\id 2PE Chamacoco NT - Paraguay 2000 (web 2013)
\h 2 Pedro
\toc1 2 Pedro
\toc2 2 Pedro
\toc3 2Pe
\mt1 2 Pedro
\c 1
\s Porrosht chiihla daabo.
\p
\v 1 Yok Simón Pedro uje tichew ana hutɨta tokosɨm olak. Yok Jesucristo ɨr yɨlak hn ɨr apóstol. Jesucristo wɨchɨ uu eyok Porrosht uje ɨshɨ eyok hnɨtewɨhɨ dahɨrkite. Wɨchɨ uje ye duhu yotiis ɨrpe, hn ye duhu otiislo ɨre. Ye niyokõrpe kɨnaha par olak hn kɨnaha par õryok.
\v 2 Par uje ma erahalo Porrosht ɨr ɨluu hn ma erahalo eyok Ɨrhĩch Jesucristo ɨr ɨluu ich sehe shish tuu odosɨr olak hn ma oduhu olak aho kɨɨs.
\p
\v 3 Chɨ̃ra dakɨrbo ich nos ɨshɨm eyok uje eyok nesita par ese ɨkɨrĩt uje yelɨj nɨhna ɨre hn par uje yuhu eyok ɨluu ɨtso ɨre. Shɨ pork yɨraha ɨre uje chiihla eyok, heke ɨshɨm eyok shuu ɨtsorz. Wɨchɨ chiihla eyok par uje yuhu ɨre ma dich.
\v 4 Shɨ pork yuhu ɨre ma dich ich chɨbɨte lahwoso uje ich ɨhɨ̃rts pisho par uje olak pwele moymlo erze kuche mɨhnũwo uje oso oshiyokorɨ̃hɨ nãhu ɨ̃rmo. Oshiyokõr kuche mɨhnũwo pork otsahmũr. Ich uhurc nehe ich olak ɨluu om shɨ ɨtso Porrosht ɨr ɨluu.
\v 5 Porrosht tyenɨj shiyokõr ɨtsorz par olak pork ye otiislo ɨre heke enaha olak par uje ahakõrlo om. Enaha olak toy par uje erahalo uje Porrosht ahwoso tata.
\v 6 Hn enaha olak par uje ahakõrlo uje Porrosht ahwoso tata hn ye ahakõrlo kuche mɨhnũwo. Enaha olak par uje nos olak ewenta erze kuche mɨhnũwo uje tɨ̃r olak. Enaha olak toy par uje ahmũrlo Porrosht.
\v 7 Enaha olak par uje ahmũrlo Porrosht aabo yewo, hn enaha olak par uje nos ahmũrlo oso yewo.
\v 8 Kɨmɨjɨ ye ahakõrlo erze uje titɨm olakɨke ich ye olak jukur, per kɨmɨjɨ shish ahakõrlo ich ahakõrlo om pork erahalopa eyok Ɨrhĩch Jesucristo ɨr ɨluu.
\v 9 Kɨmɨjɨ ye yeẽk niyokõr uje ɨtsorz ich wɨchɨ shɨ ɨtso uje olɨbɨk o kɨmɨjɨ ɨle pata, heke chɨkey uje Jesús perdonar erze kuche mɨhnũwo uje shiyokõrni.
\v 10 Pɨshɨbo watsaklo, par uje ye tokolɨhɨ olak yeẽk ɨlorz ich tyenɨj ahakõrlo ɨtso uje titɨm olakloko par uje uhulo ɨmeheeych uje ich ũru uje Porrosht chiihla olak. Kɨmɨjɨ ahakõrlo uhulo ɨtsorz ich ye eeshlo ahakõrlo mɨhnũwo uje ye Porrosht nahmũrpe.
\v 11 Ɨmeheeych uje olak Porrosht aabo heke deeych yet nehe ich shɨ ɨtso uje otsɨtsẽr pwert uhurrza oshuu ɨsahapa par uje amsahalo ehet etɨ̃rlo ese owich uje eyok Ɨrhĩch Jesucristo tyenɨj tɨbey Porrosht aabohochɨs nehe. Wɨchɨ shish tɨbey õr. Yelɨj nɨhna ɨre. Wɨchɨ uje ɨshɨ eyok hnɨtewɨhɨ Porrosht ahɨrkite.
\p
\v 12 Heke sehe shish tuu olak eyucha uje yesh titɨm olak. Osdeyo uje entloni, hn ahakõrlo hn erahalo uje erze ich ũru.
\v 13 Uje ehn yesh yok ɨkaha nãhu ɨ̃rmo ich tɨbɨte uje ma om tuu olak eyuchapo uje oshiyokorãha olak par uje ye ekeylo.
