨj shuu õr owich de dahɨr nehe.
\v 14 Nos wɨr oso uje ye ley chɨhɨ õr ahɨrpe waa je Moisés chichewkite uje oshiyokõr uje asa ley tata ich shuu ɨmeheeych uje shɨ ɨtso uje asa ley de õr aho.
\v 15 Oshuu ɨmeheeych shɨ ɨtso uje Porrosht chichew asa ley chɨbɨte õr aho pork ochuuna uje oshiyokõr uje mɨ̃hnɨk hn õr eyuwo shuu ochɨraha uje oshiyokõr uje ich mɨ̃hnɨk hn shuu ochɨraha toy uje oshiyokõr uje ich om.
\v 16 Heke uje terɨhɨ ese ɨshɨrĩt nehe hn Porrosht shuu Deyjɨt sepyẽr oso uje oshiyokõr uje ich mɨhnũwo uje otsakɨs. Uje titɨm õr uje Jesucristo ɨshɨ õr hnɨtewɨhɨ Porrosht ahɨr ich titɨm õr toy uje wɨchɨ tyenɨj sepyẽr õr kɨmɨjɨ otsotiis ɨre.
\s Israel oso onarim ɨre.
\p
\v 17 Titɨm olak yeẽk uje ɨre israelya, hn chɨbɨte uje ɨr owich de Porrosht ahɨr heke tata uje ɨre israelya hn shiyokõr asa ley waa je Moisés chichewkite. Ich narim ɨre pork teeychãha Porrosht.
\v 18 Tata uje chɨraha uje Porrosht sahmũr hn yeẽk shiyokorãha ɨrni erze ley uje Moisés chichewkite heke chɨraha uje ich ma om hn sahmũr.
\v 19 Tata uje chɨrahapa Porrosht ɨr ɨluu heke takashɨm erze uje ye odɨrehepe pork õr ɨtso uje õr ɨle pata par uje oshuu ochɨraha toy. Tata uje ɨre ɨtso luu pork shiyokorãha erze uje õr ɨtso uje ode dɨhlelta.
\v 20 Wɨchɨ tata uje pwele shiyokorãha erze uje ye odɨraha Porrosht ɨluupe, hn tata toy uje shiyokorãha pɨkɨhnino ijaabo pork erze ley uje Moisés chichewkite shuu chɨraha uje ich om hn uje ich ũru.
\v 21 Owa uje ahakorãha yewo uhu ɨtsorz ¿ɨnaapo heke ye ahakorãha owape? Uje anɨmɨrãha Porrosht ahwoso ich atɨm õr uje ye ompe par otohɨr. ¿Hap owa, je ohɨr?
\v 22 Ata uje ye ompe par otorãha dabiyo hn nerẽhte. ¿Hap owa, je orãha erãhta? Ata uje ich etakpa erze kojano po uje oso ochii ɨr porroshtɨhɨ per ¿je amsaha wɨr õr templo aho par uje orha erze kojano po ɨr kushjãro uje oso oshɨmɨhɨ?
\v 23 Ata uje ich ahmũr Porrosht ɨr ley. ¿Je uhu Porrosht disdelo uje aluwe asa ley?
\v 24 Porrosht ahwoso tata uje dihipo kɨnãho ochinehnɨm Porrosht ɨr iich pork olak aho yuhurash.
\p
\v 25 Kɨmɨjɨ olak yeẽk ye sowe erze ley uje Moisés chichewkite ich asa sirkunsisyon uje de ɨre ich bale, per kɨmɨjɨ sowe asa ley ich ye jukur asa sirkunsisyon.
\v 26 Heke kɨmɨjɨ yeẽk chɨhɨ uje nĩhyok ɨr yarta waa je iich otsɨɨ sirkunsisyon per shish shiyokõr uje asa ley tata ich shɨ ɨtso uje asa yarta de ɨre.
\v 27 Uje etɨ̃rlo Porrosht ɨle ɨkɨch nehe kɨmɨjɨ yeẽk chɨhɨ uje ye ɨr yarta chɨhɨpe waa je iich otsɨɨ sirkunsisyon hn ye sowe asa ley ich wɨchɨ tyenɨj denunsya olakɨhɨ Porrosht ɨle ɨkɨch olak uje ley de olak ahɨr hn olak yar de uje iich otsɨɨ sirkunsisyon per shish aluwelo asa ley.
\v 28 Erze uje õr israel oso õr eyuwo tɨsɨ̃r uje õr israel oso pork õr yar de per Porrosht tata uje wɨr ye israel oso pishope. Asa yarta wate ye yarta pishtpe shɨ pork ochiyuhu õr yũhurrza pɨkaabɨt.
\v 29 Erze israel oso pisho wɨr uje õr aho kɨnãho pork asa yarta waa je iich otsɨɨ sirkunsisyon de õr aho uje Porrosht Ɨchɨbich shiyokõr. Porrosht narim õr, ye hnakɨrbo onarim õrpe.
\c 3
\p
\v 1 Heke titɨm olak. ¿Je om uje olak israel oso o je ye jukur? ¿Je om uje olak yarta de waa je iich otsɨɨ sirkunsisyon o je ye jukur?
\v 2 Ich om uje olak yarta de hn ich om uje olak israel oso. Wap titɨm olak uje ich om uje olak israel oso, pork Porrosht ɨshɨm olak lahwoso par uje abeylo.
\v 3 Kɨmɨjɨ yeniyo olotiis Porrosht ¿je wɨr oduhu Porrosht sẽhi lahwoso?
\v 4 Ye ũrpe pork Porrosht yelɨj sẽhi lahwoso. Nos wɨr uje ɨre tata shish ũru. Kɨmɨjɨ nos hnakɨrbo shɨ otata lekushiĩ per Porrosht ahwoso shish ũru pork ɨr ahwoso tata shuu ɨtsorz ɨm: —Ich ɨmeheeych uje Porrosht ahwoso ich ũru. Uje oso otata uje ɨre tata dekushiĩ per shish serz õr.—
\v 5 Kɨmɨjɨ yewo otata otsɨɨ: —Erze kuche mɨhnũwo uje yiyokõrlo chɨbɨte orhõta uje Porrosht shiyokõr uje ich om.— ¿Je om uje otata uje Porrosht shiyokõr uje ich mɨ̃hnɨk uje sepyẽr õr shuu ɨtsorz? Shɨ oyiita ɨtso uje hnakɨrbo otsẽrza, ye ɨlo Porroshtpe.
\v 6 Ye Porrosht niyokõrpe uje ich mɨ̃hnɨk uje sepyẽr õr shuu ɨtsorz. Kɨmɨjɨ Porrosht ye depyẽr õr duhu ɨlorz ich ye pwele depyẽr erze oso uje ode nãhu ɨ̃rmo nehe.
\v 7 Kɨmɨjɨ israel osht tata ɨm: —Uje pukushiĩ dɨbɨte orhõta uje Porrosht tata uje ich ũru hn tuu ɨre ma dich ¿ɨnaapo heke Porrosht sepyẽr yok shɨ ɨtso uje tiyokõr uje mɨ̃hnɨk?
\v 8 ¿Ɨnaapo heke ye yiyokõrlo uje ich mɨhnũwo par uje erze om tɨ̃r eyok?— Oso ode uje otata oshuu ɨtsorz otsɨɨ: —Pablo shiyokõr erze kuche mɨhnũwo heke erze uje ich om tɨ̃r ɨre.— Ich om uje Porrosht sepyẽr erze oso uje otata lekushiĩ oshuu ɨtsorz.
\s Nos oso oshiyokõr uje ich mɨhnũwo.
\p
\v 9 Titɨm olak uje olak israel oso ¿je olak eyuwo tɨsɨ̃r latɨkpo? ¿Je eyok ma om je erze oso yewo? Ye eyok ma ompe je erze yewo. Tuu ɨmeheeych uje eyok israel oso hn nos wɨr oso yewo shɨ nos eyok ɨtsye. Nos yiyokõrlo uje ich mɨhnũwo pork eyok ɨluu mɨhnũ ich shɨ ɨtso eyok yɨnsɨro.
\v 10 Porrosht ahwoso tata shuu ɨtsorz ɨm: —Nĩhyok uje yeẽk shiyokõr uje yok ley tata, nĩhyok hnii nohmɨra.
\v 11 Nĩhyok yeẽk uje chɨraha Porrosht ɨr ɨluu. Nĩhyok yeẽk uje chukwi pork sehe dɨraha Porrosht.
\v 12 Nos wɨr oso oshiyokõr uje kɨnaha, ye oniyokõrpe uje Porrosht sahmũr. Nos õr ɨtsye, oshiyokõr uje ich mɨhnũwo. Nĩhyok yeẽk uje shiyokõr uje ich om, hnii nohmɨra.
\v 13 Õr ahwo ich shɨ ɨtso luke uje shɨ ɨsãha hn ɨr aat tokole pork shɨ otata lahwoso par uje otsehnyẽr oso, hn ich õr ahwo wosdeyo shɨ ɨtso echɨ̃re uje ich wosdeyo.
\v 14 Shish õr ahwoso mɨhnũwo tokolɨhɨ õr ahwo hn otsajɨ̃rye ɨkiyo.
\v 15 Shish ochɨmɨt ɨre par ooshɨ otsatsɨr yewo par uje oshuu õr oshuu otoy.
\v 16 Nos wɨr õr ɨluu shɨ par shuu oso õr kushjãro taata hn shuu õr dosdarakpa.
\v 17 Ye odɨrehepe uje oshuu oso õr aho kɨɨs.
\v 18 Ye otola Porroshtpe.— Wɨr erze uje Porrosht ahwoso tata.
\s Nos tyenɨj ye olotiis Cristope par uje õr owich de Porrosht ahɨr.
\p
\v 19 Yɨrahalo uje erze ley wɨr par erze israel oso pork wɨr uje Porrosht ley de õr ahɨr. Nos oyuwe erze ley. Nĩhyok yeẽk pwele sata shuu ɨtsorz heke Porrosht chɨbɨte nos wɨr oso uje ode nãhu ɨ̃rmo õr hnɨtew de ɨre ahɨr.
\v 20 Nĩhyok yeẽk pwele shiyokõr uje erze ley tata. Shish oyuwe Porrosht ɨr ley heke õr hnɨtew de ɨre ahɨr. Ɨr ley shɨ shuu ochɨraha uje oshiyokõr erze kuche mɨhnũwo uje ye Porrosht nahmũrpe.
\v 21 Per ele ahle Porrosht chɨbɨte orhõta latɨkpo uje tyenɨj oshiyokõr par uje õr owich de ɨre ahɨr. Wɨchɨ kɨnaha pork ye dɨbɨtpe uje tyenɨj oniyokõr uje asa ley tata par uje õr owich de Porrosht ahɨr. Erze uje Moisés chichewkite hn erze uje erze profeta poruwo wɨshɨ ochichewkite tata uje deeych yet nehe hn yeẽk ɨshɨ õr hnɨtewɨhɨ Porrosht ahɨr.
\v 22 Porrosht chɨbɨte uje nĩhyok õr hnɨtew nos wɨr erze uje ye olotiis Jesucristope, kɨmɨjɨ õr israel oso hn kɨmɨjɨ õr dihipo kɨnãho,
\v 23 pork nos wɨr oso uje ode ɨ̃rmo lekɨtiyo nos oshiyokõr uje ich mɨhnũwo. Nĩhyok uje yeẽk shɨ shiyokõr uje ich om ɨtso uje Porrosht sahmũr.
\v 24 Shɨ Porrosht sosɨr eyok hn shuu eyok owich de dahɨr. Ye duhu bahatɨkɨsh. Jesucristo wɨchɨ uje ɨshɨ eyok hnɨtewɨhɨ Porrosht ahɨrkite.
\v 25 Porrosht shuu Jesucristo tɨrẽt par uje ɨr armɨsta noshɨ hn ɨshɨ eyok hnɨtew, per shɨ erze uje ye olotiis Cristope wɨr uje õr owich de Porrosht ahɨr. Heke chɨbɨte orhõta uje Porrosht shiyokõr uje ich om pork uje ehn yahpaa Cristo taãchkite ich Porrosht shɨ chɨhmer erze oso õr hnɨtew uje ye olotiis ɨrpe. Uje Cristo taãcha hn toy ich ɨshɨ õr hnɨtewɨhɨ Porrosht ahɨr,
\v 26 hn ele ahle ich shish ɨmeheeych uje Porrosht shiyokõr uje ich om pork shish shuu wɨr õr owich de dahɨr erze uje ye olotiis Jesuspe.
\p
\v 27 ¿Je oso õr pwele uje onarim ɨrehe Porrosht ɨle ɨkɨch? Nĩhyok ye õr pwelpe. ¿Ɨnaapo heke ye õr pwele onarim ɨre oduhu ɨlorz? ¿Je wɨr õr pwele oniyokõr uje asa ley tata par uje õr owich dechɨ poõrc? Ye õr owich chɨhɨpe. Shɨ õr owich de poõrc pork ye olotiis Cristope.
\v 28 Yɨrahalo uje eyoklo owich de Porrosht ahɨr shɨ pork ye yotiislo Cristope, ye pork yiyokõr asa leype.
\v 29 ¿Je ũru uje Porrosht wɨchɨ shɨ israel oso õr Porrosht? Ye ɨlorzpe, wɨchɨ nos dihipo õr Porrosht toy.
\v 30 Porrosht shɨ nohmɨra de, heke erze israel oso õr owich de Porrosht ahɨr kɨmɨjɨ ye olotiis Cristope, hn nos wɨr dihipo õr owich de toy kɨmɨjɨ ye olotiis Cristope.
\v 31 Uje yomsaha par eyok Porrosht aabo shɨ pork ye yotiis Cristope ¿je ye yuhu jukur asa ley waa je Moisés chichewkite? Ye ũrpe. Shɨ yuhu asa ley bale pork wate shuu yɨrahalo uje yiyokõrlo uje mɨhnũwo heke tyenɨj ye yotiislo Cristo.
\c 4
\s Porrosht aabo ich shɨ õr ɨtso uje otãra Abraham.
\p
\v 1 Abraham wɨchɨ uu eyok porokkite uje eyok israel oso pork nos wɨr eyok poruwo wɨshɨ otãra ɨre. ¿Abraham niyokõr latɨkpo par uje ɨr owich de Porrosht ahɨr?
\v 2 Ye Abraham niyokõrpe uje om par uje shuu ɨr owich de Porrosht ahɨr heke ye pwele narim ɨrehe Porrosht ɨle ɨkɨch.
\v 3 Porrosht ahwoso tata shuu ɨtsorz ɨm: —Abraham ye lotiis Porrosht petɨkkite heke Porrosht ɨshɨ ɨr hnɨtewɨhɨ dahɨr hn shuu ɨr owich de dahɨr.—
\v 4 Ele ahle ich erahalo uje yeẽk chishew obiyo hn serz hnote wɨr ye shɨ odosɨmɨhɨ ɨrpe. Oshɨm ɨre pork wɨr uje ɨre serz.
\v 5 Per kɨmɨjɨ yeẽk chɨhɨ uje ye lotiis Porrosht uje ɨshɨ oso õr hnɨtewɨhɨ dahɨr, ich Porrosht perdonar erze kuche mɨhnũwo uje shiyokõr shɨ pork ye lotiis ɨre heke shuu ɨr owich de dahɨr. Ye niyokõr uje ich om par uje serz ɨr owich Porrosht ahɨr.
\p
\v 6 Rey David lɨshɨ tata shuu ɨtsorz toy. Tata uje ich om par ese hnakɨrbich uje Porrosht ɨshɨ ɨr hnɨtewɨhɨ dahɨr pork ye lotiis ɨrpe, per ye doshɨ par ese uje shiyokõr kuchẽrk par uje serz dawich.
\p
\v 7 David tata shuu ɨtsorz ɨm: —Ich om par erze uje Porrosht perdonar õr kuche mɨhnũwo uje oshiyokõr hn chɨkey uje oshiyokõr.
