\id 2CO Chamacoco NT - Paraguay 2000 (web 2013)
\h 2 Corintios
\toc1 2 Corintios
\toc2 2 Corintios
\toc3 2Co
\mt1 2 Corintios
\c 1
\s Pablo ɨshɨm Porrosht aabo õr saludo.
\p
\v 1 Yok Pablo. Porrosht chiihla yok shuu tomsaha par Jesucristo ɨr apóstol. Eyok leshɨbich Timoteo de pahɨr. Oyichew ana hutɨta par oyosɨm erze Porrosht aabo uje otakɨsho lawichɨhɨ wahacha dɨt Corinto uje dechɨ hnɨmich Acaya hn par nos wɨr Porrosht aabo yewo uje ode lekɨtiyo wahacha hnɨmich Acaya.
\v 2 Sehe tuu eyok Deych Porrosht hn eyok Ɨrhĩch Jesucristo odosɨr olak hn oduhu olak aho kɨɨs.
\s Oso oloter Pablo shɨ pork sanɨmɨrãha Porrosht ahwoso.
\p
\v 3 Titɨm olak uje oyeeychãha Porrosht uu eyok Ɨrhĩch Jesucristo ɨr Deych. Ɨr Deych wɨchɨ uje chuuna uje oso õr losuhlaabo hn takashɨm õr hn shuu õr aho kɨɨs.
\v 4 Uje nos wɨr kuche mɨhnũwo tɨ̃r õryok ich Porrosht shuu õryok aho kɨɨs par uje õryok pwele oyuhu wɨr õr aho kɨɨs toy erze uje kuche mɨhnũwo tɨ̃r õr. Heke õryok pwele oyuhu õr aho kɨɨs shɨ ɨtso uje Porrosht shuu õryok aho kɨɨs.
\v 5 Uje kuche mɨhnũwo kɨhniya tɨ̃r õryok shɨ ɨtso uje tɨ̃r Cristoni ich Cristo shuu õryok aho kɨɨs pork ye oyotiis ɨrpe.
\v 6 Uje kuche mɨhnũwo tɨ̃r õryok ich shɨ tɨ̃r õryok pork oyanɨmɨrãha Porrosht ahwoso oyitɨm olak, heke oyuhu amsahalo par ɨr aabo hn oyuhu olak aho kɨɨs. Uje Porrosht shuu õryok aho kɨɨs ich shuu olak aho kɨɨs toy par uje olak ewenta erze kuche mɨhnũwo uje tɨ̃r olak shɨ ɨtso uje tɨ̃r õryok.
\v 7 Oyɨraha uje erze kuche mɨhnũwo sehe duhu moymlo Cristo per ye moymlope pork oyɨraha uje erze kuche mɨhnũwo uje tɨ̃r olak wɨr shish tɨ̃r õryok toy heke Porrosht tyenɨj shuu olak aho kɨɨs shɨ ɨtso uje shuu õryok aho kɨɨs.
\v 8 Pɨshɨbo watsaklo, tahmũr uje erahalo erze kuche mɨhnũwo uje tɨ̃r oryõkni uje õryok dechɨ hnɨmich Asia. Erze kuche mɨhnũwo uje oshiyokorɨ̃hɨ õryok ich dospa nehech ye õryok pwele õryok ewentpe. Shuu õryok eyuwo tɨsɨ̃r uje tyenɨj oyɨtɨ.
\v 9 Oyuuna shɨ ɨtso uje jwe tatɨm õryok par uje shuu oshuu õryok oshuu oyɨtɨ. Erze mɨhnũwo tɨ̃r õryok par uje oyɨraha uje ye õryok ukũrbɨrsh par uje oyitokolɨhɨ erze kuche mɨhnũwo. Shɨ tyenɨj oyiyem Porrosht par uje wɨchɨ takashɨm õryok pork wɨchɨ ɨr ukurbo de. Wɨchɨ uje shuu topo õr ɨkpo.
\v 10 Porrosht chiyuhu oryokɨ̃hɨ erze uje ich mɨhnũwo pisho uje sehe duhu õryok duhu oyɨtɨni, heke oyɨraha uje wɨchɨ tyenɨj chiyuhu oryokɨ̃hɨ erze kuche mɨhnũwo uje tɨ̃r õryok toy nehe.
\v 11 Olak tyenɨj olak orar apurlo Porrosht par uje takashɨm õryok. Heke okɨhniya tyenɨj onɨna Porrosht nehe uje takashɨm õryok pork olak orar toy ɨtso õr uje õr orar otsapur Porrosht par õryok.
\s Pablo ye tɨ̃r dɨt Corintope.
\p
\v 12 Sehe titɨm olak uje õryok aho kɨɨs pork ye oyiyokõr mɨhnuwõho osope, hn yelɨj oyehnyẽr olak. Shɨ oyiyokõr uje Porrosht sahmũr. Ye õryok aho yũhɨrshpe uje oyakashɨm olak hn ye shɨ tãra õryok eyuwope ɨlo uu ɨ̃rmo oso uje otsakɨt yewo. Porrosht wɨchɨ uje takashɨm õryok.
\v 13 Nos wɨr hute uje oyichew hn oyosɨm olak wɨr par uje olak ler hn erahalo uje tata. Sehe tuu nos erahalpa uje titɨm olak
\v 14 pork olak yẽrɨj erahalo. Heke uje eyok Ɨrhĩch Jesús cheeshpo nehe ich olak aylpa hn ahmũrlo uje oyitɨm olakni ɨtso uje õryok aylpa uje olak dechɨ eyok Ɨrhĩch Jesús ahɨr toy.
\v 15 Tɨkɨraha uje ahmũrlo yok ɨtsorz heke sehe takaha tekɨrɨhɨ olak tuu do bese.
\v 16 Tuu peyuwo tɨsɨ̃r uje sehe tekɨrɨhɨ olak wap uje takaha tɨtɨ̃r hnɨmich Macedonia hn sehe tɨtɨ̃r olakpo uje tɨkɨtokolɨhɨ Macedonia. Uje tɨkɨtokolɨhɨ olak ahɨr nehe ich sehe tuu akashɨmlo yok uje tɨtɨ̃r hnɨmich Judea.
\v 17 ¿Je yok kushĩyak uje sehe tiyokõr tuu ɨlorz? ¿Je olak eyuwo tɨsɨ̃r uje yok ɨtso erze ɨ̃rmo oso uje otata otsɨɨ: —Ẽhe— per ye oniyokõrpe uje otata?
\v 18 Ich ũru uje Porrosht shish shuu lahwoso yakaha hn ich ũru toy uje erze ahwoso uje oyitɨm olak ye oyuhu ɨlorzpe: —Ẽhe— hn oyehnyẽr olak.
\v 19 Yok hn Silvano hn Timoteo oyitɨm olak Jesucristo uu Porrosht Ijɨt. Oyitɨm olak uje ich ũru heke tyenɨj yakaha. Ye oyehnyẽr olakpe. Shish yakaha uje Jesús tata.
\v 20 Nos wɨr ahwoso uje Porrosht chɨbɨtkite ich Jesús shuu yakaha. Heke ich oyahmũr uje Cristo shiyokõr hn oyiita uje yehe wɨchɨ. Uje oyiita oyuhu ɨtsorz ich oyuhu Porrosht ich dich.
\v 21 Porrosht wɨchɨ uje takashɨm õryok hn takashɨm olak par uje ma ye yotiislo Cristo. Porrosht wɨchɨ uje chiihla õryok par uje oyiyokõr ɨr ɨbiyo.
\v 22 Wɨchɨ chɨbɨte eyok yarta pork wɨchɨ uu eyok yɨnsɨrc. Ɨr yarta wɨchɨ uu ɨr Ɨchɨbich uje chɨbɨte eyok aho, heke ich ũru uje eyok owich de Porrosht ahɨr.
\p
\v 23 Porrosht chɨraha uje ye tɨtɨ̃r olakɨhɨ wahacha Corinto petɨkni shɨ pork ye tahmũrpe uje tyenɨj titɨm olak pahwoso uje ich ɨhne.
\v 24 Ye oyɨrok olakpe oyuhu ye otiislo Cristo. Shɨ sehe oyakashɨm olak oyuhu olak ma ayla hn ye olak koswãha eyok Ɨrhĩch.
\c 2
\p
\v 1 Tɨbɨte uje tekɨrɨhɨ olakpo ich ye tahmũrpe uje tuu olak dosdarak.
\v 2 Kɨmɨjɨ tuu olak dosdarak ¿ich yeniipo uje oshuu yok ayla? Shɨ olak per kɨmɨjɨ tuu olak dosdarak ich ye olak pwele uje uhulo yok ayla.
\v 3 Heke tichew asa hutɨtani hn tokosɨm olak par uje tekɨrɨhɨ olak nehe hn ye uhulo yok dosdarak pork shɨ olak uje uhulo yok ayla heke ich nos olak ayla shɨ olak ɨtso yok.
\v 4 Uje tichew asa hutɨtani hn tokosɨm olak ich yok dosdarakpa. Tukuuna nehech tɨkiyerh pork ye tahmũr petɨkni uje tichew titɨm olak par uje tuu olak dosdarak. Tichew asa hutɨta par uje tuu erahalo uje ich tahmũr pɨshɨ olak.
\s Tyenɨj õr perdonar ese hnakɨrbich uje shiyokõr mɨhnɨ̃kni.
\p
\v 5 Titɨm olak. Kɨmɨjɨ yeẽk duhu yewo õr dosdarakni ich shuu yok dosdarak, hn nos wɨr olak toy.
\v 6 Olak kɨhniya uje eyuhulo ese hnakɨrbich iglesya ehet pork shiyokõr uje ich mɨhnɨ̃kni. Ele ahle ich iim erze mɨhnũwo heke uhulo olak aho kɨɨsɨhɨ ɨrpo.
\v 7 Ele ahle ich tyenɨj olak perdonar hn akashɨmlo ɨre par uje ye wɨchɨ dosdarakpa.
\v 8 Heke titɨm olak par uje uhulo ɨmeheeych uje ahmũrlo ɨre.
\v 9 Heke tichew asa hutɨtani hn tokosɨm olak par uje tɨkɨraha kɨmɨjɨ nos ahakõrlo uje titɨm olak.
\v 10 Uje olak perdonar yeẽk ich yok perdonar ɨre toy. Kɨmɨjɨ yok perdonar yeẽkni ich yok perdonar ɨre hn Cristo chɨraha uje ich ũru uje yok perdonar wɨchɨ par uje tuu olak aho kɨɨs.
\v 11 Yok perdonar ɨre par uje ye Satanás derz eyok yeẽk. Nos yɨraha wɨr kuche uje Satanás shiyokõr pork sehe nehnyẽr eyok.
\s Uje Pablo taachɨ̃hɨ dɨt Troas ich ye ehet kɨɨspe.
