\id JAS Chamacoco NT - Paraguay 2000 (web 2013)
\h Santiago
\toc1 Santiago
\toc2 Santiago
\toc3 Stg
\mt1 Santiago
\c 1
\s Santiago ɨshɨm Porrosht aabo õr saludo.
\p
\v 1 Yok Santiago. Yok Porrosht ɨr yɨlak hn eyok Ɨrhĩch Jesucristo ɨr yɨlakpo. Tokosɨm saludo erze israel oso õr wee dose uje okarẽhe lekɨtiyoni hn odebuhu erze dihipo kɨnãho õr hnɨmo.
\s Õr eyuwo de uje tãra Porrosht.
\p
\v 2 Pɨshɨbo watsaklo, olak Porrosht aabo. Uje nos wɨr kuche tɨ̃r olak par uje prowa olak ich tyenɨj olak aylpa pork
\v 3 erahalo uje shɨ tɨ̃r olak par prowa kɨmɨjɨ otiislo Cristo o kɨmɨjɨ ye otiislope. Uje ewenta ich shuu olak ma ye otiislope.
\v 4 Shish tyenɨj olak ewenta erze uje tɨ̃r olak nehech uhurc ich ma olak pwele ewenta. Heke ich ũrpa uje ye otiislo Porroshtpe hn ye olak koswãhape.
\v 5 Olak yeẽk uje sehe dɨraha kuchɨt shɨ tyenɨj sapur Porrosht hn Porrosht takashɨm ɨre par uje shuu chɨraha, hn Porrosht ye diyuhu lahwospe par uje shuu pook pork erze uje otsapur ɨre wɨchɨ shish shuu ochɨraha.
\v 6 Shɨ tyenɨj sapur hn ye dotiis hn ɨshɨmɨhɨ ɨre. Ye duhu ɨre koswãha, pork uje yeẽk sapur hn koswãha wɨchɨ shɨ ɨtso onoota bahluta wokor. Uje myent tɨbichu ich shuu tɨ̃r pɨt yet. Wɨsɨk wɨsɨk ich shuu tɨ̃r pɨt yet.
\v 7 Ese uje koswãha ye ompe chɨbɨte uje eyok Ɨrhĩch takashɨm ɨre uje sapur.
\v 8 Hnakɨrbich uje koswãha ich yelɨj eyuwo chɨhɨ lalerc.
\p
\v 9 Porrosht aap uje ich losuhlaap ich tyenɨj aylpa pork ɨr owich de Porrosht ahɨr.
\v 10 Porrosht aap uje ich ɨrhĩch dich, kɨmɨjɨ pyert ɨr kushjãro ich shish tyenɨj aylpa pork ɨr owich de Porrosht ahɨr. Erze ɨr kushjãro tyenɨj sɨhna ɨre shɨchish shɨ ɨtso erze floro uje de aach.
\v 11 Deeych tokole ich duhlpa. Chihit asa pohorrza hn shuu erze floro nos kako hn kayɨhɨ hnɨmich. Erze floro ich ɨhɨ̃rts pisho per shɨ sɨhna ɨre. Ese ɨrhĩch dich shɨ ɨtso. Uje yesh chishew obiyo hn ɨr kushjãro sɨhna ɨre shɨchish.
\s Porrosht aabo tyenɨj õr ewenta erze uje tɨ̃r õr.
\p
\v 12 Titɨm olak. Ich om par ese hnakɨrbich uje ewenta erze uje tɨ̃r ɨre. Uje ewenta nehech uhurc ich premit ompa de par ɨre. Ese ɨr premit wɨchɨ uu ɨr ɨkɨrĩt uje de Porrosht ahɨr. Porrosht chɨbɨte lahwoskite par uje tyenɨj ɨshɨm erze uje otsahmũr ɨre ese ɨkɨrĩt uje yelɨj nɨhna ɨre.
\v 13 Uje yeẽk sehe duhu olak yet niyokõr uje mɨ̃hnɨk ich ye ompe uje wɨchɨ tata ɨm: —Porrosht sehe duhu tiyokõr uje mɨ̃hnɨk.— Ye õr pwelpe oshuu Porrosht shiyokõr uje mɨhnũwo, hn ɨre yelɨj duhu oso oniyokõr uje mɨ̃hnɨk.
\v 14 Kal nohmɨra shɨ ɨre uje sehnyẽr ɨre par uje shiyokõr uje mɨ̃hnɨk. Wap shɨ shuu deyuwo tɨsɨrɨ̃hɨ erze kuch mɨhnũwo hn uje ich uhurc hn sahmũr erze mɨhnũwo
\v 15 hn shiyokõr. Uje ich yakaha shiyokõr erze mɨhnũwo shuu ɨtsorz hn erze mɨhnũwo shuu toy.
