\id 2TH Chamacoco NT - Paraguay 2000 (web 2013)
\h 2 Tesalonicenses
\toc1 2 Tesalonicenses
\toc2 2 Tesalonicenses
\toc3 2Te
\mt1 2 Tesalonicenses
\c 1
\s Pablo ɨshɨm Porrosht aabo õr saludo.
\p
\v 1 Yok Pablo. Silvano hn Timoteo ode lɨka pahɨr. Oyichew ana hutɨta par oyosɨm olak uje olak Porrosht aabo uje olak dechɨ dɨt Tesalónica. Porrosht wɨchɨ uu olak Deych, hn Jesucristo wɨchɨ olak Ɨrhĩch.
\v 2 Sehe oyuhu Porrosht uu eyok Deych hn eyok Ɨrhĩch Jesucristo odosɨr olak hn oduhu olak aho kɨɨs.
\s Porrosht aabo tyenɨj oshuu deluu om par yewo otseẽt õr.
\p
\v 3 Pɨshɨbo watsaklo, oyɨraha uje amsahalo par Porrosht aabo tenitni ich shɨ ye otiislo ɨrpe per ele ahle ich ma ye otiislo ɨrpe hn ma ahmũrloye heke shish oyɨna Porrosht par olak.
\v 4 Hn õryok aho kɨɨs uje oyitɨm Porrosht aabo yewo uje ode lekɨtiyo uje ye otiislo Porrosht hn ye moymlo ɨrpe uje oso oshiyokõr mɨhnɨkɨ̃hɨ olak. Shɨ olak ewenta
\v 5 heke ich ɨmeheeych uje Porrosht shiyokõr om uje chiihla olakni. Par Porrosht ich om uje etɨ̃rlo wahacha ɨr ahɨr nehe pork olak ewenta erze mɨhnũwo uje oso oshiyokorɨ̃hɨ olak.
\p
\v 6 Wɨchɨ ɨr ɨluuta om heke tyenɨj shuu oshɨ labahat nehe erze uje oshiyokõr mɨhnuwõho olak.
\v 7 Uje eyok Ɨrhĩch Jesús cheeshpo nehe hn Porrosht ye duhu mɨhnũwo tɨ̃r olak hn ye duhu tɨ̃r oryõkpe. Ich sontew erze mɨhnũwo shuu ɨtsorz. Uje wɨchɨ tãra poõrc nehe ich jwekɨta data ĩya ɨre hn Porrosht ɨr anjele õya ɨre toy uje õr ukurbo deyo de.
\v 8 Porrosht tyenɨj sepyẽr erze uje ye odɨraha ɨrpe hn otsotiis eyok Ɨrhĩch Jesús ɨr ahwoso uje tata uje ɨre ɨshɨ õr hnɨtewɨhɨ Porrosht ahɨrkite.
\v 9 Par sepyẽr õr ich tyenɨj shuu omasaha asa urhuta bahluta ehet uje ich dospa. Shish odechɨ hn yelɨj onɨhna ɨre. Wɨr shish odechɨ odukulehe eyok Ɨrhĩch. Ich ye onomope erze uje ich ɨhɨ̃rtso pisho uje Porrosht shiyokõr chɨ̃ra dakɨrbo.
\v 10 Uje terɨhɨ ese deeych uje eyok Ɨrhĩch cheeshpo nehe ich ɨhɨ̃rtpa par ɨre pork nos wɨr Porrosht aabo odechɨ ɨr ahɨr. Nĩhyok kuche mɨhnũwo õr aho. Tyenɨj omo ɨre hn oteychɨm hn ich oteeychãha. Wɨr uje ye olotiis ɨrpe. Olak ye otiislope erze ahwoso uje oyitɨm olakni, heke olak dechɨ õr ahɨr toy.
