\id 1TI Chamacoco NT - Paraguay 2000 (web 2013)
\h 1 Timoteo
\toc1 1 Timoteo
\toc2 1 Timoteo
\toc3 1Ti
\mt1 1 Timoteo
\c 1
\s Pablo ɨshɨm Timoteo saludo.
\p
\v 1 Yok Pablo. Porrosht shuu tomsaha par Jesucristo ɨr apóstol. Porrosht shuu Jesucristo tɨrẽt par ɨshɨ eyok hnɨtewɨhɨ Porrosht ahɨr par uje eyok owich dechɨ ɨre ahɨr. Jesucristo sahmũr toy uje tomsaha par yok ɨr apóstol.
\v 2 Timoteo, tuu ochichew ana hutɨta tokosɨm owa. Owa shɨ owa ɨtso uje pijo pork titɨm owa erze Porrosht ahwosni hn amsaha par ɨr aap. Sehe tuu eyok Deych Porrosht hn eyok Ɨrhĩch Jesucristo odosɨr owa. Sehe tuu onuuna uje owa losuhlaap hn otakashɨm owa hn oduhu ehet kɨɨs.
\s Ode uje oshiyokorãha õr dekushiĩ.
\p
\v 3 Uje ehn yahpaa tɨtɨ̃r hnɨmich Macedonia petɨkni hn titɨm owa par uje shɨ akahachɨ dɨt Efeso. Sohmɨramo odechɨ uje otsanɨmɨrãha dekushiĩ par uje otsehnyẽr erze oso. Tyenɨj atɨm õr par uje onoym wɨr dekushiĩ.
\v 4 Atɨm õr par uje ye shɨ oduhu deyuwo tɨsɨ̃r monɨhne, hn ye oduhu deyuwo tɨsɨ̃r erze eyok poruwo wɨshɨ. Erze monɨhne hn erze eyok poruwo wɨshɨ õr ahwoso shɨ shuu oso õr koswãha Porrosht hn ye takashɨm osope par uje ma ochɨraha Porrosht ahwoso par uje ma ye olotiis ɨrpe.
\v 5 Nos wɨr Porrosht ahwoso uje oyanɨmɨrãha wɨr par nos shuu oso otsahmũrye. Uje oduhu daho yũhursh ich ye õr pwele onahmũryepe. Tyenɨj oduhu deyuwo tɨsɨ̃r par uje õr aho kɨɨsɨhɨye, hn oduhu Porrosht ahwoso yakaha par uje shish ye olotiis ɨrpe.
\v 6 Ode uje shɨ oym erze ahwoso uje ich ũru hn shɨ okeytkeryẽhe erze ahwoso uje ye jukur par õr ɨre.
\v 7 Sehe oniyokorãha oso waa ley waa je Porrosht ɨshɨm Moiseskite, per õr ɨre yerɨj odɨrahapa uje oshiyokorãha oso. Uje oshiyokorãha õr ich oshuu ɨre ɨtso uje ochɨraha.
\p
\v 8 Oyɨraha uje asa ley ich ɨhɨ̃r. Porrosht chɨbɨte asa ley par erze obiyo uje ich ɨhɨ̃rtso, per ye ompe uje wɨr ochɨbɨte par obiyo kɨnãho.
\v 9 Yɨrahalo uje ye dɨbɨte leype par erze oso uje yelɨj oniyokõr uje mɨhnũwo. Chɨbɨte ley par sontew erze uje ye oniyokõrpe asa uje ley tata. Chɨbɨte asa ley par sontew erze uje ye onahmũr oshiyokõr uje yewo otata, hn par erze uje ye onahmũr Porroshtpe, hn par erze uje shish oshiyokõr uje mɨhnũwo, hn par erze uje ye otola Porroshtpe, hn par erze uje ye onahmũr oteeychãha Porrosht, hn chɨbɨte par erze uje oshuu deyo oshuu otoy, hn par erze uje oshuu date oshuu otoy, hn par erze uje oshuu oso oshuu otoy.
\v 10 Chɨbɨte ley par sontew erze uje ye onõyhi pishye ahɨrpe. Shɨ omuhuye ahɨr, hn erze uje shɨ otorãhaye, hn chɨbɨte par sontew erze hnakɨrbo uje õyhiye ahɨr, hn par sontew erze uje otorha oso par õr yɨlo, hn par erze uje õr kushĩyo, hn sontew erze uje shɨ otata lekushiĩ otatɨm jwe par oshuu jwe shiyokõr uje mɨhnɨkɨ̃hɨ yet. Chɨbɨte ley par nos wɨr kuche yewo uje oshiyokõr wɨr uje oyuwe Porrosht ahwoso.
\v 11 Ahnũwo Porrosht ahwoso ich om hn ich om uje oso oteeychãha ɨre. Ɨshɨm yok par uje tanɨmɨrãha titɨm oso uje Jesús ɨshɨ õr hnɨtewɨhɨ Porrosht ahɨrkite par uje õr owich dechɨ ɨre ahɨr.
\s Pablo nɨnshɨp Porrosht uje takashɨm ɨre.