\p
\v 12 Sehe titɨm olak. Uje takaachɨ̃hɨ ese dɨt Troasni ich tanɨmɨrãha Porrosht ahwoso titɨm õr uje Cristo ɨshɨ õr hnɨtewɨhɨ Porrosht ahɨrkite. Eyok Ɨrhĩch takashɨm yok heke ich okɨhniya uje sehe otẽr ɨr ahwoso
\v 13 per ye pehet kɨɨspe pork ye tish pɨshɨbich Titope. Heke tokoym uje takɨt õr hn titɨm õr uje ich takaha hn tɨtɨ̃r hnɨmich Macedonia.
\s Cristo ɨr ahwoso ich ɨtso aat ehmuuj.
\p
\v 14 Titɨm olak uje ich tɨkɨnshɨp Porrosht pork shish shuu Cristo serz Satanás hn eyok yukwiĩya Cristo. Porrosht ɨshɨm eyok par uje yanɨmɨrãha ɨr ahwoso yitɨm erze oso uje ode lekɨtiyo uje Cristo ɨshɨ õr hnɨtewɨhɨ Porrosht ahɨr. Erze ahwoso ich shɨ ɨtso uje aat tokole chish lekɨtiyo.
\v 15 Par Porrosht ich erze ahwoso uje yitɨm õr Cristo ich shɨ ɨtso aat ehmuuj. Erze uje sehe omasaha par Porrosht aabo hn erze uje omasahani ochunt ese aat. Erze uje otɨ̃r urhuta bahluta ehet nehe ochunt toy.
\v 16 Par erze uje otɨ̃r urhuta bahluta ehet nehe ese aat ich shɨ ɨtso topo õr aat, per par erze uje õr ɨkɨrĩt de Porrosht ahɨr ese aat ich aat ehmuuj. ¿Yeẽk pwele shiyokõr erze obiyo par otatɨm õr Cristo? Shɨ ese uje Porrosht takashɨm ɨre.
\v 17 Õryok uje oyanɨmɨrãha Porrosht ahwoso ich ye õryok ɨlo erze yewope uje otsanɨmɨrãha shɨ par uje otserz hnote. Porrosht ɨshɨm õryok erze obiyo par uje oyanɨmɨrãha ɨr ahwoso. Ich ye õryok aho yũhɨrshpe. Oyitɨm õr Cristo Porrosht ɨle ɨkɨch.
\c 3
\s Porrosht chɨbɨte lahwoso ahlo.
\p
\v 1 Uje oyitɨm olak õryok ɨbiyo oyuhu ɨtsorzɨke ¿je yesh õryok narim oryõk? Ye õryok narim oryõkpe. Ye nesitpe uje oyosɨm olak hutɨta uje tata yeniipo õryok hn õryok ɨbiyo latɨkpo uje oyiyokõr shɨ ɨtso uje yewo oshɨm olak. Ye nesitpe oyapur olak par uje atsɨlo asa hutɨta uje tata yeniipo õryok par uje oyosɨm yewo.
\v 2 Olak ɨluu ich ahle pork amsahaloni par uje olak Porrosht aabo. Erze olak ɨluu ahle ich shɨ ɨtso hutɨta uje tata yeniipo õryok pork olak ɨluu ahle chɨbɨte orhõta yeniipo õryok. Nos ochɨraha olak uje olak ɨluu kɨnẽhe.
\v 3 Ich ɨmeheeych uje ye otiislo Cristope. Erze olak ɨluu uje ich ahle ich shɨ ɨtso hutɨta uje Cristo chichew hn ɨshɨm õryok par uje nos ochɨraha yeniipo õryok. Wɨchɨ ye dichew dɨbɨte hutɨtape. Porrosht wɨchɨ ɨka hn chɨbɨte Dechɨbich olak aho shɨ ɨtso uje chichew hn chɨbɨte olak aho. Ye dichew dɨbɨte duhu ɨlo uje chichew chɨbɨte ese kojach uje ɨshɨm Moiseskite.
\p
\v 4 Oyɨraha uje Porrosht chiihla õryok par oyiyokõr ɨr ɨbiyo pork Cristo takashɨm õryok.
\v 5 Ye oryõkpe uje oyuhu olak ɨluu ahle par uje õryok narim õryok. Shɨ Porrosht wɨchɨ uje takashɨm õryok par uje shuu olak ɨluu ahle.
\v 6 Wɨchɨ takashɨm õryok par uje oyanɨmɨrãha ɨr ahwoso ahlo uje chɨbɨtni. Wɨr ye ɨlo asa ɨr ley uje chichewkite chɨbɨte kojano po per chɨbɨte Dechɨbich olak aho shɨ ɨtso uje chichew chɨbɨte olak aho. Asa ɨr ley shuu ɨmeheeych uje oso oshiyokõr uje ich mɨhnũwo heke tyenɨj shuu otoy per ɨr Ɨchɨbich ɨshɨm olak ɨkɨrĩt uje yelɨj nɨhna ɨre.
\p
\v 7 Uje Porrosht chichew asa leykite chɨbɨte erze kojano po hn ɨshɨm Moisés par erze israel oso ich shuu Moisés ɨle hũre heke ye wɨr õr pwele uje oteychɨm Moisespe pork ich ɨr ɨle hũrpa shuu õr ɨle pata, per shɨ sɨhna ɨre saraãshi nehech ye ɨr ɨle hũrpe.
\v 8 Ich ma ɨhɨ̃rtpa ese Porrosht Ɨchɨbich ɨr ɨbiyo ahlo je uje ɨshɨm Moiseskite.
\v 9 Ich om uje chɨbɨte erze ley uje shuu oso otoy per ich ma om ese uje shuu õr ɨkɨrĩt de uje yelɨj nɨhna ɨre.
\v 10 Asa ley waa je Porrosht ɨshɨm Moiseskite ich om per Cristo ɨr ahwoso ich ma om heke shuu asa ley tokole shɨ ɨtso uje ye latɨkɨsh.
\v 11 Uje Moisés tõhwa erze ley ich ɨr ɨle hũrpa per shɨ daalo arhaabo hn erze uje hũre ich sɨhna ɨrpo, per uje Porrosht shuu Dechɨbich masaha eyok aho ich ma om pork shish eyok ɨkɨrĩt de Porrosht ahɨr.
\v 12 Yɨrahalo uje eyok ɨkɨrĩt shish de Porrosht ahɨr heke ye yɨtɨlape uje yanɨmɨrãha ɨr ahwoso.
\v 13 Eyok ɨbiyo shish bale. Ye yakɨslope uje yiyokõrlo yuhu eyok ɨlo Moisés uje shiyeru delekite chɨ̃ra shekɨpɨt par uje ye erze israel oso oteychɨm ɨle uje ich hũrpa nehech sɨhna ɨrehe ɨle.
\v 14 Õr ɨre ye onahmũrpe uje otẽr Moisés par uje ochɨraha. Ele ahle ich shish israel oso õr ɨtsye. Uje õr ler Porrosht ahwoso ich ye odɨrehepe uje tata. Shɨ ɨtso ese shekɨpɨt uje Moisés shiyeru delekite wɨchɨ sentii õr ɨle, heke ye odɨrehepe. Ye õr pwele odɨrehepe per uje ye olotiis Cristo ich ochɨraha. Wɨchɨ shɨ ɨtso uje chiyuhu ese shekɨpɨt uje sentii õr ɨle.
\v 15 Nehech ele ahle uje õr ler erze hute uje Moisés chichewkite ich shɨ ɨtso uje ese shekɨpɨt shiyeru õr ɨle par uje ye odɨrehepe.
\v 16 Per uje yeẽk ye lotiis eyok Ɨrhĩch ich shɨ ɨtso uje chiyuhu ese shekɨpɨt uje sentii ɨr ɨle.
\v 17 Eyok Ɨrhĩch wɨchɨ shɨ ɨchɨbich heke kɨmɨjɨ eyok Ɨrhĩch ɨr Ɨchɨbich chɨhɨ yeẽk ehet ich ye erze ley uje Moisés chichewkite tɨbey ɨrpe.
\v 18 Nos wɨr eyok uje eyok Porrosht aabo ich ye ese uje ɨtso shekɨpɨt nentii eyok ɨlepe. Eyok shɨ eyok ɨtso pejta uje shuu oso oteychɨm Cristo ɨr ɨluu. Uje yeẽk teychɨm eyok ɨluu ich chɨraha eyok Ɨrhĩch ɨr ɨluu pork eyok ɨluu ɨler tokole saraãshi ɨre hn ele ahle masaha uje ich shɨ ɨtso Cristo ɨr ɨluu. Eyok Ɨrhĩch wɨchɨ uje shuu eyok ɨluu kɨnẽhe pork wɨchɨ shɨ ɨchɨbich.
\c 4
\p
\v 1 Heke titɨm olak uje Porrosht sosɨr õryok hn ɨshɨm õryok erze obiyo par uje oyanɨmɨrãha ɨr ahwosni shɨ pork sahmũr ɨshɨm õryok. Ye oyuhu patɨm oryõkpe uje oyiyokõr ɨr ɨbiyo.
\v 2 Oyɨbɨte par uje ye oyiyokõr erze mɨhnũwo uje oso oshiyokõr uje shuu oso opook hn otsakɨs, hn oyɨbɨte par uje ye oyehnyẽr yeẽk hn ye oyuhu Porrosht ahwoso poshɨkpe. Uje oyiyokorãha õr ich shɨ oyiyokorãha õr uje ich ũru hn oyuhu ɨmeheeych. Heke erze uje otẽr ochɨraha uje shɨ oyiita uje ich ũru Porrosht ɨle ɨkɨch.
\v 3 Oyanɨmɨrãha Porrosht ahwoso oyitɨm õr uje Cristo ɨshɨ õr hnɨtewɨhɨ Porrosht ahɨrkite. Kɨmɨjɨ ye ɨmeheeychpe ich shɨ par erze uje otɨ̃r urhuta bahluta ehet nehe.
\v 4 Satanás wɨchɨ uu ɨ̃rmo oso õr porrosht. Wɨchɨ ye duhu õr eyuwo dishpe heke otsotiis Cristo. Ye duhu odɨraha uje Cristo ɨshɨ õr hnɨtewɨhɨ Porrosht ahɨrkite. Cristo wɨchɨ ɨtsshɨp ɨr Deych.
\v 5 Uje oyanɨmɨrãha Porrosht ahwoso ich ye õryok narim oryõkpe. Shɨ oyanɨmɨrãha oyitɨm õr uje Jesucristo wɨchɨ uu õryok Ɨrhĩch. Oyitɨm õr uje õryok olak yɨlo pork õryok de shɨ par uje oyakashɨm olak pork õryok Jesús ɨr ɨbiyo.
\v 6 Shɨ Porrosht wɨchɨ uje chiilehetkite ɨm: —Tuu luu tokole hn dihit asa dɨhlelta.— Wɨchɨ shɨ ɨtso uje chihit eyok aho toy par uje shuu yɨraha erze uje ich om uje shiyokõr par eyok uje shuu Cristo ɨshɨ eyok hnɨtewɨhɨ dahɨrkite.
