\id GAL Chamacoco NT - Paraguay 2000 (web 2013)
\h Gálatas
\toc1 Gálatas
\toc2 Gálatas
\toc3 Ga
\mt1 Gálatas
\c 1
\s Pablo ɨshɨm Porrosht aabo õr saludo.
\p
\v 1 Yok Pablo. Yok apóstol. Ye oso odɨbɨte yok petɨkni par apóstol hn nĩhyok ye yeẽk tɨ̃r yok par uje tatɨm yok par uje yok apóstol. Shɨ Jesucristo hn ɨr Deych Porrosht wɨr uje ochɨbɨte yok par apóstol. Ɨr Deych Porrosht wɨchɨ uje shuu Jesús ɨkponi.
\v 2 Yok hn nos wɨr Porrosht aabo uje ode lɨka pahɨr oyichew ana hutɨta oyosɨm nos wɨr olak uje olak dechɨ erze iglesya kɨhniya uje de wahacha ese hnɨmich Galacia.
\v 3 Sehe tuu eyok Deych Porrosht hn eyok Ɨrhĩch Jesucristo odosɨr olak hn oduhu olak aho kɨɨs.
\v 4 Jesucristo ɨshɨm ɨre osokite par uje oshuu oshuu toy par uje ɨshɨ eyok hnɨtewɨhɨ Porrosht ahɨr, par uje ye yukwiĩya erze oso uje Porrosht sepyẽr õr nehe pork nos oso õr ɨluu mɨhnũ. Eyok Deych Porrosht sahmũr uje Jesús shiyokõr par eyokkite shuu ɨtsorz.
\v 5 Sehe shish tuu oso oteeychãha Porrosht. Uje oniyokõr oduhu ɨlorz ich ɨhɨ̃rtpa.
\s Shɨ Cristo pwele shuu omasaha par Porrosht aabo.
\p
\v 6 Ich uhulo tish pɨbe uje sehe moymlo Porrosht shɨchish. Wɨchɨ uje chiihla olakni par uje ye otiislo Cristo hn shuu amsahalo par olak ɨr aabo. Ele ahle sehe moymlo Porrosht ahwoso hn ɨchii ye otiislo erze oso õr ahwoso kɨnãho hn olak ebɨtɨlo uje amsahalo par olak Porrosht aabo uhulo ɨtsorz.
\v 7 Nĩhyok ahwoso kɨnãho uje shuu omasaha par Porrosht aabo, shɨ Jesucristo nohmɨra. Per ode uje oshiyokos olak, sehe oduhu Jesucristo ɨr ahwoso poshɨk.
\v 8 Titɨm olakni uje shɨ tyenɨj ye otiislo Jesucristo par uje amsahalo par olak Porrosht aabo. Kɨmɨjɨ õryok oyitɨm olak ahwoso uje kɨnãho, o kɨmɨjɨ anjel uje tãra poõrc tatɨm olak ahwoso uje kɨnãho, ich sehe tuu Porrosht lajɨr õr ɨkiyo.
\v 9 Titɨm olakɨke ich titɨm olakpo. Kɨmɨjɨ yeẽk nanɨmɨrãha ahwoso kɨnãho tatɨm olak dehet yet par uje amsahalo par olak Porrosht aabo ye ɨlo uje titɨm olakni ich sehe tuu Porrosht lajɨr ɨr ɨkiyo.
\v 10 Ye titɨm osope tuu ɨtsorz shɨ par uje tuu otsahmũr yok. Shɨ titɨm õr uje ɨtsorz pork Porrosht sahmũr uje ɨtsorz. Ye titɨm osope par uje tuu õr aho kɨɨsɨhɨ yok. Kɨmɨjɨ titɨm õr shɨ par uje tuu õr aho kɨɨsɨhɨ yok ich ye yok Cristo ɨr ɨbɨkpe.
\s Porrosht shuu Pablo masaha par apóstol.
\p
\v 11 Pɨshɨbo watsaklo, sehe tuu erahalo uje ahnũwo ahwoso uje titɨm olakni uje Jesús ɨshɨ oso õr hnɨtewɨhɨ Porrosht ahɨr, ahnũwo ahwoso ye tãra oso õr eyuwope.
\v 12 Ye oniyokorãha yokpe hn ye otatɨm yokpe uje Jesús ɨshɨ oso õr hnɨtewɨhɨ Porrosht ahɨr. Shɨ Jesucristo wɨchɨ uje tatɨm yok par uje titɨm erze oso.
\p
\v 13 Olak ich entloni uje wapkite tɨkeeychãha Porrosht tuu yok ɨtso pɨhnapso israel oso uje oteeychãha Porrosht. Porrosht aabo õr eyuwo kɨnãho, ye ɨlo oryõkpe, heke tɨnaha yok uje tiyokõr mɨhnuwõho õr pork sehe tɨhna õr.
\v 14 Yok ich ma tɨkeeychãha Porrosht je erze pɨhnapso uje õr ãyo ɨtso yok. Ich tahmũrpa uu õryok poruwo wɨshɨ õr ahwoso.
\v 15 Uje ehn yahpaa yok shurhãpe ich Porrosht chiihla yok shɨ pork sahmũr yok
\v 16 par uje shuu tɨkɨraha Deyjɨt heke tokoym yok poruwo wɨshɨ õr ɨluu hn tomsaha par yok Porrosht aap hn shuu tanɨmɨrãha lahwoso titɨm erze dihipo kɨnãho uje Jesús ɨshɨ õr hnɨtewɨhɨ Porrosht ahɨrkite. Ich ye tapur yeẽk par uje tuu shiyokorãha yok.
\v 17 Ye tɨtɨ̃r dɨt Jerusalén petɨkni par tekɨrɨhɨ erze uje wap ɨchii õr apóstole par uje tuu oshiyokorãha yok. Shɨ tɨtɨ̃r wahacha hnɨmich Arabia, hn uje tɨkitokolɨhɨchɨs Arabia ich takaashpo tɨtɨ̃r dɨt Damasco.
\p
\v 18 Uje ich terɨhɨ tre ãyo hn tɨkitolɨhɨ dɨt Damasco hn tɨtɨ̃r dɨt Jerusalén par uje tekɨrɨhɨ Pedro. Tiyakaha wɨchɨ ahɨr nehech daalo kinse
\v 19 per ye tokomo apóstole yewope. Shɨ tokomo Santiago uu eyok Ɨrhĩch Jesucristo leshɨbich.
\v 20 Ahnũwo ahwoso uje tichew tɨbɨte ana hutɨta tokosɨm olak ich ũru. Titɨm olakɨhɨ Porrosht ɨle ɨkɨch uje ye titɨm olak pukushiĩpe.