\p
\v 12 Tɨkɨnshɨp eyok Ɨrhĩch Jesucristo uje ɨshɨm yok pukurbo par tanɨmɨrãha ɨr ahwoso. Wɨchɨ chɨraha wapni uje tyenɨj tiyokõr om erze ɨr ɨbiyo heke ɨshɨm yok par uje tiyokõr.
\v 13 Uje ehn yahpaa tomsaha par Porrosht aap ich tiyuhu pahwoso mɨhnuwõho Cristo, hn shish tiyokõr mɨhnuwõho ɨre pork tiyokõr mɨhnuwõho Porrosht aabo. Pɨluuta ich mɨhnũpa. Per Porrosht chuuna uje yok losuhlaap hn sosɨr yok pork ye tɨkɨraha uje tiyokõr hn tokotiis uje Jesús wɨchɨ uu Porrosht Ijɨt.
\v 14 Eyok Ɨrhĩch Jesucristo takashɨm pishɨ yok hn ye duhu tokotiis ɨrpe hn shuu tahmũr oso pork tomsaha par yok Porrosht aap.
\v 15 Sehe titɨm owa uje ich ũru. Ich ma om uje nos oso ye olotiis erze õr ahwoso uje sehe titɨm owa. Uje ehn oso shish oshiyokõr mɨhnũwo ɨrmõni hn Jesucristo tɨrẽt tɨ̃r nãhu ɨ̃rmo hn ɨshɨ õr hnɨtewɨhɨ Porrosht ahɨr. Uje ehn yahpaa tomsaha par Porrosht aapni ich tiyokõr ma mɨhnũwo je erze oso yewo.
\v 16 Porrosht chuuna uje yok losuhlaap hn sosɨr yok par uje shuu ochɨraha uje Jesucristo pwele ewenta erze uje oshiyokõr mɨhnũwo. Shɨ iyem õr nehech terɨhɨ ɨshɨrĩt nehe uje ye olotiis ɨrpe hn ɨshɨm õr ese ɨkɨrĩt uje yelɨj nɨhna ɨre.
\v 17 Sehe tuu shish oduhu Porrosht dich hn shish tyenɨj otola ɨre. Porrosht wɨchɨ uu rey uje yelɨj nɨhna ɨre. Shish ɨka. Yelɨj onomo. Wɨchɨ shɨ sohmɨra. Nĩhyok Porrosht yet. Ahnũwo ahwoso ich om par oso ochɨraha.
\p
\v 18 Timoteo, shɨ owa ɨtso uje pijo. Ele ahle titɨm owa uje tyenɨj ahakõr nehe. Erze uje titɨm owaka wɨr shɨ ɨtso uje Porrosht aabo otatɨm owani par uje ahakõr. Kɨmɨjɨ ahakõr uje titɨm owa ich tyenɨj tokole om erze Porrosht ɨbiyo uje ɨshɨm owa par uje ahakõr.
\v 19 Ahakõr uhu ɨlorz hn ye otiis Porrosht hn ye uhu ehet yũhurash. Ode uje ye onahmũr onuuna uje oshiyokõr mɨ̃hnɨk nehech uhurc ich otsotiis Cristo.
\v 20 Himeneo hn Alejandro oshiyokõr oshuu ɨtso õr heke tokosɨm õr Satanás par uje sepyẽr õr par uje tuu ochɨraha uje ye ompe ochiyuhu lahwoso mɨhnuwõho Porrosht.
\c 2
\s Timoteo tyenɨj shuu Porrosht aabo õr orar.
\p
\v 1 Sehe tuu atɨm Porrosht aabo uje õr orar olapur Porrosht par erze uje oso yewo õr nesita hn tyenɨj onɨna Porrosht par takashɨm õr.
\v 2 Hn tyenɨj olak orar toy par erze õr bahluwo uje õr deyo hn par erze wɨmshɨro toy par uje ye odihokos eyok heke shish eyok aho kɨɨs hn eyoklo pwele yeeychãhalo Porrosht hn yiyokõrlo uje om.
\v 3 Uje eyok orar yuhulo ɨtsorz ich ɨhɨ̃rt. Porrosht sahmũr uje yiyokõr yuhulo ɨtsorz. Wɨchɨ uje ɨshɨ eyok hnɨtewɨhɨ dahɨrkite.
\v 4 Wɨchɨ sahmũr uje nos oso omasaha par ɨr aabo, hn sahmũr uje nos ochɨraha ɨr ahwoso uje ich ũru.
\v 5 Shɨ Porrosht nohmɨra de. Nĩhyok ye Porrosht kɨnehẽtɨkɨsh. Shɨ ese hnakɨrbich Jesucristo wɨchɨ uje shuu Porrosht ehet kɨɨsɨhɨ oso.
\v 6 Ɨshɨm õr ɨre par toy par nos ɨshɨ õr hnɨtew. Osdeyo uje shiyokõr shuu ɨtsorz heke nos otatɨm oso ɨr ahwoso uje Cristo ɨshɨ oso õr hnɨtewɨhɨ Porrosht ahɨr.
