\id 1PE Chamacoco NT - Paraguay 2000 (web 2013)
\h 1 Pedro
\toc1 1 Pedro
\toc2 1 Pedro
\toc3 1Pe
\mt1 1 Pedro
\c 1
\s Pedro ɨshɨm Porrosht aabo õr saludo.
\p
\v 1 Yok Pedro. Yok Jesucristo ɨr apóstol. Tichew ana hutɨta par olak israel oso uje olak Porrosht aabo uje olak dihipo kɨnãho pork ebuhulo erze hnɨmo uje iiyo otsɨɨ Ponto, Galacia, Capadocia, Asia, hn Bitinia. Olak owich de poõrc per yesh olak de nãhu ɨ̃rmo.
\v 2 Porrosht uu eyok Deych chiihla olakkite pork chɨraha wapni uje tyenɨj ye otiislo Jesus nehe, heke Porrosht Ɨchɨbich churhũ olak aho par uje ahakõrlo uje Jesucristo sahmũr. Uje Jesucristo tooho kruskite ɨr armɨsta noshɨ hn ɨshɨ olak hnɨtewɨhɨ Porrosht ahɨr.
\s Pedro sehe duhu shish odɨraha uje tyenɨj õr ɨkpo nehe.
\p Sehe tuu Porrosht shish dosɨr olak hn shish duhu olak aho kɨɨs.
\v 3 Oyeeychãha Porrosht uu eyok Ɨrhĩch Jesucristo ɨr Deych pork chuuna uje eyok losuhlaabo hn sosɨr eyok hn shuu eyok shurhãpo heke shuu yɨraha uje tyenɨj eyok ɨkpo hn yɨtɨ̃r eyok owich uje de Porrosht ahɨr nehe pork Jesucristo ɨkponi.
\v 4 Kuche de wahacha poõrc uje Porrosht tɨbey par uje ɨshɨmɨhɨ olak nehe. Wɨr yelɨj nɨhna ɨre. Nĩhyok uje waresh, hn nĩhyok uje ɨr kolor noshɨ.
\v 5 Uje ye otiislo Porroshtpe ich wɨchɨ tɨbey olak chɨ̃ra dakɨrbo nehech aachɨ̃hɨlo ahɨr nehe. Olak owich dechɨ. Uje terɨhɨ ɨ̃rmo uhurc nehe ich Porrosht shuu eychɨmlo olak owɨlo uje de ɨre ahɨr.
\v 6 Uje ehn olak de nãhu ɨ̃rmo ich shish olak aylpa pork olak owɨlo de wahacha poõrc, hn uje mɨhnũwo tɨ̃r olak ich shɨ prowa olak ich kɨhniya uje kɨnãho kɨnãho, per shish tyenɨj olak aylpa.
\v 7 Wɨr shuu ɨmeheeych kɨmɨjɨ ũru uje ye otiislo Jesuspe o kɨmɨjɨ ye ũrpe shɨ ɨtso uje ochɨbɨte ese oro jwekɨta ehet par uje oshuu ɨmeheeych kɨmɨjɨ wɨchɨ oro pisht o kɨmɨjɨ ye wɨchpe. Ye otiislo Jesús ich ma bale je oro. Erze oro pwele sɨhna ɨre. Uje Jesucristo cheeshpo nehe ich tatɨm olak uje ich om uje ye otiislo ɨrpe hn shuu olak aylpa hn shuu olak deyo.
\v 8 Ye amlo Jesucristo petɨkni per shish ahmũrlo ɨre. Ele ahle ye amlo otɨk per ye otiislo ɨrpe heke olak aylpa nehech ye erahalo uje athɨlo.
\v 9 Shɨ pork ye otiislo Cristope heke olak owich de Porrosht ahɨr.
\p
\v 10 Titɨm olak uje erze profeta poruwo wɨshɨ otatkite uje Porrosht takashɨm olak par uje shuu olak owich de dahɨr. Wɨr oshuu deyuwo tɨsɨ̃rkite. Sehe odɨraha ¿je shɨ Porrosht duhu ɨnaapo par uje shuu õr owich de dahɨr?
\v 11 Cristo Ɨchɨbich de erze profeta õr aho hn shuu otatɨm erze oso je deeych yet nehe hn oso oloter Cristo hn Cristo Ɨchɨbich shuu otatɨm õr erze kuche ɨhɨ̃rtso uje tyenɨj tokole nehe. Erze profeta sehe odɨraha yeẽkpo ese Cristo hn latɨk nehe hn taãcha.
\v 12 Porrosht shuu erze profeta ochɨraha erze uje otatɨm oso wɨr ye par õr ɨrpe. Erze ɨr ahwoso wɨr par olak. Porrosht shuu Dechɨbich ihnɨmich, hn ele ahle Porrosht Ɨchɨbich shuu oso otatɨm olak uje Jesús ɨshɨ olak hnɨtewɨhɨ Porrosht ahɨrkite hn ye otiislo õr. Erze ahwoso uje otatɨm olak Porrosht ɨr anjele sehe odɨraha toy.