\p
\v 7 Ese uje Cristo shiyokõr par eyok ich om. Nos wɨr eyok ye eyok ukurbope uje yuhu oso omasaha par Porrosht aabo. Shɨ eyok ɨtso jarta hn erze ɨr ahwoso wɨr de eyok aho par uje oyuhu oso ochɨraha uje ɨre ukurbo deyo de par shuu oso omasaha par ɨr aabo heke ye shɨ tãra eyokpe erze ukurbo par shuu oso omasaha par Porrosht aabo.
\v 8 Shish kuche mɨhnũwo ich kɨhniya tɨ̃r õryok per wɨr ye nɨhna oryõkpe. Uje erze mɨhnũwo tɨ̃r õryok ich ye oyɨraha uje oyiyokõr per ye oyukwim Porrosht ɨbiyope.
\v 9 Oshiyokorɨ̃hɨ õryok uje ich mɨhnũwo per Porrosht yelɨj noym õryok. Oshiyokõr shɨ ɨtso uje wɨr oshuu õryok kay per ye õr pwele uje oduhu õryok oduhu oyɨtpe.
\v 10 Shish oloter õryok shɨ ɨtso uje oloter Jesusni. Sehe oduhu õryok oduhu oyɨtɨ per Jesús takashɨm õryok heke shuu ɨmeheeych uje ɨre yesh ɨka.
\v 11 Uje yesh õryok ɨka shish sehe oduhu õryok oduhu oyɨtɨ pork ye oyotiis Jesuspe. Ɨmeheeych uje Jesús yesh ɨka pork shish takashɨm õryok.
\v 12 Uje oyanɨmɨrãha Porrosht ahwoso ich shish sehe oduhu õryok oduhu oyɨtɨ, per erze Porrosht ɨbiyo uje oyiyokõr shuu olak ɨkɨrĩt de uje yelɨj nɨhna ɨre.
\v 13 Porrosht ahwoso tata shuu ɨtsorz ɨm: —Yeẽk de uje tatɨm Porrosht ɨm: “Ye tokotiis owape heke titɨm oso.”— Õryok ɨtspo ye oyotiis Porroshtpe heke oyitɨm oso
\v 14 pork oyɨraha uje Porrosht shuu eyok Ɨrhĩch Jesús ɨkponi. Heke oyɨraha uje wɨchɨ tyenɨj shuu eyok ɨkpo nehe pork ye oyotiis Jesuspe hn olak tyenɨj meylo õryok uje Jesús nos hnoy eyok seya eyok dahɨr nehe.
\v 15 Nos wɨr erze kuche mɨhnũwo tɨr õryok pork oyitɨm olak Cristo heke uje oso ma okɨhniya ochunt Porrosht ahwoso ich ma okɨhniya ode uje onɨna Porrosht hn oshuu ɨre dich.
\v 16 Heke ye oyuhu õryok dosdarakpe hn oyukwim Porrosht ɨr ɨbiyo. Eyok ukurbo saraãshi ɨre uje sɨhna ɨre uje yɨtɨ̃r par eyok ɨlaro per eyok aho kal deeych shɨ ɨtso uje ich ɨchɨrãha
\v 17 pork uje yuhu eyok eyuwo chishew erze uje ich ɨhɨ̃rtso uje yelɨj nɨhna ɨre uje de Porrosht ahɨr ich ye yuunape erze kuche mɨhnũwo uje tɨ̃r eyok uje ehn eyok de nãhu ɨ̃rmo.
\v 18 Heke ye yuhu eyok eyuwo tɨsɨ̃r erze uje de nãhu ɨ̃rmo. Wɨr tyenɨj sɨhna ɨre. Shɨ yuhu eyok eyuwo tɨsɨ̃r erze uje yahpaa yomope uje de poõrc. Wɨr yelɨj nɨhna ɨre.
\c 5
\p
\v 1 Yɨrahalo uje ehn eyok ɨkaha nãhu ɨ̃rmo eyok yũhur shɨ ɨtso pwertɨt uje yebuhulo, hn uje yɨtɨlo ich sɨhna ɨre. Mahn eyok yũhur ahle depo shɨ ɨtso ihyuwo uje de poõrc uje Porrosht shiyokõr, ye oso oniyokõrpe. Wɨr yelɨj nɨhna ɨre.
\v 2 Uje eyok de nãhu ɨ̃rmo ich eyok ɨtso uje eyok ɨhnakosh pork sehe yuhu eyok yũhur ahle masaha eyok shɨchish par yebuhu poõrc nehe.
\v 3 Yahmũr uje eyok yũhur ahle masaha eyok shɨ ɨtso uje yonãha eyok ɨshuwo pork uje yɨtɨ ich eyok yũhur ɨler tokole heke eyok ɨchɨbiyo ich shɨ ɨtso uje ɨmehshɨp eeych.
\v 4 Uje ehn eyok yũhur ɨler de nãhu ɨ̃rmo ich ɨhnakosh hn yɨtɨrãha, sehe yuhu eyok yũhur ahle shɨchish. Ye yahmũrpe uje eyok yũhur ɨler sɨhna ɨre shuu eyok ɨtso uje yɨmehe eeych per sehe yuhu eyok yũhur ahle. Eyok yũhur ich shish ma ɨler nehech sɨhna ɨre per eyok yũhur ahle de uje yelɨj nɨhna ɨre.
\v 5 Porrosht wɨchɨ uje nos nɨshii eyokni par uje erze eyok yũhur ahle masaha eyok. Sehe duhu yɨraha uje ich ũru ɨtsorz heke ɨshɨm eyok Dechɨbichni.
\v 6 Heke ye eyok koswãhape pork yɨraha uje ehn eyok ɨkaha nãhu ɨ̃rmo ich eyok dukuhlehe poõrc uje eyok Ɨrhĩch de.
\v 7 Ele ahle ye yomo Porroshtpe per wɨchɨ tɨbey eyok. Yɨrahalo uje tɨbey eyok pork ye yotiislo ɨrpe.
\v 8 Shish ye eyok koswãhape. Yahmũrlo yukwim erze eyok yũhur uje de nãhu ɨ̃rmo par yɨtɨ̃rlo eyok Ɨrhĩch ahɨr.
\v 9 Kɨmɨjɨ ehn eyok ɨka o kɨmɨjɨ yɨtɨ shish tyenɨj yɨbɨte par uje yiyokõr uje eyok Ɨrhĩch sahmũr,
\v 10 pork nos wɨr eyok tyenɨj yiyehelo Cristo ɨr ɨle ɨkɨch nehe hn ɨshɨm eyok erze uje yerz kɨmɨjɨ yiyokõrlo uje ich om o kɨmɨjɨ yiyokõrlo uje ich mɨhnũwo uje ehn eyok de nãhu ɨ̃rmo.
\s Cristo shuu Porrosht ehet kɨɨsɨhɨ Porrosht aabo.
\p
\v 11 Heke titɨm olak. Oyɨraha eyok Ɨrhĩch hn shish oyɨtɨla ɨre heke oyitɨm oso oyuhu ɨmeheeych uje Cristo ɨshɨ õr hnɨtewɨhɨ Porrosht ahɨrkite. Porrosht chɨraha õryok aho. Chɨraha erze uje oyitɨm olak ich ũru, hn tahmũr uje olak erahalo toy.
\v 12 Ye õryok narim oryokɨ̃hɨ olak ɨkɨchpe. Shɨ oyitɨm olakpo par uje olak aylɨhɨ õryok, pork ode uje oshuu yeẽk dich hn onarim ɨre hn ye oduhu deyuwo tɨsɨ̃r kɨmɨjɨ ɨre ehet yũhurash. Erze uje titɨm olakɨke shuu erahalo uje tyenɨj atɨmlo õr.
\v 13 Kɨmɨjɨ eylo õryok totiloho ich ye latɨkɨsh pork shɨ oyiyokõr uje Porrosht sahmũr. Kɨmɨjɨ ye eylo õryok totilohope ich shɨ oyiyokõr par oyakashɨm olak.
\v 14 Yɨraha uje Cristo sahmũr eyok heke yiyokõr uje ɨre sahmũr pork yɨraha uje wɨchɨ tooho nos wɨr oso heke par Porrosht ich shɨ ɨtso uje nos yɨtɨ hn yoshɨ eyok hnɨtew pork Jesús ɨshɨkite.
\v 15 Cristo tooho nos wɨr oso par uje erze uje ye olotiis ɨrpe uje ehn õr ɨka ich ye oniyokõr uje shɨ õr ɨre otsahmũr. Uje ehn õr ɨka shɨ tyenɨj oniyokõr uje Cristo sahmũr, pork wɨchɨ uje nos tooho eyokkite hn ɨkpo.
\v 16 Heke oyitɨm olak. Antni ich eyok eyuwo shɨ ɨtso ɨ̃rmo oso õr eyuwo per ele ahle ich ye eyok eyuwo ɨlorzpe. Antni uje eyok eyuwo tɨsɨrɨ̃hɨ Cristo ich eyok eyuwo shɨ ɨtso ɨ̃rmo oso õr eyuwo per ele ahle ich ye eyok eyuwo ɨlorzpe,
\v 17 heke yeẽk uje ye lotiis Cristo ich ɨre kɨnaha. Ɨr ɨluu ich ahle. Wɨchɨ ye ɨlo uje wapni pork ɨr ɨluu ɨler ich nĩhyok.
\v 18 Nos wɨr erze ɨr ɨluu ahle shɨ tãra Porrosht. Wɨchɨ uje shuu Cristo ɨshɨ eyok hnɨtewɨhɨ dahɨrkite par uje Porrosht ehet kɨɨsɨhɨ eyok, hn wɨchɨ uje ɨshɨm õryok erze obiyo uje oyiyokõr par uje oyitɨm õr par oyuhu Porrosht ehet kɨɨsɨhɨ õr toy.
\v 19 Oyanɨmɨrãha ɨr ahwoso oyitɨm oso uje Cristo ɨshɨ õr hnɨtewɨhɨ Porrosht ahɨrkite par uje shuu Porrosht ehet kɨɨsɨhɨ õr. Heke ele ahle hn Porrosht ye eyucha õr hnɨtewpe pork Cristo nos ɨshɨkite. Wɨchɨ uje ɨshɨm õryok erze obiyo par uje oyanɨmɨrãha ɨr ahwoso oyitɨm oso.
\v 20 Heke õryok Cristo ɨr ɨbiyo uje otsɨɨ embajador par uje oyitɨm oso ɨr ahwoso. Shɨ Porrosht wɨchɨ uje shuu oyitɨm oso, heke oyitɨm õr shɨ ɨtso uje Cristo tatɨm õr par uje oshuu Porrosht ehet kɨɨsɨhɨ õr ɨre.
\v 21 Cristo ye niyokõr latɨk uje mɨ̃hnɨk per Porrosht sehe dosɨr eyok heke shuu Cristo ɨshɨ eyok hnɨtewɨhɨ dahɨr. Heke uje ye yotiislo ɨre ich nĩhyok ye eyok hnɨtew chɨhɨ Porrosht ahɨr shɨ ɨtso uje yelɨj yiyokõrlo uje mɨhnũwo uje Porrosht ye nahmũrpe.
