\id COL Chamacoco NT - Paraguay 2000 (web 2013)
\h Colosenses
\toc1 Colosenses
\toc2 Colosenses
\toc3 Col
\mt1 Colosenses
\c 1
\s Pablo ɨshɨm Porrosht aabo õr saludo.
\p
\v 1 Yok Pablo. Yok Jesucristo ɨr apóstol pork Porrosht sahmũr uje tiyokorãha oso ɨr ahwoso. Timoteo de lɨka pahɨr.
\v 2 Oyuhu yet chichew ana hutɨta par tokosɨm olak uje olak Porrosht aabo uje olak dechɨ dɨt Colosas uje ye otiislo Cristope. Sehe tuu Porrosht uu eyok Deych dosɨr olak hn duhu olak aho kɨɨs.
\s Pablo hõr shish õr orar par Porrosht aabo.
\p
\v 3 Shish õryok orar par olak hn oyɨna Porrosht uu eyok Ɨrhĩch Jesucristo ɨr Deych,
\v 4 pork oyunt uje olak ye otiislo Jesucristope, hn nos ahmũrlo Porrosht aabo yewo
\v 5 pork olak erahalo erze premyo uje ich ɨhɨ̃rtso uje Porrosht yesh tɨbeyɨhɨ wahacha poõrc par olak. Uje entloni erze uje ich ũru uje Jesús tokite hn ɨshɨ olak hnɨtewɨhɨ Porrosht ahɨr ich entlo toy erze uje dechɨ poõrc wɨr par olak.
\v 6 Yeẽk de uje shiyokorãha olakni shuu ɨtsorz hn otatehe ɨ̃rmo lekɨtiyo toy. Oso ich okɨhniya lekɨtiyo uje ye olotiispe erze ahwoso heke oshiyokõr uje ich om hn shish ma okɨhniya uje ye olotiispe shɨ ɨtso uje tokolɨhɨ olak uje entloni hn erahalo uje ich ũru uje Porrosht sahmũr olak.
\v 7 Epafras wɨchɨ shiyokorãha olakni. Wɨchɨ õryok leshap toy uje oyahmũrpa. Shiyokõr Porrosht ɨbiyo ɨtso õryok hn yelɨj sehi lahwoso uje tata. Uje tatɨm olak Cristoni ich takashɨm õryok oyiyokõr Cristo ɨr ɨbiyo.
\v 8 Wɨchɨ tatɨm õryok uje Porrosht Ɨchɨbich shuu ahmũrloye.
\p
\v 9 Ese deeych uje tatɨm õryok shuu ɨtsorz nehech ele ahle shish õryok orar par olak par uje Porrosht Ɨchɨbich shuu olak eykdeyo par uje erahalo uje Porrosht sahmũr.
\v 10 Oyapur Porrosht par uje ahakõrlo uje ich om pork olak ɨr aabo hn ɨr aabo tyenɨj oshiyokõr uje eyok Ɨrhĩch sahmũr. Uje ahakõrlo uhulo ɨtsorz ich shish ahakõrlo uje ich om hn shish ma erahalo Porrosht ɨr ɨluu.
\v 11 Oyapur Porrosht toy par uje ɨshɨm olak ukurbo par uje olak ewenta nos wɨr erze kuche uje tɨ̃r olak. Ɨr ukurbo deyo de uje ɨre pwele ɨshɨm olak par uje shish entɨloye hn shish olak ayla.
\v 12 Heke shish enɨlo eyok Deych Porrosht pork wɨchɨ nɨshii olak par uje etɨ̃rlo ɨre ahɨr nehe hn ɨshɨm olak erze uje ich ɨhɨ̃rtso uje tyenɨj ɨshɨm daabo nehe wahacha Porrosht ahɨr uje luu chihit orɨ̃hɨ.
\s Cristo tooho krus eeych par shuu õr aho kɨɨsɨhɨ Porrosht.
\p
\v 13 Porrosht chiyuhu eyokɨhɨ Satanás hme uje shɨ ɨtso uje eyok de dɨhlelta hn chɨbɨte eyok Deyjɨt hme. Ich sahmũrpa Deyjɨt.
