\id GAL
\h GÁLATAS
\mt Jí² gasii¹in San Pablo tɨ́ɨ²i tsá² 'in néei¹ Galacia 
\c 1
\s Siin¹in Poo² 'e jí² lo tɨ́ɨ²i 'in jai'² lɨ́ɨi² Cristo néei¹ Galacia
\p
\v 1 Jna‑a, Poo², sɨ́ɨ³na 'e jí² lo. Joon lɨ́ɨ¹na apóstol, joon jon' tsá² 'in nigatyiin'¹³ jna la joongɨ jon' tsá² 'in nigasiin¹in jna pe Jesucristo coon'¹³ Dios Jmii²¹ nigatyiin'¹³ jna joon 'ii nigasiin¹in jna. Joon Dios Jmii²¹ gajmaa¹a jiin'¹ Jesucristo do jee²¹² 'lɨɨ²¹². 
\v 2 Jna, Poo², coon'¹³ 'in tsaru'¹u' catyaai² 'in taain²¹² coon'¹³ jna lo, sii²¹ jna'a 'e jí² lo tya' 'in tsá² jai'² lɨ́ɨi² Cristo néei¹ coon²¹ lɨ sii²¹ Galacia. 
\v 3 Cwauncwaai'³ Dios Jmii²¹ 'naa' joon cwoseen²¹mo 'naa' tyʉ́²‑ʉ tyaníi¹i coon'¹³ Ña'ñʉ'¹ʉ' Jesucristo.
\v 4 Joon Jesucristo do gajaan'²¹mo 'ña'a ijuun¹in 'wii'¹³ tsaa² tyijna' 'e coon'¹³ la joon lí² láa²mo jna' 'e juncwii²¹ gó² lo jiin'¹³ la nigali'iin²¹²in Dios Ñʉ'¹ʉ' tyii' jmáa¹a.
\v 5 ¡Cwoun'goo²¹o tsá² Dios coon²¹ tøø²mo! Amén.
\s Jo 'e sá¹ júu³ xiia'²¹ wa' lí² jmá¹ tiin'¹³ tsá²
\p
\v 6 Tsa'goo²¹‑tsii 'áai¹ tsʉ jmoono nigatiui² 'naa' Dios 'in nitø'²ø 'naa' coon'¹³ 'e nigajmaa¹a Cristo 'wii'¹³ 'naa', joon niga'láa² 'wii²¹² jmaa²aa' nʉ́ʉ¹³ʉʉ' coon²¹ júu³ xiia' wa' lí² jmá¹ tiin'¹³ tsá².
\v 7 Pe jo 'ee júu³ xiia' sá² 'e la jai'² wa' lí² jmáa¹a tiin'¹³ tsá². Pe seen²¹mo 'inlɨ́ɨi¹³ 'in untyíi² 'naa' joon 'iin²¹²in 'in tsá² do unsɨɨ²i 'e júu³ tyʉ́² tya' xiaala jmoo¹o Cristo tiin'¹³ tsá².
\v 8 Pe wana cwo'¹ tsá² 'naa' coon²¹ júu³ tya' 'e tiin'¹³ tsá² 'e sɨsɨ́ɨ²i lagɨ 'e júu³ tya' Cristo 'e ga'ii'¹³ 'naa' 'e gacwóo¹³o'o 'naa', cwojmee'²¹mo Dios 'ii xʉfiin'¹³ jna 'ñii'a sɨ jaain²¹ ángel jó¹ fu ñʉ'fú² 'ee.
\v 9 Joon la nigafo'²oo la mo jée¹ joon nano fo'²oo tún¹: wana cwo'¹ 'inlɨ́ɨi¹³ tsá² 'naa' júu³ tya' 'e tiin'¹³ tsá² 'e sɨsɨ́ɨi² lagɨ 'e júu³ 'e ga'ii'¹³ 'naa', cwojmee'²¹mo Dios 'ii.
\p
\v 10 Mo fo'²oo la joon, ¿tɨ lɨ́ɨ²naa' 'e 'iin²¹²na liseen²¹na tyʉ́² coon'¹³ tsá² sɨ coon'¹³ Dios 'ee? ¿Tɨ lɨ́ɨ²naa' 'e jmóo³oo jmaai'¹³ 'e tɨ́²‑tsi tsá²? Tsʉ wana jmóo³oo jiin'¹³ 'e tɨ́²‑tsi tsá² jo lɨ́ɨ¹na tsá² 'in jmoo¹o jiin'¹³ la to² tyʉ'² Cristo.
\s Xiiala galɨ́² 'e líi²in Poo² apóstol
\p
\v 11 Pe cwoliñí² 'naa', tsáru'¹u', jo gajooin²‑tsi tsá² 'e júu³ tyʉ́² tya' 'e tiin'¹³ tsá² 'e cwóo³oo.
\v 12 Jo ga'ii'¹³na 'e júu³ do wa' tya' jiin'¹³ jaain²¹ tsá², jon'gɨ wa' tsá² ga'e'²e jna, pe 'ña'a Jesucristo gajmaa¹a 'e liñí³ii.
\p
\v 13 Joon niganʉʉ² 'naa' xiiala nigajmáa³aa la mo jéei¹ mo gaun'góo³oo Dios coon'¹³ la tɨɨsi'² tya' tsá² Israel. Ñí³ 'naa' xiaala ga'øø²na coon'¹³ 'e 'gøøi'¹³ tya' 'in tsá² jai'² lɨ́ɨi² Cristo 'in gatyiin'¹³ Dios. Joon gali'iin²¹²na wa' 'íin²na 'in jai'² lɨ́ɨi² Cristo coonti. 
\v 14 Joon cwáain¹ tya' 'e tɨɨsi'² tya' tsá² Israel gacwán¹na lɨ́ɨ¹gɨ lagɨ 'in tsá² góo³oo 'in coon²¹ røø²na coon'¹³, tsʉ jna‑a gajmáa³gɨɨ coon'²¹ tún² la tɨɨsi'² tya' tsacøøi'¹³ tyiia.
\v 15 Pe Dios nigatyiin'¹³ jna la ñʉ'gɨ iliseen²¹na, joon gatø'²ø jna coon'¹³ 'e feei'¹‑tsi tyiia. Joon mo galɨ'yaai¹‑tsi, 
\v 16 gajmaa¹a 'e licwii¹na Jóon¹on, 'e coon'¹³ la joon ilijmaa'¹³aa júu³ tsá² jo seein²¹ Israel 'e júu³ tya' 'e tiin'¹³ tsá². Joon mo galɨ́² jilaa'²¹ 'elo, jo 'iin gaunngɨ́ɨ³ɨɨ jiin'¹³ jaain²¹,
\v 17 jon'gɨ wa'a gangó³oon Jerusalén wa'a ngajøø²¹²na 'in tsá² do 'in lɨ́ɨi¹ apóstoles la jéei¹gɨ lagɨ jna. Lɨ' cɨɨ'¹³ɨ gajmáa³aa, gangó³oon la jmoono fu coon²¹ lɨ sii²¹ Arabia joon mo ngayuui'¹³ joon gangó³oon fu Damasco tún¹.
\p
\v 18 Joon mo ningó¹ 'nɨ¹ jiin²¹ gangó³oon fu Jerusalén. Joon galicwii¹na Tʉ́³ joon gataan²¹²na dya'ñá² jmɨɨ²¹² coon'¹³on.
\v 19 Pe jo 'in apóstoles catyaai² do gamáa¹na jiin'¹³ Jacobo 'in ruui'²¹ Ña'ñʉ'¹ʉ'.
\v 20 Joon tyani Dios fuu²¹²uu 'naa' 'e la jai'² 'e júu³ lo.