\v 7 Heke Porrosht chiihla yok par yok ɨr apóstol hn par tanɨmɨrãha ɨr ahwoso. Erze ahwoso uje titɨm owa ich ũru. Ye tehnyẽr owape. Porrosht ɨshɨm yok erze obiyo par uje tiyokorãha erze oso uje ye õr israelpe par uje ye olotiis Porroshtpe hn par uje ochɨraha uje ich ũru.
\v 8 Sehe tuu nos hnakɨrbo uje ode lekɨtiyo Porrosht aabo õr ehet õr orar olapur Porrosht. Wɨr uje ye oniyokõr mɨhnũwo hn ye onowãhaye hn ye odihokosye par uje sehe oteye. Ich onem nahme uje õr orar pork shɨ õr ɨluu.
\p
\v 9 Sehe tuu erahalo uje ich om uje tɨmcher uje õr Porrosht eebe otsarz ɨre oyãha lasuwo uje ich om par õr ɨre, per ye ompe uje oyãha lasuwo uje ich om shɨ par uje shuu hnakɨrbo otsahmũr ɨre. Hn om uje tɨmcher otsarz dehe per ye ompe uje otsarz oshuu ɨre ɨhɨ̃r pishɨ shɨ par uje shuu hnakɨrbo otsahmũr ɨre. Ich om toy uje ochɨbɨte oro, kɨmɨjɨ otuuhna o kɨmɨjɨ odiyuwa nar o kɨmɨjɨ kuche yewo per ye ompe uje ochɨbɨte oshuu ɨtsorz shɨ par uje shuu hnakɨrbo otsahmũr ɨre. Hn om toy uje oyãha erze õr ɨshuwo uje ich debichpa per ye ompe uje oyãha shɨ par uje shuu hnakɨrbo otsahmũr ɨre.
\v 10 Erze tɨmcher uje otata uje õr Porrosht eebe tyenɨj oshiyokõr obiyo uje ich om par oshuu ɨmeheeych uje õr ɨluu om.
\v 11 Erze tɨmcher tyenɨj otẽr uje otsanɨmɨrãha Porrosht ahwoso hn ye odiilehet. Tyenɨj otola Porrosht aabo õr bahluwo.
\v 12 Ye ompe uje tɨmcharrza shiyokorãha hnakɨrbo, hn ye ompe uje masaha par õr bahluwa hn chɨpa hnakɨrbo. Shɨ tyenɨj ye diilehet
\v 13 pork wapkite hn Porrosht shiyokõr Adán. Uje chɨmɨtkite hn shiyokõr Eva.
\v 14 Satanás ye nehnyẽr Adankite. Shɨ sehnyẽr asa tɨmcharrza Eva hn shuu shiyokõr uje ich mɨhnũwo.
\v 15 Heke Porrosht sepyẽr tɨmcher hn shuu õr dospa uje õr aabosh, per shish tyenɨj õr aabosh, hn õr owich de Porrosht ahɨr kɨmɨjɨ ye olotiis Jesús, hn kɨmɨjɨ otsahmũr oso yewo, hn kɨmɨjɨ otsahmũr Porrosht hn kɨmɨjɨ otɨbey ɨre par uje ye oniyokõr uje mɨhnũwo.
\c 3
\s Yeẽkpo uje om par Porrosht aabo õr bahluwa.
\p
\v 1 Ahnũwo uje sehe titɨm owa ich ũru. Uje yeẽk sehe masaha par Porrosht aabo õr bahluwa, wɨchɨ sehe dishew erze obiyo uje ich ɨhɨ̃rtso.
\v 2 Heke hnakɨrbich uje masaha par Porrosht aabo õr bahluwa tyenɨj ɨr ɨluuta om par uje nĩhyok yet pwele tata uje wɨchɨ shiyokõr uje mɨ̃hnɨk. Wɨchɨ shɨ shuu nerãhta nohmɨra, hn shish kemɨhɨ kuche. Shuu deyuwo tɨsɨr wap par uje ɨr ɨbiyo tokole om. Ich nos ochɨraha uje wɨchɨ ɨluuta om heke otola ɨre. Shish tyenɨj sahmũr oso uje otekɨrɨhɨ ɨre, hn tyenɨj chɨraha uje sanɨmɨrãha Porrosht ahwoso.
\v 3 Ye duhu yɨkɨch nẽhi ɨre, hn ye disdelo per shish tyenɨj duhu dehet kɨɨs. Yelɨj dihokos oso hn ye pota hnote.
\v 4 Shish tɨbey deyso uje ode ihyuch par uje ye oniyokõr uje mɨ̃hnɨk, hn tɨbey daabo par uje ye oniyokõr uje mɨhnũwo, hn ɨr aabo otola ɨre hn oshiyokõr uje tatɨm õr.
\v 5 Kɨmɨjɨ yeẽk chɨhɨ uje ye dɨraha tɨbey nerãhta hn daabo hn deyso uje odebuhu ihyuch, ¿ich duhu ɨnaapo par uje tɨbey Porrosht aabo?