\v 14 Wɨchɨ uje ɨshɨ eyok hnɨtewɨhɨ Porrosht ahɨr hn Porrosht perdonar eyok erze kuche mɨhnũwo uje yiyokõrlo.
\p
\v 15 Cristo wɨchɨ seẽtshɨp ɨr Deych Porrosht. Nĩhyok ye latɨk nomo ɨr Deych. Cristo ich ma dich je nos wɨr kuche uje Porrosht shiyokõrkite.
\v 16 Cristo nos shiyokõr kuche uje de poõrc hn uje de lɨka hnɨmich, erze uje eyok pwele yomo hn erze uje ye eyok pwele yomope, ɨtso erze anjele uje ye eyok pwele yomo õrpe, erze anjele uje õr ukurbo deyo hn erze uje õr ukurbo yerɨj deyo hn erze uje õr ukurbo arhaabo hn erze uje ma õr ukurbo pɨkaap. Nos wɨr õr ɨre wɨr uje Porrosht shuu Cristo shiyokõrkite par uje wɨr oshuu Cristo dich.
\v 17 Cristo ɨchii dekite ehn yahpaa nos kuche chɨhɨpe. Porrosht shuu wɨchɨ nos tɨbey erze kuche par uje ye nɨhna ɨrpe.
\v 18 Cristo wɨchɨ shɨ ɨtso Porrosht aabo õr huta hn Porrosht aabo wɨr shɨ õr ɨtso Cristo ɨr yũhurrza. Wɨchɨ webich osht uje tokolɨhɨ erze topo õr ahɨrkite hn ich ye toypo par uje wɨchɨ ich ma dich je nos wɨr kuche hn ich ma dich je nos wɨr oso toy,
\v 19 pork Porrosht sahmũr uje Cristo ɨr ɨluu shɨ ɨtso ɨr ɨluuta.
\v 20 Porrosht chiihla Jesuskite par uje shuu oso õr aho kɨɨsɨhɨ ɨre, erze uje de lɨka hnɨmich hn erze uje de wahacha poõrc. Shɨ uje tooho krus eeychkite hn ɨr armɨsta noshɨ ich shuu nos õr aho kɨɨsɨhɨ Porrosht.
\p
\v 21 Titɨm olak uje antkite ich olak dukuhlehe Porrosht hn olak eyuwo mɨhnũwo heke shuu ey olak ɨmãha Porrosht pork shish ahakõrlo uje ich mɨhnũwo,
\v 22 per ele ahle ich olak aho kɨɨsɨhɨ Porrosht shɨ pork Cristo ɨshɨm ɨre oso hn oshuu oshuu toy par uje hnoy olak seya olak Porrosht ahɨr nehe. Ese deeych uje hnoy olak shuu ɨtsorz ich olak ɨluu ɨtso Cristo ɨr ɨluu. Nĩhyok ye latɨk pwele tata uje olak hnɨtew dechɨ
\v 23 kɨmɨjɨ ye otiislo Cristope hn ye olak koswãha. Shɨ olak ɨtso uhwɨrbe uje ochihitsɨm hn oshiyeru hn ich etan. Ye ompe uje moymlo uje anemlo par etɨ̃rlo olak owich uje de Porrosht ahɨr pork Jesús ɨshɨ olak hnɨtewni. Wɨr erze ahwoso uje entloni, hn wɨr erze uje otsanɨmɨrãha otatɨm erze oso uje ode ɨ̃rmo lekɨtiyo. Yok Pablo uje tomsaha par uje tanɨmɨrãha erze ahwoso toy.
\s Porrosht chɨbɨte Pablo par uje sosɨr õr.
\p
\v 24 Titɨm olak uje ich pehet kɨɨs uje oshiyokõr mɨhnɨkɨ̃hɨ yok par olak. Erze mɨhnũwo uje tɨ̃r yok wɨr shɨ ɨtso uje Cristo tatni uje tyenɨj tokolɨhɨ yok par uje takashɨm erze Porrosht aabo yewo. Porrosht aabo wɨr shɨ õr ɨtso Cristo ɨr yũhurrza.
