\id 1CO Chamacoco NT - Paraguay 2000 (web 2013)
\h 1 Corintios
\toc1 1 Corintios
\toc2 1 Corintios
\toc3 1Co
\mt1 1 Corintios
\c 1
\s Pablo ɨshɨm Porrosht aabo õr saludo.
\p
\v 1 Yok Pablo. Porrosht chiihla yok par tomsaha par yok Jesucristo ɨr apóstol shɨ pork sahmũr chiihla yok shuu ɨtsorz. Eyok leshɨbich de pahɨr iich otsɨɨ Sóstenes.
\v 2 Tichew ana hutɨta par tokosɨm olak uje olak Porrosht aabo uje ebuhulo ese dɨt Corinto. Porrosht chiihla olak par ɨr aabo pork Jesucristo ɨshɨ olak hnɨtewɨhɨ Porrosht ahɨrkite. Chiihla olak par uje ye ahakõrlo uje ich mɨhnũwo ɨtso uje chiihla erze yewo uje ode lekɨtiyo uje ye olotiis eyok Ɨrhĩch Jesucristope. Wɨchɨ wɨr õr Ɨrhĩch hn eyok Ɨrhĩch toy.
\v 3 Sehe tuu Porrosht uu eyok Deych hn eyok Ɨrhĩch Jesucristo odosɨr olak hn oduhu olak aho kɨɨs.
\s Cristo sosɨr õr.
\p
\v 4 Sehe titɨm olak uje shish tɨkɨna Porrosht par olak pork Porrosht sosɨr olakni pork ye otiislo Jesucristope.
\v 5 Porrosht shuu olak ɨkɨrĩt ɨhɨ̃rtpa uje olak de nãhu ɨ̃rmo pork wɨchɨ shuu olak dɨtuwo par anɨmɨrãhalo ɨr ahwoso hn shuu olak dɨtuwo par nos erahalo uje ich ũru
\v 6 pork uje oyitɨm olak Cristoni ich ahmũrlo heke amsahalo par Porrosht aabo. Erze om uje yesh ahakõrlo ich shuu ɨmeheeych uje olak Porrosht aabo.
\v 7 Porrosht nos shuu olak dɨtuwo par uje ahakõrlo ɨr ɨbiyo uje ehn yesh anemlo ese deeych uje eyok Ɨrhĩch Jesucristo cheeshpo nehe.
\v 8 Eyok Ɨrhĩch Jesucristo wɨchɨ uje tɨbey olak nehech terɨhɨ uhurc, hn ese deeych uje etɨ̃rlo ɨre ahɨr nehe ich ye olak hnɨtew chɨhɨ Porrosht ahɨrpe.
\v 9 Porrosht shish shuu yakaha uje ɨre tata. Wɨchɨ uje chiihla olak par uje wɨchɨ olak ihyẽrak ɨr ijɨt Jesucristo uu eyok Ɨrhĩch.
\s Ye ompe otsehek ɨre.
\p
\v 10 Pɨshɨbo watsaklo, titɨm olak. Eyok Ɨrhĩch sahmũr uje olak eyuwo ɨtsye pork ye ompe uje ahakosloye hn uhu olak kãra. Shɨ tyenɨj nos akɨshlo olak eyuwo par uje nos olak pwele ahakõrlo kuche.
\v 11 Pɨshɨbo watsaklo, shɨ titɨm olak ahnũwo pork Cloé ɨr iiso otatɨm yok uje shish ahakosloye.
\v 12 Titɨm olak uje ahakosloye pork olak yewo ode uje otata otsɨɨ: —Oyahmũr Pablo,— hn yewo otsɨɨ: —Oyahmũr Apolos,— hn yewo otsɨɨ: —Oyahmũr Pedro,— hn yewo otsɨɨ: —Oyahmũr Cristo.—
\v 13 Eyok uje eyok Porrosht aabo ich eyok ɨtso Cristo ɨr yũhurrza. ¿Je olak yeẽk dehek Cristo ɨr yũhurrza duhu pɨkaabo? Ye odehekpe. ¿Je odowɨsh Pabloni odɨbɨte krus eeych par uje ɨshɨ olak hnɨtew? Ye odowɨshpe. ¿Je uhu otohɨrm olak onɨ̃ra Pablo iich? Ye onɨ̃rape.
\v 14 Tɨkɨnshɨp Porrosht uje ye tokohɨrm olak yeẽk petɨkni. Shɨ tokohɨrm Crispo hn Gayo,
\v 15 heke nĩhyok uje yeẽk tata uje otohɨrm olak yeẽk ochɨ̃ra piich.
\v 16 Shɨ tokohɨrm Estéfanas hn nos wɨr ɨr iiso per ich tɨkey kɨmɨjɨ yewo ochɨhɨ uje tokohɨrm õrni.
\v 17 Cristo ye duhu tɨkɨrẽt petɨkni par tokohɨrm oso. Shɨ shuu tɨkɨrẽt par tanɨmɨrãha ɨr ahwoso titɨm oso uje ɨre ɨshɨ õr hnɨtewɨhɨ Porrosht ahɨr. Titɨm õr tɨ̃ra ahwoso uje ochɨraha, ye tɨ̃ra ahwoso uje ye odɨrehepe. Kɨmɨjɨ titɨm õr tɨ̃ra ahwoso kɨnãho ich ye odɨrehepe uje Cristo tooho krus eeych heke tokole ɨtso uje ye Cristo ukũrbɨrsh par shuu omasaha par Porrosht aabo.
\s Porrosht ukurbo de Cristo.
\p
\v 18 Sehe titɨm olak uje nos wɨr oso uje tyenɨj otɨ̃r urhuta bahluta ehet nehe otata erze ahwoso uje Cristo tooho krus eeychkite otsɨɨ: —Ye jukur.— Mahn par eyok uje eyok owich de Porrosht ahɨr ich bale uje Cristo tooho krus eeych hn Porrosht ukurbo shuu yomsaha par ɨr aabo.
\v 19 Porrosht ahwoso tata shuu ɨtsorz ɨm: —Porrosht sole: “Erze oso uje ye õr paabope uje õr eykdeyo ich tuu õr eyuwo ye jukur, hn erze uje ich õr dɨtuwo tuu ye õr ɨbiyo jukur.”—
\v 20 Erze uje ich õr eykdeyoho nãhu ɨ̃rmo ɨshujãro hn erze uje ochichew õr hute hn erze uje ochɨraha ochiilehet ¿latɨk tokolɨhɨ õr? Porrosht shuu õr eyuwo shɨ ɨtso uje õr totihlo.
\v 21 Nos wɨr oso uje ich õr eykdeyo shɨ otsẽrza kuche uje de nãhu ɨ̃rmo per Porrosht ye duhu odɨraha ɨrpe. Porrosht ich eykdeyo. Shuu yanɨmɨrãha lahwoso yitɨm õr uje Cristo tooho krus eeych par ɨshɨ õr hnɨtewɨhɨ Porrosht ahɨr per ochɨbɨte uje ich ye jukur uje Cristo shiyokõr, per Porrosht shuu nos omasaha par ɨr aabo erze uje ye olotiis Cristope.
\v 22 Nos wɨr israel oso otsapur yarta uje ye latɨk pwele niyokõr par uje oteychɨm par uje ye olotiis Cristope, hn erze griego sehe otẽr wɨr ahwoso uje õr eykdeyo otata par uje ye olotiis,
\v 23 per õryok shɨ oyanɨmɨrãha uje Cristo tooho krus eeychkite par uje ɨshɨ õr hnɨtewɨhɨ Porrosht ahɨr. Erze israel oso otsotiis erze ahwoso heke õryok ahwoso ich shɨ ɨtso uje kojach shuu õr hnɨte hn shuu õr kay, hn erze oso uje ye õr israel yewope wɨr ochɨbɨte uje erze õryok ahwoso ich shɨ ɨtso totihlo õr ahwoso.
\v 24 Per eyok uje Porrosht chiihla eyok kɨmɨjɨ eyok israel oso o kɨmɨjɨ eyok dihipo kɨnãho, par eyok erze uje Cristo shiyokõr ich shuu ɨmeheeych uje Porrosht ukurbo deyo de hn ich ɨr eykdeyo.
\v 25 Oso ode uje otata uje Porrosht ye eyuwɨ̃rsh per ɨr eyuwo ich ma deyo je nos wɨr oso, hn ochɨbɨte uje ye ɨr ukũrbɨrsh per Porrosht ich ma ukurbo deyo de je nos wɨr oso.
\p
\v 26 Pɨshɨbo watsaklo, uhu olak eyuwo tɨsɨ̃r uje Porrosht chiihla olak par olak ɨr aabo. Ye olak kɨhniyape uje oso otata hn ochɨbɨte uje olak eykdeyo, hn olak arhaabo uje õr bahluwoho ɨ̃rmo, hn olak arhaabo uje õr ɨhɨ̃r deyo õr aabo.
\v 27 Erze uje ich õr eykdeyo ochɨbɨte uje ye jukur uje Cristo tooho krus eeych per Porrosht chiihla erze oso uje yewo otata uje ye õr eyuwɨ̃rsh par uje shuu wɨr opook erze uje õr eykdeyo, hn erze uje õr ukurbo deyo de otata uje Cristo tooho krus eeych pork ich ye ɨr ukũrbɨrsh per Porrosht chiihla oso uje ye õr ukũrbɨrsh par ɨr aabo par shuu wɨr opook erze uje õr ukurbo deyo de.
\v 28 Erze oso uje yewo ochɨbɨte uje wɨr ye õr jukur wɨr uje Porrosht chiihla õr par ɨr aabo, hn erze oso uje yewo ye onahmũr õrpe wɨr uje Porrosht chiihla õr. Porrosht chiihla õr shuu ɨtsorz par uje shuu erze yewo õr eyuwo ye jukur,
\v 29 heke ich nĩhyok yeẽk pwele narim ɨrehe Porrosht ɨle ɨkɨch.
\v 30 Porrosht wɨchɨ uje ɨshɨm eyok ɨkɨrĩt pork ye yotiis Jesucristope. Shɨ Cristo wɨchɨ uje shuu eyok eykdeyo. Wɨchɨ uje shuu eyok Porrosht aabo, hn shish shuu eyok ɨluu ma om, hn ɨshɨ eyok hnɨtewɨhɨ Porrosht ahɨr,
\v 31 heke Porrosht ahwoso tata shuu ɨtsorz ɨm: —Uje sehe yeẽk narim ɨre o narim oso yewo ich ye ompe. Tyenɨj shɨ narim eyok Ɨrhĩch.—
\c 2
\s Cristo tooho krus eeych par õr ɨre.
\p
\v 1 Pɨshɨbo watsaklo, uje takaachɨ̃hɨ olak ahɨrni hn tanɨmɨrãha Porrosht ahwoso titɨm olak uje Porrosht shuu Cristo shiyokõr par olak, ich teẽt ahwoso uje ɨmeheeych par erahalo hn ye titɨm olakpe uje tãra peyuwo uje ich kwestpa erahalo,
\v 2 pork tɨbɨte uje shɨ sehe titɨm olak Jesucristo uje tooho krus eeychkite.
\v 3 Uje takaha tekɨrɨhɨ olakni ich yok kasɨk uje tanɨmɨrãha Porrosht ahwoso titɨm olak. Tɨkɨtɨla õr nehech pɨkiyo tãra.
\v 4 Uje tiipuhut tanɨmɨrãha Porrosht ahwoso ich tuu amsahalo par Porrosht aabo. Ye titɨm olak ahwoso uje ich ye ɨmeheeychpe ɨtso uje oso otata uje õr eykdeyo per Porrosht Ɨchɨbich hn Porrosht ɨr ukurbo wɨr uje shuu ɨmeheeych uje pahwoso ich ũru.
\v 5 Heke olak ye otiislo Porroshtpe ye uje shɨ oso otatɨm olak. Ye otiislo pork erahalo uje Porrosht ukurbo de. Wɨchɨ shuu erahalo erze uje ich ũru.
\s Porrosht Ɨchɨbich shiyokorãha õr.
\p
\v 6 Sehe titɨm olak uje õryok de Porrosht aabo õr ahɨr uje ma ochɨraha Porrosht ahwoso ich oyiyokorãha õr ɨr ahwoso uje ich ma kwestpa par ochɨraha. Erze ahwoso uje erze õr eykdeyo oshiyokorãha erze oso uje ode nãhu ɨ̃rmo uje ye odɨraha Porroshtpe ich ye oyiyokorãha olakpe oyuhu õryok ɨlo õr, hnii erze õr ahwoso uje õr bahluwo oshiyokorãha õr pork deeych yet nehe ich õr ahwoso tokole uje ye jukur.
\v 7 Per õryok oyiita erze ahwoso uje antkite Porrosht ye duhu ɨmeheeychpe. Ye duhu oso odɨraha lahwospe. Porrosht ich eykdeyo. Uje ehn yahpaa niyokõr ɨrmõkite ɨchii chɨbɨte lahwoso uje oso tyenɨj ye olotiis Cristo par omasaha par ɨr aabo par uje otaachɨ̃hɨ ɨre ahɨr nehe.
\v 8 Nos wɨr oso õr bahluwo ye odɨrehepe uje Cristo tyenɨj tooho õr. Kɨmɨjɨ odɨraha ich ye odowɨshɨhɨ eyok Ɨrhĩch uje tãra poõrc krus eeych
\v 9 pork Porrosht ahwoso tata shuu ɨtsorz ɨm: —Porrosht shiyokõr kuche par erze uje otsahmũr ɨre per nĩhyok yeẽk uje umo erze kuche, hnii chunt latɨkpo erze kuche, hnii shuu deyuwo tɨsɨ̃r erze kuche.—
\v 10 Per eyok uje eyok Porrosht aabo Porrosht shuu Dechɨbich shiyokorãha eyok erze kuche. Porrosht Ɨchɨbich nos chɨraha Porrosht ɨr ɨluu uje ich kwestpa par oso ochɨraha.
\v 11 ¿Yeẽkpo uje nos chɨraha hnakɨrbich ɨr eyuwo? Shɨ ese hnakɨrbich ɨr ɨchɨbich uje de ɨre ehet wɨchɨ uje chɨraha. Shɨ ɨtspo nĩhyok yeẽk uje chɨraha Porrosht ɨr eyuwo. Shɨ ɨr Ɨchɨbich wɨchɨ uje nos chɨraha Porrosht ɨr eyuwo.
\v 12 Porrosht ye dosɨm eyok erze ɨluu mɨhnũpe uje de nãhu ɨ̃rmo per ɨshɨm eyok Dechɨbich par uje shuu yɨraha erze kuche uje ɨshɨmɨhɨ eyok.
\v 13 Wɨr uje oyiyokorãha olak. Ye oyiyokorãha olakpe erze uje tãra oso õr eyuwo. Shɨ oyiyokorãha olak erze uje tãra Porrosht Ɨchɨbich oyuhu ɨmeheeych par erze uje Porrosht Ɨchɨbich de õr aho.
\v 14 Ese uje ye Porrosht Ɨchɨbich chɨhɨ ɨre ehetpe ich ye nahmũr erze kuche uje tãra Porrosht pork ɨre chɨbɨte uje erze kuche uje tãra Porrosht ich ye jukur. Ye ɨr pwelpe uje chɨraha pork shɨ pwele chɨraha uje Porrosht Ɨchɨbich shiyokorãha ɨre.
\v 15 Ese uje Porrosht Ɨchɨbich de ɨre ehet hn shiyokõr uje tata ich shuu deyuwo tɨsɨ̃r nos wɨr kuche kɨmɨjɨ om o kɨmɨjɨ mɨ̃hnɨk. Per ese uje ye dɨraha Porroshtpe ye dɨraha uje Porrosht aabo oshiyokõr heke ye pwele tata kɨmɨjɨ om o kɨmɨjɨ mɨ̃hnɨk.
\v 16 Porrosht ahwoso tata shuu ɨtsorz ɨm: —¿Yeẽkpo chɨraha eyok Ɨrhĩch ɨr eyuwo par uje shiyokorãha ɨre?— Nĩhyok, per Cristo ɨr eyuwo de eyok.
\c 3
\s Porrosht ĩya Pablo uje shiyokõr ɨr ɨbiyo.
\p
\v 1 Pɨshɨbo watsaklo, uje tɨkitkẽr Porrosht aabo yewo uje oshiyokõr uje ɨre sahmũr ich titɨm õr erze Porrosht ahwoso ɨr ɨluu uje ich kwestpa ochɨraha, per ye yok pwele tuu ɨtsorz uje tɨkitkẽr olak. Shɨ tɨkitkẽr olak tuu ɨtso erze Porrosht aabo uje otsahmũr nãhu ɨ̃rmo oso õr ɨluu. Shɨ tɨkitkẽr olak tuu ɨtso erze uje hnii omasaha par Porrosht aabo pork olak shɨ olak ɨtso pɨkɨhnino uje hnii oshũrha.
\v 2 Wapni tiyokorãha olak Porrosht ahwoso uje ye kwestpe par erahalo. Wɨr shɨ ɨtso leshe uje pɨkɨhnint ɨhɨ ehn yahpaa pwele taakpe. Nehech ele ahle yesh olak ɨtso pɨkɨhnint uje ye õr pwele taakpe
\v 3 pork yesh ahmũrlo olak ɨluu ɨler. Yesh de olak uje abɨtɨlo kuche hn ahakosloye heke ɨmeheeych uje yesh ahmũrlo olak ɨluu ɨler hn ahakõrlo uhu olak ɨtso erze uje ye odɨraha Porrosht ɨluutpe
\v 4 pork olak ehet yeẽk de uje tata ɨm: —Tahmũr Pablo,— hn yet de uje tata ɨm: —Tahmũr Apolos.— Heke yesh ahakõrlo uhu olak ɨtso erze uje ye Porrosht aabope.
