\id 2TI Chamacoco NT - Paraguay 2000 (web 2013)
\h 2 Timoteo
\toc1 2 Timoteo
\toc2 2 Timoteo
\toc3 2Ti
\mt1 2 Timoteo
\c 1
\s Pablo ɨshɨm Timoteo saludo.
\p
\v 1 Yok Pablo. Yok Jesucristo ɨr apóstol. Porrosht chiihla yok par uje tomsaha erze obiyo par tanɨmɨrãha ɨr ahwoso. Chɨbɨte lahwoskite uje tyenɨj ɨshɨm õr ese ɨkɨrĩt uje de ɨre ahɨr uje ye olotiis Jesucristo.
\v 2 Timoteo, tichew ana hutɨta par tokosɨm owa. Ich tahmũr pishɨ owa. Shɨ owa ɨtso uje pijo. Sehe tuu eyok Deych Porrosht hn eyok Ɨrhĩch Jesucristo odosɨr owa hn onuuna uje owa losuhlaap hn otakashɨm owa hn oduhu ehet kɨɨs.
\p
\v 3 Deeych hn dɨhlak shish yok orar tapur Porrosht hn peyucha owa. Tɨkɨna Porrosht par owa. Tiyokõr Porrosht ɨbiyo hn peyuwo om shɨ yok ɨtso uu yok poruwo wɨshɨ oshiyokõr Porrosht ɨbiyoni.
\v 4 Tukuucha uje tɨkitolɨhɨ ahɨrni hn eyerh. Sehe takachɨm owapo par uje pehet kɨɨs.
\v 5 Peyucha owa uje owa ye ehet yuhurãshpe uje ye otiis Cristope. Ekɨta wap Loida ye lotiis Jesús petɨkni, hn ata ɨtspo Eunice hn owa ɨtspo ye otiis toy.
\p
\v 6 Heke titɨm owa par uje akucha uje tɨbɨte pɨhme eheta eeychni hn tapur Porrosht hn ɨshɨm owa akɨrbo par uje ahakõr erze ɨr ɨbiyo. Per ele ahle erze akɨrbo uje de owa shɨ ɨtso jwekɨta ich hũre pɨkaap. Sehe toy. Tyenɨj erhũ par uje uhu hũrepo
\v 7 pork Porrosht ɨshɨm eyok Dechɨbichni par uje ye yɨtɨla oso. Ɨshɨm eyok Dechɨbichni par uje shuu eyok ukurbo de, hn par shuu yahmũr oso hn par takashɨm eyok par uje ye yiyokõr uje ich mɨhnũwo.
\v 8 Abey owa par uje ye apook hn ye moym uje anɨmɨrãha eyok Ɨrhĩch Jesucristo ɨr ahwoso, hn ye apookpe uje oshiyeru yokɨhɨ ohyerpta shɨ pork tanɨmɨrãha eyok Ɨrhĩch ɨr ahwoso. Anɨmɨrãha Porrosht ahwoso hn kɨmɨjɨ kuche mɨhnũwo tɨ̃r owa uje ahakõr uhu ɨtsorz ich yukwiĩye pork kuche mɨhnũwo tɨ̃r eyok shɨ pork yanɨmɨrãha Porrosht ahwoso yitɨm õr uje Jesús ɨshɨ õr hnɨtewɨhɨ Porrosht ahɨrkite. Porrosht ukurbo deyo de hn takashɨm eyok.
\v 9 Wɨchɨ shuu Jesús ɨshɨ eyok hnɨtewɨhɨ dahɨr, hn wɨchɨ chiihla eyok par uje shish yiyokõr uje ɨre sahmũr. Ye diihla eyokpe pork yiyokõr uje om. Shɨ chiihla eyok pork sehe diihla. Takashɨm eyok shɨ pork sehe takashɨm pork ye yotiispe uje Cristo ɨshɨ eyok hnɨtewɨhɨ Porrosht ahɨrni. Uje ehn yahpaa niyokõr nãhu ɨ̃rmo petɨkkite ɨchii Porrosht sahmũr eyok.