\v 25 Porrosht chiihla yok par ɨr ɨbɨk par uje tokosɨr olak hn nos tiyokorãha olak erze ɨr ahwoso.
\v 26 Antni Porrosht ye duhu oso odɨrehepe uje dihipo kɨnãho tyenɨj omasaha par ɨr aabo, per ele ahle ich shuu laabo ochɨraha.
\v 27 Porrosht sehe duhu odɨraha erze uje ye oso odɨraha petɨkni. Erze ahwoso uje shuu ochɨraha tata shuu ɨtsorz ɨm: —Cristo tyenɨj de olak aho uje olak dihipo kɨnãho par uje erahalo uje olak owich de Porrosht ahɨr hn shɨ anemlo uje etɨ̃rlo poõrc nehe.—
\v 28 Heke nos oyitɨm õr uje Cristo tooho krus eeychni par õr. Uje tiyokorãha õr ich tiyokorãha õrpa par uje ochɨraha hn ye otɨ̃r urhuta bahluta ehet nehe. Shish oyakɨt õr par uje deeych yet nehe hn oyukwi õr oyeya õr Porrosht ɨkɨch. Ich õr ɨluu ɨhɨr pishɨ ɨtso Cristo ɨr ɨluu.
\v 29 Uje tiyokõr ahnũwo obiyo tuu ɨtsorz, ich tɨnaha yok hn Cristo takashɨm yok chɨ̃ra lakɨrbo.
\c 2
\p
\v 1 Sehe tuu erahalo uje tɨnaha yok par uje tokosɨr olak, hn par erze Porrosht aabo yewo uje ode wahacha dɨt Laodicea, hn par nos wɨr Porrosht aabo yewo uje yelɨj onomo yok.
\v 2 Shish tiyokõr tuu ɨtsorz par uje tuu olak duurapo hn par uje tuu erze Porrosht aabo yewo oduurapo par uje shish otsahmũrye. Heke erahalpa erze uje Porrosht ye duhu yewo odɨrehepe. Wɨr erze Cristo ɨr ɨluu.
\v 3 Cristo nos chɨraha kuche hn ɨre pwele shuu erahalo toy.
\v 4 Ahnũwo uje titɨm olakɨke wɨr par uje erahalo par uje nĩhyok ye latɨk pwele sehnyẽr olak. Wɨr ochɨrahapa ochiilehet par otsehnyẽr oso.
\v 5 Yok Pablo. Ye yok chɨhɨ olak ahɨrpe, per tɨbɨte shɨ ɨtso uje pɨchɨbich de olak ahɨr. Ich pehet kɨɨs uje olak aho kɨɨsɨhɨye hn yelɨj olak koswãha Cristo.
\p
\v 6 Shɨ ye otiislo eyok Ɨrhĩch Jesucristo petɨkni heke amsahalo par olak Porrosht aabo. Ele ahle shɨ tyenɨj ma ye otiislo ɨre par uje ahakõrlo uje ɨre sahmũr.
\v 7 Heke olak ɨtso erze pohɨr uje ich uro yaka hn ye kaype. Ye otiislo Cristo hn shish ma ye otiislo ɨre shɨ ɨtso uje oshiyokorãha olakni, hn shish tyenɨj enɨlo Porrosht.
\s Cristo shuu Porrosht aabo õr ɨluu ahle.
\p
\v 8 Titɨm olak par uje abeylshɨp olak par uje nĩhyok ye latɨk pwele sehnyẽr olak chɨ̃ra deyuwo uje ye ũrpe. Erze õr ahwoso ich ye jukur pork õr ahwoso ye ɨlope uje Cristo shiyokorãha oso. Wɨr shɨ otata uje õr poruwo wɨshɨ otata. Erze õr ahwoso shɨ tãra demonyo, ye tãra Cristope.
\v 9 Nos wɨr Porrosht ukurbo hn ɨr eyuwo nos de Cristo,
\v 10 hn Cristo nos de olak aho heke Porrosht ukurbo hn ɨr eyuwo de olak toy. Cristo ich ma dich je nos wɨr erze uje õr ukurbo deyo de.
