\id HEB Chamacoco NT - Paraguay 2000 (web 2013)
\h Hebreos
\toc1 Hebreos
\toc2 Hebreos
\toc3 Heb
\mt1 Hebreos
\c 1
\s Porrosht shuu Deyjɨt tatɨm õr lahwoso.
\p
\v 1 Antkite hn Porrosht tatɨm lahwoso erze profeta poruwo wɨshɨ par uje shuu otatɨm eyok poruwo wɨshɨ. Wɨchɨ shish tatɨm erze profeta poruwo wɨshɨ hn shuu oshiyokõr kuche ich kɨhniya par uje sɨteẽta kuche par uje sehe duhu eyok poruwo wɨshɨ odɨraha.
\v 2 Per ele ahle Porrosht shuu Deyjɨt tatɨm eyok lahwoso par uje shuu yɨraha. Porrosht wɨchɨ uje shuu Deyjɨt shiyokõr ɨrmõkite, hn chiihla ɨre hn nos ɨshɨm ɨre wɨr kuche.
\v 3 Uje oso oteychɨm Cristo ich ochɨraha Porrosht ɨr ɨluu pork ɨr ɨluu shɨ ɨtso Cristo ɨr ɨluu. Cristo ɨtsshɨp ɨr Deych. Cristo wɨchɨ uje nos tɨbey kuche chɨ̃ra lahwoso hn chɨ̃ra lakɨrbo. Uje Cristo ɨshɨ eyok hnɨtewkite ich sakaha Porrosht waãchta wahacha poõrc pork wɨchɨ ich dich.
\v 4 Porrosht Ijɨt ma ukurbo deyo de je erze ɨr anjele hn ɨr ɨbiyo ich ma deyo je erze ɨr anjele õr ɨbiyo.
\p
\v 5 Porrosht yelɨj tatɨm erze anjele yeẽk ɨl: —Owa yok pijo. Ele ahle tuu owa shũrha.— Hn yelɨj tatɨm erze anjele yeẽk duhu ɨlorz: —Yok uu eych hn owa uu pijɨt.—
\v 6 Uje shuu Deyjɨt webich osht shurẽhe nãhu ɨrmõkite hn Porrosht tata ɨm: —Sehe tuu nos wɨr yok anjele oteeychãha ese Pijɨt.—
\v 7 Porrosht tata uje shuu erze ɨr anjele ochisãha ɨre myentɨta. Erze Porrosht anjele wɨr ɨr ɨbiyo. Shuu ochisãha ɨre jwekɨta.
\v 8 Per Porrosht tatɨm Deyjɨt ɨm:
\p —Owa Porrosht hn owa rey uje shish de. Owa uje abey paabo hn shish ahakõr uje ich om.
\v 9 Ahmũr uje oso oshiyokõr uje ich om, per etak erze uje oshiyokõr uje ich mɨhnũwo. Yok uu owa Porrosht. Ahmũr uje ich om heke tuu owa ma ayla je owa ahɨ̃ro.—
\v 10 Hn tatɨm Deyjɨt ɨm: —Owa uu nos oso hn nos wɨr kuche ɨr yɨnsɨrc. Tenitkite hn ahakõr ɨ̃rmo hn ahakõr nos wɨr kuche uje de poõrc ẽra ahme.
\v 11 Deeych yet nehe hn nos sɨhna ɨre per owa shish owa de. Ese hnɨmich hn poõrc wɨr shɨ ɨtso õr ɨshuwo uje saraãshi ɨre ɨlaro nehech sɨhna ɨre nehe.
\v 12 Wɨr shɨ ɨtso uje yeẽk iim lasuwo ɨlaro hn iyãha lasuwo ahlo per owa ye kɨnãhape, shish ɨtsye. Yelɨj ehna owa.—
\p
\v 13 Porrosht yelɨj tatɨm erze ɨr anjele yeẽk ɨl: —Akaha paãchta nehech nos terz owa amãho hn tɨbɨte õr ahme— per tatɨm Cristo shuu ɨtsorz.
\v 14 Nos wɨr Porrosht ɨr anjele wɨr shɨ õr ɨchɨbiyo. Porrosht shuu oshiyokõr debiyo otakashɨm erze uje otɨ̃r poõrc nehe.
\c 2
\s Ye ompe uje otata uje ye jukur uje Cristo tooho õrkite.
\p
\v 1 Heke titɨm olak. Tyenɨj yẽrlopa hn yiyokõrlo uje Cristo tata par uje ye yukwimlo erze ahwoso uje ich ũru.
\v 2 Porrosht tatɨm ɨr anjele par shuu otatɨm Moisés lahwoskite par tatɨm oso. Erze ahwoso ich ũru heke erze oso uje ye onahmũr oniyokõr erze Porrosht ahwoso uje anjele otatɨm õr ich oshɨ labahat pork oshiyokõr uje ich mɨhnũwo.
\v 3 Kɨmɨjɨ yotiis uje Jesús tata uje ɨshɨ eyok hnɨtewɨhɨ Porrosht ahɨrkite ¿yuhu ɨnaapo par uje eyok yuhwoho Porrosht ɨr hme par ye depyẽr eyok? Wap eyok Ɨrhĩch tatɨm oso shuu ɨtsorz hn erze uje otẽr ɨre otatɨm õryok.
\v 4 Porrosht shuu oshiyokõr kuche uje ye latɨk pwele shiyokõr uje shuu oso ochishlabe par shuu ochɨraha uje õr ahwoso ich ũru. Ich shuu ɨmeheeych toy uje õr ahwoso ich ũru pork Porrosht Ɨchɨbich ɨshɨm Porrosht aabo õr eyuwo kɨnãho kɨnãho par uje sehe duhu oniyokõr ɨr ɨbiyo kɨnãho kɨnãho.
\p
\v 5 Porrosht ye dɨbɨte erze anjele õr hmepe ese ɨ̃rmo uje tyenɨj shiyokõr nehe uje oyitɨm olakɨke hn nos wɨr kushjãro par uje otɨbey.
\v 6 Porrosht ahwoso tata uje yeẽk tatɨm Porrosht ɨm:
\p —¿Ɨnaapo heke shish uhu eyuwo tɨsɨ̃r oso? ¿Ɨnaapo heke sehe akashɨm õr?
\v 7 Owa uhu erze anjele ma õr ukurbosh je ese hnakɨrbich uje iich otsɨɨ Adán per uhu ɨre dich
\v 8 pork nos ebɨte erze kuche Adán ɨr hme.—
\p Uje Porrosht nos chɨbɨte erze kuche ɨr hme shuu ɨtsorz ich chɨbɨte ɨre par nos tɨbey erze kuche, per ele ahle ich ɨmeheeych uje ye oso otɨbey erze kuchepe.
\v 9 Per eyok eyucha Jesús. Porrosht nos sahmũr oso heke shuu Jesús ɨr ukurbo ɨtso oso õr ukurbo, ye ɨlo erze anjele õr ukurbope. Uje oso oshuu ɨre oshuu toy ich shuu Jesús dichpa pork wɨchɨ tooho osokite.
\v 10 Nos wɨr kuche uje Porrosht shiyokõrkite wɨr par ɨre. Ich om uje shuu Cristo ewenta erze uje oso oshiyokorɨ̃hɨ ɨre nehech oshuu oshuu toy par ɨshɨ oso õr hnɨtewɨhɨ Porrosht ahɨr. Heke ich ompa uje Cristo shuu okɨhniya omasaha par Porrosht aabo.
\v 11 Cristo wɨchɨ uje shuu eyok Porrosht aabo. Cristo ɨr Deych wɨchɨ Porrosht hn wɨchɨ eyok Deych toy, heke Cristo ye poym eyok uje chii eyok leshɨboho.
\v 12 Porrosht ahwoso tata uje Cristo tatɨm Deych ɨm: —Titɨm pɨshɨbo owa eluu. Uje otakɨsho lawich par oteychãha owa ich yok de õr ahɨr toy hn tɨkeeychɨ teẽt imno tɨkeeychãha owa.—
\v 13 Porrosht ahwoso tatpo ɨm: —Cristo tatɨm Deych ɨm: “Ye tokotiis owape.”— Hn Porrosht ahwoso tata ɨm: —Cristo tatɨm Deych ɨm: “Yok de lɨka hõr wɨr aabo uje asɨm yokni.”—
\v 14 Eyok ẽro de hn eyok armɨsta de heke Cristo ɨr ẽro de hn ɨr armɨsta de toy par uje pwele tooho krus eeych. Uje tokite ich sɨhna ese dyablo ɨr ukurbo uje shuu oso otoy.
\v 15 Nos wɨr oso shish otola uje otoy per Cristo tooho õrkite par uje ye duhu otolape uje otoy.
\v 16 Ich ũru uje ye tɨrẽt petɨkni par sosɨr erze anjele. Shɨ tɨrẽt par uje sosɨr erze uje otãra Abraham, hn erze uje ye olotiis Porrosht shɨ õr ɨtso Abraham uje ye lotiispe
\v 17 heke shuu Cristo hnakɨrappa ɨtso erze uje otãra Abraham par uje chuuna uje oso õr losuhlaabo. Heke ɨre masaha par Porrosht ɨbɨk uje iich otsɨɨ saserdote uje sosɨr oso hn shish shiyokõr Porrosht ɨbiyo par uje ɨshɨ oso õr hnɨtewɨhɨ Porrosht ahɨr.
\v 18 Cristo ewenta uje oso sehe oduhu niyokõr uje mɨhnũwo heke ele ahle pwele takashɨm erze uje yewo sehe oduhu oniyokõr uje mɨhnũwo.
\c 3
\s Cristo wɨchɨ ma dich je Moisés.
\p
\v 1 Pɨshɨbo watsaklo, olak uje olak Porrosht aabo, wɨchɨ chiihla olak par ahakõrlo uje ɨre sahmũr. Sehe tuu olak eyucha Jesús. Porrosht shuu tɨrẽtkite hn shuu wɨchɨ saserdote par uje shish takashɨm eyok uje ye yotiislo ɨrpe.
\v 2 Porrosht chiihla Moiseskite hn wɨchɨ nos shiyokõr erze obiyo uje ɨshɨm ɨre uje de erze israel oso õr ahɨr. Erze israel oso wɨr shɨ ɨtso Porrosht ihyuch. Porrosht chiihla Jesús toy hn wɨchɨ nos shiyokõr ɨr ɨbiyo shɨ ɨtso Moisés.
\v 3 Per Jesús wɨchɨ ma dich je Moisés shɨ ɨtso ese hnakɨrbich uje shiyokõr pwertɨt wɨchɨ ma bale je ese pwertɨt.
\v 4 Nos wɨr pwerto uje de shish yeẽk de uje shiyokõr, per Porrosht wɨchɨ uje nos shiyokõr erze kuche.
\v 5 Moisés shish shiyokõr uje Porrosht tatɨm ɨre. Shiyokorãha erze israel oso uje õr ɨtso Porrosht ihyuch. Moisés wɨchɨ Porrosht ɨbɨk uje tatɨm oso erze kuche uje Porrosht tatɨm ɨre uje tyenɨj shuu tokole nehe.
\v 6 Cristo shish shiyokõr uje Porrosht tatɨm ɨre toy. Shiyokorãha erze oso toy uje õr ɨtso Porrosht ihyuch, per wɨchɨ uu Porrosht Ijɨt pisht, ye ɨlo Moisespe uje shɨ Porrosht ɨbɨk. Eyok Porrosht ɨr ihyuch uje ye yotiislo Cristo hn yitɨm oso uje eyok owich de Porrosht ahɨr.
\s Porrosht aabo õr owich de par otsakaha.
\p
\v 7 Titɨm olak uje Porrosht ahwoso tata uje ɨr Ɨchɨbich tatɨm oso ɨm:
\p —Ele ahle uje ẽntlo uje Porrosht tata
\v 8 ye uhu olak hu kata ɨlo erze israel oso uje ye onahmũr otẽr uje Porrosht tatɨm õrkite. Wɨr otsepɨ Porrosht uje odechɨ ese hnɨmich uje ɨsa.—
\v 9 Hn Porrosht tata ɨm: —Olak poruwo wɨshɨ omo erze kuche uje tiyokõr nehech kwarenta ãyo uje ode wahacha ese hnɨmich uje ɨsakite per shish otsepɨ yok.
\v 10 Heke erze israel oso oshuu tiispulo. Tiita uje erze oso ich shish õr hu kata. Shɨ sehe oniyokõr uje õr ɨre otsahmũr. Ye odɨraha pɨluupe.