\v 16 Pɨshɨbo watsaklo, ye ehnyẽrlo olak.
\v 17 Nos wɨr kuche uje ich ɨhɨ̃rtso, ye mɨhnũwo chɨhɨ ehetpe wɨr tãra poõrc. Tãra Porrosht uje de poõrc. Wɨchɨ uje shiyokõr deeych hn shiyokõr shekurko hn shiyokõr porrzeebe. Wɨr uje nos chihit nãhu ɨ̃rmo hn shish sɨhnak laleryo, heke shish shuu ɨr puuruwo sɨhnak laleryo per Porrosht yelɨj duhu ɨre kɨnaha.
\v 18 Shɨ pork wɨchɨ sahmũr eyok pork ye yotiis ɨr ahwospe uje ich ũru hn shuu eyok shurhãpo par uje yomsaha par eyok ɨr aabo. Wɨchɨ nos shiyokõr erze uje de ɨ̃rmo per eyok uje yomsaha wap par Porrosht aabo shɨ eyok ɨtso jõro webich oso uje ochekushu.
\s Porrosht sahmũr uje oshiyokõr uje om.
\p
\v 19 Pɨshɨbo watsaklo, shɨ tyenɨj nos ẽrlo uje oso otata hn ye ey olak uhut shɨchish, hn ye aas olak uulo shɨchish,
\v 20 pork yeẽk uje chesdelo ye niyokõrpe erze om uje Porrosht sahmũr.
\v 21 Heke tyenɨj nos moymlo erze olak ɨluu mɨhnũ hn moymlopo erze kuche mɨhnũwo uje oso oshiyokorɨ̃hɨye. Ye olak narim olak. Ahakõrlo uje Porrosht ahwoso tata uje erahalo. Ɨr ahwoso wɨr shɨ ɨtso jõro eyhi uje Porrosht chukwerɨ̃hɨ olak aho. Ɨr ahwoso pwele shuu etɨ̃rlo Porrosht ahɨr nehe.
\v 22 Tyenɨj ahakõrlo uje ɨr ahwoso tata hn ye shɨ ẽrlo pork kɨmɨjɨ shɨ ẽrlo hn ye ahakõrlo hn shɨ olak pyens uje ich om ɨtsorz ich shɨ ehnyẽrlo olak uhulo ɨtsorz.
\v 23 Uje yeẽk chunt Porrosht ahwoso hn ye niyokõrpe wɨchɨ shɨ ɨtso ese hnakɨrbich uje teychɨm dechɨbich pejta ehet. Umo ɨr dechɨbich
\v 24 per uje tokole ich chɨkey ɨre shɨchish.
\v 25 Porrosht ahwoso wate ley uje shuu Porrosht aabo oshiyokõr uje Porrosht sahmũr, hn Porrosht aabo otsahmũr oshiyokõr oshuu ɨtsorz hn yelɨj onoym. Uje yeẽk tẽr Porrosht ahwoso hn ye dɨkeype pork sehe dɨraha par uje shiyokõr uje tata, Porrosht takashɨm ɨre.
\v 26 Uje yeẽk chɨbɨte uje ɨre Porrosht aap hn ye tɨbey lahwope wɨchɨ shɨ sehnyẽr ɨre hn uje teeychãha Porrosht ich ye jukur.
\v 27 Porrosht uu eyok Deych sahmũr erze uje oteeychãha ɨre hn oshiyokõr uje ɨre sahmũr. Sehe duhu otakashɨm erze kuhnẽre hn poluu uje õr nesita kuche, per ye oniyokõr erze mɨhnũwo uje oso oshiyokorɨ̃hɨ ahnũwo ɨ̃rmo.
\c 2
\s Ye ompe oniyokõr kɨnaha par yet hn kɨnaha par yet.
\p
\v 1 Pɨshɨbo watsaklo, eyok ye yotiislo eyok Ɨrhĩch Jesucristo. Wɨchɨ ich dichpa. Olak Porrosht aabo toy, heke ye ompe uje ahakõrlo uhulo kɨnaha par yet hn kɨnaha par yet. Tyenɨj nos uhulo õr ɨlye.
\v 2 Shɨ tɨteẽta tuu ɨtsorz. Kɨmɨjɨ akashɨlo olak owich hn hnakɨrbich taãcha uje ich ɨrhĩch dich. Ɨr hmarte oro hn ɨr ɨshuwo ich ɨhɨ̃rts pisho, hn hnakɨrbich losuhlaap taãcha toy uje ɨr ɨshuwo ɨlaraabo.