\c 6
\p
\v 1 Õryok Porrosht ɨr ɨbiyo. Wɨchɨ takashɨm õryok, heke oyitɨm olak par uje ye uhulo olak ɨbiyo uje Porrosht ɨshɨm olak tokole uje ye jukur.
\v 2 Pork Porrosht tatɨm õrni ɨm: —Uje terɨhɨ uu deeych uje ich om hn takɨ̃r owa. Uje terɨhɨ ese deeych par uje amsaha par uje owa yok pijo ich takashɨm owa.— Ẽrlo õryok. Ele ahle ich terɨhɨ ese deeych uje ich om uje Porrosht tata. Ele ahle ich terɨhɨ ese deeych par uje yeẽk masaha par Porrosht aap.
\v 3 Ye oyiyokõr latɨk par uje oyontew yeẽk uje sehe masaha par Porrosht aap par uje nĩhyok uje yeẽk chiinehnɨm õryok ɨbiyo.
\v 4 Shish oyuhu ɨmeheeych uje õryok Porrosht ɨr ɨbiyo. Ich ɨmeheeych pork shish oyɨnta oso, hn õryok ewenta kuche mɨhnũwo uje tɨ̃r õryok, hn õryok ewenta uje kuche nihyokɨ̃hɨ õryok ahɨr, hn oshiyokõr mɨhnuwõho õryok.
\v 5 Otsepyẽr õryok ochɨ̃ra õryok shɨkote o kɨmɨjɨ phich, hn ochɨmchaha õryok karsel ehet, hn erze uje otsɨtak õryok oshuu dɨt oso otakɨsho lawich par sehe odishew õryok, hn õryok ɨbiyo ich dospa. Dɨhlak ich ye õryok pwele uje oyumope, hn õryok iyuwo sẽhi õryok.
\v 6 Ɨmeheeych uje õryok Porrosht ɨbiyo pork shish oyiyokõr uje ich om, hn oyɨraha Porrosht ɨr ɨluu, hn õryok ewenta erze kuche mɨhnũwo uje oso oshiyokorɨ̃hɨ õryok. Shish oyakashɨm yewo, hn Porrosht Ɨchɨbich de õryok aho, hn shish oyahmũr pɨsh yewo.
\v 7 Shish oyiita uje ich ũru, hn Porrosht takashɨm õryok chɨ̃ra lakɨrbo. Shish oyiyokõr uje ich om heke shɨ ɨtso uje kuche de õryok hme waãchta hn waachjãrrza par uje oyatsɨkɨr õryok ɨmãho.
\v 8 Ode uje onarim õryok, hn ode uje ye oduhu õryok jukur, hn ode uje ochiyuhu lahwoso mɨhnuwõho õryok, hn ode uje ochiyuhu lahwoso omoho õryok. Ode uje otata uje õryok shɨ oyehnyẽr oso per shish oyiita uje ich ũru.
\v 9 Erze oso uje ode nãhu ɨ̃rmo ye odɨraha õryok ɨluupe per Porrosht chɨraha. Shish sehe oduhu õryok oduhu oyɨtɨ per shish õryok ɨka. Oshiyokõr kuchehe õryok uje ich dospa per ye oyɨtpe.
\v 10 Sehe oduhu õryok dosdarak heke oshiyokõr kuche mɨhnuwõho õryok per shish õryok ayla. Õryok losuhlaabo per oyuhu oso okɨhniya ɨhɨ̃r deyo pork oyuhu õr owich de Porrosht ahɨr. Shɨ ɨtso uje ye õryok kushjãrɨrsh per nos kuche de par õryok.
\v 11 Olak uje olak dechɨ dɨt Corinto ich nos oyitɨm olak Porrosht ahwoso oyuhu ɨmeheeychni. Ich oyahmũr pɨshɨ olak.
\v 12 Ye oryõkpe uje oyontew olak. Shɨ olak uje ontewlo olak pork yẽrɨj ahmũrlo pɨshɨ õryok.
\v 13 Shɨ titɨm olak tuu olak ɨtso uje yok pijo. Sehe tuu ma ahmũrlo õryok ɨtso uje oyahmũr olak.
\s Porrosht aabo wɨr Porrosht ihyuch.
\p
\v 14 Titɨm olak par uje ye etɨ̃rlo erze uje ye Porrosht aabope par eyãhalo olak ɨrẽhte hnii par eyãhalo olak abɨ̃rk pork ye olak ɨlo õrpe hnii uje akɨshlo olak kuche. Ye õr ɨlyepe erze uje otsahmũr oshiyokõr uje ich om hn erze uje otsahmũr oshiyokõr uje ich mɨhnũwo. Shɨ ɨtso luu hn dɨhlelta, ye pwele uje iĩyepe.
\v 15 Cristo hn Satanás ¿je õr eyuwo ɨlye? Ye õr eyuwo ɨlyepe. Hn Porrosht aabo hn erze uje ye Porrosht aabope ¿je õr eyuwo ɨlye? Ye õr eyuwo ɨlyepe.
\v 16 Porrosht ɨr aabo wɨr ɨr ihyuch. Wɨchɨ shish ɨka. Ye eyok ɨlope erze oso uje oteeychãha kojano po ochii ɨr porroshtɨhɨ. Ich ɨmeheeych uje eyok Porrosht ihyuch pork Porrosht ɨm: —Tyenɨj takabuhu olak aho nehe hn shish yok de olak ahɨr. Tyenɨj yok uu olak Porrosht hn olak yok paabo nehe.—
\v 17 Heke eyok Ɨrhĩch tatɨm õr ɨm: —Ye ahakõrlo erze mɨhnũwo uje õr ɨre oshiyokõr. Atokolɨhɨlo õr ahɨr hn eylo õr ɨsa, hn pehet kɨɨsɨhɨ olak
\v 18 hn yok uu olak Deych hn olak yok pijo hn olak yok pije.— Wɨr uje eyok Ɨrhĩch tata. Wɨchɨ ich ɨr ukurbo deyo de.
\c 7
\p
\v 1 Pɨshɨbo watsaklo, Porrosht chɨbɨte lahwoso par debuhu eyok aho, heke tyenɨj yukwimlo erze kuche mɨhnũwo hn ye niyokõrlo pork erze kuche mɨhnũwo uje yiyokõrlo ich shuu eyok aho mɨhnũwo hn shuu eyok ɨchɨbiyo mɨhnũwo. Tyenɨj yɨtɨlɨlo Porrosht hn shish yiyokõrlo uje ɨre sahmũr.
\s Porrosht aabo oshuu Pablo ehet kɨɨs.
\p
\v 2 Sehe titɨm olak par uje ahmũrlo õryok uhulo ɨlo uje oyahmũr pɨsh olak. Ye oyiyokõr mɨhnɨkɨ̃hɨ yeẽkpe, hn ye oyuhu yeẽk niyokõr mɨhnɨ̃kpe, hn ye oyehnyẽr yeẽkpe.
\v 3 Uje titɨm olak tuu ɨtsorz ich ye peyuwo tɨsɨ̃r uje ahakõrlo uhulo ɨtsorz. Titɨm olakɨke uje ich oyahmũr pɨshɨ olak. Kɨmɨjɨ yehe eyok ɨka hn kɨmɨjɨ yɨtɨlo ich shish oyahmũr olak.
\p
\v 4 Tɨkɨraha uje shish ahakõrlo uje tahmũr. Ich tahmũr uje ahakõrlo. Ich uhulo yok tukuurapo. Shish kuche mɨhnũwo kɨhniya tɨ̃r õryok per uhulo yok aylpa.
\v 5 Pork uje oyaachɨ̃hɨ hnɨmich Macedoniani ich oyɨrmtsɨr per ye oyiyarpe. Uje oyɨtɨ̃r lekɨtiyo ich shish oshiyokõr mɨhnɨkɨ̃hɨ õryok. Shish sehe oso oduhu õryok, hn shish oyuhu õryok eyuwo tɨsɨ̃r erze uje omasaha par Porrosht aabo kɨmɨjɨ õr owich om o kɨmɨjɨ ye õr owich ompe.
\v 6 Per Porrosht wɨchɨ uje shuu wɨr õr duura erze uje õr dosdarak heke shuu oyuurapo uje shuu Tito taachɨ̃hɨ õryok ahɨr.
\v 7 Ye shɨ uje taachɨ̃hɨ õryok ahɨrpe uje shuu oyuura, mahn shuu oyuurapo uje tõhwa erze olak ahwoso hn tatɨm õryok uje olak uje ebuhulo dɨt Corinto uhulo ɨre duuraponi. Wɨchɨ tatɨm õryok uje olak sehe eychɨmlo õryok toy, hn tatɨm õryok uje entɨlo uje uhulo yok dosdarakni hn eyerhlo. Tito tatɨm õryok uje shish olak eyuwo tɨsɨrɨ̃hɨ yok. Heke ich ma shuu yok aylpa.
\v 8 Uje tichew asa hutɨta tokosɨm olakni ich tuu olak dosdarak. Wap ich yok dosdarak uje tokosɨm olak asa yok hutɨta per ele ahle ich ye yok dosdarakpe. Tɨkɨraha uje asa hutɨta waa je tichew hn tokosɨm olak ich shuu olak dosdarak per shɨ par daalo arhaabo.
\v 9 Ye yok aylpe uje tuu olak dosdarak, per ele ahle ich yok ayla pork Porrosht shuu olak dosdarak par uje shuu olak eeshlopo ahakõrlo uje ɨre sahmũr. Heke ye oryõkpe uje oyiyokõr mɨhnɨkɨ̃hɨ olak.
\v 10 Uje Porrosht shuu yeẽk dosdarak ich shɨ sehe duhu noym shiyokõr uje ich mɨhnũwo par uje shiyokõr uje ɨre sahmũr. Uje shiyokõr uje Porrosht sahmũr ich ye dosdarakpe, per uje erze ɨ̃rmo oso õr dosdarak ye latɨk nɨshii õr ɨluupe. Ich uhurc shɨ shuu otoy.
\v 11 Uhu olak eyuwo tɨsɨ̃r asa hutɨta waa je tichewni hn tokosɨm olak. Uje olak ler ich Porrosht shuu olak dosdarak heke olak kemɨhɨ ese mɨ̃hnt uje yet shiyokorɨ̃hɨ olak ehet. Porrosht shuu enshiilo ese kuch mɨ̃hnt uje de olak ehet. Porrosht shuu etakloni ese kuch mɨ̃hnt uje de olak ehet. Wɨchɨ shuu olak kemɨhɨ ese kuch mɨ̃hnt uje de olak ehet. Wɨchɨ shuu olak eyuwo tɨsɨ̃rni uje sehe uhulo takaha tɨtɨ̃r olak par uje takashɨm olak. Sehe enshiilo shɨchish ese kuch mɨ̃hnt uje de olak ehet. Shuu eyuhulo wɨchɨ olak ehet ese hnakɨrbich uje shiyokõr mɨhnɨkɨ̃hɨ olak ehet. Wɨchɨ shuu nos ahakõrlo uhulo ɨtsorz par uje ebɨtlo orhõta uje enshiilo ese kuch mɨ̃hnt uje de olak ehet.
