\id TIT Chamacoco NT - Paraguay 2000 (web 2013)
\h Tito
\toc1 Tito
\toc2 Tito
\toc3 Tit
\mt1 Tito
\c 1
\s Pablo ɨshɨm Tito saludo.
\p
\v 1 Yok Pablo. Yok Porrosht ɨbɨk hn Jesucristo ɨr apóstol. Shuu takaha par uje titɨm erze uje Porrosht chiihla õrkite par uje ye olotiis Jesús. Shuu takaha par tuu ochɨraha Porrosht ahwoso. Ɨr ahwoso ich ũru. Shuu oym erze deluu mɨhnũ hn shuu oshiyokõr uje ɨre sahmũr.
\v 2 Titɨm õr par uje oyem ese ɨkɨrĩt uje yelɨj nɨhna ɨre uje Porrosht tyenɨj ɨshɨm daabo. Porrosht yelɨj nehnyẽr oso. Uje ehn yahpaa niyokõr nãhu ɨrmõkite ɨchii chɨbɨte lahwoso uje tyenɨj ɨshɨm daabo ese ɨkɨrĩt,
\v 3 hn chɨbɨte toy ese ɨshɨrĩtkite par uje shuu oso ochɨraha ese ɨkɨrĩt uje de. Uje terɨhɨ ese ɨshɨrĩtkite hn Porrosht shuu tanɨmɨrãha lahwoso. Wɨchɨ uje shuu Cristo ɨshɨ eyok hnɨtewɨhɨ dahɨr.
\v 4 Tichew ana hutɨta, Tito, par uje owa ler. Owa ɨtso pijɨt pisht pork uje titɨm owa Porrosht ahwosni ich ye otiispe ɨtso uje ye tokotiispe heke amsaha par Porrosht aap. Ele ahle ich Porrosht wɨchɨ uu eyok Deych hn Jesucristo wɨchɨ uje ɨshɨ eyok hnɨtewɨhɨ Porrosht ahɨr. Sehe tuu Jesucristo hn ɨr Deych odosɨr owa hn oduhu ehet kɨɨs.
\s Tito shiyokõr obiyoho ese hnɨmich Creta.
\p
\v 5 Uje eyok dechɨ ese hnɨmich uje iich otsɨɨ Cretani ich tuu akahachɨs par uje ahakõr erze obiyo uje yahpaa yɨmɨtpe, hn enshii uje ye ũrpe. Kal dɨt ich tyenɨj aahla hnakɨrbo par uje otɨbey Porrosht aabo uje odechɨ. Ekẽra õr iyo on anciano. Titɨm owa erze obiyoni par uje ahakõr.
\v 6 Wap eychɨm erze uje ye oniyokõr mɨhnɨ̃kpe par uje aahla õr par otɨbey Porrosht aabo. Kɨmɨjɨ oniyokõr uje mɨhnũwo heke oso ochinehnɨm õr ɨre. Kal anciano shɨ duhu nerãhta nohmɨra hn õr aabo ye odotiis Jesús. Kɨmɨjɨ oniyokõr uje mɨhnũwo heke oso ochinehnɨm ese anciano pork ɨr aabo oshiyokõr uje mɨhnũwo heke tyenɨj ɨr aabo shish oshiyokõr uje õr deych hn data otatɨm õr.
\v 7 Erze uje omasaha par anciano ich omasaha par otɨbey Porrosht aabo heke ye ompe yeẽk uje shiyokõr mɨ̃hnɨk masaha erze obiyo hnii ese uje shɨ shiyokõr uje ɨre sahmũr. Hn ye ompe yeẽk uje chesdelo shɨchish. Ye ompe ese uje yɨkɨch sẽhi, hn ye ompe ese uje satsɨr yewo. Ye ompe ese uje sehe torha hnote.
\v 8 Om uje yeẽk masaha erze obiyo ich tyenɨj sahmũr uje oso otekɨrɨhɨ ɨre. Sahmũr takashɨm yewo. Shish shuu deyuwo tɨsɨ̃r erze obiyo uje shiyokõr kɨmɨjɨ om o kɨmɨjɨ ye ompe hn shiyokõr erze om uje Porrosht sahmũr. Tɨbey ɨre par uje ye niyokõr uje mɨ̃hnɨk. Shish shiyokõr uje Porrosht ahwoso tata hn ye niyokõr erze mɨhnũwo uje yewo sehe oduhu niyokõr.
\v 9 Ye noym Porrosht ahwoso uje yewo oshiyokorãha ɨre par uje ɨre pwele shiyokorãha yewo erze uje ich ũru hn par uje ɨre pwele sontew õr ahwoso erze uje õr eyuwo kɨnãho.