\v 3 Kɨmɨjɨ eychɨmlo ese ɨrhĩch dich uje ɨr ɨshuwo ɨhɨ̃rtso hn atɨmlo par uje sakaha ese owich uje ich ɨhɨ̃rtpa, hn atɨmlo ese losuhlaap on: —Shɨ alehe wahacha,— o kɨmɨjɨ atɨmlo on: —Akahachɨs hnɨmich pɨbɨta ahɨr.—
\v 4 Uje ahakõrlo uhulo ɨtsorz ich ahakõrlo kɨnaha par yet hn kɨnaha par yet. Ich uhulo olak ɨtso jwe uje õr ɨluu mɨhnũ pork ye ahakõrlo uhulo õr ɨlyepe.
\v 5 Pɨshɨbo watsaklo, ẽrlo ahnũwo pahwoso uje titɨm olak. Porrosht chiihla erze uje oso ochii õr losuhlaaboho par uje ye olotiis ɨrpe pork chɨbɨte lahwoso par ɨshɨm wɨr õr owich erze uje otsahmũr ɨre.
\v 6 Per olak uhulo opook erze uje õr losuhlaabo pork ye uhulo õr ɨlo erze ɨhɨ̃r deyope. Ye oniyokõr uje mɨhnɨkɨ̃hɨ olak per erze ɨhɨ̃r deyo wɨr uje oloter olak hn oshuu ohnoy olak otseya olak jwe ɨkɨch.
\v 7 Wɨr uje shɨ oloter Cristo ɨr iich toy. Cristo wɨchɨ uu olak yɨnsɨrc.
\v 8 Kɨmɨjɨ yelɨj aluwelo asa ley waa je ich ɨhɨ̃rpa uje de Porrosht ahwoso ehet ich ahakõrlo uje ich ompa. Asa ley tata shuu ɨtsorz: —Tyenɨj ahmũr eshɨbo uhu ɨtso owa uje ahmũr owa.—
\v 9 Per kɨmɨjɨ ahakõrlo uhulo kɨnaha par yet hn kɨnaha par yet ich ahakõrlo uje ich mɨ̃hnɨk pork aluwelo uje Porrosht ley tata.
\v 10 Kɨmɨjɨ yeẽk chɨhɨ uje nos shiyokõr uje Porrosht ley tata per shɨ iyuwe Porrosht ley sohmɨra ich nos iyuwe Porrosht ɨr ley,
\v 11 pork Porrosht chɨbɨte lahwoso ɨm: —Ye orãha,— hn tata toy ɨm: —Ye tuk yet uhu toy.— Kɨmɨjɨ ye orãhape per tuk yet uhu toy ich aluwe Porrosht ley.
\v 12 Erahalo uje Porrosht wɨchɨ jwe uje teychɨm eyok nehe kɨmɨjɨ yiyuwe erze ley uje Cristo chɨbɨte uje ich ɨhɨ̃r pishɨ o kɨmɨjɨ ye yiyuwepe heke ye ompe uje yiyuwe. Ye aluwelo uje athɨlo kuche hn ye aluwelo uje ahakõrlo kuche.
\v 13 Uje yeẽk chɨhɨ hn ye nuunape uje yet losuhlaap par takashɨm ich Porrosht wɨchɨ jwe. Tyenɨj teychɨm ese uje ye takashɨm leshɨbichpe kɨmɨjɨ niyokõr uje mɨ̃hnɨk o ye niyokõrpe hn ye Porrosht nuunape uje wɨchɨ losuhlaap par uje takashɨm. Erze uje ochuuna uje õr leshɨbo losuhlaabo hn otakashɨm õr wɨr uje Porrosht chuuna uje õr losuhlaabo hn takashɨm õr uje otɨ̃r ɨre ahɨr nehe par uje teychɨm õr kɨmɨjɨ oniyokõr mɨhnũwo o ye oniyokõrpe.
\s Õr ahwoso de uje ye jukur.
\p
\v 14 Pɨshɨbo watsaklo, ese uje tata uje ye lotiis Jesuspe per ye niyokõrpe uje Jesús sahmũr ich ye ɨr ahwoso jukur. ¿Je wɨchɨ Porrosht aap uje shɨ tata uje ye lotiis Jesuspe?