\v 12 Heke uje tichew asa hutɨtani hn tokosɨm olak ich ye tokorzɨhɨ ese hnakɨrbich uje shiyokõr mɨ̃hnɨk hn ye tokorzɨhɨ ese hnakɨrbich yetpe uje ese yet shiyokõr mɨhnɨkɨ̃hɨ ɨre. Shɨ tichew asa hutɨta tokosɨm olak par uje tuu ɨmeheeych Porrosht ɨle ɨkɨch uje olak sehe ahakõrlo uje õryok oyahmũr.
\v 13 Heke uhulo õryok duuraponi. Ye shɨ esepe per ich õryok aylpo uje Tito taachɨ̃hɨ õryok ahɨr hn ich ayla toy pork nos uhulo ɨre ehet kɨɨs.
\v 14 Uje ehn yahpaa tuu Tito do tɨ̃r olakni ich yok narim olak titɨm Tito uje ahakõrlo om. Uje Tito taachɨ̃hɨ olak ahɨrni ich ɨmeheeych uje nos ũru erze uje titɨm ɨrni, heke ye tɨkɨpookpe.
\v 15 Ɨre ma sahmũr olak uje eyucha uje nos ahakõrlo uje oyitɨm olakni pork ich ahmũrlo uje Tito tekɨrɨhɨ olak hn atɨlɨlo ɨre.
\v 16 Yok ayla pork tɨkɨraha uje ahakõrlo uje tahmũr.
\c 8
\s Akashɨmlo Porrosht aabo yewo uje õr losuhlaabo.
\p
\v 1 Pɨshɨbo watsaklo, sehe oyuhu erahalo uje Porrosht shiyokõr par erze ɨr aabo uje otakɨsho lawichɨhɨ lekɨtiyo hnɨmich Macedonia.
\v 2 Kuche mɨhnũwo ich kɨhniya tɨ̃r õr, per uje ochunt uje sewɨt sẽhi erze Porrosht aabo uje ode dɨt Jerusalén ich sehe otakashɨm õr hn õr ayla. Ahni wɨr õr losuhlaabo pisho per oshɨm õr ich kɨhniya.
\v 3 Tɨkɨraha uje oshɨm õr uje õr pwele hn oshuu iyuwe. Nĩhyok uje yeẽk chɨrok õrni.
\v 4 Shɨ õr ɨre otsapur pish õryok par uje sehe otakashɨm erze Porrosht aabo uje ode dɨt Jerusalén.
\v 5 Õryok eyuwo tɨsɨ̃r uje wɨr shɨ oshɨmɨhɨ õr pɨkaap per ich oshuu iyuwe. Wap ich oshɨmɨhɨ ɨre eyok Ɨrhĩch par uje sehe oniyokõr ɨr ɨbiyo hn oshɨmɨhɨ ɨre õryok toy par uje otakashɨm õryok. Erze uje oshiyokõr wɨr uje Porrosht sahmũr.
\v 6 Heke oyitɨm Tito par uje sehe oyuhu nɨmɨt erze obiyo uje shiyokorɨ̃hɨ olak ahɨrni uje eeshɨlo hnote yẽr par erze Porrosht aabo uje õr losuhlaaboho wahacha Jerusalén.
\v 7 Shɨ olak ɨluu par enahalo olak uje ahakõrlo kuche. Shish enahalo olak uje ye otiislo Cristope hn enahalo olak uje anɨmɨrãhalo Porrosht ahwoso hn enahalo olak toy par erahalo pɨshɨ Porrosht ahwoso. Shish emɨtlo olak par uje ahakõrlo Porrosht ɨbiyo. Hn ahmũrlo pɨshɨ õryok. Shish enaha olak uhulo ɨtsorz heke titɨm olak par uje enahalo olak par akashɨmlo erze Porrosht aaboho wahacha dɨt Jerusalén toy.
\v 8 Uje titɨm olak tuu ɨtsorz ich ye tɨrok olakpe. Shɨ titɨm olak uje erze yewo otsahmũr otakashɨm erze Porrosht aabo uje kuche nihyokɨ̃hɨ õr ahɨr. Heke tuu ɨmeheeych uje olak ahmũrlo õr toy hn sehe akashɨmlo õr.
\v 9 Erahalo uje eyok Ɨrhĩch Jesucristo ich sahmũr pɨshɨ eyoklo. Wɨchɨ ich ɨrhĩch dich per shuu ɨre losuhlaap par uje takashɨm olak shuu olak ɨhɨ̃r deyo uje shuu olak Porrosht aabo.
\v 10 Heke takɨt olak par uje emɨtlo erze obiyo. Ãyt yetni ɨchii ebɨtlo olak ahwoso par eeshɨlo hnote yẽr hn ɨchii eeshɨlo yẽr.
\v 11 Ahmũrlo eeshɨlo erze hnote yẽr heke sehe tuu eeshɨlo yẽr shɨchish par emɨtlo. Ich om uje ebɨtɨlkite erze hnote uje olak pwele uje de olak ahɨr.
\v 12 Porrosht ayla uje yeẽk sahmũr ɨshɨm ɨre kuchɨt per shɨ uje de ɨre ahɨr, ye uje nihyokɨ̃hɨ ɨre ahɨrpe.
\v 13 Ye titɨm olak par uje akashɨmlo erze yewo uhulo õr kuche kɨhniya hn shɨ uhu olak losuhlaabo.
\v 14 Uje kuche chɨhɨ olak ahɨr hn erze yewo kuche nihyokɨ̃hɨ õr ahɨr ich akashɨmlo õr, hn uje kuche de õr ahɨr hn nihyokɨ̃hɨ olak ahɨr ich tyenɨj wɨr otakashɨm olak. Heke nos olak ɨtsye pork akashɨmloye.
\v 15 Porrosht ahwoso tata ɨm: —Erze israel oso uje otsamɨta manakite kɨmɨjɨ onamɨta kɨhniya ich ye oduhu sowe, hn kɨmɨjɨ onamɨta oduhu pɨkaap ich ye oduhu sehi pork otakashɨmye oshuu ɨtsshɨpye.—
\s Pablo shuu Tito hõr ohno otɨ̃r dɨt Corinto.
\p
\v 16 Titɨm olak uje ich tɨkɨnshɨp Porrosht uje shuu Tito sahmũr pɨshɨ olak shɨ ɨtso yok uje ich tahmũr pɨsh olak.
\v 17 Titɨm Tito par uje hno tekɨrɨhɨ olak hn ɨre sahmũrpa uje tɨ̃r olak heke tɨ̃r olak pork sehe do.
\v 18 Eyok leshɨbich yet tyenɨj hno ĩya Tito. Nos wɨr Porrosht aabo uje ode lekɨtiyo ochɨraha ɨre pork chɨrahapa sanɨmɨrãha Porrosht ahwoso tatɨm õr uje Jesús ɨshɨ õr hnɨtewɨhɨ Porrosht ahɨrkite.
\v 19 Ye shɨ erzepe per Porrosht aabo õr wee nohmɨramo ochiihla wɨchɨ par uje shish ĩya õryok hn takashɨm õryok uje oyiyokõr erze obiyo par oyakashɨm erze Porrosht aabo uje õr losuhlaabo. Uje oyiyokõr oyuhu ɨtsorz ich oyuhu eyok Ɨrhĩch ich dich hn oyuhu ɨmeheeych toy uje sehe nos oyosɨr oso
\v 20 par uje ye latɨk ninehnɨm õryok uje oyiish erze hnote yẽr uje ich kɨhniya par oyosɨm erze Porrosht aabo uje õr losuhlaabo
\v 21 heke sehe oyiyokõr uje ich om. Eyok Ɨrhĩch chɨraha hn sehe oyuhu oso odɨraha toy uje oyiyokõr om.
\v 22 Oyuhu eyok leshɨbich yet ĩya Tito hõr toy. Wɨchɨ shish oyosɨm ɨr ɨbiyoni par oyeychɨm hn shish shiyokõr uje ich om. Wɨchɨ sehe nõya õr par uje hno tɨ̃r olak pork chɨraha uje shish ahakõrlo uje ich om.
\v 23 Kɨmɨjɨ olak yeẽk ye dɨraha Tito ich wɨchɨ uu yok pihyẽrak uje takashɨm olak. Erze eyok leshɨbo uje õya Tito wɨr otãra erze Porrosht aabo uje otakasho lawichɨhɨ lekɨtiyo. Wɨr uje oshuu otɨrẽt. Uje oshiyokõr ese obich ich onarim Cristo.
\v 24 Uje ahakõrlo oomɨhɨ Tito hn erze uje õya ɨre ich nos wɨr Porrosht aabo ochɨraha uje ahmũrlo õr hn uhulo ɨmeheeych uje ahakõrlo om ɨtso uje titɨm õrni.
\c 9
\s Porrosht aabo tyenɨj otakashɨmye.
\p
\v 1 Ye nesitpe uje tichew tɨbɨte ana hutɨta titɨm olakpo erze hnote uje eeshɨlo yẽrni par uje akashɨmlo erze Porrosht aabo pork ich erahalo.
\v 2 Tɨkɨraha uje sehe akashɨmlo õr heke titɨm Porrosht aabo uje ode lɨka hnɨmich Macedonia too: —Ich ãyt nohmɨra uje erze Porrosht aabo uje ode hnɨmich Acaya sehe otakashɨm erze Porrosht aabo uje ode Jerusalén par oshɨmɨhɨ õr hnote.— Uje Macedonia oso ochunt uje sehe akashɨmlo erze Porrosht aabo ich sehe otakashɨm õr toy.
\v 3 Titɨm erze Porrosht aabo uje eeshɨlo hnote yẽrni. Ye tahmũrpe uje yok kushĩyak heke tuu eyok leshɨbo ohno otɨ̃r olak par oteychɨm kɨmɨjɨ nos emɨtlo hnote owich ɨtso uje titɨm õrni
\v 4 pork kɨmɨjɨ Macedonia oso onõya yok uje takaha tɨtɨ̃r olak hn olak ye emɨtlo hnote owɨlope ich uhulo oyɨpook hn ich shuu apooklo toy pork titɨm õrni uje olak ich nos emɨtlo.
\v 5 Heke ma om tuu eyok leshɨbo ohno wap otɨ̃r olak par onɨshii erze hnote owich uje atɨmlo yokni par uje ebɨtlo. Heke uje takaachɨ̃hɨ olak ahɨr nehe ich nos de. Ye oyɨrok olakpe par uje ebɨtlo erze hnote. Shɨ ahmũrlo heke ebɨtlo.
\v 6 Ahnũwo uje titɨm olakɨke shɨ tɨteẽta. Kɨmɨjɨ akashɨmlo erze losuhlaabo pɨkaap ich shɨ ɨtso ese uje chukwẽr pɨkaap heke chekushu pɨkaap per ese uje chukwẽr kɨhniya ich chekushu kɨhniya pork Porrosht ma takashɨm erze uje ma otsõsɨr yewo.
