\id EPH Chamacoco NT - Paraguay 2000 (web 2013)
\h Efesios
\toc1 Efesios
\toc2 Efesios
\toc3 Eg
\mt1 Efesios
\c 1
\s Pablo ɨshɨm Porrosht aabo õr saludo.
\p
\v 1 Yok Pablo. Porrosht chiihla yok par yok Jesucristo ɨr apóstol. Tichew ana hutɨta par tokosɨm olak uje olak Porrosht aabo uje ye otiislo eyok Ɨrhĩch Jesucristope, uje olak dechɨ dɨt Efeso.
\v 2 Sehe tuu eyok Deych Porrosht hn eyok Ɨrhĩch Jesucristo odosɨr olak hn oduhu olak aho kɨɨs.
\s Porrosht shiyokõr kuche om par daabo.
\p
\v 3 Pɨshɨbo watsaklo, oyeeychãha eyok Deych Porrosht, uu eyok Ɨrhĩch Jesucristo ɨr Deych. Wɨchɨ uje sosɨr eyok pork ye yotiis Cristope. Sosɨr eyok uje nos ɨshɨm eyok erze kuche om uje tãra ɨre.
\v 4 Uje ehn yahpaa Porrosht niyokõr nãhu ɨrmõkite ɨchii chiihla eyok par uje ye yotiis eyok Ɨrhĩch Jesucristope heke eyok ɨr aabo. Ele ahle nĩhyok ye eyok hnɨtew chɨhɨ Porrosht ahɨrpe heke ye latɨk pwele tatehe Porrosht ɨle ɨkɨch uje eyok hnɨtew dechɨ.
\v 5 Porrosht ich sahmũr pishɨ eyok. Uje ehn yahpaa niyokõr nãhu ɨrmõkite ɨchii chɨbɨte uje eyok tyenɨj yomsaha par ɨr aabo pork Jesucristo tyenɨj ɨshɨ eyok hnɨtewɨhɨ Porrosht ahɨr. Porrosht chɨbɨtkite shuu ɨtsorz shɨ pork wɨchɨ sahmũr shiyokõr shuu ɨtsorz.
\v 6 Heke nos yeeychãhalo Porrosht pork shuu yomsaha par eyok ɨr aaboni. Nĩhyok ye duhu bahatɨkɨsh uje sosɨr eyoklo pork ye yotiis ɨr Ijɨtpe uje ich sahmũrpa.
\v 7 Shɨ Cristo wɨchɨ uje tooho eyok hn ɨr armɨsta noshɨhɨ krus eeych par uje ɨshɨ eyok hnɨtewɨhɨ Porrosht ahɨr. Heke Porrosht perdonar eyok erze kuche mɨhnũwo uje yiyokõrlo shɨ pork sahmũr sosɨr eyok.
\v 8 Porrosht sosɨr pishɨ eyok,
\v 9 pork shuu eyok eykdeyo hn shuu yɨraha uje ɨre sahmũr, hn shuu yɨraha uje Cristo tɨrẽtni par ɨshɨ eyok hnɨtewɨhɨ Porrosht ahɨr. Shɨ tyenɨj ye yotiis ɨre par uje yomsaha par eyok ɨr aabo, per erze yewo ye odɨrehepe uje Porrosht shiyokorɨ̃hɨ eyokloni.
\v 10 Uje terɨ̃hɨ ese ɨshɨrĩt nehe ich Porrosht nos nɨshii kuche uje de poõrc hn uje de hnɨmich par uje Cristo masaha par õr bahluwa hn nos tɨbey õr.
\v 11 Porrosht chiihla eyok wapkite pork chɨraha uje deeych yet nehe hn ye yotiis Cristo heke nos shuu tokole shɨ ɨtso uje ɨre chɨbɨte wapkite
\v 12 par uje õryok webich oso uje ye oyotiis Cristope ich Porrosht ɨshɨmɨhɨ õryok ɨkɨrĩt shɨ par uje oyeeychãha ɨre hn oyuhu ɨre dich.
\v 13 Olak ɨtspo, entloni erze ahwoso uje ich ũru uje Cristo ɨshɨ olak hnɨtewɨhɨ Porrosht ahɨrkite, hn ye otiislo Cristope, heke Porrosht ɨshɨm olak Dechɨbich uje chɨbɨte wapkite par uje ɨshɨm eyok. Ese Porrosht Ɨchɨbich uje de eyok aho wɨchɨ yarta
\v 14 uje shuu ɨmeheeych uje eyok owich dechɨ Porrosht ahɨr. Deech yet nehe uje yaachɨ̃hɨlo wahacha Porrosht ahɨr ich yomsaha eyok owich, heke shish yeeychãhalo ɨre hn yuhu ɨre dich.
\s Pablo shish orar sapur Porrosht par uje shuu õr eykdeyo.
\p
\v 15 Pɨshɨbo watsaklo, tukunt uje olak ye otiislo eyok Ɨrhĩch Jesuspe hn tukunt uje ahmũrlo erze Porrosht aabo yewo toy,
\v 16 heke shish tɨkɨnshɨp Porrosht par olak, hn shish yok orar tapur Porrosht par olak.
\v 17 Shish tapur eyok Ɨrhĩch Jesucristo ɨr Porrosht. Wɨchɨ uu ɨr Deych. Sehe tuu duhu olak eykdeyo hn duhu ma erahalo pishɨ ɨre. Ich om uje oso oshuu Porrosht dich.
\v 18 Shish tapur Porrosht par uje sehe tuu duhu ma erahalo ɨr ɨluu. Sehe tuu erahalo uje Porrosht chiihla olak par ɨshɨm olak kuche uje ich om nehe. Wɨr ich ɨhɨ̃rt pisho erze uje yesh Porrosht tɨbey par ɨshɨm daabo nehe.
\v 19 Hn shish tapur Porrosht par uje sehe tuu duhu erahalo lakɨrbo uje ich deyo. Nĩhyok ye uhurztɨkɨsh. Chɨ̃ra erze lakɨrbo uje sosɨr eyok uje eyok ɨr aabo.
\v 20 Chɨ̃ra erze lakɨrbo uje shuu Cristo ɨkponi hn tokolɨhɨ erze topo õr ahɨr hn shuu sakaha naãchta pork wɨchɨ ich dich toy.
