\id PHP Chamacoco NT - Paraguay 2000 (web 2013)
\h Filipenses
\toc1 Filipenses
\toc2 Filipenses
\toc3 Flp
\mt1 Filipenses
\c 1
\s Pablo ɨshɨm Porrosht aabo õr saludo.
\p
\v 1 Yok Pablo. Timoteo de lɨka pahɨr. Õryok Jesucristo ɨr ɨbiyo. Oyichew ana hutɨta oyosɨm olak uje olak Porrosht aabo uje olak dechɨ dɨt Filipos hn oyosɨm toy par erze uje otɨbey olak uje olak Porrosht aabo hn par erze diácono toy.
\v 2 Sehe oyuhu eyok Deych Porrosht hn eyok Ɨrhĩch Jesucristo odosɨr olak hn oduhu olak aho kɨɨs.
\s Pablo orar par Porrosht aabo.
\p
\v 3 Uje peyucha olak ich shish tɨkɨnshɨp Porrosht par olak
\v 4 hn shish yok ayla uje yok orar tapur Porrosht par olak
\v 5 pork akashɨmlo yok uje tanɨmɨrãha Porrosht ahwoso titɨm õr uje Jesús ɨshɨ õr hnɨtewɨhɨ Porrosht ahɨrkite. Uje amsahaloni par olak Porrosht aabo ɨchii akashɨmlo yok uje tanɨmɨrãha ɨr ahwoso nehech ele ahle.
\v 6 Tɨkɨraha uje amsahaloni par Porrosht aabo ɨchii Porrosht nɨshii saraãshi olak ɨluu heke tɨkɨraha toy uje Jesucristo cheeshpo nehe ɨchii Porrosht chɨmɨt erze obiyo uje nɨshii olak aho hn shuu olak ɨluu ɨtso Jesucristo ɨr ɨluu.
\v 7 Ich om uje peyuwo tɨsɨ̃r tuu ɨtsorz pork tahmũr olak pork akashɨmlo yok uje tiyokõr erze obiyo uje ich ompa pork wɨr uje Porrosht ɨshɨm eyoklo par uje yiyokõrlo. Kɨmɨjɨ yok dechɨ karsel ehet o kɨmɨjɨ tɨtɨ̃r lekɨtiyo shish tiyokõr erze obiyo par uje tuu ɨmeheeych uje Jesús ahwoso ich ũru uje shɨ tyenɨj ye olotiis Jesucristo par uje ɨshɨ õr hnɨtewɨhɨ Porrosht ahɨr. Ich shish akashɨmlo yok.
\v 8 Porrosht chɨraha uje tahmũr olak shɨ ɨtso uje Jesucristo sahmũr olak.
\v 9 Shish yok orar tapur Porrosht par uje ma ahmũrloye hn yok orar par uje Porrosht shuu erahalo uje ich ũru par uje ɨmeheeych erze õr ukushiĩ uje otata.
\v 10 Shish yok orar tapur Porrosht par uje ahmũrlo erze uje ich ũru, heke shish olak ɨluu om. Nĩhyok ye latɨk chɨhɨ uje tata uje ahakõrlo uje mɨ̃hnɨk nehech terɨhɨ ese deeych uje Jesucristo cheeshpo nehe.
\v 11 Shish ahakõrlo uje ich om pork ye otiislo Jesucristope par uje oso oteeychãha Porrosht hn oshuu dich.
\s Pablo sahmũr shiyokõr Cristo ɨbiyo.
\p
\v 12 Pɨshɨbo watsaklo, sehe tuu erahalo uje ochɨmchaha yok karsel ehet ich shuu Porrosht ahwoso chũr lekɨtiyo uje tata uje Jesús ɨshɨ õr hnɨtewɨhɨ Porrosht ahɨrkite.
\v 13 Heke nos wɨr ohyerptoso uje otɨbey karsel hn nos wɨr oso yewo toy ochɨraha uje yok dechɨ karsel ehet shɨ pork ye tokotiis Cristope.