\s Porrosht sehe duhu ye oniyokõr uje mɨhnũwo.
\p
\v 13 Titɨm olak. Shish uhu dish olak eyuwo par uje ahakõrlo uje Porrosht sahmũr. Shɨ anemlo erze uje ich om uje Porrosht ɨshɨmɨhɨ olak uje Jesucristo cheeshpo nehe.
\v 14 Shɨ ɨtso uje pɨkɨhnint shiyokõr uje deych hn data otatɨm ɨre ich ahakõrlo uje Porrosht sahmũr, hn ye eeshlopo ahakõrlo erze olak ɨluu mɨhnũ uje antni ahakõrlo uje ehn yahpaa erahalo Porrosht petɨkni.
\v 15 Ich nos wɨr erze uje ahakõrlo ich ye ahakõrlo uje mɨ̃hnɨk pork ese uje chiihla olak par amsahalo par olak ɨr aabo yelɨj niyokõr uje mɨ̃hnɨk.
\v 16 Porrosht ɨr ahwoso tata ɨm: —Ye ahakõrlo uje mɨ̃hnɨk pork yok yelɨj tiyokõr uje mɨ̃hnɨk.—
\v 17 Olak uje ebiilo Porrosht on: —Dii Porrosht,— titɨm olak uje wɨchɨ jwe uje teychɨm oso kɨmɨjɨ oniyokõr uje mɨ̃hnɨk o kɨmɨjɨ ye oniyokõrpe. Yelɨj duhu oso õr kɨnãho hn duhu yewo õr kɨnãho. Shish shuu nos õr ɨtsye. Heke uje ehn yesh olak de nãhu ɨ̃rmo ich olak dihip kɨnãho pork olak owich pisht de Porrosht ahɨr, heke shish ahakõrlo uje ich om hn atɨlɨlo Porrosht.
\v 18 Erahalo uje Porrosht shuu moymlo uje ahakõrlo erze olak ɨluu mɨhnũ uje tãra uu olak poruwo wɨshɨ. Õr ɨluu ye jukur. Par chiyuhu olak shuu ɨtsorz ich ɨshɨ olak hnɨtewɨhɨ dahɨrkite. Wɨchɨ bahat ye ɨlo erze orope hn plata. Wɨr shɨ taata shɨchish.
\v 19 Shɨ uje Cristo tooho krus eeychkite hn ɨr armɨsta noshɨ wɨchɨ uu bahat par ɨshɨ eyok hnɨtewɨhɨ Porrosht ahɨr. Nĩhyok yeẽk pwele chɨbɨte ɨr armɨsta bahat. Ɨre shɨ ɨtso obejɨt uje ye wopɨkpe hn ye yarɨ̃rsh uje oshuu par uje oteeychãha Porrosht.
\v 20 Uje ehn yahpaa Porrosht niyokõr ɨrmõkite ɨchii chiihla Jesús par uje ɨshɨ oso õr hnɨtewɨhɨ dahɨr nehe. Ele ahle ich yej terɨhɨ ɨ̃rmo uhurc heke Porrosht shuu ɨmeheeych uje Cristo ɨshɨ olak hnɨtew par uje sosɨr olak.
\v 21 Shɨ uje ye otiislo Cristo heke ye otiislo Porroshtpe. Wɨchɨ shuu Cristo ɨkponi hn chɨbɨte ma dich. Heke ye otiislo Porrosht hn shɨ anemlo uje ɨshɨmɨhɨ olak owich uje de ɨre ahɨr.
\p
\v 22 Porrosht ahwoso ich ũru. Uje ahakõrlo uje tata ich erhũlo olak aho par uje ahmũrlo olak leshɨbo hn par uje ye uhulo olak aho yũhɨrsh. Tyenɨj enahalo olak par uje ahmũrlo pishye
\v 23 pork olak ich olak shurhãpo. Ye olak lata hn olak deychpe uje oshuu olak shurhãpo. Wɨr terɨhɨ õr ɨshɨ̃ryo ich otoy. Porrosht ahwoso shuu olak shurhãpo. Wɨr yelɨj nɨhna ɨre. Shish yakaha.
\v 24 Ɨr ahwoso tata shuu ɨtsorz:
\p —Nos wɨr oso shɨ õr ɨtso ɨhnemyo. Nos wɨr kuche uje oso otsahmũr wɨr shɨ ɨtso ɨhnemyo uje pohna. Shɨ pohna hn kako hn kay,
\v 25 per eyok Ɨrhĩch ɨr ahwoso shish yakaha. Yelɨj nɨhna ɨre.—
\p Erze Porrosht ahwoso wɨr uje otatɨm olakni shuu amsahalo par olak ɨr aabo.