\v 21 Porrosht shuu Cristo ma dich je nos wɨr erze uje õr ukurbo de ele ahle hn uje de nehe.
\v 22 Porrosht nos chɨbɨte erze kuche Cristo ɨr hnɨte uut pork nos serz heke nos de ɨr hme hn chɨbɨte toy uje Cristo wɨchɨ bahlut uje nos tɨbey Porrosht aabo shɨ ɨtso uje ɨre õr huta,
\v 23 hn Porrosht aabo wɨr shɨ õr ɨtso Cristo yũhurrza. Cristo nos de ɨ̃rmo lekɨtiyo hn poõrc.
\c 2
\s Eyok Porrosht aabo shɨ pork sahmũr eyok.
\p
\v 1 Titɨm olak. Wap shɨ olak ɨtso topo pork ye erahalo Porroshtpe. Shɨ tyenɨj etɨ̃rlo urhuta bahluta ehet nehe pork shish ahakõrlo uje ich mɨhnũwo heke olak hnɨtew de Porrosht ahɨr.
\v 2 Shɨ olak ɨtso erze oso yewo uje ode nãhu ɨ̃rmo uje shish oshiyokõr uje ich mɨhnũwo. Shish olak de Satanás ɨr hme uje dechɨ poõrc pehet hn shuu oso oshiyokõr uje ɨre sahmũr, erze uje ye oniyokõrpe uje Porrosht sahmũr.
\v 3 Antni nos yiyokõr shɨ ɨtso õr ɨre. Shish yiyokõr erze kuche mɨhnũwo uje yahmũr. Yuhu eyok eyuwo tɨsɨ̃rni par uje yiyokõr. Uje eyok shũrha ɨchii ɨtsorz heke Porrosht tyenɨj sepyẽr eyok. Shɨ eyok ɨtso erze oso yewo uje ode nãhu ɨ̃rmo,
\v 4 per Porrosht chuuna uje eyok losuhlaabo hn sahmũrpa eyok
\v 5 heke uje ehn yiyokõr uje ich mɨhnũwo uje tyenɨj shuu Porrosht sepyẽr eyok nehe ɨchii ye yotiis Cristope heke Porrosht ɨshɨm eyok ese ɨkɨrĩt uje de ɨre ahɨr. Shɨ ɨshɨmɨhɨ eyok pork sahmũr eyok.
\v 6 Porrosht tyenɨj shuu eyok ɨkpo nehe shuu ɨtso uje shuu Cristo ɨkponi hn tyenɨj shuu yiyakaha Cristo ahɨr wahacha poõrc nehe,
\v 7 par uje shuu yɨraha nehe uje ɨre ich sahmũr pishɨ eyok shɨ pork ye yotiis Jesucristope.
\v 8 Porrosht sahmũr pishɨ olak toy heke ɨshɨm olak ese owich uje de ɨre ahɨr shɨ pork ye otiislo ɨrpe. Ye olak pwele uje ahakõrlo kuche par uje uhulo Porrosht ɨshɨm olak ese ɨkɨrĩt.
\v 9 Shɨ Porrosht wɨchɨ uje ɨshɨmɨhɨ olak heke nĩhyok yeẽk uje narim ɨrehe wahacha poõrc shuu ɨtsorz.
\v 10 Shɨ Porrosht shiyokõr eyok shuu eyok kɨnãho shɨ pork ye yotiis Jesucristope par uje yiyokõrlo erze uje ich om uje Porrosht chɨbɨte wapkite par uje shish yiyokõrlo.
\s Cristo shuu eyok aho kɨɨsɨhɨye.
\p
\v 11 Olak uje ye olak israel osope ye ekeylo uje olak dihipo kɨnãho. Erze israel oso otata uje olak kɨnãho pork nĩhyok ye olak yarta chɨhɨpe waa je iich otsɨɨ sirkunsisyon. Erze uje õr yarta de wɨr israel oso. Ochɨbɨte õr asa yarta pork Porrosht chiihla õr per shɨ hnakɨrbo wɨr uje ochɨbɨte duhu hnakɨrbo õr yarta.
\v 12 Ye ekeylo uje antni ye erahalo Cristope, hn ye meylo erze israel osope heke erze ahwoso uje Porrosht chɨbɨtkite wɨr ye par olakpe, shɨ par israel oso. Olak uje olak de nãhu ɨ̃rmo ye anemlo Porroshtpe par uje etɨ̃rlo ahɨr nehe, hn ye eeychãhalo Porroshtpe. Shɨ eeychãhalo porrosht kɨnãho.
\v 13 Antni olak dukuhlehe Porrosht per ele ahle ich ye olak dukuhlehepe shɨ pork ye otiislo uje Jesucristo tooho krus eeych hn ɨr armɨsta noshɨ. Wɨchɨ uje ɨshɨ olak hnɨtewɨhɨ Porrosht ahɨr heke olak owich de ɨre ahɨr.
\v 14 Cristo wɨchɨ uje nos shuu eyok aho kɨɨsɨhɨye pork shuu ɨtso erze israel oso hn erze dihipo kɨnãho uje ode lekɨtiyo. Wɨr otsɨtakye shɨ ɨtso uje moraylt de õr ehet per ɨre shuu õr aho kɨɨsɨhɨye heke chiyuhu ese uje ɨtso moraylt.
\v 15 Uje Cristo tooho krus eeychkite ich chɨbɨte uje asa ley waa je Moisés chichewkite ich ye jukur. Antni israel oso wɨr õr weeta nohmɨra hn nos wɨr dihipo kɨnãho wɨr õr weeta kɨnaha. Cristo nos shuu otakasho lawich par uje shɨ õr weeta nohmɨra de, shɨ erze uje ye olotiis ɨrpe. Heke shuu erze israel oso hn erze dihipo kɨnãho õr aho kɨɨsɨhɨye.
\v 16 Uje Cristo tooho krus eeychkite ich nos ɨshɨ eyok hnɨtewɨhɨ Porrosht ahɨr. Cristo shuu õr weeta nohmɨra erze dihipo kɨnãho hn erze israel oso par uje ye odɨtakyepe.