\v 15 Shɨ tɨteẽta kuchɨt. Kɨmɨjɨ Porrosht aap hnakɨrap o kɨmɨjɨ tɨmchar ɨr ɨshuwo nĩhyok o kɨmɨjɨ ɨr poso nĩhyok par ese deeych,
\v 16 kɨmɨjɨ olak yeẽk tatɨm ɨre shuu ɨtsorz ɨm: —Sehe tuu bu eyhi hn ehet kɨɨs. Sehe ye tuu hmemɨt nẽhi owape hn ew uje shɨ owa ahmũr.— Ye jukur uje wɨchɨ shuu ɨtsorz uje ye dosɨm uje ɨre nesita.
\v 17 Heke ese uje tata uje ye lotiis Jesuspe ich tyenɨj shiyokõr uje om par uje shuu ɨmeheeych uje ɨre Porrosht aap. Kɨmɨjɨ ye niyokõrpe uje om ich ye jukur erze ɨr ahwoso.
\v 18 Kɨmɨjɨ yeẽk tatɨm olak yet ɨm: —Atɨm yokɨke uje owa Porrosht aap pork ye otiis Jesuspe per yok tiyokõr uje Porrosht sahmũr.— Owa yok uje ye otiis Jesuspe per ye ahakõr uje Porrosht sahmũr hn yok ɨtspo, tokowa owa uje ye tokotiis Jesuspe pork tiyokõr uje Porrosht sahmũr.
\v 19 Ye otiispe uje shɨ Porrosht nohmɨra uje de. Ich om uje ata uhu ɨtsorz. Demonyo ɨtspo, wɨr ye olotiispe oshuu ɨtsorz heke otolpa nehech õr ɨkiyo tãra.
\p
\v 20 Athaka uje ye otiis Jesuspe per ye ahakõr uje wɨchɨ sahmũr, heke owa shɨ ɨtso uje owa totihla. Shɨ ata uje ye otiis Jesuspe hn ye ahakõr uje sahmũr, heke tyenɨj tuu ɨmeheeych uje ahwoso ye jukur.
\v 21 Tyenɨj owa eyucha uu eyok porokkite Abraham lɨshɨ. Uu ɨr ijɨt iich otsɨɨ Isaac. Shiyokõr altar hn chɨbɨte Isaac eeychkite par uje shuu hn ɨshɨm Porrosht shuu ɨtso uje Porrosht tatɨm ɨre heke Porrosht chɨbɨte uje Abraham ɨr ɨluu om hn ɨr owich de Porrosht ahɨr.
\v 22 Ɨmeheeych uje Abraham ye lotiis Porroshtpe pork shiyokõr uje ɨre tata. Uje shiyokõr shuu ɨtsorz ich shuu ɨmeheeych uje ich ũrpa uje ye lotiis Porroshtpe.
\v 23 Heke Porrosht ahwoso ich yakaha uje tata uje Abraham ye lotiis Porrosht petɨkkite heke Porrosht ɨshɨ ɨr hnɨtew hn shuu owich de dahɨr. Oso otata uje Abraham wɨchɨ Porrosht ihyẽrak
\v 24 heke ich ɨmeheeych uje Jesús ɨshɨ oso õr hnɨtewɨhɨ Porrosht ahɨr shɨ uje oshiyokõr uje ɨre sahmũr pork ye olotiis ɨrpe. Ye doshɨpe par erze uje shɨ otata uje ye olotiis ɨrpe.
\v 25 Shɨ ɨtspo asa tɨmcharrza waa je iich otsɨɨ Rahab. Wate yɨtoro. Porrosht perdonar watkite pork takashɨm erze hnakɨrbo uje wɨr israel oso õr pahne, hn shuu oyuhwo ochɨkãha dehet yet.
\v 26 Shɨ tɨteẽta. Kɨmɨjɨ oso õr ɨchɨbiyo tokole ich otoy. Shɨ ɨtspo erze oso uje otata uje ye olotiis Jesuspe hn ye oniyokõr uje Porrosht sahmũr, ich õr ahwoso ye jukur.
\c 3
\s Oso õr ahãrc shɨ ɨtso jwekɨta.
\p
\v 1 Pɨshɨbo watsaklo, ye uhu olak kɨhniya uje amsahalo par ahakorãhalo õr Porrosht ahwoso. Uje Porrosht teychɨm daabo nehe kɨmɨjɨ oniyokõr uje om o kɨmɨjɨ ye oniyokõrpe ich erahalo uje õryok uje oyiyokorãha oso ich ma chukwi õryok ɨluu je erze yewo.
