\id 1JN Chamacoco NT - Paraguay 2000 (web 2013)
\h 1 Juan
\toc1 1 Juan
\toc2 1 Juan
\toc3 1Jn
\mt1 1 Juan
\c 1
\s Cristo pwele ɨshɨm oso õr ɨkɨrĩt uje yelɨj nɨhna ɨre.
\p
\v 1 Tichew ana hutɨta par tokosɨm olak titɨm olak Jesucristo. Uje ehn yahpaa ɨ̃rmo chɨhɨkite ɨchii ɨre shish de. Uje ehn de nãhu ɨ̃rmo ich oyunt uje ɨre tata, hn oyumo pishɨ ɨre, hn oyakɨhɨr ɨr toy. Wɨchɨ uje tata lahwoso uje ich ũru hn pwele ɨshɨm oso õr ɨkɨrĩt uje yelɨj nɨhna ɨre.
\v 2 Ɨre de nãhu ɨrmõkite hn õryok oyumo heke oyɨraha hn oyitɨm olak uje Jesús wɨchɨ uje yelɨj nɨhna ɨre. Ɨre shish de Porrosht ahɨrkite per shuu tɨrẽt heke oyumo ɨre,
\v 3 hn oyanɨmɨrãha oyitɨm olak uje oyumo Jesucristoni hn oyunt uje tata par uje olak aho kɨɨsɨhɨ õryok, hn õryok aho kɨɨsɨhɨ eyok Deych Porrosht hn ɨr Ijɨt Jesucristo, heke olak aho kɨɨsɨhɨ õr toy.
\v 4 Oyichew ana hutɨta oyosɨm olak par uje uhu olak aho ma kɨɨs ɨtso õryok.
\s Porrosht hũre shɨ ɨtso luu.
\p
\v 5 Titɨm olak erze ahwoso uje Jesucristo tatɨm oryõkni. Tatɨm õryok uje Porrosht hũre shɨ ɨtso luu. Nĩhyok dɨhlele de ɨre ahɨr hni pɨkaap.
\v 6 Uje yiita uje eyok owich omɨhɨ Porrosht per shish yiyokõrlo uje mɨ̃hnɨk shɨ ɨtso uje yɨrkɨhɨ dɨhlelta ehet ich shɨ yiita eyok ukushiĩ.
\v 7 Per uje yiyokõrlo uje Porrosht sahmũr ich shɨ ɨtso uje luu chihit eyok pork shuu yɨraha uje ich ũru. Porrosht hũre shɨ ɨtso uje luu chihit, heke uje yiyokõr uje Porrosht sahmũr ich eyok aho kɨɨsɨhɨ ɨre hn eyok aho kɨɨsɨhɨ eyok leshɨbo pork uje ɨr ijɨt Jesús tokite ich ɨr armɨsta noshɨ hn nos ɨshɨ eyok hnɨtewɨhɨ Porrosht ahɨr hn nos perdonar erze mɨhnũwo uje yiyokõrlo.
\v 8 Kɨmɨjɨ yiitɨlo uje yelɨj yiyokõrlo uje mɨ̃hnɨk uje Porrosht ye nahmũrpe ich shɨ yehnyẽrlo eyok hn ye yiitɨlope uje ich ũru.
\v 9 Per uje yitɨmlo Porrosht uje yiyokõrlo uje mɨ̃hnɨk ich ɨre perdonar eyok erze kuche mɨhnũwo uje yiyokõrlo uje ɨre ye nahmũrpe. Yɨrahalo uje Porrosht yelɨj seyhi lahwoso. Wɨchɨ jwe uje shish shiyokõr uje ich om heke nos churhũ erze kuche mɨhnũwo uje de eyok aho.
\v 10 Kɨmɨjɨ yiitɨlo uje yelɨj yiyokõrlo uje mɨ̃hnɨk uje Porrosht ye nahmũrpe, ich yuhulo Porrosht kushĩyak. Ye yahmũr uje ɨr ahwoso tata.
\c 2
\s Jesús sapur Porrosht par sosɨr eyok.
\p
\v 1 Pɨshɨbo watsaklo, tahmũr olak heke shɨ olak ɨtso pijo. Tichew ana hutɨta tokosɨm olak par uje ye ahakõrlo uje mɨ̃hnɨk uje ye Porrosht nahmũrpe. Per kɨmɨjɨ eyok yeẽk niyokõr uje mɨ̃hnɨk ich Jesucristo de par sosɨr ɨre. Sapur ɨr Deych par ese uje shiyokõr mɨ̃hnɨk. Wɨchɨ shish shiyokõr uje ich om.