\v 14 Porrosht aabo ochunt uje yok dechɨ karsel ehet heke ich okɨhniya oduurapo hn ma ye olotiis eyok Ɨrhĩchpe, heke otsanɨmɨrãha ɨr ahwoso, hn ye otola erze oso yewope.
\p
\v 15 Ode uje opota erze oso uje otsahmũr yok heke otsanɨmɨrãha Porrosht ahwoso par uje sehe oduhu oso onahmũr ɨre toy. Ode toy uje shɨ sehe onanɨmɨrãha Porrosht ahwoso par uje onarim ɨre, per yewo ode uje ich õr ɨluu om,
\v 16 heke otsanɨmɨrãha Porrosht ahwoso shɨ pork otsahmũr yok. Ochɨraha uje yok dechɨ karsel ehet par uje tuu ɨmeheeych uje Jesús ahwoso ich ũru uje tata uje ɨshɨ õr hnɨtewɨhɨ Porrosht ahɨrkite.
\v 17 Per yewo ode uje otsanɨmɨrãha Porrosht ahwoso shɨ par uje sehe onarim ɨre. Wɨr õr aho yuhurɨ̃sh. Shɨ pork yok de karsel ehet heke otsanɨmɨrãha oshuu ɨtsorz par uje oshuu yok ma dosdarak,
\v 18 per par yok ich ye latɨkɨsh kɨmɨjɨ wɨr õr aho yuhurɨ̃sh o kɨmɨjɨ õr ɨluu om. Shɨ uje otsanɨmɨrãha Cristo ɨr ahwoso ich shuu yok aylpa.
\v 19 Tyenɨj yok aylpo pork tɨkɨraha uje olak orar apurlo Porrosht par yok hn tɨkɨrahapo uje Jesucristo ɨr Ɨchɨbich takashɨm yok heke tyenɨj tɨkitokolɨhɨ karsel ehet nehe.
\v 20 Kɨmɨjɨ oduhu yok oduhu tɨkɨtɨ o kɨmɨjɨ ye oduhu yokpe ich shish sehe ye tɨkɨtɨla õrpe hn ye tɨkɨpookpe per shish tiyokõr uje Cristo sahmũr hn shish yok narim ɨre.
\v 21 Pork uje ehn yok ɨka shish tiyokõr Cristo ɨr ɨbiyo per uje tɨkɨtɨ shɨ ɨtso uje terz pork powich de Cristo ahɨr.
\v 22 Kɨmɨjɨ onoymɨhɨ yok ich shish tyenɨj tiyokõr erze Cristo ɨr ɨbiyo uje bale. Ye tɨkɨraha uje ich om par tiihla.
\v 23 Sehe takashɨm olak per sehe tɨtɨ̃r Cristo ahɨr hn ye yok pwelpe tiyokõr erze uje osiyer. Ma om par yok uje tɨkɨtɨ hn tɨtɨ̃r Cristo ahɨr,
\v 24 per par olak ich ma om uje ehn yok ɨka.
\v 25 Tɨkɨraha uje tyenɨj yesh yok ɨka par uje ma takashɨm olak ye otiislo Jesucristo heke olak aylpa.
\v 26 Uje tekɨrɨhɨ olakpo nehe ich tyenɨj olak narim Jesucristo pork takashɨm yok shuu ɨtsorz.
\p
\v 27 Sehe tuu ahakõrlo uje ich om pork nos Porrosht aabo tyenɨj oshiyokõr uje Cristo ɨr ahwoso tata. Wɨchɨ uje ɨshɨ eyok hnɨtewɨhɨ Porrosht ahɨrkite. Heke kɨmɨjɨ tekɨrɨhɨ olak nehe o kɨmɨjɨ ye yok pwele par uje tekɨrɨhɨ olak ich shish tukunt olak uje ye olak koswãha Cristope hn uhu olak eyuwo ɨlye uje anɨmɨrãhalo Porrosht ahwoso ich atɨmlo õr uje tyenɨj ye olotiis uje Jesús ɨshɨ õr hnɨtewɨhɨ Porrosht ahɨrkite par uje omasaha par Porrosht aabo.