\v 6 Uje yeẽk hnii masaha par Porrosht aap ich ye ompe uje ochɨbɨte ɨre par õr bahluwa. Uje ochɨbɨte shɨchish kɨmɨjɨ ich narim ɨre hn shiyokõr erze uje ich mɨhnũwo shuu ɨtso uje dyablo shiyokõrkite.
\v 7 Ese uje Porrosht aabo õr bahluwa tyenɨj ɨr ɨluuta om heke erze uje ye õr Porrosht aabope otola ɨre. Kɨmɨjɨ ye ɨr ɨluuta om ich shiyokõr uje mɨ̃hnɨk hn nos ochɨraha hn ochinehnɨm erze Porrosht aabo pork dyablo sehnyẽr ɨre.
\s Yeẽkpo om par diácono.
\p
\v 8 Porrosht aabo õr bahluwo yewo uje õr iiyo otsɨɨ diácono wɨr hnakɨrbo uje õr ɨluu om toy, heke oso otola õr. Yelɨj otsehi lahwoso, hn ye oduhu yɨkɨch nẽhi ɨre. Ye ompe uje opota hnote.
\v 9 Ye nos oso odɨraha Porrosht ahwospe per wɨr ochɨraha hn ye olotiispe. Uje oshiyokõr uje mɨhnũwo ich ochuuna heke onɨshii shɨchish.
\v 10 Wap tyenɨj oteychɨm erze uje sehe omasaha par diácono kɨmɨjɨ õr ɨluu om o kɨmɨjɨ ye õr ɨluu ompe. Kɨmɨjɨ õr ɨluu om ich om par uje omasaha par diácono.
\v 11 Wɨr õr ɨtspo erze tɨmcher. Tyenɨj õr ɨluu om par uje oso otola õr. Ye ompe uje otata lare, hn ye ompe uje oshuu yɨkɨch sẽhi ɨre. Tyenɨj ye otsehi lahwoso.
\v 12 Ese hnakɨrbich uje sehe masaha par diácono shɨ tyenɨj shuu nerãhta nohmɨra, hn tɨbey daabo par uje shish oshiyokõr uje om. Hn tɨbey toy erze uje odebuhu ɨr ihyuch
\v 13 pork erze diácono uje oshiyokõr debiyo hn tokole om ich nos otola õr. Ye otola osope par uje otatɨm õr Jesucristo ɨr ahwoso.
\s Porrosht aabo wɨr ɨr ihyuch.
\p
\v 14 Sehe tɨtɨ̃r owa shɨchish par uje tekɨrɨhɨ owa. Tichew ana hutɨta wap par owa.
\v 15 Kɨmɨjɨ ye yok pwele tɨtɨ̃r owa shɨchish ich eraha uje uhu erze Porrosht aabo oshiyokõr pork wɨr Porrosht ɨr ihyuch. Porrosht wɨchɨ ɨka hn ɨr ihyuch ye pwertpe. Wɨr ɨr aabo wɨchɨ ɨr ihyuch. Porrosht aabo tyenɨj oshuu Porrosht ahwoso ɨmeheeych uje otsanɨmɨrãha otatɨm oso. Porrosht ahwoso ich ũru hn wɨr tyenɨj otɨbey.
\v 16 Ich ɨmeheeych par eyok erze uje Porrosht shiyokõr par eyok per ye ɨmeheeychpe par erze yewo. Ich ɨhɨ̃rtpa uje shiyokõrkite par shuu yomsaha par eyok ɨr aabo. Shuu Cristo taachɨ̃hɨ ele ɨrmõkite hn shuu ɨre shũrha. Porrosht Ɨchɨbich shuu ɨmeheeych uje wɨchɨ uu Cristo, hn Porrosht ɨr anjele oteychɨm ɨre. Porrosht aabo otsanɨmɨrãha ɨrmõho lekɨtiyo uje wɨchɨ uu Cristo. Oso lekɨtiyo ye olotiispe, hn Porrosht hnoy ɨre seya poõrc.
\c 4
\s Ode uje oym Porrosht nehe.
\p
\v 1 Esee hn Porrosht Ɨchɨbich tata shuu ɨmeheeych uje ich yej terɨhɨ uje Porrosht sɨhne nãhu ɨ̃rmo nehe hn ode uje oym Porrosht hn otsahmũr erze ɨchɨbiyo mɨhnũwo uje sehnyẽr õr. Erze õr ahwoso uje otsanɨmɨrãha otatɨm õr wɨr shɨ tãra demonyo.
\v 2 Shɨ oshiyokorãha õr uje tãra erze hnakɨrbo uje õr aho yũhɨrsh hn õr kushĩyo. Ich õr ukushiĩ yakaha õr, hn ye onuuna uje oshiyokõr.
\v 3 Erze hnakɨrbo sehe onontew uje õhyiye ahɨr. Oposo depo uje wɨr sehe onontew par uje ye otew. Per Porrosht shiyokõr erze oposo par uje erze uje ye olotiis ɨre hn ochɨraha erze ɨr ahwoso uje ich ũru onɨna ɨre hn otew.
