\id 1TH Chamacoco NT - Paraguay 2000 (web 2013)
\h 1 Tesalonicenses
\toc1 1 Tesalonicenses
\toc2 1 Tesalonicenses
\toc3 1Te
\mt1 1 Tesalonicenses
\c 1
\s Pablo hõr oshɨm Porrosht aabo saludo.
\p
\v 1 Yok Pablo. Silvano hn Timoteo ode pahɨr. Oyichew ana hutɨta par uje oyosɨm olak uje olak Porrosht aabo uje ebuhulɨchɨ dɨt Tesalónica. Porrosht wɨchɨ uu olak Deych. Hn Jesucristo wɨchɨ olak Ɨrhĩch. Sehe oyuhu Porrosht dosɨr olak hn duhu olak aho kɨɨs.
\s Porrosht aabo tyenɨj ye olotiis ɨr ahwospe.
\p
\v 2 Shish oyɨna Porrosht par nos wɨr olak. Shish õryok eyucha olak uje õryok orar oyapur Porrosht.
\v 3 Shish oyitɨm Porrosht uje ahakõrlo pork ye otiislo eyok Deych Porrosht. Õryok eyucha uje ahmũrlo yewo hn akashɨmlo õr. Õryok eyucha uje shish olak ewenta erze uje prowa olak shɨ pork erahalo uje eyok owich de Porrosht ahɨr pork eyok Ɨrhĩch Jesucristo ɨshɨ eyok hnɨtewɨhɨ Porrosht ahɨrkite.
\v 4 Pɨshɨbo watsaklo, Porrosht sahmũr olak. Oyɨraha uje ɨre chiihla olakkite
\v 5 pork uje oyanɨmɨrãha Porrosht ahwoso oyitɨm olakni ich erahalo uje ye shɨ õryok ahwospe. Porrosht ukurbo ĩya toy hn ɨr Ɨchɨbich chish obiyoho olak aho toy. Wɨchɨ shuu erahalo lahwoso uje oyitɨm olak ich ũru. Erahalo õryok uje oyebuhu olak ahɨr ich oyiyokõr uje om.
\p
\v 6 Olak eẽtlo uje oyiyokõrni, hn eẽtlo eyok Ɨrhĩchpo. Uje entlo Porrosht ahwoso wapni ich yewo oshiyokõr mɨhnɨkɨ̃hɨ olak oshuu olak dospa per Porrosht Ɨchɨbich shuu olak aylpa.
\v 7 Uje ahakõrlo uhulo ɨtsorzni ich erze Porrosht aabo uje odebuhu wahacha hnɨmich Macedonia hn hnɨmich Acaya ochunt uje ahakõrlo hn oshiyokõr otseẽt olak.
\v 8 Erze eyok Ɨrhĩch ahwoso uje tãra olak hn oso otatɨmye ye shɨ hnɨmich Macedonia hn hnɨmich Acayape. Nos chũr lekɨtiyo. Nos oso lekɨtiyo ochɨraha olak uje ye otiislo Porroshtpe. Heke uje oyɨtɨ̃r wahachni ich ye nesit latɨk uje oyitɨm erze oso uje ode lekɨtiyo pork nos oso ochɨraha.
\v 9 Otatɨmyeehe lekɨtiyo uje oyaachɨ̃hɨchɨs olak dɨt wapni ich ahmũrlo õryok. Otatɨmye uje erze kojano po uje ehn eeychãhaloni eeylo olak porroshtɨhɨ ich moymloni par uje ahakõrlo erze ɨr ɨbiyo ese Porrosht pisht uje ich ũru hn ɨka.
\v 10 Erze oso shish otatɨmye uje olak shish anemlo Porrosht Ijɨt pisht uje tyenɨj cheeshpo nehe tãra poõrc. Wɨchɨ Jesús uje Porrosht shuu ɨkponi. Wɨchɨ Jesús uje ɨshɨ eyok hnɨtewɨhɨ Porrosht ahɨrkite par uje ye yɨtɨ̃r urhuta bahluta ehet nehe.
\c 2
\s Pablo chish obiyoho Tesalonicani.