\v 2 Nos yɨnãhalo kuche ich kɨhniya. Kɨmɨjɨ yeẽk chɨhɨ Porrosht aabo õr ehet uje yelɨj nimehĩ uje tata ich ɨr ɨluu om pishɨ. Chɨraha uje tɨbey ɨre par uje ye niyokõrpe uje mɨ̃hnɨk.
\v 3 Shɨ tɨteẽta uje yɨmchahalo kabyuhwo freno ahwo par yonãhalo ich yuhulo shiyokõr uje eyok yahmũrlo. Eyok pwele yomtɨs ɨre.
\v 4 Hn tɨteẽta kuchɨt yet. Pohɨr wɨr ich deyo. Uje myent data tɨbichu ich chukus, per ɨr yɨnsɨro ochishew asa timon waa je ijaap hn ochobɨrho erze pohɨr oshuu tɨ̃r uje õr ɨre otsahmũr.
\v 5 Eyok ahãrc ich ɨtspo. Wɨchɨ ijaap per pwele tata kuche ich shuu dichpa par shuu eyok narim eyok. Erahalo uje jwekɨta waa je ijaap ich pwele sẽru hmonte uje ich dich hn shuu nos duhlu.
\v 6 Oso õr ahãrc ich ɨtso asa jwekɨta. Kuche mɨhnũwo ich kɨhniya tãra oso õr ahãrc. Wɨchɨ uje shuu õr ɨluu mɨhnũ hn shuu oshiyokõr uje ich mɨhnũwo. Õr ahãrc shɨ ɨtso jwekɨta uje tãra Satanás.
\p
\v 7 Hnakɨrbo nos oshuu doshɨpo kɨnãho kɨnãho masaabo. Chɨpɨrme ɨtspo hn echɨ̃re hn erze uje de onoot bahluta ehet nos oshuu masaabo.
\v 8 Per shɨ õr ahãrc nohmɨra uje ye õr pwelpe par uje otsontew. Wɨchɨ shɨ ɨtso echeẽt uje ich wos deyo uje ye õr pwele oduhu masaappe pork õr ahãrc shish tata uje ich mɨhnũwo.
\v 9 Shɨ pork eyok ahãrc de ich yiitɨlo uje Porrosht uu eyok Deych ich dich. Hn ɨtspo eyok ahãrc yii eyok uhut hn yiyuhulo eyok ahwoso mɨhnũwo par eyok leshɨbo uje Porrosht shiyokõr õrni shuu õr ɨtso ɨre.
\v 10 Pɨshɨbo watsaklo, yiyuhu eyok ahwoso uje ich om hn yiyuhu eyok ahwoso uje ich mɨhnũwo hn nos tãra eyok ahwo. Ye ompe uje yiyokõrlo yuhulo ɨtsorz.
\v 11 Shɨ tɨteẽta jotsɨt uje sohmɨra. Ye õr pwelpe ochiyuhu awɨt uje ɨhɨ̃rt hn uje chiyok. Eyok ahwo ɨtspo, ye ompe uje ahwoso om hn ahwoso mɨhnũwo tãra eyok ahwo.
\v 12 Pɨshɨbo watsaklo, shɨ tɨteẽta kuchɨt yet. ¿Je õr pwele ochekushu naraje hn ɨr ee mango? ¿Je ompo uje ochekushu limon hn ɨr ee porosuwo? Ye ɨr ee tokolpe ɨtsorz. Ɨtso jotsɨt nohmet. Ye õr pwelpe ochiyuhu awɨt uje chiyok hn uje ich ɨhɨ̃rt.
\s Ode uje Porrosht shuu õr eykdeyo.
\p
\v 13 Titɨm olak. Ese uje ma eykdeyo olak ehet tyenɨj shuu ɨmeheeych uje eykdeyo pork ɨr ɨluu om hn shiyokõr uje om. Tyenɨj ye narim ɨre par uje shuu ochɨraha uje ɨre eykdeyo.
\v 14 Per kɨmɨjɨ abɨtlo pishɨ olak leshɨbo õr kushjãro hn kɨmɨjɨ sehe uhu olak no ma uje olak ma deyo hn atɨmlo yewo uje ɨtsorz ich ahakõrlo mɨ̃hnɨk. Porrosht ahwoso tata uje wɨr mɨhnũwo. Erze uje onarim ɨre otsata uje ich ũru.
\v 15 Erze õr eyuwo uje ɨtsorz ye tãra poõrzpe. Shɨ tãra erze oso uje ode nãhu ɨ̃rmo. Tãra erze uje õr ɨluu mɨhnũ. Tãra dyablo.