\v 21 Uje tɨkitokolɨhɨ ese dɨt Jerusalén ich tɨtɨ̃r hnɨmich Siria hn hnɨmich Cilicia.
\v 22 Porrosht aabo uje ode lekɨtiyo ese hnɨmich Judea ye onomo yokpe.
\v 23 Shɨ ochunt uje antni tiyokõr mɨhnɨkɨ̃hɨ Porrosht aabo. Sehe tɨhna erze uje ye olotiis Jesucristope, per ochunt uje ele ahle ich tanɨmɨrãha Porrosht ahwoso titɨm õr par uje ye olotiis Jesucristo.
\v 24 Heke onɨna Porrosht uje ochunt uje yesh tanɨmɨrãha ɨr ahwoso.
\c 2
\s Erze apóstole otsahmũr Pablo.
\p
\v 1 Uje ich terɨhɨ katorse ãyo hn takaashpo tɨtɨ̃r Jerusalén. Bernabé hn Tito õya yok.
\v 2 Tɨtɨ̃r wahacha pork Porrosht shuu tɨkɨraha uje sehe duhu tɨtɨ̃r wahacha. Uje oyaachɨ̃hɨ Jerusalén hn õryok hn erze Porrosht aabo õr bahluwo uje otɨbey Porrosht aabo oyakɨsho õryok owich. Shɨ õryok uje oyakɨsho õryok owich, ye Porrosht aabo yewope. Titɨm õr erze Porrosht ahwoso shiyehe wɨr uje tanɨmɨrãha titɨm erze dihipo kɨnãho pork sehe tɨkɨraha kɨmɨjɨ erze õr bahluwo onahmũr par uje ye tokole uje ye jukur erze pɨbiyo uje tiyokõrni hn yesh tiyokõr.
\v 3 Uje titɨm õr tuu ɨtsorz ich ɨmeheeych uje ye Porrosht aabo õr nesitpe asa yarta waa je iich otsɨɨ sirkunsisyon par uje ochɨbɨte õr pork Tito de pahɨr uje oyakɨsho õryok owich ɨtsorz. Wɨchɨ griyegoya per ye odɨrok ɨrpe par uje oshuu ochɨbɨte asa yarta waa je iich otsɨɨ sirkunsisyon.
\v 4 Somɨramo õya Porrosht aabo uje ochɨbɨte uje õr ɨre Porrosht aabo per ye õr Porrosht aabope. Shɨ sehe odɨraha Porrosht aabo õr eyuwo kɨmɨjɨ oniyokõr asa ley waa je Moisés chichewkite o kɨmɨjɨ ye oniyokõrpe par shuu omasaha par Porrosht aabo o shɨ pork ye otsotiis Jesucristope ich omasaha par Porrosht aabo. Sehe odɨbɨte par uje Porrosht aabo oshiyokõr asa ley uje Moisés chichewkite.
\v 5 Ye yuhu odiilehet ma pork erze õr ahwoso ich ye ũrpe, hn ye oyosɨm õr hnii pɨkaap par uje oshuu Jesucristo ɨr ahwoso poshɨk pork sehe oyuhu Jesús ɨr ahwoso shish ũru par olak.
\p
\v 6 Porrosht aabo õr bahluwo ye onɨshii pahwosope pork erze uje tanɨmɨrãha ich ye poshɨkpe, ich ũru. Par yok ich ye latɨkɨsh kɨmɨjɨ õr ɨre õr bahluwo o kɨmɨjɨ ye õr bahluwope pork par Porrosht ich nos õr ɨtsye. Ye duhu õr kɨnãhope.
\v 7 Per ochɨraha uje Porrosht chiihla yok par uje tanɨmɨrãha ɨr ahwoso titɨm erze dihipo kɨnãho uje Jesús ɨshɨ õr hnɨtewɨhɨ Porrosht ahɨrkite shɨ ɨtso uje Porrosht ɨshɨm Pedroni par uje sanɨmɨrãha ɨr ahwoso tatɨm erze israel oso.
\v 8 Ɨmeheeych uje Porrosht chiihla Pedro hn yok par apostole pork shuu Pedro ɨbiyo tokole om erze israel oso õr ahɨr hn shuu pɨbiyo tokole om toy uje yok dechɨ dihipo kɨnãho õr ahɨr.
\v 9 Santiago, Pedro hn Juan wɨr uje Porrosht aabo ochɨbɨte uje ich õr deyo. Uje Santiago hõr ochɨraha uje Porrosht takashɨm yok uje tiyokõr erze pɨbiyo ich oyeychye hme hn oteycha Bernabé hmata toy par yar, par uje shish oyɨtɨ̃r erze dihipo kɨnãho õr hnɨmo hn oyanɨmɨrãha Porrosht ɨr ahwoso, hn wɨr shish otsanɨmɨrãha Porrosht ahwosoho israel oso õr hnɨmich.
\v 10 Otsapur õryok par uje õryok eyucha erze losuhlaabo. Wɨr uje shish sehe takashɨm õr.
\s Pedro ehet yũhurash wahacha dɨt Antioquía.
\p
\v 11 Uje Pedro hno tɨ̃r dɨt Antioquiani ich titɨmɨhɨ ɨre erze oso õr ɨkɨch pork chimehĩ uje shiyokõr.
\v 12 Antni Santiago shuu nahɨ̃re otɨ̃r Antioquía. Uje ehn yahpaa otaachɨ̃hɨ Pedro ahɨr ich Pedro shish taakɨhɨ erze dihipo kɨnãho õr ahɨr. Uje erze oso otaãcha hn Pedro tokolɨhɨ erze dihipo kɨnãho õr ahɨr. Ye nõya õrpe pork tola wɨr nahnapso israel oso,
\v 13 hn erze Porrosht aabo yewo uje wɨr israel oso otseẽt uje Pedro shiyokõr nehech Bernabé seẽt õr toy uje õr ɨre oshiyokõr. Wɨr õr aho yũhɨrsh.
\v 14 Uje takachɨm uje ye oniyokõrpe uje Porrosht ahwoso tata uje ich ũru ich titɨm Pedroho erze oso õr ɨkɨch too: —Owa israel os per ahakõr shɨ uhu owa ɨtso dihipo kɨnãho hn ye ahakõrpe uje erze israel oso oshiyokõr. ¿Ɨnaapo heke sehe uhu erze dihipo kɨnãho oniyokõr shɨ oduhu ɨre ɨlo uu israel oso õr ɨluuta?—
\p
\v 15 Uje õryok shũrha ɨchii õryok israel oso. Ye õryok dihipo kɨnãhope uje oshiyokõr kuche mɨhnũwo.