\p
\v 5 Erahalo Apolos ɨr ɨbiyo, hn erahalo Pablo ɨr ɨbiyo. Wɨr shɨ Porrosht ɨr ɨbiyo. Wɨr uje ye oduhu otiislo Porroshtpe. Nos wɨr eyok yiyokõrlo erze obiyo uje eyok Ɨrhĩch ɨshɨm eyok nohmɨr nohmɨr.
\v 6 Shɨ yok ɨtso yeẽk uje chukwẽr jõro, hn Apolos wɨchɨ shɨ ɨtso yeẽk uje sɨta, per Porrosht wɨchɨ uje shuu erze jõro krese.
\v 7 Heke shɨ Porrosht wɨchɨ uje bale pork shuu krese, ye esepe uje chukwẽr hn ye esepe uje sɨta.
\v 8 Ese uje chukwẽr hn ese uje sɨta ich õr ɨbiyo ɨhɨ̃rtso shɨ ɨtsye. Porrosht wɨchɨ uje ɨshɨ õr uje otserz per shɨ par erze õr ɨbiyo uje ich om.
\v 9 Õryok oyukwĩya Porrosht uje oyiyokõr ɨr ɨbiyo. Wɨchɨ uje takashɨm õryok shuu tokole om. Olak shɨ olak ɨtso Porrosht ɨr shakɨrrza. Uje oyitɨm olak Porrosht ahwoso ich ɨtso uje oyukwẽr jõro shakɨrrza ehet. Olak shɨ ɨtso Porrosht ɨr ihyuch toy.
\v 10 Porrosht takashɨm yok uje ɨshɨm yok erze pɨbiyo shɨ ɨtso uje shuu tiyokõr pwertɨt tuu uhwɨrbe iyehet wap. Yet de uje shiyokõr ese pwertɨt per kal nohmɨra tyenɨj shiyokõr debiyo om par uje ye nimehĩ ese pwertɨt
\v 11 pork ich ye õr pwelpe uje ochihitsɨm uhwɨrbe yẽr pork erze uhwɨrbe uje dechɨ shɨ ɨtso Jesucristo. Nĩhyok yet uje ɨshɨ eyok hnɨtew.
\v 12 Ich kuche kɨhniya ochɨ̃ra uje oshiyokõr ese pwertɨt, ochɨ̃ra oro o kɨmɨjɨ plata o kɨmɨjɨ kojano po uje ich ɨhɨ̃rtso o kɨmɨjɨ tabla o kɨmɨjɨ onɨ̃ra ɨhnemyo o kɨmɨjɨ kuche yewo.
\v 13 Erze obiyo uje õr ɨre oshiyokõr kal nohmɨra ich deeych yet nehe hn tyenɨj õr Yɨnsɨrc shuu ɨmeheeych kɨmɨjɨ tokole om o kɨmɨjɨ ye tokolpe pork õr Yɨnsɨrc tyenɨj chɨbɨte jwekɨta par teychɨm kɨmɨjɨ ewenta o kɨmɨjɨ ye ewentpe.
\v 14 Nos Porrosht aabo oshiyokõr ese pwertɨt uje erze uhwɨrbe wɨr shɨ ɨtso Cristo. Kal nohmɨra kɨmɨjɨ ɨr ɨbiyo ewenta asa jwekɨta ich ɨre tyenɨj serz.
\v 15 Per kɨmɨjɨ asa jwekɨta nos nɨhna erze ɨbiyo uje shiyokõr ich wɨchɨ pyert ɨr premyo per shish ɨr ɨkɨrĩt de Porrosht ahɨr. Wɨchɨ shɨ ɨtso hnakɨrbich uje de dahuch ehet hn ɨr ihyuch duhlu. Tokolɨhɨ dahuch per nos wɨr ɨr kushjãro sɨhna ɨre.
\p
\v 16 Erahalo uje olak Porrosht ɨr ihyuch hn ɨr Ɨchɨbich debuhu olak aho.
\v 17 Kɨmɨjɨ yeẽk nɨhna Porrosht ihyuch ich Porrosht tyenɨj sɨhna wɨchɨ pork olak Porrosht ɨr ihyuch hn wɨchɨ uu olak Yɨnsɨrc.
\p
\v 18 Ye ompe uje shɨ yeẽk sehnyẽr ɨre. Kɨmɨjɨ olak yeẽk dɨbɨte uje ɨre eykdeyoho nãhu ɨ̃rmo ɨshujãro ich ye ompe, per kɨmɨjɨ duhu ɨre ɨlo yeẽk uje ye eyuwo tɨsɨ̃r nãhu ɨ̃rmo ɨshujãro ich Porrosht shuu ɨre eykdeyo.
\v 19 Pork erze oso uje ode nãhu ɨ̃rmo ochɨbɨte uje ich ma õr eykdeyo per par Porrosht ich õr eyuwo ye jukur. Porrosht ahwoso tata shuu ɨtsorz ɨm: —Erze uje ich õr eykdeyo Porrosht shuu õr eyuwo ɨtso trampta uje sontew õr.—
\v 20 Porrosht ahwoso tata toy shuu ɨtsorz ɨm: —Eyok Ɨrhĩch chɨraha uje erze uje õr eykdeyo õr eyuwo ye jukur.—
\v 21 Heke ye ompe uje yeẽk narim oso pork nos wɨr kuche wɨr par eyok.
\v 22 Pablo, Apolos, hn Pedro shɨ õryok ɨtso olak yɨlo par oyakashɨm olak. Hn ahnũwo ɨ̃rmo hn ese ɨkɨrĩt wɨr par olaklo. Kɨmɨjɨ Porrosht aabo yeẽk toy ich shɨ toy pork Porrosht sahmũr. Erze uje yesh tɨ̃r olak hn erze uje tyenɨj tɨ̃r olak nehe wɨr par takashɨm olak.
\v 23 Cristo wɨchɨ olak yɨnsɨrc, hn Porrosht wɨchɨ Cristo ɨr yɨnsɨrc.
\c 4
\s Pablo tatɨm Porrosht aabo erze uje apóstole oshiyokõr.
\p
\v 1 Olak tyenɨj uhu olak eyuwo tɨsɨ̃r uje õryok shɨ Cristo ɨr ɨbiyo. Tyenɨj uhu olak eyuwo tɨsɨ̃r uje Porrosht shuu oyanɨmɨrãha lahwoso oyitɨm oso uje Cristo ɨshɨ õr hnɨtewɨhɨ Porrosht ahɨr pork ye odɨrehepe.
\v 2 Ye shɨ erzepe uje oyitɨm olak. Erze uje Porrosht shuu omasaha par ɨr aabo õr bahluwo tyenɨj shish oshiyokõr uje ɨre otata.
\v 3 Par yok ich ye latɨkɨsh uje eychɨmlo pɨbiyo kɨmɨjɨ om o kɨmɨjɨ ye ompe, o kɨmɨjɨ jwe teychɨm. Hn yok ɨtspo ye tiitape kɨmɨjɨ pɨbiyo om o kɨmɨjɨ mɨhnũwo.
\v 4 Ye tukuunape kɨmɨjɨ timehĩ pork ye tɨkɨrehepe. Shɨ eyok Ɨrhĩch wɨchɨ uje chɨraha. Wɨchɨ uje tyenɨj tata kɨmɨjɨ timehĩ.
\v 5 Moymlo uje uhulo ese yet ma ɨluu om je erze yewo. Tyenɨj shɨ anemlo nehech eyok Ɨrhĩch cheeshpo nehe pork wɨchɨ uje tyenɨj nos chɨbɨte kuche orhõta uje otsakɨs. Wɨchɨ uje tyenɨj shuu ɨmeheeych uje oso sehe oniyokõr. Uje taãcha nehe ich Porrosht tyenɨj teychɨm õr ɨbiyo hn tyenɨj narim kal nohmɨr nohmɨr kɨmɨjɨ oniyokõr om.
\p
\v 6 Pɨshɨbo watsaklo, erze uje titɨm olakɨke shɨ tɨteẽta yok hn Apolos uje oyiyokorãha olak oyuhu erahalo uje ye ompe aluwelo uje Porrosht ahwoso tata par uje nĩhyok olak yeẽk uje narim yet hn sepɨ yet.
\v 7 ¿Yeẽkpo uje shuu owa ma dich je erze yewo? ¿Asujãnɨkɨhɨ uje Porrosht ye dosɨm owape? Kɨmɨjɨ shɨ dosɨmɨhɨ owa duhu ɨlorz ¿ich ɨnaapo heke owa narim owa ɨtso uje owa erz?
\v 8 ¿Ɨnaapo heke ebɨtlo shɨ ɨtso uje olak de wahacha poõrc hn erze kuche nos de olak ahɨr hn uhu olak ɨtso ɨhɨ̃r deyo? Ebɨtlo shɨ ɨtso uje amsahalo uhu olak ɨtso reyɨhɨ wahacha poõrc hn ye õryok reyɨhɨ olak ahɨr toy. Ich tahmũr par amsahalo par rey heke ich õryok oyomsaha par reyɨhɨ wahacha olak ahɨr toy.
\v 9 Tɨbɨte uje Porrosht shuu ɨtso uje õryok de ma uhurc pork õryok ɨr apóstole hn kuche mɨhnũwo shish tɨ̃r õryok. Chɨbɨte õryok ma uhurc. Wɨchɨ chɨbɨte õryok shuu õryok ɨtso erze hnakɨrbo uje tyenɨj oshuu õr oshuu otoy. Wɨchɨ chɨbɨte õryok shuu ɨtso par uje wɨr oteychɨm õryok erze uje ode ɨ̃rmo hn erze anjele toy hn erze oso.
\v 10 Õryok oyɨbɨte uje shɨ õryok ɨtso totihlo pork oyanɨmɨrãha uje Jesucristo shiyokõr par oso, per olak ebɨtlo uje olak eykdeyo pork ye otiislo Jesucristope. Õryok ye õryok ukũrbɨrsh, per olak ebɨtlo uje olak ukurbosh. Ebɨtlo uje oso otola olak, per ich shɨ ɨtso uje ye otola oryõkpe.
\v 11 Nehech ele ahle yesh õryok iyuwo sẽhi õryok hn õryok iilo sẽhi õryok. Ye õryok ishuwɨrsh uje om, hn oso ich otsepyẽr õryok, hn ye õryok ihyuwo pishɨ̃rsh.
\v 12 Shish oyishew obiyo ich oyɨhnew. Uje ochinehnɨm õryok ich oyiyuhu õryok ahwoso omoho õr. Uje otsepyẽr õryok ich shish õryok ewenta.
\v 13 Otatɨm yewo par uje oshuu otsɨtak õryok ich shish õryok prowa oyuhu õr aho kɨɨsɨhɨ õryok. Oshuu õryok ɨtso erze kuche uje waresh uje de nãhu ɨ̃rmo, hn oshuu õryok ɨtso pɨramo uhrɨ̃ye.
\p
\v 14 Ye tichew titɨm olakpe tuu ɨtsorz par uje tuu apooklo. Shɨ sehe takɨt olak pork olak ɨtso uje yok pijo uje ich tahmũr pishɨ õr.
\v 15 Okɨhniya oshiyokorãha olak Jesucristo ɨr ɨluu per erze uje õr ɨtso olak deyo wɨr ye õr kɨhniyape. Shɨ yok nohmɨra uje ich yok ɨtso olak deych pork titɨm olak uje Jesucristo ɨshɨ olak hnɨtewɨhɨ Porrosht ahɨr par uje amsahalo par olak Porrosht aabo
\v 16 heke titɨm olak par uje shish eẽtlo yok.
\v 17 Tuu Timoteo tɨ̃r olak. Wɨchɨ shɨ ɨtso yok pijo uje ich tahmũrpa. Shish shiyokõr uje tahmũr pork yok uje titɨm ɨrni hn masaha par Porrosht aap. Wɨchɨ tyenɨj tatɨm olak par uje shuu olak eyucha uje tiyokõr shɨ ɨtso uje nos tiyokorãha Porrosht aabo uje otakasho lawichɨhɨ lekɨtiyo pork yok Cristo ɨr ɨbɨk.
\v 18 Titɨm olak uje nohmɨramo ode olak ehet uje ochɨbɨte uje ich ye takaashpe par uje tekɨrɨhɨ olak nehe heke wɨr onarim ɨre
\v 19 per kɨmɨjɨ eyok Ɨrhĩch nahmũr ich takaashpo shɨchish tekɨrɨhɨ olak. Heke tɨkɨraha kɨmɨjɨ Porrosht Ɨchɨbich chɨhɨ õr aho par uje shuu õr ukurbosh o kɨmɨjɨ shɨ odiilehet.
\v 20 Kɨmɨjɨ Porrosht Ɨchɨbich iyeebe hn oyehe nẽr ich om pork Porrosht ukurbo de õr, per kɨmɨjɨ shɨ õr ɨre odiilehet ich shɨ õr ahwoso ye jukur.
\v 21 Uje tekɨrɨhɨ olak nehe ¿ich ahmũrlo latɨkpo? ¿Je ahmũrlo uje tokõhwa phich par tepyẽr olak o kɨmɨjɨ ahmũrlo uje tɨkɨrẽt tɨtɨ̃r olak hn pehet kɨɨsɨhɨ olak pork tahmũr uje ahakõrlo?
\c 5
\s Porrosht aap shiyokõr mɨ̃hnɨk.
\p
\v 1 Titɨm olak. Shish tukunt uje olak ehet yeẽk de uje shiyokõr mɨhnɨ̃kpa. Erze uje ye odɨraha Porroshtpe yelɨj oniyokõr oduhu ɨlorz. Wɨchɨ hnakɨrbich ĩhi latahacha ahɨr,
\v 2 hn olak ich olak narim olak. Tyenɨj shuu olak dosdarak uje wɨchɨ shiyokorɨ̃hɨ olak ehetni. Ich tyenɨj eyuhulo olak ehet ese hnakɨrbich uje shiyokõr mɨ̃hnt.
\v 3 Ye yok chɨhɨ olak ahɨrpe per tɨbɨte shɨ ɨtso uje pɨchɨbich de olak ahɨr, heke tɨbɨtni uje tyenɨj uhulo wɨchɨ tokolɨhɨ olak ahɨr
\v 4 tɨ̃ra eyok Ɨrhĩch Jesús ɨr iich ese hnakɨrbich uje yesh shiyokõr ese mɨ̃hnt. Uje akɨshlo olak owich ich shɨ ɨtso uje pɨchɨbich de olak ahɨr hn eyok Ɨrhĩch Jesús ɨr ukurbo de olak ahɨr toy.
\v 5 Heke tyenɨj uhulo tokolɨhɨ olak ahɨr ese hnakɨrbich hn ebɨtlo Satanás hme par uje wɨchɨ sepyẽr ɨre shuu iim deluu mɨhnũ. Heke uje terɨhɨ ese deeych uje eyok Ɨrhĩch Jesús cheeshpo nehe ich wɨchɨ hnakɨrbich de eyok ahɨr toy.
\p
\v 6 Ye ompe uje shish olak narim olak shɨ pork olak ewenta ese mɨ̃hnt uje ese hnakɨrbich shiyokõr. Erahalo uje shɨ pan eyhita pɨkaap ich shuu nos ese erint masta potɨta, hn erahalo uje erze kuche mɨhnũwo uje de olak ehet ich pɨkaap per wɨsɨk wɨsɨk ich chũr lekɨtiyo.
\v 7 Heke tyenɨj uhulo tokolɨhɨ olak ahɨr ese hnakɨrbich uje shiyokõr mɨ̃hnɨk par uje olak shɨ olak ɨtso ese masta uje ahle ye eyhirãsh pork Cristo wɨchɨ uje tooho eyokkite. Cristo shɨ ɨtso erze obeje uje erze israel oso oshuu oshuu toy par õr ahamich uje iich otsɨɨ Pascua.
\v 8 Heke tyenɨj yiyokõrlo eyok ahamich shɨ ɨtso erze israel oso uje oshiyokõr õr ahamich uje otew pan uje ye ɨr eyhirãsh. Asa pan eyhita sɨteẽta uu kuche mɨhnũwo per yiyokõr ese õr ahamich yuhulo ɨtso pan uje ye eyhirãsh. Erze pan uje ye eyhirãsh wɨr shɨ ɨtso erze ahwoso uje ich ũru.
\p
\v 9 Sehe titɨm olak uje tichew hutɨta yata par titɨm olak par uje ye meylo erze uje ye onõyhi pishye ahɨrpe, hn erze uje otorãhaye, hn erze uje otsahat loshɨpo, hn erze uje ma mɨhnũwo uje oshiyokorɨ̃hɨye.
\v 10 Uje titɨm olak tuu ɨtsorz ich ye tokorzɨhɨ erze ɨ̃rmo oso uje oshiyokõr erze kuche mɨhnũwo oshuu ɨtsorz. Ye tokorzɨhɨ erze ɨ̃rmo oso uje sehe odukutɨrãha ɨre kuche hn erze uje otohɨr hn erze uje oteeychãha kojano po ochii ɨr porroshtɨhɨ. Kɨrẽhe ɨlorz ich tyenɨj atokolɨhɨlo ɨ̃rmo.