\v 11 Heke towãha õr par uje ye tokosɨm õr ese hnɨmich par otsakaha uje tɨbɨte pahwoskite par tokosɨm erze uje otãra Abraham.—
\p
\v 12 Pɨshɨbo watsaklo, abeylshɨp olak par uje ye olak yeẽk duhu deyuwo mɨhnũwo hn lotiis uje Porrosht tata hn iim Porrosht uje ɨka.
\v 13 Per kal deeych shish tyenɨj akɨtloye nehech terɨhɨ uhurc par uje nĩhyok olak yeẽk shuu erze kuche mɨhnũwo yakaha ɨre.
\v 14 Kɨmɨjɨ ye yotiislo Cristo nehech terɨhɨ uhurc ich eyok owich de Porrosht ahɨr.
\v 15 Porrosht ahwoso tata shuu ɨtsorz: —Ele ahle uje ẽrlo uje Porrosht tata ye uhu olak hu kata ɨlo erze israel oso uje oshuu dehe katakite.—
\v 16 Olak eyucha erze uje ochunt Porrosht ahwoskite hn oshuu dehe kata. Nos wɨr israel oso uje Moisés chiyuhu orɨ̃hɨ erze egipto oso õr hnɨmichkite wɨr uje oshuu dehe kata.
\v 17 Olak eyucha erze uje Porrosht sowãha õrkite nehech terɨhɨ kwarenta ãyo. Wɨr shɨ erze israel oso uje oshiyokõr uje ich mɨhnũwo. Wɨr otooho ese hnɨmichkite uje ɨsa.
\v 18 Olak eyucha erze uje Porrosht chɨbɨte lahwoso par uje ye dosɨm õrpe ese hnɨmich par olebuhu. Wɨr shɨ erze uje ye oniyokõrpe uje ɨre sahmũr.
\v 19 Ich ɨmeheeych uje ye õr pwele omasaha ese hnɨmichpe pork otsotiis Porroshtkite.
\c 4
\p
\v 1 Heke titɨm olak erze Porrosht ahwoso uje chɨbɨtkite par uje otsakaha ɨtso uje ɨre sakaha pork yahpaa dihyerupe. Abeylshɨp olak. Heke uje terɨhɨ ese uhurc nehe ich nĩhyok ye olak yeẽk nihyokɨ̃hɨ ese owichpe.
\v 2 Otatɨm eyok erze ahwoso uje ich om shɨ ɨtso uje otatɨm eyok poruwo wɨshkite per par õr ɨre ich ye jukur pork otsotiis.
\v 3 Per eyok uje ye yotiispe uje otatɨm eyok ich eyok owich de Porrosht ahɨr uje ɨre sakaha. Porrosht ahwoso tata uje ɨre chɨbɨte lahwoso ɨm: —Towãha õr heke tɨbɨte pahwoso par uje ye tuu omasahape ese owich uje yok tiyakaha.— Uje Porrosht chɨmɨt uje shiyokõr ɨrmõkite ich chɨmɨt toy ese owich par uje otsakaha.
\v 4 Porrosht ahwoso tata ɨm: —Uje terɨhɨ deeych syetekite ich Porrosht sakɨr pork nos chɨmɨt debiyo.— Heke ich ɨmeheeych uje owich de par uje otsakɨr.
\v 5 Hn Porrosht ahwoso tata toy ɨm: —Ye tuu wɨr omasahape ese owich uje yok tiyakaha.—
\v 6 Erze oso webich oso uje ochunt erze ahwoso uje ich om ich ye omasahape pork ye oniyokõrpe uje Porrosht sahmũr heke shish owich dechɨ par yewo omasaha.
\v 7 Porrosht chɨbɨte uje deeych yet nehe hn yewo omasaha ese owich pork osdeyo uje ye omasaha petɨkkite heke shuu David chichew lahwoso ɨm: —Ele ahle uje ẽntlo uje Porrosht tata ich ye uhu olak hu kata.— Ese deeych yet nehe uje tatni wɨchɨ ele ahle.
\v 8 Josué hnoy erze israel oso seya õr Canaankite. Canaan ye wɨchɨ owichpe uje Porrosht sakaha heke tatɨm David uje deeych yet nehe hn omasaha ese owich uje ɨre sakaha.
\v 9 Heke shish owich de par erze uje ye olotiis Porroshtpe par uje otsakaha
\v 10 pork uje yeẽk masaha ese owich uje Porrosht sakaha ich iim debiyo shɨ ɨtso Porrosht uje iim debiyo.
\v 11 Heke tyenɨj yiyuhulo eyok par uje yomsahalo ese owich hn yiyakahalo par uje nĩhyok eyok yeẽk ɨlo erze uje ye oniyokõrpe uje Porrosht tata heke ye omasahape.
\v 12 Porrosht ahwoso ɨkɨrĩt de hn chish obiyoho õr aho. Wɨchɨ shɨ ɨtso kɨskɨrehet uje ich watakpa. Ma watak je espada uje otsata pɨt hn pɨt yet heke wɨchɨ nos chɨbɨte õr ɨluu orhõta hn chɨbɨte orhõta toy erze uje de õr eyuwo shɨ ɨtso uje sehek yeẽk ehet hn shuu ɨr ɨkɨrĩt tɨ̃r pɨt hn ɨr ɨchɨbich tɨ̃r pɨt yet, hn sehek lebiyo par uje ye duhu lakaha lalerzpe, hn sehekpo ese uje de lebiyo ehet. Heke chɨbɨte eyok eyuwo hn ɨluu orhõta.
\v 13 Porrosht nos shiyokõr wɨr kuche heke ich nĩhyok ye latɨk pwele uje sakɨs ɨre. Nos ɨmeheeychɨhɨ Porrosht ɨle ɨkɨch. Deeych yet nehe hn nos tyenɨj yɨtɨ̃r Porrosht ɨle ɨkɨch hn yitɨm ɨre uje yiyokõrlo.
\s Jesús wɨchɨ Porrosht ɨbɨk uje iich otsɨɨ saserdote pisht.
\p
\v 14 Titɨm olak uje eyok saserdote de uje ich dichpa. Hno tɨ̃r poõrzkite. Wɨchɨ Jesús uu Porrosht Ijɨt pisht. Heke shish tyenɨj ye yotiislo ɨre hn yitɨmlo oso yewo toy.
\v 15 Eyok saserdote chuuna uje ye eyok ukũrbɨrsh hn takashɨm eyok pork uje ehn wɨchɨ de ɨrmõkite ich sehe oduhu niyokõr uje mɨhnũwo shɨ ɨtso uje sehe oduhu yiyokõrlo uje mɨhnũwo toy per wɨchɨ yelɨj niyokõr uje mɨ̃hnɨk.
\v 16 Heke ye yɨtɨla uje yapur Porrosht erze kuche uje eyok nesita. Tyenɨj yiyokõr yuhu ɨtso uje yɨtɨ̃r Porrosht ɨle ɨkɨch uje sakaha debɨta eeych. Wɨchɨ chuuna uje eyok losuhlaabo heke uje eyok nesita kuche ich takashɨm eyok.
\c 5
\p
\v 1 Porrosht chiihla erze israel oso nohmɨr nohmɨr uje õr hnakɨrbo par omasaha par ɨr ɨbiyo uje iich otsɨɨ saserdote bahlut pisht. Wɨchɨ uje hnoy erze kuche uje oso oshɨmɨhɨ Porrosht, hn ɨshɨm Porrosht erze loshɨpo uje oshuu par erze kuche mɨhnũwo uje õr ɨre oshiyokõr par uje Porrosht perdonar õr.
\v 2 Ye ɨr ukũrbɨrsh pork shɨ hnakɨrap ɨtso erze oso yewo hn shiyokõr mɨhnũwo ɨtso õr heke pwele hneta erze uje ye odɨraha uje mɨ̃hnɨk hn shɨ oshiyokõr hn erze uje onãha.
\v 3 Ese uje ɨr ɨbiyo iich otsɨɨ saserdote shɨ hnakɨrap heke tyenɨj shuu loshɨpɨt toy par ɨshɨm Porrosht par erze kuche mɨhnũwo uje shiyokõr par Porrosht perdonar ɨre shɨ ɨtso uje ɨshɨm Porrosht par erze oso yewo toy.
\v 4 Ye latɨk dɨbɨte ɨre par masaha hn shiyokõr erze obiyo uje iich otsɨɨ saserdote. Shɨ Porrosht wɨchɨ uje pwele chiihla yeẽk par saserdote shɨ ɨtso uje chiihla Aaronkite.
\v 5 Cristo ɨtspo, ye dɨbɨte ɨrpe par saserdote uje ich dichpa. Shɨ Porrosht wɨchɨ uje chiihla ɨre hn tatɨm ɨm: —Owa uu yok Pijɨt. Ele ahle tuu amsaha par ahakõr pɨbiyo heke tuu owa shũrha.—
\v 6 Porrosht ahwoso tatehe owich yetpo shuu ɨtsorz: —Porrosht ɨm: “Owa saserdote uje yelɨj ehna owa. Shɨ owa saserdote ɨtso Melquisedec.”—
\v 7 Uje ehn Cristo de nãhu ɨrmõkite ich orar sapur Porrosht ich sɨhnew. Ich yerh uje sapur Porrosht pork chɨraha uje wɨchɨ ukurbo de par takashɨm ɨre kɨmɨjɨ nahmũr par uje ye tope. Wɨchɨ tola Porrosht heke Porrosht tẽr ɨre.
\v 8 Jesús wɨchɨ Porrosht Ijɨt pisht per uje oshiyokõr mɨhnɨkɨ̃hɨ ɨre ich ewenta hn shish shiyokõr uje Porrosht sahmũr
\v 9 hn yelɨj niyokõr uje mɨ̃hnɨk heke shɨ ɨre nohmɨra uje ɨshɨm ɨkɨrĩt uje yelɨj nɨhna ɨre erze uje oshiyokõr uje ɨre tata.
\v 10 Porrosht chiihla wɨchɨ par saserdote uje ich dichpa shɨ ɨtso Melquisedec.
\p
\v 11 Kuche de ich kɨhniya uje sehe oyitɨm olak uje Cristo wɨchɨ saserdote shɨ ɨtso Melquisedec per olak shɨ olak ɨtso armo heke ye õryok pwele oyuhu erahalope.
\v 12 Ich osdeyo uje olak Porrosht aabo heke tyenɨj ahakorãhalo yewo per olak nesita uje yeẽk shiyokorãha olakpo erze uje oyiyokorãha olak wapni. Shɨ olak ɨtso pɨkɨhnino ijaabo uje yesh ochuku pork yahpaa õr pwele uje otaakpe.
\v 13 Erze uje shɨ õr ɨtso pɨkɨhnino ijaabo uje yesh ochuku wɨr uje yẽrɨj odɨraha Porrosht ahwoso.
\v 14 Per erze uje ich õr deyo otew erze oposo pisho. Erze uje oyɨteẽtaka shuu ɨmeheeych uje erze uje sehe oyitɨm olak wɨr shɨ par erze uje õr eyuwosh pork shish õr prowa nehech ochɨraha uje ich om hn ye onahmũr uje ich mɨhnũwo.
\c 6
\s Ich yarhak par ese uje tatɨm yewo par shuu oym Cristo.
\p
\v 1 Titɨm olak. Oyiyokorãha olak Cristo oyuhu erahalo pɨkaapni per ele ahle sehe oyuhu erahalo ma nehech olak eyuwo ɨtso hnakɨrbo. Ye nesita oyiyokorãha olakpo erze uje oyiyokorãha olakni par uje moymlo kuche mɨhnũwo hn ye otiislo Porrosht.
\v 2 Oyiyokorãha olakni uje otohɨrm oso, hn ochɨbɨte nahme olak hu eeyo. Oyiyokorãha olak toy uje topo tyenɨj õr ɨkpo nehe, hn oyiyokorãha olak uje Porrosht tyenɨj chɨbɨte wɨr õr urhuta bahluta ehet nehe erze uje otsotiis ɨre hn shish odechɨ.
\v 3 Kɨmɨjɨ Porrosht nahmũr ich oyiyokorãha olak kuche ahlo
\v 4 pork ye eyok pwele yuhu yewo ocheeshɨ oteeychãha Porrosht erze uje ochuntni uje Jesús ɨshɨ õr hnɨtewɨhɨ Porrosht ahɨrkite, hn otsahmũr erze uje Porrosht shiyokõr par daabo, hn ochɨraha erze uje Porrosht Ɨchɨbich ɨshɨm daabo.