\v 7 Kal nohmɨr nohmɨr shuu deyuwo tɨsɨ̃r par ɨshɨmɨhɨ. Ye ompe uje yeẽk ɨshɨm uje ye nahmũr dosɨmpe, hn ye ompe ɨshɨm shɨ pork yeẽk chɨrok ɨre. Porrosht sahmũr erze uje ich õr ayla uje oshɨm
\v 8 hn ɨre nos pwele ɨshɨmɨhɨ olak kuche uje olak nesita hn shuu iyuwe par uje shish de olak ahɨr uje olak nesita hn par uje olak pwele akashɨmlo yewo hn uhulo sowe pork nos wɨr erze obiyo ich om.
\v 9 Porrosht ahwoso tata shuu ɨtsorz ɨm: —Uje yeẽk sahmũr yok ich ye narhak ɨr kushjãro par ɨshɨmɨhɨ erze losuhlaabo hn wɨr ye olɨkey uje ɨshɨmɨhɨ õr erze uje ich om hnii Porrosht ye dɨkeype uje wɨchɨ shiyokõr.—
\v 10 Porrosht wɨchɨ uje ɨshɨm oso jõro eyhi par uje ochukwẽr hn ɨshɨm õr poso par uje otew. Tyenɨj nos ɨshɨm olak uje olak nesita par uje olak pwele akashɨmlo erze yewo hn shish de olak ahɨr ma kɨhniya.
\v 11 Porrosht tyenɨj takashɨm pɨshɨ olak par uje olak pwele akashɨmlo pɨshɨ erze yewo toy hn erze hnote uje asɨmɨhɨlo õryok par uje oyosɨmɨhɨ õr ich shuu onɨna Porrosht.
\v 12 Uje asɨmɨhɨlo erze Porrosht aabo erze hnote ich akashɨmlo õr hn ich uhulo wɨr onɨna Porrosht toy.
\v 13 Uje akashɨmlo õr uhulo ɨtsorz ich uhulo ɨmeheeych uje olak ye otiislope uje Cristo ɨshɨ olak hnɨtewɨhɨ Porrosht ahɨrkite hn uhulo oso onarim Porrosht uje akashɨmlo õr hn akashɨmlo yewo toy.
\v 14 Heke wɨr õr eyucha olak hn õr orar otsapur Porrosht par takashɨm olak pork Porrosht wɨchɨ uje shuu akashɨmlo pɨsh õr.
\v 15 Tɨkɨnshɨp Porrosht pork shuu Cristo ɨshɨ eyok hnɨtewɨhɨ dahɨrkite. Ich ɨhɨ̃rtpa uje ɨtsorz.
\c 10
\s Pablo wɨchɨ apóstol heke ɨr ukurbosh.
\p
\v 1 Yok Pablo. Sehe titɨm olak kuchẽrk. Erahalo uje Cristo ɨle om heke shish shiyokõr uje ich om. Ode uje otata uje yok de olak ahɨr ich tɨkɨtɨloho uje titɨm olak per uje yok de dukuhla ich tobɨter olak.
\v 2 Uje takaha tɨtɨ̃r olak nehe ich ye ahakõrlo mɨhnũwo uhulo tobɨter olak. Tɨkɨraha uje olak yewo ode. Otata uje tiyokõr ɨtso erze ɨ̃rmo oso oshiyokõr. Wɨr uje tyenɨj tobɨter õr nehe.
\v 3 Ich ũru uje yebuhulo nãhu ɨ̃rmo per eyok ɨmãho kɨnãho, ye ɨlo erze ɨ̃rmo oso õr ɨmãhope.
\v 4 Erze kuche uje ɨ̃rmo oso ochɨ̃rye par oteye wɨr ye jukur par eyok. Shɨ Porrosht ukurbo de par uje yɨ̃rlo eyok ɨmãho heke pwele yɨhna erze uje sehe onontew Porrosht ahwoso.
\v 5 Uje yitɨm oso Porrosht ahwoso hn oshiyokos eyok ich yɨnta õr yɨkitkẽr õr nehech õr aho kɨɨs hn ye yuhu jukur erze õr ahwoso uje otata uje sontew õr ye duhu odɨraha Porroshtpe, hn yuhu õr eyuwo tɨsɨ̃r erze uje ich om par uje oshiyokõr uje Cristo sahmũr.
\v 6 Uje nos ahakõrlo uje Cristo sahmũr ich oyɨmɨt õryok par uje oyobɨter erze Porrosht aabo yewo uje ode olak ahɨr uje yesh oshiyokõr uje ich mɨhnũwo.
\v 7 Olak shɨ eychɨmlo oso õr eeyo hn ebɨtlo uje õr ɨluu ich om. Kɨmɨjɨ yeẽk dɨbɨte uje ich ũru uje ye lotiis Cristope ich tyenɨj chɨraha uje õryok ɨtspo, ye oyotiispe ɨtso ɨre.
\v 8 Eyok Ɨrhĩch ɨshɨm õryok ukurbo par uje oyakashɨm olak oyuhu olak ɨluu ma ɨtso Cristo ɨr ɨluu. Ye dosɨm õryok ukurbo par uje oyiyokõr mɨhnɨkɨ̃hɨ olakpe. Kɨmɨjɨ yok narim yok tuu iyuwe pɨkaap ich ye tiyokõr mɨhnɨ̃kpe pork ɨshɨm õryok erze ukurbo. Nĩhyok yeẽk pwele tata uje tehnyẽr olak hn shuu tɨkɨpook.
\v 9 Uje tichew erze hute hn tokosɨm olak ich ye tahmũrpe uje tuu as olak ɨbe
\v 10 pork yewo otata otsɨɨ: —Pablo ɨr ahwoso ich ɨhnpa uje chichew chɨbɨte hute mahn uje wɨchɨ de olak ahɨr ich ɨr ahwoso ye ɨhnpe. Uje chiilehet ich shɨ ɨtso uje ye ɨr ukũrbɨrsh.—
\v 11 Erze uje otata oshuu ɨtsorz ich sehe tuu odɨraha erze pahwoso uje tichew tɨbɨte erze hute ich shɨ ɨtso uje yok de olak ahɨr hn titɨm olak.
\p
\v 12 Õryok ye õryok narim oryõkpe oyuhu ɨlo erze yewo uje shɨ onarim ɨre pork uje wɨr oteychɨm yewo õr ɨbiyo par uje ochɨraha kɨmɨjɨ õr ɨbiyo ich ma om je erze yewo õr ɨbiyo ich oshiyokõr ɨtso uje ye õr eyuwɨ̃rsh. Kɨmɨjɨ oteychɨm yewo par ochɨraha kɨmɨjɨ õr ɨluu ich ma om je erze yewo õr ɨluu ich oshiyokõr ɨtso uje ye õr eyuwɨ̃rsh.
\v 13 Mahn õryok ye õryok narim oryõkpe oyuhu sowe erze uje Porrosht chɨbɨte par uje oyiyokõr ɨr ɨbiyo. Porrosht ɨshɨm õryok par uje oyanɨmɨrãha ɨr ahwoso nehech oyaachɨ̃hɨ ese dɨt Corinto uje olak de.
\v 14 Heke ye oyiyuwepe uje Porrosht ɨshɨm õryok par oyiyokõr uje oyaachɨ̃hɨ olak ahɨrni. Õryok webich oso uje oyãra dukuhla nehech oyaachɨ̃hɨ olak ahɨr par oyitɨm olak uje Cristo ɨshɨ olak hnɨtewɨhɨ Porrosht ahɨrkite.
\v 15 Ye õryok narim oryõkpe erze obiyo uje yewo oshiyokõr pork wɨr ye õryok ɨbiyope, per shish sehe oyuhu olak ma ye otiislo Cristo par uje õryok pwele oyuko oyɨtɨ̃r ma dukuhla.
\v 16 Sehe oyɨtɨ̃r erze hnɨmo uje de olak pɨt hn oyanɨmɨrãha Porrosht ahwoso oyitɨm oso uje Cristo ɨshɨ õr hnɨtewɨhɨ Porrosht ahɨrkite hn ye õryok narim oryõkpe erze obiyo uje yewo oshiyokõrni.
\v 17 Uje yeẽk sehe narim ɨre ich ma om tyenɨj narim eyok Ɨrhĩch.
\v 18 Kɨmɨjɨ hnakɨrbich narim ɨre ich ye jukur per kɨmɨjɨ eyok Ɨrhĩch narim wɨchɨ ich om.
\c 11
\s Oso ode uje ochii ɨr apostolehe.
\p
\v 1 Sehe tuu hap enthɨlo yok uje titɨm olak. Shɨ yok ɨtso totihlo uje titɨm olak. Hap enthɨlo yok.
\v 2 Ich yok ajɨrmɨk pork tarhãk olak, hn uje yok ajɨrmɨk shɨ tãra Porrosht. Yok tuu amsahaloni par Porrosht aabo heke shɨ olak ɨtso tɨmcharrza phãrrza pork ye ahakõrlope uje mɨ̃hnɨk hn tokosɨm olak hnakɨrbich nohmet shɨ ɨtso olak abich. Wɨchɨ hnakɨrbich Cristo.
\v 3 Ese echeẽt uje sehnyẽr Evakite ich eykdeyo. Tɨkɨtɨla uje shɨ ɨtso uje ɨre sehnyẽr Evakite ich yeẽk sehnyẽr olak nehe shuu olak eyuwo kɨnãho par uje ye eeychãhalo pɨshɨ Cristo.
\v 4 Kɨmɨjɨ yeẽk taachɨ̃hɨ olak ahɨr hn sanɨmɨrãha Jesús tatɨm olak per shuu kɨnaha ye ɨlo uje oyitɨm olak petɨkni, o kɨmɨjɨ nanɨmɨrãha tatɨm olak ɨchɨbich kɨnaha ye ɨlo uu Porrosht Ɨchɨbichpe uje masaha olak ahoni ich ahmũrlo õr ahwoso, o kɨmɨjɨ tatɨm olak kuchẽrk uje kɨnaha uje ɨshɨ olak hnɨtewɨhɨ Porrosht ahɨr ye ɨlope uje oyitɨm olak uje Cristo ɨshɨ olak hnɨtewɨhɨ Porrosht ahɨrkite heke ich ahmũrlo õr.
\v 5 Erze uje otsehnyẽr olak ich ochii ɨr apostolehe hn ochɨbɨte uje õr ma dɨtuwo je yok. Per ye tɨbɨtpe uje õr ɨre ma dɨtuwo je yok.
\v 6 Kɨmɨjɨ ye tɨkɨrahapa uje tiipuhut per ich ma tɨkɨraha Porrosht ahwoso. Ich nos oyuhu ɨmeheeychɨhɨ olak ɨkɨch uje oyɨraha Porrosht ɨr ɨluu.
\v 7 Tanɨmɨrãha Porrosht ahwoso titɨm olak uje Jesús ɨshɨ olak hnɨtewɨhɨ Porrosht ahɨrkite heke amsahaloni par olak Porrosht aabo. Ye tapur olak kuchepe par uje tuu asɨmlo yok. Shɨ tishew obiyo par uje tɨkiya uje nihyokɨ̃hɨ pahɨr. ¿Je tiyokõr mɨ̃hnɨk uje tishew obiyo tuu ɨtsorz?