\v 11 Hn shish õryok orar oyapur Porrosht par olak par uje Porrosht nɨshii erze olak ɨluu pork wɨchɨ uje chiihla olak par shuu olak ɨluu ich om. Oyapur Porrosht par uje takashɨm olak chɨ̃ra dakɨrbo par uje tokole om erze uje sehe ahakõrlo shɨ pork ye otiislo ɨrpe.
\v 12 Oyapur Porrosht oyuhu ɨtsorz par erze uje ahakõrlo shuu oso ochɨraha uje eyok Ɨrhĩch Jesús ich dich. Kɨmɨjɨ erze olak ɨbiyo tokole ɨtsorz hn Porrosht tyenɨj shuu olak deyo toy. Tyenɨj tokole ɨtsorz pork Porrosht takashɨm olak hn eyok Ɨrhĩch Jesucristo ɨtspo takashɨm olak.
\c 2
\s Yar tyenɨj tokole wap uje Jesús cheeshpo nehe.
\p
\v 1 Pɨshɨbo watsaklo, ele ahle sehe oyitɨm olak erze uje tyenɨj tokole wap nehe uje eyok Ɨrhĩch Jesucristo cheeshpo hn shuu yakɨshlo eyoklo owichɨhɨ lahɨr. Titɨm olak par uje erahalo
\v 2 uje yeẽk taãcha hn tata uje Cristo taãchhna ich ye as olak ɨbe hn ye uhu olak eyuwo kɨnãho. Kɨmɨjɨ yeẽk tata uje Porrosht Ɨchɨbich tatɨm ɨre uje eyok Ɨrhĩch taãchhna, o kɨmɨjɨ shɨ otatɨm olak o kɨmɨjɨ otõhwa hutɨta kɨnaha uje ochichew oshuu tãra yok uje otata otsɨɨ: —Uu Ɨrhĩch taãchhna—
\v 3 per ye uhulo onehnyẽr olak. Uje ehn yahpaa Cristo taãcha ich oso okɨhniya tyenɨj oym Porrosht nehe, hn hnakɨrbich nohmet uje ye nahmũr Porrosht ɨr ley tyenɨj de nehe. Wɨchɨ uje Porrosht chɨbɨte lahwoso par uje deeych yet nehe hn chɨbɨte urhuta bahluta ehet.
\v 4 Wɨchɨ hnakɨrbich sehe nontew erze uje oteeychãha Porrosht hn sehe nontew erze uje oteeychãha kojano po ochii ɨr porroshtɨhɨ. Sehe duhu ɨre ma dich je Porrosht hn sehe duhu ɨre ma dich je nos wɨr yewo uje oso oteeychãha ochii ɨr porroshtɨhɨ. Tyenɨj masaha erze israel oso õr templo ehet nehe hn sakaha hn tatɨm oso ɨm: —Yok uu Porrosht.—
\v 5 Uje ehn yok de olak ahɨrni hn titɨm olak ese hnakɨrbich. ¿Je ekeylo?
\v 6 Olak yesh erahalo ese uje sontew ɨre par uje ye tokolpe. Ye tokolpe nehech terɨhɨ ese ɨshɨrĩt nehe par uje ɨre tokole.
\v 7 Erze obiyo uje mɨhnũwo yesh oshiyokõr per shɨ otsakɨs ɨre. Ich ye ɨmeheeychpe pork ese uje sontew ɨre shish dechɨ. Ese uje sontew ɨre tyenɨj tokole nehe
\v 8 hnii ese hnakɨrbich tokole uje ɨluuta mɨhnũ. Uje eyok Ɨrhĩch Jesús cheeshpo nehe ich tyenɨj shuu ese hnakɨrbich chɨ̃ra dehyerc. Jesús tyenɨj hũrpa uje cheeshpo nehe hn uu ɨr yokõrt tyenɨj sɨhna ese hnakɨrbich.