\p
\v 1 Pɨshɨbo watsaklo, erahalo uje ehn oyekɨrɨhɨ olakni hn oyanɨmɨrãha Porrosht ahwoso ich tokole om pork ye otiislope.
\v 2 Uje ehn yahpaa oyɨtɨ̃r olak ich oyɨtɨ̃r ese dɨt Filipos wap. Oso uje ode wahacha oloter õryok hn ochiyuhu lahwoso mɨhnuwõho oryõkpo. Erahalo uje ɨtsorz. Per Porrosht takashɨm õryok, heke uje oyɨtɨ̃r olakni ich ye oyitɨlpe uje oyitɨm olak uje Jesús ɨshɨ olak hnɨtewɨhɨ Porrosht ahɨrkite. Wɨr odechɨ olak dɨt uje sehe onontew õryok per ye õr pwelpe
\v 3 pork ye oyanɨmɨrãha õryok ukushiĩpe. Uje oyanɨmɨrãha Porrosht ahwoso ich ye oyiyokõr oyuhu ɨtsorz par uje oyishew tɨmcher, hn ye par uje oyehnyẽr olak.
\v 4 Porrosht chiihla õryok par uje oyitɨm oso ɨr ahwoso. Oyitɨm oso uje Cristo ɨshɨ õr hnɨtewɨhɨ Porrosht ahɨrkite. Ye oyiyokõrpe par uje oyuhu oso otsahmũr õryok. Shɨ oyiyokõr pork Porrosht sahmũr uje oyiyokorãha õr oyuhu ɨtsorz. Porrosht wɨchɨ uje prowa kɨmɨjɨ dish uje õryok aho mɨhnũwo.
\v 5 Erahalo uje yelɨj oyiita õryok ahwoso uje ich ɨhɨ̃rts pisho shɨ par uje oyuhu asɨmlo õryok olak kuche. Yelɨj õryok aho yũhɨrsh par uje oyuhu asɨmlo õryok olak hnote. Porrosht chɨraha erze õryok ahwoso uje oyitɨm olak ich ũru.
\v 6 Yelɨj oyiyokõr kuche shɨ par uje oyuhu oso otata uje õryok ɨluu ich om hnii par uje ebɨtɨlo uje õryok ɨluu om, hnii par uje erze oso yewo ochɨbɨte uje ɨtsorz.
\v 7 Õryok Cristo ɨr apóstole, kɨrẽhe oyahmũr ich oyuhu akashɨmlo õryok kuche per ye oyapur olakpe. Shish oyɨnte olak. Shɨ oyuhu õryok ɨtso tɨmcharrza uje tɨbey deyjɨt.
\v 8 Uje õryok de olak ahɨrni ich oyahmũr pishɨ olak. Shɨ oyitɨm olak uje Jesucristo ɨshɨ eyok hnɨtewɨhɨ Porrosht ahɨrkite, hn oyosɨm õryok olak par uje oyakashɨm olak. Oyiyokõr oyuhu ɨtsorz shɨ pork oyahmũr olak.
\v 9 Pɨshɨbo watsaklo, olak eyucha uje ehn oyiyokorãha Porrosht ahwoso oyitɨm olakni uje Jesucristo ɨshɨ eyok hnɨtewɨhɨ Porrosht ahɨrkite ich oyishew obiyo toy ich oyiyuhu õryok par oyerz hnote par uje oyiya õryok poso. Oyishew obiyo deeych hn dɨhlak par uje ye oyapur olak posope.
\v 10 Olak uje ye otiislo Jesuspe uje õryok de olak ahɨrni ich amlo uje oyiyokõr hn Porrosht ɨtspo umponi. Shɨ oyiyokõr uje Porrosht sahmũr hn oyiyokõr uje ich om. Oso ye õr pwele õr denunsya õryok pork ye oyiyokõrpe uje mɨ̃hnɨk.
\v 11 Erahalo uje shish oyakɨt olak nohmɨr nohmɨr shɨ ɨtso hnakɨrbich uje sakɨt deyjɨt.