\v 11 Shɨ titɨm olak hutɨta yata ɨr ahwoso par uje ye meylo erze Porrosht aabo uje oshiyokõr mɨhnuwõhoye hn erze uje otorãhaye hn erze uje ye onõyhi pishye ahɨrpe hn erze uje oshuu loshɨpo sahat ɨre hn erze uje otsahat loshɨpo hn nos wɨr kuche mɨhnũwo uje ɨtso hn erze uje sehe odukutɨrãha ɨre kuche hn erze uje oteeychãha kojano po ochii ɨr porroshtɨhɨ hn erze uje otatɨm oso yewo par uje oshuu otsɨtak yewo hn erze uje oshuu yɨkɨch sẽhi ɨre hn erze uje otohɨr. Ye meylo erze Porrosht aabo uje oshiyokõr erze mɨhnũwo oshuu ɨtsorz hnii uje aakɨhɨlo õr ahɨr.
\v 12 Yok pɨbiyo ye par tepyẽr erze uje ye õr Porrosht aabope. Olak ɨbiyo wɨr par epiyerlo erze Porrosht aabo uje oshiyokõr uje ich mɨhnũwo.
\v 13 Porrosht wɨchɨ uje tyenɨj sepyẽr erze uje ye ɨr aabope. Uhulo tokolɨhɨ olak ahɨr ese hnakɨrbich uje shiyokõr mɨ̃hnɨk.
\c 6
\s Uje Porrosht aabo oshiyokosye ich ye ompe otɨ̃r jwe ɨkɨch.
\p
\v 1 Sehe titɨm olak. Uje olak yeẽk dihokos deshɨbich yehe wɨchɨ Porrosht aap ¿ɨnaapo heke ye apooklope uje etɨ̃rlo jwe ɨkɨch uje ye Porrosht aappe? Tyenɨj apurlo erze Porrosht aabo par uje onɨshii.
\v 2 ¿Olak je ye erahalope uje deeych yet nehe hn erze Porrosht aabo tyenɨj omasaha par õr jwe par oteychɨm erze ɨ̃rmo oso uje oshiyokõr kuche mɨhnũwo? Olak tyenɨj enshiilo erze kuche uje ich kwestpa nehe. ¿Ɨnaapo heke ye olak pwele enshiilope ese uje ye kwestpe?
\v 3 ¿Olak je ye erahalope uje deeych yet nehe hn eyok jwe par yeychɨmlo erze anjele uje oshiyokõr mɨhnũwo? Heke tyenɨj enshiilo erze kuche uje tɨ̃r eyok uje eyok de nãhu ɨ̃rmo. Wɨr ye kwestpe par enshiilo.
\v 4 Kɨmɨjɨ olak yeniyo odihokosye ¿ɨnaapo heke etɨ̃rlo jwe ɨkɨch uje ye Porrosht aappe?
\v 5 Shɨ titɨm olak tuu ɨtsorz par uje tuu apooklo. ¿Je ye olak yeẽk chɨhɨ olak ehetpe uje ich eykdeyo par nɨshii erze kuche uje olak leshɨbo oshiyokosye?
\v 6 Porrosht aap hnoy duhut Porrosht aap seya jwe ɨkɨch uje ye dɨraha Porroshtpe.
\v 7 Uje Porrosht aabo oshiyokosye ich oshuu ɨmeheeych uje ye oniyokõrpe uje Porrosht Ɨchɨbich tata. Uje yeẽk niyokõr mɨhnɨkɨ̃hɨ owa ich ma om uje shɨ owa ewenta. Kɨmɨjɨ yeẽk torha olak kuchẽrk ich ma om shɨ moymlo,
\v 8 per ahakõrlo mɨhnuwõho yewo hn ohɨrlo yewo õr kushjãro uje wɨr Porrosht aabo toy.
\p
\v 9 ¿Je ye erahalo erze oso uje ich õr ɨluu mɨhnũ wɨr nĩhyok õr owich Porrosht ahɨr? Ye ehnyẽrlo olak. Erze uje ye onõyhi pishye ahɨrpe nĩhyok õr owich Porrosht ahɨr, hnii par erze uje oteeychãha kojano po ochii ɨr porroshtɨhɨ, hnii par erze uje otorãhaye, hnii erze hnakɨrbo uje oshiyokõr mɨhnuwõhoye hn õhiye ahɨr. Wɨr ye õr owich chɨhɨ Porrosht ahɨrpe,
\v 10 hnii erze uje õr echɨko, hnii erze uje otsahmũr ochukutɨrãha ɨre kuche, hnii erze uje otsahmũr oshuu yɨkɨch sẽhi ɨre, hn erze oso uje otɨ̃r oso yewo hn otatɨm õr par uje oshuu otsɨtak yewo, hnii erze uje oshuu oso par uje sehe otorha õr kushjãro. Wɨr ye õr owich chɨhɨ Porrosht ahɨrpe.
\v 11 Olak yewo antni ahakõrlo uhulo ɨtsorz per Jesús chiyuhu erze kuche mɨhnuwõho olak ahoni shɨ ɨtso uje churhũ olak aho, hn amsahalo par Porrosht aabo pork eyok Ɨrhĩch Jesucristo ɨshɨ eyok hnɨtewɨhɨ Porrosht ahɨrkite. Heke Porrosht Ɨchɨbich de olak aho hn nɨshii olak aho.
\s Porrosht aabo tyenɨj oshiyokõr uje Porrosht sahmũr.
\p
\v 12 Sehe titɨm olak. Yok pwele nos tiyokõr uje shɨ yok tahmũr hn ye tɨkiyuwe leype per ye tahmũrpe pork ye nos wɨr kuche takashɨm yokpe par uje shuu tiyokõr uje ich om. Yok pwele nos tiyokõr uje shɨ yok tahmũr per ye tahmũrpe uje tiyokõr hn tuu erze kuche yakaha yok.
\v 13 Oposo de par uje yahulo hn tɨ̃r eyok ɨjɨta hn eyok ɨjɨta de shɨ par erze oposo, per deeych yet nehe hn Porrosht tyenɨj sɨhna erze kuche osiyer, eyok ɨjɨta hn erze oposo. Eyok ɨkiyo de per ye par uje yiyokõrlo erze kuche mɨhnũwo uje tɨmcher hn hnakɨrbo oshiyokorɨ̃hɨye uje ye onõyhi pishye ahɨrpe. Eyok ɨkiyo shɨ par yiyokõrlo eyok Ɨrhĩch ɨr ɨbiyo hn eyok Ɨrhĩch wɨchɨ uje tɨbey eyok ɨkiyo.
\v 14 Porrosht shuu eyok Ɨrhĩch ɨkpokite heke tyenɨj shuu eyoklo ɨkpo nehe chɨ̃ra lakɨrbo.
\v 15 ¿Je ye erahalo uje Porrosht ɨr aabo wɨr Cristo ɨr ɨkiyo? Ye ompe uje tɨtɨ̃r tɨmcharrza waa je yɨtoro shɨ ɨtso uje tiyuhu Cristo ɨkiyo pɨkaabɨt par uje tuu chishew asa tɨmcharrza pork nos wɨr Porrosht aabo wɨr Cristo ɨkiyo.
\v 16 ¿Je ye erahalo uje hnakɨrbich uje chishew asa tɨmcharrza waa je yɨtoro ich tokole shɨ õr sohmɨra? Porrosht ahwoso tata shuu ɨtsorz ɨm: —Erze uje õr osiyer otokole shɨ õr nohmɨra.—
\v 17 Per uje yeẽk ɨshɨmɨhɨ ɨre eyok Ɨrhĩch ich ɨr ɨchɨbich ĩya eyok Ɨrhĩch hn õr ɨre wɨr shɨ õr sohmɨra.
\v 18 Heke titɨm olak. Ahamlo par uje ye ahakõrlo erze kuche mɨhnũwo uje oso oshiyokõr uje ye onõyhi pishye ahɨrpe. Nos wɨr kuche mɨhnũwo uje yeẽk shiyokõr kɨmɨjɨ tohɨr o kɨmɨjɨ kuche yetpo ich shiyokõr mɨhnɨkɨ̃hɨ yet, per uje yeẽk shiyokõr erze uje ich mɨhnũwo uje hnakɨrbo hn tɨmcher oshiyokorɨ̃hɨye ich wɨchɨ shiyokõr mɨhnɨkɨ̃hɨ ɨre.
\v 19 ¿Je ye erahalo uje olak ɨkiyo wɨr Porrosht Ɨchɨbich ɨr ihyuch? Porrosht ɨshɨm olak Dechɨbich par uje shuu debuhu olak aho. Olak yɨnsɨrc wɨchɨ Porrosht uje tɨbey olak
\v 20 pork Jesús tooho krus eeych par tiya olak uje ɨshɨ olak hnɨtewɨhɨ Porrosht ahɨrkite, heke tyenɨj ahakõrlo uje Porrosht sahmũr par uje uhulo ɨre dich.
\c 7
\s Ahnũwo uje tyenɨj oso oshiyokõr uje ochiileku.
\p
\v 1 Sehe titɨm olak erze uje sehe erahalo uje atɨmlo yok asa olak hutɨta ɨr ahwoso uje asɨmlo yokni. Ich om uje hnakɨrbich ye diilekupe
\v 2 per hnakɨrbo hn tɨmcher ich okɨhniya uje oshiyokõr mɨhnuwõhoye uje ye onõyhi pishye ahɨrpe hn tɨmcher oshiyokõr mɨhnuwõho yẽr hn hnakɨrbo oshiyokõr mɨhnuwõhoye, heke ich ma om uje hnakɨrbich ɨr ɨrãhta pishta de, hn ich ma om uje tɨmcharrza ɨr abich pisht de.
\v 3 Hnakɨrbich tyenɨj umuhu nerãhta ahɨr hn tɨmcharrza tyenɨj umuhu dabich ahɨr.
\v 4 Asa tɨmcharrza ɨr ɨkiyo ɨr abich. Wɨchɨ uu ɨr yɨnsɨrc hn ese hnakɨrbich ɨr ɨkiyo asa ɨr ɨrãhta. Wate ɨr yɨlahata.
\v 5 Ye ompe uje hnakɨrbich iim uje umuhu nerãhta ahɨr hn tɨmcharrza ɨtspo ye ompe uje iim umuhu dabich ahɨr, per kɨmɨjɨ otakasho deyuwo hn oym pɨkaap par uje õr orar otsapur Porrosht ich om. Per uje terɨhɨ erze daalo uje õr ɨre ochɨbɨte par uje õr orar ich tyenɨj omuhuye ahɨrpo par uje Satanás ye nɨmchaha õr eyuwo uje mɨhnũwo hn ye õr pwele otɨbey ɨre hn otorãhaye.
\v 6 Titɨm olak ahnũwo par uje erahalo. Porrosht ye dɨtakpe uje ochiileku hn ye dɨtakpe uje õr kiimo.
\v 7 Tahmũr uje nos õr kiimo ɨtso yok, per Porrosht ɨshɨm kal nohmɨra ɨr ukurbo shuu kɨnãho kɨnãho par uje oshiyokõr uje Porrosht sahmũr pork ye nos õr ɨlo yokpe.
\p
\v 8 Sehe titɨm olak uje olak kiimo hn uje olak kiime hn erze uje õr poluuwo. Ich om uje ye odiilabey hn ich om uje ye ey olak eku ɨtso yok.
\v 9 Per kɨmɨjɨ ye olak pwele par uje abeylo olak ich tyenɨj ey olak eku, pork ich ma om uje olak ɨrẽhte de o olak abiyo de je uje uhu olak eyuwo mɨhnũwo uje nĩhyok olak ɨrẽhte o kɨmɨjɨ nĩhyok olak abiyo.
\v 10 Sehe titɨm erze uje õr abiyo de o kɨmɨjɨ õr ɨrẽhte de. Ahnũwo ahwoso ye tãra peyuwope. Shɨ tãra eyok Ɨrhĩch. Ye ompe uje tɨmcharrza iim dabich,
\v 11 per kɨmɨjɨ wate noym dabich ich tyenɨj shish kiime, o tyenɨj cheeshpo par uje ĩhi ese dabich ahɨrpo. Ese hnakɨrbich ɨtspo, ye ompe uje iim nerãhta.
\p
\v 12 Erze uje tyenɨj titɨm olak yewo ye tãra eyok Ɨrhĩchpe shɨ tãra yok. Kɨmɨjɨ yeẽk chɨhɨ uje Porrosht aap hn ɨr ɨrãhta ye Porrosht aappe hn wate yesh sehe dakaha ahɨr ich ye ompe uje iim wate.
\v 13 Kɨmɨjɨ tɨmcharrza chɨhɨ waa je Porrosht aap hn ɨr abich ye Porrosht aappe per yesh sehe dakaha ahɨr ich ye ompe uje wate iim ɨre.
\v 14 Hnakɨrbich uje ɨr ɨrãhta Porrosht aap per ɨre ye Porrosht aappe wɨchɨ par Porrosht ich shɨ ɨtso uje ɨre aap per ye Porrosht aappe. Hn tɨmcharrza waa je ye Porrosht aappe per ɨr abich Porrosht aap par Porrosht ich shɨ ɨtso uje ɨre aap per ye Porrosht aappe. Porrosht shiyokõr shuu ɨtsorz par uje ye õr aabo otokole ɨlo erze uje ye odɨraha Porroshtpe per ele ahle wɨr ye ɨlorzpe.
\v 15 Sehe titɨm olak kuchɨt yetpo. Kɨmɨjɨ hnakɨrbich ye Porrosht aappe per ɨr ɨrãhta Porrosht aap hn sehe noym nerãhta ich ɨr ɨrãhta ye narhak ɨre. Hn tɨmcharrza ɨtspo kɨmɨjɨ ye dɨraha Porroshtpe hn sehe noym dabich uje wɨchɨ Porrosht aap ich ɨr abich ye narhak ɨre. Porrosht ye dɨbɨtpe uje erze ɨr aabo otsontew erze tɨmcher uje oym õr o kɨmɨjɨ hnakɨrbo uje oym õr ich shɨ ɨtspo. Porrosht sahmũr uje ɨr aabo õr aho kɨɨs.
\v 16 Owa uje owa tɨmchar ye eraha kɨmɨjɨ deeych yet nehe hn akashɨm abich par uje uhu masaha toy par Porrosht aap, hn owa uje owa hnakɨrap ye eraha kɨmɨjɨ deech yet nehe hn akashɨm erãhta par uje uhu masaha toy par Porrosht aap.
\p
\v 17 Heke kal olak nohmɨr tyenɨj shish shiyokõr uje eyok Ɨrhĩch ɨshɨm ɨre pork Porrosht chiihla olak par olak ɨr aabo. Wɨr uje shish titɨm Porrosht aabo uje otakasho lawichɨhɨ lekɨtiyo.
\v 18 Kɨmɨjɨ Porrosht diihla yeẽk par uje masaha par ɨr aap uje ɨr yarta de waa je iich otsɨɨ sirkunsisyon ich ye ompe uje prowa diyuhu asa ɨr yarta. Kɨmɨjɨ ɨr yarta nihyokõho ɨre waa je iich otsɨɨ sirkunsisyon hn masaha par Porrosht aap ich ye ompe uje ɨre chɨbɨte ɨr yarta.
\v 19 Kɨmɨjɨ owa yarta chɨhɨ waa je iich otsɨɨ sirkunsisyon o kɨmɨjɨ nĩhyok ich shɨ ɨtsye, ye latɨkɨsh. Shɨ uje ahakõrlo uje Porrosht ahwoso tata wɨchɨ uje ich om.
\v 20 Heke kal olak nohmɨre uje masaha par Porrosht aap ich ye niyokõr kuche par shuu ɨre kɨnãha. Shɨ iyem uje Porrosht tatɨm ɨre. Shish tyenɨj ɨtso uje wapni de uje Porrosht chiihla ɨre par uje masaha par ɨr aap.
\v 21 Heke kɨmɨjɨ owa õr yɨlak hn amsaha par Porrosht aap ye uhu eyuwo tɨsɨ̃r hn owa yuhwo. Kɨmɨjɨ owa pwele enshii uhu ensɨrc tãra owa ich atokole heke ye owa ɨr yɨlakpe.
\v 22 Kɨmɨjɨ olak yeẽk chɨhɨ uje masaha par Porrosht aap per wɨchɨ õr yɨlak ich wɨchɨ ye eyok Ɨrhĩch ɨr yɨlakpe, per kɨmɨjɨ wɨchɨ ye oso õr yɨlakpe uje masaha par Porrosht aap ich wɨchɨ Cristo ɨr yɨlak.
\v 23 Uje Cristo tooho krus eeychkite ich tiya olak par ɨr yɨlo pork ɨshɨ olak hnɨtewɨhɨ Porrosht ahɨr heke ye ompe uje asɨmɨhɨlo olak yeẽk par uje chii olak deloho.
\v 24 Pɨshɨbo watsaklo, heke titɨm olakpo. Kal olak nohmɨre uje masaha par Porrosht aap ich ye niyokõr kuche par uje duhu ɨre kɨnãha. Shish tyenɨj ɨtso uje wapni de uje Porrosht chiihla ɨre par uje masaha par ɨr aap.
\p
\v 25 Sehe titɨm olak uje yahpaa ey olak ekupe o kɨmɨjɨ yahpaa ey olak abeype. Eyok Ɨrhĩch ye tatɨm yok latɨk uje tyenɨj titɨm olak per shɨ titɨm olak uje tãra yok peyuwo. Porrosht sosɨr yok heke erahalo uje ye tehnyẽr olakpe.