\v 28 Ye as olak ɨbe hn atɨlɨlo erze uje ye onahmũr Porroshtpe uje sehe onontew olak uje ahakõrlo erze obiyo. Uje ye atɨlɨlo õr ich Porrosht shuu ɨmeheeych uje nĩhyok õr owich Porrosht ahɨr heke tyenɨj otɨ̃r urhuta bahluta ehet nehe, mahn olak owich de Porrosht ahɨr.
\v 29 Porrosht chɨbɨte uje ye otiislo Cristope hn chɨbɨte toy uje tyenɨj olak ewenta erze kuche mɨhnũwo uje tɨ̃r olak shɨ pork ye otiislo Cristope.
\v 30 Amloni erze kuche mɨhnũwo uje tɨ̃r yok. Ich entlo uje yesh tɨ̃r yok ma. Wɨr uje tɨ̃r olak toy pork ode uje sehe onontew Porrosht ɨr ɨbiyo.
\c 2
\p
\v 1 Titɨm olak par uje tɨkɨraha. ¿Je Cristo ɨr ahwoso duhu olak duurapo? ¿Je erahalo uje Cristo sahmũr olak? ¿Je duhu olak aho kɨɨs? ¿Je Porrosht Ɨchɨbich duhu ahmũrloye? ¿Je olak aho nuuna uje olak yeẽk chɨhɨ uje losuhlaap? ¿Je akashɨmloye?
\v 2 Kɨmɨjɨ nos wɨr uje titɨm olakɨke chɨhɨ olak ɨtsorz ich uhulo yok ayla uje nos uhulo olak eyuwo ɨlye hn ahmũrloye hn akashɨlo olak eyuwo.
\v 3 Ye ahakõrlo kuche shɨ par uje shuu olak deyo hn ye olak narim olak. Kal olak nohmɨra tyenɨj shuu deyuwo tɨsɨ̃r uje erze yewo ma õr deyo je olak.
\v 4 Ye shɨ uhu olak eyuwo tɨsɨ̃r olak ɨbiyo uje ahakõrlo shɨ par olak, per tyenɨj akashɨmlo yewo toy.
\v 5 Uhu olak eyuwo tɨsɨ̃r ɨtso Cristo.
\p
\v 6 Cristo wɨchɨ Porrosht. Par ɨre ich ye latɨkɨsh
\v 7 uje iim lakɨrbo par uje shuu ɨre ɨtso uje õr ɨbɨk, hn wɨchɨ shũrha hnakɨrap.
\v 8 Uje ɨre hnakɨrap ich yelɨj narim ɨre. Shɨ shiyokõr uje Porrosht sahmũr, heke tooho kruskite uje ich dospa.
\v 9 Heke Porrosht shuu wɨchɨ ma dich hn chɨbɨte ɨr iich ma dich je nos wɨr yewo.
\v 10 Jesús ɨr iich ich dichpa heke nos wɨr erze uje ode poõrc hn uje ode nãhu ɨ̃rmo hn erze uje ode hnɨmich uut tyenɨj nos ocha dete hnɨmoho ɨkɨch,
\v 11 hn tyenɨj nos oso otata uje Jesucristo wɨchɨ uu Ɨrhĩch. Uje oshuu ɨtsorz ich oshuu Porrosht uu eyok Deych ich dich.
\p
\v 12 Pɨshɨbo watsaklo, uje ehn yok de olak ahɨrni ich shish ahakõrlo uje titɨm olak. Ele ahle ich ye yok chɨhɨ olak ahɨrpe per sehe shish tuu ahakõrlo uje ma om par uje olak ɨluu ɨlo Jesucristo ɨr ɨluu. Shish tyenɨj atɨlɨlo erze kuche mɨhnũwo nehech olak ɨkiyo tãra hn ye ahakõrlo. Enaha olak par uje ma ahakõrlo uje Cristo sahmũr
\v 13 pork Porrosht chish obiyoho olak aho par uje shuu olak ɨluu ɨtso ɨre pork sahmũr uje olak ɨluu ɨtso ɨre.