\v 2 Wɨchɨ uje ɨshɨ eyok hnɨtewɨhɨ Porrosht ahɨr. Ye doshɨpe shɨ par eyok, ɨshɨ par nos wɨr oso toy uje ode nãhu ɨ̃rmo.
\p
\v 3 Kɨmɨjɨ yiyokõrlo uje ɨre ahwoso tata ich yɨrahalo uje ich ũru uje eyok ɨr aabo.
\v 4 Per kɨmɨjɨ yeẽk tata uje ɨre Porrosht aap hn ye niyokõrpe uje Porrosht ahwoso tata ich wɨchɨ shɨ kushĩyak. Porrosht ahwoso ich ũru, per wɨchɨ ye nahmũrpe.
\v 5 Uje yeẽk niyokõr uje Porrosht ahwoso tata ich ɨmeheeych uje ich ũru uje wɨchɨ sahmũr Porrosht, heke yɨraha uje eyok aho kɨɨsɨhɨ Porrosht yuhu ɨtsorz.
\v 6 Kɨmɨjɨ yeẽk tata uje ɨre de Porrosht ich tyenɨj shiyokõr shuu deluuta ɨtso Jesucristo ɨr ɨluuta.
\s Porrosht sehe duhu oniyokõr kuche ahlo.
\p
\v 7 Pɨshɨbo watsaklo, ahnũwo pahwoso uje titɨm olak par uje ahmũrloye wɨr ye ahwoso ahlope. Nãhu uje tenitkite ɨchii entlo.
\v 8 Erze uje tichew tɨbɨte ana hutɨta tokosɨm olak nãhu ahwoso ich ma ɨmeheeych heke ɨtso uje ahlopo. Ahnũwo ich ũru pork Cristo shiyokorãha oso tatɨm õr uje ich ahlo shuu ɨtsorz. Hn ich ũru par olak pork ahmũrloye pork amsahalo par olak Porrosht aabo. Nãhu ahwoso ich shɨ ɨtso ahlo par olak pork ɨchii atokolɨhɨlo dɨhlelta ehet hn luu chihit olak hn shuu erahalo uje ich ũru.
\v 9 Kɨmɨjɨ yeẽk tata uje ɨre Porrosht aap hn tata uje luu chihit ɨre per sɨtak leshɨbo ich ye luu chihit ɨrpe. Wɨchɨ yesh de dɨhlelta ehet.
\v 10 Per ese uje sahmũr leshɨbo shish luu chihit ɨre hn nĩhyok kuche uje de wɨchɨ ehet par uje shuu shiyokõr uje mɨ̃hnɨk.
\v 11 Per ese uje sɨtak leshɨbo shɨ ɨtso uje shish dechɨ dɨhlelta hn dɨrkɨhɨ ehet. Ye dɨraha uje tɨ̃r, pork asa dɨhlelta shuu ɨtso uje wɨchɨ olɨbɨk.
\p
\v 12 Pɨshɨbo watsaklo, tichew ana hutɨta tokosɨm olak. Shɨ olak ɨtso pijo pork Jesucristo ɨshɨ eyok hnɨtewkite heke Porrosht perdonar olak erze kuche mɨhnũwo uje ahakõrlo uje ɨre ye nahmũrpe.
\v 13 Tichew ana hutɨta tokosɨm olak uje olak ɨlaro pork erahalo Cristo uje dekite ehn yahpaa ɨ̃rmo chɨhɨpe. Tichew ana hutɨta par tokosɨm olak uje yahpaa olak ɨlarope pork erzlo Satanasni hn atokolɨhɨlo ɨr hme. Pɨshɨbo watsaklo, tichew ana hutɨta tokosɨm olak pork olak shɨ olak ɨtso pijo. Erahalo Porrosht uu eyok Deych.
\v 14 Tichew ana hutɨta tokosɨm olak uje olak ɨlaro pork erahalo Cristo uje dekite ehn yahpaa ɨ̃rmo chɨhɨpe. Tichew ana hutɨta tokosɨm olak uje yahpaa olak ɨlarope pork olak ukurbo de hn olak eyuwo chishew Porrosht ahwoso. Erzlo ese Satanasni hn atokolɨhɨlo ɨr hme.