\v 12 Shish oyakɨt olak par uje shish ma ahmũrlo Porrosht hn oyitɨm olak par uje ahakõrlo uje ɨre sahmũr. Olak Porrosht aabo heke om uje ahakõrlo uje Porrosht aabo oshiyokõr. Porrosht chiihla olak hn shuu amsahalo par ɨre aabo hn tyenɨj ɨshɨm olak erze kuche uje de ɨre ahɨr nehe.
\v 13 Shish oyɨna Porrosht pork ahmũrlo uje oyitɨm olak. Erahalo erze õr ahwoso wɨr ye tãra hnakɨrbope. Shɨ tãra Porrosht heke shish shuu olak ɨluu ma om pork ye otiislo Jesuspe.
\v 14 Pɨshɨbo watsaklo, shɨ pork ye otiislo Porroshtpe heke olak ɨhnapso oshiyokõr mɨhnɨkɨ̃hɨ olak shɨ ɨtso uu Porrosht aabo uje ode wahacha hnɨmich Judea, õr ɨhnapso oshiyokõr mɨhnɨkɨ̃hɨ õrni. Wɨr israel oso.
\v 15 Wɨr uje oshuu eyok Ɨrhĩch Jesuskite hn uu õr poruwo wɨshɨ oshuu uu profeta poruwo wɨshɨ. Wɨr israel oso uje otsahna õryok. Wɨr uje ye oniyokõrpe uje Porrosht sahmũr. Ich otsɨtak nos wɨr dihipo.
\v 16 Heke shish sehe onontew õryok par uje ye oyitɨm erze dihipo kɨnãho õr Porrosht ahwoso uje Jesús ɨshɨ õr hnɨtewɨhɨ Porrosht ahɨrkite par uje omasaha par Porrosht aabo. Shish oshiyokõr uje ich mɨhnũwo. Terɨhɨ uhurc heke ele ahle ich Porrosht sepyẽr õr ich shuu dospa.
\s Pablo sehe tekɨrɨhɨ Porrosht aabopo uje ode Tesalónica.
\p
\v 17 Pɨshɨbo watsaklo, uje oso oshuu oyitokolɨhɨ olak ahɨrni ich shish sehe oyeeshɨ shɨchish. Ye õryok pwele oyumo olakpe per shish õryok eyucha olak. Shish sehe oyeeshɨ par uje oyeychɨm olak per ich ye õryok pwelpe.
\v 18 Õryok sehe oyuko oyɨtɨ̃r olak. Yok Pablo. Shish sehe takaha par uje tɨtɨ̃r olak per Satanás sontew õryok.
\v 19 Uje eyok Ɨrhĩch Jesucristo cheeshpo nehe ich eyok dechɨ ɨr ɨkɨch. Õryok aylehe wahacha pork ye otiislo erze Porrosht ahwoso uje oyitɨm olakni, heke oyitɨm Cristo nehe uje olak ye otiislo ɨr ahwoso uje oyitɨm olakni.
\v 20 Uje olak dechɨ nehe ich shuu õryok aylpa.
\c 3
\p
\v 1 Shish õryok eyuwo tɨsɨrɨ̃hɨ olak nehech ye õryok ewentpe uje ye oyɨraha kɨmɨjɨ shish ye otiislo Jesuspe. Heke oyɨbɨte par uje oyiyakahachɨs ese dɨt Atenas
\v 2 hn oyuhu Timoteo hno tɨ̃r olak. Wɨchɨ eyoklo leshap pork wɨchɨ Porrosht aap hn ɨr ɨbɨk toy. Ɨre sanɨmɨrãha Porrosht ahwoso tatɨm õr uje Cristo ɨshɨ õr hnɨtewɨhɨ Porrosht ahɨrkite. Oyuhu Timoteo hno par uje sakɨt olak par uje ma ye duhu otiislo Porrosht ahwoso hn par uje duhu ahakõrlo uje Porrosht sahmũr
\v 3 par uje deeych yet nehe uje mɨhnũwo tɨ̃r olak hnii olak nohmɨra ye moymlo erze Porrosht ahwoso. Ich erahalo erze kuche mɨhnũwo tyenɨj oshiyokorɨ̃hɨ eyoklo.
\v 4 Uje ehn õryok dechɨ olak ahɨrni ich shish oyitɨm olak uje tyenɨj oshiyokõr kuche mɨhnuwõho olak hn tokole ɨtsorz. Ich erahalo uje ɨtsorz.