\c 2
\p
\v 1 Nos moymlo erze uje ich mɨhnũwo. Nos moymlo olak ukushiĩ, hn ye uhu olak aho yũhɨrsh. Moymlo uje abɨtɨlo yewo õr kuche, hn ye eyehnɨmlo yewo.
\v 2 Uhulo olak ɨlo pɨkɨhnint uje hnii shũrha hn shish sehe duku lata ɨr ɨsho. Ich uhulo Porrosht ahwoso ɨlpo par uje shish sehe erahalo ma hn ahakõrlo ma uje Porrosht sahmũr nehech uhurc ich olak ɨluu ompa
\v 3 pork ich erahaloni uje eyok Ɨrhĩch ich ɨr ɨluu om.
\s Cristo ich shɨ ɨtso kojach per ɨka.
\p
\v 4 Ahakõrlo uje eyok Ɨrhĩch sahmũr shɨ ɨtso uje ethɨ̃rlo olak ɨre. Wɨchɨ yelɨj duhu ɨre kɨnaha. Shɨ ɨtso kojach per ɨre shish ɨka. Hnakɨrbo oshiyokõr pwertɨt ochɨ̃ra kojano yewo per oym ese kojach uje Porrosht chiihla. Par Porrosht ich wɨchɨ ma bale je erze kojano yewo.
\v 5 Olak ɨtspo pork olak ɨtso kojano per olak ɨka. Asɨmlo olak Porrosht par uje wɨchɨ shiyokõr lahuch chɨ̃ra olak par uje olak saserdote par eeychãhalo ɨre, pork Jesucristo wɨchɨ uje ɨshɨ olak hnɨtew heke eeychãhalo Porrosht ɨtso uje Porrosht sahmũr,
\v 6 pork Porrosht ahwoso tata shuu ɨtsorz: —Yok tɨbɨte kojach ese dɨt Sión. Ese kojach uje tiihla ich debichpa. Wɨchɨ ma bale par pwertɨt. Erze uje yelɨj olotiis ɨre wɨchɨ yelɨj duhu opook.— Cristo wɨchɨ uu kojach.
\v 7 Par olak ich bale pork ye otiislo ɨrpe, per par erze uje otsotiis ɨre ich kɨnaha pork Porrosht ahwoso tata shuu ɨtsorz: —Erze hnakɨrbo oshiyokõr pwertɨt ochɨ̃ra erze kojano per otsɨtak ese kojach yetkite per ese kojach ich ma bale par ese pwertɨt je erze yewo. Wɨchɨ kojach ɨtso Cristo.—
\v 8 Hn tata toy ɨm: —Ese kojach shɨ ɨtso uje shuu õr hnɨte hn shuu õr kay.— Porrosht chɨbɨte uje nos wɨr erze uje ye oniyokõr uje ɨr ahwoso tata ich tyenɨj shɨ ɨtso uje õr kay.
\v 9 Olak ye olak ɨlo õrpe. Porrosht chiihla olak par ɨre. Wɨchɨ rey hn shuu amsahalo par saserdote par akashɨmlo oso uhulo oteeychãha Porrosht. Olak Porrosht aabopo. Olak Porrosht ɨr yɨlo hn wɨchɨ uu olak yɨnsɨrc. Porrosht nos shiyokõr shuu ɨtsorz par olak par uje atɨmlo oso erze uje shiyokõrni uje ich ɨhɨ̃rtso. Wɨchɨ chiyuhu olakɨhɨchɨs olak ɨluu shɨ ɨtso uje olak de dɨhlelta par uje shuu olak ɨluu ich om shɨ ɨtso uje erze luu uje ich ɨhɨ̃r chihit olak.
\v 10 Tenitkite ye olak Porrosht aabope, per ele ahle ich olak Porrosht aabo. Tenit Porrosht ye nuunape uje olak losuhlaabo par uje sosɨr olak, per ele ahle ich chuuna uje olak losuhlaabo hn sosɨr olak pork ɨshɨ olak hnɨtewɨhɨ dahɨr.
\s Wɨr tyenɨj oshiyokõr uje Porrosht sahmũr.
\p
\v 11 Pɨshɨbo watsaklo, ẽrlo pahwoso uje titɨm olak. Olak owich de Porrosht ahɨr heke olak dihipo kɨnãho uje yesh olak de nãhu ɨ̃rmo. Heke moymlo erze õr eyuwo mɨhnũwo uje sehe duhu ahakõrlo uje mɨhnũwo. Wɨr shɨ ɨtso uje teye hõr wɨr erze eyuwo om uje Porrosht sehe duhu ahakõrlo.
\v 12 Shish tyenɨj ahakõrlo uje ich om par uje wɨr oteychɨm olak erze uje ye odɨraha Porroshtpe. Kɨmɨjɨ otata uje ahakõrlo uje ich mɨhnũwo, per omo uje ahakõrlo uje ich om ich shɨ otata lekushiĩ, heke deeych yet nehe uje Porrosht tɨrẽt par sepyẽr õr ich õr ɨre otata uje ahakõrlo uje ich om hn õr ɨre oshuu Porrosht dich.