\v 4 Nos wɨr kuche uje Porrosht shiyokõrkite wɨr ich om. Nĩhyok oposo uje mɨhnũwo. Nos om per tyenɨj yɨna Porrosht hn yahu erze oposo,
\v 5 pork uje eyok ler Porrosht ahwoso hn uje eyok orar shuu oposo om.
\s Ahwoso uje Timoteo tyenɨj shiyokorãha Porrosht aabo.
\p
\v 6 Titɨm owa. Uje ahakorãha erze Porrosht aabo uje tichew titɨm owa ich ahakõr om. Tyenɨj tokole ompa erze obiyo uje Jesucristo ɨshɨm owa par uje ahakõr. Tyenɨj tokole ɨmeheeych uje eraha Porrosht ahwoso, hn ye otiis ɨrpe, hn shish ahakõr uje Porrosht ahwoso tata.
\v 7 Ye ẽr wɨr monɨhne pork ye jukur. Wɨr mɨhnũwo. Ye ũrpe. Uhu eluuta om par uje owa ɨtso Porrosht ɨr ɨluuta.
\v 8 Ich om uje yeẽk shiyokõr nenɨmiyo par shuu dekiyo koota per ich ma om uje shiyokõr uje Porrosht sahmũr. Kɨmɨjɨ shiyokõr uje Porrosht sahmũr ich om par ɨre uje yesh de nãhu ɨ̃rmo, hn ich ompo par wahacha poõrc nehe.
\v 9 Ahnũwo uje tichew titɨm owa ich ũru. Ma om kɨmɨjɨ oso ye olotiis.
\v 10 Heke yishew obiyo ich yiyuhu eyoklo, pork ye yotiislo Porrosht uje ɨka uje tata uje eyok owich de ɨre ahɨr. Cristo wɨchɨ uje nos ɨshɨ õr hnɨtewɨhɨ Porrosht ahɨr per shɨ erze uje ye olotiis ɨre wɨr uje otɨ̃r ɨre ahɨr nehe.
\p
\v 11 Atɨm õr erze ahwoso uje titɨm owa hn ahakorãha õr par uje odɨraha.
\v 12 Ye ahakõr kuche uje shuu oso otata uje shɨ owa hnakɨrbitak hn ye eraha latɨk. Ma om uje uhu Porrosht aabo oneẽt owa. Shish ata ahwoso uje ich om, hn ahakõr uje ich om. Ahmũr oso yewo, hn ye otiis Porrosht ahwoso, hn shish tyenɨj uhu eluuta om par uje Porrosht aabo oteychɨm owa hn oneẽt owa.
\v 13 Uje ehn anem yok par uje tekɨrɨhɨ owa ich shish owa ler erze Porrosht ahwoso erze oso õr ɨkɨch par uje otẽr, hn anɨmɨrãha Porrosht ahwoso atɨm õr, hn ahakorãha õr.
\v 14 Anciano ochɨbɨte nahme eheta eeychni par uje otsapur Porrosht par uje ɨshɨm owa akɨrbo par erze obiyo. Ye moym erze akɨrbo.
\v 15 Eyuhu owa par uje ahakõr erze obiyo par uje uhu oteychɨm owa uje shish ma ahakõr uje om.
\v 16 Abeyshɨp owa par uje ye moym Porrosht hn otiis ɨre. Abeyshɨp owapo par uje ahakorãha õr uje ich ũru. Shish ahakorãha õr. Kɨmɨjɨ ye moym Jesucristo hn ye moym uje ahakorãha õr uje ich ũru ich owa owich de Porrosht ahɨr hn wɨr õr owich de toy.
\c 5
\s Timoteo tyenɨj shish shiyokõr om uje tɨbey Porrosht aabo.
\p
\v 1 Titɨm owa par uje ye atsɨrãha ahwoso erze hnakɨrbo ɨlaro. Tyenɨj akɨt õr uhu ɨtso uje wɨchɨ eych hn akɨtpo erze hnakɨrbite uhu õr ɨlo uje eshɨbo.
\v 2 Tyenɨj akɨt erze tɨmcher ɨler toy uhu õr ɨtso ata, hn erze pɨkɨhnin apɨbite tyenɨj akɨt õr uhu õr ɨtso uje anɨme hn shɨ ahakõr uje om par uje ye wɨr oso õr eyuwo dishew uje sehe ahakõr uje mɨ̃hnɨk.
\p
\v 3 Erze poluu uje ye õr iisɨ̃rsh ich tyenɨj Porrosht aabo otakashɨm õr
\v 4 per poluuta uje ɨr aabo ode o kɨmɨjɨ ɨr ahnɨmo ode wɨr tyenɨj ochɨraha uje Porrosht ahwoso tata uje tyenɨj otɨbey ɨre heke otɨbey ɨre pork wate takashɨm õrni. Porrosht sahmũr uje otakashɨm deyso oshuu ɨtsorz.
\v 5 Porrosht aabo tyenɨj otakashɨm asa poluuta uje nĩhyok ye latɨk chɨhɨ par uje takashɨm ɨre. Wate shish iyem Porrosht par uje takashɨm ɨre. Deeych hn dɨhlak wate shish orar sapur Porrosht.