\v 16 Yɨraha uje nĩhyok ye latɨk pwele ɨshɨ ɨr hnɨtewɨhɨ Porrosht ahɨr shɨ pork shiyokõr erze ley uje Moisés chichewkite. Shɨ uje ye olotiis Jesucristo ich ɨshɨ õr hnɨtewɨhɨ Porrosht ahɨr, heke eyok ye yotiis Jesucristope hn ɨshɨ eyok hnɨtewɨhɨ Porrosht ahɨr. Jesús ye doshɨ õryok hnɨtewɨhɨ Porrosht ahɨr pork oyiyokõr asa ley waa je Moisés chichewkite. Nĩhyok ye latɨk pwele ɨshɨ ɨr hnɨtewɨhɨ Porrosht ahɨr shɨ pork shiyokõr asa ley waa je Moisés chichewkite.
\v 17 Ye yotiis Jesuspe heke ɨshɨ eyok hnɨtewɨhɨ Porrosht ahɨr. Ele ahle kɨmɨjɨ yiyokõr uje mɨhnũwo ¿je Jesucristo wɨchɨ uje duhu yiyokõr mɨhnũwo? Ye duhu yiyokõrpe.
\v 18 Antni tɨbɨte uje yok Porrosht aap pork tiyokõr uje erze ley tata per ye yok Porrosht aappe. Shɨ uje ye tokotiis Cristo ich tomsaha par yok Porrosht aap. Kɨmɨjɨ takaashpo par uje tiyokõr erze leypo par shuu yok Porrosht aap ich tuu ɨmeheeych uje tiyokõr mɨ̃hnɨk.
\v 19 Erze ley uje Moisés chichewkite shuu tɨkɨraha uje shish timehĩ pork tɨkiyuwe Porrosht ɨr ley tuu ɨtsorz heke tokoym erze ley shɨ ɨtso uje tɨkɨtɨ hn ye tokotiis Jesús par uje ɨshɨ yok hnɨtewɨhɨ Porrosht ahɨr par uje tiyokõr uje ɨre sahmũr. Shish pɨkɨrĩt dechɨ Porrosht ahɨr.
\v 20 Uje Jesucristo tooho krus eeych ich shɨ ɨtso uje tɨkɨtɨ tokõya ɨre pork tokoympa tiyokõr mɨhnũwo hn ele ahle uje yesh yok ɨka ye par uje tiyokõrpe uje shɨ yok tahmũr. Shɨ yok ɨka par tiyokõr uje Jesucristo sahmũr, hn ye tokotiis Porrosht Ijɨtpe shɨ pork wɨchɨ sahmũr yok heke ɨshɨm ɨre oso par uje oshuu oshuu toy par sosɨr yok.
\v 21 Porrosht shuu deyjɨt tɨrẽt par uje ɨshɨ yok hnɨtewɨhɨ dahɨr. Kɨmɨjɨ yeẽk niyokõr uje erze ley tata par uje ɨshɨ ɨr hnɨtewɨhɨ Porrosht ahɨr ich shuu tokole uje ye jukur uje Cristo toy. Ye tiyokõrpe tuu ɨtsorz.
\c 3
\s Ye ley duhu õr Porrosht aabope.
\p
\v 1 Olak uje ebuhulo ese hnɨmich Gálatas ¿je olak totihlo? ¿Yeẽkpo sehnyẽr olak hn shuu otiislo uje ich ũru? Uje oyanɨmɨrãha Porrosht ahwosni ich oyuhu ɨmeheeych uje Jesucristo tooho krus eeych par ɨshɨ eyok hnɨtewɨhɨ Porrosht ahɨr.
\v 2 Sehe tuu atɨmlo yok ahnũwo uje tyenɨj titɨm olake. Porrosht ɨshɨm olak Dechɨbichni. ¿Je dosɨm olak Dechɨbichni shɨ pork ahakõrlo erze ley uje Moisés chichewkite, o dosɨm olak shɨ pork ye otiislo Jesucristope?
\v 3 ¿Je olak totihlo? Uje amsahalo par olak Porrosht aabo hn ɨshɨm olak Dechɨbich uje takashɨm olak, per ele ahle ich olak koswãha. Sehe uhu olak ɨluu om ẽra olak ukurbo, ye ẽrlo Porrosht Ɨchɨbichpe.
\v 4 ¿Kɨmɨjɨ moymlo Porrosht nehe ich tokole uje ye jukur erze uje olak ewentni? Nos olak ewentni erze kuche mɨhnũwo uje tɨ̃r olak pork olak Porrosht aabo. Tokotiis uje moymlo uhulo ɨtsorz.
\v 5 Porrosht ɨshɨm olak Dechɨbich uje shiyokõr kuche olak ahɨr uje nĩhyok ye latɨk pwele niyokõr. ¿Duhu ɨnaapo uje shiyokõr shuu ɨtsorz? Ye niyokõrpe duhu ɨlorz shɨ pork ahakõrlo asa ley waa je Moisés chichewkite per shɨ shiyokõr pork ye otiislo Jesucristope.
\p
\v 6 Tɨteẽta Abraham. Shɨ pork ye lotiis Porroshtpe heke Porrosht ɨshɨ ɨr hnɨtew hn shuu ɨre owich de ahɨr.
\v 7 Ich ɨmeheeych par eyok uje nos wɨr erze uje ye olotiis Porroshtpe wɨr shɨ õr ɨtso Abraham aabo.
\v 8 Porrosht ahwoso shuu ɨmeheeych uje deeych yet nehe hn ɨshɨ õr hnɨtew erze oso uje ye õr israel yewope per shɨ kɨmɨjɨ ye olotiis ɨrpe heke Porrosht tatɨm Abrahamkite uje Cristo tyenɨj shiyokõr uje tatɨm ɨre ɨm: —Shɨ pork ye otiis yokpe heke nos tokosɨr wɨr dihip kɨnãho.—
\v 9 Heke ɨmeheeych uje nos wɨr erze uje ye olotiis Porrosht ich Porrosht sosɨr õr shɨ ɨtso uje sosɨr Abrahamkite pork wɨchɨ ye lotiis ɨrpe.