\v 13 Titɨm olak. Porrosht wɨchɨ olak Ɨrhĩch hn chɨbɨte uje tyenɨj ahakõrlo uje gobierno wɨmshɨro otata. Uje õr gobierno pisht tata kuchẽrk ich tyenɨj ahakõrlo.
\v 14 Wɨr õr ɨtspo erze gobernadore tyenɨj ahakõrlo uje otatɨm olak pork gobierno chɨbɨte õr par uje otsepyẽr erze uje oshiyokõr mɨhnũwo hn otatɨm erze uje oshiyokõr uje ich om par uje õr aho kɨɨs.
\v 15 Porrosht sehe duhu ahakõrlo uje ich om par uje erze uje õr totihlo hn ye odɨraha Porroshtpe ich ye õr pwele otata uje ahakõrlo mɨ̃hnɨk.
\v 16 Ye olak chɨhɨ erze ley ɨr hmepe uje Moisés chichewkite, per ye ompe ahakõrlo uje ich mɨhnũwo. Shɨ ahakõrlo uje ich om pork olak Porrosht ɨr ɨbiyo.
\v 17 Nos atɨlɨlo oso uhulo ɨtso uje wɨr õr bahluwo. Ahmũrlo Porrosht aabo yewo. Tyenɨj atɨlɨlo Porrosht hn tyenɨj atɨlɨlo ese gobierno pisht.
\s Porrosht aabo tyenɨj õr ewenta erze mɨhnũwo uje tɨ̃r õr.
\p
\v 18 Titɨm olak uje olak Porrosht aabo per olak oso õr yɨlo. Tyenɨj atɨlɨlo olak yɨnsɨro kɨmɨjɨ õr ɨre ich om hn otakashɨm olak o kɨmɨjɨ õr ɨre ich õr ɨljaabo per shish tyenɨj atɨlɨlo õr.
\v 19 Porrosht sahmũr uje yeẽk ewenta erze mɨhnũwo uje tɨ̃r ɨre shɨ pork sahmũr Porrosht per ye niyokõrpe uje mɨ̃hnɨk.
\v 20 Kɨmɨjɨ olepyẽr olak uje ahakõrlo uje ich mɨ̃hnɨk ich olak ewenta per Porrosht ye tatɨm olak uje ahakõrlo uje ich om. Per kɨmɨjɨ ahakõrlo uje ich om hn shɨ otsepyẽr olak ich olak ewenta heke Porrosht tatɨm olak uje ahakõrlo uje ich om.
\v 21 Porrosht chiihla olak par uje amsahalo par ɨr aabo, heke shish tyenɨj olak ewenta erze kuche mɨhnũwo uje tɨ̃r olak shɨ ɨtso uje Cristo ewenta erze mɨhnũwo uje tɨ̃r ɨrni par uje ɨshɨ olak hnɨtewɨhɨ Porrosht ahɨr.
\v 22 Cristo yelɨj niyokõr uje mɨ̃hnɨk hn yelɨj tata dekushiĩ par sehnyẽr oso.
\v 23 Uje ochiyuhu lahwoso mɨhnuwõho ɨrni par uje oshuu pook ich ye diyuhu lahwoso mɨhnuwõho õrpe par uje shuu opook. Uje oshuu oshuu dospa ich ye tata latɨk par uje sepyẽr õr shuu dospa. Shɨ iim erze kuche mɨhnũwo uje oshiyokorɨ̃hɨ ɨre par uje Porrosht nɨshii. Wɨchɨ jwe uje shish shiyokõr uje ich om heke teychɨm kɨmɨjɨ oniyokõr uje mɨ̃hnɨk o kɨmɨjɨ ye oniyokõrpe.
\v 24 Nos yiyokõrlo kuche mɨhnũwo heke eyok hnɨtew de Porrosht ahɨr. Cristo ɨshɨ eyok hnɨtew uje tooho krus eeych. Uje tooho krus eeych ich shuu ɨtso uje yukwĩya ɨre hn yɨtɨ par uje ye yiyokõrpe uje ich mɨhnũwo, hn shuu eyok ɨka par uje yiyokõr uje Porrosht sahmũr. Otsepyẽr Cristo hn oshuu ɨr obɨlo kɨhniya. Wɨchɨ uu bahat par uje chiyuhu erze kuche mɨhnuwõho olak.
\v 25 Antni shɨ olak ɨtso obejɨ uje saham nanɨme. Ich ye erahalo uje etɨ̃rlo per ele ahle ich eeshlopo etɨ̃rlo ese olak Yɨnsɨrc uje tɨbey olak.
\c 3
\s Pedro sakɨt erze uje ochiileku.