\v 5 Wɨr ochɨraha uje Porrosht ahwoso ich om hn ochɨraha uje Porrosht tyenɨj shiyokõr nehe chɨ̃ra lakɨrbo,
\v 6 per kɨmɨjɨ wɨr onoympa Porrosht hn otatɨm oso ɨtsorz ich ye pwelpe uje shuu ocheeshpo pork wɨr oshiyokõr shɨ ɨtso uje ochowɨshɨhɨ Porrosht Ijɨt krus eeychpo hn oshuu oso ochish majamichɨhɨ Cristo.
\v 7 Nos wɨr Porrosht aabo shɨ õr ɨtso ese hnɨmich uje iin yuwebo ɨlote hn shuu jõro tokole par erze uje ochukwẽr, hn erze jõro ee de. Nos wɨr erze uje om tãra Porrosht.
\v 8 Per kɨmɨjɨ ese hnɨmich shɨ wontɨ tokolɨhɨ hn shɨ pohɨr wontɨ tokolɨhɨ ich ye jukur. Ich yarhak uje hnɨmich yɨnsɨrc sajɨ̃r ese hnɨmich ɨkiyo hn sẽru. Ese hnɨmich ich shɨ ɨtso erze oso uje oym Porrosht.
\v 9 Pɨshɨbo watsaklo, oyitɨm olak oyuhu ɨtsorzɨke per oyotiis uje olak ɨtso ese hnɨmich uje shɨ wontɨ tokolɨhɨ per erze om uje tãra Porrosht tyenɨj tɨ̃r olak pork ye otiislo ɨrpe.
\v 10 Porrosht shish shiyokõr uje ich om heke ye dɨkeype ɨr ɨbiyo uje ahakõrloni hn ye dɨkeype uje ahmũrlo Porrosht aabo yewo hn akashɨmlo õr, hn shish ahakõrlo.
\v 11 Oyahmũr uje kal olak nohmɨr nohmɨr shish shiyokõr uje Porrosht sahmũr nehech terɨhɨ uhurc nehe hn Porrosht ɨshɨm olak ese uje chɨbɨtkite.
\v 12 Heke ye oyahmũrpe uje olak yeẽk shuu ɨre tok per sehe oyuhu eẽtlo erze uje ye olotiis Porroshtpe hn ye atarãhalo nehech Porrosht ɨshɨm olak erze uje chɨbɨtkite.
\p
\v 13 Uje Porrosht chɨbɨte lahwoskite tatɨm Abraham ich nĩhyok uje yeẽk ma dich je Porrosht par shuu ɨmeheeych uje ɨr ahwoso ich ũru heke Porrosht shɨ eyucha ɨre uje tatɨm Abraham
\v 14 ɨm: —Ich yok uje titɨm owa uje tiyuhu pahwoso omoho owa hn tuu oso okɨhniya uje otãra owa nehe.—
\v 15 Heke Abraham ye tarãhape ese uje Porrosht chɨbɨte lahwoskite par ɨshɨm ɨre nehe nehech terɨhɨ ɨshɨrĩt hn ɨshɨm ɨre.
\v 16 Uje oso ochɨbɨte lahwoso par uje sehe oniyokõr kuchɨt ich ochiyuhu yet ɨr iich uje ich ma dich je õr par uje oshuu ɨmeheeych uje õr ahwoso ich ũru. Uje ochiyuhu yet ɨr iich oshuu ɨtsorz ich oym uje oshiyokosye.
\v 17 Porrosht sehe duhu ma ɨmeheeych uje ich ũru erze uje chɨbɨte lahwoskite par ɨshɨm õr heke Porrosht eyucha ɨre uje tatɨm õr.
\v 18 Erze kuche osiyer uje ye duhu kɨnãhape wɨchɨ ɨre hn ɨr ahwoso heke ich ɨmeheeych uje ye Porrosht nehnyẽr õrpe. Eyok uje ye yotiis Porrosht ich yɨrahalo uje eyok owich de ɨre ahɨr. Eyok aho kɨɨs pork tatɨm eyok erze kuche uje osiyer par shuu yɨrahalo uje eyok owich de ɨre ahɨr.
\v 19 Yɨrahalo erze uje Porrosht tata ich ũru. Eyok ye yotiispe erze ahwoso uje Porrosht tata heke ye eyok koswãhape per eyok ɨtso pohorrza uje ankla sontew par uje ye tɨ̃r lekɨtiyope. Ese uje ɨtso eyok ankla tẽhi wahacha poõrc templo ehet bortɨsht pɨt uje iich otsɨɨ kortina uje Porrosht de.
\v 20 Wapkite Jesús iyebe tɨ̃r wahacha par sɨtsẽr ese dehet uje tɨ̃r Porrosht par uje shuu eyok owich de Porrosht ahɨr pork wɨchɨ masaha par saserdote uje ich dichpa hn yelɨj nɨhna ɨre. Wɨchɨ saserdote shɨ ɨtso Melquisedec.
\c 7
\s Jesús wɨchɨ saserdote shɨ ɨtso Melquisedec.
\p
\v 1 Ese Melquisedec wɨchɨ reyɨhɨchɨs dɨt Salem. Wɨchɨ saserdote uje teeychãha Porrosht uje ich ma dich. Abraham hõr ohno otatskɨ̃rkite erze reye uje ich okɨhniya hõr ohyerptoso hn otserz õr. Uje Abraham cheeshpo hn chishɨhɨ Melquisedec dehet pehet hn Melquisedec chiyuhu lahwoso omoho ɨre.
\v 2 Abraham nos sehek erze kushjãro uje serz shuu po dye hn ɨshɨm Melquisedec nohmet. Ese pɨt nohmet uje ɨshɨm ɨre iich otsɨɨ dyesmo. Ese Melquisedec ɨr iich tata uje ɨre rey uje shish shiyokõr uje ich om. Wɨchɨ reyɨhɨchɨs dɨt Salem hn Salem tata uje õr aho kɨɨs heke wɨchɨ rey uje shuu õr aho kɨɨs.
\v 3 Wɨchɨ nĩhyok ɨr deych hn nĩhyok ɨr data hn ye ɨr poruwɨ̃rsh. Shish ɨr ɨkɨrĩt de. Nĩhyok webich osht hn nĩhyok uhurzosht per wɨchɨ shɨ ɨtso Porrosht Ijɨt. Wɨchɨ shish saserdote. Yelɨj nɨhna ɨre.
\v 4 Uhu olak eyuwo tɨsɨ̃r uje ese Melquisedec wɨchɨ dichpa. Eyok porokkite Abraham sehek erze kuche uje serzkite shuu po dye hn chishew ese nohmet uje iich otsɨɨ dyesmo hn ɨshɨm Melquisedec.
\v 5 Shɨ israel oso uje otãra Leví wɨr uje omasaha par Porrosht ɨbiyo uje iich otsɨɨ saserdote. Erze ley uje Moisés chichewkite tata uje oso tyenɨj otsehek erze uje otserz hn oshɨm nohmet erze Porrosht ɨbiyo uje õr iich otsɨɨ saserdote hn wɨr õr ɨhnapsoye. Nos otãra Abraham
\v 6 per Melquisedec ye tãra Levipe per Abraham sehek erze uje serz hn ɨshɨm ɨre nohmet uje iich otsɨɨ dyesmo. Porrosht chɨbɨte lahwoskite uje tyenɨj ɨshɨm Abraham kuchẽrk per Melquisedec ma dich je Abraham hn Melquisedec chiyuhu lawhoso omoho Abraham.
\v 7 Ich ɨmeheeych uje shɨ ese uje ich ma dich pwele chiyuhu lahwoso omoho ese yet.
\v 8 Erze oso uje otserz kuche oshɨm dyesmo erze uje otãra Leví, hn erze uje otãra Leví shish otoy ɨtso eyok. Per Abraham ɨshɨm dyesmo ese Melquisedec. Otata uje Melquisedec shish ɨka.
\v 9 Erze israel oso oshɨm ɨr dyesmo erze uje otãra Leví. Uje Abraham ɨshɨm Melquisedec dyesmo ich eyok pwele yẽrza uje Leví ɨshɨm toy
\v 10 pork uje Abraham chishɨhɨ Melquisedec dehet pehet ich ehn yahpaa Leví tãra Abraham petɨkkite.
\p
\v 11 Porrosht shuu oshiyokõr debiyo erze uje otãra Leví. Erze ɨbiyo iich otsɨɨ saserdote heke nos ɨshɨm israel oso erze ley uje Moisés chichewkite. Kɨmɨjɨ erze saserdote hn erze ley doshɨ eyok hnɨtewɨhɨ Porrosht ahɨr ¿ich ɨnaapo heke Porrosht shuu Cristo tɨrẽtkite par masaha saserdote ɨtso Melquisedec? Ese Melquisedec ye tãra Leví hn Aaronpe.
\v 12 Kɨmɨjɨ Porrosht nos nontew erze saserdote õr ɨbiyo hn dɨbɨte saserdote yet uje ɨr ɨbiyo kɨnãho ich Porrosht tyenɨj shuu erze ɨr ley kɨnehe toy.
\v 13 Nos wɨr saserdote otãra Leví per Cristo ye tãra ɨrpe. Asa weeta uje Cristo tãra ye saserdõtɨrsh uje ochish obiyoho altar.
\v 14 Ich ɨmeheeych uje eyok Ɨrhĩch tãra Judá. Moisés ye tatɨm erze israel oso uje erze saserdote otãra Judá.
\v 15 Ich ɨmeheeych uje erze saserdote õr kɨnãho pork saserdote ahlt de uje ich shɨ ɨtso Melquisedec.
\v 16 Cristo masaha par saserdote per ye ley dɨbɨte ɨrpe. Wɨchɨ masaha par saserdote pork yelɨj nɨhna ɨre heke ɨr ukurbo de.
\v 17 Porrosht ahwoso tata uje Porrosht tatɨm Cristo ɨm: —Tuu amsaha par saserdote uje yelɨj nɨhna ɨre. Owa saserdote shɨ ɨtso Melquisedec.—
\v 18 Uje Porrosht tata shuu ɨtsorz ich iim erze ley uje ɨler pork ye ɨr ukũrbɨrsh hn ye jukur
\v 19 pork erze ley uje Moisés chichewkite ye doshɨ eyok hnɨtewɨhɨ Porrosht ahɨrpe. Per Porrosht shuu Cristo ɨshɨ eyok hnɨtewɨhɨ dahɨr hn shuu eyok owich de. Heke eyok pwele yɨtɨ̃r Porrosht ahɨr.
\v 20 Porrosht tata shuu ũrpa uje chɨbɨte Cristo par saserdote.
\v 21 Nos wɨr oso uje omasaha par saserdote shɨ ley wate uje chɨbɨte õr, per Cristo masaha par saserdote pork Porrosht tata shuu ũrpa uje chɨbɨte lahwoso tatɨm Cristo ɨm: —Yok Porrosht. Tɨbɨte pahwoso hn ye tuu peyuwo tɨsɨ̃r kɨnaha nehe. Owa saserdote uje yelɨj ehna owa.—
\v 22 Heke Jesús shuu yakaha erze uje Porrosht tata uje eyok owich de ɨre ahɨr per erze saserdote yewo ye õr pwele oniyokõr oduhu ɨlorzpe.
\v 23 Nos wɨr saserdote uje otãra Leví tyenɨj okɨhniya pork wɨr shɨ hnakɨrbo heke shɨ otoy hn yet tyenɨj masaha owich.
\v 24 Per Jesús yelɨj toy heke ye nesitpe uje saserdote yet masaha owich.
\v 25 Heke Cristo pwele tɨbey erze uje ye olotiis ɨrpe par uje shuu õr owich shish de Porrosht ahɨr pork ɨre shish ɨkɨrĩt de par sapur Porrosht par õr ɨre.
\v 26 Ich om uje Jesús wɨchɨ eyok saserdote uje ich dichpa. Ɨre yelɨj niyokõr uje mɨhnũwo, hn yelɨj duhu yeẽk niyokõr uje mɨhnũwo, hn ye kuche mɨhnũwo chɨhɨ ɨre ehetpe. Wɨchɨ de Porrosht ahɨr dukuhlehe erze uje oshiyokõr uje ich mɨhnũwo. Wɨchɨ ma dich je nos wɨr kuche uje de Porrosht ahɨr wahacha poõrc.
\v 27 Antni erze saserdote õr bahluwo shish oshuu loshɨpo par õr ɨre wap pork oshiyokõr uje ich mɨhnũwo hn oshuu loshɨpo toy par erze oso uje oshiyokõr uje ich mɨhnũwo. Per Cristo yelɨj duhu loshɨpo par ɨre pork yelɨj niyokõr uje mɨhnũwo. Wɨchɨ ɨshɨmɨhɨ ɨre par ɨshɨ oso õr hnɨtewɨhɨ Porrosht ahɨr hn ich ye niyokõrpo petɨk nehe.