\v 8 Ich om par ese hnakɨrbich uje ye Ɨrhĩch duhu doshɨ ɨr hnɨtewɨhɨ dahɨrpe.— Wɨr uje David tata.
\p
\v 9 Ese om uje David tata ¿je Porrosht shɨ dosɨm erze uje õr yarta de waa je iich otsɨɨ sirkunsisyon o je dosɨm toy erze uje nĩhyok ye õr yãrɨrash? Nos yiita uje Porrosht chɨbɨte Abraham ɨr owich dahɨr shɨ pork ye lotiis ɨrpe.
\v 10 ¿Je Porrosht tatɨm Abraham uje ɨr owich de ɨre ahɨr uje ɨr yarta dekite waa je iich otsɨɨ sirkunsisyon o je nĩhyok ye ɨr yãrɨrash? Uje ehn nĩhyok ye ɨr yãrɨrash ich Porrosht tatɨm ɨre
\v 11 ɨm: —Ebɨte owa yarta par uje eraha uje owa owich de pahɨr pork ye otiis yokpe.— Heke Abraham wɨchɨ uu õr poorc nos wɨr erze uje ye olotiis Porroshtpe uje nĩhyok ye õr yãrɨrash waa je iich otsɨɨ sirkunsisyon. Porrosht nos ɨshɨ õr hnɨtew uje de ɨre ahɨr.
\v 12 Abraham wɨchɨ uu õr poorc toy nos wɨr erze israel oso uje ye olotiis Porroshtpe uje õr yar de waa je iich otsɨɨ sirkunsisyon, per otseẽt Abraham toy uje ye olotiis Porrosht petɨkkite uje ehn nĩhyok ye ɨr yãrɨrash.
\s Porrosht chɨbɨte lahwoso par ɨshɨm daabo ɨ̃rmo nehe.
\p
\v 13 Eseekite hn Porrosht chɨbɨte lahwoso par uje ɨshɨmɨhɨ ɨ̃rmo Abraham hn erze uje otãra ɨre. Shɨ tatɨm ɨre pork wɨchɨ ye lotiis ɨrpe heke Porrosht chɨbɨte uje tyenɨj ɨshɨ ɨr hnɨtewɨhɨ dahɨr. Abraham ye niyokõr uje erze ley tata par shuu Porrosht tatɨm ɨre shuu ɨtsorz.
\v 14 Porrosht shɨ ɨshɨm ɨ̃rmo erze uje ye olotiis ɨrpe. Ye dosɨm erze uje oshiyokõr uje erze ley tata. Wɨr shɨ sehe oduhu tokole uje ye jukur uje ye olotiis Porroshtpe, hn ye jukur erze ɨr ahwoso uje chɨbɨte, per ye õr pwelpe.
\v 15 Uje ley de, ich shuu sepyẽr erze uje oshiyokõr uje ich mɨhnũwo, per kɨmɨjɨ nĩhyok ley ich ye õr pwele otsowepe.
\v 16 Heke õr owich dechɨ Porrosht ahɨr per shɨ par erze uje ye olotiis ɨrpe. Erze uje Porrosht chɨbɨte lahwoso tatɨm Abraham wɨr shɨ pork Porrosht sehe dosɨr oso. Tyenɨj yakaha erze oso uje otãra Abraham. Ye shɨ par erze israel osope uje ye olotiis Porroshtpe hn asa ley de õr ahɨr waa je Moisés chichewkite. Erze uje Porrosht tatɨm ɨre wɨr par erze dihipo kɨnãho toy uje ye olotiis Porroshtpe shɨ õr ɨtso uje Abraham ye lotiis Porrosht petɨkkite. Wɨr shɨ õr ɨtso uje otãra Abraham lɨshɨ heke Abraham wɨchɨ nos eyok poorc.
\v 17 Porrosht ahwoso tata uje Porrosht tatɨm Abraham ɨm: —Tuu dihipo okɨhniya ode nehe uje shɨ õr ɨtso uje otãra owa.— Heke Porrosht chɨbɨte shɨ ɨtso uje otãra Abraham. Wɨchɨ uu Porrosht pisht uje ye Abraham lotiispe. Wɨchɨ uje ɨshɨm topo õr ɨkɨrĩt, hn nos shiyokõr wɨr kuche uje wapkite ich nĩhyok.
\v 18 Abraham ɨrãhta ich ebɨr heke ye õr ĩjɨrsh per Abraham shish ye lotiis Porroshtpe uje tatɨm ɨre uje dihipo okɨhniya otãra ɨre pork Porrosht tatɨm ɨrkite ɨm: —Tuu okɨhniya uje otãra owa nehe.—
\v 19 Abraham shuu deyuwo tɨsɨ̃r uje ich yej terɨhɨ uje toy pork ich ta par terɨ̃hɨ syen ãyo per shish ye koswãha Porroshtpe. Shuu deyuwo tɨsɨ̃r uje Sara ich ɨlarpa hn ebɨr per shish ye koswãha Porroshtpe.
\v 20 Ye lotiis Porrosht ahwospe uje chɨbɨte tatɨm ɨrkite hnii pɨkaap. Shɨ ma chɨbɨte uje Porrosht ahwoso tyenɨj yakaha, hn shish nɨna Porrosht.
\v 21 Chɨrahapa uje Porrosht pwele shiyokõr uje tatɨm ɨrkite.
\v 22 Uje ye lotiis Porroshtpe shuu ɨtsorz ich Porrosht chɨbɨte uje tyenɨj ɨshɨ ɨr hnɨtewɨhɨ dahɨr hn shuu ɨr owich de dahɨr.
\p
\v 23 Uje Porrosht shuu ochichew lahwoso uje tyenɨj ɨshɨ Abraham ɨr hnɨtewɨhɨ dahɨr ich ye duhu odichewpe shɨ par Abraham.
\v 24 Shuu ochichew par eyok toy. Tyenɨj ɨshɨ par eyoklo toy uje ye yotiislo Porrosht uje shuu eyok Ɨrhĩch Jesús tokolɨhɨ erze topo õr ahɨrkite.
\v 25 Wɨchɨ Jesús uje oshuu oshuu toy par uje ɨshɨ eyok hnɨtewɨhɨ Porrosht ahɨr pork yiyokõrlo uje ich mɨhnũwo. Porrosht shuu ɨkpokite uje nos ɨshɨ eyok hnɨtewɨhɨ Porrosht ahɨr.
\c 5
\s Jesús ɨshɨ oso õr hnɨtewɨhɨ Porrosht ahɨr.
\p
\v 1 Titɨm olak uje eyok Ɨrhĩch Jesucristo ɨshɨ eyok hnɨtewɨhɨ Porrosht ahɨr ich shuu Porrosht ehet kɨɨsɨhɨ eyoklo shɨ pork ye yotiis ɨrpe.
\v 2 Heke Cristo shuu Porrosht kahnɨr eyoklo pork nĩhyok ye eyok hnɨtew chɨhɨ ɨre ahɨrpe shɨ pork ye yotiis ɨrpe. Ich eyok ayla uje yɨrahalo uje deeych yet nehe hn shuu eyok ɨluu ɨtso Porrosht ɨr ɨluuta hn yebuhulo ɨre ahɨr.
\v 3 Ye shɨ eyok ayla yuhu ɨtsorz. Eyok ayla toy uje kuche mɨhnũwo tɨ̃r eyoklo pork yɨrahalo uje erze kuche mɨhnũwo shɨ tɨ̃r eyok par ma shuu eyok ukurbosh par uje ma eyok ewenta erze kuche.
\v 4 Uje shish ma eyok ewenta ich shuu eyok ɨluu ma om ɨtso uje Porrosht sahmũr. Uje eyok ɨluu om ɨtsorz ich shuu yɨrahapa uje Porrosht ahwoso shish yakaha.
\v 5 Yelɨj sẽhi lahwoso heke ye duhu yɨpooklope pork Porrosht chɨbɨte Dechɨbich eyok aho uje shuu yɨrahalo uje Porrosht sahmũr pishɨ eyok.
\p
\v 6 Antkite hn eyok hnɨtew de Porrosht ahɨr pork nĩhyok uje yeẽk pwele ɨshɨ. Uje terɨhɨ ese ɨshɨrĩtkite uje ich om hn Cristo toy par uje ɨshɨ oso õr hnɨtewɨhɨ Porrosht ahɨr pork nos oshiyokõr uje ich mɨhnũwo.
\v 7 Nĩhyok yeẽk uje ɨshɨmɨhɨ ɨre par uje oshuu oshuu toy par uje ye oduhu yet uje shish shiyokõr asa ley waa je Moisés chichewkite. Per kɨmɨjɨ sehe oduhu oduhu toy ese yet uje ɨluu om kɨmɨjɨ yeẽk chɨhɨ uje sahmũr ɨre hn ɨshɨmɨhɨ ɨre par uje masaha owich shuu oshuu ɨre oshuu toy
\v 8 per Porrosht sowa eyok uje ich sahmũr pishɨ eyok shuu ɨtsorz. Uje ehn yiyokõrlo kuche mɨhnũwo ich Porrosht shuu Cristo toy par uje ɨshɨ eyok hnɨtewɨhɨ dahɨr.
\v 9 Heke ele ahle ich ye eyok hnɨtew chɨhɨ Porrosht ahɨrpe pork Cristo tooho krus eeych. Ɨr armɨsta noshɨ par uje ɨshɨ eyok hnɨtewɨhɨ Porrosht ahɨr. Ich ũrpa uje Cristo shish sosɨr eyok par uje ye Porrosht depyẽr eyok nehe hn nɨmchaha eyok urhuta bahluta ehet.
\v 10 Ich ɨmeheeych uje ɨtsorz pork uje ehn eyok Porrosht ɨmãhoni ich shuu Deyjɨt tooho krus eeych par uje shuu Porrosht ehet kɨɨsɨhɨ eyok. Ele ahle ich Porrosht ehet kɨɨsɨhɨ eyok heke ich ũru uje eyok tyenɨj yebuhulo Porrosht ahɨr nehe pork Cristo ɨkponi hn takashɨm eyoklo.
\v 11 Ye shɨ erzepe. Eyok ayla toy pork Porrosht wɨchɨ eyok Porrosht, pork eyok Ɨrhĩch Jesucristo shuu Porrosht ehet kɨɨsɨhɨ eyoklo.
\s Adán shuu mɨhnũwo de ɨ̃rmo hn Cristo shuu ɨkɨrĩt de Porrosht ahɨr.
\p
\v 12 Eseekite uje ɨ̃rmo tenit ich nĩhyok ye latɨk toy, per shɨ hnakɨrbich nohmɨra shuu erze kuch mɨhnũwo tɨ̃r ɨ̃rmo, heke nos oso tyenɨj otoy pork nos oshiyokõr uje ich mɨhnũwo.
\v 13 Ehn yahpaa Moisés dichew asa leykite ich shish erze kuche mɨhnũwo de nãhu ɨ̃rmo. Per kɨmɨjɨ nĩhyok ye ley chɨhɨpe ich ye õr pwelpe uje otata uje oyuwe ley pork nĩhyok.
\v 14 Uje Adán lɨshɨ de nehech terɨhɨ uje Moisés lɨshɨ de ich shish otoy shɨ ɨtso uje oyuwe ley, per ye oniyokõrpe ese kuchɨt mɨ̃hnt uje Adán shiyokõr. Adán sohmɨra uje shiyokõr kuche dich hn Cristo sohmɨra uje shiyokõr kuche dich toy uje tɨrẽt iyehe Adán nẽr.
\v 15 Per ese uje Cristo ɨshɨmɨhɨ oso ich kɨnaha hn ese uje Adán shuu tɨ̃r oso ich kɨnaha toy. Ese uje Adán shiyokõrkite shuu nos oso tyenɨj otoy, per ese uje Porrosht shiyokõrkite sosɨr oso okɨhniya pork ese hnakɨrbich uje ɨshɨ õr hnɨtewɨhɨ Porrosht ahɨr wɨchɨ Jesucristo hn ese uje shiyokõr ye bahatɨkɨsh.
\v 16 Ese kuchɨt mɨ̃hnt uje ese hnakɨrbich shiyokõrkite wɨchɨ kɨnaha, hn ese uje ich ɨhɨ̃rt uje Porrosht ɨshɨmɨhɨ eyok wɨchɨ kɨnaha. Adán iyuwe uje Porrosht tata heke shuu Porrosht sepyẽr oso shuu otɨ̃r urhuta bahluta ehet nehe per Porrosht sehe dosɨr oso hn ye duhu bahatɨkɨsh. Oso oshiyokõr kuche mɨhnũwo ich kɨhniya per wɨchɨ ɨshɨ erze oso õr hnɨtew.
\v 17 Shɨ ese kuchɨt mɨ̃hnt nohmɨra uje ese hnakɨrbich shiyokõrkite ɨchii shuu nos oso otoy, per ich ũrpa uje erze uje ye olotiis Porroshtpe ich Porrosht nos perdonar õr. Ye duhu bahatɨkɨsh pork Jesucristo wɨchɨ hnakɨrbich uje shiyokõr uje ich om heke shuu õr ɨkɨrĩt de uje yelɨj nɨhna ɨre.
\p
\v 18 Ese kuchɨt mɨ̃hnt uje Adán shiyokõr wɨchɨ uje shuu nos otɨ̃r urhuta bahluta ehet nehe, per ese uje ich ɨhɨ̃rt uje Jesucristo shiyokõr par uje sosɨr erze oso uje ye olotiis ɨre ich ɨshɨ õr hnɨtewɨhɨ Porrosht ahɨr hn shuu nos õr ɨkɨrĩt de Porrosht ahɨr.
\v 19 Adán ye niyokõrpe uje Porrosht tatɨm ɨre heke shuu nos oso oshiyokõr uje mɨhnũwo, per Jesús wɨchɨ uje nos shiyokõr uje Porrosht tatɨm ɨre heke shuu oso okɨhniya uje nĩhyok õr hnɨtewɨhɨ Porrosht ahɨr.
\v 20 Asa ley waa je Moisés chichewkite shuu ɨmeheeych uje nos oshiyokõr uje ich mɨhnũwo pork nos oyuwe erze ley per Porrosht shɨ shuu ma ɨmeheeych uje sosɨr oso.
\v 21 Erze kuche mɨhnũwo uje oshiyokõr wɨr shuu otoy hn tyenɨj seya õr urhuta bahluta ehet nehe, per Porrosht ich sahmũr pishɨ oso heke eyok Ɨrhĩch Jesucristo ɨshɨ oso õr hnɨtewɨhɨ dahɨrkite par uje shuu õr ɨkɨrĩt de uje yelɨj nɨhna ɨre kɨmɨjɨ ye olotiis ɨrpe.
\c 6
\s Porrosht aabo tyenɨj oym oshiyokõr uje mɨhnũwo.
\p
\v 1 ¿Je yiyokõrlo latɨkpo? ¿Je ma om yesh yiyokõrlo uje mɨhnũwo par uje yuhu ma ɨmeheeych uje Porrosht dosɨr eyok?
\v 2 Ye ompe uje yiyokõrlo yuhulo ɨtsorz. Eyok uje yomsahalo par eyok Porrosht aabo ich shɨ ɨtso uje yɨtɨlo pork ich ye yiyokõrlope erze uje ich mɨhnũwo. Uje eyok ɨtso erze topo ich ye ompe uje yiyokõrlo erze kuche mɨhnũwopo.
\v 3 ¿Je ye erahalope nos wɨr erze uje oshuu otohɨrm ɨre pork wɨr ye olotiis Jesucristope wɨr shɨ õr ɨtso uje otoy hn õya Jesús uje tokite?
\v 4 Uje otohɨrm eyok ich shɨ ɨtso uje yɨtɨlo hn ochihitsɨm eyok yukwĩya Cristo uje ochihitsɨm ɨre. Cristo ɨr Deych chɨ̃ra lakɨrbo shuu ɨkpo tokolɨhɨ erze topo õr ahɨr, hn uje otohɨrm eyok uje ochiyuhu eyok awɨt uut ich shɨ ɨtso uje eyok ɨkpo hn eyok ɨkɨrĩt ich ahle.