\v 14 Nos wɨr erze uje tyenɨj ahakõrlo ich ye ekũna ejerpta hn ye ahakosɨlye
\v 15 par uje ye latɨk chɨhɨ uje pwele tata uje ahakõrlo uje mɨ̃hnɨk hn shish olak ɨluu ich om, heke ɨmeheeych uje olak Porrosht aabo uje ye ahakõrlo uje mɨ̃hnɨk uje ebuhulo erze oso õr ehet uje õr kushĩyo hn õr ɨluu mɨhnũ. Heke shɨ olak ɨtso luu uje chihit nãhu ɨ̃rmo oso uje shɨ õr ɨtso dɨhlele pork wɨr ich õr ɨluu mɨhnũ,
\v 16 hn olak shish tyenɨj anɨmɨrãhalo Porrosht ahwoso atɨmlo õr par uje omasaha par Porrosht aabo par uje õr ɨkɨrĩt de uje yelɨj nɨhna ɨre. Heke uje Cristo cheeshpo nehe ich yok ayla pork pɨbiyo ich tokole om olak ahɨr.
\v 17 Kɨmɨjɨ tɨkɨtɨ nehe shɨ pork tanɨmɨrãha Porrosht ahwoso titɨm olak heke ye otiislo Jesuspe, par yok ich ye latɨkɨsh kɨmɨjɨ tɨkɨtɨ ɨtsorz. Shɨ yok ayla heke olak ayla toy.
\v 18 Hn tyenɨj olak ayla heke yok ayla toy.
\p
\v 19 Kɨmɨjɨ eyok Ɨrhĩch nahmũr, ich daalo arhaabo hn tuu Timoteo do tɨ̃r olak par uje teychɨm olak. Uje deeshpo nehe hn tatɨm yok uje yesh olak owich om ich tyenɨj shuu pehet kɨɨs.
\v 20 Nĩhyok ye tish yeẽkpe uje ɨtso ɨre uje wɨchɨ sehe takashɨm olak.
\v 21 Nos wɨr yewo uje ode lɨka shɨ oshuu deyuwo tɨsɨrɨ̃hɨ erze kuche shɨ par õr ɨre. Ye oduhu deyuwo tɨsɨ̃rpe erze Jesucristo ɨr ɨbiyo.
\v 22 Olak erahalo uje Timoteo ɨr ɨluuta ich om. Takashɨm yok uje tanɨmɨrãha Porrosht ahwoso shɨ ɨtso uje pɨkɨhnint takashɨm deych.
\v 23 Wap sehe tɨkɨraha uje gobierno shiyokorɨ̃hɨ yok nehe hnii tuu Timoteo hno par tɨ̃r olak,
\v 24 hn kɨmɨjɨ eyok Ɨrhĩch nahmũr, ich tekɨrɨhɨ olakpo shɨchish.
\p
\v 25 Sehe tuu Apafrodito do deeshɨ tɨ̃r olakpo. Wɨchɨ yok pɨshap hn pihyẽrak pork wɨchɨ Porrosht aap. Uhulo tɨ̃r yokni par takashɨm yok.
\v 26 Sehe tuu do tɨ̃r olak pork ɨre eyucha olak hn ich dosdarak uje entloni uje permo.
\v 27 Ich ũru uje ɨre permoni, sehe toy. Per Porrosht chuuna uje wɨchɨ losuhlaap hn sosɨr ɨre, hn uje sosɨr ɨre ich sosɨr yok toy par uje ye duhu yok ma dosdarak, pork yesh yok dosdarakɨhɨ lɨka karsel ehet.
