\id REV Chamacoco NT - Paraguay 2000 (web 2013)
\h Apocalipsis
\toc1 Apocalipsis
\toc2 Apocalipsis
\toc3 Ap
\mt1 Apocalipsis
\c 1
\s Porrosht shuu daabo ochɨraha uje tɨ̃r
\p ɨ̃rmo nehe.
\v 1 Porrosht tatɨm Jesucristo par shuu tatɨm laabo erze kuche uje tyenɨj tɨ̃r ɨ̃rmo nehe par uje shuu ochɨraha, heke Jesucristo shuu ɨr anjel hno tɨ̃r debich uje iich otsɨɨ Juan. Wɨchɨ apóstol.
\v 2 Juan chichew erze uje Porrosht tata hn erze uje Jesucristo tyenɨj shiyokõr nehe. Wɨr uje Juan umo.
\v 3 Ich om par ese uje ler ɨr ahwoso uje de asa hutɨta uje tata uje ɨre tyenɨj shiyokõr nehe hn ich om par erze uje otẽr hn uje oshiyokõr uje erze ɨr ahwoso tata pork ich yej terɨhɨ ese ɨshɨrĩt uje erze kuche tɨ̃r ɨ̃rmo.
\s Juan chichew ana hutɨta.
\p
\v 4 Yok Juan. Tichew ana hutɨta tokosɨm erze Porrosht aabo uje õr wee syete uje odechɨ hnɨmich Asia. Porrosht de hn shish dekite hn shish de nehe. Erze ɨchɨbiyo uje õr syete odechɨ Porrosht ɨbɨta ɨkɨch. Sehe tuu Porrosht hn erze ɨchɨbiyo odosɨr olak hn oduhu olak aho kɨɨs.
\v 5 Hn sehe tuu Jesucristo takashɨm olak toy hn duhu olak aho kɨɨs. Wɨchɨ shish tata uje ich ũru. Wɨchɨ webich os uje ɨkpokite tokolɨhɨ erze topo õr ahɨr. Wɨchɨ nos rey õr bahlut pisht uje ode nãhu ɨ̃rmo. Cristo ich sahmũr pɨshɨ eyok. Wɨchɨ ɨr armɨsta noshɨkite par ɨshɨ eyok hnɨtewɨhɨ Porrosht ahɨr.
\v 6 Wɨchɨ uje shuu eyok weeta nohmɨra uje eyok Porrosht aabo hn shuu yomsaha ese obich uje iich otsɨɨ saserdote par yiyokõr ɨr Deych Porrosht ɨbiyo. Sehe tuu nos oteeychãha ɨre hn shish oduhu ɨre ma dich. Uje oniyokõr oduhu ɨlorz ich ɨhɨ̃rtpa.
\p
\v 7 Ẽrlo yok. Cristo tyenɨj cheeshpo nehe tãra poõrc tokolɨhɨ ukuhurrza ehet hn ihnɨmich hn nos oso oteychɨm. Erze uje ochiyuwa klabo ɨr hmekite tyenɨj omo toy nehe. Nos wɨr oso uje ode nãhu ɨ̃rmo ich tyenɨj oyerh pork wɨchɨ taãcha, per ich ma om uje taãcha.
\v 8 Eyok Ɨrhĩch Porrosht ɨm: —Shɨ yok ɨtso uu letra webich osht a hn uhurzosht zeta.— Tata shuu ɨtsorz pork wɨchɨ de hn shish dekite hn shish de nehe. Ɨr ukurbo deyo de.
\s Juan umo Cristo.
\p
\v 9 Titɨm olak. Yok Juan. Yok olak leshap pork yakɨshlo Jesús. Ich oso oloter yok toy. Yok Porrosht aap hn shish yok ewenta nos wɨr kuche mɨhnũwo uje tɨ̃r yok ɨtso olak. Oshiyeru yok ochɨbɨte yok ese hnɨmich uje iich otsɨɨ Patmos uje awɨt chɨpeẽsa. Wɨchɨ ɨtso karsel. Ochɨbɨte yok wahacha shɨ pork tanɨmɨrãha Porrosht ahwoso titɨm õr Jesucristo.
\v 10 Domingo wɨchɨ eyok Ɨrhĩch ɨr deeych. Uje terɨhɨ ese deeych ich Porrosht Ɨchɨbich shuu tukunt uje yeẽk chiilehetɨhɨ piyẽr. Ɨr ahwoso ich jwertpa shɨ ɨtso uje yeẽk sobɨta trompeta.
\v 11 Tatɨm yok ɨm: —Erze uje tokowa owa nehe ich tyenɨj atsew ebɨte hutɨta hn asɨm asa hutɨta erze Porrosht aabo uje õr wee syete. Ode erze duwo Efeso hn Esmirna hn Pérgamo hn Tiatira hn Sardis hn Filadelfia hn Laodicea. Erze duwo dechɨ hnɨmich Asia.—
\p
\v 12 Tomtɨs yok par takachɨm ese uje keytkẽr yok keshɨ yeẽkpo. Tokomo uhwɨrbe syete pur oro par otserũhu nampyon eeyo kal nohmɨr nohmɨr.
\v 13 Erze uhwɨrbe syete uje oro de hn yeẽk iyehetɨhɨ ehet wɨchɨ uje Porrosht shuu tɨrẽtkite tɨ̃r ɨ̃rmo. Ɨr ɨshuwo ich berzo hn ɨr ɨhɨrosht pur oro uje de ɨr ɨrjorrza.
\v 14 Ɨr akɨ̃rt ich poro shɨ ɨtso obeje wesho uje poro hn shɨ ɨtspo nieve. Ɨr ɨle eyhi shɨ ɨtso jwekɨta yokõrt,
\v 15 hn ɨr hnɨte shɨ ɨtso bronse uje ich hũrpa. Wɨchɨ shɨ ɨtso uje otsar ese bronse kipuut ehet hn ɨr otich tokole ich hũrpa. Uje chiilehet ich ihyokõrak dich shɨ ɨtso awɨt uje tãra kojach uushɨ ich jwertpa.
\v 16 Ɨr hmata waãchta porrzeebe de syete, hn espada tokolɨhɨ ɨr ahwo uje pɨt watak hn pɨt yet watak. Ɨr ɨle ich hũrpa shɨ ɨtso deeych uje chihit.
\v 17 Uje takachɨm ich yok kayɨhɨ hnɨte ahɨr shɨ ɨtso uje tɨkɨtɨ per ɨre chɨbɨte nahmɨta waãchta yok peeych hn tatɨm yok ɨm: —Ye atɨla yok. Yok uu webich osht hn uu uhurzosht.
\v 18 Ich yok ɨka. Antkite hn tɨkɨtɨ per ele ahle shish yok ɨka. Yok uje tiita uje otoy o kɨmɨjɨ ye otope hn õr ɨchɨbiyo hno tɨ̃r erze topo õr owich pork ich shɨ ɨtso uje yabe de pahɨr par tiyokõr tuu ɨtsorz.
\v 19 Heke atsew ebɨte hutɨta erze kuche uje amoko hn erze uje yesh de hn erze uje tyenɨj tɨ̃r ɨ̃rmo nehe.
\v 20 Tyenɨj titɨm owa uje sɨteẽta erze porrzeebe uje syete uje amoko de pɨhmta waãchta hn erze uhwɨrbe uje syete pur oro uje amoko. Erze porrzeebe shɨ ɨtso erze Porrosht aabo õr bahluwo uje ode kal iglesya uje syete hn erze uhwɨrbe uje pur oro syete shɨ ɨtso erze Porrosht aabo uje ode erze iglesya uje syete.
\c 2
\s Porrosht aabo uje ode dɨt Efeso.
\p
\v 1 Atsew asa hutɨta hn asɨm erze Porrosht aabo õr bahlut uje de asa iglesya uje de dɨt Efeso. Atɨm ɨre on: “Wɨchɨ ɨr ahwoso ese uje porrzeebe syete de hmata waãchta hn dɨrkɨhɨ wɨr uhwɨrbe ehet uje syete pur oro uje otserũhu nampyon eeyo. Wɨchɨ tata ɨm:
\v 2 Nos tɨkɨraha uje ahakõrlo. Tɨkɨraha uje aslo pɨbiyo ich ehnewlo hn ye moymlo erze pɨbiyope. Tɨkɨraha uje ye enthɨlope erze uje oshiyokõr mɨhnuwõho olak ehet. Olak prowa erze oso uje ochii ɨr apostolehe par erahalo kɨmɨjɨ ũru hn eshɨlo uje ye ũrpe.
\v 3 Tɨkɨraha uje shish kuche mɨhnũwo tɨ̃r olak hn olak ewenta pork ye otiislo yokpe hn ye uhulo patɨm olakpe.
\v 4 Per kuchɨt de uje shuu tɨkɨtak olak. Wap ich ahmũrlo pɨshɨ yok per ele ahle ich yẽrɨj ahmũrlo yok.
\v 5 Sehe tuu olak eyucha uje wap ich ahmũrlo pɨshɨ yok heke sehe tuu ahmũrlo yokpo uhulo ɨlo wapni hn ahakõrlo pɨbiyo uhulo ɨlo uje wapni. Kɨmɨjɨ ye ahakõrlo uhulo ɨtsorz ich tyenɨj tɨtɨ̃r olak nehe hn tuu olak weeta ye jukur shɨ ɨtso uje tiyuhu asa uhwɨrbta uje oro per kɨmɨjɨ eeshlo ahmũrlo pɨshɨ yok ɨtso uje wapni ich ye tuu ɨlorzpe.
\v 6 Kuchɨt de uje ich om uje yesh ahakõrlo, ich etaklo wɨr õr ɨbiyo erze uje õr ɨluu iich otsɨɨ nicolaítas. Yok ɨtspo ye tahmũr õrpe.
\v 7 Ese uje tẽr uje Porrosht Ɨchɨbich tatɨm Porrosht aabo uje otakasho lawichɨhɨ lekɨtiyo ich tyenɨj shiyokõr uje tata. Ese uje shiyokõr ɨtsorz ich tyenɨj serz hn tuu tew asa pohorrza eeta waa je shuu õr ɨkɨrĩt de. Asa pohorrza dechɨ paraíso uje Porrosht de.”
\s Porrosht aabo uje ode dɨt Esmirna.
\p
\v 8 Atsew asa hutɨta hn asɨm erze Porrosht aabo õr bahlut uje de asa iglesya uje de dɨt Esmirna. Atɨm ɨre on: “Ese uje wapkite de hn uhurc ich shish de, wɨchɨ uje tokite hn ɨkpo tata ɨm:
\v 9 Tɨkɨraha erze kuche mɨhnũwo uje tɨ̃r olak hn tɨkɨraha uje olak losuhlaabo per ich olak ɨhɨ̃r deyo. Tɨkɨraha uje oso ode uje oshuu yewo ochiyuhu lahwoso mɨhnuwõho olak. Wɨr otata uje õr israel oso per wɨr ye Porrosht aabope. Wɨr shɨ weeta uje oshiyokõr uje Satanás sahmũr.
\v 10 Ye atɨlɨlo erze mɨhnũwo uje tyenɨj tɨ̃r olak. Ẽrlo yok. Dyablo tyenɨj shuu ochɨmchaha olak yewo õr karsel par uje prowa olak kɨmɨjɨ moymlo Porrosht o kɨmɨjɨ ye moymlope. Tyenɨj oshiyokõr mɨhnɨkɨ̃hɨ olak oshuu daalo dye. Ye moymlo yok nehech atɨlo hn tokosɨm olak premyo uje de pahɨr. Wɨchɨ uu olak ɨkɨrĩt.
\v 11 Ese uje tẽr uje Porrosht Ɨchɨbich tatɨm Porrosht aabo uje otakɨsho lawichɨhɨ lekɨtiyo ich tyenɨj shiyokõr uje tata. Erze uje oshiyokõr uje ɨre tata ich otserz heke ye otɨ̃r urhuta bahluta ehet nehe. Asa urhuta bahluta iich yet otsɨɨ otoypo.”
\s Porrosht aabo uje ode dɨt Pérgamo.
\p
\v 12 Atsew asa hutɨta hn asɨm erze Porrosht aabo õr bahlut uje de asa iglesya uje de dɨt Pérgamo. Atɨm ɨre on: “Ese uje espada pɨt watak hn pɨt yet watak de ɨre ahɨr wɨchɨ tata shuu ɨtsorz:
\v 13 Tɨkɨraha uje ebuhulo ese owich uje Satanás sakaha. Tɨkɨraha uje ye moymlo yokpe. Antipas ye lotiis yokpe hn shish sanɨmɨrãha pahwoso nehech oshuu oshuu toy olak dɨt ehet uje Satanás debuhu. Uje oshuu ɨre oshuu toy ɨtsorzni ich olak ye moymlo yokpe
\v 14 per kuche de uje ahakõrlo uje ye tahmũrpe. Olak yewo ode uje oshiyokorãha yewo ɨtso uje Balaam shiyokõrkite. Wɨchɨ sakɨt rey Balak par shuu israel oso oshiyokõr uje ich mɨhnũwo shɨ ɨtso uje chɨbɨte kojach erze israel oso õr ɨjɨch par uje shuu õr hnɨte hn õr kay. Wɨchɨ shuu otew erze kuche ẽro uje oshuu hn oshɨmɨhɨ ɨr porrosht kojano po hn shuu oshiyokõr erze uje ich mɨhnũwo uje hnakɨrbo hn tɨmcher oshiyokorɨ̃hɨye.
\v 15 Olak yewo ode toy uje otsahmũr erze uje õr ɨluu iich otsɨɨ nicolaítas oshiyokorãha õr. Yok ich tɨkɨtak pɨshɨ õr ɨluu.
\v 16 Moymlo erze uje ich mɨhnũwo hn eeshlopo ahakõrlo uje yok tahmũr. Kɨmɨjɨ ye ahakõrlo uje tahmũr ich tɨkɨrẽt shɨchish hn tepyẽr erze uje oshiyokõr uje ich mɨhnũwo tɨ̃ra espada uje tãra pahwo.
\v 17 Ese uje tẽr uje Porrosht Ɨchɨbich tatɨm Porrosht aabo uje otakɨsho lawichɨhɨ lekɨtiyo ich tyenɨj shiyokõr uje tata. Kɨmɨjɨ shiyokõr uje titɨm ɨreke ich tyenɨj serz hn tokosɨm ɨre erze ɨr poso uje shɨ ɨtso maná uje sakɨsɨhɨ Porrosht ahɨr. Tokosɨm ɨre toy kojach uje poro uje ɨr iich ahle de. Nĩhyok ye latɨk dɨraha ese iich ahle, shɨ ese uje tokosɨm ɨre.”
\s Porrosht aabo uje ode dɨt Tiatira.
\p
\v 18 Atsew ebɨte hutɨta hn asɨm erze Porrosht aabo õr bahlut uje de asa iglesya uje de dɨt Tiatira. Atɨm ɨre on: “Porrosht ɨr Ijɨt ɨr ɨle eyhi shɨ ɨtso jwekɨta yokõrt hn ɨr hnɨte shɨ ɨtso bronse uje ich hũre, wɨchɨ uje tata ɨm:
\v 19 Tɨkɨraha uje ahakõrlo hn tɨkɨraha uje ahmũrlo yok hn ye otiislo yokpe hn shish ahakõrlo pɨbiyo hn olak ewenta erze kuche mɨhnũwo uje tɨ̃r olak. Tɨkɨraha uje olak ɨbiyo uje ahakõrlo par yok ich ma om je uje wapni
\v 20 per kuchɨt de uje ich tɨkɨtakpa uje ahakõrlo. Ye ontɨlope asa tɨmcharrza waa je iich otsɨɨ Jezabel. Wate chii ɨr profet yarɨ̃hɨ hn shiyokorãha pɨbiyo shuu oshiyokõr erze uje ich mɨhnũwo pisho uje hnakɨrbo hn tɨmcher oshiyokorɨ̃hɨye hn shuu elɨlo erze kuche ẽro uje oso oshuu hn oshɨm ɨr porrosht kojano po.
\v 21 Tɨbɨte ɨshɨrĩt par uje wate iim uje shiyokõr uje mɨhnũwo par shiyokõr uje tahmũr per ye nahmũrpe. Ye noympe uje shiyokõr erze mɨhnũwo uje hnakɨrbo hn tɨmcher oshiyokorɨ̃hɨye.
\v 22 Ẽrlo yok. Tyenɨj tuu wate permpa hn shɨ de darpich eeych. Erze uje otorãhaye hõr wate tɨmcharrza tyenɨj oym erze kuche mɨhnũwo hn oshiyokõr uje tahmũr. Kɨmɨjɨ ye onoym erze mɨhnũwo ich tuu õr dospa.
\v 23 Erze uje otsahmũr uje wate shiyokorãha õr ich tyenɨj tuu õr tuu otoy, heke nos paabo uje otakɨsho lawichɨhɨ lekɨtiyo ochɨraha uje takachɨm õr aho hn õr eyuwo. Deeych yet nehe hn tokosɨm olak nohmɨr nohmɨr uje erzlo kɨmɨjɨ ahakõrlo uje om o kɨmɨjɨ ahakõrlo uje mɨhnũwo.
\v 24 Olak yewo uje olak dechɨ dɨt Tiatira uje ye ahakõrlope uje asa tɨmcharrza tatɨm olak hn ye ahakõrlope erze kuche mɨhnũwo uje otata uje wɨr kuche uje kwestpa ochɨraha uje tãra Satanás per shish ahakõrlo uje titɨm olakni heke ye tɨrok olakpe par tokosɨm olak ɨbiyo yewo.
\v 25 Shish tyenɨj ahakõrlo erze uje yesh ahakõrlo nehech takaãcha nehe.
\v 26 Uje yeẽk shiyokõr shuu ɨtsorz nehech terɨhɨ uhurc ich tyenɨj serz hn tokosɨm ɨre ukurbo par tɨbey wɨr dihipo ich okɨhniya.
\p
\v 27 Wɨchɨ tyenɨj sepyẽr yeẽk uje shiyokõr mɨ̃hnɨk shɨ ɨtso uje shuu kobɨt chishak chɨ̃ra pyerɨt. Tokosɨm ɨre ukurbo shɨ ɨtso uje Papa ɨshɨm yok pukurbo.
\v 28 Tokosɨm ɨre kuchẽrk toy uje shɨ ɨtso porrzeebcha bahluta waa je tokolɨhɨ deeych huta.