\v 5 Uje ehn õryok eyuwo tɨsɨ̃r uje ye oyunt latɨkɨhɨ olakpe ich oyuhu õryok ihyẽt yet hno par uje tɨ̃r olak. Sehe oyɨraha kɨmɨjɨ shish ye otiislo Porroshtpe. Oyɨraha uje Satanás sehe niyokõr kuchẽrk par uje shuu moymlo erze ahwoso uje oyitɨm olak hn shuu moymlo Jesucristo. Kɨmɨjɨ wɨchɨ derz ich tyenɨj tokole uje õryok ɨbiyo ye jukur.
\p
\v 6 Per ele ahle hn Timoteo ich taachɨ̃hɨ lɨka õryok ahɨr. Tãra wahacha Tesalónica uje olak de. Tatɨm õryok erze ahwoso ɨhɨ̃rtso uje ye otiislo Porroshtpe. Shish ahmũrlo Porrosht. Tatɨm õryok uje shish olak eyucha õryok hn shish sehe eychɨmlo õryok. Õryok ɨtspo, sehe oyeychɨm olak.
\v 7 Pɨshɨbo watsaklo, kuche mɨhnũwo shish de ɨ̃rmo hn oso oshiyokõr mɨhnuwõho oryõk toy per uje oyunt uje Timoteo tatɨm õryok uje yesh ye otiislo Jesuspe ich shuu õryok aylpa.
\v 8 Ele ahle ich õryok aho kɨɨspa pork olak shish ye otiislo eyok Ɨrhĩchpe.
\v 9 Oyɨna Porrosht uje olak ɨtsorz pork shish uhulo õryok ayla. Porrosht umo uje ɨtsorz.
\v 10 Deeych hn dɨhlak shish õryok orar oyapur Porrosht par uje õryok pwele oyekɨrɨhɨ olakpo nehe par uje oyiyokorãha olak erze uje ye erahalo par uje ma ye otiislo Porrosht.
\p
\v 11 Oyapur Porrosht uu eyok Deych hn oyapur uu eyok Ɨrhĩch Jesús par uje takashɨm õryok par uje õryok pwele oyuko oyɨtɨ̃r olak.
\v 12 Oyapur eyok Ɨrhĩch par uje ma duhu ahmũrloye hn ahmũrlo erze yewo toy uhu ɨlo uje oyahmũr olak
\v 13 par uje Porrosht takashɨm olak hn ye olak koswãha ɨre hn ahakõrlo uje ɨre sahmũr. Deeych yet nehe uje eyok Ɨrhĩch Jesús cheeshpo hn nos wɨr Porrosht aabo uje otoni õya ɨre. Olak dechɨ toy Porrosht ɨle ɨkɨch. Nĩhyok kuche mɨhnũwo olak aho. Shɨ olak ɨluu om eyok Deych Porrosht ɨle ɨkɨch.
\c 4
\s Porrosht sahmũr uje ɨr aabo oshiyokõr.
\p
\v 1 Pɨshɨbo watsaklo, ẽrlo õryok. Oyiyokorãha olakni erze uje tyenɨj ahakõrlo uje Porrosht sahmũr hn shish ahakõrlo uhulo ɨlorz. Ele ahle eyok Ɨrhĩch Jesús shuu oyitɨm olak par uje ma ahakõrlo uhulo ɨtsorz.
\v 2 Erahalo erze eyok Ɨrhĩch Jesús ɨr ahwoso uje ɨre shuu oyiyokorãha olakni.
\v 3 Porrosht ye nahmũrpe uje yiyokõrlo uje mɨ̃hnɨk. Ich om uje hnakɨrbich umuhu nerãhta ahɨr hn ich ompo uje tɨmcharrza umuhu dabich ahɨr per ich mɨ̃hnɨk uje ye ohnoyhi pishye ahɨrpe hn shɨ omuhuye ahɨr. Ich mɨ̃hnɨk uje otorãhaye. Ich mɨ̃hnɨk uje tɨmcher tɨmcher õhyi yẽr ahɨr. Ich mɨ̃hnɨk uje hnakɨrbo hnakɨrbo õhyiye ahɨr. Ich mɨ̃hnɨk uje yeẽk sahat loshɨpɨt. Ich mɨ̃hnɨk uje yanak shuu loshɨpɨt sahat ɨre. Ich mɨhnɨ̃k uje pɨkɨhnino hn pɨkɨhnine oshiyokorɨ̃hɨye oshuu ɨtsorz toy.