\v 10 Nos wɨr erze uje ochɨbɨte uje shɨ tyenɨj oshiyokõr asa ley waa je Moisés chichewkite par uje shuu õr owich de Porrosht ahɨr, wɨr uje Porrosht sajɨr õr ɨkiyo pork ɨr ahwoso tata shuu ɨtsorz ɨm: —Nos sajɨ̃r wɨr õr ɨkiyo erze uje oyuwe hn ye nos oniyokõrpe erze ley uje Moisés chichewkite.—
\v 11 Ich ɨmeheeych uje nĩhyok ye latɨk pwele ɨshɨ ɨr hnɨtewɨhɨ Porrosht ahɨr shɨ pork shiyokõr erze ley uje Moisés chichewkite pork Porrosht ahwoso tata shuu ɨtsorz ɨm: —Shɨ erze uje ye olotiis ɨrpe ich nĩhyok õr hnɨtew uje de Porrosht ahɨr heke õr owich de ɨre ahɨr.—
\v 12 Kɨmɨjɨ olotiis o kɨmɨjɨ ye olotiispe ich shɨ ɨtsye par erze ley uje Moisés chichewkite, pork Porrosht ahwoso tata shuu ɨtsorz ɨm: —Kɨmɨjɨ yeẽk nos niyokõr erze ley uje Moisés chichewkite hn ye sowe ich ɨr ɨkɨrĩt de Porrosht ahɨr.—
\v 13 Nĩhyok yeẽk pwele shiyokõr shuu ɨtsorz heke Cristo chiyuhu eyok par uje ye lajɨr eyok ɨkiyope shuu ɨtsorz. Porrosht ahwoso tata toy uje tyenɨj sajɨ̃r yeẽk ɨkiyo uje oso ochowɨsh ochɨbɨte pohorrza eeych heke õr ahwoso uje otsajɨ̃r eyok ɨkiyo ich nos noshãha Cristo.
\v 14 Heke Jesucristo shiyokõr shuu ɨtsorz par uje erze ahwoso omo uje Porrosht chɨbɨte tatɨm Abraham masaha dihipo kɨnãho toy shɨ pork ye yotiis ɨrpe heke Porrosht ɨshɨm eyok ese Dechɨbich toy uje tatɨm Abraham par uje ɨshɨm ɨre.
\s Porrosht chɨbɨte lahwoso tatɨm Abrahamkite.
\p
\v 15 Pɨshɨbo watsaklo, sehe tɨteẽta titɨm olak kuche. Uje oso ochɨbɨte lahwoso par uje sehe oniyokõr kuche hn ochichew ochɨbɨte hutɨta hn ochɨbɨte deeych uut par uje shuu ũru ich ye pwelpe uje shuu erze ɨr hute tokole uje ye jukur hn ye pwelpe uje chɨbɨte ma pork ochichew ochɨbɨte deeych uut.
\v 16 Erze uje tɨteẽta tata shuu ɨtsorz. Porrosht chɨbɨte lahwoskite uje tatɨm Abraham hn ese uje tãra ɨre. Porrosht ahwoso ye tatpe ɨm: —Erze,— duhu kɨhniya. Shɨ tata ɨm: —Ese— uje sohmɨra. Wɨchɨ Cristo.
\v 17 Porrosht chɨbɨte lahwoskite uje tatɨm Abraham shuu ɨtsorz. Uje terɨhɨ kwatro syento treynta ãyokite hn ɨshɨm Moisés erze ley par uje sanɨmɨrãha tatɨm erze israel oso. Erze ley ye pwelpe uje duhu erze Porrosht ahwoso ye jukur uje tatɨm Abrahamkite.
\v 18 Ye eyok owich chɨhɨ Porrosht ahɨrpe shɨ pork yiyokõr erze ley uje Moisés chichewkite. Kɨmɨjɨ yomsaha yuhu ɨtsorz ich erze ahwoso uje Porrosht chɨbɨte tatɨm Abraham ich ye jukur, per Porrosht chɨbɨte lahwoskite uje shɨ ɨshɨmɨhɨ Abraham ɨr owich uje de ɨre ahɨr.
\p
\v 19 ¿Ɨnaapo heke Porrosht shuu Moisés chichew asa leykite? Shɨ shuu shiyokõr par uje oso ochɨraha uje nos oyuwe asa ley hn oshiyokõr uje ich mɨhnũwo. Asa ley ɨchii dekite nehech Cristo taãcha, pork Porrosht tatɨm Abrahamkite uje tyenɨj Cristo tãra ɨre. Porrosht tatɨm anjele par uje otatɨm Moisés erze ley par uje sanɨmɨrãha tatɨm erze israel oso.
\v 20 Shɨ Porrosht sohmɨra uje chɨbɨte lahwoskite tatɨm Abraham, per par uje Porrosht ɨshɨm erze oso asa ley wɨchɨ ye shɨ tatɨm õrpe. Tatɨm anjele par uje otatɨm Moisés par uje sanɨmɨrãha tatɨm oso, heke erze ahwoso uje chɨbɨte par Abraham ich ma dich pork Porrosht uje keytkẽr.
\v 21 ¿Je asa ley pwele sontew erze Porrosht ahwoso uje chɨbɨte tatɨm Abrahamkite? Ye pwele nontpe. Kɨmɨjɨ asa ley pwele shuu oso õr ɨkɨrĩt de Porrosht ahɨr uje yelɨj nɨhna ɨre ich õr pwele oshiyokõr asa ley par uje shuu õr ɨkɨrĩt de Porrosht ahɨr, per ye õr pwelpe oshiyokõr oshuu ɨtsorz.
\v 22 Per Porrosht ahwoso tata uje nos oso oshiyokõr uje mɨhnũwo, heke shɨ erze uje ye olotiis Jesucristo ich Porrosht chɨbɨte lahwoso par shuu õr owich de dahɨr.
\p
\v 23 Uje ehn yahpaa Cristo taãcha petɨkni ɨchii ley sontew eyok uje yiyokõr erze mɨhnũwo hn tɨbey eyok par uje terɨhɨ ɨshɨrĩt uje Cristo taãcha hn ye yotiislo ɨre.
\v 24 Uje ehn yahpaa Cristo taãcha hn asa ley tɨbey eyok par uje shuu ye yotiislo Cristope par uje wɨchɨ ɨshɨ eyok hnɨtewɨhɨ Porrosht ahɨr.
\v 25 Cristo taãchni heke ye yotiislo ɨrpe hn asa ley ye tɨbey eyokpe.
\v 26 Jesucristo nos shuu olak Porrosht aabo pork ye otiislo ɨrpe.
\v 27 Nos wɨr olak uje otohɨrm olakni uje ye otiislo Cristope ich uhulo olak ɨluu shɨ ɨtso Jesucristo ɨr ɨluu.
\v 28 Ye latɨkɨsh kɨmɨjɨ owa israelya, o kɨmɨjɨ owa dihip kɨnaha, hn ye latɨkɨsh kɨmɨjɨ owa õr yɨlak o kɨmɨjɨ ye õr yɨlakpe. Kɨmɨjɨ owa hnakɨrap o kɨmɨjɨ owa tɨmchar ye latɨkɨsh pork nos olak ɨtsye uje akashɨlo Jesucristo.
