\id PHM Chamacoco NT - Paraguay 2000 (web 2013)
\h Filemón
\toc1 Filemón
\toc2 Filemón
\toc3 Flm
\mt1 Filemón
\c 1
\s Pablo ɨshɨm saludo Porrosht aabo.
\p
\v 1 Yok Pablo. Yok de karsel ehet pork ye tokotiis Jesucristope. Par yok ich shɨ ɨtso uje Jesucristo shuu oshiyeru yok. Yok hn eyok leshɨbich Timoteo oyichew ana hutɨta oyosɨm owa, Filemón. Owa ebiyo shɨ ɨtso õryok ɨbiyo. Ich oyahmũr pish owa.
\v 2 Oyichew ana hutɨta par nos wɨr Porrosht aabo toy uje otakɨsho lawichɨhɨchɨs ahuch, hn par asa eyok nanɨmicha Apia toy. Arquipo dechɨ toy. Wɨchɨ ɨbiyo shɨ ɨtso õryok.
\v 3 Sehe tuu eyok Deych Porrosht hn eyok Ɨrhĩch Jesucristo dosɨr olak hn oduhu olak aho kɨɨs.
\s Pablo sahmũr uje Filemón shiyokõr.
\p
\v 4 Filemón, uje yok orar hn peyucha owa ich shish tɨkɨna Porrosht par owa,
\v 5 pork tukunt uje nos ahmũr wɨr Porrosht aabo hn ahmũr eyok Ɨrhĩch Jesús toy hn ye otiis ɨrpe.
\v 6 Tapur Porrosht par owa uje anɨmɨrãha ɨr ahwoso atɨm yewo par uje ye olotiis ɨrpe par uje nos odɨraha erze uje ich om uje tãra Cristo pork wɨchɨ uje takashɨm eyok.
\v 7 Pɨshɨbiche Filemón, uje tukunt uje ahmũr Porrosht hn ahmũr ɨr aabo toy ich shuu yok aylpa hn pehet kɨɨs. Tukunt uje akashɨm Porrosht aabo yewo uhu ma õr aho kɨɨs.
\s Pablo sehe duhu Filemón sosɨr Onésimo.
\p
\v 8 Titɨm owa uje Cristo wɨchɨ uje ɨshɨm yok pɨbich uje ich dich, heke yok pwele titɨm owa par uje ahakõr kuche
\v 9 per ye tahmũr tɨrok owape. Shɨ titɨm owa pork tahmũr owa. Yok Pablo. Ich yok ɨlaro. Yok de karsel ehet shɨ pork ye tokotiis Jesucristope.
\v 10 Tapur owa par uje akashɨm Onésimo. Uje yok de lɨka karsel ehet ich tuu Onésimo masaha par Porrosht aap, heke wɨchɨ shɨ ɨtso uje yok pijo.
\v 11 Onésimo wɨchɨ owa elak. Antni ich ye jukur per ele ahle ich wɨchɨ bale. Bale par owa hn bale par yok toy.
\v 12 Tuu Onésimo hno tɨ̃r owapo. Tahmũr ɨre heke ich tukuuna uje tuu hno cheeshpo tɨ̃r owa.
\v 13 Par yok ich ma om kɨmɨjɨ Onésimo shɨ lakaha pahɨr pork sehe tuu wɨchɨ masaha owa owich par uje takashɨm yok uje yok de lɨka karsel ehet shɨ pork tanɨmɨrãha Porrosht ahwoso titɨm oso uje Jesucristo ɨshɨ õr hnɨtewɨhɨ Porrosht ahɨrkite
\v 14 per ye tahmũrpe uje tuu Onésimo sakaha pahɨr uje ehn yahpaa tɨkɨraha ahwotɨk par uje ye tɨrok owa hn tuu akashɨm yok. Sehe tuu akashɨm yok kɨmɨjɨ ahmũr.
\v 15 Par yok ich shɨ ɨtso uje Onésimo yuhwoho ahɨr par uje shuu daalo arhaabo hn cheeshpo par uje shish sakaha ahɨr nehe,
\v 16 per ye shɨ wɨchɨ chɨhɨ ahɨrpe ɨlo erze õr yɨlo. Onésimo ma bale je õr yɨlo. Wɨchɨ pɨshap uje tahmũr, hn owa eshap toy heke ahmũr ɨre toy ye shɨ pork wɨchɨ elak. Ahmũr ɨre pork wɨchɨ Porrosht aap.
\v 17 Kɨmɨjɨ ebɨte uje yok owa ahɨ̃rakpa ich ahakõr oomɨhɨ Onésimo uhu wɨchɨ ɨlo yok.
\v 18 Kɨmɨjɨ niyokõr kucherkɨ̃hɨ owa o kɨmɨjɨ ɨr hnɨtew chɨhɨ owa ich ebɨte yok hnɨtewta.
\v 19 Yok Pablo uje tichew ana hutɨta. Tɨbɨte uje tyenɨj tokoshɨ ɨr hnɨtewta. Titɨm owani par uje amsaha par Porrosht aap heke ich shɨ ɨtso uje owa hnɨtewta de pahɨr per ye tɨrok owape.
\v 20 Pɨshɨbiche, sehe tuu akashɨm yok pork ye yotiis eyok Ɨrhĩchpe. Uhu pehet kɨɨs pork eyok yahmũr Cristo.
\v 21 Tichew ana hutɨta tokosɨm owa pork tɨkɨraha erze uje tapur owa ich ahakõr hn uhu iyuwe uje tapur owa.
\v 22 Uje akashɨm Onésimo uhu ɨtsorz ich sehe tuu enshii owich yet toy par yok. Tɨkɨraha uje shish olak orar apurlo Porrosht par yok, heke kɨmɨjɨ Porrosht nahmũr ich takaha tekɨrɨhɨ olak toy.
\s Porrosht aabo oshɨm Filemón saludo.
\p
\v 23 Epafras ɨshɨm owa saludo. Wɨchɨ pihyẽrak uje de karsel ehet shɨ pork ye oyotiis Jesucristope.
\v 24 Marcos ɨshɨm owa saludo toy hn Aristarco hn Demas. Lucas ɨshɨm owa toy. Wɨr uje otakashɨm yok pɨbiyo.
\v 25 Sehe tuu eyok Ɨrhĩch Jesucristo dosɨr olak.