\v 15 Tyenɨj ye ahmũrlo erze mɨhnũwo uje de nãhu ɨ̃rmo hn ye ahmũrlo erze kuche uje de nãhu ɨ̃rmo. Yeẽk uje sahmũr erze ich ye nahmũr Porrosht uu eyok Deychpe
\v 16 pork erze uje otsahmũr nãhu ɨ̃rmo wɨr õr ɨluu ɨtsorz. Otsahmũr oshiyokõr erze mɨhnũwo uje oshuu deyuwo chishew hn oteychɨm erze kuche mɨhnũwo uje de nãhu ɨ̃rmo, hn sehe oniyokõr hn onarim ɨre. Erze õr ɨluu ye tãra Porroshtpe. Shɨ de nãhu ɨ̃rmo
\v 17 per ahnũwo ɨ̃rmo tyenɨj Porrosht sɨhna nehe. Nos wɨr kuche mɨhnũwo uje oso otsahmũr oshiyokorɨ̃hɨ nãhu ɨ̃rmo nos sɨhna. Shɨ erze uje shish oshiyokõr uje Porrosht sahmũr wɨr uje shish õr ɨka.
\s Ahwoso de uje ich ũru hn de uje ye ũrpe.
\p
\v 18 Pɨshɨbo watsaklo, tahmũr olak heke shɨ olak ɨtso pijo. Entloni uje tyenɨj yeẽk taãcha nehe uje wɨchɨ Cristo ɨmãha uje iich otsɨɨ anticristo. Ele ahle ich oso ode ich okɨhniya uje wɨr Cristo ɨr ɨmãho, heke yɨrahalo uje ich yej terɨhɨ ɨ̃rmo uhurc.
\v 19 Wap oshuu ɨre ɨtso uje õr Porrosht aabo per oym eyok pork nos wɨr õr ɨre ye õr Porrosht aabope. Kɨmɨjɨ wɨr Porrosht aabo ich shish õya eyoklo per uje oym eyok ich shuu ɨmeheeych uje wɨr ye Porrosht aabope.
\p
\v 20 Olak ye olak ɨlo õrpe pork Porrosht shuu Dechɨbich masaha olak aho heke nos erahalo uje ich ũru.
\v 21 Shɨ tichew hn tokosɨm olak ana hutɨta pork erahalo uje ich ũru, hn erahalo uje erze uje ich ũru yelɨj kushĩyak.
\v 22 Yeẽk uje tata uje Jesús ye Cristope wɨchɨ kushĩyak. Wɨchɨ Cristo ɨmãha. Sata Porrosht uu eyok Deych hn sata ɨr ijɨt Jesucristo.
\v 23 Nos wɨr erze uje otsata Jesucristo wɨr ye õr aho kɨɨsɨhɨ Porroshtpe uu eyok Deych. Per kɨmɨjɨ yeẽk tata uje Jesús wɨchɨ Cristo uje ɨshɨ ɨr hnɨtewɨhɨ Porrosht ahɨr wɨchɨ ɨr ehet kɨɨsɨhɨ Cristo hn ehet kɨɨsɨhɨ eyok Deych Porrosht toy.
\p
\v 24 Ye moymlo erze ahwoso uje oshiyokorãha olak wapni. Kɨmɨjɨ ye moymlo erze uje entloni uhulo ɨtsorz ich shish olak de Jesús hn shish olak de eyok Deych Porrosht.
\v 25 Heke Jesús chɨbɨte lahwosni par uje ɨshɨm eyok ɨkɨrĩt uje yelɨj nɨhna ɨre.
\p
\v 26 Tichew tɨbɨte ana hutɨta par tuu erahalo uje ode uje sehe onehnyẽr olak
\v 27 per Porrosht ɨshɨm olak Dechɨbich par uje debuhu olak aho hn shuu erahalo uje ich ũru, heke ye nesita uje yeẽk shiyokorãha olak. Shɨ Porrosht Ɨchɨbich nos shiyokorãha olak kuche uje ich ũru, ye kushĩyakpe. Uhu olak aho kɨɨsɨhɨ Cristo shɨ ɨtso uje Porrosht Ɨchɨbich shiyokorãha olak.
\p
\v 28 Olak shɨ olak ɨtso pijo. Shish uhu olak aho kɨɨsɨhɨ Cristo, heke uje taãcha nehe ich eyok aho kɨɨsɨhɨ ɨre ɨle ɨkɨch hn ye yɨpooklope par uje sehe yakɨs eyok.