\v 29 Ese uje tẽr uje Porrosht Ɨchɨbich tatɨm daabo uje otakɨsho lawichɨhɨ lekɨtiyo ich tyenɨj shiyokõr uje tata.”
\c 3
\s Porrosht aabo uje ode dɨt Sardis.
\p
\v 1 Atsew ebɨte hutɨta hn asɨm erze Porrosht aabo õr bahlut uje de asa iglesya uje de dɨt Sardis. Atɨm ɨre on: “Wɨchɨ ɨr ahwoso uje Porrosht Ɨchɨbich syete de ɨre hn porrzeebe syete de ɨre toy. Wɨchɨ tata ɨm: Tɨkɨraha uje ahakõrlo. Ebɨtlo uje olak ɨka per shɨ olak ɨtso topo.
\v 2 Olak shɨ olak ɨtso uje amɨlo. Erɨ̃hɨlo uhu olak ukurboshpo. Uhulo ɨkpo ese uje sehe toy. Tokomo erze uje ahakorɨ̃hɨlo Porrosht ɨle ɨkɨch ich ye ompe.
\v 3 Olak eyucha erze uje ẽntloni hn ahmũrlo. Moymlo erze mɨhnũwo uje yesh ahakõrlo hn eeshlopo ahakõrlo uje Porrosht sahmũr. Kɨmɨjɨ ye erɨ̃hɨlo ich tɨkɨrẽt shɨ yok ɨtso echɨkɨt heke ye erahalope waa orta uje takaashpo par tepyẽr olak.
\v 4 Oso sohmɨramo ode olak ehet wahacha dɨt Sardis uje ye oniyokõr mɨhnũwope. Wɨr shɨ ɨtso uje ye õr ɨshuwo waresh heke wɨr tyenɨj õya yok nehe hn õr ɨshuwo ich poro pork ye oniyokõr uje mɨhnũwope.
\v 5 Yeẽk uje iim erze mɨhnũwo ich serz. Wɨchɨ tyenɨj iyãha lasuwo uje poro, hn ye turhũ iichpe uje de asa hutɨta uje õr ɨkɨrĩt de uje yelɨj nɨhna ɨre. Tyenɨj titɨm Papa ɨr iich toy hn erze ɨr anjele.
\v 6 Ese uje tẽr uje Porrosht Ɨchɨbich tatɨm daabo uje otakɨsho lawichɨhɨ lekɨtiyo tyenɨj shiyokõr uje ɨre tata.”
\s Porrosht aabo uje ode dɨt Filadelfia.
\p
\v 7 Atsew asa hutɨta asɨm erze Porrosht aabo õr bahlut uje de asa iglesya uje de dɨt Filadelfia. Atɨm ɨre on: “Wɨchɨ ɨr ahwoso ese uje yelɨj niyokõr uje mɨ̃hnɨk. Wɨchɨ shɨ tata uje ich ũru, hn shɨ ɨtso uje tõhwa rey David ɨr yabe pork tyenɨj tɨbey israel oso õr hnɨmich nehe. Uje Cristo sɨtsẽr ese pwert uhurrza ich nĩhyok yeẽk pwele shiyeru hn uje shiyeru ich nĩhyok yeẽk pwele sɨtsẽr. Wɨchɨ tata ɨm:
\v 8 Nos tɨkɨraha uje ahakõrlo. Ẽrlo yok. Tokosɨm olak pahwoso par anɨmɨrãhalo shɨ ɨtso uje tɨtsẽr pwert uhurrza hn nĩhyok yeẽk uje pwele shiyeru. Tɨkɨraha uje yẽrɨj olak ukurbosh per shish ahakõrlo uje titɨm olak hn yelɨj atɨlɨlo erze uje ye odɨraha yokpe.
\v 9 Ẽrlo yok. Erze israel oso otata uje ochii ɨre Porrosht aaboho per shɨ oshiyokõr uje Satanás sahmũr. Wɨr shɨ otata lekushiĩ. Ẽrlo yok. Tuu otɨrẽt hn ocha dete hnɨmoho olak ɨkɨch otatɨm olak uje tahmũr olak.
\v 10 Shish olak ewenta erze kuche mɨhnũwo uje tɨ̃r olak ɨtso uje titɨm olakni heke shish tɨkɨbey olak uje terɨhɨ ɨshɨrĩt nehe uje kuche mɨhnũwo tɨ̃r ɨ̃rmo lekɨtiyo par chɨbɨte orhõta kɨmɨjɨ õr ɨluu om o kɨmɨjɨ ye ompe.
\v 11 Tyenɨj takaashpo shɨchish. Ye moymlo erze uje ich om uje yesh ahakõrlo par uje nĩhyok yeẽk shuu olak premyo pyerte nehe.
\v 12 Ese uje shish shiyokõr uje titɨm olakɨke ich serz. Tuu wɨchɨ dich shɨ ɨtso uhwɨrbe uje de Dii Porrosht ihyuch ehet. Yelɨj tokolɨhɨ Dii Porrosht ihyuch. Tichew Dii Porrosht ɨr iich tɨbɨte ɨr eeych hn tichew Dii Porrosht ɨr dɨt ɨr iich tɨbɨte ɨr eeych toy. Ese dɨt wɨchɨ Jerusalén ahle uje tãra poõrc uje Dii Porrosht de hn ihnɨmichɨhɨ hnɨmich nehe. Tichew piich uje ahle toy tɨbɨte ɨre eeych.
\v 13 Ese uje tẽr uje Porrosht Ɨchɨbich tatɨm daabo ich tyenɨj shiyokõr uje ɨre tata.”
\s Porrosht aabo uje ode dɨt Laodicea.
\p
\v 14 Atsew asa hutɨta hn asɨm erze Porrosht aabo õr bahlut uje de asa iglesya uje de dɨt Laodicea. Atɨm ɨre on: “Wɨchɨ ɨr ahwoso ese uje ich ũru pork shish tata uje ich ũru hn shuu yakaha uje tata. Wɨchɨ shiyokõr poõrc hn shiyokõr hnɨmich hn nos wɨr kuche uje Porrosht tata. Wɨchɨ tata ɨm:
\v 15 Nos tɨkɨraha uje ahakõrlo. Shɨ olak ɨtso kuche uje oso oho kɨmɨjɨ duhlu o kɨmɨjɨ kɨɨs per olak shɨ olak ɨtso awɨt uje otsehnyẽr. Ye olak duhlu hnii olak kɨɨs. Tahmũr uje olak kɨɨs o olak duhlu,
\v 16 per ye olak duhlupe hn ye olak kɨɨspe heke tɨteẽta tuu ɨtso uje tiyuhu olak tuu ãrlo pahwo.
\v 17 Athɨlo uje ich olak ɨhɨ̃r deyo hn nos olak ɨbiyo tokole om hn ye olak nesit latɨk. Ye erahalope uje nĩhyok kuche om uje tɨ̃r olak hn nos oso ochuuna uje olak losuhlaabo hn shɨ olak ɨtso olɨbo hn shɨ ɨtso uje amehelo eeyo.
\v 18 Heke takɨt olak par uje eylo erze oro uje de pahɨr uje tarɨ̃hɨ jwekɨta par tuu ware tokole par uje ye olak koswãha yok heke tuu olak ɨhɨ̃r deyo. Hn eylo olak ɨshuwoho pahɨr uje poro par anãhalo par uje ye apooklo uje oteychɨm olak pork olak ɨluu om, hn eylo olak ɨmɨshiyoho pahɨr par uje ormɨ̃hɨlo olak ɨle hn erahalo uje Porrosht sehe duhu erahalo.
\v 19 Yok tahɨrm erze uje tahmũr õr uje sehe oniyokõr uje ye tahmũrpe hn tepyẽr erze uje tahmũr õr uje oshiyokõr uje ye tahmũrpe heke enaha olak par ahakõrlo uje titɨm olak hn moymlo erze mɨhnũwo uje ahakõrlo.
\v 20 Ẽrlo yok. Yesh tiyehe pwert uhurrza hn tuu. Kɨmɨjɨ yeẽk nunt pahwoso hn dɨtsẽr asa pwert uhurrza ich yok tomsaha ehet hn oyaakɨhɨye ahɨr.
\v 21 Uje yeẽk serz ich tuu sakaha pahɨr shɨ ɨtso uje terzni hn tiyakaha Papa ahɨr.
\v 22 Ese uje tẽr uje Porrosht Ɨchɨbich tatɨm daabo ich tyenɨj shiyokõr uje ɨre tata.”—
\c 4
\s Ode uje oteeychãha Porrosht wahacha poõrc.
\p
\v 1 Uje nos tichew erze huteke hn takachɨm poõrc hn tokomo uje uhurrza sɨtsẽr ɨre. Tukuntpo ese uje ɨr ahwoso shɨ ɨtso uje yeẽk sobɨta trompeta. Tatɨm yok ɨm: —Ohɨr lɨka. Tokowa owa erze kuche uje tyenɨj tokole nehe.—
\v 2 Ɨchii Porrosht Ɨchɨbich hnoy yok seya yok poõrc. Tokomo rey ɨr ɨbɨta dechɨ poõrc hn yeẽk sakaha eeych.
\v 3 Ese uje sakaha debɨta eeych ich hũre wɨhɨ̃rt shɨ ɨtso kojach uje iich otsɨɨ jaspe hn shɨ ɨtso kojach yet uje iich otsɨɨ cornalina. Chekshorrza chɨpeẽsa ɨre. Asa chekshorrza ɨr kolort berte ɨtso kojach uje iich otsɨɨ esmeralda.
\v 4 Ese rey ɨbɨta wɨro tokomo õr ɨbe yer toy bentikwatro, hn erze uje otsakahachɨs wɨr õr bahluwo uje õr ɨbiyo iich otsɨɨ anciano. Õr ɨshuwo ich poro hn oyãha doolo uje oro ɨtso uje reye oyãha.
\v 5 Ese uje sakaha debɨta eeych ich wɨro hũre shɨ ɨtso yuwebo uje chihit hn ich ihyokõrak dich hn nar. Asa ɨbɨta ɨkɨch syete nampyon dechɨ uje hũre. Wɨr sɨteẽta Porrosht Ɨchɨbich uje syete.
\v 6 Asa ɨr ɨbɨta ɨkɨch kucherk de uje shɨ ɨtso lagunta per shɨ ɨtso pejta hn kojach uje iich otsɨɨ cristal. Ese ɨr ɨbɨta wɨro kuche ɨka de kwatro shɨ ɨtso loshɨpo. Ɨr ɨle de lekɨtiyo ɨr eeych. De ɨr ɨkɨch hn de ɨr nẽr.
\v 7 Nohmet de uje ɨtso ɨlpiyo, hn uu yet shɨ ɨtso wõjɨt itokohlt, hn uu yet ɨr ɨle ɨtso hnakɨrbich, hn uu yet shɨ ɨtso agilt uje iyo.
\v 8 Erze loshɨpo uje kwatro, kal nohmɨra ɨr ĩhyo seys, hn ɨr ɨle de lekɨtiyo ɨr eeych. Deeych hn dɨhlak shish otsɨɨ:
\p —Eyok Ɨrhĩch Porrosht uje ukurbo deyo de, wɨchɨ yelɨj niyokõr uje mɨ̃hnɨk, yelɨj niyokõr uje mɨ̃hnɨk, yelɨj niyokõr uje mɨ̃hnɨk. Wɨchɨ ɨchii dekite hn shish de hn shish de nehe.—
\p
\v 9 Erze kuche uje kwatro uje ɨtso loshɨpo uje ɨka wɨr shish shuu Porrosht ich dich uje sakaha debɨta eeych hn onɨna ɨre. Wɨchɨ shish ɨka.
\v 10 Uje erze kwatro shiyokõr shuu ɨtsorz hn erze uje õr bentikwatro uje õr ɨbiyo iich otsɨɨ anciano wɨr ocha dete hnɨmoho ɨr ɨkɨch hn oteeychãha ɨre hn ochɨbɨte doolo ɨr ɨkɨch uje oro hn otsɨɨ:
\p
\v 11 —Õryok Ɨrhĩch Porrosht, ich om uje nos oteeychãha owa hn otatɨm owa uje akɨrbo de pork owa uje nos ahakõr kuche uje de. Wɨr de shɨ pork ahmũr heke ahakõrkite.—
\c 5
\s Juan umo asa hutɨta hn ese Obejɨt.
\p
\v 1 Takachɨm hn tokomo Porrosht uje sakaha debɨta eeych ich tukumo uje hutɨta de hmata waãchta waa je ochɨpaãsho. Õr ahwoso de pɨt hn de pɨt yet hn oshuu belt otich chishew asa hutɨta owɨlo syete par oshuu chishye.
\v 2 Tokomo anjel toy uje ɨr ukurbo deyo de. Wɨchɨ chiilehet ich sɨhnew lahwoso ɨm: —¿Yeẽkpo uje ma dich par sehek asa hutɨta hn shuu kãra erze uje oshiyeru ochɨ̃ra?— Wɨchɨ uje anjel tata.
\v 3 Nĩhyok yeẽk uje de poõrc pwele sehek asa hutɨta hnii erze uje ode hnɨmich hnii erze uje ode hnɨmich uut. Nĩhyok uje yeẽk pwele teychɨm.
\v 4 Ich tɨkiyerh pork nĩhyok yeẽk uje ma dich par sɨtsẽr asa hutɨta hnii uje pwele teychɨm,
\v 5 per erze uje õr ɨbiyo iich otsɨɨ anciano yet tatɨm yok ɨm: —Ye eyerh. Hmeychɨm, ese uje ɨr alokot otsɨɨ ɨlpiyot wɨchɨ tãra uu ɨr porokkite Judas lɨshɨ hn tãra uu ɨr porokkite rey David lɨshɨ toy, ese uje ɨr alokot otsɨɨ ɨlpiyot wɨchɨ serz heke pwele sɨtsẽr asa hutɨta hn shuu asa belta otich kãra uje oshiyeru ochɨ̃ra syete.—
\p
\v 6 Tokomo Obejɨt uje de pɨsh Porrosht ɨbɨta ahɨr hn erze uje ɨtso loshɨpo uje kwatro uje ɨka meytii dukuhlehe asa ɨr ɨbɨta hn erze uje õr ɨbiyo otsɨɨ anciano ode pɨt. Ese Obejɨt shɨ iyehe wahacha. Uje takachɨm ɨre ich shɨ ɨtso uje yeẽk shuukite shuu toy par teeychãha Porrosht. Ɨr wãpe syete hn ɨr ɨle syete. Wɨr shɨ sɨteẽta Porrosht Ɨchɨbich uje syete uje Porrosht shuu tɨ̃r ɨ̃rmo lekɨtiyo.
\v 7 Ese Obejɨt hno chishew asa hutɨta waa je de Porrosht hmata waãchta uje sakaha debɨta eeych.
\v 8 Uje chishew asa hutɨtaka hn erze uje ɨtso loshɨpo uje kwatro uje ɨka hn erze anciano uje õr bentikwatro ocha dete hnɨmoho ese Obejɨt ɨkɨch. Nos wɨr õr ɨre õr arpa de hn õr prete de uje oro uje pohɨr ɨsho de ehet uje aat ehmuuj. Erze uje aat ehmuuj shɨ sɨteẽta Porrosht aabo õr ahwoso uje õr orar otsapur ɨre.
\v 9 Wɨr oteeychɨ otseẽt imno uje ahle otsɨɨ:
\p —Owa ich ma dich heke pwele boy asa hutɨta uje ochɨpaãsho hn etsẽr erze belt otich uje oshiyeru ochɨ̃ra shɨ pork oso oshuu owani hn armɨsta noshɨ par eshɨ oso õr hnɨtewɨhɨ Porrosht ahɨr. Erze oso nohmɨramo otãra nos wɨr dihipo õr hnɨmoho lekɨtiyo hn otãra nos owɨlo uje otseẽtɨhɨ ahwoso kɨnãho kɨnãho ɨ̃rmo lekɨtiyo.
\v 10 Owa nos uhu õr weeta nohmɨra hn uhu õr saserdote par eyok Ɨrhĩch Porrosht ɨr ɨbiyo. Tyenɨj uhu nos otɨbey oso ɨ̃rmo lekɨtiyo nehe.—
\p
\v 11 Esee hn tokomo hn tukunt erze anjele õr ahwoso. Wɨr ode erze anciano õr nẽr hn erze uje ɨtso loshɨpo uje kwatro uje chɨpeẽsa ese uje sakaha debɨta eeych. Erze anjele ich okɨhnipa, õr miyone y miyone.
\v 12 Ochiilehet ich otsɨhnew lahwoso otsɨɨ:
\p —Ese Obejɨt oso oshuuni par ɨshɨ õr hnɨtewɨhɨ Porrosht ahɨr heke ich om uje ɨr ukurbo de hn ich ɨrhĩch dich hn ich eykdeyo hn ukurbosh par shiyokõr kuche. Ich om uje oshuu ɨr dich hn onarim ɨre hn oteeychãha ɨre.—
\p
\v 13 Esee hn tukunt toy nos wɨr kuche uje Porrosht shiyokõrkite uje de poõrc hn uje de hnɨmich hn uje de hnɨmich uut hn uje de onoot bahluta hn nos wɨr kuche uje de ehet otata otsɨɨ:
\p —Ese uje sakaha debɨta eeych hn ese Obejɨt ich om uje nos oteeychãha õr hn oshuu õr deyo hn onarim õr hn otata uje wɨr õr ukurbo deyo de par uje nos oshiyokõr kuche. Ich om uje shish otata oshuu ɨtsorz.—
\p
\v 14 Erze uje ɨtso loshɨpo uje ɨka uje kwatro otsɨɨ: —Yehe wɨchɨ.— Hn erze anciano uje õr bentikwatro ocha dete hnɨmoho õr ɨkɨch ese uje dechɨ debɨta eeych hn ese Obejɨt hn oteeychãha õr.
\c 6
\s Belta otich syete de uje chishew hutɨta.
\p
\v 1 Esee hn takachɨm hn tokomo ese Obejɨt uje sɨtsẽr asa belta otich webich osht uje syete de uje oshuu chishew asa hutɨta hn tukunt wɨchɨ nohmet erze uje ɨtso loshɨpo uje kwatro uje ɨka chiilehet. Ich ochiilehet lahwoso shɨ ɨtso uje nar. Tata ɨm: —Erẽt.—
\v 2 Uje takachɨm hn tokomo kabehet uje poro. Ese uje iyãha tõhwa pohɨrpɨt par uje tatsɨkɨ̃r. Porrosht ɨshɨm wɨchɨ wolt shɨ ɨtso uje reye oyãha. Hno par uje tatsɨkɨ̃r hn par uje serz.