\v 16 Uje oso opota pishɨ yet kuche hn sehe oduhu ɨre ma deyo shish tokole uje yelɨj onahmũrye hn nos oshiyokõr kuche kɨhniya uje ich mɨhnũwo.
\v 17 Erze oso uje Porrosht shuu õr eykdeyo wɨr ich õr ɨluu ɨhɨ̃r pishɨ hn õr aho kɨɨs. Õr ɨle om hn oshiyokõr erze uje õr bahluwo otatɨm õr. Erze uje Porrosht shuu õr eykdeyo shish ochuuna uje oso õr losuhlaabo hn otakashɨm õr. Shish oshiyokõr uje ich om hn yelɨj oniyokõr kɨnaha par yet hn kɨnaha par yet hn yelɨj õr aho yũhursh.
\v 18 Oso uje oshuu oso yewo õr aho kɨɨs ich oshuu õr ɨluu om. Wɨr shɨ õr ɨtso uje ochukwẽr jõro ehi hn ich uhurc ich ochekushu uje ich om.
\c 4
\s Erze ɨ̃rmo ɨshujãro kɨnãho hn erze uje Porrosht sahmũr ich kɨnãho.
\p
\v 1 Titɨm olak kɨmɨjɨ erahalo ¿ɨnaapo heke shish atsɨlye hn ahakosloye? Ahakõrlo ɨtsorz pork olak aho pota kuche hn erahalo uje ich ye ompe heke olak aho chiilehet.
\v 2 Sehe uhulo kuche chɨhɨ olak ahɨr per ye odosɨm olakpe. Heke ich tukulo yet hn abɨtlo yet ɨr kuche per ye olak pwelpe eshlo ese uje ich ahmũrlo. Heke ich ahakosloye hn atsɨlye per ye eshɨlpe pork ye apurlo Porroshtpe par uje ɨshɨm olak uje ahmũrlo.
\v 3 Uje apurlo Porrosht ich ye dosɨm olakpe pork shɨ sehe apurlo par olak no ma shɨ par uje ahakõrlo uje ahmũrlo.
\p
\v 4 Olak athɨlo uje ahmũrlo Porrosht per ma ahmũrlo ɨ̃rmo ɨshujãro ɨtso tɨmcharrza uje torãha dabich. ¿Je ye erahalope erze uje ma otsahmũr ɨ̃rmo ɨshujãro ochii Porrosht namãha? Uje yeẽk chɨhɨ hn chɨbɨte uje erze ɨ̃rmo ɨshujãro ich ɨhɨ̃rtso par ɨre ich chii Porrosht namãha.
\v 5 ¿Je olak eyuwo tɨsɨr uje ye jukur uje Porrosht ahwoso tata shuu ɨtsorz: —Porrosht Ɨchɨbich uje de eyok aho ich ajɨrmɨk pork sarhak eyok?—
\v 6 Porrosht takashɨm eyok pork ɨr ahwoso tata shuu ɨtsorz: —Porrosht sontew erze uje onarim ɨre per takashɨm erze uje yelɨj onarim ɨre.—
\v 7 Asɨmlo olak Porrosht par uje ahakõrlo uje ɨre sahmũr. Hn atɨmlo dyablo uje ye ahakõrlope uje ɨre sahmũr, hn wɨchɨ tokolɨhɨ olak ahɨr.
\v 8 Uhu olak eyuwo dishew par uje eeychãhalo Porrosht hn ɨre ɨtspo shuu deyuwo chish olak. Moymlo erze kuche mɨhnũwo uje ahakõrlo shɨ ɨtso uje erhũlo olak hme, hn olak tyenɨj enshiilo olak aho pork ye ompe uje olak aho yũhursh.
\v 9 Uje ahakõrlo kuche mɨhnũwo ich shish olak aylpa. Ye ompe uje ɨtsorz. Tyenɨj eenɨlo uje ahakõrlo mɨhnũwo heke olak dosdarak hn eyerhlopa.
\v 10 Ye olak narim olakɨhɨ eyok Ɨrhĩch ɨle ɨkɨch heke wɨchɨ takashɨm olak.
\s Ye ompe athɨlo uje olak leshɨbich shiyokõr mɨ̃hnɨk uje ye erahalope.
\p
\v 11 Pɨshɨbo watsaklo, ye eyehnɨmlo olak leshɨbich. Uje eyehnɨmlo ɨre ich shɨ eyehnɨmlo Porrosht ɨr ley. Hn uje uhulo olak ɨtso jwe hn ebɨtɨlo shɨ ɨtso uje ich ye ompe Porrosht ɨr ley. Uje ebɨtɨlo olak uhulo ɨtsorz ich ye ahakõrlope uje asa ley tata. Shɨ uhulo olak ma deyo je Porrosht ɨr ley.