\v 29 Erahalo uje Jesucristo ɨr ɨluu shish om, heke erahalo uje ich ũru uje nos wɨr uje õr ɨluu om wɨr Porrosht aabo.
\c 3
\s Porrosht sahmũr pishɨ daabo.
\p
\v 1 Hmeychɨmlo, ich Porrosht uu eyok Deych sahmũr pishɨ eyoklo heke tata uje eyok ɨr aabo. Ich ũru uje eyok ɨr aabo. Erze uje ye õr Porrosht aabope ye odɨraha uje eyok Porrosht aabo pork wɨr ye odɨraha Porroshtpe.
\v 2 Pɨshɨbo watsaklo, ele ahle ich eyoklo Porrosht ɨr aabo. Deeych yet nehe hn Porrosht shuu eyok yũhurrza kɨnaha per yahpaa yɨrahalo keshɨ eyok yũhurrza ɨlo latɨkpo nehe. Shɨ shuu yɨrahalo uje Jesucristo cheeshpo nehe ich eyoklo yũhurrza ahle ɨtso ɨre pork yomlo pishɨ Jesús ɨr yũhurrza.
\v 3 Nos wɨr erze uje oyeem uje Porrosht shuu õr yũhurrza ɨtso Cristo nehe wɨr oshuu deluu om pork Cristo ɨr ɨluuta ich om.
\p
\v 4 Nos wɨr erze uje oshiyokõr kuche mɨhnũwo uje Porrosht ye nahmũrpe wɨr ich oyuwe Porrosht ɨr ley pork uje yeẽk iyuwe Porrosht ɨr ley ich shiyokõr wɨr kuche mɨhnũwo uje ye Porrosht nahmũrpe.
\v 5 Erahalo uje Jesucristo tɨrẽt tɨ̃r nãhu ɨrmõkite par uje ɨshɨ eyok hnɨtewɨhɨ Porrosht ahɨr pork yiyokõr erze kuche mɨhnũwo uje ye Porrosht nahmũrpe per Jesús yelɨj niyokõr kuche mɨhnũwo uje Porrosht ye nahmũrpe.
\v 6 Nos wɨr erze uje ode Cristo ye oduhu kuch mɨhnũwo yakaha ɨrpe. Nos wɨr uje shish oshiyokõr uje mɨhnũwo wɨr ye odɨraha Cristope hn ye odɨraha ɨr ɨluupe.
\v 7 Pɨshɨbo watsaklo, shɨ olak ɨtso pijo. Ye uhu onehnyẽr olak. Yeẽk uje shish shiyokõr uje om wɨchɨ ɨr ɨluu om. Heke ɨr ɨluu shɨ ɨtso Cristo ɨr ɨluu uje ich om.
\v 8 Per ese uje shish shiyokõr uje ich mɨhnũwo wɨchɨ dyablo aap. Uje ehn yahpaa Porrosht niyokõr nãhu ɨrmõkite ɨchii dyablo shish shiyokõr uje mɨhnũwo. Heke Porrosht ɨr Ijɨt tɨrẽt tɨ̃r nãhu ɨrmõkite par uje sɨhna erze dyablo ɨr ɨbiyo.
\v 9 Nos wɨr uje Porrosht shuu oshũrhapo wɨr Porrosht aabo. Heke yelɨj oduhu erze kuche mɨhnũwo yakaha ɨre pork ye õr pwele oduhu erze mɨhnũwo yakaha ɨrpe pork Porrosht shuu oshũrhapo par uje omasaha par ɨr aabo.
\v 10 Heke ich ɨmeheeych uje yeniipo Porrosht aabo hn yeniipo uje dyablo aabo. Yeẽk uje ye shish niyokõr uje om wɨchɨ ye Porrosht aappe. Ɨtso ese uje ye nahmũr leshɨbope wɨchɨ ye Porrosht aappe.
\p
\v 11 Heke ich ɨmeheeych ɨtsorz pork wapni ɨchii otsanɨmɨrãha otatɨm olak uje tyenɨj nos ahmũrlo olak leshɨbo,
\v 12 hn ye uhu olak ɨlo Caín. Wɨchɨ dyablo aap pork shuu leshɨbich lɨshɨ shuu toy. ¿Ɨnaapo heke Caín shuu leshɨbich shuu toy? Shɨ pork ɨr leshɨbich ɨbiyo ɨhɨ̃rtso hn ɨr ɨbiyo mɨhnũwo.