\p
\v 3 Uje ese Obejɨt sɨtsẽr asa belta otich uje de asa hutɨta iyehe ese webich osht nẽr hn tukunt erze uje ɨtso loshɨpo uje ɨka yetpo ɨm: —Erẽt.—
\v 4 Kabehet yet tokolpo uje wɨhɨ̃rt. Ese uje iyãha wɨchɨ kabehet Porrosht ɨshɨm ɨr ukurbo par uje ye duhu oso õr aho kɨɨsɨhɨyepe heke oshuuye oshuu otoy, hn ɨshɨm ɨre espada berzak.
\p
\v 5 Uje ese Obejɨt sɨtsẽr asa belta otich uje iyehe ese osiyer nẽr hn tukunt ese uje ɨtso loshɨpo yet uje ɨka tata ɨm: —Erẽt.— Takachɨm hn tokomo kabehet uje wɨs. Ese uje iyãha kabehet balansta de ɨr hmata.
\v 6 Erze uje ɨtso loshɨpo uje ɨka uje kwatro õr ehet tukunt ahwoso uje tata ɨm: —Un kilo erint ɨr bahat shɨ ɨtso uje yeẽk chish obiyo deeych nohmɨra hn tre kilo erint kɨnaha uje iich otsɨɨ cebada ɨr bahat shɨ ɨtso uje yeẽk chish obiyo deeych nohmɨra, per ye ahakõr mɨhnɨkɨ̃hɨ erze pohɨr uje iich otsɨɨ olivo uje aseyte tãra hn ye ahakõr mɨhnɨkɨ̃hɨ erze uva uje wino tãra.—
\p
\v 7 Uje ese Obejɨt sɨtsẽr asa belt otich uje iyehe ese tre nẽr hn tukunt ese uje ɨtso loshɨpɨt yet uje kwatro uje ɨka tata ɨm: —Erẽt.—
\v 8 Takachɨm hn tokomo kabehet uje kahɨr. Ese uje iyãha ɨr iich otsɨɨ topɨk, hn ese uje iyehe nẽr wɨchɨ uje topo õr ɨchɨbiyo de. Porrosht ɨshɨm wɨchɨ ukurbo uje iich otsɨɨ topɨk par uje shuu oso shuu otoy per tyenɨj sehek oso shuu õr wee kwatro hn shɨ pwele shuu ese weeta nohmata shuu õr chɨ̃ra õr espada hn shuu sewɨt sẽhi õr nehech otoy hn shuu õr permo nehech otoy hn shuu loshɨpo uje de ɨ̃rmo shuu õr shuu otoy.
\p
\v 9 Uje ese Obejɨt sɨtsẽr asa belt otich uje iyehe ese kwatro nẽr hn tokomo topo õr ɨchɨbiyo uje odechɨ altar uut. Oso oshuu õr oshuu otoy shɨ pork otsanɨmɨrãha Porrosht ahwoso hn pork otatɨm õr uje shɨ ye olotiis Cristo heke omasaha par Porrosht aabo.
\v 10 Erze õr ɨchɨbiyo okeytkẽr Porrosht ich otsɨhnew lahwoso otsɨɨ: —Ɨrhĩche, owa ich ma dich je nos wɨr kuche uje ahakõr. Yelɨj ahakõr uje mɨhnũwo hn shish ata uje ich ũru. ¿Latɨk nehe hn eychɨm erze ɨ̃rmo oso uje oshuu õryok oshuu oyɨtɨ hn eyuhu õryok bahat?—
\v 11 Esee hn ɨshɨm õr ɨshuwo uje ich poro hn tatɨm õr ɨm: —Hap anemlo pɨkaap nehech oso oshuu Porrosht aabo yewo oshuu otoy uje oshiyokõr ɨr ɨbiyo.— Porrosht tatɨm õr ɨm: —Wɨr olak deshɨbo uje oso tyenɨj oshuu õr oshuu otoy shɨ ɨtso uje oshiyokorɨ̃hɨ olak.—
\p
\v 12 Esee hn takachɨm ese Obejɨt uje sɨtsẽr asa belta otich uje iyehe ese sinko nẽr. Takachɨm hn tokomo hnɨmich uje telerrzpa. Ese deeych ich ye dihitpe, shɨ wɨs ɨtso õr ɨshuwo uje wɨso, hn ese shekurko ich wɨhɨ̃rtpa shɨ ɨtso dɨkɨrmɨsta.
\v 13 Porrzeebe tãra poõrc kayɨhɨ hnɨmich. Wɨr shɨ ɨtso pohɨr ee uje myent tɨbichu hn chishɨt hn shuu ɨr ee kay.
\v 14 Ese poõrc ich shɨ ɨtso hute uje ochɨpaãsho nehech nĩhyok poõrc. Nos wɨr kojano sɨhnok laleryo, hn erze hnɨmo uje awɨt chɨpeẽsa nos sɨhnok laleryo toy.
\v 15 Nos wɨr reye uje ode nãhu ɨ̃rmo lekɨtiyo otsakɨs ɨrehe erze kojano ɨle. Erze uje õr wɨmshɨro õya õr hn erze ohyerptoso õr bahluwo õya õr toy hn nos wɨr ɨhɨ̃r deyo õya õr toy hn erze uje õr ukurbo deyo hn uje õr yɨlo hn erze uje ye õr yɨlope õya õr toy.
\v 16 Otatɨm erze kojano par kayɨhɨ õr pork sehe oduhu lajuwe õr ɨre par uje sakɨs õr ɨre pork otola otɨ̃r Porrosht ɨle ɨkɨch uje sakaha debɨta eeych hn ese Obejɨt pork Porrosht hn ese Obejɨt wɨr ich ochowãha pɨsh õr.
\v 17 Ich terɨhɨ ɨshɨrĩt uje Porrosht sepyẽr õr hn nĩhyok yeẽk pwele ewenta.
\c 7
\s Ochɨbɨte ɨr seylta erze israel oso õr une.
\p
\v 1 Esee hn takachɨm hn tokomo anjele uje õr kwatro uje oyehe myentɨ wãrno uje kwatro par uje otsontew erze myentɨ par uje ye tɨbichu ele hnɨmich hnii uje tɨbichu onoota bahluta hnii uje tɨbichu pohɨr.
\v 2 Tokomo anjel yet uje tãra deeych warĩch. Wɨchɨ tõhwa Porrosht seylta. Porrosht wɨchɨ ɨka. Ese anjel tɨbich ich sɨhnew tatɨm erze anjele yewo uje õr kwatro uje Porrosht ɨshɨm õr ukurbo par oshiyokõr mɨhnɨkɨ̃hɨ nãhu ɨ̃rmo hn onoota bahluta.
\v 3 Tatɨm õr ɨm: —Ye ahakõrlo mɨhnɨkɨ̃hɨ ele hnɨmich hnii onoota bahluta hnii erze pohɨr nehech oyɨbɨte Porrosht ɨr seylta õr une erze Porrosht aabo pork wɨr ɨr ɨbiyo.—
\v 4 Tukunt uje ochɨbɨte wɨr õr yar erze uje õr syento kwarenta y kwatro mil oso uje õr israel oso.
\p
\v 5 Erze uje otãra ɨr porokkite Judá wɨr õr dose mil. Erze uje otãra ɨr porokkite Rubén wɨr õr dose mil. Erze uje otãra ɨr porokkite Gad wɨr õr dose mil.
\v 6 Erze uje otãra ɨr porokkite Aser wɨr õr dose mil. Erze uje otãra ɨr porokkite Neftalí wɨr õr dose mil. Erze uje otãra ɨr porokkite Manasés wɨr õr dose mil.
\v 7 Erze uje otãra ɨr porokkite Simeón wɨr õr dose mil. Erze uje otãra ɨr porokkite Leví wɨr õr dose mil. Erze uje otãra ɨr porokkite Isacar wɨr õr dose mil.
\v 8 Erze uje otãra ɨr porokkite Zabulón wɨr õr dose mil. Erze uje otãra ɨr porokkite José wɨr õr dose mil. Erze uje otãra ɨr porokkite Benjamín wɨr õr dose mil.
\s Oso oyehe Porrosht ɨle ɨkɨch nehe.
\p
\v 9 Esee hn takachɨm hn tokomo oso ich okɨhnipa. Nĩhyok uje yeẽk pwele tɨskẽr õr. Nos otãra uu dihipo õr hnɨmoho lekɨtiyo hn otãra erze owɨlo uje otseẽt ahwoso kɨnãho kɨnãho ɨ̃rmo lekɨtiyo. Wɨr oyehetɨhɨ Porrosht ɨle ɨkɨch hn ese Obejɨt. Wɨr oyãha lasuwo poro hn nos otõhwa hɨ̃r ĩhyo.
\v 10 Nos wɨr õr ɨre otɨbich ich otsɨhnew otsɨɨ:
\p —Porrosht uje sakaha debɨta eeych hn ese Obejɨt wɨr uje otsosɨr õryok hn oshɨm õryok ese ɨkɨrĩt uje yelɨj nɨhna ɨre.—
\p
\v 11 Nos wɨr anjele oyehe ochɨpeẽsa Porrosht uje sakaha debɨta eeych hn erze anciano hn erze uje ɨtso loshɨpo uje ɨka hn erze anjele ocha dete hnɨmo nehech õr une terɨhɨ hnɨmich hn oteeychãha Porrosht
\v 12 otsɨɨ:
\p —Yehe wɨchɨ, sehe oyuhu nos oso shish oteeychãha Porrosht hn onarim ɨre. Wɨchɨ ich eykdeyo hn nos tyenɨj onɨna ɨre hn oduhu ɨre dich. Wɨchɨ ich ukurbo deyo de hn ukurbo de par shiyokõr kuche. Sehe oyuhu nos shish otata oduhu ɨlorz. Ich oyahmũr uje ɨtsorz.— Wɨr uje anjele otata.
\p
\v 13 Esee hn erze anciano õr yet tatɨm yok ɨm: —¿Yeniipo erze uje oyãha lasuwo poro hn otãra ɨraãpo?—
\v 14 Titɨm ɨre too: —Ɨrhĩche, owa eraha.— Ese anciano tatɨm yok ɨm: —Wɨr uje otokolɨhɨ erze mɨhnũwo pisho uje tɨ̃r nãhu ɨ̃rmo. Wɨr uje ye olotiis ese Obejɨt heke ich õr ɨshuwo poro pork wɨchɨ ɨr armɨsta ɨshɨ õr hnɨtewkite hn churhũ õr aho.
\v 15 Heke ode Porrosht ɨle ɨkɨch uje sakaha debɨta eeych. Deeych hn dɨhlak shish oshiyokõr Porrosht ɨbiyoho templo ehet. Porrosht uje sakaha debɨta eeych wɨchɨ uje shuu odebuhu dahɨr.
\v 16 Ich ye sewɨt nẽhi õrpe hn ye õr iilo nẽhi õrpe hn ye deeych tew õrpe hn ye onuunape uje duhlu
\v 17 pork ese Obejɨt uje de Porrosht ɨbɨta ɨkɨch wɨchɨ uje tɨbey õr shɨ ɨtso uje tɨbey obejɨ. Wɨchɨ tyenɨj hnoy õr seya õr awɨt par uje oho. Ese awɨt wɨchɨ uje ɨshɨm õr ɨkɨrĩt uje yelɨj nɨhna ɨre hn Porrosht nos churhũ õr ɨlote shuu kako.— Wɨr uje ese anciano tatɨm yok.
\c 8
\s Ese Obejɨt sɨtsẽr asa belta otich uhurzosht.
\p
\v 1 Uje ese Obejɨt sɨtsẽr asa belta otich uje iyehe ese seys nẽr hn oshuu ɨ̃rmo etich wahacha poõrc nehech terɨhɨ media ora.
\v 2 Uje iyuwe media ora hn tokomo anjele uje õr syete oyehetɨhɨ Porrosht ɨle ɨkɨch. Otõhwa trompetɨ syete hn oshɨm erze anjele trompeta kal õr nohmɨr nohmɨr.
\s Anjel tõhwa kobɨt par sẽru kuche.
\p
\v 3 Esee hn tokomo anjel yet taãcha hn iyehetɨhɨ ese altar ɨkɨch. Tõhwa kucherk uje ɨtso kobɨt par otserũhu kuche ehet uje aat ehmuuj. Ese kobɨt pur oro. Nos wɨr erze Porrosht aabo õr ahwoso uje õr orar otsapur Porrosht de wahacha ese altar eeych uje oro uje de Porrosht ɨkɨch. Yeẽk ɨshɨm ese anjel erze kuche uje aat ehmuuj ich kɨhniya hn shuu ĩya erze Porrosht aabo õr ahwoso uje de altar eeych par uje sẽru.
\v 4 Ese anjel sẽru ese uje aat ehmuuj hn ɨr iibich tɨ̃r poõrc Porrosht ɨle ɨkɨch hn erze Porrosht aabo õr ahwoso uje õr orar otsapur ɨre ĩya ese iibich.
\v 5 Ese anjel chishew pichure uje dechɨ altar eeych hn chɨmchaha ese kobɨt ehet uje oro nehech yeno hn tãra chɨbɨte ele hnɨmich. Ɨchii nar, ihyokõrak dich hn õr ahwoso tãra hn ich hũre ɨtso yuwebo hn hnɨmich telerrza.
\s Erze anjele otsobɨta ɨr trompetɨ.
\p
\v 6 Esee hn erze anjele uje õr syete ochɨmɨt ɨre par otsobɨta erze trompetɨ.
\p
\v 7 Ese anjel webich osht sobɨta ɨr trompeta hn kojano tãra poõrc kayɨhɨ hnɨmich. Jwekɨta ĩya hn dɨkɨrmɨsta ĩya toy. Kɨmɨjɨ hnɨmo po tre chɨhɨ ich wɨchɨ sẽru nohmet hn kɨmɨjɨ pohɨr chɨhɨ wee tre ich sẽru weeta nohmata hn nos sẽru erze ɨhnemyo uje berte.
\p
\v 8 Esee hn anjel yet uje iyehe ese webich osht nẽr sobɨta ɨr trompeta. Otãra kuchẽrk shɨ ɨtso kojach uje dich uje duhlu hn ɨr yokacha data. Ochɨbɨte onoota bahluta ehet.
\v 9 Kɨmɨjɨ onoota bahluta po tre ich shuu pɨt nohmet chisãha ɨre dɨkɨrmɨsta hn nos wɨr kuche uje de onoota bahluta kɨmɨjɨ wee tre ich shuu weeta nohmata toy. Kɨmɨjɨ nos wɨr pohɨr uje chɨkãha onoota bahluta wee tre ich sɨhna asa weeta nohmata.
\p
\v 10 Esee hn ese anjel yet uje iyehe erze osiyer nẽr sobɨta ɨr trompeta hn porrzeebcha bahluta tãra poõrc kayɨhɨ hnɨmich. Wate ɨtso jwekɨta waa je ich data. Kɨmɨjɨ nos wɨr onoo hn nos owɨlo uje awɨt tãra hnɨmich uut wee tre chɨhɨ ich kayɨhɨ asa weeta nohmata eeych.
\v 11 Asa porrzeebcha ɨr iich otsɨɨ chiyok pork ich pur menent. Wate shuu ese awɨt chiyok heke shuu oso shuu otoy ich okɨhniya pork ich shuu chiyokpa hn pur menent.
\p
\v 12 Esee hn ese anjel yet uje iyehe ese tre nẽr sobɨta ɨr trompeta. Kuchẽrk sentii deeych par uje ye dihitpe nehech kwatro ora, hn shekurko ɨtspo ye dihitpe nehech kwatro ora, hn erze porrzeebe ɨtspo ye dihitpe nehech kwatro ora. Uje deeych ich ese deeych ye dihitpe nehech kwatro ora hn uje dɨhlak shekurko hn porrzeebe ye dihitpe nehech kwatro ora.
\v 13 Esee hn takachɨm. Tukunt akilt uje shɨ iyohochɨs poõrc pehet hn tɨbich ich sɨhnew ɨm: —Ich yarhak par oso, ich yarhak par oso, ich yarhak par erze oso uje ode hnɨmich nehe uje erze anjele õr tre otsobɨta erze ɨr trompetɨ. Ochɨmɨt ɨre par otsobɨta.—
\c 9
\p
\v 1 Esee hn anjel yet uje iyehe erze kwatro nẽr sobɨta ɨr trompeta hn tokomo porrzeebcha tãra poõrc kayɨhɨ hnɨmich. Asa porrzeebcha wɨchɨ anjel uje Porrosht ɨshɨm asa yabe par uje sɨtsẽr ese jotsɨt ebich uje ye uhurtɨkɨsh.
\v 2 Uje sɨtsẽr ese jotsɨt ebich hn iibich tokole shɨ ɨtso kipuut dich uje iibich tokole. Ese kiibich sentii deeych hn chũr lekɨtiyo.
\v 3 Eru tãra ese kiibich hn chũr lekɨtiyoho hnɨmich. Porrosht ɨshɨm par uje chichew oso shɨ ɨtso shekshor.
\v 4 Porrosht sahɨrm erze eru par uje ye tew ɨhnemyo hn pohɨr ĩhyo hn kuche yewo uje berte. Shɨ ɨshɨm par uje ches erze oso uje ye Porrosht seylta chɨhɨ õr unepe.
\v 5 Ye dosɨm erze erupe par uje shuu oso shuu otoy, shɨ shuu õr dospa shɨ ɨtso uje shekshor ches õr. Sinko mese uje wɨr tyenɨj ches õr
\v 6 heke erze oso ich sehe otoy per ye otope.
\p
\v 7 Erze eru shɨ ɨtso kabyuhwo uje onɨshii par otatskɨ̃r hn kuche de ɨr hu eeyo shɨ ɨtso õr wolo uje reye oyãha uje oro. Ɨr ɨle shɨ ɨtso oso
\v 8 hn ɨr akɨ̃rt shɨ ɨtso tɨmcher õr akɨ̃rt hn ɨr potẽre shɨ ɨtso ɨlpiyo.