\v 6 Per poluuta uje sahmũr õr ahmiyo hn sahmũr hnakɨrbo yewo wate par Porrosht ich shɨ ɨtso uje toy. Nĩhyok ɨr ɨkɨrĩt Porrosht ahɨr.
\v 7 Atɨm Porrosht aabo par uje otɨbey erze poluu uje nĩhyok ye õr iisɨ̃rsh uhu ɨtsorz par uje nĩhyok yeẽk pwele tata uje õr ɨre oshiyokõr uje mɨhnũwo.
\v 8 Uje yeẽk chɨhɨ hn ye takashɨm deeysope uje ye odebuhu ahɨrpe ich ye niyokõrpe uje Porrosht ahwoso tata hn ich shiyokõr uje mɨ̃hnɨk. Kɨmɨjɨ ye tɨbey deeysope uje odebuhu ɨr ihyuch wɨchɨ shiyokõr uje ma mɨ̃hnɨk pork shish dechɨ õr ahɨr. Oshuu ɨmeheeych uje õr ɨre otsotiis Porrosht. Wɨr oshiyokõr ma mɨhnũwo je erze yewo uje ye odɨraha Porroshtpe.
\p
\v 9 Ochichew erze poluu õr iiyo uje oyuwe sesenta ãyo per kal sohmɨra shɨ shuu dabiitɨ sohmɨra.
\v 10 Nos ochɨraha uje wate shish shiyokõrni uje om, hn nɨshiishɨp daabo, hn sahmũr uje oso otekɨrɨhɨ ɨre. Shish takashɨm Porrosht aabo, hn shish takashɨm erze uje mɨhnũwo tɨ̃r õrni, hn shish sɨnaha ɨre par uje nos shiyokõr kuche uje om.
\v 11 Ye atsew ebɨte hutɨta erze poluu õr iiyo uje yahpaa oterɨhɨ sesenta ãyope. Wap wɨr ochɨbɨte lahwoso uje tyenɨj oshiyokõr Cristo ɨbiyo. Mahn oshuu deyuwo tɨsɨ̃r uje sehe odiilabe.
\v 12 Heke oym erze Cristo ɨr ɨbiyo uje ochɨbɨte lahwosni uje tyenɨj oshiyokõr.
\v 13 Ye shɨ erze uje oshiyokõr. Ich uhurc otokole uje ich õr towɨ hn shish otekɨrɨhɨ õr ihyuwo hn otata lare. Otokole toy uje ich otsahmũr uje odale kuche ɨkiyo, hn otata erze uje ye ompe per õr ɨre otata.
\v 14 Heke sehe tuu akɨt erze poluu uje yesh õr apɨbite par uje odii labeypo hn uje yesh õr aabo otãra õr, hn wɨr otɨbeyshɨp dahuwo. Kɨmɨjɨ wɨr oshiyokõr oshuu ɨtsorz ich erze uje ye odɨraha Porroshtpe ich ye õr pwelpe otata uje Porrosht aabo oshiyokõr uje mɨhnũwo.
\v 15 Poluu ode uje oym Porrosht hn oshiyokõr uje Satanás sahmũr.
\v 16 Uje yanak chɨhɨ uje wate Porrosht aap o kɨmɨjɨ yeẽk chɨhɨ uje ɨre Porrosht aap hn ɨr iitɨta poluu ich tyenɨj tɨbey hn ye duhu Porrosht aabo otɨbey. Heke Porrosht aabo õr pwele otakashɨm erze poluu uje nĩhyok õr iiso.
\p
\v 17 Erze Porrosht aabo õr bahluwo õr iiyo otsɨɨ anciano. Uje otɨbey byen Porrosht aabo ich wɨr tyenɨj oshɨm õr kuche ma kɨhniya je erze bahluwo yewo. Erze uje õr ɨbiyo shɨ par uje otsanɨmɨrãha Porrosht ahwoso otatɨm õr hn oshiyokorãha õr, kɨmɨjɨ oshiyokõr debiyo om, heke ɨshɨm õr ma kɨhniya.
\v 18 Porrosht ahwoso tata ɨm: —Uje wey chish obiyo par shuu trigo yũhɨr tokole ich ye emchaha bosalt wey ahwo par uje pwele taak.— Hn tatpo ɨm: —Hnakɨrbich uje chishew obiyo tyenɨj ɨr yɨnsɨrc ɨshɨ uje serz.—
\v 19 Titɨm owa par uje ye ẽr uje yeẽk tata ɨm: —Ese Porrosht aabo õr bahlut uje iich otsɨɨ anciano shiyokõr uje mɨ̃hnɨk,— per kɨmɨjɨ õr osiyer o kɨmɨjɨ õr tre uje otata oshuu ɨtsorz ich om par ẽr.
\v 20 Uje Porrosht aabo uu õr bahlut nohmet shish shiyokõr uje mɨ̃hnɨk ich tyenɨj atɨmɨhɨ erze Porrosht aabo õr ɨkɨch par uje iim uje shiyokõr uje mɨ̃hnɨk par uje erze yewo otola hn ye oniyokõr uje mɨhnɨ̃k toy.