\v 17 Cristo taãchkite par ɨshɨ eyok hnɨtewɨhɨ Porrosht ahɨr hn shuu oyanɨmɨrãha lahwoso oyitɨm olak uje olak dukuhlehe Porrosht hn oyitɨm erze israel oso uje ye odukuhlehepe par uje oyuhu erze israel oso hn erze dihipo kɨnãho õr aho kɨɨsɨhɨye hn oyuhu õr aho kɨɨsɨhɨ Porrosht toy.
\v 18 Olak uje olak dukuhlehe Porroshtni hn õryok uje ye õryok dukuhlehe Porroshtpe ele ahle ich eyok ye yotiis Cristope heke Porrosht Ɨchɨbich nohmɨra de eyok aho. Wɨchɨ takashɨm eyok uje eyok orar yapur Porrosht ich shɨ ɨtso uje yɨtɨ̃r ɨre.
\v 19 Heke olak ich ye olak ɨlo erze dihipo kɨnãhope uje shɨ otɨ̃r hnɨmich yet otekɨrɨhɨ hn deeych yet ich ocheeshpo. Ele ahle ich olak kɨnãho pork olak owich de Porrosht ahɨr pork olak ɨr iiso ɨtso erze ɨr iiso yewo pork ich olak Porrosht aabo.
\v 20 Shɨ õryok ɨtso puertɨt uje oshiyokõr pork ye oyotiis erze apóstole hn erze profeta poruwo wɨshɨ õr ahwospe heke wɨr õr ɨtso uhwɨrbe uje ochihĩtsɨm hn shɨ õryok ɨtso puert ujuwo. Jesucristo wɨchɨ ɨtso ese kutich
\v 21 uje sontew ese puertɨt par uje ye kaype. Heke shɨ õryok Porrosht ɨr templo uje yesh oshiyokõr.
\v 22 Olak owich de toy ese Porrosht ihyuch pork Porrosht Ɨchɨbich de eyok aho.
\c 3
\s Pablo sanɨmɨrãha Porrosht ahwoso tatɨm dihipo kɨnãho.
\p
\v 1 Yok Pablo. Yok de karsel ehet shɨ pork tanɨmɨrãha Jesucristo ɨr ahwosni uje ɨre tooho krus eeych hn ɨshɨ õr hnɨtewɨhɨ Porrosht ahɨr hn titɨm olak uje olak dihipo kɨnãho, heke oshiyeru yok. Par yok ich shɨ Jesucristo wɨchɨ uje shiyeru yok, ye osope.
\v 2 Tɨbɨte uje ich erahalo uje Porrosht ɨshɨm yok ahnũwo pɨbiyo uje ich ɨhɨ̃rt pisho par uje tiyokorãha olak.
\v 3 Porrosht tatɨm yok lahwoso par uje tiyokorãha oso. Tichew tɨbɨte ana hutɨta ehet tuu ahwoso arhaabo. Antni ye oso odɨrehepe erze uje Porrosht tatɨm yok.
\v 4 Uje olak ler ana hutɨta ich erahalo erze uje Porrosht tatɨm yokni, erze uje Cristo shiyokõr par eyoklo.
\v 5 Porrosht ye tatɨm õryok poruwo wɨshɨ petɨkni hnii olak poruwo wɨshɨ par uje ochɨraha, per ele ahle shuu Dechɨbich tatɨm erze ɨr apóstole hn profeta.
\v 6 Porrosht tatɨm yok shuu ɨtsorz. Erze uje ye õr israel osope kɨmɨjɨ ye olotiis Jesucristo ich õr owich de Porrosht ahɨr shɨ õr ɨtso erze israel oso. Erze ahwoso uje Porrosht chɨbɨte par israel oso wɨr par erze dihipo kɨnãho toy. Erze israel oso hn erze dihipo kɨnãho wɨr õr weeta nohmɨra shɨ pork ye olotiis uje Cristo ɨshɨ õr hnɨtewɨhɨ Porrosht ahɨrkite, heke ich õr owich de Porrosht ahɨr.
\v 7 Ele ahle ich Porrosht ɨshɨm yok erze obiyo shɨ pork sahmũr shuu tanɨmɨrãha titɨm oso uje Jesucristo ɨshɨ õr hnɨtewɨhɨ Porrosht ahɨrkite hn wɨchɨ takashɨm yok chɨ̃ra dakɨrbo.
\v 8 Erze Porrosht aabo wɨr ma õr ɨluu om je yok pork antni tiyokõr mɨhnɨkɨ̃hɨ õr, per Porrosht ɨshɨm yok erze obiyo par uje tanɨmɨrãha ɨr ahwoso titɨm erze dihipo kɨnãho uje Cristo ɨshɨ õr hnɨtewɨhɨ Porrosht ahɨr. Erze uje Cristo shiyokõr par eyok ich nĩhyok ye latɨk pwele chɨbɨte ɨr bahat pork ich dichpa.
\v 9 Sehe nos titɨm oso erze uje Porrosht shiyokõr par eyok, erze uje õryok poruwo wɨshɨ ye odɨrehepe hnii olak poruwo wɨshɨ ye odɨrehepe. Porrosht wɨchɨ uje nos shiyokõr erze kuche uje de.
\v 10 Porrosht chɨbɨte uje ɨr aabo oshuu ɨmeheeych uje ɨre ukurbo deyo de hn eykdeyo heke erze uje ode poõrc omo õr hn ochɨraha toy.
\v 11 Uje ehn yahpaa Porrosht niyokõr nãhu ɨrmõkite ɨchii chɨbɨte uje tyenɨj tokole ɨtsorz heke eyok Ɨrhĩch Jesucristo shuu tokole ɨtsorz.
\v 12 Ele ahle uje nos eyok orar ich eyok dechɨ Porrosht ɨle ɨkɨch. Ye yɨpookpe pork ye yotiis Jesucristope.
\v 13 Uje yok de lɨka karsel ehet shɨ pork tanɨmɨrãha erze ahwoso oomo titɨm olakni ich ye uhu olak dosdarakɨhɨ yok pork erze uje tɨ̃r yok ich narim olak.
\s Cristo sahmũr pishɨ Porrosht aabo.