\v 4 Oyitɨm olak oyuhu ɨtsorz pork kal olak nohmɨra tyenɨj chɨraha uje ich om par teyãha nerãhta pishta hn shiyokõr shuu ɨtsorz. Ye ompe shɨ hnoy wate hn ye tatɨm iisope. Ich shiyokõr uje mɨ̃hnɨk.
\v 5 Ye ompe shɨ teychɨm tɨmcharrza hn duhu deyuwo mɨhnũwo hn hnoy wate par ɨr ɨrãhto ɨtso erze oso uje ye odɨraha Porroshtpe oshiyokõr oshuu ɨtsorz.
\v 6 Ye ompe Porrosht aabo uje yeẽk iyuwe erze Porrosht ahwoso hn shɨ sehnyẽr Porrosht aabo yewo hn torãha nerãhta o torãha dabich pork eyok Ɨrhĩch tyenɨj nos sepyẽr erze oso uje oshiyokõr oshuu ɨtsorz. Wɨr erze Porrosht ahwoso uje shish oyitɨm olakni.
\v 7 Porrosht ye diihla eyokloni par uje yiyokõrlo uje mɨhnũwo. Chiihla eyokloni par uje yiyokõrlo uje ich om.
\v 8 Heke kɨmɨjɨ yeẽk chɨhɨ uje ye nahmũr uje oyiyokorãha olak ich sɨtak õryok. Per ye dɨtak oryõkpe, wɨchɨ sɨtak Porrosht pork erze õr ahwoso uje oyiita shɨ tãra Porrosht. Wɨchɨ uje ɨshɨm eyok Dechɨbich uje yelɨj niyokõr mɨ̃hnɨk.
\p
\v 9 Oyitɨm olak uje Porrosht aabo tyenɨj otsahmũrye, per ye nesita par uje oyitɨm ma oyuhu ɨtsorz pork oyɨraha uje Porrosht shiyokorãha olak par uje ahmũrloye.
\v 10 Ich ɨmeheeych ɨtsorz pork shish nos ahmũrlo erze Porrosht aabo yewo uje ode wahacha Macedonia. Pɨshɨbo watsaklo, oyitɨm olak par uje shish ma ahmũrlo õr.
\v 11 Shish uhulo olak aho kɨɨs, hn ahakõrlo olak ɨbiyo, hn ye alɨlo olak deshɨbo õr ɨbiyo ɨkiyo. Wɨr uje oyitɨm olakni
\v 12 par uje uhulo erze uje ye õr Porrosht aabope ochɨraha uje olak ɨluu ich om hn par uje olak pwele eylo uje olak nesita par uje ye etɨ̃rlo erze uje ye õr Porrosht aabope hn apurlo õr poso.
\s Jesús tyenɨj cheeshpo nehe.
\p
\v 13 Pɨshɨbo watsaklo, ich ye ompe uje ye erahalo uje Porrosht shiyokõr nehe par daabo uje otoni. Ye ompe uje eyerhlopa ahlɨlo õr hn uhu olak dosdarak ɨtso erze uje ye odɨraha Porroshtpe. Wɨr losuhlaabo pork nĩhyok õr owich wahacha Porrosht ahɨr.
\v 14 Yɨrahalo uje Jesús toni hn Porrosht shuu ɨkpo heke yɨrahalo uje Porrosht tyenɨj shuu erze uje otoni uje ye olotiis ɨrpe õya Jesús uje ɨre cheeshpo nehe.
\v 15 Erze uje oyitɨm olak wɨr uje eyok Ɨrhĩch tatni. Eyok uje yesh eyok ɨkaha nãhu ɨ̃rmo uje eyok Ɨrhĩch cheeshpo nehe ye yiyeebepe hn wɨr otsehe eyok nẽr erze Porrosht aabo uje otoni.