\p
\v 10 Ich okɨhniya erze uje ye onahmũrpe erze Porrosht ahwoso uje yiyokorãha oso. Ich ochɨrahapa ochiilehet per ye õr ahwoso jukur. Shɨ otsehnyẽr oso. Ma okɨhniya wɨr israel oso uje otsehnyẽr oso oshuu ɨtsorz.
\v 11 Tyenɨj ahɨrm õr par uje ye odiilehet pork otɨ̃r oso õr ihyuwo hn oshuu wɨr õr eyuwo mɨhnũwo hn oshuu otsotiis Porrosht. Oshiyokorãha õr erze uje ye ũrpe shɨ par uje otserz hnote.
\v 12 Sohmet deni uje creta oso ochɨbɨte par õr profeta. Wɨchɨ tata shuu ɨtsorz: —Erze creta oso wɨr shɨ õr kushĩyo. Wɨr shɨ õr ɨtso erze loshɨpo uje shɨ dɨrkɨhɨ lekɨtiyo par uje tohɨr. Wɨr õr towo hn õr jar.—
\v 13 Ese profeta tatni shuu ɨtsorz hn ich ũru heke atɨm erze creta oso ich ehnew par uje ye oduhu ɨlorz par uje uhu ye olotiis Porrosht ahwoso pork wɨr ich ũru.
\v 14 Uje odɨraha nehe uje Porrosht ahwoso ich ũru ich tyenɨj ye odɨbɨte uje ich ũru erze monɨhne uje erze israel oso otata. Tyenɨj ye otẽr erze oso õr ahwoso uje otsotiis Porrosht ahwoso. Erze õr ahwoso shɨ tãra õr.
\v 15 Erze oso uje õr ɨluu om uje oteychɨm kuchɨt ich ochɨbɨte uje om, per erze uje õr ɨluu mɨhnũ hn otsotiis Porrosht par õr ɨre ich nĩhyok uje ich om. Yakaha õr eyuwo par uje sehe oshiyokõr uje ich mɨ̃hnɨk hn uje oshiyokõr uje ich mɨ̃hnɨk ich ye opookpe.
\v 16 Otata uje õr ɨre ochɨraha Porrosht per erze uje õr ɨre oshiyokõr chɨbɨte orhõta uje õr ɨre ye odɨrehepe. Wɨr õr ɨluu mɨhnũ. Ye onahmũr oniyokõr uje Porrosht sahmũr. Ye õr pwele oniyokõr uje ich ompe.
\c 2
\s Tito shiyokorãha oso.
\p
\v 1 Per owa ye owa ɨlo erze uje õr ɨluu mɨhnũ. Shish ahakorãha õr uje ich ũru uje Porrosht ahwoso tata.
\v 2 Atɨm erze hnakɨrbo ɨlaraabo par uje ye oduhu yɨkɨch nẽhi ɨre. Tyenɨj oshiyokõr om par uje oso otola õr. Shɨ tyenɨj oshuu deyuwo tɨsɨ̃r par uje ye oniyokõr uje mɨ̃hnɨk. Tyenɨj ye olotiis Porrosht ahwoso hn oniyokõr uje tata. Tyenɨj otsahmũr Porrosht hn otsahmũr erze Porrosht aabo toy. Tyenɨj õr ewenta uje oso oshiyokõr kuche mɨhnuwõho õr pork wɨr shish otsɨtak Porrosht aabo.
\v 3 Ɨtso uje ahakorãha erze hnakɨrbo ɨlaraabo ich tyenɨj ahakorãha erze tɨmcher ɨler par uje oshiyokõr oshuu ɨtso uje Porrosht sahmũr. Ye ompe uje otata lare. Ye ompe uje oshuu yɨkɨch sẽhi ɨre. Tyenɨj oshiyokorãha yẽr uje ich om.
\v 4 Uje oshiyokõr oshuu ɨtsorz hn õr pwele otsakɨt erze apɨbite par uje otsahmũr dabiyo hn otsahmũr daabo toy.
\v 5 Tyenɨj oshiyokorãha erze apɨbite par uje oshuu õr eyuwo tɨsɨ̃r par uje oshiyokõr uje ich om hn shɨ oshuu dabich nohmɨra hn par uje ye otorãha dabich. Tyenɨj oshiyokorãha õr par otɨbey dahuch hn otakashɨm wɨr yewo. Tyenɨj oshiyokorãha õr par oshiyokõr uje õr abiyo otatɨm õr par uje ye oduhu oso odish majamichɨhɨ Porrosht ahwoso.