\v 11 Olak de Cristo heke ich shɨ ɨtso uje Cristo chɨbɨte olak asa yarta waa je iich otsɨɨ sirkunsisyon, per ye waa yarta yatape waa je hnakɨrbo ochɨbɨte õr uje ochiyuhu õr yũhurrza pɨkaabɨt. Asa yarta waa je Cristo chɨbɨte olak wɨchɨ uje chiyuhu olak ɨluu mɨhnũ.
\v 12 Uje otohɨrm olak ich shɨ ɨtso uje ochihitsɨm olak hnɨmich uut, hn uje ochiyuhu olak awɨt uut ich shɨ ɨtso uje olak ɨkpo hn mẽylo Cristo uje ɨkpo pork ye otiislope uje Porrosht shuu Cristo ɨkponi hn tokolɨhɨ erze topo õr ahɨr.
\v 13 Antni ahakõrlo kuche mɨhnũwo heke shɨ olak ɨtso topo. Nĩhyok ye yarta chɨhɨ olak ahope waa je iich otsɨɨ sirkunsisyon. Olak ɨluu shish mɨhnũ pork ye Porrosht diyuhupe, per ele ahle ich olak Porrosht aabo heke ɨshɨm olak ese ɨkɨrĩt uje yelɨj nɨhna ɨre pork ye otiislo Cristope hn ɨre perdonar olak nos wɨr kuche mɨhnũwo uje ahakõrlo.
\v 14 Yiyokõrlo uje ich mɨhnũwoni. Yiyuwe Porrosht ɨr ley per Cristo nos ɨshɨ eyok hnɨtew uje de Porrosht ahɨr shɨ ɨtso uje nos chichew erze mɨhnũwo uje yiyokõrlo chɨbɨte hutɨta hn chɨbɨte asa hutɨta krus eeych hn chiwa klabo pork wɨr uje Cristo ɨshɨ uje tooho krus eeychkite.
\v 15 Cristo nos serz erze demonyo uje õr ukurbo deyo de hn erze yewo, hn chɨbɨte orhõta uje serz õr. Uje Cristo tooho krus eeych ich nos serz õr.
\p
\v 16 Heke titɨm olak par uje ye uhu onehnyẽr olak erze uje otata uje ahakõrlo mɨhnũwo. Sehe onarim olak erze oposo uje elɨlo hn erze uje ehelo, hn sehe oduhu ahakõrlo õr ahmiyo uje õr ɨre otsahmũr o sehe oduhu ahakõrlo uje otsahmũr uje shekurko toy o kɨmɨjɨ sabta.
\v 17 Nos wɨr erze ahwoso uje otatɨm olak wɨr shɨ Porrosht sɨteẽta Cristo uje shiyokor uje taachɨ̃hɨ nãhu ɨrmõkite. Jesucristo wɨchɨ ich ũrpa, per erze israel oso õr ahmiyo uje oshiyokõr wɨr shɨ Porrosht sɨteẽta Cristo hn tyenɨj oym erze õr ahmiyo uje sɨteẽta ɨre pork Cristo taãchkite.
\p
\v 18 Ye eẽtlo erze uje sehe onehnyẽr olak. Shɨ sehe oduhu enaha olak premit heke sehe oduhu eeychãhalo anjele. Wɨr otata uje õr ukurbo de shɨ pork omo hn ochɨkẽra anjele. Shɨ onarim ɨre, per shɨ tãra õr eyuwo uje oshuu tɨsɨ̃r erze mɨhnũwo.
\v 19 Oym erze ahwoso uje ich ũru uje tãra Cristo. Wɨchɨ shɨ ɨtso uu Porrosht aabo õr huta, hn Porrosht aabo wɨr shɨ õr ɨtso Cristo ɨr yũhurrza. Oso otɨbey neyũhurrza heke otaak par uje õr ukurbosh, hn õr ɨtɨso tehĩye par uje ochishew obiyo hn nos tokole om pork õr ɨkiyo om heke ich õr kresa. Shɨ ɨtso oso õr huta uje tɨbey õr yũhurrza ich shɨ ɨtso uje Cristo nos tɨbey Porrosht aabo hn shish ma shuu õr ɨluu ɨtso deluu. Wɨchɨ uje Porrosht sahmũr.