\v 28 Heke sehe tuu do tɨ̃r olak shɨchish par uje olak ayla uje amlo ɨrpo hn par uje ye yok ma dosdarak.
\v 29 Asɨmlo eyok Ɨrhĩch hnechɨt uje Apafrodito taachɨ̃hɨ olak ahɨrpo. Tyenɨj olak narim erze uje õr ɨtso ɨre
\v 30 pork uje wɨchɨ shiyokõr erze Cristo ɨbiyoni ich kasi toy. Kasi ɨr ɨkɨrĩt sɨhna ɨre uje uhulo takashɨm yok pork ye olak chɨhɨ pahɨr petɨkni par akashɨmlo yok.
\c 3
\s Latɨkpo uje ma bale.
\p
\v 1 Pɨshɨbo watsaklo, uje ehn yahpaa terɨhɨ uhurc ana hutɨta uje tichew tokosɨm olak sehe titɨm olak ahnũwo. Shish tyenɨj olak ayla pork Jesucristo wɨchɨ uu eyok Ɨrhĩch. Ye tɨrmtsɨrpe uje tichew titɨm olakpo par uje olak ma erahalo hn ye eymehilo.
\p
\v 2 Abeylshɨp olak par uje ye wɨr onehnyẽr olak erze hnakɨrbo uje õr ɨbiyo mɨhnũwo. Wɨr shɨ õr ɨtso erze poyto uje mɨhnũwo. Sehe odiyuhu olak yũhurrza pɨkaabɨt par uje olak yar de uje iich otsɨɨ sirkunsisyon par amsahalo par Porrosht aabo per õr ahwoso ich ye ũrpe.
\v 3 Shɨ eyok uje yeeychãha pishɨ Porrosht pork ɨr Ɨchɨbich de eyok aho hn ich eyok ayla uje Jesucristo ɨshɨ eyok hnɨtewɨhɨ Porrosht ahɨrni hn yelɨj eyok eyuwo tɨsɨ̃r par uje yiyokõr kuchẽrk kɨnaha par yomsaha par Porrosht aabo, shɨ eyok Porrosht aabo. Wɨr uu yar pishɨ par Porrosht aabo, ye asa waa je iich otsɨɨ sirkunsisyonpe.
\v 4 Kɨmɨjɨ yeẽk duhu deyuwo tɨsɨ̃r par uje sehe masaha par Porrosht aap chɨ̃ra lakɨrbo ich yok ma pwele par tomsaha par Porrosht aap tuu ɨtsorz per ye jukur.
\v 5 Ich daalo osho uje yok shũrha hn oshiyokõr yok yarta waa je iich otsɨɨ sirkunsisyon. Yok israelya. Uu yok porokkite iich otsɨɨ Benjamín. Yok hebreoya, ye yok dihip kɨnãhape. Pɨluuta iich otsɨɨ fariseo. Ma tahmũr Porrosht ɨr ley,
\v 6 hn tɨnaha yok par uje tiyokõr uje mɨhnɨkɨ̃hɨ erze Porrosht aabo. Nĩhyok uje yeẽk tata uje tɨkiyuwe asa Porrosht ɨr ley.
\v 7 Yok tuu peyuwo tɨsɨ̃rni uje nos bale erze kuche par uje tiyokõr per ye jukur. Shɨ uje ye tokotiis Jesucristope wɨchɨ uje bale.
\v 8 Nos wɨr erze kuche uje tiyokõrni ich ye jukur par uje tɨkɨraha yok Ɨrhĩch Jesucristo. Tɨkɨraha ɨre ich ma bale je nos wɨr erze kuche yewo, heke ele ahle erze kuche par yok ich ye jukur shɨ ɨtso uje nos tɨbɨte basurt. Shɨ bale uje ye tokotiis Cristope.