\v 9 Hn ɨr yũhurrza etan shɨ ɨtso pyero hn ɨr ĩhyo ich ihyokõrak dich shɨ ɨtso kabyuhwo uje churz jarleshɨ hn uushɨ par uje tatsɨkɨ̃r.
\v 10 Erze eru ɨr kole shɨ ɨtso shekshor hn wasosh. Ɨr woso de ɨr kole par uje chichew oso hn shuu õr doso nehech terɨhɨ sinko mese.
\v 11 Erze eru ɨr bahlut wɨchɨ anjel uje tɨbey ese jotsɨt uje ye uhurtɨkɨsh. Ese anjel ɨr iich otsɨɨ Abadón. Abadón wɨchɨ hebreo õr ahwos hn ɨr iich yet otsɨɨ Apolión uje griego õr ahwos.
\p
\v 12 Ich yuwɨrke ese dosɨ̃ryo webich osht uje ese akilt tata per yehe osiyer de.
\p
\v 13 Esee hn anjel uje iyehe ese sinko nẽr sobɨta ɨr trompeta ɨchii tukunt õr ahwoso uje tãra ese altar uje oro uje ɨr wãpe kwatro. Ese altar dechɨ Porrosht ɨle ɨkɨch.
\v 14 Erze õr ahwoso uje tãra ese altar tatɨm ese anjel uje iyehe ese sinko õr nẽr uje ɨr trompeta de, erze õr ahwoso tatɨm ɨre ɨm: —Eyuhu erze anjele yewo uje õr kwatro uje ode asa onoota data waa je iich otsɨɨ Eufrates.—
\v 15 Esee hn ochiyuhu erze anjele õr kwatro. Wɨr shɨ odechɨ oyeem orta, deeych, shekurko hn ãyt uje Porrosht chɨbɨtkite par oshuu oso oshuu otoy. Kɨmɨjɨ oso õr wee chɨhɨ tre ich wɨr oshuu õr weeta nohmata.
\v 16 Esee hn tukunt uje otata erze ohyerptoso uje oyãha kabyuhwo õr dos syento miyones.
\v 17 Porrosht chowa yok erze kabyuhwo hn erze uje oyãha. Kuche sentii õr ɨrojõr uje ɨr kolor shɨ ɨtso jwekɨta hn ɨr kolor asul ɨtso ese kojach uje iich otsɨɨ jacinto hn ɨr kolor kahɨr ɨtso asufre. Erze kabyuhwo ɨr hu shɨ ɨtso ɨlpiyo. Jwekɨ tokolɨhɨ erze kabyuhwo ɨr ahwo hn kiibo hn asufre.
\v 18 Erze jwekɨ hn erze kiibo hn asufre uje tokolɨhɨ erze kabyuhwo ahwo wɨr uje shuu erze oso shuu otoy õr weeta nohmata hn iimɨhɨ wee otiyer.
\v 19 Erze kabyuhwo ɨr ukurbo tãra ahwo hn tãra kole. Ɨr kole shɨ ɨtso echɨ̃re hn ɨr hu de ɨr kole toy hn shuu oso chɨ̃ra ɨr kole shuu doso.
\v 20 Erze oso yewo uje ye erze ohyerptoso oduhu õrpe oduhu otoy ye onoympe erze kuche mɨhnũwo uje õr ɨre oshiyokõr, hn ye onoympe uje oteeychãha erze demonyo, hn ye onoympe uje oteeychãha kojano po uje oshiyokõr ochɨ̃ra oro, plata, bronse, kojano hn tabla. Erze kojano po ye nomo latɨk, hn ye nuunt latɨk, hn ye dɨrkpe.
\v 21 Erze oso ye onoympe uje oshuuye oshuu otoy, hn ye onoympe uje ochii ɨr merikoho hn ochii ɨr konsahoho, hn ye onoympe uje oshiyokõr erze kuche mɨhnũwo uje tɨmcher hn hnakɨrbo oshiyokorɨ̃hɨye uje ye onõyhi pɨshye ahɨrpe, hn ye onoympe uje otohɨr.
\c 10
\s Hutɨta de anjel ɨr hmata.
\p
\v 1 Esee hn tokomo anjel yet uje ukurbo deyo de uje tãra poõrc yesh dal hnɨmich. Ukuhurrza chɨpeẽsa ɨre hn shekshorrza de ɨr huta eeych. Ɨr ɨle ich hũre shɨ ɨtso deeych uje chihit hn ɨr hnɨte ich shɨ ɨtso uhwɨrbe per shɨ yokacha data.
\v 2 Ɨr hmata hutɨta de ochɨpaãsho arpich ijaap. Asa hutɨta ich ye odihyerupe. Shɨ ɨsãha. Uje ihnɨmich ich chɨbɨte derza waãchta onoota bahluta hn ɨr hnɨtɨta waachjãrrza chɨbɨte hnɨmich.
\v 3 Tɨbich sɨhnew shɨ ɨtso ɨlpiyo uje yerh. Uje tɨbich ɨtsorz ich nar nehech syete bese.
\v 4 Ich sehe tichew uje tukunt uje tata per ahwoso tãra poõrc tatɨm yok ɨm: —Ye atha erze uje nar syete tataka hn ye atsew ebɨte hutɨta.—
\v 5 Ese anjel uje tokomo uje iyehetɨhɨ wahachaka onoota bahluta eeych hn hnɨmich eeych wɨchɨ seem nahmɨta waãchta.
\v 6 Hn ese anjel tata Porrosht iich uje yelɨj nɨhna ɨre par uje shuu ɨmeheeych uje ɨr ahwoso uje tyenɨj tata ich ũru. Porrosht wɨchɨ uje shiyokõr poõrzkite hn nos wɨr kuche uje de ehet hn shiyokõr hnɨmich hn nos wɨr kuche uje de ehet hn shiyokõr onoota bahluta hn nos wɨr kuche uje de ehet. Ese anjel tata ɨm: —Porrosht ye seem osope.
\v 7 Uje ese anjel yet uje iyehe erze anjele yewo õr nẽr uje õr seys, uje wɨchɨ sobɨta ɨr trompeta ich tyenɨj yakaha uje Porrosht tatɨm uu debiyo profeta poruwo wɨshkite.—
\v 8 Esee hn erze õr ahwoso uje tukuntɨke uje tãra poõrc tatɨm yokpo ɨm: —Bey asa hutɨta uje de ese anjel ɨr hmata uje ɨr hnɨtɨta de onoota bahluta eeych hn ɨr hnɨtɨta yata de hnɨmich eeych. Asa hutɨta ich ɨsãha.—
\v 9 Takaha hn tapur ese anjel too: —Asɨm yok asa hutɨta ijaabta.— Ɨshɨm yok hn tatɨm yok ɨm: —Boy hn ew. Uje ew ich tete shɨ ɨtso reyne per owa ehet tyenɨj chiyokpa.—
\v 10 Uje tishew asa hutɨta ijaabta waa je de anjel hmata hn taw ich tete ɨtso reyne per shuu pehet ich chiyokpa.
\v 11 Tatɨm yok ɨm: —Nos tyenɨj atɨmpo wɨr oso uje tyenɨj tɨ̃r õr nehe. Tyenɨj atɨmpo wɨr dihipo kɨnãho hn erze uje otseẽt ahwoso kɨnãho kɨnãho ɨ̃rmo lekɨtiyo hn tyenɨj atɨmpo nos wɨr õr bahluwo.—
\c 11
\s Hnakɨrbo õr osiyer otatɨm oso Porrosht ahwoso.
\p
\v 1 Esee hn ɨshɨm yok phich uje shɨ ɨtso õr ɨtɨlta hn tatɨm yok ɨm: —Eteẽta Porrosht ɨr templo hn eteẽta ese altar hn eskẽr erze uje odechɨ uje oteeychãha Porrosht
\v 2 per ye eteẽta ese patikɨt uje chɨpeẽsa templo pork Porrosht ɨshɨm ese patikɨt erze dihipo kɨnãho. Wɨr tyenɨj odechɨ ese dɨt nehech shekurko kwarentidos hn oshiyokõr mɨhnuwõho wahacha. Wɨchɨ dɨt uje Porrosht chiihlakite.—
\v 3 Porrosht ɨm: —Tuu pɨbiyo õr osiyer otatɨm erze oso õr pahwoso par laalo mil dos syento sesenta. Wɨr õr ɨshuwo uje oyãha shɨ ɨtso ponchuko.—
\v 4 Erze Porrosht ɨbiyo uje õr osiyer shɨ õr ɨtso erze pohɨr olivo uje otiyer hn shɨ õr ɨtso nampyon uje osiyer uje dechɨ eyok Ɨrhĩch ɨkɨch. Wɨchɨ uu ɨ̃rmo oso õr bahlut pisht.
\v 5 Uje yeẽk sehe niyokõr mɨhnɨkɨ̃hɨ erze profeta ich jwekɨta tãra erze profeta õr ahwo hn otsẽru wɨchɨ oshuu duhlu. Uje yeẽk sehe niyokõr mɨhnɨkɨ̃hɨ õr ich tyenɨj toy ɨtsorz.
\v 6 Erze Porrosht ɨbiyo uje õr osiyer õr ukurbo de par uje ye oduhu ɨbɨkpe par nos wɨr daalo uje otsanɨmɨrãha Porrosht ahwoso. Õr ukurbo depo par ochisãha awɨt dɨkɨrmɨsta. Õr ukurbo depo par oshuu erze kuche mɨhnũwo kɨnãho kɨnãho tɨ̃r nãhu ɨ̃rmo shɨ uje otsahmũr oshiyokõr.
\v 7 Uje erze profeta ochɨmɨt otsanɨmɨrãha Porrosht ahwoso hn ese uje ɨtso loshɨpɨt uje tokolɨhɨ jotsɨt uje ye uhurtɨkɨsh hõr erze profeta oteye hn wɨchɨ serz õr shuu õr shuu otoy.
\v 8 Iim orɨ̃hɨchɨs dehet uje de dɨt ehet. Ese dɨt ich dich. Otsɨteẽta ese dɨt oso õr ɨluu shɨ ɨtso Sodoma hn Egipto oso õr ɨluu. Ese dɨt wɨchɨ Jerusalén. Wɨchɨ owich uje ochowɨshɨhɨ erze profeta õr Ɨrhĩchkite ochɨbɨte krus eeych.
\v 9 Nos wɨr dihipo uje ode ɨ̃rmo lekɨtiyo hn erze uje otseẽt lahwoso kɨnãho kɨnãho shish oteychɨm erze topo uje õr osiyer nehech terɨhɨ daalo tre hn pehet iya. Ye odosɨm õrpe par uje ochihitsɨm õr.
\v 10 Nos wɨr oso uje odebuhu ɨ̃rmo lekɨtiyo ich õr aylpa uje erze profeta otoy. Wɨr ich õr aylpa nehech oshɨmɨhɨye kuche pork erze profeta uje õr osiyer shish oshiyokos õr.
\v 11 Per uje terɨhɨ daalo tre hn pehet ĩya Porrosht shuu õr ɨkpo hn oyehet. Nos wɨr uje oteychɨm õr uje õr ɨkpo hn oyehet ich otolpa sehek õr ebe.
\v 12 Ochunt ahwoso uje tãra poõrc ich sɨhnew tatɨm erze profeta ɨm: —Ohɨr lɨklo.— Erze uje otsɨtak õr oteychɨm õr uje odohɨr otɨ̃r poõrc hn omasaha ukuhurrza ehet.
\v 13 Ɨchii hnɨmich telerrzpa. Kɨmɨjɨ ese dɨt chɨhɨ po dye ich sohmet kay uje hnɨmich telerrza. Shuu oso otoy õr syete mil, hn erze oso yewo uje ye otope ich otolpa heke oshuu Porrosht ich dich uje de poõrc.
\v 14 Yuwɨrke erze dosɨ̃ryo uje iyehe ese webich osht nẽr uje akilt tata hn erze kuche mɨhnũwo yewo iyehe erze yewo nẽr shɨchish.
\s Ese anjel uje iyehe erze seys nẽr sobɨta ɨr trompeta.
\p
\v 15 Esee hn anjel yet uje iyehe erze seys õr nẽr sobɨta ɨr trompeta, hn ochunt ahwoso wahacha poõrc ich sɨhnew tata ɨm: —Erze õr bahluwo uje otɨbey ɨ̃rmo lekɨtiyo wɨr tyenɨj otokole hn eyok Ɨrhĩch hn ɨr Ijɨt Cristo omasaha õr owich par õr bahluwoho nãhu ɨ̃rmo. Porrosht tyenɨj shish tɨbey oso nehe.—
\p
\v 16 Erze uje õr bentikwatro uje õr ɨbiyo iich otsɨɨ anciano wɨr otsakaha debe Porrosht ɨle ɨkɨch. Ochiyuwa dele hnɨmich nehech õr une terɨhɨ hnɨmich hn oteeychãha Porrosht.
\v 17 Otata otsɨɨ: —Ɨrhĩche Porrosht, akɨrbo deyo de. Oyɨnshɨp owa. Shish owa dekite nehech ele ahle shish owa de, hn oyɨnshɨp owa uje amsaha par abey oso ẽra akɨrbo.
\v 18 Erze dihipo kɨnãho ich otsɨtak pɨshɨ owa per ele ahle ich etak õr. Terɨhɨ ɨshɨrĩt par epiyer erze topo hn asɨm premyo erze ebiyo profeta poruwo wɨshɨ hn erze aabo yewo hn erze uje otola owa. Erze premyo de par nos wɨr õr ɨre kɨmɨjɨ õr ijaabo o kɨmɨjɨ õr deyo. Terɨhɨ ɨshɨrĩt par ehna erze oso uje oshiyokõr mɨhnɨkɨ̃hɨ nãhu ɨ̃rmo.—
\v 19 Esee hn otsɨtsẽr asa Porrosht ɨr templo waa je de poõrc. Asa templo ehet omo kejunt uje Porrosht ahwoso de ehet hn omo hnɨmich toy uje hũre ɨtso yuwebo, hn ihyokõrak dich, hn nar, hn hnɨmich telerrza, hn yuwebo kojano kayɨhɨ hnɨmich uje ich deyo.
\c 12
\s Israel oso õr ɨtso tɨmcharrza hn Satanás ɨtso loshɨpɨt.
\p
\v 1 Esee hn tokomo yarta data uje de poõrc. Tokomo tɨmcharrza. Ɨr ɨshuwo shɨ ɨtso deeych uje chihit hn iyehe shekurko eeych. Iyãha dolt uje porrzeebe de dose. Ɨr wolt shɨ ɨtso uje reye oyãha.
\v 2 Asa tɨmcharrza hmɨker. Wate tɨbich pork chuuna uje ɨr ijɨt tabɨta hn doso par shũrha.
\v 3 Tokomo kuchɨt yet wahacha poõrc ɨtso loshɨpɨt uje ich dich hn wɨhɨ̃rt. Ɨr hu syete hn ɨr wãpe dye hn ɨr wolo syete. Nohmɨr nohmɨr de kal hu eeyo. Ɨr wolo ɨtso uje reye oyãha.
\v 4 Kɨmɨjɨ porrzeebe wee chɨhɨ tre ich ese uje ɨtso loshɨpɨt chɨ̃ra ɨr kolta shuu weeta nohmata kayɨhɨ hnɨmich. Wɨchɨ de asa tɨmcharrza ɨkɨch waa je sehe ɨr ijɨt shũrha pork uje ɨr ijɨt shũrha ich sehe tew.
\v 5 Asa tɨmcharrza ɨr ijɨt shũrha ɨteẽtak. Yeẽk hnoy shɨchish ese ɨr ijɨt seya Porrosht hn ɨr ɨbɨta. Wɨchɨ uje tyenɨj nos tɨbey nãhu ɨ̃rmo oso nehe hn tyenɨj sepyẽr õr chɨ̃ra õr pyerɨt uje shɨ ɨtso pohɨrkɨta.
\v 6 Asa tɨmcharrza hno yuhwo tɨ̃r wahacha owich uje ɨsa uje Porrosht nɨshii par ɨre. Wɨchɨ tyenɨj ɨshɨm ɨr poso par erze daalo mil dos syentos sesenta.
\p
\v 7 Esee hn ɨchii oteyehe wahacha poõrc. Miguel hõr ɨr anjele hn ese uje ɨtso loshɨpɨt hõr ɨr anjele oteye,
\v 8 per ye õr pwele oderz Miguelpe, heke ich nĩhyok õr owich wahacha poõrc
\v 9 hn otãra ese uje ɨtso loshɨpɨt. Wɨchɨ uu echeẽt uje ɨchii dekite uje iiyo yewo otsɨɨ dyablo hn Satanás. Wɨchɨ uje nos sehnyẽr erze oso uje ode ɨ̃rmo lekɨtiyo. Otãra ɨre ochɨbɨte hnɨmich hn otãra erze ɨr anjele ochɨbɨte õr hnɨmich toy õya Satanás.
\v 10 Esee hn tukunt õr ahwoso wahacha poõrc ich sɨhnew tata ɨm:
\p —Ele ahle ich terɨhɨ uje Porrosht serz chɨ̃ra lakɨrbo hn eyok Deych Porrosht tɨbey eyok. Ele ahle hn Cristo ɨr ukurbo de pork otãra Satanás uje deeych hn dɨhlak shish denunsya eyok leshɨbo wahacha Porrosht ɨle ɨkɨch. Wɨchɨ otãra ochɨbɨte hnɨmich.
\v 11 Porrosht aabo otserz Satanás shɨ pork ese Obejɨt ɨr armɨsta ɨshɨ õr hnɨtewɨhɨ Porrosht ahɨrkite hn pork otatɨm erze uje ye õr Porrosht aabope uje wɨchɨ shiyokõr par õr ɨre. Ye otolpe par otoy pork ye olotiis Cristope.—
\s Israel oso oyuhwo.
\p
\v 12 Esee hn shish õr ahwoso tãra poõrc tata ɨm: —Olak tyenɨj olak ayla uje olak de poõrc hn olak uje ebuhulo poõrc, per ich yarhakpa par olak uje olak de hnɨmich hn ode onoota bahluta pork dyablo ihnɨmich hn tɨ̃r olak. Ich ches pɨsh delo pork chɨraha uje ich yej terɨhɨ ɨshɨrĩt par tɨ̃r urhuta bahluta ehet nehe.—
\v 13 Ese uje ɨtso loshɨpɨt chuuna uje otãra ochɨbɨte hnɨmich heke hno chukwi asa tɨmcharrza waa je ɨr ijɨt shurhãni ɨteẽtak.