\p
\v 13 Pɨshɨbo watsaklo, ye as olak ɨbe uje erze uje ye odɨraha Porroshtpe otsɨtak olak.
\v 14 Yɨrahalo uje eyoklo shɨ ɨtso uje yitokolɨhɨlo ese dehet uje tɨ̃r urhuta bahluta ehet hn yomsahalo ese dehet uje tɨ̃r Porrosht ahɨr. Ese dehet wɨchɨ par erze uje õr ɨkɨrĩt de uje yelɨj nɨhna ɨre. Yɨrahalo uje yɨrkɨhɨlo ese dehet pork yahmũrlo eyok leshɨbo. Ese uje ye nahmũr leshɨbope wɨchɨ shish dechɨ ese uje ɨtso dehet uje tɨ̃r urhuta bahluta ehet.
\v 15 Nos wɨr erze uje shish otsɨtakpa leshɨbo par Porrosht ich õr ɨtso uje oshuu leshɨbo oshuu otoy. Erahalo erze uje oshuu oso oshuu otoy wɨr ye õr ɨkɨrĩt chɨhɨpe uje yelɨj nɨhna ɨre.
\v 16 Ich ɨmeheeych uje Jesucristo sahmũr pishɨ eyok pork ɨshɨm ɨre erze oso par uje oshuu oshuu toy par uje ɨshɨ eyok hnɨtewɨhɨ Porrosht ahɨr. Heke tyenɨj yahmũrlo pish eyok leshɨbo yuhulo ɨtso uje Jesucristo sahmũr eyok.
\v 17 Kɨmɨjɨ eyok yeẽk chɨhɨ uje ɨr kushjãro kɨhniya de hn teychɨm deshɨbich uje nesita kuchɨt hn ye nuunape uje wɨchɨ losuhlaap hn ye dosɨmpe uje wɨchɨ nesita ich ye nahmũr deshɨbichpe. Porrosht chɨbɨte par uje yahmũrloye per wɨchɨ ye nahmũr leshɨbichpe pork ye dosɨr ɨrpe.
\s Porrosht aabo ye opookpe uje otɨ̃r ɨr ɨkɨch nehe.
\p
\v 18 Pɨshɨbo watsaklo, shɨ olak ɨtso pijo. Ye ompe uje shɨ olak ahwoso uje ahmũrloye. Tyenɨj uhulo ũru hn ɨmeheeych uje ahmũrloye uje akashɨmloye.
\v 19 Heke yɨrahalo uje ich ũru uje eyoklo Porrosht aabo hn ye yɨpooklope uje yɨtɨ̃r ɨre nehe.
\v 20 Uje yuuna uje yiyokõr uje mɨ̃hnɨk hn ese mɨ̃hnɨk sehe duhu eyok koswãha Porrosht ich Porrosht ma dich pork chɨraha hn pwele nɨshii erze uje sehe duhu eyok koswãha ɨre.
\v 21 Pɨshɨbo watsaklo, uje ye yiyokõrlo uje mɨ̃hnɨk heke ich ye yuuna latɨk hn eyok aho kɨɨs uje eyok orar yapur Porrosht.
\v 22 Hn uje yapurlo ɨre kuche ich ɨshɨm eyok pork yiyokõrlo uje ɨr ahwoso tata hn yiyokõrlo uje ɨre sahmũr.
\v 23 Erze uje Porrosht sehe duhu yiyokõrlo wɨchɨ uje ye yotiislo ɨr Ijɨt Jesucristo hn yahmũrloye. Wɨr uje sehe duhu yiyokõrlo.
\v 24 Nos wɨr uje oshiyokõr uje ɨr ahwoso tata wɨr ode ɨre hn ɨre ɨtspo de õr toy. Yɨrahalo uje ɨre de eyok pork ɨr Ɨchɨbich de eyok aho.
\c 4
\s Ɨchɨbiyo kɨnãho de uje Cristo ɨr ɨmãho.
\p
\v 1 Pɨshɨbo watsaklo, tyenɨj uhulo olak eyuwo tɨsɨ̃r kɨmɨjɨ ich ũru o kɨmɨjɨ ye ũrpe nos wɨr erze õr ahwoso uje otata uje Porrosht shuu oshiyokorãha olak kuche. Tyenɨj eychɨmlo õr wap kɨmɨjɨ Porrosht Ɨchɨbich chɨhɨ õr aho o kɨmɨjɨ ɨchɨbich kɨnaha, pork ich okɨhniya ode nãhu ɨ̃rmo uje otata uje otsanɨmɨrãha Porrosht ahwoso per ye ũrpe uje õr ɨre otata.