\p
\v 20 Moymlo uje ahakõrlo erze kuche mɨhnũwo shɨ uhulo ɨtso uje atɨlo mẽylo Cristo uje toni. Erze mɨhnũwo tãra demonyo uje tɨbey oso uje ye odɨraha Porroshtpe uje ode nãhu ɨ̃rmo per Cristo chiyuhu olakɨhɨ demonyo õr hme. ¿Ɨnaapo heke sehe eeshlopo ahakõrlo erze kuche mɨhnũwo shɨ ɨtso uje olak de õr hmepo? ¿Ɨnaapo ahakõrlo erze õr ley uje oshɨm olak?
\v 21 Otatɨm olak otsɨɨ: —Ye asɨlo, hn ye elɨlo, hn ye akahɨrlo.—
\v 22 Per nos wɨr kuche Porrosht chɨbɨte par sosɨr oso hn erze kuche shɨ sɨhna ɨre shɨchish. Erze õr ley uje otatɨm olak shɨ tãra oso õr eyuwo
\v 23 hn shuu oso õr eyuwo tɨsɨ̃r uje erze ley ich om hn shuu oso oteeychãha Porrosht, hn erze ley ye duhu onarim ɨrpe hnii shuu oshiyokõr mɨhnɨkɨ̃hɨ neyũhurrza, per erze ley ye jukur par uje sontew erze õr ɨluu mɨhnũ.
\c 3
\p
\v 1 Titɨm olak uje moymlo olak ɨluu mɨhnũni ich shɨ ɨtso uje atɨlo hn mẽylo Cristo uje toy hn mẽylo ɨre uje ɨkpo pork olak ɨluu ich ahle, heke tyenɨj ahmũrlo erze kuche uje de poõrc. Cristo dechɨ, hn yesh sakaha Porrosht ɨr waãchta pork wɨchɨ ich dich toy.
\v 2 Uhu olak eyuwo tɨsɨ̃r erze kuche uje de Porrosht ahɨr, hn ye shɨ uhu olak eyuwo tɨsɨ̃r erze kuche uje de nãhu ɨ̃rmo.
\v 3 Olak ich moymloni erze kuche mɨhnũwo uje ahakõrlo shɨ ɨtso uje atɨloni, hn Cristo tɨbey olak ɨkɨritɨ̃hɨ Porrosht ahɨr.
\v 4 Cristo wɨchɨ uje ɨshɨm eyok ese ɨkɨrĩt. Uje cheeshpo tɨ̃r hnɨmich nehe ich olak mẽylo ɨre, hn ɨre ich hũrpa.
\s Porrosht aabo tyenɨj oym deluu ɨler hn oshiyokõr deluu ahle.
\p
\v 5 Heke titɨm olak, moymlo erze kuche mɨhnũwo uje de nãhu ɨ̃rmo shɨ ɨtso uje atɨlo. Erze mɨhnũwo uje oso oshiyokorɨ̃hɨye wɨr tata shuu ɨtsorz. Ich mɨ̃hnɨk uje hnakɨrbich hn tɨmcharrza ye onõyhi pishye ahɨrpe hn shɨ omuhuye ahɨr. Ich mɨ̃hnɨk uje tɨmcher tɨmcher õhyiyer ahɨr, hn ich mɨ̃hnɨk uje hnakɨrbo hnakɨrbo õhyiye ahɨr. Ich mɨ̃hnɨk uje yeẽk sahat loshɨpɨt, hn ich mɨ̃hnɨk uje yanak shuu loshɨpɨt sahat ɨre. Ich mɨ̃hnɨk uje pɨkɨhnino hn pɨkɨhnine oshiyokorɨ̃hɨye oshuu ɨtsorz. Ye ompe uje sehe ahakõrlo uhulo ɨtsorz, hn ich ye ompe uje uhu olak eyuwo tɨsɨ̃r erze kuche mɨhnũwo. Ye ompe uje ekutɨrãha olak kuche pork uje ahakõrlo uhulo ɨtsorz ich shɨ ɨtso uje eeychãhalo erze olak kuche eylo olak porroshtɨhɨ.