\v 9 Yok de Jesucristo. Ye jukur tiyokõr erze leype uje Moisés chichewkite par uje tokoshɨ yok hnɨtewɨhɨ Porrosht ahɨr. Shɨ uje ye tokotiis Cristope par uje wɨchɨ ɨshɨ yok hnɨtewɨhɨ Porrosht ahɨr hn Porrosht perdonar yok.
\v 10 Sehe tɨkɨrahapa Jesucristo hn sehe tɨkɨrahapa erze Porrosht ɨr ukurbo. Wɨchɨ uje shuu Cristo ɨkponi. Sehe shish tiyokõr erze Cristo ɨr ɨbiyo, hn kɨmɨjɨ kuche mɨhnũwo tɨ̃r yok shɨ pork tiyokõr Jesucristo ɨr ɨbiyo o kɨmɨjɨ ye tɨ̃r yokpe ich ɨtsye. Ye latɨkɨsh par yok. Sehe tokoym tiyokõr mɨhnũwo nehech yok ɨlo erze topo uje yelɨj oniyokõr uje mɨ̃hnɨk heke tokole ɨtso uje tokõya Cristo uje toni.
\v 11 Uje Porrosht aabo õr ɨkpo nehe ich sehe tuu yok chɨhɨ õr ahɨr toy.
\p
\v 12 Uje hnii titɨm olakɨke tuu ɨtsorz ich ye titɨm olakpe uje yelɨj timehĩ kuche pork shish tɨkɨnãha pɨkaap. Hn yahpaa pɨluu ɨlo Cristo ɨr ɨluupe, per shish sehe tiyokõr erze uje shuu pɨluu ma om. Jesucristo wɨchɨ masahani par yok Ɨrhĩch par uje shuu pɨluu ɨtso ɨr ɨluu.
\v 13 Pɨshɨbo watsaklo, ye titɨm olakpe uje pɨluuta ɨtso Jesucristo ɨr ɨluuta, per shish tiyokõr tuu ɨtsorz. Ye tuu peyuwo tɨsɨ̃rpe erze kuche uje tiyokõrni. Shɨ tɨnaha yok par uje tuu pɨluuta ma om ɨtso Jesucristo ɨr ɨluuta.
\v 14 Shɨ yok ɨtso yeẽk uje uushɨ par serz ɨr premit. Heke tiyuhu yok par terz ese premit. Wɨchɨ uje yesh Porrosht tɨbeyɨhɨ wahacha poõrc par ɨshɨm yok pork ye tokotiis Jesucristope.
\v 15 Nos wɨr olak uje ye olak koswãha eyok Ɨrhĩch ich tyenɨj nos uhulo olak eyuwo ɨlo yok. Kɨmɨjɨ olak yeẽk eyuwo tɨsɨ̃r kɨnaha, ye ɨlo uje titɨm olakɨke ich Porrosht tyenɨj shuu erahalo uje pahwoso ich ũru.
\v 16 Nos wɨr uje Porrosht shuu yɨrahalo ich tyenɨj yiyokõrlo hn ye yukwimlo.
\p
\v 17 Pɨshɨbo watsaklo, sehe tuu eẽtlo yok, hn eychɨmlo olak ehet yeniipo uje otseẽt yok par uje olak yewo otseẽt õr.
\v 18 Shish titɨm olakni nehech ele ahle ich titɨm olakpo uje ich okɨhniya uje otsotiis Jesús uje tooho krus eeych par uje ɨshɨ õr hnɨtewɨhɨ Porrosht ahɨr. Shɨ pork tahmũr olak ich titɨm olak nehech uhulo tɨkiyer.
\v 19 Uje terɨhɨ õr uhurc nehe ich otɨ̃r urhuta bahluta ehet. Wɨr shɨ oshuu deyuwo tɨsɨ̃r oposo, hn erze mɨhnũwo uje shish oshiyokõr tyenɨj shuu opook per ye opookpe. Shɨ onarim ɨre pork oshiyokõr oshuu ɨtsorz. Shɨ oshuu deyuwo tɨsɨ̃r erze kuche uje de nãhu ɨ̃rmo,
\v 20 per eyok kɨnãho. Eyoklo owich de wahacha poõrc. Shɨ yiyemlo eyok Ɨrhĩch Jesucristo uje cheeshpo nehe tãra poõrc uje ɨshɨ eyok hnɨtewɨhɨ Porrosht ahɨrni.