\p
\v 14 Porrosht shiyokõr kuchɨt uje ich ɨhɨ̃rtpa par eyok heke ich shuu tokotsa pɨte hnɨmichɨhɨ eyok Deych Porrosht ɨle ɨkɨch.
\v 15 Nos wɨr Porrosht aabo uje ode poõrc hn uje ode lɨka hnɨmich ich nos õr iiyo tãra uu õr Deych Porrosht.
\v 16 Yok orar tapur Porrosht par uje shuu Dechɨbich uje de olak aho ɨshɨm olak ukurbo uje tãra Porrosht. Ɨr ukurbo ich deyo.
\v 17 Sehe tuu Cristo debuhu olak aho shɨ pork ye otiislo ɨrpe heke ahmũrlopa Jesucristo hn ye olak koswãha ɨrpe.
\v 18 Heke olak pwele erahalo uje Cristo sahmũr pishɨ olak ɨtso erze Porrosht aabo yewo ochɨraha uje Jesucristo sahmũr pishɨ õr. Wɨchɨ ich ye uhurtɨkɨsh uje sahmũr õr, shɨ ɨtso uje ich ehet dich hn shɨ ɨtso uje berzakpa hn shɨ ɨtso uje porĩt hn shɨ ɨtso uje ich yaka.
\v 19 Sehe tuu erahalo uje Cristo sahmũr pishɨ olak shuu ɨtsorz. Nĩhyok yeẽk pwele tɨskẽr pork ich ye uhurtɨkɨsh uje sahmũr olak. Uje erahalo ɨre ɨtsorz ich olak ɨluu ɨtso uu Porrosht ɨr ɨluu.
\v 20 Porrosht ɨr ukurbo de eyok aho par uje nɨshii eyok ɨluu. Chɨ̃ra lakɨrbo uje de eyok aho ich ɨre pwele shiyokõr shuu iyuwe erze uje yapur ɨre hn shuu iyuwe toy erze uje yuhu eyok eyuwo tɨsɨ̃r.
\v 21 Sehe tuu nos wɨr Porrosht aabo shish oduhu Porrosht ich dich. Wɨr uje ye olotiis Jesucristope. Uje oniyokõr oduhu ɨlorz ich ɨhɨ̃rtpa.
\c 4
\s Porrosht Ɨchɨbich shuu Porrosht aabo õr eyuwo ɨtsye.
\p
\v 1 Yok de karsel ehet shɨ pork tiyokõr eyok Ɨrhĩch ɨr ɨbiyo. Porrosht chiihla olak par olak ɨr aabo heke shish tyenɨj ahakõrlo uje ich om pork ye ompe erze uje Porrosht chiihla õr oshiyokõr uje ich mɨhnũwo.
\v 2 Ye olak narim olak, hn ye uhu olak ɨljaabo. Tyenɨj enthɨlo pishɨ olak leshɨbo, hn tyenɨj olak ewenta õr hn ahmũrloye pork
\v 3 Porrosht Ɨchɨbich sehe duhu olak aho kɨɨsɨhɨye. Enaha olak par uje ye ontɨlo Porrosht Ɨchɨbich. Akashɨlo olak eyuwo par uje ye etakloye uhulo olak kara.
\v 4 Porrosht ɨr aabo shɨ õr weeta sohmɨra. Porrosht Ɨchɨbich de õr aho. Wɨchɨ shɨ sohmɨra. Uje omasaha par Porrosht aabo, ich shuu ochɨraha uje õr owich de Porrosht ahɨr. Nĩhyok ye owich kɨnehẽtɨkɨsh.
\v 5 Eyok Ɨrhĩch shɨ sohmɨra. Shɨ tyenɨj ye yotiis ɨre, nĩhyok ye ɨluu kɨnaharãsh uje shuu yomsaha par Porrosht aabo. Otohɨrm oso shɨ par shuu ɨmeheeych uje wɨr Porrosht aabo pork ye olotiis Cristope. Nĩhyok ye ɨluu kɨnaharãsh par uje otohɨrm õr.
\v 6 Shɨ Porrosht sohmɨra de, wɨchɨ uu nos eyok Deych hn uu eyok bahlut pisht. Wɨchɨ uje shuu nos oshiyokõr debiyo, hn Porrosht Ɨchɨbich de eyok aho.
\p
\v 7 Per Cristo nos ɨshɨm eyok kal nohmɨra lakɨrbo par uje yakashɨmloye. Cristo ɨshɨm eyok uje ɨre sahmũr,
\v 8 pork Porrosht ahwoso tata shuu ɨtsorz ɨm: —Uje terɨhɨ ɨshɨrĩt uje Cristo hno tɨ̃r poõrc ich hnoy erze oso ich okɨhniya uje ode ese owich uje ye õr pwele otokolpe seya õr poõrc hn ɨshɨm yewo lakɨrbo uje ode lɨka ɨ̃rmo par otakashɨmye.—
\v 9 ¿Duhu ɨnaapo uje tata uje hno tɨ̃r poõrc? Shuu ɨmeheeych uje tyenɨj ihnɨmich wap, hn hno tɨ̃r uje topo õr ɨchɨbiyo ode ese owich uje de hnɨmich uut pisht.
\v 10 Ese Cristo uje ihnɨmichni shiyehe wɨchɨ ɨre uje ich hno tɨ̃r ma porĩt par uje nos tɨbey lekɨtiyo.
\v 11 Heke Cristo ɨshɨm lakɨrbo kal nohmɨra par uje omasaha par apóstole, hn yewo omasaha par profeta, hn yewo omasaha par odɨrkii ɨr ahwoso otsanɨmɨrãha oshuu oso omasaha par Porrosht aabo, hn yewo par õr bahluwo par otɨbey Porrosht aabo, hn yewo par uje oshiyokorãha Porrosht aabo.