\v 16 Deeych yet nehe hn eyok Ɨrhĩch tokolɨhɨ wahacha poõrc par uje ihnɨmich hn tɨbich jwertpa hn ese anjele õr bahlut wɨchɨ tɨbich toy hn yeẽk sobɨta Porrosht ɨr trompeta. Wap erze topo uje ye olotiis Cristope tyenɨj õr ɨkpo.
\v 17 Porrosht tyenɨj seem eyok uje yesh eyok ɨka hn erze ɨr aabo uje õr ɨkpo hn hnoy eyoklo seya eyok Ɨrhĩch ahɨr poõrc pehet wahacha ukuhurrza eeych hn par uje shish yiyakahalo ahɨr.
\v 18 Atɨmlo õr erze ahwoso uje oyitɨm olakɨke par uje uhulo õr aho kɨɨs erze uje ohye topo.
\c 5
\p
\v 1 Pɨshɨbo watsaklo, ye nesit latɨk par uje oyitɨm olak par uje erahalo latɨk nehe hn Jesús cheeshpo.
\v 2 Ese deeych uje eyok Ɨrhĩch cheeshpo nehe ich shɨ ɨtso echɨkɨt uje taachɨ̃hɨ dɨhlak. Ye erahalo ortpe.
\v 3 Uje oso otata uje ye latɨk teye hn ich nos õr aho kɨɨspa ich tyenɨj mɨ̃hnɨk tɨ̃r õr shɨchish shɨ ɨtso uje tɨmcharrza chuuna ɨre uje ich ta par ijɨt shũrha. Ich dospa per ye pwele duhu erze ɨr dosɨ̃ryo sehepe. Erze mɨhnũwo tyenɨj tɨ̃r erze oso nehe shuu ɨtsorz.
\v 4 Pɨshɨbo watsaklo, olak ye olak ɨlo õrpe. Wɨr ye odɨraha Porroshtpe. Shɨ õr ɨtso uje odɨrkɨhɨ dɨhlak. Olak Porrosht aabo. Erahalo ɨshɨrĩt uje Cristo cheeshpo nehe, heke ye tarãha olak hnɨmichpe shuu as olak ɨbe shɨ ɨtso uje echɨkɨt taãcha. Per ye erahalo deeychtɨkɨhɨ uje Cristo taãcha.
\v 5 Nos erahalo Jesús ɨr ɨluu shɨ ɨtso uje luu chihit olak hn shɨ ɨtso uje deeych chihit olak. Ye eyok ɨlo erze uje ye odɨraha Porroshtpe. Wɨr shɨ õr ɨtso uje odɨrkɨhɨ dɨhlelta.
\v 6 Heke ye ompe yiyokõrlo yuhulo ɨtso erze uje ye odɨraha Porroshtpe. Wɨr shɨ õr ɨtso uje omo mahn eyok shɨ eyok ɨtso uje yɨrɨ̃hɨlo. Kɨmɨjɨ yiyokõrlo uje mɨ̃hnɨk ich shɨ ɨtso uje yumulo hn ɨtso uje yɨkɨch seyhi eyok.
\v 7 Erze uje ye odɨraha Porroshtpe shɨ õr ɨtso uje omo dɨhlak hn shɨ õr ɨtso uje dɨhlak hn yɨkɨch seyhi õr.
\v 8 Per eyok uje yɨraha Porrosht ich shɨ ɨtso uje deeych chihit eyok heke ye ompe uje yuhu eyok ɨtso uje yɨkɨch seyhi eyok ɨtso õr. Uje ye yotiislo Porroshtpe hn yahmũrloye hn yahmũrlo yewo ich eyok ɨtso ohyerptosht uje chɨbɨte fyerɨt derjorrza par tɨbey ɨre. Hn uje yelɨj yɨkeylo uje eyoklo owich de Porrosht ahɨr ich shɨ eyoklo ɨtso ohyerptosht uje iyãha dolt par uje tɨbey ɨre.
\v 9 Porrosht ye dɨbɨtpe par uje yɨtɨ̃rlo urhuta bahluta ehet nehe. Chɨbɨte par uje tyenɨj yaachɨ̃hɨlo ɨr ahɨr nehe shɨ pork ye yotiislo eyok Ɨrhĩch Jesucristope.