\v 21 Ɨre tyenɨj shuu eyok yũhurrza kɨnaha, shuu ɨtso neyũhurrza chɨ̃ra lakɨrbo. Ɨr ukurbo deyo de heke deeych yet nehe hn nos shuu oshiyokõr uje ɨre sahmũr.
\c 4
\s Tyenɨj õr ayla pork Jesucristo wɨchɨ õr Ɨrhĩch.
\p
\v 1 Pɨshɨbo watsaklo, tahmũr olak hn sehe tekɨrɨhɨ olak. Olak uje uhulo yok ayla. Uje amsahalo par olak Porrosht aaboni ich uhulo pɨbiyo tokole ich ompa. Sehe tuu ye otiislo eyoklo Ɨrhĩch hn ye olak koswãha ɨre.
\p
\v 2 Evodia hn Síntique, sehe tuu olak eyuwo ɨlyẽr pork olak Porrosht eebe.
\v 3 Owa sham uje abey Porrosht aaboho wahacha, shish yakɨsho eyok ɨbiyo. Sehe tuu akashɨm Evodia hn Síntique uhu õr eyuwo ɨlyẽr. Erze tɨmcher otakashɨm yokni uje tanɨmɨrãha Porrosht ahwoso. Shɨ õr ɨtso Clemente uje takashɨm yokpo hn erze yewo uje ode lɨka pahɨr. Wɨr õr iiyo de asa hutɨta uje de poõrc uje nos wɨr oso õr iiyo de uje õr ɨkɨrĩt de uje yelɨj nɨhna ɨre.
\v 4 Titɨm olak. Shish tyenɨj uhu olak ayla pork Jesús wɨchɨ uu eyok Ɨrhĩch, hn titɨm olakpo. Uhu olak ayla.
\v 5 Nos akashɨmlo oso par uje ochɨraha uje olak ɨle om. Eyok Ɨrhĩch yej taãchpo.
\v 6 Ye atɨlɨlo latɨk, per shish olak orar apurlo Porrosht hn asɨmlo ɨre hnechɨt par erze uje apurlo.
\v 7 Heke Porrosht shuu olak aho kɨɨs. Erze yewo ye odɨrehepe ɨnaapo heke olak aho kɨɨs shuu ɨtsorz. Uje olak aho kɨɨs ich ye eenɨlo kuchepe par uje atɨlɨlo, hn ye olak eyuwo tɨsɨ̃rpe pork olak de Jesucristo.
\p
\v 8 Pɨshɨbo watsaklo, ich yej terɨhɨ ana hutɨta uhurc per sehe titɨm olak erze kuche ma. Sehe tuu olak eyuwo tɨsɨ̃r erze uje ich ũru hn erze uje shuu oso õr ɨluu om, hn erze uje oshiyokõr om uje Porrosht sahmũr, hn nos wɨr kuche uje shuu oso otsahmũrye, hn nos wɨr kuche uje oso ochɨraha uje ich om, hn nos wɨr kuche uje shuu oso õr eyuwo omɨhɨye, hn nos wɨr kuche uje shuu oso onɨna Porrosht. Wɨr tyenɨj yuhu eyok eyuwo tɨsɨ̃r, hn ye yuhu eyok eyuwo tɨsɨ̃r erze kuche mɨhnũwo uje hnakɨrbo hn tɨmcher oshiyokorɨ̃hɨye.
\v 9 Nos ahakõrlo erze uje tiyokorãha olakni, hn ahakõrlo erze uje titɨm olakni, hn ahakõrlo uje entlo uje tãra yok, hn erze uje amlo uje tiyokõr. Uje ahakõrlo uhulo ɨtsorz ich olak aho kɨɨs pork Porrosht de olak.