\v 26 Ele ahle shish kuche mɨhnũwo tɨ̃r eyoklo heke tɨbɨte uje kal olak nohmɨre ich ye niyokõr kuche par shuu ɨre kɨnãha. Shish tyenɨj shiyokõr erze obiyo uje yesh shiyokõr.
\v 27 Kɨmɨjɨ ɨrãhta chɨhɨ ich ye moym, hn kɨmɨjɨ ye ɨrãhtɨrash ich ye eyãha.
\v 28 Per kɨmɨjɨ ey eku ich ye mɨhnɨ̃kpe, hn kɨmɨjɨ apɨbitɨta diilabey ich ye niyokõrpe uje mɨ̃hnɨk. Per ich kuche mɨhnũwo ich kɨhniya heke erze uje ochiileku hn erze uje ochiilabey ich tyenɨj mɨ̃hnɨk tɨ̃r õr. Ye tahmũrpe uje erze kuche mɨhnũwo tɨ̃r olak heke titɨm olakɨke tuu ɨtsorz.
\v 29 Pɨshɨbo watsaklo, titɨm olak ahnũwo pork ich yej Cristo cheeshpo nehe heke erze uje õr ɨrẽhte de tyenɨj ochiyuhu ɨre shɨ oshuu ɨre ɨtso uje ye õr ɨrẽhtɨrsh par uje oshiyokõr Cristo ɨr ɨbiyo.
\v 30 Erze uje oyerh ye ompe uje oyerhpa oshuu daalo kɨhniya, hn erze uje ich õr ayla ye ompe uje oshuu õr ahmiyo sontew uu õr ɨbiyo uje Porrosht ɨshɨm õr par uje oshiyokõr. Erze uje otiya kuche ye ompe uje shish oshuu deyuwo tɨsɨ̃r ɨr kushjãro.
\v 31 Erze uje otiya kuche hn ochiwãha ye shɨ tyenɨj oduhu ɨlorz par uje oshiyokõr Cristo ɨr ɨbiyo toy. Erze kuche uje de nãhu ɨ̃rmo wɨr shɨ sɨhna ɨre shɨchish.
\p
\v 32 Ye tahmũrpe uje shish uhu olak eyuwo tɨsɨ̃r kuche. Hnakɨrbich uje ye ɨrãhtɨrash shish shuu deyuwo tɨsɨrɨ̃hɨ eyok Ɨrhĩch ɨr ɨbiyo. Shɨ sehe duhu eyok Ɨrhĩch ehet kɨɨsɨhɨ ɨre.
\v 33 Per hnakɨrbich uje ɨrãhtash ma shuu deyuwo tɨsɨrɨ̃hɨ erze kuche uje de nãhu ɨ̃rmo par uje shuu nerãhta ehet kɨɨsɨhɨ ɨre.
\v 34 Heke shuu deyuwo tɨsɨrɨ̃hɨ Porrosht hn shuu deyuwo tɨsɨrɨ̃hɨ nerãhta toy. Tɨmcharrza waa je poluu hn tɨmcharrza waa je phar õr ɨtspo, shɨ oshuu deyuwo tɨsɨrɨ̃hɨ eyok Ɨrhĩch par uje oshuu ehet kɨɨsɨhɨ õr ɨre. Nos wɨr kuche uje oshuu deyuwo tɨsɨ̃r hn nos wɨr kuche uje oshiyokõr wɨr par eyok Ɨrhĩch, per tɨmcharrza waa je abichish shɨ shuu deyuwo tɨsɨrɨ̃hɨ erze kuche uje de nãhu ɨ̃rmo par uje shuu dabich ehet kɨɨsɨhɨ ɨre.
\v 35 Titɨm olak ahnũwo pork sehe takashɨm olak, ye par uje tahɨrm olakpe. Sehe tuu ahakõrlo uje ich ma om, hn ahakõrlo eyok Ɨrhĩch ɨr ɨbiyo hn uhu olak eyuwo chɨhɨ lalerc.
\p
\v 36 Uje yeẽk ɨr ihyãta chɨhɨ hn shuu deyuwo tɨsɨ̃r uje ich sahmũrpa wate hn wate terɨhɨ leherc, hn sehe nõyhi wate ahɨr hn ye pwele seempe ich ma om uje õhiye ahɨr pork sehe niyokõr duhu ɨlorz. Ye mɨhnɨ̃kpe.
\v 37 Per kɨmɨjɨ yeẽk duhu deyuwo tɨsɨ̃r uje yahpaa nahmũr diilekupe hn pwele iyem pork chɨraha tɨbey ɨre par uje ye niyokõr uje ich mɨ̃hnɨk wɨchɨ shiyokõr uje ich om.
\v 38 Heke ese uje chiileku shiyokõr uje ich om hn ese uje yahpaa nahmũrpe uje diileku shiyokõr uje ich ma om.
\p
\v 39 Tɨmcharrza shish tyenɨj sakaha dabich ahɨr uje ehn ɨka. Kɨmɨjɨ ɨr abich toy ich hnii wate pwele chiilabey per shɨ tyenɨj ĩhi duhut Porrosht aap ahɨr.
\v 40 Ich ma om uje shɨ wate poluu hn ehet kɨɨs. Ahnũwo uje titɨm watɨke tuu ɨtsorz pork Porrosht Ɨchɨbich takashɨm yok.
\c 8
\s Ode uje oshɨmɨhɨ loshɨpo ẽro kojano po.
\p
\v 1 Sehe titɨm olak erze olak ahwoso uje atɨmlo yok uje kɨmɨjɨ om otew erze loshɨpo ẽro uje oshuu hn oshɨmɨhɨ kojano po uje ochii porroshtɨhɨ o kɨmɨjɨ ye ompe. Nos yɨrahalo kuche. Erze oso uje ochɨraha kuche õr pwele onarim ɨre, per ich ma om kɨmɨjɨ onahmũrye ich otakashɨmye.
\v 2 Uje yeẽk tata uje nos chɨraha kuche wɨchɨ yẽrɨj dɨrahapa uje tyenɨj chɨraha.
\v 3 Per uje yeẽk sahmũr Porrosht ich Porrosht chɨraha ɨre pork chiihla ɨre heke wɨchɨ ɨr aap.
\p
\v 4 Sehe titɨm olak kɨmɨjɨ om uje elɨlo erze kuche ẽro uje oshɨmɨhɨ kojano po uje ochii porroshtɨhɨ o kɨmɨjɨ ye ompe. Yɨrahalo erze kojano po wɨr ye latɨkɨsh, ye Porroshtpe, hn yɨrahalo uje shɨ Porrosht sohmɨra uje de.
\v 5 Ode uje otata otsɨɨ: —Porrosht ich kɨhniya uje de poõrc hn uje de lɨka hnɨmich.— Heke par õr ɨre ich õr porrosht kɨhniya hn ich õr ɨrhẽ kɨhniya.
\v 6 Per par eyok ich shɨ Porrosht sohmɨra, wɨchɨ uu eyok Deych. Wɨchɨ uje nos shiyokõr erze kuche uje de, hn eyok de shɨ par uje eyok narim ɨre. Shɨ eyok Ɨrhĩch sohmɨra de. Wɨchɨ Jesucristo uje nos shiyokõr kuche uje de. Ɨre uje shuu eyok Porrosht aabo.
\p
\v 7 Per ode uje õr eyuwo tɨsɨ̃r uje porrosht kɨnãho ode ich kɨhniya per nĩhyok. Porrosht aabo nohmɨramo ode uje antni oteeychãha erze kojano po. Õr eyuwo shish tɨsɨ̃r uje erze kojano po ich ũru uje oshɨmɨhɨ erze kuche ẽro heke uje otew ich shuu ochuuna uje oshiyokõr uje mɨ̃hnɨk.
\v 8 Kɨmɨjɨ elɨlo erze kuche ẽro o kɨmɨjɨ ye elɨlope ich ye latɨkɨsh. Porrosht shish sahmũr olak.
\v 9 Abeylshɨp olak par uje ye wɨr oneẽt olak erze uje yẽrɨj odɨraha pishɨ Porrosht hn uhulo oshiyokõr erze uje wɨr oshuu deyuwo tɨsɨ̃r uje Porrosht ye nahmũrpe per olak erahalo uje ye mɨhnɨ̃kpe.
\v 10 Owa eraha erze kuche. Kɨmɨjɨ yeẽk teychɨm owa uje akaha erze kojano po ɨr ihyuch hn aak heke uhu seẽt owa hn tew toy erze uje oshuu hn oshɨmɨhɨ erze kojano po pork wɨr ye dɨrehepe erze uje eraha heke shuu deyuwo tɨsɨ̃r uje Porrosht ye nahmũr uje tew erze kuche ẽro heke ye ompe uje ɨre tew.
\v 11 Uhu ese eshɨbich shiyokõr uje mɨ̃hnɨk shɨ pork ye dɨrehepe. Cristo tooho krus eeychkite par ese eshɨbich toy.
\v 12 Heke uje uhu olak leshɨbo oshiyokõr uje ich mɨhnũwo ich ahakõrlo mɨhnɨkɨ̃hɨ õr. Uhulo ochuuna uje oshiyokõr uje ich mɨhnũwo pork ye odɨrehepe. Uje ahakõrlo uhulo ɨtsorz ich ahakõrlo mɨhnɨkɨ̃hɨ Cristo.
\v 13 Heke kɨmɨjɨ taw erze kuche ẽro ich tuu ese pɨshɨbich shiyokõr uje ich mɨ̃hnɨk, ich ma om uje ye taw par uje ye tuu niyokõr uje ich mɨ̃hnɨk.
\c 9
\s Pablo wɨchɨ apóstol heke pwele sapur õr kuche.
\p
\v 1 Sehe titɨm olak. Nĩhyok uje yeẽk pwele sontew yok par uje ye tiyokõr uje tɨkɨraha uje ich om. Yok apóstol. Tukumo eyok Ɨrhĩch Jesusni. Pɨbiyo shɨ uje tuu amsahaloni par Porrosht aabo.
\v 2 Kɨmɨjɨ yewo ye odɨrehepe uje yok apóstol mahn olak erahalo uje yok apóstol pork tuu amsahaloni par olak Porrosht aabo.
\v 3 Ahnũwo uje titɨm erze oso uje otsotiis uje yok apóstol.
\v 4 Õryok ye õryok kɨnãhope hn erze apóstole yewo ye õr kɨnãhope. Õryok ɨtsye. Heke õryok pwele oyapur Porrosht aabo par uje oshɨm õryok uje par oyahu hn par uje oyoho.
\v 5 Kɨmɨjɨ õryok ɨrẽhte chɨhɨ uje Porrosht eebe ich õryok pwele oyukwii õr ɨtso erze apóstole yewo uje ohnoy nerẽhte hn ɨtso uje erze eyok Ɨrhĩch Jesús ɨr leshɨbo ohnoy nerẽhte hn ɨtso uje Pedro hnoy toy.
\v 6 Bernabé hn yok ye õryok kɨnãhope hn erze apóstole yewo ye õr kɨnãhope. ¿Ɨnaapo tyenɨj oyishew obiyo par uje oyiya õryok poso?
\v 7 ¿Yeẽkpo uje masaha par ohyerptos hn tyenɨj tiya kuche uje nesita? Nĩhyok. ¿Yeẽkpo uje chukwẽr uva hn ye dohope? Nĩhyok. ¿Yeẽkpo uje tɨbey erze obejɨ hn ye doho ishope uje chiyuhu? Nĩhyok.
\v 8 ¿Je shɨ titɨm olak uje tãra yok peyuwo? Ye titɨm olakpe tuu ɨtsorz. Porrosht ahwoso tata shuu ɨtsorz
\v 9 pork Porrosht ahwoso uje Moisés chichewkite tata shuu ɨtsorz ɨm: —Uje weyt tarãha trigo hnɨmich par shuu yuhur tokole ich ye aharu ahwo par uje pwele taak.— Porrosht ye duhu deyuwo tɨsɨrɨ̃hɨ ese weytpe.
\v 10 Shɨ shuu deyuwo tɨsɨrɨ̃hɨ eyok. Shuu ochichew erze lahwoskite par uje yɨraha uje erze uje ochishew obiyo tyenɨj oshɨ õr uje otserz. Ese uje chukwẽr jõro tyenɨj somtɨs hnɨmich wap hnii chukwẽr hn iyem erze jõro ee uje ɨr yɨnsɨrc tyenɨj ɨshɨm ɨre pɨkaabɨt. Ich shɨ ɨtso ese yet uje chekushu erze jõro ee. Wɨchɨ tyenɨj iyem par uje ɨshɨm ɨre pɨkaabɨt toy.
\v 11 Heke uje oyitɨm olak Porrosht ahwoso ich shɨ ɨtso uje oyukwerɨ̃hɨ olak aho. Ich ye mɨhnɨ̃kpe uje asɨmɨhɨlo õryok olak kuche uje õryok nesita.
\v 12 Yewo ochɨraha uje ich om uje otsapur olak par uje akashɨmlo õr per ich ma om uje õryok uje oyakashɨm olak oyapur olak per ye oyapur olakpe.
\p Shɨ õryok ewenta uje kuche nihyokɨ̃hɨ õryok ahɨr par uje ye Cristo ɨr ɨbiyo sehepe uje oyitɨm õr uje Cristo ɨshɨ õr hnɨtewɨhɨ Porrosht ahɨrkite.
\v 13 Erahalo erze uje ochishew obiyoho templo patikɨt ehet õr poso tãra erze uje oshɨmɨhɨ Porrosht, hn erze uje otɨbey ese altar uje otserũhu loshɨpo par oteeychãha Porrosht erze loshɨpo ẽro pɨkaabo wɨr par õr ɨre.
\v 14 Ele ahle ich ɨtso uje antni pork eyok Ɨrhĩch tata erze uje otsanɨmɨrãha ɨr ahwoso otatɨm oso uje ɨre ɨshɨ õr hnɨtewɨhɨ Porrosht ahɨrkite hn erze uje õr nesita tãra erze uje oshɨmɨhɨ Porrosht.
\v 15 Yok pwele tapur olak tuu ɨtsorz per yelɨj tapur olak. Ahnũwo uje tichew tɨbɨte ana hutɨta ye par uje tapur olak kuchepe par uje tuu asɨmlo yok. Ich ma om uje tɨkɨtɨ je uje tapur olak poso uje tanɨmɨrãha Porrosht ahwoso pork kɨmɨjɨ tapur olak tuu ɨtsorz ich ye yok pwele titɨm oso uje nĩhyok pɨbahat uje tanɨmɨrãha Porrosht ahwoso.
\v 16 Uje titɨm oso uje Jesús ɨshɨ õr hnɨtewɨhɨ Porrosht ahɨr ich ye ompe uje yok narim yok. Porrosht wɨchɨ uje tatɨm yok par tiyokõr erze ɨr ɨbiyo. Kɨmɨjɨ ye tiyokõr ich mɨhnɨ̃kpa par yok,
\v 17 per kɨmɨjɨ tahmũr tiyokõr uje Porrosht tatɨm yok ich yok premit de. Kɨmɨjɨ ye tahmũr tiyokõr uje ɨre tatɨm yok hn shɨ tiyokõr ich nĩhyok ye yok premitɨkɨsh.
\v 18 ¿Latɨkpo uje yok premyo? Yok premyo wɨchɨ uje tanɨmɨrãha titɨm oso uje Jesús ɨshɨ õr hnɨtewɨhɨ Porrosht ahɨrkite hn nĩhyok ye ɨr bahatɨkɨsh. Ye tapur olakpe par uje tuu eshɨlo yok uje titɨm olak tuu ɨtsorz.
\p
\v 19 Ye yok õr yɨlakpe per tɨbɨte tuu yok ɨtso uje oso õr yɨlak par uje tuu omasaha par Porrosht aabo ich ma okɨhniya.
\v 20 Uje yok de israel oso õr ahɨr ich tiyokõr tuu yok ɨtso uje oshiyokõr par uje tuu omasaha par Porrosht aabo. Hn erze yewo uje oshiyokõr asa ley waa je Moisés chichewkite ich tiyokõr tuu yok ɨtso õr. Ich ye par yokpe asa ley per shɨ tiyokõr teẽt õr par uje tuu omasaha ich okɨhniya par Porrosht aabo.
\v 21 Hn erze uje ye õr israel osope uje ye asa ley chɨhɨ õr ahɨrpe ich tiyokõr tuu yok ɨtso õr par uje tuu omasaha par Porrosht aabo. Shish tiyokõr erze ley uje tãra Porrosht uje Cristo chɨbɨte.
\v 22 Uje yok de wɨr õr ahɨr erze uje ich õr kaso yahpaa odɨraha latɨk ich shɨ tɨkɨnta õr tiyokõr tuu yok ɨtso õr par uje takashɨm õr par uje tuu omasaha par Porrosht aabo. Heke teẽt oso õr ɨluu uje kɨnẽhe kɨnẽhe par uje tuu sohmɨramo omasaha par Porrosht aabo.
\p
\v 23 Tanɨmɨrãha Porrosht ahwoso par uje tuu ochɨraha uje Jesús ɨshɨ õr hnɨtewɨhɨ Porrosht ahɨrkite hn uje omasaha par Porrosht aabo ich õr ayla heke ich shuu yok ayla toy.