\v 29 Uje Cristo wɨchɨ olak yɨnsɨrc ich tokole shɨ ɨtso uje olak ãrlo Abraham, heke ahnũwo ahwoso uje Porrosht chɨbɨte tatɨm Abrahamkite ich nos wɨr par olak.
\c 4
\p
\v 1 Ahnũwo uje tɨteẽta titɨm olakɨke tata shuu ɨtsorz. Uje ehn pɨkɨhnint ijaap hn ɨr deych toy ich nos wɨr ɨr kushjãro wɨr par ɨre per ye pwele tɨbeype erze ɨr kushjãro pork yesh ijaap. Heke tyenɨj shuu yet tɨbey ɨr kushjãro nehech terɨhɨ leherc. Wɨchɨ shɨ ɨtso uje õr yɨlak per wɨchɨ uu kushjãro yɨnsɨrc.
\v 2 Hnakɨrbo ode uje otɨbey wɨchɨ kushjãro hn otɨbey wɨchɨ toy pɨkɨhnint nehech terɨhɨ ɨshɨrĩt uje ɨr deych chɨbɨtni par uje erze hnakɨrbo oshɨm wɨchɨ ɨr kushjãro.
\v 3 Tɨteẽta erze kuche uje tokolɨhɨ ese pɨkɨhnintni wɨr shɨ ɨtso uje tokolɨhɨ eyokloni. Shɨ eyok ɨtso ese pɨkɨhnint. Uje ehn wɨchɨ ijaap shɨ otɨbey nehech dich, hn erze ley uje anjele oshɨm Moisés wɨr shɨ ɨtso uje tɨbey eyok,
\v 4 per uje terɨhɨ ɨshɨrĩtkite hn Porrosht shuu Deyjɨt tɨrẽt. Shuu tãra asa tɨmcharrza. Erze ley shish dekite par uje ɨre shiyokõr
\v 5 par uje ɨshɨ õr hnɨtew erze uje shɨ õr prowa oshiyokõr erze ley par uje shuu omasaha par Porrosht aabo.
\v 6 Ele ahle ich olak Porrosht aabo heke Porrosht shuu Deyjɨt Ɨchɨbich masaha olak aho. Porrosht Ɨchɨbich tata shuu ɨtsorz ɨm: —Dii Porrosht— heke olak tyenɨj atɨmlo Porrosht uhulo ɨtsorz toy: —Dii Porrosht.—
\v 7 Porrosht shuu amsahalo par olak ɨr aabo heke ele ahle ich ye olak ɨlo uje õr yɨlope shɨ pork olak prowani uje ahakõrlo asa ley par eshɨ olak hnɨtewɨhɨ Porrosht ahɨr. Ele ahle ich olak Porrosht aabo, heke erze Porrosht ɨr kushjãro uje de ɨre ahɨr wɨr par olak toy.
\p
\v 8 Uje ehn yahpaa erahalo Porrosht petɨkni ich shɨ ahakõrlo wɨr õr ɨbiyo erze porrosht kɨnãho uje ye Porroshtpe.
\v 9 Ele ahle ich erahalo Porrosht. Ma om uje titɨm olak uje Porrosht chɨraha olak. ¿Ɨnaapo heke sehe eeshlopo ahakõrlo erze ley uje anjele oshɨm Moisés? Wɨr ye ukurbɨ̃rsh hn nĩhyok ɨr kushjãro. ¿Ɨnaapo heke sehe amsahalo uhulo olak ɨtso uje õr yɨlopo?
\v 10 Ich olak narim uje terɨhɨ erze daalo hn shekurko hn ɨshɨ̃ryo hn ãyo ɨtso uje olak ɨr yɨlopo.
\v 11 Ich shuu peyuwo tɨsɨ̃r erze pɨbiyo uje tiyokorãha olak uje yok de olak ahɨrni, kɨmɨjɨ moymlo ich ye jukur.
\v 12 Pɨshɨbo watsaklo, sehe tuu olak ɨlo yok. Shɨ ye tokotiis Cristo par tomsaha par yok Porrosht aap. Shɨ yok ɨtso olak pork antni asa ley uje Moisés chichewkite ich nihyokɨ̃hɨ olak ahɨr hn ele ahle ich yok ɨtspo, ich ye yok ɨr yɨlakpe. Ye ahakorɨ̃hɨlo yok kuche petɨkni uje mɨhnũwo.
\p
\v 13 Erahalo uje wapni shɨ pork yok permo heke tɨtɨ̃r olak hn tiyakaha olak ahɨr. Uje yok dechɨ ich tanɨmɨrãha Porrosht ahwoso titɨm olak uje Jesucristo ɨshɨ olak hnɨtewɨhɨ Porrosht ahɨrkite.
\v 14 Ese permɨt uje chishew yok ich olak ewenta hn ye etaklo yokpe. Shish ahmũrlo yok shɨ uhulo yok ɨtso uje yok Porrosht ɨr anjel. Ahmũrlo yok shɨ uhulo yok ɨtso Jesucristo.
\v 15 Wap uje yok dechɨ ich shish olak aylpa per ele ahle ¿ɨnaapo heke ye olak aylɨhɨ yokpe? Tɨkɨraha uje sehe akashɨmlo yokni nehech sehe eyuhu olak ɨle eyhi par asɨmlo yok par tɨmchaha pɨle per ye olak pwele osɨrlo yok uhulo ɨtsorz.
\v 16 ¿Ele ahle je eeylo yok olak ɨmãha shɨ pork titɨm olak uje ich ũruni?
\p
\v 17 Erze oso oshiyokõr oshuu ɨtso uje otsahmũr pishɨ olak per õr eyuwo kɨnãho. Ye ũrpe. Shɨ sehe oduhu moymlo õryok hn ahmũrlo õr.
\v 18 Ich om uje otsahmũr olak per ye ompe uje shɨ oshuu daho yũhɨrsh. Ich tyenɨj oshuu ũru uje otsahmũr olak ɨtso yok uje tahmũr olak. Shish tahmũr olak ye shɨ uje yok de olak ahɨrpe.
\v 19 Pɨshɨbo watsaklo, shɨ olak ɨtso pijo. Ele ahle ich uhulo yok dosopo. Shɨ uhulo yok ɨtso uje tɨmcharrza ijɨt tabɨta pork terɨhɨ ɨshɨrĩt uje ijɨt shũrha. Shish tukuuna uje ich dospa uje tiyem uje olak ɨluu tokole shɨ ɨtso Jesucristo ɨr ɨluuta.