\v 14 Tɨkɨraha uje ich yej terɨhɨ pɨshɨrĩt par uje tɨkɨtɨ heke tyenɨj oshuu yok oshuu tɨkɨtɨ shɨ ɨtso uje eyok Ɨrhĩch Jesucristo tatɨm yokni.
\v 15 Tichew ana hutɨta par uje titɨm olak erze pahwoso. Heke uje tɨkɨtɨ nehe ich shish erahalo ahnũwo pahwoso uje titɨm olakɨke.
\p
\v 16 Erze uje tiyokorãha olak hn erze uje apóstole yewo oshiyokorãha olak oshuu erahalo uje eyok Ɨrhĩch Jesucristo ɨr ukurbo de, hn tyenɨj cheeshpo nehe. Erze ɨr ahwoso ye monɨhnepe uje shɨ otata. Ye shɨ õryok eyuwo tɨsɨ̃rpe hn oyitɨm olak. Wɨr ich ũru. Yok hn erze apóstole yewo oyumoni uje Jesús hũre.
\v 17 Oyunt Porrosht uje narim Jesús. Tata ɨm: —Wɨchɨ uu yok pijɨt pisht. Tahmũrpa uje shiyokõr.—
\v 18 Õryok oyunt erze ɨr ahwoso uje tãra poõrc pork õryok dechɨ Cristo ahɨr kojach eeych uje ɨr Deych keytkẽr.
\v 19 Heke Porrosht shuu yakaha erze ahwoso uje profeta poruwo wɨshɨ otatkite. Tyenɨj ẽrlo pahwoso uje titɨm olak. Erze profeta õr ahwoso shɨ ɨtso nampyont uje hũre chihit ese owich uje ich dɨhlelpa nehech deychole hn porrzeebcha bahluta tokole shɨ ɨtso uje chihit olak aho. Shɨ tɨteẽta uje shuu erahalo kuche nehech Cristo cheeshpo nehe ich erahalopa.
\v 20 Ahnũwo ahwoso uje tyenɨj titɨm olak ich tyenɨj erahalo. Nĩhyok uje yeẽk shuu deyuwo tɨsɨ̃r hn chichew Porrosht ahwoso shuu ɨtsorz,
\v 21 heke ich nĩhyok profeta uje shɨ tata lahwosni. Shɨ otatni uje Porrosht Ɨchɨbich tatɨm õr uje Porrosht tata.
\c 2
\s Oso ode nehe uje õr prowa otsehnyẽr Porrosht aabo.
\p
\v 1 Titɨm olak uje oso odekite uje ochii ɨr profetɨhɨ ese israel oso õr hnɨmich per wɨr ye profetpe. Je deeych yet nehe hn oso ode uje otsanɨmɨrãha Porrosht ahwosoho olak ehet per wɨr shɨ otata uje tãra õr eyuwo. Õr ahwoso shuu oso ochɨbɨte uje ye otɨ̃r urhuta bahluta ehet nehe per ye ũrpe. Ye oduhu deyuwo ɨmeheeychpe uje oshiyokorãha olak nehech uhurc ich otsata eyok Ɨrhĩch Jesucristo uje ɨshɨ õr hnɨtewkite heke Porrosht tyenɨj sepyẽr õr shɨchish ich shuu dospa.
\v 2 Ich okɨhniya uje ye olotiis õr petɨk nehe hn otseẽt õr. Oshiyokõr mɨhnɨkɨ̃hɨ tɨmcher oshuu õr ɨluu ɨtso õr. Heke oshuu oso yewo ochish majamichɨhɨ Porrosht ahwoso uje ich ũru.
\v 3 Wɨr shɨ otsahmũr hnote heke oshiyokorãha olak erze ahwoso uje ye ũrpe par uje oshuu asɨmlo õr hnote. Osdeyo uje Porrosht chɨbɨte par uje sepyẽr õr nehe hn tyenɨj yakaha.
\p
\v 4 Porrosht ye perdonar erze anjele petɨkkite uje oshiyokõr mɨhnũwo. Tãra õr chɨbɨte õr ese jotsɨt uje ich yakpa hn iim orɨ̃hɨchɨs asa dɨhlelta ehet. Shɨ oyem uje sepyẽr õr nehe.