\v 9 Uje terɨhɨ ɨshɨrĩt ɨchii ese hnakɨrbich uje ɨluuta mɨhnũ tokole pork Satanás takashɨm ɨre. Ɨshɨm ukurbo ich kɨhniya par uje pwele shiyokõr kuche uje ye latɨk pwele niyokõr. Shiyokõr par shuu oso õr eyuwo tɨsɨ̃r uje ɨr ukurbo de hn par shuu oso ochishlabe.
\v 10 Nos shiyokõr kuche kɨhniya uje ich mɨhnũwo shɨ par sehnyẽr oso uje tyenɨj otɨ̃r urhuta bahluta ehet nehe pork ye onahmũrpe Porrosht ahwoso uje ich ũru uje tata uje Jesús ɨshɨ õr hnɨtewɨhɨ Porrosht ahɨr par uje õr owich dechɨ Porrosht ahɨr.
\v 11 Erze oso uje õr ɨluu mɨhnũ ye onahmũr Porroshtpe heke Porrosht tyenɨj shiyokõr kuche par shuu õr eyuwo tɨsɨ̃r uje ese hnakɨrbich tata uje ich ũru per shɨ tata lekushiĩ.
\v 12 Porrosht shiyokõr shuu ɨtsorz pork chɨbɨte lahwosni uje nos wɨr oso uje ye onahmũrpe ɨr ahwospe uje ich ũru wɨr tyenɨj otɨ̃r urhuta bahluta ehet nehe. Shɨ otsahmũr mɨhnũwo.
\s Porrosht chiihla laabokite par uje otɨ̃r ɨre ahɨr nehe.
\p
\v 13 Pɨshɨbo watsaklo, eyoklo Ɨrhĩch sahmũr pishɨ olak. Shish oyɨna Porrosht par olak, pork Porrosht chiihla olak uje ehn yahpaa niyokõr ɨrmõkite. Shɨ pork ye otiislo Porrosht ahwospe uje ich ũru hn Porrosht Ɨchɨbich churhũ erze mɨhnũwo uje de olak aho heke olak owich de Porrosht ahɨr.
\v 14 Shɨ pork oyitɨm olak uje Jesús ɨshɨ eyok hnɨtewɨhɨ Porrosht ahɨrkite hn ye otiislo heke Porrosht chiihla olak par uje ɨshɨm olak erze om uje de eyok Ɨrhĩch Jesucristo ahɨr.
\v 15 Pɨshɨbo watsaklo, ye ekeylo hn ye moymlo erze ahwoso uje tãra Porrosht uje oyiyokorãha olakni kɨmɨjɨ oyitɨm olak o kɨmɨjɨ oyichew oyɨbɨte hute.
\v 16 Sehe oyuhu eyok Ɨrhĩch Jesucristo hn eyok Deych Porrosht otakashɨm olak. Wɨr uje otsahmũr pishɨ eyoklo heke otsõsɨr eyoklo uje shish oshuu eyoklo aho kɨɨs. Wɨr oshuu yɨrahalo uje eyoklo owich de õr ahɨr.
\v 17 Sehe oyuhu eyok Ɨrhĩch Jesucristo hn eyok Deych Porrosht oduhu olak aho kɨɨs hn oduhu olak duurapo par uje nos wɨr kuche uje ahakõrlo tokole om, hn par uje nos wɨr olak ahwoso uje atɨmlo yewo ich tokole om.
\c 3
\s Pablo sehe duhu õr orar olapur Porrosht par ɨre.
\p
\v 1 Pɨshɨbo watsaklo, ich uhurc uje oyichew oyɨbɨte ana hutɨta par olak. Sehe oyuhu olak orar apurlo Porrosht par õryok par uje erze eyok Ɨrhĩch ɨr ahwoso nũr lekɨtiyo shɨchish hn ye olotiis shɨ ɨtso olak uje ahmũrloni.
\v 2 Apurlo ɨre par uje ye wɨr hnakɨrbo uje õr ɨluu mɨhnũ odishew õryok, pork shish ode uje ye onahmũr Porrosht ahwospe.