\p
\v 24 Olak erahalo, erze uje sehe ochoshɨ ich nos ooshɨ per shɨ sohmɨra uje serz. Wɨchɨ uje oshɨm premyo. Olak shɨ olak ɨtso erze uje ooshɨ. Kɨmɨjɨ ahakõrlo Porrosht ɨbiyo uhulo tokole om ich erzlo erze premyo.
\v 25 Nos wɨr uje sehe ochoshɨ tyenɨj otɨbey ɨre par uje õr pwele otserz. Hn ese uje serz ich oshiyokõr wolt ochɨ̃ra ɨraho ĩhyo par uje ochɨmchaha huta, per wɨr shɨ sɨhna ɨre shɨchish. Eyok premyo uje Porrosht ɨshɨm eyok wɨr uje yelɨj nɨhna ɨre.
\p
\v 26 Yok tɨbɨte uje shɨ tiyokõr pɨbiyo, ye tuu yok ɨlo yeẽk uje shɨ uushɨ dal lekɨtiyo, hnii ye yok ɨlope erze uje shɨ oshuu del ɨchɨbiyo.
\v 27 Tɨkɨbey pishɨ yok par uje ye tiyokõr uje mɨ̃hnɨk, pork uje yuwɨr uje tanɨmɨrãha Porrosht ahwoso titɨm oso ich yok premit de pork ye tiyokõrpe uje ich mɨ̃hnɨk.
\c 10
\s Ye ompe oteeychãha kojano po.
\p
\v 1 Pɨshɨbo watsaklo, sehe titɨm olak uje tokolɨhɨ eyoklo poruwo wɨshkite. Nos oyehe asa ukuhurrza nẽr uje Porrosht shuu iyeebe, hn nos ochɨkãha asa onoota bahluta ehet waa je iich otsɨɨ Mar Rojo.
\v 2 Nos wɨr õr ɨre shɨ ɨtso uje otohɨrm orɨ̃hɨ asa ukuhurrza ehet uje oyehe nẽr hn shɨ ɨtso uje otohɨrm orɨ̃hɨ asa onoota bahluta ehet par uje õya Moisés.
\v 3 Nos wɨr õr ɨre otew erze oposo uje Porrosht ɨshɨm õr,
\v 4 hn nos wɨr õr ɨre oho ese awɨt uje Porrosht ɨshɨm õr uje tãra ese kojach. Ese kojach shɨ ɨtso uje ĩya õr uje awɨt tãra uje ohno. Ese kojach wɨchɨ shɨ ɨtso Cristo.
\v 5 Per ma okɨhniya oshiyokõr uje Porrosht ye nahmũrpe heke shuu otooho wahachkite hnɨmich uje ɨsa.
\v 6 Erze kuche mɨhnũwo uje tɨ̃r õr shuu yɨraha uje ye ompe yahmũr erze kuche mɨhnũwo yuhu eyok ɨtso õr,
\v 7 heke olak ye ompe uje eeychãhalo kojano po uhu olak ɨtso õr. Porrosht ahwoso tata shuu ɨtsorz ɨm: —Erze oso otsakɨr par uje otaak hn oho hn oyehet par uje oshiyokõr weyla hn oshiyokõr mɨhnuwõhoye.—
\v 8 Erze kuche shiyokorãha eyok uje ye ompe hnakɨrbo hn tɨmcher oshiyokorɨ̃hɨye uje mɨ̃hnɨk, hnii otorãhaye, hnii hnakɨrbo hnakɨrbo õhiye ahɨr, hnii tɨmcher tɨmcher õhi yẽr ahɨr, hnii nos wɨr kuche uje ɨtso wɨr. Erze israel oso õr poruwo wɨshɨ oshiyokõr oshuu ɨtsorzkite heke shiyehe wɨchɨ deeych hn beynti tre mil oso otoy.
\v 9 Deeych yet hn yewo otsepɨ eyok Ɨrhĩch hn echɨ̃re ches õr shuu okɨhniya otoy. Ye epɨlo eyok Ɨrhĩch uhu olak ɨlo õr.
\v 10 Ye eyehnɨmlo Porrosht uhu olak ɨlo erze uje ochinehnɨm Porroshtkite heke Porrosht ɨr anjel tɨ̃r õr hn shuu õr shuu otoy.
\v 11 Nos wɨr erze kuche uje tokolɨhɨ erze eyok poruwo wɨshkite wɨr par shuu yɨrahalo uje ye ompe uje yiyokõrlo erze mɨhnũwo uje oshiyokõrkite oshuu ɨtsorz. Porrosht shuu ochichew lahwoskite par uje oshiyokorãha eyok uje yesh eyok ɨka uje yej terɨhɨ ɨ̃rmo uhurc.
\v 12 Heke ese uje narim ɨre pork chɨbɨte uje yelɨj duhu ɨre ɨlo uu ɨr poruwo wɨshɨ oshiyokõrkite tyenɨj tɨbey ɨre par uje ye niyokõr duhu ɨre ɨlo õr.
\v 13 Ye shɨ olakpe uje erze kuche tɨ̃r olak par uje shuu ahakõrlo uje ich mɨhnũwo pork erze uje tɨ̃r olak tɨ̃r oso yewo toy. Porrosht wɨchɨ uje shish tɨbey olak. Yelɨj duhu erze kuche mɨhnũwo tɨ̃r olak uje ich dospa nehech ye olak pwele par uje olak ewenta, per uje erze kuche mɨhnũwo tɨ̃r olak par uje sehe duhu ahakõrlo uje mɨ̃hnɨk ich wɨchɨ takashɨm olak par uje olak pwele atokolɨhɨlo erze uje ich mɨ̃hnɨk. Heke olak pwele ahamlo erze kuche mɨhnũwo hn ye ahakõrlo.
\p
\v 14 Pɨshɨbo watsaklo, heke titɨm olak par uje ahamlo erze kojano po uje oso oteeychãha par uje ye eeychãhalo toy.
\v 15 Titɨm olak uje olak eykdeyo, uhu olak eyuwo tɨsɨ̃r kɨmɨjɨ ũru erze uje titɨm olakɨke.
\v 16 Uje yooholo ese uva otich uje de asa basta ehet ich yɨna Porrosht hn eyok eyucha uje Jesús tooho krus eeychkite hn ɨr armɨsta noshɨ par uje ɨshɨ eyok hnɨtewɨhɨ Porrosht ahɨr. Uje yahu ese pan ich eyok eyucha Cristo ɨr ɨkiyo uje ich dospa uje tooho krus eeychkite.
\v 17 Eyoklo kɨhniya uje yahulo ese pan uje shɨ sohmɨra, heke eyok ɨkiyo shɨ ɨtso uje sohmɨra, pork eyok Cristo ɨr ɨkiyo pork shiyehe wɨchɨ ese pan uje yahulo yakɨshlo.
\v 18 Uhu olak eyuwo tɨsɨ̃r erze israel oso. Uje otew erze loshɨpo uje oshuu hn ochɨbɨte altar eeych par oshɨmɨhɨ Porrosht ich shɨ ɨtso uje otaakɨhɨ Porrosht ahɨr.
\v 19 Uje titɨm olak tuu ɨtsorzni ich ye tɨbɨtpe uje erze kojano po wɨr Porrosht. Wɨr ye latɨkɨsh, hn erze loshɨpo ẽro uje oshuu hn oshɨmɨhɨ erze porrosht kɨnãho uje kojano po wɨr ye latɨkɨsh.
\v 20 Uje titɨm olak uje wɨr ye latɨkɨsh ich shɨ sehe titɨm olak erze uje ye odɨraha Porroshtpe oshuu erze loshɨpo par uje oshɨmɨhɨ erze kojano po per ich shɨ oshɨmɨhɨ demonyo, ye odosɨmɨhɨ Porroshtpe. Heke ye meylo õr uje oteeychãha erze kojano po pork ye tahmũrpe uje meylo erze demonyo.
\v 21 Ich om uje ehelo ese otich uje de asa basta ehet uje oshiyokõr Santa Cena per ye ompe etɨ̃rlo ese owich par ehelo ese otich uje oho par uje oteeychãha demonyo. Ich om uje elɨlo ese pan uje oshiyokõr Santa Cena per ich ye ompe uje etɨ̃rlo ese owich par elɨlo erze oposo uje oshiyokõr õr ahamich par demonyo.
\v 22 ¿Je om uje yiyokõrlo yuhulo ɨtsorz hn yuhulo Porrosht chesdelo? ¿Je eyok ukurbo sowe ɨre?
\s Kuche uje Porrosht aabo tyenɨj oshiyokõr.
\p
\v 23 Sehe titɨm olak. Nos eyok pwele yiyokõrlo uje shɨ eyok yahmũr hn ye yiyuwe leype per ye nos wɨr kuche takashɨm eyoklope. Eyok pwele yiyokõr uje shɨ eyok yahmũr per ye nos erze kuche duhu eyok ɨluu ompe ɨlo eyok Ɨrhĩch.
\v 24 Ye ompe uje yeẽk shɨ shuu deyuwo tɨsɨ̃r uje ich om par ɨre. Tyenɨj shuu deyuwo tɨsɨ̃r uje ich om par yewo toy.
\v 25 Etɨ̃rlo ese owich uje ochiwãha kuche ẽro par uje eylo hn elɨlo. Ye atɨmlo õr on: —¿Tãra ɨraãpo?— par uje ye uhu olak eyuwo tɨsɨ̃r uje erze ẽro ich mɨhnũwo,
\v 26 pork Porrosht wɨchɨ uu ɨ̃rmo yɨnsɨrc, hn nos wɨr kuche uje de ehet wɨchɨ shiyokõr.
\v 27 Kɨmɨjɨ yeẽk uje ye Porrosht aappe tatɨm owa par uje aakɨhɨ ɨre ahɨr, kɨmɨjɨ ahmũr ich bo Mẽya ɨre. Ew uje ɨre ɨshɨm owa. Ye atɨm ɨre je shɨ duhu tãra ɨraãpo erze loshɨpo ẽro kɨmɨjɨ wɨr uje oshɨmɨhɨ kojano po par uje ye uhu eyuwo tɨsɨ̃r uje wɨr mɨhnũwo.
\v 28 Per kɨmɨjɨ yeẽk tatɨm owa ɨm: —Oshɨmɨhɨ erze loshɨpo ẽro kojano poko,— heke ye ompe uje ew pork wɨchɨ tatɨm owaka shuu ɨtsorz. Ye ompe par uje uhu ɨre shiyokõr mɨhnũwo pork wɨchɨ chɨbɨte uje Porrosht ye nahmũr uje tew.
\v 29 Wɨchɨ shuu deyuwo tɨsɨ̃r uje wɨr ich mɨhnũwo ye owape uje uhu eyuwo tɨsɨ̃r, heke ye ompe uje ew erze kuche ẽro hn uhu ɨre shiyokõr uje ich mɨ̃hnɨk. ¿Ɨnaapo heke ye yok pwelpe par taw shɨ pork wɨchɨ shuu deyuwo tɨsɨ̃r uje wɨr ich mɨhnũwo? Par yok ich ye mɨhnũwope uje taw erze kuche ẽro.
\v 30 Kɨmɨjɨ tɨkɨna Porrosht uje taw erze kuche ẽro ¿ɨnaapo uje yewo ochɨbɨte uje tiyokõr uje mɨ̃hnɨk?
\v 31 Nos wɨr kuche ẽro uje elɨlo hn uje ehelo hn nos wɨr kuche yewo uje ahakõrlo ich shish tyenɨj olak narim Porrosht uhulo dich.
\v 32 Ye uhulo erze israel oso oniyokõr uje ich mɨ̃hnɨk hnii erze dihipo kɨnãho hnii erze Porrosht aabo.
\v 33 Shɨ tyenɨj ahakõrlo uhulo olak ɨlo yok. Nos tiyokõr wɨr kuche par uje tuu oso õr aho kɨɨsɨhɨ yok. Ye tiyokõrpe erze uje ich om shɨ par yok. Tiyokõr uje ich om par nos wɨr erze yewo toy par uje tuu omasaha par Porrosht aabo toy.
\c 11
\nb
\v 1 Eẽtlo yok pork yok teẽt Cristo.
\s Ich om par tɨmcher õr akɨ̃re berzo.
\p
\v 2 Titɨm olak. Tahmũr uje shish olak eyucha yok hn ahakõrlo uje titɨm olakni.
\v 3 Sehe tuu erahalo uje Cristo wɨchɨ uu hnakɨrbo õr yɨnsɨrc, hn kal tɨmcharrza uje ɨr abich de, wɨchɨ uu ɨr yɨnsɨrc, hn Cristo ɨr yɨnsɨrc wɨchɨ Porrosht.
\v 4 Hnakɨrbich uje orar sapur Porrosht o kɨmɨjɨ nanɨmɨrãha Porrosht ahwoso uje sajuwe deheta ich wɨchɨ ye tola nensɨrc Cristope.
\v 5 Per kɨmɨjɨ tɨmcharrza orar sapur Porrosht o kɨmɨjɨ nanɨmɨrãha Porrosht ahwoso hn ye lajuwe lehetape wate ye tola labichpe pork wɨchɨ uu ɨr ɨrhĩch. Uje ye lajuwe dehetape ich shiyokõr shɨ ɨtso uje tuhu deheta sɨhnshɨp.
\v 6 Kɨmɨjɨ wate ye nahmũr lajuwe leheta ich ma om uje tuhu deheta hn sɨhnshɨp, per kɨmɨjɨ tuhu leheta ich shuu pook je ma om uje wate ye tuhu leheta per tyenɨj sajuwe leheta uje orar.
\v 7 Ye ompe uje hnakɨrbich sajuwe leheta uje ɨre orar o kɨmɨjɨ nanɨmɨrãha Porrosht ahwoso pork wɨchɨ Porrosht shiyokõrkite shuu ɨtso ɨre. Porrosht ich dich hn shuu hnakɨrbo õr deyo toy. Per kɨmɨjɨ asa tɨmcharrza lajuwe leheta ich shuu ɨmeheeych uje ese hnakɨrbich ich dich.
\v 8 Porrosht ye niyokõr hnakɨrbich petɨkkite nɨ̃ra tɨmcharrza arzɨbich. Shɨ shiyokõr tɨmcharrza chɨ̃ra hnakɨrbich arzɨbich.
\v 9 Ye niyokõr hnakɨrbich petɨkkite par tɨmcharrza ɨr ihyẽrak. Shɨ shiyokõr asa tɨmcharrza par hnakɨrbich ihyẽra.
\v 10 Heke ich om uje tɨmcharrza sajuwe deheta par chɨbɨte orhõta uje ɨr abich ich dich hn par nos wɨr anjele oteychɨm ɨre hn ochɨraha uje tola dabich.
\v 11 Kɨmɨjɨ nĩhyok hnakɨrbo ich nĩhyok tɨmcher o kɨmɨjɨ nĩhyok tɨmcher ich nĩhyok hnakɨrbo pork nos õr nesitye.
\v 12 Porrosht shiyokõr tɨmcharrzkite chɨ̃ra hnakɨrbich arzɨbich per ele ahle hnakɨrbo oshũrha otãra tɨmcher hn Porrosht nos shiyokõr erze kuche uje de poõrc hn de hnɨmichkite.
\v 13 Sehe tuu uhulo olak eyuwo tɨsɨ̃r. ¿Je om uje tɨmcharrza orar sapur Porrosht hn ye lajuwe lehetape? Ye ompe.
\v 14 Ich nos ochuuna uje ich mɨ̃hnɨk uje hnakɨrbich iimɨhɨ lakɨ̃rt,
\v 15 per par tɨmcharrza ich om uje ɨr akɨ̃rt berzak pork ich ma ɨhɨ̃rt par ɨre. Porrosht ɨshɨm wate akɨ̃rt par sajuwe deheta.
\v 16 Kɨmɨjɨ olak yeẽk ye nahmũr uje oyiyokorãha oso oyuhu ɨtsorz ich tyenɨj chɨraha uje nos wɨr Porrosht aabo hn õryok eyuwo ɨtsye.
\s Uu Santa Cena ɨr ɨluu.
\p
\v 17 Titɨm olak. Ye tahmũrpe erze uje ahakõrlo. Uje akɨshlo olak owich ich ye ahakõrlope uje ich om. Ahakõrlo uje ich mɨhnũwo.
\v 18 Wap sehe titɨm olak uje shish tukunt uje akɨshlo olak owich ich eheklo olak. Ye tokotiispe erze uje shish otatɨm yok.
\v 19 Shɨ eheklo olak heke Porrosht shuu ɨmeheeych uje yeniipo olak ehet uje õr Porrosht aabo pisho.
\v 20 Uje akɨshlo olak owich par uje ahakõrlo Santa Cena ich ye Santa Cenape ese uje ahakõrlo,
\v 21 pork uje terɨhɨ orta par uje aaklo wap ich ekutɨrãha olak erze oposo par uje elɨlo. Ye anemlo erze yewope par uje otew toy. Uhulo iyehi õr. Shɨ õr iyuwo sẽhi õr, hn olak yet de uje shuu yɨkɨch sẽhi ɨre.
\v 22 Olak ihyuwo de par uje aakɨhɨlo hn ehelo. Uhulo erze Porrosht aabo yewo shɨ ɨtso uje ye õr jukur, hn uhulo opook erze uje õr losuhlaabo. ¿Titɨm olak latɨkpo? Ye ompe uje titɨm olak uje ahakõrlo uje ich om.
\p
\v 23 Ich titɨm olakpo ahnũwo uje tãra eyok Ɨrhĩch uje titɨm olakni. Shɨyehe wɨchɨ dɨhlakkite uje ehn yahpaa Judas dosɨm eyok Ɨrhĩch Jesús erze oso uje otsɨtak ɨre hn Jesús chishew ese pan.