\v 5 Hn ɨtspo Porrosht ye perdonar erze oso petɨkkite uje ehn ode nãhu ɨ̃rmo uje ehn Noé de. Shuu kresyent bahlut tɨrẽtkite par uje sɨhna erze oso uje ye onahmũr Porroshtpe. Noé nos tatɨm oso uje tyenɨj oshiyokõr uje Porrosht sahmũr, per ye onahmũrpe, heke Porrosht shɨ takashɨm ɨre hn erze õr syete uje õya ɨre, heke ye otope.
\v 6 Hn ɨtso erze oso uje odebuhu erze duwo Sodoma hn Gomorra, Porrosht sɨhna õrkite hn sẽru erze õr duwo nehech piitsak. Shiyokõr shuu ɨtsorzkite par uje oso uje ye onahmũr Porrosht ochɨraha uje Porrosht tyenɨj sepyẽr õr ich dospa.
\v 7 Porrosht chiyuhu Lotɨhɨ ese dɨt Sodoma ehetkite uje oso ode uje õr ɨluu mɨhnũ. Ese Lot ich ɨluuta om per ich sɨtak wɨr õr ɨluu. Shish oshiyokõr uje mɨhnũwo heke ye duhu Lot lɨshɨ ehet kɨɨspe.
\v 8 Debuhu wɨr õr ehet hn kal deeych umo erze mɨhnũwo uje wɨr oshiyokõr hn chunt erze mɨhnũwo uje otata. Wɨr shuu ɨre dosdarak.
\v 9 Heke ich ɨmeheeych uje eyok Ɨrhĩch chɨrahapa sosɨr erze uje otsahmũr ɨre par uje ye oniyokõr erze kuche mɨhnũwo uje yewo sehe oduhu Porrosht aabo oniyokõr. Hn chɨraha toy tɨbey erze uje oshiyokõr uje mɨhnũwo nehech terɨhɨ ɨshɨrĩt par sepyẽr õr.
\v 10 Ese deeych uje Porrosht sepyẽr õr ich yarhakpa par erze uje shɨ omuhuye ahɨr par uje oshiyokõr mɨhnuwõhoye. Tyenɨj Porrosht sepyẽr õr ich shuu dospa. Erze oso ye otolpe erze õr bahluwo. Ye otola latɨk. Ochinehnɨm erze uje ode poõrc uje õr ukurbo deyo de hn ye otola õrpe.
\p
\v 11 Erze anjele ma õr ukurbosh per ye oniyokõrpe oduhu ɨlorz. Yelɨj otatehe eyok Ɨrhĩch ɨle ɨkɨch uje yewo õr ɨluu mɨhnũ.
\v 12 Erze hnakɨrbo oshiyokorãha olak nehe erze uje ye ũrpe. Otata lahwoso mɨhnũwo erze uje hnii õr ɨre ye odɨrehepe. Oshiyokõr erze uje ich mɨhnũwo hn erze kuche mɨhnũwo tyenɨj cheeshɨ tɨ̃r õr hn sɨhna õr. Wɨr shɨ õr ɨtso loshɨpo. Ye õr eyuwɨ̃rsh. Ye õr eyuwo tɨsɨ̃rpe uje oshiyokõr kuche. Wɨr shɨ õr ɨtso loshɨpo uje shũrha shɨ par uje yeẽk pwele shiyeru hn shuu shuu toy.
\v 13 Oshiyokõr mɨhnɨkɨ̃hɨ yewo hn wɨr oshiyokõr mɨhnɨkɨ̃hɨ õrpo. Uje deeych ich otsahmũr pishɨ erze õr ahmiyo uje oshiyokõr. Otɨrẽt otɨ̃r olak ahamich toy per ich ye ompe pork wɨr õr ɨluu mɨhnũ. Uje odechɨ ich shɨ ɨtso mansha uje de õr nerpta. Uje odechɨ olak ahamich owich ich õr aylpa pork otsehnyẽr olak oshuu ebɨtɨlo uje ich õr ɨluu om.
\v 14 Otsahmũrpa uje oteychɨm tɨmcher hn opota õr shɨ par uje sehe otorãha õr. Yelɨj patɨm õr uje oshiyokõr oshuu ɨtsorz. Otsehnyẽr Porrosht aabo uje hnii ochɨraha Porrosht ahwoso oshuu oshiyokõr uje mɨhnũwo. Ich yakaha õr uje opota kuche. Porrosht chɨbɨte lahwoso uje tyenɨj chɨmchaha õr urhuta bahluta ehet nehe.
\v 15 Erze uje otsehnyẽr õr ich oym Porrosht ɨjɨch par uje oshiyokõr kɨnaha. Oshiyokõr ɨtso uje uu profeta Balaam lɨshɨ shiyokõrkite. Ese Balaam wɨchɨ ɨr deych iich otsɨɨ Beor. Balaam ich sahmũr pishɨ uje shiyokõr uje mɨhnũwo par uje serz hnote.