\v 6 Nos wɨr erze kuche mɨhnũwo uje titɨm olakɨke uje oso oshiyokõr oshuu ɨtsorz ich tyenɨj shuu Porrosht chesdelpa nehech sepyẽr õr.
\v 7 Antni olak ɨluu ɨtso õr heke ahakõrlo uhulo ɨtsorz,
\v 8 per ele ahle ich tyenɨj nos moymlo ahakõrlo erze mɨhnũwo. Moymlo uje aas olak uulo shɨchish, hn moymlo uje ehmerlo olak ehemurc olak aho. Ye uhu olak ɨljaabo, hn moymlo uje athɨlo olak ukushiĩhi oso par uje uhu otsɨtak yet. Ye eyuhu olak ahwoso mɨhnuwõho olak ahwo,
\v 9 hn ye ata olak ukushiĩhiye, pork moymlo erze olak ɨluu ɨler uje ich mɨhnũ uje wapni shish ahakõrlo.
\v 10 Uhu olak ɨluu ahle uje yesh Porrosht nɨshii par uje ich uhurc nehe hn olak ɨluu ɨtso Porrosht ɨr ɨluu. Wɨchɨ uje shuu olak ɨluu ahle.
\v 11 Ye latɨkɨsh kɨmɨjɨ olak griego yewo o kɨmɨjɨ olak israel yewo. Kɨmɨjɨ olak yarta de waa je iich otsɨɨ sirkunsisyon, o kɨmɨjɨ nĩhyok ich ye latɨkɨsh. Hn ye latɨkɨsh kɨmɨjɨ olak dihipo kɨnãho uje ye odɨraha latɨk o kɨmɨjɨ olak dihipo kɨnãho uje ma ye odɨraha latɨk. Ye latɨkɨsh kɨmɨjɨ olak õr yɨlo o kɨmɨjɨ ye õr yɨlope. Shɨ uje yɨrahalopa Cristo wɨchɨ uje ma om.
\p
\v 12 Titɨm olak uje Porrosht chiihla olak par olak ɨr aabo pork sahmũr olak hn sehe duhu olak ɨluu ɨlo deluu, heke tyenɨj eenɨlo erze uje õr losuhlaabo hn osɨrlo õr. Shish tyenɨj osɨrlo yewo, hn ye olak narim olak. Ye owãhaloye per tyenɨj eenthɨloye.
\v 13 Tyenɨj olak ewenta olak leshɨbo hn uje olak yeẽk niyokõr mɨhnɨkɨ̃hɨ leshɨbich ich tyenɨj duhu dehet kɨɨsɨhɨ ɨre hn dɨkey uje shiyokõr mɨhnɨkɨ̃hɨ ɨre shɨ ɨtso uje eyok Ɨrhĩch perdonar eyok.
\v 14 Per kɨmɨjɨ ahmũrloye ich ma om par olak je nos wɨr erze ahwoso yewo uje titɨm olakɨke pork uje ahmũrloye ich nos olak aho kɨɨsɨhɨye hn ye etakloyepe.
\v 15 Cristo wɨchɨ uje shuu olak aho kɨɨs pork shuu erahalo uje ich om par ahakõrlo, heke shɨ ahakõrlo uje shuu olak aho kɨɨs. Porrosht chiihla olak par uje shɨ olak weeta nohmɨra shɨ ɨtso Cristo ɨr yũhurrza, hn shish tyenɨj enɨlo Porrosht.
\v 16 Enaha olak par uje erahalopa Cristo ɨr ahwoso. Ahakorãhaloye hn akɨtloye hn uhulo olak eyuwo tɨsɨ̃r uje ich om par atɨmloye. Ye uhulo olak koswãha uje eeychɨlo eẽtlo salmo hn eẽtlo imno hn korito hn enɨlo Porrosht.
\v 17 Nos wɨr erze uje ahakõrlo hn nos wɨr erze uje athɨlo wɨr uje tyenɨj uhulo tokole om pork Jesús wɨchɨ uu eyok Ɨrhĩch hn ahakõrlo par ɨre, hn tyenɨj enɨlo Porrosht uu eyok Deych hn ẽrlo eyok Ɨrhĩch Jesucristo ɨr iich.