\v 10 Ele ahle Porrosht shuu ɨmeheeych uje sahmũr eyok pork shuu Jesucristo tɨrẽtni par uje ɨshɨ eyok hnɨtewɨhɨ Porrosht ahɨr. Jesús ye duhu yarhakpe uje oso otoy uje ye olotiis ɨre pork shuu ɨmeheeych uje õr ɨkɨrĩt de uje yelɨj nɨhna ɨre.
\v 11 Porrosht chiihla yok par uje tanɨmɨrãha ɨr ahwoso titɨm õr uje Jesús ɨshɨ õr hnɨtewɨhɨ ɨre ahɨrkite, hn shuu tɨtɨ̃r lekɨtiyo par uje titɨm õr pork yok ɨr apóstol par tiyokorãha õr ɨr ahwoso.
\v 12 Ye onahmũrpe uje tiyokorãha õr tuu ɨtsorz heke oshiyeru yokɨhɨ ohyerpta. Per ye tɨkɨpookpe uje yok dechɨ pork tɨkɨraha uje ye tokotiis Jesucristope, hn pehet kɨɨs uje tokosɨm ɨre pɨkɨrĩt par uje tɨbey pork tɨkɨraha uje terɨhɨ ese deeych uje taãcha nehe hn erze uje Jesús tata ich yakaha.
\v 13 Ye ekey erze Porrosht ahwoso uje titɨm oso. Eẽt yok par uje owa pwele anɨmɨrãha atɨm oso yewo. Ye otiis Jesucristope hn ahmũr erze oso yewopo.
\v 14 Abeyshɨp erze Porrosht ahwoso uje titɨm owani par uje anɨmɨrãha atɨm oso. Porrosht Ɨchɨbich de eyok aho heke wɨchɨ takashɨm owa uje abey erze ɨr ahwoso.
\p
\v 15 Eraha uje erze hnakɨrbo uje otãra wahacha hnɨmich Asia uje õya yokni ich nos oym yok nehech Figelo hn Hermójenes oym yok toy.
\v 16 Sehe tuu eyok Ɨrhĩch dosɨr ese Onesíforo hn nos wɨr ɨr iiso. Wɨchɨ shish takashɨm yok hn shuu tukuurapo. Wɨchɨ ye poym yokpe uje kenena de pɨhmike,
\v 17 per uje tɨ̃r Roma ich wɨchɨ shish chukwi yokɨhɨ wahacha nehech chish yok.
\v 18 Ese deeych uje eyok Ɨrhĩch cheeshpo nehe hn sehe tuu eyok Ɨrhĩch dosɨr ɨre. Erahapa uje ehn yok de wahacha dɨt Efesoni hn wɨchɨ shish takashɨm yok.
\c 2
\s Porrosht aabo tyenɨj otseẽt ohyerptoso.
\p
\v 1 Timoteo, owa shɨ owa ɨtso uje pijo. Tyenɨj eyuhu owa ẽra erze akɨrbo uje Jesucristo ɨshɨm owa.
\v 2 Tyenɨj owa eyucha pahwoso uje ẽntni uje titɨm oso okɨhniya. Wɨr ochɨraha uje erze ahwoso ich ũru. Owa tyenɨj ahakorãha erze ahwoso atɨm hnakɨrbo uje ye olotiis Porroshtpe par uje wɨr oshiyokorãha oso yewo toy.
\v 3 Titɨm owa par uje owa ewenta erze kuche mɨhnũwo uje tɨ̃r owa pork owa Cristo ɨbɨk. Tyenɨj uhu owa ɨtso uje ohyerptosht shiyokõr uje ɨr ɨluu om.
\v 4 Ese uje masaha par ohyerptosht ye ɨchii niyokõr obiyope duhu kɨnãho. Shɨ tyenɨj shiyokõr uje ɨr bahlut tatɨm ɨre pork sehe duhu ɨr bahlut ehet kɨɨsɨhɨ ɨre.