\p
\v 21 Mo galɨcɨɨin²¹gɨ joon gangó³oon coon²¹ lɨ sii²¹ Siria coon'¹³ lɨ sii²¹ Cilicia.
\v 22 Joon 'in tsaru'¹u' 'in jai'² lɨ́ɨi² Cristo 'in néei¹ lɨ sii²¹ Judea jo mo gangaa¹i jna jiin'¹³ coon²¹ naa'¹³. 
\v 23 Jiin'¹³ nigajmaa¹a 'in tsá² do júu³ jin'²in: “'In tsá² 'in niga'øøi² jna' la mo jéei¹, nano ngɨɨ¹ɨ to² cwo¹ 'e júu³ tyʉ́² 'e jo'² lɨ́ɨ²na' lo. Cwo¹ 'ido 'e júu³ tyʉ́² 'e la mo jéei¹ gali'iin²¹²in wa' 'íin²mo.” 
\v 24 Joon gacwo'¹o 'in tsá² do 'maai'¹³ Dios cwáain¹ tyiajna. 
\c 2
\s Ga'ii'²¹ 'in apóstoles catyaai² do Poo²
\p
\v 1 Joon mo gangɨ́ɨi¹gɨ dyatyʉ́² jiin²¹ joon gangó³oon tún¹ Jerusalén coon'¹³ Bernabé. Joon gajée¹moo jon Tito. 
\v 2 Gangó³oon tsʉ Dios gajma'²a jna júu³ 'e 'ná¹ ní³ii. Joon fu Jerusalén do ga'e'³ee 'in tsá² do 'e júu³ tyʉ́² 'e nigacwo'²oo 'in tsá² 'in jo seein²¹ Israel. Pe ga'e'³ee lɨ' coon'²¹ 'in lɨ́ɨi¹ tsacøøi'¹³ jee²¹² 'ii tsʉ jo gali'iin²¹²na wa'a 'e to² 'e nigajmáa³aa sɨ 'e to² ijmáa³aa 'ee ilí² jo 'ee to² tí².
\v 3 Joon 'in Tito do, xʉfiin'¹³ jo lɨ́ɨ¹i tsá² seein²¹ Israel do, jo galɨ́² wa'a 'ii'²¹in 'ido 'e li² circuncisión, 
\v 4 xʉfiin'¹³ 'inlɨ́ɨi¹³ tsá² do gali'iin²¹²in wa'a 'ii'²¹in Tito do 'e li² do. Joon 'in tsá² do, 'in gali'iin²¹²in la joon, jo lɨ́ɨ¹i tsaru'¹u' la jai'², jiin'¹³ ga'í² jee²¹² jna'a 'uun²¹mo. Ga'í² 'in tsá² do jee²¹² jna'a wa'a ilí² jøø²ø xiaala galáai² Cristo Jesús jna'a la to² tyʉ'² ley do, joon 'iin²¹²in wa'a lí² 'ñúu¹i jna'a coon'¹³ ley do tún¹.
\v 5 Pe jiin'¹³ catá² jo gacwóo¹³o'o wa'a jée¹i jna'a, tsʉ gali'iin²¹²moo'o 'e lí² 'e 'oo²gɨɨ' 'e júu³ jai'² do tya' 'e tiin'¹³ tsá².
\p
\v 6 Joon 'in tsacøøi'¹³ do jo gatsaa'²¹a jiin'¹³ coon²¹ wa'a lí² un'láai² 'e júu³ tyiia. Pe cwáain¹ tyiia jo 'ee tsa'goo¹‑tsii tya' 'in tsacøøi'¹³ do tsʉ jo jmoo¹o Dios 'ii'²¹ coon'¹³ 'e ní² tsá².
\v 7 Xʉ la wa'a tsa'láai² júu³ tyiia, galiñí² 'in tsá² do 'e nigacwo'¹o Dios jna 'e to² do wa'a cwo'³oo 'in tsá² jo seein²¹ Israel 'e júu³ tyʉ́² tya' 'e tiin'¹³ tsá². Nigacwo'¹o Dios jna 'e to² do jiin'¹³ la nigacwo'¹o Tʉ́³ to² wa'a cwo'¹o tsá² 'e júu³ tyʉ́² do tya' tsá² Israel.
\v 8 Tsʉ coon²¹ røø²¹ 'in Dios 'in nigasii¹in Tʉ́³ lɨ́ɨi¹ apóstol jee²¹² tsá² Israel, 'ii jon nigasii¹in jna lɨ́ɨ¹na apóstol jee²¹² tsá² 'in jo seein²¹ Israel.
\p
\v 9 Tsʉ 'wii'¹³ joon, Jacobo, coon'¹³ Tʉ́³ coon'¹³ Wó³, 'in lɨ́ɨi¹ 'in tyiin²gɨ jee²¹² 'ii, mo galiñii¹i xiiala nigajmaa¹a Dios coon'¹³ jna, gason'¹on cwóo³oo coon'¹³ cwoo²¹ Bernabé lawa coon²¹ li² 'e røø²¹ sɨɨ²¹ɨ'ɨ coon'¹³on. Sɨɨ²¹ɨ'ɨ røø²¹ wa'a tsá² jna'a 'e tsajmoo²¹o'o to² jee²¹² 'in tsá² jo seein²¹ Israel la 'ɨɨ²¹² tsajmaa¹a 'ido to² jee²¹² tsá² Israel do.
\v 10 Gamɨɨ¹o wa'a jiin'¹³ jo 'íin²‑tsii'i 'in tsá² tañíi² do. Joon gacwo'²‑tsii nigajmá³aa 'elo.
\s Mo gajíi²in Poo² Tʉ́³ fu Antioquía
\p
\v 11 Pe mo gacwéi¹ Tʉ́³ fu lɨ taan²¹²na fuu²¹ Antioquía gajíi²na 'ii tyaníi¹i tsʉ nigajmaa¹a 'e jo tɨ́ɨi² jmaa¹a.
\v 12 Tsʉ la nifu mo gatyíi¹a Antioquía do gagøø'²¹o caain²¹ coon'¹³ 'in tsá² jo seein²¹ Israel do. La joon gajmaa¹a ca mo gatyalíin² 'inlɨ́ɨi¹³ tsá² gasii¹in Jacobo. Mo ngayuui'¹³ joon ga'láa² Tʉ́³ 'wii²¹² jmaa¹ coon'²¹ 'ña'a, jo gøø'²¹gɨ caain²¹ coon'¹³ 'in tsá² jo seein²¹ Israel do tsʉ 'goo'²¹o Tʉ́³ nei'² liñi¹ 'in tsá² coon²¹ poo²¹² 'in jin'²in 'e 'ná¹ 'ii'²¹ tsá² 'e li² circuncisión do joon jmáa¹a jilaa'²¹ tɨɨsi'² tya' tsá² Israel. 
\v 13 Joon 'in tsá² Israel catyaai² 'in jai'² lɨ́ɨi² Cristo néei¹ do galɨ́² tún² 'ɨ¹‑tsi coon'¹³ Tʉ́³ do joon cagɨ Bernabé gasɨ́ɨ²i røø²¹ coon'¹³ 'ido coon'¹³ 'e gó² jmoo¹o.
\v 14 Pe mo gamó³oo xiiala jo nijmoo¹o røø²¹ coon'¹³ 'e jai'² tya' 'e júu³ tya' 'e tiin'¹³ tsá² gafuu²¹²uu Tʉ́³ tyani jileei'²¹ tsá² do: “'Nʉ‑ʉ, 'in lɨ́ɨi¹ tsá² Israel, joon nigajmaa²'a la jmoo¹o 'in tsá² jo seein²¹ Israel, jon'on la jmoo¹o 'in tsá² Israel; ¿xiia lɨ'ɨ 'iin²¹²u'un tyʉ'²'ʉ to² tsá² jo seein²¹ Israel wa'a jmáa¹a la jmoo¹o tsá² Israel?”