\v 8 Erze Porrosht aabo yewo uje oshɨm yok ɨr hnote par tanɨmɨrãha Porrosht ahwoso titɨm olak ich shɨ ɨtso uje tokorha õr hnote per ye tokorhape.
\v 9 Uje yok de olak ahɨrni hn yok nesita kuche ich ye tɨrok olakpe par uje tuu akashɨmlo yok. Shɨ Porrosht aabo uje otãra wahacha hnɨmich Macedonia otekɨrɨhɨ yok wɨr uje oshɨm yok uje yok nesita. Heke ye tɨrok olak petɨkni par uje tuu asɨmlo yok kuche uje nihyokɨ̃hɨ pahɨr hnii ele ahle ich ye tapur olak par asɨmlo yok uje yok nesita hnii pɨkaap.
\v 10 Tɨkɨraha uje Cristo ɨr ahwoso ich ũru uje tanɨmɨrãha, hn ich ũru toy uje ye latɨk pwele sontew yok par uje ye titɨm orɨ̃hɨ wahacha hnɨmich Acaya uje olak de uje Cristo ɨshɨ õr hnɨtewɨhɨ Porrosht ahɨrkite.
\v 11 ¿Ɨnaapo heke tiipuhut tuu ɨtsorz? ¿Je tiipuhut tuu ɨtsorz pork ye tahmũr olakpe? Porrosht chɨraha uje tahmũr olak.
\v 12 Shish tanɨmɨrãha Porrosht ahwoso hn ye tokoympe. Shish tanɨmɨrãha par uje tuu ɨmeheeych uje shɨ õr ukushiĩ uje onarim ɨre hn otata uje õr ɨbiyo ɨtso pɨbiyo.
\v 13 Erze hnakɨrbo wɨr ye õr apostolpe. Shɨ sehe onehnyẽr oso odii ɨr Cristo apostolehe per ye Cristo ɨr apostolpe.
\v 14 Heke ye as olak ɨbe pork wɨr oshiyokõr oshuu ɨre ɨtso Satanás pork Satanás chii ɨre Porrosht anjelehe.
\v 15 Heke ye erahaklo. Erze uje õr Satanás ɨbiyo oshiyokõr ɨtso ɨre hn ochii ɨr Porrosht ɨbiyoho. Õr ɨbiyo ich mɨhnũwo heke tyenɨj mɨ̃hnɨk tɨ̃r õr nehe.
\s Kuche mɨhnũwo uje shish tɨ̃r Pablo.
\p
\v 16 Titɨm olakpo. Ye ompe uje yeẽk chɨbɨte uje yok totihla. Per kɨmɨjɨ eylo yok totihlaha ich shɨ titɨm olak par uje enthɨlo yok uje yok narim yok pɨkaap.
\v 17 Erze uje tyenɨj titɨm olak ye Porrosht tatɨm yokpe. Uje titɨm olak ich shɨ yok narim yok ɨtso uje yok totihla.
\v 18 Ich okɨhniya uje onarim ɨre otata uje oshiyokorɨ̃hɨ kuche nãhu ɨ̃rmo heke yok narim yok toy.
\v 19 Olak ebɨtlo uje ich olak eykdeyo per ahmũrlo ẽrlo wɨr õr ahwoso erze uje õr totihlo uje õr ahwoso ye ompe.
\v 20 Ich uhu olak ɨtso totihlo pork uje wɨr ochii olak deloho, o kɨmɨjɨ ohnoy olak kuche, o kɨmɨjɨ onehnyẽr olak, o kɨmɨjɨ onarim ɨre, o kɨmɨjɨ oniyokõr mɨhnɨkɨ̃hɨ olak ich shish olak ewenta heke uhu olak ɨtso totihlo toy.
\v 21 Kɨmɨjɨ tiyokõr tuu yok ɨlo erze uje shɨ otsehnyẽr olak ich tɨkɨpookpa. Ich shɨ ɨtso uje ye õryok ukũrbɨrsh par oyiyokõr oyuhu õryok ɨtso õr. Per erze uje otsehnyẽr olak ich otsahmũr uje onarim ɨre heke yok narim yok toy. Uje yok narim yok ich shɨ yok ɨtso totihla.
\v 22 Erze uje otsehnyẽr olak ¿je wɨr hebreo yewo? Ich yok ɨtspo. ¿Je wɨr israel yewo? Yok ɨtspo. ¿Je wɨr otãra ɨr porokkite Abraham? Yok ɨtspo.
\v 23 ¿Je wɨr Cristo ɨbiyo? Yok Cristo ɨr ɨbɨk uje tiyokõr ma obiyo je õr ɨre. Uje titɨm olak tuu ɨtsorz ich shɨ ɨtso uje yok totihla. Yok ma tiyokõr obiyo je õr ɨre, hn ma ochɨmchaha yok karsel ehet je õr ɨre, hn ich ma otsepyẽr yok je õr ɨre, hn shish kuche mɨhnũwo tɨ̃r yok par uje sehe duhu tɨkɨtɨ per ye tɨkɨtpe.
\v 24 Ich sinko bese uje israel oso ochishew yok hn oshuu yok ochɨ̃ra yok shɨkote oshuu otɨskẽr nehech treynta y nueve bese,
\v 25 hn tre bese uje ochishew yok oshuu yok ochɨ̃ra yok phich, hn deeych yet oshuu yok ochɨ̃ra yok kojano po par uje oshuu tɨkɨtɨ, hn ich pohɨr tre uje tokonãha hn kara hn yaka. Dɨhlich sohmɨra hn deeych sohmɨra uje yok dechɨ onoota bahluta ehet pork pohorrza yaka.
\v 26 Shish takaha tɨtɨ̃r lekɨtiyo, hn ich yarhak uje tɨkãha onoota waa je uushɨ, hn ich yarhak uje echɨko ochishew yokɨhɨ dehet pehet, hn ich yarhak pork sehe pɨhnapso israel oso oduhu yok, hn ich yarhak toy uje sehe dihipo kɨnãho oduhu yok, hn ich yarhak uje yeẽk shuu yokɨhɨ dɨt ehet, hn ich yarhak uje yeẽk shuu yokɨhɨ hnɨmich uje ɨsa, hn ich yarhak toy uje yok hmartɨhɨ onoota bahluta ehet, hn ich yarhak uje erze uje ochii ɨr Porrosht aaboho sehe oduhu yok.
\v 27 Shish tishew obiyo ich kɨhniya nehech tɨrmtsɨr, hn ich dɨhle kɨhniya uje ye yok pwele tukumpe, hn daalo de uje piyuwo sẽhi yok hn piich sẽhi yok toy pork nĩhyok ye pobɨsɨ̃rsh, hn hmemɨt sẽhi yok toy, hn nĩhyok pɨshuwo uje ich om.
\v 28 Kuche mɨhnũwo yewo tɨ̃r yok toy. Ye shɨ erzepe per kal deeych ich nos wɨr kuche mɨhnũwo uje tɨ̃r Porrosht aabo lekɨtiyo ich tukuuna toy.
\v 29 Uje kuche mɨhnũwo tɨ̃r Porrosht aabo yeẽk hn chuuna uje ye pwele ewentpe ich yok ɨtspo tukuuna uje mɨhnũwo tɨ̃r ɨre. Kɨmɨjɨ yeẽk duhu yet niyokõr uje mɨ̃hnɨk ich tiis puulo par ese uje shuu eyok leshɨbich shiyokõr uje mɨ̃hnɨk.
\v 30 Erze uje otsehnyẽr olak ich oshuu yok narim yok heke tyenɨj titɨm olak kuche par tuu ɨmeheeych uje yok ye pukũrbɨrsh.
\v 31 Porrosht uu eyok Ɨrhĩch Jesucristo ɨr Deych wɨchɨ uje shish nos yeeychãhalo. Wɨchɨ chɨraha uje ye tiita pukushiĩpe.
\v 32 Uje yok dechɨ dɨt Damasconi hn ese rey Aretas ɨr gobernador uje dechɨ shuu ohyerptoso oyehe ese moraylt uhur uje de lekɨtiyo uje chɨpeẽsa dɨt par uje ochishew yok,
\v 33 per ode uje ochɨmchaha yok kanasta ehet hn oshuu tɨkãha mɨntanta waa je de moraylt hn ochɨrmas yokɨhɨchɨs pɨt heke tɨkɨtokolɨhɨ wɨchɨ gobernador hme.
\c 12
\s Porrosht chowa Pablo kuchẽrkni uje ye latɨk pwele nomo.
\p
\v 1 Ye jukur par yok uje titɨm olak erze kuche uje tɨ̃r yokni hn yok narim yok tuu ɨtsorz. Heke titɨm olak erze uje eyok Ɨrhĩch chowa yok hn erze uje tatɨm yok.
\v 2 Tɨkɨraha hnakɨrbich uje ye lotiis Cristope. Porrosht hnoy ɨre seya poõrc uje ɨre de par chowa kuchẽrk hn shuu cheeshpo. Ich terɨhɨ katorse ãyo hnii titɨm olak. Ye tɨkɨraha kɨmɨjɨ doy ɨr yũhurrza o kɨmɨjɨ shɨ doy ɨr ɨchɨbich. Porrosht wɨchɨ uje chɨraha.
\v 3 Tɨkɨraha uje Porrosht hnoy ese hnakɨrbich seya paraíso. Kɨmɨjɨ doy ɨr yũhurrza o kɨmɨjɨ doy ɨr ɨchɨbich, yok ye tɨkɨraha. Porrosht wɨchɨ uje chɨraha.
\v 4 Ese hnakɨrbich chunt ahwoso uje Porrosht ye nahmũr uje tatpe, hnii uje tatɨm yewo.
\v 5 Shɨ yok narim ese hnakɨrbich per ye yok narim yokpe. Shɨ yok narim yok uje titɨm olak erze uje shuu ɨmeheeych uje ye pukũrbɨrsh.
\v 6 Kɨmɨjɨ sehe yok narim yok ich ye tuu yok ɨlo totihlope pork shish tiita uje ich ũru. Per ye tahmũrpe uje yok narim yok par uje ye latɨk tata uje yok dichpa. Shɨ uje oteychɨm yok hn ochunt yok ich ochɨraha kɨmɨjɨ yok dich o kɨmɨjɨ ye yok dichpe.
\v 7 Porrosht shuu tɨkɨraha kuche ich kɨhniya per ye nahmũr uje tuu peyuwo tɨsɨ̃r uje yok ma dich je erze yewo. Heke ɨshɨm yok ese uje shɨ ɨtso wontɨ par uje chichew yok. Ese uje ɨtso wontɨ wɨchɨ Satanás ɨbɨk uje shuu tɨ̃r yok par shiyokos yok. Heke ye tuu peyuwo tɨsɨ̃rpe uje yok ma dich je erze yewo.