\v 2 Par uje erahalo kɨmɨjɨ Porrosht Ɨchɨbich chɨhɨ ɨre ehet uje sanɨmɨrãha Porrosht ahwoso ich wɨchɨ tyenɨj tata uje Jesús wɨchɨ Cristo uje tãra Porrosht hn ɨshɨ oso õr hnɨtewɨhɨ Porrosht ahɨr hn tyenɨj tata toy uje Jesús wɨchɨ hnakɨrbich pisht. Uje tata ɨtsorz ich Porrosht Ɨchɨbich de ɨre ehet.
\v 3 Uje ye yeẽk tata Jesús shuu ɨtsorz ich ye Porrosht Ɨchɨbich chɨhɨ ɨre ehetpe. Shɨ ɨchɨbich kɨnẽhet de ehet. Wɨchɨ Cristo ɨr ɨmãha. Olak ich entloni uje ese ɨchɨbich kɨnehe de nehe. Ele ahle ich de nãhu ɨ̃rmo.
\p
\v 4 Pɨshɨbo watsaklo, shɨ olak ɨtso pijo. Olak Porrosht aabo hn erzloni erze uje otsehnyẽr oso pork ese Porrosht Ɨchɨbich uje de olak aho wɨchɨ ma ukurbo deyo de je ese Satanás uje de nãhu ɨ̃rmo uje shuu oso oshiyokõr uje mɨhnũwo.
\v 5 Õr owich shɨ de nãhu ɨ̃rmo heke uje otata lahwoso ich shɨ otata kuche uje de nãhu ɨ̃rmo hn erze uje ye õr Porrosht aabope otsahmũr õr ahwoso.
\v 6 Eyoklo ye eyok ɨlo õrpe pork eyoklo Porrosht aabo. Erze uje otsahmũr Porrosht ich otsahmũr eyok ahwoso per erze uje ye õr Porrosht aabope ye onahmũr eyok ahwospe. Heke yɨrahalo yeniipo Porrosht Ɨchɨbich de õr aho. Porrosht Ɨchɨbich shish tata uje ich ũru, hn yeniipo uje ɨchɨbich kɨnẽhet de õr aho. Wɨr shɨ otata dekushiĩ.
\s Porrosht sahmũr oso.
\p
\v 7 Pɨshɨbo watsaklo, eyoklo tyenɨj yahmũrloye pork Porrosht wɨchɨ uje chɨbɨte eyok aho par uje yahmũrloye. Heke nos wɨr erze uje otsahmũrye ich ɨmeheeych uje Porrosht shuu oshũrhaponi par omasaha par ɨr aabo hn wɨr uje ochɨraha Porrosht.
\v 8 Ese uje ye nahmũr leshɨbope wɨchɨ ye dɨraha Porroshtpe pork Porrosht nos sahmũr oso.
\v 9 Porrosht shuu ɨmeheeych uje sahmũr eyoklo pork shuu deyjɨt nohmɨramɨt tɨrẽt tɨ̃r nãhu ɨrmõkite par ɨshɨ eyok hnɨtew par uje eyok ɨkɨrĩt de uje yelɨj nɨhna ɨre pork ye yotiis Porrosht ijɨtpe.
\v 10 ¿Ɨlo latɨkpo uje Porrosht sahmũr eyok? Wɨchɨ ye ɨlo uje yahmũrlo ɨrpe. Porrosht sahmũr pishɨ eyoklo heke shuu deyjɨt tɨrẽtni tɨ̃r nãhu ɨ̃rmo par uje ɨshɨ eyok hnɨtewɨhɨ Porrosht ahɨr.
\p
\v 11 Pɨshɨbo watsaklo, Porrosht sahmũr pishɨ eyoklo shuu ɨtsorz heke tyenɨj yahmũrloye.
\v 12 Nĩhyok yeẽk uje umo Porrosht per kɨmɨjɨ shish yahmũrloye ich Porrosht debuhu eyoklo aho hn shuu yahmũrlo pishye.
\v 13 Yɨrahalo uje eyoklo aho kɨɨsɨhɨ Porrosht hn ɨr ɨtspo ehet kɨɨsɨhɨ eyoklo pork ɨshɨm eyok Dechɨbich.