\s Nijmaa¹a Dios tiin'¹³ tsá² Israel tsʉ 'wii'¹³ jo'¹o lɨ́ɨi²
\p
\v 15 Jna'a lɨ́ɨ¹na'a tsá² Israel coon'¹³ 'e seen²¹na'a, jo lɨ́ɨ¹na'a tsá² 'noo¹o tsaa² lagɨ 'in tsá² catyaai². 
\v 16 Xʉfiin'¹³ joon né²oo'o 'e jo mo gajmeei¹ Dios tsá² tyúi¹ tyaníi¹i jiin'¹³ jaain²¹ tsʉ 'wii'¹³ nigajmaa¹a 'ido jiin'¹³ la to² tyʉ'² ley tya' Moisés. Gajmeei¹ Dios tsá² tyúi¹ tsʉ 'wii'¹³ ja'²mo galɨ́ɨi¹ Jesucristo. Tsʉ 'wii'¹³ joon jo'¹o galɨ́ɨi² jna'a Jesucristo 'e coon'¹³ la joon lí² jmeei¹ Dios tyú¹na'a tsʉ 'wii'¹³ 'e jai'² lɨ́ɨ²na'a jon' wa' tsʉ 'wii'¹³ nigajmoo²¹o'o la to² tyʉ'² ley. Tsʉ jo untyúi¹ Dios jiin' jaain²¹ tsá² tsʉ 'wii'¹³ 'e nigajmaa¹a la to² tyʉ'² ley. 
\p
\v 17 Joon jna'a, wa'a 'iin²¹²na'a 'e untyúi¹ Dios jna'a 'wii'¹³ cwáain¹ tya' Cristo galɨ́² 'e lɨ́ɨ¹na'a tsá² 'in røøi²¹ tsaa². Wana la joon, ¿tɨ lí² 'øøi'²¹‑tsi tsá² 'e Cristo nigajmaa¹a wa'a 'ná² jna'a tsaa²? ¡Esa la joon tsʉ jo lí² jmá¹ Cristo wa'a 'ná² jna'a tsaa²! 
\v 18 Tsʉ wana gajma'³aa tún¹ 'e ni'íin¹na do pe jna‑a nigarøø²¹na tsaa².
\v 19 Tsʉ najúun²moo cwáain¹ tya' ley do, joon 'e ley do nigajngaa'¹³mo jna. Najúun²moo cwáain¹ tya' ley do yʉ to² 'e liseen²¹na tya' Dios.
\v 20 Jna ni'lɨɨ²¹²moo tsʉ najúun²moo caan²¹mo coon'¹³ Cristo tsaa'¹ crúu¹³. Tsʉ 'wii'¹³ joon jon' jna 'in seein²¹ nano pe Cristo seein²¹ coon'¹³ jna. Joon xʉfiin'¹³ 'e seen²¹mogɨɨ, seen²¹moo tsʉ 'wii'¹³ 'e jai'² lɨ́ɨ²na 'in Jóon¹ Dios, 'in nigali'iin²¹²in jna joon gajan'²mo 'ña'a 'e júun²in 'wii²¹² tyiia.
\v 21 Joon jo jmáa³aa 'e jo 'ee to² tí² 'e feei'¹‑tsi Dios tyiia tsʉ wana gajmeei¹ Dios xʉfiin'¹³ jaain²¹ tsá² 'e tyúi¹ tsʉ 'wii'¹³ nigajmaa¹a la to² tyʉ'² ley jo 'ee to² 'íi³ 'e nigajuuin² Cristo wa' la joon.
\c 3
\s ¿Noo 'e gajmaa¹a tiin'¹³ 'naa', 'e ley do sɨ 'e júu³ jai'² 'e galɨ́ɨ²naa' 'ee?
\p
\v 1 ¡Lɨɨlɨ¹ bái¹ 'naa', tsaru'¹u' néei¹ Galacia! ¿'Iin nigacoon'²¹ 'naa' tóo² 'e jo jmaa²gɨɨ' nʉ́ʉ¹³ʉʉn' 'e júu³ jai'² do? Tsʉ coon'¹³ 'e júu³ nigacwoo²¹o'o tyi'naa' gasíi¹³i'i 'naa' coon²¹ júu³ coon²¹ tsáa¹ xiaala gajuin¹ Jesucristo tsaa'¹ crúu¹³.
\v 2 Síi¹³duu' jna 'e 'iin²¹²na foo²oo': ¿Tɨ ga'ii'¹³'naa' 'in Espíritu Tyʉ́² tya' Dios tsʉ 'wii'¹³ gajmaa²aa' jiin'¹³ la to² tyʉ'² ley tya' Moisés sɨ 'wii'¹³ gajai'² galɨ́ɨ²naa' 'e júu³ ganʉʉ²ʉʉn' 'ee?
\v 3 ¿Tɨ caa²¹²naa' 'e lí² líin²naa' wa lí² tyée¹naa' coon'¹³ waa'²¹ pí³ tyii' yaanaa' 'e niga'láa² 'wii²¹² jmoo²oo' coon'¹³ 'ii'²¹ tya' Espíritu tya' Dios?
\v 4 ¿Tɨ jo 'e nigali'íin³ to² jilaa'²¹ wúu¹ 'e nigañí²ii'? ¡Jo cwo'¹o Dios wa la joon!
\v 5 Joon mo gacwei'² Dios 'in Espíritu Tyʉ́² tya'a tyi'naa' joon gajmaa¹a milagros jee²¹² 'naa', ¿xiia lɨ'ɨ gajmaa¹a la joon, tsʉ 'wii'¹³ nigajmaa²aa' la to tyʉ'² ley sɨ tsʉ 'wii'¹³ jai'² galɨ́ɨ²naa' 'e júu³ niganʉʉ²ʉʉn' do 'ee?
\p
\v 6 Joon ja'²mo galɨ́ɨ²i Abraham Dios joon tsʉ 'wii'¹³ joon ga'ii'²¹mo Dios 'ii 'e tyú¹‑i.
\v 7 Joon tsʉ 'wii'¹³ joon cwoliñí² 'naa', 'in jo'² lɨ́ɨ²i Dios la jo'² lɨ́ɨ²i Abraham do, 'i‑i lɨ́ɨ¹i la jai'² jún³ tya' Abraham.
\v 8 Joon Dios, ñii¹o jéei¹gɨ, iuntyú¹i tsá² 'in jo seein²¹ Israel coon'¹³ 'e jai'² lɨ́ɨi² Cristo. Joon Dios gajma'¹a Abraham júu³ 'e júu³ tyʉ́² lo, jin'²in: “Iuncwaa'³na jileei'²¹ tsá² taain²¹² juncwii²¹ 'wii'¹³ cwáain¹ tyi'i.”
\v 9 La joon iuncwaai'³ Dios 'in jai'² lɨ́ɨi² 'ii caan²¹mo coon'¹³ Abraham, 'in nigajai'² lɨ́ɨi².
\p
\v 10 Joon jileei'²¹ 'in tsáai¹‑tsi wa ilí² jmáa¹a ley tya' Moisés ijmá¹ Dios 'ii'²¹ 'ii²¹ tya'a tsʉ ni jí² tya' Dios jin'²in: “Jileei'²¹ 'in jo untsiin¹ jilaa'²¹ 'e toon¹on ni jí² tya' ley ijmá¹ Dios 'ii'²¹ 'ii²¹ tya' 'i.”
\v 11 Joon tyʉ́² nee²¹e' 'e jo untyú¹i Dios jiin'¹³ jaain²¹ tsʉ 'wii'¹³ nigajmaa¹a jiin'¹³ la to² tyʉ'² ley do; tsʉ ni jí² tya' Dios jin'²in: “'In nigauntyú¹i Dios 'ná² ngɨ́¹ 'e jai'² lɨ́ɨi² Dios.”