\v 12 Heke Cristo ɨshɨm erze Porrosht aabo lakɨrbo par uje oshiyokõr ɨr ɨbiyo, hn par uje ma shuu õr ɨluu om
\v 13 nehech terɨ̃hɨ uhurc nehe ich nos eyok eyuwo ɨtsye uje ye yotiis Cristope, hn ich nos yɨrahalopa Porrosht ɨr Ijɨt. Uje yomsaha par eyok Porrosht aabo ich shɨ eyok eyuwo ɨtso pɨkɨhnint per uje yɨraha eyok eyuwo ich shɨ eyok ɨtso hnakɨrbo nehech eyok ɨluu ɨtso Cristo ɨr ɨluu
\v 14 par uje ich ye eyok ɨlo erze pɨkɨhninope uje nos ochɨbɨte uje erze oso õr ahwoso ich ũru, heke õya yewo hn deeych yet õya yetpo. Erze oso ochɨbɨte ɨre uje ich õr eykdeyo per shɨ par uje otsehnyẽr oso.
\v 15 Ye ompe uje yiyokõrlo yuhu eyok ɨtso õr. Ma om uje shish yiita uje ich ũru hn yahmũrloye. Uje yiita yuhu ɨtsorz ich ma shish eyok ɨluu ɨtso Cristo ɨr ɨluu. Wɨchɨ uu Porrosht aabo õr Yɨnsɨrc. Cristo wɨchɨ uu õr huta
\v 16 hn ɨr aabo wɨr õr ɨtso ɨr yũhurrza. Shɨ ɨtso uje õr ɨtɨso tehĩye par uje ochishew obiyo hn nos tokole om pork nos õr ɨkiyo om, heke nos otakasho lawich hn otsahmũrye heke õr ɨluu tokole ma om.
\s Porrosht ɨshɨm daabo õr ɨluu ahle.
\p
\v 17 Eyok Ɨrhĩch sehe duhu titɨm olak uje ye ahakõrlo uhulo olak ɨlo erze uje ye odɨraha Porroshtpe. Wɨr shɨ oshiyokõr erze kuche mɨhnũwo uje oshuu deyuwo tɨsɨ̃r.
\v 18 Shɨ õr eyuwo ɨtso uje ode dɨhlelta. Nĩhyok õr ɨkɨrĩt Porrosht ahɨr pork ye odɨraha ɨrpe. Shɨ oshuu dehe kata.
\v 19 Ye onuuna Porrosht ahwospe hn otsɨnãha ɨre par uje oshiyokõr erze kuche mɨhnũwo uje ich ma otsahmũr.
\v 20 Cristo ɨr ahwoso ye duhu ahakõrlope erze kuch mɨhnũwo uhulo olak ɨlo õr.
\v 21 Tɨbɨte uje erahalo Cristo ɨr ahwoso pork Cristo shiyokorãha olak, hn Cristo ɨr ahwoso ich ũru.
\v 22 Olak tyenɨj moymlo erze olak ɨluu ɨler uje antni shɨ ahakõrlo pork ich ahmũrlo ahakõrlo erze mɨhnũwo. Wɨr shuu olak ɨluu ma mɨhnũ.
\v 23 Ele ahle ich tyenɨj enshiilo olak eyuwo pork olak ɨluu ich ahle
\v 24 uhu ɨlo uje anaha olak ɨshuwo ahlo pork Porrosht shuu olak ɨluu ahle shɨ ɨtso ɨr ɨluuta. Ich ɨmeheeych uje olak ɨluuta ich ahle pork ahakõrlo uje ich om, hn ye ahakõrlope uje ich mɨhnũwo,
\v 25 heke tyenɨj moymlo uje athɨlo olak ukushiĩ par olak leshɨbo. Shish tyenɨj athɨlo uje ich ũru pork nos eyok shɨ ɨtso Cristo ɨr yũhurrza.
\p
\v 26 Uje aas olak uulo ich ye ahakõrlo uje ich mɨ̃hnɨk. Ye ompe uje aas olak uulo nehech uhulo deeych yaka
\v 27 par uje ye asɨmlo Satanás olak par uje sehnyẽr olak.
\v 28 Porrosht aap uje ich echɨkɨ tyenɨj iim uje tohɨr. Ich ma om uje tyenɨj chish obiyo, hn shiyokõr erze obiyo uje ich om par uje pwele serz kuchɨt hn takashɨm erze uje losuhlaabo uje kuche nihyokɨ̃hɨ õr ahɨr.
\v 29 Ye eyuhulo olak ahwosoho uje ich mɨhnũwo olak ahwo. Shɨ tyenɨj eyuhulo olak ahwoso uje ich om par õr ɨre otẽr heke akashɨmlo õr uhulo ɨtsorz.
\v 30 Ye uhulo Porrosht Ɨchɨbich dosdarak. Wɨchɨ yarta uje Porrosht chɨbɨte olak aho nehech terɨhɨ ese deeych uje Porrosht hnoy daabo nehe.
\v 31 Moymlo uje uhulo olak ehnito hn atsɨrãha olak ahwoso olak leshɨbo, hn ye ompe uje moymɨhɨlo olak ehemuro olak aho. Ye etaklo yewo. Moymlo uje aas olak uulo hn ebichlo, hn ye eyuhulo olak ahwoso mɨhnũwo. Ye eyuhulo olak ahwoso uje ye ompe uje shuu olak yewo opook. Moymlo uje sehe tuklo yewo uhulo dospa.
\v 32 Tyenɨj akashɨmloye. Tyenɨj eenɨlo uje olak leshɨbo õr losuhlaabo, hn olak perdonarye ɨtso Porrosht uje perdonar olak pork Cristo ɨshɨ olak hnɨtewɨhɨ Porrosht ahɨrkite.
\c 5
\s Porrosht aabo õr ɨluu ahle.
\p
\v 1 Heke tyenɨj eẽtlo olak Deych Porrosht pork olak ɨr aabo. Ich sahmũr olak.
\v 2 Tyenɨj shish ahmũrloye uhulo ɨtso Cristo uje sahmũr eyok, heke ɨshɨm ɨre oso par uje oshuu oshuu toy par uje ɨshɨ eyok hnɨtewɨhɨ Porrosht ahɨr. Wɨchɨ shɨ ɨtso kuche uje aat ehmuuj uje oshɨmɨhɨ Porrosht uje ɨre sahmũr.