\v 10 Ɨre tooho eyokkite heke kɨmɨjɨ yɨtɨlo nehe o kɨmɨjɨ ye yɨtɨlope per je deeych yet nehe ich yebuhulo Cristo ahɨr.
\v 11 Erze uje oyitɨm olakɨke ich tyenɨj atɨmlo erze Porrosht aabo yewo toy par uje uhulo õr aho kɨɨs. Atɨmlo õr par uje ma ye olotiis Porrosht uhulo ɨtso uje yesh ahakõrlo.
\s Porrosht aabo tyenɨj otola ɨr bahluwo.
\p
\v 12 Pɨshɨbo watsaklo, oyitɨm olak par uje atɨlɨlo erze olak bahluwo uje Porrosht chɨbɨte õr par uje otɨbey olak pork olak Porrosht aabo. Wɨr uje tyenɨj otsakɨt olak.
\v 13 Ahakõrlo uje otata hn ahmũrlo õr. Erze obiyo uje wɨr oshiyokõr ich ɨhɨ̃rtso pisho. Nos uhulo olak aho kɨɨsɨhɨye.
\v 14 Pɨshɨbo watsaklo, oyitɨm olak par uje akɨtlo erze uje ye onahmũr odishew obiyope par uje odishew obiyo. Atɨmlo erze uje õr dosdarak par uje uhulo õr aho kɨɨs. Akashɨmlo erze uje hnii omasaha par Porrosht aabo par uje ma ye olotiis ɨre, hn shish enthɨlo oso.
\v 15 Abeylshɨp olak. Uje yeẽk shiyokõr mɨhnɨkɨ̃hɨ leshɨbich ich ye diyuhu labahat. Shish ahakõrlo omɨhɨye hn ahakõrlo om par nos wɨr oso toy.
\v 16 Shish uhu olak aho kɨɨs,
\v 17 hn shish olak orar apurlo Porrosht.
\v 18 Shish asɨmlo Porrosht hnechɨt par nos wɨr kuche pork Porrosht sahmũr uje ɨtsorz pork olak ye otiislo Jesucristope.
\v 19 Ye ontɨlo Porrosht Ɨchɨbich ɨr ɨbiyo uhulo ɨtso uje yeẽk sẽhi jwekɨta.
\v 20 Ye athɨlo uje ye jukur erze profeta ɨr ahwoso.
\v 21 Nos uhulo olak eyuwo tɨsɨ̃r kɨmɨjɨ ich ũru erze uje otata o kɨmɨjɨ ye ũrpe. Erze uje ich ũru wɨr par olak.
\v 22 Nos ahamlo wɨr kuche mɨhnũwo.
\v 23 Porrosht wɨchɨ uje shuu oso õr aho kɨɨs. Sehe oyuhu nos diyuhu erze mɨhnũwo uje de olak aho. Sehe oyuhu ɨre nuhrũ erze olak ɨluu mɨhnũ uje de olak aho. Sehe oyuhu Porrosht tɨbey olak ɨchɨbiyo hn olak eyuwo hn olak yũhur. Uje tɨbey olak ɨtsorz hn uje eyok Ɨrhĩch Jesucristo cheeshpo nehe ich nĩhyok uje mɨ̃hnɨk de olak.
\v 24 Porrosht wɨchɨ uje chiihla olak par uje amsahalo par ɨr aabo. Wɨchɨ shish shiyokõr uje ɨre tata heke tɨbey olak aho par uje shuu om.
\s Pablo ɨshɨm õr saludo.
\p
\v 25 Pɨshɨbo watsaklo, sehe oyuhu olak orar apurlo Porrosht par uje takashɨm õryok.
\v 26 Nos asɨmlo Porrosht aabo yewo õr saludo hn ekulo õr ũr uhulo ɨtso uje etɨloye.
\v 27 Eyok Ɨrhĩch shuu titɨm olak par uje olak ler ana hutɨta par uje nos wɨr Porrosht aabo otẽr.
\v 28 Sehe oyuhu eyok Ɨrhĩch Jesucristo dosɨr olak.