\p
\v 5 Kɨmɨjɨ shɨ ɨlo uje yɨtɨ hn ochihitsɨm eyok yukwĩya Cristo yuhu ɨtsorz heke ich shɨ ɨtso uje yukwĩya Cristo uje ɨkpo pork tyenɨj eyok ɨkpo nehe.
\v 6 Yɨrahalo uje erze eyok ɨluu ɨler uje de eyok aho par uje shuu yiyokõrlo uje ich mɨhnũwo wɨr shɨ ɨtso uje ĩya Cristo uje tooho krus eeych par uje Cristo chiyuhu wɨr eyok aho. Heke ye erze kuche mɨhnũwo dii eyok delohope,
\v 7 pork uje yeẽk toy ich ye erze kuche mɨhnũwo dii delakɨhɨpe.
\p
\v 8 Kɨmɨjɨ shɨ ɨlo uje yɨtɨ yukwĩya Cristo uje toni ich ye yotiis uje tyenɨj eyok ɨkpo nehe hn yebuhu Cristo ahɨr.
\v 9 Yɨrahalo uje Porrosht shuu Cristo ɨkponi tokolɨhɨ erze topo õr ahɨr hn ich yelɨj toypo petɨk nehe pork ich nĩhyok uje yeẽk pwele shuu toypo.
\v 10 Uje Cristo tokite ich nos ɨshɨ eyok hnɨtew pork yiyokõr uje ich mɨhnũwo per ich ye toypo petɨk nehe. Ele ahle ɨr ɨkɨrĩt de shɨ par shiyokõr uje Porrosht sahmũr.
\v 11 Olak ɨtspo tyenɨj uhu olak ɨlo erze topo pork wɨr ich ye oniyokõrpe uje mɨ̃hnɨk, heke ele ahle ich olak ɨkɨrĩt de shɨ par uje ahakõrlo uje Porrosht sahmũr pork ye otiislo Jesucristope.
\p
\v 12 Heke ye ompe uje uhulo erze kuche mɨhnũwo yakaha olak uhulo ɨtso uje wɨr uu olak yɨnsɨro hn shuu olak eyuwo tɨsɨ̃r par ahakõrlo uje mɨhnũwo.
\v 13 Ye asɨmlo olak ɨkiyo erze kuche mɨhnũwo par uje shiyokõr. Shɨ tyenɨj asɨmlo olak Porrosht uhu olak ɨlo yeẽk uje toy hn ɨkpo shɨ par uje shiyokõr uje Porrosht sahmũr. Asɨmlo olak ɨkiyo Porrosht par uje shiyokõr uje ɨre sahmũr.
\v 14 Ye ompe uje eylo erze kuche mɨhnũwo olak yɨnsɨroho par uje chɨpa olak pork erze ley ye dii olak delohope. Shɨ Porrosht wɨchɨ uje sosɨr olak.
\s Shish oso õr yɨnsɨro de kɨmɨjɨ Porrosht o kɨmɨjɨ kuche mɨhnũwo.
\p
\v 15 Titɨm olak. ¿Yiyokõrlo latɨkpo? ¿Je om uje yiyokõrlo erze kuche mɨhnũwo pork ye ley nontew eyokpe, hn shish Porrosht perdonar eyok? Ye ompe uje yiyokõrlo yuhulo ɨtsorz.
\v 16 Ich erahalpa, kɨmɨjɨ asɨmlo olak yeẽk par uje wɨchɨ uu olak ɨrhĩch ich tokole uje olak ɨr yɨlo par uje ahakõrlo uje ɨre sahmũr. Heke uje ahakõrlo erze kuche mɨhnũwo ich olak erze kuche mɨhnũwo ɨr yɨlo hn erze kuche mɨhnũwo tyenɨj shuu atɨlo. Per kɨmɨjɨ asɨmlo olak Porrosht hn ahakõrlo uje ɨre sahmũr ich erze uje ich om uje ahakõrlo wɨr tyenɨj seya olak Porrosht ahɨr nehe.
\v 17 Ich tɨkɨnshɨp Porrosht par olak pork uje wapni erze kuche mɨhnũwo wɨr uu olak yɨnsɨro, per ele ahle ich ahakõrlo uje ich om uje oshiyokorãha olakni hn ye uhu olak aho yũhɨrshpe.
\v 18 Ele ahle ich ye erze kuche mɨhnũwo dii olak delohope per amsahalo par eey wɨchɨ olak ɨhɨrtɨ̃hɨ Porrosht hn olak ɨr yɨlo.
\v 19 Uje tɨkitkẽr olak ich shɨ teẽt erze ahwoso uje olak erahalo. Kɨmɨjɨ tiita kɨnaha ich ye erahalope. Wapkite asɨmlo olak erze kuche mɨhnũwo par uje ahakõrlo hn shish ahakõrlo uje ich ma mɨhnũwo, per ele ahle ich asɨmlo olak par uje ahakõrlo uje ich om hn olak Porrosht ɨr yɨlo.
\v 20 Wapkite shɨ olak erze kuche mɨhnũwo ɨr yɨlo. Erze uje ich om ich ye uhulo jukur par uje ahakõrlo.
\p
\v 21 Uje ahakõrlo erze kuche mɨhnũwo uje ich uhurc ¿je erzlo latɨkpo? Erze kuche mɨhnũwo uje ahakõrlo shɨ shuu apooklo nehech shuu atɨlo.
\v 22 Ele ahle Jesucristo chiyuhu olak erze kuche mɨhnũwo par uje ye wɨr dii olak delohope hn shuu olak Porrosht ɨr yɨlo. Uje olak Porrosht ɨr yɨlo ich shuu ahakõrlo uje ɨre sahmũr. Uje uhurc nehe ich olak ɨkɨrĩt de uje yelɨj nɨhna ɨre.
\v 23 Uje terɨhɨ ese deeych uje onɨshii erze uje shish oshiyokõr uje ich mɨhnũwo ich otserz ese bahat uje seya õr urhuta bahluta ehet, per ese uje Porrosht ɨshɨmɨhɨ eyok wɨchɨ ɨkɨrĩt uje yelɨj nɨhna ɨre pork ye yotiis eyok Ɨrhĩch Jesucristope.
\c 7
\s Pablo sɨteẽta tɨmcharrza uje ɨr abich toy.
\p
\v 1 Pɨshɨbo watsaklo, shɨ titɨm olak uje olak israel oso uje erahalo erze ley uje Moisés chichewkite. Erahalo uje erze ley wɨr shɨ par erze uje ich yesh õr ɨka, ye par topope.
\v 2 Shɨ tɨteẽta, kɨmɨjɨ tɨmcharrza abich chɨhɨ hn iim par ĩhi yet ahɨr ich iyuwe asa ley, per kɨmɨjɨ ɨr abich toy hn wate ĩhi yet ahɨr ich ye sowe asa leype.
\v 3 Heke kɨmɨjɨ ye ɨr abich toy hn shɨ ĩhi yet ahɨr ich wate torãha dabich per kɨmɨjɨ wate abich toy ich pwele ĩhi yet ahɨr. Ich ye sowe asa leype pork ye torãha dabichpe.
\v 4 Pɨshɨbo watsaklo, shɨ eyok ɨtso wate pork uje yapurlo Cristo par uje ɨshɨ eyok hnɨtewɨhɨ Porrosht ahɨrni ich shɨ ɨtso uje yɨtɨlo, heke ye erze ley dii eyok delohope hn pwele yomsaha par yet ɨr yɨlo. Ele ahle ich eyok Cristo ɨr yɨlo. Wɨchɨ uje ɨkponi. Eyok ɨr yɨlo par uje yiyokõrlo uje Porrosht sahmũr, pork shɨ eyok ɨtso erze pohɨr uje ich om heke shish ɨr ee de uje ich om.
\v 5 Uje ehn yahpaa yomsaha par uje eyok Porrosht aabo ich shish yahmũr uje mɨhnũwo. Uje yunt uje erze ley tata uje ye ompe uje yiyokõr kuche uje ich mɨhnũwo, ɨchii sehe eyok prowa par yiyokõr, hn erze kuch mɨhnũwo wɨr uje shuu oso otoy hn seya õr urhuta bahluta ehet.
\v 6 Ele ahle ich shɨ ɨtso uje yɨtɨ heke ye erze ley dii eyok delohope. Ich eyok ɨkɨrĩt ahle de hn Porrosht Ɨchɨbich de eyok aho heke tyenɨj yiyokõr uje ɨre sahmũr, ye erze ley dii eyok delohope uje Moisés chichewkite.
\s Pablo tata uje mɨhnũwo de ɨre ehet uje sehe dii ɨr delakɨhɨ.
\p
\v 7 Titɨm olak. ¿Yiita latɨkpo? ¿Je om uje yiitɨlo uje Porrosht ɨr ley ich mɨhnũ? Ye ompe uje yiitɨlo yuhulo ɨtsorz. Kɨmɨjɨ nĩhyok ley ich ye tɨkɨrehepe uje mɨhnũwo. Kɨmɨjɨ nĩhyok ley ich ye tɨkɨrehepe uje tobɨta kuche ich tiyokõr uje ich mɨ̃hnɨk pork Porrosht ley tata ɨm: —Ye abɨta kuche.—
\v 8 Uje tukunt uje erze ley tata uje ye ompe opota kuche ɨchii tobɨta kuche ich kɨhniya. Kɨmɨjɨ nĩhyok ley erze kuche mɨhnũwo wɨr shɨ ɨtso topo pork nĩhyok yeẽk chɨraha uje ich mɨhnũwo.
\v 9 Uje ehn yahpaa tɨkɨrehepe uje erze ley tata ich pɨkɨrĩt de, per uje tɨkɨrahani uje erze ley tata ich shuu ɨmeheeych uje yok tɨkiyuwe. Tɨkɨraha toy uje yok tyenɨj tɨkɨtɨ pork tiyokõr uje ich mɨhnũwo.
\v 10 Erze ley tata uje tyenɨj tiyokõr par uje terz pɨkɨrĩt uje yelɨj nɨhna ɨre, per shɨ shuu ɨmeheeych uje tyenɨj tɨkɨtɨ.
\v 11 Pɨluuta mɨhnũ. Wate uje sehnyẽr yok pork shuu tɨkiyuwe erze ley, heke tyenɨj tɨkɨtɨ.
\v 12 Per nos wɨr Porrosht ɨr ley wɨr tãra ɨre. Kal nohmɨr uje Porrosht chɨbɨte wɨr shɨ tãra ɨre, hn shuu oso oshiyokõr uje ich om hn sepyẽr erze uje oyuwe. Kal ley uje Porrosht chɨbɨte wɨr ich om,
\v 13 per erze uje ich om ¿je wɨr duhu tɨkɨtɨ?
\p Ye duhu tɨkɨtɨpe. Shuu ɨmeheeych uje tiyokõr kuche mɨhnũwo. Shɨ erze kuche mɨhnũwo uje tiyokõr wɨr uje tyenɨj shuu tɨkɨtɨ. Erze ley ich om. Shuu ɨmeheeych uje tiyokõr uje ich mɨhnũwo pisho.
\v 14 Yɨrahalo erze ley shɨ tãra Porrosht, per yok shɨ yok ɨ̃rmo os hn shɨ ɨtso uje yeẽk chiwãha yokɨhɨ erze kuche mɨhnũwo par uje tomsaha par uje erze kuche mɨhnũwo wɨr uu yok ɨrhĩch.
\v 15 ¿Ɨnaapo heke shish tiyokõr erze uje ye tahmũrpe? Ye tiyokõrpe uje tahmũr per tiyokõr erze uje ye tahmũrpe.
\v 16 Uje tiyokõr uje ye tahmũrpe ich tuu ɨmeheeych uje erze ley ich om pork ley tata toy uje ich mɨ̃hnɨk erze uje ye tahmũrpe,
\v 17 heke ich ye yokpe uje tiyokõr erze mɨhnũwo. Shɨ erze kuche mɨhnũwo uje de pehet wɨr uje shuu tiyokõr,
\v 18 per yok tɨkɨraha uje nĩhyok erze uje ich om uje de pɨluuta ɨlarrza ehet. Sehe tiyokõr uje ich om per ye yok pwelpe.
\v 19 Ye tiyokõr erze uje ich om uje sehe tiyokõr. Shɨ tiyokõr erze kuche mɨhnũwo uje ye tahmũrpe par uje tiyokõr.
\v 20 Kɨmɨjɨ tiyokõr erze uje ye tahmũrpe heke ich ye yokpe uje tiyokõr. Shɨ asa pɨluuta ɨlarrza wate uje shuu tiyokõr.
\p
\v 21 Heke tɨkɨraha uje kuchẽrk de pehet pork uje sehe tiyokõr uje ich om ich mɨhnũwo dechɨ. Wate pɨluuta ɨlarrza uje shuu tiyokõr mɨ̃hnɨk.
\v 22 Yok pɨluuta ahle shuu tahmũr tiyokõr uje Porrosht sahmũr.
\v 23 Tɨkɨraha uje kuche kɨnãho de yok pork sɨtak erze uje Porrosht sahmũr uje yok sehe tiyokõr. Erze kuche mɨhnũwo uje de yok wɨr chii yok delakɨhɨ.
\v 24 Heke yok ɨtso hnakɨrbich uje ɨljaabɨkpa. ¿Yeẽkpo uje pwele chiyuhu yokɨhɨ asa pɨluuta mɨhnũta uje de yok uje chii yok delakɨhɨ?
\v 25 Ich tɨkɨnshɨp Porrosht pork eyok Ɨrhĩch Jesucristo wɨchɨ uje chiyuhu yokɨhɨ asa pɨluuta ɨlarrza. Ele ahle tɨkɨraha uje yok Porrosht yɨlak shɨ par tiyokõr uje ɨre sahmũr. Uje tokoym tuu peyuwo tɨsɨrɨ̃hɨ Porrosht ich tiyokõr tuu yok ɨtso oso yewo hn erze kuche mɨhnũwo uje de pɨluuta ɨlarrza wɨr uje chii yok delakɨhɨ.
\c 8
\s Ich om oshuu Porrosht Ɨchɨbich iyeebe hn oyehe nẽr.
\p
\v 1 Nos wɨr uje ye olotiis Jesucristope wɨr uje ye otɨ̃r urhuta bahluta ehet nehe.
\v 2 Porrosht Ɨchɨbich ɨshɨm õr ɨkɨrĩt uje yelɨj nɨhna ɨre pork ye olotiis Jesucristope, hn chiyuhu õr par uje erze kuche mɨhnũwo ye dii õr delohope. Erze kuche mɨhnũwo seya oso urhuta bahluta ehet nehe.
\v 3 Kɨmɨjɨ yiyokõr uje erze ley tata uje Moisés chichewkite ich eyok ɨkɨrĩt de uje yelɨj nɨhna ɨre per ye eyok pwele yiyokõrpe, heke Porrosht sosɨr eyok hn shuu Deyjɨt tɨrẽt par uje ɨshɨ eyok hnɨtewɨhɨ dahɨr. Shuu Cristo shũrha per ye niyokõrpe uje mɨ̃hnɨk mahn oso oshiyokõr. Wɨchɨ chiyuhu eyokɨhɨ erze kuche mɨhnũwo par uje ye wɨr dii eyok delohope.
\v 4 Erze ley uje Moisés chichewkite wɨr ich om. Uje yɨbɨte uje yuhu Porrosht Ɨchɨbich iyeebe hn yiyehe nẽr ich yiyokõr uje erze ley tata, per kɨmɨjɨ shɨ yiyokõr uje shɨ eyok yahmũr ich ye yiyokõrpe uje erze ley tata.
\p
\v 5 Nos wɨr oso uje shish oshuu deyuwo tɨsɨrɨ̃hɨ erze kuche uje de nãhu ɨ̃rmo ich shish oshiyokõr erze mɨhnũwo uje õr ɨre otsahmũr, per nos wɨr oso uje oshuu deyuwo tɨsɨrɨ̃hɨ uje Porrosht Ɨchɨbich sahmũr ich shɨ oshiyokõr uje ɨre sahmũr.