\p
\v 1 Titɨm olak uje olak Porrosht eebe. Tyenɨj ahakõrlo uje olak abich tatɨm olak par erze olak abiyo uje otsotiis Porrosht ahwoso ich õr pwele ochɨraha uje ich ũru shɨ pork õr ɨrẽhte oshiyokõr uje ich om hn omasaha par Porrosht aabo. Heke ye nesita uje tatɨm ɨre
\v 2 pork teychɨm nerãhta uje wate shiyokõr uje ich om hn uje tola Porrosht.
\v 3 Olak tɨmcher ye pwele uhulo olak ɨluu ɨhɨ̃rpe shɨ pork arshlo olak akɨ̃re hn aluwalo oro hn anãhalo olak ɨshuwo uje ich debichpa.
\v 4 Shɨ uje olak ɨluu ich om hn shish olak aho kɨɨs, heke Porrosht chɨbɨte uje olak ma bale.
\v 5 Antkite uu tɨmcher poru yesh uje otsahmũr Porrosht shish oshiyokõr oshuu ɨtsorz hn otola dabiyo
\v 6 shɨ ɨtso waa Sara uje shiyokõr uje Abraham tatɨm ɨre. Tɨbii dabich ɨm pɨnsɨrc. Olak shɨ olak ɨtso uje olak Sara eebe kɨmɨjɨ ahakõrlo uje ich om hn ich ye ompe uje atɨlɨlo latɨk.
\v 7 Titɨm olak toy uje olak ɨrẽhte ode. Tyenɨj akashɨmlo õr hn abeylo õr hn ahmũrlo õr pork ye õr ukurbo ɨlo olakpe. Porrosht sahmũr õr ɨtso olak. Wɨr õr ɨkɨrĩt de Porrosht ahɨr shɨ õr ɨtso olak. Kɨmɨjɨ ye ahakõrlo uhulo ɨtsorz ich ye olak eyuwo ɨlyepe heke ye Porrosht nuntpe uje olak orar.
\s Pedro sakɨt erze uje kuche mɨhnũwo tɨ̃r õr.
\p
\v 8 Nos titɨm olak uje olak Porrosht aabo. Tyenɨj nos akɨshlo olak eyuwo hn eenɨlo uje mɨ̃hnɨk tɨ̃r olak yet, hn ahmũrloye hn akashɨmloye. Ye olak narim olak.
\v 9 Ye eyuhulo olak bahat uje yeẽk shiyokõr mɨhnɨkɨ̃hɨ olak. Uje yeẽk chiyuhu lahwoso mɨhnuwõho olak ich ye eẽtlo ɨre eyuhulo olak ahwoso mɨhnuwõho ɨre. Ma om tyenɨj eyuhulo olak ahwoso uje ich omoho õr pork Porrosht chiihla eyok par uje yiyokõrlo ɨtsorz. Uje yiyokõr ɨtsorz hn ɨshɨm eyok erze uje ich om
\v 10 pork Porrosht ahwoso tata ɨm:
\p —Uje yeẽk sehe duhu dekɨrĩt berzak hn shish ehet kɨɨs ich tyenɨj tɨbey lahwo par uje ye diyuhu lahwoso mɨhnũwo hn tyenɨj tɨbey lahwo toy par uje ye tata lekushiĩ.
\v 11 Tyenɨj iim uje shiyokõr uje mɨhnũwo par uje shiyokõr uje ich om. Tyenɨj chukwi erze uje shuu ehet kɨɨs hn ye noym
\v 12 pork eyok Ɨrhĩch tɨbey daabo uje oshiyokõr uje ich om hn chunt õr uje õr orar otsapur ɨre. Per eyok Ɨrhĩch teychɨm erze uje shish oshiyokõr uje mɨhnũwo hn chiyuhu delorɨhɨ õr.—
\p
\v 13 ¿Yeẽkpo shiyokõr mɨhnɨkɨ̃hɨ olak kɨmɨjɨ shish emɨtlo olak par uje ahakõrlo uje ich om? Nĩhyok.
\v 14 Per kɨmɨjɨ yeẽk niyokõr mɨhnɨkɨ̃hɨ olak shɨ pork olak Porrosht aabo hn ahakõrlo uje ich om ich Porrosht tyenɨj takashɨm olak. Ye atɨlɨlo õr, hn ye aslo olak ɨbe.
\v 15 Shɨ tyenɨj uhulo yakaha uje Cristo wɨchɨ uu olak Ɨrhĩch. Shish tyenɨj emɨtlo olak par uje yeẽk sehe dɨraha ɨnaapo ye otiislo uje olak owich de Porrosht ahɨr ich erahalo uje tyenɨj atɨmlo õr.