\v 28 Erze oso uje omasaha par saserdote õr bahluwo shɨ omasaha pork ley tata. Wɨr oshiyokõr uje mɨhnũwo ɨtso erze oso yewo. Ich osdeyo uje asa ley de hn Porrosht chɨbɨte lahwoso shuu ũrpa uje ɨr Ijɨt masaha par saserdote. Wɨchɨ yelɨj niyokõr kuche mɨhnũwo hn yelɨj nɨhna ɨre.
\c 8
\p
\v 1 Nos wɨr erze uje oyitɨm olakɨke shɨ oyitɨm olak uje eyok Ɨrhĩch ich dichpa heke sakaha wahacha poõrc Porrosht waãchta. Ɨr ɨbiyo iich otsɨɨ saserdote.
\v 2 Wɨchɨ chish obiyoho ese tabernakulo pisht uje de poõrc. Eyok Ɨrhĩch shiyokõr ese tabernakulo uje de poõrc, ye hnakɨrbo oniyokõrpe.
\v 3 Erze saserdote õr bahluwo õr ɨbiyo wɨr par oshɨmɨhɨ Porrosht erze kuche uje oso otõhwa hn õr ɨbiyo toy wɨr par oshuu loshɨpo par erze õr kuche mɨhnũwo bahat uje oshiyokõr. Jesucristo wɨchɨ saserdote heke tyenɨj ɨshɨm Porrosht kuchẽrk toy.
\v 4 Kɨmɨjɨ Jesús ehn chɨhɨ ele hnɨmich ich ye wɨchɨ saserdotepe pork saserdote ode lɨka hnɨmich. Wɨr par oshɨmɨhɨ Porrosht erze kuche uje oso otõhwa shɨ ɨtso uje erze ley tata uje Moisés chichewkite.
\v 5 Erze saserdote shɨ ochishew obiyoho ese tabernakulo ehet uje shɨ ɨtso ese tabernakulo pisht uje de wahacha poõrc. Yɨraha uje ɨtsorz pork ese tabernakulo uje de lɨka hnɨmich shɨ oshiyokõr oshuu ɨtso ese uje de poõrc pork uje Moisés sehe duhu oniyokõr ese tabernakulo hn Porrosht tatɨm ɨre ɨm: —Uhu oniyokõr oduhu ɨlshɨp ese uje tokowa owa wahacha kojach eeychhna.—
\s Cristo ɨr ɨbiyo ma bale je erze saserdote yewo õr ɨbiyo.
\p
\v 6 Titɨm olak. Cristo ɨr ɨbiyo uje shiyokorɨ̃hɨ wahacha poõrc ich ma ukurbosh, ye ɨlo erze saserdote õr ɨbiyo uje oshiyokorɨ̃hɨ ele hnɨmich. Nos wɨr Porrosht ahwoso ich ũru per erze ahwoso ahlo uje chɨbɨte par shuu Porrosht ehet kɨɨsɨhɨ eyok wɨr ich ma ɨhɨ̃rtso, ye ɨlo erze ahwoso uje chɨbɨte par erze israel oso wapkite.
\v 7 Porrosht chɨbɨte lahwoso uje ich om per ye oso õr pwele oniyokõr uje tata heke chɨbɨte ahwoso ahlo.
\v 8 Porrosht umo uje shish oso onãha ɨr ahwoso uje ɨre chɨbɨtkite heke Porrosht ahwoso tata ɨm:
\p —Eyok Ɨrhĩch sole: “Deeych yet nehe hn tɨbɨte pahwoso ahlo par erze israel oso hn erze judea oso. Erze israel oso otsehek ɨrni hn yewo ode norte heke ochɨkẽra iich otsɨɨ israel oso hn erze yewo ode sur heke õr iich otsɨɨ judea oso.”
\v 9 Eyok Ɨrhĩch sole: “Erze pahwoso ahlo uje tyenɨj titɨm õr ye ɨlo erze pahwoso uje titɨm õr poruwo wɨshkite. Titɨm õr uje ehn tiyuhu orɨ̃hɨchɨs egipto oso õr hnɨmich shɨ ɨtso uje tishew õr hme hn takahi õr. Ich tɨbɨte pahwoso õrkite per õr ɨre ye oniyokõrpe uje titɨm õr heke tokoym õrni.”
\v 10 Hn eyok Ɨrhĩch sole: “Tɨbɨte pahwoso titɨm erze israel oso tuu ɨtsorz nehe. Tɨbɨte yok ley õr hu tuu ochɨraha hn tuu ɨtso uje tichew tɨbɨte õr aho. Tuu ochii yok ɨr Porroshtɨhɨ hn wɨr piiso.
\v 11 Deeych yet nehe hn tyenɨj nos ochɨraha yok heke nĩhyok yeẽk uje shiyokorãha yewo hnii uje oshiyokorãha leshɨbo par uje shuu ochɨraha yok. Tuu pɨkɨhnino ochɨraha yok hn tuu erze uje ich õr deyo ochɨraha yok toy.
\v 12 Yok perdonar õr erze kuche mɨhnũwo uje oshiyokõr hn ich ye peyuchape.”—
\p
\v 13 Uje Porrosht chiilehet hn chɨbɨte lahwoso ahlo ich shiyokõr shuu ɨtso uje ye jukur erze ɨr ahwoso uje tata wapkite. Ich ɨmeheeych uje wɨr ɨlaro heke ɨhɨrle ich sɨhna ɨre.
\c 9
\s Tabernakulo uje de hnɨmichkite hn ese uje de poõrc.
\p
\v 1 Oyitɨm olak. Uje Porrosht chɨbɨte lahwoso wapkite ich chɨbɨte ɨr ley uje tyenɨj oshiyokõr par uje oteeychãha ɨre hn shuu oshiyokõr ɨr tabernakulo toy par uje oteeychãha ɨre.
\v 2 Ese tabernakulo oshiyokõr ochɨ̃ra karpɨt oshuu aho osiyer. Ese ehet webich osht kuchɨt de shɨ par uje ochɨbɨte nampyon eeych hn nemest dechɨ toy uje ochɨbɨte pan uje oshɨmɨhɨ Porrosht. Ese owich iich otsɨɨ Santo.
\v 3 Bortɨsht de ese ehet uje shuu aho osiyer hn ese bortɨsht pɨt iich otsɨɨ Santísimo.
\v 4 Kejunt uje ich berzak dechɨ uje iich otsɨɨ altar. Ese altar ochɨbɨte oro eeyo shɨ ɨtso uje ochũshur. Wɨchɨ par uje otserũhu kuche uje aat ehmuuj. Kejunt yet dechɨ toy uje iich otsɨɨ owich par Porrosht ahwoso. Wɨchɨ kejunt oro de eeyo ɨtso uje ochũshur, hn jarta dechɨ ese kejunt ehet uje oshiyokõr ochɨ̃ra oro. Maná de asa jarta ehet. Aarón ɨr ɨtɨlta uje pohnakite hn eesh dechɨ ese kejunt ehet toy. Erze kojano po uje ɨtso tabla dechɨ ehet toy. Porrosht chichew chɨbɨte ɨr ley erze kojano po eeyokite.
\v 5 Ese kejunt ɨr uhurrza shɨ oro hn oshiyokõr kuchẽrk uje iich otsɨɨ kerubines ochɨ̃ra oro uje iyehetɨhɨ asa uhurrza eeych. Õr ĩhyo terɨhɨye. Wɨr Porrosht ɨr kerubines, hn asa uhurrza wɨchɨ owich uje sosɨr oso ɨshɨ õr hnɨtewɨhɨ Porrosht ahɨr. Ele ahle ich ye õryok pwelpe par oyiita ma erze kuche.
\v 6 Uje erze israel oso ochɨmɨt ese tabernakulo uje oshiyokõr ich aho osiyer de ehet. Erze saserdote shish omasaha ese ehet webich osht par oshiyokõr debiyo,
\v 7 per shɨ erze saserdote õr bahlut pisht pwele masaha ese ehet yet uje dechɨ pɨt. Shɨ deeych nohmɨra kal ãyt ich masaha wahacha hn shɨ uje tõhwa kuche armɨsta par ɨshɨ erze ɨr kuche mɨhnũwo ɨr bahat uje shiyokõr hn par ɨshɨ erze israel oso õr bahat uje ye odɨrehepe kɨmɨjɨ mɨ̃hnɨk per oshiyokõr.
\v 8 Heke Porrosht Ɨchɨbich shuu ɨmeheeych uje nĩhyok ye oso õr pwele otaachɨ̃hɨ Porrosht ahɨr pork bortɨsht shuu ese tabernakulo aho osiyer hn sontew õr.
\v 9 Nos wɨr erze uje titɨm olakɨke wɨr shɨ tɨteẽta ele ahle uje Porrosht chɨbɨte lahwoso ahlo. Antni erze kuche uje oshɨmɨhɨ Porrosht par oteeychãha ɨre hn erze loshɨpo uje oshuu par õr kuche mɨhnũwo bahat uje oshiyokõr wɨr ye pwele churhũ õr ahope pork shish ochuuna uje oshiyokõr uje ich mɨhnũwo.
\v 10 Wɨr shɨ ley uje tata erze poso uje oso õr pwele otew hn erze uje õr pwele oho hn tatɨm õr par uje otɨsoho awɨt. Wɨr shɨ ley uje Porrosht shuu oso oshiyokõr nehech terɨhɨ ɨshɨrĩt uje chɨbɨte lahwoso ahlo.
\p
\v 11 Cristo tɨrẽtkite heke ele ahle wɨchɨ saserdote uje ich dichpa wahacha poõrc par ɨshɨm Porrosht aabo erze uje ich om. Wɨchɨ chish obiyoho ese tabernakulo uje de poõrc uje ich ma om uje ye oso oniyokõrpe. Ese tabernakulo ye ɨ̃rmo ospe.
\v 12 Cristo masaha ese tabernakulo ehet per ye dosɨm Porrosht kabɨrt armɨsta hn ye dosɨm wõjɨt armɨstape. Shɨ ɨshɨm narmɨsta hn yelɨj deeshpo masaha par shiyokõrpo. Wɨchɨ ɨshɨ eyok hnɨtewɨhɨ Porrosht ahɨrkite heke eyok ɨkɨrĩt de uje yelɨj nɨhna ɨre.
\v 13 Erze wõjo itokohlo ɨr armɨtsɨ hn erze kabɨr ɨr armɨtsɨ uje saserdote otsɨta oso ochɨ̃ra, hn asa wõjɨta uje otsẽru uu ɨr piitsɨt ochɨmchaha awɨt hn otsɨta oso ich shuu õr owich om par uje õr pwele omasaha templo patikɨt ehet.
\v 14 Mahn Cristo yelɨj niyokõr uje mɨ̃hnɨk. Porrosht Ɨchɨbich de ɨre ehet hn shuu ɨshɨmɨhɨ ɨre par uje oshuu oshuu toy par ɨshɨ õr hnɨtewɨhɨ Porrosht ahɨr. Ɨr armɨsta ich ma ukurbosh je nos wɨr loshɨpo ɨr armɨtsɨ par uje ɨshɨ erze kuche mɨhnũwo ɨr bahat uje yiyokõrlo par uje yiyokõr uje Porrosht sahmũr. Porrosht wɨchɨ shish ɨka.
\p
\v 15 Heke Jesús shuu Porrosht ehet kɨɨsɨhɨ eyok pork shuu yakaha erze ɨr ahwoso ahlo uje Porrosht chɨbɨtkite. Heke erze oso uje Porrosht chiihla õrkite ich õr ɨkɨrĩt de uje yelɨj nɨhna ɨre pork uje Jesús toy ich ɨshɨ õr hnɨtewɨhɨ Porrosht ahɨr. Wɨr oshiyokõrni uje ich mɨhnũwo pork ye oniyokõrpe erze ley uje Moisés chichewkite.
\v 16 Uje yeẽk shiyokõr ɨr hutɨta chɨbɨte lahwoso uje tata uje toy nehe hn ese yet hnoy ɨr kushjãro per ye pwele doype erze kushjãro nehech nos ochɨraha uje wɨchɨ toy.
\v 17 Asa hutɨta uje chichew par uje ɨshɨm yet ɨr kushjãro ich ye jukur uje ehn ɨr ɨka, per uje toy ich wɨchɨ pwele hnoy ɨr kushjãro uje ɨshɨmni.