\v 16 Porrosht shuu asa borkɨta chiilehet keytkẽr Balaam uje shiyokõr uje mɨ̃hnɨk, hn sontew ese profeta uje sehe niyokõr uje mɨ̃hnɨk shɨ ɨtso uje wɨchɨ totihla.
\p
\v 17 Erze hnakɨrbo uje otsanɨmɨrãha ahwoso uje ye jukurpe wɨr shɨ õr ɨtso jotse uje ye awɨt chɨhɨ ehetpe. Shɨ õr ɨtso ukuhur uje shɨ myent hnoy par uje ye ɨbɨkpe. Porrosht chɨbɨte owich shɨ par õr ɨre wahacha uut pisht uje ich dɨhlelpa.
\v 18 Uje õr ɨre ochiilehet ich otsɨhnew lahwoso par onarim ɨre per ye jukur. Wɨr otsehnyẽr erze uje yesh omasaha par Porrosht aabo uje antni shish oshiyokõr erze kuche mɨhnũwo shɨ ɨtso oso yewo. Wɨr oshuu oshiyokõr erze mɨhnũwo toy uje antni oshiyokõr.
\v 19 Otatɨm õr uje ye latɨkɨsh uje oshiyokõr erze mɨhnũwo per ye ũrpe. Erze kuche mɨhnũwo ye duhu õr librepe. Erze kuche mɨhnũwo shɨ masaha ɨtso õr yɨnsɨro pork ich yakaha õr pork erze kuche mɨhnũwo uje yakaha oso wɨr uu õr yɨnsɨro.
\v 20 Uje ochɨraha uje eyok Ɨrhĩch Jesucristo ɨshɨ õr hnɨtewkite ich oym erze kuche mɨhnũwo uje de ɨ̃rmo. Kɨmɨjɨ odeeshpo oniyokõr erze mɨhnũwo uje oymkite nehech uhurc ich yakaha õr heke ich uhurc ich õr ma ɨluu mɨhnũ. Ye ɨlo uje wap petɨkni.
\v 21 Ma om kɨrẽhe ye onunt uje tyenɨj shɨ ye olotiis Cristo par uje omasaha par Porrosht aabo je uje ochuntni hn oym ocheeshpo oshiyokõr erze mɨhnũwo.
\v 22 Shɨ õr ɨtso erze ahwoso uje ich ũru uje oso otata. Shɨ õr ɨtso pohoch uje pwey hn cheeshpo tew lapweych. Shɨ õr ɨtspo poohle uje ochũrhu hn cheeshpo tabɨtehe katuta.
\c 3
\s Eyok Ɨrhĩch tyenɨj cheeshpo nehe.
\p
\v 1 Pɨshɨbo watsaklo, tichew ana hutɨta yatapo. Ich otiyer uje tichew tokosɨm olak par uje uhu olak eyuwo tɨsɨ̃r. Sehe ye tuu olak koswãha,
\v 2 hn sehe tuu olak eyucha uu Porrosht ɨr profeta poruwo wɨshɨ õr ahwoso hn olak eyucha uu eyok Ɨrhĩch ɨr ahwoso toy uje erze apóstole yewo oshiyokorãha olak uje Jesucristo ɨshɨ eyok hnɨtewɨhɨ Porrosht ahɨrkite.
\v 3 Wap sehe tuu erahalo uje deeych yet nehe uje yej terɨhɨ ɨ̃rmo uhurc hn oso ode uje ochiyuhu lahwoso uje shɨ õr ɨre otsahmũr par uje oloter yewo. Shɨ oshiyokõr erze mɨhnũwo uje õr ɨre otsahmũr.
\v 4 Wɨr otata otsɨɨ: —¿Jesús chɨhɨ ɨraãpo? Chɨbɨte lahwoso uje tyenɨj cheeshpo per ye deeshpope. Nehech eyok deyo wɨshɨ otoni hn ye taãchpe nehech ele ahle. Uje ehn ɨ̃rmo tenitkite nehech ele ahle shish ɨtsye.—
\v 5 Erze oso ye onahmũr odɨrehepe heke ochɨkey uje Porrosht chiilehetkite hn poõrc tokole hn ɨ̃rmo de hn hnɨmich tokolɨhɨ awɨt uut hn shuu awɨt pɨt tɨ̃r poõrc hn pɨt sakaha hnɨmich.
\v 6 Porrosht chɨ̃ra ese awɨt shuu kresyent bahlut tɨrẽt par uje nos sɨhna oso uje ode nãhu ɨrmõkite.