\v 12 Shɨ Porrosht wɨchɨ uje de uje chɨbɨte asa ley. Wɨchɨ uje yesh jwe. Pwele shuu oso õr owich de dahɨr hn pwele shuu otɨ̃r urhuta bahluta ehet. ¿Per owa yeẽkpo uje ebɨte owa par jwe par uje ata uje owa eshɨbich shiyokõr uje mɨ̃hnɨk?
\s Ye odɨraha latɨkpo tokole dechole.
\p
\v 13 Ẽrlo uje titɨm olak, olak uje uhulo ɨtsorz on: —Ele ahle o kɨmɨjɨ dechole hn oyɨtɨ̃r ese dɨt o kɨmɨjɨ ese dɨt yet. Oyiyakahachɨs nehech ãyt nohmɨra par uje oyiyokõr õryok ɨbiyo hn oyerz hnote.—
\v 14 Per ye erahalope latɨkpo tokole dechole. ¿Eyok ɨkɨrĩt latɨkpo? Shɨ ɨtso ɨsɨhɨlt uje ihnɨmich, per wɨsɨk wɨsɨk ich nĩhyok.
\v 15 Ma om uje athɨlo on: —Kɨmɨjɨ eyok Ɨrhĩch nahmũr, dechole ich ehn õryok ɨka hn oyiyokõr wɨchɨ o kɨmɨjɨ oyiyokõr yet.—
\v 16 Per yelɨj athɨlo uhulo ɨtsorz. Shɨ olak narim olak uje ekitkẽrloye par uje ahakõrlo kuche. Uje olak narim olak uhulo ɨtsorz ich ahakõrlo uje mɨhnũwo.
\v 17 Ese uje chɨraha uje ich om par uje shiyokõr hn ye niyokõrpe ich shiyokõr uje ich mɨ̃hnɨk uje Porrosht ye nahmũrpe.
\c 5
\s Uje ɨhɨ̃r deyo oshiyokõr mɨhnũwo ich tyenɨj cheeshɨ tɨ̃r õrpo.
\p
\v 1 Ẽrlo pahwoso uje titɨm olak uje olak ɨhɨ̃r deyo uje ahakõrlo mɨhnũwo. Tyenɨj eyerhlo hn ebichlo pork erze kuche mɨhnũwo uje tɨ̃r olak nehe ich dospa.
\v 2 Uu olak ɨshujãro ich nos taata, hn uu olak ɨshuwo ich nos ɨhnẽro tew.
\v 3 Olak oro hn olak plata ich ye jukur. Wɨr shɨ ɨtso uje fyerɨt taata hn ɨr ukult tokole. Erze ɨr ukulo shuu ɨmeheeych uje ye akashɨmlo yewo heke ahakõrlo mɨ̃hnɨk, hn erze ɨr ukulo tyenɨj shuu otsepyẽr olak shɨ ɨtso uje jwekɨta tew olak. Shɨ etiyẽrlo olak kuche uje ich ɨhɨ̃rtso ich kɨhniya ele hnɨmich nehech ele ahle.
\v 4 Ẽrlo pahwoso. Ehnyẽrlo erze uje ochish obiyoho olak shakɨrrza ehet ochekushu jõro, hn ye eshlo õrpe. Wɨr otɨbich hn eyok Ɨrhĩch uje ukurbo deyo de chunt õr.
\v 5 Uje olak de nãhu ɨ̃rmo ich olak ɨhɨ̃r deyo hn olak kushjãro kɨhniya ich ɨhɨ̃rtso hn shish eylo kuche uje ahmũrlo. Shɨ olak ɨtso wõjo uje ochɨ̃ra par uje oshuu sohlo. Erze wõjo sahmũr erze labɨso uje tew nehech terɨhɨ ese deeych uje oshuu.
\v 6 Olak denunsya erze uje ye oniyokõrpe uje mɨhnɨ̃kni hn tukulo õr uhulo otoy. Ye onontew olakpe.
\s Porrosht aabo tyenɨj õr ewenta erze kuch mɨhnũwo uje tɨ̃r õr.
\p
\v 7 Pɨshɨbo watsaklo, tyenɨj olak ewenta erze uje prowa olak uje ehn yahpaa eyok Ɨrhĩch taãcha nehe. Shɨ olak ɨtso ese uje chukwẽr jõro ɨr shakɨrrza ehet hn iyem par uu jõro ee. Shɨ iyem ɨshɨrĩt uje ɨbɨk par chukwẽr jõro. Iyem toy ɨshɨrĩt par chekushu jõro.