\v 14 Porrosht shiyokõr shɨ ɨtso uje ɨshɨm asa tɨmcharrza akilt ĩhyo uje ich dich par uje yuhwo hno tɨ̃r ese owich uje ɨsa par ese uje ɨtso echeẽt ye dishew ɨrpe. Porrosht tyenɨj ɨshɨm wate ɨr poso par tre ãyo hn pehet ĩya.
\v 15 Ese uje ɨtso echeẽt shuu awɨt tokolɨhɨ lahwo ɨtso onoota pork sehe duhu lajuwe asa tɨmcharrza.
\v 16 Per hnɨmich takashɨm asa tɨmcharrza. Iin ese awɨt uje ese uje ɨtso loshɨpɨt shuu tokolɨhɨ lahwo shɨ ɨtso uje sehek lahwo hn iin.
\v 17-18 Heke wɨchɨ ich sɨtak pɨshɨ wate tɨmcharrza hn hno satsɨ̃r erze uje otãra wate. Wɨr uje oshiyokõr uje Porrosht ahwoso tata hn otatɨm yewo uje ye olotiis Jesuspe. Ese uje ɨtso loshɨpɨt hno iyehetɨhɨ wahacha hnɨmich ukult uje de onoot bahlut wɨrc.
\c 13
\s Loshɨpɨt de uje tokolɨhɨ onoota bahluta nehe.
\p
\v 1 Esee hn tokomo loshɨpɨt uje tokolɨhɨ onoota bahluta. Ɨr hu syete hn ɨr wãpe dye. Kal ɨr wãpe ich wolo de shɨ ɨtso uje reye oyãha hn kal ɨr hu iich de uje Porrosht sɨtak.
\v 2 Ese loshɨpɨt uje tokolɨhɨ onoota bahluta uje tokomoko wɨchɨ shɨ ɨtso ɨlpiyo. Ɨr hnɨte deyo ɨtso ese loshɨpɨt uje iich otsɨɨ hoso hn ɨr ahwo shɨ ɨtso ɨlpiyo. Ese loshɨpɨt uje tokolɨhɨ poõrc wɨchɨ Satanás. Ɨshɨm ese loshɨpɨt uje tokolɨhɨ awɨt ɨr ukurbo hn shuu ɨre dich par uje tɨbey oso uje ode ɨ̃rmo lekɨtiyo.
\v 3 Ese loshɨpɨt yet uje tokolɨhɨ awɨt ɨr obich de huta yata uje tyenɨj shuu toy per ɨr obich owich ompo, heke nos wɨr oso uje ode ɨ̃rmo lekɨtiyo ochishlabe hn õya ɨre.
\v 4 Oteeychãha Satanás pork ɨshɨm lakɨrbo ese loshɨpɨt hn oteeychãha ese loshɨpɨt toy. Otata otsɨɨ: —Nihyok yeẽk uje ma dich ɨtso ese loshɨpɨt uje tokolɨhɨ awɨt hn nĩhyok yeẽk uje tatsɨkɨ̃r ɨre hn serz.—
\v 5 Porrosht ye nontew ese loshɨpɨtpe uje tokolɨhɨ awɨt uje ɨre shɨ narim ɨre hn chiyuhu lahwoso mɨhnũwo hn ye nontew ɨrpe uje masaha par tɨbey oso nehech shekurko kwarenta y dos
\v 6 heke wɨchɨ chiinehnɨm Porrosht hn chiinehnɨm Porrosht ɨr iich hn chiinehnɨm Porrosht ɨr owich, hn chiinehnɨm erze uje ode poõrc.
\v 7 Porrosht ye nontew ese loshɨpɨtpe uje tatsɨkɨ̃r Porrosht aabo nehech serz õr. Ye nontew ɨrpe uje tɨbey dihipo uje ode hnɨmo lekɨtiyo hn par tɨbey erze uje otseẽt ahwoso kɨnãho kɨnãho ɨ̃rmo lekɨtiyo.
\v 8 Nos wɨr uje ode ɨ̃rmo lekɨtiyo oteeychãha ɨre. Nos wɨr õr ɨre õr iiyo nihyokɨ̃hɨ asa hutɨta waa je wɨr õr iiyo de uje õr ɨkɨrĩt de uje yelɨj nɨhna ɨre. Ochichew õr iiyo uje ehn yahpaa ɨ̃rmo chɨhɨkite. Ese Obejɨt uje oshuu par tooho osokite wɨchɨ ɨr huto.
\v 9 Kɨmɨjɨ yeẽk nahmũr uje sehe tẽr ich tyenɨj tẽr uje titɨm olak.
\p
\v 10 Erze uje Porrosht chɨbɨte par uje ochishew õr ich tyenɨj ochishew õr, hn erze uje Porrosht chɨbɨte par uje oshuu õr ochɨ̃ra õr espada ich tyenɨj oshuu õr oshuu otoy ochɨ̃ra õr espada heke Porrosht aabo tyenɨj õr ewenta erze mɨhnũwo uje tɨ̃r õr hn ye olotiis Porrosht.
\s Loshɨpɨt tokolɨhɨ hnɨmich nehe.
\p
\v 11 Esee hn tokomo loshɨpɨt yet uje tokolɨhɨ hnɨmich uut. Ɨr wãpe otiyer de ɨtso obejɨt hn ɨr ahwoso shɨ ɨtso ese loshɨpɨt uje tokolɨhɨ poõrc.
\v 12 Ese loshɨpɨt uje tokolɨhɨ hnɨmich uut ɨr ukurbo tãra ese loshɨpɨt yet uje tokolɨhɨ onoota bahluta. Shɨ uje de ese loshɨpɨt yet ahɨr ich ɨr ukurbo de. Wɨchɨ shuu nos oso uje ode nãhu ɨ̃rmo oteeychãha ese loshɨpɨt uje tokolɨhɨ onoota bahluta uje ɨr huta obich deni per owich ompo.
\v 13 Ese loshɨpɨt uje tokolɨhɨ hnɨmich uut shiyokõr kuche deyo uje ye latɨk pwele shiyokõr nehech shuu jwekɨta tãra poõrc kayɨhɨ hnɨmich oso õr ɨle ɨkɨch.
\v 14 Porrosht ye nontew ɨrpe par shiyokõr erze yar kɨhniya shɨ par uje oso oteychɨm per shɨ pwele shiyokõr uje ese loshɨpɨt yet uje de ɨre ahɨr par uje sehnyẽr oso uje ode ɨ̃rmo lekɨtiyo. Wɨchɨ loshɨpɨt shuu ohno oshiyokõr kojach pɨt shuu seẽtshɨp ese loshɨpɨt uje tokolɨhɨ onoota bahluta uje yeẽk ihyo hutani chɨ̃ra espada per ye tope.
\v 15 Porrosht ye nontew ese loshɨpɨt uje tokolɨhɨ hnɨmich par uje ɨshɨm ese kojach pɨt ɨr ihyerc par uje chiilehet hn par shuu nos wɨr erze uje ye oteeychãha ese kojach pɨt shuu otoy.
\v 16 Ese kojach pɨt shuu nos ochɨbɨte oso õr yar kɨmɨjɨ ijaabo o kɨmɨjɨ deyo, kɨmɨjɨ ɨhɨ̃r deyo o kɨmɨjɨ losuhlaabo, kɨmɨjɨ erze uje õr yɨlo hn erze uje ye õr yɨlope. Ochɨbɨte õr yarta õr hme waãchta o kɨmɨjɨ õr une.
\v 17 Heke nĩhyok uje yeẽk tiya kuche hnii uje chiwãha ɨr kuche shɨ erze uje õr yar de. Asa yarta wate uu loshɨpɨt uje tokolɨhɨ onoota bahluta ɨr iich o kɨmɨjɨ ɨr numɨro uje tata ɨr iich.
\v 18 Shɨ yeẽk uje eykdeyo pwele shuu deyuwo tɨsɨ̃r par chɨraha hnakɨrtɨkɨhɨ ese loshɨpɨt ɨr numɨro. Ese numɨro hnakɨrbich ɨr numɨro. Ese numɨrt seys syento sesenta y seys.
\c 14
\s Syento kwarenta y kwatro mil oso otseẽt imno.
\p
\v 1 Esee hn takachɨm hn tokomo Obejɨt uje iyehetɨhɨ wahacha ese kojach uje iich otsɨɨ Sión. Erze uje õr syento kwarenta y kwatro mil ode ɨre ahɨr toy. Wɨr uje ese Obejɨt ɨr Deych hn ɨre õr iiyo de õr une.
\v 2 Esee hn tukunt ihyokõrak dich uje tãra poõrc. Wɨchɨ shɨ ɨtso uje awɨt uushɨ ich ihyokõrak dich hn shɨ ɨtso uje nar ich jwertpa. Ese ihyokõrt uje tukuntɨke shɨ ɨtso uje oso oshuu arpa.
\v 3 Wɨr oteeychɨ otseẽt imno ahle wahacha Porrosht ɨle ɨkɨch hn erze uje ɨtso loshɨpo uje ɨka õr ɨle ɨkɨch toy hn erze uje õr ɨbiyo iich otsɨɨ anciano õr ɨle ɨkɨch toy. Nĩhyok uje yeẽk pwele chɨraha ese imno uje õr ɨre otseẽt, shɨ erze uje õr syento kwarenta y kwatro mil uje otãra hnɨmich pork ese Obejɨt ɨshɨ õr hnɨtewɨhɨ Porrosht ahɨrkite.
\v 4 Wɨr uje yelɨj odishew tɨmcher yẽr pork shish otɨbey ɨre. Shish ohno õya ese Obejɨt uje tɨ̃r lekɨtiyo. Wɨr uje oshɨmɨhɨ ɨre Porrosht hn ese Obejɨt ɨtso jõro webich oso uje oshɨmɨhɨ Porrosht.
\v 5 Wɨr yelɨj otata dekushiĩ hn ye õr kuch mɨhnũwɨrsh.
\s Nãhu uje anjele õr tre otata.
\p
\v 6 Esee hn tokomo anjel yet uje shɨ iyohochɨs poõrc pehet. Hno sanɨmɨrãha Porrosht ahwoso tatɨm nos wɨr oso uje ode ɨ̃rmo lekɨtiyo, hn nos wɨr dihipo hn nos wɨr uje otseẽt ahwoso kɨnãho kɨnãho. Tatɨm õr erze ahwoso oomo uje Porrosht chɨbɨte uje ehn yahpaa ɨ̃rmo chɨhɨkite.
\v 7 Ese anjel tata ich sɨhnew ɨm: —Atɨlɨlo Porrosht hn olak narim ɨre pork ich yej terɨhɨ ɨshɨrĩt par wɨchɨ sepyẽr oso. Eeychãhalo ese uje shiyokõr poõrc hn shiyokõr hnɨmich hn shiyokõr onoota bahluta hn nos wɨr owɨlo uje awɨt tãra hnɨmich.—
\p
\v 8 Esee hn anjel yet iyehe nẽr tata ɨm: —Ich terɨhɨ ɨshɨrĩt uje otsɨhna ese dɨt bahlut Babilonia. Erze dɨt oso nos shuu dihipo oshiyokõr uje ich mɨhnũwo shɨ ɨtso uje shuu yɨkɨch sẽhi õr.—
\p
\v 9 Esee hn anjel yet iyehe erze anjele osiyer õr nẽr hn chiilehet ich sɨhnew tata ɨm: —Uje yeẽk teeychãha ese loshɨpɨt uje tokolɨhɨ onoota bahluta hn teeychãha ese kojach pɨt uje seẽt ɨre hn shuu chɨbɨte ɨr yarta nenta o kɨmɨjɨ hmata
\v 10 ich Porrosht shuu mɨhnũwo tɨ̃r ɨre toy shɨ ɨtso uje wɨchɨ chishew wint uje ye latɨk nõya hn shuu wɨchɨ ɨhɨ. Porrosht ich sɨtak pɨshɨ wɨchɨ. Tyenɨj shuu otsẽru ɨre ochɨ̃ra jwekɨta hn asufre wahacha Porrosht anjele hn ese Obejɨt õr ɨkɨch.
\v 11 Shish duhlu hn dospa. Ɨr iibich tokole hn yelɨj nɨhna ɨre. Yelɨj tonkiya uje de asa jwekɨta ehet. Shish duhlu deeych hn dɨhlak. Wɨr erze uje oteeychãha ese loshɨpɨt uje tokolɨhɨ onoota hn ese kojach pɨt uje ɨtso ɨre hn ese loshɨpɨt yarta de õr.
\v 12 Porrosht aabo ochɨraha uje erze kuche mɨhnũwo tyenɨj tɨrẽt nehe heke tyenɨj õr ewenta erze kuche mɨhnũwo uje tɨ̃r õr hn oshiyokõr uje Porrosht ahwoso tata hn ye olotiis Jesús.—
\p
\v 13 Esee hn tukunt ahwoso uje tãra poõrc tatɨm yok par uje tichew tuu ɨtsorz ɨm: —Ele ahle nehech terɨhɨ erze mɨhnũwo uhurc nehe erze uje otoy hn ye olotiis eyok Ɨrhĩch ich om par õr ɨre nehe.— Porrosht Ɨchɨbich tata toy ɨm: —Ich ompa par õr pork otsɨhna debiyo hn otsakɨr hn õr premyo de pork oshiyokõr uje ich om.—
\s Ochekushu jorõho hnɨmich nehe.
\p
\v 14 Esee hn takachɨm hn tokomo ukuhurrza waa je poro. Asa ukuhurrza yeẽk sakaha eeych. Tɨbɨte uje wɨchɨ ese hnakɨrbich uje tãra poõrzkite. Ɨr wolt uje iyãha pur oro ɨtso rey õr wolo hn meshete uje ich watakpa de ɨr hmata par ochɨ̃ra jõro.
\v 15 Anjel yet tokolɨhɨ asa templo ehet. Wɨchɨ tɨbich ich sɨhnew tatɨm ese uje sakaha ukuhurrza eeych ɨm: —Ahlo erze jõro hn eeshye pork ich terɨhɨ ɨshɨrĩt. Erze jõro uje de hnɨmich ich nos icho.—
\v 16 Ese uje sakaha asa ukuhurrza eeych ihyo erze jõro uje de hnɨmich hn chiishye.
\p
\v 17 Esee hn anjel yet tokolɨhɨ asa templo ehet waa je de poõrc. Wɨchɨ tõhwa meshete toy uje ich watakpa par ochɨ̃ra jõro.
\v 18 Anjel yet uje tɨbey jwekɨta uje de altar eeych tokolɨhɨ ese altar hn tɨbich ich sɨhnew tatɨm ese anjel yet uje hnoy meshete uje ich watakpa ɨm: —Ahlo erze uva ɨr ee uje de hnɨmich pork ich nos icho.—
\v 19 Heke ese anjel ihyo erze jõro ee uje iich otsɨɨ uva uje de hnɨmich hn tãra chɨbɨte ɨr owich uje jotsak par ochiyuhu ɨr otich. Ese owich shɨ Porrosht sɨteẽta uje tyenɨj sepyẽr oso nehe.
\v 20 Erze uva otarãha hnɨmichɨhɨ wahacha dɨt nẽr par ochiyuhu otich. Ese ɨr owich dɨkɨrmɨsta tokolɨhɨ. Asa armɨsta ich data nehech terɨhɨ kabyuhwo ɨr freno hn terɨhɨ tre syento kilometro.
\c 15
\s Anjele syete ohnoy kuche mɨhnũwo.
\p
\v 1 Esee hn tokomo yarta yata waa je ich data hn yarhakpa wahacha poõrc. Tokomo anjele õr syete uje tyenɨj ohnoy erze dosɨ̃ryo deyo uje syete nehe. Erze dosɨ̃ryo deyo wɨr ich uhurc uje Porrosht shuu tɨ̃r ɨ̃rmo par shuu õr eyuwo tɨsɨ̃r hn oym erze mɨhnũwo uje oshiyokõr.
\p
\v 2 Hn tokomo toy shɨ ɨtso onoota bahluta per nĩhyok ye awɨtɨkɨsh, shɨ ɨtso pejta hn jwekɨta de lekɨtiyo ehet. Hn tokomo toy erze uje otserz ese loshɨpɨt uje tokolɨhɨ onoota bahluta hn ese kojach pɨt uje shɨ ɨtso ɨre. Wɨr otserz ese loshɨpɨt pork ye oduhu odɨbɨte õr yarepe ese ɨr iich hnii ɨr numɨro. Wɨr oyehe asa onoota wɨrc waa je ɨtso pejta hn oshuu arpa. Porrosht wɨchɨ uje ɨshɨm õr erze arpa.
\v 3 Otseẽt imno uje Moisés shiyokõrkite. Wɨchɨ Porrosht ɨbɨk. Ese imno shɨ eyucha ese Obejɨt. Otata otsɨɨ:
\p —Õryok Ɨrhĩch Porrosht, owa akɨrbo deyo de hn ahakõr kuche deyo uje ich ɨhɨrts pisho. Shish ahakõr uje ich om hn shish atha uje ich ũru. Owa uu nos dihipo õr rey.
\v 4 Ɨrhĩche, nos tyenɨj otola owa nehe hn oshuu owa dich. Shɨ owa uje yelɨj ahakõr uje ich mɨhnũwo. Nos wɨr dihipo tyenɨj otɨrẽt nehe hn oteeychãha owa pork ebɨte orhõta uje epiyer erze uje oshiyokõr uje mɨhnũwo.—
\p
\v 5 Esee hn takachɨm poõrc hn tokomo templo waa je otsɨtsẽrke. Wɨchɨ owich uje Porrosht ɨr ley de.
\v 6 Syete anjele otokolɨhɨ asa templo ehet. Wɨr tyenɨj ohnoy erze dosɨ̃ryo uje syete. Wɨr ich õr ɨshuwo poro hn hũre hn oshiyeru derhɨr õr ɨhɨroso uje oro.
\v 7 Erze kwatro uje ɨtso loshɨpo uje ɨka, yet ɨshɨm erze basɨ nohmɨr nohmɨr erze anjele. Erze basɨ oro hn kuche mɨhnũwo de ehet uje tãra Porrosht pork wɨchɨ sɨtakpa erze uje oshiyokõr mɨhnũwo. Porrosht wɨchɨ shish ɨka.