\v 3 Olak uje olak Porrosht aabo ye ompe uje uhu olak eyuwo tɨsɨ̃r erze mɨhnũwo uje erze hnakɨrbo hn tɨmcher oshiyokorɨ̃hɨye uje ye ohnõyhi pishye ahɨrpe. Ye ompe uje uhu olak eyuwo tɨsɨ̃r erze mɨhnũwo uje tɨmcher oshiyokɨ̃hɨ yẽr uje õhyi yẽr ahɨr, hn hnakɨrbo õr ɨtspo uje oshiyokorɨ̃hɨye hn õhyiye ahɨr, hn uje yeẽk sahat loshɨpɨt, hn uje yanak shuu loshɨpɨt sahat ɨre. Ye ompe uje pɨkɨhnino hn pɨkɨhnine oshiyokorɨ̃hɨye toy oshuu ɨtso õr. Ye ompe uje ekuturãha olak kuche pork olak Porrosht aabo.
\v 4 Ye ompe uje ekitkẽrlo tɨmcher hn shɨ uhu olak eyuwo mɨhnũwo hn tɨmcher olak ɨtspo ye ompe ekitkẽrlo hnakɨrbo hn uhu olak eyuwo mɨhnũwo. Ye uhu olak ɨlo totihlo uje shɨ ochiyuhu lahwoso uje ye jukur. Ye ompe uje athɨlo kuche mɨhnũwo par uhu oso oyana, pork ye ompe uje Porrosht aabo oshuu ɨtsorz. Ma om uje yɨnshɨp Porrosht.
\v 5 Tyenɨj erahalo uje ich ũrpa uje õr owich nihyokɨ̃hɨ Porrosht ahɨr erze hnakɨrbo hn tɨmcher uje oshiyokorɨ̃hɨye uje ye ohnõyhi pishye ahɨrpe, hn erze tɨmcher uje oshiyokorɨ̃hɨ yẽr hn õhyi yẽr ahɨr, hn erze hnakɨrbo õr ɨtspo erze uje oshiyokorɨ̃hɨye hn õhyiye ahɨr, hn erze uje otsahat loshɨpo, hn erze uje shuu loshɨpo sahat ɨre. Erze uje shish ochukutɨrãha ɨre kuche wɨr shɨ ɨtso uje oteychãha kuche ochii ɨr porroshtɨhɨ, nĩhyok õr owich Cristo ahɨr, hnii Porrosht ahɨr.
\p
\v 6 Ye ompe uje asɨmlo olak oso par uje otsehnyẽr olak ochɨ̃ra lahwoso uje ye ũrpe pork erze mɨhnũwo uje oshiyokorɨ̃hɨye hn oshiyokorɨ̃hɨ yẽr ich shuu Porrosht sɨtak pishɨ õr, heke tyenɨj sepyẽr õr ich shuu dospa. Wɨr erze uje ye oniyokõrpe uje Porrosht sahmũr
\v 7 heke ich ye meylo õr par uje ye ahakõrlo uje ich mɨhnũwo.
\v 8 Wapni shɨ olak ɨtso õr pork olak de dɨhlelta toy, per ele ahle ich ye otiislo eyok Ɨrhɨ̃chpe. Erahalo uje ich ũru heke shɨ olak ɨtso luu uje chihit yewo pork uhulo ochɨraha uje ich ũru. Ahakõrlo uje ich om pork Porrosht shɨ ɨtso luu hn olak ɨr aabo
\v 9 pork erze uje shɨ ɨtso luu de olak aho heke shuu ahakõrlo hn athɨlo uje ich om, hn shuu ahakõrlo hn athɨlo uje Porrosht sahmũr, hn shuu ahakõrlo hn athɨlo uje ich ũru.
\v 10 Enaha olak par uje ma erahalo uje eyok Ɨrhĩch sahmũr.
\v 11 Erze uje oshiyokõr uje ich mɨhnũwo wɨr shɨ õr ɨtso uje ode dɨhlelta ehet. Ich ye meylo õr par ahakõrlo uje ich mɨhnũwo. Tyenɨj ebɨtlo orhõta par uje nos ochɨraha erze mɨhnũwo uje oshiyokõr hn otsakɨs.
\v 12 Erze mɨhnũwo uje oshiyokõr hn otsakɨs ɨre ich shuu apooklo uje atɨmlo õr per shish tyenɨj ebɨtlo orhõta.
\v 13 Nos wɨr erze uje ochɨbɨte orhõta ich shɨ ɨtso uje luu chihit hn shuu nos ochɨraha.
\v 14 Heke otatɨm ese uje ye dɨraha Porroshtpe otsɨɨ:
\p —Owa uje shɨ ɨtso uje amo ich erɨ̃hɨ. Atokolɨhɨ wɨr õr ahɨr erze uje tyenɨj otɨ̃r urhuta bahluta ehet nehe, hn Cristo ɨr yokõrt chihit owa shuu eraha uje ich ũru.—
\p
\v 15 Abeylshɨp olak par uje ye ahakõrlo uje wɨr oshiyokõr erze uje ye odɨraha Porroshtpe. Shɨ tyenɨj ahakõrlo uje ich om pork erahalo uje Porrosht sahmũr.
\v 16 Uhulo nahnye uje ahakõrlo om pork daalo ich sahnye hn ich oshiyokõr mɨhnũwo ich kɨhniya,
\v 17 heke ye ahakõrlo uhulo olak ɨlo erze uje õr totihlo. Shɨ tyenɨj enaha olak par uje ma erahalo uje eyok Ɨrhĩch sahmũr hn ahakõrlo uhulo ɨtsorz.
\v 18 Ye ompe uje ehelo yɨkɨch nehech sẽhi olak pork wɨchɨ shuu ahakõrlo uje ich mɨ̃hnɨk. Ma om ahakõrlo uje Porrosht Ɨchɨbich sahmũr uhulo ɨlo uje ehelo Porrosht Ɨchɨbich hn ɨre shuu ahakõrlo uje ich om.
\v 19 Uje ekitkẽrloye ich ekitkẽrlo yeehe Porrosht ahwoso uje iich otsɨɨ salmo hn erze imno hn korito. Enaha olak uje eẽtlo erze par eeychãhalo eyok Ɨrhĩch uhulo ɨtsorz.
\v 20 Tyenɨj shish enɨlo eyok Deych Porrosht par nos wɨr kuche hn ẽrlo eyok Ɨrhĩch Jesucristo ɨr iich.