\v 7 Porrosht chɨbɨte lahwoso par uje terɨhɨ ese deeych nehe ich shɨ chiilehet hn jwekɨta sɨhna poõrc hn sɨhna hnɨmich hn sepyẽr erze oso uje ye onahmũr ɨrpe hn chɨmchaha õr urhuta bahluta ehet.
\p
\v 8 Pɨshɨbo watsaklo, ye ekeylo. Par eyok Ɨrhĩch uu deeych nohmet shɨ ɨtso mil ãyo hn mil ãyo shɨ ɨtso deeych nohmet.
\v 9 Oso ode uje otata uje eyok Ɨrhĩch iyehi lahwoso pork ye niyokõr shɨchishpe uje ɨre tata, per eyoklo Ɨrhĩch yelɨj sehi lahwoso. Shɨ hneta oso pork ye nahmũr uje yeẽk tɨ̃r urhuta bahluta ehet nehe. Shɨ sehe duhu nos õr eyuwo tɨsɨrɨ̃hɨ Cristo uje ich ũru, ye onimehipe hn ye olotiis ɨrpe.
\v 10 Per ye latɨk dɨraha eyok Ɨrhĩch ɨr ɨshɨrĩt shɨ ɨtso echɨkɨt uje taachɨ̃hɨ dɨhlak hn ye latɨk dɨraha. Shɨ ich ihyokõrak dich uje ɨre sɨhna poõrc chɨ̃ra jwekɨta hn erze kuche uje dechɨ hn sɨhna hnɨmich toy. Nos wɨr kuche uje oso oshiyokõr nos sẽru.
\v 11 Ich ma om uje ahakõrlo uje Porrosht sahmũr hn eeychãhalo ɨre pork ɨre tyenɨj nos sɨhna erze kuche shuu ɨtsorz nehe.
\v 12 Uje ehn anemlo ese deeych nehe ich ahakõrlo uje ɨre sahmũr par uje uhulo cheeshɨ shɨchish. Uje terɨhɨ ese ɨshɨrĩt ich Porrosht sɨhna poõrc hn sɨhna hnɨmich chɨ̃ra jwekɨta.
\v 13 Porrosht chɨbɨte lahwoso uje tyenɨj shiyokõr poõrc hn shiyokõr hnɨmich ahlo heke shɨ yiyemlo erze ahlo uje mɨ̃hnɨk nihyokõhochɨs.
\p
\v 14 Pɨshɨbo watsaklo, uje ehn yesh anemlo ɨ̃rmo ahle ich enahalo olak par uje ye ahakõrlo uje mɨhnũwo. Heke uje Cristo cheeshpo nehe ich nĩhyok olak kuche mɨhnũwo, hn shɨ olak aho kɨɨsɨhɨ ɨr ɨle ɨkɨch.
\v 15 Ye ekeylo uje eyok Ɨrhĩch yesh hneta oso par uje omasaha par ɨr aabo. Porrosht ɨshɨm eyok leshɨbich Pablo eyuwoni hn shuu chichew lahwoso
\v 16 uje tata ɨtso uje tichew. Nos wɨr erze ɨr hute uje chichewni tata ɨtso yok uje tiita uje Cristo cheeshpo nehe. Ɨr ahwoso yewo de uje ich kwestpa par uje ochɨraha. Erze oso uje ye odɨraha latɨk hn erze uje yerɨj odɨrahapa Porrosht ahwoso oshuu Pablo ɨr ahwoso poshɨk par uje oshiyokõr uje õr ɨre otsahmũr. Wɨr oshuu Porrosht ɨr ahwoso yewo poshɨk toy per uje oshiyokõr oshuu ɨtsorz ich shɨ sehe oduhu Porrosht nɨhna õr ɨre nehe.
\v 17 Pɨshɨbo watsaklo, uje ehn ye wɨr otaãcha ich titɨm olak wap par uje erahalo. Abeylshɨp olak par uje ye onehnyẽr olak hn oduhu olak koswãha. Wɨr õr ɨluu mɨhnũ.
\v 18 Ma om uje erahalo ma eyoklo Ɨrhĩch Jesucristo par uje ma takashɨm olak. Wɨchɨ uje ɨshɨ eyok hnɨtewɨhɨ Porrosht ahɨrkite. Ele deeych ich sehe tuu nos oso onahmũr uje Porrosht wɨchɨ uu õr bahlut pisht hn shish ɨtsorz. Ich ɨhɨ̃rtpa kɨmɨjɨ oniyokõr oduhu ɨlorz.