\v 18 Heke erze ahwoso uje Porrosht chɨbɨte wapkite shɨ uje oshuu loshɨpo oshuu toy hn ɨr armɨtsɨ noshɨ ich ɨr ahwoso ukurbosh.
\v 19 Uje Moisés nos tatɨm erze israel oso erze ley ich shuu wõjo hn kabɨr hn shuu ɨr armɨtsɨ ĩya yẽr hn shuu awɨt ĩya hn chɨpeẽsa obeje wesho ese phich uje iich otsɨɨ hisopo hn sakehe asa armɨsta ehet hn sɨta pɨkaap asa hutɨta waa je ley de hn nos sɨta wɨr oso shuu pɨkaap.
\v 20 Moisés tatɨm erze israel oso ɨm: —Ana armɨsta shuu olak owich om par ahakõrlo uje Porrosht tatɨm olak.—
\v 21 Moisés sɨta pɨkaap ese tabernakulo chɨ̃ra armɨsta toy hn nos sɨta erze kuche uje ochɨ̃ra par oteeychãha Porrosht.
\v 22 Erze ley uje Moisés chichewkite tata uje nos wɨr kuche uje ochɨ̃ra hn oteeychãha Porrosht wɨr uje sɨta chɨ̃ra armɨsta, shɨ sohmɨramo de uje ye dɨtape. Kɨmɨjɨ nĩhyok kuche uje oshuu oshuu toy hn ɨr armɨsta noshɨ par ɨshɨ bahat ich ye perdontɨkɨsh par erze kuche mɨhnũwo uje oshiyokõr.
\s Cristo tokite par ɨshɨ oso õr hnɨtew.
\p
\v 23 Titɨm olak. Ese tabernakulo hn erze kuche uje de ehet wɨr shɨ ɨtso uje de poõrc heke tyenɨj sɨta chɨ̃ra armɨsta par uje oteeychãha Porrosht. Per ese tabernakulo pisht hn erze kuche uje de ehet de wahacha poõrc heke nesita kuchɨt armɨsta uje ich ma om je loshɨpo armɨsta.
\v 24 Cristo ye masahape ese tabernakulo uje oso oshiyokõr. Wɨchɨ shɨ ɨtso ese tabernakulo pisht uje de wahacha poõrc. Cristo masaha poõrc hn tɨ̃r Porrosht ahɨr par uje takashɨm eyok.
\v 25 Uje kal terɨhɨ ãyt ich ese saserdote õr bahlut pisht uje de lɨka ɨ̃rmo hnoy armɨsta seya tabernakulo ehet. Asa armɨsta ye saserdote ɨr armɨtsape, per Cristo hnoy narmɨsta seya tabernakulo pisht ehet shɨ shuu owich nohmɨra. Ye doype kal ãyt duhu ɨre ɨlo ese saserdote õr bahlut pisht.
\v 26 Kɨmɨjɨ kal ãyt Cristo doy narmɨsta deya tabernakulo ehet ɨtso õr uje oshiyokõr ich shish Cristo tyenɨj toy kal ãyt shiyehe uje shiyokõr ɨrmõkite nehech ele ahle per ɨre ye niyokõr duhu ɨlorzpe. Per uje terɨhɨ ɨshɨrĩtkite ich Cristo tɨrẽt shɨ shuu owich nohmɨra hn ɨshɨmɨhɨ ɨre par uje oshuu oshuu toy hn ɨshɨ õr hnɨtewɨhɨ Porrosht ahɨr.
\v 27 Porrosht chɨbɨte uje nos wɨr oso shɨ owich nohmɨra uje otoy hn otɨ̃r Porrosht ɨle ɨkɨch nehe hn wɨchɨ teychɨm õr kɨmɨjɨ oniyokõr uje mɨhnũwo o kɨmɨjɨ ye oniyokõrpe.
\v 28 Heke Cristo ɨshɨm ɨre par uje oshuu oshuu toykite shɨ owich nohmɨra par uje ɨshɨ oso õr hnɨtewɨhɨ Porrosht ahɨr ich okɨhniya. Wɨchɨ tyenɨj cheeshpo nehe per ye par uje ɨshɨ õr hnɨtewpe. Shɨ tyenɨj cheeshpo nehe par uje hnoy erze uje oyem ɨre.
\c 10
\p
\v 1 Erze uje asa ley tata waa je Moisés chichewkite wɨr shɨ sɨteẽta per erze uje ich ũru iyehe erze ley nẽr. Erze uje iyehe nẽr wɨr uje ich ɨhɨ̃rts pisho uje Cristo shiyokõr. Kal ãyt ich erze ley shuu oshuu loshɨpo par uje ɨshɨ õr hnɨtewɨhɨ Porrosht ahɨr per yelɨj doshɨ õr hnɨtew erze uje sehe odɨtɨ̃r ɨre Porrosht.
\v 2 Kɨmɨjɨ loshɨpo armɨtsɨ doshɨ õr hnɨtewɨhɨ Porrosht ahɨr ich ye nesitpe uje erze israel oso õr saserdote shish oshuu loshɨpo kal ãyt par õr. Kɨmɨjɨ erze loshɨpo ɨr armɨtsɨ doshɨ õr hnɨtew ich ye onuunape uje oshiyokõr uje ich mɨhnũwo,
\v 3 per kal ãyt shish shuu loshɨpo heke shɨ shuu õr eyucha erze mɨhnũwo uje oshiyokõrni
\v 4 pork erze wõjo itokohlo ɨr armɨtsɨ hn kabɨr ɨr armɨtsɨ wɨr ye pwele doshɨ õr hnɨtewɨhɨ Porrosht ahɨrpe.
\v 5 Heke uje Cristo tɨ̃r ɨrmõkite hn tatɨm Porrosht ɨm:
\p —Ye ahmũrpe uje oshuu loshɨpo par oteeychãha owa hnii uje oshɨmɨhɨ owa kuche, per asɨm yok piyũhurrzani uhu ɨtso oso par uje tokoshɨ õr hnɨtewɨhɨ ahɨr.
\v 6 Ye ahmũrpe erze loshɨpo uje otsẽru par oteeychãha owa, hnii erze loshɨpo uje oshuu par oshɨ õr hnɨtewɨhɨ ahɨr.—
\v 7 Heke Cristo tatɨm Porrosht ɨm: —Dii Porrosht hmeychɨm, tɨkɨrẽt tɨtɨ̃r ɨ̃rmo par tiyokõr uje ahmũr. Uhu ochichew ahwosni hn tata uje tyenɨj tiyokõr tuu ɨtsorz.—
\p
\v 8 Uje Porrosht ahwoso tata uje ye Porrosht nahmũrpe erze loshɨpo uje oshuu par oteeychãha ɨre hnii erze kuche yewo uje oshɨmɨhɨ ɨre hnii erze loshɨpo uje otsẽru par oteeychãha ɨre hnii erze loshɨpo uje oshuu par oshɨ õr hnɨtewɨhɨ ɨre ahɨr, per wɨr shɨ oshiyokõr pork ley tata,
\v 9 heke Cristo tata ɨm: —Hmeychɨm, Tɨkɨrẽtni par tiyokõr uje ahmũr.— Uje tata shuu ɨtsorz ich shuu ye jukur erze ɨluu ɨler par uje ɨluu ahle masaha owich.
\v 10 Jesucristo shiyokõr uje Porrosht sahmũr heke shuu eyok yomsaha par Porrosht aabo pork wɨchɨ ɨshɨmɨhɨ ɨre oso par uje oshuu oshuu toy hn ɨshɨ eyok hnɨtewɨhɨ Porrosht ahɨrkite shɨ owich nohmɨra.
\v 11 Nos wɨr israel oso õr saserdote shish oyehetɨhɨ wahacha templo patikɨt ehet par oshuu loshɨpo par uje ɨshɨ oso õr hnɨtewɨhɨ Porrosht ahɨr per erze loshɨpo uje oshuu ye doshɨ õr hnɨtewɨhɨ Porrosht ahɨrpe.
\v 12 Per shɨ owich nohmɨrshɨp Cristo ɨshɨmɨhɨ ɨre erze oso par uje oshuu oshuu toy hn ɨshɨ eyok hnɨtewɨhɨ Porrosht ahɨr. Uje ɨshɨkite ich sɨhna debiyo hn hno sakaha Porrosht waãchta pork wɨchɨ ich dich toy.
\v 13 Ele ahle Cristo shɨ iyem uje Porrosht chɨbɨte erze ɨr ɨmãho ɨr hme nehe shɨ ɨtso uje shuu Cristo chɨbɨte der õr eeyo.
\v 14 Shɨ owich nohmɨrshɨp uje ɨshɨmɨhɨ ɨre oso par uje oshuu oshuu toy hn ɨshɨ eyok hnɨtewɨhɨ Porrosht ahɨr. Uje yomsaha par eyok Porrosht aabo ɨchii wɨchɨ nɨshii eyok ɨluu saraãshi nehech uhurc ich eyok ɨluu shɨ ɨtso ɨr ɨluu.
\v 15 Porrosht Ɨchɨbich shuu yɨraha toy uje eyok Porrosht aabo pork wɨchɨ shuu profet yet tata ɨm:
\v 16 —Eyok Ɨrhĩch sole: “Deeych yet nehe hn tɨbɨte pahwoso tuu ɨtsorz. Tɨbɨte yok ley õr aho hn tuu ochɨraha yok ley shɨ ɨtso uje tichew tɨbɨte õr eyuwo.”
\v 17 Hn Ɨrhĩch tata ɨm: “Ich ye peyuchpe erze kuche mɨhnũwo uje oshiyokõrni.”—
\v 18 Uje Porrosht perdonar olak uje ahakõrlo erze kuche mɨhnũwo ich ye nesitpe uje yeẽk ɨshɨpo.
\s Porrosht aabo ye otolpe otɨ̃r ɨre ɨkɨch nehe.
\p
\v 19 Pɨshɨbo watsaklo, titɨm olak. Porrosht perdonar olak heke ele ahle ich ye yɨtɨlape uje yɨtɨ̃r wahacha tabernakulo pisht ehet uje Porrosht de pork Jesús tooho krus eeychkite hn ɨr armɨsta noshɨ par ɨshɨ eyok hnɨtewɨhɨ Porrosht ahɨr.
\v 20 Jesús wɨchɨ ɨtso dehet ahlt uje tɨ̃r Porrosht. Ese uje ɨtso dehet ɨlarc wɨchɨ erze ley uje Moisés chichewkite. Ese dehet ahlt shuu eyok ɨkɨrĩt de uje yelɨj nɨhna ɨre. Ese bortɨsht uje dechɨ Porrosht ihyuch ehetkite sentii uu pɨt yet par uje ye oso õr pwele otɨ̃r Porroshtpe, per ese bortɨsht shɨ ɨtso Cristo ɨr yũhurrza. Uje wɨchɨ tokite ich shɨ ɨtso uje chiyuhu ese bortɨsht par uje oso õr pwele otɨ̃r Porrosht.
\v 21 Jesús wɨchɨ eyok saserdote pisht uje tɨbey Porrosht ihyuch
\v 22 heke yuko yɨtɨ̃r Porrosht pork ye eyok aho yuhurɨ̃shpe, hn ye yotiis Cristope pork wɨchɨ uje churhũ eyok aho hn yapur perdon par erze kuche mɨhnũwo uje yiyokõrlo shɨ ɨtso uje yɨsoho awɨt uje ich ɨhɨ̃rt.
\v 23 Yiitani uje eyok owich de Porrosht ahɨr. Ye yukwim hn ye yuhu eyok koswãha Cristo pork Porrosht shish shuu lahwoso yakaha uje chɨbɨtkite par uje ɨshɨm eyok.
\v 24 Tyenɨj yuhu eyok eyuwo tɨsɨ̃r yiyokõr latɨkpo par uje ma yahmũrloye hn par uje ma yiyokõrlo uje ich om.
\v 25 Ye yukwimlo uje yakɨshlo eyok owich par yeeychãhalo Porrosht. Ode uje oshuu yakaha ɨre uje ye otakɨsho lawich nehech oym. Ye ahakõrlo uhulo ɨlorz. Ich ma om uje akashɨmloye par uje olak duurapo pork ich ɨmeheeych uje yej terɨhɨ ese deeych uje eyok Ɨrhĩch cheeshpo nehe heke ich tyenɨj ma uhu olak duurapo.
\p
\v 26 Per kɨmɨjɨ eyok yeẽk dɨraha erze uje ich ũru per shish shuu erze kuche mɨhnũwo yakaha ɨre ich nĩhyok yet par ɨshɨ ɨr hnɨtewɨhɨ Porrosht ahɨr.