\v 16 Shɨ tyenɨj ye atsɨrãha olak ahwoso par õr hn tyenɨj atɨlɨlo Porrosht. Shish ahakõrlo uje ich om par uje shish olak eyuwo tɨsɨr uje ich om. Heke erze uje ochish majamichɨhɨ olak pork olak ɨluu ich om hn olak Porrosht aabo ich uhurc ich yeẽk shuu opook uje shɨ otata oshuu ɨtsorz.
\v 17 Kɨmɨjɨ Porrosht duhu erze kuche mɨhnũwo tɨ̃r olak pork sehe prowa olak ich ma om uje erze kuche mɨhnũwo tɨ̃r olak pork ahakõrlo uje ich om per ye ompe uje ahakõrlo uje ich mɨhnũwo heke erze kuche mɨhnũwo tɨ̃r olak.
\p
\v 18 Cristo toni par uje ɨshɨ olak hnɨtewɨhɨ Porrosht ahɨr pork ahakõrlo uje ich mɨhnũwo. Wɨchɨ ich ye toy petɨk nehe par uje ɨshɨpo. Ye niyokõrpe erze kuche mɨhnũwo per toni par sosɨr erze oso uje oshiyokõr uje mɨhnũwo. Heke Cristo shuu olak owich de Porrosht ahɨr. Oshuu Jesús oshuu toy per shɨ ɨr yũhurrza toy mahn ɨr ɨchɨbich shish de heke ɨr ɨkɨrĩt de.
\v 19 Ɨr ɨchɨbich hno tɨ̃r wahacha uje topo õr ɨchɨbiyo de hn sakɨt õr. Wɨr shɨ õr ɨtso uje Porrosht chɨbɨte õr karsel ehet pork ye õr pwele otokolpe.
\p
\v 20 Uje ehn Noé lɨshɨ shiyokõr asa pohorrza hn Porrosht iyem oso par uje onɨshii deyuwo per ye oniyokõrpe uje ɨre sahmũr. Heke shɨ õr arhaabokite uje ye otooho ese kresyent bahlut ehetpe pork shɨ õr osho uje ode asa pohorrza ehet.
\v 21 Ese kresyentɨt shɨ ɨtso uje otohɨrm olakni pork ye otiislo Jesuspe par uje shuu olak owich de Porrosht ahɨr. Ese otohɨrm oso ich ye ɨlo uje otɨsoho awɨtpe par uje ochũrhu õr. Otohɨrm erze oso par uje otsapur Porrosht par uje churhũ õr eyuwo mɨhnũwo pork Jesucristo ɨkponi.
\v 22 Cristo hno tɨ̃r poõrc hn sakaha Porrosht waãchta pork wɨchɨ ich dich. Erze anjele ode Cristo ɨr hme, hn erze õr bahluwo hn erze uje õr ukurbosh ode ɨr hme toy.
\c 4
\s Porrosht shuu õr dɨtuwo par uje otakashɨmye.
\p
\v 1 Uje ehn Cristo de nãhu ɨrmõni ich ewenta erze kuche uje tɨ̃r ɨre uje ich dospa. Tyenɨj uhu olak eyuwo ɨlo ɨre pork uje yeẽk ewenta erze kuche mɨhnũwo uje tɨ̃r ɨre uje ich dospa ich ye niyokõr uje ich mɨhnũwo
\v 2 par uje ehn yesh sakaha nãhu ɨ̃rmo ich shɨ shiyokõr uje Porrosht sahmũr hn ye niyokõr uje erze oso yewo oshiyokõr.
\v 3 Uje ehn yahpaa amsahaloni par olak Porrosht aabo ich shish ahakõrlo mɨhnũwo shɨ ɨtso erze uje ye odɨraha Porroshtpe. Erze uje ye odɨraha Porroshtpe oshiyokõr nos wɨr kuche mɨhnũwo ich kɨhniya. Otsahmũr uje shɨ omuhuye ahɨr par uje oshiyokõr uje mɨ̃hnɨk, hn otsahmũr uje yɨkɨch sẽhi õr. Otakɨsho lawich oshuu ɨtso uje oshiyokõr õr ahamich par oteyãha tɨmcher, hn shish oshiyokõr ahamich par uje oshuu yɨkɨch sẽhi õr. Oteeychãha kojano po. Wɨr ich mɨhnũwo pisho.
\v 4 Ele ahle ich ye meylo õrpe par uje ahakõrlo erze mɨhnũwo uje shish oshiyokõr, heke õr ɨre ochishlabe hn ochiyuhu lahwoso mɨhnuwõho olak.
\v 5 Je deeych yet nehe hn oyehe Porrosht ɨle ɨkɨch par otatɨm ɨre erze mɨhnũwo uje oshiyokõrni. Wɨchɨ jwe uje shish chɨmɨt ɨre. Kɨmɨjɨ yesh õr ɨka hn kɨmɨjɨ otoni ich ɨtsye, tyenɨj sepyẽr õr nehe.