\v 12 Joon 'e gajmaa¹a tsá² 'e ley tya' Moisés do jo coon²¹ røø²¹ 'e jai'² lɨ́ɨi² Dios tsʉ jin'² ni jí² do: “'In jmoo¹o la to² tyʉ'² ley do, coon'¹³ joon iseein²¹.” 
\p
\v 13 Joon Cristo nigaláa²mo jna' 'e jmá¹ Dios 'ii'²¹ 'ii²¹ tyi' 'wii'¹³ cwáain¹ tya' ley do tsʉ Dios gajmaa¹a 'ii'²¹ 'ii²¹ tya' Cristo 'wii'¹³ jna', tsʉ ni jí² tya' Dios jin'²: “Ijmá¹ Dios 'ii'²¹ 'ii²¹ tya' jileei'²¹ tsá² 'in táain² tsaa'¹ crúu¹³.”
\v 14 La lo galɨ́² 'e lí² uncwaai'³ Dios tsá² jo seein²¹ Israel 'wii'¹³ cwáain¹ tya' Cristo Jesús jiin'¹³ la júu³ ga'ɨɨ¹ɨ tya' Abraham. La joon lí² 'ii'¹³na' coon'¹³ 'e jai'² lɨ́ɨ²na' 'in Espíritu tya' Dios 'in nigajin'² Dios incwoi'² jna'.
\s 'E ley do coon'¹³ 'e júu³ ga'ɨɨ¹ɨ Dios tya' Abraham 
\p
\v 15 Tsaru'¹u', fuu²¹²uu 'naa' coon²¹ cwáain¹ la jmoo¹o tsá²: Mo sɨ́ɨ¹i tsá² coon²¹ júu³ tyiin² sɨ 'ɨɨ¹ɨ tsá² coon²¹ júu³ tyiin² 'ee joon tsaa'²¹ tsá² unnicwoo²¹o joon jiin'¹³ jaain²¹ jo lí² wa jo la jai'² jon'gɨ lí² wa'a tsa'láai²gɨ.
\v 16 Joon ga'ɨɨ¹ɨ Dios 'e júu³ do tya' Abraham coon'¹³ jún² tya'a. Joon 'e júu³ tya' Dios do jo gajin'²in: “jileei'²¹ jún² tyi'i”, wa' 'øøi'²¹‑tsi tsá² 'in fúui¹. Pe gajin'²in: “jún² tyi'i”; 'e coon'¹³ la joon 'øøi'²¹‑tsi tsá² jaan²¹mo, joon 'in jaain²¹ do lɨ́ɨ¹i Cristo.
\v 17 'E fuu²¹²uu 'naa' lo: Gacwoo¹o Dios 'e ley tya' Moisés tyʉ́n² cíein¹³ jiin²¹ tsi dyadya¹ jiin²¹ mo gangɨɨi¹ ga'ɨɨ¹ɨ 'e júu³ tyíin² do tya' Abraham. Joon 'e ley do jo lilí² wa'a jo tseein²¹gɨ 'e júu³ tyiin²¹ ga'ɨɨ¹ɨ Dios tya' Abraham ca la mo jéei¹gɨ.
\v 18 Joon wa mo'o gauntyúi¹ Dios tsá² 'wii'¹³ cwáain¹ tya' ley tya' Moisés, jo mo gauntyúi¹ Dios 'in tsá² do 'wii'¹³ cwáain¹ tya' 'e júu³ ga'ɨɨ¹ɨ tya' Abraham do. Pe gacwo'¹o Dios Abraham 'e júu³ tyiin² do 'e 'yaai¹‑tsio tsʉ ja'²mo galɨ́ɨi² Abraham 'ii.
\p
\v 19 Wa'a la joon, ¿'ee to² 'íi³ 'e ley tya' Moisés do? 'E ley do gajó² mo lɨ cɨɨin²¹gɨ 'e júu³ tyiin² do i'e'²e tsá² xiaala lɨ́² tsaa². Joon gataa'²¹a 'e ley do ca gajó² 'in “jún²” do 'in gacwo'¹o Dios 'e júu³ tyiin² do. Joon 'in ángeles gacwo'¹o Moisés 'e ley do, joon Moisés do galɨ́ɨ¹i 'in ngɨɨi¹ júu³ tya' Dios.
\v 20 Joon wana 'ɨɨ¹ɨ tsá² júu³ tyiin² jiin'¹³ la 'ɨ¹‑tsi 'ña'a jo 'néi² 'in ngɨɨi¹ júu³ tya'a. Joon 'in Dios lɨ́ɨ¹i jaan²¹mo.
\s 'Yʉ² to² tya' ley
\p
\v 21 ¿Tɨ lí² jin'² tsá² 'e ley tya' Moisés 'e faa'²¹a lɨ cɨɨ'¹³ lagɨ faa'²¹a 'e júu³ tyiin² ga'ɨɨ¹ɨ Dios? ¡Esa lí² la joon! Tsʉ wa mo'o galisá² coon²¹ ley 'e lí² jmée¹i tsá² tyúi¹ coon'¹³ Dios joon i'ii'²¹ Dios tsá² coon'¹³ 'e gajmaa¹a 'e to² tyʉ'² ley lo.
\v 22 Pe jiin'¹³ la gajin'² jí² tya' Dios 'e jilee'²¹mo lɨ́ɨi¹ tsá² 'in jmoo¹o jiin'¹³ la to² tyʉ'² tsaa². 'E coon'¹³ la joon lí²‑i 'ii'²¹ jileei'²¹ 'in jai'² lɨ́ɨ²i Jescuristo 'e júu³ tyiin² do 'e ga'ɨɨ¹ɨ Dios. 
\p
\v 23 Joon la nʉ'gɨ incwéi¹ Cristo ilí² 'e jai'² líin²na' 'ii, la wa'a sɨjnɨ́ɨ'¹³mo' coon'¹³ 'e ley lo. La wa'a nisɨjnɨ́ɨ'¹³mo jna' 'yiia'¹³ joon ca mo gacwéi¹ Cristo. 
\v 24 Joon 'e ley do la wa'a niga'aa¹mo jna' ca mo gacwéi¹ Cristo joon ngajée¹³mo jna' tyani Cristo do 'e coon'¹³ la joon lí²‑i untyúu¹mo Dios jna' coon'¹³ 'e jai'² lɨ́ɨ²na'. 
\v 25 Pe nano nicwé¹mo Cristo 'e lí² jai'² líin²na' 'ii joon la joon jo 'ná²gɨ' 'e ley no 'e 'ái¹gɨ jna'. 
\p
\v 26 Tsʉ coon'¹³ 'e jai'² lɨ́ɨ²naa' Cristo Jesús líin²naa' jóon¹ Dios.
\v 27 Joon jileei'²¹ 'naa' 'in gasaai²¹ jmɨɨ²¹ ilicaan²¹naa' coon'¹³ Cristo nigalíin²naa' 'e lɨ́ɨ¹naa' la lɨ́ɨi¹ Cristo.
\v 28 Joon tyani Dios jo lɨ́ɨ¹gɨɨ' tsá² Israel jon'gɨ lɨ́ɨi¹gɨɨ' tsá² jo seein²¹ Israel; jo lɨ́ɨ²gɨɨ' tsá² 'in jmoo¹o to² tyʉ'² tsá² sɨ tsá² 'in jmoo¹o to² la 'iin²¹²in yaai 'ee; jo lɨ́ɨi¹gɨɨ' tsañʉʉ'¹ sɨ tsamɨ́² 'ee, tsʉ jaan²¹mo lɨ́ɨ¹naa' 'in nigauncaain²¹ coon'¹³ Cristo Jesús.