\v 8 Porrosht ich hũre hn ɨr ukurbo deyo de heke shuu asa templo ehet ich kiibich dich. Nĩhyok uje yeẽk masaha asa templo ehet nehech wɨr sɨhna ɨre erze dosɨ̃ryo deyo uje erze syete anjele ohnoy.
\c 16
\s Basɨ syete uje kuche mɨhnũwo de ehet.
\p
\v 1 Esee hn tukunt ahwoso ich sɨhnew tãra asa templo ehet tatɨm erze anjele uje õr syete ɨm: —Bolilo erze kuche mɨhnũwo uje de erze basɨ aho hn orɨ̃hɨlo hnɨmich eeych pork Porrosht ich sɨtakpa erze uje oshiyokõr mɨhnũwo. Erze kuche mɨhnũwo Porrosht shuu tɨ̃r õr pork ich sɨtak pɨshɨ õr uje oshiyokõr uje mɨhnũwo.—
\v 2 Esee hn anjel webich osht hnoy asa ɨr basta uje kuche mɨhnũwo de ehet hn sorɨ̃hɨ hnɨmich. Kuche tokolɨhɨ oso õr yũhɨr uje ɨtso abaha uje ich yarhakpa hn doso pork ese loshɨpɨt yarta de õr hn oteeychãha ese kojach pɨt.
\p
\v 3 Esee hn anjel yet uje iyehe ese webich osht nẽr hnoy ɨr basta sorɨ̃hɨ erze kuche mɨhnũwo asa onoota bahluta heke asa onoota bahluta chisãha ɨre dɨkɨrmɨsta shɨ ɨtso topo õr armɨtsɨ. Nos wɨr kuche uje de asa onoota ehet nos toy.
\p
\v 4 Esee hn anjel yet uje iyehe erze osiyer õr nẽr hnoy ɨr basta uje erze kuche mɨhnũwo de ehet hn sorɨ̃hɨ erze onoo hn erze owɨlo uje awɨt tãra hnɨmich. Nos chisãha ɨre dɨkɨrmɨsta.
\v 5 Tukunt ese anjel yet uje tɨbey awɨt tata ɨm:
\p —Ɨrhĩche Porrosht, yelɨj ahakõr uje mɨ̃hnɨk. Shish owa dekite nehech ele ahle shish owa de. Yelɨj alehi ahwoso hn yelɨj aluwe uje epiyer õr uhu ɨtsorz.
\v 6 Ich om uje eyuhu õr bahat pork uhu wɨr oho dɨkɨrmɨsta ɨtsorz pork erze oso oshuu uu aabo wɨshɨ hn erze profeta wɨshɨ oshuu otoy hn õr armɨtsɨ noshɨ.—
\v 7 Tukunt ahwoso uje tãra ese altar tata ɨm: —Ɨrhĩche Porrosht, owa akɨrbo deyo de. Ich ũru uje oshiyokõr uje mɨhnũwo hn ich om uje epiyer õr uhu ɨtsorz.—
\p
\v 8 Esee hn anjel yet uje iyehe erze tre nẽr sanuwãha erze kuche mɨhnũwo uje de ɨr basta ehet ese deeych eeych heke ese deeych ich duhlpa ɨtso jwekɨta hn tew erze oso õr yũhɨr shuu doso.
\v 9 Erze oso ich õr yũhɨr dospa uje deeych duhlu ɨtsorz heke ochinehnɨm Porrosht ɨr iich. Porrosht wɨchɨ ukurbo deyo de hn nos tɨbey erze kuche mɨhnũwo uje tɨ̃r õr per ye onoym erze mɨhnũwope uje õr ɨre oshiyokõr par uje oshuu Porrosht dich.
\p
\v 10 Esee hn anjel yet uje iyehe erze kwatro nẽr sanuwãha erze kuche mɨhnũwo uje de ɨr basta ehet ese loshɨpɨt uje tokolɨhɨ onoota ɨr owich uje sakaha par tɨbey oso. Uje sanuwãha ich shuu dɨhlel data ese owich uje ɨre de. Erze oso uje odechɨ oches narhõ pork ich dospa
\v 11 hn ochinehnɨm Porrosht uje de poõrc pork asa dɨhlel data hn nos wɨr kuch mɨhnũwo uje tɨ̃r õr ich dospa hn erze uje ich ɨtso abaha yesh de õr toy, per ye onoympe oshiyokõr erze mɨhnũwo par uje oshiyokõr erze om uje Porrosht sahmũr.
\p
\v 12 Esee hn anjel yet uje iyehe erze sinko nẽr sanuwãha erze kuche mɨhnũwo uje de asa basta ehet asa onoota data waa je iich otsɨɨ Éufrates heke asa onoota kako par wɨr ochɨkãha erze reye hõr ɨr ohyerptoso uje otãra deeych warĩch.
\v 13 Esee hn takachɨm hn tokomo woo tre. Nohmata tãra wɨchɨ ahwo ese loshɨpɨt uje iich otsɨɨ Satanás, hn yata tãra wɨchɨ loshɨpɨt uje tokolɨhɨ onoota bahluta hn yata tãra wɨchɨ ahwo toy ese loshɨpɨt uje tokolɨhɨ hnɨmich. Ese uje tokolɨhɨ hnɨmich wɨchɨ profetya uje sehnyẽr oso. Erze woo wɨr ɨchɨbiyo mɨhnũwo.
\v 14 Erze woo uje tokolɨhɨ õr ahwo wɨr demonyo uje oshiyokõr erze uje ye latɨk pwele shiyokõr. Wɨr otɨ̃r ɨ̃rmo lekɨtiyo par otɨbii erze reye hn ohyerptoso par uje oshuu otakɨsho lawich par uje otatskɨ̃r pork ich terɨhɨ ese deeych uje Porrosht cheeshpo. Wɨchɨ ich ukurbo deyo de.
\p
\v 15 Esee hn Jesús tata ɨm: —Ẽrlo yok. Uje takaashpo nehe ich ye latɨk dɨraha shɨ ɨtso echɨkɨt. Ich om par yeẽk uje iyem yok hn chɨmɨt ɨre hn ye niyokõr uje mɨhnũwope shɨ ɨtso uje iyãha lasuwo heke ich ye ɨmeheeychpe hn ye pookpe uje takaashpo nehe.—
\p
\v 16 Esee hn erze reye hõr ɨr ohyerptoso otakɨsho lawichɨhɨchɨs ese owich uje hebreo ahwosht otsɨɨ Armagedón.
\p
\v 17 Esee hn anjel yet uje iyehe erze seys nẽr sanuwãha erze kuche mɨhnũwo uje de ɨr basta ehet poõrc pehet hn ahwoso tãra wahacha templo ehet waa je de poõrc uje Porrosht ɨbɨta de. Erze ahwoso tata sɨhnew ɨm: —Ich uhurzɨke.—
\v 18 Ich hũre ɨtso yuwebo hn tukunt ahwoso hn nar ich ihyokõrak dich hn hnɨmich telerrzpa. Yelɨj telerrza ɨlorz uje ehn hnakɨrbo ode hnɨmich.
\v 19 Ese dɨt bahlut sehek ɨre po tre, hn nos wɨr pwerto uje de erze dihipo õr duwo ɨ̃rmo lekɨtiyo nos kay hn Porrosht eyucha ese dɨt bahlut Babilonia par uje sepyẽr erze oso uje odechɨ shɨ ɨtso uje shuu oho erze kuche uje de basta ehet uje ich dospa pork ɨre ich sɨtak pɨshɨ õr.
\v 20 Nos wɨr erze hnɨmo uje onoota bahluta chɨpeẽsa yaka hn awɨt sajuwe, hn nos wɨr erze kojano deyo ihnɨmich nehech nĩhyok.
\v 21 Kojano uje ɨbɨk ich ĩya uje tãra poõrc kayɨhɨ erze oso õr eeyo. Erze kojano wɨr deyo. Iyuwe kwarenta kilo kal nohmɨra heke erze oso ochinehnɨm Porrosht uje kojano kayɨhɨ õr eeyo pork ich yarhakpa.
\c 17
\s Dɨt bahlut ich ɨtso tɨmcharrza yɨtoro.
\p
\v 1 Esee hn erze anjele uje õr syete uje õr basɨ de, yet tatɨm yok ɨm: —Erẽt. Tokowa owa ese dɨt uje ɨtso tɨmcharrza yɨtoro uje Porrosht tyenɨj shuu kuche mɨhnũwo tɨ̃r ɨre pork shiyokõr kuche mɨhnũwo ich kɨhniya. Wate sakaha awɨt eeych.
\v 2 Erze reye uje ode ɨr hnɨmoho lekɨtiyo otɨ̃r ese dɨt uje ɨtso tɨmcharrza yɨtoro par uje oshiyokõr mɨhnuwõhoye hn erze oso uje ode lekɨtiyo otɨ̃r wate par oshiyokõr mɨhnuwõhoye shɨ ɨtso uje yɨkɨch sẽhi õr.—
\v 3 Porrosht Ɨchɨbich hnoy yok seya yok hnɨmich uje ɨsa hn tokomo tɨmcharrza iyãha loshɨpɨt uje ich wɨhɨ̃rt. Ɨr iiyo kɨhniya de lekɨtiyo ɨre eeych uje Porrosht ye nahmũrpe. Ɨr hu syete hn ɨr wãpe dye.
\v 4 Asa tɨmcharrza ɨr nerpta kolor lila hn wɨhɨ̃r hn kuche de ɨr eeyo uje oro hn kojano po uje ich ɨhɨ̃rtso hn debich hn kojano yewo uje iiyo otsɨɨ perla. Asa tɨmcharrza basta de ɨr hmata waa je oro. Kuche mɨhnũwo uje wate shiyokorɨ̃hɨ oso de asa ɨr basta ehet.
\v 5 Ɨr unta iich de uje ye latɨk dɨraha. Ɨr iich tata shuu ɨtsorz: —Ese dɨt bahlut Babilonia wɨchɨ shɨ ɨtso nos yɨtoro õr data. Nos wɨr kuche mɨhnũwo uje de nãhu ɨ̃rmo wate õr data.—
\v 6 Tokomo uje asa tɨmcharrza shuu oshuu Porrosht aaboni hn õr armɨtsɨ noshɨ hõr erze uje otsanɨmɨrãha otatɨm oso Jesús. Õr armɨtsɨ shuu wate shɨ ɨtso uje yɨkɨch sẽhi. Uje takachɨm ich shuu tish pɨbe pork ye tɨkɨraha keshɨ latɨkpo.
\v 7 Per ese anjel tatɨm yok ɨm: —¿Ɨnaapo heke as abe? Yok tyenɨj titɨm owa asa tɨmcharrza hn ese loshɨpɨt uje wate iyãha uje ɨr hu syete hn ɨr wãpe dye.
\v 8 Ese loshɨpɨt uje amoko wɨchɨ antkite ɨchii de per ele ahle ich nĩhyok. Tyenɨj tokolɨhɨ ese jotsɨt uje ye uhurtɨkɨsh nehe hn tɨ̃r urhuta bahluta ehet. Uje ehn Porrosht shiyokõr ɨrmõkite ɨchii shuu ochichew laabo õr iiyo ochɨbɨte asa hutɨta uje wɨr õr iiyo de erze uje õr ɨkɨrĩt de uje yelɨj nɨhna ɨre. Erze oso uje ye õr iiyo chɨhɨpe asa hutɨta ich ochishlabe uje omo ese loshɨpɨt pork antkite de per ele ahle ich nĩhyok je deeych yet nehe hn depo.
\v 9 Yeẽk uje eykdeyo tyenɨj shuu deyuwo tɨsɨ̃r par uje chɨraha uje sɨteẽta erze uje tyenɨj titɨm owa. Erze hu uje syete sɨteẽta erze wɨ̃rye uje syete uje asa tɨmcharrza sakaha eeych,
\v 10 hn erze hu uje syete sɨteẽta toy erze reye uje õr syete. Sinko otokite hn sohmet masaha õr owich hn rey yet tyenɨj sakaha wɨchɨ owich nehe per ye osdeyope uje sakaha par rey.
\v 11 Ese loshɨpɨt uje antkite de per ele ahle ich nĩhyok wɨchɨ uje iyehe erze reye uje õr syete õr nẽr. Wɨchɨ uje tãra erze syete hn tyenɨj tɨ̃r urhuta bahluta ehet nehe.
\v 12 Erze wãpe uje dye uje eychɨmɨke wɨr reye uje õr dye. Yahpaa omasahape par reye per uje omasaha nehe ich shɨ ɨhɨrle otokolpo kɨmɨjɨ una ora. Wɨr omasaha par reye õya ese loshɨpɨt.
\v 13 Erze reye uje õr dye õr eyuwo ɨtsye heke oshɨm lakɨrbo ese loshɨpɨt.
\v 14 Tyenɨj otsatsɨr ese Obejɨt nehe. Uje oteye hn ese Obejɨt serz õr pork ɨre nos wɨr ɨrhẽ õr Ɨrhĩch hn erze reye õr bahlut toy. Erze uje õya ese Obejɨt oso otata otsɨɨ: “Wɨr uje Porrosht chiihla õrkite hn wɨr uje ye olotiis ɨrpe.”—
\p
\v 15 Ese anjel tatɨm yok ɨm: —Ese awɨt uje tokomoko uje asa tɨmcharrza yɨtorrza sakaha eeych wɨr oso uje ode ɨ̃rmo lekɨtiyo, hn nos wɨr dihipo hn nos wɨr uje otseẽt ahwoso kɨnãho kɨnãho.
\v 16 Ese loshɨpɨt wãpe uje dye uje tokomoko wɨr erze dye reye uje õya ese loshɨpɨt. Wɨr otsɨtak erze dɨt oso uje õr ɨtso tɨmcharrza yɨtoro nehe hn nos ohnoy ɨr kushjãro hn ochiyuhu wate ɨshuwo. Wɨr otew wate ẽro nehe hn otsẽru wate oshuu duhlu.
\v 17 Erze reye tyenɨj oshiyokõr oshuu ɨtsorz nehe pork Porrosht shuu otakɨsho leyuwo par oshɨm lakɨrbo ese loshɨpɨt uje tokolɨhɨ onoota nehech nos yakaha erze uje Porrosht tata.
\v 18 Asa tɨmcharrza waa je tokomoko sɨteẽta ese dɨt bahlut uje shuu erze reye uje ode hnɨmoho lekɨtiyo oshiyokõr uje ɨre sahmũr.—
\c 18
\s Otsɨhna ese dɨt Babilonia nehe.
\p
\v 1 Esee hn tokomo anjel yet uje yesh ihnɨmich tãra poõrc. Ɨr ukurbo deyo de hn hũre chihit hnɨmich.
\v 2 Wɨchɨ tɨbich sɨhnew ɨm:
\p —Ich otsɨhna ese dɨt bahlut Babilonia, ich otsɨhna. Heke shɨ demonyo sakahachɨs hn nos wɨr ɨchɨbiyo mɨhnũwo sakahachɨs toy hn chɨpɨrme uje yelɨj otew shiyokõr dewohochɨs.
\v 3 Porrosht shuu otsɨhna ese dɨt ɨtsorz pork erze dɨt oso oshuu nos dihipo oshiyokõr uje ich mɨhnũwo ɨtso õr. Oshiyokõr shɨ ɨtso uje shuu oho wint uje mɨ̃hnɨk. Erze dɨt oso oshuu erze reye uje ode ɨ̃rmo lekɨtiyo oshiyokõr mɨhnũwo ɨtso õr toy. Erze oso uje odechɨ dɨt oshiyokõr mɨhnũwo par uje otserz hnote ich kɨhniya heke oshuu wɨr õr ɨhɨ̃r deyo erze uje ode ɨ̃rmo lekɨtiyo uje ochiwãha ɨr kuche uje ich ɨhɨ̃rtso.—
\p
\v 4 Esee hn tukunt ahwoso uje tãra poõrc tata ɨm: —Porrosht sole: “Olak uje olak yok pijo, atokolɨhɨlo ese dɨt par uje ye ahakõrlo erze mɨhnũwo uje wɨr oshiyokõr hn par uje ye wɨr terɨhɨ olak erze kuche mɨhnũwo uje tɨ̃r õr uje tepyẽr õr nehe.”
\v 5 Erze kuche mɨhnũwo uje oshiyokõr shɨ ɨtso uje otsɨtiyẽr kuche ich kɨhnipa nehech terɨhɨ poõrc. Porrosht eyucha erze õr kuche mɨhnũwo uje oshiyokõr hn terɨhɨ ɨshɨrĩt par sepyẽr õr.—
\v 6 Erze ahwoso uje tukuntɨke uje tãra poõrc tatɨm Porrosht ɨm: —Epiyer erze dɨt oso par erze kuche mɨhnũwo uje oshiyokorɨ̃hɨye. Uhu sowe do bese erze kuche mɨhnũwo uje õr ɨre oshiyokõr. Erze mɨhnũwo uje oshiyokõr ich shɨ ɨtso uje oshuu yewo oho kuche mɨhnũwo, heke uhu ɨlo uje wɨr oho toy do bese erze uje oshuu yewo oho.
\v 7 Erze dɨt oso ich shɨ ɨtso tɨmcharrza waa je narim ɨre hn chukutɨrãha ɨre kuche ich kɨhniya heke uhu mɨhnũwo tɨ̃r ɨre uje ich dospa ich kɨhniya toy pork ehet chiilehet ɨm: “Yok reynta. Ye yok poluupe. Yelɨj yok dosdarak ɨlo asa poluuta uje abich toy.”
\v 8 Shɨ deeych nohmɨra uje erze mɨhnũwo tɨ̃r õr. Ode uje otoy hn ode uje oyerh pork yewo otoy hn ode uje sewɨt sẽhi õr. Deeych yet nehe hn ese dɨt tyenɨj duhlu pork eyok Ɨrhĩch Porrosht ukurbo deyo de. Wɨchɨ uje tyenɨj sepyẽr õr.—
\p
\v 9 Ese dɨt shɨ ɨtso tɨmcharrza yɨtorrza hn erze reye uje ode ɨ̃rmo lekɨtiyo ich shɨ ɨtso uje õya wate par uje oshiyokõr mɨhnuwõhoye hn wate shuu ochukutɨrãha ɨr kuche toy. Heke uje erze reye oteychɨm ese kiibich uje tɨ̃r poõrc uje ese dɨt duhlu ich oyerh hn õr dosdarak.