\v 5 Shɨ ɨtspo ese uje loter pɨlota. Kɨmɨjɨ ye niyokõr uje refle tatɨm ɨre ich ye derzpe. Ye dosɨm ɨre asa koptape.
\v 6 Hn shɨ ɨtso ese uje chish obiyoho ɨr shakɨrrza ehet. Ich chiyuhu ɨre heke wɨchɨ webich osht uje tyenɨj hnoy erze ɨr jõro ee uje chekushu.
\v 7 Tyenɨj uhu eyuwo tɨsɨ̃r ahnũwo uje titɨm owaka, hn eyok Ɨrhĩch nos shuu eraha keshɨ duhu ɨnaapo ahnũwo pahwoso.
\p
\v 8 Owa eyucha Jesucristo. Wɨchɨ ɨkponi, hn ɨr porokkite wɨchɨ uu rey David lɨshɨ. Ahnũwo ɨr ahwoso uje tanɨmɨrãha titɨm oso uje ɨshɨ õr hnɨtewɨhɨ Porrosht ahɨrkite
\v 9 heke wɨr oshiyeru yok. Oshiyeru kenena pɨhmiko oshuu yok ɨtso uje tiyokõr uje mɨ̃hnɨk, per ye õr pwele onontew erze Porrosht ahwospe. Shish ochuntɨhɨ lekɨtiyo,
\v 10 heke yok ewenta erze mɨhnũwo uje tɨ̃r yok par uje erze oso uje Porrosht chiihla õr pwele omasaha par Porrosht aabo toy nehe uje ye olotiis Jesucristope, hn õr ɨkɨrĩt de uje ich ɨhɨ̃rtpa uje yelɨj nɨhna ɨre.
\p
\v 11 Titɨm owa ahnũwo ahwoso uje ich ũru. Cristo tooho eyok. Kɨmɨjɨ ye yotiis ɨrpe ich shɨ ɨtso uje yukwiĩya ɨre hn yutɨ toy. Hn Cristo ɨkpo, heke eyok tyenɨj eyok ɨkpo hn yebuhu ɨre ahɨr nehe.
\v 12 Uje kuche mɨhnũwo tɨ̃r eyok ich tyenɨj shish eyok ewenta. Kɨmɨjɨ eyok ewenta ɨtsorz hn tyenɨj eyok ɨr wɨmshɨro hn yukwiĩya ɨre. Uje yiita uje yukwim ɨre ich ɨre tyenɨj iim eyok toy.
\v 13 Kɨmɨjɨ yotiis, per ɨre shish ye sehi lahwospe pork ɨre ye pwelpe sata uje ɨre ye Cristope.
\p
\v 14 Tyenɨj shish uhu Porrosht aabo õr eyucha ahnũwo pahwoso uje titɨm owaka. Porrosht sehe duhu atɨm õr par uje oym oshiyokosyeehe erze õr ahwoso uje ye jukur. Wɨr shɨ chimehĩ oso õr eyuwo uje otẽr.
\v 15 Uhu owa duurapo par ahakõr Porrosht ɨbiyo ich uhu ɨhɨ̃rts pisho. Heke uje terɨhɨ ese deeych uje aachɨ̃hɨ Porrosht ɨle ɨkɨch nehe ich sahmũr pork uje anɨmɨrãha Porrosht ahwoso ich ye eymehiĩpe. Ye ompe uje ahakõr uhu kɨnaha, heke ich uhurc ich apook.
\v 16 Aham erze uje otakɨsho lawich hn shɨ otata lahwoso mɨhnũwo. Erze uje ye onaham õr shɨ õya õr heke oshuu õr ɨluu mɨhnũ nehech õr ɨluu mɨhnũpa ɨtso õr.