\v 27 Shɨ tyenɨj iyem par uje tɨ̃r Porrosht ɨle ɨkɨch nehe hn sepyẽr ɨre. Wɨchɨ ich yarhakpa. Tyenɨj tɨ̃r asa urhuta bahluta ehet nehe uje Porrosht chɨmchaha namãho.
\v 28 Kɨmɨjɨ hnakɨrbich sowe asa ley waa je Moisés chichewkite hn kɨmɨjɨ õr osiyer o õr tre uje otata uje wɨchɨ iyuwe asa ley ich tyenɨj oshuu oshuu toy, hn ye latɨk nuuna uje wɨchɨ losuhlaap.
\v 29 Per kɨmɨjɨ hnakɨrbich dɨtak Porrosht Ijɨt Jesús ich ma mɨ̃hnɨk uje tyenɨj tɨ̃r ɨre pork wɨchɨ chɨbɨte uje ye jukur uje Cristo tooho krus eeychkite hn ɨr armɨsta noshɨ par ɨshɨ ɨr hnɨtewɨhɨ Porrosht ahɨr. Wɨchɨ chiyuhu lahwoso mɨhnuwõho Porrosht Ɨchɨbich uje takashɨm oso par oshiyokõr uje Porrosht sahmũr.
\v 30 Yɨrahalo uje eyok Ɨrhĩch shish shiyokõr uje tata. Wɨchɨ tata ɨm: —Uje yeẽk niyokõr mɨhnɨkɨ̃hɨ olak ich ye eẽtlo ɨre. Yok tyenɨj tiyuhu olak bahat.— Hn Porrosht ahwoso tata toy ɨm: —Eyok Ɨrhĩch teychɨm laabo kɨmɨjɨ oniyokõr mɨhnũwo o kɨmɨjɨ ye oniyokõrpe hn sepyẽr yeẽk uje shiyokõr uje ich mɨhnũwo.—
\v 31 Ich yarhakpa par erze uje oshiyokõr uje ich mɨhnũwo uje otɨ̃r Porrosht ɨle ɨkɨch nehe pork wɨchɨ ɨka hn tyenɨj sepyẽr õr.
\p
\v 32 Olak eyucha uje wapni hn ẽntlo Porrosht ahwoso hn amsahalo par olak ɨr aabo. Kuche mɨhnũwo ich kɨhniya tɨ̃r olak per shish olak ewenta.
\v 33 Deeych yetni hn ode uje oshuu dɨt oso otakɨsho lawich par uje oshuu wɨr oloter olak nohmɨramo. Deeych yetni hn olak de wɨr õr ahɨr erze Porrosht aabo yewo uje wɨr oloter õr.
\v 34 Olak ich eenɨloni uje wɨr õr losuhlaabo erze uje ode karsel ehet, hn uje oso ohnoy olak kushjãro ich shish olak ayla pork erahalo uje olak kushjãro de wahacha poõrc uje ich ma ɨhɨ̃rts pisho hn ye taatpe. Wɨr ye latɨk pwele uje diyuhu olak ahɨr.
\v 35 Heke ye otiislo uje Porrosht tyenɨj ɨshɨm olak erze premyo uje ich deyo nehe. Kɨmɨjɨ otiislo ich moymlo erze olak premyo hn pyerte.
\v 36 Olak tyenɨj nos olak ewenta erze kuche mɨhnũwo uje tɨ̃r olak par uje olak pwele ahakõrlo uje Porrosht sahmũr hn Porrosht tyenɨj ɨshɨm olak nehe erze uje chɨbɨte lahwosni par ɨshɨm olak.
\v 37 Porrosht ahwoso tata shuu ɨtsorz: —Ich yej terɨhɨ uje Cristo tyenɨj cheeshpo nehe hn ye duhu yɨlkamɨhɨ ɨrpe
\v 38 per ese uje ɨr owich de pahɨr, ɨr ɨkɨrĩt de pork ye lotiis yokpe. Kɨmɨjɨ deeshpo dotiis yok ich ye yok aylɨhɨ ɨrpe.—
\v 39 Per eyok ye eyok ɨlo erze uje ochunt per ocheeshpo otsotiis Porrosht. Wɨr tyenɨj otɨ̃r urhuta bahluta ehet nehe. Eyok ich eyok ɨtso erze uje ye olotiis Porroshtpe heke eyok ɨkɨrĩt de uje yelɨj nɨhna ɨre.
\c 11
\s Oso odekite uje ye olotiis Porroshtpe.
\p
\v 1 Uje ye yotiislo Porroshtpe ich yɨrahalo uje ich ũru erze uje chɨbɨte lahwoskite par ɨshɨm eyok nehe. Wɨr yelɨj yomo per yɨrahalo uje deeych yet nehe hn ɨshɨm eyok.
\v 2 Eyok poruwo wɨshɨ ye olotiispe uje Porrosht tatɨm õrkite heke Porrosht tata uje oshiyokõr uje ich om.
\v 3 Ye yotiis Porroshtpe heke yɨrahalo uje shiyokõr nãhu ɨrmõkite shɨ chɨ̃ra lahwoso. Erze kuche uje yesh yeychɨmlo wɨchɨ shiyokõr chɨ̃ra kuche uje ye eyok pwele yomope.
\v 4 Abel ye lotiis Porrosht petɨkkite heke ɨshɨm Porrosht kuche uje ich ma om je uje Caín ɨshɨm Porrosht heke Porrosht tata uje Abel shiyokõr uje ich om hn ɨm: —Ɨr owich de pahɨr.— Heke ich ɨmeheeych uje Porrosht sahmũr ese uje Abel ɨshɨm ɨre. Abel tokite per shish oso ochunt uje ye lotiis Porroshtpe.
\v 5 Enoc ye lotiis Porrosht petɨkkite hn Porrosht hnoy ɨre seya poõrc par uje ye tope. Ochukwi per ye latɨk dish ɨre pork Porrosht hnoy. Uje ehn yahpaa Porrosht doy Enockite ich otata uje Enoc shiyokõr uje Porrosht sahmũr.
\v 6 Kɨmɨjɨ yeẽk dotiis Porrosht ich yelɨj duhu Porrosht aylɨhɨ ɨre. Uje sehe yeẽk dɨtɨ̃r ɨre Porrosht ich tyenɨj ye lotiis uje ɨre de hn tyenɨj ye lotiis uje Porrosht ɨshɨm premyo erze uje ochukwi ɨre.
\v 7 Uje Porrosht tatɨm Noé uje tyenɨj kɨrsyent bahlut tɨrẽt ich wɨchɨ ye lotiis ɨrpe. Yelɨj oso onomo erze uje tyenɨj tɨrẽt tɨ̃r õr. Noé shiyokõr asa pohorrza par uje õr ɨre ye otope. Shɨ uje Noé ye lotiis Porroshtpe ich chɨbɨte orhõta uje erze oso uje ode nãhu ɨ̃rmo õr ɨluu mɨhnũ hn tyenɨj otoy. Ɨr owich de Porrosht ahɨr shɨ pork ye lotiis ɨrpe.
\p
\v 8 Titɨm olak uje Porrosht tatɨm Abraham par shuu iim ese dawich uje ɨre de par ɨshɨm ese owich yet nehe ich ye lotiis Porrosht petɨkkite. Uje tokolɨhɨchɨs ich ye dɨraha uje hno tɨ̃r.
\v 9 Ye lotiis Porroshtpe heke debuhu wahacha ese hnɨmich uje Porrosht chɨbɨte lahwoskite par ɨshɨm ɨre. Abraham wɨchɨ dihip kɨnaha wahacha hn shɨ debuhu karpɨt uut. Ɨr ijɨt Isaac hn ɨr ahnɨmich Jacob odebuhu karpa uulo toy. Porrosht tatɨm õr toy uje tyenɨj ɨshɨm õr ese hnɨmich nehe.
\v 10 Abraham shish iyem ese dɨt uje Porrosht shiyokõr. Porrosht shuu ese dɨt sakaha kojano eeyo ye ɨlo karpɨt uje shɨ ohnoy.
\v 11 Sara ɨtspo ye lotiis Porrosht petɨkkite heke Porrosht ɨshɨm ɨr ukurbo par ɨr ijɨtɨsh. Uje ɨr ijɨt shũrha ich wate ɨlarpa. Iyuwe erze ɨshɨ̃ryo uje tɨmcher õr aabosh per wate ye lotiis uje Porrosht shuu lahwoso yakaha uje tatɨm ɨre.
\v 12 Abraham ich ɨlarpa per aabosh hn oso otãra ɨre ich okɨhniya. Ye latɨk pwele tɨskẽr õr. Wɨr shɨ õr ɨtso porrzeebe uje de poõrc hn shɨ õr ɨtso hnɨmich ukult uje de onoot bahlut wɨrc.
\v 13 Abraham hõr otokite per shish ye olotiispe uje Porrosht tyenɨj ɨshɨm õr ese hnɨmich uje chɨbɨte lahwoso par ɨshɨm õr nehe. Nos wɨr õr ɨre ye olotiispe shɨ ɨtso uje omo uje Porrosht ɨshɨm õr hn õr ayla. Õr ɨre otata uje õr dihipo kɨnãho uje ode nãhu ɨ̃rmo pork õr owich de poõrc.
\v 14 Uje otata oshuu ɨtsorz ich ochɨbɨte orhõta uje õr eyuwo tɨsɨrɨ̃hɨ õr owich pisht uje odebuhu nehe.
\v 15 Kɨmɨjɨ oduhu deyuwo tɨsɨrɨ̃hɨ ese hnɨmich uje otokolɨhɨni ich õr pwele ocheeshpo.
\v 16 Per wɨr oyeem ese owich uje ich ma om je ese owich yet uje otãrni. Wɨr oyeem ese õr owich uje de poõrc heke Porrosht ye pookpe uje wɨr otata uje ɨre uu õr Porrosht. Wɨchɨ shiyokõr dɨtni par õr ɨre.
\v 17 Porrosht sehe duhu Abraham duhu ɨmeheeych uje ye lotiis ɨrpe heke tatɨm Abraham par ɨshɨmɨhɨ Isaac ɨre shɨ ɨtso uje oshuu loshɨpɨt hn otsẽru. Abraham de par shuu ese deyjɨt nohmɨramɨt uje Porrosht chɨbɨte lahwosni
\v 18 tatɨm ɨre uje oso okɨhniya tyenɨj otãra Isaac.
\v 19 Abraham chɨraha uje Porrosht ukurbo deyo de hn pwele shuu topo õr ɨkpo heke shɨ ɨtso uje shuu Abraham ijɨt Isaac ɨkponi.
\v 20 Isaac ye lotiis Porrosht petɨkkite heke chiyuhu lahwoso omoho deyjo Jacob hn Esaú.
\v 21 Jacob ye lotiis Porrosht petɨkkite, heke uje terɨhɨ par uje toy hn chiyuhu lahwoso omoho José aabo. Jacob tɨtɨla detɨlta hn teeychãha Porrosht.
\v 22 José ye lotiis Porrosht petɨkkite, heke uje ich terɨhɨ par toy hn tatɨm erze deeyso israel oso par uje ohnoy erze ɨr debiyo nehe uje otokolɨhɨ erze egipto oso õr hnɨmich par ochihitsɨmɨhɨ wahacha hnɨmich uje otɨ̃r par odebuhu.
\p
\v 23 Moisés ɨr deych hn ɨr data ye olotiis Porroshtpe, heke uje Moisés shurhãkite ich otsakɨs nehech shekurko tre pork õr ɨre oteychɨm ese pɨkɨhnint ich ɨhɨ̃rtpa hn ye otola ese reype uje chɨbɨte ley par uje shuu oshuu pɨkɨhnino.
\v 24 Moisés ye lotiis Porroshtpe heke uje ich terɨhɨ leherzkite ich ye nahmũrpe uje otata otsɨɨ rey faraón ijɨta ɨr ijo.
\v 25 Ma sahmũr uje ĩya erze oso uje Porrosht chiihla õr uje oso yewo oloter õr hn ye nahmũr nõyape erze uje ich õr ayla uje oshiyokõr uje ich mɨhnũwo. Wɨr shɨ õr ayla par daalo arhaabo ich õr dosdarakpo.