\v 6 Heke ode uje otsanɨmɨrãha Porrosht ahwosni otatɨm õr hn ode uje ye olotiispe. Wɨr otoy shɨ ɨtso erze uje otsotiis per erze uje ye olotiispe ich õr ɨchɨbiyo shish owich om. Shɨ õr ɨchɨbiyo ɨtso Porrosht ɨr ɨkɨrĩt uje yelɨj nɨhna ɨre.
\p
\v 7 Titɨm olak uje yej Porrosht sɨhna ɨ̃rmo hn nos wɨr kuche, heke shish tyenɨj emɨtlo olak par uje olak orar.
\v 8 Enahalo olak par uje ye moymlo uje ahmũrloye pork uje ahmũrloye ich shish olak perdonar erze uje oshiyokõr mɨhnɨkɨ̃hɨ olak.
\v 9 Shish tyenɨj ahmũrlo uje Porrosht aabo yewo otekɨrɨhɨ olak hn ye uhulo olak aho diilehet uje ye ahmũrlo õrpe.
\v 10 Titɨm olak. Porrosht shuu olak nohmɨr nohmɨr dɨtuwo par uje kal nohmɨra pwele shiyokõr uje ɨre sahmũr, heke tyenɨj akashɨmloye uhulo ɨtsorz par uje tokole uje olak Porrosht ɨbiyo uje ich om.
\v 11 Uje sehe yeẽk nanɨmɨrãha Porrosht ahwoso ich tyenɨj shuu ɨtso uje Porrosht tata. Kɨmɨjɨ Porrosht dosɨm olak ukurbo par uje ahakõrlo kuchɨt ich enahalo olak par uje ahakõrlo pork ye otiislo Jesucristope heke uhulo oso oteeychãha Porrosht. Sehe tuu nos onahmũr uje Porrosht wɨchɨ uu õr bahlut pisht hn oteeychãha ɨre par uje wɨchɨ shish tɨbey õr. Ich ɨhɨ̃rtpa kɨmɨjɨ oniyokõr oduhu ɨlorz.
\s Shish kuche mɨhnũwo tɨ̃r Porrosht aabo.
\p
\v 12 Pɨshɨbo watsaklo, ye as olak ɨbe uje erze kuche mɨhnũwo doso pisho tɨ̃r olak. Erze doso ich shɨ ɨtso jwekɨta. Wɨr shɨ tɨ̃r olak par shuu ɨmeheeych uje ich ũru uje ye otiislo Jesucristope. Erze kuche mɨhnũwo ye kɨnãhope uje tɨ̃r erze Porrosht aabo yewo.
\v 13 Ich ma om uje olak aylpa uje erze kuche mɨhnũwo tɨ̃r olak shɨ pork ye otiislo Cristope. Heke uje ɨre cheeshpo nehe ich olak aylpa hn nos omo uje ɨre ich dichpa.
\v 14 Kɨmɨjɨ odiyuhu lahwoso mɨhnuwõho olak shɨ pork ye otiislo Cristope ich om par olak pork Porrosht Ɨchɨbich ich dich hn shish de olak aho hn shuu olak ayla.
\v 15 Ye ompe uje olak yeẽk shuu yet shuu toy heke kuchɨt mɨ̃hnt tɨ̃r ɨre, hn ich ye ompe uje olak yeẽk tohɨr heke kuchɨt mɨ̃hnt tɨ̃r ɨre, hn ich ye ompe uje olak yeẽk shiyokõr uje ich mɨ̃hnɨk heke kuchɨt mɨ̃hnt tɨ̃r ɨre, hn ye ompe uje dale kuche ɨkiyo heke kuchɨt mɨ̃hnt tɨ̃r ɨre.
\v 16 Per kɨmɨjɨ kuchɨt mɨ̃hnɨk tɨ̃r ɨre shɨ pork wɨchɨ Porrosht aap ich ye ompe uje pook. Shɨ tyenɨj teeychãha Porrosht par uje shuu ɨre dich pork wɨchɨ ye lotiis Cristope.
\v 17 Ele ahle ich terɨhɨ ɨshɨrĩt uje Porrosht teychɨm daabo kɨmɨjɨ oniyokõr uje om o kɨmɨjɨ ye oniyokõrpe. Kɨmɨjɨ Porrosht teychɨm eyok wap uje yiyokõr om o ye niyokõrpe hn sepyẽr eyok ¿ich duhu ɨnaapo par erze uje ye onahmũrpe uje Jesús ɨshɨ õr hnɨtewɨhɨ Porrosht ahɨrkite?
\v 18 Kɨmɨjɨ Porrosht aabo õr pwele par uje otaachɨ̃hɨ ɨr ahɨr per ich kwestpa pork shish mɨhnũwo tɨ̃r õr ¿Porrosht duhu ɨnaapo erze uje oshiyokõr uje ich mɨhnũwo hn erze uje otsotiis ɨre?