\v 14 Õryok oyeychɨm Jesusni hn oyitɨm olak uje Porrosht shuu Deyjɨt tɨrẽtni par uje ɨshɨ oso õr hnɨtewɨhɨ Porrosht ahɨr.
\p
\v 15 Uje yeẽk tata uje Jesús wɨchɨ uu Porrosht Ijɨt pisht uje ɨshɨ oso õr hnɨtewɨhɨ Porrosht ahɨr ich Porrosht de ɨre hn ɨre ɨtspo de Porrosht.
\v 16 Heke yɨraha hn ye yotiispe uje Porrosht sahmũr eyok. Porrosht shish sahmũr oso. Uje yeẽk shish sahmũr leshɨbo wɨchɨ de Porrosht hn Porrosht ɨtspo de ɨre.
\v 17 Uje ehn eyok de nãhu ɨ̃rmo kɨmɨjɨ yahmũrlo pishɨ Porrosht ich shɨ eyok ɨluu ɨtso Jesucristo ɨr ɨluu, heke ye yɨtɨlɨlo uje yɨtɨ̃rlo ɨre ɨkɨch nehe uje sepyẽr erze uje oshiyokõr uje mɨhnũwo.
\v 18 Kɨmɨjɨ ahmũrlo pishɨ ɨre ich ye atɨlɨlope uje etɨ̃rlo ɨr ɨkɨch. Shɨ oso otola ɨre pork ochɨraha uje tyenɨj sepyẽr õr nehe. Ese uje tola tɨ̃r Porrosht ɨkɨch nehe wɨchɨ yẽrɨj nahmũr pishɨ Porrosht.
\v 19 Nos yahmũrlo Porrosht pork ɨr wapkite uje sahmũr eyok.
\p
\v 20 Kɨmɨjɨ yeẽk tata ɨm: —Yok tahmũr Porrosht— per sɨtak leshɨbich, wɨchɨ shɨ kushĩyak. Kɨmɨjɨ ye wɨchɨ nahmũr leshɨbich uje teychɨm ich ye pwele nahmũr Porroshtpe pork yelɨj teychɨm.
\v 21 Jesucristo tatɨm õryok uje yeẽk sahmũr Porrosht ich tyenɨj sahmũr leshɨbo toy.
\c 5
\s Porrosht aabo otserz uu kuche mɨhnũwo.
\p
\v 1 Nos wɨr erze uje ye olotiis Jesús uje wɨchɨ uu Cristo uje ɨshɨ õr hnɨtewɨhɨ Porrosht ahɨrkite ich wɨr Porrosht aabo. Uje yeẽk chɨhɨ uje sahmũr deych ich sahmũr daabo toy,
\v 2 heke ich ɨmeheeych uje yahmũrlo Porrosht ɨr aabo pork yahmũrlo Porrosht hn yiyokõrlo uje ɨr ahwoso tata.
\v 3 Ich ɨmeheeych uje yahmũrlo Porrosht pork yiyokõrlo uje ɨr ahwoso tata. Ɨr ahwoso ich ye ɨhnepe par uje oshiyokõr.
\v 4 Heke nos wɨr Porrosht aabo otserz erze kuche mɨhnũwo uje de nãhu ɨ̃rmo pork ye oniyokõrpe. Shɨ pork ye yotiislo Jesuspe heke yerzlo erze kuche mɨhnũwo uje de nãhu ɨ̃rmo.
\v 5 ¿Yeẽkpo uje serz erze kuche mɨhnũwo uje de nãhu ɨ̃rmo? Shɨ ese uje ye lotiis uje Jesús wɨchɨ Porrosht Ijɨt.
\v 6 Ɨmeheeych uje Jesucristo wɨchɨ Porrosht ijɨt uje Juan tohɨrm ɨre, hn ɨmeheeych toy uje tooho krus eeych. Ye shɨ ɨmeheeychpe uje Juan tohɨrm ɨre. Ɨmeheeych toy uje tooho krus eeych hn ɨr armɨsta noshɨ. Porrosht Ɨchɨbich shuu Ɨmeheeych toy uje wɨchɨ uu Porrosht ijɨt uje ɨshɨ eyok hnɨtewɨhɨ Porrosht ahɨrkite pork Porrosht Ɨchɨbich shish tata uje ich ũru.
\v 7 Heke erze uje shuu ɨmeheeych uje Jesús wɨchɨ uu Porrosht ijɨt pisht wɨr tre.