\v 21 Ana hutɨta uje tichew titɨm owa wate Porrosht sahmũr, hn Jesucristo sahmũr, hn erze ɨr anjele uje Porrosht chiihla õrni otsahmũr toy. Ahakõr uje de asa hutɨta uje tichew. Uje uhu Porrosht aabo oshiyokõr uje tichew tɨbɨte ana hutɨta ich ye ahakõr uhu kɨnaha par yet hn kɨnaha par ese yet. Nos uhu õr ɨlye.
\v 22 Ye ebɨte ahme õr hu eeyo shɨchish par uje uhu omasaha par Porrosht aabo õr bahluwo. Tyenɨj uhu eyuwo tɨsɨ̃r wap kɨmɨjɨ oniyokõr uje mɨ̃hnɨk o kɨmɨjɨ ye oniyokõrpe par uje ye erze mɨhnũwo deeshɨ hn tɨ̃r owa. Abeyshɨp owa par uje ye ahakõr uje mɨ̃hnɨk.
\v 23 Ye shɨ ehe awɨt. Tyenɨj ehe wint pɨkaabɨtpo par emɨsht pork ehet doso hn shish owa permo.
\v 24 Ode uje oshiyokõr mɨhnũwo ich nos oso ochɨraha hn ochɨraha uje deeych yet nehe hn tyenɨj oshɨ dabahat. Per ode uje oshiyokõr uje mɨhnũwo hn otsakɨs ɨre ich ye ɨmeheeych nehech uhurc ich ochɨraha.
\v 25 Shɨ ɨtso erze uje oshiyokõr uje om, nos ochɨraha. Per ode uje yelɨj onomo õr uje oshiyokõr uje om heke je deeych yet nehe hn ochɨraha.
\c 6
\s Timoteo tyenɨj sakɨt Porrosht aabo uje õr yɨlo.
\p
\v 1 Titɨm owa. Erze Porrosht aabo uje õr yɨlo tyenɨj otola nensɨro par uje ye wɨr oso oninehnɨm Porrosht hn par uje ye oninehnɨm erze ahwoso uje yiyokorãha õr.
\v 2 Uje õr yɨnsɨro ode uje wɨr Porrosht aabo toy ye ompe uje ye otola õr shɨ pork wɨr Porrosht aabo toy. Tyenɨj otola õr ma. Ich ma om uje oshiyokõr õr ɨbiyo ich oshuu ɨhɨ̃rtso pork wɨr õr leshɨbo. Porrosht sahmũr õr toy. Ahnũwo pahwoso uje tichew titɨm owaka wɨr uje tyenɨj ahakorãha õr hn uhu oshiyokõr.
\s Oso ode uje otsanɨmɨrãha dekushiĩ.
\p
\v 3 Titɨm owa uje yeẽk chɨhɨ uje sanɨmɨrãha ahwoso uje ye ũrpe, hn ye nahmũrpe erze ahwoso uje eyok Ɨrhĩch Jesucristo shiyokorãha oso uje shuu oso oshiyokõr uje Porrosht sahmũr.
\v 4 Wɨchɨ shɨ sehe duhu ɨre ma dich je erze leshɨbo. Ye dɨraha latɨk. Wɨchɨ shɨ sahmũr uje shiyokos oso. Ɨr ahwoso shɨ shuu oso opota ɨre, hn shish shuu oso oshiyokosye, hn ochinehnɨmye, hn shuu õr pyensa uje erze yewo oshiyokõr uje mɨhnũwo.
\v 5 Erze hnakɨrbo uje otsanɨmɨrãha ahwoso uje ye ũrpe hn erze hnakɨrbo uje õr eyuwo mɨhnũwo shish oteye hn ochɨkey uje Porrosht ahwoso ich ũru. Wɨr õr eyuwo pyensa uje oteeychãha Porrosht shɨ par uje otserz hnote.
\v 6 Ich ũru. Erze uje oteeychãha Porrosht hn ich õr aho kɨɨs ich ma om par õr ɨre.
\v 7 Uje eyok shurẽhe nãhu ɨrmõni ɨchii ye kuche chɨhɨ eyok ahɨrpe, hn uje yɨtɨ ich ye eyok pwele yukwii eyok kushjãrope.
\v 8 Kɨmɨjɨ eyok poso de uje yahu hn eyok ɨshuwo de uje par yonãha ich om. Yuhu eyok aho kɨɨs.
\v 9 Erze uje sehe oduhu ɨre ɨhɨ̃r deyo ich shish kuche kɨhniya tɨ̃r õr par uje sehe duhu oniyokõr uje mɨhnũwo. Wɨr õr eyuwo shɨ ɨtso trampta uje dechɨ par chishew õr. Shuu oshiyokõr ɨtso uje ye õr eyuwɨ̃rsh. Shuu oshiyokõr erze uje ye ompe par õr ɨre. Ye duhu õr kushjãro jukur nehech uhurc erze mɨhnũwo uje oshiyokõr ich sɨhna õr ɨre.