\s Porrosht aabo otakashɨm Pabloni.
\p
\v 10 Ich yok ayla hn tɨkeeychãha eyoklo Ɨrhĩch uje akashɨmlo yokpo. Ye titɨm olakpe uje ekeylo yok pork tɨkɨraha uje sehe akashɨmlo yok per ye olak pwelpe.
\v 11 Yelɨj tipuuhnɨm yeẽk uje kuche nihyokɨ̃hɨ pahɨr, pork ele ahle ich tɨkɨraha kɨmɨjɨ kuche kɨhniya chɨhɨ pahɨr o kɨmɨjɨ nihyokɨ̃hɨ pahɨr ich shish tuu pehet kɨɨs.
\v 12 Tɨkɨraha tuu pehet kɨɨs uje kuche nihyokɨ̃hɨ pahɨr hn tɨkɨraha tuu pehet kɨɨspo uje kuche kɨhniya de pahɨr. Kɨmɨjɨ mɨ̃hnɨk tɨ̃r yok o kɨmɨjɨ om ich shish tuu pehet kɨɨs. Kɨmɨjɨ oposo nihyokɨ̃hɨ pahɨr o kɨmɨjɨ chɨhɨ pahɨr hn uje kuche kɨhniya de pahɨr o kɨmɨjɨ nihyokɨ̃hɨ pahɨr ich shish tuu pehet kɨɨs. Ich kwestpa uje oso ochɨraha erze ɨluu par shish shuu õr aho kɨɨs.
\v 13 Nos yok pwele tiyokõr tuu ɨtsorz pork Jesucristo takashɨm yok chɨ̃ra lakɨrbo.
\v 14 Ich ompa uje akashɨmlo yok uje ehn erze kuche mɨhnũwo tɨ̃r yok.
\p
\v 15 Olak uje ebuhulo ese dɨt Filipos uje dechɨ hnɨmich Macedonia, uje titɨm olak Porrosht ahwoso wapni hn tɨkɨtokolɨhɨchɨs olak ahɨr par uje tɨtɨ̃r hnɨmich yet, ich erahalo uje nĩhyok iglesya uje takashɨm yok, shɨ olak.
\v 16 Uje yok dechɨs ese dɨt Tesalonicani ich shish uhulo otõhwa hnote oshɨm yok par uje akashɨmlo yok.
\v 17 Ye tuu peyuwo tɨsɨ̃rpe par uje tuu asɨmlo yok kuche. Ich tahmũr uje Porrosht ɨshɨmɨhɨ olakpo ich ma kɨhniya je uje asɨmlo yok.
\v 18 Epafrodito nos ɨshɨm yok erze uje uhulo tõhwa par uje ɨshɨm yok. Erze uje asɨmɨhɨlo yok ich iyuwe uje yok nesita. Wɨr shɨ ɨtso erze kuche uje aat ehmuuj uje oshɨmɨhɨ Porrosht uje ɨre sahmũr.
\v 19 Porrosht ich ɨrhĩch dich, heke ich nos ɨshɨm olak erze kuche uje olak nesita pork olak de Jesucristo.
\v 20 Sehe tuu shish nos yeeychãhalo uu eyok Deych. Uje yuhulo ɨtsorz ich ɨhɨ̃rtpa.
\s Pablo hõr oshɨm Porrosht aabo õr saludo.
\p
\v 21 Nos tokosɨm olak saludo uje ye otiislo Jesucristope. Eyok leshɨbo uje ode lɨka pahɨr oshɨm olak saludo toy.
\v 22 Nos wɨr Porrosht aabo yewo uje ode lɨka dɨt oshɨm olak saludo, hn erze uje ode wahacha rey Cesar ihyuch otatɨm yok par uje oshɨm olak saludo toy.
\v 23 Sehe tuu eyok Ɨrhĩch Jesucristo dosɨr olak.