\v 21 Tyenɨj akashɨmloye pork Cristo ich dich hn tyenɨj atɨlɨlo ɨre.
\s Porrosht aabo shɨ õr ɨtso Cristo ɨr ɨrãhta.
\p
\v 22 Titɨm erze tɨmcher uje õr abiyo de ich tyenɨj oshiyokõr uje õr abiyo otatɨm õr shɨ ɨtso uje oshiyokõr uje eyok Ɨrhĩch tatɨm õr.
\v 23 Kal hnakɨrbich tyenɨj tɨbey nerãhta shɨ ɨtso Cristo wɨchɨ uu Porrosht aabo õr bahlut pork wɨchɨ uu õr huta hn ɨr aabo shɨ ɨtso ɨr yũhurrza. Wɨchɨ uje ɨshɨ õr hnɨtewɨhɨ Porrosht ahɨrkite.
\v 24 Porrosht aabo tyenɨj oshiyokõr uje Cristo tata shɨ ɨtso erze tɨmcher tyenɨj nos oshiyokõr uje õr abich tatɨm õr.
\v 25 Olak hnakɨrbo uje olak ɨrẽhte de ich tyenɨj ahmũrlo õr uhulo olak ɨtso Cristo uje sahmũr Porrosht aabo, heke ɨshɨm ɨre osokite par uje oshuu oshuu toy par tooho õr ɨre
\v 26 par uje Cristo churhũ õr aho hn perdonar õr hn otohɨrm õr, hn tatɨm õr uje Porrosht sahmũr uje oshiyokõr.
\v 27 Deeych yet nehe hn hnoy Porrosht aabo shuu odebuhu dahɨr. Erze Porrosht aabo shɨ õr ɨtso tɨmcharrza uje sarz ɨre hn ɨhɨ̃rpa hn ɨr ihyẽt hnoy pork Porrosht aabo õr ɨluu ich om. Nĩhyok mɨhnũwo õr aho shɨ ɨtso uje ye õr wãrɨrɨsh hnii uje õr kako ɨtso uje õr ɨlaro hnii kuche yewo uje de õr per wɨr ich shɨ par Porrosht. Nĩhyok ye õr hnɨtew chɨhɨ Porrosht ahɨrpe.
\v 28 Shɨ ɨtso uje Cristo sahmũr Porrosht aabo ich hnakɨrbo tyenɨj otsahmũr pishɨ nerẽhte oshuu ɨtso õr ɨre uje otsahmũr ɨre. Erze uje otsahmũr nerẽhte ich otsahmũr ɨre toy
\v 29 pork nĩhyok yeẽk uje sɨtak neyũhurrza pork shiyehe wate ɨre. Shish shuu taak hn tɨbey neyũhurrza shɨ ɨtso Cristo uje tɨbey Porrosht aabo
\v 30 pork shɨ eyok ɨtso Cristo yũhurrza.
\v 31 Porrosht ahwoso tata ɨm: —Heke hnakɨrbich tyenɨj iim deych hn iim data par uje hõr nerãhta õhiye ahɨr, hn õr osiyer otokole shɨ nohmɨra.—
\v 32 Ahnũwo ahwoso uje titɨm olak ich ye nos odɨrehepe. Kwestpa par uje ochɨraha. Erze uje titɨm olakɨke shɨ tɨteẽta uje Cristo sahmũr Porrosht aabo hn tɨbey õr,
\v 33 per kal olak nohmɨra tyenɨj sahmũr nerãhta shɨ ɨtso uje sahmũr ɨre, hn kal tɨmcharrza tyenɨj tola labich.
\c 6
\p
\v 1 Titɨm olak uje olak pɨkɨhnino hn pɨkɨhnine. Tyenɨj ahakõrlo uje olak deych hn olak lata otatɨm olak pork ahmũrlo eyok Ɨrhĩch. Uje ahakõrlo uhulo ɨtsorz ich om.
\v 2 Atɨlɨlo olak deyo hn olak latɨ. Wate Porrosht ɨr ley webich otɨta uje ahwoso oomo ĩya par takashɨm erze uje ye otsowepe
\v 3 pork Porrosht ɨm: —Par uje õr aho kɨɨs hn õr ɨkɨrĩt berzakɨhɨ nãhu ɨ̃rmo.—
\v 4 Hn titɨm olak hnakɨrbo hn tɨmcher uje olak aabo ode. Uje oniyokõr uje mɨ̃hnɨk ich hnii epiyerlo õr per ye uhulo sowe hn uhulo ochesdelpa. Ahakorãhalo õr eyok Ɨrhĩch ɨr ahwoso.
\v 5 Titɨm olak uje olak õr yɨlo uje olak yɨnsɨro ode nãhu ɨ̃rmo ich tyenɨj atɨlɨlo õr hn ahakõrlo uje otatɨm olak, hn ye uhu olak aho yũhɨrsh. Uje ahakõrlo õr ɨbiyo ich ahakõrlo uhulo ɨtso uje ahakõrlo Cristo ɨr ɨbiyo.
\v 6 Ye ahakõrlo shɨ uje olak yɨnsɨrc teychɨm olak ich hnii eyuhu olak. Tyenɨj ahakõrlo ɨr ɨbiyo shɨ ɨtso uje ahakõrlo Cristo ɨr ɨbiyo. Tyenɨj ahmũrlo ahakõrlo ɨr ɨbiyo shɨ ɨtso uje ahmũrlo ahakõrlo uje Porrosht sahmũr.
\v 7 Hn enaha olak uje ahakõrlo ɨr ɨbiyo shɨ ɨtso uje ahakõrlo Cristo ɨr ɨbiyo, ye shɨ hnakɨrbo õr ɨbiyope.
\v 8 Kɨmɨjɨ olak õr yɨlo o kɨmɨjɨ ye olak õr yɨlope, shish ahakõrlo uje ich om pork erahalo uje eyok Ɨrhĩch tyenɨj shuu cheeshpo erze uje ich om ɨshɨm olak shuu ɨtsorz.