\s Agar hn Sara wɨr shɨ õr ɨtso Porrosht ahwoso osiyer.
\p
\v 20 Sehe tuu yok chɨhɨ olak ahɨrpo hn tɨkitkẽr olak titɨm olak uje ma om. Shish tuu peyuwo tɨsɨ̃r olak.
\v 21 Olak uje sehe ahakõrlo asa ley waa je Moisés chichewkite sehe tuu atɨmlo yok. ¿Je erahalo ɨnaapo heke Porrosht chɨbɨte asa ley?
\v 22 Porrosht ahwoso tata uje Abraham ɨr aabo odekite õr osiyer. Uu ɨr ijɨt yet shɨ tãra õr yɨlta hn uu ɨr ijɨt yet tãra waa ɨrãhta pishta.
\v 23 Ese ɨr ijɨt yet uje tãra waa je õr yɨla shɨ shũrha ɨtso erze pɨkɨhnino yewo uje nos õr shũrha, per ese ɨr ijɨt yet uje shũrha tãra asa ɨr ɨrãhta pishta. Shũrha par uje shuu Porrosht ahwoso yakaha uje chɨbɨte tatɨm Abrahamkite uje ɨshɨm õr ijɨt.
\v 24 Erze tɨmcher uje õr otiyer wɨr shɨ õr ɨtso erze ahwoso osiyer uje Porrosht chɨbɨtkite. Asa õr yɨlta wate shɨ ɨtso erze ley uje Porrosht tatɨmɨhɨ Moisés wahacha kojach Sinaikite. Wate iich otsɨɨ Agar. Uu ɨr ijɨt wɨchɨ shɨ õr yɨlak.
\v 25 Shɨ Porrosht sɨteẽta asa Agar ese kojach Sinaí uje dechɨ hnɨmich Arabia. Ese kojach wɨchɨ owich uje Porrosht ɨshɨm Moisés erze leykite. Hn sɨteẽtpo uje asa Agar wate shɨ ɨtso ese dɨt Jerusalén, hn erze oso uje odechɨ shɨ õr ɨtso yɨlo pork shish sehe oniyokõr erze ley par uje omasaha par Porrosht aabo.
\v 26 Waa Jerusalén ahlta waa je de poõrc wate shɨ ɨtso uje Porrosht aabo õr latɨ. Ich nĩhyok uje õr yɨlo odechɨ
\v 27 pork Porrosht ahwoso tatɨm asa tɨmcharrza ɨm:
\p —Owa uje owa ebɨr ye eyjɨ̃rsh ich tyenɨj owa aylpa hn ebich. Ye eenape erze uje ich doso uje aabosh, per ele ahle tyenɨj owa aylpa pork ma tokosɨm owa aabo je asa waa je shɨ ɨr abich shuu aabosh.—
\p
\v 28 Pɨshɨbo watsaklo, Porrosht chɨbɨte lahwoskite uje tyenɨj Isaac shũrha hn chɨbɨte lahwoso toy par uje shuu eyok shurhãpo heke eyok shurhãpo ɨtso Isaac,
\v 29 per Agar ye ebɨrpe, heke ɨr ijɨt shurhãkite shɨ ɨtso duhu pɨkɨhnino yewo uje oshũrha, hn ɨr ijɨt shiyokõr mɨhnɨkɨ̃hɨ Sara ɨr ijɨt uje shũrha pork Porrosht chɨbɨte lahwoso par uje shũrha. Ele ahle ich oso oshiyokõr shɨ ɨtso õr. Erze uje ye odɨraha Porroshtpe oshiyokõr mɨhnɨkɨ̃hɨ Porrosht aabo.
\v 30 Porrosht ahwoso tata uje Porrosht tatɨm Abraham ɨm: —Eyuhu wate ejwert asa elta hn ɨr ijɨt. Ich ye ompe uje otsehek erze kushjãro hn oshɨm pɨt yet asa elta ɨr ijɨt hn oshɨm pɨt yet asa erãhta pishta ɨr ijɨt.—
\v 31 Pɨshɨbo watsaklo, ich ũru uje titɨm olak. Ich ye eyok ɨlope asa õr yɨlta ɨr ijɨt. Shɨ eyok ɨtso asa ɨrãhta pishta ɨr ijɨt.
\c 5
\s Ye ompe ocheeshpo oshiyokõr erze ley.
\p
\v 1 Cristo chiyuhu eyokɨhɨ erze ley par uje ye erze ley dii eyok deloho, heke ye ompe uje eeshlopo ahakõrlo erze ley uhulo olak ɨtso uje ɨr yɨlopo.
\v 2 Yok Pablo. Sehe tuu ẽrlo yok uje titɨm olak. Kɨmɨjɨ ahakõrlo asa yarta waa je iich otsɨɨ sirkunsisyon par eeshɨlo olak hnɨtewɨhɨ Porrosht ahɨr, ich shɨ ebɨtɨlo uje Cristo ye jukur par ɨshɨ olak hnɨtew.
\v 3 Sehe titɨm olak. Nos wɨr hnakɨrbo uje oshuu oshiyokõr ɨr yarta ich tyenɨj nos oshiyokõr erze ley uje Moisés chichewkite.
\v 4 Olak shɨ ebɨtɨlo uje erze ley ɨshɨ olak hnɨtewɨhɨ Porrosht ahɨr. Kɨmɨjɨ ahakõrlo uhulo ɨtsorz ich shɨ moymlo Cristo, hn shɨ moymlo toy erze uje Porrosht chɨbɨtkite uje shɨ ye otiislo Cristo par uje olak owich de Porrosht ahɨr.
\v 5 Eyok ye yotiis Cristope heke Porrosht Ɨchɨbich takashɨm eyok uje yiyem par yɨtɨ̃r Porrosht ahɨr nehe.
\v 6 Eyok uje ye yotiis Jesucristo kɨmɨjɨ eyok yarta de waa je iich otsɨɨ sirkunsisyon o kɨmɨjɨ nĩhyok ich shɨ ɨtsye, ye latɨkɨsh. Shɨ uje ye yotiis Jesucristo hn yahmũr yewo, wɨchɨ uje om.
\p
\v 7 Wap shish ahmũrlo uje ich ũru hn ahakõrlo. ¿Yeẽkpo duhu moymlo uje ich ũru?
\v 8 Erze ahwoso uje shuu moymlo uje ich ũru ye tãra Porroshtpe uje chiihla olak wap par uje amsahalo par olak ɨr aabo.
\v 9 Ese uje sehnyẽr olak ɨr ahwoso ich shɨ ɨtso pan eyhita. Pan eyhita pɨkaap shuu ese erint tɨ̃r poõrc, hn ɨr ahwoso pɨkaap ich uhurc shuu olak moymlo uje ich ũru.