\s Pablo sakɨt Porrosht aabo uje õr ɨrẽhtɨsh hn Porrosht eebe uje õr abiyosh.
\p
\v 18 Titɨm olak tɨmcher, tyenɨj ahakõrlo uje olak abich tatɨm olak pork eyok Ɨrhĩch sahmũr uje ahakõrlo uhulo ɨtsorz.
\v 19 Hn titɨm olak hnakɨrbo, olak tyenɨj ahmũrlo olak ɨrẽhte hn ye abɨterlo õr.
\v 20 Hn titɨm olak pɨkɨhnino hn pɨkɨhnine, nos tyenɨj ahakõrlo uje olak deych hn olak data otatɨm olak pork eyok Ɨrhĩch sahmũr uje ahakõrlo uhulo ɨtsorz.
\v 21 Hn titɨm olak hnakɨrbo uje olak aabo ode, ye ahakoslo õr nehech uhulo ochesdelo. Kɨmɨjɨ uhulo õr dosdarak ich ye uhulo duurape.
\v 22 Hn titɨm olak uje olak õr yɨlo, tyenɨj nos ahakõrlo uje olak yɨnsɨro otatɨm olak. Ye shɨ uje oteychɨm olak ich hnii eyuhulo olak. Ye uhu olak aho yũhɨrsh. Tyenɨj ahakõrlo uje titɨm olakɨke pork atɨlɨlo eyok Ɨrhĩch Jesucristo.
\v 23 Nos wɨr erze uje ahakõrlo ich tyenɨj enaha olak par uje ahakõrlo shɨ ɨtso uje ahakõrlo par eyok Ɨrhĩch, ye shɨ par hnakɨrbope.
\v 24 Uje aachɨ̃hɨlo eyok Ɨrhĩch ahɨr nehe ich erahalo kɨmɨjɨ ahakõrlo uje om uje olak de nãhu ɨ̃rmo, ich ɨshɨm olak erze kuche uje de ɨre ahɨr wahacha poõrc, pork uje ahakõrlo olak ɨbiyo ich ahakõrlo Cristo ɨr ɨbiyo. Wɨchɨ uu olak Ɨrhĩch pisht.
\v 25 Yeẽk uje shiyokõr uje ich mɨhnũwo, Porrosht tyenɨj shuu erze kuche mɨhnũwo cheeshpo tɨ̃r ɨre nehe. Ye olak kɨnãhope pork Porrosht ye duhu yewo õr kɨnãhope hn duhu yewo õr kɨnãho. Shuu nos õr ɨtsye.
\c 4
\p
\v 1 Titɨm olak uje olak yɨlo hn olak yɨle ode, tyenɨj enshiilo õr. Erahalo uje olak Ɨrhĩch de toy, wɨchɨ uje de poõrc.
\p
\v 2 Nos titɨm olak par uje shish olak orar apurlo Porrosht. Uje olak orar ich enɨlo Porrosht hn ye uhu olak eyuwo tɨsɨ̃r kɨnãha.
\v 3 Olak orar toy apurlo Porrosht par õryok par uje Porrosht duhu tokole uje õryok pwele oyanɨmɨrãha ɨr ahwoso oyitɨm erze oso uje Cristo ɨshɨ õr hnɨtewɨhɨ Porrosht ahɨrkite. Ye nos odɨrehepe uje Cristo shiyokorɨ̃hɨ õrni shuu ɨtsorz. Shɨ pork tanɨmɨrãha ɨr ahwoso heke ochɨmchaha yok karsel ehet.
\v 4 Olak orar apurlo Porrosht par uje tuu ɨmeheeych uje titɨm õr Cristo, pork tyenɨj tiyokõr tuu ɨtsorz par uje ochɨraha.
\v 5 Ahakorɨ̃hɨlo om õr ɨle ɨkɨch erze uje ye õr Porrosht aabope par uje kɨmɨjɨ onahmũr ich olak pwele atɨmlo õr Cristo. Ye moymlo õr per ahakorãhalo õr.