\v 8 Ich tre bese uje yok orar tapur eyok Ɨrhĩch par uje chiyuhu yokɨhɨ ese uje ich dospa
\v 9 per Porrosht tatɨm yok ɨm: —Tokosɨr owa par uje owa ewenta pork wɨchɨ uje ɨtso wontɨ de owa par shuu ɨmeheeych uje pukurbo de.— Heke yok ayla hn yok narim yok pork ese uje ɨtso wontɨ de yok par uje ye duhu pukũrbɨrsh per shuu ɨmeheeych uje Cristo ɨr ukurbo de hn shish takashɨm yok.
\v 10 Erze kuche mɨhnũwo uje ɨmehe yok shuu Cristo ich dich heke shish pehet kɨɨs uje ye pukũrbɨrsh. Kɨmɨjɨ oso otata uje ye yok jukur per shish pehet kɨɨs. Kɨmɨjɨ kuche nihyokɨ̃hɨ pahɨr ich shish pehet kɨɨs. Kɨmɨjɨ oniyokõr mɨhnɨkɨ̃hɨ yok ich shish pehet kɨɨs, hn kɨmɨjɨ kuche tɨ̃r yok par uje sehe duhu yok dosdarak ich shish pehet kɨɨs. Uje ye yok pwele tiyokõr kuche ich Cristo ɨshɨm yok pukurbo par uje tiyokõr.
\s Pablo eyucha Porrosht aabo uje ode dɨt Corinto.
\p
\v 11 Titɨm olak. Tuu yok ɨtso totihlo pork olak uhulo yok narim yok. Olak tyenɨj olak narim yok, ye yokpe. Ich ye yok dichpe hn erze uje otsehnyẽr olak ochii ɨr apostolehe ye õr ma deyope je yok.
\v 12 Uje yok de olak ahɨrni ich tɨkɨnta olak uje tiyokõr erze kuche uje ye latɨk pwele niyokõr uje shuu as olak ɨbe. Erze uje tiyokõr chɨbɨte orhõta uje ich ũru uje yok Porrosht ɨr apóstol.
\v 13 ¿Latɨkpo erze uje tiyokõrni par erze Porrosht aabo uje otakasho lawichɨhɨ lekɨtiyo hn ye tiyokõr petɨkni par olak? Ese uje ye tiyokorɨ̃hɨ olak wɨchɨ uje ye tɨrok olakpe par uje tuu akashɨmlo yok. Kɨmɨjɨ mɨ̃hnɨk uje ye tapur olak par uje akashɨmlo yok ich sehe tuu olak perdonar yok.
\v 14 Do bese uje tekɨrɨhɨ olakni hn ele ahle ich tinshii yok par uje takaha tekɨrɨhɨ olakpo per ye tapur olak kushjãrope. Shɨ tukwi olak par uje tuu ahakõrlo uje Porrosht sahmũr. Olak erahalo uje pɨkɨhnino ye õr pwele odishew obiyope par uje otiya uje õr deych hn õr data õr nesita. Shɨ õr deych hn õr data ochishew obiyo par uje otiya uje õr aabo nesita.
\v 15 Shɨ yok ɨtso olak deych heke tahmũr tokosɨmɨhɨ yok olak par uje takashɨm olak hn tɨnaha yok par uje takashɨm olak par uje ma ahakõrlo uje Porrosht sahmũr. Uje shish ma tahmũr olak, ¿je om uje etaklo yok nehech yẽrɨj ahmũrlo yok?
\v 16 Ode uje otata uje shish tehnyẽr oso per ye tapur olak kushjãro petɨkni par tuu asɨmlo yok. ¿Je tiyokõr tuu ɨlorz par uje tehnyẽr olak?
\v 17 ¿Je tuu erze hnakɨrbo odo otɨ̃r olak par uje otsehnyẽr olak? Ye tiyokõr tuu ɨlorzpe.
\v 18 Tuu Tito hno tekɨrɨhɨ olak hn tuu eyok leshɨbich ĩya ɨre toy. ¿Je Tito nehnyẽr olak? Ye nehnyẽr olakpe pork Tito hn yok õryok eyuwo ɨtsye. Wɨchɨ shiyokõr ɨtso yok.
\v 19 ¿Je shish uhu olak eyuwo tɨsɨrɨ̃hɨ õryok uje oyehnyẽr olak hn sehe oyata? Ye oyiyokõr oyuhu ɨlorzpe. Õryok Cristo ɨr ɨbiyo heke nos oyitɨmɨhɨ olak Porrosht ɨle ɨkɨch erze kuche uje oyiyokõr. Pɨshɨbo watsaklo, oyahmũr olak heke oyitɨm olak par uje ma ahakõrlo uje Porrosht sahmũr.
\v 20 Titɨm olak tuu ɨtsorz pork tɨkɨtɨloho uje ye ahakõrlo uje tahmũr heke uje tekɨrɨhɨ olak nehe kɨmɨjɨ tish olak uje ye ahakõrlo uje Porrosht sahmũr ich tyenɨj tatsɨrãha pahwoso uje titɨm olak hn ye ahmũrlo uje ɨtsorz. Tuu peyuwo tɨsɨ̃r kɨmɨjɨ ahakosloye, o kɨmɨjɨ abɨtɨloye kuche, o kɨmɨjɨ etakloye, o kɨmɨjɨ ekutɨrãha olak kuche, o kɨmɨjɨ eyehnɨmloye, o kɨmɨjɨ athɨlo lare, o kɨmɨjɨ olak narim olak, o kɨmɨjɨ ye akɨshlo olak eyuwope.
\v 21 Tɨkɨtɨloho uje tekɨrɨhɨ olak nehe hn Porrosht shuu tɨkɨpookɨhɨ olak ɨkɨch uje olak kɨhniya uje ahakõrlo erze kuche mɨhnũwo hn ye moymlope. Heke uhulo tɨkiyerh kɨmɨjɨ ode olak ehet uje oshiyokõr erze kuche mɨhnũwo uje ye onõyhi pɨshye ahɨrpe hn shɨ omuhuye ahɨr, o kɨmɨjɨ hnakɨrbo ode uje oshiyokõr mɨhnuwõhoye par uje omuhuye ahɨr, o kɨmɨjɨ tɨmcher ode uje õhiyer ahɨrpo, o kɨmɨjɨ hnakɨrbo ode uje otsahat loshɨpo o kɨmɨjɨ tɨmcher õr ɨtspo, o kɨmɨjɨ pɨkɨhnino hn pɨkɨhnine oshiyokõr erze kuche mɨhnũwo oshuu ɨre ɨtso õr toy.
\c 13
\s Kɨmɨjɨ õr osiyer otata uje yet shiyokõr mɨ̃hnɨk ich tẽr õr.
\p
\v 1 Ich do bese uje tekɨrɨhɨ olakni hn ele ahle ich takaha tekɨrɨhɨ olakpo. Kɨmɨjɨ yeẽk tata uje eyok leshtɨk shiyokõr uje mɨ̃hnɨk ich ye eraha kɨmɨjɨ ũru, per kɨmɨjɨ õr osiyer otata o kɨmɨjɨ õr tre ich bale.
\v 2 Uje yok de olak ahɨrni ich titɨm erze uje oshiyokõr uje ich mɨhnũwo par uje oym oshiyokõr hn titɨm erze yewo par uje ye oniyokõr erze mɨhnũwo toy. Ele ahle ich yok de dukuhla per titɨm õrpo par uje oym. Uje takaha tekɨrɨhɨ olak nehe kɨmɨjɨ ye onoym ich ye tɨkɨntha õrpe.
\v 3 Olak sehe uhulo tuu ɨmeheeych uje ich ũru uje titɨm olak Cristo ɨr ahwoso. Cristo ɨr ukurbo de par uje nɨshii olak ɨluu heke tyenɨj shuu ɨmeheeych uje ɨr ukurbo de.
\v 4 Ich ũru uje tooho krus eeychkite shɨ ɨtso uje ye ukũrbɨrsh per Porrosht shuu wɨchɨ ɨkpo chɨ̃ra lakɨrbo. Õryok ye õryok ukũrbɨrsh. Shɨ õryok ɨtso ɨre uje wapni shiyokõr shɨ ɨtso uje ye ukũrbɨrsh, per Porrosht tyenɨj ɨshɨm õryok ukurbo par uje õryok pwele oyakashɨm olak.
\v 5 Uhu olak eyuwo tɨsɨ̃r kɨmɨjɨ olak Porrosht aabo pisho o kɨmɨjɨ ye olak ɨr aabope. Uhu olak eyuwo tɨsɨ̃r. Olak uje olak Porrosht aabo ¿je ye erahalope uje Jesucristo de olak aho? Per kɨmɨjɨ ye olak Porrosht aabope ich Cristo ye chɨhɨ olak ahope.
\v 6 Ich tahmũr uje erahalo uje olak Porrosht aabo heke ye timehĩ pɨbiyope.
\v 7 Õryok orar oyapur Porrosht par olak par uje ye ahakõrlo uje ich mɨhnũwo, per ye par uje õryok narim oryõkpe. Shɨ oyahmũr uje ahakõrlo uje ich om. Kɨmɨjɨ oso otata uje oyimehiĩ ich ye latɨkɨsh.
\v 8 Ye õryok pwelpe oyiyokõr latɨk par uje oyontew erze uje ich ũru. Shɨ oyanɨmɨrãha uje ich ũru uje Cristo ɨshɨ õr hnɨtewɨhɨ Porrosht ahɨr.
\v 9 Uje ahakõrlo uje om ich olak ukurbosh pork olak ewenta erze mɨhnũwo. Ich uhulo õryok aylpa pork tokole ɨtso uje ye õryok ukũrbɨrsh pork ye nesit oyatsɨrãha õryok ahwoso olakpe. Õryok orar oyapur Porrosht par uje shish ma ahakõrlo uje ich om uje ɨre sahmũr.
\v 10 Uje ehn yahpaa takaha tɨtɨ̃r olak ich tichew ana hutɨta par uje tokosɨm olak. Heke uje tish olak nehe ich ye nesitpe uje tatsɨrãha pahwosoho olak. Eyok Ɨrhĩch ɨshɨm yok pukurbo par uje takashɨm olak ye par uje tiyokõr mɨhnɨkɨ̃hɨ olakpe.
\p
\v 11 Pɨshɨbo watsaklo, ich pahwoso uhurc uje tichew tɨbɨte ana hutɨta. Uhu olak ayla. Moymlo uje ahakõrlo uje ich mɨhnũwo hn ahakõrlo uje ich om. Ahakõrlo uje titɨm olakɨke uje de ana hutɨta ehet. Shish uhu olak eyuwo ɨlye hn uhu olak aho kɨɨsɨhɨye. Porrosht sahmũr oso. Wɨchɨ uje shuu õr aho kɨɨs. Wɨchɨ uje tyenɨj takashɨm olak.
\v 12 Shish tyenɨj etɨloye.
\v 13 Nos wɨr Porrosht aabo uje ode lɨka oshɨm olak saludo.
\v 14 Sehe tuu eyok Ɨrhĩch Jesucristo dosɨr olak. Porrosht ich sahmũr olak, hn ɨr Ɨchɨbich de olak aho hn shish shuu olak eyuwo ɨtsye.