\v 24 Nɨhna Porrosht hn sehek. Tatɨm õr ɨm: —Nãhu yok pẽro. Tokosɨm yok ahnũwo oso pork tyenɨj tɨkɨtɨhɨ olak. Ahakõrlo uhulo ɨtsorz par uje olak eyucha yok.—
\v 25 Uje ich nos oteku hn Jesús chishew asa basta uje otich de ehet hn tatɨm õr ɨm: —Ele otich uje de ana basta ehet shɨ tɨteẽta ahnũwo ahwoso ahlo uje titɨm olak pork tyenɨj tɨkɨtɨ hn parmɨsta noshɨ. Uje ahakõrlo ich uhulo ɨtso ese uje tiyokõrke hn ehelo ese otich nehe ich tyenɨj olak eyucha yok.—
\v 26 Uje elɨlo ese pan hn ehelo ese otich uje de asa basta ehet ich uhulo ɨmeheeych uje eyok Ɨrhĩch ɨshɨ õr hnɨtewɨhɨ Porrosht ahɨrkite. Shish ahakõrlo nehech eyok Ɨrhĩch cheeshpo nehe.
\p
\v 27 Uje yeẽk shiyokõr uje ich mɨhnũwo hn ye nɨshiipe hn tew ese pan hn ɨhɨ ese otich uje de asa basta ehet wɨchɨ shɨ shiyokõr mɨhnɨkɨ̃hɨ eyok Ɨrhĩch ɨr ɨkiyo hn ɨr armɨsta.
\v 28 Heke uje ehn yahpaa odoho Santa Cena ich tyenɨj uhu olak eyuwo tɨsɨ̃r wap kɨmɨjɨ ahakõrlo uje mɨ̃hnɨk o kɨmɨjɨ ye ahakõrlope. Kɨmɨjɨ ahakõrlo uje mɨ̃hnɨk hn ye enshiilope ich ye ompe uje ehelo asa Santa Cena.
\v 29 Ese uje tew ese pan hn ɨhɨ ese otich uje de asa basta ehet hn ye duhu deyuwo tɨsɨ̃rpe uje Cristo tooho par ɨre, wɨchɨ tew ese pan hn ɨhɨ ese otich shuu ɨtsorz par uje shuu Porrosht sepyẽr ɨre.
\v 30 Heke ich olak kɨhniya uje ye olak ukũrbɨrsh, hn yewo õr permo, hn olak nohmɨramo otoy.
\v 31 Per kɨmɨjɨ yuhu eyok eyuwo tɨsɨ̃r wap kɨmɨjɨ yiyokõrlo uje mɨ̃hnɨk o kɨmɨjɨ ye yiyokõrlope par uje yɨnshiilo eyok ich ye eyok Ɨrhĩch lepyẽr eyokpe.
\v 32 Deeych yet nehe hn eyok Ɨrhĩch teychɨm eyok kɨmɨjɨ yiyokõrlo uje om o kɨmɨjɨ yiyokõrlo uje mɨ̃hnɨk. Kɨmɨjɨ yiyokõrlo uje mɨ̃hnɨk ich wɨchɨ sepyẽr eyok par uje ye yukwĩya erze ɨ̃rmo oso uje otɨ̃r urhuta bahluta ehet nehe.
\v 33 Pɨshɨbo watsaklo, heke titɨm olak. Uje akɨshlo olak owich par uje aaklo ich tyenɨj anemloye par uje nos aaklo.
\v 34 Kɨmɨjɨ yeẽk chɨhɨ olak ehet uje ɨr iyuwo sẽhi ich tyenɨj taakɨhɨ lahuch wap. Heke uje akɨshlo olak owich ich ye uhulo Porrosht depyẽr olak. Uje tekɨrɨhɨ olak nehe hn titɨm olak nos wɨr kuche yewo uje de asa olak hutɨta uje asɨmlo yokni par uje atɨmlo yok.
\c 12
\s Porrosht Ɨchɨbich ɨshɨm õr eyuwo par oshiyokõr ɨr ɨbiyo.
\p
\v 1 Pɨshɨbo watsaklo, ele ahle sehe titɨm olak uje Porrosht Ɨchɨbich ɨshɨmɨhɨ Porrosht aabo õr eyuwo o ɨshɨmɨhɨ õr ukurbo par uje oshiyokõr ɨr ɨbiyo. Ye tahmũrpe uje ye erahalope.
\v 2 Erahalo uje ehn yahpaa olak Porrosht aabo petɨkni ich oso ode uje oshuu eeychãhalo erze kojano po uje ye dilehetpe.
\v 3 Heke ele ahle sehe tuu erahalo uje Porrosht Ɨchɨbich yelɨj duhu yeẽk lajɨr Jesús ɨkiyo. Nĩhyok uje yeẽk pwele tatɨm yewo ɨm: —Jesús wɨchɨ uu yok Ɨrhĩch— uje ye Porrosht Ɨchɨbich duhu tata duhu ɨlorz.
\p
\v 4 Sehe titɨm olak. Porrosht nos ɨshɨmɨhɨ eyok eyuwo o eyok ukurbo shuu kɨnãho kɨnãho par shuu eyok dɨtuwo par uje yiyokõr ɨr ɨbiyo per nos wɨr erze eyuwo hn ukurbo shɨ tãra Porrosht Ɨchɨbich.
\v 5 Porrosht Ɨchɨbich shuu eyok yewo omasaha par Porrosht aabo õr bahluwo per õr ɨbiyo kɨnãho kɨnãho, per shish wɨr eyok Ɨrhĩch ɨr ɨbiyo.
\v 6 Obiyo ich kɨhniya uje ich kɨnãho kɨnãho uje sehe duhu yiyokõr per Porrosht shish sohmɨra. Chɨbɨte eyok aho uje sehe duhu nos yiyokõr.
\v 7 Ich ɨmeheeych uje Porrosht Ɨchɨbich de eyok aho pork shuu eyok dɨtuwo par yakashɨmloye.
\v 8 Porrosht Ɨchɨbich shuu Porrosht aap nohmɨra eykdeyo par chɨraha Porrosht ahwoso hn tatɨm õr, hn shuu yet chɨraha sanɨmɨrãha lahwoso, per shɨ Porrosht Ɨchɨbich wɨchɨ uje shuu õr dɨtuwo.
\v 9 Ɨshɨm yet eyuwo par uje ma ye duhu lotiis Porrosht. Ese õr eyuwo shɨ tãra Porrosht Ɨchɨbich, hn ɨshɨm yet ukurbo par uje shuu chukuta erze uje õr permo per shɨ tãra Porrosht Ɨchɨbich.
\v 10 Ɨshɨm yet ukurbo par uje shuu shiyokõr erze kuche uje ye latɨk pwele shiyokõr, hn ɨshɨm yet eyuwo par uje shuu dɨtɨk sanɨmɨrãha erze ahwoso uje Porrosht tatɨm ɨre, hn ɨshɨm yet eyuwo par uje shuu chɨraha kuche kɨmɨjɨ tãra Porrosht Ɨchɨbich o kɨmɨjɨ tãra ɨchɨbich kɨnẽhet. Porrosht Ɨchɨbich ɨshɨm yet eyuwo par uje seẽt ahwoso kɨnãho, hn ɨshɨm yet eyuwo par uje shuu chɨraha erze ahwoso kɨnãho uje yet seẽt hn shuu cheeshɨ tatɨm Porrosht aabo yewo.
\v 11 Nos wɨr erze ukurbo shɨ tãra Porrosht Ɨchɨbich. Ɨshɨm oso kal nohmɨr nohmɨr uje ɨre sehe dosɨm õr.
\s Porrosht aabo wɨr Cristo ɨr ɨkiyo.
\p
\v 12 Sehe titɨm olak. Hnakɨrbich shɨ sohmɨra per ɨkiyo ich kɨhniya per shish ɨre sohmɨra. Nos wɨr Porrosht aabo wɨr Cristo ɨr ɨkiyo uje shɨ sohmɨra.
\v 13 Porrosht Ɨchɨbich shɨ sohmɨra. Wɨchɨ de eyok aho uje eyok Porrosht aabo hn shuu ɨtso uje nos tohɨrm eyok par uje shuu eyok Cristo ɨr ɨkiyo. Kɨmɨjɨ eyok israel oso o kɨmɨjɨ eyok dihipo kɨnãho, o kɨmɨjɨ eyok õr yɨlo o kɨmɨjɨ ye eyok õr yɨlope per Porrosht Ɨchɨbich nos de eyok aho uje eyok Porrosht aabo.
\v 14 Eyok ɨkiyo ich kɨhniya, ye shɨ sohmɨrape.
\v 15 Kɨmɨjɨ eyok yeẽk pota ese yet ɨr ɨbiyo ich shɨ ɨtso uje asa Cristo ɨr hnɨtɨta tata ɨm: —Ye yok Cristo hmatape heke ye yok Cristo ɨr ɨkiyope— per wɨchɨ shish Cristo ɨr ɨkiyo.
\v 16 Kɨmɨjɨ Cristo ɨr ãrza tata ɨm: —Ye yok Cristo onta eyhitape heke ye yok Cristo ɨr ɨkiyope— per wɨchɨ shish ɨr ɨkiyo.
\v 17 Kɨmɨjɨ Cristo ɨr ɨkiyo shɨ onta eyhita ¿ich duhu ɨnaapo par uje chunt kuche? Kɨmɨjɨ Cristo ɨr ɨkiyo shɨ ãrza ich ye ɨre pwele uje chowɨhɨr latɨk.
\v 18 Porrosht wɨchɨ uje chɨbɨte eyok ɨkiyo erze po nohmɨr nohmɨr ɨr owich uje ɨre sahmũr.
\v 19 Kɨmɨjɨ eyok shɨ ãrza sohmɨra ich nĩhyok eyok ɨkiyo yewo.
\v 20 Ich ũru uje hnakɨrbich ɨr ɨkiyo ich kɨhniya per shɨ ɨre sohmɨra.
\v 21 Tɨteẽta kuchɨt yet. Cristo ɨr onta eyhita ye pwelpe tatɨm Cristo ɨr hmata ɨm: —Ye yok nesit owape.— Cristo ɨr huta ɨtspo ye pwele uje tatɨm ɨr hnɨtɨta ɨm: —Ye yok nesit owape.—
\v 22 Pork erze po uje de eyok ɨkiyo uje shɨ ɨtso uje ye ukũrbɨrsh per ich shish eyok nesita.
\v 23 Eyok ɨkiyo uje yẽrɨj om ich yuhu ma om. Eyok ɨkiyo de uje ye ompe par oso omo ich yakɨs yonãha eyok ɨshuwo,
\v 24 per eyok ɨkiyo uje oso omo ich ye yakɨspe. Porrosht wɨchɨ uje nos shiyokõr eyok ɨkiyo shuu yɨbey eyok ɨkiyo uje ye ompe yowa oso
\v 25 par uje ye dehek ɨre per shish nos takashɨmye.
\v 26 Kɨmɨjɨ eyok ɨkiyo sohmet doso ich nos yuuna uje doso, hn kɨmɨjɨ yeẽk diyuhu lahwoso omoho ekiyo pɨkaap ich nos wɨr ɨkiyo ich ayla.
\p
\v 27 Heke titɨm olak. Olak Cristo ɨr ɨkiyo hn olak nohmɨr nohmɨr akɨshlo ɨre.
\v 28 Porrosht nos chiihla eyok par uje yiyokõr ɨr ɨbiyo per nos eyok ɨbiyo kɨnãho. Wap chiihla par ɨr apóstole. Wɨr uje otsanɨmɨrãha ɨr ahwoso otatɨm erze uje ye õr Porrosht aabope. Chiihla profeta toy. Wɨr uje otsanɨmɨrãha Porrosht ahwoso iglesya ehet. Hn chiihla yewo par uje oshiyokorãha õr Porrosht ahwoso. Chiihla yewo ma nẽr par uje oshiyokõr kuche uje ye latɨk pwele shiyokõr, hn chiihla yewo toy par uje ochukuta erze uje õr permo. Chiihla yewo par uje otakashɨm oso yewo, hn chiihla yewo par uje otakashɨm Porrosht aabo õr bahluwo õr ɨbiyo par uje nos tokole om, hn chiihla yewo par uje otseẽt ahwoso kɨnãho.
\v 29 Shɨ chiihla nohmɨramo par ɨr apóstole, hn shɨ chiihla nohmɨramo par ɨr profeta, hn shɨ chiihla nohmɨramo par oshiyokorãha õr Porrosht ahwoso, hn shɨ chiihla nohmɨramo par oshiyokõr kuche uje ye latɨk pwele shiyokõr.
\v 30 Shɨ chiihla nohmɨramo par ochukuta erze uje õr permo, hn shɨ chiihla nohmɨramo par uje otseẽt ahwoso kɨnãho, hn shɨ chiihla nohmɨramo par ochɨraha erze ahwoso kɨnãho par uje oshuu cheeshɨ otatɨm yewo.
\v 31 Titɨm olak wapɨke erze obiyo uje ich ma ɨhɨ̃rtso uje sehe tuu olak ma ahmũrlo hn ahakõrlo, per de uje ich ma om uje tyenɨj titɨm olak nehe.
\c 13
\s Porrosht aabo tyenɨj otsahmũrye.
\p
\v 1 Titɨm olak. Kɨmɨjɨ teẽt ahwoso kɨnãho uje oso otseetɨ̃hɨ lekɨtiyo o kɨmɨjɨ teẽt anjele õr ahwoso per ye tahmũr yewo ich ye yok jukur. Ich shɨ yok ɨtso fyerɨt ihyokõrt uje yeẽk shuu, hn shɨ yok ɨtso pɨrete uje fyero uje oshuu ochɨ̃ra yẽr ich ihyokõrak dich.
\v 2 Kɨmɨjɨ yok profetya uje tanɨmɨrãha Porrosht ahwoso iglesya ehet, o kɨmɨjɨ nos tɨkɨraha erze kuche uje yewo ye odɨrehepe, o kɨmɨjɨ peyuwo deyo, nos tɨkɨraha kuche, o kɨmɨjɨ yelɨj tokotiis Porrosht heke yok pwele tuu ese kojach dich sɨhnok lalerc, per kɨmɨjɨ ye tahmũr oso yewo ich ye yok jukur.
\v 3 Kɨmɨjɨ tokosɨmɨhɨ losuhlaabo nos wɨr pishujãro, o kɨmɨjɨ tokosɨm yok õr par uje otsẽru yok per kɨmɨjɨ ye tahmũr oso yewo ich ye terz latɨk.
\p
\v 4 Sehe titɨm olak. Kɨmɨjɨ ahmũr yewo ich enta õr hn uhu eluu oomɨhɨ õr hn ye abɨta õr kuche. Kɨmɨjɨ ahmũr yewo ich ye owa narim owa.
\v 5 Uje ahmũr yewo ich ye uhu owa dich. Uje ahmũr yewo ich ye ahakõr uje shɨ owa ahmũr, hn ye aas elo shɨchish, hn ye ehmerɨhɨ ehet erze kuche mɨhnũwo uje yet shiyokõrni.
\v 6 Kɨmɨjɨ ahmũr yewo ich ye uhu owa ayla uje kuche mɨhnũwo tɨ̃r õr. Shɨ tyenɨj owa ayla toy uje erze om tɨ̃r õr.
\v 7 Kɨmɨjɨ ahmũr yewo per oshiyokõr mɨhnɨkɨ̃hɨ owa ich ye eyuhu ahwoso mɨhnuwõho õr. Uje ahmũr yewo ich shish ye otiis õr uje otatɨm owa. Uje ahmũr yewo ich shish uhu eyuwo tɨsɨ̃r uje deeych yet nehe hn wɨr oshiyokõr uje ich om, hn shish nos owa ewenta erze kuche uje õr ɨre oshiyokõr.
\p
\v 8 Porrosht chɨbɨte uje shish tyenɨj ahmũr yewo. Ye uhurztɨkɨsh, per uje yeẽk sanɨmɨrãha Porrosht ahwosoho iglesya ehet, hn uje yeẽk seẽt ahwoso kɨnãho, hn uje yet shiyokorãha yewo wɨr tyenɨj uhurɨsh nehe.
\v 9 Ele ahle yẽrɨj yɨraha, hn yẽrɨj yanɨmɨrãha ɨr ahwoso.
\v 10 Uje terɨhɨ ese ɨshɨrĩt nehe uje nos yɨraha erze kuche ich nĩhyok kuche uje yẽrɨj odɨraha.
\v 11 Uje ehn yok pɨkɨhninaapni uje tiipuhut hn uje tuu peyuwo tɨsɨ̃r ich shɨ yok ɨtso pɨkɨhnino yewo, per uje ich yok hnakɨrapni ich nos tokoym erze pɨkɨhnino õr ɨluu.
\v 12 Ele ahle yẽrɨj yɨraha Porrosht ɨluu shɨ ɨtso uje yeychɨm eyok ɨchɨbichɨhɨ pejta ehet waa je waresh hn yẽrɨj yomo eyok ɨchɨbich. Per je deeych yet nehe ich yomlo pishye. Ele ahle yẽrɨj tɨkɨraha per je deeych yet nehe ich nos tɨkɨraha shɨ ɨtso uje Porrosht chɨraha yok.
