\id 3JN Chamacoco NT - Paraguay 2000 (web 2013)
\h 3 Juan
\toc1 3 Juan
\toc2 3 Juan
\toc3 3Jn
\mt1 3 Juan
\c 1
\s Juan ɨshɨm Gayo saludo.
\p
\v 1 Yok Juan. Yok anciano uje tɨkɨbey Porrosht aabo. Gayo, tichew ana hutɨta tokosɨm owa. Yok ich tahmũr pishɨ owa.
\v 2 Pɨshɨbiche, shish yok orar tapur Porrosht par owa. Ɨtso uje ahmũr Porrosht ich sehe tuu nos ebiyo tokole om hn sehe tuu owa owich om.
\v 3 Uje Porrosht aabo yewo otaachɨ̃hɨ lɨka hn otatɨm yok uje ahakõr uje ich ompa ich shuu yok aylpa. Ich ũru uje ahakõr uje Porrosht ahwoso tata.
\v 4 Owa shɨ owa ɨtso pijɨt pork tuu amsahani par Porrosht aap. Uje tukunt uje pijo oshiyokõr uje Porrosht ahwoso tata ich shuu yok aylpa. Nĩhyok yeẽk pwele shuu yok ma ayla je erze.
\p
\v 5 Pɨshɨbiche, ich ɨhɨ̃rtpa uje akashɨm Porrosht aabo yewo, hn ich ma ɨhɨ̃rtpa uje akashɨm erze Porrosht aabo yewo uje otãra dukul dich uje ye eraha õrpe.
\v 6 Wɨr õr eyucha owa iglesya ahoni. Otatɨm Porrosht aabo uje ahmũr õr hn akashɨm õr. Ahakõr uje ich om uje akashɨm õr uje otɨ̃r lekɨtiyo. Ich om uje yakashɨm erze uje oshiyokõr Porrosht ɨbiyo oshuu ɨtsorz.
\v 7 Wɨr otɨ̃r lekɨtiyo par uje oshiyokõr Porrosht ɨbiyo. Shɨ otsahmũr uje Porrosht aabo oshɨm õr uje õr nesita. Ye onahmũrpe uje yewo oshɨm õr uje õr nesita.
\v 8 Eyok tyenɨj nos yakashɨmlo Porrosht aabo uje õr ɨbiyo ɨtso wɨr, heke uje yakashɨmlo õr yuhu ɨtsorz ich wɨr eyok ihyẽro par yanɨmɨrãha Porrosht ahwoso.
\s Diótrefes ɨr ɨluu ich mɨhnũ hn Demetrio ɨr ɨluu ich om.
\p
\v 9 Tichew hutɨta par tokosɨm Porrosht aabo uje ode iglesya ehet per Diótrefes sɨtak. Shɨ sahmũr uje sehe duhu ɨre dichɨhɨ wahacha heke wɨchɨ ye tola yokpe.
\v 10 Kɨmɨjɨ uje takaachɨ̃hɨ wahacha nehe ich tɨbɨte orhõta erze uje ɨre shiyokõr. Wɨchɨ shish chish majamichɨhɨ yok. Ye shɨ erzepe uje shiyokõr. Ye nahmũr uje Porrosht aabo yewo otɨ̃r ɨrpe, hn sontew Porrosht aabo uje õr ayla uje erze yewo otekɨrɨhɨ õr. Erze uje sehe otakashɨm õr ich wɨchɨ chiyuhu orɨ̃hɨ iglesya ehet.
\v 11 Pɨshɨbiche, ye eẽt erze uje oshiyokõr uje ich mɨhnũwo. Shɨ eẽt erze uje oshiyokõr uje ich om. Erze uje oshiyokõr uje ich om oshuu ɨmeheeych uje õr ɨre Porrosht aabo per erze uje oshiyokõr uje ich mɨhnũwo wɨr ye odɨraha Porroshtpe.
\p
\v 12 Nos otata uje Demetrio ich ɨr ɨluu om. Porrosht ahwoso chɨbɨte orhõta uje wɨchɨ ɨr ɨluu ich om, hn yok tɨkɨraha uje ɨr ɨluu ich om toy, hn eraha uje yok shish tiita uje ich ũru.
\s Porrosht aabo oshɨm Gayo saludo.
\p
\v 13 Titɨm owa. Kuche kɨhniya de uje sehe tichew titɨm owa per ye tichew tɨbɨte hutɨtape.
\v 14 Sehe takaha tɨtɨ̃r owa shɨchish par yɨkitkẽrye.
\v 15 Sehe tuu Porrosht shish duhu ehet kɨɨs. Uu owa ahɨ̃re oshɨm owa saludo, hn nos tokosɨm uu pihyẽre õr saludo toy.