\v 3 Eyok Ɨrhĩch ɨr ahwoso shish yakaha, heke shuu olak duurapo hn tɨbey olak par uje ye Satanás niyokõr mɨhnɨkɨ̃hɨ olak.
\v 4 Ye oyotiis uje shish Porrosht takashɨm olak par uje shish ahakõrlo erze uje oyitɨm olak.
\v 5 Sehe oyuhu eyoklo Ɨrhĩch Jesucristo duhu erahalo ma uje Porrosht sahmũr olak hn duhu olak ewenta erze mɨhnũwo shɨ ɨtso uje Cristo ewenta erze uje oso oshiyokorɨ̃hɨ ɨrni.
\s Porrosht chɨbɨte par nos ochishew obiyo.
\p
\v 6 Pɨshɨbo watsaklo, eyoklo Ɨrhĩch Jesucristo sehe duhu oyitɨm olak par uje moymlo ese olak leshɨbich uje ich tok hn ye niyokõrpe uje oyitɨm olak. Erze Porrosht ahwoso wɨr uje oyitɨm olakni.
\v 7 Uje ehn õryok de olak ahɨrni erahalo uje shish oyishew obiyo par oyiya õryok poso par uje eychɨmlo uje oyiyokõr hn ahakõrlo uhulo ɨtso õryok.
\v 8 Shish oyiya oposo par uje oyahu. Deeych hn dɨhlak õryok shish oyishew obiyo par uje ye oyuhu asɨmlo õryok kuche.
\v 9 Kɨrẽhe oyahmũr ich oyapur olak par uje akashɨmlo õryok per ye oyapur olakpe. Õryok shish oyishew obiyo par uje eychɨmlo hn ahakõrlo uhulo ɨtso õryok.
\v 10 Uje ehn õryok dechɨ olak ahɨrni hn oyitɨm olak oyuhu ɨtsorz: —Kɨmɨjɨ yeẽk chɨhɨ uje ye nahmũr dishew obiyope ich ye ompe par uje taak.—
\v 11 Oyitɨm olak oyuhu ɨtsorz pork oyunt uje olak yewo ye onahmũr odishew obiyope. Shɨ olale leshɨbo õr ɨbiyo ɨkiyo.
\v 12 Eyoklo Ɨrhĩch Jesucristo shuu oyitɨm erze oso uje ye onahmũr odishew obiyope par uje odishew obiyo hn oduhu daho kɨɨs. Uje odishew obiyo oduhu ɨlorz hn õr pwele otiya dabɨso uje otew.
\v 13 Pɨshɨbo watsaklo, ye ermtsɨrlo uje akashɨmlo yewo pork om uje ahakõrlo uhulo ɨtsorz.
\v 14 Uje yeẽk chɨhɨ olak ehet uje ye nahmũr niyokõr uje ana hutɨta tata uhulo nos odɨraha hn ye mẽylo par uje uhulo pook.
\v 15 Ye eylo olak ɨmãha. Shɨ tyenɨj akɨtlo ɨre pork wɨchɨ Porrosht aap toy.
\s Pablo orar par Porrosht aabo.
\p
\v 16 Eyoklo Ɨrhĩch wɨchɨ uje shuu oso õr aho kɨɨs. Sehe tuu ɨre shish duhu olak aho kɨɨs toy. Uje kuche mɨhnũwo tɨ̃r olak sehe ɨre shish duhu olak aho kɨɨs. Sehe oyuhu eyok Ɨrhĩch shish nõya olak.
\v 17 Yok Pablo. Tichew tɨbɨte ana hutɨta uhurc par uje erahalo uje asa hutɨta tãra yok. Erze yok piche uje tɨbɨte asa hutɨta shuu ɨmeheeych uje yok. Shish nos tɨbɨte hute uhurc tuu ɨtsorz. Tokosɨm olak saludo.
\v 18 Sehe tuu eyok Ɨrhĩch Jesucristo shish nos takashɨm olak.