\v 13 Kuche de tre uje yelɨj nɨhna ɨre. Webich osht uje ye yotiislo Porrosht hn yet uje shish yiyemlo uje Porrosht tyenɨj ɨshɨm eyok uje de ɨre ahɨr hn yetpo uje shish yahmũrlo yewo per ese uje ich ma ɨhɨ̃rt wɨchɨ uje yahmũrloye.
\c 14
\s Waa ɨluuta uje otseẽt ahwoso kɨnãho.
\p
\v 1 Sehe titɨm olak par uje shish enaha olak par uje ahmũrloye, hn shish apurlo Porrosht par uje ɨshɨm olak erze eyuwo hn ukurbo uje tãra ɨre. Ese uje ich ma om wɨchɨ par sanɨmɨrãha Porrosht ahwoso.
\v 2 Ese uje seẽt ahwoso kɨnãho ye keytkẽr osope, shɨ keytkẽr Porrosht heke nĩhyok uje yeẽk chɨraha uje wɨchɨ tata. Porrosht Ɨchɨbich shuu chiilehet tatɨm Porrosht erze kuche uje yewo ye odɨrehepe.
\v 3 Per ese uje shiyokorãha õr Porrosht ahwoso ich shuu erze yewo ma ye olotiis Porrosht, hn shuu õr duurapo, hn shuu õr aho kɨɨs.
\v 4 Ese uje seẽt ahwoso kɨnãho shɨ shuu ɨre ma ye lotiis Porrosht, per ese uje sanɨmɨrãha Porrosht ahwoso tatɨm erze ɨr aabo par uje shuu ma ye olotiis Porrosht.
\v 5 Titɨm olak. Sehe tuu nos erahalo eẽtlo ahwoso kɨnãho per ma tahmũr uje anɨmɨrãhalo Porrosht ahwoso. Yeẽk uje sanɨmɨrãha Porrosht ahwoso ich ma om je yeẽk uje seẽt ahwoso kɨnãho, per ich ompo kɨmɨjɨ yeẽk chɨhɨ uje shuu erze ahwoso kɨnãho cheeshɨ tatɨm olak par uje shuu olak ma ye otiislo Porrosht.
\p
\v 6 Pɨshɨbo watsaklo, kɨmɨjɨ tekɨrɨhɨ olak hn shɨ teẽt ahwoso kɨnãho uje ye erahalope ich ye takashɨm olakpe. Per kɨmɨjɨ titɨm olak erze uje Porrosht shuu tɨkɨraha ich takashɨm olak, o kɨmɨjɨ titɨm olak uje yok tɨkɨraha ich takashɨm olak, o kɨmɨjɨ tanɨmɨrãha Porrosht ahwoso ich takashɨm olak o kɨmɨjɨ tiyokorãha olak ich takashɨm olak.
\v 7 Erze kuche uje oshuu hn otsobɨta par oteeychɨ kɨmɨjɨ flawta o kɨmɨjɨ arpa, kɨmɨjɨ ye ihyokõrt tokole om ich nĩhyok uje yeẽk chɨraha uje wɨchɨ shuu seẽt.
\v 8 Kɨmɨjɨ ohyerptosht dobɨta kornetɨt hn ye dɨraha dobɨtape ich nĩhyok uje yewo ochɨraha heke ye onɨshii ɨrpe par uje oteye.
\v 9 Shɨ ɨtso uje tokolɨhɨ olak. Kɨmɨjɨ eẽtlo ahwoso kɨnãha uje ye odɨraha uje tata ich shɨ ɨtso uje shɨ eylo olak uhut.
\v 10 Oso õr ahwoso kɨnãho ich kɨhniya de nãhu ɨ̃rmo uje otseẽt hn ich ũru uje nos tata kuche par uje ochɨraha.
\v 11 Per kɨmɨjɨ ye tɨkɨraha erze ahwoso uje tata, tɨbɨte uje wɨchɨ dihip kɨnãha hn ɨre chɨbɨte uje yok dihip kɨnãha.
\v 12 Olak shɨ sehe eẽtlo ahwoso kɨnãho par uhulo ɨmeheeych uje Porrosht Ɨchɨbich de olak aho, per ich ma om enahalo olak par uje uhulo Porrosht aabo ma ye olotiis ɨrpe.
\p
\v 13 Heke yeẽk uje seẽt ahwoso kɨnãho ich tyenɨj orar sapur Porrosht par uje pwele shuu erze ahwoso cheeshɨ tatɨm õr.
\v 14 Kɨmɨjɨ teẽt ahwoso kɨnãho uje yok orar ich pɨchɨbich wɨchɨ uje orar per ye tɨkɨraha uje tiita.
\v 15 ¿Tiyokõr latɨkpo? Tyenɨj tuu pɨchɨbich orar seẽt ahwoso kɨnãho hn tyenɨj tuu peyuwo tɨsɨ̃r hn yok orar toy par uje nos ochɨraha uje tiita. Tyenɨj tuu pɨchɨbich teechɨ seẽt ahwoso kɨnãho hn tuu peyuwo tɨsɨ̃r hn teechɨ toy.
\v 16 Kɨmɨjɨ olak yeẽk ye niyokõr ɨtso yok, per shɨ seẽt ahwoso kɨnãho hn teeychãha Porrosht hn yeẽk uje tekɨrɨhɨ iglesya ehet tẽr hn ye dɨraha uje tata. Heke ye ɨre pwelpe uje tata ɨm: —Yehe wɨchɨ— pork ye dɨraha uje tata.
\v 17 Ich om uje seẽt ahwoso kɨnãho uje nɨna Porrosht per ye takashɨmpe ese yet uje de ahɨr.
\v 18 Tɨkɨnshɨp Porrosht uje ma teẽt ahwoso kɨnãho je nos wɨr olak uje eẽtlo ahwoso kɨnãho,
\v 19 per uje yok de asa iglesya ehet ich ma tahmũr tiyokorãha õr titɨm õr tuu pahwoso sinko uje ochɨraha je uje teẽt ahwoso kɨnãho dye mil uje ye odɨrehepe.
\p
\v 20 Pɨshɨbo watsaklo, moymlo uje uhu olak eyuwo ɨtso pɨkɨhnino. Shɨ tyenɨj uhu olak ɨlo pɨkɨhnino ijaabo uje ye odɨraha oniyokõr uje mɨhnɨ̃kpe hn uhu olak eyuwo tɨsɨ̃r ɨlo hnakɨrbo.
\v 21 Porrosht ahwoso tata shuu ɨtsorz ɨm: —Eyok Ɨrhĩch sole: “Tuu dihipo kɨnãho uje otseẽt lahwoso ohno otɨ̃r erze israel oso par otsepyẽr õr per shish ye onahmũr otẽr yokpe.”—
\v 22 Heke ich ɨmeheeych uje erze ahwoso kɨnãho uje otseẽt wɨr par yara par erze uje otsotiis ɨre, ye par erzepe uje ye olotiis ɨrpe. Per erze uje otsanɨmɨrãha Porrosht ahwoso wɨr ye balpe par erze uje otsotiis Porrosht. Wɨr par yara par erze uje ye olotiis Porroshtpe pork otsahmũr.
\v 23 Heke kɨmɨjɨ nos Porrosht aabo otakasho lawich hn oneẽt ahwoso kɨnãho kɨmɨjɨ yewo omasaha õr ehet uje ye Porrosht aabope hn yelɨj onõya õr ¿je otata uje õr totihlo? Ẽhe, otata uje õr totihlo.
\v 24 Per kɨmɨjɨ nos anɨmɨrãhalo Porrosht ahwoso hn yeẽk masaha olak ehet uje ye Porrosht aappe uje yelɨj nõya olak hn chunt uje athɨlo Porrosht ahwoso ich chuuna uje ɨr ɨluu mɨhnũ.
\v 25 Erze kuche mɨhnũwo uje shiyokõrni ich nos chɨbɨte orhõta heke icha dete hnɨmoho Porrosht ɨkɨch hn teeychãha Porrosht hn tatɨm õr uje ich ũrpa uje Porrosht de õr aho.
\s Waa ɨluuta uje otakasho lawichɨhɨ iglesya ehet.
\p
\v 26 Pɨshɨbo watsaklo, sehe titɨm olak. Uje akɨshlo olak owich ich ode uje oteeychɨ otseẽt imno hn ode uje oshiyokorãha õr hn ode uje otata uje Porrosht shiyokõr omɨhɨ õr hn ode uje otseẽt ahwoso kɨnãho hn ode uje ochɨraha erze ahwoso kɨnãho hn oshuu cheeshɨ otatɨm õr. Nos wɨr erze uje otata kuche iglesya ehet wɨr shɨ par oshuu Porrosht aabo ma ye olotiis ɨre.
\v 27 Uje sehe eẽtlo ahwoso kɨnãho ich shɨ uhu olak osiyer o kɨmɨjɨ olak tre hn ye aluwelo. Shɨ uhu olak nohmɨr nohmɨr uje eẽtlo per tyenɨj yet de uje chɨraha ahwoso kɨnãha hn shuu cheeshɨ tatɨm õr.
\v 28 Per kɨmɨjɨ nĩhyok uje chɨraha shuu erze ahwoso kɨnãho cheeshɨ iglesya ehet hn tatɨm õr ich ye eẽtlo. Per kɨmɨjɨ sehe eẽt ich shɨ par owa hn Porrosht per ich eetɨ̃hɨ ahuch ehet, ye iglesya ehetpe.
\v 29 Wɨr õr ɨtspo uje otsanɨmɨrãha Porrosht ahwoso, kɨmɨjɨ õr osiyer o kɨmɨjɨ õr tre uje otsanɨmɨrãha Porrosht ahwoso hn nos wɨr Porrosht aabo yewo tyenɨj oshuu deyuwo tɨsɨ̃r uje otẽr kɨmɨjɨ ũru o kɨmɨjɨ ye ũrpe.
\v 30 Kɨmɨjɨ yeẽk chɨhɨ iglesya ehet hn Porrosht tatɨm ɨre kuchẽrk hn ese yet uje sanɨmɨrãha Porrosht ahwoso tyenɨj ɨshɨm ɨre par uje chiilehet hn tẽr uje wɨchɨ tata.
\v 31 Heke nos olak nohmɨr nohmɨr pwele uje anɨmɨrãhalo Porrosht ahwoso par uje uhulo Porrosht aabo ma odɨraha kuche hn oduurapo.
\v 32 Uje yeẽk sehe nanɨmɨrãha Porrosht ahwoso tatɨm õr uje Porrosht tatɨm ɨre ich tyenɨj iyem uje tok ɨre par uje chiilehet.
\v 33 Porrosht ye nahmũrpe uje nos õr ahwoso chɨmɨrɨhɨ ye luke. Sahmũr uje nos õr aho kɨɨsɨhɨye. Titɨm olak. Ɨtso uje Porrosht aabo oshiyokorãha orɨ̃hɨ iglesya aho lekɨtiyo
\v 34 ich tɨmcher tyenɨj ye odiilehetɨhɨ iglesya ehet pork tɨmcharrza tyenɨj shiyokõr uje ɨr abich tatɨm ɨre pork Porrosht ahwoso tata shuu ɨtsorz.
\v 35 Uje kuchẽrk chɨhɨ uje sehe dɨraha ich tyenɨj tatɨm dabich uje ode dahuch pork ye ompe uje tɨmcharrza chiilehetɨhɨ iglesya ehet.
\v 36 ¿Je ye ahmũrlo uje titɨm olakɨke? Ye shɨ olak uje Porrosht ɨshɨm olak lahwosni, hn ye shɨ par olak erze Porrosht ahwoso.
\p
\v 37 Kɨmɨjɨ yeẽk dɨbɨte uje ɨre profeta uje sanɨmɨrãha Porrosht ahwoso o kɨmɨjɨ dɨbɨte uje shish shiyokõr uje Porrosht Ɨchɨbich tata, wɨchɨ tyenɨj tata uje erze ahwoso uje tichew tãra eyok Ɨrhĩch.
\v 38 Kɨmɨjɨ ye tata uje tãra Porrosht ich ye ẽrlo ɨre.
\v 39 Pɨshɨbo watsaklo, heke titɨm olak. Tyenɨj ekwilo par uje anɨmɨrãhalo Porrosht ahwoso, hn ye ahɨrmlo õr uje otseẽt ahwoso kɨnãho.
\v 40 Uje nos akɨshlo olak owichɨhɨ iglesya ehet ich tyenɨj ye uhu olak ahwoso nɨmɨrɨhɨ ye luke.
\c 15
\s Uje Cristo ɨkponi ich serz.
\p
\v 1 Pɨshɨbo watsaklo, titɨm olak. Sehe tuu olak eyucha erze ahwoso uje tiyokorãha olakni uje Jesús ɨshɨ olak hnɨtewɨhɨ Porrosht ahɨrkite. Uje entloni erze ahwoso ich ahmũrlo hn ye moymlo Porroshtpe.
\v 2 Erze Porrosht ahwoso uje titɨm olakni wɨr uje shuu olak owich de Porrosht ahɨr per kɨmɨjɨ moymlo pork olak koswãha uje ebɨtɨloni uje ye otiislo Cristo heke ich ye jukur.
\v 3 Titɨm olak wapni erze uje olak nesita entlo. Titɨm olak uje Cristo tatɨm yok uje tooho krus eeychkite par ɨshɨ eyok hnɨtewɨhɨ Porrosht ahɨr shɨ ɨtso uje Porrosht ahwoso tata.
\v 4 Ochihitsɨm Jesús per daalo tre hn Porrosht shuu ɨkpo shɨ ɨtso uje Porrosht ahwoso tata.
\v 5 Wap tokolɨhɨ Pedro ɨkɨch depwe hn nos tokolɨhɨ wɨr apóstole yewo õr ɨkɨch toy.
\v 6 Deeych yet hn Jesús tokolɨhɨ Porrosht aabo õr ɨkɨch toy uje oyuwe kinyento. Wɨr ich okɨhniya uje yesh õr ɨka hn ich nohmɨramo wɨshɨ otoy.
\v 7 Deeych yet hn tokolɨhɨ Santiago ɨkɨch toy, hn deeych yet ich nos tokolɨhɨ erze ɨr apóstole õr ɨkɨch toy.
\v 8 Ich uhurc ich tokolɨhɨ pɨkɨch heke shɨ yok ɨtso pɨkɨhnint uje iyuwe deshɨ̃ryo hn ye shurhãpe.
\v 9 Per yok ye yok dichpe je erze apóstole yewo. Ich ye ompe uje otɨbii yok otsɨɨ apóstol pork tiyokõr mɨhnɨkɨ̃hɨ Porrosht aaboni.
\v 10 Porrosht wɨchɨ uje sosɨr yok hn shuu yok ɨr apóstol. Ye tokoym ɨr ɨbiyope per ich tɨnaha yok uje tiyokõr ɨr ɨbiyo je erze apóstole yewo. Ye shɨ yok uje tiyokõr erze obiyope per Porrosht wɨchɨ uje sosɨr yok hn takashɨm yok.
\v 11 Ich ye latɨkɨsh par yok kɨmɨjɨ titɨm olak o kɨmɨjɨ erze apóstole yewo otatɨm olak. Per ich om uje oyiyokorãha olak Porrosht ahwoso hn ye otiislo.
\s Nos topo tyenɨj õr ɨkpo nehe.
\p
\v 12 Oyanɨmɨrãha oyitɨm olakni uje Cristo ɨkponi tokolɨhɨ erze topo õr ahɨr. ¿Ɨnaapo heke olak ehet yewo ode uje otata uje erze topo ye õr ɨkpope?
\v 13 Kɨmɨjɨ erze topo ye õr ɨkpo nehe ich ye Cristo ɨkpo petɨkni,
\v 14 hn kɨmɨjɨ ye wɨchɨ ɨkponi ich erze ahwoso uje oyiyokorãha olak ich ye jukur, hn ye jukur uje ye otiislo uje Cristo ɨshɨ olak hnɨtew.
\v 15 Kɨmɨjɨ Cristo ye ɨkpo ɨlorzni ich shɨ oyiita õryok ukushiĩ, pork oyitɨm olak uje Porrosht shuu Cristo ɨkponi, per kɨmɨjɨ Porrosht ye duhu ɨkponi ich nĩhyok uje õr ɨkpo nehe.
\v 16 Kɨmɨjɨ erze topo ye õr ɨkpo nehe ich Cristo ye ɨkpo petɨkni.
\v 17 Kɨmɨjɨ ye Cristo ɨkponi ich ye jukur uje ye yotiislo ɨre heke yesh eyok hnɨtew de Porrosht ahɨr.
\v 18 Kɨmɨjɨ ye Cristo ɨkponi ich nos wɨr erze uje ye olotiis Cristope uje otoni ich ode urhuta bahluta ehet.
\v 19 Kɨmɨjɨ ye eyok ɨkpo nehe ich ye jukur uje yiyemlo erze uje ich om uje Porrosht tata. Heke ich eyok ma losuhlaabo je erze oso yewo per ich ye ũrpe.
\p
\v 20 Ich ũru uje Cristo ɨkponi hn tokolɨhɨ erze topo õr ahɨr. Wɨchɨ webich os uje ɨkponi hn erze yewo tyenɨj oyehe nẽr nehe uje otoni.
\v 21 Hnakɨrbich nohmet uje iich otsɨɨ Adán nos shuu oso otoy. Per hnakɨrbich yet de uje shuu oso õr ɨkpo nehe.
\v 22 Nos wɨr eyoklo yãrlo Adán heke tyenɨj nos yɨtɨlo, per nos wɨr uje ye olotiis Cristo ich omasaha par Porrosht aabo hn õr ɨkɨrĩt ahle de nehe.