\v 6 Uje shɨ oshuu deyuwo tɨsɨrɨ̃hɨ erze kuche uje de nãhu ɨ̃rmo ich erze mɨhnũwo uje de nãhu ɨ̃rmo tyenɨj seya õr urhuta bahluta ehet nehe, per erze uje shɨ oshuu deyuwo tɨsɨrɨ̃hɨ uje Porrosht Ɨchɨbich sahmũr ich õr ɨkɨrĩt de uje yelɨj nɨhna ɨre hn õr aho kɨɨs.
\v 7 Nos wɨr uje shɨ oshuu deyuwo tɨsɨrɨ̃hɨ erze kuche uje de nãhu ɨ̃rmo wɨr Porrosht ɨr ɨmãho pork ye onahmũrpe oniyokõr uje Porrosht ɨr ley tata, hn kɨmɨjɨ õr prowa oniyokõr uje erze ley tata ich ye õr pwelpe.
\v 8 Nos wɨr uje shish oshiyokõr erze kuche mɨhnũwo uje de nãhu ɨ̃rmo wɨr ye õr pwelpe oniyokõr uje Porrosht sahmũr.
\v 9 Kɨmɨjɨ ũru uje Porrosht Ɨchɨbich chɨhɨ olak aho ich ye ahakõrlope erze olak ɨluu ɨler. Shɨ ahakõrlo uje Porrosht Ɨchɨbich sahmũr. Nos wɨr erze uje ye Porrosht Ɨchɨbich chɨhɨ õr ahope wɨr ye Porrosht aabope,
\v 10 per uje Cristo de olak aho ich olak ɨchɨbiyo ɨkɨrĩt de pork Jesús ɨshɨ olak hnɨtewɨhɨ Porrosht ahɨrkite. Kuche mɨhnũwo de nãhu ɨ̃rmo heke Porrosht chɨbɨte uje nos oso tyenɨj otoy, heke eyok yũhurrza tyenɨj toy nehe.
\v 11 Porrosht shuu Jesucristo ɨkponi chɨ̃ra Dechɨbich par uje tokolɨhɨ erze topo õr ahɨr. Kɨmɨjɨ Porrosht Ɨchɨbich chɨhɨ olak aho ich Porrosht tyenɨj shuu Dechɨbich shuu olak yũhurrza ɨkpo nehe ɨtso Cristo uje ɨkponi.
\p
\v 12 Pɨshɨbo watsaklo, heke titɨm olak. Ye uhu erze olak ɨluu ɨler dɨrok olak par uje ahakõrlo uje sahmũr.
\v 13 Kɨmɨjɨ shish ahakõrlo uje olak ɨluu ɨler sahmũr ich tyenɨj atɨlo, per kɨmɨjɨ ahakõrlo uje Porrosht Ɨchɨbich sahmũr ich uhulo erze olak ɨluu ɨler shɨ ɨtso uje toy pork ye ahakõrlope uje sahmũr, heke olak ɨkɨrĩt de.
\v 14 Nos wɨr erze uje oshuu Porrosht Ɨchɨbich iyeebe hn oyehe nẽr wɨr Porrosht aabo.
\v 15 Porrosht ye duhu olak ɨlo uje olak shɨ yeẽk ɨr yɨlo uje ich atɨlɨlpa. Porrosht shuu amsahalo par olak ɨr aabo pork ich ũru uje eyok Porrosht aabo pisho. Yɨbiilo Porrosht yuhulo ɨtsorz ɨm: —Dii Porrosht,—
\v 16 pork Porrosht Ɨchɨbich tatɨm eyok ɨchɨbiyo uje eyok Porrosht aabo.
\v 17 Ich ũru uje eyok Porrosht aabo, heke erze Porrosht kushjãro uje de ɨre ahɨr wɨr par eyok toy shɨ ɨtso uje wɨr par Cristo toy pork shish eyok ewenta erze kuche mɨhnũwo uje tɨ̃r eyok shɨ pork ye yotiis Cristope. Uje ich terɨhɨ uhurc nehe ich eyok owich ɨhɨ̃rtpa de Cristo ahɨr.
\s Porrosht tyenɨj nɨshii ɨ̃rmo nehe.
\p
\v 18 Heke titɨm olak uje erze kuche mɨhnũwo uje yesh tɨ̃r eyokɨhɨ nãhu ɨ̃rmo ye yɨteẽta erze uje ich ɨhɨ̃rtso uje de wahacha poõrc. Wɨr uje Porrosht tyenɨj sowa eyok nehe.
\v 19 Heke nos wɨr uje Porrosht shiyokõrkite ich tarãha uje Porrosht chɨbɨte laabo õr orhõta nehe.
\v 20 Porrosht sajɨr ɨ̃rmo ɨkiyokite heke ye ɨlope uu ɨ̃rmo tenit. Shiyokõr shuu ɨtsorz pork ɨre sehe niyokõr duhu ɨlorz. Ye niyokõrpe uje ich ma om par ɨ̃rmo per deeych yet nehe hn Porrosht nɨshiipo.
\v 21 Nos wɨr kuche uje de nãhu ɨ̃rmo ich nos sɨhna ɨre, per deeych yet nehe hn Porrosht nɨshiipo par uje ich ye nɨhna ɨrpe. Shish tyenɨj de nehe shɨ ɨtso wɨr Porrosht aabo.
\v 22 Yɨrahalo uje nos wɨr kuche shish sɨhna ɨre per wɨr shɨ ɨtso oso uje ɨhnakosh uje ewenta nehech ele ahle shɨ ɨtso asa tɨmcharrza ewenta uje ɨr ijɨt tabɨta nehech shũrha.
\v 23 Eyok ɨtspo yiyem ese deeych pork Porrosht Ɨchɨbich de eyok aho. Wɨchɨ webich os uje ɨshɨmɨhɨ eyokni hn yehe kuche yewo de uje tyenɨj ɨshɨmɨhɨ eyok. Ich eyok aho ɨhnakosh uje ich yɨtɨrãha ese deeych uje Porrosht chɨbɨte eyok orhõta uje eyok ɨr aabo, hn shuu eyok yũhurrza ɨkpo hn shuu ahle.
\v 24 Yɨraha uje eyok owich de Porrosht ahɨr heke shish yiyem par uje yɨtɨ̃r ɨre ahɨr. Uje yumo erze kuche ich ye yiyempe pork eyok dechɨ. Nĩhyok yeẽk uje shish iyem erze kuche uje de ɨre ahɨr,
\v 25 per eyok yesh yiyem erze uje ye yumpe, hn shɨ yɨnta nehech terɨhɨ ese deeych nehe.
\p
\v 26 Uje yiyem yuhu ɨtsorz hn erze uje tɨ̃r eyok ich ye eyok pwele ewentpe hn ye yɨrahape latɨkpo uje ich ma om par uje eyok orar yapur Porrosht ich Porrosht Ɨchɨbich takashɨm eyok hn orar par eyok. Ɨr ahwoso ich shɨ ɨtso oso õr ɨhna heke nĩhyok yeẽk pwele tata uje Porrosht Ɨchɨbich tatɨm Porrosht.
\v 27 Porrosht shish teychɨm oso õr aho kɨmɨjɨ om o kɨmɨjɨ ye ompe. Wɨchɨ chɨraha Dechɨbich ɨr eyuwo pork uje Porrosht Ɨchɨbich sapur Porrosht par nos wɨr ɨr aabo ich shish sapur uje Porrosht sahmũr.
\s Porrosht aabo tyenɨj otserz erze mɨhnũwo nehe.
\p
\v 28 Titɨm olak. Yɨrahalo uje nos wɨr kuche uje tɨ̃r eyoklo uje yahmũrlo Porrosht ich Porrosht shish shuu tokole uje ich om par eyoklo nehe. Porrosht chiihla eyoklo par uje yiyokõrlo uje ɨre sahmũr.
\v 29 Uje ehn yahpaa Porrosht niyokõr ɨrmõkite ɨchii chɨraha yeniipo uje tyenɨj omasaha par ɨr aabo nehe. Heke Porrosht chɨbɨtkite uje ich uhurc nehe hn ɨr aabo õr ɨluu tyenɨj tokole ɨtso Deyjɨt ɨr ɨluuta, heke ɨr Ijɨt wɨchɨ webich os hn deshɨbo hn nanɨme ode ich okɨhniya.
\v 30 Erze uje Porrosht chɨbɨtkite uje õr ɨluu tokole ɨtso Cristo ɨr ɨluuta nehe wɨr uje Porrosht chiihla õr, hn erze uje chiihla õr wɨr uje shuu Cristo ɨshɨ õr hnɨtewɨhɨ dahɨr. Erze uje ɨshɨ õr hnɨtew wɨr uje shuu õr owich de dahɨr.
\p
\v 31 Erze uje titɨm olakɨke ich ɨhɨ̃rt pisho. Ye latɨk pwele sontew uje Porrosht sosɨr eyok, heke ye latɨk pwele uje sontew eyok par uje ye yɨtɨ̃r ɨre ahɨr nehe.
\v 32 Porrosht ye narhak Deyjɨtpe. Ɨshɨm osokite par uje wɨchɨ nos ɨshɨ eyok hnɨtewɨhɨ Porrosht ahɨr, heke tyenɨj nos ɨshɨmɨhɨ eyok erze kuche nehe shuu ɨtso uje ɨshɨm Deyjɨt toy.
\v 33 Ye latɨk pwele denunsya erze uje Porrosht chiihla õr pork Porrosht wɨchɨ uje ɨshɨ õr hnɨtewɨhɨ dahɨr.
\v 34 ¿Yeẽkpo uje pwele tata uje eyok tyenɨj yɨtɨ̃r urhuta bahluta ehet nehe? Jesucristo ye tatpe duhu ɨlorz pork wɨchɨ uje tokite par uje ɨshɨ eyok hnɨtewɨhɨ dahɨr. Porrosht chiyuhu Cristo erze topo õr ahɨr hn ele ahle sakaha Porrosht waãchta pork wɨchɨ ich dich. Wɨchɨ shish sapur Porrosht par eyok.
\v 35 ¿Yeẽkpo uje pwele shuu Cristo iim uje sahmũr eyok? Kɨmɨjɨ mɨhnũwo tɨ̃r eyok, ¿je wɨchɨ noym eyok? Ye noym eyokpe. Kɨmɨjɨ kuchẽrk masaha eyok uje ich dospa, o kɨmɨjɨ oniyokõr mɨhnɨkɨ̃hɨ eyok pork ye yotiis ɨrpe, o kɨmɨjɨ sewɨt nẽhi eyok, o kɨmɨjɨ nĩhyok ye eyok ɨshuwɨ̃rsh, o kɨmɨjɨ kuchẽrk sehe dishew eyok uje ich yarhakpa, o kɨmɨjɨ yeẽk duhu eyok duhu yɨtɨ, ¿je wɨchɨ noym eyok? Wɨchɨ ye noym eyokpe uje sahmũr eyok.
\v 36 Porrosht ahwoso tata uje yeẽk tatɨm Porrosht shuu ɨtsorz ɨm: —Shish ode uje sehe oduhu õryok oduhu oyɨtɨ pork ye oyotiis owape. Oshuu õryok ɨtso obeje uje ohnoy par uje sehe oduhu.— Wɨr uje Porrosht ahwoso tata shuu ɨtsorz.
\v 37 Uje nos wɨr kuche tɨ̃r eyok ich shish yerz pork Porrosht sahmũr eyok hn sosɨr eyok.
\v 38 Tɨkɨraha uje ye latɨk pwele shuu Porrosht iim uje sahmũr eyok. Uje oshuu eyok oshuu yɨtɨ ich shish sahmũr eyok. Uje yesh eyok ɨka nĩhyok kuchẽrk uje pwele shuu Porrosht iim eyok, hnii erze ɨr anjele, hnii erze ɨchɨbiyo mɨhnũwo, hnii kuchẽrk uje de hn uje de nehe, hnii erze uje õr ukurbo deyo de,
\v 39 hnii erze uje de porĩt, hnii erze uje de hnɨmich uut pisht, hnii nos wɨr kuche yewo uje Porrosht shiyokõr ye pwelpe uje shuu Porrosht iim uje sahmũr eyok. Ɨmeheeych uje Porrosht sahmũr eyok pork shuu eyok Ɨrhĩch Jesucristo toy hn ɨshɨ eyok hnɨtewɨhɨ dahɨr.
\c 9
\s Porrosht chiihla israel oso.
\p
\v 1 Ye tokotiis Cristope heke erze uje titɨm olak ich ũru, ye tehnyẽr olakpe. Porrosht Ɨchɨbich shuu peyuwo chɨraha toy uje ich ũru
\v 2 uje yok dosdarakpa. Deeych hn dɨhlak shish peyucha pɨhnapso ich tukuuna.
\v 3 Sehe tuu nos pɨhnapso omasaha par Porrosht aabo heke par yok ich ma om kɨmɨjɨ tɨkitokolɨhɨ Cristo ɨr hme hn tɨtɨ̃r urhuta bahluta ehet nehe kɨmɨjɨ uje tiyokõr tuu ɨtsorz ich tuu nos pɨshɨbo hn nos pɨnɨme omasaha par Porrosht aabo. Erze pɨshɨbo uje titɨm olak wɨr pɨhnapse uje sehe tuu omasaha par Porrosht aabo.
\v 4 Wɨr israel oso. Wɨr uje Porrosht chiihla õr par ɨr aabo. Porrosht debuhu õr ahɨrkite, hn chɨbɨte lahwoso uje shish tyenɨj takashɨm õr nehe. Porrosht ɨshɨm õr erze ley uje Moisés chichewkite, hn Porrosht shuu oshuu loshɨpo par uje oteeychãha ɨre hn shish chɨbɨte lahwoso uje tyenɨj shuu Cristo tãra õr.
\v 5 Erze israel oso otãra uu ɨr porokkite Jacob ɨr aabo, hn Cristo tãra õr ɨre. Wɨchɨ uje nos tɨbey erze kuchehe lekɨtiyo. Sehe tuu nos oteeychãha ɨre. Ich om uje oniyokõr oduhu ɨlorz.
\p
\v 6 Titɨm olak uje Porrosht ahwoso ye tata lekushiĩpe. Nos wɨr israel oso otãra ɨr porokkite Jacob uje iich yet otsɨɨ Israel, per Porrosht chɨbɨte shuu kɨnaha. Ɨre chɨbɨte uje shɨ nos wɨr uje ye olotiis ɨrpe wɨr israel oso pisho,
\v 7 hn nos wɨr uje otãra uu õr porokkite Abraham, ye nos õr israel oso pishope pork yewo otsotiis ɨre. Porrosht tatɨm Abrahamkite ɨm: —Shɨ Isaac aabo wɨr uje tiihla õr.—
\v 8 Heke ich ɨmeheeych, nos wɨr uje otãra Abraham wɨr ye nos Porrosht aabope. Shɨ erze uje ye olotiis Porroshtpe wɨr uje Porrosht chɨbɨte lahwoso par shuu omasaha par ɨr aabo.
\v 9 Porrosht tatɨm Abraham lahwoskite shuu ɨtsorz ɨm: —Uje terɨhɨ ese ãyt yet nehe hn takaashpo hn tuu pahwoso yakaha heke Sara ijɨt shũrha.—
\v 10 Ye shɨ erzepe uje Porrosht tata, per uje ehn eyok porokkite Isaac ɨrãhta Rebeca hmɨker ɨr aabo õr arãho
\v 11 hn uje ehn yahpaa erze ɨr aabo oshũrha ich ɨr aabo ye oniyokõrpe uje om hn uje mɨ̃hnɨk, per Porrosht chiihla nohmet heke shuu ɨmeheeych uje shɨ chiihla uje sahmũr pork ye diihla ese uje shiyokõr kuchẽrk pork ye niyokõr latɨk.