\v 17 Erze õr ahwoso uje oshiyokorãha õr wɨr ahwoso mɨhnũwo uje chũr lekɨtiyo shɨ ɨtso permo oshye. Wɨr erze uje tɨ̃r Himeneo hn Fileto
\v 18 hn shuu õr eyuwo mɨhnũwo heke oym erze Porrosht ahwoso uje ich ũru. Otata uje topo õr ɨkponi hn oshuu erze Porrosht aabo nohmɨramo otsotiis Porrosht.
\v 19 Per Porrosht chɨbɨte lahwoso ich tyenɨj yakaha. Ɨr ahwoso uje shuu eyok aho kɨɨs tata ɨm: —Eyok Ɨrhĩch chɨraha laabo.— Hn tata toy ɨm: —Nos wɨr erze uje otata otsɨɨ: “Cristo wɨchɨ uu õryok Ɨrhĩch,” wɨr uje tyenɨj oym erze mɨhnũwo uje oshiyokõr.—
\p
\v 20 Tɨteẽta kuchɨt titɨm owa. Pwert dich ehet kuche de uje oro, hn kuche de uje plata, hn kuche de uje tabla, hn kuche de uje katuu. Erze uje ich ɨhɨ̃rtso wɨr oro hn plata. Okahnɨ̃r par õr ahmiyo. Erze uje ich tabla hn katuu wɨr uje ochɨ̃ra obiyo kal deeych.
\v 21 Uje yeẽk iim shiyokõr uje mɨhnũwo par uje ɨre ɨtso erze oro hn plata ich chɨmɨt ɨre par uje shiyokõr Porrosht ɨbiyo. Wɨchɨ shuu deluuta om. Heke ɨr yɨnsɨrc sahmũr pork chɨmɨt ɨre par nos shiyokõr wɨr obiyo uje ich ɨhɨ̃rtso.
\v 22 Aham erze mɨhnũwo uje hnakɨrbite hn apɨbite shish oshiyokõr. Shish emɨt owa par uje ahakõr uje ich om, hn emɨt owa par uje ma ye otiis eyok Ɨrhĩch ɨr ahwoso, hn ahmũr oso yewo, hn uhu ehet kɨɨs. Tyenɨj meya erze Porrosht aabo yewo uje õr ɨluu om hn shish õr orar otsapur eyok Ɨrhĩch.
\v 23 Aham erze uje oshiyokosyeehe erze kuche uje ye jukur pork eraha uje wɨr shɨ oshuu oso ochɨnkẽrk delo.
\v 24 Ich ye ompe uje eyok Ɨrhĩch ɨr ɨbich satsɨrãha lahwoso. Shɨ tyenɨj nos keytkẽr oso hn hneta lahwoso. Tyenɨj chɨraha shiyokorãha oso Porrosht ahwoso, hn tyenɨj shish hneta oso.
\v 25 Erze uje ye onahmũr eyok Ɨrhĩch ɨr ɨbich ɨr ahwoso ich tyenɨj saraãshi uje shiyokorãha õr, hn shɨ iyem uje Porrosht shuu õr eyuwo tɨsɨ̃r nehech ochɨraha uje erze ahwoso ich ũru.
\v 26 Ich uhurc hn ochɨraha uje ich ũru, hn ochɨraha uje Satanás sehnyẽr õr. Wɨr shɨ õr ɨtso uje otokolɨhɨ Satanás trampta ehet. Uje ehn wɨr ode asa trampta ehet ich oshiyokõr uje Satanás sahmũr.
\c 3
\s Uje yej terɨhɨ ɨ̃rmo uhurc nehe ich oso oshiyokõr mɨhnũwo.
\p
\v 1 Sehe tuu erahapa uje ich yej terɨhɨ uje ɨ̃rmo sɨhna ɨre hn ich yarhakpa par oso.
\v 2 Oso ode ich okɨhniya nehe uje shɨ otsahmũr ɨre. Ode uje opota hnote hn ode uje ich onarim pishɨ ɨre. Ode uje otata uje ma ochɨraha kuche je yewo hn ode uje ochinehnɨm Porrosht hn ochinehnɨm nos wɨr oso toy. Ode uje ye otola deyo hn datɨpe hn ode uje yelɨj onɨna uje oshɨm õr kuche. Ode uje ye otola Porroshtpe.