\v 8 Olak ɨtspo shish tyenɨj olak ewenta erze uje prowa olak hn ye uhu olak koswãha pork eyok Ɨrhĩch tyenɨj taãcha shɨchish.
\v 9 Pɨshɨbo watsaklo, ye eshlo majamichɨhɨye pork kɨmɨjɨ eyehnɨmlo olak leshɨbo ich Porrosht wɨchɨ jwe uje tyenɨj sepyẽr olak. Wɨchɨ de par sepyẽr olak shɨchish shɨ ɨtso uje dechɨ pwert ebich par masaha ehet.
\v 10 Pɨshɨbo watsaklo, uhulo olak ɨlo uu profeta poruwo wɨshɨ uje otatɨm õr eyok Ɨrhĩch ɨr ahwoso. Uje kuche prowa õr ich shish õr ewenta.
\v 11 Erahalo uje nos otata uje ich õr aylpa erze uje õr ɨre ewenta erze kuche uje prowa õr. Ich nos entloni uje Job ewenta erze kuche uje prowa ɨre, hn erahalo uje ich uhurzkite hn eyok Ɨrhĩch takashɨm ɨre. Heke ɨmeheeych uje eyok Ɨrhĩch shish chuuna uje kuche mɨhnũwo tɨ̃r eyok hn takashɨm eyok.
\v 12 Pɨshɨbo watsaklo, titɨm olak erze uje ma tyenɨj ahakõrlo. Uje sehe athɨlo ẽhe ich shɨ on: —Ẽhe.— Hn uje sehe athɨlo uje nĩhyok ich shɨ athɨlo nĩhyok, hn ye ata ahwoso ma par uje uhu ɨmeheeych uje olak ahwoso ich ũru. Ye ebiilo kuche uje de poõrc hn ye ebiilo kuche uje de hnɨmich par uje shuu ɨmeheeych uje olak ahwoso ich ũru. Ye ebiilo kuche kɨnãho. Kɨmɨjɨ ebiilo yewo uhulo ɨtsorz ich Porrosht tyenɨj sepyẽr olak.
\p
\v 13 Kɨmɨjɨ olak yeẽk uje kuche mɨ̃hntɨk tɨ̃r ɨre ich tyenɨj ɨre orar. Hn kɨmɨjɨ olak yeẽk ehet kɨɨs ich tyenɨj teechɨ seẽt imno uje shuu Porrosht ich dich.
\v 14 Kɨmɨjɨ olak yeẽk permo ich shuu otɨbii erze anciano uje otɨbey Porrosht aabo par uje wɨr õr orar otsapur Porrosht par ɨre. Shɨ otsapur eyok Ɨrhĩch ɨr iich hn otormɨ̃hɨ wɨchɨ aseyte.
\v 15 Uje erze anciano ye olotiis Porroshtpe hn otsapur par ese uje permo ich eyok Ɨrhĩch chukuta ɨre. Kɨmɨjɨ shiyokõr kuche mɨhnũwo ich Porrosht perdonar ɨre.
\v 16 Heke uje olak yeẽk shiyokõr mɨhnɨkɨ̃hɨ deshɨbich ich tyenɨj tɨ̃r ɨre par uje sapur perdon, hn shish olak orarye. Uje ahakõrlo uhulo ɨtsorz hn Porrosht chukuta olak. Porrosht aap uje ɨr ɨluut om uje orar ich ɨr ukurbo deyo de pork Porrosht tẽr ɨre hn shiyokõr uje sapur.
\v 17 Uu profeta Elías lɨshɨ hnakɨrap shɨ ɨtso eyok. Uje orar ich sɨnaha ɨre par uje ye ɨbɨkpe hn ye ɨbɨkpe nehech tre ãyo hn pehet ĩya.
\v 18 Uje orarponi par uje ɨbɨk hn ɨbɨk. Heke erze pohɨr nos pohna. Uje terɨhɨ ɨshɨrĩt hn ɨr ee de.
\p
\v 19 Pɨshɨbo watsaklo, uje olak yeẽk saham uje ich ũru hn yet shuu cheeshpo par uje shiyokõr uje Porrosht ahwoso tata,
\v 20 ich erahalo uje yeẽk shuu iim erze mɨhnũwo uje shish shiyokõr ich takashɨm wɨchɨ par uje ye tope hn shuu Porrosht perdonar erze kuche mɨhnũwo uje wɨchɨ shiyokõr ich kɨhniya.