\id 2JN Chamacoco NT - Paraguay 2000 (web 2013)
\h 2 Juan
\toc1 2 Juan
\toc2 2 Juan
\toc3 2Jn
\mt1 2 Juan
\c 1
\s Porrosht aabo tyenɨj otsahmũrye.
\p
\v 1 Yok Juan uje tichew ana hutɨta. Yok anciano uje tɨkɨbey Porrosht aabo. Tichew ana hutɨta par tokosɨm erze Porrosht aabo. Wɨr shɨ õr ɨtso tɨmcharrza hõr uu daabo. Ich tahmũr pishɨ õr, hn ye shɨ yok nohmɨrape uje tahmũr õr. Nos wɨr erze uje ochɨraha uje ich ũru otsahmũr õr toy.
\v 2 Tahmũr õr pork ich ũru uje Cristo sahmũr eyok hn shish de eyok ahɨr.
\v 3 Sehe tuu eyok Deeych Porrosht hn ɨr Ijɨt Jesucristo odosɨr eyok, hn onuuna uje eyok losuhlaabo hn otakashɨm eyok hn oduhu eyok aho kɨɨs. Sehe tuu oduhu yahmũrloye hn yakashɨmlo pishye.
\p
\v 4 Ich uhulo yok aylpa uje tish olak yewo uje oshiyokõr uje Porrosht ahwoso tata. Ɨr ahwoso ich ũru.
\s Ode uje sehe onehnyẽr Porrosht aabo.
\p
\v 5 Pɨshɨbo watsaklo, wap sehe titɨm olak par uje ma ahmũrloye. Ahnũwo uje tichew titɨm olak ye ahwoso ahlope. Uje yomsahaloni par eyok Porrosht aabo ɨchii yuntlo ɨtsorz.
\v 6 Kɨmɨjɨ yahmũrlo Porrosht ich yiyokõrlo uje ɨre tata. Entlo wapni erze uje Porrosht sahmũr uje ahakõrlo, wɨchɨ uje tyenɨj yahmũrloye
\v 7 pork ich okɨhniya uje otɨ̃r lekɨtiyo shɨ par uje otsehnyẽr oso. Wɨr otsotiis Jesucristo uje tɨrẽtni hn shũrha hnakɨrap. Uje yeẽk tata shuu ɨtsorz ich shɨ sehe nehnyẽr oso. Wɨchɨ Cristo ɨr ɨmãha.
\v 8 Abeylshɨp olak par uje ye onehnyẽr olak hn oduhu olak premyo pyerte. Ich asɨlo obiyo ich kɨhniya par erze premyo uje Porrosht tyenɨj ɨshɨm olak nehe. Ye uhulo erze olak premyo pyerte hnii pɨkaap.
\p
\v 9 Uje yeẽk sowe uje Cristo tata ich chimehĩ. Ye niyokõrpe uje tatɨm ɨre. Wɨchɨ ye dɨraha Porrosht ɨluupe, per erze uje oshiyokõr uje Cristo tata ochɨraha Porrosht ɨluu hn ochɨraha Cristo ɨluu.
\v 10 Uje yeẽk tɨ̃r olak hn sanɨmɨrãha ahwoso uje ye ɨlo Cristo ɨr ahwospe ich ye uhu lakaha olak ihyuch. Ye atɨmlo ɨre par uje Porrosht takashɨm ɨre
\v 11 pork uje yeẽk tatɨm ɨre shuu ɨtsorz ich takashɨm wɨchɨ shiyokõr erze ɨr ɨbiyo uje ich mɨhnũwo.
\s Porrosht aabo yewo nos oshɨm õr saludo.
\p
\v 12 Kuche kɨhniya de uje sehe titɨm olak per ye tahmũr tichewpe tɨbɨte hutɨta. Sehe takaha tɨtɨ̃r olak par uje yɨkitkẽrloye heke ich eyoklo aylpa.
\v 13 Nos wɨr Porrosht aabo uje ode lɨka pahɨr oshɨm olak saludo. Porrosht chiihla õrni. Shɨ ahnũwo uje sehe titɨm olak.