\v 9 Titɨm olak uje olak yɨlo ode, ahakõrlo oomɨhɨ õr shɨ ɨtso uje wɨr tyenɨj oshiyokõr oomɨhɨ olak. Ye ey olak apha õr. Erahalo uje wɨr õr yɨnsɨrc de poõrc hn olak ɨtspo, hn wɨchɨ ye duhu yet kɨnãhape hn duhu yet kɨnaha. Shuu nos õr ɨtsye.
\s Porrosht aabo õr ɨtso ohyerptoso.
\p
\v 10 Ich terɨhɨ uhurc ahnũwo ahwoso uje tyenɨj titɨm olak. Uhu olak ukurbosh ẽrlo erze ukurbo uje tãra eyok Ɨrhĩch pork wɨchɨ ich ɨr ukurbo deyo de.
\v 11 Porrosht ɨshɨm olak kuche ich kɨhniya par uje tɨbey olak. Tyenɨj nos anãhalo uhulo ɨtso uje ohyerptosht iyãha fyerɨt shuu sentii derjorrza par uje abeylo olak par uje ye dyablo nehnyẽr olak,
\v 12 pork ye yatsɨrlo osope. Shɨ yatsɨ̃r erze demonyo uje õr ukurbo deyo de, hn erze demonyo uje õr ukurbo arhaabo, hn erze demonyo uje otɨbey erze oso uje ye odɨraha Porroshtpe. Wɨr shɨ õr ɨtso uje ode dɨhlelta ehet. Erze demonyo ich okɨhniya uje ode poõrc pehet,
\v 13 heke tyenɨj nos anãhalo erze uje Porrosht ɨshɨm olak par uje tɨbey olak shɨ ɨtso ohyerptosht uje iyãha fyerɨt shuu sentii derjorrza par uje tɨbey ɨre. Ahakõrlo uhulo ɨtsorz hn ese deeych uje kuche mɨhnũwo uje tãra demonyo tɨ̃r olak ich olak pwele ewenta. Uje anãhalo uje Porrosht ɨshɨm olak par uje tɨbey olak ich ye õr pwele oderz olak hn oshuu olak koswãha Porrosht.
\v 14 Olak pwele ewenta pork ese uje ɨtso ohyerptosht ɨr ɨhɨrosht uje Porrosht ɨshɨm olak par uje tɨbey olak wɨr Porrosht ahwoso uje ich ũru. Hn uhu olak ɨlo ohyerptosht uje iyãha fyerɨt shuu sentii derjorrza par uje tɨbey ɨre. Wɨchɨ fyerɨt uje Porrosht sɨteẽta uje olak ɨluu ich om.
\v 15 Ahakõrlo uhu olak ɨlo ohyerptosht uje terɨhɨ deriho. Erze uje ɨtso ɨr erihyo uje Porrosht sɨteẽta wɨchɨ uje etɨ̃rlo lekɨtiyo par uje anɨmɨrãhalo atɨmlo oso uje Jesucristo ɨshɨ õr hnɨtewɨhɨ Porrosht ahɨrkite par uje shuu õr aho kɨɨsɨhɨ Porrosht.
\v 16 Ye shɨ erze uje ohyerptosht tɨbey ɨrpe. Tõhwa kuchẽrk uje iich otsɨɨ eskudo par uje sentii ɨre. Wɨchɨ shɨ ɨtso uje ye otiislo Cristope, heke olak pwele ontɨlo erze uje dyablo sehe niyokorɨ̃hɨ olak. Ich yarhak uje ɨre sehe niyokorɨ̃hɨ olak shɨ ɨtso opɨne uje jwekɨta de wasɨt uje serzɨm chɨ̃ra olak.
\v 17 Ese uje anãhalo shɨ ɨtso ohyerptosht ɨr wolt wɨchɨ shɨ ɨtso uje Jesús ɨshɨ olak hnɨtewɨhɨ Porrosht ahɨr. Hn aharu olak ɨhɨrrza Porrosht Ɨchɨbich ɨr espada. Wɨchɨ Porrosht ahwoso.
\v 18 Shish tyenɨj olak orar apurlo Porrosht. Apurlo Porrosht par uje shuu Dechɨbich shiyokorãha olak uje olak orar. Enahalo olak uje olak orar. Uje olak orar uhulo ɨtsorz ich tyenɨj emɨt olak hn ye moymlo uje olak orar. Tyenɨj olak orar toy apurlo Porrosht par uje nos sosɨr erze daabo yewo.
\v 19 Titɨm olak par uje olak orar toy apurlo Porrosht par yok par uje Porrosht dosɨm yok erze ahwoso uje ich om par uje titɨm õr, hn par uje ich ye tɨkɨtɨla õrpe par uje tuu ochɨraha uje Jesús ɨshɨ õr hnɨtewɨhɨ Porrosht ahɨrkite pork nos õr ɨre ye odɨrehepe.
\v 20 Porrosht shuu takaha par uje titɨm oso ɨr ahwoso, hn shɨ pork tanɨmɨrãha ɨr ahwoso heke oshiyeru pɨhmikɨt ochɨ̃ra kenena hn ochɨmchaha yok karsel ehet. Sehe tuu olak orar apurlo Porrosht par uje yok pwele titɨm õr erze ɨr ahwoso hn ich ye tɨkɨtɨla latɨk.
\s Pablo ɨshɨm Porrosht aabo õr saludo.
\p
\v 21 Titɨm olak uje Tíquico wɨchɨ Porrosht aap toy hn tahmũr pishɨ ɨre. Yelɨj sehi lahwoso. Wɨchɨ eyok Ɨrhĩch ɨbɨk toy. Tyenɨj nos tatɨm olak erze kuche uje oshiyokorɨ̃hɨ yok, hn erze pɨbiyo uje yesh tiyokõr,
\v 22 heke tuu hno tɨ̃r olak par uje shuu erahalo uje tokolɨhɨ õryok hn par uje shuu olak aho kɨɨs.
\v 23 Sehe tuu eyok Deych Porrosht hn eyok Ɨrhĩch Jesucristo oduhu eyok leshɨbo õr aho kɨɨs hn onahmũrye pork ye olotiis Porroshtpe.
\v 24 Sehe tuu Porrosht dosɨr nos wɨr erze uje shish otsahmũr eyok Ɨrhĩch Jesucristo.