\v 29 Joon wana lɨ́ɨ¹naa' tsá² tya' Cristo lɨ́ɨ¹moo' jon jún² tya' 'lɨɨ²¹² tsafeei'¹ Abraham. Joon i'ii'¹³naa' lawa coon²¹ 'e tɨ́ɨ²moo' 'e júu³ tyiin² do 'e ga'ɨɨ¹ɨ Dios tya' Abraham.
\c 4
\p
\v 1 'E 'øøi'²¹‑tsi 'e fo'³oo lo: la jee²¹² sɨján² jaain²¹ jóon¹ tsá² i'ii'²¹ tya' 'e itɨ́ɨ²i coon²¹ røø²¹ lɨ́ɨ¹i la lɨ́ɨi¹ tsá² 'in jmoo¹o to² tyʉ' tsá², xʉfiin'¹³ 'ii‑o lɨ́ɨ¹i fii²¹² jilaa'²¹ 'e sá².
\v 2 Tsʉ seen²¹mo tsá² 'in 'aai¹ 'ii joon tyʉ'²ʉ to² 'ii ca tsín¹ jiin²¹ jiin'¹³ la gajin'² jmii²¹.
\v 3 La joon jon lɨ́² coon'¹³ jna', lawa'a 'e xuu²¹²mo', joon 'e ley do tyʉ'² to² jna' joon ga'ɨ¹‑tsi' jiin'¹³ 'e sá² juncwii²¹ lo.
\v 4 Pe mo gatsín¹ jiin²¹ jiin'¹³ la ga'ɨ¹‑tsi Dios 'ña'a, gasiin¹in Dios Jóon¹on 'in gangatyéin¹ jaain²¹ tsamɨ́². Joon galɨ́ɨ¹i jaain²¹ tsá² Israel 'in 'ná² jmá¹ la to² tyʉ'² ley.
\v 5 Gajó² la joon, joon coon'¹³ la joon ilí² láai² jna' coon'¹³ 'e ley 'e tyʉ'² to² jna' do. 'E coon'¹³ la joon lí² 'ii'²¹mo Dios jna' lawa jóon¹o.
\p
\v 6 Joon, tsʉ 'wii'¹³ lɨ́ɨ¹naa' jóon¹ Dios, gasii¹in Dios Espíritu tya' Jóon¹on Jesús 'e tsa'i² alma tyi'naa'. Joon 'in Espíritu 'yuui² alma tyii' 'oo¹o, tø'¹ø Dios Jmii²¹ jin'²in: “¡Ñʉ'²!”
\v 7 Joon tsʉ 'wii'¹³ joon jo lɨ́ɨi¹gɨɨ' la lɨ́ɨi¹ tsá² 'in jmoo¹o la to² tyʉ'² tsá², pe lɨ́ɨ¹naa' jóon¹ Dios. Joon wa' lɨ́ɨ¹naa' jóon¹ Dios 'wii'¹³ cwáain¹ tya' Cristo i'ii'¹³ naa' la tɨ́ɨ²i 'ii'²¹ jóon¹ Dios.
\s Cu'²‑tsi Poo² coon'¹³ 'in jai'² lɨ́ɨ²i 'in néei¹ Galacia 
\p
\v 8 Joon la mo jéei¹, mo jo mo galicwii¹naa' Dios Jmii²¹, lɨ́ɨ¹naa' tsá² 'in jmoo¹o la to² tyʉ'² dioses 'in gajmeei¹ tsá², 'in jo lɨ́ɨi¹ dios la jai'².
\v 9 Pe la no nigalicwii¹moo' Dios Jmii²¹ owa'a 'e tyʉ́²gɨ fo'²oo 'ee, nigalicwii¹mo Dios 'naa'. Wa'a la joon, ¿'ee lɨ'ɨ cɨɨi'¹³ yaanaa' jmoo²oo' tún¹ 'e jo 'oo¹o pí³ wa'a jmá¹a tiin'¹³ 'naa' joon jo 'ee to² 'íi? Lɨ́ɨ¹naa' la lɨ́ɨi¹ tsá² 'in 'iin²¹²in jmá¹ la to² tyʉ'² 'e jooin¹‑tsi tsá² yaai.
\v 10 Jmoo²oo' jmɨɨ²¹² 'áai¹, mo tɨ́² jmɨɨ²¹² tya' sɨɨ'²¹, sɨ jmɨɨ²¹² tya' jiin²¹ 'ee, sɨ doñi'ee jmɨɨ²¹² 'ee 'e seen²¹naa' tyʉ́² coon'¹³ Dios.
\v 11 Cu'²‑tsii 'e to² tyiia 'e gajmáa³aa jee²¹² 'naa' jo 'e galilɨ́ɨi¹³ 'ee.
\p
\v 12 Tsaru'¹u', mɨ́³ɨɨ tyaní²ii' ilíin²naa' tún¹ la lɨ́ɨi¹ jna tsʉ nigalɨ́ɨ¹na la lɨ́ɨi¹ 'naa'. Jo mo gajmee'¹³naa' jna jiin'¹³xʉ la mo jéei¹ la joon jon nano.
\v 13 Tsʉ ñí² 'naa' 'e gacwo'³oo 'naa' 'e júu³ tyʉ́² tya' 'e tiin'¹³ tsá² mo 'wiin²¹² tsʉ 'wii'¹³ 'e tsaa'¹³oo. 
\v 14 Joon jo gali'ee'¹naa' jna tsʉ 'wii'¹³ 'e jmoowúu¹ 'e tyaan¹ lo. Pe ga'ii'¹³moo' jna lawa 'e lɨ́ɨ¹na jaain²¹ ángel tya' Dios sɨ lawa 'e lɨ́ɨ¹na 'ña'a 'ee Cristo Jesús.
\v 15 ¿'Ee galɨ́² coon'¹³ 'e tyʉ́² sáan²aan' coon'¹³ jna? Lí²‑i fo'³oo 'wii²¹² tyi'naa' wu xʉ'ʉ ilí² 'wóo¹³oo' mɨ'² unní²ii' yaanaa' cwoo²¹oo' jna.
\v 16 Pe nano, ¿tɨ nigali'ee'¹naa' jna tsʉ 'wii'¹³ nigafuu²¹²uu 'naa' 'e júu³ 'e la jai'²?
\p
\v 17 'In tsá² 'in 'e'² 'naa' no 'áai¹ untyúu¹i 'naa' pe 'e gó² 'ɨ¹‑tsi. Jiin'¹³ 'e tyaa¹‑'oo' wa' ituu²naa' jna'a. 'E coon'¹³ la joon ijmaa²aa' nʉ́ʉ¹³ʉʉn' to² tyʉ'² 'ii.
\v 18 Joon tyʉ́²‑ʉ wa'a untyúu¹i tsá² tsá² xeei'²¹ wa'a 'ɨ¹‑tsi tsá² jiin'¹³ 'e tyʉ́²‑ʉ, pe 'ná² jmáa¹a la joon coon²¹ tøø²mo, jon' wa'a jiin'¹³ mo ngɨ́ɨ³ɨɨ coon'¹³ 'naa'.
\v 19 Lawa xuui²¹² tyiia lɨ́ɨi¹ 'naa', joon 'wii'¹³ tyi'naa' 'e móo³oo wúu¹ la wúu¹ ni² tsamɨ́² mo tɨ lɨ́² liseein²¹ yʉʉn²¹ tya'a. Joon la joon imóo³oo wúu¹ ca galɨ́ɨ¹naa' tsá² 'in jmoo¹o jiin'¹³ la to² tyʉ'² Cristo.