\v 10 Shɨ otsɨhna ɨre pork nos wɨr oso uje opota hnote ich ochɨbɨte ɨre par uje oshiyokõr nos wɨr kuche mɨhnũwo. Oso ode uje opota hnote oshuu ɨtsorz nehech uhurc ich oym Porrosht hn ich õr dosdarakpa.
\s Timoteo tyenɨj shiyokõr Porrosht ɨbiyo.
\p
\v 11 Timoteo, owa shish eeychãha Porrosht. Aham nos wɨr kuche uje ich mɨhnũwo hn ahakõr uje Porrosht sahmũr. Eeychãha ɨre hn shish ye otiis ɨre. Ahmũr Porrosht aabo toy. Owa ewenta erze mɨhnũwo uje oso oshiyokorɨ̃hɨ owa. Ye uhu ehet duhlu.
\v 12 Uhu owa duurapo par ahakõr erze obiyo uje Porrosht ɨshɨm owa pork owa ye otiis Jesucristope. Porrosht chiihla owa par uje ɨshɨm owa ese ɨkɨrĩt uje yelɨj nɨhna ɨre. Abeyshɨp owa par uje ye moym ese ɨkɨrĩt. Uje atɨm erze oso erze ahwoso om uhu ɨtsorzni on: —Ye tokotiis Jesuspe,— heke ɨmeheeych uje Porrosht chiihla owani par uje ɨshɨm owa ese ɨkɨrĩt.
\v 13 Porrosht sahmũr uje titɨm owa uje wɨchɨ uje nos ɨshɨm kuche ɨkɨrĩt hn Jesucristo sahmũr toy uje titɨm owa. Wɨchɨ uje tata lahwoso omoho Poncio Pilato ɨle ɨkɨch. Titɨm owa par uje
\v 14 ahakõr erze uje tichew hn ye eymehiĩ par uje nĩhyok yet pwele tata uje ahakõr mɨ̃hnɨk nehech terɨhɨ uje eyok Ɨrhĩch Jesucristo cheeshpo nehe.
\v 15 Porrosht chɨbɨte Cristo ɨshɨrĩt par uje cheeshpo nehe. Porrosht wɨchɨ uje yeeychãhalo hn nĩhyok uje ɨtso ɨre. Wɨchɨ uje shuu õr aho kɨɨs. Wɨchɨ uu rey õr bahlut pisht hn wɨchɨ uu ɨrhẽ õr bahlut pisht.
\v 16 Wɨchɨ shɨ sohmɨra uje shish ɨka hn debuhu luu ehet. Nĩhyok yeẽk pwele tɨ̃r asa luu pork yokõrt jwertpa. Ye latɨk chɨhɨ uje umo ɨrni, hn ye latɨk pwele nomo ɨre. Sehe shish tuu oso otola ɨre hn oduhu ɨre dich. Ich om oshuu ɨtsorz.
\p
\v 17 Titɨm owa par uje atɨm erze Porrosht aabo uje ode lɨka hnɨmich uje õr ɨhɨ̃r deyo par uje ye onarim ɨre. Hn ye ompe uje erze ɨhɨ̃r deyo õr aho otsɨɨ: —Õryok hnote de ich kɨhniya. Oyiyokõr uje oyahmũr. Ye nesit yeẽk takashɨm õryok.— Ye ompe uje onarim ɨre shɨ pork õr hnote de. Erze õr hnote ich pwele sɨhna ɨre shɨchish. Atɨm erze ɨhɨ̃r deyo uje ich ma om uje shɨ ye olotiis Porrosht. Wɨchɨ nos ɨshɨm eyok kuche ich kɨhniya par uje shuu eyok aho kɨɨs.
\v 18 Atɨm õr par uje shish oniyokõr uje om. Shish tyenɨj oniyokõr debiyo ich kɨhniya uje om par erze yewo. Ye ompe uje otsarhak lasujãro. Shish tyenɨj ochɨmɨt ɨre par uje otakashɨm õr uje kuche nihyokɨ̃hɨ õr ahɨr.
\v 19 Uje oniyokõr oduhu ɨlorz ich ɨtso uje ochɨhmer õr kushjãro wahacha Porrosht ahɨr ich kɨhniya par ese õr ɨkɨrĩt uje de Porrosht ahɨr uje ich ɨhɨ̃rtpa.
\p
\v 20 Timoteo, tyenɨj ahakõr uhu om erze obiyo uje Porrosht ɨshɨm owa. Ye ẽr erze õr ahwoso uje ye jukur. Ye tãra Porroshtpe. Hn ye ẽr erze uje otsotiis Porrosht ahwoso hn otata oshuu kɨnaha. Wɨr ochɨbɨte uje ochɨrahapa uje ich ũru per ye odɨrehepe.
\v 21 Ode uje ye olotiis Porroshtpe per uje otẽr erze õr ahwoso kɨnãho ich otsahmũr, heke ich uhurc ich otsotiis Porrosht. Sehe tuu Porrosht dosɨr olak.