\v 12 Heke tatɨm Rebeca ɨm: —Ese eyjɨt webich osht tyenɨj shiyokõr ese eyjɨt shakaharc ɨr ɨbiyo nehe.—
\v 13 Porrosht ahwoso tata shuu ɨtsorz ɨm: —Tahmũr Jacob per tɨkɨtak Esaú.—
\p
\v 14 ¿Je om uje yiita uje Porrosht shiyokõr uje mɨ̃hnɨk? Ye ompe uje yiita yuhu ɨtsorz
\v 15 pork Porrosht tatɨm Moisés ɨm: —Tokosɨr erze uje sehe tokosɨr õr hn tukuuna uje ich õr losuhlaabo erze uje sehe tukuuna.—
\v 16 Heke Porrosht sosɨr erze uje ɨre sehe dosɨ̃r õr, hn ye niyokõrpe uje oso sehe oduhu niyokõr o kɨmɨjɨ oniyokõr kuchẽrk par uje sehe oduhu shiyokõr.
\v 17 Porrosht ahwoso tata uje tatɨm erze egipto oso õr rey ɨm: —Tɨbɨte owa par rey hn tiyokõr kucherkɨ̃hɨ owa par uje tɨbɨte orhõta uje pukurbo de par uje nos oso uje ode ɨ̃rmo lekɨtiyo odɨraha uje yok de hn otatehe yok lekɨtiyo.—
\v 18 Heke ich ɨmeheeych uje Porrosht sosɨr erze uje sehe dosɨr õr hn shuu wɨr õr hu kata erze uje sehe duhu õr hu kata.
\v 19 Heke atɨmlo yok on: —¿Ɨnaapo heke Porrosht sɨtak õryok pork nĩhyok yeẽk pwele sontew uje Porrosht sehe niyokõr?—
\v 20 Owa yeẽkpo sham heke owãha Porrosht on: —¿Ɨnaapo heke ahakõr uhu ɨtsorz?— Je om uje kobɨt je pwele chiilehet tatɨm ese uje shiyokõr ɨre ɨm: —¿Ɨnaapo ahakõr yok uhu ɨtsorz?—
\v 21 Ese uje shiyokõr ese kobɨt ɨre pwele shiyokõr uje ɨre sahmũr. Shiyehe wate katuta shiyokõr kobɨt uje ich ɨhɨ̃rtpa hn shiyokõr kobɨt yetpo par uje ochɨ̃ra obiyo.
\v 22 Kɨmɨjɨ Porrosht nahmũr ich pwele chɨbɨte orhõta uje ɨr ukurbo de hn ich sɨtak erze uje oshiyokõr mɨhnũwo per shɨ ewenta õr hn hneta õr nehech otɨ̃r urhuta bahluta ehet nehe
\v 23 pork sehe duhu daabo odɨrahapa uje ɨre ich dichpa hn chuuna uje õr losuhlaabo hn sosɨr õr hn nɨshii õr par uje otɨ̃r ɨre ahɨr nehe.
\v 24 Erze Porrosht aabo wɨr eyoklo, per ye shɨ eyokpe uje eyok israel oso. Wɨr dihipo kɨnãho toy.
\v 25 Porrosht ahwoso uje profeta Oseas lɨshɨ chichewkite tata shuu ɨtsorz ɨm: —Porrosht sole:
\p “Tiihla erze oso nehe uje ye tiihla õr petɨkni, hn erze uje ye tahmũr õr petɨkni ich tahmũr õr nehe.”
\v 26 Shiyehe erze oso uje Porrosht tatni ɨm: “Ye tiihla olakpe,” deeych yet nehe hn oso otata uje wɨr õr Porrosht aabo, Porrosht uje yelɨj nɨhna ɨre.— Wɨr uje Oseas chichewkite.
\p
\v 27 Profeta Isaías lɨshɨ eyucha erze israel osokite ɨm: —Erze israel oso tyenɨj okɨhniya nehe, shɨ õr ɨtso hnɨmich ukult uje de onoota bahluta wɨrc, per wɨr shɨ sohmɨramo uje tyenɨj otaachɨ̃hɨ Porrosht ahɨr nehe,
\v 28 pork uje terɨhɨ ese deeych nehe uje Porrosht sepyẽr erze oso uje ode nãhu ɨ̃rmo shɨ ɨtso uje ɨr ahwoso tata hn nos tyenɨj ɨr ahwoso yakaha shɨchish.—
\v 29 Profeta Isaías lɨshɨ tat toy uje Porrosht tyenɨj sepyẽr õr nehe ɨm: —Eyok Ɨrhĩch ich ukurbo deyo de. Kɨmɨjɨ ye noymɨhɨ eyok nohmɨramo par uje ye yɨtɨ ich shɨ eyok ɨtso erze duwo Sodoma hn Gomorra oso uje Porrosht ye noymɨhɨ õr latɨk.—
\s Israel oso otsotiis Cristo.
\p
\v 30 Heke titɨm olak. ¿Yuhu ɨnaapo uje ɨtsorz? Erze uje ye õr israel osope wɨr ye odukwi Porroshtpe. Ele ahle ich ye olotiispe uje Porrosht shiyokõr par õr ɨre par uje õr owich de ɨre ahɨr,
\v 31 per erze israel oso ochukwi uje õr owich de Porrosht ahɨr heke õr prowa oshiyokõr erze ley uje Moisés chichewkite, per nĩhyok õr owich pork oyuwe erze ley.
\v 32 ¿Ɨnaapo heke ye odishpe ese owich uje de Porrosht ahɨr? Shɨ otsotiis uje Jesucristo ɨshɨ õr hnɨtewɨhɨ Porrosht ahɨr, hn õr prowa oshiyokõr erze ley par uje sehe oduhu lawich chɨhɨ Porrosht ahɨr. Ye onahmũr Jesuspe, heke Jesús wɨchɨ shɨ ɨtso kojach uje shuu õr hnɨte hn shuu õr kay.
\v 33 Porrosht ahwoso tata shuu ɨtsorz ɨm: —Tɨbɨte kojach wahacha dɨt Jerusalén uje iich yet otsɨɨ Sión par uje wɨchɨ shuu õr hnɨte hn shuu õr kay. Cristo wɨchɨ ese kojach. Uje ye olotiis ɨre ich ye opookpe uje otɨ̃r ɨre ahɨr nehe pork õr owich dechɨ.—
\c 10
\p
\v 1 Pɨshɨbo watsaklo, ich tahmũrpa uje erze pɨhnapso israel oso omasaha par Porrosht aabo, heke shish yok orar tapur Porrosht par õr ɨre.
\v 2 Titɨm olak uje õr ɨre ich ochiyuhu ɨre uje oteeychãha Porrosht per ochimehi pork ye odɨrehepe uje Porrosht sahmũr.
\v 3 Ye odɨrehepe uje Porrosht shuu Cristo tɨrẽtkite par toy par ɨshɨ õr hnɨtewɨhɨ Porrosht ahɨr, heke õr prowa oshiyokõr erze ley par uje sehe oduhu Porrosht ehet kɨɨsɨhɨ õr ɨre. Ye Porrosht duhu õr owich chɨhɨ dahɨrpe pork otsotiis uje Jesús shiyokõrni par õr ɨre.
\v 4 Asa ley shuu ochɨraha uje oshiyokõr uje ich mɨhnũwo par uje ye duhu olotiis Jesucristope par uje ɨshɨ õr hnɨtewɨhɨ Porrosht ahɨr, heke nos wɨr uje ye olotiis ɨre ich õr owich de Porrosht ahɨr.
\p
\v 5 Moisés chichewkite shuu ɨtsorz ɨm: —Yeẽk uje shiyokõr erze ley par uje shuu ɨr owich de Porrosht ahɨr ich ye ompe uje iyuwe erze ley.—
\v 6 Per erze uje ye olotiis uje Cristo ɨshɨ õr hnɨtewɨhɨ Porrosht ahɨrni yelɨj oduhu deyuwo tɨsɨ̃r ɨl: —¿Yeẽkpo tyenɨj tɨ̃r poõrc?— Ochɨbɨte uje sehe oduhu yeẽk duhu Cristo sohnɨmich.
\v 7 Hn ye oduhu deyuwo tɨsɨ̃r ɨl: —¿Yeẽkpo ihnɨmich tɨ̃r erze topo õr ɨchɨbiyo owich?— Ochɨbɨte uje sehe oduhu yeẽk diyuhu Cristo õr ahɨr.
\v 8 ¿Õr ahwotiyoho uje shuu õr owich de Porrosht ahɨr? Erahalo erze ahwoso pork wɨr uje athɨlo hn uhulo olak eyuwo tɨsɨ̃r, pork wɨr erze ahwoso uje tanɨmɨrãha titɨm erze oso kɨmɨjɨ ye olotiis Cristo ich ɨshɨ õr hnɨtewɨhɨ Porrosht ahɨr.
\v 9 Tanɨmɨrãha tuu ɨtsorz pork uje yeẽk tata uje Jesús wɨchɨ ɨr Ɨrhĩch hn ye lotiis uje Porrosht shuu Cristo tokolɨhɨ erze topo õr ahɨrni ich ɨr owich de Porrosht ahɨr.
\v 10 Uje yeẽk ye lotiis uje Jesús ɨshɨ ɨr hnɨtewɨhɨ Porrosht ahɨr ich Jesús ɨshɨ ɨr hnɨtewɨhɨ Porrosht ahɨr. Uje tatɨm yewo shuu ɨtsorz ich ɨr owich de Porrosht ahɨr.
\v 11 Porrosht ahwoso tata ɨm: —Ese uje ye lotiis Cristope, uje taachɨ̃hɨ Cristo ahɨr nehe ich ye pookpe pork ɨr owich de.—
\v 12 Eyok Ɨrhĩch ye niyokõrpe kɨnaha par erze israel oso hn niyokõr kɨnaha par erze dihipo kɨnãho. Shuu nos õr ɨtsye pork wɨchɨ uu nos oso õr yɨnsɨrc. Nos sosɨr erze uje otsapur ɨre.
\v 13 Porrosht ahwoso tata ɨm: —Nos wɨr uje otsapur eyok Ɨrhĩch par uje wɨchɨ perdonar õr ich wɨchɨ ɨshɨ õr hnɨtewɨhɨ Porrosht ahɨr.—
\p
\v 14 Kɨmɨjɨ oso olotiis ich ye õr pwelpe par uje otsapur Jesús par uje ɨshɨ õr hnɨtewɨhɨ Porrosht ahɨr. Uje yelɨj onunt uje Jesús ɨshɨ õr hnɨtew ich shish otsotiis pork ye odɨrehepe. Ich ye õr pwele uje onunt kɨmɨjɨ nĩhyok yeẽk tatɨm õr uje Jesús ɨshɨ õr hnɨtew.
\v 15 Kɨmɨjɨ Porrosht ye duhu odo onanɨmɨrãha ɨr ahwoso ich ye õr pwel odope, per Porrosht shuu ohno pork ɨr ahwoso tata shuu ɨtsorz ɨm: —Ich ɨhɨ̃rtpa erze uje ohno hn otsanɨmɨrãha pahwoso otatɨm oso uje Cristo ɨshɨ õr hnɨtewɨhɨ pahɨr par uje shuu pehet kɨɨsɨhɨ õr ɨre.—
\v 16 Per israel oso ich okɨhniya ode uje ochunt hn otsotiis uje Jesús ɨshɨ õr hnɨtew heke Isaías tatɨm Porroshtkite ɨm: —Ɨrhĩche, nos otsotiis erze ahwoso uje titɨm õr ɨre.—
\v 17 Heke shɨ erze uje otẽr wɨr uje õr pwele ye olotiispe, hn wɨr shɨ õr pwele otẽr uje yeẽk sanɨmɨrãha tatɨm õr uje Cristo shiyokõr par õrkite.
\p
\v 18 Titɨm olak, ¿je israel oso onunt uje Cristo shiyokõr par õr ɨre? Ochunt pork Porrosht ahwoso tata shuu ɨtsorz ɨm: —Erze ɨr ahwoso ich nos chũr ɨ̃rmo lekɨtiyo.—
\v 19 Titɨm olak, erze israel oso ¿je ye odɨrehepe? Titɨm olak wap uje Moisés tata uje Porrosht sole: —Tuu dihipo kɨnãho omasaha par paabo, heke olak israel oso abɨtɨlo õr. Tuu dihipo kɨnãho uje õr ɨluu mɨhnũ omasaha par paabo, heke olak israel oso tuu etaklo õr.—
\v 20 Hn Isaías ye tola õrpe. Tatɨm õr ɨm: —Porrosht sole: “Erze uje ye odukwi yok petɨkni ele ahle ich ochish yok, erze uje ye olapur par uje sehe odɨraha yok petɨkni tuu ochɨraha yok.”—
\v 21 Isaías tata ɨm: —Porrosht sole: “Shish tokohɨrmi olak uje olak israel oso per olak ye ahakõrlope uje yok tahmũr hn shish uhu olak hu kata.”—
\c 11
\s Porrosht chiihla israel oso.
\p
\v 1 Ele ahle ich titɨm olak. ¿Je Porrosht noym erze israel oso uje chiihla õrkite? Ye noym õrpe pork yok israelya. Abraham hn ɨr ahnɨmich Benjamín wɨr uu yok poruwo wɨshɨ.
\v 2 Porrosht ye noym erze israel oso petɨkni. Uje ehn yahpaa niyokõr ɨrmõkite ɨchii chiihla õr. Olak erahalo uje Porrosht ahwoso tata uje profeta Elías tatɨm Porroshtkite uje sɨtak erze israel oso ɨm:
\v 3 —Ɨrhĩche, erze israel oso oshuu uu profeta wɨshɨ oshuu otoy, hn otsehnɨmich erze altar uje oso oshuu loshɨpo hn otserũhu par uje oteeychãha owa. Shɨ yok nohmɨra uje yesh tɨkeeychãha owa hn sehe oduhu yok oduhu tɨkɨtɨ toy.—
\v 4 Per Porrosht tatɨm Elías ɨm: —Ye shɨ owa sohmɨrape uje eeychãha yok. Hnakɨrbo ode õr syete mil uje tɨkɨbey õr. Ye olotsa lete nɨmohope erze kojano po uje iich otsɨɨ Baal par uje oteeychãha ochii ɨr porroshtɨhɨ.—
\p
\v 5 Heke nehech ele ahle shish ode uje ye olotiis Porroshtpe. Wɨr uje chiihla õrkite shɨ pork sehe diihla õr.
\v 6 Uje Porrosht chiihla oso par uje ɨshɨmɨhɨ õr owich uje de ɨre ahɨr, ich ye latɨk pwele dish obiyo par uje serz owich Porrosht ahɨr, pork serz kɨnaha hn ɨshɨmɨhɨ kɨnaha, ye ɨlyepe.
\v 7 ¿Latɨkpo uje tokolɨhɨ erze israel oso? Ye odish lawichɨhɨ Porrosht ahɨrpe pork onaha, per erze uje Porrosht chiihla õrkite wɨr uje ochiyey pork õr owich de Porrosht ahɨr. Erze yewo uje ye Porrosht diihla õrpe ye onahmũr oniyokõrpe uje Porrosht sahmũr heke Porrosht shuu õr hu kata.
\v 8 Porrosht ahwoso tata shuu ɨtsorz ɨm: —Porrosht shuu ɨtso uje õhyok kuhɨ̃rt, heke uje oteychɨm ɨchii ye onomope, hn uje ochunt ich ye odɨrehepe. Nehech ele ahle ich shish ɨtsorz.—
\p
\v 9 Rey David lɨshɨ tatɨm Porroshtkite ɨm: —Sehe tuu uhu wɨr õr ahamich tokole shɨ ɨtso trampta uje chishew õr, hn uhu wɨr shɨ ɨtso trampta par uje shiyeru õr, hn uhu wɨr shɨ ɨtso kojach uje shuu õr hnɨte hn shuu õr kay par uje oshɨ labahat pork oshiyokõr uje ich mɨhnũwo.