\v 20 'Áa¹mo 'iin²¹²na wa' mo tyíin¹³na coon'¹³ 'naa' nano 'e lí² fuu²¹²uu 'naa' coon'¹³ júu³ xiia'gɨ tsʉ jo ñí³ii 'ee 'ɨ́‑tsii tyi'naa'.
\s Xiiala galɨ́ɨ¹ Agar coon'¹³ Sara
\p
\v 21 Sii'¹³du 'naa' jna jileei'²¹ 'naa' 'in 'iin²¹² 'naa' 'e tyʉ'² ley to² 'naa': ¿Tɨ jo mo ganʉ́ʉ¹³ʉʉn' la gajin'² ley do?
\v 22 Tsʉ 'e ley do jin'² 'e galiseein²¹ gái¹ yʉʉn²¹ tsañʉʉ'¹ tya' Abraham. Joon 'in yʉʉn²¹ nifu do galiseein²¹ tya' jaain²¹ tsamɨ́² 'in jmoo¹o to² inʉʉ tya'a. 'In tsamɨ́² lo lɨ́ɨi¹ esclava, 'e 'øøi'²¹‑tsi tsá² 'in jmoo¹o la to² tyʉ'² tsá² 'ii. Joon, 'in yʉʉn²¹ jaain²¹ dogɨ galiseein²¹ tya' tsamɨ́² tya'a 'in lí² jmá¹ jiin'¹³ la 'iin²¹²in.
\v 23 Joon 'in yʉʉn²¹ 'in galiseein²¹ tya' 'in tsamɨ́² lɨ́ɨi¹ esclava do galiseein²¹ la liseein jileei'²¹ yʉʉn²¹ catyaai². Pe mo galiseein²¹ Isaac, 'in yʉʉn²¹ tya' 'in tsamɨ́² 'in lí² jmá¹ jiin'¹³ la 'iin²¹²in, gauntsiin¹mo 'e júu³ tyiin² 'e ga'ɨɨ¹ɨ Dios tya'a. 
\v 24 'E cwáain¹ lo lɨ́¹ lawa coon²¹ cwáain¹ tya' tsá². La je tún² júu³ tyiin² ga'ɨɨ¹ɨ Dios lɨ́ɨi¹ 'in gái¹ tsamɨ́² no. 'In tsamɨ́² galisii²¹ Agar, 'in lɨ́ɨi¹ esclava do, lɨ́ɨi¹ la lɨ 'e júu³ tyiin² ga'ɨɨ¹ɨ Dios yʉ' moo'²¹ Sinaí. Joon jileei'²¹ 'in jóon¹on 'in tsamɨ́² lo 'in líin² esclavos jon.
\v 25 Agar do lɨ́ɨ¹i la lɨ 'e moo'²¹ sii²¹ Sinaí 'e si'² coon²¹ lɨ sii²¹ Arabia. La lɨ 'e moo'²¹ Sinaí la mo jéei¹ la joon lɨ Jerusalén nano tsʉ jileei'²¹ 'in tsagoo¹o 'e fuu²¹ do 'ná untsiin¹ jiin'¹³ la to² tyʉ'² ley 'e ga'ii'²¹i yʉ' moo'²¹ Sinaí.
\v 26 Pe 'e Jerusalén ná¹ fu ñʉ'fú² jo tyʉ'² to² ley do joon lɨ́ɨ¹na' tsagoo¹o 'e fuu²¹ joon.
\v 27 Tsʉ la jin'² jí² tya' Dios:
\q Tsamɨ́² jo 'in yʉʉn²¹ tsatyéein¹, cwounjløøi'³ 'wo'o. Unjløøi'³ 'wo'o 'in jo 'in xuui²¹² seein²¹ tya'a.
\q 'Nʉ 'in jo mo gangó¹ wúu¹ tya' tsamɨ́² mo lɨseein²¹ jóon¹on, 'óo²o 'e jløø'³u'u.
\q Tsʉ 'in tsamɨ́² 'in jo mo galiseein²¹ yʉʉn²¹ tya'a, 'ii‑i 'in tsafúui¹gɨ jóon¹on lagɨ 'in tsamɨ́² 'in seein²¹ ñʉʉ'¹ tya'.
\p
\v 28 Tsaru'¹u', jna' lɨ́ɨ¹na' la lɨ́ɨi¹ Isaac tsʉ lɨ́ɨ¹na' jóon¹on jiin'¹³ la júu³ tyiin² ga'ɨɨ¹ɨ Dios.
\v 29 'In xuui²¹² tya' Agar do galiseein²¹ la liseein²¹ jileei'²¹ xuui²¹² catyaai². Joon 'in xuui²¹² tya' Agar do ga'øø¹i 'in xuui²¹² jaain²¹ do 'in galiseein²¹ coon'¹³ 'ii'²¹ tya' Espíritu Tyʉ́². La joon jon lɨ́² la no. 'In tsá² 'in jmoo¹o jiin'¹³ la to² tyʉ'² ley i'ǿø¹mo jna' 'in jai'² lɨ́ɨi² Cristo.
\v 30 Pe ¿'ee jin'² júu³ tya' Dios? La joon jin'²: “'Wóoi caluu 'in tsamɨ́² 'in lɨ́ɨi¹ esclava coon'¹³ jóon¹on tsʉ 'in yʉʉn²¹ tya' 'in esclava do jo lí² 'ii'²¹i caain²¹ 'e gatɨ́ɨ²i coon'¹³ 'in yʉʉn²¹ tya' 'in tsamɨ́² 'in lí² tyʉ'² to² do.”
\v 31 La joon, tsaru'¹u', jo lɨ́ɨ¹na' xuui²¹² tya' 'in esclava do 'e tyʉ'² to² ley jna' pe lɨ́ɨ¹na' xuui²¹² tya' Sara 'in tsamɨ́² 'in lí² tyʉ'² to².
\c 5
\s Tá² téein¹‑'oo' tsʉ nigaláa²mo Cristo 'naa'
\p
\v 1 Tsʉ 'wii'¹³ joon tá² téein¹‑'oo' coon'¹³ 'e galáai² Cristo jna' joon jo cwéi¹gɨ yaanaa' wa' a líin²naa' tsá² tún¹ 'in jo lí² tyʉ'² to² yaai. Tsʉ 'e ley do lɨ́², lawa coon²¹ 'mó² tsityi² tya' tsá², 'e joon jo lí² cwó²o wa'a tyʉ'² tsá² to² yaai.
\p
\v 2 Nʉ́ʉ²duu', tsʉ jna, Poo², fuu²¹²uu 'naa', jo 'ee to² 'íi³ Cristo tyii' wa' 'ii'¹³naa' 'e li² circuncisión. 
\v 3 Tsʉ fuu²¹²uu 'naa' tún¹ 'e doñi'iin 'in 'iin²¹²in 'ii'²¹ 'e li² do 'ná² untsiin¹ jilaa'²¹ ley tya' Moisés. 
\v 4 Joon jileei'²¹ 'naa' 'in 'iin²¹²in wa'a untyúi¹ Dios 'naa' tsʉ 'wii'¹³ nigajmaa²aa' jiin'¹³ la to² tyʉ'² ley do nigatíu¹moo' Cristo, joon nigajmaa²oo' coon'²¹ wa'a 'e lí² feei'¹gɨ‑tsi Dios tyii'.
\v 5 Pe jna'gɨɨ'ɨ coon'¹³ 'ii'²¹ tya' Espíritu sɨjaan²¹a'an wa'a untyúi¹ Dios jna'a tsʉ 'wii'¹³ jai'² lɨ́ɨ²na'a Cristo.
\v 6 Tsʉ wana sɨcaan²¹na' coon'¹³ Cristo Jesús jo 'ee to² 'íi³ wa lɨ́ɨ¹na' 'e li² circuncisión do sɨ jo lɨ́ɨ¹na' 'ee. 'E 'íi³ to² tyi' 'e li'iin²¹²na' la jaain²¹ la jaan²¹na' tsʉ 'wii'¹³ ja'²mo galɨ́ɨ²na' Dios.