\v 6 Shish uhu olak ahwoso om shɨ ɨtso sal uje ich om par oposo par uje erahalo erze ahwoso uje ich om par atɨmlo õr erze uje sehe odɨraha, hn ye ehnewlo olak ahwoso uje atɨmlo õr.
\s Pablo ɨshɨm Porrosht aabo õr saludo.
\p
\v 7 Titɨm olak uje Tíquico wɨchɨ eyok leshap uje tahmũrpa. Yelɨj sehi lahwoso uje tata. Wɨchɨ takashɨm yok uje tiyokõr eyok Ɨrhĩch ɨr ɨbiyo. Tyenɨj tatɨm olak nos wɨr kuche uje tokolɨhɨ yok,
\v 8 heke tuu hno tɨ̃r olak par uje shuu erahalo erze uje tokolɨhɨ yok hn par uje shuu olak duurapo.
\v 9 Tuu Onésimo hno ĩya ɨre. Wɨchɨ eyoklo leshap toy uje tahmũrpa. Yelɨj sehi lahwoso, shish shiyokõr. Wɨchɨ olak ɨhnapsa. Wɨr tyenɨj nos otatɨm olak erze kuche uje tokolɨhɨ õryok.
\v 10 Aristarco ɨshɨm olak saludo. Wɨchɨ pihyẽrak. Oshiyeru toy ochɨbɨte pahɨr ele karsel ehet. Marcos ɨshɨm olak saludo toy. Wɨchɨ Bernabé ɨr primo. Kɨmɨjɨ Marcos taachɨ̃hɨ olak ahɨr nehe ich enshiilo ɨre shɨ ɨtso uje asa hutɨta yata tata uje tokosɨm olakni.
\v 11 Jesús ɨshɨm olak saludo toy. Wɨchɨ iich yet otsɨɨ Justo. Marcos hn Justo wɨr pɨhnapso israel yewo uje õya erze pihyẽre yewo uje otakashɨm yok tanɨmɨrãha Porrosht ahwoso par uje oyuhu oso omasaha par Porrosht aabo. Marcos hn Justo oshuu pehet kɨɨs.
\v 12 Epafras ɨshɨm olak saludo toy. Wɨchɨ olak ɨhnapsa, hn wɨchɨ Jesucristo ɨr ɨbɨk. Shish sɨnaha ɨre par uje ɨre orar sapur Porrosht par olak par uje ye olak koswãha ɨre, hn par uje erahalo nos wɨr erze uje Porrosht sahmũr uje ahakõrlo.
\v 13 Tɨkɨraha uje Epafras shish shuu deyuwo tɨsɨrɨ̃hɨ olak hn ɨre orar par olak hn erze Porrosht aabo yewo toy uje odechɨ dɨt Laodicea hn par erze uje odechɨ dɨt Hierápolis.
\v 14 Lucas ɨshɨm olak saludo toy. Wɨchɨ lotor, hn tahmũrpa ɨre. Demas ɨshɨm olak saludo toy.
\v 15 Atɨmlo erze Porrosht aabo uje ode wahacha dɨt Laodicea uje tokosɨm õr saludo toy. Atɨmlo asa Ninfa toy hn nos wɨr Porrosht aabo uje shish otakasho lahwichɨhɨ ɨr ihyuch uje tokosɨm õr saludo toy.
\v 16 Uje nos olak ler asa hutɨta nehe ich sehe tuu asɨmlo erze Porrosht aabo uje odechɨ dɨt Laodicea par uje õr ler toy, hn tyenɨj olak ler toy asa hutɨta uje tichewni hn tokosɨm erze Porrosht aabo uje odechɨ dɨt Laodicea.
\v 17 Sehe tuu atɨmlo Arquipo par uje niyokõr erze obiyo uje eyok Ɨrhĩch ɨshɨm ɨre par uje shiyokõr.
\p
\v 18 Yok Pablo. Tuu ochichew ana hutɨta per ana hutɨta uhurc ich yok tichew par uje erahalo uje tãra yok. Tokosɨm olak saludo. Sehe tuu shish olak orar apurlo Porrosht par yok pork yesh yok de karsel ehet. Sehe tuu Porrosht dosɨr olak.