\v 23 Ye nos õr ɨkpe yehe wɨchɨ deeych nohmet per nos õr owɨlo de uje õr ɨkpo nehe. Cristo wɨchɨ uje wapni hn ɨkpo, hn uje cheeshpo nehe ich nos wɨr eyok uje Cristo wɨchɨ uu eyok Ɨrhĩch eyok ɨkpo.
\v 24 Uje terɨhɨ ɨ̃rmo uhurc nehe ich Cristo nos sɨhna erze uje õr bahluwo hn nos wɨr erze uje õr ukurbosh. Ɨshɨm ɨr Deych Porrosht nos wɨr Porrosht aabo.
\v 25 Cristo tyenɨj masaha par rey nehech nos serz namãho.
\v 26 Ese ɨr ɨmehẽt uhurzosht uje Cristo tyenɨj sɨhna nehe wɨchɨ uje shuu oso otoy.
\v 27 Porrosht nos chɨbɨte oso hn nos chɨbɨte kuche Cristo ɨr hme. Uje Porrosht tata uje nos chɨbɨte erze kuche Cristo ɨr hme ich ɨmeheeych uje ye dɨbɨte ɨre Cristo hmepe.
\v 28 Ich uhurc hn Cristo nos serz wɨr kuche hn nos de ɨr hme hn wɨchɨ de Porrosht ɨr hme. Porrosht wɨchɨ uje nos chɨbɨte erze kuche Cristo ɨr hme. Heke ich uhurc hn Porrosht ich ma dich.
\p
\v 29 Kɨmɨjɨ ye erze topo õr ɨkpo nehe ¿ich ɨnaapo heke otohɨrm erze yewo par erze Porrosht aabo uje otoni hn ye otohɨrm õr petɨkni? Kɨmɨjɨ olotiis uje topo õr ɨkpo nehe ¿ɨnaapo heke otohɨrm yet uje yesh ɨka par ese uje toni?
\v 30 Sehe titɨm olak kuchɨt yet. Kɨmɨjɨ ye topo õr ɨkpo nehe ich ye jukur uje oyanɨmɨrãha Porrosht ahwoso hn oyuhu yewo otsɨtak õryok nehech sehe oduhu õryok oduhu oyɨtɨ.
\v 31 Pɨshɨbo watsaklo, erahalo uje ich ũru uje ma tahmũr uje ye otiislo eyok Ɨrhĩch Jesucristo. Ich ũru toy uje ode uje kal daalo sehe oduhu yok oduhu tɨkɨtɨ.
\v 32 Uje yok dechɨ dɨt Efeso tanɨmɨrãha Porrosht ahwosni ich ɨtso uje takɨtsɨkɨr erze hnakɨrbo uje shɨ õr ɨtso erze loshɨpo uje ich ehnito. Kɨmɨjɨ ye erze topo õr ɨkpo nehe ¿ɨnaapo heke titɨm õr tuu ɨtsorz? Kɨmɨjɨ ye õr ɨkpo nehe ich ma om tiyokõr uje yewo otata otsɨɨ: —Oyuko oyaak hn oyoho pork deeych yet nehe hn oyɨtɨ.—
\v 33 Ye uhulo onehnyẽr olak. Yet de uje tatni ɨm: —Kɨmɨjɨ yeẽk ɨr ɨluu om hn ĩya erze uje õr ɨluu mɨhnũ ich oshuu wɨchɨ ɨr ɨluu mɨhnũ toy.—
\v 34 Uhu olak eyuwo tɨsɨ̃r erze uje ich om hn ye ahakõrlopo erze uje ich mɨhnũwo. Olak yewo ode uje ye odɨraha Porrosht ɨr ɨluupe. Titɨm olak tuu ɨtsorz par uje tuu apooklo uje ode olak ehet hn ye atɨmlo õr.
\s Uje Porrosht aabo ɨkpo nehe ich õr ɨkiyo ɨtso Cristo ɨr ɨkiyo.
\p
\v 35 Sehe titɨm olak uje olak yewo sehe odɨraha uje ¿keshɨ oduhu ɨnaapo par topo õr ɨkpo nehe? ¿Keshɨ õr ɨkiyo ɨlo latɨkpo uje õr ɨkpo nehe?
\v 36 Owa uje uhu eyuwo tɨsɨ̃r ɨtsorz ich owa totihla. ¿Ɨnaapo heke ye uhu eyuwo tɨsɨ̃rpe uje ekwẽr erze jõro eyhi ich shɨ ɨtso uje toy uje ahatsɨm hn erze jõro tokole?
\v 37 Uje ekwẽr kuchẽrk ich shɨ ɨr eyhi wɨr uje ekwẽr kɨmɨjɨ trigo ɨr eyhi o kɨmɨjɨ jõro kɨnãho ɨr eyhi per jõro tokole.
\v 38 Porrosht wɨchɨ uje shuu erze eyhi tokole shɨ yehe wate pohorrza uje ɨre sahmũr. Kal eyhi shɨ yehe wate pohorrza tokole ɨtso uje ɨre sahmũr.
\v 39 Nos wɨr kuche ẽro ye ɨlyepe. Hnakɨrbich ɨr ẽro kɨnãho, hn loshɨpo ɨr ẽro kɨnãho, hn chɨpɨrme ɨr ẽro kɨnãho, hn loshiyo ɨr ẽro kɨnãho.
\v 40 Shɨ ɨtso erze anjele wɨr õr ɨkiyo kɨnãho, ye ɨlo oso õr ɨkiyope. Erze kuche uje ich ɨhɨ̃rtso uje de wahacha poõrc ich kɨnãho hn erze kuche uje ich ɨhɨ̃rtso uje de nãhu ɨ̃rmo ich kɨnãho toy.
\v 41 Uu deeych ɨr yokõrt wɨchɨ kɨnãha, ye ɨlo ese shekurko ɨr yokõrtpe. Wɨchɨ kɨnãha hn porrzeebe ɨr yokõrt kɨnãho toy. Nos wɨr porrzeebe ɨr yokõrt kɨnãha kɨnãha, ye ɨlyẽrpe.
\p
\v 42 Erze uje otoni uje õr ɨkpo nehe ich õr kɨnãho toy. Erze õr ɨkiyo uje ochihitsɨm ich nos taata hn uje õr ɨkpo nehe ich ye õr ɨkiyo taatpe.
\v 43 Erze uje otoy ich tyenɨj ochihitsɨm õr pork õr ɨkiyo taata. Uje õr ɨkpo nehe ich õr ɨkiyo ɨhɨ̃rtso. Uje ochihitsɨm õr ich ye õr ukũrbɨrsh, per uje õr ɨkpo nehe ich õr ukurbo de.
\v 44 Uje otoy hn ochihitsɨm õr ich shɨ õr ɨkiyo ɨtso ahnũwo oso uje ode nãhu ɨ̃rmo, per uje õr ɨkpo nehe ich ye õr ɨkiyo shɨ par ɨrmõpe. Õr ɨkiyo de uje sɨhna ɨre hn õr ɨkiyo de uje yelɨj nɨhna ɨr.
\v 45 Porrosht ahwoso tata shuu ɨtsorz ɨm: —Adán wɨchɨ uu hnakɨrbich webich osht uje Porrosht shiyokõrkite hn ɨshɨm ɨr ɨkɨrĩt shɨ par nãhu ɨ̃rmo.— Hnakɨrbich yet de uje ɨtso Adán. Wɨchɨ ɨshɨm oso õr ɨkɨrĩt uje yelɨj nɨhna ɨre. Wɨchɨ Cristo.
\v 46 Wap ye oso õr ɨkɨrĩt chɨhɨpe uje ich om par otɨ̃r poõrc. Shɨ oso õr ɨkɨrĩt de nãhu ɨ̃rmo. Õr ɨkɨrĩt uje ich om par tɨ̃r poõrc iyehe nẽr.
\v 47 Ese hnakɨrbich webich osht wɨchɨ ɨ̃rmo os. Porrosht shiyokõrkite chɨ̃ra hnɨmich. Ese hnakɨrbich yet uje iyehe nẽr wɨchɨ tãra poõrc.
\v 48 Kal oso ich õr ɨkiyo ɨtso Adán. Porrosht shiyokõrkite chɨ̃ra hnɨmich ukult, per Porrosht aabo tyenɨj otɨ̃r poõrc nehe. Je deeych yet nehe ich õr ɨkiyo ɨtso Cristo ɨr ɨkiyo uje tãra poõrc.
\v 49 Ele ahle shɨ eyok ɨkiyo ɨtso Adán ɨr ɨkiyo uje Porrosht shiyokõrkite chɨ̃ra hnɨmich ukult. Je deeych yet nehe ich eyok ɨkiyo ɨtso Cristo ɨr ɨkiyo uje tãra poõrc.
\p
\v 50 Pɨshɨbo watsaklo, sehe titɨm olak. Eyok uje eyok de nãhu ɨ̃rmo eyok ẽro hn eyok armɨsta ye pwelpe uje tɨ̃r Porrosht ahɨr wahacha poõrc. Eyok ɨkiyo tyenɨj taata nehe heke erze ɨkiyo ye pwelpe tɨ̃r poõrc par uje serz erze uje yelɨj taata.
\v 51 Titɨm olak kuchɨt yet uje ye oso odɨrehepe. Ye nos yɨtɨlo petɨk nehe per Porrosht tyenɨj nos shuu eyok ɨkiyo kɨnãho.
\v 52 Uje yunt Porrosht ɨr trompeta uje yeẽk sobɨta uje shuu iyehe uje sobɨta ich nos shuu eyok kɨnãho shɨchish shuu ɨtsorz. Shɨ ɨtso uje eyok ɨle ẽperak shɨchish ich Porrosht shuu laabo õr ɨkpo shɨchish uje otoni hn ich ye otopope, shɨ Porrosht shuu eyok ɨkiyo ahlo toy.
\v 53 Eyok ɨkiyo sɨhna ɨre saraãshi per deeych yet nehe hn Porrosht ɨshɨm eyok ɨkiyo ahlo uje ye nɨhna ɨrpe, heke ye yɨtpe. Shish tyenɨj eyok ɨka.
\v 54 Uje eyok ɨkiyo tokole uje ye taatpe hn eyok ɨkɨrĩt tokole uje ye tope ɨtsorz ich Porrosht ɨr ahwoso yakaha uje ɨr aabo otata otsɨɨ:
\p —Eyok yerz pork ich ye yɨtpe.
\v 55 Ese uje shuu oso otoy ye derzpe, hn nĩhyok ɨr ukurbo par uje shuu otoypo ɨtso uje ich ye wosɨ̃rsh.—
\p
\v 56 Ese uje ich wos deyo uje shuu otoy wɨchɨ uje oshiyokõr uje ich mɨhnũwo. Ɨr ukurbo wɨchɨ Porrosht ɨr ley pork shuu yɨraha uje yiyokõr uje ich mɨhnũwo par uje sepyẽr eyok.
\v 57 Tɨkɨnshɨp Porrosht pork eyok Ɨrhĩch Jesucristo wɨchɨ uje ɨshɨ eyok hnɨtewkite heke shuu yerz.
\v 58 Pɨshɨbo watsaklo, heke titɨm olak. Ye uhu olak koswãha eyok Ɨrhĩch. Shish ahakõrlo ɨr ɨbiyo pork erahalo uje erze eyok Ɨrhĩch ɨr ɨbiyo uje ahakõrlo wɨr shish tokole uje bale.
\c 16
\s Pablo shuu ochish hnote yẽr par Porrosht aabo uje ode Jerusalén.
\p
\v 1 Sehe titɨm olak par uje eeshɨlo hnote yẽr par asɨmlo eyok leshɨbo uje õr nesita. Titɨm olak par uje ahakõrlo uhulo olak ɨtso uje titɨm erze Porrosht aaboni uje ode hnɨmich Galacia par uje oshiyokõr.
\v 2 Uje kal terɨhɨ domingo ich eeshɨlo hnote yẽr par uje ehmerlo. Uje olak yewo otserz hnote kɨhniya ich om oshɨm kɨhniya per erze uje otserz arheebe ich om oshɨm pɨkaap. Heke uje takaachɨ̃hɨ olak ahɨr nehe ich ye nesit eeshɨlo yẽrpe.
\v 3 Uje takaachɨ̃hɨ olak ahɨr nehe ich aahlɨlo hnakɨrbo par uje ohnoy erze hnote uje eeshɨlo yẽr par oshɨm erze Porrosht aabo uje ode Jerusalén. Erze hnakɨrbo uje ohnoy erze hnote uje eeshɨlo yẽrhna par oshɨm õr ich tichew hute hn tokosɨm õr par uje ochɨraha yeniipo õr.
\v 4 Kɨmɨjɨ om uje takaha tɨtɨ̃r Jerusalén ich wɨr õya yok.
\s Owich uje Pablo tyenɨj tɨ̃r nehe.
\p
\v 5 Sehe titɨm olak uje wap sehe tekɨrɨhɨ erze Porrosht aabo uje odechɨ hnɨmich Macedonia nehech takaachɨ̃hɨ olak ahɨr.
\v 6 Yɨbe kɨmɨjɨ tiyakaha olak ahɨr tuu daalo arhaabo o kɨmɨjɨ tiyakaha olak ahɨr nehech hmamo ɨshɨrĩt uhurc. Heke olak pwele akashɨmlo yok uje takaha keshɨ ɨraãpo uje tyenɨj tɨtɨ̃r.
\v 7 Ye tahmũrpe uje tekɨrɨhɨ olak hn tɨkitokolɨhɨ olak ahɨr shɨchish per sehe tiyakaha olak ahɨr tuu daalo kɨhniya kɨmɨjɨ eyok Ɨrhĩch nahmũr.
\v 8 Sehe tiyakaha dɨt Efeso nehech terɨhɨ ese õr ahamich uje iich otsɨɨ Pentecostés.
\v 9 Porrosht shuu oso okɨhniya uje otsahmũr tiyokorãha õr Porrosht ahwoso, per ich okɨhniya uje otsɨtak hn sehe onontew.
\p
\v 10 Uje Timoteo taachɨ̃hɨ olak ahɨr nehe ich tyenɨj uhulo wɨchɨ ehet kɨɨs pork wɨchɨ chishew eyok Ɨrhĩch ɨr ɨbiyo shɨ ɨtso yok.
\v 11 Ye ompe uje olak yeẽk sɨtak wɨchɨ. Uje tokolɨhɨ olak ahɨr ich akashɨmlo ɨre hn uhulo ehet kɨɨs par uje tɨrẽt tɨ̃r yok pork yok hn Porrosht aabo yewo yesh oyiyem ɨre.
\p
\v 12 Shish titɨm eyok leshɨbich Apolos par uje tuu ĩya erze Porrosht aabo yewo uje sehe odo otɨ̃r olak per ele ahle ye nahmũr dope. Uje terɨhɨ ɨshɨrĩt uje ich om par hno tekɨrɨhɨ olak ich hno.
\s Yewo oshɨm õr saludo.
\p
\v 13 Titɨm olak par uje abeylshɨp olak par uje nĩhyok yeẽk sehnyẽr olak. Ye uhu olak koswãha Cristo. Shish ye otiislo ɨre hn ye atɨlɨlo latɨk.
\v 14 Nos wɨr kuche uje ahakõrlo ich ahakõrlo pork ahmũrloye.
\p
\v 15 Pɨshɨbo watsaklo, olak erahalo uje Estéfanas hn nos wɨr ɨr iiso wɨr uje omasaha wapni par Porrosht aabo wahacha hnɨmich Acaya. Wɨr ochɨbɨte ɨre par uje otakashɨm Porrosht aabo yewo.
\v 16 Titɨm olak par uje ahakõrlo uje erze oso otatɨm olak uje õr ɨtso Estéfanas hõr hn nos wɨr erze yewo uje otakashɨm erze Porrosht aabo hn erze yewo uje ochishew ɨr ɨbiyo.
\v 17 Sehe titɨm olak uje ich yok ayla uje Estéfanas hn Fortunato hn Acaico otaachɨ̃hɨ pahɨr. Wɨr uje otakashɨm yok pork olak ich olak dukuhla hn ye olak pwele akashɨmlo yokpe.
\p
\v 18 Õr ɨre ich oshuu tukuurapo heke ich oshuu olak duurapo. Oso uje oshiyokõr oshuu ɨtsorz ich tyenɨj enɨlo õr.
\p
\v 19 Nos wɨr Porrosht aabo uje ode ese hnɨmich Asia kal õr wee ich oshɨm olak saludo. Aquila hn Prisca hn nos wɨr Porrosht aabo uje otakasho lawichɨhɨ ɨr ihyuch oshɨm olak saludo pork ye otiislo eyok Ɨrhĩchpe.
\v 20 Nos wɨr eyok leshɨbo uje ode lɨka pahɨr oshɨm olak saludo. Olak tyenɨj shish etɨloye.
\p
\v 21 Yok Pablo. Tichew tɨbɨte ana hutɨta uhurc uje tokosɨm olak saludo.
\p
\v 22 Uje yeẽk chɨhɨ hn ye nahmũr eyok Ɨrhĩchpe ich Porrosht tyenɨj sajɨr wɨchɨ ɨkiyo. Sehe tuu eyok Ɨrhĩch deeshpo shɨchish.
\p
\v 23 Sehe tuu eyok Ɨrhĩch Jesús dosɨ̃r olak.
\p
\v 24 Nos wɨr olak ich tahmũr pishɨ olak pork erahalo Jesucristo.