\p
\v 7 'Naa', cwolíin²naa' røø²¹ la mo jéei¹. Pe nano, ¿'iin gajmaa¹a gajnii'²¹ 'naa' wa jo jmaa²gɨɨ' nʉ́ʉ¹³ʉʉn' 'e júu³ la jai'² lo?
\v 8 Jon'on Dios gajmaa¹a 'e joon, lɨ' 'ii‑o catø'²ø 'naa'. 
\v 9 La 'øøi'²¹‑'oo' no, coon'¹³ ca pi'³ tyiian'³ do ilí² iróon² jilaa'²¹ con² do; la joon jon jaain²¹ tsá² lí² uncaain²¹ tsá² fúui¹ wa'a núu²uun júu³ tya'a.
\v 10 Joon jo cu'²‑tsii coon'¹³ Ña'ñʉ'¹ʉ' 'wii'¹³ 'naa' 'e jo unsɨɨ²¹naa' 'e 'ɨ¹‑'oo' jilaa'²¹ 'e niga'e'²ee 'naa'. Pe i'e'² Dios wúu¹ 'in untyíin² 'naa', jo 'ee cwáain¹ tya'gɨ doñi'iin.
\p
\v 11 Joon 'inlɨ́ɨi¹³ cwo'¹o jna tsaa² 'e 'ee'¹ jna tsá² 'e 'ná² 'ii'²¹ tsá² 'e li² circuncisión do. Pe jo i'øøi'¹gɨ tsá² Israel jna wa mo'o 'ee²¹ee 'e 'ná¹ 'ii'²¹ tsá² li² circuncisión. Pe 'øøi'¹gɨ 'ido jna tsʉ 'wii'¹³ fuu²¹²uu 'ido 'e gajuuin²¹ Jesús tsaa'² crúu¹³ 'wii'i tya' tsaa² tya'a. Joon 'wii'¹³ joon 'ee'¹mo 'ido jna. 
\v 12 Pe tya' 'in tsá² 'in ngɨ́¹ to² untyíin² 'naa' tsáai¹gɨ‑tsii wa' 'wó¹mo yaa‑i jee²¹² 'naa' coonti.
\p
\v 13 Tsaru'¹u', gatø'² Dios 'naa' 'e seen²¹naa' sɨláa²naa' 'e tyʉ́²ʉʉ' to² yaanaa'. Seen²¹naa' sɨláa²naa' pe jo cwéi¹ yaanaa' wa'a jmaa²aa' 'e gó² 'e 'yaai¹‑tsi ngú¹ taan²¹²naa'. Pe cwéi¹ yaanaa' wa'a uncóon¹³on' la jaain²¹ la jaan²¹naa' tsʉ 'wii'¹³ 'iin²¹²naa' yaanaa'. 
\v 14 Tsʉ wana jmoo²oo' jiin'¹³ la jin'² 'e júu³ lo: “Cwoli'iin²¹²moo' tsaruu'²¹naa' jiin'¹³ la 'iin²¹²naa' yaanaa'”, iuntsiin¹naa' jilaa'²¹ ley catyiia².
\v 15 Pe wana 'eei'¹ 'naa' joongɨ mɨɨ'¹³ 'naa' la jaain²¹ la jaan²¹naa', ¿xiiala iliseen²¹naa' tyʉ́² la 'oo'²¹ yaanaa' 'e la joon?
\s Xiiala lɨ́ɨ¹i tsá² 'in jmoo¹o jiin'¹³ la 'yaai¹‑tsi ngú¹ taain²¹²
\p
\v 16 Pe fuu²¹²uu 'naa': Ngɨ́²ɨɨ' to² jmoo²oo' la to² tyʉ'² Espíritu tya' Dios joon coon'¹³ la joon jo jmaa²aa' 'e gó² jiin'¹³ la 'yaai¹‑tsi ngú¹ taan²¹²naa'.
\v 17 Tsʉ 'e ngú¹ taan²¹²naa' no jo 'iin²¹²in jmá¹ 'e 'yaai¹‑tsi Espíritu tya' Dios. La joon jon 'in Espíritu do jo 'iin²¹²in jmá¹ 'e 'yaai¹‑tsi 'e ngú¹ taan²¹²naa'. 'Aa'¹a ngú¹ taan²¹²naa' 'in Espíritu do, la joon jon Espíritu 'aa'¹o ngú¹ taan²¹²naa'. Joon tsʉ 'wii'¹³ joon jo cwói¹ jmaa²aa' jiin'¹³ la 'iin²¹²naa'.
\v 18 Tsʉ wana cwéi¹ 'naa' yaanaa' 'e tyʉ'² Espíritu to² 'naa' jo tyʉ'²gɨ ley to² 'naa'.
\p
\v 19 Joon jo wúui¹ liñí² tsá² 'e 'iin²¹²in ngú¹ taan²¹²naa' jmá¹, 'iin²¹²in fee'²i tsamɨ́² tya' tsá² xeei'²¹, 'iin²¹²in jmá¹ jilaa'²¹ 'e 'leei'²¹ tsá², joon 'iin²¹²in jmá¹ jilaa'²¹ 'e 'yaai¹‑tsi 'ña'a.
\v 20 Joon 'e ngú¹ taan²¹²naa' 'iin²¹²in un'goo¹o jileei'²¹ dioses tya'a 'in gajmee¹i yaai joon tɨ́²‑tsi jmáa¹a júu³ loo¹, 'eei'¹ ruu'²¹i, 'noo¹o mɨɨ'¹³ joon 'iin²¹²in 'e sá² tya' tsá² xeei'²¹. Joon jo wúui¹ tɨ́² 'nii'²¹‑tsi, joon jilaa'²¹ 'e jmoo¹o jiin'¹³ tya' 'e yaai. Joon 'iin²¹²in jmáa¹a poo²¹² la 'ii'¹³ tsá², sɨ jmáa¹a coon²¹ poo²¹² tya' 'ña'a 'ee.
\v 21 Joongɨ 'oo¹o tsii²¹² wúu¹, joongɨ jngaai'¹³ tsá², joongɨ ngɨɨ¹ɨ to² 'íin¹ joongɨ to'²o mɨɨ'¹³ mo 'íin¹in joongɨ jmoo¹o jilaa'²¹ 'e catyiia² 'e lɨ la lo. Joon fuu²¹²uu 'naa' tún¹ la nafo'¹oo la mo jéei¹ do, 'in jmoo¹o la lo jo lí² wa' tsatáai¹ lɨ tyʉ'² Dios to² tsá².
\s Xiaala lɨ́ɨ¹i tsá² 'in jmoo¹o jiin'¹³ la 'iin²¹²in Espíritu
\p
\v 22 Pe 'in Espíritu do jmoo¹o wa'a li'iin²¹²mo tsaruu'²¹i joongɨ jmoo¹o wa'a jmá¹ tsá² jløø'³i, joongɨ 'e seein²¹ tyʉ́² coon'¹³ Dios la joon jon la 'oo'²¹ yaai. Coon'¹³ 'ii'²¹ tya' Espíritu Tyʉ́² do lí² líin² tsá² tsá² feei'¹‑tsi, joongɨ tsá² 'wó²‑tsi, joongɨ tsá² 'in uncoon'¹³ tsá² xeei'²¹, joongɨ tsá² 'in untiin'¹³ júu³ tya'a.
\v 23 'In Espíritu do uncoon'¹³ tsá² 'e seein²¹ tyʉ́²‑tsi joon 'e lí² tyʉ'² to² yaai. Joon jiin'¹³ coon²¹ ley jo sá² wa'a jmaa¹a 'ii'²¹ tya' 'in tsá² 'in jmoo¹o jilaa'²¹ 'elo.