\v 8 Erze tre wɨchɨ Porrosht Ɨchɨbich hn wɨchɨ yet uje Juan tohɨrm ɨre hn wɨchɨ yet toy uje tooho krus eeych hn ɨr armɨsta noshɨ. Erze tre shuu ɨmeheeych uje Jesús wɨchɨ uu Porrosht ijɨt pisht.
\p
\v 9 Eyok yɨbɨte uje ich ũru erze ahwoso uje hnakɨrbo otata per ich ma ũru erze ahwoso uje Porrosht tata. Erze ahwoso uje Porrosht tata wɨr erze tre uje shuu ɨmeheeych uje ɨr ijɨt wɨchɨ Jesucristo.
\v 10 Yeẽk uje ye lotiis Porrosht ɨr Ijɨt ich Porrosht Ɨchɨbich de wɨchɨ ehet hn shuu ɨmeheeych uje Jesús wɨchɨ Porrosht ɨr Ijɨt. Ese uje sotiis uje Porrosht tata wɨchɨ shɨ chɨbɨte uje Porrosht kushĩyak pork sotiis erze ahwoso uje Porrosht tata uje Jesús wɨchɨ ɨr Ijɨt.
\v 11 Erze uje Porrosht tata wɨr par ɨshɨm eyok ese ɨkɨrĩt uje yelɨj nɨhna ɨre shɨ uje ye yotiis uu ɨr Ijɨt.
\v 12 Yeẽk uje ye lotiis Porrosht ɨr Ijɨt ich ese ɨkɨrĩt de ɨre uje yelɨj nɨhna ɨre, per ese uje sotiis Porrosht ɨr Ijɨt ich ye ese ɨkɨrĩt chɨhɨ ɨrpe uje yelɨj nɨhna ɨre.
\s Porrosht aabo õr ɨkɨrĩt de Porrosht ahɨr.
\p
\v 13 Tichew ana hutɨta tokosɨm olak uje ye otiislo Porrosht Ijɨtpe par uje erahalo uje ich ũru uje ese ɨkɨrĩt de olak uje yelɨj nɨhna ɨre.
\p
\v 14 Yɨrahalo uje ich ũru uje eyoklo orar yapurlo Porrosht kuchɨt uje ich om ich chunt eyoklo,
\v 15 hn uje yɨrahalo uje chunt eyoklo uje yapurlo ɨre kuche ich yɨrahalo toy uje ɨshɨm eyoklo uje yapurlo.
\v 16 Uje eyok yeẽk nomo deshɨbich uje shiyokõr uje mɨ̃hnɨk uje ye duhu wɨchɨ tope nehe ich tyenɨj sapur Porrosht par uje perdonar wɨchɨ par uje ye wɨchɨ toy. Porrosht shɨ perdonar wɨchɨ kɨmɨjɨ ye niyokõrpe ese kuchɨt mɨ̃hnt uje shuu otoy. Kuchɨt mɨ̃hnt de uje shuu otoy. Ye titɨm olakpe par uje olak yeẽk orar lapur Porrosht par ese.
\v 17 Nos wɨr kuche uje ye Porrosht nahmũrpe wɨr mɨhnũwo. Kuche mɨhnũwo de uje Porrosht ye nahmũrpe uje ye duhu otope pork Porrosht pwele perdonar.
\p
\v 18 Yɨraha uje ese uje Porrosht shuu shũrhapo par ɨr aap ich ye duhu erze kuche mɨhnũwo yakaha ɨrpe. Porrosht Ijɨt wɨchɨ uje tɨbey ɨre, hn ye Satanás pwelpe par uje shiyokõr mɨhnɨkɨ̃hɨ ɨre.
\v 19 Yɨrahalo uje eyoklo de Porrosht hme, hn erze oso uje ode nãhu ɨ̃rmo ode Satanás hme,
\v 20 hn yɨrahalo toy uje Porrosht ɨr Ijɨt tɨrẽtkite par uje shuu yɨrahalo Porrosht pisht. Eyoklo aho kɨɨsɨhɨ Porrosht pisht, hn eyoklo aho kɨɨsɨhɨ ɨr Ijɨt Jesucristo. Jesucristo wɨchɨ Porrosht pisht. Wɨchɨ uje ɨshɨm eyok ese ɨkɨrĩt uje yelɨj nɨhna ɨre.
\v 21 Pɨshɨbo watsaklo, shɨ olak ɨtso pijo. Abeylshɨp olak par uje ye eeychãhalo porrosht kɨnãho.