\v 26 Moisés chibɨte uje ich ma om ĩya erze uje ye olotiis Cristo hn ewenta erze kuche mɨhnũwo uje yewo oshiyokorɨ̃hɨ õr. Wɨchɨ shuu deyuwo tɨsɨ̃r kɨmɨjɨ ɨre ewenta erze mɨhnũwo uje tɨ̃r ɨre ich ma om je erze hnote uje de egipto oso õr hnɨmich pork wɨchɨ eyuwo tɨsɨ̃r erze premyo uje Porrosht tyenɨj ɨshɨm erze uje ye olotiis ɨre nehe.
\v 27 Moisés ye lotiis Porroshtpe heke tokolɨhɨ ese egipto oso õr hnɨmichkite. Ese rey ich sɨtak ɨre per Moisés ye tola ɨrpe. Wɨchɨ shɨ ewenta erze uje tɨ̃r ɨre pork ye lotiis Porroshtpe shɨ ɨtso uje umo Porrosht per ye latɨk pwele nomo ɨre.
\v 28 Ye lotiis Porroshtpe heke shiyokõr ese õr ahamich webich osht uje iich otsɨɨ Pascua. Shuu oshuu obeje hn otormɨ̃hɨ armɨsta pwert uhur ujuwo uje otsɨɨ marko par uje ese anjel uje shuu õr aabo webich oso ye duhu wɨr õr aabope.
\v 29 Erze israel oso ye olotiis Porrosht petɨkkite heke uje ochɨkãha asa onoota bahluta waa je iich otsɨɨ Mar Rojo ich ochɨkãha hnɨmich uje kako. Per erze egipto oso õr ohyerptoso õr prowa ochɨkãha õr ɨjɨch toy hn nos õr hmarta.
\v 30 Erze israel oso ye olotiis Porroshtpe heke shish ochɨpeẽsa ese dɨt Jericó daalo syete hn ese moraylt kay uje chɨpeẽsa ese dɨt.
\v 31 Rahab wate tɨmcharrza yɨtoro. Ye lotiis Porroshtpe hn takashɨm erze israel oso õr pahnekite heke ye wate toy petɨkni nõya erze nanapso uje ye oniyokõrpe uje Porrosht sahmũr.
\p
\v 32 Ye tahmũrpe uje titɨm olak ma pork ye yok tyempɨrsh uje titɨm olak uje Gedeón shiyokõr, hnii uje Barac shiyokõr, hnii uje Sansón shiyokõr, hnii uje Jefté shiyokõr, hnii uje David shiyokõr, hnii uje Samuel shiyokõr, hnii uje erze profeta oshiyokõr toy.
\v 33 Shɨ pork wɨr ye olotiis Porroshtpe heke oteye hõr wɨr dihipo kɨnãho hn otserz õr. Ode uje ye olotiis Porroshtpe hn shuu omasaha par õr jwe uje oshiyokõr uje ich om. Ye olotiis Porroshtpe heke ɨshɨm õr erze uje chɨbɨte lahwosni par ɨshɨm õr. Ye olotiis Porroshtpe heke sontew erze ɨlpiyo par uje ye tew õrpe.
\v 34 Ode uje ye olotiis Porroshtpe hn otsẽhi jwekɨta waa je ich data, hn erze uje oyuhwo par uje ye ohyerptoso oduhu õrpe onɨ̃ra õr espada, hn erze uje ye õr ukũrbɨrsh ich Porrosht shuu õr ukurbo deyo de par uje oteye ochɨ̃ra namãho. Porrosht ɨshɨm erze uje ye olotiis ɨre õr ukurbo par oshuu erze dihipo kɨnãho õr ohyerptoso otola õr hn oyuhwo.
\v 35 Profet yewo odekite uje oshuu topo õr ɨkpo hn oshɨm õr datɨ. Yewo ode uje oso oloter õr. Sehe oduhu onoym Porrosht par uje oym uje oloter õr per ye onoym Porroshtpe heke oloter õr nehech oshuu õr oshuu otoy pork sehe õr ɨkpo nehe hn otɨ̃r Porrosht ahɨr.
\v 36 Ode uje ye olotiis Porroshtpe heke yewo ochiyuhu lahwoso mɨhnuwõho õr hn otsepyẽr nohmɨramo hn oshiyeru nohmɨramo ochɨ̃ra õr kenena hn ochɨmchaha nohmɨramo õr karsel ehet.
\v 37 Hn ode uje oshuu õr ochɨ̃ra õr kojano po nehech otoy, hn ode uje ochekshehe õr ochɨ̃ra õr serusho nehech otoy, hn ode uje oshuu ochɨ̃ra õr espada oshuu otoy, hn ode uje oshuu otokolɨhɨ dɨt heke ochũr lekɨtiyo. Shɨ oshiyokõr lasuwo ochɨ̃ra obeje yũhur hn kabɨr yũhur. Wɨr ich õr losuhlaabo. Kuche mɨhnũwo tɨ̃r õr hn oso oshiyokõr mɨhnuwõho õr.
\v 38 Erze oso uje ode nãhu ɨ̃rmo opoym õr ɨluu uje om heke oshuu otokolɨhɨ lahɨr. Shɨ ochinshẽhe ɨre hnɨmoho lekɨtiyo uje ɨsa hn ese hnɨmich uje shɨ kojano deyo. Odebuhu kojano ɨle.
\v 39 Erze kuche mɨhnũwo uje tɨ̃r õr chɨbɨte orhõta uje nos wɨr õr ɨre ye olotiis Porroshtpe per Porrosht ye dosɨm õr shɨchishpe erze uje chɨbɨte lahwoskite par ɨshɨm õr
\v 40 pork Porrosht sehe duhu nos yukwiĩyaloye par uje nos ɨshɨm eyok nehe erze uje tatkite. Tyenɨj shuu eyok ɨluu ɨtso Cristo ɨr ɨluu wap.
\c 12
\s Eẽtlo Jesús.
\p
\v 1 Titɨm olakɨke uje erze oso okɨhniya oshiyokõrkite pork ye olotiis Porroshtpe, heke tyenɨj yeẽtlo õr hn yukwimlo uje yiyokõrlo erze kuche mɨhnũwo uje shish sontew eyoklo par uje eyok pwele yiyokõrlo erze obiyo uje Porrosht ɨshɨm eyok shɨ ɨtso yeẽk uje shish iim erze kuche par uje uushɨ hn serz ese premyo.
\v 2 Tyenɨj olak eyucha uje Jesús shiyokõrkite. Wɨchɨ ye lotiis Porroshtpe heke eyok tyenɨj yeẽtlo ɨre. Uje Jesús shuu deyuwo tɨsɨ̃r uje deeych yet nehe ich aylpa pork ɨshɨ oso õr hnɨtew heke shɨ ewenta erze kuche mɨhnũwo uje tɨ̃r ɨrehe krus eeych, hn shɨ ewenta uje ochiyuhu lahwoso mɨhnuwõho ɨre par uje sehe oduhu pook. Ele ahle wɨchɨ sakaha Porrosht waãchta.
\v 3 Heke uhu olak eyuwo tɨsɨ̃r Cristo. Uje erze oso uje õr ɨluu mɨhnũ oshiyokõr mɨhnuwõho ɨrkite ich shish ewenta, heke ye ermtsɨrlo hn ye uhu patɨm olak.
\v 4 Uje kuche tɨ̃r olak par sehe duhu ahakõrlo mɨhnũwo ich ye olak ewentpe pork ye olak ɨlo Cristope uje ewentkite hn ɨr armɨsta noshɨ per shish ewenta.
\v 5 ¿Je ekeylo uje Porrosht sakɨt olak pork olak ɨr aabo? Porrosht tata ɨm:
\p —Pijɨte, ye ompe ebɨte uje ye latɨkɨsh uje owa Ɨrhĩch sepyẽr owa. Ye ompe uje moym ɨre uje sepyẽr owa shuu ɨtsorz
\v 6 pork olak Ɨrhĩch sahmũr olak heke sepyẽr olak. Kal nohmɨr uje masaha par Porrosht aap ich shish sepyẽr ɨre uje shiyokõr uje ich mɨhnũwo.—
\p Wɨr uje Porrosht tata.
\v 7 Uje Porrosht sepyẽr olak ich tyenɨj olak ewenta pork olak ɨr aabo hn sehe duhu ahakõrlo uje ich om. ¿Je pɨkɨhnint chɨhɨ uje ɨr deych ye depyẽrpe uje shiyokõr mɨhnũwo? Tyenɨj ɨr deych sepyẽr.
\v 8 Kɨmɨjɨ Porrosht ye depyẽr olak ich ye olak ɨr aabope pork shɨ olak ɨtso pɨkɨhnino uje ye deych pishtɨkɨsh pork nos wɨr pɨkɨhnino tyenɨj õr deyo otsepyẽr õr.
\v 9 Eyok deyo uje ode nãhu ɨ̃rmo otsepyẽr eyok hn yɨtɨlɨlo õr, heke tyenɨj ma yɨtɨlɨlo eyok Deych Porrosht. Wɨchɨ nos õr ɨchɨbiyo Deych pork nos shiyokõr õr. Wɨchɨ ɨshɨm eyok ɨkɨrĩt uje yelɨj nɨhna ɨre.
\v 10 Eyok deyo ode ɨ̃rmo hn uje ehn eyok ijaabo otsepyẽr eyok par uje yiyokõrlo uje õr ɨre otsahmũr, per Porrosht sepyẽr eyok par uje yuhu eyok ɨluu ɨtso ɨr ɨluu uje yelɨj niyokõr uje ich mɨhnũwo.
\v 11 Uje ehn sepyẽr eyok ich dospa per shiyokorãha eyok par yiyokõrlo uje ich om hn shuu eyok aho kɨɨs.
\s Ich yarhakpa par erze uje ye onahmũr otẽr Porrosht ahwoso.
\p
\v 12 Heke titɨm olak uje shɨ olak ɨtso yeẽk uje ɨr hme hn ɨr ɨtero ich chɨrmtsɨrpa. Uhu olak duurapo.
\v 13 Moymlo erze olak ɨluu mɨhnũ hn uhu olak ɨlo yeẽk uje nɨshii dehet par chɨkãha pork ode olak ehet uje meytii õr koswãha. Wɨr shɨ õr ɨtso yeẽk uje ɨr hnɨtɨta doso hn nesita dehet om par chɨkãha uje ye duhu ma doso par uje pwele owich ompo.
\p
\v 14 Eyuhu olak par uje uhu olak aho kɨɨsɨhɨ nos wɨr oso, hn shish ahakõrlo uje ich om uje Porrosht sahmũr. Uje yeẽk ye niyokõr uje Porrosht sahmũr ich ye pwele nomo eyok Ɨrhĩch petɨk nehe.
\v 15 Kɨmɨjɨ olak yeẽk ye Porrosht aappe ich ye pwele tɨ̃r Porrosht petɨk nehe. Eyuhu olak par akashɨmlo ɨre par uje masaha par Porrosht aap toy. Kɨmɨjɨ Porrosht aap yeẽk chɨhɨ olak ehet uje shish shiyokõr uje ich mɨhnũwo ye uhulo ɨre ɨlo erze Porrosht aabo yewo pork wɨchɨ shɨ ɨtso pohorrza uro waa je mɨhnũ uje shuu eebe tãra. Deeych yet nehe hn shuu yewo otseẽt ɨre oshiyokõr mɨhnũwo toy.
\v 16 Ich om uje hnakɨrbich umuhu nerãhta ahɨr hn ich ompo uje tɨmcharrza umuhu dabich ahɨr per ich mɨ̃hnɨk uje ye onõyhi pɨshye ahɨrpe, shɨ omuhuye ahɨr. Ich mɨ̃hnɨk uje otorãhaye. Ich mɨ̃hnɨk uje tɨmcher tɨmcher õhyi yẽr ahɨr, hn ich mɨ̃hnɨk uje hnakɨrbo hnakɨrbo õyhiye ahɨr. Ich mɨ̃hnɨk uje yeẽk sahat loshɨpɨt, hn ich mɨ̃hnɨk uje yanak ɨshɨm ɨre loshɨpɨt par shuu sahat ɨre. Ich mɨhnɨ̃kpo uje pɨkɨhnino hn pɨkɨhnine oshiyokorɨ̃hɨye oshuu ɨtsorz. Ye uhu olak ɨlo yeẽk uje ma sahmũr nãhu ɨ̃rmo oso õr ɨluu heke ye nahmũr Porroshtpe. Wɨchɨ shɨ shiyokõr ɨtso uje Esaú shiyokõrkite pork par ɨre ich ye latɨkɨsh kɨmɨjɨ deych diyuhu lahwoso omoho ɨre o kɨmɨjɨ diyuhu lahwoso omoho ese deyjɨt shakaharc. Heke chibehe erze ahwoso oomo oposht shuu pretilt nohmɨra.