\v 19 Heke kɨmɨjɨ Porrosht duhu erze kuche uje mɨhnũwo tɨ̃r olak pork sehe niyokorãha olak kuche ich ma om uje ye moymlo uje ahakõrlo uje ich om hn asɨmlo olak Porrosht par uje wɨchɨ tɨbey olak, pork wɨchɨ uje shiyokõr eyok hn ɨr ahwoso shish yakaha.
\c 5
\s Pedro sakɨt Porrosht aabo õr bahluwo.
\p
\v 1 Titɨm olak uje olak iiyo otsɨɨ anciano pork abeylo Porrosht aabo. Yok anciano toy. Tokomni uje oshiyokõr mɨhnɨkɨ̃hɨ Cristo hn ochɨbɨte krus eeych par uje toohochɨs. Uje Cristo cheeshpo nehe ich ɨre rey hn yok dechɨ ɨr ahɨr.
\v 2 Abeylo Porrosht aabo shɨ uhulo ɨtso uje oso otɨbey obeje. Porrosht ɨshɨm olak erze obiyo par uje ahakõrlo. Ahakõrlo shɨ pork ahmũrlo hn ye etaklo uje ahakõrlo. Ye ahakõrlo shɨ pork ahmũrlo hnote. Enahalo olak uje ahakõrlo.
\v 3 Ye uhu olak ɨlo õr bahluwo uje shɨ ochɨpa oso per akashɨmlo õr par uje wɨr oshiyokõr oshuu ɨtso olak.
\v 4 Olak shɨ olak ɨtso erze uje otɨbey obeje hn Cristo wɨchɨ uu olak bahlut pisht. Uje cheeshpo nehe ich ɨshɨm olak ese uje ich ɨhɨ̃rtpa uje yelɨj nɨhna ɨre.
\v 5 Shɨ ɨtso uje erze anciano oshiyokõr uje Cristo tata ich olak uje olak hnakɨrbite tyenɨj ahakõrlo uje erze ɨlaro otata. Nos wɨr olak tyenɨj akashɨmloye, hn ye olak narim olak. Porrosht ye nahmũrpe erze uje onarim ɨre per takashɨm erze uje ye onarim ɨrpe.
\v 6 Olak ye olak narim olak. Porrosht wɨchɨ uje tɨbey olak. Uje terɨhɨ uhurc nehe ich Porrosht uje ukurbo deyo de tyenɨj shuu olak ma deyo.
\v 7 Erze kuche uje uhu olak eyuwo tɨsɨrɨ̃hɨ moymɨhɨlo par uje shɨ Porrosht nɨshii pork wɨchɨ tɨbey olak.
\v 8 Shish emɨtlo olak shɨ ɨtso uje ye omope pork ese olak ɨmehẽt wɨchɨ dyablo. Shiyokõr shɨ ɨtso ɨlpiyot uje dɨrkɨhɨ lekɨtiyo hn yer teyãha labɨso par uje tew.
\v 9 Ye ahakõrlo uje dyablo sahmũr. Ye otiislo Porrosht. Erahalo uje erze mɨhnũwo uje tɨ̃r olak wɨr shɨ ɨtso uje tɨ̃r olak leshɨbo uje ode ɨ̃rmo lekɨtiyo.
\v 10 Erze kuche mɨhnũwo uje tɨ̃r olak ich dospa per ye shish dakaha olak ahɨrpe. Porrosht nos nɨshii nehe hn takashɨm olak hn ɨshɨm olak ukurbo. Porrosht wɨchɨ uje shish sahmũr olak hn chiihla olakni par uje aachɨ̃hɨlo ɨr ahɨr nehe hn ebuhulo pork ye otiislo Jesucristope.
\v 11 Sehe tuu nos onahmũr uje Porrosht wɨchɨ uu õr bahlut pisht par uje wɨchɨ shish tɨbey õr. Ich ɨhɨ̃rtpa kɨmɨjɨ oniyokõr oduhu ɨlorz.
\s Pedro ɨshɨm Porrosht aabo õr saludo.
\p
\v 12 Tichew ana hutɨta par uje Silvano hnoy ɨshɨm olak. Wɨchɨ ye lotiis Jesuspe. Asa hutɨta uje tichew titɨm olak ye ahwoso kɨhniyape par uje takɨt olak par uje erahalo uje ich ũru hn ye moymlo erze uje Porrosht shiyokõr par olak.
\v 13 Porrosht aabo uje ode dɨt Babilonia oshɨm olak saludo. Wɨr uje Porrosht chiihla õr shɨ ɨtso uje chiihla olakni. Pijɨt Marko ɨshɨm olak saludo toy.
\v 14 Etɨloye par uje nos ochɨraha uje ahmũrloye. Olak uje ye otiislo Jesucristope sehe tuu Porrosht shish duhu olak aho kɨɨs. Ich ɨhɨ̃rtpa uje ɨtsorz.