\v 10 Tyenɨj oyehe dukuhla pork otola uje erze mɨhnũwo uje tɨ̃r dɨt terɨhɨ õr toy. Otata otsɨɨ:
\p —Hiye, hiye, ese dɨt bahlut Babilonia ich ɨr ukurbo deyo de per ich wantakpa uje ese mɨ̃hnɨk tɨ̃r ɨre pork oshiyokõr mɨhnũwo.—
\p
\v 11 Nos wɨr oso uje ode ɨ̃rmo lekɨtiyo uje ochiwãha ɨr kuche erze dɨt oso ich õr dosdarak hn oyerh pork ich nĩhyok uje yeẽk tiya õr kushjãro.
\v 12 Wɨr ochiwãha ɨr oro, plata, hn kojano uje ich ɨhɨ̃rtso hn debich, hn erze kojano yewo uje iich otsɨɨ perla. Ochiwãha bortɨso uje ich ɨhɨ̃rtso hn bortɨso uje kolor lila hn uje seda hn bortɨso uje wɨhɨ̃rtso. Ochiwãha nos wɨr tabla uje aat ehmuuj hn ochiwãha erze kuche uje oshiyokõr ochɨ̃ra elefante wãpe. Ochiwãha erze kuche uje oshiyokõr ochɨ̃ra tabla uje ich debichpa hn erze uje oshiyokõr ochɨ̃ra bronse hn pyerɨt hn erze uje oshiyokõr ochɨ̃ra kojano uje iich otsɨɨ mármol.
\v 13 Ochiwãha canela hn yet iich otsɨɨ especias hn erze kuche uje aat ehmuuj uje iich otsɨɨ incienso, mirra, hn perfume. Ochiwãha wino, aseyte, erint hn trigo. Ochiwãha wõjo, obeje, kabyuhwo, jarleshɨ nehech ochiwãha oso uje õr yɨlo.
\p
\v 14 Erze oso otsɨɨ: —Ich ɨhɨ̃r pɨshɨ erze pohɨr ee uje otewni per ich ye otewpope, hn nos wɨr kuche uje otsahmũrpa hn erze kuche uje ich ɨhɨ̃rts pisho uje deni ich ye chɨhɨpo petɨk nehe pork ich nĩhyok ese dɨt.—
\p
\v 15 Erze uje ochiwãha ɨr kushjarõho erze dɨt oso ich otserz hnote ich kɨhniya. Wɨr shɨ oyehe dukuhla ese dɨt uje kuchɨt mɨ̃hnt tɨ̃r par uje ye terɨhɨ õr toy. Wɨr ich oyerh pork oyẽra ese dɨt hn otata otsɨɨ:
\v 16 —Hiye, hiye, ese dɨt bahlut ich shɨ ɨtso tɨmcharrza waa je ɨr ɨshuwo ich ɨhɨ̃rt pishoni. Ɨr ɨshuwo kolor lila hn wɨhɨ̃rtso. Oro de eeyo hn kojano uje ich ɨhɨ̃rtso hn debich hn yewo uje iich otsɨɨ perla.
\p
\v 17 Ich ɨhɨrle uje sɨhna ɨre ese dɨt hn nos wɨr kushjãro ɨhɨ̃rtso uje de ehet.— Nos wɨr pohɨr ɨr yɨnsɨro hn erze yewo uje õr pohɨr de hn erze uje ochishew obiyoho pohɨr aho hn nos wɨr erze uje ochiwãha ɨr kuchehe pohɨr wɨr shɨ oyehe dukuhla
\v 18 hn oteychɨm ese kiibich uje tãra ese dɨt uje duhlu otɨbich otsɨɨ: —Nĩhyok dɨt yet uje ɨtso ese dɨt bahlut.—
\v 19 Ochukshãha hnɨmich ukult dehe pork ich õr dosdarak hn oyerh otsɨɨ:
\p —Hiye, hiye, ese dɨt uje ich dich. Nos shuu wɨr õr ɨhɨ̃r deyo erze pohɨr yɨnsɨro hn ich shɨ una ora uje otsɨhna ese dɨt.—
\v 20 Hn erze ahwoso uje tãra poõrc tata ɨm: —Olak uje olak Porrosht aabo hn uje olak apóstole hn uje olak profeta uje olak dechɨ poõrc tyenɨj olak ayla uje Porrosht sɨhna ese dɨt oso pork oshiyokõr mɨhnuwõho olakni.—
\p
\v 21 Esee hn anjel uje ukurbo deyo de chishew kojach uje ich dich hn tãra chɨbɨte onoota bahluta hn tata ɨm:
\p —Ese dɨt bahlut Babilonia ich tyenɨj otsɨhna shɨchish heke ich ye onomo petɨk nehe shɨ ɨtso ese kojach uje tokõraka tɨbɨte onoota bahluta.
\v 22 Ich ye onunt petɨk nehe uje erze oso oshuu arpa par uje oteeychɨ hn ich ye onunt uje otsobɨta flawta hn trompeta. Ich nĩhyok erze uje ochishew obiyo oshiyokõr kuchehe wahacha dɨt ehet nehe, hn ich ye onunt ese kojach ihyokõrtpe uje chukwerh oposo.—
\v 23 Hn ese anjel ɨm: —Ich ye onomo nampɨr petɨk nehe uje chihit ese dɨt ehet, hn ich ye onunt ese ahamich nehe uje ochiileku. Erze oso uje odebuhu ese dɨt ehetni wɨr ɨhɨ̃r deyo pork otiya ɨr kuche hn ochiwãha. Nos wɨr oso uje ode ɨ̃rmo lekɨtiyo ochɨraha õr, hn erze meriko hn konsaho uje ode ese dɨtni nos otsehnyẽr oso uje ode ɨ̃rmo lekɨtiyo.
\v 24 Erze dɨt oso wɨr uje oshuu Porrosht ɨr profeta wɨshɨ hn uu Porrosht aabo. Oshuu õr oshuu otoy hn õr armɨtsɨ noshɨ. Oshuu wɨr toy erze uje ode ɨ̃rmo lekɨtiyo.—
\c 19
\p
\v 1 Esee hn tukunt ahwoso uje tãra poõrc ɨtso oso okɨhniya uje ochiilehet otsɨɨ:
\p —Eeychãhalo eyok Ɨrhĩch Porrosht. Wɨchɨ ɨshɨ oso õr hnɨtewkite. Ich om uje yeeychãhalo ɨre. Wɨchɨ ukurbo deyo de.
\v 2 Uje Porrosht sepyẽr erze oso uje oshiyokõr uje ich mɨhnũwo ich shish shiyokõr uje ich om hn tata uje ich ũru. Sepyẽr ese dɨt bahlut. Ese dɨt shɨ ɨtso tɨmcharrza yɨtorrza. Wate shuu nos oso oshiyokõr uje ich mɨhnũwo shuu otseẽt ɨre. Porrosht sepyẽr ɨre pork shuu Porrosht aabo wɨshɨ shuu õr armɨtsɨ noshɨ.—
\p
\v 3 Hn erze uje ode poõrc uje okɨhniya otɨbich toy otsɨɨ: —Eeychãhalo eyok Ɨrhĩch Porrosht. Ese dɨt duhlu hn kiibich shish tɨ̃r poõrc. Yelɨj nɨhna ɨre.—
\v 4 Erze bentikwatro uje õr ɨbiyo iich otsɨɨ anciano hn erze uje ɨtso loshɨpo uje ɨka uje kwatro ocha dete hnɨmo hn oteeychãha Porrosht uje sakaha debɨta eeych. Õr ɨre otsɨɨ: —Yehe wɨchɨ. Eeychãhalo eyok Ɨrhĩch Porrosht.—
\p
\v 5 Ese Porrosht ɨr ɨbɨta õr ahwoso tãra uje tata ɨm: —Nos wɨr olak uje olak Porrosht ɨr ɨbiyo hn erze uje otola ɨre kɨmɨjɨ õr ijaabo o kɨmɨjɨ õr deyo, eeychãhalo eyok Ɨrhĩch Porrosht.—
\s Porrosht aabo tyenɨj otɨ̃r ahamich nehe.
\p
\v 6 Esee hn tukunt õr ahwoso ɨtso oso uje ich okɨhniya. Õr ahwoso ihyokõrak dich shɨ ɨtso awɨt uje uushɨ hn shɨ ɨtso uje nar ihyokõrak dich. Wɨr otsɨɨ:
\p —Eeychãhalo eyok Ɨrhĩch Porrosht pork wɨchɨ ɨr ukurbo deyo de. Ɨchii ɨre nos tɨbey oso.
\v 7 Tyenɨj eyok aylpa hn eyok narim ɨre hn tyenɨj yuhulo ɨre dich pork terɨhɨ ese Obejɨt ɨr ahamich shɨ ɨtso uje wɨchɨ chiileku hn ɨr ihyãta chɨmɨt ɨre.
\v 8 Porrosht ɨshɨm õr par uje oyãha lasuwo uje ich ɨhɨ̃rts pisho poro hn ich hũre hn ye warɨ̃rsh.— Erze õr ɨshuwo uje ich poro shɨ Porrosht sɨteẽta erze ɨr aabo õr ɨluu uje oshiyokõr om.
\p
\v 9 Ese anjel tatɨm yok ɨm: —Atsew ebɨte hutɨta erze uje titɨm owa. Ich om par erze uje Porrosht tatɨm õr par otɨ̃r ese Obejɨt ɨr ahamich. Ese ahamich shɨ ɨtso uje ese Obejɨt chiileku.— Tatɨm yok toy ɨm: —Erze uje titɨm owaka ich ũru, wɨr Porrosht ahwoso.—
\v 10 Esee hn tokotsa pɨte hnɨmoho ese anjel ɨkɨch par tɨkeeychãha ɨre per ese anjel tatɨm yok ɨm: —Ye ahakõr uhu ɨlorz. Shɨ yok Porrosht ɨr ɨbɨk ɨtso owa hn shɨ yok ɨtso eshɨbo uje ye olotiis uje Jesús tata. Shɨ eeychãha Porrosht. Erze uje Jesús tata hn erze uje profeta otata wɨr uje Porrosht Ɨchɨbich tatɨm õr.—
\s Yet tãra poõrc iyãha kabehet poro.
\p
\v 11 Esee hn takachɨm poõrc uje sɨtsẽr ɨre hn tokomo kabehet uje poro. Ese uje iyãha ese kabehet ɨr iich otsɨɨ shish yakaha uje tata hn shish ũru. Uje sepyẽr oso uje oshiyokõr mɨhnũwo hn uje tatsɨkɨ̃r õr ich shish shiyokõr uje ich om.
\v 12 Ɨr ɨle eyhi ich hũre shɨ ɨtso jwekɨta yokacha, hn erze õr wolo uje reye oyãha wɨchɨ iyãha ich kɨhniya. Ɨr iich de eeych uje nĩhyok yeẽk chɨraha, shɨ ɨre uje chɨraha.
\v 13 Erze ɨr ɨshuwo uje iyãha shɨ ɨtso uje otsakɨhɨ dɨkɨrmɨsta ehet hn ochiyuhu. Ese uje iyãha kabehet ɨr iich otsɨɨ Porrosht ahwoso.
\v 14 Ohyerptoso oyehe wɨchɨ nẽr uje otãra poõrc. Wɨr ich õr ɨshuwo ye warɨ̃rsh hn poro. Oyãha kabyuhwo poro.
\v 15 Ese õr bahlut espada tokolɨhɨ ɨr ahwo uje ich watakpa par nos ihyo wɨr dihipo uje otɨrẽt otãra ɨ̃rmo lekɨtiyo. Wɨchɨ shiyokõr shɨ ɨtso yeẽk uje tarãha uva hnɨmich hn chiyuhu ɨr otich pork Porrosht uje ukurbo deyo de ich sɨtak pɨshɨ õr. Wɨchɨ tyenɨj tɨbey ɨ̃rmo oso nehe hn uje yeẽk shiyokõr uje ich mɨ̃hnɨk ich sepyẽr chɨ̃ra pyerɨt ɨtso pohɨrkɨta.
\v 16 Ese uje iyãha kabehet iich de ɨr nerpta eeych hn de ɨtero eeych toy. Ɨr iich otsɨɨ wɨchɨ uu rey õr bahlut pisht hn erze ɨrhẽ õr bahlut toy.
\p
\v 17 Esee hn tokomo anjel yet uje iyehetɨhɨchɨs par deeych chihit. Wɨchɨ tɨbich ich sɨhnew tɨbii erze chɨpɨrme uje iyohochɨs poõrc pehet ɨm:
\p —Erẽtlo par uje aaklo elɨlo poso uje Porrosht ɨshɨm olak.
\v 18 Tyenɨj elɨlo erze reye õr ẽro hn tyenɨj elɨlo erze ohyerptoso õr bahluwo õr ẽro hn erze uje õr ukurbo deyo de hn elɨlo erze kabyuhwo ẽro hn erze uje oyãha. Tyenɨj nos elɨlo wɨr õr ẽro erze oso kɨmɨjɨ õr yɨlo o kɨmɨjɨ ye õr yɨlope, kɨmɨjɨ õr deyo o kɨmɨjɨ õr ijaabo.—
\p
\v 19 Esee hn tokomo ese loshɨpɨt uje tokolɨhɨ onoota bahluta hõr wɨr reye hn erze ohyerptoso uje otãra ɨ̃rmo lekɨtiyo. Wɨr otakɨsho lawich par otatskɨr ese uje iyãha kabehet hõr wɨr ohyerptoso.
\v 20 Uje oteye hn ochishew ese loshɨpɨt uje tokolɨhɨ onoota bahluta hn ese profetɨt uje shiyokõr kuche uje ye latɨk pwele niyokõr par sehnyẽr oso. Shɨ uje ese loshɨpɨt de ɨre ahɨr ich pwele shiyokõr shuu ɨtsorz. Shish sehnyẽr erze oso uje ese loshɨpɨt yarta de õr hn oteeychãha ese loshɨpɨt ɨr kojach pɨt uje seẽt ɨre. Ochishew ese loshɨpɨt uje tokolɨhɨ onoota bahluta hn ese profetɨt uje sehnyẽr oso hn otãra õr ochɨmchaha õr urhuta bahluta ehet shɨ õr ɨka. Asufre dechɨ uje duhlu.
\v 21 Ese uje espada tãra ahwo hn iyãha ese kabehet shuu erze oso yewo chɨ̃ra õr ese espada shuu otoy. Nos wɨr chɨpɨrme tew erze oso õr ẽro nehech ɨr ɨje yenpa.
\c 20
\s Cristo masaha par rey.
\p
\v 1 Esee hn tokomo anjel uje ihnɨmich tãra poõrc. Wɨchɨ tõhwa yabe par sɨtsẽr ese jotsɨt ebich uje ye uhurtɨkɨsh. Kenent dich de ɨr hmata.
\v 2 Ese anjel chishew ese loshɨpɨt. Wɨchɨ ese echeẽt uje dekite iich otsɨɨ dyablo hn Satanás. Shiyeru chɨ̃ra ese kenent par uje ye tokolpe nehech mil ãyo
\v 3 hn tãra chɨmchaha ese jotsɨt hn shiyeru ebich. Chɨbɨte yarta ese jotsɨt ɨr uhurrza par uje ye odɨtserpe par uje ye wɨchɨ nehnyẽr erze oso uje ode ɨ̃rmo lekɨtiyo par erze mil ãyo uje shɨ sakahachɨs. Uje terɨhɨ mil ãyo ich tyenɨj ochiyuhu ɨre par daalo arhaabo.
\p
\v 4 Esee hn tokomo õr ɨbe hn erze uje otsakaha eeyo. Porrosht ɨshɨm õr ukurbo par otsepyẽr erze uje oshiyokõr mɨhnũwo. Tokomo wɨr õr ɨchɨbiyo toy erze uje ochekshehe õr etɨbiyoni shɨ pork ye olotiis uje Jesús tata hn uje Porrosht tata. Wɨr ye oteeychãha ese loshɨpɨtpe uje tokolɨhɨ onoota bahluta hnii ese kojach pɨt uje seẽt ɨre hnii uje ochɨbɨte ese loshɨpɨt yarta õr une o kɨmɨjɨ õr hme. Wɨr õr ɨkpo hn oshiyokõr Cristo ɨr ɨbiyo uje Cristo tɨbey oso nehe nehech mil ãyo.
\v 5 Wɨchɨ webich osht uje õr ɨkpo, per erze yewo uje ye odɨraha Porroshtpe ye õr ɨkpope nehech iyuwe erze mil ãyo. Erze uje ochɨraha Porrosht wɨr uje õr ɨkpo wap.
\v 6 Ich om par erze uje õr ɨkpo wap pork wɨr Porrosht aabo. Ye otɨ̃r urhuta bahlutpe. Uje otãra yeẽk ochɨmchaha urhuta bahluta ehet otata otsɨɨ toypo. Erze Porrosht aabo wɨr shɨ Porrosht hn Cristo õr ɨbiyo uje iich otsɨɨ saserdote par oshiyokõr õr ɨbiyo. Wɨr Cristo ɨbiyo par otɨbey oso uje ode ɨ̃rmo lekɨtiyo ese mil ãyo.
\s Porrosht tyenɨj sepyẽr Satanás nehe.
\p
\v 7 Esee uje terɨhɨ mil ãyo ich otsɨtsẽr ese jotsɨt ebich uje Satanás de.
\v 8 Tokolɨhɨchɨs par hno tɨ̃r ɨ̃rmo lekɨtiyo par sehnyẽr oso. Hno tɨ̃r ese hnɨmich uje iich otsɨɨ Gog hn ese hnɨmich yet uje iich otsɨɨ Magog par shuu nos wɨr oso otakasho lawich par otatskɨr. Wɨr ich okɨhnipa shɨ õr ɨtso hnɨmich ukult uje de onoota bahluta wɨrc.
\v 9 Nos otãra ɨr hnɨmoho lekɨtiyo otakasho lawich hn ohno otɨ̃r Jerusalén uje Porrosht sahmũr. Porrosht aabo odebuhu Jerusalén wɨro. Erze oso ochɨpeẽsa Porrosht aabo hn ese dɨt par sehe onɨhna õr per jwekɨta tãra poõrc kayɨhɨ õr eeyo hn nos õr duhlu.
\v 10 Ese dyablo uje sehnyẽr oso ich otãra ochɨmchaha asa urhuta bahluta ehet uje asufre de. Ochɨmchaha ese loshɨpɨt wapkite uje tokolɨhɨ onoota hn ese profeta uje sehnyẽr oso. Wɨr shish odechɨ deeych hn dɨhlak. Ochuuna erze uje ich doso hn ye uhurtɨkɨsh.