\v 6 Tito, owa tyenɨj ahakorãha erze pɨkɨhnino hnakɨrbito toy. Atɨm õr par uje oshuu deyuwo tɨsɨ̃r uje õr ɨre oshiyokõr.
\v 7 Nos wɨr kuche uje ahakõr tyenɨj ahakõr om par uje wɨr oteychɨm owa uje ahakõr hn ochɨraha uje Porrosht sahmũr. Uje ahakorãha oso uu Porrosht ahwoso tyenɨj atɨm õr uje ich ũru. Ye ahakorãha õr shɨ par uje wɨr õr ayla.
\v 8 Tyenɨj ahakorãha õr uje ich ũru par uje ye wɨr oso otata otsɨɨ: —Wɨchɨ ɨr ahwoso ich ye jukur.— Ahakorãha oso uhu ɨtsorz hn erze uje otsɨtak owa wɨr opook pork ye odishpe uje mɨ̃hnɨk par uje oninehnɨm eyok.
\v 9 Tyenɨj ahakorãha erze Porrosht aabo par uje ochishew obiyo par oshiyokõr uje õr yɨnsɨro otatɨm õr. Tyenɨj oshuu nensɨro õr aylpa hn otola õr.
\v 10 Ye ompe uje otorha nensɨro õr kushjãro. Tyenɨj Porrosht aabo oshiyokõr uje õr yɨnsɨro otatɨm õr par uje nos omo uje oshiyokõr uje ich om, heke ochɨraha uje erze ahwoso uje yiyokorãha õr ich ɨhɨ̃rts pisho. Otsahmũr uje yitɨm õr Porrosht ahwosni hn Jesucristo uje ɨshɨ oso õr hnɨtewɨhɨ Porrosht ahɨr.
\p
\v 11 Porrosht sehe dosɨ̃r oso heke ɨre ɨshɨ õr hnɨtewɨhɨ dahɨrni hn kɨmɨjɨ onahmũr ich nos õr pwele ochɨraha hn omasaha par ɨr aabo.
\v 12 Uje Porrosht ɨshɨ eyok hnɨtewɨhɨ dahɨrni ich shuu yukwim mɨhnũwo hn yaham erze kuche mɨhnũwo uje oso otsahmũr oshiyokõr. Uje ehn eyok de nãhu ɨ̃rmo hn wɨchɨ shuu eyok eyuwo tɨsɨ̃r par uje yiyokõr uje ich om uje Porrosht sahmũr
\v 13 uje yiyem ese deeych uje ich ɨhɨ̃rtpa uje Jesucristo cheeshpo nehe. Uje taãcha ich hũre. Wɨchɨ uje ɨshɨ eyok hnɨtewɨhɨ Porrosht ahɨrni.
\v 14 Wɨchɨ ɨshɨm ɨre oso par uje oshuu oshuu toni par uje chiyuhu eyok Satanás hme hn par uje shuu ye yiyokõr erze uje Porrosht ye nahmũrpe hn par uje shuu eyok ɨluu om pork wɨchɨ uu eyok yɨnsɨrc. Shuu yahmũrpa yiyokõr uje ich om.
\v 15 Erze uje tichew tokosɨm owaka wɨr uje tyenɨj ahakorãha oso. Uhu otsahmũr oshiyokõr uje ich om, hn ekushuhu õr uje oshiyokõr uje mɨhnũwo pork Porrosht wɨchɨ uje shuu ahakõr uje ɨtsorz. Ontew erze uje otata otsɨɨ: —Ye eraha latɨk.—
\c 3
\s Nãhu tyenɨj Porrosht aabo oshiyokõr.
\p
\v 1 Uhu erze Porrosht aabo õr eyucha uje tyenɨj oshiyokõr uje gobierno tatɨm õr hn shish ochɨmɨt ɨre par oshiyokõr uje om.
\v 2 Atɨm õr par uje ye oninehnɨm oso hn ye odihokosye nehech otsɨtakye hn ohneta oso hn uhu nos ye odɨkey uje otsetye.
\v 3 Antni eyok ye yɨraha Porroshtpe. Ich eyok ɨtso õr. Ye yiyokõrpe uje Porrosht sahmũr. Shɨ yiyokõrni uje yewo otatɨm eyok. Erze kuche mɨhnũwo uje yahmũrpa yiyokõr shish yiyokõr nehech uhurc ich yakaha eyok. Wɨr shɨ ɨtso eyok yɨnsɨrc uje chɨpa eyok pork eyok ɨr yɨlo. Ich yahmũrpa erze õr ahmiyoni hn shish yahmũr yiyokõr erze mɨhnũwo. Yɨtak yewo pork yobɨta õr kushjãro. Hn uje otsɨtak eyok hn eyok ɨtspo yɨtak õr.