\v 10 Yok ye tokotiis uje eyok Ɨrhĩch tyenɨj takashɨm olak par uje shuu olak eyuwo tɨsɨ̃r uje om ɨtso yok. Deeych yet nehe hn Porrosht sepyẽr pishɨ ese uje shɨ sehnyẽr olak.
\v 11 Pɨshɨbo watsaklo, kɨmɨjɨ tanɨmɨrãha titɨm oso par uje ochɨbɨte õr yar waa je iich otsɨɨ sirkunsisyon ich ye wɨr israel oso oniyokõr mɨhnɨkɨ̃hɨ yokpe, hn ye olɨtak uje shɨ Jesús nohmɨra uje ɨshɨ õr hnɨtewɨhɨ Porrosht ahɨr uje tooho krus eeychni, per oshiyokõr mɨhnɨkɨ̃hɨ yok pork ye tiyokorãha osope par uje ochɨbɨte õr yar.
\v 12 Erze uje shish sehe odihokos olak wɨr uje sehe tuu odiyuhu õr itɨ shɨ ɨtso uje oshiyokɨ̃hɨ wõjo ochiyuhu itɨ.
\p
\v 13 Pɨshɨbo watsaklo, Porrosht chiihla olak par uje ye erze ley dii olak delohope. Ye ompe uje ebɨtɨlo uje Porrosht chiyuhu olak shuu ɨtsorz shɨ par uje ahakõrlo uje ich mɨhnũwo. Ich ma om uje ahmũrloye hn akashɨmloye.
\v 14 Pork Porrosht ahwoso tata ɨm: —Ahmũr yewo ich shɨ uhu ɨtso uje ahmũr owa.— Uje ahakõrlo uhulo ɨtsorz ich ye aluwelo erze ley uje Moisés chichewkite.
\v 15 Per uje etakloye hn ahakosloye ich shɨ ɨtso uje elɨloye. Abeylshɨp olak par uje ye ehnɨloye.
\v 16 Ma om uje ahakõrlo uje Porrosht Ɨchɨbich tatɨm olak hn ye ahakõrlo erze uje ich mɨhnũwo uje ahmũrloni,
\v 17 pork erze kuche mɨhnũwo uje de oso õr aho ye nahmũrpe erze uje Porrosht Ɨchɨbich sahmũr, hn Porrosht Ɨchɨbich ɨtspo ye nahmũrpe erze kuche mɨhnũwo uje de oso õr aho uje otsahmũr oshiyokõr. Erze osiyer ode olak aho hn shish odaliiye, heke ye olak pwelpe ahakõrlo uje ahmũrlo.
\v 18 Per kɨmɨjɨ asɨmlo Porrosht Ɨchɨbich par uje iyeebe hn ekãhalo ɨr ɨjɨch ich erze ley ye dii olak delohope.
\v 19 Ich ɨmeheeych uje erze kuche uje de oso õr aho ich mɨhnũwo. Ich om uje hnakɨrbich umuhu nerãhta ahɨr hn ich om toy uje tɨmcharrza umuhu dabich ahɨr per ich mɨ̃hnɨk uje ye onõyhi pɨshye ahɨrpe, shɨ omuhuye ahɨr. Ich mɨ̃hnɨk uje otorãhaye. Ich mɨ̃hnɨk uje tɨmcher tɨmcher oyhĩ yẽr ahɨr, hn ich mɨ̃hnɨk uje hnakɨrbo hnakɨrbo õyhiye ahɨr. Ich mɨ̃hnɨk uje yeẽk sahat loshɨpɨt, hn ich mɨ̃hnɨk uje yanak ɨshɨm ɨre loshɨpɨt par shuu sahat ɨre. Ich mɨhnɨ̃k toy uje pɨkɨhnino hn pɨkɨhnine oshiyokorɨ̃hɨye oshuu ɨtsorz. Ich mɨ̃hnɨk uje shɨ oshuu deyuwo tɨsɨ̃r shɨ par uje omuhu tɨmcher õr ahɨr, hn tɨmcher õr ɨtspo, ich mɨ̃hnɨk uje shɨ oshuu deyuwo tɨsɨ̃r par uje omuhu hnakɨrbo õr ahɨr.
\v 20 Ich mɨ̃hnɨk uje oteeychãha kojano po ochii ɨr porroshtɨhɨ, hn ich mɨ̃hnɨk uje oshiyokõr oshuu ɨre ɨtso meriko hn oteeychãha topo hn demonyo ochii ɨr porroshtɨhɨ. Ich mɨ̃hnɨk uje shish otsɨtakye, hn ich mɨ̃hnɨk uje oshiyokosye. Ich mɨ̃hnɨk uje otsahmũrpa opota kuche. Ich mɨ̃hnɨk uje ochesdelo shɨchish, hn ich mɨ̃hnɨk uje onarim ɨre sehe oduhu ɨre ma deyo. Ich mɨ̃hnɨk uje oshuu oso otsehek ɨre, hn ich mɨ̃hnɨk uje oshiyokorãha oso õr ahwoso uje ich ye ũrpe par oshuu õya ɨre par oshiyokõr weeta yata.
\v 21 Ich mɨ̃hnɨk uje opota yewo õr kushjãro hn ich mɨ̃hnɨk uje oshuu yɨkɨch sẽhi ɨre. Ich mɨ̃hnɨk uje oshiyokõr õr ahmiyo par oteeychãha kojano po ochii ɨr porroshtɨhɨ hn ich mɨ̃hnɨk nos wɨr kuche yewo uje ɨtso erze. Titɨm olakni hn ele ahle ich titɨm olakpo. Nos wɨr erze uje oshiyokõr oshuu ɨtsorz ich nĩhyok õr owich Porrosht ahɨr.
\p
\v 22 Porrosht Ɨchɨbich ye duhu ahakõrlope erze mɨhnũwo duhu ɨlorz. Wɨchɨ shuu ahmũrloye, hn shuu olak aho kɨɨs, hn shuu olak aho kɨɨsɨhɨ Porrosht. Wɨchɨ shuu entɨloye, hn shish shuu olak ɨle om. Wɨchɨ shuu ahakõrlo omɨhɨ oso yewo, hn shuu nos ahakõrlo uje athɨlo.
\v 23 Wɨchɨ ye duhu olak ehnitope, hn shuu erahalo abeylo olak par uje ye ahakõrlope uje ich mɨ̃hnɨk. Nĩhyok ye leyɨrãsh par uje sontew erze uje Porrosht Ɨchɨbich shiyokorɨ̃hɨ eyok aho.