\s Jwe sepyẽr nos wɨr uje ye õr Porrosht aabope.
\p
\v 11 Esee hn tokomo õr ɨbɨta data waa je poro. Yeẽk sakaha eeych. Ese hnɨmich hn poõrc ich sɨhna ɨre.
\v 12 Nos tokomo wɨr topo deyo hn ijaabo oyehe jwe ɨkɨch uje sakaha debɨta eeych. Ese jwe shuu yeẽk sehek erze hute, hn sehek hutɨta yata toy. Wate uje wɨr õr iiyo de erze uje õr ɨkɨrĩt de uje yelɨj nɨhna ɨre. Esee hn nos wɨr kuche uje oso oshiyokõr uje ehn yahpaa otoy ich nos ochichewni ochɨbɨte erze hute. Ese jwe shuu otsepyẽr õr kal nohmɨr nohmɨr par nos wɨr kuche uje de erze hute pork wɨr uje oshiyokõrni.
\v 13 Nos wɨr uje otoni otokolɨhɨ onoota bahluta hn yewo otokolɨhɨ hnɨmich uut hn otokolɨhɨ ese topo õr ɨchɨbiyo owich. Nos sepyẽr õr par erze kuche mɨhnũwo uje oshiyokõrni.
\v 14 Ese uje shuu oso otoy hn ese owich uje topo õr ɨchɨbiyo deni otãra ochɨmchaha urhuta bahluta ehet. Asa urhuta bahluta iich otsɨɨ toypo.
\v 15 Nos wɨr uje ye õr iiyo chɨhɨ asa hutɨtape uje wɨr õr iiyo de erze uje õr ɨkɨrĩt de uje yelɨj nɨhna ɨre, ich otãra õr ochɨmchaha õr asa urhuta bahluta ehet.
\c 21
\s Juan teychɨm poõrc ahle hn ɨ̃rmo ahle.
\p
\v 1 Esee hn tokomo poõrc uje ahle hn tokomo ɨ̃rmo uje ahle toy pork uu poõrc webich osht hn hnɨmich ich nos sɨhna ɨre hn asa onoota bahluta ich nĩhyok.
\v 2 Tokomo dɨt uje tãra Porrosht ahɨr wahacha poõrc hn ihnɨmich. Ese dɨt ye kuche mɨhnũwo chɨhɨ ehetpe. Ɨr iich otsɨɨ Jerusalén ahle. Wɨchɨ ich ɨhɨ̃rtpa shɨ ɨtso uje onɨshii tɨmcharrza par chiilabey.
\v 3 Tukunt ahwoso uje ich sɨhnew tãra ese Porrosht ɨbɨta tata ɨm: —Ẽrlo yok. Ele ahle Porrosht ihyuch dechɨ oso õr ahɨr hn wɨchɨ debuhu õr ahɨr. Wɨr Porrosht ɨr iiso hn wɨchɨ uu õr Porrosht.
\v 4 Wɨchɨ nos churhũ õr ɨlote hn ich ye otope. Nĩhyok uje õhyiye hn nĩhyok uje oyerh hn nĩhyok uje doso pork nos wɨr kuche uje antkite de nihyokɨ̃hɨ wahacha.—
\p
\v 5 Porrosht uje sakaha debɨta eeych tata ɨm: —Ẽrlo yok. Yok ich nos tiyokõr erze kuche ahlo.— Tatɨm yok toy ɨm: —Atsew ebɨte hutɨta pork ahnũwo ahwoso ich ũru hn tyenɨj yakaha.—
\v 6 Tatɨm yok ɨm: —Ich nos tɨmɨtɨke. Yok uu webich osht hn uu uhurzosht shɨ ɨtso letra a hn zeta. Ese uje iich sẽhi tokosɨm ɨre awɨt tuu ɨhɨ. Ese awɨt wɨchɨ uje tõhwa õr ɨkɨrĩt uje yelɨj nɨhna ɨre. Wɨchɨ ye bahatɨkɨsh.
\v 7 Ese uje serz ich tokosɨm ɨre ese premit. Ese premit wɨchɨ yok uu ɨr Porrosht hn ɨre yok pijo.
\v 8 Per erze uje otola hn erze uje otsotiis, hn erze uje oshiyokõr uje ye tahmũrpe, hn erze uje oshuu yewo oshuu otoy, hn erze uje ye onõyhi pɨshye ahɨrpe, shɨ omuhuye ahɨr, hn erze uje otorãhaye, hn erze uje õyhi yẽr ahɨr, hn erze uje õyhiye ahɨr, hn erze uje otsahat loshɨpo, hn erze uje oshɨm ɨre loshɨpo par oshuu sahat ɨre, hn nos wɨr meriko, hn erze uje oteeychãha kojano po, hn nos wɨr erze uje ich õr kushĩyo nos wɨr õr ɨre otserz. Õr premyo wɨchɨ uje tyenɨj otɨ̃r urhuta bahluta ehet uje asufre duhlu. Asa urhuta bahluta iich otsɨɨ toypo.—
\s Jerusalén ahle.
\p
\v 9 Esee hn erze anjele uje õr syete uje õr basɨ de uje syete uje erze kuche mɨhnũwo uje syete de aho uje yuwɨrke uje nos otsorɨ̃hɨ ɨ̃rmo ese yet tatɨm yok ɨm: —Erẽt. Tokowa owa waa je ɨtso Obejɨt ɨr ihyãta.—
\v 10 Porrosht Ɨchɨbich shuu takachɨm erze uje anjel tatɨm yokɨke. Ese anjel hnoy yok seya yok kojach eeych uje ich dich hn de porĩt hn sowa yok ese dɨt uje mɨhnũwo nihyokɨ̃hɨ ehet uje iich otsɨɨ Jerusalén. Tãra Porrosht ahɨr wahacha poõrc hn ihnɨmich.
\v 11 Ese dɨt ich hũre shɨ ɨtso Porrosht uje hũre hn shɨ ɨtso kojach uje ich ɨhɨ̃rt hn debich uje iich otsɨɨ jaspe uje pwele oteychɨm pɨt ɨtso ese kojach yet uje iich otsɨɨ cristal.
\v 12 Moraylt uje ich berzak chɨpeẽsa ese dɨt. Ese moraylt ɨr uhɨr dose hn kal uhɨr anjel iyehe. Erze uhɨr israel oso õr poruwo wɨshɨ õr iiyo de uje õr dose kal nohmɨr nohmɨr.
\v 13 Ɨr uhɨr tre de deeych warĩch hn tre de norte hn tre de sur hn tre de uje deeych yakaha.
\v 14 Ese moraylt sakaha erze kojano eeyo uje dose. Ese Obejɨt ɨr apóstole õr iiyo de erze kojano kal nohmɨr nohmɨr.
\p
\v 15 Ese anjel uje keytkẽr yok hnoy oro uje ɨtso phich par sɨteẽta ese dɨt hn sɨteẽta uhɨr hn ese moraylt.
\v 16 Ese dɨt uu ɨr wɨro nos ɨtsye. Ɨr ehet hn uje berzak ich ɨtsye. Ese anjel sɨteẽta ese dɨt chɨ̃ra ese phich shuu do mil do syento kilometro. Ɨr ehet hn uje berzak hn porĩt shɨ ɨtsye.
\v 17 Sɨteẽta ese moraylt toy. Wɨchɨ sesenta y sinko metro uje de porĩt. Sɨteẽta chɨ̃ra namikɨt ɨtso hnakɨrbich meykɨt.
\v 18 Ese moraylt oshiyokõr ochɨ̃ra kojach uje iich otsɨɨ jaspe. Ese dɨt pur oro hn shɨ ɨtso pejta waa je ye warɨ̃rsh.
\v 19 Ese moraylt sakaha kojano eeyo. Wɨr ich ɨhɨ̃rts pisho hn ich debich. Ese moraylt chɨpeẽsa ese dɨt. Uu kojach webich osht iich otsɨɨ jaspe. Ese kojach uje de ese webich osht eeych iich otsɨɨ zafiro. Ese kojach yet uje de ese osiyer eeych iich otsɨɨ ágata. Ese kojach yet uje de ese tre eeych iich otsɨɨ esmeralda.
\v 20 Ese kojach yet uje de ese kwatro eeych iich otsɨɨ ónice. Ese kojach yet uje de ese sinko eeych iich otsɨɨ cornalina. Ese kojach yet uje de ese seys eeych iich otsɨɨ crisólito. Ese kojach yet uje de ese syete eeych iich otsɨɨ berilo. Ese kojach yet uje de ese ocho eeych iich otsɨɨ topacio. Ese kojach yet uje de ese nueve eeych iich otsɨɨ crisoprasa. Ese kojach yet uje de ese dye eeych iich otsɨɨ jacinto. Ese kojach yet uje de ese onse eeych iich otsɨɨ amatista.
\v 21 Erze ɨr uhur uje dose oshiyokõr ochɨ̃ra ese kojach uje iich otsɨɨ perla. Kal ɨr uhɨr perla nohmɨra. Ese dɨt ehet dehet de uje ich dich, pur oro hn shɨ ɨtso pejta waa je ye warɨ̃rsh.
\p
\v 22 Nĩhyok ye tokomo templo uje chɨhɨ dɨt ehetpe pork ese eyok Ɨrhĩch Porrosht uje ukurbo deyo de wɨchɨ templo hn ese Obejɨt.
\v 23 Ese dɨt ye nesitpe uje deeych chihit hnii shekurko pork shɨ Porrosht yokõrt wɨchɨ uje chihit hn ese Obejɨt wɨchɨ shɨ ɨtso nampyon uje de ese dɨt.
\v 24 Ese dɨt hũre ɨtsorz heke nos chihit wɨr oso uje ode ɨ̃rmo lekɨtiyo hn wɨr odɨrkɨhɨ ɨr yokõrt. Erze reye uje ode ɨ̃rmo lekɨtiyo ohnoy ɨr kuche uje ich ɨhɨ̃rtso otseya ese dɨt.
\v 25 Ese dɨt ye odihyeru ɨr uhɨrpe uje deeych, hn nĩhyok uje dɨhlak.
\v 26 Nos wɨr dihipo uje ode ɨ̃rmo lekɨtiyo ohnoy ɨr kuche uje ich ɨhɨ̃rtso otseya ese dɨt,
\v 27 per nĩhyok kuche uje ich mɨhnũwo masaha ehet. Erze uje oshiyokõr uje ich mɨhnũwo ye omasaha ehetpe hn erze uje ich õr kushĩyo. Shɨ wɨr omasaha erze uje õr iiyo de asa hutɨta uje õr ɨkɨrĩt de uje yelɨj nɨhna ɨre. Asa hutɨta Obejɨt ɨr huto.
\c 22
\p
\v 1 Ese anjel sowa yok asa onoota waa je ich nimpyo shɨ ɨtso kojach uje iich otsɨɨ cristal. Asa onoota tokolɨhɨ ese Porrosht hõr ese Obejɨt õr ɨbɨta hn uushɨ
\v 2 chɨkãha ese dehet dich ehet. Ɨr wɨro pohɨr de uje shuu õr ɨkɨrĩt de uje yelɨj nɨhna ɨre. Kal shekurko ɨr ee de hn erze ɨr ĩhyo ich shuu nos oso uje ode ɨ̃rmo lekɨtiyo õr owich om.
\v 3 Erze ɨ̃rmo ɨlaro Porrosht sajɨr ɨkiyokite per ese ɨ̃rmo ahle Porrosht ye dajɨr ɨkiyope. Porrosht hõr ese Obejɨt õr ɨbɨta de ese ɨ̃rmo ahle, hn ɨr ɨbiyo shish oteeychãha ɨre.
\v 4 Wɨr oteychɨm Porrosht ɨle hn ɨr iich de õr une.
\v 5 Ese ɨ̃rmo ahle ich nĩhyok uje dɨhlak. Ye õr nesita nampyonpe hnii deeych par chihit õr pork eyok Ɨrhĩch Porrosht ɨr yokõrt chihit õr. Ich shish nos õr ɨtso rey hn shish odechɨ.
\s Ich yej terɨhɨ uje Jesús cheeshpo.
\p
\v 6 Esee hn anjel tatɨm yok ɨm: —Erze ahwoso ich ũru hn ich tyenɨj yakaha. Eyok Ɨrhĩch Porrosht wɨchɨ uje shuu erze ɨr profeta otatɨm erze oso lahwoskite. Wɨchɨ shuu ɨr anjel sowa laabo erze mɨhnũwo uje tyenɨj tɨ̃r ɨ̃rmo shɨchish nehe.
\p
\v 7 Jesús sole: “Ẽrlo yok. Tyenɨj tɨkɨrẽt shɨchish. Ich om par erze uje oshiyokõr uje asa hutɨta tata.”—
\p
\v 8 Yok Juan. Tukunt erze kuche hn tokomo erze kuche. Uje tukunt hn tokomo erze, ich tokotsa pɨte hnɨmoho ese anjel ɨle ɨkɨch par tɨkeeychãha ɨre pork sowa yok erze kuche,
\v 9 per ese anjel tatɨm yok ɨm: —Ye ahakõr uhu ɨlorz. Shɨ yok Porrosht ɨbɨk ɨtso owa hn yok ɨtso erze eshɨbo uje õr profeta hn yok ɨtso erze uje oshiyokõr uje asa hutɨta tata. Eeychãha Porrosht.—
\v 10 Hn tatɨm yok toy ɨm: —Uhu nos odɨraha uje asa hutɨta tata pork ich yej terɨhɨ ɨshɨrĩt uje erze ahwoso yakaha.
\v 11 Moym erze uje õr ɨluu mɨhnũ yakaha õr par shɨ oniyokõr uje ich mɨhnũwo. Moym erze uje oshiyokõr mɨhnũwo shɨ õr ɨtso erze hnakɨrbo hn tɨmcher uje oshiyokõr mɨhnuwõhoye par uje shish oshiyokõr oshuu ɨtsorz. Per erze uje oshiyokõr uje ich om ich shish tyenɨj oshiyokõr uje ich om hn erze uje oshiyokõr uje Porrosht sahmũr ich shish tyenɨj oshiyokõr uje Porrosht sahmũr.
\p
\v 12 Jesús sole: “Ẽrlo yok. Tyenɨj tɨkɨrẽt shɨchish hn tokõhwa premyo par tokosɨm pɨbiyo shɨ ɨtso uje otserz nohmɨr nohmɨr.
\v 13 Yok uu webich osht hn uhurzosht shɨ yok ɨtso letra a hn zeta.
\p
\v 14 Ich om par erze uje oshiyokõr uje Porrosht sahmũr shɨ ɨtso uje ochũrhu lasuwo par uje õr pwele otew asa pohorrza ee waa je shuu õr ɨkɨrĩt de uje yelɨj nɨhna ɨre hn par uje ochɨkãha ese moraylt ɨr uhurrza hn otɨ̃r ese dɨt ehet.
\v 15 Nos wɨr uje oshiyokõr uje ich mɨhnũwo ye omasaha ese dɨt ahltpe pork õr ɨre ode urhuta bahluta ehet. Wɨr shɨ õr ɨtso poyto. Nos wɨr meriko hn konsaho ode urhuta bahluta ehet, hn nos wɨr erze uje ye onõyhi pɨshye ahɨrpe, shɨ omuhuye ahɨr, hn erze uje otorãhaye, hn erze uje õyhi yẽr ahɨr, hn erze uje õyhiye ahɨr, hn erze uje otsahat loshɨpo, hn erze uje oshɨm ɨre loshɨpo par oshuu sahat ɨre, hn erze uje oshuu yewo oshuu otoy, hn erze uje oteeychãha kojano po, hn nos wɨr erze uje otsahmũr otsehnyẽr yewo, hn erze uje otata lekushiĩ nos ode urhuta bahluta ehet.
\p
\v 16 Yok Jesús. Tuu yok anjel hno tɨ̃r owa par shuu atsew erze ahwoso hn asɨm erze iglesya. Yok porokkite wɨchɨ rey David. Shɨ yok ɨtso porrzeebcha bahluta waa je deeych huta ich tokole.”—
\v 17 Porrosht aabo wɨr õr ɨtso ese Obejɨt ɨr ihyãta. Porrosht Ɨchɨbich hn erze uje õr ɨtso Obejɨt ihyãta otɨbii otsɨɨ: —Erẽt.— Ese uje chunt uje yeẽk ler asa hutɨta ich tɨbii Jesús ɨm: —Erẽt.— Ese uje iich sẽhi ich tyenɨj tɨrẽt hn ese uje sahmũr ich tyenɨj ɨhɨ ese awɨt uje shuu õr ɨkɨrĩt de uje yelɨj nɨhna ɨre. Wɨchɨ ye bahatɨkɨsh.
\p
\v 18 Titɨm olak nohmɨr nohmɨr uje ẽntlo uje asa hutɨta tata uje erze mɨhnũwo tyenɨj tɨ̃r ɨ̃rmo nehe. Kɨmɨjɨ yeẽk duhu ahwoso kɨnãho nõya erze Porrosht ahwoso ich erze kuche mɨhnũwo uje asa hutɨta tata uje Porrosht shuu tɨ̃r ɨ̃rmo nehe ich tɨ̃r ɨre toy.
\v 19 Kɨmɨjɨ yeẽk diyuhu ahnũwo ahwoso nohmɨramo uje de ana hutɨta uje tata uje Porrosht shuu mɨhnũwo tyenɨj tɨ̃r ɨ̃rmo nehe ich ye Porrosht duhu tew erze pohɨr ee uje shuu õr ɨkɨrĩt de uje yelɨj nɨhna ɨre hn ye dosɨm ɨre owichpe uje de ese dɨt Jerusalén ahle. Ana hutɨta tata ese dɨt hn erze pohɨr.
\p
\v 20 Jesús wɨchɨ uje tatɨm eyok erze kuche hn wɨchɨ tata ɨm: —Titɨm olak uje ich ũru. Tyenɨj tɨkɨrẽt shɨchish.— Titɨm Jesús too: —Yehe wɨchɨ. Õryok Ɨrhĩche Jesús, erẽt.—
\v 21 Sehe tuu eyok Ɨrhĩch Jesús nos dosɨr olak uje olak Porrosht aabo. Shɨ ahnũwo uje titɨm olak.