\v 4 Per uje terɨhɨ ɨshɨrĩt par uje Porrosht shuu oso ochɨraha uje wɨchɨ sahmũr pishɨ õr hn sehe dosɨ̃r õr heke ɨshɨm õr Deyjɨt par uje oshuu oshuu toy par uje ɨshɨ õr hnɨtewɨhɨ Porrosht ahɨr.
\v 5 Uje shuu yɨraha ɨtsorz ich shuu yomsaha par eyok ɨr aabo. Ye yiyokõrpe uje om par uje shuu yomsaha par ɨr aabo. Shɨ chuuna uje eyok losuhlaabo heke sosɨr eyok. Shuu Dechɨbich masaha eyok aho hn churhũ eyok kuche mɨhnũwo uje Porrosht ye nahmũrpe uje de eyok aho hn shuu eyok shurhãpo hn shuu eyok aho kɨnãho par uje yiyokõr uje om.
\v 6 Ɨshɨm eyok Dechɨbich par uje ɨr ukurbo kɨhniya de eyok aho pork Jesucristo ɨshɨ eyok hnɨtewɨhɨ Porrosht ahɨrni.
\v 7 Sosɨr eyok heke ye eyok hnɨtew chɨhɨ ɨr ahɨrpe. Ɨshɨm eyok Dechɨbich par uje yomsaha par eyok ɨr aabo. Ele ahle yiyem ese ɨkɨrĩt uje yelɨj nɨhna ɨre.
\p
\v 8 Ahnũwo ahwoso uje ticheku ich ũru. Sehe tuu ahakorãha pishɨ erze uje ye olotiis Porroshtpe par uje ochɨrahapa par uje shish oshiyokõr uje om. Ahnũwo ɨr ahwoso ich ɨhɨ̃rts pisho hn om par nos wɨr oso ochɨraha.
\v 9 Per ye ekitkẽr erze uje shɨ ochiilehet hn õr ahwoso ich ye jukur. Ye ekitkẽr erze uje shɨ õr eyucha õr poruwo wɨshɨ õr ahwoso. Par Porrosht ich wɨr õr ahwoso ye jukurpe. Ye etɨ̃r erze uje oshiyokosye hn oshuu ma kɨhniya asa uje Moisés ley tata. Wɨr õr ahwoso ye jukurpe.
\v 10 Uje yeẽk duhu Porrosht aabo otsehek ɨre ich tyenɨj atɨm ɨre par uje ye duhu ɨlorz. Kɨmɨjɨ niyokõrpo duhu ɨlorz ich tyenɨj atɨmpo. Kɨmɨjɨ niyokõrpo ich uhu tokolɨhɨchɨs Porrosht aabo õr ehet.
\v 11 Eraha uje wɨchɨ iim uje Porrosht sahmũr, par uje shiyokõr uje mɨ̃hnɨk. Shiyokõr mɨhnũwo heke ɨre shuu Porrosht aabo ochiyuhu ɨrehe õr ehet.
\s Tito tyenɨj takashɨm Porrosht ɨr ɨbiyo yewo.
\p
\v 12 Sehe tuu Artemas do tɨ̃r owa o kɨmɨjɨ Tíquico. Uje taachɨ̃hɨ ahɨr hn owa tyenɨj etɨ̃r yokɨhɨ wahacha dɨt Nicópolis pork tɨbɨte tɨtɨ̃r wahacha nehe par tiyakaha par ese hmamo ɨshɨrĩt.
\v 13 Akashɨm Apolos hn Zenas. Asɨm õr uje õr nesita par uje ye kuchẽrk nihyokɨ̃hɨ õr ahɨr dehet pehet. Ese Zenas wɨchɨ politikya uje chɨrahapa gobierno ɨr ley.
\v 14 Nos Porrosht aabo tyenɨj oshuu chish leheta par uje shish oshiyokõr uje ich om hn otakashɨm deyso hn erze Porrosht aabo yewo uje kuche nihyokɨ̃hɨ õr ahɨr. Kɨmɨjɨ ye otakashɨm õr ich ye oniyokõrpe uje Porrosht sahmũr.
\s Pablo ɨshɨm Porrosht aabo õr saludo.
\p
\v 15 Tito, nos wɨr Porrosht aabo uje ode lɨka pahɨr nos oshɨm owa saludo. Atɨm erze Porrosht aabo yewo uje ode ahɨr uje otsahmũr yok uje tokosɨm õr saludo. Sehe tuu Porrosht nos dosɨr olak.