\p
\v 24 Joon jileei'²¹ 'in lɨ́ɨi¹ tsá² tya' Cristo Jesús lawa nigatáan¹in tsaa'¹ crúu¹³ jilaa'²¹ 'e gó² 'iin²¹²in ngú¹ taan²¹²in.
\v 25 Joon wa' seen²¹na' coon'¹³ 'ii'²¹ tya' Espíritu Tyʉ́² do, cwongɨ́²ɨ' jon coon'¹³ 'ii'²¹ tya' Espíritu do. 
\p
\v 26 Joon coon'¹³ la joon jo lí² jmée¹na' jloo'³ yiia' tsʉ wana jmoo²¹o' jloo'³ untyíi²na' la jaain²¹ la jaain²¹ tsá² joongɨ 'oo²¹²o' tsii²¹² wúu¹.
\c 6
\s Uncóon¹³oon' la jaain²¹ la jaain²¹
\p
\v 1 Tsaru'¹u', wana gajiin²¹naa' jaain²¹ tsá² 'in nigatøi'² tsaa² tya'a, 'naa', 'in ngɨ¹gɨ coon'¹³ 'ii'²¹ tya' Espíritu, 'ná² uncóon¹³oon' 'ido 'e jiin'¹³in coon'¹³ Cristo. Joon 'ná² jmaa²aa' 'e 'wó²‑'oo' coon'¹³on. Coon'²¹ tún² 'ná² jmaa²aa' tsʉ coon²¹ jo¹ ngái¹ la no wa 'naa'gɨɨ' gaxuu'²¹ 'naa' tsaa² tyii'.
\v 2 Uncóon¹³oon' la jaain²¹ la jaain²¹ tsá² 'in 'oo¹o fa'í³ joon coon'¹³ la joon lí² untsiin¹naa' 'e ley tya' Cristo.
\p
\v 3 Tsʉ coon'²¹ tsá² tóo² yaai wa'a lɨɨi² tsá² 'e tsá² 'in tyiin² 'ii, pe jon'gɨ 'in tyiin² 'ii.
\v 4 'Ná¹‑a tyá²a tsá² cwáain¹ tya'a la jaain²¹ la jaain²¹ xiiala to² nigajmaa¹a wa'a cwo'ɨ́ɨ¹i 'e tyúu¹i cwáain¹ tya' 'ña'o, jon' wa' cwáain¹ tya' tsá² xeei'²¹.
\v 5 'E juncwii²¹ tya' tsá² lɨ la lɨ láa¹a joon la jaain²¹ la jaain²¹ tsá² 'ná¹ cón² láa¹a 'ña'a.
\p
\v 6 Joon jileei'²¹ 'in núu²un 'e júu¹ tyʉ́² tya' Dios 'e 'e'²e tsa tɨ́ɨ²i uncoon'¹³ 'in tsá² do 'in 'e'² 'ii coon'¹³ 'e tyʉ́² tya'a.
\p
\v 7 Jo cóon¹³oon' tóo² yaanaa': 'e lɨ́ɨ²naa' 'e lí² unsɨ́ɨi² tsá² 'e to² nigatyʉ'² Dios. Tsʉ 'e jún² 'e jñi¹ tsá² la joon jon cón² tsá² mi tɨ́² 'e garoo²¹. (Wa jñi¹ tsá² cwuu²¹ joon coon²¹ tsá² cwu¹ tya'a mo garoo²¹o.)
\v 8 La joon jon wa' jmoo¹o tsá² jilaa'²¹ 'e gó² 'iin²¹²in ngú¹ taan²¹²in, 'e gó² do jon ijmá¹ júuin² lɨ gatséi¹. Pe wana jmoo¹o tsá² jiin'¹³ la 'yaai¹‑tsi Espíritu tya' Dios, 'in Espíritu do ijmáa¹a 'e seen²¹mo 'in tsá² do coon²¹ tøø²mo.
\v 9 Jo cwo'woo²¹oo' 'e jmoo²oo' 'e tyʉ́²; tsʉ wana jmoo²¹o' taa'²¹gɨ' ca gatɨ́² 'ii'²¹ 'e garoo²¹ 'e sá² 'e 'lee²¹e'. 
\v 10 Tsʉ 'wii'¹³ joon cwojmoo²¹o' 'e tyʉ́² tya' jileei'²¹ tsá² mi lí². Cwojmóo²¹o' la joon 'e tyiin²gɨ nifu tya' tsaru'¹u' 'in jai'² lɨ́ɨ²i Cristo.
\s Júu³ lɨ tséi¹
\p
\v 11 Ñí²duu' xiaala coo'¹³ 'e júu³ lo 'e gatón³oon ni mo'jí² lo coon'¹³ cwóo³oo.
\v 12 'In tsá² do 'in 'iin²¹²in wa' 'ii'¹³naa' 'e li² circuncisión, 'iin²¹²in la joon jiin'¹³ wa' iliseen²¹in tyʉ́² coon'¹³ 'in tsá² Israel catyaai² do, 'e coon'¹³ la joon jo 'e iní²i wúu¹ 'wii'¹³ tya' 'e júu³ tyʉ́² do 'e gajuin¹ Cristo tsaa'¹ crúu¹³ 'wii'¹³ tyi'.
\v 13 Jon' wa' jiin'¹³ 'in tsá² lɨ́ɨi¹ li² circuncisión lí² jmáa¹a jilaa'²¹ la jin'² ley pe 'iin²¹²in 'e 'ii'¹³naa' 'e li² do 'e coon'¹³ la joon ijmá¹ jloo'³ 'e to² tyʉ'² 'ii‑o ga'ii'¹³naa' 'e li² do.
\v 14 Pe wa jna, cwáain¹ tyiia 'ñii'a, jo 'e sá² wa' jmá³aa jloo'³ 'ñii'a. Pe wa'a jmá³aa jloo'³, jloo'³ jmá³aa tsʉ 'wii'¹³ nigajuin¹ Ña'ñʉ'¹ʉ' Jesucristo tsaa'¹ crúu¹³ 'wii²¹² tyiia. Tsʉ 'wii'¹³ cwáain¹ tya' 'e crúu¹³ do 'e fu juncwii²¹ lo jo tyʉ'²gɨ to² jna, joon la wa' na'lɨɨ²¹²moo tya' 'e fu juncwii²¹ lo.
\v 15 Tsʉ wana sɨcaan²¹na' coon'¹³ Cristo Jesús jo 'ee to² 'íi³ tyi' wana 'ii'¹³na' 'e li² do sɨ jo mo 'ii'¹³na' 'ee. Jiin'¹³ 'e 'íi³ to² tyi' wa' 'e líin³na' 'in 'múu²mo'. 
\v 16 Joon cwoliseein²¹ tyʉ́² tyani Dios jileei'²¹ 'in lɨ́ɨi¹ la joon, joon cwolifee'¹mo‑tsi Dios tya'a, tsʉ líin² 'ido tsá² tya' Dios 'e la jai'².
\p
\v 17 Nano tiin'¹³ lɨ ngóo'¹gɨ do jo 'iin²¹²na wa'a untyíin² tsá² jna jiin'¹³ jáain¹. Tsʉ lí²‑i liñí² tsá² 'e lɨ́ɨ¹na tsá² tya' Ña'ñʉ'¹ʉ' Jesús coon'¹³ 'e li² lɨ sɨcwuu'²¹ tyiia lo.
\p
\v 18 Tsaru'¹u', cwoseen²¹moo' 'e feei'¹‑tsi Ña'ñʉ'¹ʉ' Jesucristo 'wii²¹² tyii' coon'¹³ jilaa'²¹ 'e 'ɨ¹‑'oo'. Amén.