\v 24 Erze uje ye olotiis Jesucristope wɨr shɨ õr ɨtso uje otoy oyehe krus eeych pork oym deluu uje mɨhnũ.
\v 25 Uje yɨbɨtɨlo uje Porrosht Ɨchɨbich iyeebe hn yiyehelo ɨr nẽr, heke tyenɨj yiyokõrlo uje Porrosht Ɨchɨbich tatɨm eyok.
\v 26 Ye eyok narim eyok hn ye yuhu yewo onarim eyok hn ye yobɨta erze uje õr deyo õr ɨbiyo.
\c 6
\s Porrosht aabo tyenɨj otakashɨmye.
\p
\v 1 Pɨshɨbo watsaklo, uje eyok leshtɨk yeẽk ye ewenta erze kuche mɨhnũwo hn shiyokõr, ich olak uje ahakõrlo uje Porrosht Ɨchɨbich sahmũr tyenɨj akɨtlo ɨre per ye atsɨrãhalo olak ahwoso uje akɨtlo ɨre hn uhulo niyokõr uje Porrosht sahmũr. Kal olak nohmɨr tyenɨj tɨbey ɨre par uje ye niyokõr uje mɨhnɨ̃k toy.
\v 2 Akashɨmloye. Uje ahakõrlo uhulo ɨtsorz ich ahakõrlo erze ley uje Cristo chɨbɨtkite.
\v 3 Kɨmɨjɨ yeẽk narim ɨre chɨbɨte ɨre uje ich dich per wɨchɨ ye dichpe ich shɨ sehnyẽr ɨre.
\v 4 Kal olak nohmɨr tyenɨj teychɨm debiyo kɨmɨjɨ tokole om o kɨmɨjɨ ye tokolpe, heke ich olak aho kɨɨsɨhɨ olak ɨbiyo hn ye atha uje ebiyo ma tokole om je ese yet.
\v 5 Kal olak nohmɨr tyenɨj tɨbey uje shiyokõr par uje tokole om.
\p
\v 6 Nos wɨr erze uje ochunt Porrosht ahwoso tyenɨj otakashɨm ese uje shiyokorãha õr oshɨm ɨre uje ich om.
\v 7 Ye ehnyẽrlo olak. Nĩhyok uje yeẽk pwele sehnyẽr Porrosht. Erze uje ochukwẽr tyenɨj ochekushu nehe.
\v 8 Heke uje yeẽk shiyokõr uje mɨhnũwo ich shɨ ɨtso uje chukwẽr jõro uje mɨhnũwo. Uje terɨhɨ ɨshɨrĩt nehe par uje chekushu ich shɨ chekushu ɨr jõro ee uje ich mɨhnũwo. Shiyokõr uje mɨ̃hnɨk heke erze mɨhnũwo tyenɨj seya ɨre waa urhuta bahluta ehet nehe. Uje yeẽk shiyokõr uje Porrosht Ɨchɨbich sahmũr ich shɨ ɨtso uje chukwẽr ɨr jõro uje ich om heke tyenɨj chekushu ɨr ee uje ich om. Wɨchɨ ese ɨr ɨkɨrĩt uje yelɨj nɨhna ɨre.
\v 9 Ye yuhu patɨm eyok uje yiyokõrlo uje ich om pork uje terɨhɨ ɨshɨrĩt nehe ich eyok premyo de kɨmɨjɨ ye yukwimpe.
\v 10 Par uje eyok premyo de, uje eyok pwele ich shish nos tyenɨj yakashɨmlo oso, per ma tyenɨj yiyokõrlo om par erze Porrosht aabo yewo.
\s Porrosht shuu daabo õr ɨluu kɨneheni.
\p
\v 11 Ich hutɨta uhurc heke tichew tɨ̃ra pɨhmta. Eychɨmlo ehni piche ich deyo heke erahalo uje ana hutɨta tãra yok.
\p
\v 12 Wɨr erze uje onarim ɨre sehe oduhu oniyokõr olak yarta waa je iich otsɨɨ sirkunsisyon. Sehe oniyokõr oduhu ɨlorz shɨ par uje erze oso ye oniyokõr mɨhnɨkɨ̃hɨ õrpe uje otsanɨmɨrãha otatɨm oso uje Jesús tooho krus eeych par uje ɨshɨ õr hnɨtewɨhɨ Porrosht ahɨr.
\v 13 Erze uje sehe oniyokõr õr yar hn erze uje õr yarta de tyenɨj oshiyokõr asa ley waa je Moisés chichewkite, per ye oniyokõrpe. Shɨ sehe odɨbɨte olak yarta par uje õr pwele otata uje ochɨbɨte olak yar hn onarim ɨre oshuu ɨtsorz.
\v 14 Par yok ich ye tahmũrpe uje yok narim yok. Shɨ tahmũr uje yok narim eyok Ɨrhĩch Jesucristo uje tooho krus eeychkite. Ich shɨ ɨtso uje erze kuche mɨhnũwo uje de nãhu ɨ̃rmo tooho ese krus eeych toy heke ich shɨ ɨtso uje tɨkɨtɨ tokõya Cristo krus eeych pork tokoym erze kuche mɨhnũwo uje de nãhu ɨ̃rmo.
\v 15 Ich ye latɨkɨsh kɨmɨjɨ asa yarta de waa je iich otsɨɨ sirkunsisyon o kɨmɨjɨ nĩhyok. Ese uje nos oso õr nesita wɨchɨ uje Porrosht shuu õr ɨluu kɨnẽhe ich shuu õr ahlo.
\v 16 Sehe tuu Porrosht duhu nos wɨr õr aho kɨɨs erze uje shɨ ye olotiis Cristope hn ye odɨbɨte õr yarta ɨtso uje tichew tɨbɨte ana hutɨta. Sehe tuu Porrosht nuuna uje õr losuhlaabo hn dosɨr õr toy. Erze Porrosht ɨr aabo wɨr uje Porrosht chiihla õr.
\p
\v 17 Ich ye tahmũrpe uje oshiyokos yokpo nehe shɨ pork sehe odɨbɨte erze Porrosht aabo õr yar. Ahnũwo pobɨlo de piyũhurrza pork oso otsepyẽr yok. Erze pobɨlo shuu ɨmeheeych uje tanɨmɨrãha titɨm oso Jesús per ye titɨm oso uje tyenɨj ochɨbɨte asa yartape waa je iich otsɨɨ sirkunsisyon heke ich otsɨtak yok hn otsepyẽr yok oshuu ɨtsorz.
\p
\v 18 Pɨshɨbo watsaklo, sehe tuu eyok Ɨrhĩch Jesucristo dosɨr olak. Shɨ ahnũwo uje titɨm olak.