\v 3 Ode uje ye onahmũr nerẽtpe hn daabo hn tɨmcher õr ɨtspo, ye onahmũr dabiyope hn ye onahmũr daabope. Ode uje yelɨj õr perdonar oso yewo. Ode uje otatɨm dekushiĩ oso par uje oshuu oso otsɨtak yewo. Ode uje ye õr pwelpe uje otɨbey ɨre heke shish oshiyokõr uje mɨhnũwo. Ode uje õr ehnito. Ode uje ye onahmũrpe uje ich om.
\v 4 Ode uje otatɨm oso õr ɨmãho par uje oshuu ochishew õr, hn ode uje oshiyokõr kuche shɨchish hn yelɨj õr pyensa kɨmɨjɨ om o kɨmɨjɨ mɨ̃hnɨk. Ode uje sehe oduhu deyuwo ma deyo je erze yewo, hn ode uje ma otsahmũr uje olota je uje oteeychãha Porrosht.
\v 5 Wɨr oshuu oso oteychɨm ɨre par uje oshuu õr pyensa uje wɨr Porrosht aabo per ye oduhu Porrosht Ɨchɨbich nuhrũ dahope. Aham erze oso uje oshiyokõr oshuu ɨtsorz.
\v 6 Hnakɨrbo ode erze oso õr ehet uje otɨ̃r erze tɨmcher õr ihyuwo hn otsehnyẽr õr. Erze tɨmcher ye oduhu deyuwo tɨsɨ̃rpe. Wɨr shish oshiyokõr uje mɨ̃hnɨk. Shish otẽr erze uje otsehnyẽr õr.
\v 7 Shish oso oshiyokorãha erze tɨmcher per yelɨj odɨraha uje ich ũru.
\v 8 Erze hnakɨrbo uje otsehnyẽr erze tɨmcher wɨr shɨ õr ɨtso ese Janes hn Jambres uje sehe onontew Moiseskite. Sehe onontew erze ahwoso uje ich ũru. Shɨ oshuu deyuwo tɨsɨ̃r erze kuche uje ich mɨhnũwo. Otata uje õr Porrosht aabo per otsotiis Jesús.
\v 9 Shɨ oshiyokorãha oso pɨkaap hn nos oso okemɨhɨ õr shɨ ɨtso erze uje õr osiyer sehe onontew Moiseskite.
\p
\v 10 Owa ye owa ɨlo õrpe. Eraha erze ahwoso uje tiyokorãha oso, hn eraha yok pɨluu, hn eraha erze uje sehe tiyokõr. Eraha uje ye tokotiis Jesuspe, hn erahapo uje tɨkɨnta pishɨ oso. Eraha uje tahmũr oso, hn nos eraha uje yok ewenta wɨr kuche mɨhnũwo uje tɨ̃r yok.
\v 11 Eraha erze kuche mɨhnũwo uje oshiyokorɨ̃hɨ yok, hn eraha erze yok dosɨ̃ryo uje chish yokɨhɨ dehet paho. Eraha toy nos wɨr erze mɨhnũwo uje masaha yokɨhɨ wahacha dɨt Antioquía hn Iconio hn wahacha dɨt Listra. Eraha erze mɨhnũwo uje yok ewenta uje oso oshiyokorɨ̃hɨ yok, per eyok Ɨrhĩch takashɨm yok heke ye wɨr oduhu yokpe oduhu tɨkɨtɨ.
\v 12 Ich ũru uje nos wɨr erze uje sehe oniyokõr uje Jesucristo sahmũr ich shish oso oshiyokõr mɨhnuwõho õr.