\v 17 Olak erahalo uje deeych yet hn sehe duhu ɨr deych diyuhu lahwoso omoho ɨre per ɨr deych tatɨm uje ich nĩhyok par ɨre. Esaú ich yerh per ye pwele duhu ɨr deych ahwoso oomo deeshpe.
\v 18 Olak ye nesita uje etɨ̃rlo olak ese kojach Sinaí uje olak poruwo wɨshɨ otsɨtɨ̃r ɨrkite. Wɨr ye õr pwele uje otsakɨhɨr ese kojach petɨkkite, hn jwekɨta data dechɨ ɨr eeych hn dɨhlel data hn ukuhur hn myent data
\v 19 hn yeẽk sobɨta trompeta wahacha kojach eeych, hn Porrosht chiilehet. Uje ochunt ɨre ich otatɨm Moisés par uje ye duhu Porrosht keytkẽr õr ɨre.
\v 20 Porrosht tatɨm erze oso par uje ye olakɨhɨr ese kojach uje ɨre de. Kɨmɨjɨ yeẽk lakahɨr o kɨmɨjɨ loshɨpɨt lakahɨr ich tyenɨj oshuu ɨre ochɨ̃ra kojano po o kɨmɨjɨ odichew ɨre onɨ̃ra asõrza par uje oshuu toy. Otata uje ich ɨhnpa asa ley heke ye õr pwele õr ewentpe.
\v 21 Ich yarhakpa par oteychɨm ese kojach uje Porrosht dechɨ nehech Moisés tata uje ɨr ɨkiyo tãra pork ich tolpa.
\v 22 Per par olak ich kɨnãho ye ɨtso erze uje otsɨtɨ̃r ɨre kojach Sinaikite. Ich shɨ ɨtso uje aachɨ̃hɨlo Porrosht ahɨr wahacha kojach uje iich otsɨɨ Sión uje de poõrc. Aachɨ̃hɨlo Porrosht ɨr dɨt Jerusalén uje dechɨ toy. Porrosht wɨchɨ ɨka. Anjele odechɨ toy. Otakasho lawich ich okɨhniya hn ich õr aylpa uje oteeychãha Porrosht.
\v 23 Nos wɨr Porrosht aabo õr iiyo de poõrc toy. Wɨr õr bahluwo ɨtso yeẽk ijɨt webich osht. Wɨr otakasho lawichɨhɨchɨs Porrosht ahɨr toy pork wɨchɨ jwe uje tyenɨj nos teychɨm erze oso. Nos wɨr ɨr aabo uje otoni õr ɨchɨbiyo dechɨ toy. Porrosht nos shuu õr ɨluu ɨtso Cristo ɨr ɨluu.
\v 24 Aachɨ̃hɨlo Jesús ahɨr. Wɨchɨ uje ɨshɨ eyok hnɨtewɨhɨ Porrosht ahɨrkite par shuu Porrosht ehet kɨɨsɨhɨ eyok. Jesús ɨr armɨsta ma om je Abel ɨr armɨsta. Jesús ɨr armɨsta shuu Porrosht perdonar eyok per Abel ɨr armɨsta shɨ sapur Porrosht par uje sehe diyuhu labahat.
\p
\v 25 Abeylshɨp olak par uje ye otiislo Porrosht ahwoso uje tatɨm olak. Nos wɨr erze uje ye onahmũr otẽr uje Porrosht shuu profeta otatɨm õrkite, ich Porrosht sepyẽr õr hn nĩhyok yeẽk uje yuhwoho ɨr hme. Cristo ma dich je erze profeta uje otsanɨmɨrãha Porrosht ahwoso pork erze profeta wɨr shɨ hnɨmich oso per Cristo tãra poõrc. Kɨmɨjɨ ye yahmũrlo yẽr uje Cristo tatɨm eyok ich ma ũru uje ye eyok pwele eyok yuhwoho ɨr hmepe.
\v 26 Antkite uje Porrosht chiilehet ich shuu hnɨmich telerrza. Porrosht chɨbɨt lahwospo ɨm: —Deeych yet nehe hn tuu hnɨmich telerrza hn poõrc ɨtspo hn ich ye tiyokõr petɨk nehe tuu ɨlorz.—
\v 27 Uje tata ɨm: —Ich ye tuu telerrzpope— ich chɨbɨte orhõta uje ich tyenɨj yuwɨr erze uje pwele telerrza hn wɨr shɨ sakaha erze uje ye pwele telerrzpe.
\v 28 Heke tyenɨj yɨnshɨp Porrosht uje ɨshɨm eyok ese owich uje ye pwele telerrzpe hn tyenɨj yɨtɨlɨlo Porrosht hn yeeychãhalo ɨre
\v 29 pork eyok Deych Porrosht wɨchɨ shɨ ɨtso jwekɨta pork sepyẽr erze uje oshiyokõr uje ich mɨhnũwo.
\c 13
\s Titɨm olak yuhulo ɨnaapo par yɨnɨlo Porrosht.
\p
\v 1 Shish tyenɨj ahmũrloye pork nos olak leshɨbye pork ye otiislo Cristope.
\v 2 Ye ekeylo uje akashɨmlo Porrosht aabo yewo uje ye erahalo õrpe uhulo otsakaha olak ihyuwo. Porrosht aabo ode uje oshiyokõr oshuu ɨtsorz ich otakashɨm anjele per ye odɨraha uje wɨr anjelepe.
\v 3 Olak eyucha erze Porrosht aabo yewo uje ode karsel ehet hn eenɨlo shɨ ɨtso uje meylo orɨ̃hɨ karsel ehet. Olak eyucha erze Porrosht aabo uje yewo oloter õr hn eenɨlo shɨ ɨtso uje oloter olak toy.
\v 4 Porrosht wɨchɨ uje shuu oso õyhiye ahɨr heke ye ompe uje uhulo ye jukur. Porrosht tyenɨj sepyẽr erze hnakɨrbo hn tɨmcher uje ye onõyhi pɨshye ahɨrpe, shɨ omuhuye ahɨr. Tyenɨj sepyẽr erze uje otorãhaye hn erze tɨmcher uje õyhi yẽr ahɨr, hn erze uje hnakɨrbo uje õyhiye ahɨr hn erze uje otsahat loshɨpo, hn erze uje oshuu loshɨpo sahat ɨre.
\v 5 Ye ompe uje ahmũrlo hnote. Uhu olak aho kɨɨs erze kuche uje de olak ahɨr pork eyok Ɨrhĩch tata ɨm: —Shish takashɨm olak. Ye tokoym olakpe.—
\v 6 Heke ye eyok koswãhape uje yiita ɨtso uje profet yet tata shuu ɨtsorz ɨm: —Pɨnsɨrc takashɨm yok heke ye tɨkɨtɨla latɨk uje oso õr pwele oshiyokorɨ̃hɨ yok.—
\v 7 Titɨm olak par uje olak eyucha erze olak bahluwo uje otsanɨmɨrãha Porrosht ahwoso otatɨm olak hn olak eyucha uje oshiyokõr pork wɨr ye olotiis Porroshtpe. Tyenɨj eẽtlo õr.
\v 8 Jesucristo ɨr ɨluu shish ɨtsye uje wapni nehech ele ahle hn shish ɨtsye nehe.
\v 9 Ye uhulo yeẽk nehnyẽr olak hn niyokorãha olak ahwoso kɨnãho. Erze uje elɨlo ye duhu olak ɨluu ompe. Shɨ uje ye otiislo Porroshtpe. Wɨchɨ uje shuu olak ɨluu ma om. Erze uje ochɨbɨte uje ye otew erze kuche ẽrope oshuu deyuwo tɨsɨ̃r uje wɨr takashɨm õr per ye duhu õr ɨluu ompe.
\v 10 Erze uje oshuu loshɨpo hn ochɨbɨte altar eeych par uje sehe oduhu doshɨ ɨr hnɨtewɨhɨ Porrosht ahɨr wɨr otsotiis Cristo heke ye doshɨ õr hnɨtewɨhɨ Porrosht ahɨrpe per ɨshɨ eyok hnɨtew pork ye yotiislo ɨrpe.
\v 11 Erze israel oso õr saserdote bahlut pisht shuu loshɨpo hn hnoy armɨsta seya ese tabernakulo ehet par uje ɨshɨ õr hnɨtewɨhɨ Porrosht ahɨr. Hnakɨrbo ohnoy erze loshɨpo otseya dɨt nẽr hn otserũhuchɨs.
\v 12 Jesús ɨtspo, ochiyuhu ɨre ese dɨt ehetkite hn oshuuhu wahacha oshuu toy dɨt nẽr. Ɨr armɨsta noshɨ par ɨshɨ oso õr hnɨtewɨhɨ Porrosht ahɨr.
\v 13 Heke tyenɨj yiyokõrlo shɨ ɨtso uje yukwim ese dɨt uje ɨluu ɨler de hn yiyakahalo Cristo ahɨr wahacha ejwert. Uje oso oshiyokorɨ̃hɨ eyok uje mɨhnũwo ich shish tyenɨj eyok ewenta shɨ ɨtso uje Cristo ewentkite.
\v 14 Ye shish eyok owich chɨhɨpe ahnũwo duwo uje de ɨ̃rmo. Shɨ yiyem ese dɨt uje tãra poõrc nehe,
\v 15 heke shish tyenɨj eyok narim Porrosht pork shish yiita uje ye yotiislo Cristope.
\v 16 Ye ekeylo ahakõrlo uje om hn akashɨmlo yewo uje kuche nihyokɨ̃hɨ õr ahɨr pork Porrosht sahmũr uje ahakõrlo uhulo ɨtsorz pork ich shɨ ɨtso uje asɨmɨhɨlo Porrosht.
\p
\v 17 Ahakõrlo uje olak bahluwo uje ode iglesya ehet otatɨm olak pork õr ɨre shish otɨbey olak. Deeych yet nehe hn olak bahluwo tyenɨj otatɨm Porrosht debiyo uje oshiyokõr. Uhulo õr ayla uje oshiyokõr erze obiyo, ye uhulo õr dosdarak. Uje uhulo õr dosdarak ich ye ompe par olak.
\v 18 Sehe tuu olak orar par õryok pork oyɨraha uje ye oyiyokõr uje ich mɨhnũwope. Sehe shish oyiyokõr uje ich om.
\v 19 Sehe tuu enaha olak uje olak orar apurlo Porrosht par yok toy par uje yok pwele takaashpo shɨchish tekɨrɨhɨ olak nehe.
\p
\v 20 Porrosht wɨchɨ uje shuu oso õr aho kɨɨs. Wɨchɨ uje shuu eyok Ɨrhĩch Jesús ɨkpokite. Jesús wɨchɨ eyok bahlut pisht. Wɨchɨ ɨtso pastor uje tɨbey ɨr obeje hn eyok uje eyok Porrosht aabo shɨ eyok ɨtso obeje. Wɨchɨ tɨbey eyok pork sõrhɨr narmɨstakite hn ɨshɨ eyok hnɨtewɨhɨ Porrosht ahɨr shuu ɨtso uje Porrosht chɨbɨte lahwoso par uje Cristo shiyokõr hn yelɨj duhu kɨnaha.
\v 21 Sehe tuu Porrosht dosɨm olak nos wɨr kuche uje olak nesita uje om par uje olak pwele ahakõrlo uje ɨre sahmũr. Jesucristo ɨshɨ olak hnɨtewkite heke Porrosht takashɨm olak shuu ahakõrlo uje ɨre sahmũr. Tyenɨj shish olak narim Cristo. Ich ɨhɨ̃rtpa kɨmɨjɨ ahakõrlo uhulo ɨlorz.
\s Porrosht aabo tyenɨj oshɨmye saludo.
\p
\v 22 Pɨshɨbo watsaklo, sehe tuu ahakõrlo ahnũwo pahwoso uje tichew tɨbɨte ana hutɨta. Ye pahwoso berzope.
\v 23 Sehe tuu erahalo uje eyok leshɨbich Timoteo ochiyuhu karsel ehetni. Kɨmɨjɨ taachɨ̃hɨ pahɨr shɨchish nehe hn oyuko oyukwĩyaye oyekɨrɨhɨ olak.
\v 24 Tokosɨm saludo nos wɨr Porrosht aabo õr bahluwo hn nos wɨr Porrosht aabo toy. Nos wɨr Porrosht aabo uje odebuhu hnɨmich Italia oshɨm olak saludo toy.
\v 25 Sehe tuu Porrosht dosɨr olak. Shɨ erze uje tichew tɨbɨte ana hutɨta.