\v 10 Uhu wɨr õr ɨlo olɨbo par uje ye õr pwele onomo asa trampta, hn shish uhu õr ɨbiyo nẽhi õr par uje õr narhak.— Wɨr uje rey David tatkite.
\s Dihipo kɨnãho omasaha par Porrosht aabo.
\p
\v 11 Heke titɨm olak. Erze israel oso wɨr shɨ ɨtso uje kojach shuu õr hnɨte hn shuu õr kay pork otsotiis Cristo. ¿Je ye õr pwele otsehetpe pork õr ɨre ochimehi? Wɨr õr pwele oyehet. Uje erze israel oso ochimehi ich erze dihipo kɨnãho omasaha par Porrosht aabo par uje oshuu erze israel oso opota õr ɨre.
\v 12 Uje õr ɨre ochimehi ich oshuu dihipo kɨnãho õr ɨtso ɨhɨ̃r deyo pork õr owich de Porrosht ahɨr. Heke uje erze israel oso omasaha par Porrosht aabo nehe ich tyenɨj tokole ɨtso uje erze dihip kɨnãho ich ma õr ɨhɨ̃r deyo.
\p
\v 13 Kuchɨt de uje sehe titɨm olak uje olak dihipo kɨnãho. Porrosht chɨbɨte yok par yok apóstol par uje tɨtɨ̃r erze dihipo kɨnãho. Shish yok narim pɨbiyoho
\v 14 erze pɨhnapso israel oso õr ɨle ɨkɨch par tuu opota erze dihipo kɨnãho par uje nohmɨramo omasaha par Porrosht aabo toy.
\v 15 Uje erze israel oso ochimehi ich Porrosht iim õr, heke erze dihip kɨnãho omasaha par Porrosht aabo. Uje erze israel oso omasaha par Porrosht aabo nehe ich shɨ ɨtso uje õr ɨkpo.
\v 16 Titɨm olak shɨ tɨteẽta. Erze trigo ee uje webich oso ich ochekushu hn oshiyokõr pan hn oshɨmɨhɨ Porrosht heke ich om hn shuu ese erint ɨr masta uje pan tãra ich om toy. Ese uje tɨteẽta wɨr shɨ ɨtso israel poruwo wɨshɨ uje õr webich oso uje Porrosht chiihla õrkite heke Porrosht chiihla erze israel oso uje otãra õr. Tɨteẽta erze israel oso toy. Kɨmɨjɨ odosɨmɨhɨ Porrosht erze pohɨr uro pork ich om heke erze ɨr uke ich om toy.
\p
\v 17 Erze israel oso nohmɨramo wɨr shɨ õr ɨtso erze pohɨr uke uje iich otsɨɨ olivo uje ich ɨhɨ̃r, hn olak uje olak dihipo kɨnãho shɨ olak ɨtso asa pohorrza uke uje ich otsɨɨ olivo uje de hmont ehet. Uje amsahalo par olak Porrosht aabo ich shɨ ɨtso uje yeẽk chobɨrho asa pohorrza uke sohmɨreme waa je ich om. Chekshehe asa pohorrza uke sohmɨreme uje de hmont ehet toy. Chichyẽr asa pohorrza uke asa pohorrza waa je ich om heke asa pohorrza ɨr isho masaha erze uke ahle. Asa pohorrza uke ahle wɨr olak pork amsahalo israel oso õr owich hn erze om uje Porrosht shiyokõr wɨr par olak.
\v 18 Ye ompe uje olak narim olak pork amsahalo erze israel oso õr owich shɨ olak ɨtso pohorrza uke uje ochichyẽr. Kɨmɨjɨ olak narim olak ich tyenɨj olak eyucha uje erze isho ye tãra olakpe par uje ye duhu olak uro kakope. Erze isho shɨ tãra erze uro heke ye duhu olak kakope.
\v 19 Kɨmɨjɨ atɨmlo yet on: —Ochekshehe erze uke par uje yomsaha owich.—
\v 20 Ich ũru uje ochekshehe erze uke hn amsahalo owich. Ochekshehe erze uke pork ye ompe. Wɨr shɨ ɨtso erze israel oso uje otsotiis Cristo. Shɨ pork ye otiislo Cristope heke olak ɨtso erze uke uje ochichyẽr, heke ich ye ompe uje olak narim olak. Shɨ tyenɨj atɨlɨlo Porrosht.
\v 21 Porrosht ye narhak erze ukepe pork wɨr shɨ ɨtso erze israel oso uje otsotiis Cristo. Kɨmɨjɨ otiislo ɨre ich olak ɨtso õr toy, Porrosht tyenɨj ye narhak olak petɨk nehe.
\v 22 Hmeychɨmlo, ode uje shish Porrosht sosɨr õr hn ode toy uje tyenɨj sepyẽr õr nehe. Sepyẽr erze uje otsotiis ɨre per sosɨr olak kɨmɨjɨ shish ye otiislo ɨrpe. Per kɨmɨjɨ otiislo ɨre ich shɨ olak ɨtso pohɨr uke uje ochekshehe oshuu kay.
\v 23 Kɨmɨjɨ erze israel oso onoym deluu hn ye olotiis Porrosht ich Porrosht shuu ocheeshpo omasaha ese ɨr uke owich. Porrosht ukurbo deyo de heke pwele shuu wate pohorrza uke masaha lawichpo.
\v 24 Olak uje ye olak israel osope, shɨ olak ɨtso asa pohorrza uke uje iich otsɨɨ olivo uje de hmont ehet. Ich kwestpa par uje ochichyẽr asa pohorrza uke uje tãra hmont ehet hõr asa pohorrza waa je ich om. Uje shiyehe wate pohorrza uje ochichyẽr ich wantak pork shiyehe wate pohorrza uke.
\s Uje ich uhurc nehe hn Israel oso omasaha par Porrosht aabo toy.
\p
\v 25 Pɨshɨbo watsaklo, sehe tuu erahalpa par uje ye olak narim olak hn ebɨtlo uje olak ma om je erze yewo. Sehe tuu erahalo uje Porrosht sehe niyokõr par erze israel oso nehe uje ye oso yewo odɨrehepe. Porrosht shuu erze israel oso okɨhniya õr hu kata nehech terɨhɨ ese deeych nehe uje nos dihipo kɨnãho uje Porrosht chiihla õrkite omasaha par ɨr aabo.
\v 26 Uje ich uhurc ich nos wɨr israel oso tyenɨj omasaha par Porrosht aabo toy pork Porrosht ahwoso tata shuu ɨtsorz ɨm: —Ese yet uje sosɨr erze israel oso tyenɨj tokolɨhɨ ese dɨt Sión hn chiyuhu erze uje ye onahmũr Porroshtpe. Wɨr israel oso pork otãra Jacob lɨshɨ.—
\v 27 Hn profet yet tata uje Porrosht sole: —Tɨbɨte pahwoso titɨm õr uje tyenɨj yok perdonar erze kuche mɨhnũwo uje oshiyokõr.— Wɨr erze uje Porrosht ahwoso tata.
\p
\v 28 Erze israel oso otsotiis uje Jesús ɨshɨ õr hnɨtewɨhɨ Porrosht ahɨr heke ochii Porrosht namãha, per olak uje olak dihipo kɨnãho ich tokole om par olak pork amsahalo par olak Porrosht aabo. Per Porrosht yesh sahmũr erze israel oso pork chiihla õr hn chɨbɨte lahwoso uje tatɨm uu õr poruwo wɨshkite.
\v 29 Erze uje Porrosht ɨshɨm yelɨj nesɨ̃ra, hn erze uje Porrosht chiihla õr yelɨj noym õr.
\v 30 Wapkite olak uje ye olak israel osope ich ye ahakõrlope uje Porrosht sahmũr, per ele ahle wɨchɨ sosɨr olak pork erze israel oso ye oniyokõrpe uje wɨchɨ sahmũr.
\v 31 Ele ahle erze israel oso ye oniyokõrpe uje Porrosht sahmũr shɨ õr ɨtso olak uje wapkite hn ye ahakõrlope uje Porrosht sahmũr, heke Porrosht sosɨr olak par uje deeych yet nehe hn sosɨr õr toy.
\v 32 Porrosht chɨbɨte orhõta uje nos oso oshiyokõr uje ich mɨhnũwo, heke sehe nos dosɨr õr pork shuu Cristo tooho õr.
\p
\v 33 Porrosht ich ma eykdeyo, hn nos chɨraha erze kuche. Nĩhyok uje yeẽk eyuwo ɨtso ɨre pork uje tata kuche ich nos chiyey, hn nĩhyok uje yeẽk nos chɨraha uje Porrosht shiyokõr.
\v 34 ¿Yeẽkpo uje chɨraha eyok Ɨrhĩch eyuwo? Nĩhyok. ¿Yeẽkpo uje sakɨt ɨre? Nĩhyok.
\v 35 ¿Yeẽkpo uje ɨshɨm Porrosht kuche heke shuu ɨr hnɨtew de ɨre? Nĩhyok.
\p
\v 36 Heke ich ɨmeheeych uje Porrosht ich dich pork Porrosht shiyokõr nos wɨr kuche uje de, hn nos tɨbey. Nos wɨr uje ɨre shiyokõrkite wɨr par shuu ɨre ich dich. Sehe tuu nos oso shish oteeychãha Porrosht. Uje oniyokõr oduhu ɨlorz ich ɨhɨ̃rtpa.
\c 12
\s Tyenɨj oshiyokõr uje Porrosht sahmũr.
\p
\v 1 Pɨshɨbo watsaklo, heke titɨm olak. Porrosht sosɨr eyok shuu ɨtsorz heke tyenɨj asɨmɨhɨlo olak ɨre uje yesh olak ɨka. Enahalo olak par uje shɨ ahakõrlo uje ɨre sahmũr. Heke olak shɨ par ɨre par uje eeychãhalo ɨre. Porrosht sahmũr uje ahakõrlo uhulo ɨtsorz.
\v 2 Ye uhu olak ɨluu ɨlo erze uje ye odɨraha Porroshtpe. Enshii olak eyuwo par uje olak ɨluu tokole ich om. Uje ahakõrlo uhulo ɨtsorz ich ɨmeheeych uje Porrosht sehe duhu ahakõrlo, heke erahalo uje ich om hn erahalo uje Porrosht sahmũr.
\p
\v 3 Porrosht ɨshɨm yok pɨbich uje ich dich heke yok pwele titɨm olak yeẽk. Ye ompe uje ɨre narim ɨre hn duhu deyuwo tɨsɨ̃r uje ɨre ich ma dich hn iyuwe uje Porrosht chɨbɨte ɨre. Porrosht shuu dɨtɨk par shiyokõr debiyo pork ye lotiis ɨrpe. Shɨ tyenɨj shuu deyuwo tɨsɨrɨ̃hɨ debiyo heke ye duhu ɨre ma losuhlaap o kɨmɨjɨ duhu ɨre ma dich.
\v 4 Kal eyok nohmɨra ɨr yũhurrza shɨ nohmɨra per ɨr ɨkiyo ich kɨhniya. Ye ɨr ɨkiyo ɨlyepe.
\v 5 Shɨ eyok ɨtso Cristo ɨr yũhurrza hn ɨr ɨkiyo pork eyok ich eyok kɨhniya per shɨ eyok weeta nohmɨra ɨtso ɨr yũhurrza.
\v 6 Porrosht nos ɨshɨm eyoklo ɨbiyo shuu kɨnãho kɨnãho, ye duhu ɨlyepe. Ɨshɨm eyok debiyo uje sehe duhu yiyokõr. Kɨmɨjɨ dosɨm eyok yeẽk par uje sanɨmɨrãha ɨr ahwoso ich ye sowe uje Porrosht ahwoso tata.
\v 7 Kɨmɨjɨ Porrosht dɨbɨte yeẽk par diákono uje nɨshii iglesya ich nos shiyokõr debiyo shuu tokole om. Kɨmɨjɨ Porrosht dosɨm yeẽk par uje shiyokorãha õr ich tyenɨj shiyokorãha õr.
\v 8 Kɨmɨjɨ Porrosht dosɨm yeẽk erze obiyo par uje duhu yewo oduurapo ich tyenɨj sakɨt õr. Kɨmɨjɨ Porrosht dosɨm yeẽk kuche par uje ɨshɨmɨhɨ yewo ich ye narhak, dosɨm õr. Kɨmɨjɨ Porrosht dosɨm yeẽk par uje tɨbey Porrosht aabo uje ochish obiyo o oteeychãha Porrosht ich tyenɨj chɨbɨte ɨre par uje takashɨm õr. Kɨmɨjɨ Porrosht dosɨm yeẽk erze obiyo par uje sosɨr erze uje õr permo, hn erze uje õr dosdarak hn erze uje õr losuhlaabo ich tyenɨj ɨre ayla uje takashɨm õr.
\s Porrosht aabo tyenɨj otsahmũrye.
\p
\v 9 Titɨm olak. Ich uhulo ũrpa uje ahmũrloye, per etaklopa ahakõrlo erze mɨhnũwo, hn shish ahakõrlo erze uje ich om.
\v 10 Ahmũrlo erze Porrosht aabo yewo pork wɨr olak leshɨbo, hn shish olak narim õr uhulo ɨlo uje ich õr deyo.
\v 11 Ye uhulo patɨm olak. Ye uhulo olak towo, per shish emɨtlo olak par ahakõrlo eyok Ɨrhĩch ɨr ɨbiyo.
\v 12 Shish tyenɨj olak ayla pork erahalo uje olak owich de Porrosht ahɨr, hn shish tyenɨj olak ewenta erze kuche mɨhnũwo uje tɨ̃r olak. Shish tyenɨj olak orar apurlo Porrosht.
\v 13 Akashɨmlo erze Porrosht aabo yewo uje kuche nihyokɨ̃hɨ õr ahɨr. Kɨmɨjɨ Porrosht aap tãra dukuhla hn tekɨrɨhɨ olak yeẽk ich uhulo taakɨhɨ ahuch. Kɨmɨjɨ nĩhyok uje umuhu ich uhulo umuhu ahuch.
\v 14 Eyuhulo olak ahwoso oomoho erze uje oloter olak, ye ajɨ̃rlo õr ɨkiyo.
\v 15 Uje yeẽk ayla ich tyenɨj olak aylɨhɨ ɨre toy. Uje yeẽk yerh ich olak tyenɨj eyerhlo toy.
\v 16 Nos olak uje olak Porrosht aabo ich tyenɨj uhulo olak eyuwo ɨlye, hn ye olak narim olak. Ye ebɨtlo uhu olak ma deyo je erze losuhlaabo pork nos olak ɨtsye, hn ye uhulo olak ɨlo uje olak ma dɨtuwo je erze yewo.
\v 17 Uje yeẽk niyokõr mɨhnɨkɨ̃hɨ olak ich ye eyuhulo olak bahat. Shɨ ahakõrlo uje nos oso ochɨraha uje ich om.
\v 18 Kɨmɨjɨ yeẽk dɨtak olak yeẽk ich tyenɨj uhulo ɨre ehet kɨɨs par uje olak aho kɨɨsɨhɨye. Kɨmɨjɨ wɨchɨ ye nahmũrpe ich shɨ ɨre.
\v 19 Pɨshɨbo watsaklo, uje oniyokõr mɨhnɨkɨ̃hɨ olak ich ye eyuhulo olak bahat. Shɨ moymɨhɨlo Porrosht hme par uje ɨre nɨshii hn sepyẽr õr, pork ɨr ahwoso tata shuu ɨtsorz ɨm: —Eyok Ɨrhĩch sole: “Uje yeẽk niyokõr mɨhnɨkɨ̃hɨ olak ich yok tyenɨj tiyuhu olak bahat.”—
\v 20 Wɨr uje tyenɨj ahakõrlo. Kɨmɨjɨ sewɨt nẽhi olak ɨmehẽt asɨmlo kuchẽrk par tew hn uje iich nẽhi asɨmlo awɨt uhulo doho. Uje ahakõrlo uhulo ɨtsorz ich tyenɨj shuu wɨchɨ pook pork shɨ ahakõrlo omɨhɨ ɨre.