\v 13 Per erze hnakɨrbo uje õr ɨluu mɨhnũ hn erze yewo uje otsehnyẽr oso shish oshiyokõr uje ma mɨhnũwo hn shish ma otsehnyẽr oso hn yewo odepo uje otsehnyẽr wɨr.
\v 14 Per owa ye owa ɨlo õr heke shish ahakõr erze uje oshiyokorãha owani pork eraha uje ich ũru hn eraha erze uje oshiyokorãha owa.
\v 15 Uje ehn owa pɨkɨhninaapni ɨchii eraha nehech ele ahle yesh eraha erze Porrosht ahwoso. Porrosht ahwoso shuu eraha uje ye otiis eyok Ɨrhĩch Jesucristope hn shuu amsaha par owa Porrosht aap.
\v 16 Nos wɨr Porrosht ahwoso tãra ɨre pork shuu oso ochichew lawhoso. Porrosht ahwoso ich om par uje oshiyokorãha õr, hn sahɨrm õr uje oshiyokõr uje mɨ̃hnɨk. Ich om par nɨshii erze uje ochimehi kuche, hn ich om par oshiyokorãha õr oshuu oshiyokõr uje Porrosht sahmũr.
\v 17 Uje õr ler Porrosht ahwoso hn uje otẽr ich nɨshii õr eyuwo erze uje otsahmũr ɨre par oshiyokõr nos wɨr obiyo uje ich ɨhɨ̃rtso.
\c 4
\p
\v 1 Porrosht hn Jesucristo sehe oduhu titɨm owa uje nos wɨr erze uje yesh õr ɨka hn erze uje otoni tyenɨj otɨ̃r Jesús ɨle ɨkɨch nehe. Wɨchɨ jwe uje tyenɨj teychɨm erze mɨhnũwo uje oshiyokõrni. Titɨm owa pork Cristo tyenɨj cheeshpo nehe hn masaha par rey. Sehe tuu
\v 2 shish anɨmɨrãha Porrosht ahwoso. Emɨt owa par uje anɨmɨrãha Porrosht ahwoso uje owa tyempɨt de, hn uje ye owa tyemptɨkɨsh. Enshii erze uje ochimehi kuche, hn ahɨrm erze uje oshiyokõr uje mɨhnũwo par uje oshiyokõr uje ich om. Uhu oduurapo par uje oshiyokõr uje ich om. Tyenɨj eentha pishɨ õr uje ahakorãha õr
\v 3 pork uje terɨhɨ ɨshɨrĩt nehe ich ye oso onahmũrpe uje otẽr erze ahwoso uje ich ũru. Erze oso tyenɨj ochiihla hnakɨrbo ich okɨhniya par uje oshuu oshiyokorãha õr ahwoso uje otsahmũr otẽr.
\v 4 Porrosht ahwoso ich ũru per ye onahmũrpe par uje otẽr. Shɨ otsahmũr otẽr erze monɨhne.
\v 5 Per owa shish tyenɨj abeyshɨp owa. Tyenɨj owa ewenta erze kuche mɨhnũwo uje tɨ̃r owa, hn tyenɨj shish ahakorãha oso par uje uhu omasaha par Porrosht aabo. Nos ahakõr erze obiyo uje Porrosht ɨshɨm owa.
\v 6 Yok shɨ yok ɨtso erze kuche uje oshɨm Porrosht par uje oteeychãha ɨre, pork yej terɨhɨ ese pɨshɨrĩt uje par oshuu yok.
\v 7 Ich tɨmɨtɨke erze obiyo uje Porrosht ɨshɨm yok par uje tiyokõr heke shɨ ɨtso uje oteye hn terz. Shɨ yok ɨtspo ese uje uushɨ hn serz. Yelɨj tokotiis Jesucristo
\v 8 heke yok premit yesh dechɨ poõrc. Wɨchɨ yok premit uje yok Ɨrhĩch tyenɨj shuu pɨluuta ompa. Yok Ɨrhĩch ich jwe uje yelɨj niyokõr uje mɨ̃hnɨk. Uje terɨhɨ ese deeych nehe ich ɨshɨm yok uje terz, hn ye duhu yok sohmɨrape. Nos ɨshɨm wɨr toy uje otsahmũr uje ɨre tɨrẽt.
\s Pablo tatɨm Timoteo chɨhɨ ɨraãpo erze ɨr ihyẽre.
\p
\v 9 Sehe tuu erẽt shɨchish etɨ̃r yok.
\v 10 Demas ich sahmũr pishɨ ɨ̃rmo ɨshujãro heke iim yokni. Hno tɨ̃r wahacha dɨt Tesalónica. Shɨ Crescente hno tɨ̃r wahacha hnɨmich Galacia, hn Tito hno tɨ̃r wahacha hnɨmich Dalmacia.
\v 11 Shɨ Lucas nohmɨra sakaha pahɨr. Timoteo, sehe tuu bo bey Marcos par tɨrẽt nõya owa tɨ̃r yok pork wɨchɨ shish takashɨm yok pɨbiyo.
\v 12 Tuu Tíquico hno tɨ̃r dɨt Efesoni.
\v 13 Timoteo, uje erẽt nehe hn õhwa asa piyẽrpta waa je tɨ̃ra hmemɨt uje tokoymɨhɨ wahacha dɨt Troasni. De ese hnakɨrbich ihyuch uje iich otsɨɨ Carpo. Õhwa yok hute toy, hn ye moym erze hute uje oshiyokõr ochɨ̃ra obejɨ yũhɨr.
\v 14 Alejandro ɨr ɨbiyo ich shɨ shiyokõr fyero, wɨchɨ shiyokõr kuche mɨhnuwõho yokni ich kɨhniya. Eyok Ɨrhĩch tyenɨj shuu ɨshɨ dabahat erze mɨhnũwo uje shiyokorɨ̃hɨ yokni.
\v 15 Abeyshɨp owa par uje ye wɨchɨ niyokõr mɨhnɨkɨ̃hɨ owa toy pork wɨchɨ sɨtakpa erze Porrosht ahwoso uje yiyokorãha õr.
\v 16 Uje otseya yok jwe ɨkɨch wapni ich nĩhyok ye latɨk takashɨm yok. Nos oym yok. Sehe tuu Porrosht ye nowãha õrpe hn ye depyẽr õr.
\v 17 Eyok Ɨrhĩch takashɨm yok hn ɨshɨm yok pukurbo par uje yok pwele nos tanɨmɨrãha Porrosht ahwoso hn tuu nos dihipo ochɨraha. Eyok Ɨrhĩch takashɨm yok heke ye oduhu yok oduhu tɨkɨtɨ shɨ ɨtso uje chiyuhu yokɨhɨ ɨlpiyot ahwo.
\v 18 Eyok Ɨrhĩch tyenɨj takashɨm yok par uje yok ewenta erze mɨhnũwo uje oso oshiyokorɨ̃hɨ yok par uje takaachɨ̃hɨ wahacha ɨr ahɨr poõrc nehe. Sehe tuu Porrosht dich. Tahmũr uje ɨtsorz.
\s Pablo ɨshɨm saludo nahɨ̃re.
\p
\v 19 Tokosɨm saludo Prisca hn Aquila hn nos wɨr Onesíforo ɨr iiso.
\v 20 Erasto sakaha ese dɨt Corinto, hn tokoymɨhɨ Trófimo wahacha dɨt Mileto pork wɨchɨ permoni.
\v 21 Timoteo, emɨt owa hn erẽt shɨchish etɨ̃r yok pork yej terɨhɨ hmamo ɨshɨrĩt. Eubulo ɨshɨm owa saludo. Pudente hn Lino hn Claudia oshɨm owa saludo toy, hn nos wɨr Porrosht aabo uje ode lɨka.
\v 22 Sehe tuu eyok Ɨrhĩch Jesucristo shish nõya owa, hn sehe tuu Porrosht shish nos dosɨr olak.