\v 21 Ye eyuhulo olak bahat hn uhulo erze kuche mɨhnũwo derz olak. Shɨ tyenɨj ahakõrlo omɨhɨ erze uje oshiyokõr mɨhnɨkɨ̃hɨ olak heke erzlo erze mɨhnũwo.
\c 13
\p
\v 1 Nos wɨr oso tyenɨj oshiyokõr uje gobierno hn õr bahluwo otatɨm õr. Shɨ Porrosht wɨchɨ uje chɨbɨte par nos oso õr bahluwo ode hn chiihla yeniipo uje omasaha par õr bahluwo.
\v 2 Heke erze uje otsɨtak uje õr bahluwo ode ich otsɨtak erze uje Porrosht chɨbɨte. Uje ye oniyokõrpe uje õr bahluwo otatɨm õr ich erze õr bahluwo tyenɨj otsepyẽr õr.
\v 3 Erze õr bahluwo ye ochɨhɨpe par uje oshuu wɨr otola õr ɨre erze uje oshiyokõr uje ich om. Erze õr bahluwo ode shɨ par uje oshuu wɨr otola õr ɨre erze uje oshiyokõr uje ich mɨhnũwo. Kɨmɨjɨ ye ahmũrlo uje erze õr bahluwo otsepyẽr olak ich tyenɨj ahakõrlo uje ich om. Uje ahakõrlo uje ich om uhulo ɨtsorz ich erze õr bahluwo otsahmũr olak.
\v 4 Porrosht chɨbɨte erze õr bahluwo par uje oshiyokorɨ̃hɨ olak uje ich om, per kɨmɨjɨ ahakõrlo uje ich mɨhnũwo ich tyenɨj atɨlɨlo õr. Õr ukurbo de pork Porrosht chɨbɨte õr par uje otsepyẽr erze uje oshiyokõr uje ich mɨhnũwo.
\v 5 Heke tyenɨj ahakõrlo uje olak bahluwo otatɨm olak par uje ye Porrosht duhu olepyẽr olak, hn par uje eenɨlo uje ahakõrlo uje mɨhnũwo.
\v 6 Eshɨlo gobierno uje ley tata pork Porrosht chɨbɨte erze õr bahluwo par oshiyokõr erze obiyo uje titɨm olakɨke.
\v 7 Erze uje õr ɨbiyo shɨ par õr kobra hnote par gobierno ich tyenɨj eshɨlo õr uje ley tata, hn uje eyuhu hute ich eshɨlo ɨre pork ley chɨbɨte shuu ɨtsorz. Tyenɨj atɨlɨlo erze õr bahluwo.
\p
\v 8 Ye ahakõrlo olak hnɨtewɨhɨ yeẽk. Ese uje shɨ ɨtso hnɨtewta uje de Porrosht aabo wɨchɨ uje tyenɨj otsahmũrye, pork yeẽk uje sahmũr yewo ich nos shiyokõr uje Porrosht ley tata.
\v 9 Porrosht ahwoso tata uje ɨr ley tata shuu ɨtsorz ɨm: —Ye orãha erãhta, hn ye orãha abich, hn ye tuk yewo uhu otoy, hn ye ohɨr. Ye abɨta kuche.— Erze ley hn erze yẽr wɨr shɨ ɨtso erze ahwoso uje tata ɨm: —Ahmũr yewo uhu ɨtso owa uje ahmũr owa.—
\v 10 Uje yeẽk sahmũr yet ich yelɨj shiyokõr mɨhnɨkɨ̃hɨ ɨre, heke shɨ ɨtso uje shiyokõr uje Porrosht ɨr ley tata.
\p
\v 11 Kuchɨt yet de uje tyenɨj ahakõrlo toy. Ich osdeyo uje yomsahaloni par eyok Porrosht aabo per ele ahle yej terɨhɨ ɨshɨrĩt uje Cristo cheeshpo par hnoy eyok nehe. Ese deeych uje cheeshpo nehe ich yej terɨhɨ je uje yomsahaloni par eyok Porrosht aabo, heke ich ye ompe uje olak shɨ ɨtso uje amɨlo hn ye ahakõrlo ɨr ɨbiyope. Heke tyenɨj erɨ̃hɨlo par uje ahakõrlo ɨr ɨbiyo.
\v 12 Ich yej terɨhɨ uje sɨhna ɨre ese ɨshɨrĩt uje oso oshiyokõr uje ich mɨhnũwo shɨ ɨtso uje yej deychole uje Cristo cheeshpo nehe, heke tyenɨj moymlo erze kuche mɨhnũwo uje ahakõrlo pork wɨr shɨ ɨtso uje dɨhlak. Ahakõrlo uje ich om uje Porrosht sahmũr pork uje ahakõrlo uje ich om ich olak shɨ ɨtso luu. Uhu olak ɨlo ohyerptosht uje chɨmɨt ɨre par uje oteye.
\v 13 Olak shɨ olak ɨtso uje deeych heke tyenɨj ahakõrlo uje Porrosht sahmũr. Ye ompe uje etɨ̃rlo õr ahamich uje ich mɨ̃hnɨk, hnii uje uhulo yɨkɨch sẽhi olak, hnii ye ahakõrlo erze kuche mɨhnũwo uje hnakɨrbo hn tɨmcher oshiyokorɨ̃hɨye. Ye ompe uje ahakosloye, hn ye abɨtɨlo kuche.
\v 14 Shɨ tyenɨj uhu olak ɨluu ɨlo eyok Ɨrhĩch Jesucristo ɨr ɨluuta. Ye emɨtlo olak par uje ahakõrlo erze olak ɨluu ɨler uje moymloni.
\c 14
\s Ich ye ompe ochish majamichɨhɨye.
\p
\v 1 Tyenɨj olak ayla uje yeẽk tekɨrɨhɨ olak uje Porrosht aap uje yẽrɨj dɨraha Porrosht ahwoso. Uje ɨre eyuwo tɨsɨ̃r kɨnaha, ye ɨlo uje olak eyuwo tɨsɨ̃r hn ye Porrosht ahwoso tata latɨk ich ye ahakoslo ɨre.
\v 2 Shɨ tɨteẽta kɨmɨjɨ yeẽk dɨraha uje nos wɨr oposo ich om par otew, per yet de uje ye dɨrehepe heke shɨ tew jõro.
\v 3 Ese uje nos tew erze kuche ye ompe uje chɨbɨte uje wɨchɨ ye jukur ese uje ye tepe, hn ese uje ye tew erze kuchepe ich ye ompe uje chish majamichɨhɨ ese uje tew. Ese uje tew erze ẽro hn ese uje ye tepe wɨr Porrosht aabo hn Porrosht sahmũr õr.
\v 4 ¿Owa yeẽkpo par uje ata uje ich mɨ̃hnɨk ese yet ɨr ɨbich? Porrosht wɨchɨ uu ɨr Yɨnsɨrc, ye owape. Porrosht wɨchɨ uje tyenɨj tatɨm kɨmɨjɨ om uje shiyokõr o kɨmɨjɨ ye ompe, heke tyenɨj shiyokõr uje ich om pork eyok Ɨrhĩch ukurbo deyo de par uje takashɨm wɨchɨ.
\p
\v 5 De uje shuu deyuwo tɨsɨ̃r ese deeych nohmet hn shuu ma dich par teeychãha Porrosht je uu daalo yewo, hn yet de uje shuu erze daalo nos ɨtsye. Kal nohmɨr shɨ tyenɨj shuu deyuwo tɨsɨ̃r uje ich om par ɨre kɨmɨjɨ diihla deeych nohmet ich ma dich o kɨmɨjɨ nos diihla, hn ye ompe uje koswãha.
\v 6 Wɨr õr ɨtsye, ochiihla uje õr ɨre otsahmũr par uje oteeychãha Porrosht, heke ich oshuu eyok Ɨrhĩch ich dich erze daalo. Ɨtso ese uje nos tew erze kuche pork shuu eyok Ɨrhĩch ich dich hn nɨna Porrosht. Ese yet uje ye tew ẽrope ich ye tepe heke shuu eyok Ɨrhĩch ich dich toy, hn nɨna Porrosht toy.
\v 7 Heke ich nĩhyok eyok yeẽk uje pwele shiyokõr shuu ɨtso uje ɨre sahmũr pork uje ehn ɨka ich shish tyenɨj shuu Porrosht dich hn uje terɨhɨ ese deeych uje toy ich shish shuu Porrosht dich.
\v 8 Uje yesh eyok ɨka hn uje yɨtɨ shish tyenɨj yiyokõrlo uje eyok Ɨrhĩch sahmũr. Heke shish yishew eyok Ɨrhĩch ɨr ɨbiyo uje yesh eyok ɨka hn uje yɨtɨ,
\v 9 pork Cristo tokite hn ɨkpo par uje wɨchɨ masaha par uu topo õr Ɨrhĩch hn erze uje õr ɨka toy.
\p
\v 10 Heke titɨm olak yeẽk. ¿Ɨnaapo heke chish majamichɨhɨ Porrosht aap yet pork wɨchɨ leshap? Hn olak yet ɨtspo ¿ɨnaapo heke chɨbɨte uje wɨchɨ ye jukur pork wɨchɨ leshap toy? Deeych yet nehe hn nos yɨtɨ̃rlo Porrosht ɨle ɨkɨch ese owich uje teychɨm oso kɨmɨjɨ oniyokõr uje mɨ̃hnɨk o kɨmɨjɨ oniyokõr uje ich om.
\v 11 Porrosht ahwoso tata uje eyok Ɨrhĩch sole: —Ich ũru uje shish yok ɨka hn ich ũru toy uje tyenɨj nos ocha dete hnɨmoho pɨkɨch hn nos oteeychãha yok nehe otata uje yok ich dich.— Wɨr uje Porrosht ahwoso tata,
\v 12 heke kal eyok nohmɨr nohmɨr tyenɨj nos yitɨm Porrosht uje yiyokõrloni.
\p
\v 13 Tyenɨj yukwim uje yishlo majamichɨhɨye pork nos tyenɨj yitɨm Porrosht uje yiyokõrloni yuhu ɨlorz nehe. Ma om yɨbɨte uje ye yiyokõrlo kuchẽrk uje shuu eyok leshɨbich shiyokõr uje ich mɨ̃hnɨk. Uje yuhulo shiyokõr uje mɨ̃hnɨk ich shɨ ɨtso uje yɨbɨte kojach ɨjɨch par uje shuu hnɨte shuu kay.
\v 14 Tɨkɨraha erze uje ye olotiis eyok Ɨrhĩch Jesuspe ich om par otew nos wɨr oposo. Wɨr om per par ɨre uje shuu deyuwo tɨsɨ̃r uje Porrosht ye nahmũr uje ɨr tew ich mɨhnũwo par ɨre tew. Shɨ shuu ɨtso uje Porrosht ahwoso ye jukur.
\v 15 Uje eshɨbich shuu deyuwo tɨsɨ̃r uje Porrosht ye nahmũr uje tew erze kuche hn teychɨm owa uje ew heke tew toy ich shiyokõr uje mɨ̃hnɨk. Uhu eshɨbich tew heke ich ye ahmũr wɨchpe. Ye owa eshɨbich uje ew erze uje shuu ɨre shiyokõr uje mɨ̃hnɨk. Cristo tooho krus eeych par uje ɨshɨ eshɨbich ɨr hnɨtew toy.
\v 16 Erze oposo uje eraha uje ich om per yewo oshuu deyuwo tɨsɨ̃r uje ich mɨhnũwo, ye ew par uje ye odish majamichɨhɨ owa.
\v 17 Par Porrosht aabo ich om par otaak hn oho ye latɨkɨsh, per ich ma ɨhɨ̃rtpa par õr ɨre uje tyenɨj oshiyokõr uje ich om hn oshuu laho kɨɨs hn õr ayla pork Porrosht Ɨchɨbich de õr aho.
\p
\v 18 Erze uje oshiyokõr Cristo ɨr ɨbiyo oshuu ɨtsorz ich Porrosht sahmũr uje oshiyokõr hn nos wɨr oso otsahmũr toy,
\v 19 heke tyenɨj yiyokorɨ̃hɨye erze uje shuu eyok aho kɨɨs hn yakashɨmloye yuhu eyok ɨluu ma ɨtso Cristo ɨr ɨluuta.
\v 20 Ye ompe uje uhu Porrosht ɨbiyo tokole uje ye jukur shɨ pork sehe ew erze kuche. Ich ũru uje nos wɨr oposo ich om par uje otew, per kɨmɨjɨ ew erze uje shuu eshɨbich shiyokõr uje mɨ̃hnɨk ich ahakõr uje mɨ̃hnɨk.
\v 21 Kɨmɨjɨ eshɨbich teychɨm owa uje ew erze kuche ẽro hn tew toy per ɨr eyuwo tɨsɨ̃r uje ye Porrosht nahmũrpe, ich uhu shiyokõr uje ich mɨ̃hnɨk. Ma om uje ye ew erze kuche ẽro hn ye ehe erze wino hn ye ahakõr kuche yewo uje shuu eshɨbich shiyokõr uje ich mɨ̃hnɨk.
\v 22 Owa eraha erze kuche uje ich nos om par uje ahakõr hn par ew hn ehe. Porrosht chɨraha uje ye mɨhnɨ̃kpe par ahakõr, per ye uhu erze yewo oniyokõr pork wɨr ye odɨrehepe. Ese uje ye duhu leshɨbich niyokõrpe uje ich mɨ̃hnɨk shuu ɨtsorz ich ayla pork ehet chuuna uje ye niyokõrpe uje mɨ̃hnɨk.
\v 23 Per ese uje koswãha pork ye dɨrehepe kɨmɨjɨ om o kɨmɨjɨ ye ompe par uje tew erze kuche wɨchɨ shiyokõr uje mɨ̃hnɨk uje tew pork ɨr eyuwo tɨsɨ̃r uje shiyokõr uje ye Porrosht nahmũrpe, per shiyokõr. Nos wɨr kuche uje yeẽk shuu deyuwo tɨsɨ̃r uje Porrosht ye nahmũrpe, uje shiyokõr ich shiyokõr mɨ̃hnɨk.
\c 15
\s Porrosht aabo tyenɨj otakashɨmye.
\p
\v 1 Eyok uje yɨraha uje Porrosht ahwoso tata ich ye ompe uje shɨ yiyokõr uje yahmũr. Tyenɨj eyok ewenta erze uje yẽrɨj odɨrahapa Porrosht ahwoso heke õr koswãha hn ochimehi.
\v 2 Tyenɨj yakashɨm erze uje yẽrɨj odɨraha Porrosht ahwoso par uje ma ye olotiis ɨre. Wɨchɨ ich om par õr ɨre.
\v 3 Cristo ye niyokõrpe uje shɨ ɨre sahmũr per shish shiyokõr uje Porrosht sahmũr. Porrosht ahwoso tata uje Cristo tatɨm Porroshtkite shuu ɨtsorz ɨm: —Erze uje ochiyuhu lahwoso mɨhnuwõho owa ich ochiyuhu lahwoso mɨhnuwõho yok toy.—
\v 4 Nos wɨr Porrosht ahwoso uje profeta poruwo wɨshɨ ochichewkite wɨr par shiyokorãha eyok par uje yɨraha heke eyok ewenta erze kuch mɨhnũwo uje tɨ̃r eyok hn yɨraha uje eyok owich de Porrosht ahɨr.
\v 5 Porrosht wɨchɨ uje shuu eyok ewenta erze kuche uje tɨ̃r eyok hn shuu eyok aho kɨɨs. Sehe tuu Porrosht duhu olak eyuwo ɨlye ɨlo Cristo uje hõr Deych õr eyuwo ɨtsye
\v 6 par uje nos eeychãhalo Porrosht uu eyok Ɨrhĩch Jesucristo ɨr Deych pork ich nos olak eyuwo ɨtsye.
\s Dihipo kɨnãho ochunt Cristo toy.
\p
\v 7 Tyenɨj olak ayla uje wɨr õya olak erze Porrosht aabo uje yẽrɨj odɨraha Porrosht shɨ ɨtso uje Cristo ayla uje amsahalo par olak Porrosht aabo par uje uhulo Porrosht dich.
\v 8 Titɨm olak uje Cristo tɨrẽtni par uje takashɨm erze israel oso par uje sowa õr uje Porrosht ahwoso ich ũru uje chɨbɨte tatɨm eyok poruwo wɨshkite pork Cristo shuu Porrosht ahwoso yakaha uje tatɨm õr.
\v 9 Tɨrẽt toy par uje takashɨm erze dihipo kɨnãho par uje wɨr onɨna Porrosht uje sosɨr õrkite pork ɨr ahwoso tata shuu ɨtsorz ɨm: —Cristo tatɨm Porrosht ɨm: “Tyenɨj tɨkeeychãha owa uje yok dechɨ dihipo kɨnãho õr ehet, hn tɨkeeychɨ teẽt imno par owa nehe.”—
\v 10 Porrosht ahwoso tatpo tatɨm erze dihipo kɨnãhokite ɨm: —Uhu olak ayla hõr wɨr israel oso.—
\v 11 Hn Porrosht ahwoso tatpo shuu ɨtsorz ɨm: —Olak uje olak dihipo kɨnãho, nos eeychãhalo olak Ɨrhĩch, hn sehe duhu nos oso oteeychãha ɨre.—
\v 12 Profeta Isaías tatkite ɨm: —Cristo tyenɨj tɨrẽt nehe. Wɨchɨ tyenɨj tãra Isaí lɨshɨ uu rey David lɨshɨ ɨr deych. Ese Cristo tyenɨj tɨbey erze dihipo kɨnãho nehe, heke erze dihipo kɨnãho ochɨraha uje õr owich de Porrosht ahɨr pork ye olotiis Cristope.— Wɨr uje Porrosht ahwoso tata.
\v 13 Porrosht wɨchɨ uje shuu erahalo uje olak owich de ɨre ahɨr. Sehe tuu Porrosht duhu nos olak ayla hn duhu olak aho kɨɨs pork ye otiislo ɨrpe. Uje Porrosht niyokõr duhu ɨlorz ich ɨr Ɨchɨbich shuu erahalo uje ich ũru uje olak owich de Porrosht ahɨr.
\p
\v 14 Pɨshɨbo watsaklo, ye tokotiispe uje olak ɨle om. Tɨbɨte uje nos erahalo ahakõrlo uje Porrosht sahmũr hn erahalo uje akɨtloye.
\v 15 Erze ahwoso uje tuu ochichew ochɨbɨte asa hutɨta ich meytii doso uje titɨm olak hn par uje olak eyucha pork Porrosht chɨbɨte yok erze pɨbiyo par uje titɨm olak tuu ɨtsorz.
\v 16 Yok Jesucristo ɨr ɨbɨk par uje titɨm erze dihipo kɨnãho ɨr ahwoso. Erze Porrosht ɨbiyo uje ɨshɨm yok par tiyokõr wɨr uje titɨm õr uje Jesucristo ɨshɨ õr hnɨtewɨhɨ Porrosht ahɨrkite. Heke yok shɨ ɨtso israel oso õr saserdote uje oshɨm Porrosht loshɨpo armɨstakite hn erze dihipo kɨnãho uje titɨm õr Cristo wɨr shɨ õr ɨtso erze loshɨpo uje tokosɨmɨhɨ Porrosht. Wɨchɨ uje Porrosht ich sahmũrpa uje tiyokorãha erze dihipo kɨnãho pork Porrosht Ɨchɨbich nɨshii õr.
\p
\v 17 Yok narim Jesucristo pork shuu pɨbiyo tokole ich om uje Porrosht ɨshɨm yok par uje tiyokõr.
\v 18 Shɨ tiita uje Cristo shiyokõrni pork wɨchɨ uje shuu pɨbiyo tokole ich om. Uje titɨm erze dihipo kɨnãho tuu ɨtsorz hn uje omo uje tiyokõr ich ye olotiis ɨrpe hn oshiyokõr uje Porrosht ahwoso tata.
\v 19 Porrosht Ɨchɨbich ich ukurbo deyo de. Wɨchɨ uje takashɨm yok par uje shuu tiyokõr erze kuche uje ye latɨk pwele shiyokõr par uje ye olotiis Cristope. Heke titɨm erze dɨt Jerusalén oso hn nos wɨr oso yewo uje ode lekɨtiyo nehech takaachɨ̃hɨ ese hnɨmich Iliria titɨm õr uje Jesucristo ɨshɨ õr hnɨtewɨhɨ Porrosht ahɨrkite,
\v 20 pork tɨbɨte uje shɨ tɨtɨ̃r erze oso uje ye odɨraha uje Cristo ɨshɨ õr hnɨtewɨhɨ Porrosht ahɨrkite. Ye tɨtɨ̃r erze hnɨmope uje yewo otsanɨmɨrãha ɨr ahwosni pork wɨr ich ye pɨbiyope.
\v 21 Porrosht ahwoso tata shuu ɨtsorz ɨm: —Erze uje ye odɨraha Cristope wɨr uje tyenɨj ochɨraha nehe. Erze uje yelɨj onunt uje Cristo shiyokõrkite par õr ɨre wɨr uje tyenɨj ochɨraha nehe.—
\s Pablo sehe do tɨ̃r dɨt Roma.
\p
\v 22 Heke titɨm olak. Nĩhyok ye yok tyempɨ̃rsh petɨkni par uje tekɨrɨhɨ olak,
\v 23 per ele ahle ich nos tɨhna pɨbiyoho lɨka, hn ich osdeyo uje sehe takaha tekɨrɨhɨ olakni,
\v 24 heke sehe tekɨrɨhɨ olak wap uje olak de dehet pehet uje takaha tɨtɨ̃r España nehe. Uje takaachɨ̃hɨ olak ahɨr nehe hn tiyakaha olak ahɨr tuu pɨkaap ich sehe tuu akashɨmlo yok uje tɨtɨ̃r ese hnɨmich España.
\p
\v 25 Wap sehe takaha tɨtɨ̃r Jerusalén. Takahii hnote par tokosɨm erze Porrosht aabo uje odechɨ,
\v 26 pork erze Porrosht aabo uje ode erze hnɨmo Macedonia hn Acaya otakɨsho deyuwo hn ochɨbɨte hnote par otakashɨm erze Porrosht aabo uje õr losuhlaabo uje odechɨ dɨt Jerusalén.
\v 27 Wɨr ich õr ayla uje otakashɨm erze Porrosht aabo uje õr losuhlaabo. Erze uje ich om uje Porrosht ɨshɨmɨhɨ erze israel oso uje shuu Cristo ɨshɨ õr hnɨtewɨhɨ dahɨr ich tɨ̃r erze dihipo kɨnãho toy, heke ich om uje erze dihipo kɨnãho oshuu cheeshɨ otakashɨm erze israel oso toy.
\v 28 Uje tokosɨm erze hnote erze Porrosht aabo nehe uje Porrosht aabo yewo oshɨm õr ich sehe takaha tɨtɨ̃r España. Sehe tiyakaha olak ahɨr wap ese dehet pehet.
\v 29 Tɨkɨraha uje tekɨrɨhɨ olak nehe ich Cristo shuu tokole uje ich ompa.
\p
\v 30 Pɨshɨbo watsaklo, shɨ pork Jesucristo wɨchɨ uu eyok Ɨrhĩch hn pork Porrosht Ɨchɨbich shuu yahmũrloye ich tapur olak par uje enaha olak par uje eyok orar yapurlo Porrosht par yok.
\v 31 Yapurlo Porrosht par uje ye wɨr odishew yok hn oduhu yok oduhu tɨkɨtɨ erze israel oso uje odechɨ hnɨmich Judea uje otsotiis Cristo. Apurlo Porrosht toy par uje erze ɨr aabo uje ode Jerusalén ich onahmũr erze hnote uje tãra erze dihipo kɨnãho uje tokõhwa par tokosɨm õr,
\v 32 heke kɨmɨjɨ Porrosht nahmũr uje takaachɨ̃hɨ olak ahɨr nehe ich yok aylpa hn tahmũrpa tekɨrɨhɨ olak.
\v 33 Sehe tuu Porrosht uje shuu oso õr aho kɨɨs takashɨm olak. Ich ɨhɨ̃rtpa uje ɨtsorz.
\c 16
\s Pablo ɨshɨm Porrosht aabo õr saludo.
\p
\v 1 Sehe tuu erahalo uje Febe wate eyok nanap. Wate Porrosht aap hn dyakɨnyarɨ̃hɨchɨs ese dɨt Cencrea.
\v 2 Sehe tuu olak ayla uje wate taachɨ̃hɨ olak ahɨr nehe pork ich om uje nos akashɨmlo Porrosht aabo hn wate eyok Ɨrhĩch ɨr aap. Uje kuchẽrk nihyokɨ̃hɨ ahɨr ich akashɨmlo wate pork wate shish takashɨm Porrosht aabo hn takashɨm yok toy.
\p
\v 3 Tokosɨm Prisca hn Aquila õr saludo. Wɨr pihyẽro uje oshiyokõr Jesucristo ɨr ɨbiyo ɨtso yok.
\v 4 Wɨr otakashɨm yokni par uje ye erze yewo oduhu yok oduhu tɨkɨtɨ nehech sehe oduhu õr toy. Ye shɨ yokpe uje tɨkɨna õr, nos wɨr Porrosht aabo uje otakɨsho lawichɨhɨ lekɨtiyo uje õr dihipo kɨnãho onɨna õr toy.
\v 5 Tokosɨm saludo erze Porrosht aabo uje otakɨsho lawichɨhɨ Prisca hn Aquila õr ihyuch. Tokosɨm saludo Epeneto. Wɨchɨ ich tahmũr. Wɨchɨ webich os uje ye lotiis Cristope uje dechɨ hnɨmich Asia.
\v 6 Tokosɨm María saludo. Wate shish shiyokõr Cristo ɨr ɨbiyoho olak ahɨr.
\v 7 Tokosɨm saludo Andrónico hn Junias. Wɨr pɨhnapso uje ode pahɨr karsel ehetni. Wɨr apóstole uje oshiyokõr debiyo ich otsɨhnew. Uje ehn yahpaa tomsahani par yok Porrosht aap ɨchii õr ɨre omasaha par Porrosht aabo.
\v 8 Tokosɨm saludo Ampliato toy. Tahmũr ɨre pork ye lotiis eyok Ɨrhĩchpe.
\v 9 Tokosɨm saludo Urbano. Wɨchɨ ĩya yokni uje oyiyokõr Cristo ɨr ɨbiyo. Tokosɨm saludo Estaquis. Ich tahmũr ɨre.
\v 10 Tokosɨm saludo Apeles toy. Ich ɨmeheeych uje ɨre ye lotiis Cristope. Tokosɨm saludo nos wɨr Aristóbulo ɨr iiso toy.
\v 11 Tokosɨm ese pɨhnapsɨt Herodión saludo toy. Tokosɨm saludo toy nos wɨr Narciso ɨr iiso uje ye olotiis eyok Ɨrhĩchpe.
\v 12 Tokosɨm saludo Trifena hn Trifosa. Wɨr ochish eyok Ɨrhĩch ɨr ɨbiyo. Tokosɨm saludo Pérsida. Wate shish chish eyok Ɨrhĩch ɨr ɨbiyo. Nos wɨr Porrosht aabo otsahmũr wate.
\v 13 Tokosɨm saludo Rufo toy. Wɨchɨ ma ye lotiis eyok Ɨrhĩchpe. Tokosɨm waa ɨr lata saludo toy. Wate shɨ ɨtso uje yok patɨ.
\v 14 Tokosɨm saludo Asíncrito, hn Flegonte hn Hermes hn Patrobas hn Hermas hn nos wɨr Porrosht aabo uje ode õr ahɨr.
\v 15 Tokosɨm saludo Filólogo toy hn Julia hn Nereo hn waa nanɨmicha toy. Tokosɨm Olimpas saludo toy hn nos wɨr uje ye olotiis Cristo uje odechɨ õr ahɨr toy.
\v 16 Nos tyenɨj etɨloye. Nos wɨr uje ye olotiis Cristope uje otakɨsho lawichɨhɨ lekɨtiyo oshɨm olak saludo.
\p
\v 17 Pɨshɨbo watsaklo, titɨm olak. Eychɨmlo erze oso uje shish sehe odehek olak hn sehe oduhu olak yewo oniyokõr uje ich kɨnaha, ye ɨlo erze ahwoso uje oshiyokorãha olakni. Moymlo wɨr, ye meylo õr
\v 18 pork ye oniyokõr eyok Ɨrhĩch Jesucristo ɨr ɨbiyope. Shɨ oshiyokõr uje õr ɨre otsahmũr. Otata lahwoso uje ich ɨhɨ̃rt pisho shɨ par otsehnyẽr erze uje ye odɨrehepe.
\v 19 Nos oso ochɨraha uje olak dechɨ dɨt Roma shish ahakõrlo uje ich om uje Porrosht sahmũr heke ich uhulo yok aylpa, hn sehe tuu olak eykdeyo heke ahakõrlo uje ich om hn ye ahakõrlo uje ich mɨhnũwo.
\v 20 Kɨmɨjɨ olak eykdeyo ɨlorz ich Porrosht uje shuu oso õr aho kɨɨs ich shuu ɨtso uje arãhalo Satanás hnɨmich. Sehe tuu eyok Ɨrhĩch Jesucristo dosɨr olak.
\p
\v 21 Timoteo ɨshɨm olak saludo. Wɨchɨ ĩya yok uje oyiyokõr Cristo ɨr ɨbiyo. Lucio hn Jasón hn Sosípater oshɨm olak saludo toy. Wɨr yok pɨhnapso.
\v 22 Yok Tercio uje tichew Pablo ahwoso tɨbɨte ana hutɨta. Tokosɨm olak saludo pork yok Porrosht aap toy.
\v 23 Gayo ɨshɨm olak saludo toy. Yok Pablo. Gayo shuu tiyakaha dahuch. Wɨchɨ shish shuu nos Porrosht aabo otakɨsho lawichɨhɨ dahuch hn oteeychãha Porrosht. Erasto ɨshɨm olak saludo toy. Wɨchɨ tesorero uje tɨbey ese dɨt ɨr hnote. Cuarto ɨshɨm olak saludo toy. Wɨchɨ Porrosht aap toy.
\v 24 Sehe tuu eyok Ɨrhĩch Jesucristo nos takashɨm olak. Ich ɨhɨ̃rtpa uje ɨtsorz.
\s Pablo narim Porrosht.
\p
\v 25 Titɨm olak. Porrosht ukurbo deyo de par uje takashɨm olak. Tanɨmɨrãha Porrosht ahwoso hn titɨm oso tuu ɨtsorz. Titɨm oso toy uje Jesucristo ɨshɨ õr hnɨtewɨhɨ Porrosht ahɨrkite. Wap Porrosht ye duhu odɨrehepe
\v 26 per ele ahle ich shuu ochɨraha. Erze ahwoso uje profeta poruwo wɨshɨ ochichewkite wɨr uje Porrosht shuu nos erze dihipo kɨnãho ochɨraha uje Cristo shiyokõrkite par uje ye olotiis ɨre hn oshiyokõr uje ɨre tata. Porrosht yelɨj nɨhna ɨre.
\v 27 Wɨchɨ shɨ sohmɨra hn ich eykdeyo. Sehe tuu nos ye olotiis uje Jesucristo ɨshɨ õr hnɨtewɨhɨ Porrosht ahɨrkite heke oshuu Porrosht ich dich. Ich ɨhɨ̃rtpa uje oniyokõr ɨr ahwoso oduhu ɨlorz.